ကောင်းကင်ကို စီရင်၊ မြေပြင်ကို ချေမှုန်း၊ မိစ္ဆာနတ်ဆိုးအပေါင်းအား သုတ်သင်ခြင်း။ သက်ရှိအားလုံး၏ သတ်ဖြတ်လိုစိတ်ကို စုစည်းထားသော ဓားတစ်လက်(၁)။

ဤအချိန်တွင် ကျောင်းလုံမြို့တော်အတွင်း၌...။

စတုတ္ထအဆင့် မိစ္ဆာကျင့်ကြံသူအများအပြား စုဝေးနေကြသည်။ ၎င်းတို့သည် ပုံသဏ္ဌာန် အမျိုးမျိုးရှိကြပြီး တစ်ကောင်ချင်းစီတိုင်းမှ စိတ်နှလုံး တုန်လှုပ်ဖွယ်ကောင်းသော မိစ္ဆာစွမ်းအင်များကို ထုတ်လွှတ်နေကြရာ၊ ကောင်းကင်ယံထက်တွင် အဆုံးမဲ့သောမိစ္ဆာတိမ်တိုက်မည်းကြီး ဖုံးလွှမ်းနေသကဲ့သို့ပင် ဖြစ်ချေသည်။

ခေါင်းဆောင်လုပ်သူများမှာ သဘာဝကျစွာပင် စတုတ္ထအဆင့် အထွတ်အထိပ် မိစ္ဆာကျင့်ကြံသူ တစ်စုဖြစ်လေ၏။

ဤနေရာတွင် မိစ္ဆာကျင့်ကြံသူ ထောင်ချီရှိနေသော်လည်း အမှန်တကယ် စတုတ္ထအဆင့် အထွတ်အထိပ်သို့ ရောက်ရှိနိုင်သူမှာ (၄၀)၊ (၅၀) ခန့်သာ ရှိပေသည်။

အများစုမှာ စတုတ္ထအဆင့်အောက်ခြေအဆင့်သာ ရှိကြပေသည်။ ဤသည်မှာလည်း မတတ်နိုင်သောကိစ္စပင် ဖြစ်ချေသည်။

မိစ္ဆာမျိုးနွယ်စုသည် လူသားကျင့်ကြံသူများထက် သက်တမ်းအဆမတန် ရှည်လျားသော်လည်း ၎င်းတို့၏ကျင့်ကြံနှုန်းမှာမူ အလွန်နှေးကွေးလှပေ၏။

ထို့အပြင် အဆင့်တက်လှမ်းရန်လည်း ပိုမိုခက်ခဲလေသည်။

ထို့ကြောင့် ၎င်းတို့၏ ထိပ်တန်းမိစ္ဆာမျိုးနွယ်စု အရေအတွက်မှာ အလွန်ရှားပါးနေခြင်း ဖြစ်ပေသည်။

မှန်ပေသည်၊ ထိုသို့ဖြစ်လင့်ကစား အရေအတွက်အားဖြင့်မူ လူသားများထက် အပြတ်အသတ် သာလွန်နေဆဲပင် ဖြစ်၏။

"အကြီးအကဲဝူဝေ... ချန်လန်ပင်လယ်ဒေသက လူသားဝိညာဉ်သန္ဓေသားအုပ်စုက ကျုပ်တို့ ကျောင်းလုံမြို့တော်ကို တိုက်ခိုက်ချင်နေကြတယ်လို့ သတင်းရထားတယ်..."

စတုတ္ထအဆင့် အထွတ်အထိပ်အဆင့် မိစ္ဆာကျင့်ကြံသူတစ်ဦးက ပြောလိုက်သည်။

၎င်းသည်လည်း ကျောင်းလုံမျိုးနွယ်စုဝင် တစ်ဦးဖြစ်ပြီး ကျင့်ကြံခြင်းအဆင့်မှာ ကျောင်းဝူဝေပြီးလျှင် ဒုတိယအမြင့်ဆုံး ဖြစ်ပေသည်။

ချန်လန်ပင်လယ်ဒေသ၏ သတင်းအချက်အလက်အမျိုးမျိုးကို စုံစမ်းထောက်လှမ်းရန် တာဝန်ယူထားသူလည်း ဖြစ်လေ၏။

"ကျောင်းလုံမြို့တော်ကို တိုက်ခိုက်မယ် ဟုတ်လား... သူတို့က ငါတို့မိစ္ဆာမျိုးနွယ်ရဲ့ စီမံကိန်းကို နောက်ဆုံးတော့ ရိပ်မိသွားကြပြီပေါ့... သိပ်တော့ မတုံးကြဘူးပဲ..."

