အခန်း (၃၄၇)

အခန်း။ ၃၄၇

ရှူး... ရှူး... ရှူး...

အဆိုပါ အမြောက်ကျည်များ ကျရောက်လာစဉ်က အရှိန်အဟုန်မှာ မည်မျှပင် မြန်ဆန်ခဲ့သည်

ဖြစ်စေ ယခု ပြန်လည်လွင့်စင်သွားသော အရှိန်မှာမူ ထို့ထက်ပင် ပိုမိုအံ့အားသင့်ဖွယ် ကောင်းလှသည်။

မျက်စိတစ်မှိတ်အတွင်းမှာပင် ၎င်းတို့သည် အမြောက်တပ်စခန်း တည်ရှိရာ ကောင်းကင်ယံထက်သို့ ပြန်လည်ရောက်ရှိသွားခဲ့လေပြီ။

ထိုခဏ၌ ဒုတိယအသုတ် ပစ်ခတ်ရန် ပြင်ဆင်နေကြသော အမြောက်တပ်စုမှ စစ်သည်များသည် ရင်းနှီးနေသော ထိုစူးရှသည့် လေတိုးသံကို ကြားလိုက်ရသဖြင့် မှင်တက်သွားကြပြီးနောက် ကြောက်ရွံ့ထိတ်လန့်မှုများ ရင်ထဲ၌ ပြင်းထန်စွာ တိုးဝင်လာတော့သည်။

မကောင်းတော့ဘူး။

ဝုန်း... ဝုန်း... ဝုန်း...

ကံဆိုးလှသည်မှာ အမြောက်တပ်စုမှ စစ်သည်များ တုံ့ပြန်ရန် အချိန်မရလိုက်မီမှာပင် အမြောက်ကျည်များသည် စခန်းအတွင်းသို့ တရစပ် ကျရောက်ပေါက်ကွဲသွားခဲ့သည်။

ပြင်းထန်လှသော မီးလုံးကြီးများသည် စခန်းအတွင်း၌ ပေါက်ကွဲထွက်သွားပြီး ကိုယ်ပိုင်

တွန်းအားသုံးအမြောက်ကြီးများသည်လည်း မီးလျှံများကြားတွင် အစိတ်စိတ်အမွှာမွှာ ပျက်စီးသွားရတော့သည်။ နားကွဲမတတ် ဆူညံလှသော ပေါက်ကွဲသံများမှာလည်း မရပ်မနား ဆက်တိုက်ထွက်ပေါ်နေပြီး စခန်းတစ်ခုလုံးမှာ ပြင်းထန်စွာ တုန်ခါနေခဲ့သည်။

ကြောက်မက်ဖွယ်ကောင်းသော ပေါက်ကွဲအားလှိုင်းကြောင့် မြေပြင်မှ ဖုန်မှုန့်နှင့် ရွှံ့နွံများမှာ လေထဲသို့ လွင့်စင်တက်သွားကာ အနီးနားရှိ ပျက်စီးသွားသော အမြောက်ကြီးများပင်လျှင် ထိုပြင်းထန်သော အင်အားကြောင့် တိမ်းမှောက်သွားကြရသည်။

ယခုအချိန်တွင် အမြောက်တပ်စခန်းတစ်ခုလုံးမှာ အမြောက်ကျည်များ၏ မညှာမတာ ထိုးနှက်မှုကို ခံလိုက်ရသဖြင့် လုံးဝဥဿုံ ပျက်စီးယိုယွင်းသွားခဲ့ပြီး နေရာအနှံ့အပြား၌ ထိခိုက်ကျဆုံးမှုများဖြင့် ပြည့်နှက်နေတော့သည်။

မြေပြင်ပေါ်တွင် မြေမျက်နှာပြင်၏ အမာရွတ်များသဖွယ် နက်ရှိုင်းလှသော ကျင်းကြီးများမှာ ဟင်းလင်းပွင့်လျက်ရှိပြီး မီးလောင်ကျွမ်းထားသော အလောင်းများနှင့် ပုံသဏ္ဌာန်ပျက်ယွင်းနေသည့် အမြောက်အစိတ်အပိုင်းများမှာလည်း အရပ်မျက်နှာအနှံ့သို့ ပြန့်ကျဲနေသည်။

"အား..."

