ဟီးဟီး... ကြက်တစ်ကောင်ပါလား

ထိုမြင်ကွင်းကြောင့် ကြက်ပေါက်စတစ်၏ မျက်နှာအမူအယာ သုန်မှုန်သွားသည်။

ဤသည်ကို မြင်တွေ့ချိန်၌ ပိုင်ဝူရှားသည် ထိတ်လန့်တကြား ဖြစ်သွားပေ၏။

"ကြက်သခင်ကြီး... တစ်ခုခု ဖြစ်လို့လား..."

ကြက်ပေါက်စတစ်က သူ၏အတောင်ပံများကို ခတ်ပြီး ပြောဆိုသည်။

"ဘာမှမဖြစ်ပါဘူး...ငါ့မှာ ဖြေရှင်းစရာ ကိစ္စအသေးအမွှားလေးတစ်ခု ရှိနေလို့ပါ..."

"မင်းတို့အားလုံး ဝိုင်အရက်ကို နွှေးထားပြီးတော့ စားသောက်ပွဲကို ပြင်ဆင်ထားကြစမ်း... ကြက်သခင်ကြီး မကြာခင် ပြန်လာခဲ့မယ်..."

သူသည် စကားပြောဆိုရင်း အလင်းတန်းတစ်တန်းအဖြစ် ပြောင်းလဲသွားကာ အလျင်အမြန် ထွက်ခွာသွားလေ၏။

မျက်တောင်တစ်ခတ်စာ အချိန်အတွင်းမှာပင် သူသည် လူများအားလုံး၏အမြင်အာရုံအောက်မှ ပျောက်ကွယ်သွားခဲ့သည်။

ကြက်ပေါက်စတစ် ထွက်ခွာသွားပြီးနောက် ကျီးဝူချန်နှင့်ပိုင်ဝူရှားတို့သည် သူတို့၏ တာဝန်များကို ပေါ့ဆဝံ့ခြင်း မရှိကြချေ။

သူတို့သည် လက်အောက်ငယ်သားများကို ဝိုင်အရက်နွှေးထားရန်နှင့် စားသောက်ပွဲ ပြင်ဆင်ရန် အမိန့်ပေးလိုက်ကြပြီး ကြွင်းကျန်သော နတ်ဆိုးစစ်သူကြီးများကို ဂရုတစိုက် လုပ်ကျွေးပြုစုနေကြ၏။

ပင်မခန်းမကြီး အတွင်း၌...

နတ်ဆိုးစစ်သူကြီး ဆယ့်တစ်ဦးသည် အမျိုးသမီးတပည့်များနှင့် ရောနှောနေကြလေပြီ။

သူတို့သည် ပရောပရည်လုပ်လိုက် ရယ်မောလိုက်ဖြင့် အလွန်အမင်း ပျော်ရွှင်နေကြ၏။

ဂိုဏ်းချုပ်နှစ်ဦးမှာမူ ရှေ့သို့ထွက်လာကာ အနည်းငယ် နေရခက်နေခဲ့ကြသည်။

ထိုအချိန်မှာပင် တပည့်တစ်ဦး ရောက်ရှိလာပြီး သတင်းပို့သည်။

"ဂိုဏ်းချုပ်... ကျွန်တော်တို့ ဒါကို တွေ့ခဲ့ပါတယ်..."

ရာသီလေးပါးဂိုဏ်းနှင့် ဓားတစ်သောင်းဂိုဏ်းမှ တပည့်များသည် ပစ္စည်းတစ်ခုစီကို ရှေ့သို့ ယူဆောင်လာခဲ့ကြသည်။

ဤသည်မှာ ရှေးဟောင်း ကျောက်အိုးနှစ်လုံးပင်။

ထိုကျောက်အိုးများအတွင်း၌ ရွှေရောင်တောက်ပနေသော နတ်ဘုရားစွမ်းအင်ရည်များ တစ်ဝက်ခန့် ရှိနေသည်။

ထိုအရာအတွင်းမှ အံ့အားသင့်ဖွယ်ကောင်းသော စိတ်ဝိညာဉ်အရှိန်အဝါများ ထွက်ပေါ်နေပြီး ဤသည်မှာ ကြီးမားသော ပြန်လည်ကုစားနိုင်စွမ်းရှိသည့် အရာတစ်ခုဖြစ်ကြောင်း သိသာထင်ရှားလှ၏။

ကျီးဝူချန်နှင့်ပိုင်ဝူရှားတို့နှစ်ယောက်သား ထိတ်လန့်တုန်လှုပ်သွားကြသည်။

ထိုအရာကို ရှုရှိုက်လိုက်ရုံဖြင့် နှစ်ပေါင်းများစွာကြာအောင် ရပ်တန့်နေခဲ့သော သူတို့၏ကျင့်ကြံဆင့်များ တိုးတက်လာမည့် လက္ခဏာများကို သူတို့ ခံစားလိုက်ရသည်။

ဤအရာသည် မည်သည့်နည်းနှင့်မျှ သာမန်မဟုတ်နိုင်ချေ။

ဤမျှထိ တန်ဖိုးရှိသောအရာကို သူတို့၏သဘောဆန္ဒအလျောက် မသုံးစွဲရဲကြပေ။

"မင်းတို့ သိပ်တော်တယ်... ဒီရတနာကို နတ်ဆိုးစစ်သူကြီးတွေဆီ ဆက်သလို့ရတယ်..."

