ချန်မိသားစု၏သရုပ်မှန်

ချန်ရွှေ့တာသည် စုန့်ဝမ်ကို တစ်ချက်ကြည့်လိုက်ပြီးမှ ကျော့ရွှေယွင်ကို ကြည့်လိုက်သည်။

"မင်းတို့က တကယ်ပဲ မနေတော့ဘူးလား"

"မနေတော့ပါဘူး၊ ကျေးဇူးတင်ပါတယ်" ဟု စုန့်ဝမ်က ငြင်းပယ်လိုက်သည်။

ချန်ရွှေ့တာ၏ ဖော်ရွေသော အမူအရာမှာ အနည်းငယ် ခက်ထန်လာသည်။

"မင်းတို့ တစ်ခုခုကို သိသွားပုံရတယ်၊ ငါက ဒီကိစ္စနဲ့ ပတ်သက်ပြီး မင်းတို့နဲ့ ဆွေးနွေးချင်ခဲ့တာပါ၊ ဒါပေမဲ့ အခုတော့ အင်အားသုံးရတော့မယ့်ပုံပဲ"

"ချန်ဟန်... ဘာလို့ ထွက်မလာသေးတာလဲ"

ချန်ရွှေ့တာ၏ ကျယ်လောင်စွာ အော်ဟစ်သံနှင့်အတူ ချန်မိသားစု၏ ခြံဝင်းအတွင်းမှ လူရိပ်တစ်ခုသည် ကောင်းကင်ယံသို့ ပျံတက်သွားပြီး ဓားပျံကို စီးလျက် သူတို့ထံသို့ လျင်မြန်စွာ ပျံသန်းရောက်ရှိလာသည်။

ကျော့ရွှေယွင် ဒေါသထွက်ပြီး မျက်နှာတင်းမာလာသည်။

"ချန်ရွှေ့တာ... ဒါ ဘာသဘောလဲ"

စုန့်ဝမ်လည်း အံ့ဩသွားသည်။ ချန်မိသားစုတွင် အမှန်တကယ်ပင် ပုန်းကွယ်နေသော အခြေတည်အဆင့် ကျင့်ကြံသူ တစ်ဦး ရှိနေသည်။ ချန်မိသားစုတွင် ရက်အတော်ကြာ နေထိုင်ခဲ့သော်လည်း ထိုသူ၏ တည်ရှိမှုကို မသိခဲ့ရသဖြင့် ဖုံးကွယ်အစီအရင်တစ်ခုအတွင်း ပုန်းအောင်းနေခြင်း ဖြစ်ကြောင်း ရိပ်မိလိုက်သည်။ သို့သော် ရောက်လာသူမှာ အခြေတည် အစောပိုင်းအဆင့်သာ ဖြစ်သဖြင့် ကြီးကြီးမားမား ခြိမ်းခြောက်မှု မဟုတ်ပေ။

ချန်ရွှေ့တာနှင့် ချန်ဟန်တို့သည် စုန့်ဝမ်နှင့် ကျော့ရွှေယွင်ကို ရှေ့နှင့်နောက်မှ ပိတ်ဆို့ထားလိုက်ကြသည်။

"အကြီးအကဲကျော့၊ အကြီးအကဲဝူ... မစိုးရိမ်ပါနဲ့။ ငါက မင်းတို့ကို မထိခိုက်စေချင်ပါဘူး၊ ဆေးတစ်မျိုး ဖော်စပ်ဖို့ပဲ အကူအညီ တောင်းချင်တာပါ" ဟု ချန်ရွှေ့တာက ပြောသည်။

ချန်ရွှေ့တာမှာ အခြေတည် အလယ်အဆင့်ကျင့်ကြံသူ ဖြစ်ပြီး ချန်ဟန်၏ အကူအညီဖြင့် အခြေတည် အစောပိုင်းအဆင့် စုန့်ဝမ်နှင့် ကျော့ရွှေယွင်ကို ထိန်းချုပ်ထားနိုင်မည်ဟု ယုံကြည်နေသည်။

