အခန်း (၁၀၄)

စစ်မြေပြင်မှ ထာဝရရှင်သန်ခြင်းဆီသို့

အခန်း (၁၀၄)

" ကျောက်ကျိ..." ဟွာယန်က စိတ်ထဲမှ တွေးလိုက်သည်။ " အခုအချိန်ထိတောင် နင်က ငါတို့ချင်နိုင်ငံရဲ့ ကံကြမ္မာအပေါ် ကပ်ဘေးတွေ ယူဆောင်လာတုန်းလား။ နင့်အတွက် သေတာက သက်သာလွန်းနေတယ်။ ရင်အာကိုသာ မစိုးရိမ်ရု် နင့်ကို ကွပ်မျက်ဖို့ အမိန့်ပေးခဲ့တာကြာပြီ။ "

မယ်တော်ကြီးဟွာယန်က အလွန်ဒေါသထွက်နေသည်။ ယခုလက်ရှိဘုရင် ရင်ကျန့်၏ အဘွား၊ ချင်နိုင်ငံ၏ မယ်တော်ကြီးဟောင်းဖြစ်သောကြောင့် သူမက ထက်မြက်ပြီး ဩဇာရှိသော အမျိုးသမီးတစ်ယောက်ဖြစ်သည်မှာ သံသယဝင်စရာမလိုပေ။

ယုံမြို့၏ အပြင်ဘက် တောအုပ်ထဲတွင်။

" ဝန်ကြီးချုပ် တာဝန်ပြီးဆုံးသွားပါပြီ။ " တပ်မှူးတစ်ယောက်က ကောခိုင်ကို အစီရင်ခံလိုက်သည်။ သူက ကျောက်နိုင်ခံ၏ နန်းတွင်းကိုယ်ရံတော်တပ်ဖွဲ့ကို တာဝန်ယူထားသူဖြစ်သည်။

" ကျွန်တော်မျိုးတို့ ချင်နိုင်ငံရဲ့ မယ်တော်ကြီးကို ဖမ်းဆီးနိုင်ခဲ့ပါပြီ။ "

သူတို့က သတိမေ့နေသော ကျောက်ကျိကို ခေါ်ဆောင်လာကြသည်။ ကောခိုင်က ပိုပြီး သေချာစေရန် မီးအိမ်ကို မြှောက်ပြီး ကျောက်ကျိကို ကြည့်လိုက်သည်။

" သူမရဲ့ အလှတရားက ဒီလောက်ကျော်ကြားနေတာ မထူးဆန်းပါဘူး။ တကယ်ကို အလှဘုရင်မပဲ။ " ကောခိုင်က ရယ်မောလိုက်သည်။

" သူမကို ဟန်တန်မြို့တော်ဆီ ခေါ်သွားနိုင်တာနဲ့ အရှင်မင်းကြီးက တကယ်ဝမ်းသာသွားမှာပဲ။ မင်းတို့အလုံး အလုပ်ကောင်းကောင်းလုပ်ခဲ့ကြတယ်။ "

အင်အားကြီးသော ချင်နိုင်ငံ၏ မယ်တော်ကြီးကို လွယ်လွယ်ကူကူ ဖမ်းမိခဲ့သော​ကြောင့် ကောခိုင်က အတိုင်းမသိ ဝမ်းသာနေသည်။ ကျောက်ကျိကိုသာ ဟန်တန်သို့ ခေါ်သွားနိုင်လျှင် ကျောက်ဘုရင်က သူ့ကို ပိုပြီး​မြှောက်စားတော့မည်ဖြစ်သည်။

" ဝန်ကြီးချုပ်။ " ကိုယ်ရံတော်တပ်မှူးက လေးနက်စွာ ပြောလိုက်သည်။ " ကျွန်တော်တို့က ယုံမြို့မှာပဲ ရှိနေတုန်းပါ။ ကျောက်နိုင်ငံနဲ့က မိုင်ပေါင်းထောင်ချီဝေးပါသေးတယ်။ ကျောက်ကျိကို အပြင်ထုတ်သွားဖို့က ခက်ခဲပါလိမ့်မယ်။ "

" စိတ်မပူနဲ့။ ငါအားလုံးစီစဉ်ထားပြီးသား။ " ကောခိုင်က သူ၏ မုတ်ဆိတ်ကို ဂုဏ်ယူစွာ ပွတ်သပ်လိုက်သည်။

