အခန်း (၄၈၄-၄၈၆)

အခန်း (၄၈၄) ပြိုင်ဘက်ကင်း ဓားဝိညာဉ်။ လောကကို တုန်လှုပ်စေပြီး လုထုကို ထိတ်လန့်စေသော သံဖြတ်ဓားသိုင်း။ (၆)

နန်ကုန်းမင်သည် မိစ္ဆာသတ်ဓား သွန်းလုပ်ခြင်းကို လူတိုင်းထံမှ လျှို့ဝှက်ထားခဲ့ခြင်း ဖြစ်သည်။ လုယာနှင့် အခြားသော မူလနယ်ပယ် အကြီးအကဲ သုံးဦးသာလျှင် ဤအကြောင်းကို သိကြသည်။

ထို့ကြောင့် ဝတ်ရုံခရမ်းရောင်ဝတ် အမျိုးသမီးနှင့် သူမ၏ အဖော်နှစ်ဦးမှာ ယနေ့သည် လက်နက်သွန်းလုပ်ပြီးစီးမည့်နေ့ဖြစ်ကြောင်း ကြိုတင်သတင်းရရှိထားခြင်းမှာ တိုက်ဆိုင်မှုမဟုတ်ပေ။ သူတို့ထဲတွင် သစ္စာဖောက်တစ်ဦး ရှိနေပြီး ထိုသူက မိစ္ဆာသတ်ဓားအကြောင်းကို ဤသုံးဦးထံ သတင်းပေးလိုက်ခြင်း ဖြစ်သည်။

နန်ကုန်းမင်၏ စူးရှသော အကြည့်များအောက်တွင် အကြီးအကဲတစ်ဦးမှာ မသိစိတ်ဖြင့် မျက်နှာလွှဲလိုက်မိသည်။

နန်ကုန်းမင်က ထိုအချက်ကို ရိပ်မိသွားပြီး မယုံကြည်နိုင်စွာဖြင့် ရေရွတ်လိုက်သည်။ "ဦးလေး ရှဲ့ဖေးလား။ ဦးလေးက သတင်းတွေကို ပေါက်ကြားအောင် လုပ်ခဲ့တာလား။ ဘာဖြစ်လို့လဲ"

ရှဲ့ဖေးဟု အမည်ရသော ဤအကြီးအကဲမှာ နတ်ဘုရားလက်နက်အိမ်တော်၏ အနည်းငယ်သော မူလနယ်ပယ် အကြီးအကဲများထဲမှ တစ်ဦးဖြစ်ပြီး သူ၏ အသက်အရွယ်နှင့် ကိုယ်ကျင့်တရားကြောင့် လူအများ၏ လေးစားမှုကို ရရှိထားသူ ဖြစ်သည်။ နန်ကုန်းမင်က သူ့ကို အကြွင်းမဲ့ ယုံကြည်ခဲ့ခြင်းကြောင့် ဤသစ္စာဖောက်မှုမှာ နန်ကုန်းမင်အတွက် နားမလည်နိုင်စရာ ဖြစ်နေလေ၏။

ရှဲ့ဖေး၏ မျက်နှာထက်တွင် အပြစ်ရှိသကဲ့သို့ ခံစားချက်အချို့ ပေါ်လာသော်လည်း သူက ပြတ်ပြတ်သားသား ပြန်လည်ချေပခဲ့သည်။ "အိမ်တော်သခင်... မိစ္ဆာသတ်ဓားကို သွန်းလုပ်တာဟာ ငါတို့ နတ်ဘုရားလက်နက်အိမ်တော်အတွက် ကောင်းကျိုးမရှိဘူး။ ဒါက ငါတို့ဆီကို ဘေးဒုက္ခတွေ သယ်ဆောင်လာလိမ့်မယ်"

ဤစကားများက နန်ကုန်းမင်ကို ဒေါသထွက်စေခဲ့သည်။ "အဲဒါနဲ့ အပြင်လူတွေနဲ့ ပူးပေါင်းတာက ဘာဆိုင်လို့လဲ"

မိစ္ဆာသတ်ဓား သွန်းလုပ်ခြင်းက စံအိမ်အတွက် ဘေးဒုက္ခဖြစ်စေမည်ဟု အမှန်တကယ် ယုံကြည်ပါက ရှဲ့ဖေးအနေဖြင့် တိုက်ရိုက်တားမြစ်သင့်သော်လည်း သူက သတင်းကို ပြင်ပလူများထံ ရောင်းစားခဲ့သည်။ သူတို့က သူ့ကို အကျိုးအမြတ် ကြီးကြီးမားမား တစ်ခုခု ပေးမည်ဟု ကတိပြုထားကြောင်း ထင်ရှားနေပြီး သူသည် တစ်ကိုယ်ကောင်းဆန်မှုသက်သက်ဖြင့် လုပ်ဆောင်ခဲ့ခြင်းပင်။

ရှဲ့ဖေးက ဘာမျှ ပြန်မပြောတော့ပေ။ သူသည် မိမိကိုယ်ကျိုးအတွက် အမှန်တကယ် လုပ်ဆောင်ခဲ့ခြင်း ဖြစ်သည်။ လူသည် အသက်ကြီးလာလေ သေရမှာကို ပိုကြောက်လာလေဖြစ်ပြီး အထူးသဖြင့် အဆင့်အတန်းနှင့် အာဏာရှိသူများအတွက် ဤလောကတွင် မခံစားရသေးသော ပျော်ရွှင်မှုများစွာ ကျန်ရှိနေသေးသည်ဟု ထင်မြင်တတ်ကြသည်။

ချက်ချင်းပင် ရှဲ့ဖေးက ထိုသုံးဦးကို ပြောလိုက်သည်။ "ဇီမိန်၊ ရှံးရှန်း၊ လန်ချန်း... မင်းတို့ သုံးယောက် ငါ့ကို ပေးထားတဲ့ ကတိတွေကို မမေ့နဲ့နော်"

စာသင်သားပုံစံ ဝတ်ဆင်ထားသော ဝတ်ရုံပြာနှင့် အမျိုးသား လန်ချန်းက သူ၏ ယပ်တောင်ကို ခတ်ရင်း ခပ်ဖွဖွ ရယ်မောလိုက်သည်။ "စိတ်ချပါ၊ ကျွန်တော်တို့ သုံးယောက်က ကတိတည်ပါတယ်။ ခင်ဗျားကို နတ်ဆိုးအမြုတေနဲ့ ပေါင်းစပ်တဲ့နေရာမှာ ကူညီပေးပြီး အန္တရာယ်အနည်းဆုံးဖြစ်အောင် လုပ်ပေးပါ့မယ်"

ဤစကားကို ကြားလိုက်ရသည့်အခါ လုယာနှင့် နန်ကုန်းမင်တို့သည် ထိုသုံးဦး၏ မည်သူမည်ဝါဖြစ်ကြောင်းကို အပြည့်အဝ နားလည်သွားကြသည်။ သူတို့မှာ လူသားများမဟုတ်ဘဲ 'မိစ္ဆာလူသား' များပင် ဖြစ်သည်။

