ထုန်းရှန့်ညီလာခံ အကြိုနေ့

ကျန့်ဟွမ်းတောင်ခရီးစဉ် ပြီးဆုံးပြီးနောက် ထန်ထျန်းက ထုန်းရှန့်တောင် သို့ ပြန်ရောက်လာပြီး သူ၏ ကျင့်ကြံခြင်းကို ပြန်လည်စတင်ခဲ့ပေသည်။

သူ၏ စီစဉ်မှုများကြောင့် ကုန်သွယ်ရေးအသင်းများ ဝယ်ယူသည့်ကိစ္စမှာ ယခင်ကထက် များစွာ ပိုမိုချောမွေ့လာခဲ့သည်။

ထျန်းရှထုန်က သူ၏ စေတနာကို အရင်ပြသခဲ့ပြီးနောက် သူ၏ အနှိုင်းမဲ့သော ငွေကြေးဓနကိုပါ ထပ်မံပြသခဲ့ပေသည်။

အမြင်အနည်းငယ် ရှိသူတိုင်းက အနာဂတ်ကုန်သွယ်မှုလောကမှာ ထျန်းရှထုန် ကုန်သွယ်ရေးအသင်း၏ ကမ္ဘာဖြစ်လာတော့မည်ကို သိကြပေသည်။

ထျန်းဖူနန်းတော် အဆင့်မြင့်ပိုင်းများက ကြားဝင်တားဆီးခြင်း မပြုသရွေ့ပေါ့။

သို့သော် ထန်ထျန်းက စည်းကမ်းတကျရှိပြီး မည်သည့် တားမြစ်ချက်ကိုမျှ ချိုးဖောက်ခြင်း မရှိသည့်အပြင် လက်လည်း ဖွာလှပေရာ လှူဒါန်းလိုက်လျှင် ထရီလီယံနှင့်ချီ၍ လှူဒါန်းတတ်ပေသည်။

ယခင်က ဝမ်ပေါင်ရေကန်၏ တစ်နှစ်စာ အခွန်အားလုံး ပေါင်းလိုက်လျှင်ပင် ဘယ်လောက်ရှိပါမည်နည်း။

ထန်ထျန်း၏ ထျန်းဖူနန်းတော် တပည့်ဆိုသည့် အဆင့်အတန်းမှာလည်း ဤကုန်သည်များထက် များစွာ ပို၍ ယုံကြည်ရပေသည်။

ထို့ကြောင့် အခြေအနေကို သိသူများမှာ ထျန်းရှထုန် အင်အားကြီးလာတော့မည်မှာ အတည်ဖြစ်သွားပြီ ဖြစ်ကြောင်း အခြေခံအားဖြင့် ခွဲခြားသိမြင်နိုင်ကြပေသည်။

ရွှမ်ယွင်မျှော်စင်မှာမူ...

သမိုင်းသံသရာ ကြီးက တရွေ့ရွေ့ လည်ပတ်လာခဲ့ပြီဖြစ်ရာ သူတို့ကဲ့သို့သော ဘုရင်ဟောင်းမှာလည်း အတိတ်တစ်ခုအဖြစ်သာ ကျန်ရစ်ရတော့မည် ဖြစ်ပေသည်။

သို့သော် နောက်ပိုင်းကိစ္စများတွင် ထန်ထျန်းမှာ များများစားစား ပါဝင်ခြင်း မရှိတော့ဘဲ ဝမ်ကန်းနှင့် လီဟုန်တို့ကိုသာ လွှဲအပ်၍ ကိုင်တွယ်ခိုင်းထားလိုက်သည်။

သူကမူ ကုံးချန် ခြံဝင်း ရှိ ကျင့်ကြံခြင်း အခန်းထဲသို့သာ ဝင်သွားခဲ့ပေသည်။

ထန်ထျန်းသာ စိတ်အေးလက်အေးနှင့် အလေးအနက် ကျင့်ကြံမည်ဆိုပါက တိုးတက်မှုနှုန်းမှာ အလွန်ပင် လျင်မြန်လှပေသည်။

လဝက်ခန့် ကြာပြီးနောက်တွင် သူက မြင့်မြတ်ရွှေအင်မော်တယ် အလယ်အလတ်အဆင့်သို့ အောင်မြင်စွာ တက်လှမ်းနိုင်ခဲ့ပေသည်။

နောက်ထပ် နှစ်ရက်၊ သုံးရက်ခန့် အချိန်ပေး၍ သူ၏ ကျင့်ကြံခြင်း အဆင့်ကို ခိုင်မာအောင် လုပ်ခဲ့သည်။

