အခန်း (၃၅၁)

ရှေ့ဆုံးမှ ဦးဆောင်လာသူမှာ ဝံပုလွေသွားတပ်ဖွဲ့၏ ခေါင်းဆောင် ချန်းလန်ဖြစ်ဟန်တူသည်။ သူသည် သန်မာထွားကြိုင်းသော သိုင်းပညာရှင်တစ်ဦးဖြစ်ပြီး ကျောပြင်တွင် လူတစ်ရပ်နီးပါး မြင့်မားသည့် လေးမြားအကြီးစားကြီးကို လွယ်ထားသည်။ ထိုလေးမြားမှာ နက်မှောင်သော အရောင်ရှိပြီး ၎င်း၏ မျက်နှာပြင်မှာ ပြင်းထန်သော နေရောင်ခြည်နှင့် အပြိုင် တောက်ပလျှက်ရှိသည်။

အလယ်တွင် တည်ရှိနေသူမှာ အမျိုးသမီး မုဆိုးတစ်ဦးဖြစ်ပြီး အလွန်ထူးချွန်ထက်မြက်မည့်ပုံ ပေါ်သည်။ သူမသည် အသက် ၃၀ အောက်အရွယ်၊ အမျိုးသမီးတစ်ဦး၏ ဆွဲဆောင်မှုအရှိဆုံးအရွယ်တွင် ရှိနေပြီး လက်ဖက်ရည်ရောင် ဆံနွယ်များကို ပိုင်ဆိုင်ထားသည်။ သူမ၏ လက်ထဲတွင် မှော်စွမ်းအင်ဝိညာဉ်ကျောက်လေးလုံး မြှုပ်နှံထားသည့် မှော်လှံတံတစ်ခုကို ကိုင်ဆောင်ထားသည်။

ထိုအမျိုးသမီး မုဆိုး၏ နောက်ကွယ်တွင်မူ မျက်နှာဖျော့တော့တော့နှင့် အသက်အငယ်ဆုံးဖြစ်ပုံရသည့် အမျိုးသား မုဆိုးတစ်ဦး လိုက်ပါလာသည်။

ဇရပ်၏ အလယ်ဗဟိုတည့်တည့်တွင် ထိုင်နေသော ယန်ချန်းလန်နှင့် ထန်ယု ဦးလေးနှင့်တူ နှစ်ယောက်ကို မြင်လိုက်ရချိန်တွင် ထိုလူငယ်မုဆိုး၏ မျက်လုံးများမှာ ဒေါသမီးများ တောက်လောင်သွားပြီး ခါးတွင်ချိတ်ထားသော ဓားမြှောင်ကို အလိုအလျောက် ဆွဲယူရန် ကြိုးစားတော့သည်။ သို့သော် သူ၏ဘေးမှ အမျိုးသမီး မှော်ဆရာမက သူမ၏ မှော်လှံတံဖြင့် တားဆီးလိုက်သည်။

ယန်ချန်းလန်က ဝံပုလွေသွားတပ်ဖွဲ့ဝင် သုံးဦးကို အကဲခတ်နေစဉ်မှာပင် တပ်မှူး ချန်းလန်နှင့် ဒုတပ်မှူး အမျိုးသမီးမုဆိုး ဟောင်နုတို့ကလည်း ယန်ချန်းလန်ကို အပြန်အလှန် အကဲခတ်နေကြသည်။

တစ်ဖက်လူသည် ညှိနှိုင်းပွဲအတွက် မုဆိုးတစ်ဦးကိုသာ ခေါ်ဆောင်လာကြောင်း ဇရပ်

ပတ်ဝန်းကျင်တွင်လည်း မည်သည့် ချုံခိုတိုက်ခိုက်မည့်သူမျှ မရှိကြောင်းနှင့် ကျိုးအင်ပါယာ၏ သိုင်းသူရဲကောင်း ယန်ပါးဟို အနီးအနားတွင် မရှိကြောင်း အတည်ပြုနိုင်လိုက်ချိန်တွင် သူတို့၏ မျက်နှာထားများမှာ အနည်းငယ် ပြေလျော့သွားသည်။ တစ်ချိန်တည်းမှာပင် ယန်ချန်းလန်အပေါ် ထားရှိသော သူတို့၏ အမြင်မှာလည်း သိသိသာသာ ကောင်းမွန်သွားခဲ့သည်။

