မဟာအကြီးအကဲများကို သင်ကြားခြင်း

[ ကိုယ်ခံပညာဉာဏ်အလင်းပွင့်ကတ် (အသက်ဝင်နေသည်) — ၂၄ နာရီ ကျန်ရှိသည်]

ပိုင်ကျီဟန်သည် ကိုယ်ခံပညာဉာဏ်အလင်းပွင့်ကတ်ကို အသုံးပြုလိုက်သည်။

သူ့စိတ်အာရုံသည် ချက်ချင်းဆိုသလို ပိုမိုထက်မြက် ကြည်လင်လာသည်။

နည်းစနစ်များ၏ အနှစ်သာရကို တစ်ခါဖူးမျှ မကြုံဖူးသော အမြင်မျိုးဖြင့် မြင်လာရသည်။

အခြေခံအဆင့်သာရှိသေးသည့် ကံကြမ္မာဖြတ်တောက်ခြင်း ဓားချက်ပင်လျှင် ယခင်က သူပြုလုပ်ခဲ့မိသော အမှားအယွင်းအားလုံးကို ထင်ထင်ရှားရှား ပြသလာတော့သည်။

"မဟာအကြီးအကဲတို့... ကျွန်တော် သရုပ်ပြပါမယ်။ သေချာကြည့်ထားကြပါ”

ပိုင်ကျီဟန်က ကြေညာလိုက်သည်။

"ကံကြမ္မာဖြတ်တောက်ခြင်း ဓားချက်”

သူသည် ထိုနည်းစနစ်ကို ထုတ်ဖော်လိုက်သည်။ ယခင်ကထက် ပိုမိုတိကျပြတ်သားပြီး အစွမ်းထက်လာရုံသာမက ချီဓာတ်ကုန်ဆုံးမှုလည်း သိသိသာသာ လျော့နည်းသွားသည်။

ယင်းမှာ သူယခင်က ထုတ်ဖော်ခဲ့သမျှထက် သာလွန်ကောင်းမွန်သော နည်းစနစ်ဖြစ်ကြောင်း ထင်ရှားလှသည်။

မဟာအကြီးအကဲများသည် အနီးကပ်စောင့်ကြည့်နေကြပြီး သူတို့၏ ကျင့်ကြံမှုနှင့် အတွေ့အကြုံအရ ကွာခြားချက်ကို သတိပြုမိရန် မခက်ခဲလှပေ။

"အရင်ကထက်တောင် ပိုအစွမ်းထက်လာပါလား"

"သူ့ရဲ့ ကျင့်ကြံမှုအဆင့် တက်လာလို့လား?"

"မထင်ဘူး... ပိုပြီး သန့်စင်လာတာ၊ ပိုထက်မြက်လာတာ”

ထို့ပြင် ထိုနည်းစနစ်သည် မည်မျှခက်ခဲကြောင်းကိုလည်း သူတို့ အမှန်တကယ် နားလည်သွားကြသည်။

ဤမျှ ငယ်ရွယ်သော အသက်အရွယ်ဖြင့် ဤမျှ ရှုပ်ထွေးသော နည်းကို နားလည်သဘောပေါက်နိုင်သည့် ပိုင်ကျီဟန်ကို သူတို့ တဖန်ပြန်၍ အထင်ကြီးလေးစားမိကြပြန်သည်။

ဆိတ်သုဉ်းသော လွင်ပြင်ထက်တွင် တိတ်ဆိတ်မှုက စိုးမိုးသွားသည်။

ဓားအလင်းတန်းများ ပျောက်ကွယ်သွား၏

ကမ္ဘာလောကကြီးကိုယ်တိုင် အမာရွတ်အနည်းငယ် ထင်ကျန်ရစ်သကဲ့သို့ ဖိအားအငွေ့အသက်များကတော့ လွင့်ပျံ့နေဆဲဖြစ်သည်။

မဟာအကြီးအကဲများ၏ အကြည့်မှာ ပိုင်ကျီဟန် ဓားကွက်အဆုံးသတ်လိုက်သည့် နေရာတွင်သာ စွဲမြဲနေပြီး သူတို့မျက်လုံးများတွင် အံ့ဩတုန်လှုပ်မှုများက ဖုံးကွယ်မရအောင် ထင်ဟပ်နေသည်။

"ဒါက တကယ့်ဖြစ်သင့်တဲ့ ပုံစံကိုး..."

