အခန်း (၂၀၅၃-၂၀၅၄)

အပိုင်း(၂၀၅၃)

ဝေ့ဝူယင်သည် အခြားသော သတင်းစကားများကို စစ်ဆေးကြည့်ရှုရင်း သူ၏ ကောင်းကင်ဘုံ နတ်မျက်လုံးများမှ အသစ်ရရှိထားသော "ဝိညာဉ်အာရုံခံနိုင်စွမ်း" ကို အသုံးပြုကာ သူ၏ လက်အောက်ငယ်သားများ၊ ချစ်သူများ၊ ဝေ့စီနှင့် သခင်လေးရှန်တို့၏ တည်နေရာများကို အတည်ပြုလိုက်သည်။

သူ၏ အကြည့်များ ဝေ့စီထံသို့ ရောက်ရှိသွားသောအခါ ဝေ့စီ၏ ဝိညာဉ်ကို လွှမ်းခြုံထားသော ကြေးဝါရောင် အလင်းတန်းတစ်ခုကို မြင်လိုက်ရသည်။ တစ်ပြိုင်နက်တည်းမှာပင် ရန်လိုသော အရှိန်အဝါတစ်ခုနှင့်အတူ ပြင်းထန်သော ဝိညာဉ်လှိုင်းထန်မှုများက ဝေ့ဝူယင်ထံသို့ တုံ့ပြန်လာခဲ့သည်။

သို့သော် ခဏအကြာတွင် ထိုရန်လိုမှုများမှာ ပျောက်ကွယ်သွား၏။ ဝေ့စီသည် ထိုအကြည့်မှာ ဝေ့ဝူယင်၏ အကြည့်ဖြစ်ကြောင်း ချက်ချင်း သိရှိသွားပြီး သူ၏ စိတ်လှုပ်ရှားမှုများကို ထိန်းချုပ်ကာ စိတ်အေးသွားခဲ့သည်။

လောကကို စတင်ဖန်တီးပြီးစ အချိန်တွင် "ဖန်တီးခြင်း" နှင့် "လုံခြုံရေး" တို့သည် နောက်ဆုံး ဖန်တီးမှုနှင့် ပတ်သက်၍ "စနစ်" က ငြင်းဆန်ခဲ့ပြီးနောက် ပဋိပက္ခများ ဖြစ်ပွားခဲ့ကြသည်။ ထိုအရာက မည်သို့ပင်ဖြစ်စေ စကြဝဠာ၏ လုံခြုံရေးနှင့် စနစ်တကျဖြစ်ခြင်းတို့ ပူးပေါင်းကာ ဖန်တီးခြင်းကို တိုက်ခိုက်ခဲ့ကြပြီး ခက်ခဲသော အောင်ပွဲကို ရယူခဲ့ကြသည်။

မက်ဂီများကို ဖန်တီးခြင်း၏ အပိုင်းအစများအဖြစ် သတ်မှတ်နိုင်သော်လည်း စပါတန် များမှာမူ... ဝေ့ဝူယင် ဝေခွဲမရသေးပေ။ သူတို့သည် လုံခြုံရေးလား... သို့မဟုတ် မက်ဂီများကဲ့သို့ပင်လား... မက်ဂီ ကျွန်မှသည် မင်းမျိုးမင်းနွယ်အထိ အမွေအနှစ်များထဲတွင် ဖန်တီးခြင်း၊ လုံခြုံရေး သို့မဟုတ် စပါတန်တို့၏ မူလအစကို အသေးစိတ် ဖော်ပြထားခြင်း မရှိချေ။ ထူးဆန်းသည်က သူတို့ကို မြင်သည်နှင့် သတ်ရမည့် ရန်သူများအဖြစ်သာ စာရင်းသွင်းထားခြင်းပင်။

သို့သော်လည်း... ဝိညာဉ်အတွင်းသို့ ရောက်ရှိလာသော ဗီဇရန်လိုမှုများကိုမူ ဝေ့ဝူယင်က သူ၏ ပြင်းထန်သော စိတ်ဓာတ်ဖြင့် ထိန်းချုပ်ထားနိုင်သည်။ ထို့ကြောင့် သူ၏ ခံစားချက်အပေါ် မည်သည့် သက်ရောက်မှုမျှ မရှိပေ။ မည်သို့ပင် ဆိုစေ... ဝေ့စီမှာ သူ၏ ညီအစ်ကို မဟုတ်ပါလား။

အကယ်၍ မက်ဂီအားလုံးနှင့် ဝေ့စီတစ်ယောက်တည်းကြားတွင် ရွေးချယ်ရမည်ဆိုလျှင်ပင် သူ မည်သူ့ကို ရွေးမည်နည်းဟူသော မေးခွန်းမှာ စဉ်းစားစရာပင် မလိုချေ။

"ဝိညာဉ် အာရုံခံနိုင်စွမ်းက တကယ်ကို ကြောက်စရာကောင်းတာပဲ..."