" ကိုယ်ရံတော်ငါးရာကို ငါးဖွဲ့ခွဲလိုက်။ လေးဖွဲ့က လမ်းလွှဲဖို့ အသုံးချမယ်။ ကျန်တဲ့တစ်ဖွဲ့ကတော့ အဓိကအဖွဲ့ဖြစ်ပြီး ငါကိုယ်တိုင်ဦးဆောင်မယ်။ ပြီးတော့ ငါတို့ ကုန်းလမ်းကမသွားဘူး။ ဝေမြစ်နဲ့ လောရွှေကနေတစ်ဆင့် ရေလမ်းကသွားပြီး ဝေနိုင်ငံထဲကို ဝင်မယ်။ ဝေနိုင်ငံကနေမှ ကျောက်နိုင်ငံကို ကုန်းလမ်းအတိုင်း ပြန်မယ်။ "

ကောခိုင်က ကျောက်ကျိကို ပြန်ပေးဆွဲရန် လချီပြီး စီစဉ်ခဲ့ရသည်။ သူက သူ၏ အသက်ကို အရာအားလုံးထက် ပို၍ တန်ဖိုးထားသူဖြစ်သည်။ သူက တခြားနေရာတွင် မတော်လျှင်တောင် ထွက်ပြေးရန် အစီအစဉ်ချသောနေရာတွင် ကျွမ်းကျင်သူတစ်ယောက်ဖြစ်သည်။

" ကျွန်တော်မျိုးတို့ ဝန်ကြီးချုပ်ရဲ့ အမိန့်ကို လိုက်နာပါမယ်။ "တပ်မှူးက ပြန်ဖြေလိုက်သည်။

" ရင်ကျန့် ဟဲဟဲ အရှင်မင်းကြီးပြောသလိုပဲ။ မင်းက ငါ့ခြေဖဝါးအောက်မှာ နင်းခြေခံရဖို့ ကံပါလာပြီးသားပါ။ " ကောခိုင်က ဂုရ်ယူစွာ ပြုံးလိုက်သည်။

" လမ်းဖယ် လမ်းဖယ်ကြ။ " မြင်းစီးသမားတစ်ယောက်က အော်ဟစ်လိုက်သည်။ " ယုံမြို့က အရေးပေါ်အစီရင်ခံစာရောက်လာပါတယ်။ "

မြင်းတစ်ကောင်က နန်းတော်ဆီသို့ အရှိန်အဟုန်ဖြင့် ပြေးဝင်းသွားသည်။

ချင်နန်းတော်၊ ညီလာခံခန်းမ။

" ဘာ...." ရင်ကျန့်က အော်ဟစ်လိုက်သည်။ " မယ်တော်ကြီးက နန်းတော်ထဲကနေ ပြန်ပေးဆွဲခံရတယ်ဟုတ်လား။ အခုထိပြန်မတွေ့သေးဘူးလား။ ယုံမြို့က အစောင့်တွေ ဘာလုပ်နေတာလဲ။ အသုံးမကျတဲ့ကောင်တွေ။ "

အုပ်ချုပ်ရေးအာဏာကို ရယူပြီးနောက် ရင်ကျန့်က သူ၏ ခံစားချက်များကို ပြသခဲလေသည်။ သို့သော် ယနေ့တော့ သူ့ကိုသူ မထိန်းချုပ်နိုင်တော့ပေ။ နှစ်များစွာ ကုန်လွန်လာပြီး ကျောက်ကျိအပေါ် နာကျည်းနေသော်လည်း မိခင်နှင့်သားကြားက သံယောဇဉ်များကို မေ့နိုင်မည်မဟုတ်ပေ။

ယခု သူ၏ နယ်မြေထဲတွင် သူ၏ မိခင်ကို ပြန်ပေးဆွဲခံလိုက်ရခြင်းက သူ၏ မျက်နှာကို ဖြတ်ရိုက်လိုက်ခြင်းပင်ဖြစ်သည်။

