တာအိုအဆင့်၏ အထက်

ထန်ထျန်း၏ ထိုစကားကို ကြားလိုက်ရသောအခါ ကြောင်လေး၏ ခန္ဓာကိုယ်မှာ တောင့်တင်းသွားခဲ့သည်။

၎င်းက နောက်သို့ အလိုအလျောက် ဆုတ်လိုက်ပြီး အမြီးကို ကိုယ့်ကိုယ်ကိုယ် နီးကပ်စွာ ရစ်ပတ်လိုက်၏။

"ဘယ်... ဘယ်လိုဖြစ်နိုင်မှာလဲ"

"ငါက ဒီနေရာလွတ်ထဲမှာပဲ အမြဲနေနေတာကို၊ အဲဒီလူတွေက ဘယ်လိုလုပ် ရှာတွေ့သွားတာလဲ"

ကြောင်လေး၏ မျက်လုံးများထဲတွင် စိုးရိမ်ထိတ်လန့်မှုများ ပြည့်နှက်နေပေသည်။

ထန်ထျန်းက အသာအယာ သက်ပြင်းချကာ "မင်း အချိန်နှင့် ဟင်းလင်းပြင် ကြေးမုံ အကြောင်း ကြားဖူးလား"

"အဲဒါက အတိတ်နဲ့ ပစ္စုပ္ပန်ကို ထိုးဖောက်မြင်နိုင်တဲ့ တာအိုလက်နက် တစ်မျိုးပဲ။"

ကြောင်လေးက ခေါင်းမော့လိုက်ပြီး "အင်း... အဲဒီလိုမျိုး အရာတစ်ခုအကြောင်း ကြားဖူးသလိုပဲ။"

"အဲဒီ တာအိုလက်နက်က တစ်စုံတစ်ယောက် ဒါမှမဟုတ် ကိစ္စတစ်ခုရဲ့ အတိတ်နဲ့ အနာဂတ်ကို ကြည့်ဖို့ အသုံးပြုနိုင်တာ။"

"မင်း အဲဒီအရာနဲ့ တွေ့ခဲ့တာလား"

ထန်ထျန်းက ခေါင်းညိတ်ပြလိုက်၏။

"ထျန်းယွမ်အင်မော်တယ်အရှင်က ထျန်းယန်ရှန်း သေဆုံးမှုကို စုံစမ်းရင်း ကောင်းကင်ထိပ်ဆုံးကနေ အချိန်နှင့် ဟင်းလင်းပြင် ကြေးမုံ ဆိုတဲ့ တာအိုလက်နက် တစ်ခုကို တောင်းခံခဲ့တယ်။"

"သူက အဲဒီတုန်းက အဖြစ်အပျက်တွေကို မြင်ခဲ့ရသလို မင်းရဲ့ ပုံရိပ်ကိုလည်း မြင်သွားခဲ့တယ်။"

"အဲဒါကြောင့် ကောင်းကင်ထိပ်ဆုံးက တစ်စုံတစ်ဦးသော ဖြစ်တည်မှုက မင်းကို စောင့်ကြည့်သွားပြီ"

ကြောင်လေး၏ ခန္ဓာကိုယ်မှာ နောက်သို့ ထပ်မံ ဆုတ်သွားပြီး ခြေထောက်လေးဖက်မှာ တစ်ခုနှင့်တစ်ခု ထပ်လုနီးပါး ဖြစ်နေချေပြီ။

"ဒါပေမဲ့... ငါက မင်းရဲ့ ဥ ထဲကနေ အပြင်မထွက်ဘဲ အမြဲနေနေရင် သူ ငါ့ကို ရှာတွေ့နိုင်မှာ မဟုတ်ဘူး မလား"

ထန်ထျန်းက "မင်းပြောတာ မှန်ပါတယ်။"

"ဒါပေမဲ့..."

"သူက အခု ငါ့ကိုပါ တစ်ခါတည်း စောင့်ကြည့်နေပြီ"

ကြောင်လေး : ...

