အခန်း (၃၃၆)

အခန်း။ ၃၃၆

ကျန်းယွမ်တောင်တန်းနှင့် မိုင်တစ်ရာခန့် ဝေးကွာသော တောအုပ်တစ်ခုအတွင်းရှိ ဂူတစ်ခုထဲမှ အလွန်အမင်း ဖရိုဖရဲဖြစ်နေသော ဟွမ်ရွှမ်းသည် ယိုင်တိုင်တိုင်ဖြင့် ထွက်ပေါ်လာခဲ့သည်။

သူ၏ မျက်နှာအသွင်အပြင်မှာ ယခင်အတိုင်းပင် ပြာနှမ်းလျက် ရှိနေဆဲပင်။ ပြီးခဲ့သည့်ညက သူ၏ စိတ်စွမ်းအင်များ နှစ်ကြိမ်တိုင်တိုင် ပြန်လည်ရိုက်ခတ်မှုကို ခံစားခဲ့ရခြင်းကြောင့် သူ၏ အခြေအနေမှာ အတော်လေး ဆိုးရွားနေခဲ့သည်။

အကယ်၍ သူသာ အဆင့် ၄ ဆင့်ကဲပြောင်းလဲသူ၏ ကြံ့ခိုင်သော ကိုယ်ခန္ဓာကို ပိုင်ဆိုင်မထားခဲ့ပါက သာမန်လူတစ်ဦးအဖို့ ယခုကဲ့သို့ ပြင်းထန်သော ဒဏ်ရာမျိုးနှင့် ယနေ့နံနက်တွင် ပြန်လည်နိုးထလာနိုင်ရန်မှာ မဖြစ်နိုင်သလောက်ပင်။

"အဟွတ်... အဟွတ်..."

သူ၏ ခန္ဓာကိုယ်အတွင်းရှိ ဒဏ်ရာများမှာ အနည်းငယ်မျှ တည်ငြိမ်စပြုလာပြီ ဖြစ်သော်လည်း အနည်းငယ်မျှ လှုပ်ရှားလိုက်ရုံဖြင့် အတွင်းပိုင်းမှ နာကျင်မှုများမှာ ပိုမိုပြင်းထန်လာကာ သွေးများပင် အဆက်မပြတ် အန်ထွက်လာစေသည်။

ဂူရှေ့ရှိ ရှေးဟောင်းသစ်ပင်ကြီးတစ်ပင်ကို အားပြုမှီထားရင်း ဟွမ်ရွှမ်း၏ ရင်ဘတ်မှာ ပြင်းထန်စွာ နိမ့်ချည်မြင့်ချည် ဖြစ်နေပြီး ခေတ္တမျှ မောဟိုက်နေရသည်။ အသက်ရှူခြင်းကို အတန်ကြာ ထိန်းညှိပြီးနောက်မှသာ သူ၏ ဒဏ်ရာများကို အနည်းငယ် ဖိနှိပ်ထားနိုင်တော့သည်။

"အဲဒီ မိန်းမယုတ် သူသာ ငါနဲ့ ပူးပေါင်းဖို့ သဘောတူခဲ့ရင် အခြေအနေတွေက ဒီလောက်အထိ ဆိုးမှာမဟုတ်ဘူး"

ဟွမ်ရွှမ်း၏ မျက်ဝန်းများထဲတွင် ရက်စက်ကြမ်းကြုတ်မှုများ ပြည့်နှက်နေသည်။

ထိုမိန်းမ ကျောက်လင်း အကြောင်းကို တွေးမိသည်နှင့် သူသည် ဒေါသကြောင့် အံကြိတ်မိပြီး ယခုချက်ချင်းပင် သွားရောက်သတ်ဖြတ်ပစ်ချင်စိတ်များ ပေါက်နေမိသည်။

ယခုတစ်ကြိမ်တွင် သူ၏ အဖိုးတန်လှသော အဆင့် ၄ သားရဲကြီး နှစ်ကောင်လုံးမှာ သူမ၏ လက်ချက်ဖြင့် ပျက်စီးသွားခဲ့ရသည်။