ကျိုးအင်ပါယာ စစ်တပ်၏ အံ့ဖွယ်အမြွှာနှစ်ဦးအနက် တစ်ဦးဖြစ်သူ ယန်ချန်းလန်သည် အလွန်ပင် ဂုဏ်သိက္ခာရှိပြီး ဖြောင့်မတ်သူဖြစ်သည်ဟူသော ကောလာဟလမှာ အမှန်ပင်ဖြစ်ကြောင်း ယခုအခါ သက်သေပြနေပြီဖြစ်သည်။ ယန်အိမ်တော်နှင့် အကြီးအကျယ် ပဋိပက္ခဖြစ်နေသော်လည်း ဝံပုလွေသွားတပ်ဖွဲ့သည် ယန်ပါးဟို၏ ကျော်ကြားမှုကိုတော့ အနည်းငယ် ကြောက်ရွံ့နေကြဆဲပင်။

"တပ်မှူးယန်..."

ချန်းလန်က ရှေ့သို့ခြေတစ်လှမ်းတိုးကာ လက်နှစ်ဖက်ကို ဆုပ်ကိုင်၍ ဂါရဝပြု နှုတ်ဆက်လိုက်သည်။ နှစ်ဖက်စလုံး၏ ညှိနှိုင်းပွဲ အစပျိုးပုံမှာ ချစ်ကြည်ရင်းနှီးမည့်ပုံ ပေါ်နေသည်။

"အဖွဲ့ခေါင်းဆောင်ချန်း..."

ယန်ချန်းလန်ကလည်း မတ်တတ်ရပ်ကာ အပြန်အလှန် ဂါရဝပြုလိုက်သည်။

"ဒုတပ်မှူးဟောင် ကျွန်တော့်ကို မတားပါနဲ့။ အဲဒီ တိရစ္ဆာန်လေးကို ကျွန်တော် သတ်ပစ်ချင်တယ်"

နှစ်ဦးသား နှုတ်ဆက်စကား ပြောနေကြစဉ်မှာပင် လူငယ်မုဆိုးသည် သူ၏ဘေးမှ အမျိုးသမီးမှော်ဆရာမ၏ မှော်လှံတံ တားဆီးမှုကို ရုတ်တရက် ရုန်းထွက်လိုက်ပြီး သူ၏လက်မှာ ခါးဆီသို့ လျင်မြန်စွာ ရောက်သွားသည်။

ထိုလူငယ်မုဆိုး၏ ဝတ်စားဆင်ယင်မှုမှာ အနည်းငယ် ထူးဆန်းသည်။ ဝူကျိတိုက်ကြီးပေါ်ရှိ သိုင်းပညာရှင်အများစုမှာ ခါးတွင် ဓားရှည်များကို ချိတ်ဆွဲလေ့ရှိသော်လည်း သူကမူ လက်ချောင်းအရွယ်အစားရှိသော ဓားမြှောင်လေးများကို စီတန်း၍ ချိတ်ထားသည်။

လျှပ်တစ်ပြက်အတွင်းမှာပင် ခလင် ဟူသော မြည်သံနှင့်အတူ ငွေရောင်အလင်းတန်းတစ်ခု လေထဲတွင် ဖြတ်သန်းသွားပြီး ပုန်းကွယ်လက်နက်ဓားမြှောင် ငါးစင်း ခြောက်စင်းခန့်မှာ ထန်ယုကို ဦးတည်ကာ ပျံသန်းသွားတော့သည်။

ထိုလူငယ်၏ ပုန်းကွယ်လက်နက်များ ပစ်လွှတ်လိုက်သည့် နည်းပညာမှာ အလွန်ပင် လျင်မြန်လှရာ ဤပညာရပ်တွင် ကျွမ်းကျင်သူတစ်ဦးဖြစ်ကြောင်း ထင်ရှားလှသည်။ ဓားမြှောင်တစ်စင်းချင်းစီတွင် တိုက်ခိုက်ရေးစိတ်ဝိညာဉ်များ လွှမ်းခြုံထားပြီး ထန်ယု၏ အသက်သွေးကြော အချက်အချာနေရာများကို တိုက်ရိုက်ပစ်မှတ်ထား၍ ဆက်တိုက်တိုက်ခိုက်လာခြင်း ဖြစ်သည်။ အကယ်၍သာ အမှန်တကယ် ထိမှန်သွားပါက ထန်ယုမှာ ထိုနေရာတင်ပင် သွေးအိုင်ထဲ၌ အသက်ပျောက်သွားပေလိမ့်မည်။

