လအင်မော်တယ်ဝိုင်က မည်သူ့ကိုမဆို နိုင်သည်

လော့ရှီး၏ ပြောပြချက်များအရ ထန်ထျန်းက ရှန်လင် (နတ်ဘုရားအလင်းတန်း) အခြေအနေကို အကြမ်းဖျင်း နားလည်သွားခဲ့သည်။

ရှင်းရှင်းပြောရလျှင် ၎င်းမှာ ဂိုဏ်းဝင်စ တပည့်များအတွက် ပေးအပ်သော ဆုလာဘ်တစ်ခုနှင့် တူလှသည်။

ရှန်လင် ဖြစ်စဉ်အတွင်း လူတစ်ယောက်ချင်းစီ၏ အခြေအနေပေါ် မူတည်ကာ မတူညီသော မြင်ကွင်းများကို မြင်တွေ့ရလိမ့်မည်။

ထိုမြင်ကွင်းများမှာ တစ်နည်းအားဖြင့် တပည့်တစ်ဦးချင်းစီ၏ ရှန်လင်မှ ရရှိမည့် အကျိုးကျေးဇူးများကို ကိုယ်စားပြုနေခြင်းပင်။

တပည့်များမှာ သူတို့ မြင်တွေ့ရသော မြင်ကွင်းကိုသာ မြင်နိုင်ပြီး အခြားသူများကမူ မသိနိုင်ကြပေ။

သို့သော်လည်း ရှန်လင် ဖြစ်စဉ်ပေါင်း ထောင်နှင့်ချီ ဖြစ်ပွားခဲ့ပြီးနောက် ထျန်းချီတောင်က တပည့်များ၏ ပြောပြချက်များအပေါ် အခြေခံကာ အဆင့်များကို ခွဲခြား သတ်မှတ်နိုင်ခဲ့သည်။

ပထမအဆင့်တွင် ပန်းမန်များ၊ မြက်ပင်များ သို့မဟုတ် တိရစ္ဆာန်များကို မြင်တွေ့ရတတ်သည်။ မြင်တွေ့ရပုံချင်း မတူညီကြသော်လည်း ဤဘောင်အတွင်း၌သာ ရှိတတ်ကြသည်။

ထိုအရာများကို မြင်တွေ့ရသော တပည့်များက မြင်တွေ့ရသည့် အရာပေါ် မူတည်ကာ အထူးစွမ်းရည် တစ်ခုခုကို ရရှိတတ်ကြသည်။

ထိုအထူးစွမ်းရည်မှာ အဆင့် အလွန်မြင့်မားသော လျှို့ဝှက်ကျင့်စဉ် တစ်ခုနှင့် တူလှသည်။

၎င်းအပြင် ကျင့်ကြံခြင်း အဆင့်ကိုလည်း သိသိသာသာ တိုးတက်စေသည်။

ဤသည်မှာပင် အတော်လေး အံ့အားသင့်စရာ ကောင်းလှသည်။

သို့သော် ဤသည်မှာ အကျိုးအမြတ် အနည်းဆုံး အဆင့်သာ ရှိသေးသည်။

ဒုတိယအဆင့်မှာမူ ပို၍ပင် အစွမ်းထက်လှသည်။

တပည့်များက သစ်တောများ၊ ပန်းခင်းများ၊ တိရစ္ဆာန်အုပ်စုများ သို့မဟုတ် လူနေအိမ်ခြေများကို မြင်တွေ့ရတတ်သည်။

ဤအဆင့်တွင် ရရှိမည့် အကျိုးကျေးဇူးမှာ ပထမအဆင့်ထက် ဆယ်ဆမက သာလွန်ပေသည်။

လော့ရှီး၏ ပြောပြချက်အရ ရှန်းယွမ်စင်မြင့် တပည့်အများစုမှာ ဤအဆင့်နှစ်ခုအတွင်း၌သာ ရှိကြသည်။