လူတိုင်း၏ ဝိညာဉ်ကို အသေးစိတ် ကြည့်နိုင်စွမ်းရှိသဖြင့် ဝေ့ဝူယင် မှတ်ချက်ပြုလိုက်သည်။ ထို့နောက် သူသည် အဆင့်မြင့် "လျှို့ဝှက် ကောင်းကင် ဝိညာဉ်ဆေးလုံး" ကို ထုတ်ယူ၍ စစ်ဆေးကြည့်ရာ ယခင်က ခံစားခဲ့ရသည်ထက် များစွာ သာလွန်သော အရာကို မြင်လိုက်ရသည်။ ၎င်းအတွင်း၌ ချီ နှင့် ဆင်တူသော ဝိညာဉ်စွမ်းအင်တစ်မျိုး ဖြစ်သည့် "ဝိညာဉ်ချီ" ပါဝင်နေသည်။ ၎င်း၏ တည်ဆောက်ပုံမှာ သီးခြားဖြစ်ပြီး သေမျိုး သို့မဟုတ် လျှို့ဝှက် တာအိုတို့၏ လွှမ်းမိုးမှု မရှိချေ။

၎င်းမှာ "ပဲ့တင်ထပ် ဝိညာဉ်" အဆင့် ပညာရှင်များ အသုံးပြုသော စွမ်းအင်မျိုးလော။ ၎င်းမှာ အလွန်ပင် သန့်စင်လှသည်။ သို့သော် ဆေးလုံးအတွင်း၌ ၎င်းမှာ အနည်းငယ်သာ ပါဝင်ပြီး အများစုမှာ လောကသုံးထောင်၊ သေမျိုးတာအိုနှင့် လျှို့ဝှက် တာအိုတို့နှင့် ဆက်စပ်နေသော "ပဲ့တင်ထပ်ချီ" များသာ ဖြစ်သည်။

ဝေ့ဝူယင်သည် ပဲ့တင်ထပ် ဝိညာဉ်အဆင့်၏ ကျင့်ကြံမှုကို အပြည့်အဝ နားမလည်သေးသော်လည်း ထိန်ကျန့်ဝမ်နှင့် သူတော်စင် နွေဦးကွင်းပြင်တို့၏ မှတ်ဉာဏ်များအရ အချို့ကို ခန့်မှန်းနိုင်သည်။ ပထမဦးစွာ "ဝိညာဉ်ချီ" ဆိုသည်မှာ ပဲ့တင်ထပ် ဝိညာဉ်အဆင့်တွင် အစစ်အမှန် ဝိညာဉ်မှ ထွက်ပေါ်လာသော စွမ်းအင်သစ် ဖြစ်သည်။ ထိုဝိညာဉ်ချီကို ရုပ်ပိုင်း၊ စိတ်ပိုင်း၊ အမတေနှင့် ဝိညာဉ်စွမ်းအင်တို့နှင့် ပေါင်းစပ်လိုက်သောအခါ "ပဲ့တင်ထပ်ချီ" ကို ရရှိခြင်း ဖြစ်သည်။

အရာအားလုံးသည် နောက်ဆုံးတွင် ရိုးရှင်းခြင်းဆီသို့ ပြန်သွားကြသည်ဟု ဆိုရပေလိမ့်မည်။

ပဲ့တင်ထပ်ချီကို ဥပဒေသများနှင့် ပေါင်းစပ် အသုံးပြုလိုက်လျှင် ဂလက်ဆီ၏ အစိတ်အပိုင်းများကိုပင် လွယ်ကူစွာ ဖျက်ဆီးနိုင်သော စွမ်းအားကို ရရှိသည်။ ၎င်းမှာ ကြောက်မက်ဖွယ်ကောင်းလှ၏။ သူတော်စင် နွေဦးကွင်းပြင်၏ အတွေ့အကြုံအရ ပဲ့တင်ထပ် ဝိညာဉ်အဆင့်ဆိုသည်မှာ ကျင့်ကြံသူများအတွက် ကျော်ဖြတ်ရန် မဖြစ်နိုင်သော ချောက်ကမ္ဘာကြီးသဖွယ် ဖြစ်ပြီး ထိပ်တန်း ပါရမီရှင်များပင်လျှင် ထိုအဆင့်ရှိသူများကို ခုခံနိုင်ရန် ဥပဒေသများနှင့် ဂလက်ဆီ၏ စွမ်းအားများကို အသုံးချကြရသည်။

သို့သော် ကျင့်ကြံခြင်း အဆင့်တက်လာသည်နှင့်အမျှ အဆင့်တစ်ခုချင်းစီ၏ ခြားနားချက်မှာ ဧရာမ သတ္တဝါကြီးများကဲ့သို့ ကြီးမားလာသဖြင့် ဤသို့ ရင်ဆိုင်နိုင်ခြင်းမှာ အလွန်ပင် ရှားပါးလှသည်။ ပဲ့တင်ထပ် ဝိညာဉ်အဆင့်သည် သေမျိုးနှင့် လျှို့ဝှက် တာအိုတို့ထက် သာလွန်ပြီး တန်ခိုးရှင် တာအိုဆီသို့ ကူးရာ တံတားသဖွယ် ဖြစ်သည်။

ဝေ့ဝူယင်သည် သူ၏ လျှို့ဝှက် ကြယ်တာရာ အဆင့်ကို အဆုံးစွန်အထိ မြှင့်တင်ပြီးလျှင် နောက်ထပ် ရည်မှန်းချက်မှာ ပဲ့တင်ထပ် ဝိညာဉ်အဆင့် ဖြစ်လာလိမ့်မည်ကို နားလည်လိုက်သည်။

"ပဲ့တင်ထပ် ဝိညာဉ်အဆင့်က ပညာရှင်တွေကို 'ရိုးရွဲ သူတော်စင်' တွေလို့ ခေါ်ကြပြီး သူတို့ကို 'ကန်းပန် သူတော်စင်’ နဲ့ ‘မူလ သူတော်စင်’ ဆိုပြီး အဓိပ္ပာယ် မပြတ်သားတဲ့ အခေါ်အဝေါ် သုံးမျိုး ခွဲထားသေးတယ်။ ဒါကြောင့် 'သူတော်စင်တွေရဲ့ နယ်ပယ်' ဆိုတာ ပဲ့တင်ထပ် ဝိညာဉ်အဆင့်ပဲ ဖြစ်ရမယ်..."

