နတ်စင်စားပွဲပေါ်က လက်စွပ်

ဆားတွင်းကို ပိတ်ဆို့ပြီးနောက် ရွှီရှင်းသည် တောင်ကုန်းအစွန်းတွင် ဆက်မနေဝံ့တော့ပေ။

သူသည် ငွေရောင်ဘုရင်ကို ချက်ချင်းစီးနင်းကာ တောင်ကုန်းများဝန်းရံထားသော အရင်းအမြစ်ဇုန်အတွင်းသို့ အရှိန်အဟုန်ဖြင့် ပြေးဝင်ပြီး အပြာရောင်အဆင့် အရင်းအမြစ်များကို အလုအယက် စတင်သိမ်းဆည်းတော့သည်။

ဤနေရာရှိ အခြေအနေမှာ သစ်ပင်အိမ်၏ အခြားတစ်ဖက်က အရင်းအမြစ်ဇုန်နှင့် ဆင်တူလှပေသည်။

အသီးအနှံထွက်သော သစ်ပင် သို့မဟုတ် ချုံပုတ်များစွာ မကျန်တော့ပေ။

အပြာရောင်အဆင့် အရင်းအမြစ်များအနေဖြင့် ပေါ့ပလာပင်အချို့နှင့် သစ်သားနက်ပင် တစ်ပင်သာ ရှိသော်လည်း၊ အပြာရောင်အဆင့် ဆေးဘက်ဝင်အပင်အချို့ကိုမူ သူ တွေ့ရှိခဲ့သည်။

၎င်းတို့မှာ သူ့အတွက် အသုံးမဝင်သော်လည်း ချီရွှယ်ဖေးအတွက်မူ အပြာရောင်အဆင့် ဆေးလုံးများ ဖော်စပ်ရာတွင် အသုံးဝင်ပေလိမ့်မည်။

အစားအသောက်အနေဖြင့်မူ သာမန်အစိမ်းရောင်အဆင့် အက်ပရီကော့ ပင်တစ်ပင်နှင့် မှိုခင်းငယ်လေးတစ်ခုသာ ရှိသည်။

ဘာမှမဖြုန်းတီးချင်သော အကျင့်အရ ရွှီရှင်းသည် ၎င်းတို့ကိုပါ သိမ်းဆည်းကာ ကျောပိုးအိတ်ထဲ ထည့်လိုက်၏။

အရင်းအမြစ်ဇုန်တစ်ခုလုံးကို စူးစမ်းပြီးနောက် ရွှီရှင်းသည် သားရဲရုပ်တုများရှိရာ နတ်စင် ဆီသို့ ငွေရောင်ဘုရင်ကို စီး၍ သွားလိုက်သည်။

ယခင်ကဆိုလျှင် ငွေရောင်ဘုရင်မှာ ဤနတ်စင်ကို အလွန်ကြောက်ရွံ့ပြီး တုန်ရင်နေတတ်သော်လည်း၊ ယခုမူ ဗီဇပြောင်းသားရဲ ဖြစ်သွားပြီဖြစ်ရာ ဘာမှမကြောက်တော့ဘဲ နတ်စင်အတွင်းသို့ လွယ်လင့်တကူ ဝင်ရောက်နိုင်ခဲ့သည်။

"ဂျောက်"

ငွေရောင်ဘုရင် ခြေချလိုက်သည်နှင့် နတ်စင်အောက်ခြေမှ ထိုထူးဆန်းသော အသံကြီး ထပ်မံထွက်ပေါ်လာပြန်သည်။

ထို့နောက် မီမီကလည်း နတ်စင်အတွင်းသို့ လိုက်ဝင်လာသော်လည်း ၎င်းကမူ မည်သည့်အသံမှ ထွက်ပေါ်မလာစေပေ။

ရွှီရှင်းသည် ဤအသံကို မျှော်လင့်ထားပြီးသားဖြစ်သဖြင့် မတုန်လှုပ်ဘဲ နတ်စင်၏ ထောင့်လေးထောင့်ရှိ ကျောက်တိုင်လေးတိုင်ကို လှမ်းကြည့်လိုက်သည်။

"ဒီလိုကိုး..."