ပိုင်ချူက တိုးတိုးလေး ရေရွတ်လိုက်သည်။

မဟာအကြီးအကဲများ၏ မျက်နှာတွင် အံ့ဩမှုများ ပြည့်နှက်နေသည်။

မဟုတ်သေးပေ

အံ့ဩသည်ဟု ပြောရုံနှင့် မလုံလောက်ပေ။

သူတို့သည် သွေးကြောများ နာကျင်ကိုက်ခဲပြီး စိတ်အာရုံများ ထုံထိုင်းလာသည်အထိ လေ့ကျင့်ခဲ့ကြသော်လည်း

ပိုင်ကျီဟန် ပြသလိုက်သည့်အရာမှာ အခြေခံကျကျ ကွာခြားနေသည်။

ပိုသန်မာခြင်းမဟုတ်ပေ

ပိုမြန်ခြင်းမျိုး မဟုတ်ပေ

လုံးဝ တခြားအဆင့်တစ်ခုသို့ ရောက်ရှိနေခြင်းမျိုး ဖြစ်သည်။

ပိုင်ကျီဟန်သည် သူတို့ဘက်သို့ လှည့်လာသည်။ သူ့အမူအရာက တည်ငြိမ်အေးစက်နေသော်လည်း မျက်လုံးများကတော့ ယခင်ကထက် ပိုမိုတောက်ပနေသည်။

"ကဲ..." သူက ဆိုသည်။ "အကြီးအကဲတို့ ဘယ်နေရာတွေမှာ မှားနေလဲဆိုတာကို ပြောပြတာနဲ့ပဲ စလိုက်ကြမလား?"

မဟာအကြီးအကဲများသည် ကံကြမ္မာဖြတ်တောက်ခြင်း နည်း ကို စတင်လေ့ကျင့်ကြသည်။

ပိုင်ကျီဟန်က လှုပ်ရှားလိုက်သည်။

သူ့ပုံရိပ်သညါ ဝေဝါးသွားပြီး ပိုင်ချူ ဘေးတွင် ပေါ်လာသည်။

"ဒီမှာကြည့်" ပိုင်ကျီဟန်က ဓားဖျားဖြင့် မြေကြီးကို အသာအယာ တို့လိုက်သည်။

"အကြီးအကဲရဲ့ ဓားရည်ရွယ်ချက်က စောစောစီးစီး ပုံဖော်လွန်းနေတယ်"

"...နားလည်ပြီ" ပိုင်ချူက တိုးတိုးလေး ပြန်ဖြေသည်။

ပိုင်ကျီဟန်က ထိုနေရာတွင် မရှိတော့ပေ။

သူသည် ပိုင်ရမ်၏ နောက်ကျောဘက်တွင် ပေါ်လာပြန်သည်။

"အကြီးအကဲက ချီဓာတ်ပေါ်မှာ အရမ်းအားကိုးနေတယ်" ပိုင်ကျီဟန်က တည်ငြိမ်စွာ ပြောသည်။ "နည်းစနစ်ကို အတင်းအကျပ် တွန်းအားပေးနေတာပဲ"

ပိုင်ရမ်က နှာခေါင်းတစ်ချက် ရှုံ့လိုက်သည်။

"အကျင့်ဟောင်းတွေပေါ့"

"ဒါဆိုရင် အဲဒီအကျင့်တွေကို ဖျက်လိုက်ပါ" ပိုင်ကျီဟန်က တုံ့ပြန်လိုက်သည်။

သူသည် လှုပ်ရှားမှု တစ်ကွက်ကို ပြသလိုက်သည်။ အပိုအလိုမရှိ၊ ဟန်ပြအကွက်များလည်း မပါဝင်ပေ။

