ရွှမ်ဟွမ်ဘိုးဘေး၏ မှောင်မိုက်သော သမိုင်းကြောင်း၊ သူတစ်ပါး၏ အထောက်ပံ့ခံခဲ့ရဖူးခြင်း(၁)။

"ရွှမ်ဟွမ်ဂိုဏ်းက ငါတို့ကို တကယ်ရော ကာကွယ်ပေးပါ့မလား..."

လူအချို့သည် သံသယရှိနေဆဲ ဖြစ်၏။

မည်သို့ပင်ဖြစ်စေ တစ်ဖက်သည်ကား ဝိညာဉ်သန္ဓေသားအဆင့် ဂိုဏ်းတစ်ခုဖြစ်ပြီး၊ အကယ်၍ ဝင်ရောက်ခိုလှုံရန် ငြင်းပယ်ခံရပါက သူတို့၏ခရီးစဉ်သည် လုံးဝ ပျက်စီးသွားပေလိမ့်မည်။ ယခုကဲ့သို့သော ဘေးကျပ်နံကျပ် အခြေအနေမျိုးတွင် သေချာပေါက် သေလမ်းသာ ရှိတော့သည်။

"စိတ်မပူပါနဲ့... ဒါက ရွှမ်ဟွမ်ဂိုဏ်းချုပ်ကိုယ်တိုင် ချမှတ်ထားတဲ့ အမိန့်ပါ..."

"ရွှမ်ဟွမ်ဂိုဏ်းကို လာရောက်ခိုလှုံချင်သူ မည်သူ့ကိုမဆို လက်ခံမယ်တဲ့..."

"တကယ်တော့ ငါတို့တင် မဟုတ်ဘူး... ရွှမ်ဟွမ်ဂိုဏ်းကို လာရောက်ခိုလှုံတဲ့ မိသားစုတွေ အများကြီး ရှိတယ်..."

"ငါတို့က အဲဒီအထဲက တစ်ခုပဲ ရှိပါသေးတယ်..."

"တကယ်တမ်း ပြောရရင် ငါတို့မိသားစုထဲက ကျင့်ကြံသူတချို့တောင် တည်နေရာရွှေ့ပြောင်းအစီအရင်ကို သုံးပြီး ကြယ်သုံးပွင့်ကျွန်းစုကို အရင်သွားပြီးတော့ ဒီကိစ္စကို အတည်ပြုပြီးပါပြီ..."

ကျင့်ကြံသူတစ်ဦးက လေးနက်စွာ ပြောလိုက်သည်။

အကယ်၍ ဤကိစ္စကို ထပ်ခါတလဲလဲ အတည်မပြုထားခဲ့ပါက သူတို့အနေဖြင့် မိသားစုလိုက် ပြောင်းရွှေ့သည့် ဤသို့သောကိစ္စကြီးကို လုပ်ဆောင်ရဲမည် မဟုတ်ပေ။

မည်သို့ပင်ဖြစ်စေ ကျင့်ကြံသူ မိသားစုများအတွက် ဤသည်မှာ သေရေးရှင်ရေး ကိစ္စဖြစ်၏။

ရာနှုန်းပြည့် မသေချာပါက ပေါ့ပေါ့ဆဆ လုပ်ဆောင်ရဲကြမည် မဟုတ်ချေ။

"ဟုတ်သားပဲ..."

"ဒီကိစ္စကို အတည်ပြုဖို့အတွက် ရွှမ်ဟွမ်ဂိုဏ်းကို သွားတုန်းက ငါတို့မိသားစုမှာ အထွတ်အထိပ်အဆင့် ဝိညာဉ်ကျောက်တုံး သုံးတုံးတောင် ကုန်ကျခဲ့ရတာ..."

"ကြီးကြီးမားမား ရင်းနှီးထားရတာလို့တောင် ပြောလို့ရတယ်..."