သူ အတွေးထဲ နစ်ဝင်သွားမိသည်။

မူလက သူ ယဇ်ပူဇော်ခဲ့သဖြင့် လွတ်နေရမည့် ကျောက်တိုင်နှစ်တိုင်ပေါ်တွင် ရုပ်တုအသစ်များ ရောက်ရှိနေချေပြီ။

ယုန်ရုပ်တုနေရာတွင် ကြွက်ရုပ်တုတစ်ခု ရောက်နေ၏။

၎င်းမှာ အခြားရုပ်တုများထက် သေးငယ်သော်လည်း ရှေ့သွားနှစ်ချောင်းမှာမူ ကြောက်စရာကောင်းလောက်အောင် ကြီးမားလှပြီး တစ်ချက်ကိုက်လိုက်ရုံဖြင့် အခြားသတ္တဝါများ၏ ခေါင်းကို ပြတ်တောက်သွားစေနိုင်မည့်အလား ရှိနေသည်။

တောကြောင်ရုပ်တုနေရာတွင်မူ မြေခွေးရုပ်တုတစ်ခု ရောက်နေသည်။

၎င်း၏ အရွယ်အစားမှာ တောကြောင်နှင့် မကွာခြားသော်လည်း အမြီးမှာမူ ကိုယ်ထည်ထက် နှစ်ဆခန့် ပိုရှည်ကာ အလွန်ပင် ထူးခြားနေ၏။

တောဝက်ရုပ်တုနှင့် ဝံပုလွေရုပ်တုများမှာမူ မပြောင်းလဲဘဲ ရှိနေဆဲဖြစ်သည်။

ရွှီရှင်းသည် နတ်စင်၏ ကြမ်းပြင်ကို ကြည့်ကာ တစ်ခုခုကို သတိရလိုက်သည်။

ယခင်က သွေးရောင်ယုန်ကြီး၏ နားရွက်ဖြင့် ခြစ်မိထားသော အစင်းကြောင်းများမှာ ယခုအခါ လုံးဝ ပျောက်ကွယ်သွားပြီး အလိုအလျောက် ပြန်လည်ကောင်းမွန်နေချေပြီ။

၎င်းမှာ ဆားတွင်းက အခြေအနေနှင့် ထပ်တူပင်။

"ဒီနတ်စင်ကြီးကလည်း သက်ရှိတစ်ခုခု ဖြစ်နေတာလား"

သူသည် ဧရာမ သတ္တဝါကြီးတစ်ကောင်၏ ကျောပေါ်တွင် ရပ်နေရသကဲ့သို့ ခံစားလိုက်ရသဖြင့် ကျောစိမ့်သွားရသည်။

သို့သော် အောက်ခြေက ဂျောက် ဟူသော အသံမှာ စက်ယန္တရားတစ်ခု၏ အသံနှင့် ပိုတူလှသဖြင့် သူ၏အတွေးကို ပြန်လည်ရုပ်သိမ်းလိုက်ရ၏။

"အီးးး"

ရွှီရှင်း၏ ပုခုံးပေါ်က ခဲခဲလေးက နတ်စင်အလယ်က စားပွဲပေါ်သို့ လက်ညှိုးထိုးပြကာ တစ်ခုခုရှိကြောင်း အချက်ပေးလိုက်သည်။

ရွှီရှင်း ကြည့်လိုက်သောအခါ စားပွဲပေါ်တွင် အလွန်သေးငယ်သော အရာတစ်ခု ရှိနေသည်ကို တွေ့လိုက်ရ၏။

သူ ငွေရောင်ဘုရင်ကို စီး၍ အနားကပ်ကြည့်လိုက်သောအခါ မျက်နှာအမူအရာ ချက်ချင်း ပြောင်းလဲသွားတော့သည်။

"...ဒါ... ဒါက ဘာလို့ ဒီမှာ ရှိနေတာလဲ"