သူတို့နှစ်ဦးသည် ကျောက်အိုးများကို ယူလိုက်ပြီး ဤရတနာကို ရှာတွေ့ခဲ့သူများအတွက် ကြီးမားသော အကျိုးဆောင်မှုတစ်ခုအဖြစ် မှတ်တမ်းတင်ပေးလိုက်၏။

ထို့နောက် သူတို့သည် မြှောက်ပင့်ဖားယားသော မျက်နှာထားများဖြင့် ဘဲခုနစ်၏ အနီးသို့ ချဉ်းကပ်သွားကြသည်။

ကျီးဝူချန်က အရင်ဆုံး ပြောဆိုသည်။

"စစ်သူကြီးခုနစ်... ဒါက ဂိုဏ်းက တပည့်တွေ ရှာတွေ့ထားတဲ့ ရတနာတစ်ခုပါ... ဒါက အရမ်းထူးခြားတာကြောင့် စစ်သူကြီးတို့အားလုံးအတွက် သီးသန့်ဆက်သပါတယ်..."

သူတို့သည် ထိုအရာကို သူတို့ကိုယ်တိုင်အတွက် မသုံးစွဲချင်၍ မဟုတ်ချေ။

သူတို့ လက်ရှိပိုင်ဆိုင်ထားသမျှ အရာအားလုံးကို မည်သူက ပေးသနားခဲ့သည်အား သူတို့နှစ်ဦးလုံး အလွန်ရှင်းလင်းစွာ သိရှိထားကြ၏။

အကောင်းဆုံးအရာများအား နတ်ဆိုးစစ်သူကြီးများအပေါ် လေးစားမှုပြသရန်အတွက် အသုံးပြုရပေမည်။

ဘဲခုနစ်က ထိုအရာကို တစ်ချက် ကြည့်လိုက်သည်။

"မင်းတို့နှစ်ယောက်က တော်တော်လေး ကံကောင်းတာပဲ...ဒါက နဂါးသွေးအဆီအနှစ်ပဲ... ဒါကို စားသုံးတာက ပါရမီနဲ့ စွမ်းအားကို တိုးတက်စေနိုင်တယ်...ဒါက ငါတို့အတွက် အသုံးမဝင်ဘူး...မင်းတို့အတွက်ပဲ သိမ်းထားလိုက်ကြတော့..."

သူသည် စကားပြောဆိုရင်း အတောင်ပံကို ခတ်ကာ ထိုလူနှစ်ဦးကို အဝေးသို့ နှင်ထုတ်လိုက်ပြီး မိန်းမပျိုလေးများနှင့် ဆက်လက်၍ ဆော့ကစားနေလေ၏။

"စစ်သူကြီးခုနစ်ကို ကျေးဇူးတင်ပါတယ်..."

ပိုင်ဝူရှားနှင့်ကျီးဝူချန်တို့ အလွန်အမင်း ထိတ်လန့်တုန်လှုပ်သွားခဲ့သည်။

ဤအရာကို တန်ဖိုးမဖြတ်နိုင်သော ရတနာတစ်ခုဟု ယူဆနိုင်သည်။

သို့သော် ဘဲခုနစ်နှင့်တခြားသူများ၏ အမူအယာများကို ကြည့်ခြင်းဖြင့် သူတို့သည် ထိုအရာကို အထင်သေးနေပုံရပေ၏။

သူတို့နှစ်ယောက်သား အလွန်အမင်း ဝမ်းသာပီတိဖြစ်သွားကာ ထိုအရာကို လက်ခံပြီး နေရာမှာပင် တိုက်ရိုက်စားသုံးလိုက်ကြသည်။

"ဝုန်း..."

သူတို့သည် နဂါးသွေးအဆီအနှစ်ကို စားသုံးလိုက်သည်နှင့် သူတို့၏ခန္ဓာကိုယ်များ မီးလောင်ကျွမ်းနေသကဲ့သို့ ခံစားလိုက်ရပြီး သူတို့၏ သွေးများသည် ခန္ဓာကိုယ်အနှံ့အပြားသို့ ပြင်းထန်စွာ စီးဆင်းသွားပေ၏။

သူတို့၏ခန္ဓာကိုယ်တစ်ခုလုံးမှ အမျိုးမျိုးသော ကောင်းကင်ဘုံ နတ်ဘုရားအလင်းတန်းများ ထွက်ပေါ်လာတော့သည်။

တစ်ချိန်တည်းမှာပင် အချိန်ကြာမြင့်စွာ ရပ်တန့်နေခဲ့သော သူတို့၏ကျင့်ကြံဆင့်စွမ်းအားများသည်လည်း တဟုန်ထိုး မြင့်တက်လာပေ၏။

သူတို့၏ကျင့်ကြံဆင့်သည် ယန်သုံးပါးနယ်ပယ်သို့ ရောက်ရှိနေပြီဖြစ်ကာ ထောင်ပေါင်းများစွာသော နှစ်များအတွင်း သူတို့၏ကျင့်ကြံဆင့်စွမ်းအားများ တိုးတက်လာသည်ကို သူတို့ မခံစားခဲ့ရဖူးချေ။

