ထိုက်ကျိငါး

"လေဆင်နှာမောင်းက... ပျောက်သွားတာလား"

ရွှီရှင်းမှာ အံ့အားသင့်ကာ ကြောင်ကြည့်နေမိ၏။

သူသည် ဝဲဂယက်အတွင်းမှ မွန်းစတားကို မည်သို့ကိုင်တွယ်ရမည်နည်းဟု စဉ်းစားနေစဉ် စက္ကန့်အနည်းငယ်အတွင်းမှာပင် ပတ်ဝန်းကျင်တစ်ခုလုံး ပြောင်းလဲသွားခြင်း ဖြစ်သည်။

ခရမ်းနက်ရောင် ဝဲဂယက်ငယ် ပျောက်ကွယ်သွားသည်နှင့်အတူ လေဆင်နှာမောင်းကြီးသည်လည်း တစ်ပါတည်း ပျောက်ကွယ်သွားခဲ့ပြီ ဖြစ်၏။

ကံကောင်းသည်မှာ မိုးသက်မုန်တိုင်းက မရပ်တန့်သေးသဖြင့် ရွှီရှင်းအနေဖြင့် လက်ရှိအခြေအနေကို လက်ခံနိုင်သေးသည်။

သူသည် ပတ်ဝန်းကျင်ကို လှည့်ပတ်ကြည့်ရှုလိုက်၏။

သူ၏ သစ်ပင်အိမ်အနီးတွင် ဤလေဆင်နှာမောင်း တစ်ခုတည်း ရှိနေခြင်း မဟုတ်ပါ။

သို့သော် သူ၏ သစ်ပင်အိမ်နှင့် နီးကပ်သော လေဆင်နှာမောင်း တစ်ခုတည်းသာ ပျောက်ကွယ်သွားခြင်း ဖြစ်ကြောင်း သူ တွေ့ရှိလိုက်ရသည်။

ရေပေါ်တွင် ပေါလောပေါ်ရင်း ကြည့်လိုက်ရာ အဝေးက လေဆင်နှာမောင်းများမှာမူ မူလနေရာများတွင် လည်ပတ်နေဆဲဖြစ်ပြီး၊ ကောင်းကင်ယံက တိမ်တိုက်မည်းကြီးများနှင့် ချိတ်ဆက်လျက် ကမ္ဘာပျက်ကိန်း ဆိုက်ရောက်နေသည့်အလား ကြောက်မက်ဖွယ် မြင်ကွင်းအဖြစ် ရှိနေဆဲပင်။

ရွှီရှင်း ရေပေါ်၌ ငေးမှိုင်နေစဉ်မှာပင် ဆန်းကြယ်သော အသံတစ်ခု ထွက်ပေါ်လာတော့သည်။

[ဂုဏ်ယူပါသည် ရှင်ကျန်သူ၊ သင်သည် ဤရှင်ကျန်သူ အုပ်စုအတွင်း၌ လေဆင်နှာမောင်းတစ်ခုကို လူလုပ်နည်းဖြင့် ပထမဆုံး ဖယ်ရှားနိုင်သူ ဖြစ်ပါသည်။ ဆုလာဘ်ကို အစီအစဉ် ပြီးဆုံးပြီးနောက် ထုတ်ပေးပါမည်။]

ဤအသံက ရွှီရှင်းအား သတိပြန်ဝင်လာစေ၏။

သူသည် လေဆင်နှာမောင်းကို လူလုပ်နည်းဖြင့် အမှန်တကယ် ဖယ်ရှားနိုင်ခဲ့သည်လား။ ဒါပေမဲ့ သူ ဘာလုပ်ခဲ့လို့လဲ..။