၎င်းတို့အထက်တွင်မူ ပို၍ အံ့မခန်းသော အဆင့်နှစ်ခု ရှိသေးသည်။

တတိယအဆင့်တွင်မူ တောင်တန်းကြီးများ၊ မြစ်ချောင်းအင်းအိုင်များ သို့မဟုတ် ကောင်းကင်ယံရှိ နိမိတ်ကောင်းသော တိမ်တိုက်များကို မြင်တွေ့ရမည် ဖြစ်သည်။

ဤအဆင့်သို့ ရောက်ရှိပါက လျှို့ဝှက်ကျင့်စဉ် ရရုံတင်မကဘဲ နိယာမ အော်ရာ များ၏ ဆေးကြောသန့်စင်မှုကို ခံယူရမည် ဖြစ်သည်။

ထို့ကြောင့် အင်မော်တယ်ဘုရင် အထက် လမ်းစဉ်ကို လျှောက်လှမ်းရာတွင် ပိုမို ချောမွေ့သွားမည် ဖြစ်ပြီး အင်မော်တယ်ဧကရာဇ် အဆင့်သို့ တက်လှမ်းရန်မှာလည်း မဖြစ်နိုင်တော့သည့် အရာမဟုတ်ပေ။

၎င်းအပြင် အဆင့်တက်ရန် နီးစပ်နေသော တပည့်များမှာ ထိုနေရာ၌ပင် အဆင့်တက်လှမ်းသွားနိုင်ကြသည်။

အင်မော်တယ်ဘုရင် အထက်အဆင့်များမှာ တက်လှမ်းရန် အလွန် ခက်ခဲလှသဖြင့် ရှန်လင်၏ အစွမ်းမှာ မည်မျှ ကြီးမားကြောင်း သိသာလှသည်။

သို့သော် စတုတ္ထအဆင့်နှင့် နှိုင်းယှဉ်လျှင်မူ ၎င်းမှာ ကလေးကစားစရာကဲ့သို့ ဖြစ်သွားရသည်။

စတုတ္ထအဆင့်တွင် တပည့်များက ကောင်းကင်ယံ၌ ပျံသန်းနေသော နဂါးများ၊ ကခုန်နေသော ဖီးနစ်ငှက်များကို မြင်တွေ့ရနိုင်သည်။

သို့မဟုတ် မူလ ဝိညာဉ်များ၊ ဝူရှင်း (ဒြပ်စင်ငါးပါး) နှင့် ပါးကွ များကို မြင်တွေ့ရတတ်ပြီး အချို့မှာမူ ကျယ်ပြောလှသော ကုန်းမြေကြီး တစ်ခုလုံးကိုပင် မြင်တွေ့ရတတ်သည်။

ထိုသူများသည် နိယာမစွမ်းအားများ တိုက်ရိုက် လောင်းချခြင်းကို ခံရမည်ဖြစ်ပြီး "နိယာမဝိညာဉ်ခန္ဓာ" တစ်ခုကို ပိုင်ဆိုင်လာကာ ဒန်တျန်အတွင်း၌ ရှိ နေမည် ဖြစ်သည်။

ထိုသို့သော ဝိညာဉ်ခန္ဓာ ကို ပိုင်ဆိုင်သူမှာ အင်မော်တယ်အရှင် အဆင့်သို့ ရောက်ရန် ရာနှုန်းပြည့် သေချာသွားသလို အင်မော်တယ်ဧကရာဇ် ဖြစ်လာရန် အခွင့်အရေးလည်း များစွာ မြင့်မားသွားသည်။

၎င်းအပြင် နိယာမဝိညာဉ်ခန္ဓာ ကို အသုံးပြုကာ နိယာမစွမ်းအားများ ပါဝင်သော အင်မော်တယ်ကျင့်စဉ် များကို အသုံးပြုနိုင်မည် ဖြစ်သည်။

အဆင့်တူ ကျင့်ကြံသူများကြားတွင် ၎င်းမှာ အခြားသူများကို ဖိနှိပ်နိုင်သော အစွမ်းပင် ဖြစ်သည်။

အချုပ်အားဖြင့်ဆိုရသော် အကယ်၍ သင်က စတုတ္ထအဆင့်သို့ ရောက်ရှိပါက ဂိုဏ်း၏ အထူးအလေးပေးခြင်းကို ခံရမည် ဖြစ်သည်။