သို့သော် ဤနဂါးသွေးအဆီအနှစ်မှာ အလွန်အစွမ်းထက်ပြီး ထူးဆန်းသည်။

ထိုအရာသည် သူတို့၏အစာအိမ်ထဲသို့ ဝင်ရောက်သွားသည်နှင့် တပြိုင်နက် သူတို့၏ခန္ဓာကိုယ်များကို အတင်းအကြပ် ပြောင်းလဲလိုက်တော့သည်။

သူတို့၏ပါရမီများ တိုးတက်လာသည်ကို သူတို့ ခံစားလိုက်ရပြီး သူတို့၏ကျင့်ကြံဆင့်စွမ်းအားများသည် ကြယ်ပျံတစ်စင်းအလား တဟုန်ထိုး မြင့်တက်သွားပေ၏။

မကြာမီမှာပင် တုန်ခါသံတစ်သံ ထွက်ပေါ်လာခဲ့သည်။

ထို့နောက် သူတို့နှစ်ဦး၏ကျင့်ကြံဆင့်သည် အဆင့်ငယ်တစ်ခုကိုပင် တိုက်ရိုက်ချိုးဖျက်သွားခဲ့သည်။

သူတို့၏ကျင့်ကြံဆင့်သည် ယန်သုံးပါးနယ်ပယ် ပထမအဆင့်မှ ယန်သုံးပါးနယ်ပယ် ဒုတိယအဆင့်သို့ ရောက်ရှိသွားကြသည်။

သူတို့၏ခန္ဓာကိုယ်အတွင်းမှ ပြင်းထန်သော ကျင့်ကြံဆင့်စွမ်းအားများကို ခံစားလိုက်ရပြီး သူတို့နှစ်ဦးယောက်သား အလွန်အမင်း စိတ်လှုပ်ရှားသွားကြ၏။

အကယ်၍ သူတို့သာ ပင်ပင်ပန်းပန်း ကျင့်ကြံခြင်းအပေါ် မှီခိုရမည်ဆိုပါက လက်ရှိအမြင့်သို့ ရောက်ရှိရန် နှစ်ပေါင်းမည်မျှထိကြာမည်ကို သူတို့ မသိနိုင်ချေ။

သို့ရာတွင် သူတို့သည် သွေးဆီအနှစ်တစ်အိုးကို သောက်လိုက်ရုံမျှဖြင့်...

အဆင့်ငယ်တစ်ခုတက်လှမ်းခြင်းကို တိုက်ရိုက်အောင်မြင်ပြီးမြောက်သွားခဲ့လေပြီ။

ဤသည်က နတ်ဆိုးစစ်သူကြီးများအပေါ် ထားရှိသော သူတို့၏ အကြည့်များကို ကျေးဇူးတင်မှုများဖြင့် ပြည့်နှက်သွားစေခဲ့သည်။

တစ်ချိန်တည်းမှာပင် သူတို့ ယခင်က ချမှတ်ခဲ့သော ဆုံးဖြတ်ချက်အတွက် အလွန်အမင်း ကံကောင်းသည်ဟု သူတို့ ခံစားမိပေ၏။

အမှန်အားဖြင့် တစ်ခါတရံ၌ ရွေးချယ်မှုသည် ကြိုးစားအားထုတ်မှုထက် ပို၍အရေးကြီးတတ်သည်။

သူတို့သည် မှန်ကန်သော လူတစ်ယောက်ကို မြှောက်ပင့်ဖားယားပြီး မှန်ကန်သော လမ်းကြောင်းကို ရှာတွေ့နိုင်သရွေ့ ...

ကြီးကျယ်ခမ်းနား တာအိုလမ်းစဉ်ကို မြှောက်ပင့်ဖားယားခြင်းဖြင့် လျှောက်လှမ်းကာ အမြင့်သို့ မရောက်နိုင်မည်ကို မည်သည်ကြောင့် ပူပန်နေရအုံးမည်နည်း....

သူတို့နှစ်ယောက်ထံတွင် တိုးတက်လာသည်မှာ သူတို့၏ကျင့်ကြံခြင်းတစ်ခုတည်းသာ မဟုတ်ပေ။

ဤလျှို့ဝှက်နယ်မြေ ခရီးစဉ်မှ ဂိုဏ်းနှစ်ဂိုဏ်းလုံးရှိ လူများအားလုံး အကျိုးအမြတ်များစွာ ရရှိခဲ့ကြ၏။

အကယ်၍ ဤရိတ်သိမ်းမှုကို သူတို့ သေချာစွာ ချေဖျက်နိုင်မည်ဆိုပါက ဂိုဏ်းနှစ်ဂိုဏ်းလုံး၏ စွမ်းအားသည် ကြီးမားသော အဆင့်တက်လှမ်းမှုတစ်ခုကို ကြုံတွေ့ရလိမ့်မည်ဟု ကြိုတင်၍ မှန်းဆနိုင်သည်။

...

တစ်ချိန်တည်းမှာပင်...