"ချန်ရွှေ့တာ... သေချာ စဉ်းစားပါ။ အကြီးအကဲဝူနဲ့ ကျွန်မက သားရဲသခင်ဂိုဏ်းရဲ့ အကြီးအကဲတွေ။ အကယ်၍ ကျွန်မတို့ကို ထိခိုက်အောင် လုပ်ရဲရင် ဂိုဏ်းက ရှင်တို့ချန်မိသားစုကို လွှတ်ပေးမှာ မဟုတ်ဘူး" ဟု ကျော့ရွှေယွင်က ဒေါသတကြီး ခြိမ်းခြောက်ပြောဆိုသော်လည်း ကြောက်ရွံ့မှု အရိပ်အယောင် ပါနေသည်။

ချန်ရွှေ့တာမှာ ကျော့ရွှေယွင်၏ ခြိမ်းခြောက်မှုကို ဂရုမစိုက်ဘဲ အနည်းငယ် ပြုံးလိုက်သည်။

"အကြီးအကဲကျော့ မှားနေပါပြီ။ ငါ့မှာ မကောင်းတဲ့ ရည်ရွယ်ချက် မရှိပါဘူး။ ငါ့ကို ဆေးဖော်စပ်ရာမှာ ကူညီပေးပြီး ချန်မိသားစုရဲ့ကိစ္စတွေကို ဘယ်သူ့ကိုမှ မပြောပြဖို့ ဝိညာဉ်သစ္စာဆိုပေးရုံပါပဲ။ အလုပ်ပြီးရင် မင်းတို့ကို ပြန်လွှတ်ပေးပြီး၊ ဆုလာဘ်အနေနဲ့ ဝိညာဉ်ကျောက်တုံး သုံးထောင်စီ ပေးပါ့မယ်။ အကယ်၍ ငြင်းဆန်မယ်ဆိုရင်တော့ ငါ့အနေနဲ့ မလွှဲမရှောင်သာ ရက်စက်ရတော့မှာပဲ။ နောက်ပိုင်းမှာ သားရဲသခင်ဂိုဏ်းက ချန်မိသားစုကို အပြစ်ပေးရင်တောင် အဲဒါက မင်းတို့နဲ့ ဘာဆိုင်လို့လဲ။ မင်းတို့က ငရဲပြည်ကို ရောက်နှင့်နေပြီသား ဖြစ်မှာလေ"

"ဆေးဖော်စပ်ရုံပဲလား" ကျော့ရွှေယွင်က မယုံကြည်သလို မေးရင်း စုန့်ဝမ်ကို ကြည့်ကာ ဆုံးဖြတ်ချက်ချဖို့ တောင်းဆိုလာသည်။ ယခင်က အေးအေးဆေးဆေး နေတတ်သော အကြီးအကဲဝူကို အထင်သေးမိခဲ့ကြောင်း သူမ သဘောပေါက်သွားသည်။

စုန့်ဝမ်က ခဏမျှ စဥ်းစားပြီး "အကြီးအကဲကျော့... ချန်မိသားစုက ကျွန်တော်တို့ကို စိတ်ရင်းမှန်နဲ့ ဖိတ်ခေါ်နေတာဆိုတော့ ကူညီပေးလိုက်ကြရအောင်" ဟု ပြန်ဖြေသည်။

ကျော့ရွှေယွင်သည် စုန့်ဝမ်ကို အံ့အားသင့်စွာ ကြည့်လိုက်သည်။ ထိုသို့ ချက်ချင်း သဘောတူလိမ့်မည်ဟု မထင်ထားခဲ့ပေ။

စုန့်ဝမ်၏ မျက်လုံးများတွင် သတ်ဖြတ်လိုသည့် အရိပ်အယောင်တစ်ခု ဖြတ်ပြေးသွားသည်။ သူ့အနေဖြင့် သားရဲသခင်ဂိုဏ်းတွင် လုံခြုံစွာ နေရသည်ကို ကျေနပ်နေပြီး ပြဿနာများကို ဖန်တီးလိုခြင်း မရှိပေ။ မူလက ချန်မိသားစု၏ ကိစ္စများကို ရှောင်ရှားလိုခဲ့သည်။ သို့သော် ချန်ရွှေ့တာက သေလမ်းရှာနေမှတော့ လိုက်လျောကာ ပါရမီဖြည့်ပေးရုံသာ ရှိတော့သည် မဟုတ်ပါလား။

