အခန်း (၉၇၃-၉၇၄)

အခန်း (၉၇၃) ကျွမ်းကျင် သူခိုး

ဂလက်ဆီစစ်ပွဲတစ်ခုတွင် ကြယ်တာရာတံခါး သွားလာရေးအပေါ် အခြေခံထားသော ထောက်ပံ့ရေးနှင့် ရိက္ခာလမ်းကြောင်းများသည် အလွန်အရေးကြီးသည်။ စူးစမ်းရှာဖွေရေး အင်ပါယာတပ်ဖွဲ့များသည် လမ်းတစ်လျှောက်တွင် ကြယ်တာရာတံခါးများကို အဆက်မပြတ်တည်ဆောက်ခဲ့ပြီး သူတို့ဆန္ဒရှိသလို ရှေ့တိုးဆုတ်ခွာရန် အသုံးပြုနိုင်သည့် လျင်မြန်သောလမ်းကြောင်းတစ်ခုအဖြစ် ချိတ်ဆက်ခဲ့သည်။ ရန်သူက သူတို့၏ ကြယ်တာရာတံခါးစခန်းများကို ခြုံခိုတိုက်ခိုက်ခြင်းမှ ကာကွယ်ရန် လမ်းကြောင်းကို တိုးချဲ့လိုက်တိုင်း ဝန်ထမ်းအချို့ကို ထိုနေရာတွင် တပ်စွဲထားမည်ဖြစ်သည်။ ထို့ကြောင့် ဖုန်အလင်း ကြယ်စုတန်းထဲသို့ နက်ရှိုင်းစွာ ဝင်ရောက်လေလေ အင်ပါယာအရာရှိတစ်ဦးစီ ဦးဆောင်သော တပ်ဖွဲ့ဝင်အရေအတွက်သည်လည်း လျော့နည်းလာမည်ဖြစ်သည်။

တိုက်ခိုက်ရေးဘက်မှ အင်ပါယာသည် ထောက်ပံ့ရေးလမ်းကြောင်းများကို အဆက်မပြတ် တိုးချဲ့ရမည်ဖြစ်သော်လည်း ဤနေရာတွင် စစ်တပ်၏ အားသာချက်ကို ပြသထားသည်၊ သူတို့တွင် သူတို့၏ အရင်းအမြစ်များကို ဤကဲ့သို့ ဖြုန်းတီးပစ်ရန် အရင်းအနှီးရှိသည်။

ရှေ့တန်းတပ်ဖွဲ့များ၏ အရွယ်အစားသည် တဖြည်းဖြည်း ကျုံ့သွားမည်ဖြစ်ပြီး တိုက်ပွဲ၏ ပြင်းထန်မှုသည် တဖြည်းဖြည်း တိုးလာမည်ဖြစ်သောကြောင့် တပ်မတစ်ခုစီ၏ တပ်မှူးသည် အင်ပါယာအတွင်း ကြီးမားသော အလားအလာရှိသည့် လူငယ်အရာရှိတစ်ဦး ဖြစ်လာမည်ဖြစ်သည်။ သူတို့အားလုံးသည် ကြယ်တာရာစစ်ပွဲများတွင် ကြွယ်ဝသော အတွေ့အကြုံများကို ရရှိထားရမည်ဖြစ်သည်။

ဤလူစာရင်းသည် မည်မျှ ခမ်းနားနေသလဲဆိုလျှင် ဟန်ရှောင်းသည် စစ်ဆင်ရေးတွင် ပါဝင်သော အရာရှိအားလုံးနီးပါးသည် အနာဂတ်တွင် စစ်တပ်တွင် ရာထူးကြီးမြင့်မည့်သူများဖြစ်ကြောင်း ပြန်လည်အမှတ်ရသည်။ သူတို့အထဲတွင် တန်နီအောက်မကျသော စွမ်းအားရှိသူ အနည်းဆုံး သုံးဦးရှိပြီး သူတို့သည် အင်ပါယာ၏ အခြားသော ကြီးမားသော တပ်မတော်တပ်ဖွဲ့များကိုလည်း ကွပ်ကဲနေကြသည်။

ထိုကဲ့သို့ နာမည်ကြီး စစ်ဗိုလ်ချုပ်ကြီးများအဖွဲ့နှင့် ရင်ဆိုင်ရချိန်တွင် ကွန်ဒီလူမျိုးများသည် လုံးဝ အားနည်းချက်ရှိနေသည်။ အင်ပါယာတပ်များ လျော့ကျသွားလျှင်တောင် ကွန်ဒီလူမျိုးများ အခွင့်အရေး မရှိသေးပေ။

ဟန်ရှောင်း၏ တောင်းဆိုမှုကို ခံရပြီးနောက် တန်နီသည် သူ၏ ယခင်စတိုင်ကို ပြောင်းလဲကာ ဘလက်စတား စစ်တပ်အား စစ်ပွဲတာဝန်များကို ပိုမိုထမ်းဆောင်ခွင့်ပြုခဲ့ပြီး အထူးသဖြင့် နီရိုကို ဂရုစိုက်ခဲ့သည်။

တိုက်ပွဲတိုင်းလိုလိုတွင် နီရိုပါဝင်သော တပ်ဖွဲ့အား အဓိက တိုက်ခိုက်ရေးမစ်ရှင်များ တာဝန်ပေးအပ်မည်ဖြစ်ပြီး သူတို့အား တိုက်ပွဲများအတွက် အခွင့်အရေးများစွာ ရရှိစေသည်။

စူပါ အကယ်ဒမီမှ ကျောင်းဆင်းအများစုသည် ဤတပ်ဖွဲ့အတွင်းရှိ မတူညီသောအဖွဲ့များတွင် တာဝန်ပေးအပ်ခံရသည်မှာ ကောင်းမွန်လှသည်။ အဆက်မပြတ် ပြင်းထန်ပြီး အန္တရာယ်များသော တိုက်ပွဲသည် ဤကျောင်းသားလူငယ်များကို ကြီးမားသော ဝန်ထုပ်ဝန်ပိုးဖြစ်စေသည်။ နီရိုပင် လွှမ်းမိုးခံရ၏။ သူတို့တပ်က တပ်မှူးကို တစ်နည်းနည်းနဲ့ စော်ကားမိသလားလို့ တွေးရင်း ထူးဆန်းနေမိသည်။

အဆက်မပြတ် ဖိအားများသော တိုက်ပွဲများကြောင့် နီရို၏ စက်ယန္တရားများ ဆိုးရွားစွာ ဟောင်းနွမ်းသွားသည်။ သူသည် သူ၏ ပစ္စည်းစာရင်းတစ်ခုလုံး၏ ထက်ဝက်နီးပါးကို ဆုံးရှုံးခဲ့ရသည်။ တိုက်ပွဲမရှိသည့်အခါတွင် သူသည် နောက်တိုက်ပွဲအတွက် တပ်ဆင်မှုမရှိမည်ကို စိုးရိမ်သဖြင့် သူ၏ စက်ယန္တရားများကို ပြုပြင်ရန် ကြိုးစားလုပ်ဆောင်ရသဖြင့် ကောင်းကောင်း အနားမယူနိုင်ခဲ့ပေ။

ဤအချိန်တွင် နီရိုသည် ရေနိုးကို အလွန်ကျေးဇူးတင်နေသည်။

‘... အိပ်မပျော်တာပဲ မဟုတ်ဘူးလား။ ငါစာသင်ဖို့ အတင်းအကြပ် အခိုင်းခံရတုန်းက ဒီစွမ်းရည်ကို မြန်မြန်ဆန်ဆန် သင်ယူခဲ့တယ်။’

ပြောရလျှင် ၎င်းသည် တင်စားချက်သက်သက်သာ မဟုတ်ပေ။ သူ၏ ဇာတ်ကောင်မျက်နှာပြင်တွင် အရည်အချင်းတစ်ခုအဖြစ် စာသားအရ ဖော်ပြထားသည်။

[အဆင့်မြင့် ပင်ပန်းနွမ်းနယ်မှု ခံနိုင်ရည်] – အနားယူချိန်တွင် +၅၀၀% ရုပ်ပိုင်းဆိုင်ရာ ပြန်လည်ကောင်းမွန်မှု စွမ်းဆောင်ရည်၊ -၆၀% ရုပ်ပိုင်းဆိုင်ရာ ဆုံးရှုံးမှုနှုန်း။ အိပ်ရေးပျက်ခြင်းကြောင့်ဖြစ်ရသည့် 'စိတ်ပိုင်းဆိုင်ရာ ပင်ပန်းနွမ်းနယ်မှု' ၏ အနုတ်လက္ခဏာ အခြေအနေကို 'အနည်းငယ် စိတ်ပိုင်းဆိုင်ရာ ပင်ပန်းနွမ်းနယ်မှု' အများဆုံးအထိ ကန့်သတ်ထားသည်။

ပါရမီရှင်တစ်ဦးသည် အိပ်မပျော်ဘဲ အရည်အချင်းများကို ဖွံ့ဖြိုးတိုးတက်စေနိုင်သည်၊ ၎င်းကို မည်သူနှင့် ကျိုးကြောင်းဆီလျှော်အောင်ပြောရမလဲဆိုတာ ဟန်ရှောင်း မသိတော့ပေ။

သို့သော်လည်း အခြား ဘွဲ့ရများသည် နီရို၏ အတွေ့အကြုံမျိုး မရှိဘဲ လုံးဝ ပင်ပန်းနွမ်းနယ်နေကြသည်။ မီယာပင် သူနှင့် ဖုန်းဆက် စကားပြောဖို့ အချိန်မရချေ။

တပ်မှူး၏ စိတ်နေသဘောထားကို သူ ခန့်မှန်းရန် နည်းလမ်းမရှိသောကြောင့်ဖြစ်သည်။ နီရိုက သူ့ကို ကျိန်ဆဲချင်ရင်တောင် အသုံးမဝင်ပေ။ တန်နီက သူ့ကို ဒီလိုလုပ်ဖို့ စီစဉ်ထားမှန်း မသိဘဲ တိုက်ပွဲဝင်ဖို့ အံကြိတ်ပြီး တိုက်ပွဲဝင်ရုံသာတတ်နိုင်၏။

ဖိအားများသော တိုက်ပွဲတစ်ခုသည် အသေအပျောက်များကို ဖြစ်ပေါ်စေမည်ဖြစ်ပြီး ၎င်းသည် လက်တွေ့ဘဝ တိုက်ပွဲ သရုပ်သကန်တွင်ပင် ဖြစ်ပွားနိုင်သည်။ သို့သော် ဤကိစ္စတွင် နီရို၏အဖွဲ့သည် အတော်လေး အခြေအနေကောင်းနေသည်။ သူတို့အားလုံး ပင်ပန်းနွမ်းနယ်နေကြသော်လည်း သေဆုံးမှုတစ်စုံတစ်ရာ မကြုံတွေ့ရသေးပေ။ မကြာခဏ တိုက်ပွဲများ အားဖြင့် သူတို့၏ နှောင်ကြိုးများသည် ပိုမိုနက်ရှိုင်းလာခဲ့သည်။

ကြက်သွေးရောင်အင်ပါယာသည် ဤစစ်ပွဲတွင် လုံးဝအားသာချက်ရှိသည်။ ရက်အတော်ကြာ ဖြတ်သန်းသွားပြီး ကွန်ဒီလူမျိုးများ၏ နယ်စပ်သို့ရောက်ရှိရန် ကြယ်စနစ်များစွာကို ဖြတ်ကျော်ကာ အမျိုးမျိုးသော အင်ပါယာရေယာဉ်စုများသည် တည်ငြိမ်စွာ ချီတက်လာသည်။