သို့သော် ယန်ချန်းလန်သည် အလျင်စလိုမရှိဘဲ တည်ငြိမ်နေခဲ့သည်။ သူ၏ လက်လှုပ်ရှားမှုမှာ ပျံသန်းလာသော ဓားမြှောင်များထက် ဆတ္တပြည့်မျှ ပို၍မြန်ဆန်နေသည်။ သူသည် ထန်ယုကို လျှပ်တစ်ပြက် ဆွဲယူလိုက်ရာ ဓားမြှောင်ငါးစင်း ခြောက်စင်းစလုံးမှာ ပစ်မှတ်နှင့် လွဲချော်သွားတော့သည်။

ထိုပုန်းကွယ်လက်နက်များသည် ဇရပ်၏ နံရံများကို ထိုးဖောက်သွားပြီး ဓားရာ ငါးခု ခြောက်ခုကို ချက်ချင်းပင် ကျန်ရစ်စေခဲ့သည်။

ဓားမြှောင်များကို ရှောင်တိမ်းပြီးနောက် ယန်ချန်းလန်သည် ထန်ယုကို မူလနေရာသို့ ပြန်လည်ပစ်ချပေးလိုက်ပုံမှာ စီးဆင်းနေသော ရေကဲ့သို့ပင် ချောမွေ့လွန်းလှသည်။ အကယ်၍ အမြင်အာရုံမကောင်းသူတစ်ဦးက ဘေးမှကြည့်နေမည်ဆိုပါက ထန်ယု၏ တင်ပါးသည် ထိုင်ခုံမှ တစ်ခါမျှပင် မကြွခဲ့သကဲ့သို့ ထင်မှတ်ရပေလိမ့်မည်။

ကြောက်လန့်လွန်းသဖြင့် မျက်ဖြူလန်မတတ် ဖြစ်သွားသော ထန်ယုသာ မရှိခဲ့လျှင် ခုနက ဘာတွေဖြစ်ပျက်သွားသည်ကို မည်သူမျှပင် ရိပ်မိကြမည် မဟုတ်ပေ။

ဘေးတစ်ဖက်တွင်မူ ချန်းလန်နှင့် ဟောင်နုတို့သည် တည်ငြိမ်သော အမူအရာကို ပြသထားသော်လည်း သူတို့၏ ရင်ထဲတွင်မူ မုန်တိုင်းထန်နေသော ပင်လယ်ပြင်ကဲ့သို့ လှုပ်ခတ်သွားခဲ့ပြီ ဖြစ်သည်။

အတိတ်ကာလတွင် ယန်ချန်းလန်သည် ကျိုးအင်ပါယာ၏ ထင်ရှားကျော်ကြားသော ပုဂ္ဂိုလ်တစ်ဦးဖြစ်ခဲ့ရာ မုဆိုးများဖြစ်ကြသည့် ချန်းလန်နှင့် အခြားသူများမှာလည်း သူ၏ဂုဏ်သတင်းကို အလွန်ပင် လေးစားခဲ့ကြသည်။ အစောပိုင်းက ယန်ချန်းလန်သည် နှစ်ပေါင်းများစွာ မသန်မစွမ်း ဖြစ်နေခဲ့ပြီးနောက် စစ်တပ်မှထွက်ကာ မုဆိုးတစ်ဦး ဖြစ်လာကြောင်း သူ၏ ကျိုးပဲ့သွားသော လက်များမှာလည်း လျှို့ဝှက်ဆန်းပြားစွာ ပြန်လည်ကောင်းမွန်သွားကြောင်း ကောလာဟလများ ထွက်ပေါ်ခဲ့ဖူးသည်။

သို့သော် ချန်းလန်အပါအဝင် လူအများစုမှာ ၎င်းကို အမှန်တကယ် မယုံကြည်ခဲ့ကြပေ။ ကျိုးပဲ့သွားသော လက်များ ပြန်လည်ကောင်းမွန်လာနိုင်သည်ကို သူတို့ သံသယရှိခဲ့ကြသလို ကောင်းမွန်သွားသည့်တိုင်အောင် ယခင်ကဲ့သို့ လျင်မြန်ဖြတ်လတ်မှုမှာ ဆိုးရွားစွာ ထိခိုက်သွားလိမ့်မည်ဟု ယူဆထားကြသည်။

