ဆုံတွေ့ခြင်း

ယီထျန်းယွမ်၏ ထူးဆန်းမှုက လူအများအပြားကို အမှန်တကယ်ပင် ထိတ်လန့်သွားစေသည်။ အကယ်၍ ကောင်းကင်အရှင်သာဆိုလျှင် လူတိုင်း လက်ခံနိုင်သော်လည်း ဤမျှအထိ ကြမ်းတမ်းလှသော မြေကမ္ဘာအရှင်မျိုးကိုမူ ၎င်းတို့ ပထမဆုံးအကြိမ် မြင်ဖူးခြင်း ဖြစ်သည်။

ဤမျှအထိ ရက်စက်ကြမ်းကြုတ်သည့် အနေအထားမျိုးမှာ သာမန် ကောင်းကင်အရှင်များပင်လျှင် လုပ်ဆောင်နိုင်လိမ့်မည် မဟုတ်ချေ။ သို့သော် ယီထျန်းယွမ်ကမူ ဆေးစွဲနေသူတစ်ဦးကဲ့သို့ ပတ်ဝန်းကျင်ရှိ ကြယ်တာရာပင်လယ်မိစ္ဆာများကို ရူးသွပ်မတတ် သတ်ဖြတ်နေပြီး ပင်ပန်းနွမ်းနယ်သည့် အရိပ်အယောင်ပင် မရှိချေ။

အတွေ့အကြုံမှတ် အမြောက်အများကို လျင်မြန်စွာ ရရှိနေသည်ဖြစ်ရာ မည်သို့ ပင်ပန်းပါမည်နည်း။ သူ ရူးသွပ်လာသည့်အခါတွင်မူ လုံးဝ ရပ်တန့်၍ မရတော့ချေ။

- ဂုဏ်ယူပါသည်... ကစားသမား 'ယီထျန်းယွမ်' သည် မြေကမ္ဘာအရှင်အဆင့် ၇ သို့ တက်လှမ်းရန် အခြေအနေ ပြည့်မီသွားပါပြီ... ယခု အဆင့်တက်မည်လား -

“လောလောဆယ် မလိုသေးဘူး...”

ယီထျန်းယွမ်သည် ယခုအချိန်တွင် အဆင့်မတက်လိုသေးချေ။ အကယ်၍ ယခု အဆင့်တက်မည်ဆိုပါက ကောင်းကင်ဘေးဒဏ်ကို ရင်ဆိုင်ရပေလိမ့်မည်။ ၎င်းမှာ အလွန်ပင် အလုပ်ရှုပ်စရာ ကောင်းလှသည်။

သူ ငြင်းပယ်လိုက်ပြီးနောက် ဆက်လက်၍ သတ်ဖြတ်နေခဲ့ရာ အတွေ့အကြုံမှတ်များမှာ အဆက်မပြတ် စုမိလာခဲ့သည်။ ဤမျှများပြားသော ကြယ်တာရာပင်လယ်မိစ္ဆာ အရေအတွက်အရ သူသည် နောက်ထပ် အဆင့်တစ်ဆင့်၊ သို့မဟုတ် နှစ်ဆင့်အထိပင် ဆက်လက် တက်လှမ်းနိုင်ခြေ ရှိသည်။ အရေအတွက်မှာ အလွန်ပင် များပြားလှပြီး ၆၄ ဆသော အတွေ့အကြုံမှတ် တိုးမြှင့်မှုအောက်တွင် အတွေ့အကြုံမှတ်များမှာ ရူးသွပ်မတတ် မြင့်တက်လာနေခြင်း ဖြစ်သည်။

“တကယ်ကို ထူးဆန်းတာပဲ... ဒီလူက တကယ်ပဲ လူသားမျိုးနွယ်ရော ဟုတ်ရဲ့လား...”