ပင်မတပ်ဖွဲ့က ခံတပ်ကို ကာကွယ်ထားသဖြင့် စူးစမ်းထောက်လှမ်းရေးတပ်ဖွဲ့သည် ဦးစွာထွက်ခွာလာပြီး သတင်းအချက်အလက်ရယူရန်၊ ကွန်ဒီလူမျိုးများထံသို့ ကြိုတင်ဝင်ရောက်ရန် တပ်ရင်းအသီးသီး ခွဲထွက်လိုက်ကြသည်။ ဤကင်းထောက်များတွင် အဝေးထိန်းစနစ်ဖြင့် ထိန်းချုပ်ထားသော မောင်းသူမဲ့ ဒရုန်းများနှင့် မြေပြင်တိုက်ခိုက်ရေး ဝန်ထမ်းများ ပါဝင်သည်။

အန္တရာယ်ရှိသော မစ်ရှင်ကို လုပ်ဆောင်ရန် နီရို၏ တပ်စုအား ကင်းထောက်များအဖြစ် ရွေးချယ်ခံရသည်မှာ အံ့သြစရာမဟုတ်ပေ။

အင်ပါယာတပ်များသည် ကွန်ဒီနယ်စပ်ကို စူးစမ်းရှာဖွေနေစဉ် ဟန်ရှောင်းမှ တိတ်တဆိတ်စေလွှတ်လိုက်သော လျှို့ဝှက် ယန္တရားတပ်မတော်သည် သူ၏လမ်းညွှန်မှုအတိုင်း ကွန်ဒီမိခင်ဂြိုဟ်အနီးသို့ ရောက်ရှိလာသည်။

...

လူသူကင်းမဲ့သော ဂြိုဟ်ကဲ့သို့ ဖြစ်နေသော အနက်ရောင်ဂြိုဟ်များထဲမှ တစ်ခုတွင် စူးစမ်းလေ့လာရေးဂြိုလ်တု အများအပြား အာကာသပြင်ပတွင် ပျံဝဲနေသည်။ ထိုဂြိုလ်တုများကို ဂြိုဟ်မျက်နှာပြင်ကို ဖုံးအုပ်အသွင်ဖျောက်ရန်လည်း အသုံးပြုသည်။ အာကာသပြင်ပတွင် ယန္တရားစစ်သည်များကို အသုံးပြု၍ ဖုံးကွယ်ထားခြင်းကို ထိုးဖောက်ပါက ကွန်ဒီမိခင်ဂြိုဟ်၏ စစ်မှန်သော အသွင်အပြင်ကို မြင်တွေ့ရမည်ဖြစ်သည်။ ဂြိုလ်သည် နီလာပြာရောင်ဖြစ်ပါသည်။ အရောင်သည် မျက်နှာပြင်ဧရိယာအများစုကို နေရာယူထားပြီး သမုဒ္ဒရာ၏ထိပ်တွင် မျောလွင့်နေသောမြို့အသီးသီးကို မျောလွင့်နေသည်။

"နောက်တော့ ဂြိုလ်ရဲ့ တကယ့်အသွင်အပြင်က ဒီလိုပဲ"

ယန္တရားစစ်သည်များသည် ဂြိုဟ်နှင့် ဝေးကွာသော အာကာသထဲတွင် ရပ်တန့်သွားကြပြီး အားလုံးက သူတို့၏ ကိုယ်ပျောက် ဖုံးကွယ်မှုကို ဖွင့်ထားကြသည်။ ဟန်ရှောင်း၏ နည်းပညာနှင့် ယန္တရားစွမ်းအား အားဖြည့်မှုများသည် ဤအဖွဲ့အား ကွန်ဒီမိခင်ဂြိုဟ်မှ မသိရှိနိုင်အောင် တားဆီးရန် လုံလောက်၏။

သူတို့အနက်မှတစ်ခုမှာ ဟန်ရှောင်း၏ ကိုယ်ပွားပါရှိသော ယန္တရားလက်ခံအိမ်ဖြစ်ပြီး လက်ရှိတွင် ဂြိုဟ်ကို သေချာစောင့်ကြည့်နေသည်။

သူ၏ယခင်ဘဝက ကြယ်ရောင်တောက်ပကမ္ဘာ ဖွင့်လှစ်ပြီးနောက် ဟန်ရှောင်းသည် ဤနေရာတွင် မစ်ရှင်များထမ်းဆောင်ရန် ရောက်လာခဲ့သည်။ ထိုအချိန်တွင် အင်ပါယာမှ ပြုပြင်မွမ်းမံပြီးနောက် ကွန်ဒီမိခင်ဂြိုဟ်သည် ၎င်း၏အသွင်အပြင်ကို လုံးလုံးလျားလျား ပြောင်းလဲသွားခဲ့သည်။

အင်ပါယာက ဝင်တိုက်သောကြောင့် ကွန်ဒီမိခင်ဂြိုဟ်ရှိ လူအများစုသည် အခြေခံအားဖြင့် ရွှေ့ပြောင်းသွားကြသော်လည်း ကွန်ဒီလူမျိုးများသည် သူတို့၏ မိခင်ဂြိုဟ်ကို မပေါက်ကွဲခဲ့ပေ။ ၎င်းတွင် အဆောက်အအုံများစွာ ကျန်ရစ်ခဲ့ပြီး နေရာအား ယာယီစီမံခန့်ခွဲရန် နောက်ဆုံးရေယာဉ်စုတစ်ခု ထားရှိခဲ့သည်။ ဤနေရာသည် ကွန်ဒီလူမျိုးများ၏ အဓိက ကွမ်တမ်ကွန်ရက် အမှတ်များထဲမှ တစ်ခုတည်ရှိရာ နေရာဖြစ်သည်။

"စလိုက်ကြစို့။"

ဟန်ရှောင်းသည် အကြောဆန့်လိုက်ပြီး အတွေးတစ်ခုဖြင့် ကွမ်တမ်ကွန်ရက်၏ အမြင်အာရုံထဲသို့ ဝင်ရောက်လာသည်။

သူ၏အမြင်အာရုံသည် အနက်ရောင်ပြောင်းသွားကာ ကွမ်တမ်ကွန်ရက်၏ ဆုံမှတ်များကိုကိုယ်စားပြုသော အလင်းအစုအဝေးများကိုသာ ချန်ထားခဲ့သည်။ သူတို့သည် တောက်ပမှု ကွဲပြားကြပြီး ကွန်ရက်ဖွဲ့စည်းပုံ ဖွဲ့စည်းရန် အချက်အလက် စီးဆင်းမှုကို ကိုယ်စားပြုသည့် သိမ်မွေ့သော အလင်းတန်းများဖြင့် အချင်းချင်း ချိတ်ဆက်ထားသည်။

ဟန်ရှောင်းသည် မိခင်ဂြိုဟ်၏ အဓိက ကွမ်တမ်ကွန်ရက် အမှတ်ပေါ်သို့ တိုက်ရိုက် လော့ခ်ချကာ ၎င်းဆီသို့ အလင်းတန်းတစ်ခုအဖြစ် ပြောင်းလဲပြီး ချဉ်းကပ်သွားသည်။ အမှတ်၏ ဖားယားဝေါ သည် ဒေတာအလွှာတစ်ခုကဲ့သို့ သူ့ရှေ့တွင် ပေါ်လာပြီး သူ၏အမြင်တွင် အားနည်းချက်များနှင့် ကွက်လပ်များ နေရာတိုင်းတွင် ရှိနေသည်။

သူသည် ကွန်ဒီလူမျိုးများကို မသိစေလိုသောကြောင့် ဖားယားဝေါ အတွင်းရှိ ဒေတာအပေါက်များမှတစ်ဆင့် အသာတိုးဝင်ကာ တိုက်ရိုက်ဟက်ခ်လုပ်မည့်အစား အနောက်ဖက်တံခါးကို ဖွင့်ရန် ဆုံးဖြတ်လိုက်သည်။

အခြားတစ်ဖက်၏ ကွမ်တမ်ကွန်ရက်ကျွမ်းကျင်မှုသည် အမှိုက်သာသာဖြစ်ပြီး သူတို့သတ်မှတ်ထားသော ခွင့်ပြုချက်အားလုံးသည် သူ၏ရှေ့တွင် မရှိသလိုပင်ဖြစ်နေသည်။ ပိုင်ရှင်မရှိသောအိမ်သို့ ရောက်လာသကဲ့သို့ဖြစ်သော်လည်း တံခါးအတွင်းမှ မည်သည့်အရာကိုမဆို ဖွင့်ရန် ကိရိယာများရှိသည်။ ခွင့်ပြုချက်တောင်းရန် မလိုပါ။ သူလုပ်ချင်တာကို လုပ်လို့ရ၏။

လျင်မြန်စွာပင် ကွန်ဒီ ၏ ဒေတာဘေ့စ်သည် ၎င်း၏ ကာကွယ်ရေးအားလုံးကို ဆုံးရှုံးသွားပြီး အသင့်စားသုံးရန် စောင့်ဆိုင်းနေသော အချိုပွဲကဲ့သို့ ဟန်ရှောင်းရှေ့တွင် အချက်အလက်အပိုင်းအစများ ပေါ်လာသည်။

"ဖီးလစ်၊ သူတို့ရဲ့ ဒေတာဘေ့စ်တွေကို ကူးယူပြီး ထုပ်ပိုးလိုက်ပါ။"

ဟန်ရှောင်း နှာမှုတ်လိုက်သည်။

သူ၏ ရည်မှန်းချက်မှာ သူတို့၏ မပြည့်စုံသော အချိန်-အာကာသ ပေါင်းစပ်ခြင်း နည်းပညာသာဖြစ်သော်လည်း သူ ထိုနေရာတွင် ရှိနေသောကြောင့် အရာအားလုံးကို ယူဆောင်သွားနိုင်သည်။

ဖီးလစ်သည် အလုပ်စလုပ်သော်လည်း ဒေတာအစုအဝေးတစ်ခုလုံးကို ကူးယူရန် အချိန်အနည်းငယ်ကြာသည်။ ဤကာလကို အခွင့်ကောင်းယူ၍ ဟန်ရှောင်းသည် ဤ အမှတ်နှင့် ချိတ်ဆက်ထားသော အရာဝတ္ထုအားလုံးကို ရိုးရိုးရှင်းရှင်း စစ်ဆေးလိုက်သည်။

ပြောင်းပြန်ခြေရာခံခြင်းမှတဆင့် ကွန်ဒီလူမျိုးများရှိ ရေယာဉ်စုများ၏ တည်နေရာကို ရှာဖွေနိုင်မည်ဖြစ်သည်။

"ကွန်ဒီလူမျိုးတွေရဲ့ တပ်တွေ ဘယ်မှာရှိလဲ ကြည့်ရအောင်..."

