အခန်း (၃၄၄)

အခန်း။ ၃၄၄

လီမြစ် အခြေစိုက်စခန်းမြို့တော်။

ယခုအချိန်တွင် အစည်းအဝေးခန်းမအတွင်း၌ လူအများဖြင့် ပြည့်နှက်နေသည်။ အခြေစိုက်စခန်း၏ အကြီးအကဲဖြစ်သူ ဆံပင်ဖြူအဖွေးသားနှင့် လီယွမ်ဖုန်းသည် စားပွဲ၏ ထိပ်ဆုံးနေရာတွင် ထိုင်လျက် မျက်မှောင်ကြုတ်ကာ တက်ရောက်လာကြသော အဆင့်မြင့်အရာရှိကြီးများကို တည်ကြည်လေးနက်သော မျက်နှာထားဖြင့် ကြည့်ရှုနေသည်။

"အခြေအနေအရပ်ရပ်ကိုတော့ အားလုံးပဲ သိရှိပြီးဖြစ်ကြမှာပါ။ လီမြစ်မြို့တော်အတွင်းမှာ အဆင့် ၅ ရှိတဲ့ ဇွန်ဘီတစ်ကောင် ပေါ်ထွက်လာနိုင်ခြေ ရှိနေပါတယ်။ ဒီသတင်းရဲ့ မှန်ကန်မှုကိုတော့ သံသယဖြစ်စရာ မလိုပါဘူး။ အခြေစိုက်စခန်းကနေပြီး အတည်ပြုဖို့ လူလွှတ်ခဲ့ပြီးပြီဖြစ်သလို သတင်းပေးပို့ချက်တွေနဲ့လည်း ထပ်တူကျနေပါတယ်။

အဆင့် ၅ လို့ ယူဆရတဲ့ ဒီမီးလျှံဇွန်ဘီက ပြင်းထန်တဲ့ မီးလျှံစွမ်းရည်ကို ပိုင်ဆိုင်ထားရုံတင်မကဘဲ ပျံသန်းနိုင်စွမ်းပါ ရှိနေတာကြောင့် အမှန်တကယ်ပဲ ရင်ဆိုင်ရခက်ခဲတဲ့ ရန်သူတစ်ဦး ဖြစ်လာမှာ အသေအချာပါပဲ။

ဒါနဲ့ပတ်သက်ပြီး အားလုံးပဲ လွတ်လပ်စွာ အကြံပြုဆွေးနွေးနိုင်ပါတယ်"

လီယွမ်ဖုန်းက ဖြည်းညှင်းစွာ ဆိုလိုက်သည်။

"အကြီးအကဲ... ကမ္ဘာပျက်ကပ် စတင်ခဲ့ကတည်းက လီမြစ်မြို့တော်မှာ အဆင့် ၅ ဆင့်ကဲပြောင်းလဲထားတဲ့ ဇွန်ဘီတစ်ကောင် ပေါ်လာတာ ဒါက ပထမဆုံးအကြိမ်ပါပဲ။ အခြေစိုက်စခန်းအနေနဲ့ အထူးသတိထားပြီး စဉ်းစားသင့်တယ်လို့ ကျွန်တော် ထင်ပါတယ်။ အလွန်အမင်း လိုအပ်တာမျိုးမရှိရင် အဲဒီဇွန်ဘီကို သွားရောက်ရင်ဆိုင်တာမျိုး မလုပ်သင့်သေးပါဘူး။

ပြီးခဲ့တဲ့အကြိမ်က ကျွန်တော်တို့ အခြေစိုက်စခန်းဟာ အဆင့် ၄ ဆင့်ကဲပြောင်းလဲထားတဲ့ ဇွန်ဘီတစ်ကောင်ကို ဝိုင်းဝန်းတိုက်ခိုက်ခဲ့တုန်းက နာကျင်စရာကောင်းတဲ့ အထိအခိုက် အကျဆုံးတွေ ရှိခဲ့တာကို အမှတ်ရကြဦးမှာပါ။ အဲဒီတုန်းက စစ်သည်တွေနဲ့ ဆင့်ကဲပြောင်းလဲသူ အများအပြားဟာ ထိုဇွန်ဘီရဲ့လက်ချက်နဲ့ အသက်ဆုံးရှုံးခဲ့ကြရပါတယ်။

