အခန်း (၂၈၅-၂၈၆)

အခန်း (၂၈၅) - သန္ဓေတည်ဝိညာဉ်ဂိုဏ်း စစ်ပွဲနှင့် နောက်ထပ် ကံကြမ္မာ၏ ရွေးချယ်မှု။

"အကယ်၍ ငါတို့သာ သားရဲတစ်သောင်း တောင်တန်းကို သွားမယ်ဆိုရင်၊ သန္ဓေတည်ဝိညာဉ် ဆေးလုံးကို ရဖို့ အခွင့်အရေး ရှိနိုင်တာပဲ။"

"အဲဒီလိုဆိုရင်တော့ ငါတို့ တကယ် ချမ်းသာပြီ။"

အုတ်မြစ်တည်ဆောက်ခြင်း ကျင့်ကြံသူ အမျိုးသမီး ယွီခယ်လျန်၏ မျက်လုံးများမှာ အရောင်တောက်သွားခဲ့ပြီး၊ ပြင်းပြလှသော လောဘရိပ်များ ပေါ်ထွက်လာခဲ့လေသည်။

အကယ်၍ သူမသာ ထိုဆေးလုံးကို ရရှိပြီး ပြန်လည် ရောင်းချနိုင်မည်ဆိုပါက၊ ရွှေအမြုတေ အဆင့်သို့ မတက်လှမ်းမီအထိ ကျင့်ကြံရေး အရင်းအမြစ်များ အတွက် စိုးရိမ်နေရန် လိုတော့မည် မဟုတ်ပေ။ တစ်နည်းအားဖြင့် ဤသည်မှာ သူမအတွက် ရွှေအမြုတေ အဆင့်သို့ တက်လှမ်းရန် အခွင့်အရေး တစ်ခုဟုပင် ဆိုနိုင်လေသည်။

မည်သို့ဆိုစေ သန္ဓေတည်ဝိညာဉ် ကျင့်ကြံသူများပင်လျှင် သန္ဓေတည်ဝိညာဉ်ဆေးလုံး တစ်လုံးအတွက် အဖိုးတန် ရတနာများကို လဲလှယ်ရန် ဝန်လေးကြမည် မဟုတ်သောကြောင့် ဖြစ်ပေသည်။

"အဲဒါကို ရဖို့ဆိုတာ မဖြစ်နိုင်ဘူး။"

"အခုအချိန်မှာ အဲဒီဆေးလုံးကို မျက်စိကျနေတဲ့ ကျင့်ကြံသူတွေက အများကြီးပဲ။"

"အကယ်၍ ငါတို့သာ အဲဒီကိစ္စထဲ ပါဝင်ပတ်သက်မိမယ်ဆိုရင်၊ သေချာပေါက် 'အသေခံ မြှားစာ' တွေပဲ ဖြစ်သွားလိမ့်မယ်။"

"ကြားရသလောက်ဆိုရင် နက်နဲကောင်းကင် ဓားဂိုဏ်းရဲ့ တကယ့် ရည်မှန်းချက်က အဲဒီ သန္ဓေတည်ဝိညာဉ် ဂူဗိမာန်ပဲတဲ့။"

"ဘာပဲဖြစ်ဖြစ် အပြင်ဘက် ဧရိယာလေးတင်မှာတင် သူတို့က သန္ဓေတည်ဝိညာဉ်ဆေးလုံး တစ်လုံးကို ရရှိခဲ့တာလေ။"

"အကယ်၍ သူတို့သာ ဗဟိုချက်မ နေရာကို ဝင်ရောက်နိုင်မယ်ဆိုရင်၊ နောက်ထပ် ဘယ်လို ရတနာမျိုးတွေ ထပ်ရဦးမလဲဆိုတာ ဘယ်သူ သိနိုင်မှာလဲ။"

အုတ်မြစ်တည်ဆောက်ခြင်း ကျင့်ကြံသူ အမျိုးသမီး လျန်မင်လန်မှာ ဤကိစ္စနှင့် ပတ်သက်၍ အတော်အတန် သိရှိထားပုံရလေသည်။ သို့သော် သူမသည် ဤကဲ့သို့သော ပဋိပက္ခများ ဖြစ်ပွားရာနေရာသို့ အသက်နှင့်လဲ၍ သွားရောက်ရန် အစီအစဉ် လုံးဝ မရှိပေ။ ထိုသို့သော နေရာမျိုးသို့ ရောက်သွားပါက အသက်ပေါင်း မည်မျှပင် ရှိပါစေ အသတ်ခံရရန်သာ ရှိပေသည်။

"ဗဟိုချက်မ နေရာ ဟုတ်လား။ ဒါဆို အဲဒီဂူဗိမာန်ကို အခုထိ အပြည့်အဝ ဖောက်ထွင်းဝင်ရောက်နိုင်ခြင်း မရှိသေးဘူးပေါ့။"

"မဖောက်ထွင်းနိုင်သေးတာ သေချာတာပေါ့။ ဒါက သန္ဓေတည်ဝိညာဉ် ဂူဗိမာန်လေ။ အတွင်းထဲမှာရှိတဲ့ အဆင့် (၄) အစီအရင်က အရမ်းကို အစွမ်းထက်လွန်းတယ်။ ရွှေအမြုတေ အရှင်သခင် အမြောက်အမြား ပေါင်းတိုက်ရင်တောင် အသုံးမဝင်ဘူး။ ကြားရသလောက်ဆိုရင် ဒီတစ်ခါမှာတော့ နက်နဲကောင်းကင် ဓားဂိုဏ်းက သန္ဓေတည်ဝိညာဉ်ရှင် ကိုယ်တိုင် ပါဝင် လှုပ်ရှားတော့မယ်တဲ့။"

"ဟူး... အကယ်၍ သန္ဓေတည် ဝိညာဉ်ရှင်ကသာ ပါဝင်လာမယ်ဆိုရင်တော့၊ ငါတို့အတွက် ဘာအခွင့်အရေးမှ ရှိတော့မှာ မဟုတ်ဘူး။"

"ဟုတ်တယ်... အတွင်းထဲက ရတနာတွေကို နက်နဲကောင်းကင် ဓားဂိုဏ်းကပဲ သေချာပေါက် သိမ်းပိုက်သွားတော့မှာပေါ့။"

