ကျူးရှန်းဓားချီ၊ သန်းချီသော မိစ္ဆာသားရဲတပ်မဟာ။

ဘုန်း... ဘုန်း...

မကြာမီအချိန်အတွင်း စစ်သွေးစစ်မာန်ပြည့်နေသော မိစ္ဆာမျိုးနွယ်စု တပ်မဟာကြီးသည် ကြယ်သုံးပွင့်ကျွန်းစုဆီသို့ ပျံသန်းလာကြချေသည်။ မိစ္ဆာအငွေ့အသက်များသည် ကောင်းကင်အထိတိုင် ထိုးတက်နေကာ ကောင်းကင်တစ်ခုလုံး မည်းမှောင်သွားပြီး နေကိုကွယ်လျက် ကောင်းကင်ကိုပင် ဖုံးလွှမ်းသွားသကဲ့သို့ ဖြစ်နေလေသည်။

ပင်လယ်ပြင်ထက်တွင်လည်း မရေမတွက်နိုင်သော ပင်လယ်မိစ္ဆာသားရဲများ ကူးခတ်လာကြလေသည်။

အကြမ်းဖျင်း တွက်ချက်ကြည့်လျှင် ဤမိစ္ဆာသားရဲအရေအတွက်သည် သန်းချီ၍ပင် ရှိနေသည်။ သေချာသည်မှာ အဓိကအင်အားစုသည် မိုးကြိုးသိမ်းငှက်မျိုးနွယ်စုပင် ဖြစ်ပေသည်။

၎င်းတို့သည် လေထဲတွင် ပျံသန်းနေကြပြီး အသံထက်မြန်သော တိုက်လေယာဉ်များကဲ့သို့ ကောင်းကင်ယံကို ထိုးခွင်းသွားကြကာ၊ ရံဖန်ရံခါတွင် ခန္ဓာကိုယ်ပေါ်၌ ရွှေရောင်လျှပ်စီးများ ပေါ်ထွက်လာပြီး ကြောက်မက်ဖွယ် ဖျက်ဆီးခြင်းအရှိန်အဝါများ ပျံ့နှံ့နေလေသည်။

အရေအတွက်အားဖြင့် သောင်းဂဏန်းခန့်သာ ရှိသော်လည်း ၎င်းတို့အားလုံးသည် အနည်းဆုံး ဒုတိယအဆင့် မိစ္ဆာသားရဲများ ဖြစ်ကြပြီး တတိယအဆင့် မိစ္ဆာသားရဲများပင် ပါဝင်ကြသည်။

မိုးကြိုးသိမ်းငှက်တစ်ကောင်၏ တိုက်ခိုက်ရေးစွမ်းရည်သည် အခြားမိစ္ဆာသားရဲများထက် များစွာ သာလွန်ပေသည်။

သဘာဝကျကျပင် ဤမျှ ကြီးမားသော တိုက်ပွဲဝင်အခင်းအကျင်းနှင့် စစ်တပ်ကြီး၏ ချီတက်လာမှုကို ကြယ်သုံးပွင့်ကျွန်းစုမှ လူသားကျင့်ကြံသူများ ပထမဆုံး သတိပြုမိလိုက်ကြတော့၏။

"ဒုက္ခပါပဲ... သားရဲဒီရေ... သားရဲဒီရေ ရောက်လာပြီ..."

လူတစ်ယောက်က အော်ဟစ်လိုက်သည်။

"မင်းမေကြီးတော်ကို သားရဲဒီရေပါ့လား... ဒါက ရှေးဟောင်းမိစ္ဆာကမ္ဘာက မိစ္ဆာသားရဲတွေကွ... ဒါ မိုးကြိုးသိမ်းငှက်မျိုးနွယ်စုပဲ ဖြစ်ရမယ်..."

"မဖြစ်နိုင်တာ... ငါတို့ ကြယ်သုံးပွင့်ကျွန်းစုက ဝေးလံခေါင်ဖျားတဲ့ ပင်လယ်ပြင်မှာ ရှိတာလေ... ဘယ်လိုလုပ် မိုးကြိုးသိမ်းငှက်မျိုးနွယ်စုကို စွဲဆောင်မိတာလဲ..."

