အခန်း (၄၀၁-၄၀၂)

အခန်း ၄၀၁ သန်မာသော အမတမင်းဆက် (၂)

တစ်နာရီအကြာတွင် သတင်းတစ်ခုက အဓိပတိဂိုဏ်းကို တုန်လှုပ်စေခဲ့သည်။ အကြီးအကဲများခန်းမက ရှန့်မိသားစုကို စေ့စေ့စပ်စပ် စုံစမ်းစစ်ဆေးရန် အမိန့်ပေးခဲ့ပြီး တပည့်အများအပြားကို ရှန့်မိသားစု၏ နေအိမ်အား ဝန်းရံရန် စေလွှတ်ခဲ့သည်။ ဤသတင်းထွက်ပေါ်လာသည်နှင့် အဓိပတိဂိုဏ်း၏ မြို့များတွင် အောင်ပွဲခံသံများ ဆူညံသွားသည်။

အမှန်တရားကို အတည်မပြုရသေးသော်လည်း ရှန့်မိသားစု၏ ဂုဏ်သတင်းမှာ ပျက်စီးသွားခဲ့ပြီဖြစ်သည်။ အကြောင်းမှာ ရှန့်မိသားစု၏ ဖိနှိပ်မှုကို ခံခဲ့ရသော အခြားတပည့်များကလည်း သူတို့၏ ဩဇာကို အသုံးချကာ ရှန့်မိသားစု၏ မောက်မာသော အပြုအမူများအကြောင်း ဖြန့်ဝေနေသောကြောင့် ဖြစ်သည်။

ညနေပိုင်းတွင် ကုအန်သည် တွင်းဂိုဏ်းမြို့တော်မှ တိုက်ပွဲ၏ အငွေ့အသက်ကို ခံစားမိလိုက်သော်လည်း ၎င်းသည် လျင်မြန်စွာ ပျောက်ကွယ်သွားသည်။ လှုပ်ရှားခဲ့သူမှာ ကိုးချောင်းလက်နတ်သခင် ဖြစ်သည်။

လုပိုင်ထျန်းကိုယ်တိုင် လက်ကိုးချောင်းသခင်ကို သွားရောက်ဖိတ်ခေါ်ခဲ့ခြင်း ဖြစ်သည်။ သူကိုယ်တိုင်က အကြီးအကဲတစ်ဦး၏ ရာထူးကို ပိုင်ဆိုင်ထားသူဖြစ်သောကြောင့် ရှန့်မိသားစုကို မကြောက်ပေ။

လက်ကိုးချောင်းသခင်သည် လုပိုင်ထျန်း၏ စကားကြောင့် စိတ်လှုပ်ရှားကာ ဝင်ပါခဲ့ခြင်းဖြစ်သည်။ အကြောင်းမှာ လုပိုင်ထျန်းက ဆရာသခင်ဓားအရှင်သည် ဤပြဇာတ်ကို လျှို့ဝှက်စွာ စောင့်ကြည့်နေကြောင်း အရိပ်အမြွက်ပြောခဲ့သောကြောင့် ဖြစ်သည်။

ကုအန်သည် အကြီးအကဲများခန်းမသည် သူ၏ဩဇာကို အသုံးချနေခြင်းကို စိတ်ထဲမထားပေ။ အမှန်စင်စစ် ၎င်းသည် အမှန်တရားပင် ဖြစ်သည်။ ထို့အပြင် ရှန့်မိသားစုကို အင်အားသုံး ရင်ဆိုင်ရန်အတွက် သူတို့ကို ယုံကြည်မှုအနည်းငယ် မပေးဘဲနှင့် ခက်ခဲပါလိမ့်မည်။

ကုအန်လိုချင်သည်မှာ သူတို့၏ ရပ်တည်ချက်သာ ဖြစ်သည်။

ထိုညသည် မငြိမ်မသက်ဖြစ်မည့်ညအဖြစ် သတ်မှတ်ထားပြီးဖြစ်သည်။

နောက်တစ်နေ့၏ နေရောင်ခြည်သည် အဓိပတိဂိုဏ်းတစ်ခုလုံးကို လင်းလက်စေသောအခါ ဒဏ္ဍာရီများစွာသည် လူထုကြားတွင် ပျံ့နှံ့နေခဲ့ပြီ ဖြစ်သည်။

နှစ်ရက်အကြာတွင် အဓိပတိဂိုဏ်းက ကြေညာချက်တစ်ခုကို ကပ်ထားခဲ့သည်။ ဝူကျွယ်အမှု၏ အကျိုးနှင့် အကြောင်းရင်းဆက်များကို ဖော်ပြကာ သူ၏အမည်ကို ရှင်းလင်းပေးခဲ့သည်။ ထို့အပြင် ရှန့်မိသားစုသည်လည်း အမှန်တရားကို မသိရှိခဲ့ကြောင်း ဤအရာအားလုံးသည် နားလည်မှုလွဲခြင်းတစ်ခုသာဖြစ်ကြောင်း တပည့်များကို အသိပေးခဲ့သည်။

တပည့်အများစုမှာ ရှန့်မိသားစုကို တိုက်ရိုက်ဖြုတ်ချလိုသောကြောင့် မကျေမနပ်ဖြစ်နေကြသော်လည်း အဓိပတိဂိုဏ်းက ဤကိစ္စလေးတစ်ခုအတွက် မျိုးရိုးကြီးမိသားစုတစ်ခုကို စွန့်ပစ်မည်မဟုတ်ပေ။ အထူးသဖြင့် သေဆုံးသွားသူမှာ ရှန့်မိသားစုမှ ပါရမီရှင်တစ်ဦးဖြစ်နေသောကြောင့် ဖြစ်သည်။