ရုတ်တရက်ဆိုသလို ဟိန်းထွက်နေသော ခေါင်းလောင်းသံကြီးမှာ ထုန်းရှန့်တောင် ထိပ်တွင် မြည်ဟည်းလာခဲ့ပေသည်။

ကျင့်ကြံခြင်း အခန်းထဲတွင် ထန်ထျန်းက မျက်လုံးများကို ဖြေးဖြေးချင်း ဖွင့်လိုက်သည်။

ဤခေါင်းလောင်းသံမှာ တစ်နှစ်လျှင် တစ်ကြိမ် ကျင်းပမြဲဖြစ်သော ထုန်းရှန့်ညီလာခံ ကို တရားဝင် စတင်လိုက်ပြီဖြစ်ကြောင်း ကြေညာလိုက်ခြင်းပင်။

ထိုအချိန်တွင် ထုန်းရှန့်တောင် ထိပ်ဖျားရှိ ကြီးမားလှသော ရွှေဝါရောင် ခေါင်းလောင်းကြီး၏ ဘေးပတ်ပတ်လည်တွင် တပည့်များနှင့် အကြီးအကဲ အမြောက်အမြား ဝိုင်းအုံနေကြပြီ ဖြစ်သည်။

ခေါင်းလောင်းကြီးမှာ မြေပြင်မှ ခုနစ်မီတာ၊ ရှစ်မီတာခန့် အကွာတွင် လေထဲ၌ လွင့်မျောနေပြီး တစ်ခုလုံးမှ ဝါကျင့်ကျင့် အလင်းတန်းများ ဖြာထွက်ကာ အောက်ဘက်ရှိ နယ်မြေတစ်ခုလုံးကို ဖုံးလွှမ်းထားပေသည်။

တပည့်များမှာ တစ်ယောက်ပြီးတစ်ယောက် ရှေ့သို့ တိုးသွားကာ ခေါင်းလောင်းကြီး၏ အောက်တွင် ရပ်နေကြပေသည်။

ခေတ္တမျှ စောင့်ဆိုင်းပြီးနောက်တွင် ခေါင်းလောင်းကြီးမှာ မြည်ဟည်းလာလေ့ရှိသည်။

တစ်ခါတစ်ရံ တစ်ချက်၊ နှစ်ချက် မြည်ပြီး တစ်ခါတစ်ရံ သုံးချက်၊ လေးချက်အထိ မြည်ပေသည်။

ခေါင်းလောင်းသံ လေးချက် မြည်သည့် အခါတိုင်းတွင် လူအများကြား၌ ဆူညံသွားလေ့ ရှိသည်။

ခဏအကြာတွင် ထန်ထျန်း၏ ပုံရိပ်မှာ လူအုပ်၏ အပြင်ဘက်တွင် ပေါ်လာခဲ့သည်။

သူက မိုရှု နှင့်အတူ လာခဲ့ခြင်း ဖြစ်သည်၊ ခေါင်းလောင်းသံ မြည်ပြီး မကြာမီမှာပင် မိုရှောင်းရှောင်းက သူ့ထံသို့ သတင်းပို့လာခဲ့ပြီးနောက် မိုရှု ကို လွှတ်လိုက်ခြင်း ဖြစ်ပေသည်။

"ဒါက ခွန်အားကို စစ်ဆေးတဲ့ အရာလား"

ရှေ့ရှိ ခေါင်းလောင်းကြီးကို ကြည့်ကာ ထန်ထျန်းက မေးလိုက်သည်။

မိုရှုက ခေါင်းညိတ်ကာ "ဒါက ဟွမ်းလုံ ခေါင်းလောင်း လို့ ခေါ်တယ်၊ တချို့ကလည်း ရှန်းလင် ခေါင်းလောင်း လို့ ခေါ်ကြတယ်။"

"ဒါက ကျင့်ကြံသူရဲ့ ခွန်အားကို စစ်ဆေးနိုင်သလို လူတစ်ယောက်ရဲ့ အရိုးသက်တမ်းကိုလည်း စစ်ဆေး နိုင်တယ်၊ ဒါပေမဲ့ မြင့်မြတ်ရွှေအင်မော်တယ် အဆင့်တွေအတွက်ပဲ သက်ရောက်မှု ရှိတာ။"