အခုတစ်ကြိမ်မှာတော့ ရန်သူက ပိုမိုအစွမ်းထက်တဲ့ အဆင့် ၅ ဇွန်ဘီ ဖြစ်နေပါတယ်။ အကယ်လို့ တိုက်ခိုက်နိုင်စွမ်းရော ပျံသန်းနိုင်စွမ်းပါရှိတဲ့ ဒီမီးလျှံဇွန်ဘီကို ထိပ်တိုက်ရင်ဆိုင်မယ်ဆိုရင် ကျွန်တော်တို့ အခြေစိုက်စခန်း ခံစားရမယ့် ဆုံးရှုံးမှုတွေဟာ ခန့်မှန်းလို့တောင် ရနိုင်မှာမဟုတ်ပါဘူး"

ထိုစကားကို ကြားသောအခါ အဆင့်မြင့်အရာရှိတစ်ဦးဖြစ်သူ သန်မာထွားကြိုင်းသော အမျိုးသားကြီးက စိုးရိမ်ပူပန်သော မျက်နှာထားဖြင့် ဖျောင်းဖျပြောပြောလိုက်သည်။

ပြီးခဲ့သည့် အဆင့် ၄ ဇွန်ဘီကို နှိမ်နင်းသည့် စစ်ဆင်ရေးတွင် ဖြစ်ပေါ်ခဲ့သော အကျဆုံးများမှာ အလွန်ပင် များပြားလှပေရာ ထိုအကြောင်းကို ပြန်လည်တွေးတောမိရုံမျှဖြင့် သူသည် များစွာရင်နာမိနေဆဲပင်။

ထိုတိုက်ပွဲတွင် ဆုံးရှုံးသွားခဲ့ရသူများမှာ ရဲစွမ်းသတ္တိနှင့် ပြည့်စုံသော စစ်သည်တော်များနှင့် အလားအလာကောင်းသည့် ဆင့်ကဲပြောင်းလဲသူများပင်။

"ဒါကတော့ မဖြစ်သင့်ဘူးဗျ။ အန္တရာယ်ရှိတဲ့ ရန်သူကြီးကို ငါတို့ ဘေးနားမှာ အေးအေးဆေးဆေး အိပ်ခွင့်ပေးထားလို့ ဘယ်ဖြစ်မလဲ။ ဒီအဆင့် ၅ မီးလျှံဇွန်ဘီက လီမြစ်မြို့ထဲမှာ ပုန်းနေတာဟာ ငါတို့ လီမြစ်အခြေစိုက်စခန်းအတွက် တကယ့်ကို ကြီးမားတဲ့ ခြိမ်းခြောက်မှုကြီးပဲ။ ဒီကောင် ဒီမှာ ရှိနေသရွေ့တော့ ငါတို့ရဲ့ လုံခြုံရေးက အမြဲတမ်း စိုးရိမ်နေရမှာပဲ။

ဒါကြောင့် အခုက အင်အားတွေအကုန်စုပြီး ဒီကောင်ကို လက်နက်ကြီးတွေနဲ့ အပြတ်ရှင်းပစ်ဖို့ အကောင်းဆုံးအချိန်ပဲ။ သူ့ကို ဒီထက်ပိုပြီး အင်အားကြီးလာအောင် အခွင့်အရေး လုံးဝမပေးသင့်ဘူး"

ဆန့်ကျင်ဘက်အရပ်မှ ပညာတတ်အသွင်ဆောင်ကာ မျက်မှန်တပ်ထားသော အဆင့်မြင့်အရာရှိတစ်ဦးသည် ရှေ့တွင်ပြောကြားသွားသော အားလျော့ဖွယ်စကားများကို ကြားရသောအခါ ချက်ချင်းပင် မျက်နှာထားတင်းမာသွားပြီး ခေါင်းကို အပြင်းအထန်ခါယမ်းလျက် ပွင့်လင်းပြတ်သားစွာ ကန့်ကွက်ပြောပြောလိုက်သည်။

