နောက်ထပ် အစီအစဉ်များ

အင်မော်တယ်ဘုရင် အဆင့်က အင်မော်တယ် နယ်ပယ်၏ အဆင့်ကိုးဆင့်ထဲတွင် အလွန်အရေးကြီးသော နယ်နိမိတ် တစ်ခု ဖြစ်ပေသည်။

အင်မော်တယ်ဘုရင် အဆင့်အောက်တွင် ရှိနေသရွေ့ မြင့်မြတ်ရွှေ အင်မော်တယ် ဖြစ်နေပါစေဦးတော့ စစ်မှန်သော "အင်မော်တယ်" ဘောင်အတွင်းမှ ရုန်းမထွက်နိုင်သေးပေ။

အင်မော်တယ်စွမ်းအားများ ပိုမို သန့်စင်လာပြီး ပိုမို သိပ်သည်း လာခြင်းသာ ရှိပေသည်။

အင်မော်တယ်ဘုရင် ဖြစ်လာပြီးနောက်တွင်မူ လုံးဝ ခြားနားသော အသွင်ကူးပြောင်းမှု ဖြစ်ပေါ်လာပေသည်။

အဘယ်ကြောင့်ဆိုသော် ဤအဆင့်က နိယာမများကို စတင် ထိတွေ့နိုင်ပြီ ဖြစ်သောကြောင့်ပင်။

နိယာမစွမ်းအား၏ အကြမ်းဖျင်း ပုံသဏ္ဍာန်ကိုသာ ထိတွေ့နိုင်သေးသည် ဆိုသော်လည်း အရင်နှင့် လုံးဝ ကွဲပြားသွားခဲ့ပေပြီ။

ထို့ကြောင့် ကျင့်ကြံသူ အများစုအတွက် ဤသည်မှာ အရေးအကြီးဆုံးနှင့် အခက်ခဲဆုံး အပိုင်းဖြစ်ပေသည်၊ အဘယ်ကြောင့်ဆိုသော် ဤသည်မှာ အောက်ခြေမှ အထက်သို့ မရှိရာမှ ရှိရာသို့ သွားရသည့် ဖြစ်စဉ်တစ်ခု ဖြစ်သောကြောင့်ပင်။

သို့သော် ထန်ထျန်းကမူ ဆန့်ကျင်ဘက်ပင် ဖြစ်ပေသည်။

အင်မော်တယ်ဘုရင် အဆင့်သို့ မတက်လှမ်းမီကပင် သူက စနစ်ကို အသုံးပြု၍ ကမ္ဘာ့နိယာမ အမြောက်အမြားကို ပိုင်ဆိုင်ထားပြီးဖြစ်ကာ ဟင်းလင်းပြင် နိယာမ များကိုပင် အတော်အတန် နားလည်ထားပြီး ဖြစ်သည်။

ဤသည်မှာ စစ်မှန်သော နိယာမများ ဖြစ်ပြီး နိယာမစွမ်းအား၏ ဘောင်ထက် များစွာ ကျော်လွန်နေပေသည်။

ထို့ကြောင့် သူ့အတွက်မူ ဤသည်မှာ အထက်မှ အောက်သို့ ဆင်းလာသည့် ဖြစ်စဉ်တစ်ခုသာ ဖြစ်ပြီး မည်သည့် အခက်အခဲမှ မရှိပေ။

အခက်ခဲဆုံး အပိုင်းမှာမူ အင်မော်တယ်စွမ်းအားကို စုဆောင်းရသည့် ဖြစ်စဉ်သာ ဖြစ်ပေတော့သည်။

အင်မော်တယ်စွမ်းအား လုံလောက်စွာ စုဆောင်းပြီးသည်နှင့် နောက်ပိုင်း အဆင့်များမှာ ရေစုန်မျောသည့် လှေအလား ပိုမို ချောမွေ့လာမည် ဖြစ်ပေသည်။

အင်မော်တယ်အရှင်၊ အင်မော်တယ်ဧကရာဇ် အဆင့်များမှာလည်း ထို့အတူပင်။

အင်မော်တယ်ဘုရင်၏ အော်ရာများမှာ တဖြည်းဖြည်း ပြန်လည် တည်ငြိမ်သွားသည်နှင့် ထန်ထျန်းက မျက်လုံးများကို ဖြည်းညှင်းစွာ ဖွင့်လိုက်သည်။