"အခု ကျင့်ကြံခြင်း အဆင့်က ဘယ်လိုလဲ..."

ကောင်းကင်စစ်ဝိညာဉ်မှာ မူးနေသလို အသံမျိုးဖြင့် မေးလာသည်။ သူမသည် ဝေ့ဝူယင်၏ စိတ်စွမ်းအင်များကို စားသုံးလေ့ရှိရာ ယခု အဆင့်မြှင့်တင်ထားသော လျှို့ဝှက် အဆင့်ရှိ စိတ်စွမ်းအင်များကို မြည်းစမ်းကြည့်ပြီးနောက် မခံနိုင်ဘဲ မူးနောက်သွားခြင်း ဖြစ်သည်။

ဝေ့ဝူယင် ကိုယ်တိုင်လည်း သူ၏ အစွမ်းမှာ မည်မျှ ရှိမည်ကို အတိအကျ မသိသေးချေ။ အဆင့်မတက်ခင်က သူသည် "ဉာဏ်အလင်းရ ရှန့်ထို" တစ်ဦးကို သတ်နိုင်သည်ဟု ယုံကြည်ချက် ရှိခဲ့သည်။ သို့သော် ယခုအခါတွင်မူ သူ့၌ ကြယ်တာရာ စွမ်းအား မရှိတော့ဘဲ လျှို့ဝှက် စွမ်းအား သာ ရှိတော့သည်။ ထို့ပြင် သူ၏ ဥပဒေသများမှာလည်း အရင်ကထက် များစွာ ပိုမို သန့်စင် မြင့်မားလာခဲ့ပြီ ဖြစ်သည်။ သူ၏ "ဆေဘာ ဥပဒေသ" မှာလည်း နောက်တစ်ဆင့်၏ အာဏာစက်ကို ရယူရန် လက်တစ်ကမ်းအလိုသို့ ရောက်ရှိနေပြီဟု သူ ခံစားနေရသည်။

သို့သော်လည်း ပဲ့တင်ထပ် ဝိညာဉ်အဆင့်ရှိသော သူတော်စသ် တစ်ဦးနှင့် ရင်ဆိုင်ရန်မှာမူ သူတော်စင် နွေဦးကွင်းပြင်၏ အတွေ့အကြုံအရဆိုလျှင် အလွန်ပင် ခက်ခဲလှပေလိမ့်မည်။ သူတော်စင် နွေဦးကွင်းပြင်မှာ ကန်းပန် သူတော်စင် တစ်ဦးကို ရင်ဆိုင်ရန် တွေးရုံနှင့်ပင် စိတ်ဓာတ်ကျခဲ့ဖူးသည် မဟုတ်ပါလား။

"ငါ ကန်းပန် တစ်ယောက်နဲ့ တိုက်ကြည့်ပြီး စမ်းသပ်ချင်တယ်...."

ဝေ့ဝူယင်၏ ပြင်းပြသော တိုက်ခိုက်လိုစိတ်မှာ နိုးကြားလာခဲ့သည်။ သူနှင့် သူတော်စင် နွေဦးကွင်းပြင်တို့ကြားရှိ ခြားနားချက်မှာ ဤစိတ်ဓာတ်ပင် ဖြစ်သည်။

"ဆရာ... ဆက်လုပ်မှာလား"

ပိုင်ရှု၏ တိုးညှင်းသော အသံ ထွက်ပေါ်လာသည်။ သူမသည် ဝေ့ဝူယင် အဆင့်တက်ပြီးသည်ကို စိတ်လှုပ်ရှားစွာ စောင့်ဆိုင်းနေခဲ့ခြင်း ဖြစ်သည်။ သို့သော်လည်း အဂ္ဂိရတ် ထုတ်ကုန်များ ဖော်စပ်ရန် မဟုတ်...။ ရှားပါး ရတနာများ၊ ရင်းမြစ်များကို ခိုးယူရန် အတွက် ဖြစ်ပေသည်။

ဝေ့ဝူယင်၏ "လျှို့ဝှက် ဒဏ္ဍာရီ အမှတ်အသား" နှင့် သူ၏ "အစစ်အမှန် ဟင်းလင်းပြင် နဂါး သွေးမျိုးဆက်" တို့သည် သူ၏ ဝိညာဉ် အဆင့်မြှင့်တင်ပြီးနောက် "ကြယ်တာရာ ပါရဂွန် ခန္ဓာကိုယ်" နှင့် အပြည့်အဝ ပေါင်းစပ်သွားပြီ ဖြစ်ကြောင်း ပိုင်ရှု မသိရှာပေ။ သူသည် ယခုအခါ သွေးမျိုးဆက်၏ စွမ်းအားများကို အပြည့်အဝ ထုတ်ဖော်နိုင်ပြီ ဖြစ်သည်။

"ဆက်လုပ်မှာလား ဟုတ်လား..."

သူ၏ ချောမောလှပသော မျက်နှာတွင် အပြုံးတစ်ခု ပေါ်လာသည်။

"အင်း... ဆက်လုပ်ကြတာပေါ့..."