ချန်ရွှေ့တာက ကျယ်လောင်စွာ ရယ်မောလိုက်သည်။

"ကောင်းတယ် … အခြေအနေနဲ့ အချိန်အခါကို နားလည်သူတွေကမှ စစ်မှန်တဲ့ သူရဲကောင်းတွေပါ။ အကြီးအကဲဝူက အခြေအနေကို ကောင်းကောင်း နားလည်သားပဲ။ ခဏလောက် စောင့်ပေးပါ၊ သွေးမိစ္ဆာကို ရှင်းပြီးရင် ဆေးကိစ္စကို အသေးစိတ် ဆွေးနွေးကြမယ်"

ထိုသို့ ပြောပြီးနောက် စုန့်ဝမ်နှင့် ကျော့ရွှေယွင်ကို စောင့်ကြည့်ရန် ချန်ဟန်ကို အချက်ပြလိုက်သည်။

ထို့နောက် ချန်ရွှေ့တာသည် လက်ကို မြှောက်လိုက်ရာ စည်းတံဆိပ်ခတ်ထားသော သံမှို ၇ ခု ထွက်ပေါ်လာပြီး သွေးမိစ္ဆာကို ပိတ်လှောင်ထားသော အစီအရင် အကာအကွယ်မှ ပွင့်လာသော အပေါက်ငယ်ထဲသို့ ထိုးဖောက်ဝင်ရောက်သွားသည်။ သံမှိုများသည် အဆိပ်မြွေ၏ အစွယ်များကဲ့သို့ သွေးမိစ္ဆာ၏ ခန္ဓာကိုယ်ထဲသို့ ရက်စက်စွာ ထိုးဖောက်ဝင်ရောက်သွားသည်။ ဒဏ်ရာရထားသော သွေးမိစ္ဆာမှာ သံမှိုများကြောင့် ဝိညာဉ်စွမ်းအင်ကို မလည်ပတ်နိုင်တော့ဘဲ မြေပြင်ပေါ်သို့ လဲကျသွားသည်။

သွေးမိစ္ဆာ မလှုပ်နိုင်အောင် ထိန်းချုပ်ပြီးသည်နှင့် ချန်ရွှေ့တာသည် အစီအရင်ကို ရုပ်သိမ်းလိုက်ပြီး သံကြိုးတစ်ချောင်း ပစ်လွှင့်ပြီး သွေးမိစ္ဆာကို တင်းကျပ်စွာ ချည်နှောင်လိုက်သည်။ ထို့နောက် သံကြိုး၏ အစွန်းတစ်ဖက်ကို ဆွဲယူကာ သွေးမိစ္ဆာကို သူ၏ ဘေးသို့ ဆွဲခေါ်လာသည်။

"သားရဲ... မင်း ဘယ်တော့မှ ငါ့လက်ထဲက မလွတ်မြောက်နိုင်ဘူး"

သွေးမိစ္ဆာကို ဆွဲခေါ်လျက် ချန်ရွှေ့တာသည် စုန့်ဝမ်နှင့် ကျော့ရွှေယွင်တို့ထံ ချဉ်းကပ်လာသည်။

"ကျေးဇူးပြုပြီး၊ ငါ့နောက်က လိုက်ခဲ့ပါ"

ထိုသို့ ပြောပြီးနောက် သူသည် သွေးမိစ္ဆာကို ချန်မိသားစုခြံ၏ အတွင်းပိုင်း တစ်နေရာသို့ ဆွဲခေါ်သွားသည်။

စုန့်ဝမ်သည် ချန်ရွှေ့တာနောက်မှ လိုက်ပါကာ ချန်မိသားစု၏ အတွင်းပိုင်းထဲသို့ ပျံသန်းဝင်ရောက်သွားသည်။ ကျော့ရွှေယွင်သည် သူတို့လာခဲ့သော လမ်းကို ပြန်ကြည့်လိုက်ပြီး စုန့်ဝမ်နှင့် ချန်ရွှေ့တာတို့ကို ကြည့်ကာ ခဏတာ တွန့်ဆုတ်နေပြီးနောက် တစ်ယောက်တည်း ထွက်မပြေးတော့ရန် ဆုံးဖြတ်လိုက်သည်။

မကြာမီ သူတို့လေးယောက် ချန်မိသားစု ဆေးဖော်စပ်ခန်းသို့ ရောက်ရှိသွားသည်။ ဆေးဖော်စပ်ခန်းကို ခိုင်မာစွာ တည်ဆောက်ထားပြီး ဆေးဖော်စပ်ရန် အခန်းပေါင်း ဆယ်ခန်းကျော် ရှိသည်။