ယခုအခါ ထိုအဆင့် ၅ ဇွန်ဘီသည် လီမြစ်မြို့ပြအတွင်း၌သာ လှုပ်ရှားနေသည်ဖြစ်၍ တစ်

ချိန်ချိန်တွင် သူတို့၏ အခြေစိုက်စခန်းသို့ လာရောက်တိုက်ခိုက်လိမ့်မည်မဟုတ်ဘူူဟု မမှတ်ယူသင့်ပေ။

အထူးသဖြင့် ပျံသန်းနိုင်စွမ်းနှင့် မီးလျှံစွမ်းရည်ကို ပိုင်ဆိုင်ထားသော ဤကဲ့သို့သော အဆင့် ၅ ဇွန်ဘီမျိုးသည် အခြေစိုက်စခန်းအတွင်းသို့ ကျူးကျော်ဝင်ရောက်လာပါက ဖြစ်ပေါ်လာမည့် ပျက်စီးဆုံးရှုံးမှုမှာ ခန့်မှန်း၍ပင် ရနိုင်မည်မဟုတ်ပေ။

"မှန်တယ်... ဒီကိစ္စကို ပေါ့ပေါ့ဆဆ တွေးလို့မရသလို အလျှော့ပေးစရာလည်း ဘာအကြောင်းမှမရှိဘူး။ အဆင့် ၅ ဇွန်ဘီဆိုတာ ငါတို့ လီမြစ်အခြေစိုက်စခန်း တစ်ခုလုံးကို ပြုတ်ပြုတ်ပြုန်းသွားအောင် ခြိမ်းခြောက်နိုင်တဲ့အစွမ်း ရှိတယ်။ အခြေစိုက်စခန်းအနေနဲ့ ဒါကို အချိန်မီ မနှိမ်နင်းဘဲနဲ့ သူ့ကို ဒီထက်ပိုပြီး အစွမ်းထက်လာအောင် ခွင့်ပြုထားရမှာလား။

ထိခိုက်ကျဆုံးမှုတွေနဲ့ ပတ်သက်လို့ကတော့... တစ်ခါတလေမှာ စခန်းတစ်ခုလုံးရဲ့ ဘေးကင်းလုံခြုံရေးအတွက် စတေးသင့်တာတွေကို စတေးရမှာပဲ"

အခြားသောအဆင့်မြင့်အရာရှိတစ်ဦးကလည်း ထိုအမြင်ကို ထောက်ခံလျက် ခေါင်းညိတ်လိုက်သည်။

အကျဆုံးဟူသည်မှာ ရှောင်လွှဲ၍ မရနိုင်သော အရာဖြစ်သော်လည်း အခြေစိုက်စခန်း ပျက်စီးခြင်းမှ ကင်းဝေးစေမည်ဆိုပါက ထိုစတေးမှုမှာ ထိုက်တန်လှသည်။

"ကျွန်တော်လည်းပဲ ဒီအဆင့် ၅ ဆင့်ကဲပြောင်းလဲထားတဲ့ ဇွန်ဘီကို ချက်ချင်းအရေးယူ ဆောင်ရွက်သင့်တယ်လို့ ယုံကြည်ပါတယ်။ အကယ်လို့ သူြကို သတ်ဖြတ်နိုင်ပြီး အဆင့် ၅ အမြုတေကို ရရှိခဲ့မယ်ဆိုရင် ဒါက အရမ်းကြီးမားတဲ့ အောင်မြင်မှုတစ်ခု ဖြစ်လာပါလိမ့်မယ်။

နေပြည်တော်ကနေ သုတေသနပြုထားတဲ့ ဆင့်ကဲပြောင်းလဲမှု ဆေးရည်အသစ်ရဲ့ ဖော်မြူလာအရ အဆင့် ၅ ဇွန်ဘီရဲ့ အမြုတေသာ ရှိမယ်ဆိုရင် အဆင့် ၅ ရှိတဲ့ ဆင့်ကဲပြောင်းလဲသူတစ်ယောက်ကို မွေးထုတ်ပေးနိုင်မှာပါ"

