ကောင်းကင်ကို စီရင်၊ မြေပြင်ကို ချေမှုန်း၊ မိစ္ဆာနတ်ဆိုးအပေါင်းအား သုတ်သင်ခြင်း။ သက်ရှိအားလုံး၏ သတ်ဖြတ်လိုစိတ်ကို စုစည်းထားသော ဓားတစ်လက်(၅)။

သူမ တစ်ခုခု ပြောချင်နေသေးသည်။

သို့သော် နောက်တစ်စက္ကန့်တွင် သူမ လက်ထဲရှိ ချင်းဟယ်ဓားသည် ရုတ်တရက် တုန်ခါလာပြီး ဓားမြည်သံများ ထွက်ပေါ်လာကာ တဝီဝီ မြည်ဟီးနေသည်ကို တွေ့ရှိလိုက်ရပေသည်။

အမှန်တကယ်တွင် ယဲ့ဖေးရို၏ ဝိညာဉ်ဓားသာ တုန်ခါနေခြင်း၊ ပဲ့တင်ထပ်နေခြင်း မဟုတ်ပေ။

မြူနှင်းနန်းတော်မှ အမျိုးသမီးကျင့်ကြံသူ အများအပြား၏ ကိုယ်ပေါ်ရှိ ဓားလက်နက်များသည်လည်း ဤအချိန်တွင် ပဲ့တင်ထပ်နေပြီး တဝီဝီ မြည်ဟီးနေကြချေသည်။

ဓားပျံတိုင်းသည် ပျော်ရွှင်စွာ ကခုန်နေသကဲ့သို့ပင် ရှိပေသည်။

ဤကြောက်မက်ဖွယ် ဓားအလိုဆန္ဒသည် မိုင်တစ်ထောင်ပတ်လည်ရှိ ဓားပျံများကို တုန်ခါသွားစေခဲ့ခြင်း ဖြစ်ပေသည်။

"ဓားလက်နက် ပဲ့တင်ထပ်ခြင်း... ဒါ… ဒါက ဘယ်လို ဓားအလိုဆန္ဒမျိုးလဲ..."

ယဲ့ဖေးရို၏ မျက်လုံးအိမ်များ ကျဉ်းမြောင်းသွားရတော့သည်။

သူမသည် ဓားသိုင်းသမား ဖြစ်သည့်အားလျော်စွာ ဓားလက်နက် ပဲ့တင်ထပ်ခြင်းသည် မည်မျှ အံ့သြဖွယ်ကောင်းသော ကိစ္စဖြစ်ကြောင်း သိထားပေသည်။

ဓားသိုင်းအလိုဆန္ဒသည် ဓားတစ်သောင်းကို စိုးမိုးနိုင်သည့်အဆင့်သို့ ရောက်ရှိမှသာ ဓားလက်နက် ပဲ့တင်ထပ်ခြင်းကို ဖြစ်ပေါ်စေပြီး ဓားတစ်သောင်း ဦးညွှတ်စေနိုင်၏။

ကောင်းကင်ဓားဂိုဏ်း၏ ဓားသိုင်းသမားများပင်လျှင် ဤအဆင့်သို့ ရောက်ရှိနိုင်သူမှာ အလွန်ပင် ရှားပါးလှပေသည်။

သို့သော် ယခုမူ သူမသည် ဤအမည်မဲ့တာအိုရောင်းရင်း၏ ကိုယ်ပေါ်တွင် ဤကဲ့သို့သော မြင်ကွင်းကို မြင်တွေ့လိုက်ရခြင်း ဖြစ်ပေ၏။

ဤအချိန်တွင် သူမသည် ဤအမည်မဲ့တာအိုရောင်းရင်းကို အမှန်တကယ် လျှော့တွက်မိကြောင်း ချက်ချင်းပင် နားလည်လိုက်ရချေသည်။

တစ်ဖက်လူ၏ စကားများသည် မောက်မာသောစကားများ မဟုတ်တန်ရာပေ။

"နောက်ထပ် လူသားဓားသိုင်းသမား တစ်ယောက်လား..."

"တကယ့်ကို ဟာသပဲ... လူသား ဓားသိုင်းသမားတွေက ငါ့ရဲ့ မြေကမ္ဘာသံလိုက် စွမ်းအားရှေ့မှာ အမှိုက်တွေပဲဆိုတာ မင်း မသိဘူးလား..."