ဝူကျွယ်သည် လွတ်မြောက်လာသည်နှင့် ကုအန်ကို ရှာဖွေကာ ကျေးဇူးတင်စကား လာပြောခဲ့သည်။

"ငါ့လား...ငါ ဘာမှမလုပ်ခဲ့ပါဘူး။ မင်းအတွက် စကားပြောပေးခဲ့လို့ ဂိုဏ်းချုပ်နဲ့ ဒုဂိုဏ်းချုပ်ဆီက အဆူတောင် ခံလိုက်ရသေးတယ်" ကုအန်က ခေါင်းခါရင်း ဝူကျွယ်ကို လက်ဖက်ရည်ငှဲ့ပေးကာ ပြောလိုက်သည်။

ဝူကျွယ်က ပြုံးကာ "သူတို့က မင်းဒုက္ခရောက်မှာ စိုးလို့ ဆူတာပါ။ သူတို့က အထောက်အထားတွေ ပြင်ဆင်နေတုန်း မင်းကို တည်ငြိမ်အောင် အရင်လုပ်ထားတာ ဖြစ်မှာပါ"

သူသည် တပည့်များကြားမှ ထကြွမှုကို လုပိုင်ထျန်းနှင့် အခြားသူများက လှုံ့ဆော်ခဲ့သည်ဟု ခံစားမိသည်။ သူတို့သည် ဆရာသခင်ဓားအရှင်၏ ရည်ရွယ်ချက်ဖြစ်ကြောင်း ပွင့်ပွင့်လင်းလင်း မပြောဝံ့ကြပေ။ များပြားလှသော ထင်ကြေးပေးမှုများကြားတွင် သူတို့သည် ငြင်းဆိုခြင်းလည်းမရှိအသိအမှတ်ပြုခြင်းလည်း မပြုခဲ့ပေ။

ကုအန်က နှာမှုတ်လိုက်ပြီး "သူတို့ ဘာတွေးနေလဲ ဘယ်သူသိမှာလဲ။ ဒါပေမဲ့ မင်းအပေါ် စွဲချက်တွေကင်းလွတ်သွားသရွေ့တော့ ငါဝမ်းသာပါတယ်။ ဒီနေ့ ငါတို့ တစ်နေကုန် တစ်ညလုံး ပျော်ပျော်ပါးပါး သောက်ကြရမယ်။ မင်း ပြေးလို့မရဘူးနော်"

ဝူကျွယ်က ရယ်မောကာ "မင်းရဲ့ကျင့်ကြံမှုအဆင့်နဲ့ ငါ့အဆင့်နဲ့၊ မင်းက ငါ့ကို နိုင်မယ်လို့ ထင်နေတာလား"

ဤအခက်အခဲပြီးနောက် သူသည် လူအများအပြားနှင့် အဖြစ်အပျက်များစွာကို ရှင်းလင်းစွာ သိမြင်လာခဲ့သည်။ သူသည် နာကြည်းစိတ်မရှိသော်လည်း ပိုမိုသန်မာလာရန်နှင့် ကုအန်ကို ကျေးဇူးဆပ်ရန် ကျိန်ဆိုခဲ့သည်။

မျိုးရိုးကြီးမိသားစု ဟုတ်လား။

ဒါဆိုရင် ငါလည်း မျိုးရိုးကြီးမိသားစုတစ်ခု ဖြစ်လာရမယ်!

ဝိုင်ခွက်ကိုကိုင်ရင်း ဝူကျွယ်သည် ကုအန်၏ ပြုံးနေသောမျက်နှာကိုကြည့်ကာ စိတ်ထဲမှ တွေးနေမိသည်။

သူသည်လည်း ကုအန်ကို ကျေးဇူးဆပ်သည့်အနေဖြင့် ကုအန်၏ အားကိုးရာတစ်ခု ဖြစ်ချင်သည်။ ကုအန်သည် သူဘာတွေးနေသည်ကို မသိသော်လည်း မည်သို့ပင်ဖြစ်စေ၊ သူ့အတွက် အရေးမကြီးပေ။

ရှန့်မိသားစုနှင့် ပြဿနာမှာ သူ၏အမြင်တွင် ပြဿနာမဟုတ်ပေ။ ဝူကျွယ်ကို ကူညီရန် နည်းလမ်းများစွာရှိသည်။ ဤနည်းလမ်းကို ရွေးချယ်ခြင်းသည် ဘဝအတွက် ပျော်စရာနှင့် မျှော်လင့်ချက်အနည်းငယ် ထပ်ဖြည့်လိုက်ခြင်းသာ ဖြစ်သည်။

ကုအန်သည် သူ၏အကြည့်ကို ပြတင်းပေါက်ဘက်သို့ လှည့်လိုက်သည်။ အပြင်ဘက်တွင် လေပြင်းတစ်ချက် စတင်တိုက်ခတ်လာပြီး ကမ္ဘာလောကကြီးသည် ကြီးမားသော အပြောင်းအလဲတစ်ခု၏ အစွန်းသို့ ရောက်နေသကဲ့သို့ ဖြစ်နေသည်။

ကမ္ဘာလောက၏ ကြီးကျယ်သော လားရာနှင့် နှိုင်းယှဉ်လျှင် အဓိပတိဂိုဏ်း၏ သေးငယ်သော အဖြစ်အပျက်များသည် အရေးမပါပေ။

အမတမင်းဆက်သည် လှုပ်ရှားမှုအသစ်များ ပြုလုပ်ရန် အသင့်ဖြစ်နေပြီ...