အဆင့်မြင့်အရာရှိတစ်ဦးက လိုလားတောင့်တသော မျက်လုံးများဖြင့် ပြောကြားလိုက်ရာ အားလုံး၏ အာရုံမှာ စိတ်ဝင်တစား ဖြစ်သွားကြသည်။ တစ်ပြည်နယ်လုံး အတိုင်းအတာဖြင့်ပင် အဆင့် ၅ ဆင့်ကဲပြောင်းလဲသူဟူသည်မှာ အလွန်ပင် ရှားပါးလှသောကြောင့်ပင်။

ထိုစကားကို ကြားလိုက်ရသောအခါ အခြားသောအဆင့်မြင့်အရာရှိ အများအပြားမှာလည်း မျက်နှာအမူအရာများ ပြောင်းလဲသွားကြပြီး အကျိုးစီးပွားအပေါ် အခြေခံ၍ စိတ်ဝင်တစား ရှိလာကြတော့သည်။

"မှန်ပါတယ်... ဒါဟာ အဆင့် ၅ ဇွန်ဘီရဲ့ အမြုတေပဲ။ ငါတို့ လီမြစ်အခြေစိုက်စခန်းအတွက်တော့ ဒါဟာ တကယ့်ကို ရှားပါးလှတဲ့ အခွင့်အရေးကြီးတစ်ခုပဲ။ တကယ်လို့သာ ဒါကို ငါတို့ အောင်အောင်မြင်မြင် နှိမ်နင်းနိုင်ခဲ့ရင်၊ ဒီအတွက် ပေးဆပ်ခဲ့ရတဲ့ ကြိုးစားမှုတွေအားလုံးက တကယ်ကို ထိုက်တန်သွားမှာပါလို့ ကျွန်တော် ယုံကြည်တယ်။ ဒါကြောင့် အချိန်မဆွဲဘဲ မြန်မြန်ဆန်ဆန် လှုပ်ရှားကြရအောင်..."

"..."

ခဏချင်းမှာပင် တက်ရောက်လာသူ အားလုံးမှာ သဘောတူညီစွာဖြင့် ခေါင်းညိတ်ထောက်ခံကြတော့သည်။

လူအများ၏ စကားသံများကို ကြားရသောအခါ အစောပိုင်းက ကန့်ကွက်ခဲ့သော အဆင့်မြင့်အရာရှိကြီးမှာ မျက်နှာပျက်သွားသော်လည်း နောက်ထပ်တစ်ခွန်းမျှ ဆက်လက်ပြောဆိုခြင်း မပြုတော့ပေ။

"ကောင်းပြီ ဒါဆိုရင် ငါတို့ လီမြစ်အခြေစိုက်စခန်းရဲ့ ဒီ အဆင့် ၅ မီးလျှံဇွန်ဘီ ချေမှုန်းရေး စစ်ဆင်ရေးကို အခုကစပြီး ချက်ချင်း အကောင်အထည်ဖော်တော့မယ်။ အချိန်မဆွဲကြနဲ့... အခုပဲ စတင်လိုက်ကြရအောင်"

လီယွမ်ဖုန်းက လေးနက်တည်ကြည်သော မျက်နှာထားဖြင့် ပြတ်သားစွာ ပြောလိုက်သည်။

ထို့နောက်တွင် အဆင့်မြင့်အရာရှိကြီးများသည် စစ်ဆင်ရေးနှင့် ပတ်သက်သော စီမံကိန်းများကို အသေးစိတ် စတင်ဆွေးနွေးကြတော့သည်။

...

မြို့ပြနယ်မြေအသစ်သို့ ရောက်ရှိလာပြီးနောက် လုချွမ်းသည် အမြုတေများ စုဆောင်းနိုင်မည့် အခွင့်အရေးကို လက်လွှတ်ခံမည့်သူ မဟုတ်ပေ။ သူသည် အခြေချနေထိုင်ပြီးသည်နှင့် ထုံးစံအတိုင်း သူ၏ ဇွန်ဘီရုပ်သေးများကို စနစ်တကျ ထိန်းချုပ်ကာ လီမြစ်မြို့ပြဧရိယာအတွင်းရှိ ဇွန်ဘီများကို အမဲလိုက်သုတ်သင်၍ ရိတ်သိမ်းမှုများ စတင်ပြုလုပ်ခဲ့သည်။