အုတ်မြစ်တည်ဆောက်ခြင်း ကျင့်ကြံသူ အမြောက်အမြားမှာ စိတ်အားထက်သန်စွာ ဆွေးနွေးနေကြပြီး၊ သူတို့၏ ရင်ထဲ၌ ရှိနေသော သားရဲတစ်သောင်း တောင်တန်းသို့ သွားလိုသည့် ဆန္ဒများမှာလည်း ချက်ချင်းပင် ငြိမ်းသတ်ခြင်း ခံလိုက်ရလေသည်။ အကယ်၍ နက်နဲကောင်းကင် ဓားဂိုဏ်းကသာ ပါဝင်လာမည်ဆိုပါက၊ မည်သည့် ကျင့်ကြံသူကများ သူတို့ကို ယှဉ်ပြိုင်ရဲပါမည်နည်း။

ခဏမျှ စကားပြောဆိုပြီးနောက် ကျန်းဖန်သည် သူ၏ ဂူဗိမာန်သို့ ပြန်လာခဲ့လေသည်။ ထိုအချိန်တွင် စုဝေဝေသည်လည်း သားရဲတစ်သောင်း တောင်တန်း၌ ဖြစ်ပျက်နေသော အဖြစ်အပျက်များကို သိရှိသွားခဲ့ပြီ ဖြစ်လေသည်။

"လင်တော်မောင်... ကံကောင်းလို့ ငါတို့ အချိန်မီ ထွက်ပြေးခဲ့မိတာပဲ။"

"အကယ်၍ ငါတို့သာ ထွက်မပြေးခဲ့ရင်၊ အခုအချိန်မှာ ပြေးဖို့ အခွင့်အရေးတောင် ရှိမှာ မဟုတ်တော့ဘူး။"

စုဝေဝေက များစွာ သက်သာရာရစွာဖြင့် ပြောလိုက်လေသည်။ ထင်ရှားသည်မှာ အင်အားကြီး အုပ်စုများမှာ သားရဲတစ်သောင်းတောင်တန်း အတွင်း၌ အပြင်းအထန် တိုက်ခိုက်နေကြပြီ ဖြစ်လေသည်။ ယခုအချိန်တွင် သားရဲတစ်သောင်း တောင်တန်းမှ ထွက်ခွာရန် မည်သည့် ဝိညာဉ်သင်္ဘောမျှ ရှိတော့မည် မဟုတ်ပေ။

လေလွင့်ကျင့်ကြံသူများမှာမူ ထိုနေရာ၌သာ ပိတ်မိနေကြတော့မည် ဖြစ်လေသည်။ အကယ်၍ စွန့်စားပြီး တောင်တန်းကြီး တစ်ခုလုံးကို ဖြတ်ကျော်ရန် ကြိုးစားမည်ဆိုလျှင်ပင်၊ အသက်ရှင်နိုင်ခြေမှာ အလွန်ပင် နည်းပါးလှပေသည်။ လမ်းခရီး၌ လုယက်သူများ သို့မဟုတ် အဆင့် (၂)၊ အဆင့် (၃) မိစ္ဆာသားရဲများနှင့်သာ တွေ့ဆုံခဲ့မည်ဆိုပါက သေဆုံးရန်သာ ရှိပေတော့သည်။

"မင်းမှာ အစွမ်းအစ တစ်ခုခု‌တော့ ရှိမယ်ထင်တယ်ဟေ့ ။"

"မင်းရဲ့ ကံတရားက အံ့သြစရာကောင်းလောက်အောင် ကောင်းတာပဲ။"

သောင်းပြောင်းလဲခြင်း ဆေးပေါင်းဖိုကြီးမှာလည်း ပြောစရာ စကားမဲ့နေတော့သည်။ အစတုန်းကတော့ သူ၏သခင်မှာ အလွန်အမင်း သတိကြီးလွန်းပြီး ကြောက်တတ်သူဟု ၎င်းက ထင်မှတ်ခဲ့လေသည်။ အနည်းငယ်မျှ လှုပ်ခတ်မှု ရှိသည်နှင့် ချက်ချင်း ထွက်ပြေးရန် ပြင်ဆင်တတ်သူ မဟုတ်ပါလား။

သို့သော် ရလဒ်ကို ကြည့်လိုက်သောအခါ သူ့သခင်၏ ဆုံးဖြတ်ချက်မှာ အလွန်ပင် မှန်ကန်နေခဲ့လေသည်။ အကယ်၍ အချိန်မီ ထွက်မပြေးခဲ့ပါက၊ သူတို့သည်လည်း ထိုရုန်းရင်းဆန်ခတ် အခြေအနေများအတွင်း ပိတ်မိနေပေလိမ့်မည်။ ထိုသို့ဆိုလျှင် ဘာတွေ ဆက်ဖြစ်လာမည်ကို မည်သူမျှ မသိနိုင်ပေ။

"သားရဲတစ်သောင်း တောင်တန်းရဲ့ ကိစ္စတွေက ငါတို့နဲ့ မဆိုင်တော့ပါဘူး။"

"အခု ငါတို့အတွက် အရေးကြီးဆုံးက ငါတို့ရဲ့ ကျင့်စဉ်အဆင့်ကို မြှင့်တင်ဖို့ပဲ။"

ကျန်းဖန်က စုဝေဝေကို ဖက်ထားရင်း ပြောလိုက်လေသည်။

"ဟုတ်ကဲ့ပါ... ကျွန်မလည်း ကျင့်စဉ်ကို ကြိုးကြိုးစားစား ကျင့်ပါ့မယ်။" စုဝေဝေက ခေါင်းညိတ်လိုက်လေသည်။

သူမ၌ အလွန်ကောင်းမွန်သော အရင်းအမြစ်များ ရှိနေသလို အဆင့် (၂) ဝိညာဉ်ကြောပေါ်တွင်လည်း နေထိုင်နေရလေသည်။ ထို့ကြောင့် အုတ်မြစ်တည်ဆောက်ခြင်း အဆင့်ကို အောင်မြင်ရန် အခွင့်အရေးမှာလည်း အဆပေါင်းများစွာ တိုးတက်လာခဲ့ပြီ ဖြစ်လေသည်။ အကယ်၍ သူမသာ အောင်မြင်အောင် မလုပ်နိုင်ခဲ့ပါက၊ အခြားသော လေလွင့်ကျင့်ကြံသူများ အတွက်လည်း မည်သို့မျှ ဖြစ်နိုင်လိမ့်မည် မဟုတ်ပေ။