နေတယ့်နေရာ မကောင်းဟု ခံစားရပါက တာဝန်ခံ အကြီးအကဲကိုယ်တိုင် လာရောက် လဲလှယ်ပေးမည် ဖြစ်ပြီး အခြားသော အခွင့်အရေးများကိုလည်း ဦးစားပေး ရရှိမည် ဖြစ်သည်။

၎င်းမှာ အပြင်ဘက်ရှိ ထိပ်တန်းတပည့်များကဲ့သို့ပင် ဖြစ်သည်။

အထက်ပါ အချက်များမှာ ရှန်လင်၏ အခြေအနေများပင် ဖြစ်သည်။

တကယ်တော့... ထူးခြားသော ဖြစ်ရပ်အချို့လည်း ရှိတတ်သည်။ အချို့သော တပည့်များက ရှန်လင်မှ ဆင်းသက်လာသော နိယာမများကို မတောင့်ခံနိုင်ဘဲ ပထမအဆင့်ကိုပင် မမှီလိုက်ကြပေ။

အချို့မှာမူ အဆင့်လေးဆင့်ထက် ကျော်လွန်သော အရာများကို မြင်တွေ့ရတတ်သည်။

သို့သော် ထိုသို့သော အခြေအနေမျိုးမှာ အလွန်ပင် ရှားပါးလှပြီး ဆယ်နှစ်မှ တစ်ကြိမ်ပင် မရှိတတ်ပေ။

ရှန်လင် ဖြစ်ပေါ်မည့် နေရာမှာ လော့ရှီး ခုနက ညွှန်ပြခဲ့သည့် တားမြစ် ရုပ်တု ပင် ဖြစ်သည်။

သူတို့က ရုပ်တု၏ ခြေကျင်းဝတ်နှင့် ခြေသလုံးများကို ကျော်ဖြတ်ကာ အထူးနေရာတစ်ခုသို့ သွားရောက်ပြီး ရှန်လင် ဖြစ်စဉ်ကို ခံယူရမည် ဖြစ်သည်။

အသေးစိတ်ကိုမူ ရောက်သည့်အခါမှ သိရပေလိမ့်မည်။

လော့ရှီး၏ ပြောပြချက်များကို နားထောင်ပြီးနောက် ထန်ထျန်းက စူးစမ်းလိုစိတ်ဖြင့် မေးလိုက်သည်။ "ဒါဆို အဲဒီတုန်းက မင်းက ဘာတွေကို မြင်ခဲ့တာလဲ"

"ပြောပြလို့ အဆင်ပြေမလား"

လော့ရှီးက ခေါင်းညိတ်ကာ "ဒါက ပြောပြလို့ မရစရာ ဘာရှိမှာလဲ၊ ထျန်းချီတောင်က လူတိုင်းနီးပါး သိကြတာပဲ"

"အဲဒီတုန်းက ကျွန်မက ဘာမှန်းမသိတဲ့ အလွှာပါးလေး တစ်ခုကို ဖြတ်ကျော်သွားပြီးတော့..."

" ကမ္ဘာကြီးရဲ့ တစ်စိတ်တစ်ပိုင်းကို မြင်ခဲ့ရတယ်"

ထန်ထျန်း ခဏတာ တိတ်ဆိတ်သွားရသည်။

စတုတ္ထအဆင့်မှသာ ကုန်းမြေတစ်ခုကို မြင်ရသည် မဟုတ်ပါလား။

ဤမိန်းကလေးကမူ ကမ္ဘာကြီး၏ တစ်စိတ်တစ်ပိုင်းကို မြင်ခဲ့သည်ဆိုလျှင် ၎င်းမှာ မည်သည့် အဆင့်နည်း။

ထန်ထျန်းက သူ၏ သံသယကို မေးမြန်းလိုက်သည်။

လော့ရှီးကလည်း ဖုံးကွယ်ထားခြင်း မရှိဘဲ "အကြီးအကဲတွေ ပြောပြချက်အရဆိုရင် ဒီလို အခြေအနေမျိုးက ထျန်းဖူနန်းတော် တစ်လျှောက်လုံးမှာ နှစ်ကြိမ်ပဲ ဖြစ်ဖူးသေးတယ်တဲ့"