"နှမြောစရာကောင်းတာက အခုမှသိတာတော့ အရမ်း နောက်ကျသွားပြီ..."

"နှစ်ပေါင်း (၂၀) ကြာ ပြင်ဆင်ပြီးတဲ့နောက်မှာ… ငါတို့ရဲ့ 'ရှေးဟောင်းမိစ္ဆာအသွင်ပြောင်းအစီအရင်' ကလည်း ပြီးစီးလုနီးပါး ဖြစ်နေပြီ..."

"အဲဒီအချိန်ကျရင် ရှေးဟောင်းမိစ္ဆာစွမ်းအင်တွေက ဒီ ပဉ္စမအဆင့်ဝိညာဉ်သွေးကြောထဲ ပေါင်းစပ်သွားပြီး... ဒီဝိညာဉ်သွေးကြောကို ပဉ္စမအဆင့်မိစ္ဆာသွေးကြောအဖြစ် ပြောင်းလဲပစ်လိမ့်မယ်..."

"ဟားဟား… ဒီပင်လယ်ဒေသ တစ်ခုလုံးကလည်း ငါတို့မိစ္ဆာမျိုးနွယ် အုပ်စိုးတဲ့ နယ်မြေအဖြစ် အလျင်အမြန် ပြောင်းလဲသွားလိမ့်မယ်..."

ကျောင်းဝူဝေက အားပါးတရ ရယ်မောလိုက်လေသည်။

၎င်းသည် လူသားကျင့်ကြံသူများ၏ အစီအစဉ်ကို အထင်သေးလေသည်။

အကြောင်းမှာ မိစ္ဆာမျိုးနွယ်စု၏ စီမံကိန်းသည် အောင်မြင်ရန် မဝေးတော့သဖြင့်၊ ယခုမှ လာရောက်တားဆီးချင်သည်မှာ စိတ်ကူးယဉ်သက်သက်သာ ဖြစ်သောကြောင့်ပင်။

ထို့အပြင် လူသားများ၏ တိုက်ခိုက်ရေးအစီအစဉ်က အောင်မြင်လိမ့်မည်ဟုလည်း ၎င်းမယူဆပေ။

အကယ်၍ ကျောင်းလုံမြို့တော်ကို အမှန်တကယ် တိုက်ခိုက်လိုပါက ကိုယ့်သေတွင်း ကိုယ်တူးသည်နှင့် မခြားနားပေ။

"မိစ္ဆာတစ်သောင်းနန်းတော်ကလည်း ငါတို့ရဲ့စီမံကိန်းကို အရမ်း အလေးထားတယ်..."

"ဘာလို့လဲဆိုတော့ ချန်လန်ပင်လယ်ဒေသကလွဲရင်... ငါတို့ရှေးဟောင်းမိစ္ဆာကမ္ဘာက တခြားနယ်မြေတွေကို ကျူးကျော်တဲ့အခါ 'ရှေးဟောင်းမိစ္ဆာအသွင်ပြောင်းအစီအရင်' ကို မစီရင်နိုင်ကြဘူး..."

"တခြား ကုန်းမြေတိုက်ကြီးတွေမှာက ကျောထောက်နောက်ခံပေးမယ့် နတ်ဘုရားအသွင်ပြောင်းအဆင့် အရှင်သခင်တွေ ရှိနေကြတော့... ငါတို့လည်း အလွယ်တကူ မလှုပ်ရှားရဲဘူးလေ..."

"ဒါကြောင့် ဒီတစ်ခါ စီမံကိန်းမှာ ငါတို့ဘက်က အမှားအယွင်းမရှိအောင် လုပ်ရမယ်..."

မိစ္ဆာဖီးနစ်မျိုးနွယ်စု အကြီးအကဲတစ်ဦးက လေးနက်စွာ ဆိုလိုက်သည်။

ရှေးဟောင်းမိစ္ဆာကမ္ဘာ တစ်ခုလုံးကိုလည်း အမှန်တကယ်တွင် စုစည်းထားပြီးဖြစ်ကာ 'မိစ္ဆာတစ်သောင်းနန်းတော်' က ဦးဆောင်၍ ရှေးဟောင်းမိစ္ဆာကမ္ဘာရှိ မျိုးနွယ်စုအမျိုးမျိုးကို အုပ်ချုပ်ထားသည်။