"ငါတို့ ကံဆိုးတယ်လို့ပဲ မှတ်ရမှာပေါ့... အနီးအနားက ပင်လယ်ပြင်မှာ ကမ္ဘာ့တံခါးပေါက်တစ်ခု ရှိနေတယ်လေ... မိုးကြိုးသိမ်းငှက်မျိုးနွယ်စုက အဲဒီတံခါးပေါက်ကနေတစ်ဆင့် ငါတို့ ချန်လန်ပင်လယ်ဒေသကို ကျူးကျော်လာတာလို့ ကြားတယ်..."

"ရွှမ်ဟွမ်ဂိုဏ်းဆီ မြန်မြန် ထွက်ပြေးကြ... ကြယ်သုံးပွင့်ကျွန်းစုမှာ စတုတ္ထအဆင့် ထိပ်တန်းအစီအရင် ရှိတယ်... ဒီမိစ္ဆာသားရဲတွေကို သေချာပေါက် တားဆီးနိုင်မှာပါ..."

ကျင့်ကြံသူ အများအပြားသည် အသည်းထဲထိတိုင် ကြောက်ရွံ့ထိတ်လန့်နေကြသည်။

ဤမိစ္ဆာသားရဲများနှင့် ထိပ်တိုက်တွေ့ဆုံပါက သေလမ်းသာ ရှိကြောင်း သူတို့ သိထားကြလေသည်။ ရွှမ်ဟွမ်ဂိုဏ်း၏ ကြယ်သုံးပွင့်ကျွန်းစုဆီသို့ ထွက်ပြေးမှသာလျှင် အသက်ရှင်ရန် မျှော်လင့်ချက် ရှိပေလိမ့်မည်။

…………

ထိုအချိန်တွင် ကြယ်သုံးပွင့်ကျွန်းစု၌...။

ကျိုးစွေ့၊ လန်ယွဲ့ရှီ၊ လင်းယာကျူ၊ ချူတျဲယီ၊ သခင်မမက်မွန်ပွင့် စသည့် တာအိုလက်တွဲဖော်များသည် ရွှမ်ဟွမ်ကျွန်းမှ ကြယ်သုံးပွင့်ကျွန်းစုဆီသို့ ပြန်လည် ရောက်ရှိနေကြပြီ ဖြစ်လေသည်။ ကျိပင်းယွီ၊ မုဇီယန်နှင့် ရှားကျင်းယန်တို့ သုံးဦးမှာမူ ရွှမ်ဟွမ်ကျွန်းတွင် ကျန်ရစ်ခဲ့ကြသည်။

မည်သို့ပင်ဖြစ်စေ သူမတို့သည် 'စိမ်းလန်းဧကရာဇ် သက်ရှည်ကျင့်စဉ်'ကို ကျင့်ကြံထားကြရာ ရွှမ်ဟွမ်ကျွန်းမှ ထွက်ခွာ၍ မဖြစ်နိုင်ပေ။

ထို့အပြင် သူမတို့၏ စွမ်းအားဖြင့် ဤမျှ ကြီးမားသော စစ်ပွဲကြီးတွင် ပါဝင်ရန် မဖြစ်နိုင်ချေ။

ဤအချိန်တွင် ကျိုးစွေ့သည် တာအိုလက်တွဲဖော်များကို ဦးဆောင်ပြီး လေထဲတွင် ပျံသန်းနေကာ၊ အဝေးမှ တဟုန်ထိုး ဝင်ရောက်လာသော မိစ္ဆာသားရဲများကို ကြည့်လိုက်သည်။

သန်းချီသော မိစ္ဆာသားရဲများသည် စစ်သွေးစစ်မာန် တက်ကြွစွာဖြင့် ချီတက်လာကြသည်။ ကြောက်မက်ဖွယ် မိစ္ဆာအငွေ့အသက်များ ဖုံးလွှမ်းနေသည်မှာ ကောင်းကင်တစ်ခုလုံးကိုပင် မည်းမှောင်နေစေပြီး၊ သတ်ဖြတ်ခြင်း အငွေ့အသက်များ ထွက်ပေါ်နေသဖြင့် လူကို ကြောက်ရွံ့တုန်လှုပ်စေသည်။

