သစ်ပင်အိမ် ကာကွယ်ရေးတိုက်ပွဲ

ရွှီရှင်းသည် ကုတင်ပေါ်မှ ချက်ချင်းထကာ ပြတင်းပေါက်အပြင်ဘက်သို့ လှမ်းကြည့်လိုက်သည်။

တောအုပ်ကြီးမှာ လောလောဆယ်တွင် ထူးခြားမှုမရှိသေးဘဲ နေမင်းကြီးမှာ အခုမှ ထွက်စပြုနေပြီး လေပြေအေးလေး တိုက်ခတ်နေသည်မှာ စိတ်အေးချမ်းစရာပင် ကောင်းနေသေး၏။

မြေပုံကို စစ်ဆေးကြည့်ရာတွင်လည်း စူးစမ်းပြီးသားနေရာရော၊ မစူးစမ်းရသေးသည့်နေရာပါ အနီရောင်အစက်အပြောက်များ လုံးဝမရှိသေးပေ။

သို့သော် ဤငြိမ်သက်မှုအောက်တွင် ကြီးမားသော အန္တရာယ်တစ်ခု ဖုံးကွယ်နေသည်ကို ရွှီရှင်း သိနေသည်။

သစ်ပင်အိမ်၏ ကာကွယ်ရေးစွမ်းအား အားနည်းသွားသည်ဆိုခြင်းမှာ ထိုမြေအောက်မွန်းစတားများသည် အကာအကွယ်များကို ဖောက်ထွက်ပြီး ဘေးကင်းဇုန်အတွင်းသို့ တိုက်ရိုက်ရောက်ရှိလာနိုင်သည်ဟု ဆိုလိုခြင်းပင်။

မဟုတ်သေးဘူး... သူတို့ ရောက်နှင့်နေပြီပဲ။

မနေ့ညက အခြေအနေမှာ မိုးရာသီအပြီး သစ်ပင်အိမ်ကာကွယ်ရေး အားနည်းသွားခြင်း၏ နောက်ဆက်တွဲရလဒ် ဖြစ်နိုင်ပေသည်။

"အီးးး..."

ရွှီရှင်း၏ လှုပ်ရှားမှုကြောင့် ခဲခဲလေး နိုးလာပြီး ကုတင်ပေါ်တွင် ဟိုဘက်ဒီဘက် လူးလိမ့်ကာ မျက်လုံးလေးများကို လက်ဖြင့် ပွတ်နေသည်။

"ဆက်အိပ်ဦး၊ စောပါသေးတယ်"

ရွှီရှင်းက ခဲခဲလေး၏ ခေါင်းကို ပုတ်ပေးလိုက်သည်။

ယနေ့အစီအစဉ်မှာ ခဲခဲလေးနှင့် သိပ်ပတ်သက်မှု ရှိပုံမရပေ။

"အီးးး..."

ထိုစကားကို ကြားပြီးနောက် ခဲခဲလေးသည် ၎င်း၏အမြီးလေးကို ဖက်ကာ ပြန်အိပ်ပျော်သွားတော့သည်။

ဒေသတွင်း ဆက်သွယ်ရေးလိုင်းမှာမူ ဆူညံပွက်လောရိုက်နေချေပြီ။

"သစ်ပင်အိမ် ကာကွယ်ရေး အားနည်းသွားတယ်ဆိုတာ ဘာကို ဆိုလိုတာလဲ"

"ဘေးကင်းဇုန် အပြင်ဘက်ကို ထွက်လိုက်ရင် မွန်းစတားတွေ ပေါ်လာတတ်တယ်လို့ ပြောကြတယ်၊ ဘယ်သူသွားကြည့်ပြီးပြီလဲ"

"အပြင်ထွက်တဲ့သူတွေကတော့ အခုလောက်ဆို မြက်ပင်တွေတောင် လူတစ်ရပ်ကျော်နေတာသိနေလောက်ပြီ"

"အစီအစဉ်က ဒီလောက်စောစောကြီး စတာလား.. ပုံမှန်ဆို ၉ နာရီမှ မဟုတ်ဘူးလား..."