သူသည် မုန်တိုင်းဗဟိုချက်ကို စောင့်ကြပ်နေသော သွေးရောင်ဓားသွားငါးကို သတ်ခဲ့သည်၊ ဝဲဂယက်အတွင်းပိုင်းသို့ ဝင်ခဲ့သည်၊ ခရမ်းရောင်အဆင့် ရတနာပါသော သေတ္တာအစုတ်ကို တွေ့ခဲ့သည်၊ ထို့နောက် ခရမ်းနက်ရောင် ဝဲဂယက်ငယ်လေးကို တွေ့ရှိပြီး တိုက်ခိုက်ခဲ့သည်။

လေဆင်နှာမောင်း ပျောက်ကွယ်သွားခြင်းမှာ သူသည် ထိုခရမ်းနက်ရောင် ဝဲဂယက်ငယ်ကို မြှားသေနတ်ဖြင့် ပစ်ခတ်လိုက်သောကြောင့် ဖြစ်ပေလိမ့်မည်။

ကြည့်ရသည်မှာ လေဆင်နှာမောင်း၏ အချက်အခြာနှင့် အဓိကအရင်းအမြစ်ဖြစ်သော ထိုဝဲဂယက်ငယ်ကို တိုက်ခိုက်ရုံဖြင့် လေဆင်နှာမောင်းကြီးတစ်ခုလုံးကို ဖယ်ရှားနိုင်ပုံရပေသည်။

၎င်းမှာ ရိုးရှင်းလှသော်လည်း သာမန်ရှင်ကျန်သူများအတွက်မူ အလွန်ပင် ခက်ခဲလှပေမည်။

အလယ်အလတ်အဆင့် ဗီဇပြောင်း ရေနေသတ္တဝါတစ်ကောင် ရှိနေခြင်းကပင် လူအများကို ဟန့်တားရန် လုံလောက်နေပြီ ဖြစ်သလို၊ မည်သူကမှလည်း ရေအောက်ဝဲဂယက်အတွင်းသို့ ဝင်ရဲမည် မဟုတ်ပေ။

သူ ဝဲဂယက်အတွင်းသို့ ဝင်ရဲခြင်းမှာလည်း ခဲခဲလေးက လေဆင်နှာမောင်းမှာ အန္တရာယ်မရှိကြောင်းနှင့် အထဲ၌ ရတနာရှိကြောင်း ပြောပြခဲ့၍သာ ဖြစ်သည်။

ခဲခဲလေးသာ မရှိပါက သူလည်း ဝင်ရဲမည် မဟုတ်ပေ။

ဒါနဲ့...ဝဲဂယက်အချက်အခြာထဲမှာ ဘာတွေ ရှိနေလို့လဲ။

ထိုထူးဆန်းသော အသံများနှင့် ခရမ်းရင့်ရောင် စေးကပ်သော အရည်များက ရွှီရှင်း၏ စူးစမ်းလိုစိတ်ကို များစွာ နှိုးဆွနေမိသည်။

သို့သော် လေဆင်နှာမောင်းမှာ ပျောက်ကွယ်သွားပြီဖြစ်သလို သူ၏ ဘေးကင်းဇုန်အတွင်းမှာလည်း ဤလေဆင်နှာမောင်း တစ်ခုတည်းသာ ရှိခဲ့ခြင်း ဖြစ်သည်။

နောက်တစ်ကြိမ် ထိုထူးဆန်းသော ဝဲဂယက်နှင့် ကြုံတွေ့ရမှသာ လျှို့ဝှက်ချက်ကို ဖော်ထုတ်နိုင်ပေလိမ့်မည်။

ရွှီရှင်းသည် ရေမှော်ပင်တစ်ပင်ကို ထပ်မံစားသုံးကာ ရေအောက်သို့ ငုပ်လျှိုးလျက် လေဆင်နှာမောင်းဒဏ်သင့် ဧရိယာအတွင်း ကျန်ရစ်သော အရင်းအမြစ်များကို လိုက်လံရှာဖွေတော့သည်။

ရေဝဲကြီး မရှိတော့သဖြင့် ပျက်စီးသွားသော အပင်ငယ်များကြားတွင် ရေအောက်မြင်ကွင်းမှာ ကြည်လင်နေ၏။

"ဒါတွေက နောက်ထပ် အလှမွေးငါးတွေလား..."