"ကယ်ကြပါဦး... ကျွန်တော် မသေချင်သေးဘူး"

"နာတယ်... အား..."

"..."

အမြောက်ကျည် ဆယ်ဂဏန်းခန့်သည် စခန်းတစ်ခုလုံးကို အမြစ်ပြတ် သုတ်သင်နိုင်ခြင်း မရှိသေးပေ။ ယမ်းခိုးများ ဖုံးလွှမ်းနေသော မြေပြင်ပေါ်တွင် အသက်ရှင်ကျန်ရစ်နေသေးသည့် အမြောက်တပ်စုမှ စစ်သည်အများအပြားမှာ နေရာအနှံ့ ပြန့်ကျဲ၍ လဲကျနေကြရှာသည်။

သို့သော်လည်း ကျန်ရစ်သူအားလုံးနီးပါးမှာ ဒဏ်ရာကိုယ်စီ ရရှိထားကြပြီး အချို့မှာ နာကျင်စွာ အော်ဟစ်နေကြသလို အချို့မှာလည်း အကူအညီတောင်းခံနေကြကာ အချို့မှာမူ ထိတ်လန့်တုန်လှုပ်လွန်းသဖြင့် ဘာမျှမလုပ်နိုင်ဘဲ မှင်တက်ငေးမောနေကြရရှာသည်။

ယာယီကွပ်ကဲမှုဌာနအတွင်း တပ်မှူးသည် ပေါက်ကွဲသံများကို ကြားလိုက်ရသည့်အခါ တစ်စုံတစ်ခု မှားယွင်းနေပြီဖြစ်ကြောင်း အလိုလိုသိရှိလိုက်သဖြင့် မျက်မှောင်ကြုတ်သွားမိသည်။ ဤသို့ စုပြုံပေါက်ကွဲသံများသည် အဝေးတစ်နေရာမှ ထွက်ပေါ်လာခြင်းဖြစ်ပြီး ဟန်ယဲ့ရပ်ကွက်ဘက်မှ ထွက်ပေါ်လာသော အသံမျိုးမဟုတ်ပေ။

"ဘာတွေဖြစ်နေတာလဲ။ အမြောက်ကျည်တွေက ဘာလို့ လွဲချော်ကုန်ရတာလဲ။ ကိုဩဒိနိတ်တွေလည်း ပေးထားပြီးသားပဲကို အမြောက်တပ်စုက ဘာတွေလုပ်နေကြတာလဲ"

တပ်မှူး၏ မျက်နှာမှာ မည်းမှောင်သွားပြီး အေးစက်စက်လေသံဖြင့် ကြိမ်းမောင်းလိုက်သည်။

ထိုအချိန်တွင် အရာရှိတစ်ဦးသည် ထိတ်လန့်တုန်လှုပ်နေသော မျက်နှာထားဖြင့် အခန်းတွင်းသို့ အပြေးအလွှား ဝင်ရောက်လာခဲ့သည်။

"အရာရှိမင်း... အမြောက်တပ်စုဘက်မှာ ပြဿနာတက်နေပါပြီ။ သူတို့ပစ်လိုက်တဲ့ အမြောက်ကျည်တွေက အမြောက်စခန်းပေါ်ကို တိုက်ရိုက်ပြန်ကျလာပါတယ်"

"ဘာ... အဲဒါ ဘယ်လိုလုပ် ဖြစ်နိုင်မှာလဲ။ အမြောက်စခန်းက ဒီနေရာနဲ့ မီတာထောင်ချီ ဝေးတာလေ။ အဲဒီအမြောက်ကျည်တွေကို ဟိုဘက်အထိ ပြန်ပို့နိုင်တဲ့ စွမ်းအားမျိုး ဘယ်သူ့မှာ ရှိမှာမို့လို့လဲ"

တပ်မှူးသည် ထိတ်လန့်တကြားဖြင့် ထိုင်နေရာမှ ထရပ်လိုက်ပြီး သူ၏မျက်လုံးများတွင် မယုံကြည်နိုင်မှုများဖြင့် ပြည့်နှက်နေတော့သည်။

"အရာရှိမင်း... ဒါ အမှန်တကယ်ပါပဲ။ ဒါက အမြောက်တပ်စုက ကျန်ရစ်သူတွေ ပေးပို့လာတဲ့ စစ်မြေပြင်မှတ်တမ်း ဗီဒီယိုဖိုင်ပါ..."