ရှဲ့ဖေးက နတ်ဆိုးလက်နက်စံအိမ်ကို သစ္စာဖောက်ရသည့် အကြောင်းရင်းမှာ နတ်ဆိုးအမြုတေနှင့် ပေါင်းစပ်ကာ အသက်ရှည်စေရန်အတွက် 'အသစ်တစ်ဖန် မွေးဖွားခြင်း' ကို ခံယူလိုသောကြောင့် ဖြစ်သည်။

နတ်ဆိုးအမြုတေနှင့် ပေါင်းစပ်ခြင်းမှာ အသက်ကြီးသူများအတွက် ကျရှုံးနိုင်ခြေ ပိုများပြီး ကျရှုံးပါက သေချာပေါက် သေဆုံးရမည်ဖြစ်သည်။ သို့သော် အခြားသော မိစ္ဆာလူသားများ သို့မဟုတ် မိစ္ဆာစစ်သည်တော်များ၏ အကူအညီပါက အောင်မြင်မှုနှုန်းမှာ သိသိသာသာ မြင့်မားလာမည်ပင်။

ရှဲ့ဖေးသည် အသက်တစ်ရာကျော် နေထိုင်ခဲ့ပြီးဖြစ်ရာ သူသည် သိုင်းပညာရှင်တစ်ဦး ဖြစ်သော်လည်း နေရမည့်သက်တမ်းမှာ အနည်းငယ်သာ ကျန်တော့သည်။ သူ အသက်ကြီးလာပြီး ခန္ဓာကိုယ် ယိုယွင်းလာသည်နှင့်အမျှ နတ်ဆိုးအမြုတေနှင့် ပေါင်းစပ်ရန် ပိုမိုလိုလားလာခဲ့သည်။ ဤမိစ္ဆာလူသား သုံးဦး၏ အကူအညီရှိပါက အန္တရာယ်မှာ များစွာ လျော့နည်းသွားမည် ဖြစ်သည်။

"ဒီတိရစ္ဆာန်က... အသက်ရှည်ဖို့အတွက်နဲ့ နတ်ဘုရားလက်နက်အိမ်တော်ကို ရောင်းစားဖို့ ကြံနေတာလား" လုယာနှင့် အခြားသူများမှာ ဒေါသကြောင့် မျက်နှာများ နီရဲလာ၏။ ရှဲ့ဖေးမှာ အောင်မြင်မှုနှုန်း မြင့်မားရန်အတွက်သာ လောင်းကြေးထပ်နေခြင်း ဖြစ်သည်။ သူ အောင်မြင်ခဲ့လျှင်တောင် လူသားစိတ်မရှိသော လူသားပုံစံ နတ်ဆိုးတစ်ကောင်သာ ဖြစ်လာမည်ဖြစ်ပြီး ဤအခွင့်အရေးအတွက် အရင်းအနှီးမှာ သူတို့၏ အိမ်တော်ကို သစ္စာဖောက်ခြင်းပင် ဖြစ်သည်။

"မိစ္ဆာသတ်ဓားကို ထုတ်ပေးလိုက်စမ်း။ ဒီပစ္စည်းက တကယ်ပဲ ရှားပါးတယ်။ မိစ္ဆာသိုင်းအဖွဲ့အစည်းနဲ့ အသက်ခြွေအဖွဲ့အစည်းတို့က ဒါကို တန်ဖိုးကြီး ပေးဝယ်ကြလိမ့်မယ်။ အလယ်အလတ်အဆင့် နတ်ဆိုးအမြုတေတစ်ခုနဲ့တောင် လဲနိုင်လိမ့်မယ်"

ဝက်ဝံကဲ့သို့ ထွားကျိုင်းသော အမျိုးသားက သူ၏ တောက်ပနေသော မျက်လုံးများဖြင့် နန်ကုန်းမင်၏ လက်ထဲရှိ ငရဲမီးလျှံဓားကို စိုက်ကြည့်ရင်း ပြောလိုက်သည်။

မိစ္ဆာသတ်ဓားသည် အမှန်တကယ်ပင် အဖိုးတန်ရတနာတစ်ခု ဖြစ်သည်။ ၎င်းကို ကြောက်ရွံ့ကြသော အင်အားစုများသည် ပိုင်ဆိုင်ရန်ဖြစ်စေ သို့မဟုတ် ဖျက်ဆီးရန်ဖြစ်စေ ကြီးမားသော ပမာဏကို ပေးဆောင်ကြပေလိမ့်မည်။ ဤသုံးဦးမှာ ၎င်းကို ရရှိအောင် လုပ်ဆောင်ပေးခြင်းဖြင့် ကြီးမားသော အကျိုးအမြတ်ကို ရရှိနိုင်မည် ဖြစ်သည်။

ထို့ကြောင့် သူတို့ သတင်းရရှိပြီးနောက် နတ်ဘုရားလက်နက်အိမ်တော်က မိစ္ဆာသတ်ဓားကို သွန်းလုပ်ပြီးစီးသည့်အချိန်အထိ စောင့်ဆိုင်းကာမှ ကိုယ်ထင်ပြလာခြင်း ဖြစ်သည်။

"ဝီ... ဝီ..."

နန်ကုန်းမင်၏ လက်ထဲရှိ ငရဲမီးလျှံဓားမှာ ပြင်းထန်စွာ တုန်ခါလျက် အသံမြည်လာသည်။

"မီးလျှံငရဲဓားကို လိုချင်တာလား။ ဒါဆို မင်းတို့ရဲ့ သွေးတွေနဲ့ လာပြီး ပူဇော်လိုက်ကြလေ" နန်ကုန်းမင်၏ မျက်လုံးများထဲတွင် သတ်ဖြတ်လိုသော အရှိန်အဝါများ တောက်လောင်နေ၏။ သူသည် အိမ်တော်သခင်တစ်ဦးအနေဖြင့် လက်နက်သွန်းလုပ်ရာတွင်သာ ထူးချွန်သည်မဟုတ်ဘဲ မူလနယ်ပယ်သို့ စောစီးစွာ ရောက်ရှိခဲ့သော သိုင်းပညာရှင်တစ်ဦးလည်း ဖြစ်သည်။

စကားတွေ အများကြီးမပြောတော့ဘဲ နတ်ဆိုးများကို မုန်းတီးလှသော နန်ကုန်းမင်မှာ လျှင်မြန်စွာ လှုပ်ရှားလိုက်သည်။ သူ၏ ထွားကျိုင်းသော ခန္ဓာကိုယ်မှာ သန်သန်မာမာနှင့် ရှုံးရှန်း၏ ရှေ့တွင် ချက်ချင်းပေါ်လာပြီး ငရဲမီးလျှံဓားဖြင့် ဘေးတိုက် ခုတ်ချလိုက်သည်။ သံမဏိကိုပင် အရည်ပျော်စေနိုင်သော အစိမ်းရောင်မီးလျှံများ ဝန်းရံနေသည့် ဓားသွားမှာ ရှုံးရှန်းကို သတ်ဖြတ်ရန် ဦးတည်လိုက်သည်။