အထူးသဖြင့် ကောင်းကင်ယံထက်တွင် မီတာတစ်ရာခန့် ကြီးမားသော ရက်စက်ကြမ်းကြုတ်သည့် မိစ္ဆာသားရဲပျံများက ပျံသန်းလာကြသည်။

လူသားများအတွက်မူ ၎င်းတို့သည် ဧရာမ သတ္တဝါကြီးများပင် ဖြစ်သည်။

၎င်းတို့၏ ခန္ဓာကိုယ်ပေါ်တွင် ကြောက်မက်ဖွယ် မိုးကြိုးစွမ်းအားများ ထွက်ပေါ်နေပြီး၊ အချင်းချင်း ယှက်နွှယ်သွားကာ မိုးကြိုးပင်လယ်ကြီးတစ်ခု ဖြစ်ပေါ်လာသကဲ့သို့ ရှိနေလေသည်။ ကောင်းကင်တစ်ပြင်လုံး မိုးကြိုးတိမ်တိုက်များ ဖုံးလွှမ်းနေသဖြင့် လွန်စွာ ကြောက်ရွံ့ဖွယ် ကောင်းလှ၏။

ဤသည်မှာ မိုးကြိုးသိမ်းငှက်မျိုးနွယ်စု၏ တိုက်ပွဲဝင်အခင်းအကျင်းပင် ဖြစ်သည်။

မိုးကြိုးသိမ်းငှက် တစ်ကောင်ချင်းစီ၏ မိုးကြိုးစွမ်းအားကို ပေါင်းစပ်ပြီး တုနှိုင်းမဲ့သော ကောင်းကင်မိုးကြိုးစွမ်းအားကို ထုတ်လွှတ်နိုင်သည်။

"အင်း... အားလုံးပေါင်း စတုတ္ထအဆင့် မိစ္ဆာသားရဲ (၁၂၈) ကောင် ရှိတာပဲ..."

"အဲဒီအထဲမှာ စတုတ္ထအဆင့် အထွတ်အထိပ် မိစ္ဆာသားရဲတစ်ကောင်… စတုတ္ထအဆင့် အလယ်အလတ် (၂၃) ကောင်နဲ့... ကျန်တာတွေက စတုတ္ထအဆင့် အောက်ခြေအဆင့်တွေပဲ..."

"စိတ်ဝင်စားစရာပဲ... ငါတို့ ချန်လန်ပင်လယ်ဒေသက ဒေသခံမိစ္ဆာသားရဲတွေလည်း ပါနေပါလား... ကြည့်ရတာ သူတို့က ရှေးဟောင်းမိစ္ဆာကမ္ဘာက မိစ္ဆာသားရဲတွေဆီမှာ ခိုလှုံသွားကြပုံပဲ..."

ကျိုးစွေ့သည် လက်နောက်ပစ်ကာ အေးအေးဆေးဆေး ရပ်နေလိုက်သည်။

သူ၏ နှလုံးသားမျက်လုံး အာရုံသည် ဖြန့်ကျက်သွားပြီး မိုင်သောင်းချီ အကွာအဝေးကို လွှမ်းခြုံကာ ပတ်ပတ်လည်ကို ဖုံးလွှမ်းသွားလေသည်။

မျက်စိတစ်မှိတ်အတွင်းမှာပင် ဤကြီးမားသော မိစ္ဆာသားရဲတပ်မဟာကြီး၏ အချက်အလက် အတိအကျကို သူ သိရှိလိုက်သည်။

အမှန်အတိုင်းဆိုရလျှင် ဤမိစ္ဆာသားရဲ အရေအတွက်သည် သုံးလေးသန်းခန့် ရှိသော်လည်း၊ သူ့ကို အမှန်တကယ် စိုးရိမ်စေနိုင်သည်မှာ ထိုစတုတ္ထအဆင့် မိစ္ဆာသားရဲများသာ ဖြစ်ပေသည်။

