သူတော်စင်မင်းဆက်နှင့် သူတော်စင်နတ်ဘုရားအဖွဲ့ ၂

ဒုတိယမြောက် သူတော်စင်စစ်သူကြီးသည် ဤ သူတော်စင်နတ်ဘုရားအဖွဲ့ကို အမြစ်ပြတ်ချေမှုန်းမည့် စစ်ဆင်ရေး၏ ခေါင်းဆောင်ဖြစ်လာသဖြင့် သူတော်စင်မင်းဆက်ပိုင် နယ်နိမိတ်အတွင်းရှိ သူတော်စင်စစ်တပ်ကို စတင်စုစည်းတော့သည်။

ဂုဏ်သတင်းကြီးလှသော ကောင်းကင်မျိုးနွယ်စုကြီး ဆယ်စုမှာမူ မိသားစုအခြေပြု အင်အားစုများသာ ဖြစ်သဖြင့် သူတို့၏တာဝန်မှာ မျိုးနွယ်စုအတွင်းရှိ ထိပ်သီးကျွမ်းကျင်သူများကို စေလွှတ်၍ စစ်တပ်နှင့် ပူးပေါင်းရန်သာ ဖြစ်သည်။

ယခုအခါ သူတော်စင်နတ်ဘုရားအဖွဲ့သည် အရှေ့ဘက်ကောင်းကင်ယံ၏ အထွတ်အထိပ် အာဏာရှင်အင်အားစု ဖြစ်နေပြီဖြစ်သည်။ ၎င်းကို အရှေ့ဘက်ကောင်းကင်၏သရဖူမဲ့ဘုရင် ဟုပင် ခေါ်ဆိုနိုင်သည်။

သူတို့၏အင်အားမှာ ကောင်းကင်မျိုးနွယ်စုများမှ ကောင်းကင်ဘုရင်များပင် လျှော့တွက်၍မရလောက်အောင် အစွမ်းထက်နေပြီဖြစ်သည်။

ထို့အပြင် သူတို့ရရှိထားသော သတင်းများအရ သူတော်စင်နတ်ဘုရားအဖွဲ့သည် ရှေးဟောင်းနတ်ဘုရားချောက်နက်ကို အောင်နိုင်ပြီးကတည်းက အရှေ့ဘက်ကောင်းကင်ရှိ သက်ရှိသန်းပေါင်းများစွာ၏ အသိအမှတ်ပြုမှုကို ရရှိထားသည်။ တစ်ချိန်တည်းမှာပင် ထိပ်သီးကျွမ်းကျင်သူများနှင့် အင်အားကြီးအဖွဲ့အစည်းများစွာ ဝင်ရောက်ပူးပေါင်းလာသဖြင့် အဖွဲ့၏အင်အားမှာ ယခင်ကထက် များစွာပိုမိုတောင့်တင်းလာခဲ့သည်။

ယခုအခါ သူတော်စင်နတ်ဘုရားအဖွဲ့၏ စုစုပေါင်းအင်အားမှာ ကောင်းကင်မျိုးနွယ်စုကြီး ဆယ်စုအနက် မည်သည့်မျိုးနွယ်စုထက်မဆို သာလွန်နေပြီး ဧရာမအင်အားကြီးသားရဲကြီးတစ်ကောင်ကဲ့သို့ ဖြစ်နေပြီဖြစ်သည်။ ဤကမ္ဘာလောကတွင် သူတော်စင်နတ်ဘုရားအဖွဲ့သည် ထိပ်တန်းအင်အားစုများထဲမှ တစ်ခုပင်။

သူတော်စင်မင်းဆက်က စစ်တပ်ကို အလုပ်ရှုပ်ခံ စုစည်းနေချိန်တွင် အဝေးတစ်နေရာရှိ အရှေ့ဘက်ကောင်းကင်မှ သူတော်စင်နတ်ဘုရားအဖွဲ့ထံသို့ သတင်းများ ရောက်ရှိလာသည်။ ၎င်းမှာ သတင်းပျံ့နှံ့မှု မြန်ဆန်ခြင်းကြောင့်မဟုတ်ဘဲ တစ်စုံတစ်ယောက်က တမင်လာရောက် သတင်းပို့ခြင်းကြောင့်ဖြစ်သည်။

ထိုသူများအနက် တစ်ဦးမှာ ဖုန်းကောင်းကင်မျိုးနွယ်စုမှ စေလွှတ်လိုက်သော ကျွမ်းကျင်သူဖြစ်ပြီး ရှန်းချန်ကော ထံသို့ သတင်းလာပေးခြင်းဖြစ်သည်။ အခြားတစ်ဖက်တွင်လည်း သူတော်စင်သခင်မ လော့ယွင်ရှီးက သူတော်စင်မြို့တော်တွင် မြှုပ်နှံထားသော သူလျှိုများကလည်း သတင်းရသည်နှင့်ချက်ချင်း လာရောက်သတင်းပို့ခဲ့ကြသည်။

သတင်းရရချင်းမှာပင် လော့ယွင်ရှီးသည် သူတော်စင်နတ်ဘုရားအဖွဲ့မှ ကျွမ်းကျင်သူအားလုံးကို အရေးပေါ် အစည်းအဝေး ခေါ်ယူလိုက်တော့သည်။

သူတော်စင်နတ်ဘုရားအဖွဲ့၏ နန်းတော်အတွင်း

အမည်မသိကမ္ဘာအတွင်းရှိ သူတော်စင်နတ်ဘုရားအဖွဲ့ဌာနချုပ်၏ သူတော်စင်နန်းတော်အတွင်း...