ထိုဓားခုတ်ချက်မှာ ရိုးရှင်းလှ၏

သူ့ရှေ့ရှိ ဟင်းလင်းပြင်သည် အနည်းငယ် ပုံပျက်သွားသည်။

ပိုင်ကျီဟန်က ထပ်မံလှုပ်ရှားပြန်သည်။

ပိုင်ရုဟုန်ထံသို့၊

ပိုင်ယွီထံသို့။

ပြင်ဆင်ချက်တိုင်းမှာ တိုတောင်းပြီး တိကျလှသည်။

မဟာအကြီးအကဲတိုင်းသည် ပိုင်ကျီဟန်၏ ပြောကြားချက် အပြီးတွင် သူတို့ ဘာမှားနေသည်ကို ချက်ချင်း သဘောပေါက်သွားကြသည်။

ပိုင်ကျီဟန်သည် တစ်ယောက်ပြီးတစ်ယောက် ကူးချည်သန်းချည်ဖြင့် လေ့လာစောင့်ကြည့်သည်။

ပြင်ဆင်ပေးသည်။

သူတို့နှင့်အတူ လေ့ကျင့်သည်။

အချိန်ကုန်ဆုံးလာသည်နှင့်အမျှ လွင်ပြင်ထက်မှ ဓားအလင်းတန်းများ ပြောင်းလဲလာသည်။

၎င်းတို့သည် ပိုမိုသန့်စင်လာသည်။

ပိုမိုထက်မြက်လာသည်။

ပိုမိုထိရောက်လာသည်။

မဟာအကြီးအကဲများ၏ ဓားခုတ်ချက်များမှာ ယခင်ကကဲ့သို့ ဗရဗြဲဖြစ်မနေတော့သလို အတင်းအကျပ် လုပ်ယူထားသည့် ပုံစံမျိုးလည်း မဟုတ်တော့ပေ

သို့သော်—

တစ်ခုခု လိုအပ်နေသေးသည်။

သူတို့ ခံစားနေရသည်။

အရေးကြီးဆုံး အနှစ်သာရ။

နားလည်မှုမှသည် စစ်မှန်သော ကံကြမ္မာဖြတ်တောက်ခြင်းသို့ ကူးပြောင်းပေးမည့် နောက်ဆုံးအဆင့်။

ဤအပိုင်းကိုတော့ သင်ကြားပေး၍ မရနိုင်ပေ။

ပိုင်ကျီဟန်က ရှင်းပြရန် ကြိုးစားသော်လည်း စစ်မှန်သော အနှစ်သာရကို သူတို့ကိုယ်တိုင် နားလည်ရန်သာ လိုအပ်သည်။

ကံကောင်းသည်မှာ— သူတို့သည် အင်မော်တယ်များ ဖြစ်ကြသည်။

ပိုင်ကျီဟန်၏ လမ်းညွှန်မှုရှိနေသဖြင့် ထိုနောက်ဆုံးအနှစ်သာရကို ဆုပ်ကိုင်နိုင်ရန်မှာ အချိန်ပိုင်းကိစ္စသာ ဖြစ်သည်။

ပိုင်ကျီဟန်သည် ကံကြမ္မာဖြတ်တောက်ခြင်း ဓားချက်တစ်ခုတည်းကိုသာ သင်ကြားလေ့ကျင့်နေခြင်း မဟုတ်ပေ။

နည်းစနစ်တစ်ခုတည်းအပေါ် အာရုံစိုက်နေပါက ကိုယ်ခံပညာဉာဏ်အလင်းပွင့်ကတ်မှာ အလဟဿ ဖြစ်သွားပေလိမ့်မည်။

သူသည် ထာဝရစီးဆင်းနေသောရေဓားသိုင်း နှင့် အရိပ်ကိုးပါးစီးဆင်းနေသောအလင်းဓားသိုင်းကိုပါ လေ့ကျင့်ခဲ့သည်။