“စကားမပြောနဲ့... သူက လူသားမျိုးနွယ်ဆိုတာ သေချာပါတယ်... ဒါပေမဲ့ ဘယ်ကနေ ပေါ်လာမှန်းတော့ မသိဘူး... သူက မြေကမ္ဘာအရှင် အဆင့် ၆ ပဲ ရှိသေးတာကို ထုတ်ဖော်လိုက်တဲ့ စွမ်းအားက ငါတို့ထက် အများကြီး ပိုသန်မာနေတယ်... အလွန်သန်မာတဲ့ နတ်ဘုရားနယ်မြေတစ်ခုခုက တပည့်များလား...”

“မဖြစ်နိုင်ပါဘူး... တကယ်လို့ အလွန်သန်မာတဲ့ နတ်ဘုရားနယ်မြေက တပည့်ဆိုရင် ဘာလို့ တစ်ယောက်တည်း သွားမှာလဲ... အဖော်တွေနဲ့ သွားသင့်တာပေါ့... ဒါမှမဟုတ် ကိုယ်ပိုင် ဝိညာဉ်သင်္ဘော ရှိသင့်တာလေ... ငါတို့နဲ့အတူတူ ဒီသင်္ဘောကို လာစီးစရာ အကြောင်းမရှိဘူး...”

လူတိုင်းမှာ ဤနေရာမှ အခြေအနေကို ကြည့်ရင်း မှင်တက်မိ နေကြသည်။ အခြားသူများက ကြယ်တာရာပင်လယ်မိစ္ဆာ တစ်ကောင်ကို သတ်ဖြတ်ချိန်တွင် ယီထျန်းယွမ်က သုံးလေးကောင်ကို သတ်ဖြတ်နေခဲ့ပြီ ဖြစ်သည်။ သူ့ကို ယှဉ်နိုင်သူမှာ လက်ရှိတွင် တစ်ဦးတည်းသာ ရှိသည်၊ ထိုသူမှာ သင်္ဘောကပ္ပတိန်ပင် ဖြစ်သည်။

သင်္ဘောကပ္ပတိန်မှာ အလွန်ပင် ကြမ်းတမ်းလှပြီး သစ်ပင်နွယ်ပေါင်းများစွာဖြင့် ဝန်းရံကာ မိစ္ဆာများကို အခြောက်တိုက်ခြင်း သို့မဟုတ် အပိုင်းပိုင်း ချေမှုန်းခြင်းများ ပြုလုပ်နေသည်။ ကောင်းကင်အရှင်ရန်လုံသည်ပင် ယီထျန်းယွမ်နှင့် ယှဉ်လျှင် အနည်းငယ် ညံ့ဖျင်းနေသေးပြီး အနည်းဆုံးတော့ သူသည် ရှေ့သို့ အလွန်အမင်း တိုးမထွက်ဝံ့ချေ။

“ဒီကောင်က ဘယ်ကလဲ...”

ကောင်းကင်အရှင်ရန်လုံ၏ မျက်နှာမှာ ကြည့်မကောင်းလှချေ။ အရင်က သူသည် ယီထျန်းယွမ်အား အလွန်ပင် အထင်သေးခဲ့သော်လည်း ယခုအခါ ယီထျန်းယွမ် ထုတ်ဖော်ပြသသော စွမ်းအားမှာ သူ့ထက်ပင် သာလွန်နေသည် မဟုတ်ပါလော။

သို့သော် ထူးခြားလှသော ပါရမီရှင်တစ်ဦး ပေါ်ထွက်လာခြင်းက ပျော်ရွှင်စရာပင် ဖြစ်သည်။ ပတ်ဝန်းကျင်တွင် ကြယ်တာရာပင်လယ်မိစ္ဆာ အမြောက်အများ ရှိနေသဖြင့် လူတိုင်းမှာ ယီထျန်းယွမ်ကို ပိုမို သတ်ဖြတ်စေလိုကြသည်၊ သို့မှသာ ၎င်းတို့ ဘေးကင်းမည် ဖြစ်သည်။

