မျက်နှာပြောင်တိုက်သော ဝိညာဉ်သန္ဓေသားဘိုးဘေးများ၊ အားလုံးက ကျုပ်သမီးကို အမြတ်လာထုတ်နေကြတာလား(၁)။

ဤအချိန်တွင် လိုဏ်ဂူတစ်ခုအတွင်း၌...။

"မိုးကြိုးသည် ယန်၊ လျှပ်စီးသည် ယင်၊ ယင်နှင့်ယန် ပေါင်းစပ်မှ မိုးကြိုးလျှပ်စီး ဖြစ်ပေါ်၏။"

ကျိုးစွေ့သည် ကြမ်းပြင်ပေါ်တွင် တင်ပျဉ်ခွေထိုင်နေပြီး သူ၏ခန္ဓာကိုယ်ပေါ်တွင် မိုးကြိုးစွမ်းအားများ ပေါ်ထွက်နေလေသည်။

သစ်သားမိုးကြိုး၊ ရေမိုးကြိုး၊ မီးမိုးကြိုး၊ မြေမိုးကြိုးနှင့် ရွှေမိုးကြိုးဟူသော ဓာတ်ငါးပါးမိုးကြိုးစွမ်းအားများသည် အတူတကွ စုဝေးလာပြီး သူ၏ နှလုံး၊ အသည်း၊ သရက်ရွက်၊ အဆုတ်နှင့် ကျောက်ကပ်တို့ထဲသို့ စီးဝင်ပေါင်းစပ်သွားကြသည်။

ဤအခိုက်အတန့်တွင် ဓာတ်ငါးပါးသင်္ကေတများနှင့် မိုးကြိုးသင်္ကေတများ အားလုံး စုဝေးသွားကြသည်။

နောက်ဆုံးတွင် မျိုးစေ့တစ်ခုအဖြစ် စုစည်းသွားလေသည်။ ဤအရာကို 'နတ်ဘုရားစွမ်းရည်မျိုးစေ့' ဟု ခေါ်ဆိုပေသည်။

ထို နတ်ဘုရားစွမ်းရည်မျိုးစေ့သည်လည်း သူ၏ ကိုယ်တွင်းကလီစာများထဲသို့ ဝင်ရောက်သွားပြီး ဓာတ်ငါးပါးမိုးကြိုးစွမ်းအားများနှင့် ပေါင်းစပ်သွားလေသည်။

သူ၏ခန္ဓာကိုယ်သည် မရေမတွက်နိုင်သော မိုးကြိုးစွမ်းအားများနှင့် ပေါင်းစပ်သွားပြီး ခန္ဓာကိုယ်၏ နေရာအနှံ့အပြားသို့ စီးဆင်းသွားသကဲ့သို့ ရှိသည်။

ဤအချိန်တွင် သူ၏ခန္ဓာကိုယ်သည် မိုးကြိုးစွမ်းအင်များကို လက်ခံထားရှိသော 'ကောင်းကင်မိုးကြိုးခန္ဓာ' အဖြစ် ပြောင်းလဲသွားသကဲ့သို့ပင်။

"အောင်မြင်သွားပြီ..."

"အနှစ်နှစ်ဆယ်ကြာ အချိန်ကုန်ဆုံးပြီးနောက်... နောက်ဆုံးတော့ 'ဓာတ်ငါးပါးမိုးကြိုးပညာရပ်' ကို အောင်မြင်ခဲ့ပြီ..."

"နတ်ဘုရားစွမ်းရည်မျိုးစေ့ကို စုစည်းနိုင်ခဲ့ပြီပဲ..."

ကျိုးစွေ့ မျက်လုံးဖွင့်လိုက်ရာ ကြောက်မက်ဖွယ်ကောင်းသော အရောင်အဝါများ လက်သွားပြီး သူ၏မျက်ဝန်းအနက်ပိုင်းထဲတွင် ကြောက်မက်ဖွယ် မိုးကြိုးစွမ်းအားများ ကိန်းအောင်းနေသကဲ့သို့ ရှိကာ၊ အကြည့်တစ်ချက်တည်းနှင့်ပင် ကြီးမားသော သတ်ဖြတ်ခြင်းစွမ်းအားများ ပါဝင်နေလေသည်။

ဤအချိန်တွင် 'နတ်ဘုရားစွမ်းရည်' ဆိုသည်မှာ မည်သည့်အရာဖြစ်ကြောင်း သူ နားလည်သဘောပေါက်သွားသည်။