ဝေ့ဝူယင်၏ အကြည့်မှာ အမည်မဲ့ ဂလက်ဆီအတွင်းရှိ အဂ္ဂိရတ် အဖွဲ့အစည်းများနှင့် ရှန့်ထိုအဆင့်ရှိ အင်အားစုများထံသို့ ရောက်ရှိသွားသည်။ သူ အသက်ကို ဝဝရှူလိုက်ပြီး သူ၏ ခန္ဓာကိုယ်အတွင်း စီးဆင်းနေသော နဂါးသွေးများကို ခံစားလိုက်သည်။ သူ၏ ခန္ဓာကိုယ် စွမ်းအင်နှင့် သွေးမျိုးဆက် စွမ်းအင်တို့မှာ သေမျိုးနှင့် လျှို့ဝှက်ဟူသော ခြားနားချက်များ မရှိတော့ဘဲ တစ်သားတည်း ဖြစ်သွားခဲ့ပြီ ဖြစ်သည်။

ဝေ့ဝူယင်က ၎င်းကို "နဂါး ပါရဂွန် စွမ်းအင်" ဟု အမည်ပေးလိုက်သည်။ သူ ရိုးရှင်းသည့် "ဟင်းလင်းပြင် ကူးပြောင်းခြင်း" တစ်ခုကို လုပ်ဆောင်လိုက်ရာ၊ ဉာဏ်အလင်းရ သူတော်စင် တစ်ဦး၏ မျက်စိတစ်မှိတ်အတွင်းမှာပင် အစအနမကျန် ပျောက်ကွယ်သွားတော့သည်။

နောက်တစ်နာရီအတွင်းမှာပင်... မည်သည့် အင်အားစုမျှ လွတ်မြောက်ခြင်း မရှိခဲ့ချေ။

***

အပိုင်း(၂၀၅၄)

"နင်က ဘယ်သူလဲ..."

ဒေါသတကြီး မေးမြန်းလိုက်သော အသံမှာ မိုင်ပေါင်း သန်းနှင့်ချီသည့် ဟင်းလင်းပြင်ကို တုန်ခါသွားစေပြီး နေရောင်ခြည်ကိုပင် မှေးမှိန်သွားစေသည်။ ဒေါသထွက်နေသော်လည်း ထိုအသံမှာ အလွန်ပင် နားဝင်ချိုလှသည်။ ထိုအသံပိုင်ရှင်မှာ ခေတ်အဆက်ဆက်တွင် ပြိုင်ဘက်ကင်းသော အလှပဂေးတစ်ဦး ဖြစ်ကြောင်း သိသာလှသည်။

"ငါလား..."

ပဲ့တင်သံများစွာ ပါဝင်နေပြီး နက်ရှိုင်းလှသော အသံတစ်ခုက လှောင်ပြုံးသံနှင့်အတူ ပြန်လည် ထွက်ပေါ်လာသည်။

"လာရှာကြည့်လေ... ငါတို့ အိပ်ရာပေါ်မှာ ပျော်စရာလေးတွေ လုပ်ကြတာပေါ့..."

"မိုက်ရိုင်းလှချည်လား... မင်းက သူတော်စင် အီမန်တက်ကိုတောင် စော်ကားရဲတယ်ပေါ့... သေချင်နေပြီ ထင်တယ်..."

မာန်မာနနှင့် ကြမ်းတမ်းမှုများ ပါဝင်နေသော အမျိုးသား အသံတစ်ခုက ဟိန်းဟောက်လာပြန်ရာ အချိန်နှင့် ဟင်းလင်းပြင်တို့ ပြင်းထန်စွာ တုန်ခါသွားသည်။

"အဲဒီ လူယုတ်မာကို ဟိုမှာပဲ ထိန်းထား... ငါလာနေပြီ..."

နောက်ထပ် မိန်းမပျိုတစ်ဦး၏ အေးစက်သော အသံမှာ မိုင်ပေါင်း ဘီလီယံနှင့်ချီ၍ ပဲ့တင်ထပ်သွားသည်။ အဝေးမှနေ၍ ကြယ်တံခွန်တစ်ခုကဲ့သို့သော အရာတစ်ခုမှာ အလင်းအလျင်ဖြင့် အမည်မဲ့ ဂလက်ဆီရှိ တည်နေရာတစ်ခုဆီသို့ အရှိန်အဟုန်ဖြင့် ပြေးဝင်လာနေသည်။

နက်ရှိုင်းလှသော အသံပိုင်ရှင်က ထပ်မံ ရယ်မောလိုက်၏။

"ဟား ဟား... တကယ်ကို ရက်ရောတာပဲ... ငါကလည်း ဒီဂလက်ဆီက နတ်သမီး နှစ်ပါးလုံးနဲ့ တစ်ပြိုင်တည်း ပျော်ပါးချင်နေတာ... ငါ့ကို ဒီလောက်တောင် လိုချင်နေကြမှန်း မသိခဲ့ဘူး..."

"..."

ဂလက်ဆီကို ဖြတ်ကျော်လာသော ကြယ်တံခွန်မှာ ပိုမို အရှိန်ပြင်းလာပြီး ကောင်းကင်ခန္ဓာများ၏ ပတ်လမ်းများကိုပင် ပြောင်းလဲသွားစေသည်။

ဂလက်ဆီ၏ ပြင်ပမှ ကြည့်လျှင် ငွေရောင်ရင့်ရင့် အလင်းတန်းများ ပါဝင်သော ဂလက်ဆီတစ်ခုလုံးကို ဖုံးလွှမ်းထားသည့် အစီအရင်ကြီး တစ်ခုကို မြင်တွေ့နိုင်သည်။ ဂလက်ဆီ တစ်ခုလုံးမှာ ဟင်းလင်းပြင် ကျင့်စဉ်နှင့် နည်းစနစ်အားလုံးကို အသုံးမပြုနိုင်အောင် တားဆီးထားသည့် အထူးအစီအရင်အောက်သို့ ရောက်ရှိသွားပြီ ဖြစ်သည်။

ဂလက်ဆီတစ်ခုလုံးမှာ လှောင်အိမ်တစ်ခုအဖြစ်သို့ ပြောင်းလဲသွားခဲ့ပြီ ဖြစ်လေတော့သည်။

...