ညအချိန်သို့ ရောက်သောအခါ၊ တိတ်ဆိတ်ငြိမ်သက်လှသော ကျင့်ကြံရာ အခန်းအတွင်း၌…

ထိုအချိန်တွင် ကျန်းဖန်သည် မြေပြင်ပေါ်၌ တင်ပျဉ်ခွေ ထိုင်လိုက်ပြီး မြေကမ္ဘာဆေးလုံး တစ်လုံးကို ထုတ်ယူလိုက်လေသည်။ ၎င်းသည် နက်နဲကောင်းကင် ဓားဂိုဏ်း ထံမှ ဆုလာဘ်အဖြစ် ရရှိခဲ့သော အဆင့် (၂) ဆေးလုံးတစ်မျိုး ဖြစ်ပေသည်။ သောင်းပြောင်းလဲခြင်း ဆေးပေါင်းဖိုကြီး၏ သန့်စင်ပေးမှုကြောင့် ၎င်းသည် မည်သည့် အဆိပ်အတောက်မျှ မရှိသော အထွတ်အထိပ် အရည်အသွေးရှိ ဆေးလုံးတစ်လုံး ဖြစ်လာခဲ့ချေပြီ။

သူသည် တွေဝေမနေတော့ဘဲ ၎င်းကို ချက်ချင်းပင် မျိုချလိုက်လေ၏။ ချက်ချင်းဆိုသလိုပင် မြေကမ္ဘာဆေးလုံးမှာ သန့်စင်သွားခဲ့ပြီး၊ ပြင်းထန်လှသော ဆေးစွမ်းအားများမှာ မြစ်ရေပြင်ကြီးတစ်ခုအလား သူ၏ 'မိန်' နှင့် 'ချီပင်လယ်' နက်ရှိုင်းသော နေရာဆီသို့ စီးဝင်သွားခဲ့ကာ၊ သူ၏ ကိုယ်တွင်းရှိ မူလဝိညာဉ်စွမ်းအားများကို တဖြည်းဖြည်းချင်း တိုးပွားလာစေခဲ့လေသည်။

၎င်းသည် အမှန်တကယ်ပင် အဆင့် (၂) ဆေးလုံးဟု ခေါ်ဆိုထိုက်လှပေသည်။ ၎င်း၌ ပါဝင်သော ဆေးစွမ်းအားမှာ သာမန် ဝိညာဉ်ဆေးပင်များနှင့် မည်သို့မျှ နှိုင်းယှဉ်၍ မရနိုင်ပေ။ ထို့ပြင် မည်သည့် ဆေးအဆိပ်မျှလည်း လုံးဝ မပါဝင်ပေ။ ဤအဆင့် (၂) ဆေးလုံး တစ်လုံးတည်းနှင့်တင် သူ၏ ပင်ပင်ပန်းပန်း ကျင့်ကြံအားထုတ်ရမည့် အချိန်များစွာကို သက်သာစေခဲ့လေသည်။

ထိုအခိုက်အတန့်တွင် ကျန်းဖန်သည် သူ၏ ခန္ဓာကိုယ်အတွင်းရှိ မူလဝိညာဉ်စွမ်းအားများ လျင်မြန်စွာ တိုးပွားလာသည့် ခံစားချက်အတွင်း၌ လုံးလုံးလျားလျား နှစ်မြုပ်နေခဲ့လေတော့သည်။

ကျင့်ကြံခြင်း၌ အချိန်ကုန်ဆုံးသည်ကို မသိနိုင်တော့ပေ။

မျက်တောင်တစ်ခတ် အတွင်းမှာပင် ခြောက်လတာ အချိန် ကုန်ဆုံးသွားခဲ့လေပြီ။ ထိုခြောက်လအတွင်း ကျန်းဖန်နှင့် စုဝေဝေတို့သည် ခုနစ်စင်ကြယ် တောင်ထိပ်ရှိ ဂူဗိမာန်အတွင်းမှာပင် နေထိုင်ခဲ့ကြပြီး မည်သည့်နေရာသို့မျှ မသွားခဲ့ကြပေ။ သူတို့နှစ်ဦးစလုံးမှာ ထိုနေရာ၌ပင် အေးအေးချမ်းချမ်း ကျင့်ကြံအားထုတ်နေခဲ့ကြပြီး၊ သူတို့၏ ကျင့်စဉ်အဆင့်များကို မှန်မှန်ကန်ကန် မြှင့်တင်နေခဲ့ကြလေသည်။

"နောက်ဆုံးတော့ အုတ်မြစ်တည်ဆောက်ခြင်း ဒုတိယအဆင့် အထွတ်အထိပ်ကို ရောက်ခဲ့ပြီ။"

"ငါ ခန့်မှန်းရသလောက်တော့ နောက်ထပ် အနည်းငယ်လောက် ထပ်ပြီး ကျင့်ကြံလိုက်ရင်၊ အုတ်မြစ်တည်ဆောက်ခြင်း တတိယအဆင့်ကို တက်လှမ်းနိုင်တော့မှာပဲ။"

ကျန်းဖန်သည် သူ၏ ကျင့်ကြံရာ အခန်းအတွင်း၌ ရှိနေရင်း၊ သူ၏ ခန္ဓာကိုယ်အတွင်းရှိ ကြွယ်ဝလှသော မူလဝိညာဉ်စွမ်းအားများကို အာရုံခံလိုက်လေသည်။ သူ၏ ခန္ဓာကိုယ်အတွင်းရှိ သွေးကြောပေါင်း ခုနစ်ခု၊ ရှစ်ခုခန့်မှာ ဆက်တိုက်ဆိုသလို ပွင့်သွားခဲ့ချေပြီ။

ကြီးမားလှသော ဝိညာဉ်စွမ်းအားများသည် သူ၏ ခန္ဓာကိုယ် တစ်ခုလုံးရှိ သွေးကြောများအတွင်း စီးဆင်းနေကြလေသည်။ သူ ယခင်က ရရှိခဲ့သော မြေကမ္ဘာဆေးလုံးများမှာလည်း လုံးဝ ကုန်ဆုံးသွားခဲ့ပြီး သူ၏ ကိုယ်တွင်း ဝိညာဉ်စွမ်းအားများအဖြစ် အပြည့်အဝ ပြောင်းလဲသွားခဲ့ချေပြီ။

သူသည် ဓာတ်ကြီးငါးပါး အင်းကျမ်းအပေါ် သူ၏ နားလည်သဘောပေါက်မှုမှာလည်း ပိုမိုမြင့်မားသော အဆင့်သို့ ရောက်ရှိသွားခဲ့ပြီဟု ခံစားလိုက်ရလေသည်။ ထို့အပြင် သူ၏ မြွေပျံကျင့်စဉ်မှာလည်း အတိုင်းအတာတစ်ခု အထိ တိုးတက်လာခဲ့လေသည်။ သို့သော်လည်း တိုးတက်မှုနှုန်းမှာမူ အတော်အတန် နှေးကွေးလှပေ၏။