မကြာသေးမီက ကုအန်သည် အမတလမ်းစဉ် ပဉ္စမအလွှာကောင်းကင်အထက်ရှိ သတ္တဝါများစွာ မဟာကောင်းကင်ဘုံစိတ်ဝိညာဉ်ဘုံသို့ ပြန်လည်ရောက်ရှိလာသည်ကို ခံစားမိခဲ့သည်။ သူတို့အားလုံးသည် အမတမင်းဆက်မှ စိတ်ဝိညာဉ်များ ဖြစ်ကြသည်။ မြင့်မြတ်ခုံရုံး သည် တန်ခိုးကြီးပုဂ္ဂိုလ် အများအပြားကို ကြိုဆိုခြင်းမရှိသေးသော်လည်း သူတို့သည် နယ်ပယ်တိုင်းတွင် သူတို့၏နေရာများကို အားဖြည့်နေသည်မှာ ထင်ရှားသည်။

မှော်တိုက်ပွဲညီလာခံသည် ရေရှည်ငြိမ်းချမ်းရေးကို မဆောင်ကြဉ်းပေးခဲ့ဘဲ အမတမင်းဆက်ကို ပိုမိုကြီးမားသော မျှော်လင့်ချက်ပေးခဲ့ပုံရသည်။

…

ပြိုးပြိုးပြက်ပြက် ကြယ်များဖြင့် ပြည့်နှက်နေသော ညကောင်းကင်အောက် မျက်နှာကြက်မရှိသော ဧရာမနန်းတော်ကြီးတစ်ခု၏ ထိပ်တွင် ယန်ရှန်ဧကရာဇ်သည် ရွှေရောင်အလင်းလုံးတစ်ခုအောက်တွင် မျက်လုံးမှိတ်ကာ တရားထိုင်နေပြီး လက်များက မန္တန်များကို အဆက်မပြတ် ရွတ်ဖတ်နေသည်။

ခန်းမဆောင်ကြီးအထက်တွင် ပုံရိပ်တစ်ခု ပေါ်လာသည်။ ရှေးဟောင်းအမတဧကရာဇ် ဖြစ်သည်။

ရှေးဟောင်းအမတဧကရာဇ် မျက်မှောင်အနည်းငယ်ကြုတ်ကာ "မင်းက တကယ်ပဲ အင်အားသုံးပြီး အဆင့်တက်ဖို့ ကြံရွယ်နေတာလား။ မင်းရဲ့ပါရမီနဲ့ဆိုရင် မင်းက ငါ့ကို ကျော်တက်မှာ သေချာတယ်။ ဘာလို့ နည်းနည်းလောက် စိတ်မရှည်နိုင်ရတာလဲ"

မျက်လုံးမဖွင့်ဘဲ ယန်ရှန်ဧကရာဇ်က "ငါဧကရာဇ်က စိတ်မရှည်တာမဟုတ်ဘူး၊ ရှန့်ထျန်းက ငါဧကရာဇ်ကို အခွင့်အရေးမပေးတာ။ သူ့ကို ကပ်ဘေးဖြတ်ကျော်ခြင်း အောင်မြင်သွားခွင့်ပေးလိုက်ရင် အမတမင်းဆက်ဆိုတာ ရှိတော့မှာမဟုတ်ဘူး။ သူ့ရဲ့ပါရမီကို မင်းလည်း သိတဲ့အတိုင်းပဲ ရှင်းရှင်းလင်းလင်းမြင်နေရတယ်။ မင်း မဖြတ်ကျော်နိုင်ခဲ့တဲ့ နယ်ပယ်ကို သူက သေချာပေါက် ရောက်သွားမှာပဲ။ ဘယ်အချိန်ရောက်မလဲဆိုတာပဲ ကွာခြားတာ"

ရှေးဟောင်းအမတဧကရာဇ်က "ပြန်လည်ဝင်စားခြင်းကပ်ဘေးက အဲဒီလောက် မလွယ်ဘူး" ဟု ဆိုသည်။

"မင်းက အမတမင်းဆက်ရဲ့ ကံကြမ္မာကို သူရှုံးနိမ့်သွားမယ့်အပေါ် လောင်းကြေးထပ်ချင်တာလား။ ဒါမှမဟုတ် သူ့ကို နှစ်တစ်သန်း... ဆယ်သန်းလောက် အချိန်ယူရလိမ့်မယ်လို့ လောင်းကြေးထပ်မလို့လား။"

ယန်ရှန်ဧကရာဇ်၏ ပြန်လည်ချေပမှုကြောင့် ရှေးဟောင်းအမတဧကရာဇ် တိတ်ဆိတ်သွားသည်။

မကြာမီ ယန်ရှန်ဧကရာဇ်သည် မျက်လုံးဖွင့်ကာ အဝေးမှ စကြဝဠာကို ကြည့်ရင်း "ဒါ့အပြင် ယွမ်ရွှီဘိုးဘေးက ပြန်လည်ဝင်စားခြင်းလမ်းကြောင်းတွေကို အကျိုးမရှိဘဲ ဖွင့်ပေးခဲ့တာမဟုတ်ဘူး။ နောက်လာမယ့်အရာက အမတမင်းဆက်ရဲ့ သမိုင်းတစ်လျှောက်မှာ အင်အားအကြီးဆုံးကာလ ဖြစ်လာလိမ့်မယ်။ အဲဒီအထွတ်အထိပ်ပုဂ္ဂိုလ်တွေအားလုံးက ငါဧကရာဇ်နဲ့အတူ တိုက်ပွဲဝင်ဖို့ ပြန်လာကြလိမ့်မယ်"