ယီထျန်းယွမ်၏ တိုက်ခိုက်ရေးစွမ်းအားက သင်္ဘောကပ္ပတိန်၏ အာရုံစိုက်မှုကိုလည်း ရရှိခဲ့သည်။ သို့သော် သူသည် ရှေ့ဆုံးမှ တိုက်ခိုက်နေရသဖြင့် ယီထျန်းယွမ်နှင့် စကားပြောရန် အားမလပ်သေးချေ။ သူ၏ မျက်ဝန်းထဲတွင်မူ ဝမ်းမြောက်မှုများ ပြည့်နှက်နေခဲ့ပြီး ယီထျန်းယွမ်၏ တိုက်ခိုက်ရေးစွမ်းအားမှာ ကောင်းကင်အရှင် အမြောက်အများထက်ပင် သာလွန်နေသည်ဟု သူ ခံစားလိုက်ရသည်။

အဓိကမှာ ကောင်းကင်အရှင်များကဲ့သို့ ကြောက်ရွံ့ခြင်း မရှိဘဲ တိုက်လိုက်၊ ဆုတ်လိုက် လုပ်နေခြင်းမျိုး မရှိခြင်းပင် ဖြစ်သည်။ ကောင်းကင်အရှင် အချို့မှာမူ ရှေ့သို့ ပြင်းထန်စွာ တိုးမတိုက်ဝံ့ကြဘဲ အမြဲတမ်း နောက်ဆုတ်နေကြသဖြင့် သူ့အား အလွန်ပင် စိတ်ပျက်စေသည်။

ထိုသို့ဖြစ်ပါက သူ၏ အဖွဲ့ဝင်များမှာ ဒုက္ခရောက်ပေလိမ့်မည်။ အမှန်တကယ်လည်း ထိုသို့ပင် ဖြစ်သည်။ နောက်ဆုတ်သွားသော ကောင်းကင်အရှင်များကြောင့် ထိုကြယ်တာရာပင်လယ်မိစ္ဆာများမှာ အဖွဲ့ဝင်များထံသို့ ခုန်အုပ်သွားကြပြီး ၎င်းတို့ကို ဖမ်းဆီးကာ အပိုင်းပိုင်း ဆွဲဖြဲပစ်လိုက်ကြသည်။

ကျင့်ကြံခြင်းနယ်ပယ်က ထိုမျှအထိ ကွာခြားနေပြီး အသာစီး ရထားပါလျက်နှင့် ဤမျှအထိ ကြောက်ရွံ့နေကြခြင်းက သူ့အား စိတ်ပျက်စေသည်။ ယီထျန်းယွမ်၏ ပေါ်ထွက်လာမှုကမူ သူ့အား ဝမ်းမြောက်စေခဲ့သည်။

“တတိယအသုတ်အတွက် ပြင်ထားကြ...”

သင်္ဘောကပ္ပတိန်က ကျယ်လောင်စွာ အော်ဟစ်လိုက်ပြီး တတိယအသုတ်ကို ဖွင့်ရန် ပြင်ဆင်လိုက်သည်။ ဤစကားကို ကြားသောအခါ လူတိုင်း၏ မျက်နှာများမှာ ချက်ချင်း ပြောင်းလဲသွားခဲ့သည်။

ဒုတိယအသုတ်ကိုပင် သေချာ မရှင်းလင်းရသေးဘဲ တတိယအသုတ်အတွက် ပြင်ဆင်ခိုင်းခြင်းမှာ အနားယူရန် အချိန်ပင် မပေးခြင်း မဟုတ်ပါလော။

အခြေအနေကို သိရှိသူများကမူ သင်္ဘောကပ္ပတိန်မှာ လူများကို အနားယူစေလိုသော်လည်း ဤကြယ်တာရာပင်လယ်မိစ္ဆာများမှာ အလွန် သန်မာလွန်းနေသည်ကို သိကြသည်။ အကယ်၍ ဆက်လက်၍ အထဲသို့ မပေးဝင်ပါက အပြင်ဘက်မှ အကာအကွယ် အလွှာ ကို ချိုးဖောက်ဝင်ရောက်လာမည် ဖြစ်ရာ အားလုံး သေဆုံးသွားကြပေလိမ့်မည်။ ထို့ကြောင့် အပြင်ဘက်မှ ဖိအားကို လျင်မြန်စွာ လျှော့ချနိုင်မှသာ အချိန်ကြာမြင့်စွာ တောင့်ခံနိုင်ပေလိမ့်မည်။