အခြားကျင့်ကြံသူတစ်ဦး၏ မျက်နှာပေါ်တွင် နှမြောတသဖြစ်သော အရိပ်အယောင်များ ပေါ်လာလေသည်။

သာမန်ကျင့်ကြံသူ မိသားစုများအတွက် အထွတ်အထိပ်အဆင့် ဝိညာဉ်ကျောက်တုံး သုံးတုံးဆိုသည်မှာ အလွန်ပင် ဈေးကြီးလှပြီး၊ အောက်ခြေအဆင့် ဝိညာဉ်ကျောက်တုံး သုံးသောင်းနှင့် ညီမျှရာ လူတိုင်း တတ်နိုင်သည်တော့ မဟုတ်ပေ။

တည်နေရာရွှေ့ပြောင်းအစီအရင်ကို အသုံးပြု၍ ရွှမ်ဟွမ်ဂိုဏ်းသို့ တိုက်ရိုက် သွားရောက်နိုင်ပါလျက်နှင့်၊ အဘယ်ကြောင့် သူတို့သည် သင်္ဘောစီးပြီး နှစ်ပေါင်းများစွာ ကြာမြင့်အောင် ပင်လယ်ပြင်ကို ဖြတ်သန်း၍ ကြယ်သုံးပွင့်ကျွန်းစုသို့ သွားနေရသနည်းဟု ဆိုလျှင် ပိုက်ဆံမရှိသောကြောင့်ပင် ဖြစ်သည်။

ချမ်းသာသော ကျင့်ကြံသူများသည် တည်နေရာရွှေ့ပြောင်းအစီအရင်ကို တိုက်ရိုက် အသုံးပြုကြ၏။

အနည်းငယ် ဆင်းရဲလျှင် လှေပျံကို စီးနင်းကြပြီး အမြန်နှုန်း ပိုမြန်ပေသည်။

သို့သော် သူတို့မှာမူ လှေပျံပင် မစီးနိုင်ကြသဖြင့် သာမန်သင်္ဘောကိုသာ စီးနင်းပြီး ပင်လယ်ပြင်ကို ဖြတ်သန်းနေရခြင်း ဖြစ်သည်။

လက်တွေ့တွင် ချန်လန်ပင်လယ်ဒေသ၌ သင်္ဘောများသည် အဓိက သယ်ယူပို့ဆောင်ရေးယာဉ်များ ဖြစ်နေဆဲပင်။

လှေပျံကဲ့သို့သော အရာများသည် ဇိမ်ခံပစ္စည်းများ ဖြစ်ပြီး စတင်အသုံးပြုတိုင်း ဝိညာဉ်ကျောက်တုံး အမြောက်အမြား ကုန်ကျလေသည်။

ကျင့်ကြံသူ အနည်းငယ်သာ ထိုကုန်ကျစရိတ်ကို တတ်နိုင်ကြသည်။

"ဒါပေမဲ့ ဒီလိုလုပ်ရတာ တန်ပါတယ်ကွာ..."

"ချန်လန်ပင်လယ်ဒေသတစ်ခုလုံး နေရာအနှံ့မှာ မိစ္ဆာသားရဲတွေ ကျူးကျော်နေပြီလေ... ကြည့်ရတာ အရမ်းကို ဆိုးရွားလွန်းတယ်..."

"ရွှမ်ဟွမ်ဂိုဏ်းတည်ရှိတဲ့ ဧရိယာတစ်ခုတည်းမှာပဲ မိစ္ဆာသားရဲတွေ မကျူးကျော်ရဲကြတာ..."

"အကြောင်းရင်းကတော့ သိပ်ကိုရှင်းတယ်... ရွှမ်ဟွမ်ဂိုဏ်းက လုံလောက်အောင် စွမ်းအားကြီးမားလို့ပဲ..."

"လွန်ခဲ့တဲ့ နှစ်နှစ်ဆယ်လောက်က မိုးကြိုးသိန်းငှက်မျိုးနွယ်စု ကျူးကျော်လာတုန်းက ရွှမ်ဟွမ်ဂိုဏ်းချုပ်ကိုယ်တိုင် ထွက်တိုက်ခဲ့တာလေ..."

"အဲဒီတိုက်ပွဲတုန်းက မိစ္ဆာသားရဲ သန်းချီကို သတ်ဖြတ်ခဲ့ပြီး... စတုတ္ထအဆင့် မိစ္ဆာသားရဲ အကောင်တစ်ရာကျော်ကိုပါ သတ်ဖြတ်ခဲ့တယ်တဲ့..."