အဆင့်နိမ့်မိစ္ဆာသားရဲများ မည်မျှပင် များပြားသည်ဖြစ်စေ ပြောပလောက်စရာ မရှိချေ။

ဝိညာဉ်သန္ဓေသား ဘိုးဘေးတစ်ပါးက အဆင့်နိမ့်မိစ္ဆာသားရဲ သန်းချီကို လွယ်ကူစွာ သတ်ဖြတ်နိုင်ပေသည်။

အဘယ်ကြောင့်ဆိုသော် ဝိညာဉ်သန္ဓေသား ဘိုးဘေးသည် လူသားအသွင် နျူကလီးယားဗုံးကဲ့သို့ ဖြစ်ပြီး၊ လက်တစ်ဖက် လှုပ်ရှားလိုက်ရုံဖြင့် မိုင်ထောင်ချီကို ဖုံးလွှမ်းသွားနိုင်သည်။

အဆင့်နိမ့်မိစ္ဆာသားရဲ မည်မျှပင် များပြားသည်ဖြစ်စေ ဘာအဓိပ္ပာယ်မျှ မရှိပေ။

ကျင့်ကြံခြင်းကမ္ဘာတွင် အဆင့်မြင့် ကျင့်ကြံသူများကသာ စစ်ပွဲ၏ အနိုင်အရှုံးကို အဆုံးအဖြတ်ပေးသော အဓိကသော့ချက်များ ဖြစ်ကြလေသည်။

အကယ်၍ အဆင့်မြင့် ကျင့်ကြံသူများ ရှုံးနိမ့်ပါက ဤစစ်ပွဲသည် လုံးဝ ရှုံးနိမ့်သွားပေလိမ့်မည်။

အဆင့်နိမ့် ကျင့်ကြံသူများ မည်မျှပင် အပြင်းအထန် သတ်ဖြတ်ကြသည်ဖြစ်စေ၊ ပြောပလောက်စရာ မဟုတ်ချေ။

"စတုတ္ထအဆင့် မိစ္ဆာသားရဲတွေ ဒီလောက်တောင် များတာလား..."

ဤစကားကို ကြားသောအခါ ချူတျဲယီနှင့် အခြားသူများသည် လေအေးများကို ပင့်သက်ရှိုက်လိုက်မိကြသည်။ သူမတို့သည် ဤမျှများပြားသော စတုတ္ထအဆင့် မိစ္ဆာသားရဲများကို မည်သည့်နေရာတွင်မှ မမြင်ဖူးခဲ့ကြပေ။

ပင်လယ်မျိုးနွယ်စုပင်လျှင် အထွတ်အထိပ် အချိန်ကာလ၌ ဤမျှများပြားသော စတုတ္ထအဆင့် မိစ္ဆာသားရဲများကို စုစည်းရန် အလွန် ခက်ခဲလှသည်။

သို့သော် ယခုမူ ဤမိုးကြိုးသိမ်းငှက်မျိုးနွယ်စုသည် စတုတ္ထအဆင့် မိစ္ဆာသားရဲ အကောင်တစ်ရာကျော်ကို ခေါ်ဆောင်လာခဲ့သည်။

ထို့အပြင် ဤသည်မှာ ချန်လန်ပင်လယ်ဒေသကို ကျူးကျော်လာသော မိစ္ဆာသားရဲများ၏ တစ်စိတ်တစ်ပိုင်းသာ ရှိသေးသည်။

ချန်လန်ပင်လယ်ဒေသ တစ်ခုလုံးတွင် စတုတ္ထအဆင့် မိစ္ဆာသားရဲမည်မျှ ကျူးကျော်ဝင်ရောက်လာသည်ကို စိတ်ကူးကြည့်၍ပင် မရနိုင်ပေ။

ရှေးခေတ်ကာလမှ လူသားများသည် ဤမျှ သနားစဖွယ်ကောင်းပြီး၊ ကပ်ဘေးအမျိုးမျိုးနှင့် ကြုံတွေ့ရကာ သေကျေပျက်စီးမှု များပြားခဲ့ရခြင်းမှာ အံ့သြစရာမဟုတ်တော့ပေ။

ဤမျှများပြားသော မိစ္ဆာသားရဲများ ထွက်ပေါ်လာသည်ကို မြင်လိုက်ရုံဖြင့် ကြောက်ရွံ့တုန်လှုပ်စေပြီး၊ သတ္တိများ အလိုလိုပျောက်ဆုံးကာ မျှော်လင့်ချက်မဲ့စေရန် လုံလောက်ပေသည်။

"ယောက်ျား... စတုတ္ထအဆင့် အစီအရင်ကို အသက်သွင်းဖို့ လိုမလား..."