"သူငယ်ချင်းတို့ ဘာပဲဖြစ်ဖြစ် သစ်ပင်အိမ်ထဲကနေ အပြင်မထွက်ကြနဲ့ ငါ ခုနက အခြေအနေသွားကြည့်တာ၊ နှစ်လှမ်းပဲ လှမ်းရသေးတယ်၊ လက်မောင်းလောက် တုတ်တဲ့ နွယ်ပင်ကြီး မြေကြီးထဲက ထိုးထွက်လာတာ ငါသာ အိမ်ထဲကို အမြန်ပြန်မပြေးရင် သေပြီ"

ဆက်သွယ်ရေးလိုင်းတွင် တစ်စုံတစ်ယောက် ပြောနေသည်ကို မြင်ရသဖြင့် ရွှီရှင်း၏ မျက်နှာတွင် ထင်ထားတဲ့အတိုင်းပဲ ဟူသော အမူအရာ ပေါ်လာသည်။

အမှန်ပင် မြေပြင်မှာ လုံးဝ ဘေးမကင်းတော့ချေ။

ဘေးကင်းဇုန်ထဲ မပေါ်နိုင်ခဲ့သော မြေအောက်မွန်းစတားများသည် ယခုအခါ မြေပြင်ပေါ်သို့ ရောက်နေကြပြီ ဖြစ်သည်။

"ဘုရားရေ အဲဒီနွယ်ပင်က ငါ့သစ်ပင်အိမ်ကို တိုက်ခိုက်နေပြီ၊ ငါ ဘာလုပ်ရမလဲ သစ်ပင်ရဲ့ ပင်စည်ကိုတောင် ရိုက်နေပြီ"

"သစ်ပင်အိမ်ကို တိုက်ခိုက်နေတာလား"

"ဒါ... ဒါက သစ်ပင်အိမ် ကာကွယ်ရေးတိုက်ပွဲပေါ့။ သစ်ပင်အိမ်ထဲမှာ နေရင်တောင် ဘေးမကင်းတော့ဘူးလား..."

နွယ်ပင်တွေက ပင်စည်ကို တိုက်ခိုက်နေတာလား..။

ရွှီရှင်း ရုတ်တရက် သတိရလိုက်သည်မှာ သူသည် ဟိုးအရင်ကတည်းက သူ၏သစ်ပင်ပင်စည်တွင် သစ်ပင်အိမ် သစ်သားချပ်ဝတ် ဟုခေါ်သော ကာကွယ်ရေးပစ္စည်းကို တပ်ဆင်ခဲ့ဖူးခြင်းပင်။

သူသည် ထုတ်လုပ်ရေးစာရင်းကို စစ်ဆေးကြည့်လိုက်ရာ သစ်ပင်ပင်စည်ကို ကာကွယ်နိုင်သော ချပ်ဝတ်ကို တွေ့လိုက်ရသည်။

[သစ်ပင်အိမ် သစ်သားချပ်ဝတ် (အစိမ်းရောင်အဆင့်): သစ်ပင်ပင်စည်တွင် တပ်ဆင်ရသော ချပ်ဝတ်ဖြစ်ပြီး၊ သားရဲများ၏ တိုက်ခိုက်မှုကြောင့် သစ်ပင်အိမ် ပျက်စီးမှုကို ထိရောက်စွာ လျှော့ချပေးနိုင်သည်။ လိုအပ်ချက်: သစ်တုံး (အစိမ်းရောင်အဆင့်) ၂ ခု]

ဤချပ်ဝတ်မှာ ပင်စည်တစ်မီတာစာအတွက် နှစ်ခု လိုအပ်သည်။

၎င်းမှာ သားရဲများ၏ တိုက်ခိုက်မှုအတွက်ဟု ဖော်ပြထားသော်လည်း ဗီဇပြောင်းသတ္တဝါများအတွက်လည်း အလုပ်ဖြစ်နိုင်ပေသည်။

သူသည် တိုက်ခိုက်ခံနေရသူထံသို့ တိုက်ရိုက် သီးသန့်စာ ပို့လိုက်သည်။

"အခြေအနေ ဘယ်လိုလဲ၊ သစ်ပင်ပင်စည် ထိခိုက်မှု များလား"

တစ်ဖက်က ချက်ချင်း ပြန်ဖြေသည်။

"အကြီးအကဲ ရွှီ ကျွန်တော့်ကို ကယ်ပါဦး"

ရွှီရှင်း - "မလန့်နဲ့၊ အခြေအနေကို ရှင်းပြ"