အတိအကျ ဘာတွေ ဖြစ်ခဲ့သည်ကို မသိသော်လည်း ၎င်းမှာ တစ်စုံတစ်ဦး၏ ကျော့ကွင်းထဲသို့ ရောက်သွားသကဲ့သို့ ခံစားလိုက်ရသည်။

ထိုကဲ့သို့သော ဖြစ်တည်မှုမျိုးကို ၎င်းက ကောင်းစွာ နားလည်ထားရာ ထန်ထျန်းသာ အကြည့်ခံလိုက်ရပါက ၎င်းကိုယ်တိုင်လည်း လွတ်မြောက်နိုင်မည် မဟုတ်ကြောင်း သိပေသည်။

ထိတ်လန့်နေသော ကြောင်လေးကို ကြည့်ကာ ထန်ထျန်းက စိတ်ထဲမှ သက်ပြင်းချလိုက်ပြီး "သိပ်ပြီးတော့လည်း မကြောက်ပါနဲ့၊ ငါက အခုမှ အကြည့်ခံရရုံတင် ရှိသေးတာပါ။"

"အဲဒီလို ဖြစ်တည်မှုမျိုးက အောက်လောကအပေါ် လွှမ်းမိုးနိုင်စွမ်း အကန့်အသတ် ရှိတယ်၊ ငါ့မှာ ဖြေရှင်းနိုင်တဲ့ အစွမ်း ရှိပါသေးတယ်။"

"ဒါပေမဲ့ ငါတို့က ဒီကမ္ဘာထဲမှာ တစ်သက်လုံး ပုန်းနေလို့ မရဘူး။"

"ဒါကြောင့် မင်းက ငါ့ကို လုံလောက်တဲ့ သတင်းအချက်အလက်တွေ ပြောပြမှသာ နောက်ထပ် ဘာဆက်လုပ်ရမလဲဆိုတာ ငါ ဆုံးဖြတ်နိုင်မှာ၊ နားလည်လား"

ကြောင်လေး တိတ်ဆိတ်သွား၏။

ဤသတင်းမှာ ၎င်းအတွက် အလွန် ရုတ်တရက် ဆန်လွန်းလှသဖြင့် မည်သည့် စိတ်ပိုင်းဆိုင်ရာ ပြင်ဆင်မှုမျှ မရှိခဲ့ပေ။

ကြာမြင့်စွာ တိတ်ဆိတ်နေပြီးမှ ၎င်းက ဖြည်းဖြည်းချင်း ခေါင်းညိတ်လိုက်သည်။

"ကောင်းပြီလေ။"

"မင်း သိချင်တာ မှန်သမျှ ငါ အကုန် ပြောပြမယ်..."

ခဏအကြာတွင် ကြောင်လေး၏ ပြောပြချက်အရ ထန်ထျန်းက ၎င်း၏ စစ်မှန်သော နောက်ခံနှင့် တာအိုအဆင့်၏ အထက်ရှိ အခြေအနေများကို နားလည်သွားခဲ့တော့သည်။

ကြောင်လေးက မွေးရာပါ ကမ္ဘာဦး ဝိညာဉ် တစ်ဦး မဟုတ်ဘဲ ၎င်း၏ အတိတ်ဘဝမှာ ဆီးနှင်းလုံးကဲ့သို့ ဖြူဖွေးသော ကြောင်တစ်ကောင် ဖြစ်ခဲ့ခြင်းပင်။

၎င်း၏ သခင်မှာ မည်သူဖြစ်သည်ကို မမှတ်မိတော့သော်လည်း သခင်နှင့်အတူ ကောင်းကင်၌ လှည့်လည်သွားလာခဲ့ပြီး မည်သည့် အစွမ်းထက် သက်ရှိမျှ သူတို့ကို မတားဆီးနိုင်ခဲ့သည်ကိုမူ ရှင်းလင်းစွာ မှတ်မိနေပေသည်။

ဤအခြေအနေအပေါ် ထန်ထျန်းက တစ်စုံတစ်ဦးက ၎င်း၏ မှတ်ဉာဏ်များကို တမင် ဖျောက်ပစ်လိုက်ခြင်း ဖြစ်လိမ့်မည်ဟု ယူဆလိုက်ပြီး ကြောင်လေးကလည်း သဘောတူခဲ့သည်။

ထို့ပြင် ထိုသူက ကြောင်လေးကို နောက်ထပ် တာဝန်တစ်ခု ပေးအပ်ခဲ့သေးသည်။

၎င်းမှာ ကောင်းမွန်စွာ ကြီးပြင်းလာရန်နှင့် "တစ်စုံတစ်ယောက်" ပြန်လာသည်အထိ စောင့်ဆိုင်းရန် ဖြစ်ပြီး မကောင်းသော ရည်ရွယ်ချက်ရှိသည့် သူများထံမှ ပုန်းအောင်းနေရန် ဖြစ်ပေသည်။