မည်သို့ဖြစ်စေ အဆင့် (၂) သို့ ရောက်ရှိပြီးနောက်တွင် 'ချီ' ကျင့်ကြံခြင်းအဆင့်တုန်းကကဲ့သို့ လျင်မြန်စွာ တိုးတက်ရန်မှာ မဖြစ်နိုင်တော့ပေ။ သို့သော်လည်း သူ့အတွက်မူ ဤကဲ့သို့သော တိုးတက်မှုနှုန်းမှာပင် များစွာ ကျေနပ်ဖွယ် ရှိနေခဲ့လေသည်။ တစ်ဆင့်ချင်းစီ ဆက်လက် လျှောက်လှမ်းသွားမည်ဆိုပါက သူသည် အဆင့် (၂) အလယ်ပိုင်းသို့ မလွဲမသွေ တက်လှမ်းနိုင်မည် ဖြစ်ပေသည်။

ဝုန်း…

ထိုအခိုက်အတန့်တွင် ကျန်းဖန်၏ ရင်ထဲ၌ လှိုင်းတံပိုးတစ်ခု ဖြစ်ပေါ်လာခဲ့ပြီး၊ သူ၏ ကိုယ်ပေါ်ရှိ အခြေအနေပြ မျက်နှာပြင်ကို ချက်ချင်းပင် ဖွင့်ကြည့်လိုက်လေတော့သည်။

……

အခန်း (၂၈၆) - သန္ဓေတည်ဝိညာဉ်ဂိုဏ်း စစ်ပွဲနှင့် နောက်ထပ် ကံကြမ္မာ၏ ရွေးချယ်မှု (အပိုင်း ၂)

[ အမည် - ကျန်းဖန် ]

[ ကံကြမ္မာဇာတာ - ကောင်းကင်နှင့်အမျှ ကံကောင်းခြင်းများ၊ ဘေးဒုက္ခကြီးများကို ကျော်လွန်ရှင်သန်ပြီးနောက် ကြီးမားသော ကောင်းချီးများ ရရှိခြင်း ]

[ သက်တမ်း - ၈၀၀ နှစ် ]

[ ဝိညာဉ်အမြစ် - မြေကမ္ဘာ ဝိညာဉ်အမြစ် ]

[ ကံကောင်းခြင်းအမှတ် - ၄၅,၀၀၀ အမှတ် ]

[ ပိုင်ဆိုင်မှု - ဝိညာဉ်ကျောက်တုံး ၄၀၀,၀၀၀ ]

[ ကျင့်စဉ် (၁) - မြွေပျံကျင့်စဉ်၊ အုတ်မြစ်တည်ဆောက်ခြင်း အခန်းကဏ္ဍ (အဆင့် ၂ အစောပိုင်း) ]

[ ကျင့်စဉ် (၂) - ဓာတ်ကြီးငါးပါး အင်းကျမ်း၊ ဒုတိယအဆင့် ]

[ သွေးသားတော်ဝင်စွမ်းရည် - ဧကရာဇ်အကြည့်၊ လက်ဝါးလေပြေ ]

[ အသက်သွေးကြောအင်းများ - ကြာညိုမြေကမ္ဘာမီးလျှံအင်း (အဆင့်မြင့်)၊ ယင်ယန်မန်ဒါရင်ဘဲ ရုပ်သေးအင်း (ကျွမ်းကျင်)၊ နိမိတ်ဖတ်အင်း (ကျွမ်းကျင်)၊ ဝိညာဉ်တုန်ဟိန်းအင်း (အဆင့်မြင့်)၊ ကောင်းကင်မိုးကြိုးအင်း (ကျွမ်းကျင်)၊ စိတ်ညို့အင်း (ကျွမ်းကျင်) ]

[ ကျင့်စဉ်အဆင့် - အုတ်မြစ်တည်ဆောက်ခြင်း ဒုတိယအဆင့် (၉၉%) ]

[ အတတ်ပညာ - အဆင့် (၂) အနိမ့်စား အင်းဆရာ (၈၀%) ]

ထင်ရှားသည်မှာ လွန်ခဲ့သော ခြောက်လနှင့် နှိုင်းယှဉ်လျှင် သူ၏ စွမ်းရည်အားလုံးမှာ သိသိသာသာ တိုးတက်လာခဲ့ခြင်းပင် ဖြစ်ပေသည်။ အထူးသဖြင့် သူ၏ အသက်သွေးကြောအင်းများ၏ အဆင့်မှာ မြင့်မားလာခဲ့ပြီး၊ ဝိညာဉ်တုန်ဟိန်းအင်း နှင့် ကြာညိုမြေကမ္ဘာမီးလျှံအင်းတို့မှာ 'အဆင့်မြင့်'သို့ ရောက်ရှိသွားခဲ့ချေပြီ။

ကောင်းကင်မိုးကြိုးအင်း နှင့် စိတ်ညို့အင်းတို့သည်လည်း 'ကျွမ်းကျင်အဆင့်'သို့ တက်လှမ်းနိုင်ခဲ့ကြလေသည်။

ယင်ယန်မန်ဒါရင်ဘဲ ရုပ်သေးအင်း နှင့် နိမိတ်ဖတ်အင်းတို့သာလျှင် သိသိသာသာ တိုးတက်မှု မရှိသေးခြင်း ဖြစ်၏။ မည်သို့ဆိုစေ ဤအင်းနှစ်မျိုးကို မြှင့်တင်ရန်မှာ အလွန်ခက်ခဲလှပြီး ဖြတ်လမ်းဟူ၍ မရှိပါ၊ စိတ်ရှည်လက်ရှည် ကျင့်ကြံအားထုတ်ခြင်းကသာ တစ်ခုတည်းသော နည်းလမ်း ဖြစ်ပေသည်။

သို့သော်လည်း ဤတိုးတက်မှုများသည်ပင် သူ၏ တိုက်ခိုက်ရေး စွမ်းရည်ကို များစွာ မြှင့်တင်ပေးရန် လုံလောက်လှပေသည်။ ယခင်ကနှင့် နှိုင်းယှဉ်ပါက မည်သို့မျှ မယှဉ်နိုင်လောက်အောင်ပင်။ သေချာသည်မှာ ဤမျှ လျင်မြန်စွာ တိုးတက်လာခဲ့ခြင်းမှာ ကျန်းဖန်အနေဖြင့် ကံကောင်းခြင်း အမှတ်များကို အမြောက်အမြား အသုံးပြုခဲ့သောကြောင့်ပင် ဖြစ်လေသည်။