"အပြင်က... အဲဒီနွယ်ပင်က... ပင်စည်ကို ကြာပွတ်နဲ့ ရိုက်သလို အဆက်မပြတ် ရိုက်နေတာ ရိုက်ချက်တိုင်းမှာ သစ်သားတွေ ကွာကျလာတဲ့အသံကို ကြားနေရတယ်၊ တစ်အိမ်လုံးလည်း လှုပ်နေတာပဲ"

"နွယ်ပင်က သစ်ပင်အိမ်ကို ထိုးဖောက်တိုက်ခိုက်တာမျိုး လုပ်လား"

"လုပ်တယ် လုပ်တယ် ဒါပေမဲ့ သူတို့က ပင်စည်ကို ဖောက်လို့မရတော့ အခု ကြာပွတ်နဲ့ ရိုက်သလိုပဲ အတင်းလုပ်နေတာ၊ တစ်ချက်ရိုက်ရင် သစ်ခေါက်တစ်လွှာ ကွာကျတယ် အကြီးအကဲ... ကယ်ပါဦး"

"မင်းဆီမှာ သစ်တုံးတွေ ရှိလား ရှိရင် ငါ့ကိုပေး၊ ငါ မင်းအိမ်အတွက် ချပ်ဝတ် လုပ်ပေးမယ်"

"ရှိတယ်၊ ရှိတယ်"

ထိုသူမှာ မျှော်လင့်ချက်ရသွားသဖြင့် အားတက်သွားကာ လက်ကျန်သစ်တုံး တစ်ရာကျော်လုံးကို လွှဲပေးလိုက်သည်။

သစ်ပင်အိမ် အနိမ့်များတွင် အကိုင်းအခက်မရှိသော ပင်စည်အပိုင်းမှာ သုံးမီတာခန့်သာ ရှိသဖြင့် ချပ်ဝတ် ၆ ခုဆိုလျှင် ပင်စည်ကို အပြည့်ဖုံးအုပ်နိုင်သည်။

ရွှီရှင်းသည် သူ့အတွက် ချပ်ဝတ် ၁၂ ခု လုပ်ပေးလိုက်ပြီး "ဒါတွေကို မင်းရဲ့ သစ်ပင်ပင်စည်မှာ တပ်လိုက်" ဟု ပြောလိုက်၏။

စက္ကန့်အနည်းငယ်အကြာတွင် ထိုသူက ပြန်ပြောသည်။

"ကျေးဇူးတင်ပါတယ် အကြီးအကဲ ကျွန်တော့်အသက်ကို ကယ်လိုက်တာပဲ"

ရွှီရှင်းက ၎င်း၏ ထိရောက်မှုကို စမ်းသပ်ချင်သဖြင့် "ကာကွယ်မှုကော အဆင်ပြေရဲ့လား" ဟု မေးလိုက်သည်။

"ပြေပါတယ် ချပ်ဝတ်တပ်ပြီးတော့ ပင်စည်က အပြည့်ဖုံးသွားပြီ။ အဲဒီနွယ်ပင်တွေက ချပ်ဝတ်ကို ဆက်ရိုက်နေပေမဲ့ အရင်လောက် မထိခိုက်တော့ဘူး"

"ဘယ်လောက်အထိ ကွာခြားသွားလဲ"

"အင်း... အရင်ကဆိုရင် ရိုက်ချက်ပေါင်း ရာဂဏန်းလောက်ဆို သစ်ပင်ကျိုးသွားနိုင်တယ်၊ ဒါပေမဲ့ အခု ချပ်ဝတ်မှာ အစင်းရာလေးတွေပဲ ထင်တော့တာ ချပ်ဝတ်တစ်စုံကတော့ အတော်လေး တောင့်ခံနိုင်မယ်"

ရွှီရှင်း စိတ်အေးသွားရသည်။

လောလောဆယ်တွင် ချပ်ဝတ်တပ်ဆင်ခြင်းဖြင့် နွယ်ပင်များ၏ တိုက်ခိုက်မှုကို ခုခံနိုင်ပုံရသည်။