စကားသံအဆုံးမှာပင် အကာအကွယ် အလွှာမှာ ထပ်မံ ပွင့်သွားခဲ့ပြီး ကြယ်တာရာပင်လယ်မိစ္ဆာ အကောင်ပေါင်း သောင်းနှင့်ချီ၍ ထပ်မံ ခုန်အုပ်လာကြသည်။ သင်္ဘောကပ္ပတိန်က အကာအကွယ်ကို ပြန်လည် ပိတ်ဆို့ရန် ပြင်လိုက်စဉ်မှာပင် ဘေးဘက်မှ ကျယ်လောင်သော အော်ဟစ်သံတစ်ခု ထွက်ပေါ်လာသည်။

“သင်္ဘောကပ္ပတိန်... အကာအကွယ်ကို မပိတ်ပါနဲ့ဦး...”

သင်္ဘောကပ္ပတိန်မှာ ခေတ္တမျှ မှင်တက်မိ သွားခဲ့ပြီးနောက် ဟင်းလင်းပြင် အထက်ပိုင်းမှ ပုံရိပ်အချို့ ဆင်းသက်လာကာ ကြယ်တာရာပင်လယ်မိစ္ဆာ အုပ်စုကြီးအတွင်း၌ ဧရာမ အပေါက်ကြီးတစ်ခု ဖြစ်သွားအောင် ပြင်းထန်စွာ တိုက်ခိုက်လိုက်သည်။ ထိုပုံရိပ်အချို့ ဆင်းသက်လာသည်နှင့် သင်္ဘောကပ္ပတိန်က လျင်မြန်စွာ လက်ဟန်ပြုလိုက်ပြီး အကာအကွယ်ကို ပြန်လည် ပိတ်ဆို့လိုက်သည်။

အနည်းငယ် နှေးကွေးသွားသဖြင့် မူလက ကြယ်တာရာပင်လယ်မိစ္ဆာ တစ်သောင်းခန့်သာ အထဲသို့ ပေးဝင်ရန် ရည်ရွယ်ခဲ့သော်လည်း ယခုအခါ သောင်းနှင့်ချီ၍ ဝင်ရောက်လာခဲ့ပြီ ဖြစ်ရာ ပြည့်နှက်နေသော မိစ္ဆာများမှာ အော်ဟစ်ရင်း အဖွဲ့ဝင်များကို ကိုက်ခဲရန် ကြိုးစားနေကြတော့သည်။

ဆင်းသက်လာသော ပုံရိပ်များမှာ အမျိုးသား သုံးဦးနှင့် အမျိုးသမီး တစ်ဦး ဖြစ်ပြီး မည်သူများ ဖြစ်သည်ကို မသိရချေ။ ၎င်းတို့ ဝင်လာသည်နှင့် ချက်ချင်းပင် တိုက်ပွဲအတွင်းသို့ ပါဝင်လာကြသည်။ ပြင်းထန်လှသော စွမ်းအားများမှာ ထိုကြယ်တာရာပင်လယ်မိစ္ဆာများထံသို့ စီးဝင်သွားပြီး ခဏချင်းမှာပင် အမြောက်အများ သေဆုံးသွားခဲ့ကြသည်။

သိသာထင်ရှားသည်မှာ ရုတ်တရက် ရောက်ရှိလာသူများမှာ အလွန် အစွမ်းထက်သော ကျင့်ကြံသူများ ဖြစ်ကြသည်။

“ဘုန်း...”