ထိုအဆင့် ၄ သားရဲကြီး နှစ်ကောင် မရှိတော့ဘဲနှင့် သူ၏ တိုက်ခိုက်ရေးစွမ်းရည်မှာ ထက်ဝက်ခန့် လျော့ကျသွားခဲ့ရပြီး ယခုကဲ့သို့သော တောနက်ကြီးများအတွင်း လှည့်လည်သွားလာရန်ပင် ဝံ့ရဲတော့မည် မဟုတ်ပေ။

"ငါ့ရဲ့ သားရဲဘုရင်ဂိုဏ်းကိုလည်း ဖျက်ဆီးတယ်။ ငါ့ရဲ့ အဆင့် ၄ သားရဲ နှစ်ကောင်ကိုလည်း သတ်တယ် ငါ့ကိုလည်း ဒီလောက် ပြင်းပြင်းထန်ထန် ဒဏ်ရာရအောင် လုပ်တယ်"

"ဒါဟာ သေတပန်သက်ဆုံးအထိ ရန်ငြိုးပဲ ဒီမိန်းမယုတ်ကို ငါကိုယ်တိုင် မသတ်နိုင်မချင်း ငါ့ရင်ထဲက အာဃာတတွေ ပြေပျောက်မှာ မဟုတ်ဘူး။ ငါ သူ့ကို အဆပေါင်းများစွာ ကလဲ့စားပြန်ချေရမယ်"

"မဖြစ်ဘူး... ငါ့ကို ဒီလောက်ထိ ဒုက္ခပေးထားတဲ့ ဒီမိန်းမယုတ်ကို လွယ်လွယ်နဲ့ လွတ်ခွင့်ပေးလို့ မရဘူး"

ဟွမ်ရွှမ်းသည် အံကို တင်းတင်းကြိတ်ထားပြီး သူ၏ မျက်ဝန်းများမှာလည်း အမုန်းတရားများဖြင့် ပြည့်နှက်နေကာ သတ်ဖြတ်လိုစိတ်များမှာ တစ်နေ့ထက်တစ်နေ့ ပိုမိုပြင်းထန်လာခဲ့သည်။

သို့သော်လည်း သူ၏ လက်ရှိအခြေအနေကို ပြန်လည်စဉ်းစားမိသောအခါ ဟွမ်ရွှမ်းသည် ချက်ချင်းပင် စိတ်ဓာတ်ကျသွားရသည်။ သူ၏ လက်ရှိ ရုပ်ပိုင်းဆိုင်ရာ အခြေအနေအရ ကာလတိုအတွင်း သူကိုယ်တိုင် ကလဲ့စားချေရန်မှာ လုံးဝ မဖြစ်နိုင်သည့် အခြေအနေပင်။

ထိုမိန်းမယုတ်၏ ဘေးတွင်ရှိသော အဆင့် ၄ ဗီဇပြောင်းဇွန်ဘီများအကြောင်းကို ပြန်လည်တွေးတောမိသည့်အခါ ဟွမ်ရွှမ်း၏ နှလုံးသားမှာ မသိစိတ်ဖြင့်ပင် တုန်လှုပ်သွားရတော့သည်။

"ဟုတ်ပြီ... လူသားအာဏာပိုင်တွေက အဲဒီမိန်းမယုတ်ကို လိုက်လံရှာဖွေနေကြတာပဲ ငါသာ သူမရှိတဲ့ တည်နေရာကို သတင်းပေးလိုက်ရင်..."

ရုတ်တရက်ဆိုသလို ဟွမ်ရွှမ်း၏ ဦးနှောက်အတွင်း၌ ထက်မြက်သော အကြံတစ်ခု လက်ခနဲ ပေါ်ထွက်လာပြီး သူ၏ မျက်လုံးများမှာလည်း တောက်ပသွားတော့သည်။

လောလောဆယ်တွင် သူကိုယ်တိုင် ထိုမိန်းမယုတ်ကို မကိုင်တွယ်နိုင်သေးသရွေ့ လူသားအာဏာပိုင်များ၏ အင်အားကို ဓားတစ်လက်အဖြစ် အသုံးချမည်ဖြစ်သည်။ ထိုအချိန်ကျမှ သူမ မည်သို့ သေဆုံးသွားမည်ကို စောင့်ကြည့်ရုံသာ ရှိတော့သည်။