လူတစ်ယောက်သည် ကောင်းကင်လှေကားထစ်၏အောက်တွင် မတ်တတ်ရပ်နေပေ၏။

ဤလူသည် ရိုးရှင်းသော အဝတ်အစားများကို ဝတ်ဆင်ထားပြီး တောင့်တင်းခိုင်မာသော ခန္ဓာကိုယ်နှင့် ဖရိုဖရဲဖြစ်နေသော ဆံပင်ရှည်များရှိသည်။ သူ့ထံမှနေ၍ နက်ရှိုင်းသော အငွေ့အသက်တစ်ခုကို ထုတ်လွှတ်နေကာ အလွန်ထူးခြားနေပုံရသည်။

သူ၏အမည်မှာ ယိုလုံပင်။

သူသည် မြောက်ပိုင်းဒေသမှ လေလွင့်ကျင့်ကြံသူတစ်ဦး ဖြစ်ပေ၏။

သူသည် လေလွင့်ကျင့်ကြံသူတစ်ဦး ဖြစ်သော်လည်း သူ၏နာမည်ဂုဏ်သတင်းမှာ အလွန်အမင်း ကျော်ကြားသည်။

ယန်သုံးပါးနယ်ပယ် တတိယအဆင့်တွင်ရှိသော သူ၏ကျင့်ကြံဆင့် တစ်ခုတည်းကပင် သူ့အား အလွန်မြင့်မြတ်သော အဆင့်အတန်းတစ်ခုကို ပေးစွမ်းထားနိုင်သည်။

ယိုလုံက သူ၏ရှေ့ရှိ ကောင်းကင်လှေကားထစ်ကိုကြည့်ပြီး သူ၏မျက်နှာပေါ်တွင် ထိတ်လန့်တုန်လှုပ်သော အမူအယာတစ်ရပ် ထင်ဟပ်နေသည်။

"ဒါက အစစ်အမှန် နတ်ဆိုးအမွေအနှစ် တည်ရှိတဲ့ နေရာပဲလား...ဒီအခွင့်အရေးက ဒီအဘိုးကြီးပိုင်ဆိုင်ရမယ့် အရာပဲ..."

သူသည် စိတ်လှုပ်ရှားမှုကြောင့် သူ၏ခန္ဓာကိုယ် တုန်ရီနေပေ၏။

အစစ်အမှန် နတ်ဆိုးအမွေအနှစ်သည် မရေမတွက်နိုင်သော ထိပ်သီးကျင့်ကြံသူများကို ဆွဲဆောင်ထားခဲ့သည်။ ထိုကြောင့် မြောက်ပိုင်းဒေသ၏ ထိပ်သီးအင်အားစုကြီးလေးစုလုံး လှုပ်ရှားလာခဲ့ကြသော်လည်း နောက်ဆုံးတွင် ဤနေရာကို သူ အရင်ဆုံး ရှာတွေ့ခဲ့သည်။

သို့သော် သူ အထက်သို့ မော့ကြည့်ပြီးနောက် သူ၏မျက်လုံးများ အနည်းငယ်ကျဉ်းမြောင်းသွားသည်။

"မဟုတ်ဘူး...ဒီအဘိုးကြီးထက်အရင် လူတစ်ယောက်က ပိုမြင့်တဲ့နေရာကို တက်သွားပြီပဲ..."

ဤအချိန်တွင် သူ၏ အမြင်အာရုံထဲရှိ ကောင်းကင်လှေကားထစ်ပေါ်မှ ပေရာပေါင်းများစွာအကွာတွင် လူရိပ်တစ်ခုက အရှေ့သို့ ဖြည်းညှင်းစွာ တက်လှမ်းနေသည်။

သို့သော် ပတ်ဝန်းကျင်ရှိ တလိမ့်လိမ့်ထနေသော နတ်ဆိုးစွမ်းအင်များကြောင့် ထိုလူ၏မျက်နှာကို သူ သေချာစွာ မြင်တွေ့နိုင်ရန် ခက်ခဲနေသည်။

ဤသည်က သူ၏မျက်နှာအမူအယာကို အနည်းငယ် ပြောင်းလဲသွားစေပေ၏။

"အစစ်အမှန် နတ်ဆိုးအမွေအနှစ်ကို ဒီအဘိုးကြီး တစ်ယောက်တည်းကပဲ ယူလို့ရမယ်... ဒီအဘိုးကြီးရဲ့ အခွင့်အရေးကို လုယူချင်တဲ့သူတိုင်း သေရမယ်..."

သူက ရက်စက်ကြမ်းကြုတ်သော အပြုံးတစ်ခုကို ပြုံးလိုက်ပြီး လှေကားထစ်ပေါ်သို့ တက်ရန် ဟန်ပြင်လိုက်၏။

သို့သော် ထိုအချိန်မှာပင် အလင်းတန်းတစ်တန်းက အလျင်အမြန် ပျံသန်းလာပြီး သူ၏လမ်းကို တိုက်ရိုက်ပိတ်ဆို့လိုက်လေသည်။

ဤှသည်မှာ အခြားသူမဟုတ်ဘဲ ကြက်ပေါက်စတစ်ပင်။

"အဘိုးကြီး... ဒီကိုလာဖို့ မင်းကို ဘယ်သူက ပြောတာလဲ... 'သေ' ဆိုတဲ့ စကားလုံးကို ဘယ်လိုရေးရလဲဆိုတာ မင်း သိလား..."