" အရှင်မင်းကြီး ဒေါသကို ထိန်းပါဦး။ " ယွီလျောင်က ရှေ့ထွက်လာပြီး ပြောလိုက်သည်။

" မယ်တော်ကြီးဟွာယန်ရဲ့ စာအရ ပြစ်မှုကျူးလွန်သူတွေက ယုံမြို့ နန်းတော်ထဲမှ အတွင်းလူရှိနေပြီး ကင်းလှည့်တဲ့ အချိန်ဇယားတွေကို သိနေပါတယ်။ သူတို့က အဲ့ဒီလူကို သုံးပြီး နန်းတွင်းကို ကျူးကျော်ခဲ့တာပါ။ ပြီးတော့ သူတို့က သာမန်ရာဇဝတ်သားတွေမဟုတ်ဘဲ လေ့ကျင့်ထားတဲ့ အထူးတပ်ဖွဲ့ဝင်တွေဖြစ်ပါတယ်။ "

" ယုံမြို့က တပ်မှူးရဲ့ အစီရင်ခံစာအရ သူတို့ဆီမှာ တံဆိပ်အချို့ တွေ့ခဲ့ပါတယ်။ အဲ့ဒါတွေက ကျောက်နိုင်ငံရဲ့ အထူးချွန်ဆုံး လျို့ဝှက်ကိုယ်ရံတော်တွေဖြစ်ပါတယ်။

ရင်ကျန့်၏ မျက်နှာက မဲမှောင်နေပြီး ဒေါသများဖြင့် ပြည့်နှက်နေသည်။ " ကျောက်နိုင်ငံ ကိုယ်ရံတော်တပ်ဖွဲ့။ ကျောက်ယန် အကွက်စေ့လှချည်လား။ တကယ်ကောင်းတဲ့ အကွက်ပဲ။ "

" သူတို့က ဘယ်ကလာလဲ၊ ဘယ်သူလဲဆိုတာ ငါဂရုမစိုက်ဘူး။ " ရင်ကျန့်က အေးစက်စွာ ပြောလိုက်သည်။ " ငါ့မယ်တော် ချင်နိုင်ငံရဲ့ နယ်စပ်ကနေ ထွက်မသွားစေရဘူး။ တကယ်လို့ သူတို့အောင်မြင်သွားရင် ညှတာမှုမရှိဘဲ အပြစ်ပေးခံရမယ်။ "

နံနက်ခင်း ညီလာခံပြီးနောက် ရင်ကျန့်က ကျန်းထိုင်နန်းတောင်ကို တစ်ယောက်တည်း ပြန်လာခဲ့သည်။ ထိုသို့ကြီးမားသော ကိစ္စတစ်ခုဖြစ်နေသောကြောင့် သွမ်လောက ကြိုစောင့်နေသည်။

" ဒီလောက်ကြီးတဲ့ကိစ္စဖြစ်နေတာကို ဟေးပင်းထိုင်က ဘာသတင်းမှကြိုမရတာ ဘာလို့လဲ။ " ရင်ကျန့်က သူ၏ ဒေါသကို ထိန်းပြီး ပြောလိုက်သည်။

" အရှင်မင်ကြီး " သွမ်လောက ရိုသေစွာ ပြန်ပြောလိုက်သည်။ " ကျောက်နိုင်ငံရဲ့ ကိုယ်ရံတော်တပ်ဖွဲ့က ကျွန်တော်တို့ ဟေးပင်းထိုင်လိုပဲ ကျောက်ဘုရင်ဆီကို တိုက်ရိုက်အစီရင်ခံရတဲ့ လျို့ဝှက်တပ်ဖွဲ့ပါ။ ဒီစစ်ဆင်ရေးအမိန့်ကို နန်းတွင်းက ထုတ်ပြန်တာမဟုတ်လို့ ဟေးပင်းထိုင်က မသိလိုက်တာပါ။ "

ဟေးပင်းထိုင်၏ ကွန်ရက်က တစ်ကမ္ဘာလုံးကို ဖြန့်ကျက်ထားသော်လည်း အခြားနိုင်ငံများ၏ လျို့ဝှက်အဖွဲ့အစည်းများထဲသို့ ထိုးဖောက်နိုင်ရန် မဖြစ်နိုင်သေးပေ။ ထိုလျို့ဝှက်အဖွဲ့အစည်းများက သူတို့၏ အဖွဲ့ဝင်များကို ငယ်စဉ်ကတည်းက ရွေးချယ်လေ့ကျင့်ပေးပြီး အသေခံစစ်သည်များအဖြစ် ပုံသွင်းထားသောကြောင့် သူလျိုထည့်သွင်းရန် မဖြစ်နိုင်သလောက်ဖြစ်သည်။