စားပွဲပေါ်က လက်စွပ်ကို ကြည့်ရင်း ရွှီရှင်း ဇဝေဇဝါ ဖြစ်သွားရသည်။

ဤလက်စွပ်ကို သူ ကောင်းကောင်းသိသည်။

၎င်းမှာ ချန်ယင်ကိုယ်တိုင် ပြုလုပ်ပြီး ရှုလန်ကို ပေးခဲ့သည့်အရာ ၊ သူကိုယ်တိုင်လည်း တစ်ချိန်က ဝတ်ဆင်ခဲ့ဖူးကာ ချန်ယင်တို့မိသားစုထံ ပြန်လည်ပေးအပ်ခဲ့သော လက်စွပ် ဖြစ်သည် မဟုတ်ပါလား..။

ဘာကြောင့် ဒီလက်စွပ်က ဒီမှာ ရှိနေရတာလဲ။

ချန်ယင်တို့မိသားစုက... ဒီကို ရောက်ခဲ့တာလား..။

ရွှီရှင်း လက်စွပ်ကို ကောက်ယူလိုက်သည်။

မူလက အပြာရောင်အဆင့်ရှိသော ထိုလက်စွပ်မှာ ယခုအခါ အဖြူရောင်အဆင့် သာမန်လက်စွပ်တစ်ခုအဖြစ် ပြောင်းလဲသွားချေပြီ။

[ပျက်စီးနေသော ဗီဇပြောင်းသားရဲလက်စွပ် (အဖြူရောင်အဆင့်): တစ်ချိန်က ထူးခြားသော စွမ်းရည်များ ရှိခဲ့သော်လည်း ယဇ်ပူဇော်ခံလိုက်ရပြီးနောက် လုံးဝပျက်စီးသွားကာ သာမန်လက်စွပ်တစ်ခု ဖြစ်သွားခဲ့သည်။]

ဤလက်စွပ်ကို နတ်စင်သို့ ယဇ်ပူဇော်လိုက်ခြင်း ဖြစ်သည်။

ချန်ယင်က ဤလက်စွပ်ထဲတွင် အဆင့်မြင့် ဗီဇပြောင်းသားရဲ ကုန်ကြမ်းများ ပါဝင်သည်ဟု ပြောခဲ့ဖူးသဖြင့် နတ်စင်က ၎င်းကို လက်ခံခဲ့ခြင်း ဖြစ်ပေလိမ့်မည်။

ဒါပေမဲ့ ချန်ယင်တို့မိသားစုက ဘာကြောင့် ဒီမှာ လာပြီး ယဇ်ပူဇော်ရတာလဲ။

ရွှီရှင်း ရုတ်တရက် သိရှိလိုက်ရသည်မှာ ဤနတ်စင်တွင် ယဇ်ပူဇော်ခြင်း၏ ရည်ရွယ်ချက်မှာ ရုပ်တုများကို သက်ရှိသားရဲများအဖြစ် ပြောင်းလဲပစ်ရန် ဖြစ်သည်။

ဒါဆိုရင် ချန်ယင်တို့မိသားစုဟာ သူတို့ကိုယ်သူတို့ လူသားပြန်ဖြစ်ဖို့အတွက် ဒီမှာ လာပြီး ယဇ်ပူဇော်ခဲ့တာလား။

ဖြစ်နိုင်ခြေ အလွန်များ၏။

"ညကျမှ သွားတာ အကောင်းဆုံးပါ၊ အခုသွားရင် မထူးခြားဘူး" ဟု အစေခံမလေးက ရှုလန်ကို ပြောခဲ့သော စကားကို သူ ပြန်သတိရလိုက်သည်။

ညဘက်မှာ နတ်စင်က နေ့ဘက်နဲ့ မတူဘဲ ထူးခြားမှု ရှိနေတာလား..။

"...ဒီည ငါ ဒီကို လာကြည့်ရမယ်။"