သူက သက်ပြင်းအရှည်ကြီး တစ်ချက် ချလိုက်၏။

"နောက်ဆုံးတော့... ဒီအရေးကြီးတဲ့ ခြေလှမ်းကို လှမ်းနိုင်ခဲ့ပြီ"

ခန္ဓာကိုယ်အတွင်းရှိ ခွန်အားများ ပြောင်းလဲသွားမှုကို ခံစားရင်း သူက ကျေနပ်စွာ ပြုံးလိုက်သည်။

နောင်တွင်မူ ယခုကာလကဲ့သို့ တံခါးပိတ် ကျင့်ကြံခြင်းမျိုးကို ပြုလုပ်ရန် မလိုတော့ပေ။

အင်မော်တယ်စွမ်းအားကို နိယာမစွမ်းအားအဖြစ် ပြောင်းလဲသည့် ဖြစ်စဉ်တွင် လျှို့ဝှက်ဆန်းကြယ်သော ရှေးဟောင်းကျောက်စိမ်း နှင့် လနတ်သမီး ကျောက်စိမ်း တို့၏ စွမ်းရည်ကို အသုံးပြုကာ သဘာဝအတိုင်း အင်မော်တယ်စွမ်းအားကို စုပ်ယူရုံသာ ရှိပေသည်။

ကျင့်ကြံခြင်း ဆိုသည်မှာ အမှန်တကယ်တော့ ပျင်းစရာ ကောင်းလှပေသည်။

အနည်းငယ် စိတ်လှုပ်ရှားနေမှုကို ထိန်းညှိပြီးနောက် ထန်ထျန်းက နောက်ထပ် အခြေအနေများကို စဉ်းစားလိုက်သည်။

အချိန်တွက်ချက်ကြည့်လျှင် ရှန်းယွမ်စင်မြင့်သို့ ဝင်ရောက်ရန် အချိန်နီးကပ်နေပြီ ဖြစ်ပေသည်။

ထိုနေရာက မတူညီသော နယ်ပယ်တစ်ခု ဖြစ်ပြီး ဝင်ရောက်ပြီးမှသာ အသေးစိတ် သိနိုင်မည် ဖြစ်သည်။

သို့သော် မည်သို့ပင်ဖြစ်စေ သူ၏ ရည်မှန်းချက်မှာ တစ်ခုတည်းသာ ရှိပေသည်၊ ထိုအရာမှာ ကောင်းကင်ထိပ်ဆုံး သို့ ဝင်ရောက်ခွင့် ရရှိရန်ပင်။

မြင့်မြတ် သားတော် ဖြစ်ရန် လိုအပ်လျှင် ဖြစ်ရမည်၊ နတ်ဘုရား သားတော် ဖြစ်ရန် လိုအပ်လျှင်လည်း ဖြစ်ရမည်၊ အရာအားလုံးက လွယ်ကူပေသည်။

ပို၍ အရေးကြီးသော ပြဿနာမှာ သုံးစွဲမှုအမှတ် အမြောက်အမြားကို မည်သို့ ဆက် ရယူမည်နည်း ဟူသော အချက်ပင်။

ယခုမှ ထရီလီယံ ၃၀ ခန့်သာ ရရှိသေးပြီး ထရီလီယံ ၅၀၀၀ ဆိုသော ရည်မှန်းချက်နှင့် ယှဉ်လျှင် တစ်ရာခိုင်နှုန်းပင် မပြည့်သေးပေ။

အမှန်တကယ်ပင် ခက်ခဲလှပေသည်။

သက်တော်စောင့် ငှားရမ်းသည့် အစီအစဉ်မှာ အကန့်အသတ်သို့ ရောက်နေပြီဖြစ်ကာ အခြေခံအုတ်မြစ်များကို ဝယ်ယူသည့် ကိစ္စမှာလည်း ကန့်သတ်ချက် များပြားလွန်းသဖြင့် ထိရောက်သော နည်းလမ်း မဖြစ်နိုင်တော့ပေ။

ယခု ဆက် လုပ်နိုင်သည်မှာ ထျန်းရှထုန် ကုန်သွယ်ရေးအသင်း သာ ရှိပေသည်။

အကယ်၍ ကျန်ရှိနေသော အကြီးစားနှင့် အင်အားကြီး ကုန်သွယ်ရေးအသင်း အားလုံးကို ဝယ်ယူနိုင်ပြီး ထိပ်တန်း အသင်းအချို့ကိုလည်း ဝါးမြိုနိုင်မည်ဆိုလျှင် စုစုပေါင်း သုံးစွဲမှုမှာ ထရီလီယံ ၁၀၀ ကျော်အထိ ရှိနိုင်ပေသည်။

ငါးဆယ်ပုံ တစ်ပုံပေါ့...