သူ၏ မျက်နှာပေါ်တွင် စိတ်လှုပ်ရှားမှုများ ပေါ်လာပြီး မြင့်မြတ်ခုံရုံး နှင့် တိုက်ပွဲတစ်ခုကို မစောင့်ဆိုင်းနိုင်တော့သည့် ပုံဖြစ်နေသည်။

ရှေးဟောင်းအမတဧကရာဇ်က သူ့ကိုကြည့်ရင်း "ဒါဆို မင်း ဘယ်လိုအဆင့်တက်ဖို့ စီစဉ်ထားလဲ။ မြင့်မြတ်ခုံရုံးက မင်းကို အဆင့်တက်ခွင့်ပေးလောက်အောင် မောက်မာလိမ့်မယ်လို့ မင်းထင်နေတာလား။ သူတော်စင်ဘိုးဘေးက မလှုပ်ရှားရင် ငါလည်း မလှုပ်ရှားဘဲ နေရလိမ့်မယ်။ မဟုတ်ရင် အခြေအနေက ထိန်းမနိုင်သိမ်းမရ ဖြစ်သွားလိမ့်မယ်"

ယန်ရှန်ဧကရာဇ်က ခေါင်းခါကာ "မင်း စိတ်ပူစရာမလိုပါဘူး။ ငါဧကရာဇ်မှာ ကိုယ်ပိုင်အစီအစဉ်တွေ ရှိတယ်။ သူတို့က ငါ့ရဲ့ ကပ်ဘေးဖြတ်ကျော်ခြင်းကို တားဆီးဖို့ ကြိုးစားတာကိုတောင် ငါက မျှော်လင့်နေတာ။ ဒါဆိုရင် ငါ့ဘက်က အသာစီးရဖို့အတွက် တရားမျှတတဲ့ အကြောင်းပြချက်တစ်ခု ရသွားလိမ့်မယ်"

အခန်း ၄၀၂ ငါ့ရဲ့ ကျင့်ကြံမှုအဆင့်က ဘာလဲဆိုတာ မင်းသိလား

ဆောင်းဦးကုန်၍ ဆောင်းသို့ကူးပြောင်းလာသည်နှင့်အမျှ နှင်းများသည် ကျယ်ပြန့်သော ထိုက်ချန်းတိုက်ကြီးကို တဖြည်းဖြည်း ဖုံးလွှမ်းလာခဲ့သည်။

ကုအန်သည် မျက်နှာဖုံးတစ်ခုကို ဝတ်ဆင်ကာ အိမ်၏ခေါင်မိုးစွန်းပေါ်တွင် ထိုင်လျက် ကောင်းကင်ကို မော့ကြည့်နေသည်။ အောက်ဘက်ခြံဝင်းထဲတွင်မူ ပညာရှိရွှမ်းမြောင်သည် ဆေးဖော်စပ်ရင်း ကုအန်ကို စူးစမ်းစွာ ကြည့်နေလေသည်။

တောင်စောင့်နတ်သည် တစ်စုံတစ်ခုကို စိတ်ဝင်တစားဖြင့် အချိန်အတော်ကြာ ကြည့်ရှုနေပုံရသည်။ ပညာရှိရွှမ်းမြောင်သည် တောင်စောင့်နတ်၏ အမြင်ကို ရလိုစိတ်ဖြင့် တိတ်တဆိတ် တွေးနေမိသည်။ တောင်စောင့်နတ်၏ မျက်စိရှေ့မှ မြင်ကွင်းသည် စိတ်ကူးဖြင့်ပင် မမှန်းဆနိုင်အောင် သေချာပေါက် သာလွန်နေပေလိမ့်မည်။

ကောင်းကင်ဘုံအပြင်ဘက်မှာ တစ်ခုခုများ ဖြစ်နေတာလား။

ပညာရှိရွှမ်းမြောင်၏ ခန့်မှန်းချက် မှန်ကန်နေသည်။ အမှန်တကယ်ပင် ကောင်းကင်ဘုံအပြင်ဘက်၌ တစ်စုံတစ်ခု ဖြစ်ပျက်နေပြီး ၎င်းမှာ လောကအတွက် အလွန်အရေးကြီးသော အဖြစ်အပျက်တစ်ခု ဖြစ်သည်။

ကုအန်သည် စကြဝဠာထဲတွင် ကြီးကျယ်ခမ်းနားသော အစီအရင်တစ်ခုကို စီစဉ်နေသည့် အမတဝိညာဉ်အများအပြားကို မြင်လိုက်ရသည်။ ထိုအစီအရင်သည် အလွန်ကြီးမားလွန်းသဖြင့် အစီအရင်၏အထက်တွင် ထိုင်နေသော စိတ်အတွေးအကြံအမတနှစ်ဦး၏ ပုံရိပ်များကိုပင် မြင်နိုင်ပြီး သူတို့၏ စွမ်းအင်များကို လုံးဝ ဖုံးကွယ်မထားပေ။