ကြယ်မြေပုံပေါ်ရှိ သြဒိနိတ်များ၏ အချက်အလက်များကို ကြည့်ရှုရင်း ဟန်ရှောင်း၏ မျက်လုံးများ တောက်ပလာပြီး စိတ်ဝင်စားစရာကောင်းသော အချက်အလက်အချို့ကို တွေ့ရှိသွားသည်။

ကွန်ဒီ၏ ရေယာဉ်စုကို အုပ်စုလေးခုအဖြစ် ခွဲခြားထားသည်ကို သူတွေ့ခဲ့သည်။ သူတို့အထဲတွင် တပ်မှူးများပါဝင်သော အဓိက ရေယာဉ်စုသည် ပိုင်နက်အတွင်း ပုန်းအောင်းနေပြီး ဒုတိယတစ်ခုမှာ ရှေ့တန်းရှိ အင်ပါယာ၏ ရှေ့တန်းတိုက်ခိုက်ရေးတပ်များကို ကြားဖြတ်တားဆီးရန် ထွက်ခွာသွားသည်။ တတိယတွင် ရွှေ့ပြောင်းလာသော အရပ်သားများကို သယ်ဆောင်သည့် ရေယာဉ်စုများ ပါ၀င်ပြီး ကွန်ဒီလူမျိုးများ၏ ပိုင်နက်မှ ဝေးကွာနေပြီဖြစ်သည်။

သို့သော် ဟန်ရှောင်း၏ အာရုံကို ဆွဲဆောင်နိုင်သည်က စတုတ္ထမြောက် ရေယာဉ်စုပင်။ သူတို့သည် သူတို့၏ နယ်မြေနယ်နိမိတ်သို့ ချဉ်းကပ်ကာ မရေမတွက်နိုင်သော အဖွဲ့များအဖြစ် ခွဲထွက်သွားကြသည်။ သူတို့သည် ဝိုင်းရံမှုတစ်ခု လုပ်လိုသည့်ပုံပေါ်သော်လည်း ထိုသို့သောအကွာအဝေးက လက်တွေ့မကျပေ။ ထို့ကြောင့် သူတို့သည် အခြားသော အထူးမစ်ရှင်များကို ထမ်းဆောင်နေခြင်း ဖြစ်နိုင်သည်။

သူ၏ လက်ရှိအသိပညာအပေါ် အခြေခံလျှင် ဟန်ရှောင်း စဉ်းစားရခက်မနေပေ။ အယူအဆတစ်ခု မြန်မြန်ဆန်ဆန် ထွက်လာ၏။

"ဖြစ်နိုင်ချေ သုံးခုရှိတယ်... တစ်ခုက လွတ်မြောက်ဖို့၊ နောက်တစ်ခုက ရွှေ့ပြောင်းမှုကို ဖုံးအုပ်ထားဖို့၊ နောက်ဆုံးတစ်ခုကတော့ အထူးအစီအစဉ်တွေ လုပ်ဖို့ပဲ။ လွတ်မြောက်မှုကို ဖယ်လိုက်လို့ရတယ်၊ ရွှေ့ပြောင်းတာက ဆန့်ကျင်ဘက်မှာ ဖြစ်ပျက်နေတာ၊ လမ်းမှာမဟုတ်ဘူး။ ဒါဆိုရင်၊ အထူးအစီအစဉ်တွေပဲ ရှိတယ်။ အထူးအစီအစဉ်တွေက ဘယ်လိုလဲဆိုတော့..."

ဟန်ရှောင်း မျက်လုံးမှေးလိုက်သည်။ သူ၏ အသိပညာအရ ဖြစ်နိုင်ခြေအများဆုံးအခြေအနေမှာ သူတို့သည် နယ်စပ်တွင် ရှေးဦး ဆိုင်ရွန်းနစ်စွမ်းအင်များကို အမြောက်အမြား မြှုပ်နှံထားကြသည်။ ထိုစွမ်းအင်များ ပျံ့နှံ့လာစေရန် လှုံ့ဆော်ခြင်းဖြင့် ပတ်ဝန်းကျင်ရှိ ကြယ်များနှင့် ဂြိုဟ်အားလုံးကို ဝါးမြိုဖျက်ဆီးပစ်ရန် ရည်ရွယ်ထားခြင်းဖြစ်သည်။ ဤသို့ပြုလုပ်ခြင်းဖြင့် အင်ပါယာအနေနှင့် မည်သည့်အရင်းအမြစ်ကိုမျှ ရရှိနိုင်တော့မည် မဟုတ်ပေ။

ဒါက မျက်ကန်းခန့်မှန်းချက်မဟုတ်ပေ၊ ထိုသို့သော ဥပမာ များစွာရှိ၏။ ထိုသို့သော လူသူကင်းမဲ့သည့် စကြာဝဠာ ခါးပတ်များစွာသည် အမှန်တကယ် လူကြောင့်ဖြစ်ပြီး ရှေးဦး ဆိုင်ရွန်းနစ်စွမ်းအင်၏ ဓာတ်ကူမှုကြောင့် ဖြစ်သည်။

"ကွန်ဒီက သူတို့ရဲ့ မွေးရပ်မြေကို သတ်ဖြတ်တဲ့ ထောင်ချောက်အဖြစ် ပြောင်းလဲပြီး အင်ပါယာကို သတ်ဖို့ သွေးဆောင်ချင်နေတယ်။ ဟီး၊ အရမ်းရက်စက်တယ်။ မပြေးခင် အင်ပါယာကနေ တစ်ကိုက်လောက် ကိုင်ချင်နေကြတယ်။" ဟန်ရှောင်းက ခေါင်းယမ်းလိုက်သည်။

ရှေးဦး ဆိုင်ရွန်းနစ်စွမ်းအင်နှင့် အဆက်အစပ်မရှိသော လူမှုအဖွဲ့အစည်းများသာ ထိုကဲ့သို့သောအရာကို လုပ်ကိုင်ရဲမည်ဖြစ်သည်။ သဘာဝ အာကာသခန္ဓာကိုယ်တစ်ခု ဖွဲ့စည်းခြင်းသည် နှစ်ဘီလီယံနှင့်ချီ၍ ကြာမြင့်ပြီး ဖြစ်နိုင်ခြေသည် ကျပန်းဖြစ်သည်။ သို့သော် ရှေးဦး ဆိုင်ရွန်းနစ်စွမ်းအင်သည် ၎င်းဖြတ်သန်းသွားသမျှအရာအားလုံးကို ဝါးမျိုသွားမည်ဖြစ်ပြီး၊ ထိုဧရိယာကို လေဟာနယ်ဇုန်အဖြစ်သို့ ပြောင်းလဲကာ မြုံသွားစေပြီး အရင်းအမြစ်များ ကင်းမဲ့သွားစေမည်ဖြစ်သည်။

ထို့အပြင် ညစ်ညမ်းမှုကို မထိန်းချုပ်ပါက ၎င်းသည် အကန့်အသတ်မရှိ ကျယ်ပြန့်လာမည်ဖြစ်သည်။ ကျယ်ပြောလာသည်နှင့်အမျှ ဝါးမြိုသွားသော ဧရိယာသည် ပိုမိုမြန်ဆန်လာမည်ဖြစ်ပြီး ထိုအချိန်တွင် ကမ္ဘာပျက်မည့်အချိန် ရောက်လာသကဲ့သို့ ဖြစ်သွားနိုင်သည်။

သူ၏ယခင်ဘဝက အင်ပါယာက ကွန်ဒီလူမျိုးများကို မည်သို့ဆက်ဆံကြောင်း အသေးစိတ်အချက်အလက်များ မရှိပေ။ ဟန်ရှောင်းသည် မြေလှန်စနစ် အစီအစဉ်ကို ကျင့်သုံးခဲ့ခြင်းရှိမရှိ မသိသော်လည်း ဖုန်အလင်း ကြယ်စုတန်းရှိ အာကာသခန္ဓာကိုယ်များကို ကောင်းမွန်စွာ ထိန်းသိမ်းထားခြင်းကြောင့် အကောင်အထည်ဖော်မည်ဆိုပါက အင်ပါယာက ၎င်းကို ရပ်တန့်စေခဲ့ခြင်း ဖြစ်လိမ့်မည်။

(TN: celestial body = အာကာသခန္ဓာကိုယ် ဆိုတာ အာကာသထဲမှာရှိတဲ့ နေ၊ လ၊ ကြယ်၊ ဂြိုလ် စတာတွေကို ခေါ်တာပါ။)

စဉ်းစားရင်း ဟန်ရှောင်းသည် အင်ပါယာထံသို့ ဤအချက်အလက်များပေးပို့ရန် ပြင်ဆင်လိုက်သည်။

သူ၏ မစ်ရှင်အဆင့်သတ်မှတ်ချက်ကို သေချာပေါက် မြှင့်တင်ပေးလိမ့်မည်။

"ရှေးဦး ဆိုင်ရွန်းနစ်စွမ်းအင် ဟာ ကြောက်စရာကောင်းနိုင်ပေမယ့် အတိုင်းအတာတစ်ခုအထိ ချဲ့ထွင်ဖို့ လုပ်ထုံးလုပ်နည်းတစ်ခု လိုအပ်တယ်။ ဒါကြောင့် အင်ပါယာမှာ ဒီပြဿနာကို ဖြေရှင်းဖို့ အချိန်အလုံအလောက်ရှိတယ်။"

ဟန်ရှောင်းသည် တိတ်တဆိတ် ခေါင်းညိတ်လိုက်ပြီး သူစိတ်က ပြေလျော့သွားသည်။

မူလက သူသည် အချိန်-အာကာသ ပေါင်းစပ်ခြင်း နည်းပညာကို ကူးယူရန် ရည်ရွယ်ခဲ့သည်။ မထင်မှတ်ထားတဲ့ ရိတ်သိမ်းမှုမျိုး ရလာလိမ့်မယ်လို့ သူ မမျှော်လင့်ထားပေ။

ခဏအကြာတွင် ဖီးလစ်က ဒေတာများကို လုံးဝကူးယူပြီးသောအခါ ဟန်ရှောင်းသည် နောက်တံခါးအစီအစဉ်မှ ထွက်ခွာပြီး သူ၏လာရောက်လည်ပတ်မှု အရာအားလုံးကို ရှင်းလင်းလိုက်သည်။ ထို့နောက် ယန္တရားယူနစ်ကို ပြန်သွားရန် အမိန့်ပေးကာ ကွမ်တမ်ကွန်ရက် အမြင်အာရုံကို ရုတ်သိမ်းလိုက်သည်။

ကွန်ဒီမိခင်ဂြိုဟ်သည် ယန္တရားလက်ခံအိမ်၏ အမြင်တွင် ပျောက်ကွယ်သွား၏။ အစမှအဆုံးထိ၊ သူ့လာလည်တာက ဘယ်သူ့ကိုမှ မသိသွားစေပေ၊ ကျွမ်းကျင်သူခိုးတစ်ယောက်လိုပင်။

အဆင့် အေ အထက် အန္တိမ ယန္တရားပညာရှင်၏ အထွတ်အထိပ်သည် အချက်အလက်ခိုးယူခြင်းတွင် ပြိုင်ဖက်ကင်းပြီး စကြဝဠာ လူမှုအဖွဲ့အစည်းသုံးခုအတွက်ပင် ကြောက်စရာကောင်းသော တည်ရှိမှုတစ်ခုဖြစ်သည်။

...