ရှုံးရှန်း၏ မျက်နှာမှာ မည်သည့် ခံစားချက်မျှ မရှိဘဲ သူ၏ လက်ကြီးကို ဆန့်ထုတ်ကာ တိုးဝင်လာသော ဓားသွားကို တိုက်ရိုက် ဖမ်းဆုပ်လိုက်သည်။

"ရှဲ"

အသားစများ ပြတ်တောက်သွားသည့် အသံနှင့်အတူ လောင်ကျွမ်းနေသည့် အသံများ ထွက်ပေါ်လာပြီး ရှုံးရှန်း၏ လက်မှာ လက်ကောက်ဝတ်မှ ပြတ်သွားခဲ့သည်။ မီးလျှံများက ပြတ်သွားသော လက်ကို ပြာဖြစ်သွားသည့်အထိ လောင်ကျွမ်းပစ်လိုက်သည်။

သို့သော် ရှုံးရှန်း၏ စိတ်အာရုံ လှုပ်ရှားလိုက်သည်နှင့် အနက်ရောင် အခိုးအငွေ့များ ထွက်ပေါ်လာပြီး ဒဏ်ရာရှိ လောင်ကျွမ်းနေသော မီးလျှံများကို ငြှိမ်းသတ်လိုက်သည်။ ပြတ်သွားသော လက်မှာ ဖြည်းညှင်းစွာ ပြန်လည် ထွက်ပေါ်လာခဲ့သည်။

ရှံးရှန်းက မျက်မှောင်ကြုတ်လိုက်ပြီး "အဆင့်နိမ့် နတ်ဆိုးအမြုတေ ငါးခုနဲ့ သွန်းလုပ်ထားတဲ့ ဒီမိစ္ဆာသတ်ဓားက သာမန်လက်နက်တွေထက်တော့ စွမ်းအားပိုရှိတာ အမှန်ပဲ... ဒါပေမဲ့ ဒါပဲလား။ မိစ္ဆာသတ်ဓားက ဒီလောက်ပဲ အစွမ်းရှိတာလား။ အမှိုက်ပုံထဲက သံစုတ်ထက်စာရင်တော့ နည်းနည်းလေး ပိုကောင်းရုံပါပဲ"

မိစ္ဆာသတ်ဓားသည် မိစ္ဆာနတ်ဆိုးများ၏ မသေမျိုးခန္ဓာကိုယ်ကို နှိမ်နင်းရာတွင် အလွန်စွမ်းထက်သည်ဟု ကောလာဟလများ ရှိခဲ့သည်။ နတ်ဆိုးအမြုတေနှင့် ပေါင်းစပ်ထားသော သိုင်းပညာရှင်တစ်ဦးဖြစ်သည့် ရှုံးရှန်းသည် ထိုအချက်ကို စမ်းသပ်ရန်အတွက် သူ၏ လက်ဖဝါးဖြင့် တမင်သက်သက် အခုတ်ခံခဲ့ခြင်း ဖြစ်သည်။ သို့သော် သူ စိတ်ပျက်သွားခဲ့သည်။ ဓား၏ ဒဏ်ရာမှာ သူ မခံနိုင်လောက်သော အခြေအနေမျိုး မဟုတ်ပေ။

မိစ္ဆာသတ်ဓား၏ စွမ်းဆောင်ရည်မှာ ဤမျှသာဆိုလျှင် ၎င်းကို မည်သို့ တန်ဖိုးကြီးကြီးနှင့် ရောင်းချနိုင်မည်နည်း။

"သေလိုက်တော့"

နန်ကုန်းမင်မှာ အလွန်အမင်း ဒေါသထွက်သွားသည်။ သူသည် မီးလျှံငရဲဓားကို သွန်းလုပ်ရန် အလွန်တရာ အားထုတ်ခဲ့ရခြင်းဖြစ်ရာ မိစ္ဆာလူသား၏ ရှံ့ချမှုကို သူ လုံးဝသည်းမခံနိုင်ပေ။

"ဘုန်း"

နန်ကုန်းမင်၏ ပတ်ဝန်းကျင်ရှိ သဘာဝ ဝိညာဉ်စွမ်းအင်များမှာ ပြင်းထန်စွာ တုန်ခါသွားပြီး သူ၏ ပတ်လည်တွင် ကောင်းကင်သွေးကြော လေးခု၏ ပုံရိပ်ယောင်များ ပေါ်ထွက်လာသည်။ သူ၏ အရှိန်အဝါမှာ မြင့်တက်လာပြီး သူ့ရှေ့ရှိ မိစ္ဆာလူသားကို သတ်ဖြတ်ရန် သူ၏ ခွန်အားအားလုံးကို ထုတ်သုံးရန် ပြင်လိုက်တော့သည်။

အခန်း (၄၈၅) ပြိုင်ဘက်ကင်း ဓားဝိညာဉ်။ လောကကိုထိတ်လန့်စေပြီး လူထုကိုတုန်လှုပ်စေသော သံဖြတ်ဓားသိုင်း။ (၁)

"အိမ်တော်သခင် နန်ကုန်း... ခဏလောက် ငြိမ်ငြိမ်နေပေးပါဦး" ဝတ်ရုံခရမ်းရောင်နှင့် အမျိုးသမီး ဇီမိန်က ထိုအချိန်တွင် တိုးညှင်းစွာ ပြောလိုက်သော်လည်း သူ၏ အသံထဲတွင် ဦးနှောက်ကို တိုက်ရိုက်ထိုးဖောက်နိုင်သော မှော်စွမ်းအားတစ်မျိုး ပါဝင်နေသည်။ နန်ကုန်းမင်၏ ခန္ဓာကိုယ်မှာ တုန်ခါသွားပြီး သူ၏ ဦးနှောက်အတွင်း တဝီဝီအသံများ မြည်လာကာ ကမ္ဘာကြီးတစ်ခုလုံး ချာချာလည်နေသကဲ့သို့ ခံစားလိုက်ရသည်။ သူ၏ နှာခေါင်းနှင့် နားများမှ သွေးများ စီးကျလာပြီး သူ၏ အရှိန်အဝါများမှာလည်း လျင်မြန်စွာ ဆုတ်ယုတ်သွားကာ နောက်သို့ ယိုင်နဲ့စွာ ဆုတ်ခွာသွားခဲ့ရသည်။

"ဘုန်း"

ထိုအတောအတွင်း ရှုံးရှန်း၏ လေးလံသော လက်သီးချက်မှာ မိုးကြိုးပစ်သကဲ့သို့ ထွက်ပေါ်လာပြီး နန်ကုန်းမင်၏ ရင်ဘတ်ကို အတွင်းဘက်သို့ ချိုင့်ဝင်သွားအောင် ထိုးနှက်လိုက်သည်။ နန်ကုန်းမင်မှာ ပါးစပ်မှ သွေးများ အရှိန်အဟုန်ဖြင့် အန်ထုတ်လိုက်ရပြီး နောက်သို့ လွင့်ထွက်သွားကာ မြေပြင်ပေါ်သို့ ပြင်းထန်စွာ လဲကျသွားတော့သည်။