ဤသို့ တွေးမိသည်နှင့် ဟွမ်ရွှမ်း၏ မျက်နှာတွင် ကောက်ကျစ်သော အပြုံးတစ်ခု ပေါ်ထွက်လာသည်။

ထို့ကြောင့် ဟွမ်ရွှမ်းသည် ချက်ချင်းပင် အကောင်အထည်ဖော်ရန် ဆုံးဖြတ်လိုက်သည်။ လူသားအာဏာပိုင်များနှင့် ထိုမိန်းမယုတ်တို့ ခွေးအချင်းချင်း ကိုက်ကြသည့် ပွဲကို ကြည့်ရန် သူ အလွန်ပင် စိတ်လှုပ်ရှားနေမိသည်။

ထိုအတွေး ဝင်လာသည်နှင့် တစ်ပြိုင်နက် ကောင်းကင်ယံထက်မှ အဆင့် ၃ သားရဲငှက်တစ်ကောင်သည် စူးရှစွာ အော်ဟစ်လျက် အရှိန်အဟုန်ဖြင့် ဆင်းသက်လာခဲ့သည်။

နောက်တစ်ခဏတွင် ဟွမ်ရွှမ်းသည် ထိုအဆင့် ၃ သားရဲငှက်ပေါ်သို့ တက်စီးကာ ကျန်းဟိုင်မြို့ရှိရာသို့ ပျံသန်းသွားတော့သည်။

တောင်ပတ်လမ်းပေါ်တွင်...

ဂျုန်း... ဂျုန်း...

ကားတန်းကြီးသည် ကျောက်စရစ်ခဲများရှိသော လမ်းအတိုင်း ဖြည်းညှင်းစွာ မောင်းနှင်လာနေပြီး တာယာများနှင့် လမ်းထိတွေ့သံမှာ တဂျိဂျိဖြင့် မြည်ဟည်းနေသည်။

"လုချွမ်း... ဒီတောင်လမ်းက ဘယ်လောက်တောင် ရှည်ဦးမှာလဲ ဘယ်တော့မှ ဒီထဲကနေ ထွက်ရမှာလဲ လမ်းကလည်း တကယ့်ကို မောင်းရခက်လိုက်တာ ချိုင့်ခွက်တွေကလည်း နေရာတိုင်းမှာပဲ။ ငါ့မှာတော့ ဟိုဘက်ဒီဘက် လွင့်ထွက်ပြီး အသက်ထွက်တော့မယ်"

ကားနောက်ခန်းတွင်မူ ကျောက်လင်းသည် ကားတံခါးကို မှီလျက် လေကောင်းလေသန့် ရရှိရန် ပြတင်းပေါက်ကို ဖွင့်ထားရင်း ညည်းညူနေမိသည်။

ရံဖန်ရံခါတွင် ပြတင်းပေါက်မှတစ်ဆင့် ခြင်များ ပျံသန်းဝင်ရောက်လာတတ်ရာ ကျောက်လင်းမှာ စိတ်မရှည်စွာဖြင့် လိုက်လံရိုက်နှက်နေရတော့သည်။

၎င်းကို ကြားရသောအခါ လုချွမ်းအနေဖြင့် ဤအမျိုးသမီးအား ပြန်လည်တုံ့ပြန်ရန် ဆန္ဒမရှိပေ။ အဘယ်ကြောင့်ဆိုသော် ရှန်းချွမ်းမြို့တစ်ဝိုက်ရှိ လမ်းများအားလုံးမှာ ဤကဲ့သို့ပင် ဆိုးရွားနေသောကြောင့် ဖြစ်သည်။

အထူးသဖြင့် ရှန်းချွမ်းမြို့မှ ထွက်ခွာရာ တောင်ပတ်လမ်းများမှာ အကြမ်းတမ်းဆုံး ဖြစ်သည်။ အကယ်၍ ညည်းညူရုံမျှဖြင့် လမ်းအခြေအနေ ကောင်းမွန်သွားမည်ဆိုပါက သူကိုယ်တိုင်ပင် အစောကြီးကတည်းက လုပ်ဆောင်ခဲ့ပြီးပေလိမ့်မည်။