ပိုက်ဆံတွေ အလွန်အမင်း များလာသည့်အခါ ထိုပိုက်ဆံတွေကို ဘယ်လို ကုန်အောင် သုံးရမလဲ ဆိုသည်မှာလည်း ခေါင်းခဲစရာ ကိစ္စတစ်ခု ဖြစ်လာကြောင်း ထန်ထျန်းက သက်ပြင်းချရင်း တွေးလိုက်မိသည်။

ဥပမာအားဖြင့် မင်းရဲ့ လက်ထဲမှာ ဘီလီယံ ၁၀၀ ရှိနေပြီး ညဈေးတန်းကြီးထဲကို ရောက်သွားသလိုမျိုးပေါ့။

အဲဒီမှာ ပိုက်ဆံတွေ အကုန်သုံးဖို့ဆိုတာ တကယ်ကို ခက်ခဲတဲ့ ကိစ္စပင်။

သို့သော် မည်သို့ပင်ဖြစ်စေ သူ့၏ အနာဂတ် ဘေးကင်းလုံခြုံရေးအတွက် ထန်ထျန်းက ပိုက်ဆံများ အကုန်သုံးနိုင်မည့် နည်းလမ်းကို စဉ်းစားရပေမည်။

ခဏတာ စဉ်းစားပြီးနောက် သူက ထျန်းရှထုန် ကုန်သွယ်ရေးအသင်း ဘက်မှ စတင်ရန် ဆုံးဖြတ်လိုက်ပေသည်။

ဤကမ္ဘာကြီးမှာ အလွန် ကျယ်ပြောလှပေသည်၊ ပြင်ပလောက၏ သုံးစွဲမှု အဆင့်မှာ တိမ်တိုက် ထျန်းဖူနန်းတော် ပင်မ နန်းတော်လောက် မမြင့်မားသော်လည်း အရေအတွက်မှာမူ အလွန် များပြားလှပေသည်။

ဥပမာအားဖြင့် နေလအင်မော်တယ်နန်းတော် ဘက်က ကုန်သွယ်ရေးလောက ဆိုလျှင်လည်း စုစုပေါင်း ပမာဏမှာ ထရီလီယံ အနည်းငယ် ရှိနိုင်ပေသည်။

နေလအင်မော်တယ်နန်းတော် နှင့် အဆင့်တူသော နေရာများစွာ ရှိနေသေးပေသည်။

ထိုထက် အနည်းငယ် နိမ့်သော ဘီလီယံ ရာဂဏန်းမှ ထရီလီယံ အထိ ရှိသော နေရာများမှာ ပို၍ပင် များပြားလှပေသည်။

ဆယ်ဂဏန်းလောက်သာ ရှိသော နေရာများမှာမူ ကောင်းကင်မှ ကြယ်များအလား အရပ်မျက်နှာ အနှံ့မှာ ပြန့်နှံ့နေပေသည်။

အကယ်၍ ထျန်းရှထုန် ကုန်သွယ်ရေးအသင်းက ဤနေရာအားလုံးကို ဝါးမြိုနိုင်မည်ဆိုလျှင် အနည်းဆုံးတော့ ထရီလီယံ အထိ ရောက်ရှိနိုင်ပေသည်။

ထို့အပြင် နယ်မြေများ ဝယ်ယူခြင်း၊ လျှို့ဝှက်နယ်မြေများ ဝယ်ယူခြင်း၊ မြို့များကို ဝယ်ယူခြင်း စသည်တို့ကို လုပ်ဆောင်မည်ဆိုလျှင် ရည်မှန်းချက်သို့ မရောက်လျှင်ပင် အလွန် များပြားသော ကိန်းဂဏန်းတစ်ခု ဖြစ်လာပေလိမ့်မည်။