"ဟား ဟား ဟား..."

လွတ်လပ်မှုနှင့် လျှို့ဝှက်ဆန်းကြယ်မှု အရှိန်အဝါများ လွှမ်းမိုးနေသော ရယ်မောသံကြီးမှာ ဟင်းလင်းပြင် တစ်ခုလုံး ဟိန်းထွက်သွားပြီး ကြယ်တံခွန်ကြီးမှာ ယခင်ကထက် ပိုမိုမြန်ဆန်သော အရှိန်ဖြင့် ပြေးဝင်လာသည်။ တစ်ချိန်တည်းမှာပင် ဂလက်ဆီတစ်ခုလုံး၏ အလွှာပြင်ပ၌ ငွေရောင်ရင့်ရင့် အလင်းတန်းများ ဖုံးလွှမ်းသွားရာ ဝိညာဉ်ကိုပင် တုန်လှုပ်ချောက်ချားစေသည်။ ဟင်းလင်းပြင် ကူးပြောင်းမှု အားလုံးကို တားမြစ်ထားသဖြင့် အရပ်ရပ်ရှိ ဟင်းလင်းပြင် သင်္ဘောများမှာ အခက်တွေ့နေကြပြီး၊ ထွက်ပြေးသူနှင့် လိုက်လံဖမ်းဆီးသူတို့ကြားတွင်လည်း ပရမ်းပတာ တိုက်ပွဲများ ဖြစ်ပွားနေတော့သည်။

အမည်မဲ့ ဂလက်ဆီတွင် နယ်မြေပေါင်း (၃၄) ခု ရှိပြီး၊ ၎င်းတို့ထဲတွင် နယ်မြေငယ် (၂၂) ခုနှင့် နယ်မြေကြီး (၁၂) ခု ပါဝင်သည်။ နယ်မြေတစ်ခုချင်းစီမှာပင် ဂလက်ဆီဇုန် တစ်ခုကဲ့သို့ အလွန်တရာ ကျယ်ဝန်းလှပြီး လူဦးရေလည်း ထူထပ်လှသည်။ ကြယ်စင်စုပေါင်း မြောက်မြားစွာနှင့် ကြယ်တရာ နယ်မြေပေါင်း ထောင်သောင်းချီ၍ ရှိနေသဖြင့် အဆင့်နိမ့် "လျှို့ဝှက် အာဏာရှင်" ကျင့်ကြံသူများပင်လျှင် မိမိတို့ နယ်မြေပြင်ပသို့ တစ်သက်လုံး ရောက်ရှိနိုင်ရန် မလွယ်ကူပေ။

ယခု ပဋိပက္ခမှာ နယ်မြေကြီး (၁၂) ခုထဲမှ တစ်ခုဖြစ်သော သူတော်စင် အီမန်တက် အုပ်ချုပ်သည့် နယ်မြေတွင် ဖြစ်ပွားနေခြင်း ဖြစ်သည်။ ဟင်းလင်းပြင်ကို ဖြတ်ကျော်လာသော ကြယ်တံခွန်မှာမူ အခြားသော သူတော်စင် တစ်ဦးဖြစ်သည့် သူတော်စင် ပါခက်၏ နယ်မြေမှ လာခြင်း ဖြစ်သည်။ သူမသည် အလွန်လှပသော်လည်း အေးစက်ကြမ်းတမ်းသော ခြင်္သေ့မတစ်ဦးကဲ့သို့ ကျော်ကြားသူ ဖြစ်သည်။

သူတော်စင် ပါခက်သည် ဟင်းလင်းပြင်ကို ရုပ်ပိုင်းဆိုင်ရာ စွမ်းအားသက်သက်ဖြင့် ဖြတ်ကျော်လာခြင်း ဖြစ်သည်။ သူမသည် စစ်မှန်သော "သိုင်းပညာ ကျင့်ကြံသူ” တစ်ဦးပင်။ သူမ မြင်တွေ့နေရသော အလင်းတန်းမှာ ကြယ်တံခွန် မဟုတ်ဘဲ၊ ဟင်းလင်းပြင်ကို မရပ်မနား ထိုးခွဲလာသည့် သူမ၏ အရှိန်အဟုန်ကြောင့် ဖြစ်ပေါ်လာသော အရှိန်အဝါများသာ ဖြစ်သည်။

ဂလက်ဆီတစ်ခုလုံးတွင် ဟင်းလင်းပြင် ရွှေ့ပြောင်းမှုကို တားမြစ်ထားသဖြင့် သူတော်စင် များသည် အခြားသော နည်းလမ်းများကို အသုံးပြု၍ လာကြရရာ၊ သူမ၏ နည်းလမ်းမှာ အပေါ်လွင်ဆုံး ဖြစ်သည်။

အမျိုးသား အသံပိုင်ရှင်မှာ သူတော်စင် နပ်ပရီ ဖြစ်ပြီး သူသည် ကျော်ကြားသော "စိတ်ဝိညာဉ် ကျင့်ကြံသူ" တစ်ဦး ဖြစ်သည်။ သူ၏ စိတ်ဝိညာဉ် အတတ်ပညာများမှာ အစစ်အမှန် ဝိညာဉ်သခင် တစ်ဦးထက်ပင် မနိမ့်ကျကြောင်း ဆိုကြသည်။ သူသည် သူတော်စင် ပါခက်ထက် ဝေးကွာသော နေရာတွင် ရှိနေသော်လည်း သူ၏ စိတ်ဝိညာဉ် အာရုံကို နယ်မြေများကို ဖြတ်ကျော်၍ လွယ်ကူစွာ ပေးပို့နိုင်ခြင်းက သူ၏ စွမ်းအားကို သက်သေပြနေခြင်းပင်။