လော့ယွင်ရှီးသည် ပလ္လင်ပေါ်တွင် ခန့်ညားထည်ဝါစွာ ထိုင်နေသည်။ သူမသည် အလွန်ပင် မာနကြီးပြီး အေးစက်ကာ လူ့ပြည်သို့ ဆင်းသက်လာသော ဧကရီတစ်ပါးကဲ့သို့ အရှိန်အဝါကြီးမားလှသည်။ သူမ၏ နတ်ဘုရားအရှိန်အဝါမှာ ကြောက်မက်ဖွယ်ကောင်းလှပြီး ခန္ဓာကိုယ်မှ မမြင်ရသော စွမ်းအားများ ထွက်ပေါ်နေကာ ဟင်းလင်းပြင်ကိုပင် တုန်ခါစေသည်။

"သူတော်စင်သခင်မ... ကျွန်တော်မျိုးတို့ကို ဘာကြောင့် အရေးပေါ်ဆင့်ခေါ်ရတာလဲ သိပါရစေ"

ပထမမြောက် သူတော်စင်နတ်ဘုရားက ရိုသေစွာ မေးမြန်းလိုက်သည်။ ၎င်းမှာ ခန်းမထဲရှိ လူတိုင်း သိချင်နေသော မေးခွန်းလည်း ဖြစ်သည်။ ဖန်ဆင်းခြင်းနယ်ပယ်ကျွမ်းကျင်သူများဖြစ်ကြသော ထိပ်သီးနတ်ဘုရား ဆယ်ဦးသည် ပုံမှန်အားဖြင့် ကိုယ့်ဘာသာ လှည့်လည်ကျင့်ကြံနေကြသူများဖြစ်ပြီး အလွန်အရေးကြီးသည့်ကိစ္စမှလွဲ၍ သခင်မက ဆင့်ခေါ်လေ့မရှိပေ။

လော့ယွင်ရှီးက ပြန်မဖြေဘဲ သူမ၏ ဖီးနစ်မျက်ဝန်းများဖြင့် ရှန်းချန်ကော ကို ကြည့်ကာ အေးစက်တည်ကြည်သော အသံဖြင့် ပြောလိုက်သည်။

"မင်းလည်း သိပြီးသားဖြစ်ပုံရတယ်"

ရှန်းချန်ကောသည် အဖွဲ့အစည်းတွင် အဆင့် (၁၀) ဖြစ်သော်လည်း သူ၏အဆင့်အတန်းမှာ အခြားနတ်ဘုရား ဆယ်ဦးထက်ပင် သာလွန်နေပြီး အစည်းအဝေးများကိုလည်း တက်ရောက်ခဲသည်။ ယခု သူဖိတ်ကြားချက်မပါဘဲ ရောက်လာခြင်းမှာ သတင်းရရှိထားခြင်းကြောင့် ဖြစ်ရမည်ဟု လော့ယွစ်ရှီးက သိလိုက်သည်။

ရှန်းချန်ကောက ခေါင်းညိတ်ပြပြီး လေသံအေးအေးဖြင့် ပြောလိုက်၏။

"ဖုန်းမျိုးနွယ်စုက တမင်လွှတ်လိုက်တဲ့ သံတမန်တစ်ယောက် ရောက်လာတယ်။ သူတော်စင်ဘုရင်က စစ်တပ်ကို စုစည်းပြီး ကောင်းကင်မျိုးနွယ်စု ငါးခုနဲ့ ပူးပေါင်းကာ အရှေ့ဘက်ကောင်းကင်ကို တိုက်ခိုက်ဖို့နဲ့ သူတော်စင်နတ်ဘုရားအဖွဲ့ကို ဖျက်ဆီးဖို့ အမိန့်ပေးလိုက်ပြီတဲ့"

"ဘုန်း"

ရှန်းချန်ကော၏ စကားအဆုံးတွင် ခန်းမတစ်ခုလုံး ရုတ်ရုတ်သဲသဲ ဖြစ်သွားသည်။ ၎င်းမှာ မိုးကြိုးပစ်လိုက်သကဲ့သို့ လူတိုင်း၏ မျက်နှာအမူအရာကို ပျက်ယွင်းသွားစေသည်။

"အားလုံးပဲ... ဒါကို ငါတို့ ဘယ်လိုရင်ဆိုင်ကြမလဲ" လော့ယွင်ရှီးက တည်ငြိမ်စွာ မေးလိုက်သည်။