အတိုင်းအတာတစ်ခုအထိ ပြောရလျှင် နတ်ဘုရားစွမ်းရည်ဆိုသည်မှာ မန္တန်အတတ်တစ်ခုပင် ဖြစ်သော်လည်း၊ ၎င်းသည် မန္တန်အတတ်တို့၏ အမြင့်ဆုံးသော ဖော်ပြချက်ဖြစ်ပေ၏။

ကျင့်ကြံသူတစ်ဦးသည် မန္တန်အတတ်များကို မရပ်မနားကျင့်ကြံပြီး မန္တန်အတတ်ကို အမြင့်ဆုံးအဆင့်ထိ ရောက်ရှိအောင် လုပ်ဆောင်နိုင်သောအခါ ထိုမန္တန်အတတ်ကို နတ်ဘုရားစွမ်းရည်အဖြစ် အသွင်ပြောင်းလဲနိုင်ပေသည်။

မန္တန်အတတ်တစ်ခုသည် နတ်ဘုရားစွမ်းရည်အဆင့်သို့ ရောက်ရှိသွားသောအခါ ဆွေးမြေ့နေသောအရာကို မှော်ဆန်သော အံ့ဖွယ်အရာအဖြစ် ပြောင်းလဲနိုင်စွမ်း ရှိလာသည်။

တစ်ချိန်တည်းမှာပင် ချက်ချင်းဆိုသလို ထုတ်ဖော်အသုံးပြုနိုင်သည်။

သာမန်မန္တန်အတတ်များဆိုလျှင် လက်သင်္ကေတများ ဖော်ရန်လိုအပ်ပြီး ပြင်ဆင်ချိန် အနည်းငယ် လိုအပ်သည်။

သို့သော် နတ်ဘုရားစွမ်းရည်မှာမူ စိတ်ဆန္ဒတစ်ချက်ဖြင့် ချက်ချင်း ပေါက်ကွဲထွက်ပေါ်လာနိုင်ပြီး ကောင်းကင်နှင့် မြေကြီး၏ စွမ်းအားများကို ဆွဲငင်ကာ ကမ္ဘာမြေကို တုန်လှုပ်စေသော စွမ်းအားကို ထုတ်ဖော်နိုင်သည်။

မိစ္ဆာမျိုးနွယ်စု၏ သွေးမျိုးဆက်နတ်ဘုရားစွမ်းရည်များနှင့် အနည်းငယ် တူညီမှုရှိသည်။

ကွာခြားချက်မှာ သွေးမျိုးဆက်နတ်ဘုရားစွမ်းရည်သည် မျိုးရိုးလိုက်ခြင်းမှ ရရှိပြီး မွေးရာပါတတ်မြောက်ခြင်း ဖြစ်သော်လည်း၊ နတ်ဘုရားစွမ်းရည် မန္တန်အတတ်များမှာမူ ကိုယ်တိုင် လေ့လာသင်ယူရခြင်း ဖြစ်သည်။

သို့သော် ဝိညာဉ်သန္ဓေသားအဆင့်သို့ ရောက်ရှိမှသာ နတ်ဘုရားစွမ်းရည် မန္တန်အတတ်များကို ကျွမ်းကျင်ပိုင်နိုင်စွာ တတ်မြောက်နိုင်သည်။

ဤသည်မှာလည်း ဝိညာဉ်သန္ဓေသားကျင့်ကြံသူများ အဘယ်ကြောင့် ဤမျှ စွမ်းအားကြီးမားရသနည်း ဆိုသည့် အကြောင်းရင်းများထဲမှ တစ်ခုပင် ဖြစ်လေ၏။

နတ်ဘုရားစွမ်းရည် မန္တန်အတတ်တစ်ခု၏ စွမ်းအားသည် မိုင်ထောင်ချီသော ဧရိယာကို လွှမ်းခြုံနိုင်ပြီး လူသားအသွင် နျူကလီးယားဗုံးတစ်လုံးကဲ့သို့ ဖျက်ဆီးအားကို ဖြစ်ပေါ်စေနိုင်သည်။

"ငါ အရင်က ကျင့်ကြံခဲ့တဲ့ မန္တန်အတတ်အများအပြားက မဟာဆရာသခင်အဆင့် ရောက်ပြီးတာနဲ့ ဘာလို့ ဆက်ပြီး မတိုးတက်တော့တာလဲဆိုတာ အခုမှပဲ နားလည်တော့တယ်..."