သူ၏ နယ်မြေအတွင်း၌... အဖြူ၊ အမည်းနှင့် အနီရောင် ဝတ်စုံဝတ်ထားသော ကြွက်သားအမြောင်းမြောင်းနှင့် လူလတ်ပိုင်း အမျိုးသားကြီးသည် သူ၏ ခါးရှိ ဓားမြှောင်ကို တင်းတင်းဆုပ်ကိုင်ရင်း၊ သူတော်စင် အီမန်တက် အုပ်ချုပ်သည့် "လျှို့ဝှက် သဲကန္တာရ ဂလက်ဆီ" ဟု ခေါ်ဆိုသည့် နယ်မြေဆီသို့ စူးစိုက်ကြည့်နေသည်။

ထိုနေရာတွင် အရိပ်များ ဖုံးလွှမ်းနေသော ပုံရိပ်တစ်ခုမှာ လျှို့ဝှက် စွမ်းအားများဖြင့် တည်ဆောက်ထားသည့် အမည်းရောင်နှင့် အဖြူရောင် သဲကန္တာရ မုန်တိုင်းများ၏ တိုက်ခိုက်ခြင်းကို ခံနေရသည်။ သူသည် ဝိုင်းရံပိတ်ဆို့ခြင်း ခံထားရပြီ ဖြစ်သည်။

သူတော်စင် နပ်ပရီက သူ၏ စိတ်ဝိညာဉ် အာရုံဖြင့် လှမ်း၍ သတိပေးလိုက်သည်။

"သူတော်စင် အီမန်တက်... သူ့ကို အဲဒီမှာပဲ မြဲမြဲထိန်းထား... လက်လွှတ်မခံနဲ့..."

တရားခံကို နောက်ဆုံးတွင် ထောင့်ပိတ်မိသွားပြီ ဖြစ်သဖြင့် ဤအခွင့်အရေးကို အဆုံးရှုံး မခံနိုင်ကြပေ။

"ငါ သိတယ်..."

ဒေါသတကြီး အော်ဟစ်လိုက်သော အသံမှာ အလွန်ပင် ဆွဲဆောင်မှု ရှိလှသော်လည်း၊ သူမ ထုတ်လွှတ်လိုက်သော သဲမုန်တိုင်းများမှာမူ အနီးနားရှိ ကြယ်စင်စုများ၏ ပတ်လမ်းကိုပင် ပျက်ပြားစေလောက်အောင် ကြောက်မက်ဖွယ်ကောင်းလှသည်။

လွန်ခဲ့သော နှစ်လခန့်က ဂလက်ဆီတစ်ခုလုံးကို တုန်လှုပ်သွားစေသည့် အဖြစ်အပျက်တစ်ခု ဖြစ်ပွားခဲ့သည်။ ဂလက်ဆီအနှံ့ရှိ အဖွဲ့အစည်းပေါင်း မြောက်မြားစွာ၏ အဖိုးတန် ဘဏ္ဍာတိုက်များမှာ အမည်မသိ သူခိုးတစ်ဦး၏ ဖောက်ထွင်းခြင်းကို ခံခဲ့ရပြီး၊ ရှိရှိသမျှ အရာအားလုံးကို အစအနမကျန် ခိုးယူခြင်း ခံခဲ့ရသည်။ ပစ္စည်းများသာမက ဆေးဖက်ဝင် အပင်များမှာလည်း အမြစ်ကပါ မကျန် ခိုးယူခံခဲ့ရခြင်း ဖြစ်သည်။

အစပိုင်းတွင် ၎င်းကို ချက်ချင်း သတိမထားမိခဲ့ကြပေ။ သို့သော် အင်အားစု အသီးသီးမှ စုံစမ်းစစ်ဆေးမှုများ ပြုလုပ်လာသောအခါမှသာ ၎င်းမှာ သာမန် ခိုးယူမှု မဟုတ်ကြောင်း သိလိုက်ရသည်။ အဆင့်မြင့် ပညာရှင်များက စစ်ဆေးကြည့်ရာတွင် ကျန်ရှိနေသော အော်ရာ အစအနများကို တွေ့ရှိခဲ့ကြပြီး၊ နိမိတ်ဖတ်သူများ၏ အကူအညီဖြင့် တရားခံကို ရှာဖွေနိုင်ခဲ့ကြသည်။

ထိုသူမှာ "ထိန်ကျန့်ဝမ်” ဟု ခေါ်သော လေလွင့်ကျင့်ကြံသူ တစ်ဦးပင် ဖြစ်ကြောင်း အဖြေထွက်လာခဲ့သည်။ သူသည် သူတော်စင် အဆင့်ရှိ ပညာရှင်တစ်ဦး ဖြစ်သဖြင့် ဂလက်ဆီများကို ဖြတ်ကျော် သွားလာခြင်းမှာ သူ၏ ကျွမ်းကျင်မှုတစ်ခုပင် ဖြစ်သည်။

ထို့ကြောင့်ပင် သခင်လေးရှန်က သူ့ကို ငှားရမ်းခဲ့ခြင်း ဖြစ်သည်။ ထိန်ကျန့်ဝမ်သည် ဟင်းလင်းပြင်၏ အန္တရာယ်များကို ရှောင်ကွင်းနိုင်စွမ်း ရှိသလို၊ "အဟုန် ဥပဒေသ" ကိုလည်း ပိုင်ဆိုင်ထားသူ ဖြစ်သည်။