လေဆင်နှာမောင်းဒဏ်သင့် ဧရိယာ၏ အခြားတစ်ဖက်တွင် ငါးနှစ်ကောင်မှာ ရေအောက်တောအုပ်ကြား၌ ကူးခတ်နေကြသည်။

ထိုငါးနှစ်ကောင်မှာ အနက်တစ်ကောင်၊ အဖြူတစ်ကောင် ဖြစ်ပြီး ငါးသိုင်းအရွယ်အစားခန့် ရှိကာ တစ်ကောင်ကိုတစ်ကောင် ပတ်ချာလည် ကူးခတ်နေကြရင်း အပြာရောင်အလင်းတန်းများ ထွက်ပေါ်နေသည်။

"အပြာရောင်အဆင့် ငါးတွေပဲဟ"

ရွှီရှင်း ဝမ်းသာအားရ ကူးသွားလိုက်၏။

အရင်က ရောင်စုံအကြေးခွံငါးများကဲ့သို့ပင် ဤအမည်းနှင့် အဖြူငါးနှစ်ကောင်မှာ ရွှီရှင်း ချဉ်းကပ်လာသောအခါ ထွက်မပြေးဘဲ သူ့ကို ဝိုင်း၍ ကူးခတ်နေကြသည်။

ဖြစ်နိုင်သည်မှာ သူဝတ်ဆင်ထားသော အကြေးခွံချပ်ဝတ်၏ အာနိသင်ကြောင့် ဖြစ်ပေလိမ့်မည်။

ရွှီရှင်းသည် အဖြူရောင်ငါးကို လှမ်းဖမ်းလိုက်ရာ ၎င်းမှာ ရုန်းကန်ခြင်းမရှိဘဲ ငြိမ်သက်စွာ ပါလာပြီး၊ အမည်းရောင်ငါးကမူ သူ့ကို ဆက်လက်ဝိုင်းပတ်ကူးနေ၏။

[ထိုက်ကျိငါးဖြူ (အပြာရောင်အဆင့်): အဆင့်မြင့် အလှမွေးငါးဖြစ်သည်။ သစ်ပင်အိမ်တွင် မွေးမြူပါက အလှဆင်မှုအဆင့်ကို တိုးမြင့်စေပြီး၊ ထိုက်ကျိငါးမည်းနှင့် တွဲဖက်မွေးမြူပါက အလှဆင်မှုအဆင့်ကို နှစ်ဆတိုးစေမည့်အပြင် သစ်ပင်အိမ်တွင် နေထိုင်သူ၏ ကျန်းမာရေးကို ဖြည်းဖြည်းချင်း ကောင်းမွန်စေကာ အသက်ရှည်စေမည်ဖြစ်သည်။]

ဤအမည်းနှင့် အဖြူ ငါးတစ်စုံကို ထိုက်ကျိငါး ဟု ခေါ်ဆိုခြင်းမှာ အလွန်ပင် ဆီလျော်လှပေသည်။

ထို့အပြင် ကျန်းမာရေးကောင်းမွန်စေပြီး အသက်ရှည်စေသည်ဆိုပါက အဖိုးမဖြတ်နိုင်သော ရတနာများပင် ဖြစ်၏။

ရှင်ကျန်သူများအတွက် အသက်ရှည်ရန်ဆိုသည်မှာ အရေးမကြီးလှဟု ထင်ရသော်လည်း မနက်ဖြန် သေမလား၊ ဒီနေ့သေမလား မသိနိုင်သဖြင့် ကျန်းမာရေးကောင်းမွန်စေခြင်းမှာမူ အလွန်စွမ်းအားကြီးသော လုပ်ဆောင်ချက် ဖြစ်သည်။