ဟန်ယဲ့ရပ်ကွက်နှင့် မီတာရာဂဏန်းမျှ ဝေးကွာသော လမ်းမတစ်ခုပေါ်တွင် လျှပ်စီး ၁ သည် ဇွန်ဘီအုပ်စုကြား၌ လျှပ်စီးတန်းတစ်ခုသဖွယ် အရှိန်အဟုန်ဖြင့် ဖြတ်သန်းလှုပ်ရှားနေသည်။ ၎င်း၏လက်အတွင်းရှိ သံမဏိလက်သည်းများမှာ လေထုအတွင်း၌ အေးစက်သော အလင်းတန်းများကို ဆွဲခြစ်လျက် ရှိနေသည်။

လျှပ်စီး ၁ ၏ ကိုယ်ဟန်သည် လမ်းမပေါ်ရှိ ဇွန်ဘီအုပ်စု၏ အလယ်ဗဟိုသို့ ဖြတ်သန်းသွားသည်နှင့်တစ်ပြိုင်နက် …..

ဝူး... ဝူး...

ဇွန်ဘီအုပ်စုအတွင်းရှိ အဆင့် ၃ ဆင့်ကဲပြောင်းလဲထားသည့် ဇွန်ဘီအချို့မှာ ကျယ်လောင်စွာ ဟိန်းဟောက်လိုက်ကြသော်လည်း ၎င်းတို့ တစ်စုံတစ်ရာ မလှုပ်ရှားနိုင်မီမှာပင် ဦးခေါင်းများသည် လည်ပင်းမှ ပြတ်တောက်၍ မြေပြင်ပေါ်သို့ လိမ့်ဆင်းသွားခဲ့သည်။

ဘုန်း...

ချက်ချင်းပင် ဦးခေါင်းမဲ့သွားသော အဆင့် ၃ ဇွန်ဘီများ၏ ခန္ဓာကိုယ်မှာ တောင့်တင်းသွားပြီးနောက် မြေပြင်ပေါ်သို့ အားအင်ချည့်နဲ့စွာ ပြိုလဲကျသွားတော့သည်။

ထိုရုတ်တရက် အပြောင်းအလဲကြောင့် ဇွန်ဘီအုပ်စုအတွင်း ရုတ်ရုတ်သဲသဲ ဖြစ်သွားကာ အမြောက်အမြားသော ဇွန်ဘီများသည် အသေကောင်များထံမှ ဗီဇစိတ်အရ အဝေးသို့ ခွာလိုက်ကြပြီး ပါးစပ်များမှလည်း တုန်ရီနေသော အော်ဟစ်သံများ ထွက်ပေါ်လာကြသည်။

နောက်တစ်စက္ကန့်တွင် လေပြင်းတစ်ချက် ဝှေ့ယမ်းသွားသကဲ့သို့ လျှပ်စီး ၁ သည် အလောင်းများရှိရာသို့ မျက်စိတစ်မှိတ်အတွင်း ရောက်ရှိသွားပြီး အဆင့် ၃ အမြုတေများကို ထုတ်ယူလိုက်တော့သည်။

"လျှပ်စီး ၁ ရဲ့ သုတ်သင်မှုက ဒီအဆင့်နိမ့်ဇွန်ဘီတွေအတွက်တော့ တကယ်ကို မြန်ဆန်တိကျလွန်းလှတယ်"

သွေးစွန်းနေသော အမြုတေများကို ကြည့်ကာ လုချွမ်းသည် အသာအယာ ပြုံးလိုက်မိသည်။

ထိုအချိန်မှာပင် ကောင်းကင်ယံထက်၌ ဟိန်းဟောက်သံများ ပဲ့တင်ထပ်လာပြီး အဝေးတစ်နေရာမှ သေနတ်ပစ်ခတ်သံများနှင့် ပေါက်ကွဲသံများကို ကြားလိုက်ရသည်။

တစ်ချိန်တည်းမှာပင် မြေပြင်မှာလည်း တစ်စုံတစ်ရာ ချဉ်းကပ်လာသည့်အလား အနည်းငယ် တုန်ခါနေ၏။

ဝူး... ဝူး...