ထို့ကြောင့် ယန်ချန်းလန်ကိုယ်တိုင် ဤကိစ္စကို လာရောက်ကိုင်တွယ်မည်ဟု ကြားသိရချိန်တွင် ချန်းလန်နှင့် အခြားသူများမှာ စမ်းသပ်လိုသည့် စိတ်ဆန္ဒအချို့ ရှိနေခဲ့ကြသည်။ ယခု စမ်းသပ်လိုက်သည့်အခါမှပင် ယန်ချန်းလန်၏ စွမ်းရည်မှာ အတိတ်ကထက် ဆုတ်ယုတ်သွားခြင်းမရှိသည့်အပြင် ပို၍ပင် တိုးတက်လာပုံရကြောင်း ချက်ချင်း သိလိုက်ရတော့သည်။

ဝံပုလွေခေါင်းဆောင် ချန်းလန်က ဒေါသထွက်ဟန်ဆောင်ကာ ပြောလိုက်သည်။

"လျိုဟောင်... မင်းကို ဘယ်သူက လှုပ်ရှားခိုင်းလို့လဲ။ တပ်မှူးယန်ရဲ့ ရှေ့မှာ မရိုမသေ မလုပ်နဲ့"

"ဘာမှ မဖြစ်ပါဘူး။ ဒါက လူကြီးမင်းလျို ဖြစ်မှာပေါ့နော်။ ဒီကိစ္စက အမှန်တော့ ထန်ယုရဲ့ အမှားပါ"

ယန်ချန်းလန်က အပြုံးနုနုဖြင့် ပြန်လည်ပြောဆိုလိုက်သည်။

သို့သော် ယန်ချန်းလန်၏ စိတ်ထဲ၌မူ ဒီဝံပုလွေသွား တပ်ဖွဲ့ဝင်တွေ တကယ့်ကို ကောက်ကျစ်တာပဲ ဟု လှောင်ပြောင်နေမိသည်။ ဟောင်နု၏ ကျင့်ကြံမှုအဆင့်မှာ လျိုဟောင်ထက် များစွာမြင့်မားလှရာ သူမအနေဖြင့် စိတ်လိုက်မာန်ပါ လုပ်ဆောင်မည့် သူမ၏ လက်အောက်ငယ်သားကို ဘာလို့ မတားဆီးနိုင်မှာလဲ။ သူမ တမင်မတားဘဲ စမ်းသပ်ခိုင်းခြင်းသာ။

ထန်ယုမှာမူ ငိုချင်သော်လည်း မျက်ရည်မထွက်နိုင်တော့ချေ။ သူသည် အမှန်တကယ်ပင် သေလောက်အောင် ကြောက်လန့်နေပြီဖြစ်သည်။

"ဒီကိစ္စကို ဆွေးနွေးဖို့ သဘောတူထားပြီးပြီဆိုတော့ ပွင့်ပွင့်လင်းလင်းပဲ ရှင်းရှင်းလင်းလင်း ပြောကြရအောင်။ ဒီကိစ္စက မူလက ဝံပုလွေသွား တပ်ဖွဲ့နဲ့ မဆိုင်ပါဘူး။ ဒါပေမဲ့ လျိုဟောင်က ကျွန်တော်တို့တပ်ဖွဲ့ရဲ့ အလားအလာရှိတဲ့ မုဆိုးတစ်ယောက် ဖြစ်နေတယ်။ တပ်ဖွဲ့ဝင်တစ်ယောက် ဒုက္ခရောက်ရင် တပ်မှူးတစ်ယောက်အနေနဲ့ မားမားမတ်မတ် ရပ်တည်ပေးဖို့က တာဝန်ပဲဆိုတာ တပ်မှူးယန်လည်း သိမှာပါ"

ဝံပုလွေခေါင်းဆောင် ချန်းလန်က ယန်ချန်းလန်၏ အခြေအနေကို စမ်းသပ်ပြီးနောက် တဲ့တိုးပင် ပြောလိုက်သည်။

"အဖွဲ့ခေါင်းဆောင်ချန်း ပြောတာ မှန်ပါတယ်။ ထန်ယု... ဒီပြဿနာက မင်းကြောင့် စတာဖြစ်

သလို လူကြီးမင်းလျိုလည်း ဒီမှာ ရှိနေပြီဆိုတော့ ဒီတိရစ္ဆာန်လေးကို ဘယ်လို ကိုင်တွယ်ဖြေရှင်းရမလဲဆိုတာ တိုက်ရိုက်သာ ပြောပါ"