ထို့ကြောင့်ပင် သူ၏ လက်ထဲ၌ ကံကောင်းခြင်းအမှတ် ၄၅,၀၀၀ သာ ကျန်ရှိတော့ခြင်း ဖြစ်ပေသည်။

ရွှစ်…

နာရီဝက်ခန့် ကြာပြီးနောက် ကျန်းဖန်သည် ကျင့်ကြံရာ အခန်းအတွင်းမှ ထွက်လာခဲ့လေသည်။

"လင်တော်မောင်... သားရဲတစ်သောင်း တောင်တန်းမှာ နောက်ထပ် ပြသာနာကြီးတစ်ခု ဖြစ်နေပြန်ပြီ"

ကျန်းဖန် အခန်းထဲမှ ထွက်လာသည်ကို မြင်သောအခါ၊ စုဝေဝေသည် သူမ ရရှိထားသော သတင်းများကို မပြောရဘဲ မနေနိုင် ဖြစ်နေတော့သည်။ ဤရက်ပိုင်းအတွင်း သူမသည် ပတ်ဝန်းကျင် တောင်ထိပ်များရှိ ကျင့်ကြံသူများနှင့် ကောင်းမွန်သော ဆက်ဆံရေး တည်ဆောက်ထားခဲ့လေသည်။

မည်သို့ဖြစ်စေ ခုနစ်စင်ကြယ် တောင်ထိပ်ပေါ်တွင် နေထိုင်ကြသူများသည် အုတ်မြစ်တည်ဆောက်ခြင်း ကျင့်ကြံသူများချည်းသာ မဟုတ်ပေ။ ၎င်းတို့အပြင် ၎င်းတို့၏ ဆွေမျိုးသားချင်းများ၊ မိတ်ဆွေများနှင့် တပည့်များပါ ရှိနေကြခြင်း ဖြစ်ပေသည်။

အခြေခံအားဖြင့် ခုနစ်စင်ကြယ် တောင်ထိပ်သည် မိသားစုကြီးတစ်ခု နေထိုင်နေသကဲ့သို့ပင် ဖြစ်ပေသည်။ ထို့ကြောင့် သူမသည် ပတ်ဝန်းကျင်ရှိ 'ချီ' ကျင့်ကြံခြင်းအဆင့် ကျင့်ကြံသူများနှင့် ရောနှောနေထိုင်ရင်း သတင်းအချက်အလက် အချို့ကို ရရှိခဲ့ခြင်းပင် ဖြစ်၏။

"ပြသာနာကြီး ထပ်ဖြစ်ပြန်ပြီ ဟုတ်လား။ အဲဒါက ဘာလဲ" ကျန်းဖန်က စူးစမ်းစွာ မေးမြန်းလိုက်လေသည်။

သူသည် မူလက နက်နဲကောင်းကင် ဓားဂိုဏ်းမှ ကျင့်ကြံသူများ သားရဲတစ်သောင်း တောင်တန်းသို့ ဝင်ရောက်သွားခဲ့ပြီးနောက်၊ မိုးကြိုးအဟုန်အလား ပြင်းထန်သော စွမ်းအားများဖြင့် ရွှေအမြုတေ အင်အားစုများကို နှိမ်နင်းကာ ထိုနေရာရှိ မတည်ငြိမ်မှုများကို လုံးဝ ငြိမ်သက်သွားစေလိမ့်မည်ဟု ထင်မှတ်ခဲ့လေသည်။

ခြောက်လကြာပြီးနောက်တွင် သားရဲတစ်သောင်း တောင်တန်း၌ နောက်ထပ် ကြီးမားသော အပြောင်းအလဲတစ်ခု ပေါ်ထွက်လာလိမ့်မည်ဟု သူ မထင်ထားခဲ့မိပေ။

"အဲဒါက သန္ဓေတည်ဝိညာဉ် ဂူဗိမာန်နဲ့ ပတ်သက်နေတာ။ ဝမ်ဟွာအရှင်သခင်ရဲ့ အမွေအနှစ်ကို သိမ်းပိုက်ဖို့ ကြိုးစားနေတာက နက်နဲကောင်းကင် ဓားဂိုဏ်း တစ်ခုတည်း မဟုတ်ဘူးတဲ့။ နောက်ထပ် သန္ဓေတည်ဝိညာဉ် အင်အားစုတစ်ခုဖြစ်တဲ့ ရှန်နွန်ဂိုဏ်းကလည်း ပါဝင် လှုပ်ရှားလာပြီတဲ့။ အခုဆိုရင် အဲဒီ သန္ဓေတည်ဝိညာဉ် ဂိုဏ်းကြီးနှစ်ခုက ကျင့်ကြံသူတွေက သားရဲတစ်သောင်း တောင်တန်းမှာ တိုက်ပွဲ ဖြစ်ပွားနေကြပြီ။ သန္ဓေတည်ဝိညာဉ်ရှင်တွေတောင်မှ အဲဒီတိုက်ပွဲမှာ ပါဝင်လာကြတာကြောင့် ကောင်းကင်နဲ့ မြေကြီးက တုန်ခါနေသလို၊ နေနဲ့ လကလည်း အလင်းရောင် ကွယ်ပျောက်နေရပြီတဲ့" ဟု စုဝေဝေက စိတ်လှုပ်ရှားစွာ ပြောကြားလိုက်လေသည်။

သားရဲတစ်သောင်း တောင်တန်းသည် သေချာပေါက် အန္တရာယ်များလိမ့်မည်ဟု သူမ သိထားသော်လည်း၊ ဤမျှအထိ အန္တရာယ် ကြီးမားလိမ့်မည်ဟုတော့ သူမ မထင်ထားခဲ့ပေ။ ယခုအခါ သန္ဓေတည်ဝိညာဉ်ရှင်များပင် ပါဝင် လှုပ်ရှားလာကြပြီဖြစ်ရာ ၎င်းမှာ တကယ်ပင် မှန်းဆရ ခက်ခဲလှပေသည်။

"ဘာဖြစ်လို့ သူတို့က ရှန်နွန်ဂိုဏ်းကို သွားပြီး ရန်စမိကြတာလဲ" ကျန်းဖန်မှာ များစွာ တွေဝေသွားခဲ့ရလေသည်။

