ဝဲဂယက်အတွင်းမှ အရင်းအမြစ်များ

ရွှီရှင်းသည် အပြင်သို့ မထွက်မီ အပြင်မှ ယူဆောင်လာခဲ့သော အရင်းအမြစ်သစ်များကို အိမ်ထဲ၌ ထားခဲ့လို၏။

သူသည် သစ်သားပုံးကို ထုတ်လိုက်ရာ ရောင်စုံငါးလေးများသည် ပုံးထဲ၌ ပျော်ရွှင်စွာ ကူးခတ်နေဆဲ ဖြစ်သည်။

သူသည် လူတစ်ရပ်နီးပါး မြင့်သော ဖန်ငါးကန်အကြီးကြီးတစ်ခုကို ဖန်တီးကာ တတိယထပ်ရှိ ဆက်သွယ်ရေးမျက်နှာပြင်ဘေးတွင် ထားလိုက်ပြီး ပုံးထဲမှ ရေနှင့် ငါးများကို လောင်းထည့်လိုက်သည်။

[သစ်ပင်အိမ်အတွင်း ရောင်စုံကြေးခွံငါး (အစိမ်းရောင်အဆင့်) ၅၂ ကောင် မွေးမြူထားကြောင်း စနစ်က သိရှိပါသည်။ သစ်ပင်အိမ် အလှဆင်မှုအဆင့် +၁၀.၄ တိုးလာပါပြီ။ လက်ရှိ သစ်ပင်အိမ် အလှဆင်မှုအဆင့်: ၁၀.၄]

ရုတ်တရက် ထွက်ပေါ်လာသော အသံကြောင့် ရွှီရှင်း လန့်သွား၏။

ဂုဏ်သတ္တိအသစ်ဖြစ်သော အလှဆင်မှုအဆင့် ပေါ်လာခဲ့ချေပြီ။

ရွှီရှင်းသည် မျက်နှာပြင်သို့ သွားကြည့်ရာ ရွေးချယ်စရာများထဲတွင် အလှဆင်မှုအဆင့် ဟူသော ကဏ္ဍသစ်တစ်ခု တိုးလာသည်ကို တွေ့ရသည်။

၎င်းကို နှိပ်လိုက်သောအခါ စာသားတစ်ကြောင်းတည်းသာ ရှိ၏။

ရောင်စုံကြေးခွံငါး (အစိမ်းရောင်အဆင့်) ၅၂ ကောင် မွေးမြူထားသဖြင့် အလှဆင်မှုအဆင့် ၁၀.၄ တိုးလာသည်။

ငါး ၅၂ ကောင်က ၁၀.၄ တိုးပေးသည်ဆိုလျှင် ငါးတစ်ကောင်က ၀.၂ တိုးပေးခြင်း ဖြစ်၏။ .

..ဒါနဲ့ ဒီအလှဆင်မှုအဆင့်က ဘာအတွက်လဲ။

တန်ဖိုးတစ်ခုခု ရောက်မှ သိသာမှာလား။

ထိုအချိန်တွင် ခဲခဲလေးသည် ငါးကန်အစွန်းသို့ တွားတက်ကာ ကန်ထဲက ငါးလေးများကို စူးစမ်းကြည့်နေသည်။

"ခဲခဲ... မင်းတို့ သုံးကောင်လုံး"

ရွှီရှင်းက သားရဲသုံးကောင်ကို လှမ်းပြောလိုက်၏။

"ဒီငါးလေးတွေကို ဖမ်းမစားရဘူးနော်၊ ဒါတွေက အလှကြည့်ဖို့ပဲ၊ သိလား"

"အီးးး"

ခဲခဲလေးက ခေါင်းညိတ်ပြရင်း သူမ၏ လက်ကလေးဖြင့် ရေမျက်နှာပြင်ကို မွှေနေ၏။

ငွေရောင်ဘုရင်ကလည်း ဟိန်းသံတစ်ချက်ဖြင့် တုံ့ပြန်သည်။

မီမီကတော့ နှုတ်ခမ်းကို တွန့်လိုက်ကာ ဤငါးလေးများမှာ သူ၏ သွားကြားညှပ်ရန်ပင် မလောက်ဟု ဆိုနေသည့်အလား ရှိနေ၏။

ရွှီရှင်းသည် သူ၏ကျောပိုးအိတ်ထဲမှ နှင်းဆီသစ်သားများနှင့် ရေအောက်မှ ကောက်လာသော သလင်းကျောက်များကို ထုတ်လိုက်သည်။