နတ်ဘုရားအသွင်ပြောင်းအဆင့်သို့ ရောက်ရှိမှသာ 'မိစ္ဆာတစ်သောင်းနန်းတော်' သို့ ဝင်ရောက်ပြီး အကြီးအကဲလုပ်နိုင်ပေသည်။

မိစ္ဆာမျိုးနွယ်စုတစ်ခုလုံးသည် 'မိစ္ဆာတစ်သောင်းနန်းတော်' ရှိ နတ်ဘုရားအသွင်ပြောင်းအဆင့် အရှင်သခင်များ၏ ဆန္ဒအတိုင်း လည်ပတ်နေသည်ဟု ဆိုနိုင်ပေ၏။

ကမ္ဘာနှစ်ခု ပေါင်းစပ်ခြင်းဖြစ်စဉ်ကြောင့် ကမ္ဘာ့တံခါးပေါက် ပေါ်လာသောနေရာသည် ချန်လန်ပင်လယ်ဒေသ တစ်ခုတည်းမဟုတ်ဘဲ အရှေ့ပိုင်းကုန်းမြေတိုက်၊ အနောက်ပိုင်းကုန်းမြေတိုက်၊ မြောက်ပိုင်းကုန်းမြေတိုက်နှင့် တောင်ပိုင်းကုန်းမြေတိုက် စသည်တို့တွင်လည်း ရှိနေပေသည်။

သို့သော် ထိုနေရာများတွင် နတ်ဘုရားအသွင်ပြောင်းအဆင့် အရှင်သခင်များ ရှိနေသဖြင့် ၎င်းတို့ အကြီးအကျယ် မကျူးကျော်ရဲကြပေ။

‘သစ်သီးကို ရွေးချယ်ရာတွင် ပျော့သောအသီးကို ရွေးချယ်ပြီး ညှစ်ရသည်’ ဆိုသကဲ့သို့ပင် ဖြစ်ပေ၏။

ချန်လန်ပင်လယ်ဒေသတွင် နတ်ဘုရားအသွင်ပြောင်းအဆင့် အရှင်သခင်မရှိသဖြင့် သဘာဝကျစွာပင် မိစ္ဆာမျိုးနွယ်စု၏ အဓိကတိုက်ခိုက်မည့် ပစ်မှတ် ဖြစ်လာခဲ့လေသည်။

၎င်းတို့သည် ချန်လန်ပင်လယ်ဒေသကို အရင်သိမ်းပိုက်ပြီးမှ တဖြည်းဖြည်းချင်း ကျင့်ကြံခြင်းလောက တစ်ခုလုံးကို ဝါးမြိုရန် ကြံစည်ထားကြသည်။

အမှန်တကယ်တွင် ရှေးဟောင်းခေတ်ကာလကလည်း ချန်လန်ပင်လယ်ဒေသသည် ရှေးဟောင်းမိစ္ဆာကမ္ဘာမှ အဓိကတိုက်ခိုက်သော နေရာဖြစ်ခဲ့ဖူးသည်။

ပထမအချက်မှာ ဤနေရာတွင် လူဦးရေနည်းပါးပြီး လူသားမျိုးနွယ်စုက အဓိကအာရုံစိုက်သော နေရာမဟုတ်ပေ။

ဒုတိယအချက်မှာ ဤနေရာတွင် မိစ္ဆာသားရဲများ များပြားပြီး မိစ္ဆာကျင့်ကြံသူများအတွက် နိဗ္ဗာန်ဘုံဖြစ်နေသည်။

ထို့အပြင် ဤနေရာတွင် အရင်းအမြစ်များ ပေါကြွယ်ဝသဖြင့်၊ သဘာဝကျစွာပင် မိစ္ဆာမျိုးနွယ်စု၏ ပထမဦးစားပေး ရွေးချယ်စရာ ဖြစ်လာခဲ့ခြင်း ဖြစ်ပေသည်။

ချန်လန်ပင်လယ်ဒေသကို အောင်မြင်စွာသိမ်းပိုက်နိုင်သည်နှင့် မိစ္ဆာမျိုးနွယ်စုသည် တိုက်စစ်အတွက်ဖြစ်စေ၊ ခံစစ်အတွက်ဖြစ်စေ လိုသလို အသုံးချသွားနိုင်ပေမည်။