" ဟေးပင်းထိုင်က အင်အားအားလုံးသုံးပြီး လိုက်ဖမ်း။ " ရင်ကျန့်က သွမ်လောကို အပြစ်မတင်ဘဲ တိုက်ရိုက်အမိန့်ပေးလိုက်သည်။ " ကျောက်ကိုယ်ရံတော်တပ်ဖွဲ့က ဘယ်သူမှ အသက်ရှင်မကျန်စေနဲ့။ ပြီးတော့ မယ်တော်ကြီးကို ဘာဒဏ်ရာမှမရစေဘဲ ပြန်ခေါ်လာရမယ်။ "

" အမိန်အတိုင်းပါ။ " သွမ်လောက ဦးညွှတ်ပြီး ထွက်ခွာသွားသည်။

" ကျောက်ယန် တကယ်ပါးနပ်တဲ့ ဗျူဟာပဲ။ ငါ့ရဲ့ ချင်နိုင်ငံထဲကို ထိုးဖောက်ဝင်ရောက်ပြီး ငါ့မိခင်ကို ပြန်ပေးဆွဲရဲတယ်ပေါ့။ ငါပေါ့ဆသွားတယ်။ ငါသာ ယုံမြို့ရဲ့ ခံစစ်ကို မြှင့်တင်ပြီး သူမကို ပိုဂရုစိုက်ခဲ့ရင် ဒါမျိုးတွေဖြစ်လာမှာမဟုတ်ဘူး။ အဲ့ဒီနေ့က ငါ ယောက္ခမကြီး စကားကို နားထောင်ခဲ့သင့်တယ်။ "

ရင်ကျန့်က ချင်နိုင်ငံ၏ အနာဂတ်ကိုလည်း စိုးရိမ်နေသည်။ အကယ်၍ ကျောက်ယန်က အောင်မြင်သွားလျှင် သူ့အတွက် အခြေအနေမကောင်းပေ။ အကယ်၍ ချင်မယ်တော်ကြီးက အမ်းခံရပြီး အခြားနိုင်ငံကို ပါသွားခဲ့လျှင် ချင်နိုင်ငံ၏ ဂုဏ်သိက္ခာကို ထိခိုက်ရုံသာမက တစ်ကမ္ဘာလုံးက လှောင်ပြောင်ကြပေလိမ့်မည်။

ဝေမြို့။

ကွေကျန့်တောအုပ်၏ အနက်ရှိုင်းဆုံးတွင် ကျောက်ဖုန်းတည်ထောင်ထားသော အင်အားစု၏ လေ့ကျင့်ရေးကွင်းရှိနေသည်။

" သတ် " အနက်ရောင်ဝတ်စုံကို ဝတ်ဆင်ထားသော ယောကျာ်းလေးနှင့် မိန်းကလေးများက သူတို့၏ ဓားများကို ဝှေ့ရမ်းပြီး တစ်ယောက်နှင့်တစ်ယောက် ​သတ်ဖြတ်လိုစိတ်အပြည့်ဖြင့် တိုက်ခိုက်နေကြသည်။

တိုက်ခိုက်ရေးနည်းစနစ်အမျိုးမျိုးနှင့် ပါးနပ်သော လုပ်ကြံသတ်ဖြတ်မှုနည်းလမ်းများက ကျောက်ဖုန်း၏ မျက်စိရှေ့တွင် ထွက်ပေါ်နေသည်။ လွန်ခဲ့သော သုံးလက ထိုကလေးများက ဘာမှမသိသေးကြသော်လည်း ယခုသူတို့အားလုံးက ပြာင်းလဲသွားကြပြီဖြစ်သည်။

မူလက သုံးရာရှိသော အထဲမှ ယခု ၂၇၈ ယောက်သာ ကျန်တော့သည်။ ပျောက်ဆုံးသွားသော ၂၂ ယောက်က သေဆုံးသွားကြခြင်းဖြစ်သည်။

" မဆိုးဘူး ဟန်ရွှမ်း။ " ကျောက်ဖုန်းက လေ့ကျင့်နေသူများကို ကြည့်ပြီး ချီးကျူးလိုက်သည်။ " ဒီသုံးလရဲ့ ရလဒ်က ငါ့ကို တကယ်အံ့ဩစေတယ်။ "