"အဲဒီတိုက်ပွဲက ချန်လန်ပင်လယ်ဒေသတစ်ခုလုံးကို တုန်လှုပ်သွားစေခဲ့တာ..."

"အဲဒီနောက်ပိုင်းကစပြီး အဲဒီမိစ္ဆာသားရဲတွေ အစောပိုင်းတုန်းကလောက် မောက်မာဝံ့ကြွားခြင်း မရှိတော့ဘဲ... သူတို့ရဲ့ နယ်မြေကိုတောင် မချဲ့ထွင်ရဲတော့ဘဲ ခေါင်းဝှက်နေကြတော့တာ..."

"ရွှမ်ဟွမ်ဂိုဏ်းတည်ရှိတဲ့ ပင်လယ်ပြင်ကိုဆိုရင် ဘယ်မိစ္ဆာသားရဲမှ မကျူးကျော်ရဲကြတော့ဘူး..."

"အဲဒါကြောင့် ရွှမ်ဟွမ်ဂိုဏ်းကို ဝင်လိုက်တာနဲ့ ငါတို့ လုံးဝ ဘေးကင်းသွားမှာ... မိစ္ဆာသားရဲတွေရဲ့ ခြိမ်းခြောက်မှုကို စိုးရိမ်စရာ မလိုတော့ဘူး..."

နောက်ထပ် ကျင့်ကြံသူတစ်ဦး၏ မျက်နှာပေါ်တွင် ကြည်ညိုလေးစားသော အရိပ်အယောင်များ ပေါ်လာသည်။

ဤကဲ့သို့သော စွမ်းအားကြီးမားသည့် အင်အားစုကသာ ကပ်ဘေးကာလ၌ ထိပ်တန်းအင်အားစုဟု ခေါ်ဆိုထိုက်ပေသည်။

ထို့ကြောင့်ပင် မရေမတွက်နိုင်သော ကျင့်ကြံသူမိသားစုများ လာရောက်ခိုလှုံကြပြီး ရွှမ်ဟွမ်ဂိုဏ်း၏ ကာကွယ်မှုကို ရယူလိုကြခြင်း ဖြစ်၏။

"ရွှမ်ဟွမ်ဘိုးဘေးက တကယ်ပဲ ငါတို့လူသားမျိုးနွယ်ရဲ့ စံပြပုဂ္ဂိုလ်ပါပဲ... ပြောရရင် ငါတို့ ချန်လန်ပင်လယ်ဒေသရဲ့ နံပါတ်တစ် ဝိညာဉ်သန္ဓေသားကျင့်ကြံသူ ဖြစ်လောက်တယ်..."

လူတစ်ယောက်က သက်ပြင်းချရင်း ပြောလိုက်ရာ လေးစားမှုဖြင့် ဦးညွှတ်လုနီးပါး ဖြစ်နေရှာသည်။

လောကလူသားများသည် ရွှမ်ဟွမ်ဂိုဏ်းချုပ်ကို ရွှမ်ဟွမ်ဘိုးဘေးဟု သတ်မှတ်ထားကြပြီး ဒေသတစ်ခုကို အုပ်စိုးသော ဘိုးဘေးအဆင့် ပုဂ္ဂိုလ်တစ်ဦးပင် ဖြစ်နေလေပြီ။

"ကြားတာတော့ ရွှမ်ဟွမ်ဘိုးဘေး ငယ်ငယ်တုန်းက တစ်ကိုယ်တော်ကျင့်ကြံသူ တစ်ယောက်တဲ့... ပါရမီကောင်းပေမယ့် ဘယ်သူမှ အသိအမှတ်မပြုကြလို့ ဂိုဏ်းသားတောင် မဖြစ်ခဲ့ဘဲ တစ်ကိုယ်တော်ကျင့်ကြံသူ ဖြစ်ခဲ့ရတာတဲ့..."