ဤအချိန်တွင် သူတို့၏အိမ်သည် ဖောက်ထွင်းခံခဲ့ရသော်လည်း ကွန်ဒီအထက်တန်းလွှာများက ၎င်းနှင့်ပတ်သက်၍ မည်သည့်အရာကိုမျှ မသိကြဘဲ အစည်းအဝေးတစ်ခုတွင် ရှိနေဆဲဖြစ်သည်။

၎င်းသည် စူပါများနှင့် ဆက်စပ်နေသည်။

အခန်းထဲတွင် ကွန်ဒီခေါင်းဆောင်က လူတိုင်းကို လေးနက်သောအသံဖြင့် ပြောနေရင်း လှမ်းကြည့်လိုက်သည်။ "ရန်သူ့ စူပါနည်းပညာဟာ သူတို့ရဲ့ စစ်သည်တွေကို အစွမ်းထက်တဲ့ တစ်ဦးချင်း တိုက်ခိုက်ရေးစွမ်းအားတွေ ပေးထားတယ်။ ငါတို့ရဲ့ အာကာသယာဉ်တွေရဲ့ အချက်အလက်တွေအရ သူတို့ရဲ့နည်းပညာဟာ တစ်ဦးချင်းစီအတွက် ကိုယ်တိုင်လေ့ကျင့်ဖို့ နည်းလမ်းတစ်ခုဖြစ်တယ်။ ဒီနည်းနဲ့ လူတစ်ယောက်ဟာ အစွမ်းထက်လာနိုင်တယ်။ ဂြိုဟ်တစ်လုံးကို ဖျက်ဆီးပစ်နိုင်တဲ့ စွမ်းအားတွေ ရှိတယ်။ ငါတို့ရဲ့ စစ်သည်တွေက ဂုဏ်ယူရပေမယ့် ဒီလို စူပါတွေရဲ့ရှေ့မှာ သူတို့က ဘာမှမဟုတ်ဘူး။"

လူတိုင်းက စိတ်လေးသော အမူအရာဖြစ်နေသည်။ စူပါစနစ်သည် ရှာဖွေတွေ့ရှိရန် ကံကြမ္မာလိုအပ်သော နည်းပညာတစ်မျိုးဖြစ်ပြီး ကွန်ဒီလူမျိုးများသည် ဟန်ရှောင်းကဲ့သို့ပင် ကံတရားနတ်ဘုရားမ၏ အမည်ပျက်စာရင်းတွင် ရှိနေသည်မှာ ထင်ရှား၏။

နောက်ကွယ်ရှိ စူပါကြယ်စုတန်း လူမှုအဖွဲ့အစည်းသည် စူပါများတည်ရှိမှုကို ဖော်ပြခဲ့သော်လည်း စူပါများထုတ်လုပ်ရန် နည်းလမ်းများကို ကွန်ဒီလူမျိုးများထံ မပေးခဲ့ပေ။ ထို့ကြောင့် သူတို့တွင် စူပါစနစ်မရှိပါ။

"စူပါတွေ၊ ဒါက ကျွန်တော်တို့ အရမ်းလိုအပ်နေတဲ့အရာပဲ" ကွန်ဒီခေါင်းဆောင်က ဖြည်းညှင်းစွာ ပြန်ဖြေပါတယ်။ "လူတိုင်း၊ ငါတို့ ဘိုးဘွားပိုင်မြေကို စွန့်ခွာဖို့ ဆုံးဖြတ်ပြီးကတည်းက ငါတို့ရဲ့ ရန်သူတွေဆီက ဒီနည်းပညာကို ရနိုင်ရင် အဲဒါက ငါတို့ရဲ့ လူမှုအဖွဲ့အစည်းကို ပြန်လည်တည်ဆောက်ရာမှာ အထောက်အကူဖြစ်စေလိမ့်မယ်။"

"မင်းဆိုလိုတာက..."

"စမ်းသပ်ပစ္စည်းတစ်ခုအနေနဲ့ ရှေ့တန်း စူပါတချို့ကို ဖမ်းယူဖို့ နည်းလမ်းရှာချင်တယ်။ သူတို့ရဲ့ ခန္ဓာကိုယ်တွေကို ငါရနိုင်သရွေ့ ငါတို့စနစ်ရဲ့ လျှို့ဝှက်ဆန်းကြယ်မှုတွေနဲ့အတူ နိယာမတွေကို လေ့လာနိုင်လိမ့်မယ်။"

"အဲဒီအခြေအနေမှာ ရှေ့တန်းတပ်တွေရဲ့ တိုက်ခိုက်ရေးမူတွေကို ချိန်ညှိဖို့ လိုလိမ့်မယ်။"

အားလုံး စိတ်ပါလက်ပါနဲ့ အကြံအစည်ကို ဆွေးနွေးလာကြတယ်။

ခွန်အားနှင့် အခွင့်အာဏာများကို ဆုပ်ကိုင်ထားသော အထက်တန်းလွှာလူများဖြစ်သည့်အချက်ကို အသာထား၊ သူတို့အားလုံးသည် သန်မာသော ကိုယ်ပိုင်အင်အားနှင့် အသက်ရှည်ရန် အလိုရှိကြသည်။ အခွင့်အာဏာသည် ခွန်အားမှ အမြဲတမ်း ရယူသည်။

သူတို့သည် စူပါများကို တပ်မက်ကြပြီး ယခုအခါတွင် သူတို့သည် မြေလှန်စနစ်နည်းဗျူဟာဖြင့် အင်ပါယာကို ဖျက်ဆီးရန် စီစဉ်ရုံသာမက အင်ပါယာထံမှ သူတို့မပိုင်ဆိုင်ထားသော နည်းပညာသစ်ကိုပါ ရယူလိုကြသည်။

...

ရက်အနည်းငယ်အကြာ၊ ကွန်ဒီအမျိုးသားနယ်စပ်တွင် စူးစမ်းထောက်လှမ်းရေးတပ်ဖွဲ့များ၏ အစိတ်အပိုင်းတစ်ခုသည် လျှို့ဝှက်ချီတက်လာကြသည်။

ဤတပ်ဖွဲ့တွင် စစ်သင်္ဘော အစီးနှစ်ဆယ်ကျော်ရှိပြီး အများစုမှာ ဘလက်စတား စစ်တပ်မှ သင်္ဘောများဖြစ်သည်။ သူတို့တွင် တိုက်ခိုက်ရေးအဖွဲ့ငယ်များ ပါဝင်ပြီး နီရိုသာမက မီယာနှင့် အခြားဘွဲ့ရတစ်စုလုံးလည်း ရှိနေကြသည်။

သူတို့သည် ကွန်ဒီနယ်မြေအတွင်း ရက်အတော်ကြာရောက်နေပြီဖြစ်သော်လည်း လမ်းတစ်လျှောက်တွင် နိုးနိုးကြားကြားရှိနေကြပြီး တွေ့ဆုံမှုများကို တုံ့ပြန်ရန်အသင့်ရှိကြသည်။ သို့သော် လမ်းတလျှောက်မှာ ရန်သူတစ်ယောက်မှ မတွေ့ခဲ့ရပေ။

စစ်သင်္ဘောတစ်စင်း၏ အခန်းငယ်တွင် စစ်တပ်မှ စစ်သည်များ အများအပြားသည် ကြယ်မြေပုံတစ်ဝိုက်တွင် စုရုံးကာ သူတို့၏ လက်ရှိအခြေအနေကို ဆွေးနွေးခဲ့ကြသည်။ နီရိုသည် မေးစေ့ကို ပွတ်သပ်လိုက်ပြီး သံသယကို မပြောဘဲမနေနိုင်ပေ။

"ဒါက ထူးဆန်းတယ်။ ငါတို့ မရောက်သေးတဲ့အချိန်မှာ နေ့စဉ်ကြားဖြတ်မယ့် ရန်သူတွေကို တွေ့ခဲ့ရတယ်။ ဒါပေမယ့် အခု ငါတို့ သူတို့ပိုင်နက်ထဲကို ဝင်လာပြီဆိုတော့ ဘာလို့ ငါတို့ကို ကန့်သတ်မယ့်သူ မရှိတာလဲ"

ဒါကိုကြားတော့ အားလုံးက သူ့ကိုလှည့်ကြည့်ပေမယ့် စကားမပြောဘူး။

မလှမ်းမကမ်းတွင် မီယာက လက်ပိုက်ရပ်နေသည်။ သူမသည် မျက်ခုံးပင့်ကာ "ရန်သူက အင်ပါယာကို မတားဆီးနိုင်ဘူးလို့ ထင်ပြီး အားလုံး ဆုတ်ခွာသွားတာ ဖြစ်နိုင်တယ်။"

"အဲဒီလောက် မရိုးရှင်းဘူးထင်တယ်" နီရို ခေါင်းယမ်းလိုက်သည်။

ယခုတစ်ကြိမ်၊ နီရိုနှင့် မီယာ၏အဖွဲ့သည် တူညီသောစစ်သင်္ဘောပေါ်တွင် ရှိနေကြပြီး သူတို့နှင့်အတူ အခြားတိုက်ခိုက်ရေးအဖွဲ့များစွာ ပါရှိသည်။

စစ်ပွဲ၏ နှစ်ခြင်းကို ကြုံတွေ့ရပြီးနောက် နီရို၏ တကယ့်တိုက်ခိုက်ရေးစွမ်းရည် တိုးတက်လာသော်လည်း သူ၏ ပင်ကိုယ်အကျင့်စရိုက်မှာ များစွာပြောင်းလဲခြင်းမရှိပေ။ နောက်ဆုံးတော့ သူ့မှာ ကလေးမျက်နှာရှိသေးပြီး ဘယ်လောက်ပဲ ကြမ်းတမ်းနေပါစေ သူ့ကို ပိုချစ်စရာကောင်းအောင် လုပ်ထား၏။

အခြားတစ်ဖက်တွင်၊ တိုက်ပွဲတွင် သူမ၏ခွန်အားကို အတည်ပြုခြင်းဖြင့် မီယာသည် ပိုမိုယုံကြည်မှုရလာသည်။

ဟုန်

ဤအချိန်တွင်၊ ရေယာဉ်စုသည် ကြိုတင်သတ်မှတ်ထားသော ပစ်မှတ်တည်နေရာသို့ ရောက်ရှိလာပြီး ဟိုက်ပါဒရိုက်မှ ထွက်ခွာသွားသည်။

ပြတင်းပေါက်အပြင်ဘက်တွင် ကွန်ဒီကိုလိုနီဂြိုဟ်ဟု သံသယရှိသည့် သူတို့၏ စူးစမ်းရှာဖွေမှုပစ်မှတ်ဖြစ်သော ဂြိုဟ်တစ်ခုဖြစ်သည်။

ဂြိုဟ်၏မျက်နှာပြင်ပေါ်တွင် မြို့များ၏ခြေရာများရှိနေသည်ကို သူတို့ရှင်းလင်းစွာမြင်နိုင်သည်။

ဒါကိုမြင်တော့ လူတိုင်းရဲ့အမူအရာ တင်းမာသွားတယ်။

"ငါတို့ နေရာမှန်ကို ရှာတွေ့ပုံရတယ်။ အားလုံးပဲ အာရုံစိုက်ထားကြ။"

စာစဉ် (၅၇)၊ အခန်း (၉၇၃) ပြီးပါပြီ။

လင်းဆက်

+++++

အခန်း (၉၇၄) ရှင်းလင်းစွာ စီစဉ်ခြင်း

ရေယာဉ်စုသည် ချက်ချင်းချဉ်းကပ်ခြင်းမရှိဘဲ ၎င်း၏ ကိုယ်ပျောက်မုဒ်ကို ထိန်းသိမ်းထားသည်။ ယင်းအစား ဂြိုဟ်၏လေထုဆီသို့ ဖြည်းညှင်းစွာချဉ်းကပ်ရန် အာကာသအခြေပြု အသေးစား စူးစမ်းရှာဖွေရေးဂြိုလ်တုကို လွှတ်တင်ခဲ့ပြီး မျက်နှာပြင်ကို အဆက်မပြတ် စကင်ဖတ်လိုက်သည်။