ကြက်ပေါက်စတစ်က မလိုမုန်းထားမှုများ အပြည့်ပါသော မျက်နှာဖြင့် ပြောဆိုလိုက်သည်။

သူသည် မျက်စိရှင်ရှင်ထားပြီး ဤနေရာက အခြေအနေကို အမြဲတစေ စောင့်ကြည့်နေခဲ့ခြင်းကြောင့် ကံကောင်းသွားခဲ့သည်။

အကယ်၍ ဤအဘိုးကြီးကို ပိုင်လင်းအပေါ် ထိခိုက်မှုရှိစေပြီး သခင်၏အမိန့်တွေကို ချိုးဖောက်ခွင့် ပေးလိုက်မည်ဆိုလျှင် သူ သေဒဏ်အကြိမ်တစ်ထောင် ကျခံရလျှင်ပင် သူ၏အပြစ်များ ပြေပျောက်သွားမည် မဟုတ်ချေ။

ထို့ကြောင့် ဤအချိန်တွင် ကြက်ပေါက်စတစ်၏ သတ်ဖြတ်လိုခြင်း အရှိန်အဝါသည် ယခင်က တစ်ကြိမ်တစ်ခါမှ မကြုံဖူးသော အမြင့်တစ်ခုသို့ ရောက်ရှိနေခဲ့ခြင်းပင်။

"ဝုန်း..."

အပိုစကားများ မပြောတော့ဘဲ သူက ချက်ချင်းဆိုသလိုပင် တိုက်ခိုက်လိုက်၏။

"ဟီးဟီး... ကြက်တစ်ကောင်ပါလား...ပုရွက်ဆိတ်လို သတ္တဝါလေးက ဒီအဘိုးကြီးရဲ့ရှေ့မှာ မောက်မာရဲတယ်ပေါ့..."

ယိုလုံက၏မျက်နှာပေါ်တွင် အထင်သေးမှုများဖြင့် ပြည့်နှက်နေပြီး သူက အေးစက်စက် နှာခေါင်းရှုံ့လိုက်သည်။

ထို့နောက် သူ၏လက်ကို ဝှေ့ယမ်းလိုက်ရာ ဥပဒေသစွမ်းအား အလင်းတန်းများ ထွက်ပေါ်လာပေ၏။

ဤဥပဒေသ စွမ်းအားသည် ယင်သုံးပါးနယ်ပယ်၏အထက်တွင်ရှိသော ကျင့်ကြံသူများသာ ကျွမ်းကျင်နိုင်သော စွမ်းအားတစ်ရပ်ပင်။

ထိုအရာသည် ကောင်းကင်နှင့်မြေပြင်၏ စည်းမျဉ်းဥပဒေများကို ကိုယ်စားပြုပြီး ပတ်ဝန်းကျင်ရှိ နတ်ဘုရားစွမ်းအင်များကို စုစည်းနိုင်စွမ်းရှိသည်။

ထိုနတ်ဘုရားစွမ်းအင်များသည် အဆုံးအစမရှိ ကြီးမားကျယ်ပြန့်ပေ၏။

ယိုလုံသည် ကြက်ပေါက်စတစ်ကို အထင်မကြီးသော်လည်း ဤကဲ့သို့ နေရာမျိုးတွင် ထွက်ပေါ်လာနိုင်သူတိုင်းသည် သာမန်မဖြစ်နိုင်ကြောင်း သူ ကောင်းစွာသိရှိထားသည်။

ထို့ကြောင့် သူသည် သူ၏သတ်ဖြတ်ခြင်း လှုပ်ရှားမှုကို ချက်ချင်းဆိုသလိုပင် အသုံးပြုလိုက်သည်။

ဥပဒေသစွမ်းအား အလင်းတန်းများ ထွက်ပေါ်လာပြီး ရှည်လျားသော သက်တံတစ်စင်းနှင့် နေမင်းကြီးတစ်စင်းအလား နတ်ဘုရားအလင်းတန်းများ ပွင့်အံ့ထွက်လာသည်။

ထိုစွမ်းအားသည် လေဟာနယ်တစ်ခုလုံးကို ခြေမွှဖျက်ဆီးတော့မည့်အလားပင်။

ဤတိုက်ခိုက်မှုသည် အလွန်အမင်း ထိတ်လန့်ဖွယ်ကောင်းပေ၏။

အကယ်၍ ထိုအရာသာ ကျရောက်လာပါက တောင်များ ပြိုလဲပြီး ပင်လယ်သမုဒ္ဒရာများပင် ပျောက်ကွယ်သွားပေလိမ့်မည်။

ယန်သုံးပါးနယ်ပယ် ထိပ်သီးကျင့်ကြံသူများသည် ဒဏ္ဍာရီများနှင့်ပုံပြင်များတွင် ဖော်ပြထားသည့်အတိုင်း တောင်များနှင့်ပင်လယ်များကို ကျွမ်းထိုးမှောက်ခုံလှန်နိုင်စွမ်းကို ပိုင်ဆိုင်ထားပြီးဖြစ်သည်။

သို့သော် ထိုကဲ့သို့ ထိတ်လန့်ဖွယ်ကောင်းသည့် တိုက်ခိုက်မှုကို ရင်ဆိုင်ရာတွင် ကြက်ပေါက်စတစ်က သူ၏ကြက်နှုတ်သီးကိုသာ ဖွင့်ဟလိုက်ရာ ထိတ်လန့်ဖွယ်ကောင်းသော စုပ်ယူမှုစွမ်းအားတစ်ရပ် ထွက်ပေါ်လာသည်။

ထို့နောက် ပူလောင်သော နေမင်းကြီးကဲ့သို့ ဖျက်ဆီးနိုင်စွမ်းရှိပြီး လေဟာနယ်ကို ဆုတ်ဖြဲနိုင်လောက်အောင် အစွမ်းထက်သော ဥပဒေသ စွမ်းအားသည် အမှန်တကယ်ကို သူ၏ဝမ်းဗိုက်ထဲသို့ စုပ်ယူမျိုချခြင်း ခံလိုက်ရပေ၏။

"ရှီး..."