ထိုအကြောင်းရင်းကြောင့်ပင် ရှေးဟောင်းခေတ်ကာလက ချန်လန်ပင်လယ်ဒေသသည် အလွန်ဆိုးရွားစွာ ပျက်စီးခဲ့ရပြီး၊ အဓိကစစ်မြေပြင်များထဲမှ တစ်ခုဖြစ်ခဲ့ကာ ပဉ္စမအဆင့်ဝိညာဉ်သွေးကြော အများအပြား ပျောက်ကွယ်ခဲ့ရခြင်း ဖြစ်ပေသည်။

ယခု ကမ္ဘာနှစ်ခု ပေါင်းစပ်ခြင်းဖြစ်စဉ် ထပ်မံပေါ်ပေါက်လာသောအခါ ၎င်းတို့သည် လမ်းဟောင်းအတိုင်း ချန်လန်ပင်လယ်ဒေသသို့ ရောက်လာကြခြင်း ဖြစ်၏။

"အကြီးအကဲဝူဝေ... ကျုပ်တို့ ပေါ့ဆလို့တော့ မဖြစ်သေးဘူး..."

"ကျုပ်တို့ရဲ့ မိစ္ဆာအင်အားက များတယ်ဆိုပေမယ့် လူသားတွေကလည်း လွယ်လွယ်နဲ့ ထိပါးလို့ရတာ မဟုတ်ဘူး..."

"ဒီတစ်ခါ သူတို့က 'ကောင်းကင်အဆင့် ဝိညာဉ်ရတနာ' ကို ထုတ်သုံးဖို့ ကြံစည်ထားတယ်လို့ ကြားတယ်..."

"တကယ်လို့ အဲဒီ လူသားကျင့်ကြံသူတွေကသာ အသက်စွန့်ပြီး တိုက်ခိုက်လာရင်... နတ်ဘုရားအသွင်ပြောင်းအဆင့် စွမ်းအားမျိုး ထွက်ပေါ်လာနိုင်တယ်..."

"အဲဒီအချိန်ကျရင် ကျုပ်တို့ စတုတ္ထအဆင့် မိစ္ဆာကျင့်ကြံသူတွေ ဘယ်လောက်များများ အလကား ဖြစ်သွားလိမ့်မယ်..."

ထိုစတုတ္ထအဆင့် မိစ္ဆာကျင့်ကြံသူသည် ဤအချက်ကို အလွန်ပင် စိုးရိမ်နေဆဲ ဖြစ်သည်။

မည်သို့ပင်ဖြစ်စေ 'ကောင်းကင်အဆင့် ဝိညာဉ်ရတနာ'၏ ဂုဏ်သတင်းသည် ရှေးဟောင်းမိစ္ဆာကမ္ဘာတွင်လည်း အလွန်ကျော်ကြားလှပြီး၊ နတ်ဘုရားအသွင်ပြောင်းအဆင့် အရှင်သခင်များသာ ပိုင်ဆိုင်ခွင့် ရှိကြပေသည်။

အခြားသော မိစ္ဆာကျင့်ကြံသူများမှာ မြင်တွေ့ခွင့်ရရန်ပင် ခက်ခဲလှပေ၏။ အရေအတွက်မှာလည်း အလွန်ရှားပါးပြီး လက်ဆယ်ချောင်းပင် မပြည့်ချေ။

'ကောင်းကင်အဆင့် ဝိညာဉ်ရတနာ'၏ တန်ဖိုးကြီးမားပုံကို မှန်းဆကြည့်နိုင်ပေသည်။

"ဟုတ်တယ်... ဟုတ်တယ်... အရင်တုန်းက ကြယ်သုံးပွင့်ကျွန်းစုမှာ မိုးကြိုးသိမ်းငှက်မျိုးနွယ်စုက ရွှမ်ဟွမ်ဂိုဏ်းရဲ့ ဂိုဏ်းချုပ်နဲ့ တိုးခဲ့ရတယ်မလား..."

"ရလဒ်ကတော့ ရွှမ်ဟွမ်ဂိုဏ်းဂိုဏ်းချုပ်က 'ကောင်းကင်အဆင့် ဝိညာဉ်ရတနာ' ကို ကိုင်စွဲပြီး စတုတ္ထအဆင့် မိစ္ဆာကျင့်ကြံသူရာချီကို သတ်ဖြတ်ပစ်ခဲ့တယ်..."

"မိုးကြိုးသိမ်းငှက်မျိုးနွယ်စုကို အကြီးအကျယ် အထိနာသွားစေခဲ့တယ်... ဒီကိစ္စကို မပြင်ဆင်ထားလို့တော့ မဖြစ်ဘူး..."