ချန်ရွှေ့တာသည် တံဆိပ်တစ်ခု ကိုင်ကာ ဆေးဖော်စပ်ခန်း တစ်ခန်း၏ ကျောက်နံရံထဲသို့ ထည့်လိုက်သည်။ ဆေးဖော်စပ်ခန်း၏ ကျောက်တံခါး ပွင့်သွားသည်။ အထဲတွင် မည်သည့်အရာမျှ မရှိပေ။ ဆေးဖော်စပ်ခန်းထဲ ရောက်သောအခါ ချန်ရွှေ့တာသည် နောက်ထပ် တံဆိပ်တစ်ခုကို နံရံထဲသို့ ထည့်လိုက်ရာ၊ ဆေးဖော်စပ်ခန်း၏ ကြမ်းပြင်ပေါ်တွင် အပေါက်တစ်ခု ရုတ်တရက် ပေါ်လာသည်။

"ငါ့နောက် လိုက်ခဲ့ပေးပါ"

ချန်ရွှေ့တာသည် အပေါက်ထဲသို့ အရင် ခုန်ချသွားသည်။ စုန့်ဝမ်သည် သတိလက်လွတ် မလုပ်ပေ။ အပေါက်ဝသို့ ရောက်သည်နှင့် သူ၏ ဖိနပ်အောက်မှ ကူပိုးကောင် တစ်ကောင် ထွက်လာပြီး တွင်းထဲ အရင်ဝင်သွားသည်။ ကူပိုးကောင်က ရှေ့တွင် အန္တရာယ် မရှိကြောင်း အတည်ပြုပြီးမှ စုန့်ဝမ်လည်း အပေါက်ထဲ ခုန်ချလိုက်သည်။

ပေ ၅၀ ခန့် ကျသွားပြီးနောက် ကျယ်ဝန်းသော မြေအောက်လှိုဏ်ဂူကြီးကို မြင်တွေ့ရသည်။ လှိုဏ်ဂူတွင် ဝိညာဉ်ဖုံးကွယ်အစီအရင်တစ်ခု ခင်းကျင်းထားသည်။ ၎င်းမှာ ဒုတိယအဆင့် အစီအရင်ဖြစ်ပြီး အပြင်လူများ သတိမပြုမိအောင် ဖုံးကွယ်ထားခြင်း ဖြစ်သည်။ ချန်မိသားစုတွင် ရက်အနည်းငယ် နေခဲ့ရသော စုန့်ဝမ်သည် ချန်ဟန်၏ တည်ရှိမှုကို မသိခဲ့ရသဖြင့် ထိုသူမှာ ဤလှိုဏ်ဂူအတွင်း၌ ပုန်းအောင်းနေခြင်း ဖြစ်နိုင်ကြောင်း သိလိုက်ရသည်။

လှိုဏ်ဂူ၏ အလယ်ဗဟိုတွင် ကြီးမားသော ဆေးဖိုတစ်ခု ရှိသည်။ ဆေးဖိုပတ်လည်တွင် ထိုင်ခုံ ၃ ခု ရှိသည်။

အားလုံး ရောက်လာသောအခါ ချန်ရွှေ့တာက "မင်းတို့ကို ဆေးတစ်မျိုး ဖော်စပ်တာမှာ ကူညီပေးဖို့ ခေါ်လာတာပါ။ ဒီဆေးဖော်စပ်တဲ့ လုပ်ငန်းစဉ်က အရမ်းရှုပ်ထွေးပြီး အချိန်ကုန်ပါတယ်။ ငါတစ်ယောက်တည်း မလုပ်နိုင်ဘူး"ဟု ပြောသည်။ ထို့နောက် ကျောက်စိမ်းပြား နှစ်ခုကို စုန့်ဝမ်နှင့် ကျော့ရွှေယွင်တို့ထံ ပစ်ပေးလိုက်သည်။

"ဒီထဲမှာ ဆေးနည်းနဲ့ ဖော်စပ်နည်းတွေ ပါပါတယ်။ အစက အကြီးတန်း ဆေးဖော်စပ်သူ တစ်ယောက်နဲ့ ချန်ဟန်ကို အကူအညီတောင်းဖို့ စီစဉ်ထားတာ။ ဒါပေမဲ့ ဂိုဏ်းက အကြီးအကဲ နှစ်ယောက် လွှတ်ပေးလိုက်တော့ ပိုအဆင်ပြေသွားတယ်။ ချန်ဟန် မလိုတော့ပါဘူး၊ သူက ဆေးဖော်စပ်တာ မကျွမ်းကျင်ဘူး"