အရာရှိဖြစ်သူသည် လေးနက်သောမျက်နှာထားဖြင့် တက်ဘလက်တစ်လုံးကို တပ်မှူးထံသို့ ကမ်းပေးလိုက်သည်။

တပ်မှူးသည် စိတ်ကို အတတ်နိုင်ဆုံး တည်ငြိမ်အောင် ထိန်းသိမ်းရင်း တက်ဘလက်ကို ယူ၍ ကြည့်ရှုလိုက်ရာ ဗီဒီယိုဖိုင်အတွင်းရှိ မီးလောင်ကျွမ်းထားသော အလောင်းများနှင့် မီးဟုန်းဟုန်းတောက်နေသော အမြောက်ပျက်ကြီးများကို မြင်တွေ့လိုက်ရသဖြင့် မျက်လုံးများအတွင်း နာကျင်မှုရိပ်များ ဖြတ်ပြေးသွားသည်။

သူသည် အားအင်ကုန်ခမ်းစွာဖြင့် ထိုင်ခုံပေါ်သို့ ပြန်လည်ထိုင်ချလိုက်ပြီး မုန်းတီးမှုများ ပြည့်နှက်နေသော အသံဖြင့် "အမြောက်တပ်စုရဲ့ ဆုံးရှုံးမှု အခြေအနေက ဘယ်လိုရှိလဲ" ဟု မေးမြန်းလိုက်သည်။

"အရာရှိမင်း... ဒီတစ်ကြိမ်မှာ အမြောက်တပ်စုက အကြီးအကျယ် ဆုံးရှုံးသွားခဲ့ရပါတယ်။ ကိုယ်ပိုင်တွန်းအားသုံး အမြောက် ၃၆ လက်ထဲမှာ ၃ လက်ပဲ အကောင်းအတိုင်း ကျန်ပါတော့တယ်။ ကျန်တာတွေကတော့ လုံးဝပျက်စီးသွားပြီဖြစ်လို့ ပြန်ပြင်ဖို့တောင် မဖြစ်နိုင်တော့ပါဘူး။

လူအင်အားဘက်မှာတော့ ကံကောင်းလို့ အသက်ရှင်ကျန်ရစ်သူ စစ်သည် ၂၀ ခန့်ပဲ ရှိပါတော့တယ်။ အဲဒီထဲမှာလည်း အများစုက ဒဏ်ရာပြင်းထန်လို့ အရေးပေါ် ဆေးကုသမှု ခံယူဖို့ လိုအပ်နေပါတယ်"

ထိုစကားကို ကြားသောအခါ အရာရှိ၏ မျက်နှာပေါ်တွင်လည်း ဇွန်ဘီဘုရင်ကြောင့် အမြောက်တပ်စု ခံစားလိုက်ရသည့် ပျက်စီးဆုံးရှုံးမှုများအတွက် မုန်းတီးမှုအရိပ်အယောင်များ ဖြတ်သန်းသွားတော့သည်။

"အင်း..."

ဒုန်း…

အမြောက်တပ်စု တစ်ခုလုံးနီးပါး ချေမှုန်းခံလိုက်ရသည်ဟူသော သတင်းကို ကြားလိုက်ရသောအခါ တပ်မှူးသည် သူမြိုသိပ်ထားသမျှ ဒေါသအဟုန်များ ပြန်လည်ပွင့်ထွက်လာပြီး ရှေ့ရှိစားပွဲကို အားပြင်းစွာ ရိုက်ချလိုက်တော့သည်။

"ပစ်ခတ်ကြစမ်း... ရှေ့တန်းက တပ်ဖွဲ့တွေကို အစွမ်းကုန် တိုက်ခိုက်ဖို့ အမိန့်ပေးလိုက် ဒီနေ့ ငါသေရမယ်ဆိုရင်တောင် အဲဒီ ဇွန်ဘီဘုရင်ရဲ့ အသားတစ်ဖတ်လောက်ကိုတော့ အလဲအလှယ်လုပ်ပြီး ယူသွားရမယ်"

"တပ်မှူး..."