" ချီကျူးတဲ့အတွက် ကျေးဇူးတင်ပါတယ် အရှင်။ အချိန်ပိုရရင် ဒီထက်ပိုပြီး သန်မာလာပါလိမ့်မယ်။ " ဟန်ရွှမ်းက ရိုသေစွာ ပြန်ဖြေလိုက်သည်။

" ငါအချိန်ပိုပေးမယ်။ ဒါပေမယ့် ငါတို့ လူအင်အားပိုလိုသေးတယ်။ " ကျောက်ဖုန်းက လှည့်ပြီး ဟန်ရှီကို ကြည့်လိုက်သည်။

" ဟန်ရှီ သုံးလအတွင်း လူသစ်စုဆောင်းတာ ဘယ်လိုလဲ။ "

" အရှင် ကျွန်တော်မျိုးက ဝေမြို့နဲ့ အခြားနေရာတွေကနေ နောက်ထပ်လူသစ် ငါးရာကို စုဆောင်းထားပါတယ်။ ပထမအုပ်စုလို့ပဲ ဘယ်သူမှ အသကဆယ်တစ်နှစ် မကျော်ပါဘူး။ သူတို့ရဲ လေ့ကျင့်မှုတွေလည်း စတင်နေပါပြီ။ "

" ဆက်ပြီးစုဆောင်းပါ။ " ကျောက်ဖုန်းက ခေါင်းညိမ့်ပြီး ပြောလိုက်သည်။

" အရှင် " ဟန်ရှီက ပြောလိုက်သည်။ " လူစုဖို့က ပြဿနာမဟုတ်ပါဘူး။ ကုန်ကျစရိတ်က ပြဿနာပါ။ အသုံးစရိတ်က အရမ်းများပါတယ်။ သုံးလတည်းနဲ့ အရှင်ပေးခဲ့တဲ့ ရွှေငွေ ၄၀ ရာခိုင်နှုန်းလောက် ကုန်သွားပါပြီ။ "

" အင်အားစုတစ်ခု တည်ထောင်ဖို့က ငွေအများကြီးလိုတယ်။ " ဟန်ရှီက ကူကယ်ရာမဲ့စွာ ပြောလိုက်သည်။

ကျောက်ဖုန်းက သူ၏ ရွှေငွေ ၉၉ ရာခိုင်နှုန်းကို ဟန်ရှီအား ပေးခဲ့ခြင်းဖြစ်ပြီး ၎င်းတို့က ရွှေတုံး ၇၀၀၀ ကျော်နှင့် ဒင်္ဂါးသိန်းချီရှိနေသည်။ သုံးလအတွင်း ထိုငွေ၏ ၄၀ ရာခိုင်နှုန်း ကုန်သွားခြင်းဖြစ်သောကြောင့် နေ့စဉ်ကုန်ကျစရိတ်က မည်မျှကြီးမားမည်ကို သိနိုင်လေသည်။

" ငါဝယ်ခိုင်းထားတဲ့ ဆေးပင်တွေ အခြေအနေ ဘယ်လိုရှိလဲ။ " ကျောက်ဖုန်းက မေးလိုက်သည်။

" အရှင် ကျွန်တော်မျိုး အများကြီး ဝယ်ထားပါပြီ။ အခုဂိုဒေါင်ထဲမှာ ထည့်ထားပါတယ်။ "

" ဝိုင်ချက်တဲ့ကိစ္စက ဘယ်လိုလဲ။ " ကျောက်ဖုန်းက ထပ်မေးလိုက်သည်။ ထိုဝိုင်အရက်များက သူ၏ အင်အားစုကို ရပ်တည်နိုင်အောင် လုပ်ပေးမည့် အဓိကသော့ချက်ဖြစ်သည်။

" အရှင်ကိုယ်တိုင် အိုးတွေဖွင့်ပေးမှာကို စောင့်နေပါတယ်။ " ဟန်ရှီက ရိုသေစွာ ပြောလိုက်သည်။ " ဝိုင်ချက်တဲ့သူတွေ ပြောစကားအရ အရှင်ရဲ့ နည်းလမ်းက ဒီလောကမှာရှိတဲ့ အခြားနည်းလမ်းတွေထက် အများကြီး သာလွန်တယ်လို့ သိရပါတယ်။ ဒါကို ရောင်းချရင် ယှဉ်နိုင်မယ့်သူရှိမှာမဟုတ်ပါဘူး။ "