သူသည် မြေပုံကို သေသေချာချာ လေ့လာပြီးဖြစ်သည်။ ကျန်ရှိနေသော တောင်ပတ်လမ်း အကွာအဝေးအရ လမ်းရှင်းရန် အချိန်အနည်းငယ် ထပ်ပေးရဦးမည် ဖြစ်ရာ သူတို့အားလုံး အောင့်အည်းသည်းခံရန်သာ ရှိတော့သည်။

ကျောက်လင်းက ဘယ်ဘက်ကားတံခါးကို မှီထားစဉ် ကျိရုရွှယ်မှာမူ ညာဘက်အစွန်တွင် ထိုင်လျက် ပြတင်းပေါက်အပြင်ဘက်သို့ ကြည့်ကာ အတွေးကိုယ်စီဖြင့် နစ်မျောနေခဲ့သည်။

မနေ့ညက ဖြစ်ရပ်နှင့် ပတ်သက်၍ ကျောက်လင်းအား ဘာမျှမသိသလို ဟန်ဆောင်ကာ လိမ်ညာ၍ ရနိုင်သော်လည်း သူမ၏ ဖခင်မှာမူ ထိုမျှလွယ်လွယ်နှင့် လှည့်စား၍ ရမည့်သူမဟုတ်ကြောင်း သူမ ကောင်းစွာ သိရှိထားသည်။ သူမ၏ ဖခင်သည် တစ်စုံတစ်ခုကို ရိပ်မိနေပြီး ဖြစ်ပေလိမ့်မည်။

ထို့ကြောင့် သူမ၏ လက်ရှိ စွမ်းအားအစစ်အမှန်ကို ဖခင်ဖြစ်သူအား ဖွင့်ပြောပြသင့် မပြောပြသင့် ကျိရုရွှယ်မှာ အတော်လေး ဝေခွဲမရ ဖြစ်နေမိသည်။

နေ့စဉ်နှင့်အမျှ အတူတကွ နေထိုင်နေကြသူများ ဖြစ်သည့်အတွက် ဖခင်ဖြစ်သူထံမှ သူမ၏ အစွမ်းကို ဖုံးကွယ်ထားရန်မှာ အလွန်တရာ ခက်ခဲလှသည်။ အထူးသဖြင့် အန္တရာယ်နှင့် ရင်ဆိုင်ရချိန်မျိုးတွင် အရေးကြီးသော အခိုက်အတန့်၌ သူမအနေဖြင့် ပါဝင်ပတ်သက်ရန် လိုအပ်လာမည်သာ ဖြစ်သည်။

ဥပမာအားဖြင့် ဗီဇပြောင်း သင်းခွေချပ်ကြီးက ရုတ်တရက် တိုက်ခိုက်လာချိန်တွင် သူမအနေဖြင့် ဘယ်လိုလုပ် ငြိမ်နေနိုင်မှာလဲ။

သူမ လက်ဦးမှုရယူလိုက်သည်နှင့် တစ်ပြိုင်နက် ဖခင်ဖြစ်သူမှာ တစ်စုံတစ်ခု မှားယွင်းနေသည်ကို ခံစားမိသွားမည်မှာ အသေအချာပင်။ သူမတွင် အကြောင်းပြချက် အမျိုးမျိုး ရှိနေစေကာမူ ပထမတစ်ကြိမ်တွင် လွတ်မြောက်နိုင်သော်လည်း ဒုတိယ တတိယအကြိမ်များပါ ထပ်မံ ဖြစ်ပွားလာပါက ဆက်လက်၍ ဟန်ဆောင်နေနိုင်မည်မဟုတ်ပေ။

ကျောက်လင်းပင်လျှင် လူအ မဟုတ်သည့်အတွက် တစ်စုံတစ်ခု ထူးခြားနေသည်ကို သတိထားမိလာနိုင်ရာ သူမ၏ ဖခင်မှာမူ ပြောနေရန်ပင် မလိုတော့ပေ။