ဒါက အလွန် ကောင်းမွန်သော သုံးစွဲမှု လမ်းကြောင်းတစ်ခု ဖြစ်ပေသည်။

သို့သော် ပြဿနာမှာ ထျန်းရှထုန် ကုန်သွယ်ရေးအသင်းကို မည်သို့ လျင်မြန်စွာ ပြန့်နှံ့အောင် လုပ်မည်နည်း။

ရိုးရိုးနည်းလမ်းများမှာ အချိန်အလွန် ကုန်ဆုံးစေပြီး ကုန်သွယ်ရေးအသင်း၏ လူအင်အားမှာလည်း မလုံလောက်ပေ။

ချင်းယွဲ့ဂိုဏ်း ဘက်က ကုန်သွယ်ရေးအသင်းတွေကို ဝါးမြိုဖို့တောင် ရှစ်လလောက် အချိန်ယူခဲ့ရတာ ဖြစ်ပေရာ ထန်ထျန်း၏ ရည်မှန်းချက်အတိုင်း ဖြစ်ဖို့ဆိုလျှင် နှစ်ပေါင်း ရာချီတောင် လောက်မည် မဟုတ်ပေ။

အကွာအဝေး ဆိုသော ပြဿနာက လူကို အကန့်အသတ် ဖြစ်စေပေသည်။

သူက ဤမျှ ကြာရှည်စွာ မစောင့်နိုင်ပေ။

သို့ဆိုလျှင် မြန်ဆန်ပြီး အကွာအဝေးကို လျှော့ချပေးနိုင်မည့် မည်သည့် နည်းလမ်း ရှိသနည်း။

ထန်ထျန်းက တိတ်ဆိတ်စွာ စဉ်းစားလိုက်ရာ ခဏအကြာတွင် စကားလုံး သုံးလုံးက သူ၏ ဦးနှောက်ထဲတွင် ပေါ်လာခဲ့ပေသည်။

"ပုံရိပ်ယောင်ကမ္ဘာ "

ဤ ပုံရိပ်ယောင် ကမ္ဘာကို ဧကရာဇ်မြို့တွင် ပထမဆုံး တွေ့ခဲ့ရစဉ်ကပင် ထန်ထျန်းအား အလွန် စွဲမှတ်သွားစေခဲ့ပေသည်။

အွန်လိုင်း ပလက်ဖောင်း ၏ အားသာချက်မှာ အော့ဖ်လိုင်း ပလက်ဖောင်း များထက် များစွာ သာလွန်ပေသည်။

ထို့အပြင် ဤနေရာမှာ ကျင့်ကြံရေးလောက ဖြစ်သဖြင့် ကုန်စည် ပို့ဆောင်ရေးမှာလည်း အလွန် လွယ်ကူပေသည်၊ တည်နေရာ ကူးပြောင်း လမ်းကြောင်းတစ်ခု တည်ဆောက်လိုက်ရုံဖြင့် ဝယ်ပြီးသည်နှင့် လက်ဝယ် ရောက်ရှိမည် ဖြစ်ပေသည်။

ဤသည်မှာ ဈေးဝယ်ဝါသနာပါသူများအတွက် သတင်းကောင်းပင်။

ထို့အပြင် အင်တာနက်က ဖန်တီးပေးနိုင်သော တန်ဖိုးမှာ အပေါ်ယံ မြင်ရသည်ထက် များစွာ ပိုမို နက်ရှိုင်းပေသည်၊ ထန်ထျန်းက ဤအချက်ကို အသိဆုံး ဖြစ်ပေသည်။

ခဏတာ စဉ်းစားပြီးနောက် ထန်ထျန်းက ရှေ့ဆက်မည့် လမ်းကြောင်းကို အတည်ပြုလိုက်ပေသည်။

ကုန်သွယ်ရေးလောကကို အတော်အတန် ဝယ်ယူပြီးပြီ ဖြစ်သဖြင့် ဤ အွန်လိုင်းပလက်ဖောင်း ကို စတင်ရန် လုံလောက်နေပြီ ဖြစ်ပေသည်။

ထိုအချိန်ကျလျှင် ထျန်းဖူနန်းတော် ၏ ကုန်သွယ်ရေးလောကကို ဗဟိုထားပြီး အရပ်မျက်နှာ အနှံ့သို့ လျင်မြန်စွာ ပြန့်နှံ့သွားစေကာ လုပ်ငန်းကို ချဲ့ထွင်လိုက်မည် ဖြစ်ပေသည်။