တတိယမြောက် နတ်ဘုရား မုရုန်ရမ်ယန် "ဒီကိစ္စက ဖြစ်လာမှာ သေချာနေပြီးသားပါ။ သူတော်စင်ဘုရင် ဒေါသထွက်မယ်ဆိုတာ သိပေမယ့် ဒီလောက်အင်အားကြီးတဲ့ စစ်တပ်ကို လွှတ်လိမ့်မယ်လို့တော့ မထင်ထားမိဘူး။"

ဒုတိယမြောက် နတ်ဘုရား "သူတော်စင်မင်းဆက်ဖြစ်တော့ရော ဘာဖြစ်လဲ ဘာကို ကြောက်နေရမှာလဲ တိုက်ရုံပေါ့" သူ၏ မျက်နှာမှာ ပြတ်သားနေပြီး တောင်တန်မြစ်ချောင်းများကို ဝါးမြိုနိုင်မည့် အရှိန်အဝါမျိုး ထွက်ပေါ်နေသည်။

ပထမမြောက် နတ်ဘုရာ: "ဒုတိယနတ်ဘုရားပြောတာ မှန်တယ်။ သူတော်စင်မင်းဆက်က ဒီကမ္ဘာကို အုပ်ချုပ်လာတာ ကြာလွန်းလှပြီ။ သူတို့က လူတွေအတွက် အေးချမ်းမှုကို ဆောင်ကြဉ်းပေးဖို့ မေ့လျော့နေကြပြီ။ သူတို့ဟာ ဒီကမ္ဘာကို အုပ်ချုပ်ဖို့ မထိုက်တန်တော့ဘူး။ အဆိုတစ်ခုရှိတယ်... ဧကရာဇ်ဆိုတာ အလှည့်ကျတာပဲတဲ့။ ဒီနှစ်တော့ ငါတို့အလှည့်ပဲ။ သူတော်စင်ဘုရင်ကို ပလ္လင်ပေါ်က ဆွဲချပြီး ငါတို့ သူတော်စင်တွေက အစားထိုးရမယ့် အချိန်ရောက်ပြီ။"

လော့ယွင်ရှီး၏ မူလရည်ရွယ်ချက်မှာလည်း တစ်နေ့တွင် သူတော်စင်ဘုရင်၏ နေရာကို ပြန်လည်ရယူရန် ဖြစ်သည်။ သို့သော် သူမ၏ ဒဏ်ရာဟောင်းများမှာ အပြည့်အဝ မပျောက်ကင်းသေးသဖြင့် စောစီးစွာ ထိပ်တိုက်မတွေ့ရန် ရှောင်ရှားနေခဲ့ခြင်း ဖြစ်သည်။ ယခုမူ ကံကြမ္မာက သူမကို စောင့်ဆိုင်းခွင့် မပေးတော့ပေ။

"ဘာကို ကြောက်နေရမှာလဲ ကျွန်တော်မျိုးတို့ တိုက်ပွဲဝင်ဖို့ အသင့်ပါပဲ"

ခန်းမထဲရှိ ကျန်ရှိသော နတ်ဘုရားများကလည်း တညီတညွတ်တည်း ကြွေးကြော်လိုက်ကြသည်။ သူတို့သည် အရှေ့ဘက်ကောင်းကင်ယံရှိ အခြားအင်အားစုများကို ရင်ဆိုင်တုန်းကကဲ့သို့ မာနထောင်လွှားခြင်း မရှိတော့ဘဲ လေးနက်တည်ကြည်စွာဖြင့် တိုက်ပွဲဝင်ရန် ဆုံးဖြတ်လိုက်ကြသည်။

ရှန်းချန်ကောက နောက်ဆုံး သတိပေးချက်တစ်ခု ပြောလိုက်သည်။

"ဒုတိယမြောက် သူတော်စင်စစ်သူကြီးက စစ်တပ်ကို ဦးဆောင်လာလိမ့်မယ်။ အဲဒီအပြင် ကောင်းကင်မျိုးနွယ်စု ငါးခုက ကောင်းကင်ဘုရင်တွေလည်း ကိုယ်တိုင် ပါလာနိုင်တယ်။ အထူးသဖြင့် ကုမျိုးနွယ်စုက ငါတို့နဲ့ ရန်ငြိုးအကြီးဆုံးမို့ သေချာပေါက် ပါလာလိမ့်မယ်။"

လော့ယွင်ရှီးက ခေါင်းညိတ်ကာ လက်ဝှေ့ယမ်းလျက် အမိန့်ပေးလိုက်သည်။

"အားလုံးပဲ... တိုက်ပွဲအတွက် အဆင်သင့်ပြင်ကြတော့။"

ယခုအခါ သူတော်စင်နတ်ဘုရားအသင်းသည် ယခင်ကကဲ့သို့ မဟုတ်တော့ပေ။ သူတို့သည် အရှေ့ဘက်ကောင်းကင်ယံ၏သရဖူမဲ့ဘုရင်များအဖြစ် ရန်သူကို ရဲရဲဝံ့ဝံ့ ရင်ဆိုင်ရန် အသင့်စောင့်ကြိုနေကြပြီဖြစ်သည်။