ဤသည်က ယိုလုံကို လုံးလုံးလျားလျား ထိတ်လန့်တုန်လှုပ်သွားစေခဲ့သည်။

သူသည် နှစ်ပေါင်းများစွာ ခရီးသွားလာခဲ့သဖြင့် သူ၏အသိပညာဗဟုသုတမှာ အလွန်အမင်း ကြွယ်ဝလှသည်။

သူ၏ အလွန်ကောင်းမွန်သော ပါရမီအပေါ် သူ ဂုဏ်ယူခဲ့ကာ မည်သည့် ယန်သုံးပါးနယ်ပယ် ထိပ်သီးကျင့်ကြံသူကမျှ သူ၏တိုက်ခိုက်မှုကို ဤမျှထိ လွယ်လင့်တကူ ဝါးမျိုချနိုင်မည် မဟုတ်ပေ။

တစ်စုံတစ်ယောက်မှ ထိုသို့လုပ်နိုင်ရန် ဆိုသည်မှာ ဖြစ်နိုင်ခြေ တစ်ခုတည်းသာ ရှိပေ၏။

ဤသည်မှာ ထိုသူ၏ကျင့်ကြံဆင့်သည် ယန်သုံးပါးနယ်ပယ်၏အထက်၌ ရှိနေခြင်းပင်။

ဤကိစ္စကို တွေးတောမိချိန်၌ ယိုလုံသည် အလွန်အမင်း ထိတ်လန့်တုန်လှုပ်သွားပေ၏။

ယခင်က သူ၏မောက်မာထောင်လွှားမှုများအားလုံးလည်း ပျောက်ကွယ်သွားတော့သည်။

"စီနီယာ... ဒါက နားလည်မှု လွဲတာပါ..."

သူသည် တောင်းပန်စကား ပြောချင်ခဲ့သော်လည်း ကြက်ပေါက်စတစ်က သူ့ကို ထိုအခွင့်အရေးမျိုး မည်သို့ ပေးမည်နည်း။

သူသည် သူ၏ကြက်ခြေထောက်ဖြင့် ယိုလုံကို ကန်ကျောက်လိုက်သည်။

သူ၏ကြက်ခြေထောက်တစ်ခုလုံးတွင် ထိတ်လန့်တုန်လှုပ်ဖွယ်ကောင်းသော ဥပဒေသ စွမ်းအားများဖြင့် ပြည့်နှက်နေသည်။

ဤဥပဒေသစွမ်းအားများသည် အလွန်အမင်း အရည်အသွေးမြင့်မားပြီး တလိမ့်လိမ့်ထနေသော နတ်ဆိုးချီစွမ်းအင်များကို သယ်ဆောင်ထားပေ၏။

ဤကြက်ခြေထောက်သည် သေးငယ်ပုံပေါ်သော်လည်း ထိတ်လန့်ဖွယ်ကောင်းသော စွမ်းအင်လှိုင်းလုံးတစ်ခုကို သယ်ဆောင်ထားသည်။

ဤသည်မှာ ရှေးဟောင်း နတ်ဘုရားတောင်ကြီး တစ်လုံးဖြင့် ပစ်ပေါက်လိုက်သည့်အလားပင်။

"ဝုန်း..."

မိုးကောင်းကင်ယံတွင် လျှပ်စီးမိုးကြိုးများ လင်းလက်လာသည်။

ဤကန်ချက်က လေဟာနယ်အတွင်းတွင် အပေါက်ကြီးတစ်ခုကို အမှန်တကယ် ဖန်တီးလိုက်၏။

ယိုလုံက ကျယ်လောင်စွာ ဟိန်းဟောက်ပြီး သူ၏စွမ်းအားကုန် အသုံးပြု၍ ခုခံလိုက်၏။

သို့သော် ဤသည်မှာ လုံးလုံးလျားလျား အသုံးမဝင်ခဲ့ချေ။

သူသည် မည်သည့် နည်းစနစ်ကို အသုံးပြုစေကာမူ မည်မျှထိများပြားသော ကာကွယ်ရေး စိတ်ဝိညာဉ်ရတနာများကို သူ၏ခန္ဓာကိုယ်၌ ထပ်ခါတလဲလဲ တင်ထားစေကာမူ....