[သစ်ပင်အိမ်အတွင်း အပြာရောင်သလင်းကျောက် (အစိမ်းရောင်အဆင့်) ၁ လုံး၊ ခရမ်းရောင်သလင်းကျောက် (အစိမ်းရောင်အဆင့်) ၁ လုံး၊ အနီရောင်သလင်းကျောက် (အစိမ်းရောင်အဆင့်) ၁ လုံး၊ အစိမ်းရောင်သလင်းကျောက် (အစိမ်းရောင်အဆင့်) ၁ လုံး ထားရှိကြောင်း စနစ်က သိရှိပါသည်။ သစ်ပင်အိမ် အလှဆင်မှုအဆင့် +၄ တိုးလာပါပြီ။ လက်ရှိ သစ်ပင်အိမ် အလှဆင်မှုအဆင့်: ၁၄.၄]

နှင်းဆီသစ်သားအတွက်တော့ အသံထွက်မလာပေ။

နှင်းဆီသစ်သား၏ ဖော်ပြချက်တွင် ၎င်းကို ပန်းပုထုလုပ်ခြင်း သို့မဟုတ် ပရိဘောဂပြုလုပ်ခြင်းဖြင့်သာ အလှဆင်မှုအဆင့် တိုးမည်ဟု ပါရှိသည်။

သလင်းကျောက်များကိုလည်း ပန်းပုထုနိုင်သည်ဟု ပါရှိရာ ပန်းပုထုလိုက်ပါက အဆင့်ပိုတက်မည်လားဟု သူတွေးမိသည်။

သို့သော် သူ ပန်းပုမထုတတ်ပေ။

လောလောဆယ် အရေးကြီးဆုံးအလုပ်မှာ လေဆင်နှာမောင်းအောက်က ဝဲဂယက်ထဲမှာ ဘာရှိသလဲဆိုသည်ကို သွားကြည့်ရန် ဖြစ်၏။

အလယ်အလတ်အဆင့် ဗီဇပြောင်းသတ္တဝါက စောင့်ကြပ်နေသည်ဆိုပါက ကောင်းသောအရာများ ရှိနေရမည်။

ရွှီရှင်းသည် ပြင်ပရှိ ကြောက်မက်ဖွယ်ကောင်းသော လေဆင်နှာမောင်းကြီးကို ကြည့်ကာ ရေထဲသို့ နောက်တစ်ကြိမ် ငုပ်ဆင်းလိုက်သည်။

လမ်းတလျှောက်တွင် လေဆင်နှာမောင်းမှ အသစ်လွှင့်ထုတ်လိုက်သော အဝါရောင်သလင်းကျောက်နှင့် အဖြူရောင်သလင်းကျောက်များကိုပါ ရှာတွေ့ခဲ့သဖြင့် ဆက်လက်စုဆောင်းလိုက်၏။

ဝဲဂယက်နှင့် နီးကပ်လာသောအခါ ရွှီရှင်းသည် အန္တရာယ်ရှိသော ခံစားချက်မျိုး မရတော့သော်လည်း သတိမပေါ့ဘဲ ရေစီးအတိုင်း လွှတ်ပေးလိုက်ရာ ဝဲဂယက်ထဲသို့ တဖြည်းဖြည်း ဝင်သွားတော့သည်။

ဝဲဂယက်၏ အတွင်းပိုင်းသို့ ရောက်သောအခါ အရှိန်မှာ ပိုမြန်လာပြီး ရွှီရှင်းမှာ ပတ်ချာလည်လျက် ဗဟိုချက်ဆီသို့ နီးကပ်သွားခဲ့၏။

ရုတ်တရက် ရွှီရှင်းသည် အပြင်သို့ လွင့်ထွက်သွားပြီး ခြေထောက်များ မြေပြင်နှင့် ထိသွားသဖြင့် ရှေ့သို့ အရှိန်ဖြင့် ပြေးထွက်လိုက်ရသည်။

သူသည် အမှန်တကယ်ပင် မြေပြင်ပေါ်၌ ရပ်နေခြင်း ဖြစ်၏။

"ဒါ လေဆင်နှာမောင်းရဲ့ ဗဟိုချက်လား.. အရမ်းအေးတာပဲ..."