"မြင့်မြတ်ရွှေအင်မော်တယ် အစောပိုင်းအဆင့်ဆိုရင် တစ်ချက်မြည်တယ်၊ အလယ်အလတ်အဆင့်ဆိုရင် နှစ်ချက်ပေါ့၊ အဲဒီလိုပဲ မြင့်မြတ်ရွှေအင်မော်တယ် အထွတ်အထိပ် အဆင့် ရောက်ရင်တော့ လေးချက် မြည်တယ်။"

"လေးချက်က အမြင့်ဆုံးပဲ၊ မြင့်မြတ်ရွှေအင်မော်တယ် ခွန်အား မပြည့်မီတဲ့သူတွေ ဒါမှမဟုတ် ကျော်လွန်သွားတဲ့သူတွေဆိုရင် ဟွမ်းလုံ ခေါင်းလောင်းက ဘာတုံ့ပြန်မှုမှ ပြမှာ မဟုတ်သလို သင့်တော်တဲ့ ပြစ်ဒဏ်ကိုပါ ခံရဦးမှာ။"

"ပြောရရင်တော့ ဒီခေါင်းလောင်းက ထုန်းရှန့်ညီလာခံအတွက် သီးသန့် ပြင်ဆင်ထားတာပဲ။"

ထုန်းရှန့်ညီလာခံ၏ အသက်ကန့်သတ်ချက်မှာ အသက် ၃၀ ဖြစ်ပြီး ခွန်အားကန့်သတ်ချက်မှာ မြင့်မြတ်ရွှေအင်မော်တယ် အဆင့် ဖြစ်ပေသည်။

ဤစည်းကမ်းချက်များနှင့် ကိုက်ညီလျှင် ဟွမ်းလုံ ခေါင်းလောင်းအောက်တွင် စစ်ဆေးမှု ခံယူနိုင်ပြီး အောင်မြင်သွားပါက စာရင်းသွင်းခြင်း အောင်မြင်သည်ဟု မှတ်ယူရပေမည်။

သူတို့နှစ်ဦး စကားပြောနေစဉ်မှာပင် ရွှေအင်မော်တယ် အထွက်အထိပ် အဆင့်ရှိသော တပည့်တစ်ဦးက ပွဲတက်ချင်သဖြင့် ရှေ့သို့ သွားလိုက်သည်။

သို့သော် ဟွမ်းလုံ ခေါင်းလောင်းက ချက်ချင်းပင် သူ့ကို သိသွားပြီး ဝါကျင့်ကျင့် မိုးကြိုး တန်း တစ်ခုက ထိုတပည့်၏ ဦးခေါင်းပေါ်သို့ တိုက်ရိုက် ပစ်ချလိုက်ရာ သူ၏ ဦးထုပ်မှာ လွင့်စင်သွားပြီး ဆံပင်များလည်း ဖရိုဖရဲဖြစ်ကာ တစ်ကိုယ်လုံးမှ မီးခိုးဝါများ ထွက်လာတော့သည်။

ထိုသနားစရာကောင်းသော အခြေအနေကြောင့် ဘေးပတ်ပတ်လည်ရှိ တပည့်များမှာ တဟားဟား အော်ရယ်ကြတော့သည်။

"ဟားဟားဟား၊ နှစ်တိုင်း ဒီလိုလူမျိုးတွေ ရှိတာပဲ၊ မဖြစ်နိုင်မှန်း သိသိကြီးနဲ့ လာပြီး အပြစ်ပေးခံရတာ၊ ဘာစိတ်ဓာတ်လဲ မသိဘူး"

"သူက ဟွမ်းလုံ ခေါင်းလောင်းကို လိမ်လို့ရမယ်လို့ ထင်နေတာ ထင်ပါရဲ့"

"အသက်ကန့်သတ်ချက်က ပြည့်တော့မှာမို့လို့ နေမှာပါ၊ အခုမှ မကြိုးစားရင် နောင်မှာ ဘာအခွင့်အရေးမှ ရှိတော့မှာ မဟုတ်ဘူးလေ။"

တစ်စုံတစ်ယောက်က သက်ဆိုင်သည့် အကြောင်းရင်းကို ပြောလိုက်သည်။

ထုန်းရှန့်တောင်ရှိ တပည့်များအတွက် ထုန်းရှန့်ညီလာခံမှာ အမြင့်ဆုံး စံနှုန်းရှိပြီး သူတို့အားလုံး အလွန်ပင် မျှော်လင့်တောင့်တရသော အမြင့်ဆုံး စင်မြင့်ကြီး ဖြစ်ပေသည်။