သူသည် ဒေသတွင်း ဆက်သွယ်ရေးလိုင်းတွင် သတိပေးချက်တစ်ခု တင်လိုက်သည်။

"အားလုံးပဲ... အပြင်ကို လျှောက်မထွက်ကြပါနဲ့၊ ပြတင်းပေါက်ကနေ ခေါင်းတောင် ထွက်မကြည့်ကြပါနဲ့ဦး။ မြေပြင်ပေါ် ခြေမချရင်တောင် သစ်ပင်အိမ်အပြင်ဘက်မှာ ရှိနေတာနဲ့ မြေအောက်က မွန်းစတားတွေရဲ့ ပစ်မှတ် ဖြစ်သွားပါလိမ့်မယ်။ အကောင်းဆုံးနည်းဗျူဟာကတော့ သစ်ပင်အိမ်ထဲမှာပဲ ငြိမ်ငြိမ်လေး နေဖို့ပါပဲ"

ရှင်ကျန်သူများက ရွှီရှင်း၏ စကားကို ထောက်ခံကြပြီး အပြင်မထွက်ရန် ဆုံးဖြတ်ကြသည်။

အချို့မှာ အစာငတ်ခံရန်ပင် ပြင်ဆင်ထားကြ၏။

သို့သော် လွန်ခဲ့သော မိနစ်ပိုင်းအတွင်းမှာပင် လူအယောက် ၄၀ ကျော်မှာ သေဆုံးသွားခဲ့ရပြီး ဆက်သွယ်ရေးလိုင်းရှိ လူဦးရေမှာလည်း လျော့နည်းသွားခဲ့သည်။

စူးစမ်းရှာဖွေသူများ အဖွဲ့အတွင်း၌လည်း ကျိချောင်းယန်က ရွှီရှင်း၏ စကားကို ထောက်ခံပြီး အခြေအနေကို အရင်စောင့်ကြည့်ရန် ပြောကြားခဲ့သည်။

ရွှီရှင်းက သူကြုံတွေ့ခဲ့ရသော နွယ်ပင်အမျိုးအစားများနှင့် တိုက်ခိုက်ပုံများကို ရှင်းပြလိုက်ရာ ကျိချောင်းယန်နှင့် အခြားသူများကလည်း ၎င်းတို့ ကြေးဝါသေတ္တာ ရှာဖွေစဉ်က ထိုနွယ်ပင်မျိုးနှင့် ကြုံခဲ့ရဖူးကြောင်း ပြောပြကြသည်။

ရွှီရှင်းက အကြံပြုလိုက်၏။

"ငါတို့အားလုံး ငွေရောင်သေတ္တာတွေ ရထားကြတာဆိုတော့ သစ်ပင်အိမ် သစ်သားချပ်ဝတ် ကို လုပ်နိုင်ကြမှာပါ။ ဒါကို အခြားလူတွေကို ရောင်းပေးလို့ ရတယ်"

ထိုစဉ် ကျိချောင်းယန်က ထူးခြားသော သတင်းတစ်ခုကို ပြောလာသည်။

"ရွှီရှင်း... ငါ ခုနက သွားစမ်းကြည့်တာ၊ အမြင့် ၅ မီတာလောက်မှာဆိုရင် နွယ်ပင်တွေက သတိမထားမိတော့ဘူး။ သစ်ပင်အမြစ်တွေပေါ် ၅ မီတာအထက်လောက်မှာ တွဲလောင်းခိုနေရင် နွယ်ပင်တွေက ပေါ်မလာဘူး"

ရွှီရှင်း အံ့သြသွားရ၏။

"အဲဒီနွယ်ပင်တွေက ၅ မီတာအထက်ကို တိုက်ခိုက်လို့ မရဘူးလား"

"မရဘူး" ဟု ကျိချောင်းယန်က ဖြေသည်။

မူရင်း ရွှီရှင်း ကြုံခဲ့ရသော နွယ်ပင်များသည် ၁၀ မီတာကျော်အထိ တိုက်ခိုက်နိုင်သော်လည်း၊ ယခု ဘေးကင်းဇုန်အတွင်း ပေါ်လာသော နွယ်ပင်များ ၅ မီတာအထက်ကို မတက်နိုင်ခြင်းမှာ သစ်ပင်အိမ်၏ ကာကွယ်ရေးစွမ်းအားက ၎င်းတို့၏ စွမ်းဆောင်ရည်ကို အတိုင်းအတာတစ်ခုအထိ ကန့်သတ်ထားသောကြောင့် ဖြစ်ပေလိမ့်မည်။

ကျိချောင်းယန်၏ သတင်းအချက်အလက်မှာ အလွန်ပင် အဖိုးတန်လှပေသည်။

---

အခန်း ၁၄၉ ပြီး။