ဤသို့ တွေးတောရင်း ကျိရုရွှယ်မှာ ရင်ထဲ၌ သက်ပြင်းချမိကာ စိတ်အခြေအနေမှာလည်း ရှုပ်ထွေးနေတော့သည်။

"ချီချီလေး... အန်တီ ကားထဲမှာ ထားခဲ့တဲ့ အာလူးကြော်တွေကော သမီးရဲ့ အနောက်မှာ ရှိနေလား ကြည့်ပေးပါဦး"

ထိုစဉ်မှာပင် ကျောက်လင်း၏ အသံက ဟိန်းခနဲ ထွက်ပေါ်လာသည်။

သူမသည် သူမ၏ ပတ်ဝန်းကျင်တစ်ခုလုံးကို အသည်းအသန် ရှာဖွေနေပြီးနောက် ကျိရုရွှယ်ကို ဇဝေဇဝါဖြင့် လှမ်းကြည့်လိုက်သည်။

ကျိရုရွှယ်သည်လည်း အတွေးကမ္ဘာထဲမှ သတိပြန်ဝင်လာပြီးနောက် သူမ၏ အနောက်ဘက်တွင် ရှိနေသော အာလူးကြော်ထုပ်ကို ဆွဲထုတ်ကာ ကျောက်လင်းထံသို့ လှမ်းပစ်ပေးလိုက်သည်။

"ဟားဟား... တကယ်ကြီး ဒီမှာ ရှိနေတာပဲ။ ကျေးဇူးပဲ ချီချီလေးရေ"

ကျောက်လင်းသည် ဝမ်းသာအားရဖြင့် အာလူးကြော်ထုပ်ကို ဖောက်ကာ တဂျွတ်ဂျွတ် ဝါးစားနေတော့သည်။ ကျိရုရွှယ်၏ စိတ်ထဲတွင် ဖြစ်ပျက်နေသော ထူးခြားမှုများကိုမူ သူမ လုံးဝ သတိပြုမိခြင်း မရှိပေ။

‘ဖြစ်နိုင်တာက... ဖေဖေသာ မရှိရင် သမီးက တကယ့်ကို ဒီအစွမ်းတွေကို အကန့်အသတ်မရှိ ဆက်ပြီး ဖုံးကွယ်ထားမိမှာလားမသိဘူး... ဖြစ်နိုင်တာပဲ...’

စောစောက ညည်းညူမှုများကို မေ့ပျောက်ကာ အာလူးကြော်စားရင်း ပျော်ရွှင်နေသည့် ကျောက်လင်းကို ကြည့်ပြီး ကျိရုရွှယ်သည် မတတ်သာသလို ခေါင်းခါမိတော့သည်။

ကျန်းဟိုင် အခြေစိုက်စခန်းမြို့တော် အစည်းအဝေးခန်းမ

နဂါးပျံအဖွဲ့ကို နေရာချထားပေးပြီးနောက် အခြေစိုက်စခန်း အကြီးအကဲသည် ခေတ္တမျှ အနားယူရန် ပြင်ဆင်နေစဉ်မှာပင် ဇွန်ဘီဘုရင်နှင့် ပတ်သက်သော နောက်ဆုံးရ သတင်းပို့ချက်ကို လက်ခံရရှိလိုက်သည်။ ထို့ကြောင့် သူသည် အနားမယူနိုင်တော့ဘဲ ရုံးခန်းမှ ထွက်ခွာကာ အစည်းအဝေးခန်းမသို့ တစ်ဖန် ပြန်လည်လာခဲ့ရပြန်သည်။

"အကြီးအကဲ... ကျွန်တော်တို့ အခုလေးတင် သတင်းတစ်ခု ရရှိထားပါတယ်။ ဇွန်ဘီဘုရင်နဲ့ ပတ်သက်တဲ့ သတင်းအသစ်ပါ"

အခြေစိုက်စခန်း အကြီးအကဲသည် စားပွဲ၏ ထိပ်ဆုံးနေရာတွင် ထိုင်လိုက်သည်။ ထိုစဉ် သူ၏ ဘယ်ဘက်ရှိ အရာရှိကြီးတစ်ဦးက စိတ်လှုပ်ရှားစွာဖြင့် တင်ပြလိုက်သည်။