"ဘာလို့လဲဆိုတော့ ဒါက မန္တန်အတတ်တွေရဲ့ အကန့်အသတ်ကို ရောက်နေပြီမို့လို့ပဲ..."

"အဲဒီထက် ပိုပြီး အဆင့်မြင့်သွားရင် နတ်ဘုရားစွမ်းရည် ဖြစ်သွားမှာ..."

"နှမြောစရာကောင်းတာက ဒီအဆင့်ကို ရောက်ဖို့ ကျင့်ကြံသူ ဘယ်နှယောက်လောက် အတားအဆီး ဖြစ်နေမလဲ မသိနိုင်ဘူး..."

"ရုတ်တရက် ဉာဏ်အလင်းပွင့်ပြီး ကောင်းကင်နဲ့မြေကြီးရဲ့ သဘောတရားကို နားလည်သဘောပေါက်မှသာ ရနိုင်မှာ..."

"အဲဒီလိုမှ မဟုတ်ရင် ဒီအဆင့်ကို ကျော်ဖြတ်ဖို့ ဘယ်လိုမှ မဖြစ်နိုင်ဘူး..."

"ဒါမှမဟုတ် နတ်ဘုရားစွမ်းရည် မန္တန်အတတ်တစ်ခုကို တိုက်ရိုက် ရှာဖွေတွေ့ရှိပြီး ကျင့်ကြံရင်လည်း နတ်ဘုရားစွမ်းရည်ကို ရရှိနိုင်တယ်..."

"ဒါပေမဲ့ နတ်ဘုရားစွမ်းရည် မန္တန်အတတ်တစ်ခုကို ရှာတွေ့ဖို့ဆိုတာလည်း မလွယ်ကူဘူးလေ..."

ကျိုးစွေ့ မျက်လုံးများကို မှေးစင်းလိုက်သည်။

'ဓာတ်ငါးပါးမိုးကြိုးပညာရပ်' ကို အပြည့်အဝ အောင်မြင်သွားပြီးနောက် မန္တန်အတတ်များအပေါ် သူ၏ နားလည်မှုသည် နောက်တစ်ဆင့်သို့ တက်လှမ်းသွားပြီဟု ခံစားလိုက်ရပြီး၊ ယခင်က သူ ကျွမ်းကျင်ခဲ့သော မန္တန်အတတ်အများအပြားသည် အဘယ်ကြောင့် မဟာဆရာသခင်အဆင့်တွင်သာ ရပ်တန့်နေပြီး ဆက်လက် မတိုးတက်နိုင်ရသနည်း ဆိုသည်ကို စတင် နားလည်လာခဲ့ရသည်။

အကြောင်းမှာ ထပ်မံတိုးတက်နိုင်ပါက နတ်ဘုရားစွမ်းရည်အဖြစ်သို့ ပြောင်းလဲသွားမည် ဖြစ်သောကြောင့်ပင်။

အမှန်အတိုင်းဆိုရလျှင် ၎င်းသည် သာမန်မန္တန်အတတ်များ၏ အဆုံးစွန်သော အကန့်အသတ်ဖြစ်နေသဖြင့် ထပ်မံ တိုးတက်ရန် မဖြစ်နိုင်သလောက်ပင်။

ဝှစ်...

ဤအကြောင်းကို တွေးမိပြီးနောက် ကျိုးစွေ့၏ကိုယ်ခန္ဓာသည် တစ်ချက်လှုပ်ရှားသွားပြီး လိုဏ်ဂူထဲမှ ချက်ချင်းထွက်ခွာကာ ရွှမ်ဟွမ်ကျွန်းရှိ လူသူကင်းမဲ့သော နေရာတစ်ခုသို့ ရောက်ရှိသွားလေသည်။

ဂျိမ်း... ဂျိမ်း... ဂျိမ်း…

သူ စိတ်ဆန္ဒတစ်ချက် ပြုလိုက်သည်နှင့် ဓာတ်ငါးပါးမိုးကြိုးများကို ချက်ချင်းပင် ထိန်းချုပ်လိုက်သည်။