မိစ္ဆာကျင့်ကြံသူ အများအပြားမှာ ဆွေးနွေးငြင်းခုံနေကြတော့သည်။

၎င်းတို့သည် မိုးကြိုးသိမ်းငှက်မျိုးနွယ်စု၏ ကံဆိုးမိုးမှောင်ကျမှုကို သဘောကျနေကြသော်လည်း၊ ဤသည်မှာ သင်ခန်းစာယူစရာလည်း ဖြစ်နေချေသည်။

ဤကိစ္စကြောင့်ပင် ၎င်းတို့၏တိုက်စစ်အရှိန်မှာ လျော့ကျသွားခဲ့ရပြီး၊ မြို့သိမ်းတိုက်ပွဲများကို ယခင်ကကဲ့သို့ အသည်းအသန် မလုပ်ဆောင်တော့ဘဲ 'ရှေးဟောင်းမိစ္ဆာအသွင်ပြောင်းအစီအရင်' အပေါ်သာ အာရုံစိုက်လာကြခြင်း ဖြစ်၏။

"ဟဟ... လူသားတွေမှာ 'ကောင်းကင်အဆင့် ဝိညာဉ်ရတနာ' ရှိတယ်ဆိုရင်... ငါတို့မိစ္ဆာမျိုးနွယ်မှာရော မရှိလို့လား..."

"ဒီတစ်ခါ စီမံကိန်းကို အမှားအယွင်း မရှိစေဖို့အတွက်… မျိုးနွယ်စုခေါင်းဆောင်က ငါ့ကို 'ကောင်းကင်အဆင့် ဝိညာဉ်ရတနာ' တစ်ခု ငှားပေးလိုက်တယ်..."

"တကယ်လို့ လူသားကျင့်ကြံသူတွေ ငါ့ရဲ့ ကျောင်းလုံမြို့တော်ကို လာရဲရင် သေချာပေါက် သေလမ်းပဲရှိတယ်..."

"ဒါပေမဲ့ ဒါလည်း ကိစ္စကောင်းပဲ... လူသားဝိညာဉ်သန္ဓေသားအုပ်စုကို တစ်ခါတည်း အကုန်ဖမ်းလို့ ရသွားတာပေါ့..."

"ဒီလိုဆိုရင် ချန်လန်ပင်လယ်ဒေသက ငါတို့မိစ္ဆာမျိုးနွယ်ပိုင် လုံးဝဖြစ်သွားပြီးတော့… ဘယ်သူမှ ငါတို့ကို တားဆီးနိုင်တော့မှာ မဟုတ်ဘူး..."

ကျောင်းဝူဝေ၏ မျက်လုံးများတွင် အေးစက်သော အလင်းရောင်တစ်ချက် လက်သွားလေသည်။

၎င်းသည်လည်း အရူးမဟုတ်ပေ၊ သဘာဝကျစွာ ကြိုတင်ပြင်ဆင်မှုများ ပြုလုပ်ထားပေသည်။

လူသားတို့၏ 'ကောင်းကင်အဆင့် ဝိညာဉ်ရတနာ' ကို ယှဉ်ပြိုင်ရန်အတွက် ၎င်းသည်လည်း ကျောင်းလုံမျိုးနွယ်စုခေါင်းဆောင်၏ 'ကောင်းကင်အဆင့် ဝိညာဉ်ရတနာ' ကို ငှားရမ်းထားခဲ့ချေသည်။

ဤသို့ဆိုလျှင် လူသားတို့၏ အားသာချက်မှာ ပျောက်ကွယ်သွားပြီ ဖြစ်၏။

"ဒီလိုဆိုရင်... ငါတို့က လူသားဝိညာဉ်သန္ဓေသားတွေရဲ့ တိုက်ခိုက်မှုကို တားဆီးဖို့ မလိုရုံတင်မကဘူး..."

"ဆန့်ကျင်ဘက်အနေနဲ့ သူတို့ကို လာတိုက်ဖို့တောင် အားပေးရဦးမယ်..."

"မဟုတ်လို့… ငါတို့က အင်အားအရမ်းကြီးသလို နေပြနေရင် သူတို့တွေ ကြောက်ပြီး ထွက်ပြေးကုန်လိမ့်မယ်..."