ဤအချက်ကို သိလိုက်ရသောအခါ အဖွဲ့အစည်း အများစုမှာ လက်လျှော့လိုက်ကြရသည်။ အခြေချ နေထိုင်ရာ မရှိဘဲ ဥပဒေသကို ပိုင်ဆိုင်ထားသော ရှန့်ထိုတစ်ဦးကို မည်သူက လက်စားချေရဲပါမည်နည်း။ အထူးသဖြင့် အဂ္ဂိရတ် အဖွဲ့အစည်းကြီးများမှာမူ ခိုးယူခြင်း မခံရသဖြင့် သူတို့အနေဖြင့်လည်း အခြားသော ရှန့်ထိုတစ်ဦးကို ငှားရမ်း၍ တိုက်ခိုက်ရန်မှာ မဖြစ်နိုင်သလောက်ပင်။

သို့သော် ကျန်ရှိသော အင်အားစုများမှာမူ ဘဝပျက်သွားခဲ့ပြီ ဖြစ်သည်။ အရာအားလုံး ခိုးယူခံလိုက်ရသဖြင့် သူတို့မှာ လက်စားချေရန်အတွက် ရှန့်ထိုတစ်ဦးကို ငှားရမ်းရန်ပင် မတတ်နိုင်တော့ချေ။ အချို့သော အင်အားစုများကမူ ထိန်ကျန့်ဝမ်သည် ရှေးဟောင်း ဂူဗိမာန်တစ်ခုကို တွေ့ရှိခဲ့သဖြင့် အဆမတန် ကြွယ်ဝနေကြောင်း ကောလာဟလများ ဖြန့်ခဲ့ကြသည်။ သူတို့ အခိုးခံရသည်ကို ထုတ်ပြောလျှင် အရှက်ရမည်ဖြစ်သဖြင့် ဤသို့ ဖုံးကွယ်ခဲ့ကြခြင်းပင်။

အစပိုင်းတွင် အမည်မဲ့ ဂလက်ဆီ၏ ရှန့်ထို (၈) ပါးစလုံးမှာလည်း ထိုကောလာဟလကို စိတ်ဝင်စားခဲ့ကြပြီး၊ ထိန်ကျန့်ဝမ်ကို ရှာဖွေရန် ကြိုးစားခဲ့ကြသည်။ သူသည် ဂလက်ဆီပြင်ပသို့ ထွက်ခွာသွားခြင်း မရှိသေးသဖြင့် ဤနေရာတွင်ပင် ပုန်းအောင်း၍ ကျင့်ကြံနေမည်ဟု သူတို့ ယူဆခဲ့ကြသည်။

သို့သော် တစ်ပတ်ခန့်အကြာတွင် အခြေအနေများမှာ ပိုမို ဆိုးရွားလာခဲ့သည်။ အရာအားလုံး ဆုံးရှုံးလိုက်ရသော အင်အားစုများမှာ အချင်းချင်း ပြန်လည် တိုက်ခိုက် လုယက်လာကြသည်။ အခြေခံ အရင်းအမြစ်များပင် မရှိတော့သဖြင့် သန်းပေါင်းများစွာသော ကျင့်ကြံသူများမှာ အခက်တွေ့နေကြရသည်။

ထိုသူခိုးမှာ အလွန်ပင် စေ့စပ်လှသည်။ သူသည် အဆင့်မြင့် အင်အားစုများကိုသာမက သေမျိုးအဆင့်ရှိ အဖွဲ့အစည်းလေးများကိုပင် မချန်ဘဲ အကုန်လုံးကို သုတ်သင်သွားခဲ့ခြင်း ဖြစ်သည်။ အရင်းအမြစ်များ ပြတ်လပ်မှုကြောင့် ပစ္စည်းဈေးနှုန်းများမှာ အဆမတန် မြင့်တက်လာပြီး၊ အင်အားစုများမှာလည်း ရှင်သန်ရန်အတွက် ဓားပြတိုက်ခြင်း၊ စစ်ခင်းခြင်း နည်းလမ်းများကို သုံးလာကြရသည်။

နောက်ဆုံးတွင် သူတော်စင် (၈) ပါးမှာလည်း အခြေအနေကို ရိပ်မိသွားကြသည်။ ၎င်းမှာ သာမန် အဖြစ်အပျက် မဟုတ်ကြောင်းနှင့် ထိန်ကျန့်ဝမ် ဆိုသူမှာလည်း တစ်ဦးတည်းသော တရားခံ မဟုတ်နိုင်ကြောင်း သံသယ ဝင်လာခဲ့သည်။ သို့သော် နိမိတ်ဖတ်သူများ၏ အကူအညီဖြင့် ရှာဖွေရာတွင် ထိန်ကျန့်ဝမ်မှာ အသက်ရှင်နေဆဲ ဖြစ်သော်လည်း သူ၏ တည်နေရာကိုမူ အစွမ်းထက်သော ကာကွယ်မှုတစ်ခုကြောင့် ရှာမရ ဖြစ်နေခဲ့သည်။

သူသည် အစွမ်းထက်သော "ကောင်းကင်ဘုံ ရတနာ" တစ်ခုခုကို အသုံးပြု၍ ဖုံးကွယ်ထားပုံရသဖြင့်၊ သူ့ကို ရှာဖွေရန်မှာ အလွန်ပင် စွမ်းအင်ကုန်ကျပြီး အန္တရာယ်များလှသည့် အလုပ်တစ်ခု ဖြစ်နေတော့သည်။