တခါတရံတွင် မဟာအကြီးအကဲများသည် သူတို့၏ လေ့ကျင့်မှုကို ရပ်တန့်ကာ ပိုင်ကျီဟန်၏ အရိပ်ကိုးပါးစီးဆင်းနေသည့် အလင်းဓားသိုင်း ထုတ်ဖော်မှုကို အံ့အားသင့်စွာ ကြည့်နေကြရသည်။

ပိုင်ကျီဟန်၏ ပိုင်မျိုးနွယ်စု အမာခံနည်းစနစ်အပေါ် ကျွမ်းကျင်မှုသည် သူတို့ထက် ကျော်လွန်သွားပြီဖြစ်ပြီး ပိုင်ချူနှင့်ပင် ရင်ပေါင်တန်းနိုင်နေပြီဖြစ်ကြောင်း သူတို့ သိလိုက်ရသည်။

"ကျီဟန်က ကြောက်စရာကောင်းတဲ့ ကျင့်ကြံမှုအရှိန်ရှိရုံတင်မကဘူး၊ သူ့ရဲ့ နားလည်သဘောပေါက်မှုက ပိုလို့တောင် ကြီးမားသေးတယ်"

"ပိုင်ကျီဟန် ထိပ်ဆုံးကို ရောက်ဖို့အတွက် ဘယ်အတားအဆီးမှ ရှိမှာမဟုတ်ဘူးဆိုတာ တကယ်ပါပဲ"

ကျင့်ကြံသူတစ်ဦး၏ ခွန်အားကို ဆုံးဖြတ်ပေးသည့် အခြေခံအချက် သုံးချက်ရှိသည်

ကိုယ်ခန္ဓာ၊ ကျင့်ကြံမှုအဆင့် နှင့် နားလည်သဘောပေါက်မှုတို့ဖြစ်သည်။

တစ်ခုခု လိုအပ်နေပါက ယင်းမှာ အားနည်းချက် ဖြစ်လာသည်။

အချို့မှာ နားလည်မှုအားကောင်းသော်လည်း ကျင့်ကြံမှုနှေးကွေးသည် — လင်းရွှမ်ကဲ့သို့ပင်။

အချို့မှာ ကျင့်ကြံမှုနှင့် နားလည်မှုရှိသော်လည်း ကိုယ်ခန္ဓာအားနည်းသည် — ပိုင်ရွှယ်ချင်းကဲ့သို့ပင်

ပိုင်ရွှယ်ချင်း၏ ကိုယ်ခန္ဓာမှာ အမှန်တကယ် အားနည်းခြင်းမဟုတ်သော်လည်း သူမ၏ တခြားအားသာချက်များနှင့် ယှဉ်လျှင် အနည်းငယ် နောက်ကျနေခြင်းသာ ဖြစ်သည်

သို့သော် ပိုင်ကျီဟန်မှာမူ?

သူ့ကျင့်ကြံမှု သို့မဟုတ် ကိုယ်ခန္ဓာအကြောင်း ပြောနေစရာပင် မလိုတော့ပေ— ကုံးယောင်၏ လက်သီးချက်ကို ခံနိုင်ခဲ့သည့် ထိုကိုယ်ခန္ဓာပင် ဖြစ်သည်။

ယခုအခါတွင်မူ သူ၏ နားလည်သဘောပေါက်မှုသည်ပင် မဟာအကြီးအကဲများထက် သာလွန်ကြောင်း သက်သေပြခဲ့ပြီဖြစ်သည်။

ပိုင်ကျီဟန်ကို တစ်ခုခုက တားဆီးထားနိုင်လိမ့်မည်ဟု သူတို့ စိတ်ကူး၍ပင် မရတော့ပေ။

သူသည် မြင့်တက်လာမည်။

အရာအားလုံး၏ အထက်သို့ မြင့်တက်လာပေလိမ့်မည်။

[ ကိုယ်ခံပညာဉာဏ်အလင်းပွင့်ကတ် (အသက်ဝင်နေသည်) — ၅ စက္ကန့် ကျန်ရှိသည်]

[ ကိုယ်ခံပညာဉာဏ်အလင်းပွင့်ကတ် (အသက်ဝင်နေသည်) — ၄ စက္ကန့် ကျန်ရှိသည် ]

"ဟူး..."