ရွှီရှင်းမှာ ချမ်းလွန်းသဖြင့် တုန်ရင်နေ၏။

သူသည် ရေဝဲဂယက်၏ အတွင်းပိုင်းသို့ ရောက်နေသော်လည်း ထူးဆန်းစွာပင် ဤနေရာ၌ ရေမရှိပေ။

သိပ္ပံနည်းကျ ရှင်းပြရန် ခက်ခဲလှသော်လည်း ပတ်ဝန်းကျင်ကို ကြည့်လိုက်သောအခါ အောက်ဘက်တွင် ငါးမီတာ၊ ခြောက်မီတာခန့် မြင့်သော ရေဝဲတံတိုင်းကြီး ရှိနေပြီး အပေါ်ဘက်တွင် လေဆင်နှာမောင်းကြီး ရှိနေသည်။

ကံကောင်းထောက်မစွာဖြင့် ဤဗဟိုချက်ထဲတွင် လေမတိုက်ပေ။

သို့သော် အပူချိန် အလွန်နိမ့်ပြီး လေဖိအား နည်းလှသည်။

သူသည် ရေစိုနေသဖြင့် ချမ်းတုန်နေပြီး အသက်ရှူရလည်း ခက်ခဲနေကာ လိုချင်သောအရာကို အမြန်ရှာဖွေရတော့သည်။

လေဆင်နှာမောင်း၏ ဗဟိုချက်မှာ အချင်း ၁၀ မီတာခန့်ရှိသော စက်ဝိုင်းပုံ ဧရိယာဖြစ်ပြီး၊ ထူးဆန်းစွာပင် ဤနေရာရှိ သစ်ပင်ငယ်လေးများမှာ လေဆင်နှာမောင်းဒဏ်ကြောင့် ပျက်စီးသွားခြင်း မရှိဘဲ နဂိုအတိုင်း ရှိနေကြ၏။

"အဲဒါ ဘာလဲဟ"

သစ်ပင်အုပ်လေး၏ အလယ်တွင် စုတ်ပြတ်နေသော သစ်သားသေတ္တာလေးတစ်လုံး ရှိနေသည်ကို ရွှီရှင်း တွေ့လိုက်ရသည်။

သူသည် အေးစိမ့်နေသော ဒဏ်ကို မခံနိုင်သဖြင့် ထိုနေရာသို့ အပြေးသွားလိုက်၏။

ပြန်ရောက်လျှင် ချီရွှယ်ဖေးပေးထားသော ဆေးကို သေချာပေါက် သောက်ရပေလိမ့်မည်။

"ဒါကြီးက တော်တော်စုတ်နေတာပဲ၊ အမှိုက်ပုံထဲက ကောက်လာတာလားဟ"

ရွှီရှင်း မျက်မှောင်ကြုတ်လိုက်မိသည်။

သို့သော် ဤနေရာ၌ ဤသေတ္တာမှလွဲ၍ ဘာမှမရှိသဖြင့် သူ ထိုင်ချလိုက်၏။

သေတ္တာမှာ သော့ခတ်ထားသော်လည်း စုတ်ပြတ်နေသဖြင့် အက်ကွဲကြောင်းများကြားမှ အတွင်း၌ တောက်ပနေသော ကျောက်တုံးများကို မြင်နေရသည်။

ရွှီရှင်းသည် အားဖြင့် ဆွဲဖွင့်လိုက်ရာ သေတ္တာအဖုံးမှာ ပြုတ်ထွက်သွားတော့သည်။

သေတ္တာထဲတွင် အပြင်က သူကောက်ခဲ့သော ကျောက်တုံးမျိုးစုံဖြင့် ပြည့်နှက်နေ၏။

[အနီရောင်သလင်းကျောက် (အပြာရောင်အဆင့်): အလွန်လှပသော သလင်းကျောက်ဖြစ်သည်၊ သစ်ပင်အိမ်တွင် ထားရှိပါက အလှဆင်မှုကို မြှင့်တင်နိုင်ပြီး ပန်းပုထုရန် သင့်တော်သည်။]

အပြာရောင်အဆင့် ကျောက်နီ၊ ကျောက်ပြာနှင့် ကျောက်ဖြူများကို သူတွေ့ရှိခဲ့သည်။

"ဒါပဲလား..." ရွှီရှင်း မကျေနပ်ပေ။

အလယ်အလတ်အဆင့် ဗီဇပြောင်းသတ္တဝါကို သတ်ပြီး ဝင်လာရသည်မှာ ဤမျှနှင့်တော့ မတန်ဟု ခံစားရသည်။

သူသည် သေတ္တာကို မှောက်ချလိုက်ရာ ခရမ်းရောင်အလင်းတန်းတစ်ခု ပေါ်ထွက်လာသဖြင့် သူ ပြုံးလိုက်မိ၏။

၎င်းမှာ ကတ်ပြားတစ်ခုဖြစ်ပြီး နောက်ထပ် စာချုပ် တစ်မျိုး ဖြစ်သည်။

[အနုပညာရှင်စာချုပ် (ခရမ်းရောင်အဆင့်): ဤစာချုပ်ကို အသုံးပြုပြီးနောက် အနုပညာရှင် ကဏ္ဍကို ဖွင့်နိုင်မည်ဖြစ်ပြီး ပန်းပုနှင့် ပန်းချီဆိုင်ရာ ပုံကြမ်း များကို ဖန်တီးနိုင်ကာ ပန်းပုနှင့် ပန်းချီအတတ်ပညာကို ကျွမ်းကျင်စွာ တတ်မြောက်လိမ့်မည်။]

ရွှီရှင်း: "...."