ဤအခိုက်အတန့်တွင် ကောင်းကင်ယံ၌ တိမ်မည်းများ ဖုံးလွှမ်းသွားပြီး မိုးကြိုးလျှပ်စီးများ လင်းခနဲလက်ခနဲ ဖြစ်ပေါ်လာကာ ရွှေမိုးကြိုး၊ သစ်သားမိုးကြိုး၊ မြေမိုးကြိုး၊ ရေမိုးကြိုးနှင့် မီးမိုးကြိုးတို့ ပါဝင်ပြီး၊ ဓာတ်ငါးပါးမိုးကြိုးများ အားလုံးစုဝေးနေသကဲ့သို့ ဟင်းလင်းပြင်ထဲတွင် လှည့်ပတ်သွားလာနေကြ‌တော့သည်။

ချက်ချင်းပင် မိုးကြိုးတန်းများသည် ကောင်းကင်မှ ကျဆင်းလာပြီး ထောင်သောင်းချီသော မိုးကြိုးတန်းများအဖြစ် မိုင်ရာချီသော ဧရိယာကို ဖုံးလွှမ်းသွားလေသည်။

နောက်တစ်စက္ကန့်တွင် မြေကြီးပေါ်သို့ ပြင်းထန်စွာ ရိုက်ခတ်သွားပြီး မြေကြီးပေါ်၌ ကြီးမားသော တွင်းနက်ကြီးများ ချက်ချင်း ဖြစ်ပေါ်စေကာ ကျောက်ခဲများ လွင့်စင်ပြီး ဖုန်မှုန့်များ အုန်းအုန်းထသွားကာ မြေပြင်သည်လည်း မီးကျွမ်းသွားလေသည်။

၎င်းသည် ဥက္ကာခဲပေါင်းများစွာ ကျဆင်းလာပြီး တိုက်ခိုက်လိုက်သကဲ့သို့ပင်။

"ဓာတ်ငါးပါးမိုးကြိုးပညာရပ် ဆိုတာနဲ့ တကယ်ကို ထိုက်တန်ပါပေတယ်..."

"အခြေခံအဆင့်ပဲ ရှိသေးတာတောင် ဒီလောက် စွမ်းအားကြီးနေပြီ..."

"ဒီနတ်ဘုရားစွမ်းရည်က မိစ္ဆာသားရဲတွေနဲ့ နတ်ဆိုးတွေရဲ့ သဘာဝရန်သူပဲ..."

"ထုတ်သုံးလိုက်တာနဲ့ အသတ်အဖြတ်ပွဲကြီးတစ်ခုလိုကို ဖြစ်သွားစေမှာ..."

"'မိုးကြိုးကပ်ဘေးကူ'ရဲ့ စွမ်းအား မပါဘဲနဲ့တောင်... ငါ့ရဲ့ ကိုယ်ပိုင်စွမ်းအားသက်သက်နဲ့ မိုးကြိုးပညာရပ်ကို သုံးပြီး ရန်သူကို သတ်ဖြတ်နိုင်ပြီ..."

ကျိုးစွေ့ အနည်းငယ်ပြုံးလိုက်ပြီး အလွန်ပင် ကျေနပ်သွားသည်။

သူ၏ခန္ဓာကိုယ် အတွင်းပိုင်းနေရာတွင် နတ်ဘုရားစွမ်းရည်မျိုးစေ့တစ်ခု ဖြစ်ပေါ်လာသည်ကို အာရုံခံမိလိုက်သည်။ ဤသည်မှာ ဓာတ်ငါးပါးမိုးကြိုးမျိုးစေ့ ဖြစ်ပြီး၊ အပေါ်ယံတွင် ရွှေ၊ သစ်သား၊ မြေ၊ ရေ၊ မီး မိုးကြိုးသင်္ကေတများ ပေါ်နေကာ အချင်းချင်း ယှက်နွှယ်နေပြီး တစ်သားတည်း ပေါင်းစပ်နေလေသည်။

သို့သော် ဤ နတ်ဘုရားစွမ်းရည်မျိုးစေ့သည် သေးငယ်နေသေးပြီး အစပျိုးအဆင့်တွင်သာ ရှိသေးသည်။

အကယ်၍ ထပ်မံ ကြီးထွားလာပါက ဤနတ်ဘုရားစွမ်းရည်မျိုးစေ့၏ စွမ်းအားသည်လည်း ပိုမို ကြီးမားလာမည်ဖြစ်ပြီး ပိုမို ကြောက်မက်ဖွယ်ကောင်းသော စွမ်းအားများကို ထုတ်လွှတ်နိုင်ပေလိမ့်မည်။