ပိုင်ကျီဟန်က အသက်ကို ပြင်းပြင်းရှူလိုက်သည်။

ကိုယ်ခံပညာဉာဏ်အလင်းပွင့်ကတ် ကုန်ဆုံးသွားပြီဖြစ်သည်။

ပိုင်ကျီဟန် ကံကြမ္မာဖြတ်တောက်ခြင်း ဓားကို သင်ကြားလေ့ကျင့်ပေးခဲ့သည်မှာ တစ်ရက် တင်းတင်း ပြည့်သွားခဲ့ချေပြီ။

ထိုကတ်မရှိလျှင်ပင် သူသည် ဆက်လက်လုပ်ဆောင်ရန် အလွန်ပင် မောပန်းနေပြီဖြစ်သည်။

ကံကြမ္မာဖြတ်တောက်ခြင်း ဓားသည် ချီဓာတ်ကို ကြောက်မက်ဖွယ်ကောင်းသော နှုန်းဖြင့် လောင်ကျွမ်းစေသည်။

သို့သော် သူ၏ တိုးတက်လာသော ကျွမ်းကျင်မှုနှင့် ကျင့်ကြံမှုကြောင့် ယခုဆိုလျှင် သူသည် သုံးချက် သို့မဟုတ် လေးချက်ပင်ကို အလွယ်တကူ ထုတ်ဖော်နိုင်ပြီဖြစ်သည်။

တစ်နေကုန် သရုပ်ပြလေ့ကျင့်ပြီးနောက် မောပန်းနွမ်းနယ်မှုမှာ မလွဲမသွေပင်။

"စနစ်”

[ပိုင်ရှင် အချက်အလက် ]

ပိုင်ရှင်: ပိုင်ကျီဟန်

ကျင့်ကြံမှုအဆင့်: ဝိညာဉ်ခွဲခြမ်းစိတ်ဖြညခြင်းအဆင့် (ထိပ်ဆုံး)

ကိုယ်ခံပညာရပ်များ:

အရိပ်ကိုးပါး စီးဆင်းနေသော အလင်းဓားသိုင်း: (ကျွမ်းကျင်မှုအဆင့် - အဓိကအဆင့်)

ထာဝရစီးဆင်းနေသော ရေဓားသိုင်း: (ကျွမ်းကျင်မှုအဆင့် - အဆင့်မြင့်)

ကံကြမ္မာဖြတ်တောက်ခြင်းဓားချက်: (ကျွမ်းကျင်မှုအဆင့် - အဆင့်မြင့်)

ကောင်းကင်ဘုံ အမိန့်တော် ပြောင်းပြန်လှန်ခြင်း: (ကျွမ်းကျင်မှုအဆင့် - အခြေခံ)

အရိပ်ကိုးပါး စီးဆင်းနေသည့် အလင်းဓားသိုင်းသည် အဆင့်တစ်ခု တက်လာပြီး ပြည့်စုံခြင်း အဆင့်သို့ နီးကပ်လာသည်။

ထာဝရစီးဆင်းရေပြင်ဓားသိုင်း မှာလည်း တစ်ဆင့်တိုးကာ အဆင့်မြင့်ကျွမ်းကျင်မှုသို့ ရောက်ရှိသွားသည်။

ကံကြမ္မာဖြတ်တောက်ခြင်း ဓားချက်မှာမူ အခြေခံမှသည် အဆင့်မြင့်ကျွမ်းကျင်မှုအထိ နှစ်ဆင့်တောင် ခုန်တက်သွားခဲ့သည်။

ယင်းမှာ ပိုင်ကျီဟန်သည် မဟာအကြီးအကဲများကို သင်ကြားပေးရင်း အချိန်အများစုကို ယင်းအပေါ်၌သာ အသုံးချခဲ့ခြင်းကြောင့် ဖြစ်သည်။