လင်းယာကျူတစ်ယောက် မနေနိုင်ဘဲ မေးလိုက်သည်။

ဤမျှ ကြီးမားသော မိစ္ဆာသားရဲ တပ်မဟာကြီးကို တားဆီးရန်အတွက် လူသားများအနေဖြင့် အစီအရင်စွမ်းအားကိုသာ အားကိုးရမည်ဟု သူမ ထင်မြင်မိသည်။

အကယ်၍ အစီအရင်သာ မရှိပါက ဤမျှ ထူထပ်များပြားသော မိစ္ဆာသားရဲ တပ်မဟာကြီးကို ခုခံနိုင်မည် မဟုတ်ချေ။

"မလောပါနဲ့ဦး..."

"လာတယ်ဆိုမှတော့ ဧည့်သည်ပဲလေ..."

"တကယ်လို့ အစီအရင်ကြီးကို ဖွင့်လိုက်ရင်... ဒီမိစ္ဆာသားရဲအုပ်စုကြီး လန့်ပြီး ထွက်ပြေးသွားရင် ဘယ်လိုလုပ်မလဲ..."

"ဒီမိစ္ဆာသားရဲအုပ်စုရဲ့ အစွမ်းအစကို အရင် စမ်းကြည့်လိုက်ရအောင်..."

ကျိုးစွေ့က ပြောရင်းဆိုရင်း လက်တစ်ဖက် ဝှေ့ယမ်းလိုက်ရာ လက်ထဲတွင် ဓားပျံတစ်လက် ချက်ချင်း ရောက်ရှိလာသည်။

ကျူးရှန်းဓားသိုင်း ပထမပုံစံ - သဏ္ဌာန်မဲ့ ဓားအလင်း…။

ဤအချိန်တွင် သူ၏ခန္ဓာကိုယ်မှ အလွန်တရာ သန့်စင်သော ဓားဆန္ဒနှင့် သတ်ဖြတ်ခြင်း စိတ်ဆန္ဒများ ပေါက်ကွဲထွက်ပေါ်လာသည်။ ဤအချိန်ခဏလေးအတွင်း ထိုအလိုဆန္ဒသည် ကောင်းကင်ကိုပင် ထိုးဖောက်သွားကာ ဟင်းလင်းပြင်ကို စုတ်ဖြဲသွားသကဲ့သို့ ရှိလေ၏။

"ဘာ..."

ဘေးနားရှိ ချူတျဲယီနှင့် အခြား တာအိုလက်တွဲဖော်များမှာ မျက်လုံးများ ပြူးကျယ်သွားကြပြီး၊ မိမိတို့၏ ယောက်ျားကို မယုံကြည်နိုင်စွာ ကြည့်နေမိကြတော့သည်။ အဘယ်ကြောင့်ဆိုသော် ယောက်ျားဖြစ်သူ ဝိညာဉ်သန္ဓေသားအဆင့်သို့ တက်လှမ်းပြီးနောက် တိုက်ခိုက်သည်ကို ပထမဆုံးအကြိမ် မြင်တွေ့ဖူးခြင်းကြောင့် ဖြစ်သည်။

ယခင်က ကျိုးစွေ့သည် တိုက်ခိုက်ခဲပြီး လိုဏ်ဂူထဲတွင်သာ တံခါးပိတ်ကျင့်ကြံနေလေ့ရှိသည်။

သို့မဟုတ် သူမတို့နှင့်အတူသာ ကျင့်ကြံလေ့ရှိသည် မဟုတ်ပါလော။

သူမတို့၏ ယောက်ျားသည် ဆေးဖော်စပ်ခြင်း၊ အစီအရင်ပညာ စသည့် ကျင့်ကြံခြင်း အတတ်ပညာများတွင် ထူးကဲသော စွမ်းဆောင်ရည်ရှိကြောင်း သူမတို့ ဝန်ခံသော်လည်း၊ တိုက်ခိုက်ရေးတွင် မည်သို့သော ပါရမီရှိကြောင်း မည်သည့်အခါမျှ မမြင်တွေ့ခဲ့ရပေ။