"အဲဒီ တစ်စုံတစ်ယောက် ဆိုတာက ဘယ်သူလဲဆိုတာ ငါ အတိအကျ မသိပေမဲ့ ငါ့ရဲ့ သခင်တော့ သေချာပေါက် မဟုတ်ဘူး၊ ဒါပေမဲ့ သူ ပေါ်လာတာနဲ့ ငါ ချက်ချင်း သိနိုင်မှာပါ။"

"အဲဒီလူရဲ့ အစွမ်းက ငါ့သခင်ထက် မနိမ့်သလို ဒီကမ္ဘာပေါ်မှာ အမြင့်ဆုံး အဆင့်မှာ ရှိတဲ့ သက်ရှိတွေထဲက တစ်ဦးပဲ။"

"သူ ပေါ်လာတဲ့အခါမှာတော့ ငါ့ရဲ့ မှတ်ဉာဏ်တွေနဲ့ ချိပ်ပိတ်မှုတွေ အားလုံး ပွင့်သွားပြီး အရင်လို အခြေအနေမျိုးဆီ ပြန်ရောက်သွားမှာ"

ကြောင်လေးက ပြော လိုက်သည်။

ထို့ကြောင့် ၎င်းက ထိုလူမှာ ထန်ထျန်း မဟုတ်ကြောင်း အသေအချာ ပြောနိုင်ခြင်း ဖြစ်၏။

မဟုတ်ပါက ပထမဆုံး တွေ့စဉ်ကတည်းက တိုက်ခိုက်နေကြမည် မဟုတ်ပေ။

ဤတာဝန်မှာ ကြောင်လေး၏ ဝိညာဉ်ထဲ၌ နက်ရှိုင်းစွာ အမြစ်တွယ်နေပြီး ၎င်းမှာ ထိုတာဝန်ကို အစွမ်းကုန် ပြီးမြောက်အောင် လုပ်ဆောင်ရမည် ဖြစ်သည်။

၎င်းကိုယ်တိုင်ကလည်း မကောင်းသော ရည်ရွယ်ချက်ရှိသည့် ပုဂ္ဂိုလ်ကြီးများ၏ လက်ထဲသို့ ရောက်ရှိကာ သက်ရှိအပေါင်းကို ဒုက္ခပေးမည့် ပစ္စည်း တစ်ခု ဖြစ်သွားရန် အလိုမရှိပေ။

ဤအကြောင်းအရာများအပြင် ကြောင်လေး၏ မှတ်ဉာဏ်များမှာ လုံးဝ ပြန်လည် ကြည် လင်လာခဲ့ပြီ ဖြစ်ရာ တာအိုအဆင့်၏ အထက်ရှိ ပုဂ္ဂိုလ်များအကြောင်းကိုလည်း ကောင်းစွာ နားလည်ထားခဲ့ပြီ ဖြစ်သည်။

အင်မော်တယ်ဧကရာဇ်၏ အထက်မှာတော့ တာအိုအဆင့် ပင် ဖြစ်၏။

တာအိုအဆင့် ပုဂ္ဂိုလ်များကို အဆင့် ခုနစ်ဆင့် ခွဲခြားထားပေသည်။

၎င်းတို့မှာ ကျန့်တာအို၊ ကျိတာအို၊ ချန်ရှန်းတာအို၊ ထိုက်ယိတာအို၊ ဟွမ်ယွမ်တာအို၊ ဝူကျိတာအို နှင့် ကျိကျွင်း တို့ ဖြစ်ကြသည်။

ကျိကျွင်း ၏ အထက်မှာမူ ဝူရှန့်ကျိကျွင်း နှင့် ယုံဟန်ကျိကျွင်း ဟူသော နယ်ပယ် နှစ်ခု ရှိသေးသော်လည်း အမှန်တကယ်တွင်မူ ၎င်းတို့အားလုံးမှာ ကျိကျွင်း အဆင့်ထဲမှာပင် ပါဝင်ပြီး အင်အား အနည်းအများမှလွဲ၍ ထူးခြားသော ခြားနားချက် မရှိပေ။

ကြောင်လေး၏ ပြောပြချက်အရ ၎င်း၏ သခင်နှင့် ၎င်း စောင့်ဆိုင်းနေသော ထိုလျှို့ဝှက်ဆန်းကြယ်သည့် ပုဂ္ဂိုလ်မှာ အနည်းဆုံးတော့ အလွန်အမင်း အစွမ်းထက်သော ဝူရှန့်ကျိကျွင်း အဆင့်တွင် ရှိပေလိမ့်မည်။

အစမှ ပြန်ပြောရလျှင်...