အခန်းအတွင်းရှိ ပုံရိပ်ယောင်မျက်နှာပြင်သည် ဂြိုလ်တုစကင်ဖတ်စစ်ဆေးခြင်း၏ ပုံရိပ်ကို ပြသထားသည်။ မျက်နှာပြင်ပေါ်တွင် မြို့ရွာများစွာရှိသော်လည်း အများစုမှာ လူသူကင်းမဲ့နေပါသည်။ နိုင်ငံသားများ ကမန်းကတန်း ဘေးလွတ်ရာသို့ ရွှေ့ပြောင်းလာသဖြင့် လမ်းများပေါ်တွင် အမှိုက်များ ပုံနေသည်။

"ကိုလိုနီဂြိုဟ်ဟာ စွန့်ပစ်ခံထားရပုံရတယ်။" နီရိုသည် လူနေထိုင်ခြင်းမရှိသောမြို့များကို အဆက်မပြတ်စကင်ဖတ်ကာ သူ၏လက်ချောင်းကို ပုံရိပ်ယောင်မျက်နှာပြင်ပေါ်တွင် ပွတ်ဆွဲလိုက်သည်။

"အသက်ဓာတ် အချက်ပြမှုတွေကို စစ်ဆေးကြည့်ပါ" ၎င်း၏တပ်မှူးက တိုက်တွန်းသည်။

နီရိုက ခေါင်းညိတ်ပြီး ဂြိုလ်တု၏ ထိန်းချုပ်မှုမျက်နှာပြင်သို့ ပြောင်းကာ ဆက်တင်ချိန်လိုက်သည်။ ဤဂြိုလ်တုသည် ဘလက်စတား စစ်တပ်၏ ထုတ်ကုန်တစ်ခုဖြစ်ပြီး သူထုတ်လုပ်ထားခြင်းမဟုတ်သော်လည်း ၎င်းကိုလည်ပတ်ရန်မှာ ရိုးရှင်းသည်။

ဤစူးစမ်းထောက်လှမ်းရေးတပ်ဖွဲ့တွင် စစ်သားနှစ်ထောင်ခန့်ရှိပြီး သူတို့ထဲမှအများစုမှာ အဆင့် စီ စူပါများဖြစ်သည်။ သူတို့၏ ခေါင်းဆောင်တစ်ဦးတည်းသာ အဆင့် ဘီ ဖြစ်သည်။ နီရိုသည် တပ်မှူးမှလွဲ၍ ထိုနေရာတွင် အသန်မာဆုံးဖြစ်ပြီး ဤတပ်ဖွဲ့အတွင်း အကောင်းဆုံး ယန္တရားပညာရှင်ဖြစ်သည်။ ထို့ကြောင့် စက်ပိုင်းဆိုင်ရာ ကိရိယာများအားလုံးနီးပါးကို သူကိုင်တွယ်ဖြေရှင်းရန် ပေးထားသည်။

ရလဒ်များ အလွန်လျင်မြန်စွာ မျက်နှာပြင်ပေါ်တွင် ပြသလာသည်။ မျက်နှာပြင်ပေါ်ရှိ အသက်ဓာတ်ကို အချက်ပြသည့် အလင်းတန်းများသည် အများစုမှာ တောတောင်များထဲတွင် စုပြုံနေသည်။ သားရဲများ ဖြစ်နိုင်သည်။ မြို့ထဲတွင်၊ ဉာဏ်ရည်ဉာဏ်သွေးရှိသော အသက်ဓာတ်တည်ရှိမှုကို အချက်ပြသည့် အလင်းတန်းအနည်းငယ်မျှသာ ရှိသည်။

မီယာ မျက်လုံးများ တောက်ပလာသည်။ "မြို့ထဲမှာ လူတွေရှိသေးတယ်"

"သူတို့က ဘေးလွတ်ရာကို မရွှေ့ပြောင်းချင်တဲ့ အရပ်သားတွေ ဖြစ်လိမ့်မယ်။" နီရိုက သက်ပြင်းတစ်ချက်ချလိုက်သည်။ ဤခရီးစဉ်အတွက် သူတို့၏ မစ်ရှင်မှာ စစ်ဆေးမေးမြန်းရန် ကွန်ဒီ အရပ်သားများကို တတ်နိုင်သမျှ ဖမ်းဆီးရန်ဖြစ်သည်။

"ကောင်လေး၊ ဒီဂြိုဟ်ရဲ့ လက်နက်ကိုင်တပ်ဖွဲ့တွေကို စစ်ဆေးပါ။ ဘာပြဿနာမှမရှိရင် ငါတို့ ဆင်းသက်နိုင်တယ်" တပ်မှူးက အမိန့်ပေးသည်။

နီရိုက ခေါင်းညိတ်ပြီး စကင်ကို စတင်လိုက်သည်။

လူတိုင်းက မျက်နှာပြင်ကို စိုက်ကြည့်နေကြပြီး ရလဒ်ကို စောင့်မျှော်နေကြသည်။ ထိုအချိန်တွင် သူတို့အားလုံး မမြင်နိုင်သည့် ကွမ်တမ်ကွန်ရက်ထဲမှာ ချုံခိုစောင့်ဆိုင်းနေသော ဒေတာအတွဲလိုက်က ဂြိုလ်တု၏ အချက်အလက်စီးဆင်းမှုကို တိတ်တဆိတ် ကြားဖြတ်ပြီး နှောင့်ယှက်လိုက်သည်။ ထို့နောက် ထောက်လှမ်းရေး အချက်အလက်ကို သင်္ဘောပေါ်ရှိ လူတိုင်းထံ ပေးပို့လိုက်သည်။

"အင်း... အနီးနားမှာ ရန်သူ့သင်္ဘောတွေ မရှိဘူး၊ မျက်နှာပြင်ပေါ်ရှိ စစ်စခန်းတွေကနေ ပုံမှန်မဟုတ်တဲ့ တုံ့ပြန်မှုမျိုး မရှိပါဘူး။ ရန်သူက ဒီကိုလိုနီဂြိုဟ်ကို လုံးလုံးလျားလျား စွန့်လွှတ်လိုက်ပုံပေါ်ပြီး သူတို့တပ်တွေတောင် မနေတော့ဘူး" နီရိုက ရလဒ်တွေကို ဖတ်ပြသည်။

သူတို့ခေါင်းဆောင်က ပြုံးလိုက်၏။ "ဒါဆို ဒါက လွယ်လိမ့်မယ်။ တပ်မှူးက အမိန့်ပေးတယ်။ ငါတို့ ဆင်းရမယ်။"

ရေယာဉ်စုသည် လျင်မြန်စွာ အလုပ်စလိုက်ပြီး စစ်သင်္ဘောအများစုသည် လေထုထဲသို့ ဝင်ရောက်ကာ မြို့ဆီသို့ စတင်ဆင်းသက်လာကြသည်။ အာကာသပြင်ပတွင် တုံ့ပြန်မှုအင်အားစုအဖြစ် ဆောင်ရွက်ရန် တပ်မှူး၏စစ်သင်္ဘောနှင့် အခြားအာကာသယာဉ်သုံးစင်းသာ ကျန်ရှိတော့သည်။

တစ်ချိန်တည်းမှာပင်၊ ကိုလိုနီနယ်မြေဂြိုဟ်၏အထက်ရှိ မျောလွင့်စစ်အခြေစိုက်စခန်းတစ်ခုတွင် အသင့်ရှိနေသော ကွန်ဒီလူမျိုးများ၏ အလတ်စားရေယာဉ်စုတစ်ခုရှိသည်။ အခြေစိုက်စခန်းအတွင်း အာကာသယာဉ် အစီးတစ်ရာကျော်ရှိပြီး ၎င်း၏ အချက်ပြတန်ပြန်မှုကို ဖွင့်ထားကာ ဖုံးကွယ်ထားဆဲဖြစ်သည်။ ၎င်းသည် ၎င်း၏ပတ်ဝန်းကျင်နှင့် ရောနှောကာ ဖောက်ထွင်းမြင်နေရသည်။

မျောလွင့်စစ်အခြေစိုက်စခန်း၏ ပင်မထိန်းချုပ်ခန်းတွင် အော်ပရေတာအများအပြား အလုပ်များနေကြသည်။ ရေဒါကို စောင့်ကြည့်နေသော အော်ပရေတာများထဲမှ တစ်ဦးသည် လေထု၏ ပုံမှန်မဟုတ်သော အတက်အကျများ၏ အချက်ပြမှုကို ရုတ်တရက်တွေ့လိုက်ရသော်လည်း အနီးကပ်ကြည့်လိုက်သောအခါ အချက်ပြပျောက်သွားသည်။

"ငါ မှားသွားတာလား။" ကွန်ဒီ အော်ပရေတာသည် အံ့အားသင့်သွားပြီး အခြားစကင်ဖတ်ရန် ရေဒါကို အသက်သွင်းလိုက်သည်။

ရှာဖွေတွေ့ရှိမှုရလဒ်များက လေထုနဂိုအတိုင်းဖြစ်ရုံသာမက ရဲရဲဝံ့ဝံ့ ဆင်းသက်လာသည့် နီရို၏အဖွဲ့ကိုပင် ထောက်လှမ်းမတွေ့ကြောင်း ပြသနေသည်။

"မှားပြီး အချက်ပြတာ ဖြစ်မှာပါ။" ဒါကိုမြင်တော့ အော်ပရေတာက လှည့်ထွက်သွားတယ်။

ကင်းထောက်အဖွဲ့သည် စစ်အခြေစိုက်စခန်းကို ရှာမတွေ့ခဲ့သလို စစ်စခန်းမှ ဝန်ထမ်းများကလည်း ကင်းထောက်များကို ရှာမတွေ့ခဲ့ပေ။ နှစ်ယောက်စလုံးက နီးကပ်နေသော်လည်း မျက်ကန်းဖြစ်နေပြီး တစ်ဖက်ကိုတစ်ဖက် မမြင်နိုင်ကြပေ။

ထိုသို့ဖြစ်ရန် ပြုလုပ်သူမှာ ကင်းထောက်တပ်ဖွဲ့၏ ယန္တရားယူနစ်အတွင်း ပုန်းအောင်းနေသည့် ဟန်ရှောင်းဖြစ်သည်။ သူသည် ပါတီနှစ်ခုစလုံး၏ စကင်န်ရလဒ်များကို ပြုပြင်ရန် ပုံရိပ်ယောင်နည်းပညာကို တိုက်ရိုက်အသုံးပြုနေသည်။

ဤမြင်ကွင်းသည် ဟန်ရှောင်း၏ ဇာတ်ညွှန်းအတိုင်း လုံးဝသွားနေ၏။

...