"အိမ်တော်သခင်"

ထိုမြင်ကွင်းကြောင့် လုယာ၏ မျက်လုံးများမှာ ဒေါသကြောင့် နီမြန်းသွားပြီး အခြားသော မူလနယ်ပယ်သိုင်းပညာရှင် နှစ်ဦးနှင့်အတူ ကူညီရန် အရှေ့သို့ ပြေးထွက်လာခဲ့သည်။

"လမ်းဖယ်စမ်း"

သို့သော် ယဉ်ကျေးသိမ်မွေ့ဟန်ရှိသော စာသင်သားဝတ်စုံအပြာနှင့် လန်ချန်းက နှာခေါင်းရှုံ့ကာ အထင်အမြင်သေးစွာဖြင့် သူ၏ ယပ်တောင်ကို ခတ်လိုက်သည်။ လေထုထဲတွင် နတ်ဆိုးလေပြင်းများ ပေါက်ကွဲထွက်ပေါ်လာပြီး ဓားသွားများစွာကဲ့သို့ တိုက်ခတ်လာလေ၏။

"ရွှီး... ရွှီး... ရွှီး "

လုယာနှင့် ကျန်နှစ်ဦးမှာ ထိုလေပြင်းထဲတွင် ပါသွားပြီး ခန္ဓာကိုယ်အနှံ့ သွေးသံရဲရဲ ဓားဒဏ်ရာများစွာဖြင့် နောက်သို့ လွင့်ထွက်သွားကြသည်။

"ဒါ... ဒါက မိစ္ဆာလူသားတွေရဲ့ စွမ်းအားလား။ ငါလည်း သူတို့လို ဖြစ်လာနိုင်တာပဲ"

ဤမြင်ကွင်းကို ကြည့်ရင်း နတ်ဘုရားလက်နက်အိမ်တော်၏ အကြီးအကဲ ရှဲ့ဖေးမှာ အလွန်တရာ တုန်လှုပ်သွားခဲ့ရသလို ကြီးမားသော မျှော်လင့်ချက်များဖြင့်လည်း ပြည့်နှက်သွားလေ၏။

သူ၏ ရှေ့တွင် ရပ်နေသော ဇီမိန်၊ ရှုံးရှန်းနှင့် လန်ချန်းတို့မှာ တစ်ချိန်က ကြောက်မက်ဖွယ်ကောင်းသော အင်အားရှိသည့် မူလနယ်ပယ် လူသား သိုင်းပညာရှင်များ ဖြစ်ခဲ့ကြသော်လည်း နတ်ဆိုးအမြုတေနှင့် ပေါင်းစပ်ပြီးနောက်တွင်မူ အသစ်တစ်ဖန် မွေးဖွားလာခဲ့ကြပြီး မသေမျိုးခန္ဓာကိုယ်ကို ရရှိကာ ထူးဆန်း၍ ခန့်မှန်းရခက်သော နတ်ဆိုးအတတ်များကို တတ်မြောက်ထားကြခြင်း ဖြစ်သည်။

သုံးယောက်နှင့် လေးယောက် တိုက်ခိုက်ခြင်း ဖြစ်သော်လည်း အချိန်တိုအတွင်းမှာပင် နန်ကုန်းမင်နှင့် သူ၏ အဖော်များမှာ စုတ်ပြတ်သတ်သွားခဲ့ပြီး တစ်ဖက်သတ် အနိုင်ယူခံလိုက်ရသည်။

နတ်ဘုရားလက်နက်အိမ်တော်တွင် အစဉ်အလာ အမွေအနှစ်အချို့ ရှိသလို မူလနယ်ပယ်သိုင်းပညာရှင် အနည်းငယ်လည်း ရှိသော်လည်း သိုင်းပညာ ဂိုဏ်းတစ်ခုတော့ မဟုတ်ပေ။ သူတို့သည် နေ့ရက်အတော်များများကို လက်နက်သွန်းလုပ်ခြင်းနှင့် တိတ်ဆိတ်စွာ ကျင့်ကြံခြင်းတို့ဖြင့်သာ ကုန်ဆုံးစေကြပြီး တိုက်ပွဲများတွင် ပါဝင်ခဲသည်။ လုယာနှင့် သူ၏ အဖော်များ၏ တိုက်ခိုက်ရေးစွမ်းရည်မှာ မူလနယ်ပယ်သိုင်းပညာရှင်များထဲတွင် ပျမ်းမျှအဆင့်သာ ရှိရာ မိစ္ဆာလူသား အုပ်စုတစ်စုကို ရင်ဆိုင်ရန်မှာ မဖြစ်နိုင်ပေ။

ဇီမိန်က ရှဲ့ဖေးဘက်သို့ လှည့်ကြည့်လိုက်ပြီး သူ၏ လှပသော မျက်နှာမှာ အေးစက်နေသည်။ "ရှဲ့ဖေး... ဒီမိစ္ဆာသတ်ဓားက ဘာလို့ ဒဏ္ဍာရီထဲကလို အံ့သြစရာ မကောင်းနေရတာလဲ"

ရှဲ့ဖေးက အလျင်အမြန် ပြန်ဖြေလိုက်သည်။ "မိစ္ဆာသတ်ဓားမှာ ဝိညာဉ်မရှိသေးလို့ ဖြစ်ပါလိမ့်မယ်"

"ဝိညာဉ်မရှိဘူး"

ဇီမိန်နှင့် အခြားသူများမှာ နားမလည်နိုင် ဖြစ်သွားကြသည်။

ရှဲ့ဖေးက ဆက်ရှင်းပြသည်။ "မိစ္ဆာသတ်ဓားက ကောင်းကင်နဲ့ မြေကြီးရဲ့ သဘာဝစွမ်းအားကို စုပ်ယူတာဟာ ဒုတိယအဆင့်ပဲ ရှိပါသေးတယ်။ တတိယအဆင့်က သွေးနဲ့ ပူဇော်ဖို့ လိုတယ်။”

“အနည်းဆုံးတော့ မူလချီစွမ်းအင်ရှိတဲ့ မူလနယ်ပယ်သိုင်းပညာရှင်တစ်ဦး ဖြစ်ရမယ်။ ပြီးတော့ မိစ္ဆာနတ်ဆိုးတွေကို အလွန်အမင်း မုန်းတီးတဲ့သူ ဖြစ်ရမယ်။ အဲဒီလိုလူမျိုးရဲ့ သွေးနဲ့ ဝိညာဉ်နဲ့ မိစ္ဆာသတ်ဓားကို ပူဇော်လိုက်မှ ဓားမှာ ဝိညာဉ်ကိန်းဝပ်လာမှာ ဖြစ်ပြီး မိစ္ဆာစွမ်းအားနဲ့ သဘာဝစွမ်းအားကို ပေါင်းစပ်ပေးကာ ထူးခြားတဲ့ အံ့ဖွယ်စွမ်းအင်တွေကို ထွက်ပေါ်လာစေမှာပါ။"