မဟုတ်ပါက တခြားနည်းစနစ်များမှာ ယခုထက် ပို၍ တိုးတက်လာပေလိမ့်မည်။

သို့သော် ကံကြမ္မာဖြတ်တောက်ခြင်း ဓားသည် သူ၏ အစွမ်းထက်ဆုံး တိုက်ကွက်ဖြစ်သဖြင့် နောင်တရစရာ မရှိပေ။

သူသည် ကောင်းကင်ဘုံ အမိန့်တော် ပြောင်းပြန်လှန်ခြင်း ကိုလည်း အောင်မြင်စွာ တတ်မြောက်ခဲ့သည်။

ဉာဏ်အလင်းပွင့်ကတ် ရှိနေသဖြင့် ယင်းကို နားလည်ရန်မှာ မခဲယဉ်းလှပေ။

ယခုအခါတွင် သူသည် ယင်း၏ ကန့်သတ်ချက်များကို အပြည့်အဝ နားလည်သွားပြီဖြစ်သည်။

လက်ရှိကျင့်ကြံမှုဖြင့် သူသည် ဗလာသန့်စင်ခြင်းအဆင့်မြင့်တွင် မိနစ်နှစ်ဆယ်ခန့် ကြာရှည်နိုင်မည်။

မဟာကောင်းကင်ဘုံတက်ခြင်းအဆင့်သို့ ရောက်ရှိရန်မှာ ချီဓာတ်အပြည့်ရှိလျှင်ပင် အများဆုံး သုံးမိနစ်သာ ခံနိုင်မည်ဖြစ်သည်။

ယင်းနောက်တွင် ဖြစ်ပေါ်လာမည့် တုံ့ပြန်မှုမှာ သူ့ကိုယ်ခန္ဓာကို ပြင်းထန်စွာ ထိခိုက်စေလိမ့်မည်။

ထို့ကြောင့် လုံးဝမဖြစ်မနေမှလွဲ၍ သူ ထပ်မံအသုံးမပြုတော့ပေ။

ဤနည်းကို မဟာအကြီးအကဲများအား သင်ကြားပေးရန် သူ ခဏမျှ စဉ်းစားခဲ့သော်လည်း ထိုအတွေးကို ဖျောက်လိုက်သည်။

သူတို့၏ ကိုယ်ခန္ဓာမှာ ပြင်းထန်သော တုံ့ပြန်ဒဏ်ကို ခံနိုင်ရည်ရှိလောက်အောင် မသန်မာသေးပေ။

ထို့ပြင် ကံကြမ္မာဖြတ်တောက်ခြင်း ဓားတစ်ခုတည်းဖြင့်ပင် သူတို့ထက် အဆင့်မြင့်သော ရန်သူများကို အနိုင်ယူနိုင်စွမ်း ရှိနေပြီဖြစ်သည်။

ဤမျှ အန္တရာယ်များသော နည်းစနစ်အတွက် သူတို့အသက်ကို ရင်းရန် မလိုအပ်ပေ။

မဟာအကြီးအကဲများသည် သူတို့၏ ဓားများကို ဖြည်းဖြည်းချင်း ပြန်သိမ်းလိုက်ကြသည်။

ပိုင်ကျီဟန်က သက်ပြင်းတစ်ချက်ကို တိုးတိုးလေး မှုတ်ထုတ်လိုက်သည်။

ဤနေရာတွင် သူလုပ်ရမည့် အလုပ်မှာ ပြီးဆုံးသွားပြီဖြစ်သည်။

သူသည် မဟာအကြီးအကဲများဘက်သို့ လှည့်ကာ လက်သီးဆုပ်လျက် အရိုအသေပေးလိုက်သည်။

"ဒီနေ့အတွက်တော့ ဒါပါပဲ" ပိုင်ကျီဟန်က ဆိုလိုက်သည်။ " အကြီးအကဲတို့ ဒါတွေကို ပြန်ပြီး ချင့်ချိန်ဖို့ အချိန်လိုပါလိမ့်မယ်။ အတင်းအကျပ် ဆက်လုပ်နေရင်လည်း အကျိုးရှိမှာ မဟုတ်ဘူး"