သူ့ဘေးရှိ အဆင့်မြင့်အရာရှိကြီးများသည် တစ်စုံတစ်ရာ ဖျောင်းဖျရန် ပြင်လိုက်ကြသော်လည်း စကားလုံးများကို ပြန်လည်မြိုချလိုက်ကြရသည်။

ဇွန်ဘီဘုရင်သည် သူတို့အပေါ် ဤမျှကြီးမားသော ဆုံးရှုံးမှုမျိုး ပေးစွမ်းခဲ့လေရာ ၎င်းကို ပြန်လည်ပေးဆပ်စေခြင်း မပြုနိုင်ပါက အခြေစိုက်စခန်းသို့ ပြန်ရောက်သည့်အခါတွင်လည်း တာဝန်ခံမှု၊ တာဝန်ယူမှုများ ရှိလာပေလိမ့်မည်။

လူသားများသာ အံ့အားသင့်နေကြသည်မဟုတ်ပေ။ ချီချီလေးပြသလိုက်သော စွမ်းအားကို မြင်တွေ့လိုက်ရသည့် လုချွမ်းသည်လည်း ထပ်တူပင် မှင်တက်သွားခဲ့ရသည်။

ချီချီလေး၏ သေးငယ်လှသော ခန္ဓာကိုယ်လေးထဲမှ ဤမျှကြောက်မက်ဖွယ်ကောင်းသော စွမ်းအင်များ ပေါက်ကွဲထွက်လာလိမ့်မည်ဟု သူ လုံးဝမထင်မှတ်ထားခဲ့ပေ။

ဒါဟာ အဆင့် ၅ ကို ရောက်ရှိသွားတဲ့ ချီချီလေးရဲ့ တကယ့်စွမ်းအားအစစ်အမှန်လား။

သူ့ဘေးတွင် ရပ်နေသော ကျောက်လင်းမှာမူ ကျိရုရွှယ်၏ စွမ်းအားထုတ်ဖော်မှုကို ကြည့်ရင်း အံ့သြလွန်းသဖြင့် ဦးနှောက်ပင် ထုံကျဉ်သွားသကဲ့သို့ ခံစားလိုက်ရသည်။

ဒါ... ဒါ ဘာတွေဖြစ်ကုန်တာလဲ။

ဒါ တကယ်ပဲ ချီချီလေး လုပ်လိုက်တာလား။

ချီချီလေးမှာ ဒီလောက်အထိ အစွမ်းထက်တဲ့ ခွန်အားတွေ ရှိနေတာလား။

ဒီနေ့ကစပြီး ငါက ချီချီလေးကို ကာကွယ်ပေးဖို့ လိုအပ်ဦးမှာလား။

ဒါမှမဟုတ် နောင်အနာဂတ်မှာ ချီချီလေးကပဲ ငါ့ကို ပြန်ပြီး ကာကွယ်ပေးရတော့မှာလား။

........

ဟန်ယဲ့ရပ်ကွက် အပြင်ဘက်တွင်မူ တိုက်ခိုက်ရေးအမိန့်ကို ထပ်မံထုတ်ပြန်လိုက်ပြီးနောက် စစ်သည်များသည် အမြောက်တပ်စု၏ ပြဿနာများကို ဆက်လက်တွေးတောမနေတော့ဘဲ ဟန်ယဲ့ရပ်ကွက်အတွင်းပိုင်းသို့ အငမ်းမရ တိုက်စစ်ဆင်လာကြတော့သည်။

ရှူး... ရှူး... ရှူး...