တစ်စုံတစ်ယောက် အဆင့်တက်တော့မည်ဖြစ်သည်။ ဤကဲ့သို့သော အစီအရင်မျိုးဖြင့် စိတ်အတွေးအဆအမတတစ်ဦးက ငြိမ်းအေးရာအမတအဖြစ်သို့ တက်လှမ်းရန် ကြိုးစားနေခြင်း ဖြစ်နိုင်ဖွယ်ရှိသည်။

ကုအန်သည် မည်သူဖြစ်သည်ကို တိတိကျကျ တွက်ချက်၍မရပေ။ အမတမင်းဆက်ကို ကံကြမ္မာချီစွမ်းအင်က ကာကွယ်ထားသဖြင့် အကြောင်းအကျိုးဆက်များကို ဖုံးကွယ်ထားသည်။ ဟုတ်ပေသည်။ အချိန်ပေးလျှင် သူတွက်ထုတ်နိုင်သော်လည်း သိခြင်း၊ မသိခြင်းက သိပ်အရေးမကြီးပေ။

အဘယ်ကြောင့်ဆိုသော် စိတ်အတွေးအကြံအမတများမှာ ရှားပါးပြီး ငြိမ်းအေးရာအမတများမှာမူ လက်ရှိတွင် နယ်မြေတစ်ခုစီ၌ တစ်ဦးသာ ရှိသောကြောင့် ဖြစ်သည်။

လက်ရှိ ကောင်းကင်ဝိညာဉ်နယ်မြေတစ်ခုလုံးတွင် အများက အသိအမှတ်ပြုထားသော ငြိမ်းအေးရာအမတ နှစ်ဦးသာ ရှိသည်။

ကုအန်သည် ထရပ်လိုက်ပြီး ပညာရှိရွှမ်းမြောင်ကို ငုံ့ကြည့်ကာ "လောကကြီးမှာ အပြောင်းအလဲကြီးတွေ ဖြစ်လာတော့မယ်။ လုံ့လဝီရိယနဲ့ ကျင့်ကြံအားထုတ် ပျင်းရိမနေနဲ့"

ထိုသို့ပြောပြီးနောက် သူသည် ခေါင်မိုးစွန်းမှ လေထဲတွင် ပျောက်ကွယ်သွားခဲ့သည်။

လောကကြီး ပြောင်းလဲတော့မှာလား။

ပညာရှိရွှမ်းမြောင် မျက်မှောင်ကြုတ်သွားသည်။ တောင်စောင့်နတ်က အပြောင်းအလဲကြီးဟု ပြောဆိုရလောက်အောင် မည်သို့သော ဘေးဒုက္ခမျိုး ကျရောက်လာမည်နည်း။

အခြားတစ်နေရာ၌။

ကုအန်သည် ခြေတစ်လှမ်းဖြင့် ပုန်းကွယ်စိတ်ဝိညာဉ်နန်းတော်အတွင်းသို့ ရောက်ရှိလာပြီး သူ၏အကြည့်က အကာအရံအပြင်ဘက်တွင် ရှိနေသော ပင်လယ်နက်နဂါးငါးကြင်းဆီသို့ ရောက်သွားသည်။

ယခင်က အကာအရံကို ဝင်တိုက်ပြီး ပုန်းကွယ်စိတ်ဝိညာဉ်နန်းတော်၏ တည်နေရာကို အတည်ပြုပြီးနောက် ထိုငါးကြင်းသည် အလျင်လိုပုံမရဘဲ အကာအရံပတ်လည်တွင် အသံတစ်ချက်မပြုဘဲ ပျင်းရိစွာ လှည့်ပတ်နေခဲ့သည်။

ကုအန်သည် ပုန်းကွယ်စိတ်ဝိညာဉ်နန်းတော်တံခါးရှေ့ရှိ ကွင်းပြင်ပေါ်သို့ တက်လှမ်းကာ ညာခြေကို မြှောက်လိုက်သည်နှင့် ပင်လယ်နက်နဂါးငါးကြင်းသည် သူ၏ခြေဖဝါးအောက်သို့ ချက်ချင်းရောက်ရှိလာသည်။

ပင်လယ်နက်နဂါးငါးကြင်းမှာ ထိတ်လန့်သွားပြီး ငါးမျက်လုံးများ ပြူးကျယ်သွားသည်။ ဤတစ်ကြိမ်တွင်မူ ရုန်းကန်ခြင်းမပြုဘဲ ကုအန်ကို တည်ငြိမ်စွာ စိုက်ကြည့်နေသည်။

"မင်း သေချင်နေတာလား။ ပြော...မင်းကိုငါ ပေါင်းစားရမလား ကင်စားရမလား" ကုအန်က မျက်နှာသေဖြင့် သူ့ကို ငုံ့ကြည့်ရင်း မေးလိုက်သည်။

ပင်လယ်နက်နဂါးငါးကြင်း၏ ငါးမျက်လုံးများတွင် မျက်ရည်များ ပြန်လည်ဝဲတက်လာသည်။ သူ၏ခရီးတစ်လျှောက် ကြုံတွေ့ခဲ့ရသော အခက်အခဲများနှင့် အန္တရာယ်များထဲတွင် ကုအန်၏ရှေ့မှောက်၌ နှစ်ကြိမ်တိုင်တိုင် ငိုခဲ့ရခြင်းလောက် အရှက်ရစရာ မရှိခဲ့ပေ။

ကုအန်၏စိတ်မှာ ပျော့ပျောင်းမသွားပေ။ ခဏစဉ်းစားပြီးနောက် သူ၏နဖူးပေါ်တွင် ကနဦးကောင်းကင်မျက်လုံး ပေါ်လာပြီး ပင်လယ်နက်နဂါးငါးကြင်း၏ ကိုယ်ထဲသို့ ရွှေရောင်အလင်းတန်းတစ်ခု ပစ်လွှတ်လိုက်သည်။