မကြာမီပင် စူးစမ်းထောက်လှမ်းရေးတပ်ဖွဲ့၏ အာကာသယာဉ်များသည် မြို့တွင်း၌ ဆင်းသက်လာကြသည်။ တိုက်ခိုက်ရေးအဖွဲ့ အသီးသီးသည် သူတို့၏ လက်နက်ကိရိယာများကို တပ်ဆင်ကာ အာကာသယာဉ်ပေါ်မှ အဆက်မပြတ်ဆင်းကာ လူသူကင်းမဲ့သော လမ်းများပေါ်သို့ တက်ရောက်လာကြသည်။

"လာ၊ ငါတို့ရဲ့ သက်ဆိုင်ရာ မစ်ရှင်တွေကို တာဝန်ခွဲရအောင်။"

တပ်မှူးများအားလုံးသည် အုပ်စုသုံးစုမခွဲမီ အတိုချုံးအစည်းအဝေး လုပ်ကြသည်။ တစ်ဖွဲ့သည် သူတို့၏ အာကာသယာဉ်များတွင် မတော်တဆမှုတစ်စုံတစ်ရာမဖြစ်ပွားစေရန် နောက်ကွယ်တွင် ကျန်ရစ်မည်ဖြစ်ပြီး ဒုတိယအဖွဲ့သည် အရပ်သားများကို ဖမ်းဆီးရေးဆောင်ရွက်မည်ဖြစ်ကာ နောက်ဆုံးတွင် စစ်ဘက်အခြေစိုက်စခန်းများနှင့် စွမ်းအင်စက်ရုံများကဲ့သို့သော အထူးအဆောက်အအုံများကို ရှာဖွေရန် တာဝန်ယူမည်ဖြစ်သည်။

အဖွဲ့တစ်ဖွဲ့စီကို သူတို့၏ မစ်ရှင်အဖြစ် သတ်မှတ်ပေးပြီးနောက် သူတို့သည် သီးခြားစီရွှေ့ရန် အဖွဲ့ငယ်များအဖြစ် လူစုခွဲကြသည်။ နီရိုနှင့် မီယာ၏အဖွဲ့များသည် ဆင်ခြေဖုံးရပ်ကွက်ရှိ စွန့်ပစ်ထားသော စစ်စခန်းအား စူးစမ်းရှာဖွေရန် တာဝန်ရှိသည်။ သူတို့သည် ခရီးစဉ်သို့ မြေပြင်ယာဉ်တစ်စီးဖြင့် အတူသွားကြသည်။

ယာဉ်အတွင်းတွင် တိုက်ခိုက်ရေးအဖွဲ့များက ငြိမ်သက်နေခဲ့သည်။ နီရိုသည် ပတ်ပတ်လည်ကို ငေးကြည့်ကာ အဆင်မပြေစွာ ချောင်းဟန့်လိုက်ပြီးနောက် မတ်တတ်ထရပ်ကာ မီယာ၏ဘေးသို့ ရွှေ့လိုက်သည်။

အေးတိအေးစက်ဖြင့် သူမ၏ဓားကို ပွတ်တိုက်နေသော မီယာသည် သူ့ကို စိုက်ကြည့်လိုက်ပြီး သူ့လက်နက်ကို ဆက်လက်အရောင်တင်ရန် ခေါင်းပြန်ငုံ့သွားသည်။ သူမ၏လေသံက ပေါ့ပေါ့ပါးပါးဖြင့် "နင်ဘာလို့ဒီမှာထိုင်နေတာလဲ"

"မင်းနဲ့ စကားပြောဖို့လေ။" နီရိုက မျက်နှာကို ကုတ်လိုက်သည်။ "ဒီကာလအတွင်းမှာ ငါတို့ တိုက်ပွဲတွေ အလုပ်များနေပြီး စကားပြောဖို့ အချိန်မရှိဘူး။"

"ဘာအကြောင်းပြောစရာရှိလို့လဲ" မီယာ မျက်လုံးလှန်လိုက်သည်။ "အိပ်ဖို့တောင် အချိန်မလောက်ဘူး။ အိပ်စရာမလိုဘဲ အလုပ်လုပ်နိုင်တဲ့ နင့်လို ငါတို့ကို ထင်နေတာလား။"

နီရိုက စကားမပြောနိုင်ဘဲ စဉ်းစားပြီးနောက် "တကယ်တော့ ပင်ပန်းနွမ်းနယ်မှုကို ဘယ်လိုတိုက်ဖျက်ရမလဲဆိုတာ သင်ပေးလို့ရပါတယ်။ ဒီကိစ္စနဲ့ပတ်သက်ပြီး ငါက အရမ်းအတွေ့အကြုံရှိတယ်"

"ငါက စစ်သည်တော်တစ်ယောက်ပါ၊ ဒါပေမယ့် နင်က ငါ့ကို သင်ပေးဖို့ လိုတယ်လား။" မီယာက ရယ်သည်။

ဒါပေမယ့် နီရိုက လေးလေးနက်နက် ပြန်ဖြေတယ်။ "စစ်သည်တော်တစ်ယောက်အနေနဲ့ ငါ့ထက် ဒါကို သင်ယူဖို့က ပိုအရေးကြီးတယ်။ ယန္တရားပညာရှင်တစ်ယောက်က ခံနိုင်ရည်အများကြီးမလိုပါဘူး၊ ဒါပေမယ့် ခံနိုင်ရည်မရှိရင် စစ်သည်တော်ဟာ သူတို့ရဲ့ တိုက်ခိုက်နိုင်စွမ်းကျဆင်းမှုကို ကြုံတွေ့ရလိမ့်မယ်။ မင်း အန္တရာယ်ကြုံရမှာကို ငါကြောက်တယ်"

"နင် အရမ်းဂရုစိုက်ပုံရတယ်။" မီယာသည် နီရိုကို ဘေးတစောင်း ကြည့်လိုက်သည်။

"ငါအရင်ကပြောခဲ့သလို မင်းကိုကာကွယ်ပေးမယ်။" နီရို ပြုံးပြလိုက်သည်။

"ဟွန့်၊ မပြုံးနဲ့။ အဲဒါက နင့်ကို အရူးနဲ့တူစေတယ်။" မီယာ နှာမှုတ်ပြီး ခေါင်းလွှဲသွားတယ်။ စက္ကန့်အနည်းငယ်အကြာတွင် သူမသည် ပေါ့ပေါ့ပါးပါးမေးဟန်ဆောင်ကာ "ဒီတော့ ပင်ပန်းနွမ်းနယ်မှုတွေကို ဘယ်လိုတိုက်ဖျက်မလဲ"

နီရို စကားပြောရင်း နှာခေါင်းကို ကုတ်လိုက်သည်။ "အိပ်တဲ့အကျင့်ကို အရင်ပြောင်းရမယ်။ ပင်ပန်းနွမ်းနယ်နေတဲ့ အခြေအနေမှာ မင်းစိတ်ကို စွမ်းဆောင်ရည်အပြည့်နဲ့ အလုပ်လုပ်နေအောင် ကြိုးစားရမယ်။ အစကတော့ ခက်ခဲလိမ့်မယ်၊ ဒါပေမယ့် ဖြတ်သန်းဖူးသူတစ်ယောက်အနေနဲ့ အတွေ့အကြုံရှိတယ်။ အိပ်ချင်ရင် ငါ့ကိုလာရှာလို့ရတယ်။"

မီယာက အရူးလို ခေါင်းညိတ်ပြလိုက်ပြီးမှ တစ်ခုခုမှားနေမှန်း နောက်ကျမှ သိသွားသည်။

"အိပ်ချင်ရင် လာရှာလို့ ပြောတာလား… ငါ့ကို လာနောက်နေတာလား။"

သူမရဲ့ နှလုံးသားထဲမှာ အရှက်တရားတွေ တက်လာပြီး နီရိုရဲ့ ရင်ဘတ်ကို ရက်ရက်စက်စက် ထုနှက်လိုက်သည်။

"အာ ငါပြောတာ မှားသွားလို့လား" နီရိုမှာ ဘာဖြစ်နေမှန်း မသိသော်လည်း သူ၏ ယန္တရားဝတ်စုံသည် ခိုင်ခံ့သောကြောင့် မည်သည့်ဒဏ်ရာမျှ မရပေ။

မီယာက တစ်ခုခုပြောရန် ပြင်လိုက်သော်လည်း ယာဉ်ပေါ်က လူတိုင်းရဲ့အကြည့်က သူတို့နှစ်ယောက်ဆီ ရောက်သွားတာကို ရုတ်တရက်တွေ့လိုက်ရသည်။ ရန်ဖြစ်နေတဲ့ ချစ်သူရည်းစားစုံတွဲကို ကြည့်နေသလိုပဲ သူတို့ရဲ့ အကြည့်တွေထဲတွင် ရယ်မောခြင်း၊ ငြူစူခြင်း၊ မနာလိုခြင်းများ ရှိနေကြသည်။

သူမ ပါးပြင်တွင် အနီရောင် သန်းသွားကာ နီရိုကို စိုက်ကြည့်ကာ ရှက်ရှက်နှင့် ခေါင်းငုံ့သွားသည်။ စကားမပြောတော့ဘဲ မျက်လုံးတွေက သူမရဲ့လက်နက်ကို အရောင်တင်ဖို့ ကြည့်လိုက်သည်။ သူမ၏ ဓားသွေးကျောက်သည် အလွန်လျင်မြန်စွာ ရွေ့လျားသွားကာ သူမ၏ ဓားသွားပေါ်တွင် ဥက္ကာပျံ မိုးရွာစေပုံရသည်။

နီရိုက ခေါင်းကုတ်ပြီး နောက်ထပ်ပြောချင်ပေမယ့် မျက်နှာချင်းဆိုင်ထိုင်နေတဲ့ တပ်မှူးက သူ့ကို ရုတ်တရက် တိတ်တဆိတ် အချက်ပြလိုက်ပါတယ်။ လက်တစ်ဖက်ကို မြှောက်ပြီး လက်သီးဆုပ်ထားလိုက်သည်။ သူ၏အခြားလက်က လက်ချောင်းတစ်ချောင်းကိုဆန့်ကာ လက်သီးထဲသို့ထည့်လိုက်သည်။ ၎င်းသည် ဂလက်ဆီတွင်ပင် အဖြစ်များသော အမူအရာဖြစ်ပြီး ၎င်း၏အဓိပ္ပါယ်မှာ ကိုယ်တိုင်သိသာသည်။

ကောင်လေး၊ ဆန္ဒမစောပါနဲ့၊ မင်းလုပ်ရမယ့်အခါ လုပ်သင့်တယ်။

ဒါကိုမြင်တော့ နီရိုက မကျိန်ဆဲဘဲ မနေနိုင်ပေ။ "သောက်ချီးထုပ် လူရမ်းကား..."