ရွှီရှင်း ဆုံးဖြတ်လိုက်သည်။

ချန်ယင်တို့ မိသားစု တစ်ခုခု အခက်အခဲ ဖြစ်နေပါက သူ ကူညီပေးနိုင်ပေလိမ့်မည်။

သူသည် နတ်စင်ဓား ကို ရှာကြည့်ရာ ကျောက်အံဆွဲထဲတွင် မရှိတော့သည်ကို တွေ့ရသည်။

"ချန်ယင်တို့ ယူသွားကြတာလား"

ရွှီရှင်း ရေရွတ်လိုက်မိသည်။

အကယ်၍ ဓားကို ယူသွားသူမှာ ဤအနီးအနား၌ ရှိနေပါက သွေးရောင်ဘီလူးကြီး ပေါ်လာပေလိမ့်မည်။

သို့သော် မြေပုံပေါ်တွင် ရန်သူလုံးဝ မရှိသလို၊ ချန်ယင်တို့မိသားစုမှာလည်း မြေပုံပေါ်တွင် အစက်အပြောက်အဖြစ် ပေါ်လာမည်မဟုတ်ပေ။

နေဦး...

သူ မစစ်ဆေးရသေးသော နေရာတစ်ခု ကျန်သေးသည်။

ဤအရင်းအမြစ်ဇုန်အတွင်းက ကန်ရေပြင်၏ အောက်ခြေပင်။

ရွှီရှင်းသည် ငွေရောင်ဘုရင်ကို ကန်ရှိရာဘက်သို့ အမြန်ပြေးခိုင်းလိုက်၏။

ကန်ဘေးတွင် အရင်ကလို သားရဲများ မရှိတော့ဘဲ တိတ်ဆိတ်ငြိမ်သက်နေသည်။

သူသည် ခရမ်းရောင်အဆင့် အကြေးခွံချပ်ဝတ်ကို ဝတ်ထားသဖြင့် ရေအောက်တွင် လွတ်လပ်စွာ လှုပ်ရှားနိုင်သည်။

သူသည် အသက်ကို ဝဝရှူကာ ရေထဲသို့ ငုပ်လျှိုးလိုက်တော့၏။

ဤကန်မှာ သစ်ပင်အိမ်နားက ကန်လောက် မနက်ဘဲ အလယ်ဗဟိုတွင် ခြောက်မီတာ၊ ခုနစ်မီတာခန့်သာ ရှိပေသည်။

သူ ရေအောက်တွင် လှည့်လည်ကြည့်ရှုစဉ် ကန်လယ်၏ ရွှံ့နွံများပေါ်တွင် ခြေရာအချို့ကို တွေ့လိုက်ရသည်။

လူကြီးခြေရာ သုံးခုနှင့် ကလေးခြေရာ တစ်ခု။

၎င်းတို့မှာ ရွှံ့ထဲတွင် နက်ရှိုင်းစွာ ထင်ကျန်နေ၏။

ဒါ... ချန်ယင်တို့ မိသားစုရဲ့ ခြေရာတွေပဲ။

သူတို့က ရေအောက်မှာ လမ်းလျှောက်ခဲ့ကြတာလား။

ရွှီရှင်း ရေပေါ်သို့ ခဏပြန်တက်ကာ ရေမှော်ပင်ကို စားသုံးပြီးနောက် ခြေရာများနောက်သို့ ထပ်မံလိုက်ပါသွားခဲ့သည်။

ခြေရာများမှာ ကန်လယ်အနီးသို့ ရောက်သောအခါ ရပ်တန့်သွား၏။

ထိုနေရာတွင် ရေတွင်းတစ်တွင်း အရွယ်အစားရှိသော နက်ရှိုင်းသည့် အပေါက်ကြီးတစ်ခု ရှိနေသည်။

အထဲကို လှမ်းကြည့်လိုက်ရာ မှောင်အတိကျနေပြီး အဆုံးကို မမြင်ရပေ။

နောက်တစ်ခါ သူတို့ ဒီထဲကို ခုန်ချသွားကြတာလား...။

...သူတို့ မြေအောက်ကမ္ဘာထဲကိုပဲ ပြန်သွားကြတာလား..။

---

အခန်း ၁၄၀ ပြီး။