"တစ်ကြိမ်က ကျွန်မ၊ နောက်တစ်ကြိမ်ကတော့ လွန်ခဲ့တဲ့ နှစ်ပေါင်း တစ်ရာကျော်က လုမင် ဆိုတဲ့ တစ်ယောက်ပဲ"

"ဟူး... သူက နှစ်တစ်ရာ စောမွေးသွားတာ နှမြောစရာပဲ၊ မဟုတ်ရင် သူ့ကို အသေသတ်ပြီး ဘယ်သူက အတော်ဆုံးလဲဆိုတာ ပြိုင်ကြည့်လို့ ရတာပေါ့"

သူမက နှမြောတသဟန်ဖြင့် ပြောလိုက်သည်။

ထန်ထျန်း တိတ်ဆိတ်သွားမိသည်။ မင်းက နှစ်တစ်ရာ နောက်ကျမှ မွေးလာလို့ပါလား၊ ဘာကြောင့် ဒီလောက် မာနကြီးနေရတာလဲ။

သို့သော် လော့ရှီးတွင် မာနကြီးထိုက်သည့် အစွမ်း ရှိပေသည်။

သမိုင်းတစ်လျှောက်တွင် နှစ်ဦးတည်းသာ ရှိခဲ့ ခြင်းက လက်ရှိ ရေနှင့်သစ်သား လျှိုမြောင် တစ်ခုလုံးကို အထင်သေးရန် လုံလောက်လှသည်။

လုမင်သည် ထိုစဉ်က ရွယ်တူများကြားတွင် အထွတ်အထိပ်သို့ ရောက်ခဲ့ပြီး ရှင်းဟယ်အင်မော်တယ်ဧကရာဇ် ကိုပင် ဖိနှိပ်ထားနိုင်ခဲ့သည်။

အကယ်၍ သူသာ တားမြစ်ချက်များကို မချိုးဖောက်ခဲ့ပါက ယခုအချိန်တွင် ကောင်းကင်ထိပ်ဆုံး သို့ ရောက်နေလောက်ချေ ပြီ။

လော့ရှီးသာ သူကဲ့သို့ လမ်းမှားမလိုက်ပါက ထိုနေရာသို့ ရောက်ရန်မှာ သေချာသလောက်ပင်။

ထို့ကြောင့်လည်း ဤမိန်းကလေးက ထျန်းချီတောင်တွင် အလွန်ပင် အလိုလိုက် ခံထားရခြင်း ဖြစ်ကာ ထန်ထျန်းတို့၏ သတင်းများကိုလည်း အတိအကျ သိနေခြင်း ဖြစ်ပေလိမ့်မည်။

"တော်တာပေါ့"

ထန်ထျန်းက ပြုံးလျက် ချီးကျူးလိုက်သည်။ "မင်းလို ပါရမီရှင်မျိုးက အသစ်ရောက်လာတဲ့ ငါ့လိုလူကို လာပြီး တိုက်ခိုက်ဖို့ မသင့်တော်ပါဘူး"

"မင်းက ဟို ဝါရင့် မြင့်မြတ် သားတော်လောင်းလျာတွေ၊ ဥပမာ အင်မော်တယ်အရှင် ဖြစ်နေတဲ့သူတွေနဲ့ သွားဆော့သင့်တာ"

သူက နောက်ပြောင်လိုက်သည်။

သို့သော် လော့ရှီးက ပြန်ပြောသည်။ "ရှာပြီးသားပါ"

"ဒါပေမဲ့ အင်မော်တယ်အရှင် မြင့်မြတ် သားတော်လောင်းလျာ နှစ်ယောက်ကို ကျွန်မက ရိုက်နှက်လိုက်ပြီးတဲ့နောက် ကျန်တဲ့သူတွေက ကျွန်မနဲ့ မဆော့ချင်ကြတော့ဘူး"