သူသည် သူ၏ကာကွယ်မှုများကို သွားများအထိပင် တပ်ဆင်ထားပေ၏။

သို့သော် ဤကန်ချက်၏အောက်တွင် သူ၏ခန္ဓာကိုယ်ပေါ်ရှိ ကာကွယ်ရေး စိတ်ဝိညာဉ်ရတနာများသည် တစ်ခုပြီးတစ်ခု အက်ကွဲပျက်စီးသွားခဲ့သည်။ ထိုအရာများနှင့်အတူ သူသည်လည်း ကန်ကျောက်၍ အသတ်ခံလိုက်ရတော့သည်။

သူ၏ ရုပ်ခန္ဓာကိုယ်သည် အမှုန်အမွှားများအဖြစ်သို့ ခြေမွှဖျက်ဆီးခြင်း ခံလိုက်ရသည်။

ယန်သုံးပါးနယ်ပယ် တတိယအဆင့်ရှိ ထိပ်သီးကျင့်ကြံသူတစ်ဦးသည် ဤကဲ့သို့ ကန်ကျောက်၍ အသတ်ခံလိုက်ရကြောင်းကိုသာ လူအများ သိသွားပါက သူတို့ မည်ကဲ့သို့ ခံစားရမည်ကို မသိနိုင်တော့ချေ။

ဤအရာအားလုံးကို လုပ်ဆောင်ပြီးနောက် ကြက်ပေါက်စတစ်က ကောင်းကင်လှေကားထစ်ပေါ်ရှိ ပိုင်လင်းကို တစ်ချက်ကြည့်လိုက်၏။ သူမထံ၌ မည်သည့်ထိခိုက်မှုမျှ မရှိကြောင်း သူ မြင်တွေ့ချိန်၌ တိတ်တဆိတ် ထွက်ခွာသွားတော့သည်။

ဤဖြစ်စဉ်တစ်ခုလုံးမှာ ဖော်ပြရန် ကြာမြင့်သော်လည်း လက်တွေ့တွင်မူ လျှပ်စီးလက်သကဲ့သို့ မြန်ဆန်ပြီး မျက်တောင်တစ်ခတ်စာ အချိန်အတွင်းမှာပင် ဖြစ်ပျက်သွားခဲ့သည်။

ကြက်ပေါက်စတစ်သည် နတ်ဆိုးနဂါး လျှို့ဝှက်နယ်မြေသို့ ပြန်ရောက်လာချိန်တွင် ခမ်းနားသော စားသောက်ပွဲကြီးမှာ ယခုမှ စတင်ရုံသာ ရှိသေးပေ၏။

"ကြက်သခင်ကြီး... ပြန်ရောက်လာပြီပဲ..."

ကျင့်ကြံဆင့်မြင့်တက်သွားသော ကျီးဝူချန်သည် သူ့ကို လေးစားစွာ နှုတ်ဆက်ရန် ချက်ချင်းဆိုသလိုပင် ရှေ့သို့တိုးလာခဲ့သည်။

သူ၏စွမ်းအားသည် သိသိသာသာ တိုးတက်လာသော်လည်း သူ၏သဘောထားမှာ ပို၍ပင် နှိမ့်ချလာခဲ့သည်။

မည်သို့ပင်ဆိုစေကာမူ သူ ပိုင်ဆိုင်ထားသော အရာအားလုံးကို မည်သူက ပေးသနားခဲ့သည်အား သူ ကောင်းစွာသိရှိထားသည် မဟုတ်လော.....

"ဖျော်ဖြေမှုတွေ အဆင်သင့်ဖြစ်နေပါပြီ... ကြက်သခင်ကြီးကို စောင့်နေတာပါ..."

ပင်မခန်းမကြီးအတွင်း၌ လှပချောမောသော မိန်းမပျိုလေး ဆယ်ယောက်ကျော်ခန့်သည် တန်းစီ၍ မတ်တတ်ရပ်နေကြ၏။

သူမတို့သည် အစိမ်းရောင်ဝတ်ရုံများကို ဝတ်ဆင်ထားပြီး သူမတို့၏ဆွဲဆောင်မှုများကို တစ်စိတ်တစ်ပိုင်း လှစ်ဟပြထားသည်။

မိန်းကလေးတချို့က တည်ငြိမ်ရင့်ကျက်ပြီး တချို့သည် ဆွဲဆောင်မှုရှိကာ တချို့ကမူ ညှို့ငင်ဖမ်းစားနိုင်စွမ်းရှိသည်။

သူမတို့၏ကိုယ်နေဟန်ထားများမှာ အမျိုးမျိုးကွဲပြားနေကြသည်။

သူမတို့၏မျက်လုံးများတွင် ပေါ့ပါးရွှင်ပျသော ဆွဲဆောင်မှုများဖြင့် ပြည့်နှက်နေပေ၏။

သူမတို့သည် ဆွဲဆောင်မှုရှိသော စုန်းမငယ်လေးများဖြစ်ကြောင်း သိသာထင်ရှားလှပြီး လူအများကို ပူလောင်သော ခံစားချက်အား ဖြစ်ပေါ်စေနိုင်သည်။

ရုတ်ချည်းဆိုသလိုပင် ကြက်ပေါက်စတစ်သည် သူ၏စိတ်ဝိညာဉ် သန့်စင်သွားသကဲ့သို့ ခံစားမိသည်။

ယခင်က သတ်ဖြတ်ခြင်းကြောင့် ဖြစ်ပေါ်လာသော သူ့ထံမှ မကောင်းဆိုးဝါး အငွေ့အသက်များသည် အရိပ်အယောင်မကျန် ပျောက်ကွယ်သွားခဲ့လေပြီ။

သူ၏မျက်လုံးများထဲတွင် လှပသော မိန်းမပျိုလေးများ၏ပုံရိပ်များသာ ရှိနေတော့သည်။

"အဆင်သင့်ဖြစ်နေပြီဆိုမှတော့ ဘာကိုစောင့်နေတာလဲ...မင်းတို့ရဲ့ အကအခုန်တွေ မကြာသေးခင်ကများ တိုးတက်လာသလားဆိုတာ ကြက်သခင်ကြီး တစ်ချက်လောက် ကြည့်ရအောင်..."