ရှရွှေယန်တစ်ယောက်သာ ကျိုးစွေ့ ဝိညာဉ်သန္ဓေသားအဆင့် ကျင့်ကြံသူကို သတ်ဖြတ်သည်ကို မြင်တွေ့ခဲ့ဖူးသည်။

၎င်းသည်လည်း ကိုယ်ပွားတစ်ခုသာ ဖြစ်သောကြောင့်၊ ရေခဲတောင်၏ အပေါ်ယံထိပ်ဖျားမျှသာ ရှိသော ကျိုးစွေ့၏စွမ်းအားကို မြင်တွေ့နိုင်ခဲ့ရခြင်းသာ ဖြစ်၏။

ဘန်း...

မျက်စိတစ်မှိတ်အတွင်း သဏ္ဌာန်မဲ့ ကျူးရှန်းဓားအလင်းတစ်ခုကို ပစ်လွှတ်လိုက်တော့သည်။ အကောင်အထည်မရှိသလို၊ အသံနှင့် မည်သည့်အရိပ်အယောင်မျှမရှိဘဲ ဟင်းလင်းပြင်ထဲသို့ ပေါင်းစပ်သွားသကဲ့သို့ ဖြစ်နေပြီး ဟင်းလင်းပြင်တွင် ဂယက်လှိုင်းများသာ ထွက်ပေါ်လာသည်။

ဤဓားချက်သည် မိစ္ဆာသားရဲတပ်မဟာကြီးထဲရှိ ငါးမန်းနက်မျိုးနွယ်စုခေါင်းဆောင် ရှားချန်ကို အသေအချာ ချိန်ရွယ်ထားလေသည်။

သူ၏ ဘဝတွင် သစ္စာဖောက် လမ်းပြများကို အမုန်းဆုံး ဖြစ်လေ၏။

ထို့အပြင် ဤ ငါးမန်းနက်မျိုးနွယ်စု ခေါင်းဆောင်သည် သူနှင့် သွေးပင်လယ်ချီသော ရန်ကြွေးရှိခဲ့ဖူးသည်။

ထို့ကြောင့် သူ လက်စွမ်းပြလိုက်သည်နှင့် ထိုအကောင်၏ အသက်ကို ယူဆောင်ပြီး၊ ကံကြွေးကမ္မကို အပြီးတိုင် ဖြတ်တောက်လိုက်ခြင်း ဖြစ်ပေသည်။

"ဘာ..."

ဤအခိုက်အတန့်တွင် ရင်းရှိယန်၏ မွေးညှင်းများ ထောင်ထသွားသည်။ ၎င်းသည် စတုတ္ထအဆင့် အထွတ်အထိပ်မိစ္ဆာသားရဲ ဖြစ်သည့်အားလျော်စွာ အာရုံခံနိုင်စွမ်း အလွန်ထက်မြက်ပြီး၊ စတုတ္ထအဆင့် မိစ္ဆာသားရဲ၏ ပင်ကိုအသိစိတ်ဖြင့် အန္တရာယ်ရောက်လာကြောင်း အာရုံခံမိလိုက်၏။

သို့သော် ထိုအန္တရာယ်မှာ မည်သည့်နေရာမှ လာသည်ကိုမူ မသိရှိချေ။ မကြာမီတွင်မူ ထိုအန္တရာယ် မည်သည့်နေရာမှ လာသည်ကို ၎င်း တွေ့ရှိလိုက်ရတော့သည်။

သဏ္ဌာန်မဲ့သော ဓားအလင်းတစ်ခုသည် တဟုန်ထိုး ဝင်ရောက်လာပြီး၊ အခြားသော စတုတ္ထအဆင့် မိစ္ဆာသားရဲများကို လျစ်လျူရှုကာ ငါးမန်းနက်မျိုးနွယ်စုခေါင်းဆောင် ရှားချန်ကို တိုက်ရိုက်ဦးတည်နေခြင်းပင် ဖြစ်လေတော့သည်။