ထိုအချိန်တွင် သူတို့ရေဒါမှာ ပုံမှန်မဟုတ်သည့် အရာတစ်ခုကို တစ်ယောက်က တွေ့ရှိသွား၏။

"ပုံမှန်မဟုတ်တဲ့ စွမ်းအင်အရင်းအမြစ် နှစ်ခုကို တွေ့ရှိရပါတယ်။"

လူအုပ်ကြီးက ချက်ချင်းပြုံးတာရပ်သွားတယ်။ သူတို့သည် ရေဒါကို စိုက်ကြည့်နေကြသော်လည်း အချက်ပြမှု နှစ်ခု ထပ်မံထွက်ပေါ်လာသည်ကို မြင်လိုက်ရပြီး တစ်ခုမှာ စွန့်ပစ်ထားသော စစ်စခန်းအား ညွှန်ပြကာ နောက်တစ်ခုမှာ ပိုမိုဝေးကွာသော တောရိုင်းဆီသို့ ဦးတည်သွားခြင်းဖြစ်သည်။

"ထူးဆန်းတယ်၊ ဘာလို့အရင်က မပေါ်ခဲ့တာလဲ၊ ဒါက ပျက်နေတာလား" ဒုတပ်မှူးက သံသယဖြင့် ရေဒါကို ပုတ်လိုက်သည်။

"ဘယ်လိုပဲဖြစ်ဖြစ် ငါတို့ သွားစစ်ကြည့်ရမယ်။"

တပ်မှူးက မီယာ၏အဖွဲ့ကို အမိန့်မပေးမီ ကြည့်လိုက်သည်။ "ငါတို့ ခွဲထွက်ဖို့ လိုမယ်ထင်တယ်။ စစ်တပ်စခန်းကို ရောက်တဲ့အခါ စွမ်းအင်အရင်းအမြစ်ကို စစ်ဆေးဖို့ တောထဲမသွားခင် ငါတို့ကို အရင်ချပေးပါ။"

အစီအစဥ်ကို အမြန်အပြီးသတ်ပြီး မော်တော်ယာဉ်သည် စစ်စခန်းပတ်လည်တွင် နီရို၏အဖွဲ့ကို ချပေးသည်။ နီရိုသည် မီယာ၏အဖွဲ့ မြေလမ်းကြောင်းအတိုင်း ရွေ့လျားသွားသည်ကို စောင့်ကြည့်နေသည်။ နှစ်ယောက်သား နောက်တစ်ကြိမ် ကွဲသွားကြပြန်သည်။

နီရို ကားထွက်သွားသည့်လမ်းကြောင်းကို စိုက်ကြည့်နေသည်ကိုမြင်တော့ သူက လှမ်းပြီး နီရို၏နားရွက်ကိုတောက်ကာ "ကောင်လေး၊ စိုက်ကြည့်မနေနဲ့။ အလုပ်လုပ်ရမယ့်အချိန်ပဲ"

နီရိုသည် ခံစားချက်များကို တည်ငြိမ်အောင်လုပ်လိုက်ပြီး အဖွဲ့နှင့် အတူလိုက်လာကာ အနည်းငယ် အာရုံလွင့်နေပုံရ၏၊

ဘာကြောင့်မှန်းမသိသော်လည်း ဤအခိုက်အတန့်တွင် သူ နည်းနည်း စိတ်မသက်မသာ ခံစားနေရသည်။

ယင်းအတွက် အနည်းငယ် အာရုံရောက်နေစဉ် နီရိုသည် စစ်အခြေစိုက်စခန်းအား စူးစမ်းရှာဖွေရန် သူ၏အဖွဲ့နောက်သို့ လိုက်ပါသွားသည်။ သူတို့သည် စွန့်ပစ်ထားသော ဓာတ်လှေကားတစ်ခုကို တွေ့ရှိခဲ့ပြီး ရေဒါတွင် ပြသထားသည့် 'ပုံမှန်မဟုတ်သောအချက်ပြမှု' ကို သွားရောက်မစူးစမ်းမီ ရှုပ်ထွေးလှသော မြေအောက်အခြေစိုက်စခန်းတစ်ခုသို့ ရောက်ရှိသွားသည်။

...

"သတိပေးချက်။ အမည်မသိပစ်မှတ်ကို တွေ့ရှိပါပြီ။"

မျက်မမြင်ဖြစ်နေသော ကွန်ဒီ ရေပေါ်အခြေစိုက်စခန်းသည် ဆယ်မိနစ်ကျော်အကြာတွင် ၎င်း၏ 'အတွင်းတိမ်' ရောဂါ ရုတ်တရက် ပျောက်ကင်းသွားခဲ့သည်။ ၎င်းတို့သည် မျက်နှာပြင်ပေါ်တွင် ကင်းထောက်တပ်ဖွဲ့တစ်ခုကို အံ့အားသင့်ဖွယ် တွေ့ရှိသွားကြသည်။

အခြေစိုက်စခန်းအတွင်းရှိ လူတိုင်း ထိတ်လန့်သွားပြီး ပုရွက်ဆိတ်များကဲ့သို့ ပြာပြာသလဲ ဖြစ်ကုန်၏။

ထောက်လှမ်းရေးအစီရင်ခံစာကို ရေပေါ်အခြေစိုက်စခန်း တပ်မှူးထံသို့ လျင်မြန်စွာ ပေးပို့လိုက်သည်။ သူ၏ရုံးခန်းအတွင်း တပ်မှူးသည် ဒေါသထွက်လာပြီး မျက်လုံးများ ပြူးကျယ်လာသည်။

"ဒီရန်သူအုပ်စုက ဘယ်တုန်းက ဆင်းသက်လာတာလဲ၊ ပြီးတော့ ဘာလို့ စောစောက မတွေ့တာလဲ။ မင်းတို့ တာဝန်ဝတ္တရားတွေကို ပေါ့ဆနေကြတာလား။"

ရေဒါအော်ပရေတာများ၏ ခေါင်းဆောင်က သူ၏အဖွဲ့ကို ကာကွယ်ပြောဆိုလိုက်သည်။ "ရေဒါက ဘာတုံ့ပြန်မှုမှတောင် မပြခဲ့ပါဘူး၊ ပိုမိုအဆင့်မြင့်တဲ့ ကိုယ်ယောင်ဖျောက်နည်းပညာရှိတဲ့ ရန်သူ့ကင်းထောက်တွေက ရှောင်ကွင်းသွားတာ ဖြစ်နိုင်ပါတယ် ခင်ဗျာ။"

"ဒါက အရမ်းကြောက်စရာကောင်းတယ်။ ဒီလိုနည်းပညာမျိုးနဲ့ သူတို့က ငါတို့ကို ခြုံခိုတိုက်ခိုက်ဖို့ ရွေးချယ်ခဲ့ရင် ငါတို့ ကျဆုံးနေတာ ကြာလှပြီ။" အခြေစိုက်စခန်း တပ်မှူးသည် ထိတ်လန့်သွားသော အမူအရာ ပြသပြီးနောက် ဒေါသတကြီး ဖြစ်သွားခဲ့သည်။ "ဒီလိုမျိုး ခိုးဝင်လာတာက ငါတို့ မရှိဘူးလို့ မင်းတို့ ထင်နေကြတာလား။"

"တပ်မှူး၊ စဉ်းစားကြည့်ပါဦး။ ပြိုင်ဘက်က ဒီလိုအင်အားမျိုး ရှိနေတာတောင် ငါတို့ကို ခြုံခိုမတိုက်ဘဲ မျက်နှာပြင်ပေါ်မှာ ဘာလို့ ဆင်းသက်ခဲ့တာလဲ။ ဘာကြောင့်လဲ။"

ထိုစကားကို ကြားသောအခါ တပ်မှူး၏ မျက်လုံးများ လင်းလက်သွားပြီး စားပွဲကို ရုတ်တရက် ရိုက်လိုက်ကာ ဟောက်လိုက်သည်။ "ငါ အခု နားလည်သွားပြီ။ သူတို့က ငါတို့ ဒီမှာရှိတာကို သိတာ ထင်ရှားတယ်၊ ဒါပေမယ့် သူတို့ရဲ့ လူအင်အား မလုံလောက်လို့ မတိုက်ခိုက်တာပဲ၊ ငါတို့ကို အပြတ်ရှင်းဖို့ သူတို့မှာ ယုံကြည်ချက် မရှိဘူး။ တကယ်တော့ ငါတို့ကို မျက်လုံးထဲတောင် မထည့်ဘဲ ထောက်လှမ်းရေးသတင်း စုဆောင်းဖို့ ငါတို့ရှေ့မှာ ကြွားဝါနေတာပဲ၊ သူတို့က အရမ်းဝင့်ကြွားလွန်းတယ်။ သူတို့ကို တန်ဖိုးတစ်ခု ပေးဆပ်ခိုင်းရမယ်။"

ခေတ္တမျှ ရပ်တန့်ပြီးနောက် တပ်မှူးသည် မတ်တတ်ရပ်ကာ အော်ဟစ်လိုက်သည်။ "ရန်သူကို ဝိုင်းထားဖို့ ယာဉ်တန်းကို အမိန့်ပေးလိုက်။ သူတို့ထဲက တစ်ယောက်မှ လွတ်မသွားစေနဲ့။"

သူ၏ဘေးမှ ဒုတပ်မှူးက ထပ်လောင်းပြောဆိုသည်။ "တပ်မှူး၊ ကျွန်တော့်စကားကို ခွင့်လွှတ်ပါ၊ သူတို့ထဲက အချို့ကို အရှင်ဖမ်းဖို့ ကြိုးစားသင့်ပါတယ်။ အထက်လူကြီးတွေက သူတို့ကို သုတေသနလုပ်ချင်နေကြတာပါ။ ဒါက ငါတို့အတွက် အခွင့်အရေးပါပဲ။"

တပ်မှူး၏ မျက်လုံးများ လင်းလက်သွားပြီး ဝမ်းသာအားရ အမူအရာဖြင့် ထပ်ပြောလိုက်သည်။ "မှန်တယ်၊ ငါ မေ့လုနီးပါးပဲ။ အထက်လူကြီးတွေက ဒီစူပါတွေကို လိုချင်နေတာ၊ အခု သူတို့က ငါတို့ဆီကို ကိုယ်တိုင် ရောက်လာပြီဆိုတော့ သူတို့ကို ဖမ်းပြီး ငါတို့နဲ့အတူ ပြန်ခေါ်သွားရုံပဲ။"

…

စွန့်ပစ်ထားသော စစ်အခြေစိုက်စခန်းအတွင်း နီရို၏ တပ်ဖွဲ့များသည် စူးစမ်းရှာဖွေနေကြသည်။ လျှပ်စစ်မီး ပြတ်တောက်နေသည်မှာ ကြာပြီဖြစ်သောကြောင့် ၎င်းသည် မှောင်မည်းနေပြီး လုံးဝတိတ်ဆိတ်နေသည်။ လူတိုင်းသည် တစ်ယောက်နှင့်တစ်ယောက်၏ အသက်ရှူသံနှင့် ခြေသံများ ပဲ့တင်ထပ်နေသည်ကိုသာ ကြားနေရသည်။ လေထုမှာ ထိတ်လန့်စရာနှင့် ရင်တထိတ်ထိတ်ဖြစ်စရာများဖြင့် ပြည့်နှက်နေသည်။

နီရိုသည် အားကောင်းသော အလင်းရောင်များ ထုတ်လွှတ်သည့် ယန္တရားလမ်းပြပျားငယ် အနည်းငယ်ကို လွှတ်တင်လိုက်သည်။ ၎င်းတို့သည် ရှေ့မှ လမ်းပြပေးပြီး မြေအောက်အခြေစိုက်စခန်းကို လင်းထိန်သွားစေသည်။

လျှပ်စစ်မီးမရှိသဖြင့် အခြေစိုက်စခန်း၏ ဝင်ရောက်ခွင့် ထိန်းချုပ်မှုစနစ်မှာ အကျုံးမဝင်တော့ဘဲ တံခါးများကို အတင်းအကြပ်သာ ဖွင့်နိုင်တော့သည်။ စွမ်းအင်မြင့် ရောင်ခြည်သေနတ် အနည်းငယ်သည် ပိတ်ထားသော သတ္တုတံခါးကို နီရဲနေသော သံရည်ပူများအဖြစ် ပြောင်းလဲပစ်ရန် လုံလောက်သောကြောင့် သူတို့သည် တစ်လျှောက်လုံး အတားအဆီးမရှိဘဲ သွားလာနိုင်ခဲ့သည်။

အဖွဲ့နှင့်အတူ ခဏမျှ လမ်းလျှောက်ပြီးနောက် နီရို၏ မကောင်းသော ခံစားချက်မှာ ပိုမိုပြင်းထန်လာပြီး သူက ပါးစပ်မဟဘဲ မနေနိုင်တော့ပေ။