"ကိုယ့်သေတွင်း ကိုယ်တူးနေတာပဲ..."

ကျောင်းရှိချီက အေးစက်စွာ ရယ်မောလိုက်သည်။

၎င်းသည် မျက်စိရှေ့မှောက်ရှိ လူသားကျင့်ကြံသူ၏ ကိုယ်ပေါ်မှ ပျံ့နှံ့လာသော ကြောက်မက်ဖွယ်ဓားအလိုဆန္ဒကို ခံစားလိုက်ရသော်လည်း လုံးဝ အရေးမစိုက်ပေ။ ၎င်း၏ သွေးမျိုးဆက်နတ်ဘုရားစွမ်းရည် ရှေ့မှောက်တွင် အမှိုက်စတစ်ခုသာ ဖြစ်နေဆဲပင် မဟုတ်ပါလော။

သေချပေါက် သူ၏ပြိုင်ဘက် ဖြစ်လာနိုင်မည် မဟုတ်ပေ။

"မြေကမ္ဘာသံလိုက် စွမ်းအားက တကယ်ကို အစွမ်းထက်ပါတယ်... ငါလည်း အသိအမှတ်ပြုပါတယ်..."

"ဒါပေမဲ့ အခုအချိန်မှာ ငါ့အတွက်တော့ မခုတ်ပိုင်းနိုင်တဲ့အရာဆိုတာ မရှိဘူး..."

ကျိုးစွေ့က တည်ငြိမ်စွာ ပြောလိုက်သည်။

သူသည် ဟန်ဆောင်နေခြင်းမဟုတ်ဘဲ အမှန်တကယ် ထိုကဲ့သို့ ခံစားနေရခြင်း ဖြစ်ပေသည်။

အကြောင်းမှာ သူသည် 'ကျူးရှန်းဓားသိုင်း' ကို လည်ပတ်လိုက်သောအခါ ကောင်းကင်နှင့် မြေကြီးကြားရှိ အဆုံးမဲ့သော သတ်ဖြတ်လိုစိတ်၊ အာဃာတ၊ ဒေါသ စသည့် ပုံသဏ္ဌာန်မဲ့စွမ်းအားများသည် သူ့ဝိညာဉ်၏ နက်ရှိုင်းသောနေရာသို့ ဝင်ရောက်လာကြ၏။

ထို့နောက် နေရာတိုင်းတွင် ရှိနေသော စိတ်ခံစားမှုစွမ်းအားများကို သန့်စင်လိုက်ပြီး သန့်စင်သော သတ်ဖြတ်လိုစိတ်အဖြစ် ပြောင်းလဲလိုက်ပေသည်။

[ ကောင်းကင်လော… ငါစီရင်မည်၊ မြေပြင်လော… ငါချေမှုန်းမည်၊ မိစ္ဆာနတ်ဆိုးလော… ငါသုတ်သင်မည်။ ]

[ ငါ မသတ်ဖြတ်နိုင်သော အရာဟူ၍ မရှိ။ ]

ဤ စိတ်ခံစားမှုစွမ်းအားများသည် သေဆုံးသွားသောလူသားများထံမှ လာခြင်းဖြစ်ကြောင်း သူ သိခံစားရသည်။

ဤသာမန်လူသားများသည် မိမိ၏ စွမ်းအားမဲ့မှုကို မုန်းတီးကြသည်၊ မိစ္ဆာသားရဲများ၏ရက်စက်မှုကို မုန်းတီးကြသည်၊ ကောင်းကင်နှင့် မြေကြီး၏ မတရားမှုကို မုန်းတီးကြပေသည်။

သေဆုံးသွားလျှင်တောင်မှ ဤအာဃာတများသည် ပျောက်ကွယ်မသွားဘဲ ဤကျွန်းပေါ်တွင် ဆက်လက် လည်ပတ်နေကြသည်။

ဤကဲ့သို့သော စွမ်းအားကို သာမန်ကျင့်ကြံသူများ အာရုံမခံနိုင်သလို၊ သတိမပြုမိနိုင်ကြသော်လည်း၊ 'ကျူးရှန်းဓားသိုင်း' ကို ကျင့်ကြံထားသောသူအနေဖြင့် ပထမဆုံးအကြိမ်၌ပင် ဤအချက်ကို အာရုံခံမိလိုက်ခြင်း ဖြစ်ပေသည်။