ကြက်ပေါက်စတစ်၏ အမိန့်ပေးမှုအောက်တွင် အမျိုးသမီးဆယ်ယောက်ကျော်သည် သူတို့၏ သေးသွယ်သော ခါးများကို မိုးမခပင်များကဲ့သို့ ယိမ်းနွဲ့ကာ လှပစွာ စတင်၍ ကပြကြတော့သည်။

နတ်ဆိုးစစ်သူကြီး ဆယ့်နှစ်ဦးကို စိတ်ကျေနပ်စေရန်အတွက် မိန်းမပျိုတစ်ယောက်ချင်းစီတိုင်းက သူမတို့၏ သေးသွယ်သောခါးများ လည်ထွက်သွားမည်ကိုပင် စိုးရိမ်ရလောက်အောင် အစွမ်းကုန် ကြိုးစားကပြနေကြသည်။

အချိန်တခဏကြာပြီးနောက် နတ်ဆိုးစစ်သူကြီး ဆယ့်နှစ်ဦးလုံး အလွန်စိတ်လှုပ်ရှားလာကြ၏။

သူတို့တစ်ယောက်စီတိုင်းက ပါဝင်ဖျော်ဖြေချင်စိတ်များ ပေါက်လာကြသည်။

ထိုကြောင့် သူတို့သည် ခေါင်းများကို ယိမ်းထိုးကာ စင်မြင့်ပေါ်သို့ တက်လာကြ၏။

လှပသော မိန်းမပျိုလေးများနှင့်အတူ "ဝိညာဉ်ဖော်အက" ကို သူတို့ ကပြလိုကြသည်။

သို့သော် ကြက် ဘဲ ဝက်နှင့် နွား တစ်အုပ်က သူတို့၏ခန္ဓာကိုယ်များကို လှည့်ပတ်နေကာ လှပသော မိန်းမပျိုလေးများ၏ ကျက်သရေရှိသော အကအခုန်များနှင့် တွဲဖက်လိုက်ချိန်၌ ဤသည်မှာ မျက်စိနောက်စရာ ဖြစ်နေသည်မှာ အမှန်ပင်။

ဒါပေမဲ့ ဘယ်သူကများ တစ်ခုခု ပြောရဲမှာလဲ...

ယခုအချိန်တွင် ဂိုဏ်းနှစ်ဂိုဏ်းမှ လူများ၏စိတ်ထဲ၌ နတ်ဆိုးစစ်သူကြီးဆယ့်နှစ်ဦးမှ အီးပေါက်လိုက်လျှင်ပင် မွှေးကြိုင်နေသည်ဟု ထင်ရလောက်အောင် ဖြစ်နေလေပြီ။

ဤကဲ့သို့ မျက်စိနောက်စရာလောက်သာဖြစ်သေူ အကအခုန်များကိုမူ ထည့်ပြောနေပင် မလိုတော့ချေ။

"ငါ့ရဲ့ ကလေးလေးတွေ... သီချင်းမပါဘဲ ဘယ်လိုလုပ် ကလို့ရမှာလဲ...အားလုံးပဲ... သီဆိုပြီး ကကြတော့..."

နတ်ဆိုးစစ်သူကြီး ဆယ့်နှစ်ဦး၏ အကအခုန်များသည် အလွန်အမင်း မျက်စိနောက်စရာ ကောင်းသော်လည်း သူတို့၏တေးဂီတအပေါ် အာရုံခံနိုင်စွမ်းမှာ အမှန်တကယ်ကို အားကောင်းလှသည်ဟု ဆိုရပေမည်။

ဂိုဏ်းနှစ်ဂိုဏ်းမှ လူများသည် သူတို့၏ခန္ဓာကိုယ်များကို မယိမ်းထိုးဘဲ မနေနိုင်အောင်ပင် ဖြစ်သွားကြ၏။

အချိန်တခဏအတွင်းတွင် ပတ်ဝန်းကျင်နေရာတဝိုက်သည် သရဲတစ္ဆေများ အော်ဟစ်ငိုယိုနေပြီး ဝံပုလွေများ အူနေသကဲ့သို့ ဖြစ်နေကာ လူများအားလုံး ခုန်ပေါက်၍ ကခုန်နေကြသည်။

ဤသည်က 'အလှလေးနှင့်မိစ္ဆာ'ဟူသည့် ဇာတ်လမ်းကို ပြီးပြည့်စုံစွာ သရုပ်ဖော်နေသည့်အလားပင်။

ဤမြင်ကွင်းကို တခြားကမ္ဘာမှ ဒစ္စကိုကလပ်များ၏မူလအစဟုပင် ယူဆနိုင်သည်။

လူများအားလုံး သီဆိုကခုန်နေကြချိန်တွင် နတ်ဆိုးနဂါးလျှို့ဝှက်နယ်မြေ၏ အပြင်ဘက်၌ ခုနစ်စင်ကြယ်ဓားဂိုဏ်း၏ တတိယအကြီးအကဲသည် ဝင်္ကပါကို ပြင်းပြင်းထန်ထန်ကြိုးစား၍ ဖျက်ဆီးနေဆဲပင်။