ခဏချင်းမှာပင် မော်တာများ၊ စက်သေနတ်များ၊ ဒုံးပစ်လောင်ချာများသာမက ဝေဟင်ရှိ တင့်ကားများနှင့် ရဟတ်ယာဉ်များအားလုံးသည် ဟန်ယဲ့ရပ်ကွက်အတွင်းရှိ ဇွန်ဘီရုပ်သေးများကို စတင်ပစ်ခတ် တိုက်ခိုက်ကြတော့သည်။

အထူးသဖြင့် တင့်ကားဆယ်ဂဏန်းကျော်နှင့် တိုက်ခိုက်ရေးရဟတ်ယာဉ်များသည် သံသယဖြစ်ဖွယ်ရှိသော အဆောက်အအုံအထပ်များကို ပစ်မှတ်ထားကာ တပြိုင်နက်တည်း ပစ်ခတ်လိုက်ကြသည်။

မျက်စိတစ်မှိတ်အတွင်းမှာပင် အမြောက်ကျည်ဆန်မိုးများသည် ကောင်းကင်ယံကို ဖြတ်သန်းသွားပြီး ဟန်ယဲ့ရပ်ကွက်၏ နေရာအနှံ့အပြားသို့ ကျရောက်သွားခဲ့သည်။

တစ်ချိန်တည်းမှာပင် ရိုင်ဖယ်ကိုင်စစ်သည်များသည်လည်း ဇွန်ဘီရုပ်သေးများနှင့် သံသယရှိဖွယ် အဆောက်အအုံအထပ်များကို တရစပ် ပစ်ခတ်ကြရာ ထွက်ပေါ်လာသော မီးလျှံတန်းများမှာ ဟန်ယဲ့ရပ်ကွက်တစ်ခုလုံးကို ဆန်ခါတစ်ခုကဲ့သို့ အပေါက်အပြဲများဖြစ်အောင် ဖောက်ထွင်းပစ်တော့မည့်အလား ထင်မှတ်ရသည်။

"ဟင်း... အလကားပဲ ကြိုးစားမနေနဲ့"

အခန်းတွင်း၌ ရှိနေသော ကျိရုရွှယ်သည် အစွမ်းကုန်အသုံးချထားမှုကြောင့် အသက်ကို ခပ်ပြင်းပြင်းရှူရင်း အေးစက်စွာ နှာခေါင်းရှုံ့လိုက်ကာ အချိန်ထိန်းချုပ်ခြင်းစွမ်းရည်ကို ထပ်မံထုတ်ဖော်လိုက်ပြန်သည်။

ချက်ချင်းဆိုသလိုပင် အမြောက်ကျည်များဖြစ်စေ ကျည်ဆန်များဖြစ်စေ အားလုံးမှာ ထူးဆန်းအံ့သြဖွယ်ကောင်းလောက်အောင်ပင် ဝေဟင်ထက်၌ တန့်ခနဲ ရပ်တန့်သွားကြတော့သည်။

ကောင်းကင်ယံကို ဖြတ်သန်းသွားသော ကျည်ဆန်နှင့် အမြောက်သံများမှာ ရုတ်တရက် ငြိမ်သက်သွားပြီး ဟန်ယဲ့ရပ်ကွက်တစ်ခုလုံးမှာ ထူးဆန်းသော တိတ်ဆိတ်မှုတစ်ခုအတွင်းသို့ ကျရောက်သွားခဲ့သည်။

ရှူး... ရှူး... ရှူး...

ထိုခဏ၌ပင် ကြောင်ကြည့်နေကြသော စစ်သည်များ၏ မျက်စိရှေ့မှောက်မှာပင် ကျိရုရွှယ်သည် သူမ၏ စိတ်စွမ်းအားကို ထုတ်လွှတ်လိုက်ရာ ရပ်တန့်နေသော ကျည်ဆန်များနှင့် အမြောက်ကျည်များမှာ မျက်စိတစ်မှိတ်အတွင်း လားရာဘက် ပြောင်းပြန်လှည့်သွားခဲ့သည်။

"အမြန်ပြေးကြ..."