လုချွမ်း လှည့်ကြည့်လိုက်သောအခါ ဝေးကွာသော ကောင်းကင်ယံ၌ လက်နက်တပ်ဆင်ထားသည့် တိုက်ခိုက်ရေးရဟတ်ယာဉ် ဆယ်စင်းကျော်မှာ ဗွီပုံသဏ္ဌာန်ဖြင့် သူရှိရာအရပ်သို့ ပျံသန်းလာနေသည်ကို မြင်တွေ့လိုက်ရသည်။

ချက်ချင်းပင် လုချွမ်း၏ မျက်နှာအမူအရာ ပြောင်းလဲသွားပြီး လျှပ်စီး ၁ အား ကိုယ်ယောင်ဖျောက်ကာ အနီးရှိ အထပ်မြင့်အဆောက်အအုံပေါ်သို့ အမြန်ဆုံး တက်လှမ်းစေခဲ့သည်။ အထပ်မြင့်သို့ ရောက်ရှိသွားသောအခါ သူသည် လီမြစ်မြို့ပြဧရိယာ၏ အစွန်အဖျားသို့ လှမ်း၍ အကဲခတ်လိုက်သည်။

ထိုအခါ ဟန်ယဲ့ရပ်ကွက်နှင့် အလှမ်းဝေးကွာသော မြို့ပြလမ်းမများပေါ်တွင် နဂါးတစ်ကောင်ကဲ့သို့ ရှည်လျားလှသော စစ်ဘက်ဆိုင်ရာ ယာဉ်တန်းကြီးတစ်ခုမှာ သူရှိရာအရပ်သို့ ဦးတည်ချဉ်းကပ်လာနေသည်ကို သတိပြုမိလိုက်သည်။

ထိုကြီးမားလှသော လှုပ်ရှားမှုများကြောင့် ပတ်ဝန်းကျင်ရှိ ဇွန်ဘီများမှာ အနက်ရောင်ဒီရေလှိုင်းကြီးကဲ့သို့ စုပြုံရောက်ရှိလာကြသော်လည်း ထိုယာဉ်တန်းကြီးထံမှ ထွက်ပေါ်လာသော ကျည်ဆန်မိုးများက ဇွန်ဘီများကို အနီးသို့ ချဉ်းကပ်ခွင့်မပေးဘဲ အစွမ်းကုန် နှိမ်နင်းထားသည်။

လုချွမ်းအနေဖြင့် လီမြစ်အခြေစိုက်စခန်း၏ တရားဝင်စစ်တပ်နှင့် ထိပ်တိုက်တွေ့ဆုံရမည်ကို ကြိုတင်ခန့်မှန်းထားသော်လည်း ယခုတစ်ကြိမ်တွင် နဂါးနိုင်ငံစစ်တပ်၏ တုံ့ပြန်မှုမှာ ဤမျှအထိ လျင်မြန်လိမ့်မည်ဟု မမျှော်လင့်ထားခဲ့ပေ။

သူ လီမြစ်မြို့ပြဧရိယာသို့ ရောက်ရှိသည်မှာ တစ်ရက်မျှသာ ရှိသေးသော်လည်း လီမြစ်အခြေစိုက်စခန်းက အရေးယူဆောင်ရွက်မှုများကို စတင်နေပြီ ဖြစ်သည်။

"ဒီနေ့တော့ တစ်ကျော့ပြန် သွေးချောင်းစီး တိုက်ပွဲတစ်ခုကို ဆင်နွှဲရဦးမယ် ထင်တယ်"

မနားတမ်း ချဉ်းကပ်လာနေသော ရဟတ်ယာဉ်အုပ်စုနှင့် စစ်စိမ်းရောင် ယာဉ်တန်းကြီးကို ကြည့်ကာ လုချွမ်း၏ မျက်လုံးများမှာ ရက်စက်ကြမ်းကြုတ်သော အလင်းတန်းများ တောက်ပလာပြီး သူ၏ ခန္ဓာကိုယ်မှလည်း အေးစက်သော အရှိန်အဝါများ ထွက်ပေါ်လာတော့သည်။