ကျန့်တာအို အဆင့်မှာ အင်မော်တယ်ဧကရာဇ် ဖြစ်ပြီးနောက် ပထမဆုံး နယ်ပယ် ဖြစ်၏။

ဤအဆင့်မှာ သာမန် ကောင်းကင်နှင့် မြေကြီး နိယာမ တစ်ခု သို့မဟုတ် နှစ်ခုကို ထိန်းချုပ်နိုင်ပြီ ဖြစ်ကာ အစစ်အမှန် နိယာမ စွမ်းအားကို အသုံးပြုနိုင်ပေသည်။

နိယာမ စွမ်းအားနှင့် အင်မော်တယ် စွမ်းအားမှာ အင်မော်တယ် စွမ်းအားနှင့် ဝိညာဉ် စွမ်းအားကဲ့သို့ပင် အဆင့်ချင်း လုံးဝ ကွဲပြားပြီး လုံးဝ ဖိနှိပ်နိုင်စွမ်း ရှိပေသည်။

ကျိတာအို အဆင့်မှာ သူ ထိန်းချုပ်ထားသော နိယာမများကို ကျွမ်းကျင်စွာ အသုံးချနိုင်ခြင်းပင်။

ချန်ရှန်းတာအို အဆင့်မှာမူ ထိုနိယာမများကို သူ့အပိုင် အဖြစ် လုံးဝ ပြောင်းလဲလိုက်ခြင်း ဖြစ်ရာ သူက နိယာမ ဖြစ်ပြီး နိယာမမှာလည်း သူပင် ဖြစ်ပေသည်။

၎င်းမှာ ထန်ထျန်း ထိန်းချုပ်ထားသော လက်ညှိုး စွမ်းအားနိယာမကဲ့သို့ပင် ဖြစ်၏။

ထို့ကြောင့် တစ်နည်းအားဖြင့် ပြောရလျှင် ထန်ထျန်းမှာလည်း ချန်ရှန်းတာအို အဆင့်ရှိ ပုဂ္ဂိုလ်တစ်ဦး၏ အစွမ်း အနည်းငယ် ရှိနေပြီဟု ဆိုနိုင်သည်။

ထို့ကြောင့် သူက ထျန်းယွမ်အင်မော်တယ်အရှင်ကို လုံးဝ ဖိနှိပ်နိုင်ခဲ့ပြီး စက္ကန့်ပိုင်းအတွင်း အရာအားလုံးကို ဖျက်ဆီးနိုင်ခဲ့ခြင်း ဖြစ်၏။

ထိုစဉ်က ထန်ထျန်း၏ ရှေ့၌ အင်မော်တယ်ဧကရာဇ် တစ်ဦး ရှိနေလျှင်ပင် အမှုန် ဖြစ်သွားရမည့် အဆုံးသတ်မှ လွတ်မြောက်နိုင်မည် မဟုတ်ပေ၊ ၎င်းမှာ ပြည့်စုံသော နိယာမ၏ ဖိ နှိပ်မှုပင် ဖြစ်သည်။

နောက်ထပ် ထိုက်ယိတာအို အဆင့်မှာ ချန်ရှန်းတာအို အဆင့်ကို အခြေခံ၍ ဆက်လက် တိုးတက်လာခြင်း ဖြစ်ပြီး အရေးပါသော ကမ္ဘာ့နိယာမ အချို့ကို ထိန်းချုပ်နိုင်ခြင်း ဖြစ်သည်။

ထိုနိယာမများ၏ စွမ်းအားမှာ လက်ညှိုး စွမ်းအားနိယာမထက် များစွာ သာလွန်သကဲ့သို့ လုံးဝ ထိန်းချုပ်နိုင်ရန်မှာလည်း အလွန် ခက်ခဲလှပေသည်။

ကြောင်လေး၏ အဆိုအရ တာအိုအဆင့် ကျင့်ကြံသူ အများစုမှာ ဤအဆင့်၌ပင် ပိတ်မိနေကြခြင်း ဖြစ်၏။

စစ်မှန်သော ကောင်းကင်ဖီဆန်သူများသာ ဆက်လက်၍ တက်လှမ်းနိုင်ပေသည်။

ဟွမ်ယွမ်တာအို အဆင့်မှာ တက်လှမ်းပြီးနောက်တွင် ကမ္ဘာ့ နိယာမ တစ်ခု သို့မဟုတ် နှစ်ခုကို အောင်မြင်စွာ ထိန်းချုပ်နိုင်သော ကောင်းကင်ဖီဆန်သူများ ဖြစ်ကြသည်။