လူအုပ်ထဲမှ အော်ဟစ်သံတစ်သံ ထွက်ပေါ်လာပြီး နောက်တစ်စက္ကန့်တွင် သိပ်သည်းလှသော ပေါက်ကွဲသံများသည် ဟန်ယဲ့ရပ်ကွက်၏ ပတ်လည်တစ်ခွင်၌ ပြန့်နှံ့သွားတော့သည်။

"အား..."

နာကျင်စွာ အော်ဟစ်သံများ ဆက်တိုက်ထွက်ပေါ်လာပြီးနောက် မြက်ပင်များကို ရိတ်သိမ်းလိုက်သကဲ့သို့ လူသားစစ်သည် အမြောက်အမြားမှာ လွင့်စင်ထွက်သွားကာ မြေပြင်ပေါ်သို့ လဲကျကုန်ကြသည်။

လားရာပြောင်းသွားသော အမြောက်ကျည်များသည် မော်တာစခန်းအချို့ရှိ ခဲယမ်းမီးကျောက်များကို ထိမှန်ပေါက်ကွဲစေခဲ့ရာ ထိုနေရာများမှာ အစအနပင် ရှာမရအောင် ပျက်စီးသွားပြီး မော်တာတပ်သားများမှာလည်း ခန္ဓာကိုယ်များ မီးကျွမ်းလျက် လေထဲသို့ လွင့်စင်သွားကြရသည်။

တိုက်ခိုက်ရေးရဟတ်ယာဉ်များမှာလည်း မီးဟုန်းဟုန်းတောက်ကာ အောက်ဘက်သို့ ထိုးဆင်းပျက်ကျကုန်ကြသည်။

သံချပ်ကာယာဉ်များနှင့် တင့်ကားများသည် သူတို့ပစ်လိုက်သော အမြောက်ကျည်များဖြင့်ပင် ပြန်လည်ထိမှန်ကုန်ကြရာ အများစုမှာ မီးလောင်ပေါက်ကွဲသွားကြပြီး အနီးနားရှိ စစ်သည်များမှာလည်း သံချပ်ကာ အပိုင်းအစများ၏ ဒဏ်ကြောင့် သွေးအိုင်ထဲတွင် လဲကျကုန်ကြတော့သည်။

ချက်ချင်း ပေါက်ကွဲမသွားသော တင့်ကားအချို့မှာလည်း မီးစွဲလောင်နေသဖြင့် အတွင်းရှိ စစ်သည်များမှာ မီးလျှံများကြားမှ ရူးသွပ်စွာ တွားသွား၍ ထွက်လာကြပြီး ပါးစပ်မှလည်း ကြောက်မက်ဖွယ်ကောင်းအောင် အော်ဟစ်နေကြရှာသည်။

ချီချီလေးက လူသားစစ်တပ်ကို တစ်ကွက်တည်းဖြင့် အရေးနိမ့်လုနီးပါး ဖြစ်အောင်လုပ်လိုက်သည်ကို မြင်တွေ့လိုက်ရသော လုချွမ်းမှာ ရှေ့တန်းမှ လူသားများကို တိုက်ခိုက်ရန် ဇွန်ဘီရုပ်သေးများကို ဆင့်ခေါ်တော့မည့်အစီအစဉ်ကို ချက်ချင်းရပ်တန့်လိုက်ပြီး ဂုဏ်ယူမိသွားသည်။

ချီချီလေး ပြသလိုက်သော အစွမ်းထက်စွမ်းရည်နှင့် ယှဉ်လျှင် သူ၏လက်အောက်ရှိ မည်သည့်အဆင့် ၅ ဇွန်ဘီမျှ မနှိုင်းယှဉ်နိုင်ပေ။

ဒီလောက်ငယ်ငယ်လေးနဲ့ ဒီလောက်ကြောက်စရာကောင်းတဲ့ စွမ်းအားမျိုးကို ပိုင်ဆိုင်ထားတာလား...

ဒီနေ့ကစပြီး ချီချီလေးက ငါ့ရဲ့ အကြီးမားဆုံးသော လျှို့ဝှက်လက်နက်ဖြစ်လာတော့မှာပဲ။