ဤသာမန်လူသားများ၏ သေဆုံးမှုကို မြင်တွေ့ရသောအခါ၊ သူ အဘယ်ကြောင့် ဤမျှ ဒေါသထွက်ခဲ့ရသနည်း။

ဤအာဃာတများ၏ လွှမ်းမိုးမှုကြောင့်ပင် ဖြစ်ပေသည်။

ဤသာမန်လူသားများသည် ကောင်းကင်နှင့် မြေကြီး၏ မတရားမှုကို မုန်းတီးကြသည်၊ ကံကြမ္မာ၏ ဆိုးရွားမှုကို မုန်းတီးကြသည်၊ ကိုယ်တိုင် အသုံးမကျမှုကို မုန်းတီးကြသည်၊ မိစ္ဆာမျိုးနွယ်၏ ရက်စက်မှုကို မုန်းတီးကြသည်။

ဤအာဃာတများနှင့် သတ်ဖြတ်လိုစိတ်များကို စုပ်ယူပြီးနောက်၊ သူသည် 'ကျူးရှန်းဓားသိုင်း' အပေါ် နားလည်သဘောပေါက်မှုမှာ ပိုမို၍ မြင့်မားလာသည်ကို ခံစားလိုက်ရပေသည်။

တစ်ခဏအတွင်းမှာပင် သူသည် 'ကျူးရှန်းဓားသိုင်း' ၏ ဒုတိယပုံစံဖြစ်သော 'သတ်ဖြတ်ခြင်းဓားအလင်း' ကို ထိုးထွင်းသိမြင်သွားခဲ့လေသည်။

"ရှေးဟောင်းခေတ်တုန်းက နတ်ဆိုးသတ်ဂိုဏ်း ကျင့်ကြံသူတွေရဲ့ တိုးတက်မှုနှုန်း ဘာလို့ ဒီလောက် မြန်ဆန်ရတာလဲဆိုတာ အံ့သြစရာ မဟုတ်တော့ဘူး..."

"တိုက်ပွဲမြေပြင်ထဲမှာ 'ကျူးရှန်းဓားသိုင်း' ကို ကျင့်ကြံရင် တကယ့်ကို အရှိန်အဟုန်နဲ့ တိုးတက်မှာပဲ..."

"ဒါက သက်ရှိတွေရဲ့ ဆန္ဒကို စုပ်ယူပြီး ကြီးထွားလာစေတဲ့ အထွတ်အထိပ်ဓားကျင့်စဉ်ပဲ..."

ကျိုးစွေ့သည် ဤ 'ကျူးရှန်းဓားသိုင်း' ၏ ကြမ်းတမ်းမှုနှင့် ကြောက်မက်ဖွယ်ကောင်းမှုကို ဝိုးတဝါး အာရုံခံမိလိုက်ပေသည်။

သေချာပေါက် မိစ္ဆာလမ်းစဉ် ဓားသိုင်းတစ်ခုဖြစ်ပြီး အလွန်ပင် ထူးခြားဆန်းကြယ်သလို စွမ်းအားကြီးမားကာ စိတ်ကူးယဉ်နိုင်စွမ်းထက်ပင် ကျော်လွန်နေလေ၏။

ဤဓားသိုင်းသည် အကာအကွယ်အားလုံးကို စွန့်လွှတ်ထားပြီး အဆုံးစွန်သော တိုက်ခိုက်မှုကိုသာ ဦးတည်ပေသည်။

ထို့ကြောင့် ၎င်းတွင် မည်သည့် ဟန်ရေးပြမှုမျှ မရှိဘဲ တိုက်ရိုက်ဆန်ပေသည်။

မည်သို့သော ရန်သူနှင့် ရင်ဆိုင်ရသည်ဖြစ်စေ ဓားတစ်ချက်သာ ရှိပေသည်။

အကယ်၍ ဤဓားတစ်ချက်ဖြင့် ရန်သူကို မသတ်နိုင်ပါက၊ သေရမည့်သူမှာ မိမိကိုယ်တိုင်ပင် ဖြစ်ပေလိမ့်မည်။

"'ကျူးရှန်းဓားသိုင်း' ဒုတိယပုံစံ 'သတ်ဖြတ်ခြင်းဓားအလင်း'၊ သူက သက်ရှိတွေရဲ့ သတ်ဖြတ်လိုစိတ်ကို စုစည်းပြီး အသန်မာဆုံး ဓားတစ်ချက်ကို ထုတ်ဖော်နိုင်တယ်..."