ဤမုန်တိုင်းကြောင့် ဖြစ်ပေါ်လာနိုင်သော ဖျားနာမှုနှင့် အအေးဒဏ်များကို ပိုမိုခံနိုင်ရည် ရှိစေမည် မဟုတ်ပါလား။

ရွှီရှင်းသည် ငါးနှစ်ကောင်ကို ရေဖြည့်ထားသော သစ်သားပုံးထဲသို့ ထည့်ကာ ကျောပိုးအိတ်ထဲ သိမ်းဆည်းလိုက်သည်။

ပတ်ဝန်းကျင်တွင် အခြားအရင်းအမြစ်များ မရှိတော့သဖြင့် သူ သစ်ပင်အိမ်ရှိရာသို့ ပြန်လည်ကူးခတ်လာခဲ့၏။

လမ်းတစ်လျှောက်တွင် ကန်ထဲမှ ထွက်လာသော ငါးများစွာကို တွေ့ရသည်။

၎င်းတို့သည် အစောပိုင်းကထက် ပိုမိုကြီးမားလာကြပြီး ဗီဇပြောင်းသားရဲများ၏ အငွေ့အသက် အနည်းငယ် ပါဝင်နေကြသည်။

သို့သော် ၎င်းတို့၏ ကိုယ်ပေါ်တွင် ဗီဇပြောင်းသားရဲများကဲ့သို့ သွေးရောင်အစင်းကြောင်းများ မရှိကြပေ။

ရွှီရှင်းသည် အရှည် တစ်ပေခွဲခန့်ရှိသော ငါးတစ်ကောင်ကို ဖမ်းယူကာ ခွဲစိတ်ကြည့်ရာတွင် အစိမ်းရောင်အဆင့်ထက် မပိုသော သာမန်ငါးအသားများကိုသာ ရရှိခဲ့သည်။

ကြည့်ရသည်မှာ ၎င်းတို့မှာ ဗီဇပြောင်းမှု လုံးဝ ပြည့်စုံပုံမရသေးပေ။

ရွှီရှင်း သစ်ပင်အိမ်သို့ ပြန်ရောက်သောအခါ အမြစ်များကို ကိုင်ကာ တတိယထပ်သို့ တက်လာခဲ့ပြီး၊ အိမ်အောက်တွင် တွဲလောင်းခိုနေသော လင်းနို့လေးကို ငါးအသားတစ်စင် ပစ်ပေးခဲ့သည်။

လေဆင်နှာမောင်း ပျောက်ကွယ်သွားသည်ကို မြင်သောအခါ ခဲခဲလေးနှင့် ငွေရောင်ဘုရင်တို့မှာ ပြတင်းပေါက်တွင် လာရောက်ကြည့်ရှုကြ၏။

ရွှီရှင်းသည် သူ၏ အတွေ့အကြုံများကို ပြောပြရင်း ဖန်ငါးကန်အသစ်တစ်ခု ဖန်တီးကာ ထိုက်ကျိငါးမည်းနှင့် ငါးဖြူ တစ်စုံကို ထည့်လိုက်သည်။

၎င်းတို့မှာ ကန်ထဲသို့ ရောက်သည်နှင့် တစ်ကောင်ကိုတစ်ကောင် ဝိုင်း၍ ကူးခတ်နေကြတော့သည်။

[သစ်ပင်အိမ်အတွင်း ထိုက်ကျိငါးဖြူ (အပြာရောင်အဆင့်) ၁ ကောင်၊ ထိုက်ကျိငါးမည်း (အပြာရောင်အဆင့်) ၁ ကောင် ရှိကြောင်း စနစ်က သိရှိပါသည်။ သစ်ပင်အိမ် အလှဆင်မှုအဆင့် +၁၆ တိုးလာပြီး၊ ထိုက်ကျိငါးအတွဲလိုက်အာနိသင်ကြောင့် အလှဆင်မှုအဆင့် +၁၆ ထပ်မံတိုးလာပါသည်။ လက်ရှိ အလှဆင်မှုအဆင့်: ၄၆.၄]