ပင်လယ်နက်နဂါးငါးကြင်းသည် တုန်ရီသွားပြီး သူ၏ကိုယ်မှာ တောင့်တင်းသွားသည်။ ခဏအကြာတွင် တစ်စုံတစ်ခုကို ခံစားမိသည့်အလား "ခင်ဗျား... အမတတစ်ပါးလား" ဟု သတိဖြင့် မေးလိုက်သည်။

ထိုအသံမှာ လူသား၏အသံဖြစ်ပြီး ကလေးဆန်သော လူငယ်လေးတစ်ဦး၏ အသံနှင့်တူသည်။

ကုအန်သည် ခြေထောက်ကိုမရွှေ့ဘဲ "ငါက အမတဟုတ်သည်ဖြစ်စေမဟုတ်သည်ဖြစ်စေ မင်းနဲ့ ဘာဆိုင်လို့လဲ"

"အမတ... ကျွန်တော့်ကို တပည့်အဖြစ်လက်ခံပေးနိုင်မလား။ ကျွန်တော် ခင်ဗျားကို သစ္စာခံပါ့မယ်၊ ကျွန်တော့်ကို ကောင်းကင်သိုင်းပညာတွေ သင်ပေးပါ.... ကျွန်တော် ခင်ဗျားစကားကို ထာဝရ နားထောင်ပါ့မယ်..."

ပင်လယ်နက်နဂါးငါးကြင်းက မျက်ရည်များဖြင့် တောင်းပန်ကာ သူ၏အသံမှာ ကြားရသူတိုင်း စိတ်မကောင်းဖြစ်လောက်အောင် ဆွေးမြေ့ဖွယ်ရာများ ပြည့်နှက်နေသည်။

"ငါက မင်းကို ဘာလို့ လက်ခံရမှာလဲ။"

"ကျွန်တော်... ကျေးဇူးပြုပြီး တောင်းပန်ပါတယ်..."

"ပင်လယ်အောက်ခြေမှာ အမတတွေရဲ့ ဒဏ္ဍာရီကို မင်း ဘယ်လိုကြားဖူးတာလဲ။"

"ကျွန်တော် ငယ်ငယ်ကတည်းက ကိုယ်ပိုင်မဟုတ်တဲ့ မှတ်ဉာဏ်တွေ အများကြီး ရှိခဲ့တယ်။ ဘိုးဘေးတွေဆီက လက်ဆင့်ကမ်းလာတာ ဖြစ်နိုင်ပါတယ်။ အမတတွေ ဆင်းသက်လာတာကို ကျွန်တော်မြင်ဖူးတယ်၊ သူတို့က ခင်ဗျားနဲ့ တစ်ပုံစံတည်းပဲ..."

"ငါက လူသားလေ..ဒီလောကမှာ လူသားမျိုးနွယ်တွေအများကြီး ရှိတယ်။"

"မဟုတ်ဘူး....ခင်ဗျားက လူသားမျိုးနွယ်နဲ့ မတူဘူး။ ခင်ဗျားဆီက ခံစားချက်က အဲဒီအမတတွေနဲ့ တူတူပဲ..."

ထိုစကားကိုကြားသော် ကုအန်သည် မျက်လုံးများ ကျဉ်းမြောင်းသွားပြီး မဟာဝိညာဉ်ချုပ်အမတသိုင်းကွက်ကို တိုက်ရိုက်အသုံးပြုကာ သူ၏မှတ်ဉာဏ်များကို ရှာဖွေစစ်ဆေးလိုက်သည်။

ပင်လယ်နက်နဂါးငါးကြင်း၏ မျက်လုံးများသည် အရောင်အဝါများ ပျောက်ကွယ်သွားပြီး သေနေသည့်အလား ဖြစ်သွားကာ ပါးစပ်မှ ရေပူဖောင်းများပင် ထွက်လာသည်။

အချိန်အတော်ကြာပြီးနောက်။

ကုအန်သည် သူ၏ ကောင်းကင်အာရုံကို ပြန်ရုပ်သိမ်းလိုက်ရာ သူ၏မျက်နှာအမူအရာမှာ ထူးဆန်းနေသည်။

တကယ်ပင် အမတတွေ ရှိခဲ့သည်တကား! ပင်လယ်နက်နဂါးငါးကြင်း၏ မှတ်ဉာဏ်ထဲတွင် ထိုအချိန်သည် အလွန်ရှေးကျသော ကာလဖြစ်ပြီး သူ၏သွေးမျိုးဆက်မှတ်ဉာဏ်များမှာ ပြတ်တောင်းပြတ်တောင်း ဖြစ်နေသောကြောင့် ထိုအချိန်ကို ကုအန် မဆုံးဖြတ်နိုင်ခဲ့ပေ။

သူ၏မှတ်ဉာဏ်ထဲမှ အမတများသည် အမတလမ်းစဉ်၏ ကောင်းကင်ကိုးထပ်ထက် ကျော်လွန်သော သတ္တဝါများဖြစ်သည်မှာ သေချာသည်။ စုစုပေါင်း ငါးဦးရှိပြီး ကောင်းကင်မှ ဆင်းသက်လာကာ လျှို့ဝှက်ဆန်းကြယ်သော ကျောက်သလင်းတုံးများကို ပင်လယ်ထဲသို့ ပစ်ချခဲ့ကြသည်။