"စုပ်ယူထားတဲ့ သတ်ဖြတ်လိုစိတ် များလေလေ ဒီဓားချက်ရဲ့ စွမ်းအားက ပိုပြီးကြောက်မက်ဖွယ် ကောင်းလေလေပဲ..."

"ဒါက သက်ရှိတွေရဲ့ဆန္ဒကို ကိုယ်စားပြုပြီး ပြစ်ဒဏ်ခတ်တဲ့ ဓားတစ်ချက်၊ စီရင်ဆုံးဖြတ်တဲ့ ဓားတစ်ချက်ပဲ..."

"လူအများရဲ့ စွပ်စွဲပြစ်တင်မှုကို ခံရရင် ရောဂါမရှိလည်း သေဆုံးတတ်တယ် ဆိုသလိုပဲ..."

"ဒါပေမဲ့ ဒါကလည်း ကျင့်ကြံသူအနေနဲ့က ဒီသတ်ဖြတ်ခြင်းဆန္ဒကို ထိန်းချုပ်နိုင်ဖို့ လိုအပ်တယ်..."

"တကယ်လို့ မထိန်းချုပ်နိုင်ရင် ကိုယ့်ကိုယ်ကိုယ် ပြန်လည်တိုက်ခိုက်မိပြီး ဓားကျိုးလူသေ ဖြစ်သွားလိမ့်မယ်..."

"တကယ်လို့ ထိန်းချုပ်နိုင်ရင်တော့ နတ်ဘုရားက လာတားရင် နတ်ဘုရားကို သတ်မယ်၊ ဘုရားက လာတားရင် ဘုရားကို သတ်မယ်၊ မသတ်ဖြတ်နိုင်တဲ့အရာဆိုတာ မရှိဘူး..."

"သံသယဖြစ်စရာမရှိ… တကယ်လို့ ကုဋေပေါင်းများစွာသော သက်ရှိတွေရဲ့ သတ်ဖြတ်လိုစိတ်ကိုသာ စုစည်းနိုင်မယ်ဆိုရင် အင်မော်တယ်ကိုတောင် တကယ် သတ်ဖြတ်နိုင်လောက်တယ်..."

ကျိုးစွေ့သည် အလွန် တည်ငြိမ်နေလေသည်။

သူ့လက်ထဲရှိ ဓားပျံသည် သတ်ဖြတ်လိုစိတ်များကို ပိုမို စုပ်ယူနေသော်လည်း သူ၏ဝိညာဉ်စွမ်းအားသည်ကား အတော်အတန် သန်မာသောကြောင့် လွယ်ကူစွာ ထိန်းချုပ်နိုင်ဆဲဖြစ်ပြီး၊ သတ်ဖြတ်လိုစိတ်များ အလွန်အကျံ့ လွတ်ထွက်သွားပြီး ကိုယ့်ကိုယ်ကိုယ် ပြန်လည် ဒုက္ခပေးမည့်အခြေအနေမျိုး မရောက်ရှိသေးပေ။

ဤအချိန်တွင် သူသည် ထိုသေဆုံးသွားသော ဝိညာဉ်များ၏ အသံများကို ကြားလိုက်ရသကဲ့သို့ ရှိပေသည်။

[ ငါ မုန်းတယ်... ဒီမိစ္ဆာသားရဲတွေက ငါ့ဇနီး၊ သားသမီး၊ မိဘတွေကို သတ်ဖြတ်သွားတယ်... ငါ့ရဲ့အရာအားလုံးကို ဖျက်ဆီးပစ်တယ်... ငါ့တစ်မိသားစုလုံးကို သတ်တယ်... ငါ့အိမ်ကို ဖျက်ဆီးတယ်... ငါ့မိသားစုရဲ့ သွေးသားတွေကို စားသောက်တယ်... ဒီအမုန်းတရားက ကောင်းကင်နဲ့ မြေကြီး မပြိုသရွေ့ ပျောက်ကွယ်မှာ မဟုတ်ဘူး... ဒီမိစ္ဆာသားရဲတွေကို သေစေချင်တယ်... ]

[ တကယ်လို့ ဒီမိစ္ဆာသားရဲတွေ မျိုးမသုဉ်းရင်... ငါတို့ သေသွားရင်တောင် မျက်လုံးမှိတ်နိုင်မှာ မဟုတ်ဘူး...]