မဟာအကြီးအကဲများသည် သူ့ကို ရှုပ်ထွေးသော အမူအရာများဖြင့် ကြည့်လိုက်ကြသည်။

ကျေးဇူးတင်ရှိမှု။

အံ့ဩတုန်လှုပ်မှု။

ထို့ပြင် မယုံနိုင်စရာ ကောင်းလွန်းသည့် ခံစားချက်တစ်ခု။

ပိုင်ချူက ခေါင်းခါယမ်းရင်း ခပ်တိုးတိုး ရယ်မောလိုက်သည်။

"ဝိညာဉ်ခွဲခြမ်းစိတ်ဖြာခြင်းအဆင့်နဲ့ အင်မော်တယ်တွေကို ဓားသိုင်းသင်ပေးတယ်ပေါ့..." သူက ဆိုသည်။ "တခြားသူတစ်ယောက်ယောက်သာ ဒါကို မြင်ရင် ကမ္ဘာကြီးတစ်ခုလုံး ရူးသွားပြီလို့ ထင်ကြမှာပဲ"

ပိုင်ရမ်က ပိုင်ကျီဟန်ကို နက်နက်ရှိုင်းရှိုင်း ကြည့်လိုက်သည်။

"မင်း လုပ်ပေးတာတွေက လုံလောက်တာထက်တောင် ပိုနေပါပြီ" သူက လေးလေးနက်နက် ပြောလိုက်သည်။ "ကောင်းကောင်း အနားယူလိုက်ပါ။ ကျန်တာကို ငါတို့တာဝန်ထားလိုက်တော့"

ပိုင်ယွီကလည်း ညင်သာစွာ ခေါင်းငြိမ့်ပြသည်။

"နောက်တစ်ကြိမ် တိုက်ပွဲရောက်လာတဲ့အခါ" သူမက ထပ်လောင်းပြောသည်မှာ "ငါတို့ မင်းကို စိတ်မပျက်စေရပါဘူး"

ပိုင်ကျီဟန်က ခပ်မှိန်မှိန် ပြုံးလိုက်သည်။

"ကျွန်တော် မျှော်လင့်နေပါ့မယ်"

သူသည် ထိုနေရာမှ လှည့်ထွက်လာခဲ့သည်။

ပေါ့ပါးသော လှုပ်ရှားမှုတစ်ခုဖြင့် သူ၏ပုံရိပ်မှာ ဝေဝါးသွားပြီး ဆိတ်သုဉ်းသော လွင်ပြင်ထက်တွင် ပျောက်ကွယ်သွားကာ တပ်စခန်းရှိရာသို့ ပြန်လည်ဦးတည်သွားတော့သည်။

တပ်စခန်းမှာတော့ စနစ်တကျရှိနေပြီး တည်ငြိမ်နေဆဲဖြစ်သည်။

အရေးပေါ်အချက်ပေးသံများ မရှိပေ

မိစ္ဆာတို့၏ လှုပ်ရှားမှု အရိပ်အယောင်များလည်း မရှိပေ။

သူ့တဲအနီးသို့ ရောက်ရှိသွားချိန်တွင်တော့ ရင်းနှီးသော ပုံရိပ်တစ်ခုက ချက်ချင်း ကိုယ်ကိုမတ်လိုက်သည်။

ယခင်က ပိုင်မျိုးနွယ်စုတပည့်သည် ရှေ့သို့တိုးလာပြီး အရိုအသေပေးကာ ဦးညွှတ်လိုက်သည်။

"သခင်လေး”

ပိုင်ကျီဟန်က ခဏရပ်ကာ သူ့ကို ကြည့်

လိုက်သည်။

"မင်း နောက်တစ်ခါလား?"