ထိန်ကျန့်ဝမ်သည် ယခုအခါ ထိန်ကျန့်ဝမ် မဟုတ်တော့ဘဲ ကျန်းကျန့်ဝမ်သာ ဖြစ်တော့သည်။ ထိုသူတို့ အောင်မြင်ခဲ့လျှင်ပင် ကျန်းကျန့်ဝမ်သည် 'စစ်ဥပဒေသ' အရ သိမ်းပိုက်ခြင်း ခံထားရသည့် စစ်သုံ့ပန်း တစ်ဦးသာ ဖြစ်ကြောင်း အလွန်ဆုံး သိရှိနိုင်ပေမည်။ 'စစ် အဆောင်' အကြောင်း ကျွမ်းကျင်သူများသာလျှင် အဘယ်ကြောင့် ဤသို့ ဖြစ်ရသည်ကို အဖြေထုတ်နိုင်မည် ဖြစ်ည်။ ထိုအချိန်သို့ ရောက်လျှင်ပင် ပိုင်ရှင်ကို ရှာဖွေရန် အားထုတ်မှုများကို အဆပေါင်းများစွာ တိုးမြှင့်ရပေဦးမည်။ ဤသည်မှာ သုံးထပ်ကွမ်း အကာအကွယ်ပင် ဖြစ်တော့သည်။

သက်တမ်းရင့်လှသော လောကပရောဟိတ် တစ်ဦးသည် ပထမအလွှာ အကာအကွယ်ကို ထိုးဖောက်နိုင်ခဲ့သည်။ ထို့နောက်... ထိန်ကျန့်ဝမ်သည် သူ၏ သတင်းအချက်အလက်များကို ဖုံးကွယ်ရန် 'ကောင်းကင်ဥပဒေသ' များ နောက်ကွယ်တွင် ပုန်းအောင်းနေကြောင်း သိရှိသွားချိန်၌ နေရာချင်း၌ပင် ပွဲချင်းပြီး သေဆုံးသွားခဲ့ရဖူးသည်။

ထိန်ကျန့်ဝမ်သည် မူလကပင် 'သာမည ဥပဒေသ' ကို ပိုင်ဆိုင်ထားသည့် 'သူတော်စင်' တစ်ဦး ဖြစ်သည်။ ထို့ကြောင့် မည်သည့် အခြေအနေမျိုးတွင်မဆို သူ့ကို အလွယ်တကူ စုံစမ်းစစ်ဆေးနိုင်သည့် ဖြစ်တည်မှုမျိုး မဟုတ်ပေ။

ဤရုတ်ရုတ်သဲသဲ အခြေအနေများကြောင့် နောက်ဆုံးတွင် 'သူတော်စင်' ရှစ်ဦးတို့သည် အရေးယူဆောင်ရွက်ရန် ဆုံးဖြတ်လိုက်ကြလေသည်။ ၎င်းတို့သည် အချေအတင် ငြင်းခုံဆွေးနွေးကြပြီးနောက်၊ အချိန်မရွေး လှုပ်ရှားနိုင်သည့် ပိုက်စိပ်တိုက် ကျော့ကွင်းတစ်ခုကို တစ်ဂလက်ဆီလုံး အနှံ့ ဖြန့်ကြက်ထားရန် သဘောတူညီချက် ရရှိခဲ့ကြသည်။ သူတို့သည် ထိန်ကျန့်ဝမ် လွတ်မြောက်သွားပြီဟု မထင်မှတ်ကြဘဲ၊ သူတို့ထံမှ ပစ္စည်းများကို ခိုးယူရန် နည်းလမ်းရှာနေခြင်းသာ ဖြစ်နိုင်သည်ဟု ယူဆထားကြသည်။

မည်သို့ပင်ဖြစ်စေ၊ သူတို့သည် ကြိုးစားကြည့်ကြပေဦးမည်။ ထိန်ကျန့်ဝမ် ပိုင်ဆိုင်ထားသော အဆမတန် များပြားလှသည့် ဓနဥစ္စာများသည် လက်လွှတ်လိုက်ရန် အလွန်ပင် ဆွဲဆောင်မှု ရှိလွန်းလှသည်။ ထိုပစ္စည်းများ၏ တန်ဖိုးမှာ များပြားလွန်းလှသဖြင့် အမြဲတမ်း တစ်ဦးနှင့်တစ်ဦး တိုက်ခိုက်နေကြသော ထို 'သူတော်စင်' ရှစ်ဦးပင်လျှင် ယခုအခါ၌မူ ညီညွတ်စွာ ပူးပေါင်းရန် ဆုံးဖြတ်လိုက်ကြရလေသည်။

သူတို့သည် စီမံကိန်းကို လျင်မြန်စွာ ရေးဆွဲပြီးနောက်၊ တစ်ဂလက်ဆီလုံးအား 'အာကာသ ကန့်သတ်ခြင်း အစီအရင်' ဖြင့် ခေတ္တမျှ လွှမ်းခြုံပိတ်ဆို့လိုက်ကြသည်။ ထို့နောက် ဂလက်ဆီအတွင်းရှိ အဓိက နှင့် သာမည နယ်မြေများ၏ အင်အား၊ ထိုနယ်မြေ အသီးသီးမှ ခေါင်းဆောင်များ၏ အစွမ်းတို့ကို အသုံးချ၍ ဆုံးရှုံးသွားသော ဥစ္စာများကို ပြန်လည်ရယူနိုင်ရန် 'ရှစ်မျက်နှာ နတ်ဘုရား ကျော့ကွင်း အစီအရင်' ကို အလျင်အမြန် တည်ဆောက်လိုက်ကြတော့သည်။

မကြာမီပင် သူတို့၏ အထင်မှာ မှန်ကန်ကြောင်း သက်သေပြလိုက်ရသည်။ တရားခံမှာ သူတို့၏ ရတနာတိုက်များကို လောဘတကြီး ပစ်မှတ်ထားကာ ရဲရဲဝံ့ဝံ့ပင် လက်ဆန့်တန်းလာခဲ့လေပြီ ဖြစ်သည်။