[ တကယ်လို့ ငါတို့ရဲ့ သတ်ဖြတ်လိုစိတ်က သင့်ကို ကူညီပြီး မိစ္ဆာသားရဲတွေကို သတ်ဖြတ်ပေးနိုင်မယ်ဆိုရင်... ငါတို့ အရာအားလုံး ပေးဆပ်ဖို့ ဝန်မလေးဘူး... ]

[မိစ္ဆာတွေကို သတ်... မိစ္ဆာတွေကို သတ်... မိစ္ဆာတွေကို သတ်... ]

ဝိညာဉ်တွေ၏ အသံများ ထွက်ပေါ်လာပြီး ဝိညာဉ်ကုဋေပေါင်းများစွာက တစ်ပြိုင်နက်တည်း အော်ဟစ်နေသကဲ့သို့ ရှိနေပေသည်။

၎င်းတို့သည် 'ကျူးရှန်းဓားသိုင်း' ၏ စွမ်းအားကို အာရုံခံမိလိုက်ပြီး မျှော်လင့်ချက်ကို မြင်တွေ့လိုက်ရသကဲ့သို့ သူ၏ဓားပျံထဲသို့ အသီးသီး ဝင်ရောက်သွားကြ၏။

ဤအချက်က သူ၏ကိုယ်ပေါ်ရှိ ဓားပျံကို သတ်ဖြတ်လိုစိတ်များ ပိုမို စုဝေးလာစေခဲ့သည်။

ကျွန်းတစ်ကျွန်းလုံး၏ သတ်ဖြတ်လိုစိတ်များအားလုံးမှာ ကျိုးစွေ့၏ ကိုယ်ပေါ်တွင် စုဝေးနေသကဲ့သို့ပင် ဖြစ်ပေသည်။

ဝုန်း...

ပုံသဏ္ဌာန်မဲ့သော သတ်ဖြတ်လိုစိတ်နှင့် ဓားအလိုဆန္ဒသည် ကောင်းကင်ယံကို တိုက်ရိုက်စုတ်ဖြဲပစ်လိုက်ပြီး၊ တိမ်တိုက်များကို ထိုးဖောက်သွားကာ ကျွန်းတစ်ကျွန်းလုံးကို လွှမ်းခြုံသွားရာ ကျွန်းပေါ်ရှိ မိစ္ဆာသားရဲတိုင်း ကျောချမ်းသွားကြလေတော့သည်။

၎င်းတို့၏ ခန္ဓာကိုယ်မှ အရှိန်အဝါများသည် ဤသတ်ဖြတ်လိုစိတ်၏ စောင့်ကြည့်ခြင်းကို ခံလိုက်ရသကဲ့သို့ ရှိပေသည်။

"သေစမ်း... ဒီလူသားကျင့်ကြံသူက နည်းနည်း ထူးဆန်းနေတယ်..."

စတုတ္ထအဆင့် မိစ္ဆာသားရဲအများအပြားမှာ အမွှေးအမျှင်များ ထောင်ထကုန်ကြတော့သည်။

၎င်းတို့သည် ဝိညာဉ်သန္ဓေသားအဆင့် သက်ရှိများ ဖြစ်ကြသည့်အားလျော်စွာ မျက်စိရှေ့မှောက်ရှိ ဤလူသား၏ ကိုယ်ပေါ်မှ ဝိညာဉ်သန္ဓေသားနယ်ပယ်ကို ကျော်လွန်သော စွမ်းအားတစ်ခု ပျံ့နှံ့လာနေကြောင်း၊ ကြောက်မက်ဖွယ်စွမ်းအားတစ်ခုက ဤလူ၏ ခန္ဓာကိုယ်ထဲတွင် စုစည်းနေကြောင်း ပင်ကိုအသိစိတ်ဖြင့် ခံစားမိလိုက်ကြပေသည်။

အကယ်၍သာ မတားဆီးပါက ၎င်းတို့အားလုံး ဤနေရာတွင် သေဆုံးသွားနိုင်ဖွယ် ရှိပေသည်။

ဤသည်မှာ စတုတ္ထအဆင့် မိစ္ဆာသားရဲများ၏ ဆဌမအာရုံပင် ဖြစ်ပေ၏။

ဝိုးတဝါး ဖြစ်သော်လည်း အလွန်ပင် စစ်မှန်လှပြီး အတွင်းစိတ်ဝိညာဉ်မှ ပေးပို့လာသော သတိပေးချက်တစ်ခုကဲ့သို့ပင် ဖြစ်ချေသည်။

"သေလိုက်တော့..."