ထိုအချိန်ရောက်လျှင် သူသည် စစ်မှန်သော မိုးကြိုးနတ်ဘုရား ဆင်းသက်လာသကဲ့သို့ပင် မည်သူမျှ ယှဉ်ပြိုင်နိုင်မည် မဟုတ်တော့ပေ။

ဓာတ်ငါးပါးမိုးကြိုးပညာရပ်ကို သင်ယူရန် အချိန်များစွာ ပေးလိုက်ရခြင်းသည် အလွန်မှန်ကန်သည်ဟုသာ ဆိုရပေမည်။

"ဟုတ်သားပဲ... ငါ့ရဲ့ ကျင့်ကြံမှု တိုးတက်လာလား ကြည့်ရအောင်..."

ကျိုးစွေ့သည် အတွေးတစ်ချက်ဖြင့် သူ၏ အချက်အလက်ပြ မျက်နှာပြင်ကို ချက်ချင်းပင် ဖွင့်လိုက်သည်။

[ ပိုင်ရှင် - ကျိုးစွေ့၊ ကျင့်ကြံမှု - ဝိညာဉ်သန္ဓေသား အလယ်အလတ်အဆင့် (တိုးတက်မှု ၉၀%)၊ သက်တမ်း - ၁၈၅ (၂၁၀၀၀ နှစ်) ]

[ ပင်ကိုပါရမီ - ဒုတိယအဆင့် စိတ်ဝိညာဉ်အမြစ် (၉၉%) ]

[ ဓားသိုင်းပညာ - စတုတ္ထအဆင့် အထွတ်အထိပ် (၃%) ]

[ အဆောင်ပညာ - စတုတ္ထအဆင့် အလယ်အလတ် (၃၅%) ]

[ အစီအရင်ပညာ - ပဉ္စမအဆင့် အထွတ်အထိပ် (၉၉%) ]

[ ဆေးဖော်စပ်ပညာ - စတုတ္ထအဆင့် အထွတ်အထိပ် (၈၀%) ]

[ လက်နက်သွန်းလုပ်ခြင်း - စတုတ္ထအဆင့် အလယ်အလတ် (၄၅%) ]

[ နတ်ဆိုးအသွင်ပြောင်း ပညာရပ် - မဟာဆရာသခင်အဆင့် (၉၉%) ]

[ ဓာတ်ငါးပါး ဆေးဖော်စပ်ပညာရပ် - မဟာဆရာသခင်အဆင့် (၉၉%) ]

[ မိစ္ဆာနှလုံးသားဆင့်ခေါ်ခြင်း ပညာရပ် - မိစ္ဆာမျိုးစေ့၊ မိစ္ဆာဆင့်ခေါ်ခြင်း ]

[ အလင်းမျက်လုံးခုနစ်လုံး လျှို့ဝှက်ပညာရပ် - နှလုံးသားမျက်လုံး အသိအမှတ်ပြုခြင်း၊ နှလုံးသားမျက်လုံး အလိုလိုသိမြင်ခြင်း၊ နှလုံးသားမျက်လုံး ဘာသာစကား ]

[ ကျူးရှန်းဓားသိုင်း - ပထမပုံစံ သဏ္ဌာန်မဲ့ဓားအလင်း ]

[ ဓာတ်ငါးပါးမိုးကြိုးပညာရပ် - အခြေခံအဆင့်၊ ကုယုံဆန်းကြယ်အလင်း - အကြီးစားအောင်မြင်မှု၊ ရှေးဟောင်းလိပ်ပညာရပ် - ဒုတိယအဆင့်၊ ဝိညာဉ်ဖြန့်ကျက် အဆိပ်ဆူး - မဟာဆရာသခင်အဆင့်၊ မီးလုံးပညာရပ် - မဟာဆရာသခင်အဆင့်၊ လေဓားသွားပညာ - မဟာဆရာသခင်အဆင့်၊ ရွှေအလင်းပညာ - မဟာဆရာသခင်အဆင့်၊ ရေခဲနှင်းပညာ - မဟာဆရာသခင်အဆင့်၊ နွေလေမိုးပညာ - မဟာဆရာသခင်အဆင့်၊ လျှပ်စီးဆင့်ခေါ်ခြင်းပညာ - မဟာဆရာသခင်အဆင့်... ]