ဤနေရာတွင် အသက် ၃၀ အထိ ကျင့်ကြံနေပြီး ထုန်းရှန့်ညီလာခံကို တစ်ကြိမ်မျှ မဝင်ပြိုင်ခဲ့ရလျှင် ၎င်းမှာ တစ်သက်လုံး နောင်တရစရာ ဖြစ်ပေလိမ့်မည်။

ထို့ကြောင့် အချို့လူများမှာ မဖြစ်နိုင်မှန်း သိသိကြီးနှင့် အပြစ်ပေးခံရမည်ကို သိနေသော်လည်း ဟွမ်းလုံ ခေါင်းလောင်းအောက်တွင် ရပ်ရန် ရွေးချယ်ခဲ့ကြခြင်း ဖြစ်ပေသည်။

မိုးကြိုး အပစ်ခံရပြီး တစ်ကိုယ်လုံး ကျွမ်းသွားရင်တောင် ၎င်းက အတိတ်က သူ့ကိုယ်သူ အဖြေတစ်ခု ပေးလိုက်ခြင်း ဖြစ်ပေသည်။

သို့သော် ထိုသို့သော လူမျိုးမှာ နည်းပါးလှပေသည်၊ မကြာမီမှာပင် ဟွမ်းလုံ ခေါင်းလောင်း၏ စစ်ဆေးမှုမှာ ပုံမှန်အတိုင်း ပြန်ဖြစ်သွားပြီး လေးလံသော ခေါင်းလောင်းသံများမှာ လူတိုင်း၏ ဦးခေါင်းထက်တွင် စဉ်ဆက်မပြတ် မြည်ဟည်းနေတော့သည်။

ခဏမျှ ကြည့်ပြီးနောက် ထန်ထျန်းက မိုရှုကို မေးလိုက်သည်။ "နှစ်တိုင်း ထုန်းရှန့်ညီလာခံကို ပါဝင်တဲ့လူက ဘယ်လောက်လောက် ရှိလဲ"

"ခုနက တော်တော်များများ စစ်ဆေးမှု အောင်မြင်သွားတာကို ငါ မြင်လိုက်သလိုပဲ။"

"ဒါပေမဲ့... အများစုက မြင့်မြတ်ရွှေအင်မော်တယ် အစောပိုင်းအဆင့်တွေပဲ၊ တချို့ဆို အခုမှ အဆင့်တက်လာတဲ့ ပုံပဲ။"

မိုရှုက ခေါင်းညိတ်ကာ ပြုံးလျက် ပြောသည်။ "သခင်လေးထန်က တကယ်ကို အကဲခတ် တော်တာပဲ။"

"ထုန်းရှန့်ညီလာခံကို နှစ်တိုင်း ကျင်းပတာပါ၊ တစ်ကြိမ်မှာ ပါဝင်ခွင့်ရတဲ့ လူဦးရေက ၅၀၀ ဝန်းကျင်လောက် ရှိတယ်။"

"ဒါပေမဲ့ ဒီ ၅၀၀ ထဲမှာ ၄၀၀ လောက်က တကယ်တော့ မြင့်မြတ်ရွှေအင်မော်တယ် အစောပိုင်းအဆင့်တွေ ဒါမှမဟုတ် အခုမှ အဆင့်တက်လာတဲ့ လူတွေပဲ။"

"ဒီအခြေအနေက ထုန်းရှန့်ညီလာခံရဲ့ စည်းကမ်းချက်တွေနဲ့ ဆက်စပ်နေတယ်။"

"ထုန်းရှန့်တောင်က တပည့်တိုင်းဟာ ထုန်းရှန့်ညီလာခံကို သုံးကြိမ် ပါဝင်ယှဉ်ပြိုင်ခွင့် ရှိတယ်၊ ပထမတစ်ကြိမ် ရှုံးနိမ့်သွားရင် နောက်ထပ် နှစ်ကြိမ် ဆက်ပြီး ယှဉ်ပြိုင်လို့ ရသေးတယ်။"

"ဒါကြောင့် တပည့်တော်တော်များများက မြင့်မြတ်ရွှေအင်မော်တယ် အစောပိုင်းအဆင့် ရောက်တာနဲ့ ထုန်းရှန့်ညီလာခံရဲ့ တိုက်ပွဲ အငွေ့အသက် ကို သွားပြီး ခံစားကြည့်တတ်ကြတယ်။"

"အဲဒါကြောင့် ခုနက မြင်ခဲ့ရတဲ့ အခြေအနေမျိုး ဖြစ်လာတာပေါ့။"