ယန်ချန်းလန်က အစေခံကို အရက်တည်ခိုင်းရင်း ပြောလိုက်သည်။

ထိုစကားကို ကြားလိုက်ရချိန်တွင် လျိုဟောင်သည် သနားစရာကောင်းစွာ သေဆုံးသွားခဲ့ရသော သူ၏ စေ့စပ်ထားသူကို သတိရကာ ထန်ယုကို စူးစိုက်ကြည့်လိုက်သည်။ သူသည် သူ၏ရှေ့မှ ထိုဝတုတ်တုတ်လူကို သွေးအိုင်ထဲလဲအောင် လုပ်ပြီး အသားကိုပင် ဝါးစားပစ်ချင်နေမိသည်။

"အသက်ကို အသက်နဲ့ ပြန်ပေးဆပ်ရမယ်။ ကျွန်တော် သူ့အသက်ကို လိုချင်တယ်"

လျိုဟောင်က တစ်လုံးချင်း အံကြိတ်ပြောလိုက်ရင်း သူ၏ ဓားမြှောင်ကို ထပ်မံဆွဲယူရန် ပြင်လိုက်သည်။ သို့သော် ဤတစ်ကြိမ်တွင်မူ သူ စိတ်မလောတော့ပေ။ ယန်ချန်းလန် ဤနေရာတွင် ရှိနေသရွေ့ သူ ပုန်းကွယ်လက်နက်ကို သုံးလျှင်ပင် ထန်ယုကို ထိခိုက်အောင်လုပ်နိုင်မည့် အခွင့်အရေး မရှိမှန်း သူ သိထားသည်။

"ကျွန်တော် သတ်တာမဟုတ်ဘူး။ သူမဘာသာ သူမ သတ်သေတာလေ။ အဲဒါကို ဘာလို့ ကျွန်တော့်အသက်နဲ့ ပေးဆပ်ရမှာလဲ ပြီးတော့ အဲဒီမိန်းမက သာမန်ပြည်သူတစ်ယောက်ပဲဥစ္စာ"

ထန်ယုက ဒေါသတကြီး ပြန်ပြောလိုက်သည်။ သူ့အမေနှင့် အဖိုးတို့ ဤနေရာတွင် ရှိမနေသဖြင့် သူ၏ဦးလေးက စိတ်လိုက်မာန်ပါနှင့် သူ့အသက်ကို အသက်နှင့်လဲ၍ ပေးဆပ်လိုက်လျှင် သူ ဒုက္ခရောက်တော့မည်ကို ကြောက်ရွံ့သောကြောင့်ပင်။

ထန်ယုအနေဖြင့် နှုတ်ပိတ်နေလျှင် ပိုကောင်းမည်ဖြစ်သော်လည်း သူ၏စကားကြောင့် ဝံပုလွေခေါင်းဆောင်နှင့် ဒုတပ်မှူး ဟောင်နုတို့၏ မျက်လုံးများတွင် ချက်ချင်းပင် ဒေါသရိပ်များ လွှမ်းသွားတော့သည်။

မုဆိုးအများစုမှာ ဆင်းရဲသားနောက်ခံများမှ လာသူများဖြစ်ကြရာ အရာရှိသားသမီးများက သာမန်ပြည်သူများအပေါ် ခွဲခြားဆက်ဆံခြင်းကို လုံးဝ သည်းမခံနိုင်ကြချေ။ သေဆုံးသူ အမျိုးသမီးကို စော်ကားခဲ့သည်ကပင် လုံလောက်နေပြီဖြစ်သော်လည်း သူမ သေဆုံးပြီးနောက်တွင်ပါ ဤကဲ့သို့ မရိုမသေ ပြောဆိုခြင်းမှာ အကြိမ်ပေါင်း ထောင်သောင်းမက သေထိုက်သော အပြုအမူပင်။

"ပါးစပ်ပိတ်စမ်း... ဒီတိရစ္ဆာန်"

ယန်ချန်းလန်၏ နားထင်မှ သွေးကြောများ တထိတ်ထိတ် ခုန်လာပြီး စားပွဲပေါ်သို့ လက်ဖဝါးဖြင့် ပြင်းထန်စွာ ရိုက်ချလိုက်ရာ စားပွဲပေါ်တွင် လက်ဖဝါးရာကြီး ထင်ကျန်ရုံတင်မကဘဲ အရက်ခွက်များအားလုံး ဖရိုဖရဲ ကွဲအက်ကုန်တော့သည်။