[ 'ချစ်ခြင်းမေတ္တာကူ' - ပဉ္စမအဆင့် အလယ်အလတ်၊ 'ကိုယ်ပွားကူ' - စတုတ္ထအဆင့် အလယ်အလတ်၊ 'အရက်ကူ' - စတုတ္ထအဆင့် အလယ်အလတ်၊ 'ရွှေစားကူ' - စတုတ္ထအဆင့် အလယ်အလတ်၊ 'စာအုပ်ကူ' - စတုတ္ထအဆင့် အလယ်အလတ်၊ 'အိပ်မက်ဝိညာဉ်ကူ' - စတုတ္ထအဆင့် အထွတ်အထိပ်၊ 'နဂါးဆင်ကူ' - စတုတ္ထအဆင့် အလယ်အလတ်၊ 'ရွှေအလင်းအဆိပ်တစ်ထောင်ကူ' - စတုတ္ထအဆင့် အလယ်အလတ်၊ 'တည်နေရာရွှေ့ပြောင်းကူ' - စတုတ္ထအဆင့် အလယ်အလတ်၊ 'အစီအရင်နှလုံးသားကူ' - ပဉ္စမအဆင့် အထွတ်အထိပ်၊ 'ပစ္စည်းရှာဖွေကူ' - စတုတ္ထအဆင့် အလယ်အလတ်၊ 'မိုးကြိုးကပ်ဘေးကူ' - စတုတ္ထအဆင့် အထွတ်အထိပ်၊ 'ဆေးဝါးကူ' - စတုတ္ထအဆင့် အလယ်အလတ်။ ]

"ကျင့်ကြံမှုက ၉၀ ရာခိုင်နှုန်းအထိ တိုးတက်လာတာပဲ..."

"ကြည့်ရတာ ငါ သန့်စင်ခဲ့တဲ့ 'သန့်စင်နှင်းကြာပန်းဆေးလုံး'ရဲ့ အာနိသင်က တကယ်ပဲ ကြီးမားပုံရတယ်..."

ကျိုးစွေ့ မျက်လုံးများကို မှေးစင်းလိုက်သည်။

အမှန်အတိုင်းဆိုရလျှင် ပုံမှန်အတိုင်းဆိုပါက နှစ်ပေါင်းနှစ်ဆယ် ကြိုးစားကျင့်ကြံရုံဖြင့် သူ၏ ကျင့်ကြံမှုကို ၉၀ ရာခိုင်နှုန်းအထိ တိုးတက်လာစေရန် မဖြစ်နိုင်ချေ။

သာမန် ဝိညာဉ်သန္ဓေသား ကျင့်ကြံသူများသည် နှစ်ပေါင်း တစ်ရာ၊ နှစ်ရာခန့် ကျင့်ကြံမှသာ ဤအဆင့်သို့ ရောက်ရှိနိုင်ကြသည်။

ကျင့်ကြံမှုတိုးတက်နှုန်း ဤမျှ မြန်ဆန်ရခြင်းမှာ 'သန့်စင်နှင်းကြာပန်းဆေးလုံး'၏ အာနိသင်ကြောင့် ဖြစ်ပေသည်။

သူသည် စတုတ္ထအဆင့် အထွတ်အထိပ် ဆေးလုံးတစ်လုံး၊ စတုတ္ထအဆင့် အလယ်အလတ် ဆေးလုံးသုံးလုံးနှင့် စတုတ္ထအဆင့် အနိမ့်စား ဆေးလုံးသုံးလုံးကို သောက်သုံးခဲ့ရာ၊ ရလဒ်အနေဖြင့် သူသည် အနည်းဆုံး ကျင့်ကြံမှုသက်တမ်း နှစ်ရာစာခန့် တိုးတက်လာခဲ့သည်။

သူ့အတွက် ကျင့်ကြံချိန် အများအပြားကို သက်သာစေခဲ့သည်။

နောက်ထပ် အချိန်တစ်ခုကြာပြီးနောက် ဝိညာဉ်သန္ဓေသား နှောင်းပိုင်းအဆင့်သို့ ချိုးဖျက်ဝင်ရောက်ရန် ကြိုးစားနိုင်တော့မည်ဟု ဆိုနိုင်ပေသည်။

ထိုအချိန်ရောက်လျှင် သူသည် ချန်လန်ပင်လယ်ဒေသ၏ လက်ချိုးရေတွက်၍ရသော မဟာကျင့်ကြံသူတစ်ဦး ဖြစ်လာပေလိမ့်မည်။