ထိုအရာသည် တစ်ခုတည်းသော အပိုင်းအစဖြစ်သော်လည်း မြင်ကွင်းမှာ ရှင်းလင်းပြတ်သားသည်။ ၎င်းက ပင်လယ်နက်နဂါးငါးကြင်း၏ ဘိုးဘေးသည် ထိုမှတ်ဉာဏ်ကို သူတို့၏ အရိုးထဲစွဲအောင် တန်ဖိုးထားပြီး မမေ့ပျောက်လိုကြောင်း ပြသနေသည်။

ကုအန်သည် ပြန်လည်တွက်ချက်ကြည့်ရာ ပင်လယ်နက်နဂါးငါးကြင်းတွင် အခြားအရေးပါသော ကံကြမ္မာဆက်နွယ်မှုများ မရှိကြောင်း အတည်ပြုပြီးမှ စိတ်အေးသွားသည်။

သူသည် ပင်လယ်နက်နဂါးငါးကြင်းကို ညင်သာစွာ ကန်လိုက်ရာ နိုးထလာသည်။ ကုအန်၏ ဖိနှိပ်မှုမရှိတော့သည့်အခါ ပင်လယ်နက်နဂါးငါးကြင်းသည် ရုတ်တရက် အပေါ်သို့ ပျံတက်သွားပြီး လေထဲတွင် ဝဲနေသည်။

ပင်လယ်နက်နဂါးငါးကြင်းသည် ကုအန်ကို ကြောက်ရွံ့စွာ ကြည့်နေပြီး အလွန်စိတ်လှုပ်ရှားနေသည်။

"ငါ မင်းကို လက်ခံနိုင်တယ်၊ ဒါပေမယ့် မင်းရဲ့လွတ်လပ်မှုကို ထာဝရ စွန့်လွှတ်ဖို့ သေချာပြီလား" ဟု ကုအန်က မေးလိုက်သည်။

ပင်လယ်နက်နဂါးငါးကြင်းသည် ဝမ်းသာလွန်း၍ ခေါင်းကို အသည်းအသန် ငြိမ့်ပြကာ "ကျွန်တော် ဆန္ဒရှိပါတယ်! ခင်ဗျားနဲ့အတူ ကျင့်ကြံခွင့်ရမယ်...အမတဖြစ်ခွင့်ရမယ်ဆိုရင် ကျွန်တော် အရာအားလုံးကို စွန့်လွှတ်ဖို့ ဆန္ဒရှိပါတယ်!" ဟု ပြောလိုက်သည်။

"အမတဖြစ်ဖို့လား။ အရင်ဆုံး မင်းရဲ့တန်ဖိုးကို သက်သေပြရလိမ့်မယ်!"

ကုအန်သည် ပင်လယ်နက်နဂါးငါးကြင်းကို မထီမဲ့မြင် ကြည့်လိုက်ပြီးနောက် ပုန်းကွယ်စိတ်ဝိညာဉ်နန်းတော်၏ အခြေအနေကို စတင်မိတ်ဆက်ပေးသည်။

ပင်လယ်နက်နဂါးငါးကြင်းသည် ကုအန်ကို စိတ်ပျက်စေမည်ကို စိုးရိမ်စွာဖြင့် ဂရုတစိုက် နားထောင်နေသည်။ ညွှန်ကြားချက်များ ပြောပြီးနောက် ကုအန်သည် သူ့အား လောလောဆယ် ဒီမှာပဲနေရန်နှင့် နောက်မှ ကျင့်ကြံခြင်းနည်းစနစ် သင်ပေးမည်ဟု ပြောကာ အထွတ်အထိပ်ဂိုဏ်းသို့ ပြန်သွားခဲ့သည်။

ပင်လယ်နက်နဂါးငါးကြင်းသည် ပုန်းကွယ်စိတ်ဝိညာဉ်ကွယ်နန်းတော်ကို လှည့်ကြည့်လိုက်ရာ သူ၏ငါးမျက်လုံးများမှာ တောက်ပနေပြီး ပြင်းပြသော စိတ်လှုပ်ရှားမှုများဖြင့် ပြည့်နှက်နေသည်။ ဆယ်စုနှစ်ပေါင်းများစွာ ကြိုးစားခဲ့ပြီးနောက် နောက်ဆုံးတွင် အချိုမြိန်ဆုံးသော အသီးအပွင့်ကို ရရှိခဲ့ပြီဖြစ်သည်။

...

ဆယ့်သုံးနှစ်အကြာတွင်။

ညသန်းခေါင်ယံအချိန် ကုအန်သည် တောင်ကြားအစွန်းရှိ တောင်ထိပ်တစ်ခုပေါ်တွင် ရပ်နေပြီး လက်ထဲမှ ကံကြမ္မာဖန်တီးခြင်းကလောင်တံကို ကစားရင်း ညကောင်းကင်ကို မော့ကြည့်နေသည်။

အမတမင်းဆက်၏ အရှင်သခင် ယန်ရှန်ဧကရာဇ်သည် ကပ်ဘေးကို ဖြတ်ကျော်တော့မည်ဖြစ်သည်။ စကြဝဠာထဲတွင် တန်ခိုးကြီးသော အမတဝိညာဉ်ပေါင်း သောင်းနှင့်ချီ၍ စုရုံးနေကြသည်။ သူတို့ထဲမှ အားအနည်းဆုံးမှာပင် အပူပင်မဲ့အမတအဆင့် ဖြစ်ပြီး ၎င်းမှာ အမတမင်းဆက်၏ အင်အားအပြည့်အစုံ မဟုတ်သေးပေ။ ဤမြင်ကွင်းကို မြင်ရုံမျှဖြင့် အမတမင်းဆက်၏ အင်အားကို မည်သူမဆို အံ့ဩသွားစေနိုင်သည်။