သူက ခပ်အေးအေး မေးလိုက်သည်။

"ဟီးဟီး... ကျွန်တော့်ကို သခင်လေးရဲ့တဲကို စောင့်ကြပ်ခွင့်ပြုပါဦး"

ပိုင်ကျီဟန်သည် သူ့ကို တိတ်ဆိတ်စွာ အကဲခတ်လိုက်သည်။ ခဏအကြာတွင် ပိုင်ကျီဟန်က ခေါင်းငြိမ့်ပြလိုက်သည်။

"ကောင်းပြီ”

သူက တည်ငြိမ်စွာ ဆိုသည်။

ထိုတပည့်၏ မျက်လုံးများမှာ ချက်ချင်း တောက်ပသွားတော့သည်။

"ဟုတ်ကဲ့ပါ သခင်လေး”

ပိုင်ကျီဟန်သည် သူ့ကို ကျော်ဖြတ်ဝင်သွားပြီးမှ ပြန်ရပ်လိုက်သည်။

"မိစ္ဆာသားရဲတွေဘက်က လှုပ်ရှားမှု တစ်ခုခုရှိရင်" သူက ထပ်ပြောသည်မှာ "ငါ့ကို ချက်ချင်း အကြောင်းကြားပါ"

"နားလည်ပါပြီ” ထိုတပည့်က ပြတ်သားစွာ ပြန်ဖြေသည်။ "နှောင့်ယှက်မှု အသေးအဖွဲလေးတစ်ခုတောင် မလွတ်စေရအောင် သတိထားပါ့မယ်”

ပိုင်ကျီဟန်က ခေါင်းတစ်ချက်ငြိမ့်ကာ အသိအမှတ်ပြုလိုက်သည်။

သူသည် တဲလိုက်ကာကို မကာ အတွင်းသို့ ဝင်ခဲ့သည်။

အပြင်ဘက်မှ ဆူညံသံများ ချက်ချင်း တိတ်ဆိတ်သွားတော့သည်။

နောက်တစ်ကြိမ်တွင် သူတစ်ယောက်တည်း ပြန်ဖြစ်သွားပြန်သည်။

ပိုင်ကျီဟန်သည် တင်ပလ္လင်ခွေ ထိုင်လိုက်ပြီး သူ့အမူအရာက တည်ငြိမ်သော အာရုံစူးစိုက်မှုအဖြစ် ပြောင်းလဲသွားသည်။

သူ့၏ ချီဓာတ်များမှာ ဖြည်းဖြည်းချင်း စတင်လှည့်ပတ်လာသည်။

သူ သင်ယူခဲ့သမျှကို ပြန်လည်ဆင်ခြင်ပြီး ကျင့်ကြံရန် လိုအပ်နေသေးသည်။

နှစ်ရက်တာ အချိန်မှာ တိတ်ဆိတ်စွာ ကုန်ဆုံးသွားသည်။

ပိုင်ကျီဟန်သည် သူ့တဲအတွင်း၌သာ ရှိနေပြီး ကျင့်ကြံမှုအဆင့်ကို တည်ငြိမ်အောင်လုပ်ရင်း သင်ယူခဲ့သမျှကို အစာခြေဖျက်နေသည်။

ချီဓာတ်များသည် သူ့ခန္ဓာကိုယ်အတွင်း မှန်မှန်လည်ပတ်နေပြီး သူ့၏ အခြေခံအုတ်မြစ်မှာ ပိုမိုခိုင်မာလာခဲ့သည်။

အပြင်ဘက်တွင်မူ ပိုင်မျိုးနွယ်စုတပည့်သည် အနားမယူဘဲ ဆက်လက်စောင့်ကြပ်နေဆဲ ဖြစ်သည်။

ထိုစဉ်

"သခင်လေး”

ပိုင်ကျီဟန် မျက်လုံးများ ပွင့်လာသည်။

"ဘာဖြစ်တာလဲ?"

ထိုတပည့်၏ အသံမှာ တင်းမာနေသည်။

"မိစ္ဆာသားရဲတွေနဲ့ မိစ္ဆာကျင့်ကြံသူတွေ နောက်တစ်ခါ ကျူးကျော်လာပြန်ပါပြီ”

ပိုင်ကျီဟန် မတ်တပ်ထရပ်လိုက်သည်။

"သိပြီ" သူက တည်ငြိမ်စွာ ဆိုသည်။

"ဒါဆိုရင် သူတို့ကို သွားပြီး ကြိုဆိုလိုက်ကြတာပေါ့”