ငါးနှစ်ကောင်တည်းနှင့် အလှဆင်မှုအဆင့် ၃၂ အထိ တိုးသွားသည်မှာ အံ့သြဖွယ်ပင်။

တစ်ပြိုင်နက်တည်းမှာပင် ငါးများထံမှ ထွက်ပေါ်လာသော နွေးထွေးသည့် စွမ်းအင်လှိုင်းတစ်ခုမှာ သူ၏ ခန္ဓာကိုယ်ကို လွှမ်းမိုးသွားသည်ကို ရွှီရှင်း ခံစားလိုက်ရသည်။

၎င်းမှာ ကျန်းမာရေးကောင်းမွန်စေသည့် အာနိသင် ဖြစ်ပေလိမ့်မည်။

သို့သော် ငါးမွေးမြူခြင်းဖြစ်ရာ ၎င်းတို့ကို အစာကျွေးရန် လိုအပ်ပေသည်။

၎င်းတို့သည် အထူးအလှမွေးငါးများ ဖြစ်သဖြင့် အထူးငါးစာများ လိုအပ်မည်လားဟု သူတွေးမိကာ အမှတ်ဆိုင် တွင် ရှာဖွေကြည့်လိုက်ရာ တွေ့ရှိခဲ့၏။

[အလှမွေးငါးစာ (အစိမ်းရောင်အဆင့်): အလှမွေးငါးများကို ကျွေးရန် လိုအပ်သည်။ ရမှတ်: ၅၀ လျှော့ဈေးဖြင့် ၃၅ ]

ငါးစာတစ်အိတ်ကို ရမှတ် ၅၀ တောင်လား။

အလယ်အလတ်အဆင့် ဗီဇပြောင်းသတ္တဝါ တစ်ကောင်သတ်မှ ရမှတ် ၁၀၀ သာရသည် မဟုတ်ပါလား။

ဤမွေးမြူစရိတ်မှာ အလွန်ပင် မြင့်မားလှသည်။

သို့သော် သူ၏ ၃၀ ရာခိုင်နှုန်း လျှော့ဈေးဖြင့် တစ်အိတ်ကို ဝယ်ယူလိုက်၏။

ရွှီရှင်းသည် ငါးစာအနည်းငယ်ကို ထိုက်ကျိငါးကန်ထဲသို့ ဖြူးလိုက်ရာ ငါးနှစ်ကောင်မှာ အစာများကို စားသောက်ကြပြီးနောက် ပြန်လည်ကူးခတ်နေကြသည်။

ရောင်စုံအကြေးခွံငါးများမှာလည်း အစာကို ဝိုင်းအုံစားကြသော်လည်း အများကြီး မစားကြသဖြင့် ငါးစာတစ်အိတ်မှာ ဆယ်ရက်မှ ဆယ့်ငါးရက်ခန့် ခံမည်ဟု သူ ခန့်မှန်းလိုက်သည်။

ကုန်ကျစရိတ် များသော်လည်း ထိုက်ကျိငါး၏ အာနိသင်မှာ အလွန်ကောင်းမွန်သဖြင့် သူ ဆက်လက်မွေးမြူရန် ဆုံးဖြတ်လိုက်၏။

ရွှီရှင်းသည် ရေနွေးနွေးဖြင့် ရေချိုးကန်ထဲတွင် အေးအေးဆေးဆေး အပန်းဖြေလိုက်ရင်း တွေးနေမိသည်။

"မကြာခင် ငါ့ရဲ့ အနုပညာ စွမ်းရည်အသစ်တွေကို စမ်းသပ်ကြည့်ရမယ်၊ ဒါတွေက ရှင်သန်ရေးအတွက် အသုံးဝင်လာမှာပါ"

---

အခန်း ၁၂၇ ပြီး။