အရက်စက်များမှာ တစက်စက် ကျနေပြီး ဇရပ်အတွင်း၌ ထန်ယု၏ ကြောက်လန့်တကြား အသက်ရှူသံမှလွဲ၍ ဘာအသံမျှ မကြားရတော့ချေ။ ယန်ချန်းလန်၏ ဒေါသမီးကြောင့် ဇရပ်အတွင်းရှိ အပူချိန်မှာ ရုတ်တရက် ဒီဂရီအနည်းငယ် ကျဆင်းသွားသကဲ့သို့ ခံစားရသည်။

ထန်ယုက သူ့ဦးလေးကို ခိုးကြည့်နေစဉ် တစ်ဖက်မှ ဝံပုလွေခေါင်းဆောင်နှင့် ဒုတပ်မှူးဟောင်နုတို့ကမူ ဘာမျှမဖြစ်သကဲ့သို့ အေးအေးဆေးဆေးပင် သူတို့၏ သောက်စရာများကို သောက်နေကြသည်။

ခဏအကြာတွင် ဝံပုလွေခေါင်းဆောင်ကပင် တိတ်ဆိတ်မှုကို အရင်ဆုံး ဖြိုခွင်းလိုက်သည်။ သူသည် အရက်ခွက်ကို ချလိုက်ပြီး "တပ်မှူးယန်... ကျွန်တော် ယန်အိမ်တော်ရဲ့ သစ္စာရှိမှုနဲ့ သူရဲကောင်းပီသမှုကို လေးစားပါတယ်။ ဒါပေမဲ့ တစ်ခါတလေမှာ ကြွက်ချေးတစ်လုံးက ဟင်းတစ်အိုးလုံးကို ပုပ်စေတတ်တယ် ဆိုသလိုပဲ။ မထိုက်တန်တဲ့အရာအတွက် အနစ်နာခံတာက ရှုံးချက်ထွက်ပါလိမ့်မယ်"

ဝံပုလွေခေါင်းဆောင်၏ စကားမှာ ပေါ့ပါးသယောင်ရှိသော်လည်း တိုက်ခိုက်တော့မည့် ခြိမ်းခြောက်မှုများ ကိန်းအောင်းနေသည့် လေးနက်သော စကားပင်။ ဒုတပ်မှူး ဟောင်နုသည်

လည်း ဘေးတွင် ပြုံးလျက် ထိုင်နေသော်လည်း အနီးကပ်ကြည့်မည်ဆိုပါက သူမ၏ လက်ထဲရှိ မှော်လှံတံမှာ စာလုံးပေါင်းစပြုနေပြီဖြစ်သော ဆွဲဆောင်မှုရှိသည့် အလင်းတန်းများ တဖျတ်ဖျတ် တောက်ပနေသည်ကို တွေ့ရမည်ဖြစ်သည်။

ဝံပုလွေခေါင်းဆောင် တစ်ဦးတည်းဆိုလျှင် ယန်ချန်းလန်ကို ယှဉ်နိုင်မည်မဟုတ်သော်လည်း အလွန်ပြင်းထန်သော မီးဓာတ်မှော်ဆရာမပါ ထပ်ပေါင်းလိုက်လျှင် ရလဒ်က မည်သို့ဖြစ်မည်ကို မည်သူမျှ မပြောနိုင်ချေ။

"စကားက ဒီအထိရောက်လာပြီဆိုတော့ တပ်မှူးယန်အနေနဲ့ ကျွန်တော်တို့ရဲ့ ရပ်တည်ချက်ကို နားလည်မှာပါ။ လျိုဟောင်အတွက် ကျွန်တော်ပဲ ဆုံးဖြတ်ပေးလိုက်မယ်။ အသက်ကို အသက်နဲ့ လဲရမယ်။ အကယ်၍ ယန်အိမ်တော်ကသာ သဘောတူမယ်ဆိုရင် ဝံပုလွေသွား တပ်ဖွဲ့အနေနဲ့ နောင်အနာဂတ်မှာ ယန်အိမ်တော်ကို ဘယ်တော့မှ ပြဿနာလာမရှာဘူးလို့ ကတိပေးပါတယ်။ ဒါပေမဲ့ တပ်မှူးယန်က သဘောမတူဘူးဆိုရင်တော့... ဝံပုလွေသွားက ကောင်းကင်မုဆိုးတပ်ဖွဲ့နဲ့ မပြေလည်နိုင်တဲ့ ရန်သူတော်တွေ ဖြစ်သွားကြပါလိမ့်မယ်"

ဝံပုလွေခေါင်းဆောင်က ညှိနှိုင်းရန် နေရာမချန်တော့ဘဲ ပြတ်သားစွာ နိဂုံးချုပ်လိုက်တော့သည်။