ထို ရှန်နွန်ဂိုဏ်း ဆိုသည်မှာ နက်နဲကောင်းကင် ဓားဂိုဏ်း နှင့် မဝေးလှသော နေရာတွင် တည်ရှိသည့် သန္ဓေတည်ဝိညာဉ် ဂိုဏ်းတစ်ခု ဖြစ်ကြောင်း သူ သိရှိထားလေသည်။ တစ်ဖက်လူ၏ အင်အားမှာလည်း နက်နဲကောင်းကင် ဓားဂိုဏ်းထက် မလျော့လှပေ။

လက်တွေ့တွင် ထိုဂိုဏ်းနှစ်ခုအကြား၌ ပွတ်တိုက်မှုများနှင့် တိုက်ပွဲကြီးများမှာ မကြာခဏဆိုသလို ဖြစ်ပွားလေ့ရှိကြလေသည်။ သူတို့၏ ဆက်ဆံရေးမှာ မူလကတည်းက မကောင်းလှဟု ဆိုနိုင်လေသည်။

"ကြားရသလောက်တော့ ဝမ်ဟွာအရှင်သခင်က တစ်ခါတုန်းက ရှန်နွန်ဂိုဏ်းဆီကနေ လျှို့ဝှက်ရတနာတစ်ခုနဲ့ ဆေးဆရာ အမွေအနှစ်တစ်ခုကို ခိုးယူခဲ့ဖူးတယ်တဲ့။ အဲဒါကြောင့် ရှန်နွန်ဂိုဏ်းက ကြီးမားတဲ့ ဆုံးရှုံးမှုတွေနဲ့ ရင်ဆိုင်ခဲ့ရတာပေါ့။ ဒါကြောင့် ရှန်နွန်ဂိုဏ်းက ဝမ်ဟွာအရှင်သခင် ချန်ထားခဲ့တဲ့ ရတနာတွေဟာ သူတို့နဲ့ပဲ ထိုက်တန်တယ်လို့ ယူဆနေကြတာလေ" ဟု စုဝေဝေက လေးလေးနက်နက် ရှင်းပြလိုက်လေသည်။

"လျှောက်ပြောနေတာပဲ။ ဘယ်လိုမျိုး အဓိပ္ပာယ်မရှိတဲ့ ရှန်နွန်ဂိုဏ်းလဲ။ သူတို့အားလုံးက ယုတ်မာပြီး အရှက်မရှိတဲ့ လူယုတ်မာတွေပဲကွ။ ငါ့ရဲ့ အရင်သခင် အဟောင်းကို ပုတ်ခတ်စော်ကားနေကြတာပဲ"

"ငါ့သခင်အဟောင်းက တစ်ခါတုန်းက ရှန်နွန်ဂိုဏ်းမှာ ဆေးဖော်စပ်တဲ့ နည်းပညာတွေ သွားပြီး တောင်းဆိုခဲ့ဖူးပေမဲ့၊ သူတို့က သူ့ကို အထင်သေးခဲ့ကြတာ။ နောက်ပိုင်းမှာ ငါ့သခင်က အဆင့် (၄) ဆေးဆရာ တစ်ယောက် ဖြစ်လာပြီး ဆေးလုံး အမြောက်အမြားကို သန့်စင်နိုင်တဲ့အခါကျမှ၊ ရှန်နွန်ဂိုဏ်းက သူ့ကို အပုပ်ချခဲ့ကြတာလေ။ ငါ့သခင်က သူတို့ဂိုဏ်းရဲ့ ဆေးဖော်စပ်နည်းတွေကို ခိုးယူခဲ့ပါတယ် ဆိုပြီးတော့ပေါ့"

"ရှန်နွန်ဂိုဏ်းက သန္ဓေတည်ဝိညာဉ်ရှင်တွေတောင်မှ ငါ့သခင်ရဲ့ လျှို့ဝှက်ချက်တွေကို ရယူဖို့အတွက် တောင်ပေါ်ကနေ ဆင်းပြီး လိုက်လံ ဖမ်းဆီးခဲ့ကြသေးတာ" ဟု သောင်းပြောင်းလဲခြင်း ဆေးပေါင်းဖိုကြီးက ဒေါသတကြီး ဆဲဆိုလိုက်လေတော့သည်။

ထင်ရှားသည်မှာ ၎င်းသည် ဝမ်ဟွာအရှင်သခင်နှင့်အတူ ရှန်နွန်ဂိုဏ်း နှင့် ကြီးမားသော ပဋိပက္ခများ၊ ရန်ငြိုးနက်များ ရှိခဲ့ဖူးခြင်းပင် ဖြစ်ပေသည်။ ထို့ကြောင့်လည်း ရှန်နွန်ဂိုဏ်း၏ ပုပ်ခတ်စော်ကားမှုများကို ၎င်းက လုံးဝ သည်းမခံနိုင်ခြင်း ဖြစ်မည်။

"ရန်ငြိုးတွေ ရှိခဲ့ရင်တောင်မှ အဲဒါက လွန်ခဲ့တဲ့ နှစ်ပေါင်း တစ်ထောင်ကျော်က ကိစ္စပဲ မဟုတ်လား။ ဝမ်ဟွာအရှင်သခင်ရဲ့ မျိုးဆက်က သန္ဓေတည်ဝိညာဉ်ရှင်တွေ အားလုံး ကျဆုံးကုန်ကြပြီ မဟုတ်လား" ကျန်းဖန်က ဝိညာဉ်အာရုံဖြင့် မေးမြန်းလိုက်လေသည်။

"ဟုတ်တယ်... သူတို့တွေ ကျဆုံးသွားခဲ့ကြပြီ။ ဒါပေမဲ့ သူတို့ရဲ့ တပည့်တွေနဲ့ မျိုးဆက်တွေကတော့ ရှိနေတုန်းပဲ။ အဲဒီလူတွေကလည်း တစ်ယောက်နဲ့ တစ်ယောက် အကျင့်ချင်း တူတူပဲ၊ ဘယ်သူမှ မကောင်းကြပါဘူး။ အကယ်၍ မင်း နောက်နောင်မှာ ရှန်နွန်ဂိုဏ်းက လူတွေနဲ့ တွေ့ရင် သတိထားတာ အကောင်းဆုံးပဲ" ဟု ဆေးပေါင်းဖိုကြီးက ရှန်နွန်ဂိုဏ်း ကျင့်ကြံသူများအပေါ် မည်သည့် ခံစားချက်ကောင်းမျှ မရှိဘဲ လှောင်ပြောင် ပြောဆိုလိုက်လေသည်။