"တပ်မှူး၊ ဒီမှာ တစ်ခုခုတော့ မှားနေပြီလို့ ကျွန်တော် ခံစားနေရတယ်။"

"ဘယ်အပိုင်းလဲ။" တပ်မှူးက မေးလိုက်သည်။

"ကျွန်တော် သေချာတော့ လက်ညှိုးမထိုးပြတတ်ဘူး။"

"အဲဒီလိုဆိုရင်..." တပ်မှူးသည် မျက်မှောင်ကြုတ်လိုက်ပြီးနောက် အမိန့်တစ်ခု ထုတ်ပြန်လိုက်သည်။ "မင်း လူနည်းနည်းခေါ်ပြီး ငါတို့နောက်ကနေ အကွာအဝေးတစ်ခုက လိုက်ခဲ့။ ငါတို့ ဆုတ်ခွာရမယ့် လမ်းကြောင်းကို ဂရုစိုက်။ ငါက တခြားလူတွေနဲ့အတူ ပုံမှန်မဟုတ်တဲ့ စွမ်းအင်အရင်းအမြစ်ကို သွားစစ်ဆေးလိုက်မယ်။"

တပ်မှူးသည် နီရိုနောက်သို့ လိုက်ရန် အဖွဲ့ဝင်အချို့ကို ရွေးချယ်ပေးခဲ့ပြီး သူက ကျန်လူများကို ဦးဆောင်ကာ ရှေ့သို့ ဆက်သွားခဲ့သည်။

နီရိုသည် ထိုနေရာတွင် ခဏမျှ စောင့်နေစဉ် ဆက်သွယ်ရေးစက်မှတစ်ဆင့် တပ်မှူး၏ အသံကို ကြားလိုက်ရသည်။

"ငါတို့ ထူးဆန်းတဲ့ စွမ်းအင်အရင်းအမြစ်ရှိတဲ့ နေရာကို ရောက်ပြီ၊ ဒါပေမယ့် ဒီမှာ ဘာမှမရှိဘူး။"

နီရို၏ နှလုံးသားမှာ တုန်လှုပ်သွားပြီး သူက မျှဝေထားသော အမြင်အာရုံကို ချက်ချင်း ဖွင့်ကြည့်လိုက်သည်။ သူသည် တပ်မှူး၏ မျက်လုံးများမှတစ်ဆင့် ဆံပင်တစ်ပင်တောင် မရှိသော ဗလာကျင်းနေသည့် ဂိုဒေါင်တစ်ခုကို မြင်လိုက်ရသည်။

သို့သော်လည်း ရေဒါတွင် အမှတ်အသားပြုထားသော အချက်ပြမှုမှာ ထိုနေရာကို ရည်ညွှန်းနေသည်။ ကိုဩဒိနိတ်များမှာ အတိအကျ တူညီနေသောကြောင့် ၎င်းတို့သည် မှားယွင်းသော နေရာသို့ ရောက်သွားခြင်း မဖြစ်နိုင်ပေ။

"ရေဒါက အချက်ပေးတာ မှားနေတာလား။" နီရို တံတွေးမျိုချလိုက်သည်။ "ဒါမှမဟုတ်..."

ဘုန်း။

သူ မတုံ့ပြန်နိုင်မီမှာပင် ပြင်းထန်သော တုန်လှုပ်မှုတစ်ခု ပေါက်ကွဲထွက်လာသည်။

"သတိပေးချက်။ စွမ်းအင်မြင့် တိုက်ခိုက်မှုကို တွေ့ရှိရသည်။ ကျေးဇူးပြု၍ ရှောင်တိမ်းပါ။"

ဘုန်း။

အမြောက်များဖြင့် ပစ်ခတ်သံသည် သူ၏နားအနီးတွင် မြည်ဟည်းသွားပြီး မြေအောက်အခြေစိုက်စခန်း၏ အထောက်အပံ့တိုင်များ ရုတ်တရက် ပြိုကျသွားသည်။

အခြေစိုက်စခန်း၏ ဖွဲ့စည်းပုံမှာ တစ်ခဏချင်းအတွင်း ပျက်စီးသွားပြီး ကြမ်းပြင်ကြွေပြားများမှာ အစိတ်စိတ်အမွှာမွှာ ကွဲအက်ကာ ပိုမိုနက်ရှိုင်းသော အောက်ခြေမရှိသည့် တွင်းနက်ကြီးအဖြစ် ပြောင်းလဲသွားသည်။

နီရိုသည် မိမိကိုယ်ကို ကာကွယ်ရန် သူ၏ဒိုင်းကို ဖွင့်ရန်သာ အချိန်ရလိုက်ပြီး ပေါက်ကွဲမှု၏ တုန်လှုပ်လှိုင်းများကြောင့် လွင့်ထွက်သွားကာ စင်္ကြံနံရံများကို ရိုက်မိပြီး အောက်သို့ တိုက်ရိုက် ပြုတ်ကျသွားသည်။

ဆက်သွယ်ရေးစက်မှတစ်ဆင့် သူ၏အသင်းဖော်များ၏ အော်ဟစ်သံများ ထွက်ပေါ်လာသော်လည်း သူက မိမိကိုယ်ကိုတောင် ဂရုမစိုက်နိုင်သော အခြေအနေတွင် သူတို့ကို ဂရုမစိုက်နိုင်တော့ပေ။ သူသည် စိုးရိမ်ပူပန်မှုများဖြင့် ပြည့်နှက်နေသည်။

‘ငါတို့ ဘာလို့ ခြုံခိုတိုက်ခိုက်ခံရတာလဲ။ ဒီဂြိုဟ်ပေါ်မှာ တပ်စွဲထားတဲ့ တပ်ဖွဲ့တွေ မရှိဘူးဆိုတာ ငါတို့ သေချာ အတည်ပြုခဲ့တာပဲ။’

ယခုအချိန်တွင် နီရိုသည် အခြားရှင်းပြချက်ကို မစဉ်းစားနိုင်တော့ပေ။ သူ၏အမြင်တွင် ဖြစ်နိုင်ခြေတစ်ခုသာ ရှိသည်။

‘ကျစ်၊ ဒီကိုလိုနီဂြိုဟ်က ထောင်ချောက်ပဲ။ ရန်သူက ဒီခြုံခိုတိုက်ခိုက်မှုအတွက် တမင်တကာ စီစဉ်ထားတာ သေချာတယ်။ ငါတို့တော့ ထောင်ချောက်ထဲ ဆင်းမိပြီ။’

ဤအတွေးမှာ သူ၏ဦးနှောက်အတွင်း ဖြတ်ပြေးသွားစဉ်မှာပင် နီရိုသည် အောက်ခြေသို့ အရှိန်ပြင်းစွာဖြင့် ဆောင့်မိသွားသည်။

ဒုန်း

လူပုံသဏ္ဌာန် တွင်းတစ်ခု ဖြစ်ပေါ်လာပြီး မီးခိုးငွေ့ တိမ်တိုက်ကြီးတစ်ခု ပေါ်လာသည်။

ရှီး။

ကြီးမားသော ထိခိုက်မှုမှာ သူ၏ခန္ဓာကိုယ်အတွင်း ပဲ့တင်ထပ်သွားပြီး သူက နာကျင်မှုကြောင့် အံကို မကြိတ်ဘဲ မနေနိုင်တော့ပေ။

သို့သော်လည်း သူ မတ်တတ်မရပ်နိုင်မီမှာပင် ဧရာမ သတ္တုအပိုင်းအစကြီးတစ်ခုက သူ၏ဆီသို့ ပြုတ်ကျလာခဲ့သည်။

နီရိုသည် သူ၏လက်များကို မြှောက်ကာ မိမိကိုယ်ကို ကာကွယ်ရန် သူ၏ဒိုင်းကို ပြန်လည်အသက်သွင်းရန်သာ အချိန်ရလိုက်သည်။

ဘုန်း ဘုန်း ဘုန်း။

အပျက်အစီးများမှာ မိုးရွာသကဲ့သို့ ကျဆင်းလာပြီး နီရို၏ အမြင်အာရုံကို ဖုံးလွှမ်းသွားကာ သူ့ကို တိုက်ရိုက် မြှုပ်နှံလိုက်သည်။

…

ယခုအချိန်တွင် မလှမ်းမကမ်းရှိ စွန့်ပစ်ထားသော မြို့တစ်မြို့၌ ရန်သူများရှိနေကြောင်း သိရှိသွားသော ကွန်ဒီ ယာဉ်တန်းသည် နောက်ကွယ်တွင် ကျန်ရစ်ခဲ့သော တပ်ဖွဲ့များနှင့် စတင်၍ အပြန်အလှန် ပစ်ခတ်နေပြီဖြစ်သည်။

ဝုန်း

စွန့်ပစ်ထားသော စစ်အခြေစိုက်စခန်း၏ အထက်တွင် ကွန်ဒီ စစ်သင်္ဘောအချို့ ဆိုက်ကပ်ထားသည်။ ၎င်းတို့၏ လက်နက်များကို ထုတ်ယူလိုက်ပြီး အခြေစိုက်စခန်းကို ဗုံးကြဲတိုက်ခိုက်လိုက်သည်။

ဘုန်း။

အခြေစိုက်စခန်းတစ်ခုလုံး အပျက်အစီးပုံဘဝသို့ ရောက်ရှိသွားမှသာ ထိုစစ်သင်္ဘောများသည် နောက်ဆုံးတွင် ပစ်ခတ်မှုကို ရပ်တန့်လိုက်သည်။

အပေါက်များ ပွင့်သွားပြီး ကွန်ဒီ သံချပ်ကာစစ်သား တပ်စုတစ်စုသည် အခန်းအတွင်းမှ ခုန်ထွက်ကာ မြေပြင်ပေါ် ဆင်းလာကြပြီး လက်နက်များကို ကိုင်ဆောင်ကာ အခြေစိုက်စခန်းသို့ ပြေးသွားကြသည်။

နီရိုနှင့် သူ၏အဖွဲ့၏ အသက်ဓာတ် အချက်ပြမှုများကို သူတို့၏ ရေဒါတွင် တွေ့ရှိနေရပြီး ထိုစစ်သားများ၏ ရည်ရွယ်ချက်မှာ ၎င်းတို့ယာဉ်တန်း၏ အကာအကွယ် မရှိတော့သော ဤစူပါအဖွဲ့ငယ်လေးကို ဖမ်းဆီးရန်ဖြစ်သည်။

"ကောင်းတယ်။ တိုက်ခိုက်ရေးစစ်ဆင်ရေးက အောင်မြင်သွားပြီ။"

ယခုအချိန်တွင် ကွန်ဒီ ရေပေါ်အခြေစိုက်စခန်း၏ တပ်မှူးသည် ကွပ်ကဲမှုအခန်းအတွင်းမှ ကျေနပ်စွာ ပြုံးနေသည်။

သို့သော်လည်း သူသည် ပြတင်းပေါက်အပြင်ဘက်တွင် ကိုယ်ယောင်ဖျောက်ထားသော ယန္တရားစစ်သည်များ အုပ်စုတစ်ခု ပျံဝဲနေပြီး သူ၏လှုပ်ရှားမှုတိုင်းကို တိတ်ဆိတ်စွာ စောင့်ကြည့်နေသည်ကို သတိမထားမိခဲ့ပေ။

စာစဉ် (၅၇)၊ အခန်း (၉၇၄) ပြီးပါပြီ။

လင်းဆက်

+++++