စတုတ္ထအဆင့် မိစ္ဆာကျင့်ကြံသူတစ်ဦးက ပြောလိုက်သည်။

၎င်း၏မျက်လုံးများမှာ တောက်ပနေပြီး ယုတ်မာကောက်ကျစ်သော အကြံအစည်များ ပေါ်ထွက်နေပုံရကာ၊ ဤသည်မှာ လူသားဝိညာဉ်သန္ဓေသားများကို အကုန်အစင် သုတ်သင်ရှင်းလင်းနိုင်မည့် အခွင့်ကောင်းတစ်ခုဟု ယူဆနေလေသည်။

အကယ်၍ လူသားများတွင် ဝိညာဉ်သန္ဓေသားကျင့်ကြံသူများ၏ ကာကွယ်မှုသာ မရှိတော့ပါက၊ ၎င်းတို့အနေဖြင့် လူသားမျိုးနွယ်စုကို ဖျက်ဆီးပစ်ရန်မှာ လက်ဖဝါးလှန်သကဲ့သို့ လွယ်ကူသွားပေလိမ့်မည်။

"ခေါင်းစားနေစရာ မလိုပါဘူး... ဘာလို့လဲဆိုတော့ ဒါက ပေါ်တင်လုပ်တဲ့ လှည့်ကွက်မို့လို့ပဲ..."

"တကယ်လို့ သူတို့ ကျောင်းလုံမြို့တော်ကို လာမတိုက်ရင်... ငါတို့ရဲ့ 'ရှေးဟောင်းမိစ္ဆာအသွင်ပြောင်းအစီအရင်' အောင်မြင်သွားတဲ့အခါ သူတို့ သေရမှာပဲ... အဲဒါက နှေးကွေးတဲ့သေဆုံးခြင်းပဲ... ပြန်လမ်းမရှိတဲ့ သေဆုံးခြင်းမျိုး..."

"ဒါကြောင့် သူတို့ ဘယ်လိုပဲ ရွေးချယ်ပါစေ... ငါတို့နဲ့ မဖြစ်မနေ အသေခံပြီး တိုက်ခိုက်ရလိမ့်မယ်..."

ကျောင်းဝူဝေက အေးစက်စွာ ရယ်မောလိုက်သည်။

ထင်ရှားသည်မှာ ဤတစ်ကြိမ် မိစ္ဆာမျိုးနွယ်စု၏ စီမံကိန်းသည် လူသားများကို တမင်ဖိအားပေးနေခြင်း ဖြစ်ပြီး၊ လူသားဝိညာဉ်သန္ဓေသား ကျင့်ကြံသူအားလုံးကို အပြင်ထွက်လာစေရန် ဆွဲဆောင်ကာ တစ်ခါတည်း အကုန်လုံးကို ဖမ်းဆီးသတ်ဖြတ်လိုခြင်း ဖြစ်ပေသည်။

လူသားများအနေဖြင့် မတိုက်ခိုက်ချင်လျှင်ပင် မရဟု ဆိုနိုင်၏။ သို့မဟုတ်ပါက နှေးကွေးသောသေဆုံးခြင်းသာ ဖြစ်ရပေလိမ့်မည်။

အခြေခံအားဖြင့် ၎င်းတို့သည် အသင့်စောင့်ဆိုင်းနေရုံဖြင့် ရှုံးနိမ့်နိုင်ခြေမရှိသော နေရာတွင် ရပ်တည်နေကြပြီး ဖြစ်ပေသည်။

"ဒါနဲ့... မင်းတို့ အစီအရင်ပစ္စည်းတွေကို အချိန်မီ စုဆောင်းကြ..."

"အခုဆိုရင် ရှေးဟောင်းမိစ္ဆာကမ္ဘာကနေ အရင်းအမြစ်တွေ ယူစရာ မလိုတော့ဘူး... ဒီကမ္ဘာက ပစ္စည်းတွေကိုပဲ တိုက်ရိုက်ယူသုံးလိုက်..."

"တကယ်လို့ အဲဒီလူသားတွေက ပြန်ခုခံရဲရင် ချက်ချင်း သတ်ပစ်လိုက်..."

"ဒီအတိုင်း ဆက်စောင့်နေလို့ မဖြစ်တော့ဘူး... ငါတို့ရဲ့ စွမ်းဆောင်ရည်ကို မြှင့်တင်ဖို့ လိုတယ်..."

ကျောင်းဝူဝေသည် မိစ္ဆာကျင့်ကြံသူအများအပြားကို ကြည့်လိုက်တော့သည်။

"ကောင်းပါပြီ အရှင်ဝူဝေ..."

မိစ္ဆာကျင့်ကြံသူအများအပြားသည် ခေါင်းညိတ်လိုက်ကြပြီး ချက်ချင်းပင် အမိန့်နာခံလိုက်ကြတော့သည်။