"အဲ့သလိုကိုး.. ဒီမိစ္ဆာသတ်ဓားက... လူအရှင်လတ်လတ်နဲ့ သွေးပူဇော်ဖို့ လိုသေးတာလား။ ဒါကို နတ်ဘုရားလက်နက်လို့ ခေါ်တာထက် မိစ္ဆာနတ်ဆိုးလက်နက်တွေထဲက မိစ္ဆာစစ်သည်တော်လို့ ခေါ်တာက ပိုပြီး သင့်တော်မယ် ထင်တယ်။"

ဇီမိန်၊ ရှုံးရှန်းနှင့် လန်ချန်း တို့မှာ မိစ္ဆာသတ်ဓား ပြီးပြည့်စုံရန် နောက်ထပ် တစ်လှမ်းသာ လိုတော့ကြောင်း နားလည်သွားကြသည်။ ၎င်းမှာ လက်နက်ကို ဝိညာဉ်သွင်းရန်အတွက် သွေးဖြင့် ပူဇော်ခြင်း ဖြစ်သည်။ ထိုသူမှာ နတ်ဆိုးများကို ပြင်းပြင်းထန်ထန် မုန်းတီးသော မူလချီစွမ်းအင်ရှိသည့် မူလနယ်ပယ်သိုင်းပညာရှင်တစ်ဦး ဖြစ်ရမည်။

သွေးပူဇော်ခြင်း ပြီးဆုံးသွားသည်နှင့် မိစ္ဆာသတ်ဓားမှာ သာမန်မှ မူလနယ်ပယ်သို့ ကူးပြောင်းသွားသကဲ့သို့ အစစ်အမှန် အသွင်ပြောင်းလဲသွားပေလိမ့်မည်။ ၎င်း၏ အံ့သြဖွယ်ရာများမှာ နှိုင်းယှဉ်၍မရနိုင်အောင် ဖြစ်လာမည်ဖြစ်ပြီး မိစ္ဆာနတ်ဆိုးများကို သတ်ဖြတ်လေလေ ၎င်း၏ စွမ်းအားမှာ ပိုမိုကြီးမားလာလေလေ ဖြစ်ပေလိမ့်မည်။

"အိမ်တော်သခင် နန်ကုန်း... ဒါဆိုရင် ငါတို့ကပဲ ဒီနောက်ဆုံးအဆင့်မှာ ကူညီပေးပါရစေ" ထိုသုံးဦးမှာ နန်ကုန်းမင်ကို ယုတ်မာသော အကြည့်များဖြင့် ကြည့်လိုက်ကြသည်။

နန်ကုန်းမင်၏ မိဘများမှာ နတ်ဆိုးများလက်ချက်ဖြင့် ကွယ်လွန်ခဲ့ရခြင်း ဖြစ်ပြီး သူသည် နောင်တစ်ချိန်တွင် မိစ္ဆာနတ်ဆိုးများစွာကို သတ်ဖြတ်နိုင်ရန် ရည်ရွယ်ချက်ဖြင့် မိစ္ဆာသတ်ဓား သွန်းလုပ်ခြင်းအတွက် အရာအားလုံးကို ပေးဆပ်ခဲ့သူ ဖြစ်ရာ မိစ္ဆာနတ်ဆိုးများအပေါ် နက်ရှိုင်းသော အာဃာတ ရှိနေသည်မှာ သဘာဝကျပါသည်။ ထို့အပြင် သူသည် မူလနယ်ပယ် သိုင်းပညာရှင်တစ်ဦး ဖြစ်သောကြောင့် သွေးပူဇော်ခြင်းအတွက် အသင့်တော်ဆုံး ပုဂ္ဂိုလ်ပင် ဖြစ်သည်။

အမှန်တော့ နန်ကုန်းမင်သည် အစတည်းက မိမိကိုယ်ကိုယ် ငရဲမီးလျှံဓားအတွက် ပူဇော်ရန် ပြင်ဆင်ထားပြီး ဖြစ်သည်။ ဒဏ္ဍာရီလာ ပန်းပဲဆရာကြီးများကဲ့သို့ပင် သူသည် ခေတ်အဆက်ဆက် ချီးကျူးခံရမည့် နတ်ဘုရားလက်နက်တစ်ခု ချန်ထားရစ်ရန်အတွက် မိမိ၏ အသက်ကို စွန့်လွှတ်ရန် အသင့်ရှိနေခဲ့သည်။ သူသည် ဝန်လေးခြင်းမရှိဘဲ မိမိအသက်ဖြင့် ပေးဆပ်ရန် ဆုံးဖြတ်ထားပြီးသား ဖြစ်သည်။

သို့သော် အခုတော့ မိစ္ဆာသတ်ဓားကို အောင်မြင်အောင် လုပ်ပြီး ဒီမိစ္ဆာလူသားတွေကို ပေးရမယ်ပေါ့။ နန်ကုန်းမင် ဒါကို လုံးဝ လက်မခံနိုင်ပေ။

"မင်းတို့အားလုံး... သေလိုက်ကြတော့" နန်ကုန်းမင်သည် ပါးစပ်မှ သွေးများ ထွက်သော်လည်း မြေပြင်မှ အတင်းရုန်းထ၍ ထလိုက်သည်။ သူ၏ မျက်လုံးများမှာ နာကျင်မှုကြောင့် ရဲရဲနီနေ၏။ သူ၏ ခန္ဓာကိုယ်မှာ အပိုင်းပိုင်း ပြတ်သွားပါစေဦးတော့ ရန်သူများကို အောင်မြင်ခွင့်မပေးဘဲ အစွမ်းကုန် တိုက်ခိုက်ရန် သူ ပြင်ဆင်လိုက်သည်။

နန်ကုန်းမင်သည် သူ၏ သွေးများကို ငရဲမီးလျှံဓားက အတင်းအဓမ္မ စုပ်ယူသွားအောင် လုပ်ပြီး အသက်စွန့် တိုက်ခိုက်ရန် ကြံရွယ်နေခြင်း ဖြစ်သည်။

"ဘယ်သူလဲ"

ထိုအချိန်တွင် လန်ချန်းက ရုတ်တရက် တောင်အောက်ခြေဘက်သို့ လှည့်ကြည့်လိုက်သည်။

တောင်တက်လမ်းပေါ်တွင် ရိုးရှင်းစွာ ဝတ်ဆင်ထားသော ဝတ်ရုံနက်နှင့် လူငယ်တစ်ဦးမှာ အပေါ်သို့ လမ်းလျှောက်တက်လာနေသည်။ နံနက်ခင်း အလင်းတန်းများမှာ သူ၏အပေါ်သို့ ကျရောက်နေပြီး သူ၏ ပုံရိပ်သည် ဝေဝါးသော အလင်းရောင်များအကြားတွင် ထင်ရှားလာလေ၏။

"နေ့တစ်နေ့က ခုမှ စတာကို... အိပ်လို့မရအောင် ဆူညံနေတာပဲ။ မင်းတို့ တိရစ္ဆာန် သုံးကောင်ကတော့... ငါ့ကို တကယ်ပဲ ဒေါသထွက်အောင် လုပ်လိုက်ပြီ။"