ထို့ကြောင့် နောက်တစ်ဆင့်မှာ ပိုင်နိုယီ ကို ရှာပြီး "ပုံရိပ်ယောင်ကမ္ဘာ " ကို ဝယ်ယူမည့် ကိစ္စကို တရားဝင် ဆွေးနွေးရမည် ဖြစ်ပေသည်။

အကယ်၍ ဝယ်ယူမှု ချောမွေ့ပါက အရာအားလုံး အဆင်ပြေပေမည်။

အကယ်၍ ဝယ်ယူရန် နည်းလမ်း မရှိပါက သူသည် ပုံမှန်မဟုတ်သော နည်းလမ်းများကို အသုံးပြုရပေတော့မည်။

ပြီးခဲ့သည့် ဆွေးနွေးမှုတွင် ထန်ထျန်းက ပုံရိပ်ယောင်ကမ္ဘာ သို့ ဝင်ရောက်ခွင့် ရရှိထားပြီးဖြစ်ကာ "စီမံသူ အခွင့်အာဏာ" အချို့ကိုလည်း ရယူထားပြီး ဖြစ်ပေသည်။

ဤအခွင့်အဏာကို အသုံးပြုပြီး ရှောင်ကျိ ကို ပုံရိပ်ယောင်ကမ္ဘာ ၏ အဓိက လည်ပတ်ပုံ စနစ်ကို ပြောင်းပြန် တွက်ချက်ခိုင်းမည် ဖြစ်ပေသည်။

ထို့နောက် သူ့ဘာသာ ကော်ပီ တစ်ခု ဖန်တီးလိုက်မည် ဖြစ်ပေသည်။

မည်သို့ပင်ဖြစ်စေ ဤ အွန်လိုင်းပလက်ဖောင်း အစီအစဉ်ကို သူ အောင်မြင်အောင် လုပ်ရမည် ဖြစ်ပေသည်။

မဟုတ်ပါက ထရီလီယံ ၅၀၀၀ ဆိုသော ရည်မှန်းချက်မှာ မည်သည့် အချိန် မှ ရောက်ရှိမည်ကို မသိနိုင်ပေ။

အခြားသော အသေးစိတ် အချက်အလက်များကို ထပ်မံ စဉ်းစားပြီးနောက် ထန်ထျန်းက ဤအစီအစဉ် ကို အတည်ပြုလိုက်ပြီး ရက်အနည်းငယ်အတွင်း တံခါးပိတ် ကျင့်ကြံခြင်းမှ ထွက်ကာ ပိုင်နိုယီ နှင့် သွားရောက် ဆွေးနွေးရန် ပြင်ဆင်လိုက်ပေသည်။

ထို့နောက် သူ့ကိုယ်သူ ပြန်လည် ဆန်းစစ်ကြည့်ရာ သူ၏ လက်ရှိ တိုက်ခိုက်ရေးစွမ်းရည်မှာ ကမ္ဘာ့နိယာမ အမြောက်အမြားကို ပိုင်ဆိုင်ထားပြီးဖြစ်ကာ ဟင်းလင်းပြင် နိယာမ အချို့ကိုလည်း လဲလှယ်ထားပြီး ဖြစ်ပေသည်။

"အနန္တတာအိုနိယာမ နယ်မြေ " ကို ဖွင့်လိုက်မည်ဆိုလျှင် အင်မော်တယ်အရှင် တင်မကဘဲ အင်မော်တယ်ဧကရာဇ် ကိုပင် အနိုင်ယူနိုင်မည့် ယုံကြည်ချက် ၁၀၀ ရာခိုင်နှုန်း ရှိပေသည်။

သို့သော် ဤသည်မှာ သူ၏ ဝှက်ဖဲဖြစ်သဖြင့် အလွယ်တကူ ထုတ်ပြမည် မဟုတ်ပေ။

မဟုတ်လျှင် သူတစ်ပါးကို ထိတ်လန့်သွားစေကာ ကောင်းကင်ထိပ်ဆုံး မှ "မေမေ ဖေဖေ " တွေကို ခေါ်လိုက်လျှင် မကောင်းပေ။

ထို့ကြောင့် ပုံမှန် နည်းလမ်းများမှသာ စတင် စဉ်းစားရပေမည်။