"ဇွန်ဘီဘုရင်က ဘယ်မှာလဲ သတင်းကကော ခိုင်လုံရဲ့လား"

အရာရှိကြီး၏ စိတ်လှုပ်ရှားမှုနှင့် ဆန့်ကျင်ဘက်ဖြစ်စွာ အခြေစိုက်စခန်း အကြီးအကဲမှာမူ တည်ငြိမ်အေးဆေးစွာဖြင့်သာ မေးမြန်းလိုက်သည်။

ယခင်ကလည်း ဇွန်ဘီဘုရင်နှင့် ပတ်သက်သော သတင်းအချက်အလက်များစွာ ရရှိခဲ့ဖူးသော်လည်း စစ်ဆေးကြည့်သည့်အခါ သတင်းမှားများသာ ဖြစ်နေခဲ့သဖြင့် ယနေ့သတင်းကိုမူ သူက အထူးသတိထားနေခြင်း ဖြစ်သည်။

"အကြီးအကဲ... ဇွန်ဘီဘုရင်ဟာ လက်ရှိမှာ ကျန်းယွမ်တောင်တန်းနဲ့ နီးစပ်တဲ့ ရှန်းချွမ်းမြို့မှာ ရှိနေပါတယ်။ ဒီသတင်းကို ဒီနေ့မှာပဲ အမည်မသိ ဆင့်ကဲပြောင်းလဲသူတစ်ဦးက အခြေစိုက်စခန်းကို လျှို့ဝှက်ပေးပို့လာတာ ဖြစ်ပြီး ပါဝင်တဲ့ အချက်အလက်တွေအရ ဒီသတင်းက တော်တော်လေး ခိုင်လုံမှုရှိတယ်လို့ ကျွန်တော် ယုံကြည်ပါတယ်"

ထိုအရာရှိကြီးသည် စာသားများစွာ ရေးသားထားသော မှတ်တမ်းစာအုပ်ငယ်ကို အကြီးအကဲထံ ကမ်းပေးလိုက်ပြီးနောက် ဆက်လက်၍ "ဒီစာအုပ်ထဲမှာ ရေးထားတာကတော့ ရှန်းချွမ်းမြို့ရဲ့ အကြီးဆုံး ဆင့်ကဲပြောင်းလဲသူအဖွဲ့အစည်းဖြစ်တဲ့ သားရဲဘုရင်ဂိုဏ်းက အဆင့် ၄ ဗီဇပြောင်းဇွန်ဘီ အုပ်စုတစ်စုရဲ့ ချေမှုန်းခြင်းကို ခံလိုက်ရတယ်လို့ ဆိုပါတယ်။

ဒါ့အပြင် ဇွန်ဘီဘုရင်ရဲ့ ကားတန်းဟာ ကျန်းယွမ်တောင်တန်းမှာ လှုပ်ရှားနေပြီး မျက်မြင်သက်သေရဲ့ အဆိုအရ ကားတန်းထဲမှာ မိန်းကလေးငယ်တစ်ဦးနဲ့ အရွယ်ရောက်ပြီး အမျိုးသမီးတစ်ဦးတို့ကိုလည်း တွေ့ရှိခဲ့ရတယ်လို့ ရေးသားထားပါတယ်..."

မှတ်တမ်းစာအုပ်ထဲရှိ အကြောင်းအရာများကို ဖတ်ရှုပြီးနောက်တွင်မူ အခြေစိုက်စခန်း အကြီးအကဲ၏ မျက်နှာတွင် စိတ်လှုပ်ရှားမှု အရိပ်အယောင်များ နောက်ဆုံး၌ ပေါ်ထွက်လာတော့သည်။

"မြန်မြန် နဂါးပျံအဖွဲ့ကို အကြောင်းကြားလိုက်ပါ။ ဇွန်ဘီဘုရင ရှိနေတဲ့ နောက်ဆုံး တည်နေရာကို ရှာဖွေတွေ့ရှိပြီလို့ သူတို့ကို ပြောလိုက်ပါ"