ဝတ်ရုံနက်နှင့်လူငယ်မှာ ဖြည်းညှင်းစွာ ချဉ်းကပ်လာ၏။ သူ၏ ခါးတွင် ဓားအိမ်၌ထည့်ထားသော ဓားရှည်တစ်လက် ပါရှိသည်။ သူသည် ရုပ်ရည်ချောမောသော်လည်း သူ၏ အရှိန်အဝါမှာ ထိန်းချုပ်ထားသဖြင့် သာမန်လူတစ်ယောက်ကဲ့သို့ မထူးခြားလှပေ။ မိစ္ဆာလူသား သုံးဦးအပေါ် ထားရှိသော သူ၏ အကြည့်များမှာ လူသေ သုံးယောက်ကို ကြည့်နေသကဲ့သို့ အေးစက်ပြီး ကရုဏာကင်းမဲ့နေလျက်။

"စူးထိုက်လိုင်လား"

နန်ကုန်းမင်၊ လုယာနှင့် အခြားသူများမှာ တောင်ထိပ်သို့ ချဉ်းကပ်လာသော လူငယ်ကို ကြည့်ပြီး အံ့အားသင့်သွားကြသည်။

ရောက်လာသူမှာ အခြားသူမဟုတ်ဘဲ စူးချန်ခုန်းပင် ဖြစ်သည်။

အခန်း (၄၈၆) ပြိုင်ဘက်ကင်း ဓားဝိညာဉ်။ လောကကိုထိတ်လန့်စေပြီး လူထုကိုတုန်လှုပ်စေသော သံဖြတ်ဓားသိုင်း။ (၂)

စူးချန်ခုန်းသည် သူ၏ ပုံမှန်အလေ့အထအတိုင်း ဝူချင်းရှီ လေ့ကျင့်ရန်အတွက် စောစောထခဲ့သည်။ တောင်ထိပ်ပေါ်တွင် ရှုံးရှန်း၊ နန်ကုန်းမင်နှင့် အခြားသူများ၏ တိုက်ပွဲမှာ ခဏတာမျှသာ ကြာမြင့်ပြီး ဆူညံသံလည်း သိပ်မထွက်ခဲ့သော်လည်း အလွန်စူးရှသော အာရုံခံစားမှုရှိသည့် မူလနယ်ပယ် သိုင်းပညာရှင်တစ်ဦးဖြစ်သော စူးချန်ခုန်းသည် တောင်ထိပ်ရှိ သဘာဝ ဝိညာဉ်စွမ်းအင်များ၏ ပုံမှန်မဟုတ်သော လှုပ်ရှားမှုကို သတိပြုမိခဲ့သည်။

တောင်ထိပ်တွင် တစ်ခုခုဖြစ်နေတာကို စူးချန်ခုန်းကို သိသွားခဲ့သည်။ တစ်စုံတစ်ယောက် တိုက်ခိုက်လာခြင်းပင်။

စူးချန်ခုန်းသည် အနည်းငယ်မျှသာ တုံ့ဆိုင်းပြီးနောက် အခြေအနေကို သွားရောက်စစ်ဆေးရန် ဆုံးဖြတ်လိုက်သည်။

"သူတို့ သုံးယောက်စလုံးက မိစ္ဆာလူသားတွေလား။ တစ်ခါတည်းနဲ့ သုံးယောက်တောင်လား"

စူးချန်ခုန်းသည် ပတ်ဝန်းကျင်ကို အကဲခတ်လိုက်ရာ ရှုံးရှန်း၏ ရှေ့တွင် ရပ်နေသော ထိုသူစိမ်းသိုင်းပညာရှင်သုံးဦးထံမှ ထွက်ပေါ်နေသော အရှိန်အဝါများမှာ ပြင်းထန်ပြီး နှစ်လိုဖွယ်မရှိသည်ကို သတိပြုမိလိုက်သဖြင့် ၎င်းတို့မှာ မိစ္ဆာလူသားများဖြစ်ကြောင်း ချက်ချင်း ကောက်ချက်ချလိုက်သည်။

"စူးထိုက်လိုင်လား။ မင်း ဒီမှာ ဘာလာလုပ်တာလဲ။ ဒီနေရာကနေ အမြန်ထွက်သွားတော့။ ဒီမှာ မိစ္ဆာလူသား သုံးယောက် ရှိနေတယ်။"

စူးထိုက်လိုင် ပေါ်လာသည်ကို မြင်လိုက်ရသည့်အခါ လုယာမှာ ထိတ်လန့်သွားပြီး ချက်ချင်း အော်ဟစ်သတိပေးလိုက်သည်။

စူးချန်ခုန်းမှာ သာမန်မဟုတ်ကြောင်းနှင့် သူကိုယ်တိုင်ပင် စူးချန်ခုန်း၏ သိုင်းပညာနက်ရှိုင်းမှုကို မမြင်နိုင်ကြောင်း လုယာ သိထားသော်လည်း စူးချန်ခုန်းမှာ ငယ်ရွယ်လွန်းပါသေးသည်။ သူသည် သူတို့ကဲ့သို့ မူလနယ်ပယ်သိုင်းပညာရှင်တစ်ဦး ဖြစ်နေလျှင်ပင် ကြောက်မက်ဖွယ်ကောင်းသော မိစ္ဆာလူသား သုံးဦးကို ရင်ဆိုင်ရခြင်းမှာ အလဟဿ ဖြစ်ပေလိမ့်မည်။ ၎င်းမှာ အဓိပ္ပာယ်မဲ့ အသက်စွန့်ခြင်းသာ ဖြစ်ပေမည်။

"သူက စူးထိုက်လိုင်လား"

နန်ကုန်းမင်မှာလည်း အတန်ငယ် အံ့အားသင့်သွားသည်။ စူးချန်ခုန်းသည် နတ်ဘုရားလက်နက်အိမ်တော်တွင် ရှိနေသည်မှာ ခြောက်လကျော်ပြီဖြစ်ပြီး နန်ကုန်းမင်ကိုယ်တိုင် ဝင်ခွင့်ပြုခဲ့တာ ဖြစ်သော်လည်း မိစ္ဆာသတ်ဓားကိစ္စဖြင့် အလုပ်များနေခဲ့သဖြင့် စူးချန်ခုန်းနှင့် တစ်ခါမျှ မဆုံဖူးပေ။ ယခုမှသာ သူသည် စူးချန်ခုန်းကို ပထမဆုံးအကြိမ် မြင်ဖူးခြင်း ဖြစ်သည်။

"ဟင်… ဒီကလေးက... နည်းနည်းတော့ ထူးဆန်းတယ်။"

ရှုံးရှန်းနှင့် အခြားနှစ်ဦးမှာ စူးချန်ခုန်းကို မြင်လိုက်ရသည့်အခါ အံ့သြသွားသည့် အရိပ်အယောင်များ ပေါ်လာ၏။