"တချို့ဆိုရင် ကျွန်မထက် အများကြီး ပိုသန်မာပြီး ကျွန်မကို နိုင်နိုင်ပေမဲ့ အကြောင်းပြချက် အမျိုးမျိုးပေးပြီး ငြင်းကြတယ်"

သူမက စိတ်ပျက်ဟန်ဖြင့် ပြော သည်။

ထန်ထျန်း တိတ်ဆိတ်သွားမိသည်။ မင်းကမှ စိတ်ပျက်နေသေးတယ်၊ စိတ်ပျက်ရမှာက သူတို့ မဟုတ်ဘူးလား။

ရှုံးရင်လည်း အရှက်ကွဲမည်၊ ကံကောင်း၍ နိုင်သွားလျှင်လည်း ဘာမှ ဂုဏ်ယူစရာ မရှိပေ။

မည်သူကမှ အရှုံးပေါ်မည့် အလုပ်ကို မလုပ်လိုကြပေ၊ ထိုအချိန်တွင် ကျင့်ကြံနေခြင်းကမှ ပို၍ အကျိုးရှိဦးမည်။

"အထွတ်အထိပ် လမ်းစဉ်ဆိုတာ အမြဲတမ်း အထီးကျန်တတ်တာပဲ"

"ဝိုင် သောက်တတ်လား"

ထန်ထျန်းက မေးလိုက်သည်။

လော့ရှီးက ခေါင်းညိတ်ကာ "သေချာတာပေါ့၊ ကျွန်မတို့ ရှောင်းယောင် မိသားစုက အရက်ချက်တဲ့သူတွေပဲလေ၊ ကျွန်မ ငယ်ငယ်က သောက်ခဲ့တဲ့ နို့ထဲမှာတောင် အရက်တွေ ပါနေမလားလို့ သံသယဖြစ်မိတယ်"

"ဘယ်လောက် ပြင်းတဲ့ အင်မော်တယ်ဝိုင် ဖြစ်ဖြစ် ကျွန်မကတော့ ဘယ်တော့မှ မမူးဘူး"

ထန်ထျန်း အံ့အားသင့်သွားရသည်။ ဤမျှအထိ ရဲတင်းလှသလော။

ထို့နောက် သူက လော့ရှီး၏ ရှေ့သို့ လအင်မော်တယ်ဝိုင် တစ်ခွက် ငှဲ့ပေးလိုက်သည်။

"ဒါဆို ဒါလေး မြည်းကြည့်ပါဦး၊ မင်း ဒါမျိုး တစ်ခါမှ သောက်ဖူးမှာ မဟုတ်ဘူး"

လော့ရှီးက ခွက်ကို ယူကာ နှာခေါင်းဖြင့် အနံ့ခံကြည့်ပြီး "ဟင် တကယ် တစ်ခါမှ မသောက်ဖူးဘူးပဲ"

"အနံ့က တော်တော်လေး ထူးခြားတာပဲ"

သူမ ပြော ကာ အနည်းငယ် မြည်းကြည့်လိုက်သည်။

လော့ရှီးက နှုတ်ခမ်းဖြင့် အသံမြည်အောင် လုပ်မိကာ ထန်ထျန်းကို မော့ကြည့်လိုက်သည်။

ရုတ်တရက်ဆိုသလို သူမ၏ ပါးပြင်ပေါ်သို့ နီမြန်းသော အရောင်များ တက်လာပြီး မျက်တောင်တစ်ခတ်အတွင်းမှာပင် မျက်နှာတစ်ခုလုံး၊ နားရွက်များနှင့် လည်ပင်းအထိ နီရဲသွားတော့သည်။

နောက်တစ်ခဏတွင် သူမက ကျောက်စားပွဲပေါ်သို့ ခေါင်းဖြင့် ဘုန်းခနဲ မှောက်ကျသွားကာ သတိလစ် မေ့မြောသွားတော့သည်။

ထန်ထျန်း : ...

အမ်

ဘယ်လိုပဲဖြစ်ဖြစ် မမူးဘူးလို့ ပြောခဲ့တာ မဟုတ်ဘူးလား။