ထိတ်လန့်ဖွယ် ကောင်းသော မီးလျှံများမှာ ပတ်ဝန်းကျင်သို့ ဖုံးလွှမ်းသွားပြီး ခုန်အုပ်လာသော ကြယ်တာရာပင်လယ်မိစ္ဆာများကို ပြာဖြစ်သွားအောင် လောင်ကျွမ်းပစ်လိုက်သည်။ ပြင်းထန်လှသော နတ်ဘုရားမီးလျှံများကြောင့် လူတိုင်းမှာ အံ့အားသင့်သွားကြရသည်။

ဤသည်မှာ အမျိုးသမီး တစ်ဦး၏ လုပ်ရပ်ဖြစ်ရာ အမျိုးသမီးပင်လျှင် ဤမျှ သန်မာနေပါက ဤလူများမှာ မည်သူများ ဖြစ်ပါသနည်း။

ယီထျန်းယွမ်သည် ထိုအမျိုးသမီးကို မြင်သည့်အခါ မျက်ဝန်းများမှာ တည်ငြိမ်သွားခဲ့သည်။ တစ်ဖက်လူကလည်း သူ့အား မြင်သည့်အခါ ခေတ္တမျှ မှင်တက်မိ သွားသော်လည်း လျင်မြန်စွာပင် ဆက်လက်၍ သတ်ဖြတ်နေခဲ့သည်။

“မြေကမ္ဘာအရှင်ထျန်ချင်းက ဘာလို့ ဒီမှာ ရောက်နေတာလဲ...”

ယီထျန်းယွမ်က မျက်မှောင်ကြုတ်လိုက်သည်။ သူ၏ရှေ့တွင် ပေါ်ထွက်လာသော အစွမ်းထက်သော အမျိုးသမီးမှာ အခြားသူ မဟုတ်ဘဲ မြေကမ္ဘာအရှင်ထျန်ချင်းပင် ဖြစ်သည်။ သူနှင့် ဤနေရာတွင် ဆုံတွေ့ရလိမ့်မည်ဟု သူ မထင်မှတ်ထားခဲ့ချေ။ အဓိကမှာ သူအား ထိုနတ်ဘုရားနယ်မြေ နတ်သားရဲက ဖမ်းဆီးသွားခဲ့သည် မဟုတ်ပါလော။ အဘယ်ကြောင့် ပြန်လည် လွတ်မြောက်လာပါသနည်း။

“မြေကမ္ဘာအရှင်ယီထျန်းယွမ်... မင်းနဲ့ ဒီမှာ ဆုံရလိမ့်မယ်လို့ မထင်ထားဘူး... တကယ်ကို တိုက်ဆိုင်တာပဲ...”

မြေကမ္ဘာအရှင်ထျန်ချင်း၊ သို့မဟုတ် နတ်ဘုရားအရှင်ယွီချင်းဖြစ်သည်။

သူသည် ယီထျန်းယွမ်အား ကြည့်ကာ မျက်ဝန်းထဲတွင် အလင်းတန်းများ တောက်ပနေပြီး ဘာများ ကြံစည်နေသည် မသိရချေ။

“မင်းက ငါ့ကို လာဖမ်းတာတော့ မဟုတ်ဘူး မလား...”

ယီထျန်းယွမ်က မျက်မှောင်ကြုတ်ကာ ဆိုလိုက်သည်။ အခြေအနေမှာ ရိုးရှင်းမည် မဟုတ်ဟု သူ ခံစားလိုက်ရသည်။

နတ်ဘုရားအရှင်ယွီချင်းသည် ထိုနတ်ဘုရားနယ်မြေ နတ်သားရဲဘက်နှင့် ပတ်သက်မှု ရှိသည်ကို သူ သိရှိထားသည်။ အရင်က ယီထျန်းယွမ် ဖမ်းဆီးခံရမည်ဟု သူက ယူဆထားသဖြင့် အချို့သော ကိစ္စရပ်များကို အနည်းငယ် ထုတ်ပြောခဲ့ဖူးသည်။