သူတို့မှာ နတ်ဆိုးအမြုတေနှင့် ပေါင်းစပ်ထားသော သိုင်းပညာရှင်များဖြစ်ပြီး မိစ္ဆာနတ်ဆိုးများ၏ ထူးခြားသော အာရုံခံစားမှုကို ပိုင်ဆိုင်ထားကြသဖြင့် သိုင်းပညာရှင်တစ်ဦး၏ ခန္ဓာကိုယ်အတွင်းရှိ သွေးနှင့် စွမ်းအင်များ စီးဆင်းမှု၊ ကောင်းကင်သွေးကြော အရေအတွက်တို့ကို အလွယ်တကူ မြင်နိုင်ပြီး သူတို့၏ အင်အားကို ခန့်မှန်းနိုင်သည်။

သို့သော် ယခု စူးချန်ခုန်း၏ အရှိန်အဝါမှာ အလွန်တရာ စုစည်းနေသဖြင့် သူ၏ သိုင်းပညာ နက်ရှိုင်းမှုကို ခန့်မှန်းရန် ခက်ခဲနေကြသည်။ ၎င်းက စူးချန်ခုန်းတွင် သူ၏ အရှိန်အဝါကို ဖုံးကွယ်ထားနိုင်သည့် အလွန်အားကောင်းသော နည်းလမ်းများ ရှိနေကြောင်း ဖော်ပြနေသည်။

လိပ်အသက်ရှူနည်းပညာ အဆင့် ၁၀ သို့ ရောက်ရှိပြီးနောက် စူးချန်ခုန်းသည် သူကိုယ်တိုင် ထုတ်မပြသရွေ့ အခြားသူများအနေဖြင့် သူ၏ အစစ်အမှန်အဆင့်ကို သိရှိရန် အလွန်ခက်ခဲသွားပြီ ဖြစ်သည်။

သို့သော် ရှုံ့ရှန်းနှင့် အခြားသူများမှာ စိုးရိမ်ခြင်းမရှိပေ။ သူတို့ သုံးဦးမှာ နတ်ဆိုးအမြုတေနှင့် ပေါင်းစပ်ပြီးနောက် ယခင်ကထက် များစွာ အစွမ်းထက်လာသော မူလနယ်ပယ်သိုင်းပညာရှင်များ ဖြစ်ကြသည်။ သူတို့ သုံးဦး ပေါင်းလိုက်မည်ဆိုလျှင် သာမန် မူလနယ်ပယ်သိုင်းပညာရှင်တစ်ဦးကို မဆိုနှင့် သဘာဝစွမ်းအားကို ထိန်းချုပ်နိုင်ပြီး ကောင်းကင်သွေးကြော ငါးခုထက်မက ဖွင့်လှစ်ထားသည့် "ပန်းနှစ်ပွင့်" အဆင့်ရှိ သိုင်းပညာရှင်တစ်ဦးကိုပင် အနိုင်ယူပြီး အပိုင်းပိုင်းဖြစ်အောင် ချေမှုန်းပစ်နိုင်သည်။

ဝတ်ရုံခရမ်းရောင်နှင့် ဆွဲဆောင်မှုရှိသော အမျိုးသမီး ဇီမိန်က ပါးစပ်ကို အုပ်ကာ ခပ်တိုးတိုး ရယ်မောလိုက်သည်။ "မမက မင်းလို သန်မာပြီး ငယ်ရွယ်တဲ့ မောင်လေးတွေကို တကယ် သဘောကျတာ။ မမ မင်းကို ကောင်းကောင်း စောင့်ရှောက်ပေးမှာပါ။"

စူးချန်ခုန်းကို ကြည့်သော သူ၏ အကြည့်မှာ အရသာရှိသော သားကောင်ကို ကြည့်နေသည့် ဆာလောင်မွတ်သိပ်နေသော ဝံပုလွေတစ်ကောင်အလား။

ရှုံ့ရှန်းက စိတ်မရှည်စွာဖြင့် ပြောလိုက်သည်။ "နန်ကုန်းမင်... မိစ္ဆာသတ်ဓားကို နာနာခံခံနဲ့ အပ်ပြီး သွေးပူဇော်ခြင်းမှာ ပူးပေါင်းလိုက်စမ်း။ ငါတို့ လိုချင်တာက မိစ္ဆာသတ်ဓားပဲ။ မင်းတို့ အိမ်တော်က တခြားဘယ်သူ့ကိုမှ မထိခိုက်စေရဘူး။ ငါ့ကို ဒေါသထွက်အောင် လုပ်မယ်ဆိုရင်တော့ ဒီနေ့ နတ်ဘုရားလက်နက်အိမ်တော်က သွေးချောင်းစီးပြီး သမိုင်းထဲမှာပဲ ကျန်ခဲ့လိမ့်မယ်။"

"မိစ္ဆာသတ်ဓားလား"

နန်ကုန်းမင်၏ လက်ထဲရှိ အစိမ်းရောင် မီးလျှံအလင်းများ ထွက်ပေါ်နေသော ငရဲမီးလျှံဓားကို စူးချန်ခုန်း မြင်လိုက်ရပြီး သူ၏ စိတ်ထဲတွင် တစ်စုံတစ်ခုကို ခံစားလိုက်ရသည်။

စူးချန်ခုန်း ဤနေရာသို့ လာရသည့် မူလရည်ရွယ်ချက်မှာ မိစ္ဆာသတ်ဓားအတွက် ဖြစ်သည်။ လွန်ခဲ့သော တစ်လက သူ၏ အဆင့်တက်လှမ်းမှုကြောင့် ၎င်းကို အရင်ကလောက် အသည်းအသန် မလိုချင်တော့သော်လည်း သူ၏ နက်ရှိုင်းသော ပန်းပဲပညာကြောင့် ထိုနတ်ဘုရားလက်နက်ကို လေ့လာရန် စိတ်ဝင်စားနေဆဲ ဖြစ်သည်။

နန်ကုန်းမင်က ငရဲမီးလျှံဓားကို ပိုမိုတင်းတင်းဆုပ်ကိုင်လိုက်ပြီး သူ၏ မျက်လုံးများမှာ အေးစက်သော ပြတ်သားမှုများဖြင့် ပြည့်နှက်နေ၏။ "ငါ မကြောက်ဆုံးက ခြိမ်းခြောက်တာပဲ... ငါ့ရဲ့ ခန္ဓာကိုယ်က အပိုင်းပိုင်းပြတ်ပြီး ပြာဖြစ်သွားပါစေဦးတော့ မင်းတို့ ဘယ်တော့မှ အောင်မြင်မှာ မဟုတ်ဘူး။"

ဤမိစ္ဆာလူသား သုံးဦးမှာ နတ်ဘုရားလက်နက်အိမ်တော်ကို အသုံးချကာ သွေးပူဇော်ခြင်းတွင် ပူးပေါင်းရန် နန်ကုန်းမင်ကို ခြိမ်းခြောက်နေခြင်းဖြစ်သော်လည်း နန်ကုန်းမင်၏ စရိုက်အရ အရှုံးပေးရန် လုံးဝဆန္ဒမရှိပေ။