မူလက ကျောင်းရှိချီ၏ မျက်နှာပေါ်တွင် လှောင်ပြောင်သော အရိပ်အယောင်များ ရှိနေသေးပြီး၊ ဤအားနည်းသော လူသားကျင့်ကြံသူက မည်သို့သောလှည့်ကွက်များ ထုတ်သုံးမည်ကို ကြည့်ချင်နေခဲ့ပေသည်။

၎င်း၏ အင်အားဖြင့်ဆိုလျှင် ဤလူသားကျင့်ကြံသူမှာ မည်သည့် နတ်ဘုရားစွမ်းရည်ကို ထုတ်သုံးသည်ဖြစ်စေ၊ ၎င်းအနေဖြင့် အေးဆေးစွာ ကိုင်တွယ်နိုင်မည်ဟု ယူဆခဲ့ချေသည်။

သို့သော် ယခုအခိုက်အတန့်တွင်မူ ၎င်းသည် သေခြင်းတရားနှင့် နီးကပ်သောအန္တရာယ်ကို ခံစားလိုက်ရပေသည်။

ဤလူသားကျင့်ကြံသူ ဓားထုတ်လိုက်သည်နှင့် သူ သေချာပေါက် သေဆုံးရတော့မည့်အလား ခံစားနေရသည်။

စွမ်းအားပေါင်း မြောက်မြားစွာသည် ဤလူ၏ ကိုယ်ပေါ်တွင် ပေါင်းစပ်နေသကဲ့သို့ပင် ဖြစ်ချေသည်။

အမှန်အတိုင်း ပြောရလျှင် ဤခံစားချက်မှာ မည်သို့မျှ ယုံကြည်နိုင်စရာ မရှိပေ။

ဝုန်း...

ထို့ကြောင့် ကျောင်းရှိချီသည် တွန့်ဆုတ်မနေတော့ဘဲ မြေကမ္ဘာသံလိုက် စွမ်းအားကို ထပ်မံ ထုတ်ဖော်လိုက်တော့သည်။

၎င်း၏ ခန္ဓာကိုယ်ပေါ်တွင် အမည်းရောင်အလင်းတန်းများ ပေါ်လာပြီး မရေမတွက်နိုင်သော သံလိုက်သင်္ကေတများသည် ၎င်းကိုယ်ပေါ်ရှိ အကြေးခွံများတွင် လက်ခနဲ ဖြစ်ပေါ်နေကာ ကြီးမားသော သံလိုက်အကာအရံ တစ်ခုအဖြစ် ပြောင်းလဲသွားပြီး မိုင်တစ်ထောင်ပတ်လည်ကို ဖုံးလွှမ်းသွားပေသည်။

ကြောက်မက်ဖွယ် ဆွဲငင်အားတစ်ခုသည် ကောင်းကင်မှ ကျဆင်းလာပြီး ဆွဲငင်အားနယ်ပယ်တစ်ခုကဲ့သို့ အရပ်မျက်နှာအားလုံးကို လွှမ်းခြုံသွားတော့သည်။

ဤပုံသဏ္ဌာန်မဲ့စွမ်းအားသည် ကျိုးစွေ့ထံသို့လည်း ပစ်ဝင်သွားပြီး ကျိုးစွေ့ကို ချက်ချင်းပင် အပိုင်းပိုင်းအစစ ဖြစ်သွားအောင် ဖိချေပစ်ရန် ကြံစည်လိုက်တော့သည်။

ရင်ထဲမှ ကြီးမားသော ဆူးအား ဖျက်ဆီးပစ်ရမည် မဟုတ်ပါလော။

ဤသည်မှာ ကျောင်းရှိချီ၏ အစွမ်းကုန် တိုက်ခိုက်မှုဖြစ်ပြီး ၎င်း၏ကိုယ်ပေါ်ရှိ စွမ်းအားအားလုံးကို အကုန်အစင် ထုတ်သုံးလိုက်ခြင်း ဖြစ်သည်ဟု ဆိုနိုင်ပေသည်။

ဤကဲ့သို့သော စွမ်းအားသည် ကျွန်းတစ်ကျွန်းကိုပင် နစ်မြုပ်သွားစေနိုင်သည့် စိတ်ကူးမယဉ်နိုင်သော ပျက်စီးမှုများကို ဖြစ်ပေါ်စေရန် လုံလောက်ပေတော့သည်။