"ဒါပေမဲ့ ရုပ်ရည်ချောမောတာကို အသုံးချပြီးတော့... အခြေတည်အဆင့် အမျိုးသမီးကျင့်ကြံသူတချို့ရဲ့ သဘောကျမှုကို ရရှိနိုင်ခဲ့ပြီး အိပ်ခန်းသုံးပျော်တော်ဆက်လေး ဖြစ်ခဲ့တယ်တဲ့..."

"ဝူကျိမဟာမိတ်အဖွဲ့ကို ရောက်လာပြီးတော့လည်း... ဝိညာဉ်သန္ဓေသားအဆင့်ကျင့်ကြံသူ သခင်မမက်မွန်ပွင့်ရဲ့ သဘောကျမှုကို ခံရပြီးတော့ ပညာတွေ အကုန်သင်ပေးခံခဲ့ရတာတဲ့..."

"အဲဒါကြောင့် ရွှမ်ဟွမ်ဘိုးဘေးက ဝိညာဉ်သန္ဓေသားအဆင့်ကို တက်လှမ်းနိုင်ပြီး ဒေသတစ်ခုကို အုပ်စိုးနိုင်တဲ့ ဘိုးဘေးတစ်ပါး ဖြစ်လာတော့တာပေါ့..."

လူတစ်ယောက်က သူ စုံစမ်းရရှိထားသော အတင်းအဖျင်းသတင်းများကို လျှို့ဝှက်စွာ ပြောပြလိုက်သည်။

"ဟုတ်ပါ့မလားကွာ... ဒီလိုဆိုရင် ရွှမ်ဟွမ်ဘိုးဘေးက အမျိုးသမီးတွေကို မှီခိုပြီး ကြီးပွားလာတာပေါ့..."

"အသက်ကြီးတဲ့ အမျိုးသမီးကျင့်ကြံသူတွေကို ပေါင်းသင်းပြီး အမြင့်ကို တက်လာတာလား... အဲတာကြောင့် ဒီနေ့ဒီအချိန် အောင်မြင်မှုမျိုး ရခဲ့တာလား..."

လူအများအပြားမှာ အံ့သြသွားကြရပြီး၊ ချန်လန်ပင်လယ်ဒေသကို တုန်လှုပ်စေသော ရွှမ်ဟွမ်ဘိုးဘေး၏ ငယ်ဘဝတွင် ဤကဲ့သို့သော အတွေ့အကြုံများ ရှိခဲ့လိမ့်မည်ဟု ထင်မထားခဲ့ကြပေ။

သူတို့သည် ဝိညာဉ်သန္ဓေသား ဘိုးဘေးများ၏ အတင်းအဖျင်းသတင်းများကို အလွန် စိတ်ဝင်စားကြလေသည်။

"ဒါကလည်း မတတ်နိုင်ဘူးလေ..."

"ရွှမ်ဟွမ်ဘိုးဘေးက တစ်ကိုယ်တော်ကျင့်ကြံသူတစ်ယောက် ပါရမီပဲ ရှိတာ... ဘာနောက်ခံမှ မရှိဘူး..."

"ဒီခေတ်ကြီးမှာ ပါရမီဘယ်လောက်ကောင်းကောင်း ဘာမှမလုပ်နိုင်ဘူး... လောကထဲ ဝင်တိုးချင်ရင် နောက်ခံရှိမှ ဖြစ်တာ..."

"ဒါပေမဲ့ ရွှမ်ဟွမ်ဘိုးဘေးက အခြေအနေအလိုက် နေတတ်တယ်... အသက်ကြီးတဲ့ အမျိုးသမီးကျင့်ကြံသူတွေရဲ့ မတော်မတရား သတ်မှတ်ချက်တွေကို ခံရရင်တောင်မှ အရှက်တကွဲ အကျိုးနည်းခံပြီးတောင် အောင့်အီးသည်းခံခဲ့တာ..."

"ကောလဟာလတွေအရဆိုရင် သူ့မှာ လျှို့ဝှက်ထားတဲ့ ဘွဲ့နာမည်တစ်ခုတောင် ရှိသေးတယ်တဲ့... 'ကျောက်စိမ်းတာအိုအရှင်' တဲ့..."