နန်ကုန်းမင်သည် သူ၏ နောက်ကွယ်ရှိ မီးတောင်ဝကို တစ်ချက် ကြည့်လိုက်သည်။ သူ သွန်းလုပ်ထားသော ဓားကို သူတို့လက်ထဲ လွယ်လွယ်ကူကူ အရောက်ခံမည့်အစား ထိုဓားနှင့်အတူ မီးတောင်ဝအတွင်းသို့ ခုန်ချကာ ခန္ဓာကိုယ်နှင့် အရိုးများ အရည်ပျော်သွားခြင်းကိုပင် ရွေးချယ်ပေလိမ့်မည်။

သူတို့၏ စကားဝိုင်းကြောင့် စူးချန်ခုန်းမှာ ဖြစ်ပျက်နေသည်များကို အကြမ်းဖျင်း နားလည်သွားခဲ့သည်။ ဇီမိန်နှင့် အခြားသူများမှာ နန်ကုန်းမင်၏ လက်ထဲရှိ မိစ္ဆာသတ်ဓားအတွက် ဤနေရာတွင် ပေါ်လာခြင်း ဖြစ်သည်။ ဒါပေမယ့် မိစ္ဆာသတ်ဓားက မိစ္ဆာနတ်ဆိုးတွေကို နှိမ်နင်းနိုင်တယ်လို့ ပြောကြတာ မဟုတ်ဘူးလား။ ဘာဖြစ်လို့ နတ်ဘုရားလက်နက်အိမ်တော်က လူတွေက ဒီလောက်အထိ အခြေအနေ ဆိုးနေရတာလဲ။

သို့သော် စူးချန်ခုန်းက ထိုအကြောင်းကို အများကြီး မစဉ်းစားတော့ဘဲ နန်ကုန်းမင်ဘက်သို့ လှည့်ကာ ပြောလိုက်သည်။ "အိမ်တော်သခင် နန်ကုန်း... ကျွန်တော် နတ်ဘုရားလက်နက်အိမ်တော်မှာ နေခဲ့တာ အတော်ကြာပါပြီ။ ကျေးဇူးဆပ်တဲ့အနေနဲ့ ဒီတိရစ္ဆာန် သုံးကောင်ကို ရှင်းလင်းခွင့်ပြုပါ"

ဇီမိန်နှင့် အခြားသူများက နတ်ဘုရားလက်နက်အိမ်တော်တွင် ဤမျှ သောင်းကျန်းနေသည်ကို စူးချန်ခုန်း ဒီအတိုင်း ကြည့်မနေနိုင်ပေ။ ဤခြောက်လကျော်အတွင်း စူးချန်ခုန်းမှာ အများကြီး ရရှိခဲ့သလို လုယာနှင့် အခြားသူများကလည်း သူ့ကို အစွမ်းကုန် ကူညီပေးခဲ့ကြသောကြောင့် သူ၏ ပန်းပဲပညာမှာ အမြင့်ဆုံးအဆင့်သို့ ရောက်ရှိခဲ့ခြင်း ဖြစ်သည်။

ထို့အပြင် စူးချန်ခုန်းအတွက်မူ ဤမိစ္ဆာလူသားသုံးဦးမှာ ရတနာများ ဖြစ်သည်။ သူတို့၏ ရင်ဘတ်အတွင်းရှိ မူလချီစွမ်းအင်များနှင့် နတ်ဆိုးအမြုတေများမှာ တန်ဖိုးမဖြတ်နိုင်သော ပစ္စည်းများ ဖြစ်သည်။ ယခု သူနှင့် တွေ့နေပြီဖြစ်ရာ သူတို့ကို ဘယ်လိုလုပ် အလွတ်ပေးနိုင်မည်နည်း။

"သူ... သူ အခု ဘာပြောလိုက်တာလဲ"

ရှဲ့ဖေး အပါအဝင် နတ်ဘုရားလက်နက်အိမ်တော်မှ လူများမှာ မှင်တက်သွားကြသည်။ သူတို့အားလုံး စူးချန်ခုန်းအကြောင်းကို သိထားကြပြီး သူသည် လက်နက်သွန်းလုပ်ရာတွင် တော်တော်လေး ပါရမီရှိကြောင်းနှင့် သူ၏ နောက်ခံမှာလည်း သာမန်မဟုတ်နိုင်ကြောင်း သိထားကြသည်။

သို့သော် ဤလူငယ်လေးက ယခုအချိန်တွင် ရှေ့သို့ထွက်ကာ မိစ္ဆာလူသား သုံးဦးကို စိန်ခေါ်နိုင်ပါ့မလား။ သူက မိစ္ဆာစစ်သည်တော်တွေကို သာမန် မူလနယ်ပယ်သိုင်းပညာရှင်တွေလို့ ထင်နေတာလား။ ဒါဟာ ကိုယ့်ကိုယ်ကိုယ် သေကြောင်းကြံတာနဲ့ ဘာမှမခြားပေ။

"ဒီကလေးကို မြန်မြန် ရှင်းပစ်လိုက်စမ်း။ အချိန်ဆွဲနေရင် ပြဿနာတက်လိမ့်မယ်" ဟု ရှဲ့ဖေးက သူ၏ စိတ်ထဲမှ တိုက်တွန်းနေခဲ့သည်။ အချိန်အကြာကြီး စောင့်နေပါက မထင်မှတ်ထားသည်များ ဖြစ်လာနိုင်သည်ကို သူ စိုးရိမ်နေခြင်း ဖြစ်သည်။ မိစ္ဆာသတ်ဓားကို မြန်မြန်သိမ်းပိုက်ပြီး နန်ကုန်းမင်ကို သွေးပူဇော်ခြင်းအတွက် အသုံးပြုရန်မှာသာ အမှန်ကန်ဆုံး နည်းလမ်းဖြစ်သည်ဟု သူ ထင်မြင်နေသည်။

"သတိထား"

ထိုအချိန်တွင် နန်ကုန်းမင်နှင့် လုယာတို့၏ မျက်နှာများမှာ ပြောင်းလဲသွားပြီး အော်ဟစ်သတိပေးလိုက်ကြသည်။

"မင်းက သေချင်နေတာကိုး။ ငါ မင်းရဲ့ ဆန္ဒကို ဖြည့်ဆည်းပေးလိုက်မယ်"

ထိုစကားကို ပြောလိုက်သူမှာ အမြဲတမ်း စိတ်တိုတတ်သော ရှုံးရှန်းပင် ဖြစ်သည်။ သူ၏ ရှေ့ရှိ နားမလည်တတ်သော လူငယ်လေးက သူတို့ကို နှစ်ကြိမ်တိုင်တိုင် မလေးမစား လုပ်ခဲ့သည့်အတွက် ရှုံးရှန်းမှာ စိတ်မရှည်တော့ဘဲ ဤနှောင့်ယှက်နေသော လူငယ်ကို အသေချေမှုန်းရန်အတွက် အချိန်ဆွဲ မနေတော့ဘဲ ချက်ချင်း တိုက်ခိုက်လိုက်တော့သည်။