အပြင်ဘက်အလင်းလွှာများအထက်တွင်မူ ကောင်းကင်ဝိညာဉ်နယ်မြေမှ ဂိုဏ်းကြီးအသီးသီး၏ ကျင့်ကြံသူများသည် ရပ်နေကြပြီး အမတမင်းဆက်၏ ပြိုင်ဘက်ကင်းသော တန်ခိုးအာဏာကို ဆွေးနွေးနေကြသည်။

သူတို့သည် အမတမင်းဆက်၏ အင်အားကြီးမားကြောင်း သိသော်လည်း ယနေ့မှသာ သူတို့၏ အင်အားအတိုင်းအတာကို အမှန်တကယ် နားလည်ခဲ့ကြသည်။ အဓိကအချက်မှာ မြင့်မြတ်ခုံရုံးသည် အမတမင်းဆက်အရှင်သခင်၏ ကပ်ဘေးကို ဂရုမစိုက်သကဲ့သို့ မည်သည့်တုံ့ပြန်မှုမျှ မပြခြင်းပင် ဖြစ်သည်။

"ဒါက ဘယ်လို ကြောက်စရာကောင်းတဲ့ ကောင်းကင်ကပ်ဘေးမျိုးလဲ။"

"ဒီလောက် ကြောက်စရာကောင်းတဲ့ အရှိန်အဝါမျိုး၊ အမတမင်းဆက်ရဲ့ ကောင်းကင်စျန်အမတတွေရဲ့ အရေအတွက်က ဒီမှာရှိတဲ့ အင်အားစုအားလုံးပေါင်းတာထက်တောင် ကျော်လွန်နေပုံပဲ။"

"အမတမင်းဆက်က မြင့်မြတ်ခုံရုံးကို ဘာနဲ့ ရင်ဆိုင်နိုင်တယ်လို့ မင်းတို့ထင်လဲ။"

"အမတမင်းဆက်က တော်တော်ရည်မှန်းချက်ကြီးတာပဲ။ မြင့်မြတ်ခုံရုံးက သူတို့ကို ဘာလို့ သတိထားနေရတဲ့ပုံပေါက်နေတာလဲ။"

ဂိုဏ်းအသီးသီးမှ တပည့်များ သာမန်လတောင်ထိပ်မှ တပည့်များအပါအဝင် ထိုသို့သော အကြောင်းအရာများကို ဆွေးနွေးနေကြသည်ကို ကုအန် နားထောင်နေသည်။

မြင့်မြတ်ခုံရုံးသည် အမတမင်းဆက်ကို သတိထားနေခြင်းမဟုတ်၊ သူတို့သည် အခွင့်ကောင်းကို စောင့်ဆိုင်းနေခြင်းသာ ဖြစ်သည်။

မြင့်မြတ်ခုံရုံး၏မြို့တော်တစ်ခုအတွင်း၌ ကောင်းကင်စျန်အမတများနှင့် ကနဦးအပူအပင်မဲ့အမတများ အများအပြား စုရုံးနေကြသည်ကို ကုအန် ခံစားမိနေသည်။ တစ်ခုခုအတွက် ပြင်ဆင်နေသည်မှာ ထင်ရှားသည်။

အထက်လွှာများမှ ကျင့်ကြံသူအချို့သည် အချိန်မီ မလွတ်မြောက်နိုင်ဘဲ နေရာမှာပင် ပျက်စီးသွားမည့် တိုက်ပွဲကြီးတစ်ခုကို သူ ခန့်မှန်းထားခဲ့သည်။

ဤကပ်ဘေးသည် ကောင်းကင်ဝိညာဉ်နယ်မြေကိုလည်း သက်ရောက်မှုရှိမည်ဖြစ်ပြီး နယ်မြေအသီးသီးတွင် မြေငလျင်များ၊ ဆူနာမီများ၊ ဟာရီကိန်းများနှင့် အခြားသော ဘေးအန္တရာယ်များကို ဖြစ်ပေါ်စေမည်ဖြစ်သည်။ နောင်နှစ်ပေါင်းများစွာအထိ ထိုက်ချန်းတိုက်ကြီးသည် ၎င်း၏ လွှမ်းမိုးမှုကို ခံစားရမည်ဖြစ်ပြီး မရေမတွက်နိုင်သော သက်ရှိသတ္တဝါများသည် ခက်ခဲသောအချိန်များကို ရင်ဆိုင်ရမည်ဖြစ်သည်။

ကုအန်သည် ဝင်ရောက်စွက်ဖက်ရန် ရည်ရွယ်ချက်မရှိပေ။ ထိုကဲ့သို့သော ကပ်ဘေးသည် သူ၏ ဆေးအပင်တောင်ကြားကို ထိခိုက်မည်မဟုတ်ပေ။

သာမန်လူများအတွက်မူ သူတို့သည် ဤခက်ခဲသောအချိန်များကို သဘာဝဘေးအန္တရာယ်များကြောင့်ဟု သတ်မှတ်ကြမည်ဖြစ်ပြီး ဤပဋိပက္ခကို သိရှိကြမည်မဟုတ်ပေ။