"စဉ်းစားကြည့်ဗျာ... အဲဒီ အသက်ကြီးတဲ့ အမျိုးသမီးကျင့်ကြံသူတွေ၊ အဆင့်မြင့် အမျိုးသမီးကျင့်ကြံသူတွေကို မျက်နှာလိုမျက်နှာရ လုပ်ဖို့အတွက် ဘယ်လောက်တောင် ပေးဆပ်ခဲ့ရမလဲဆိုတာ..."

"ကံကောင်းလို့ အခုအချိန်မှာ ရွှမ်ဟွမ်ဘိုးဘေးက ဒေသတစ်ခုကို အုပ်စိုးတဲ့ ခေါင်းဆောင်ကြီး ဖြစ်လာခဲ့တာ..."

"ဒါပေမဲ့ ဒီလိုဖြစ်နေရင်တောင်မှ သူ ငယ်ငယ်တုန်းက မှောင်မိုက်တဲ့ သမိုင်းကြောင်းနဲ့ အစော်ကားခံခဲ့ရတာတွေကိုတော့ ဖုံးကွယ်လို့ မရဘူးပေါ့ကွာ..."

ထိုကျင့်ကြံသူက လျှို့ဝှက်စွာ ဖောက်သည်ချလိုက်ပြန်သည်။

ဝိညာဉ်သန္ဓေသား ဘိုးဘေးတစ်ပါးစီတိုင်း၏ ကြီးပွားတိုးတက်မှု နောက်ကွယ်တွင် ကိုယ်ပိုင်ကျခဲ့ရသော သွေးနှင့်မျက်ရည် သမိုင်းကြောင်းများ ရှိစမြဲဟု သူ ထင်မြင်ယူဆထားသည်။

ထိုအထဲတွင် ရွှမ်ဟွမ်ဘိုးဘေးလည်း အပါအဝင်ပင် ဖြစ်လေ၏။

"ချန်လန်ပင်လယ်ဒေသမှာ နာမည်ကြီးတဲ့ ရွှမ်ဟွမ်ဘိုးဘေးမှာတောင် ဒီလိုမျိုး သွေးနဲ့မျက်ရည်သမိုင်းကြောင်း ရှိခဲ့လိမ့်မယ်လို့ ထင်မထားဘူး..."

"အရင်းအမြစ်လေး နည်းနည်းရဖို့အတွက်နဲ့ 'ကျောက်စိမ်းတာအိုအရှင်' အဖြစ် ခံယူခဲ့ရတာပေါ့..."

"ဒါပေမဲ့ ပြန်စဉ်းစားကြည့်ရင်... တကယ်လို့ ငါ့ကို ထောက်ပံ့မယ့်သူက သခင်မမက်မွန်ပွင့်သာ ဆိုရင်တော့... ငါလည်း ကျေကျေနပ်နပ်ကြီး လက်ခံမိမှာပဲလေ..."

"မင်းက ဘာနားလည်လို့လဲ... ကြားတာတော့ ရွှမ်ဟွမ်ဘိုးဘေးကိုယ်တိုင်က ပြိုင်ဘက်ကင်းတဲ့ ရုပ်ချောကောင်လေးတဲ့... ရုပ်ရည်ချောမောမှုကိုပဲ ပြောကြစတမ်းဆိုရင် သခင်မမက်မွန်ပွင့်တောင် သူ့ကို မယှဉ်နိုင်ဘူးတဲ့...

ရွှမ်ဟွမ်ဘိုးဘေးက အထောက်ပံ့ခံလိုက်ရတယ် ဆိုပေမယ့် တကယ်တမ်းတော့ သူက အကြီးကြီး နစ်နာသွားတာပါကွ... အဲဒီ အသက်ကြီးတဲ့ အမျိုးသမီးကျင့်ကြံသူတွေက ဘယ်လောက်တောင် ဖောက်လွဲဖောက်ပြန် အတွင်းစိတ်တွေရှိတယ်ဆိုတာ မင်း မသိလို့... ဘယ်လိုနည်းလမ်းတွေ သုံးမလဲဆိုတာ ဘယ်သူသိမှာလဲ..."

"ဘုရားရေ... ရွှမ်ဟွမ်ဘိုးဘေး ငယ်ငယ်တုန်းက ဒီလို ဆက်ဆံခံရမှုမျိုး ကြုံခဲ့ရတာလား..."