သူ ယခု ရောက်လာခြင်းမှာ သူ့အား ဖမ်းဆီးရန် ဖြစ်နိုင်ခြေ ရှိသည်ဟု သူ ခန့်မှန်းလိုက်သည်။

“မင်းကို ဖမ်းဖို့ ဟုတ်လား... အဲဒါက သူတို့ရဲ့ ရည်ရွယ်ချက်ပါ... ငါ့မှာတော့ အဲဒီလို ရည်ရွယ်ချက် မရှိပါဘူး... ငါက ဒီအတိုင်း လေညင်းခံ ထွက်လာရင်း အသက်ရှူဖို့ လာတာပါ...”

နတ်ဘုရားအရှင်ယွီချင်း၏ မျက်နှာမှာ အေးစက်နေခဲ့သည်။

“ဒါပေမဲ့ ဒီကိစ္စ ပြီးသွားရင်တော့ မင်း ထွက်မပြေးနဲ့ဦး... မင်းကို ပြောစရာ ကိစ္စရှိတယ်...”

“စိတ်ချပါ... မင်း ငါ့ကို လာဖမ်းတာ မဟုတ်ရင် ငါလည်း ထွက်ပြေးဖို့ ပျင်းပါတယ်...”

ယီထျန်းယွမ်သည် ပတ်ဝန်းကျင်ရှိ ကြယ်တာရာပင်လယ်မိစ္ဆာများကို ဆက်လက်၍ သတ်ဖြတ်နေခဲ့သည်။

၎င်းတို့၏ စကားသံများ အဆုံးမှာပင် အခြားတစ်ဖက်၌လည်း စကားသံများ ထွက်ပေါ်လာခဲ့သည်။

“သစ်ပင်သင်္ဘောကပ္ပတိန်... ငါတို့ ပြန်ဆုံကြပြန်ပြီ... ဒါပေမဲ့ ဒီလို အန္တရာယ်ရှိတဲ့ နေရာမှာ ဆုံရလိမ့်မယ်လို့ မထင်ထားဘူး...”

ထိုအထဲမှ ဝက်ဝံကြီး တစ်ကောင်မှာ ဧရာမ လက်ဝါးကြီးဖြင့် ရိုက်ချလိုက်ရာ ကြယ်တာရာပင်လယ်မိစ္ဆာ အမြောက်အများ သေဆုံးသွားခဲ့သည်။ သူ၏ ကြမ်းတမ်းမှုမှာ သိသာလှသည်။

“ဝက်ဝံသင်္ဘောကပ္ပတိန်... ဒါက ဘာဖြစ်တာလဲ... မင်းတို့ရဲ့ ဝိညာဉ်သင်္ဘောက ဖျက်ဆီးခံလိုက်ရတာလား...”

သစ်ပင်သင်္ဘောကပ္ပတိန်၏ မျက်နှာမှာ လေးနက်သွားခဲ့သည်။ ဤသည်မှာ အခြေအနေမှာ အလွန်ပင် စိုးရိမ်ရသည်ဟု ဆိုလိုခြင်းပင် ဖြစ်သည်။

“အရေအတွက်က အရမ်းများတယ်... ကြယ်တာရာပင်လယ်မိစ္ဆာ အကောင်ပေါင်း သိန်းနဲ့ချီ ရှိနေတာ... ဒါက ဘယ်လိုဖြစ်တာလဲဆိုတာ လုံးဝ မသိဘူး...”

ဝက်ဝံသင်္ဘောကပ္ပတိန်က စိတ်ပျက်ဖွယ် ကောင်းသော သတင်းတစ်ခုကို ထုတ်ပြောလိုက်သည်။

ကြယ်တာရာပင်လယ်မိစ္ဆာ အကောင်ပေါင်း သောင်းနှင့်ချီ မဟုတ်ဘဲ သိန်းနှင့်ချီ ရှိနေခြင်း ဖြစ်သည်။

အခန်း ၁၀၆၆ ပြီးပါပြီ။