ဤသည်ကို တွေးတောရင်း ကျန်းဖန်က စုဝေဝေကို ကြည့်လိုက်လေသည်။ "ဒါဆိုရင် နက်နဲကောင်းကင် ဓားဂိုဏ်း နဲ့ ရှန်နွန်ဂိုဏ်းက တကယ်ပဲ စပြီး တိုက်ခိုက်နေကြပြီပေါ့။ သာမန်အားဖြင့်ဆိုရင် ဒီလို သန္ဓေတည်ဝိညာဉ် ဂိုဏ်းကြီးနှစ်ခုက ဒီအတိုင်း အလွယ်တကူ တိုက်ပွဲ ဖြစ်မှာ မဟုတ်ဘူးလေ"

"အဲဒါကတော့ ဟုတ်ပါတယ်"

"ဘာပဲဖြစ်ဖြစ် အားလုံးက သန္ဓေတည်ဝိညာဉ် ဂိုဏ်းသားတွေ ဖြစ်ကြတာဆိုတော့၊ တိုက်ပွဲ ဖြစ်ဖို့က မလွယ်လှပါဘူး။ ပြဿနာက အဲဒီ သန္ဓေတည်ဝိညာဉ် ဂူဗိမာန်ရဲ့ ဗဟိုချက်မ နေရာမှာ ရတနာတွေ အရမ်းများလွန်းနေတာပဲ"

"ကြားရသလောက်ဆိုရင် နက်နဲကောင်းကင် ဓားဂိုဏ်းက မျက်စိအမြင် စွမ်းအားကို ကျွမ်းကျင်တဲ့ သန္ဓေတည်ဝိညာဉ်ရှင် တစ်ပါးက အစီရင်စုရဲ့ လျှို့ဝှက်ချက်တွေကို ဖောက်ထွင်း မြင်နိုင်ခဲ့တယ်တဲ့။ အဲဒီကျင့်ကြံသူက ဂူဗိမာန်အတွင်းမှာ အဆင့် (၄) ဆေးလုံး အမြောက်အမြား ချန်ထားခဲ့တာကို ရှာတွေ့ခဲ့တယ်လေ။ အဲ့ဒီအပြင် အဲဒီဆေးလုံးတွေက လုံးဝ အပြစ်အနာအဆာ မရှိတဲ့ အထွတ်အထိပ် အရည်အသွေးရှိ ဆေးလုံးတွေတဲ့။ အကယ်၍သာ အဲဒါတွေကို ရရှိခဲ့မယ်ဆိုရင်၊ ဂိုဏ်းအတွင်းမှာ သန္ဓေတည်ဝိညာဉ်ရှင် ဘယ်လောက်တောင် ထပ်ပြီး တိုးလာမလဲဆိုတာ ဘယ်သူ သိနိုင်မှာလဲ"

"ဒါဟာ သန္ဓေတည်ဝိညာဉ်ရှင်တွေ အတွက်တောင်မှ ကြီးမားလှတဲ့ အခွင့်အလမ်းကြီး တစ်ခုပဲလေ။ အဲဒါက နက်နဲကောင်းကင် ဓားဂိုဏ်းက ကျင့်ကြံသူတွေကို အတိုင်းထက်အလွန် မက်မောသွားစေခဲ့တာပေါ့။ ဂိုဏ်းတစ်ခုလုံးရဲ့ အင်အားကို အသုံးပြုပြီး ပေးဆပ်ရပါစေဦး၊ သူတို့တွေကတော့ အဲဒီဂူဗိမာန်ကို ရှန်နွန်ဂိုဏ်း လက်ထဲ ပါသွားအောင် အဖြစ်ခံမှာ မဟုတ်ဘူး" ဟု စုဝေဝေက အကျိုးအကြောင်း ခိုင်လုံစွာဖြင့် ရှင်းပြလိုက်လေသည်။

သံသယဖြစ်စရာ မလိုပါ။ ဤမျှကြီးမားလှသော အကျိုးစီးပွားများကြောင့်သာလျှင် သန္ဓေတည်ဝိညာဉ် ဂိုဏ်းကြီးနှစ်ခုအကြား စစ်ပွဲ ဖြစ်ပွားခဲ့ခြင်းပင် ဖြစ်ပေသည်။ ထို့ပြင် မည်သည့် ကျင့်ကြံသူမျှ ဤမက်လုံးကို ငြင်းဆန်နိုင်လိမ့်မည် မဟုတ်ပေ။ သန္ဓေတည်ဝိညာဉ်ရှင်များ အတွက်မူ အဆင့် (၄) ဆေးလုံးများထက် ပို၍ အဖိုးတန်သောအရာ မရှိပေ။

အကယ်၍ ၎င်းတို့သာ အဆင့် (၄) ဆေးလုံး အမြောက်အမြားကို ရရှိခဲ့မည်ဆိုပါက၊ နောင်တစ်ချိန်တွင် နတ်ဘုရားပြောင်းလဲခြင်း အဆင့်သို့ တက်လှမ်းနိုင်ရန်ပင် မျှော်လင့်ချက် ရှိလာပေလိမ့်မည်။ ထို့ကြောင့် မည်သည့် သန္ဓေတည်ဝိညာဉ်ရှင်ကများ လက်လျှော့လိုပါမည်နည်း။

"ဒါကတော့ သဘာဝကျပါတယ်"

"ငါ့ရဲ့ အရင်သခင်က အဆင့် (၄) ဆေးဆရာ အဆင့်နှောင်းပိုင်း ကျင့်ကြံသူ တစ်ဦးလေ။ ငါဖြစ်တဲ့ သောင်းပြောင်းလဲခြင်း ဆေးပေါင်းဖို နဲ့ ပေါင်းစပ်လိုက်တဲ့အခါ၊ ဆေးလုံး ဖြစ်ပေါ်နှုန်းက ၁၀၀ ရာခိုင်နှုန်းပဲ။ ငါ့သခင် ကျဆုံးသွားခဲ့တာ မှန်ပေမဲ့၊ သူချန်ထားခဲ့တဲ့ အဖိုးတန် ဆေးလုံးတွေကတော့ အပုံလိုက် ရှိနေဦးမှာ။ နှမြောစရာကောင်းတာက မင်းရဲ့ စွမ်းအားက အရမ်း အားနည်းနေတာပဲ။ မဟုတ်ရင် အထဲမှာ ရှိသမျှ ဆေးလုံးအားလုံးကို မင်း သွားယူလို့ ရတာပေါ့" ဟု ဆေးပေါင်းဖိုကြီးက သဘာဝကျကျပင် ပြောလိုက်လေသည်။