ဤလူမျိုးမှာ လောက၌ အလွန် ရှားပါးလှသော်လည်း ပေါ်ထွက်လာပါက ကမ္ဘာကြီးကို တုန်လှုပ်စေမည့် ပြိုင်ဘက်ကင်း အရှင်သခင်များ ဖြစ်ကြပေလိမ့်မည်။

ဟွမ်ယွမ်တာအို အဆင့်ရှိ ပုဂ္ဂိုလ်များက ဆက်လက် တိုးတက်လာပြီး အရေးပါသော ကမ္ဘာ့ နိယာမများ ဖြစ်သည့် စွမ်းအားနိယာမ၊ ဓာတ်ကြီးငါးပါး နိယာမ၊ ကမ္မနိယာမ၊ ယင်ယန်နိယာမ သို့မဟုတ် အချိန်နှင့် ဟင်းလင်းပြင် နိယာမ စသည်တို့ကို ထိန်းချုပ်နိုင်လာသောအခါ သက်ရှိများ၏ အစွမ်းကုန် အခြေအနေ ဖြစ်သော ဝူကျိတာအို အဆင့်သို့ ရောက်ရှိပေလိမ့်မည်။

ဝူကျိတာအို အရှင်သခင်မှာ လောက၌ ပြိုင်ဘက်ကင်း၏။

၎င်းမှာ ထိုကဲ့သို့သော ဖြစ်တည်မှုမျိုးကို ဖော်ပြရန် အသင့်တော်ဆုံး စကားစုပင် ဖြစ်သည်။

နောက်ဆုံးတွင် ဝူကျိတာအို အရှင်သခင်က သက်ရှိများ၏ ကန့်သတ်ချက်ကို ကျော်လွန်ကာ ဟင်းလင်းပြင် စကြဝဠာသို့ တိုက်ရိုက် ရောက်ရှိပြီး ကမ္ဘာ့ နိယာမများ၏ အထက်၌ ရှိနေသောအခါ ကျိကျွင်း ဟု ခေါ်ဆိုနိုင်ပေတော့မည်။

ကျိကျွင်း ပုဂ္ဂိုလ်များမှာ လောက၌ ပေါ်ထွက်လာခဲလှသည်၊ တစ်နည်းအားဖြင့် သူတို့က ကမ္ဘာပေါ်ရှိ သက်ရှိများ မဟုတ်တော့ဘဲ တစ်ကမ္ဘာလုံးမှာ သူတို့၏ အကြည့်အောက်၌ ရှိနေပေသည်။

"ကောင်းကင်ထိပ်ဆုံး ဆိုတာ အမှန်တော့ ကမ္ဘာကြီးရဲ့ အပြင်ဘက်ပဲ။"

"ကျိကျွင်း ပုဂ္ဂိုလ်တွေက အဲဒီမှာ နေထိုင်ပြီး ကမ္ဘာပေါင်းများစွာကို ငုံ့ကြည့်နေကြတာ၊ တစ်ဦးစီက မတူညီတဲ့ ကမ္ဘာပေါင်းများစွာကို အုပ်ချုပ်နေကြတာပဲ။"

"တိမ်တိုက် ထျန်းဖူနန်းတော် ရှိတဲ့ ဒီကမ္ဘာကလည်း အဲဒီထဲက တစ်ခု ဖြစ်ရမယ်"

ကြောင်လေးက ပြော လိုက်သည်။

ထန်ထျန်းမှာ တိတ်ဆိတ်သွားမိ၏။

အရင်က ဝမ်ကျိယွီ ပြောပြချက်အရ တိမ်တိုက် ထျန်းဖူနန်းတော် အပြင် အခြားသော ထျန်းဖူနန်းတော် ကြီး ရှစ်ခု ရှိသေးပြီး ၎င်းတို့အားလုံးမှာ မတူညီသော ကမ္ဘာများတွင် တည်ရှိနေခြင်း ဖြစ်သည်။

သို့သော် သူတို့အားလုံး၌ တူညီသော အရှင်သခင် တစ်ဦး ရှိပေသည်၊ ၎င်းမှာ "နတ်ဘုရား အရှင်" ပင် ဖြစ်၏။

ထို နတ်ဘုရား အရှင်မှာ သက်ရှိများ၏ ကန့်သတ်ချက်ကို ကျော်လွန်ကာ ကမ္ဘာကြီးကို လွှမ်းမိုးထားသော "ကျိကျွင်း" တစ်ဦး ဖြစ်နေပေလိမ့်မည်။