"ဟဟ... မင်းက ဘာမှတ်နေလို့လဲ... သူများရဲ့ အောက်ကျို့ခံရတာ လွယ်တယ်ထင်နေလား... အရည်အချင်းမရှိရင် သူများက မင်းကို ဘာကိစ္စ လိုချင်မှာလဲ..."

"ရွှမ်ဟွမ်ဘိုးဘေးဆိုတဲ့အတိုင်းပဲ... တကယ့်ကို ငါတို့ရဲ့ စံပြပုဂ္ဂိုလ်ပါပဲ... အခြေအနေအလိုက် နေတတ်ထိုင်တတ်တာ ယောက်ျားကောင်း ပီသပါပေတယ်..."

"ဟူး... ဒါက တစ်ကိုယ်တော်ကျင့်ကြံသူတွေရဲ့ အခက်အခဲပဲလေ... ကျင့်ကြံခြင်း အရင်းအမြစ်လေး ရဖို့အတွက် ကိုယ့်သိက္ခာကို ရောင်းစားပြီး သူဌေးမကြီးတွေရဲ့ စော်ကားမှုကို ခံရရင်တောင်မှ ခေါင်းငုံသည်းခံရမှာပဲ... မဟုတ်ရင် ဘယ်လိုလုပ် သက်ရှည်လမ်းစဉ်ကို လျှောက်လှမ်းနိုင်မှာလဲကွာ..."

"ဟုတ်တာပေါ့... ရွှမ်ဟွမ်ဘိုးဘေးက တကယ်ပဲ ငါတို့ တစ်ကိုယ်တော်ကျင့်ကြံသူတွေရဲ့ စံပြပါပဲ..."

ကျင့်ကြံသူအများအပြားမှာ ဦးညွှတ်ကာ လေးစားသမှုသာ ပြုလိုက်ကြလေတော့သည်။

နာမည်ကျော်ကြားလှသော ရွှမ်ဟွမ်ဘိုးဘေးတွင် ဤကဲ့သို့သော ခက်ခဲလှသည့်သမိုင်းကြောင်း ရှိခဲ့လိမ့်မည်ဟု သူတို့ ထင်မှတ်မထားခဲ့ကြပေ။ တကယ့်ကို စိတ်ကူးယဉ်နိုင်စွမ်းထက်ပင် ကျော်လွန်နေချေသည်။

"ဟုတ်သားပဲ... ခုနကပြောတဲ့ ကိစ္စကို မင်းတို့ လျှောက်မပြောကြနဲ့နော်..."

"ဒါက တကယ့်ဒိတ်ဒိတ်ကြဲ လျှို့ဝှက်သတင်း... သာမန်လူတွေ မသိကြဘူး..."

"တကယ်လို့ လျှောက်ပြောလို့ ရွှမ်ဟွမ်ဂိုဏ်းသားတွေ သိသွားရင် မင်းနဲ့ငါ အတော်လေး ဒုက္ခရောက်လိမ့်မယ်..."

"အခု ရွှမ်ဟွမ်ဘိုးဘေးက အောင်မြင်ကျော်ကြားနေပြီဆိုတော့... သူ ဘယ်လိုတွေးမလဲဆိုတာ ဘယ်သူသိမှာလဲ..."

"ကြားတာတော့ သူက သဘောထား သိပ်မကြီးဘူးတဲ့... သူ့ကို ပြစ်မှားမိတဲ့သူဆိုရင် တစ်ယောက်မှ မလွတ်မြောက်နိုင်ဘူးတဲ့..."

"မင်းတို့လည်း အပြင်မှာ ကောလဟာလတွေ လျှောက်မဖြန့်ကြနဲ့..."

ထိုကျင့်ကြံသူက တိုးတိုးလေး ပြောလိုက်ပြန်သည်။

"အေးပါကွ... ငါတို့လည်း အကျိုးနဲ့အပြစ်ကို နားလည်ပါတယ်..."

ကျင့်ကြံသူအများအပြားမှာ တညီတညွတ်တည်း ခေါင်းညိတ်လိုက်ကြတော့သည်။