ကျော့ရွှေယွင်သည် ကျောက်စိမ်းပြားကို ယူကာ ဝိညာဉ်အာရုံဖြင့် စစ်ဆေးကြည့်သည်။ ကျောက်စိမ်းပြားထဲရှိ အကြောင်းအရာများကို ချန်ရွှေတာက မှတ်တမ်းတင်ထားခြင်း ဖြစ်ပြီး မူလဆေးနည်း၏ အဓိကအပိုင်းများကို ဖုံးကွယ်ထားကာ ဆေးအမည်ကိုပင် ဖယ်ထုတ်ထားသည်။ ကျောက်စိမ်းပြားထဲမှ အကြောင်းအရာများကို အကြမ်းဖျင်း ကြည့်ပြီးနောက် ကျော့ရွှေယွင်သည် ချန်ရွှေ့တာကို စိုးရိမ်စွာ ကြည့်လိုက်သည်။ ဆေးနည်းမှာ အလွန်ရှုပ်ထွေးပြီး ဝိညာဉ်ဆေးပင် အမျိုးအစားပေါင်း တစ်ရာနီးပါး ပါဝင်သည်။ ၎င်းမှာ ရှုပ်ထွေးသော ဒုတိယအဆင့် ဆေးနည်းတစ်ခု ဖြစ်သည်။

ချန်ရွှေ့တာသည် ဆေးကို ဖော်စပ်ရန် ယုံကြည်မှု ရှိနေသဖြင့် သူသည် ကျွမ်းကျင်သော ဒုတိယအဆင့် ဆေးဆရာတစ်ဦး ဖြစ်ကြောင်း ပြသနေသည်။ သူ့ဆေးပညာအရ သွေးမိစ္ဆာကို မျှားခေါ်ရန် ဒုတိယအဆင့် နတ်ဆိုးသားရဲမျှားခေါ်ဆေး မဖော်စပ်နိုင်ဆိုခြင်းမှာ မဖြစ်နိုင်ပေ။ သားရဲသခင်ဂိုဏ်းမှ အကူအညီ တောင်းခံပြီး ဆေးဆရာတစ်ယောက်ကို ချန်မိသားစုသို့ ဖိတ်ခေါ်ခြင်းမှာ သူ့အစီအစဉ်၏ အစိတ်အပိုင်း ဖြစ်သည်။ သွေးမိစ္ဆာ ပေါ်လာခြင်းမှာ ချန်ရွှေ့တာနှင့် ဆက်စပ်နေခြင်း ဖြစ်နိုင်သည်။

ကျော့ရွှေယွင်သည် စုန့်ဝမ်ကို ပြန်ကြည့်ရာ စုန့်ဝမ်က တည်ငြိမ်စွာဖြင့် ကျောက်စိမ်းပြားကို သေချာစွာ စစ်ဆေးနေသည်ကို တွေ့ရသည်။ ကြည့်နေရင်း ကျော့ရွှေယွင်သည် စုန့်ဝမ်ကို နားလည်ရ ပိုခက်လာသည်။ ယခင်က သူမသည် နောက်မှ ရောက်လာသော ဤလေလွင့်ကျင့်ကြံသူကို အထင်သေးခဲ့သည်။ သို့သော် ယခု ချန်ရွှေ့တာ၏ ခြိမ်းခြောက်မှုအောက်တွင် စုန့်ဝမ်မှာ အလွန်တည်ငြိမ်နေပြီး နောက်ပိုင်းတွင် အန္တရာယ်ပြုခံရမည်ကို လုံးဝ မစိုးရိမ်သကဲ့သို့ ဖြစ်နေသည်။

ကျော့ရွှေယွင်လည်း ရှုပ်ထွေးသော အတွေးများကို ဖယ်ထုတ်လိုက်ပြီးနောက် ကျောက်စိမ်းပြားကို ထပ်မံ၍ သေချာစွာ စစ်ဆေးသည်။ ဤဆေးမှာ လူသွေးနှင့် ဆက်စပ်သော ပစ္စည်းများစွာ ပါဝင်နေသည့် နတ်ဆိုးလမ်းစဥ်ဆေးနည်း ဖြစ်သည်။