ခဏလောက် ဤစာချုပ်မှာ အသုံးမဝင်ဟု သူထင်လိုက်မိသည်။

သို့သော် သူရလာသော အရင်းအမြစ်သစ်များသည် ပန်းပုထုခြင်းနှင့် ဆက်စပ်နေသဖြင့် ဤစာချုပ်က အလှဆင်မှုအဆင့်ကို မြှင့်တင်ရန် ကူညီပေးနိုင်လိမ့်မည်။

၎င်းအပြင် ခရမ်းရောင်အလင်း ထွက်ပေါ်နေသော သလင်းကျောက်တစ်လုံးကိုလည်း သူတွေ့ရှိခဲ့၏။

ခရမ်းရောင်အဆင့် အရင်းအမြစ်တစ်ခုပင်။

ရွှီရှင်းသည် စာချုပ်ကို ချက်ချင်း အသုံးပြုလိုက်ရာ နွေးထွေးသော စွမ်းအင်များ သူ၏ ခန္ဓာကိုယ်အတွင်း စီးဆင်းသွားပြီး ပန်းပုနှင့် ပန်းချီအတတ်ပညာများမှာ သူ၏ ဦးနှောက်ထဲသို့ အတင်း ထည့်သွင်းခံလိုက်ရသကဲ့သို့ ခံစားလိုက်ရသည်။

သူသည် ယခုဆိုလျှင် ကမ္ဘာကျော် အနုပညာလက်ရာများကို ဖန်တီးနိုင်စွမ်း ရှိသွားပြီဟု ခံစားရ၏။

ဆက်သွယ်ရေးနာရီကို ဖွင့်ကြည့်လိုက်သောအခါ အလှဆင်မှုအဆင့် အောက်တွင် အနုပညာရှင် ကဏ္ဍသစ်တစ်ခု ပေါ်လာပြီး ဖန်တီးမှုသုံးခု ပါဝင်နေသည်။

[ပန်းပုကိရိယာအစုံ (အစိမ်းရောင်အဆင့်): အစိမ်းရောင်အဆင့် ပန်းပုများ ထုလုပ်နိုင်သည်။]

[ပန်းချီစုတ်တံ (အစိမ်းရောင်အဆင့်): အစိမ်းရောင်အဆင့် ပန်းချီများ ရေးဆွဲနိုင်သည်။]

[ပန်းပုနှင့် ပန်းချီ စားပွဲ (အပြာရောင်အဆင့်): သမိုင်းဝင် လက်ရာများကို ဖန်တီးနိုင်သည့် စားပွဲကြီး။]

ရွှီရှင်းမှာ အနည်းငယ် အံ့အားသင့်သွား၏။

အလှဆင်မှုအဆင့်က ဘာအတွက်လဲ သူသေချာမသိသေးသော်လည်း ဤစွမ်းရည်က အသုံးဝင်မည်ဟု သူမျှော်လင့်သည်။

သူသည် အပေါ်သို့ မော့ကြည့်လိုက်ရာ သူ၏ မျက်လုံးများ ပြူးသွားရသည်။

သူ၏ ခေါင်းပေါ် နှစ်မီတာခန့်အကွာတွင် ခရမ်းနက်ရောင် ဝဲဂယက်လေးတစ်ခုက တိတ်ဆိတ်စွာ လည်ပတ်နေခြင်းပင်။

"ဒါ ဘာကြီးလဲ"

ရွှီရှင်း၏ မျက်ခွံများ တုန်ခါသွား၏။

ဤဝဲဂယက်လေးမှာ အာကာသထဲက အနက်ရောင်တွင်း အသေးစားလေးနှင့် တူလှပြီး ပတ်ဝန်းကျင် လေထုကိုပင် ပုံပျက်သွားစေသည်။

သို့သော် ထူးဆန်းသည်မှာ ၎င်းသည် အောက်က သစ်ပင်များ သို့မဟုတ် ရွှီရှင်းအပေါ် ဘာသက်ရောက်မှုမှ မရှိဘဲ လေထဲတွင် တိတ်ဆိတ်စွာ လည်ပတ်နေခြင်း ဖြစ်၏။

ဒါ ဘာကြီးလဲဟ..။

လေဆင်နှာမောင်းရဲ့ ဗဟိုချက်ထဲမှာ ဘာလို့ နောက်ထပ် ဝဲဂယက်အသေးလေးတစ်ခု ရှိနေရတာလဲ။

---

အခန်း ၁၂၅ ပြီး။