ထန်ထျန်းမှာ ချက်ချင်းပင် သဘောပေါက်သွားခဲ့သည်၊ဒီလိုကိုး။

"ဆိုလိုတာက ဒီ ၄၀၀ က လူအင်အား ဖြည့်ပေးရုံ သက်သက်ပေါ့"

မိုရှုက ပြုံးလျက် "ဒီလိုလည်း ပြောလို့ရပါတယ်"

"သူတို့က အဓိကအားဖြင့် ပွဲအရှိန်မြှင့်ပေးဖို့ပါပဲ၊ ဒီ ၄၀၀ က ပထမရက်မှာပဲ အရှုံးအနိုင် ခွဲကြမှာဖြစ်ပြီး ဒုတိယအဆင့်ကို တက်ရောက်ဖို့အတွက် နေရာ ၁၀ ခုကိုပဲ လုကြရမှာ။"

"ဒုတိယအဆင့်ဖြစ်တဲ့ မြင့်မြတ်ရွှေအင်မော်တယ် အလယ်အလတ်အဆင့်တွေရဲ့ ပြိုင်ပွဲက စပြီးမှ ထုန်းရှန့်ညီလာခံရဲ့ အဓိက ပွဲစဉ်က တရားဝင် စတင်မှာပါ။"

ထန်ထျန်းက ခေါင်းညိတ်လိုက်သည်။

တကယ်တော့ မိုရှုပြောသည်မှာ အနည်းငယ် ယဉ်ကျေးနေသေးသည်၊ မြင့်မြတ်ရွှေအင်မော်တယ် အစောပိုင်းအဆင့်က ပွဲအရှိန်မြှင့်ပေးဖို့ ဆိုလျှင် အလယ်အလတ်အဆင့်က သရုပ်ပြပွဲ ဖြစ်ပြီး နှောင်းပိုင်း အဆင့်ကို ထိပ်တန်းပြိုင်ပွဲဟု ခေါ်နိုင်ကာ အထွတ်အထိပ် အဆင့်မှသာ တကယ့် အဆင့်တက်ပွဲ ဖြစ်ပေလိမ့်မည်။

ဘယ်လိုပဲဖြစ်ဖြစ် စုစုပေါင်း နေရာ ၃ ခုပဲ ရှိသည် မဟုတ်ပါလား။

သူတို့နှစ်ဦး ခဏမျှ ထပ်ကြည့်နေပြီးနောက် မိုရှုက ရုတ်တရက် မေးလိုက်သည်။ "သခင်လေးထန်၊ အခုတစ်ခေါက်... ရှင်လည်း သေချာပေါက် ပါမှာ မဟုတ်လား"

ထန်ထျန်းက မေးစေ့ကို ပွတ်ကာ "ငါက ရွှေအင်မော်တယ် အဆင့် တစ်ယောက်ပဲလေ၊ မင်းတို့နဲ့အတူ ယှဉ်ပြိုင်ဖို့ ဘယ်မှာ အရည်အချင်း ရှိပါ့မလဲ။"

မိုရှုက ခေါင်းယမ်းလျက် ပြုံးလိုက်သည်။ "သခင်လေးထန်က ကျွန်မကို နောက်မနေပါနဲ့တော့။"

"ပြီးခဲ့တဲ့ အခေါက် နေလအင်မော်တယ်နန်းတော် ခရီးစဉ်ကတည်းက သခင်လေးရဲ့ ခွန်အားက ရွှေအင်မော်တယ် အဆင့် မဟုတ်ဘူးဆိုတာ ကျွန်မ သိပြီးသားပါ။"

"ဒါပေမဲ့..."

"လူတော်တော်များများကတော့ ဒီလဝက်၊ တစ်လအတွင်းမှာ ရှင့် ခွန်အားက ဒီလောက်အထိ တိုးတက်လာဖို့ မဖြစ်နိုင်ဘူးလို့ ယူဆနေကြတုန်းပဲ။"

"တစ်ချိန်တည်းမှာပဲ တချို့လူတွေက ရှင့်ကို ပါဝင်စေချင်နေကြတယ်၊ အဲဒါမှ ရန်ငြိုးအချို့ကို ရှင်းလို့ရမှာမို့လို့လေ။"

"ဥပမာ စစ်နတ်ဘုရားနန်းတော်က ဟွမ်ထောင် လိုမျိုးပေါ့။"

ထိုအမည်ကို ကြားလိုက်ရသည့်အခါ ထန်ထျန်းက မျက်ခုံးပင့်လိုက်မိသည်။

"ဟမ်"