ချန်ရွှေ့တာသည် စုန့်ဝမ်နှင့် ကျော့ရွှေယွင်တို့ကို ဆေးနည်းကို နားလည်ရန် တစ်ရက် အချိန်ပေးသည်။ နောက်တစ်နေ့တွင် ဆေးဖော်စပ်မှု စတင်ရန် ချန်ရွှေ့တာ၊ စုန့်ဝမ်နှင့် ကျော့ရွှေယွင်တို့သည် ဆေးဖိုပတ်လည်တွင် ထိုင်ခုံ ၃ ခုပေါ်တွင် ထိုင်နေကြသည်။

"ဆေးဖော်စပ်တဲ့အခါ အကောင်းဆုံး ကြိုးစားပေးဖို့ မျှော်လင့်ပါတယ်။ အမှားအနည်းငယ် ရှိရင် ငါ ရက်စက်တာကို အပြစ်မတင်ပါနဲ့" ဟု ချန်ရွှေ့တာက ပြောသည်။ ထို့နောက် အနီးတွင် စောင့်ကြည့်နေသော ချန်ဟန်ဘက်သို့ လှည့်လိုက်သည်။

"ချန်ဟန်... မင်းက သူတို့ကို ကာကွယ်ပြီး စောင့်ကြည့်ရမယ်။ မသင်္ကာစရာ တစ်ခုခု တွေ့ရင် ချက်ချင်း သတ်ပစ်လိုက်"

ချန်ရွှေ့တာ၏ ခြိမ်းခြောက်မှုကို ရင်ဆိုင်ရသော်လည်း စုန့်ဝမ်က ကြောက်ရွံ့ခြင်း မရှိဘဲ တက်ကြွစွာ တိုက်တွန်းသည်။

"မိသားစုခေါင်းဆောင်ချန်... စဖော်စပ်ကြရအောင်။ ငါတို့ အချိန်မဆွဲချင်ဘူး။ ဂိုဏ်းက ငါတို့ အချိန်တန်လို့ ပြန်မလာရင် ချန်မိသားစုဆီ လူလွှတ်ပြီး စစ်ဆေးလိမ့်မယ်။ အဲဒီအခါ မင်းတို့ နောင်တရချိန်တောင် ရှိမှာ မဟုတ်ဘူး"

ချန်ရွှေ့တာသည် စုန့်ဝမ်ကို မနှစ်မြို့ဖွယ် အကြည့်ဖြင့် ကြည့်လိုက်သော်လည်း ထပ်မံ၍ မပြောတော့ပေ။ ထို့နောက် ချန်ရွှေ့တာ၏ ဦးဆောင်မှုအောက်တွင် ဆေးဖော်စပ်ခြင်းကို စတင်ကြသည်။ လုပ်ငန်းစဉ် တလျှောက်လုံးတွင် ချန်ရွှေ့တာက အပြည့်အဝ ထိန်းချုပ်ထားသည်။ ဆေးပင်များ ထည့်ရမည့် အချိန်၊ မီး၏ ပြင်းအားနှင့် အရည်များ ပေါင်းစပ်မှုတို့ကို သူက ဦးဆောင်သည်။ စုန့်ဝမ်နှင့် ကျော့ရွှေယွင်တို့က ကူညီအားဖြည့်မှုကိုသာ အဓိက လုပ်ဆောင်ပေးရသည်။

လဝက်အကြာတွင် ဆေးဖိုထဲမှ ကြည်လင်သော အသံတစ်ခု ခပ်တိုးတိုးလေး ထွက်ပေါ်လာသည်။ ဆေးဖော်စပ်ရသည့် ကြာရှည်သော အချိန်ကြောင့် ဝိညာဉ်စွမ်းအင်များစွာ သုံးစွဲလိုက်ရသဖြင့် နွမ်းနယ်နေသော ချန်ရွှေ့တာမှာ ထိုအသံကြောင့် အလွန် ဝမ်းမြောက်သွားသည်။ ၎င်းမှာ ဆေးအောင်မြင်စွာ ပေါင်းစပ်သွားသည့် အသံဖြစ်ပြီး ဆေးလုံးမှာ ဆေးဖိုအောက်ခြေသို့ ကျသွားသည်။

……..