၎င်းသည်လည်း ထိုဂူဗိမာန်အတွင်း၌ ဆေးလုံး မည်မျှအထိ ကျန်ရှိနေသလဲ ဆိုသည်ကို ကောင်းစွာ သိရှိနေခြင်းပင် ဖြစ်ပေသည်။ ၎င်းမှာ မည်သည့် သန္ဓေတည်ဝိညာဉ် ဂိုဏ်းကြီးကိုမဆို ရူးသွပ်သွားစေရန် လုံလောက်လှပေ၏။ သို့သော်လည်း ၎င်းမှာ ဝိညာဉ်လက်နက် တစ်ခုသာ ဖြစ်သဖြင့် ဆေးလုံးများမှာ ၎င်းအတွက် အသုံးမဝင်ပေ။

"နှမြောစရာ လုံးဝ မရှိပါဘူး"

"အခွင့်အလမ်းက ကြီးမားတာ မှန်ပေမဲ့၊ စွမ်းအား မရှိရင် အဲဒါကို မထိန်းသိမ်းနိုင်ဘူးလေ"

"ကိုယ့်ခေါင်းနဲ့ တန်တဲ့ ဦးထုပ်ကိုပဲ ဆောင်းရမယ်။ ကိုယ့်စွမ်းအားနဲ့ မတန်တဲ့ ရတနာတွေကို မဆင်မခြင် ရယူဖို့ ကြိုးစားတာဟာ ကိုယ့်သေတွင်းကိုယ် တူးတာနဲ့ အတူတူပဲ" ဟု ကျန်းဖန်က မည်သည့် နောင်တမျှ မရှိဘဲ တည်ငြိမ်စွာ ပြောလိုက်လေသည်။

ဝမ်ဟွာအရှင်သခင် ချန်ထားခဲ့သော ဂူဗိမာန်အတွင်း၌ ရတနာများစွာ ရှိနေသည်မှာ မှန်ပေသည်။ သို့သော် သူ၏ ကိုယ်ပိုင်စွမ်းအားမှာ မလုံလောက်သေးသဖြင့်၊ အတွင်းရှိ ရတနာများသည် သူ့အတွက် မဟုတ်သေးပေ။

ယခုအချိန်တွင် သူသည် တိတ်တဆိတ် ကျင့်ကြံအားထုတ်ပြီး သူ၏ ကျင့်စဉ်အဆင့်ကို ဖြည်းဖြည်းချင်း မြှင့်တင်ရန်သာ လိုအပ်ပေသည်။

ကျင့်စဉ်လောက၌ အရာအားလုံးသည် အပေါ်ယံသာ ဖြစ်ပြီး၊ မိမိ၏ ကျင့်စဉ်အဆင့်ကသာ အစစ်အမှန် ဖြစ်ပေသည်။ အကယ်၍ သူသာ နတ်ဘုရားပြောင်းလဲခြင်း အဆင့်ရှိ ကျင့်ကြံသူတစ်ဦး ဖြစ်နေမည်ဆိုပါက၊ ကျင့်စဉ်လောက၌ သူ မရနိုင်သော ရတနာဟူ၍ အဘယ်မှာ ရှိပါမည်နည်း။

"တကယ် မှန်ပါတယ်" ဆေးပေါင်းဖိုကြီးကလည်း ဤအချက်ကို သဘောတူလိုက်လေသည်။

ကျင့်စဉ်လောက၌ ဤကဲ့သို့သော မက်လုံးများကို ငြင်းဆန်နိုင်သော ကျင့်ကြံသူမှာ များများစားစား မရှိလှပေ။

"လင်တော်မောင်..."

"ကြားရသလောက်ဆိုရင် နက်နဲကောင်းကင် ဓားဂိုဏ်းက သားရဲတစ်သောင်း တောင်တန်းဆီကို ဝိညာဉ်သင်္ဘော အမြောက်အမြား စေလွှတ်ထားပြီးပြီတဲ့။ ကျွန်မ စိုးရိမ်တာက ဒီနယ်မြေကလည်း မကြာခင်မှာ ရှုပ်ထွေးလာတော့မှာလားလို့လေ" ဟု စုဝေဝေက အလွန်ပင် စိုးရိမ်တကြီး ပြောလိုက်လေသည်။

ခြောက်လတာ ငြိမ်းချမ်းမှုအပြီးတွင် အခြေအနေများမှာ ဤမျှ လျင်မြန်စွာ ပြန်လည် မတည်မငြိမ် ဖြစ်လာလိမ့်မည်ဟု သူမ မထင်ထားခဲ့ပေ။ ကျင့်စဉ်လောကကြီးမှာ ဤမျှ ကျယ်ပြောလှသော်လည်း၊ တည်ငြိမ်အေးချမ်းသော နေရာဟူ၍ များများစားစား မရှိလှပေ။

ဝုန်း…

ကျန်းဖန် တစ်စုံတစ်ရာ ပြန်ပြောရန် ပြင်လိုက်သော်လည်း၊ ထိုအခိုက်အတန့်တွင် သူ၏ 'မိန်' နှင့် 'ချီပင်လယ်' နက်ရှိုင်းသော နေရာရှိ နိမိတ်ဖတ်အင်းသည် စတင် တုန်ခါလာခဲ့ချေပြီ။ ၎င်းသည် အနာဂတ်နှင့် ပတ်သက်သော သတင်းစကားတစ်ခုကို အာရုံခံမိလိုက်ပုံရပေသည်။

သတင်းအချက်အလက် တစ်ခုသည် သူ၏ အသိစိတ်ထဲသို့ ချက်ချင်း စီးဝင်လာခဲ့လေတော့၏။

"စစ်မက်များ ဖြစ်ပွားပြီး မိစ္ဆာများ ကတိုက်ကရိုက် ကကြလိမ့်မည်။ ခုနစ်စင်ကြယ် တောင်ထိပ်သည် ဘေးကင်းသည်ဟု ထင်ရသော်လည်း၊ အမှန်စင်စစ်တွင် အန္တရာယ် ကြီးမားလှပေသည်။"

"ခုနစ်စင်ကြယ်တောင်ထိပ်မှ ထွက်ခွာ၍၊ ဘေးဒုက္ခကို ရှောင်ရှားရန် 'ဂျိုပါတောင်' သို့ သွားပါ - ကံကောင်းခြင်း အနည်းငယ်။"

"ခုနစ်စင်ကြယ် တောင်ထိပ်၌ ဆက်လက် ကျင့်ကြံနေထိုင်ပါ - ဘေးဒုက္ခ အနည်းငယ်။"

…..