ငါ့အစ်ကိုကြီးရဲ့နတ်ဘုရားစွမ်းအားကို မင်းတို့ သိလား

ဤလူနှစ်ဦးသည် ယန်သုံးပါးနယ်ပယ် ပထမအဆင့် ကျင့်ကြံသူများ မဟုတ်ချေ။

သူတို့၏အစစ်အမှန် ကျင့်ကြံဆင့်နယ်ပယ်မှာ အမှန်အားဖြင့် ယန်သုံးပါးနယ်ပယ် ဒုတိယအဆင့်ပင်။

အကယ်၍ ဤမျှသာဆိုလျှင် ဖူနျန်သည် အနည်းငယ်မျှ ကြောက်ရွံ့နေမည် မဟုတ်ချေ။

တူညီသော အဆင့်အတွင်း၌ပင်လျှင် ကြီးမားသော ကွာခြားချက်များ ရှိနေသေး၏။

သူသည် ယန်သုံးပါးနယ်ပယ် ဒုတိယအဆင့်သို့ လွန်ခဲ့သော နှစ်ပေါင်းငါးထောင်နီးပါးခန့်ကတည်းက အဆင့်တက်ထားခဲ့ခြင်းဖြစ်သည်။

ယန်သုံးပါးနယ်ပယ် ဒုတိယအဆင့်တွင်ရှိသော ကျင့်ကြံသူများကြားတွင် သူ့အား ဝါရင့်သူတစ်ဦးအဖြစ် သတ်မှတ်နိုင်သည်။

သူသည် ယန်သုံးပါးနယ်ပယ် တတိယအဆင့်သို့ တက်လှမ်းနိုင်ရန် ခြေတစ်လှမ်းသာ ကွာဝေးတော့သည်။

ယခင် သတင်းအချက်အလက်များအရ...

ရာသီလေးပါးဂိုဏ်းနှင့် ဓားတစ်သောင်းဂိုဏ်းတို့၏ဂိုဏ်းချုပ်များသည် ယန်သုံးပါးနယ်ပယ် ပထမအဆင့်တွင်သာ ရှိခဲ့ကြသည်။ ယခုချိန်၌ သူတို့သည် ဒုတိယအဆင့်တွင် ရှိနေလျှင်ပင် မကြာသေးမီကမှ အဆင့်တက်ထားခြင်း ဖြစ်ပေမည်။

ထိုမျှသာမက သူသည် အစစ်အမှန် ဧကရာဇ်အဆင့် ဆန်းကြယ်စွမ်းရည်တစ်ခုကို ပိုင်ဆိုင်ထားသည်ဟူသောအချက်နှင့် ပေါင်းစပ်လိုက်လျှင်....

ဧကရာဇ်အဆင့် ဆန်းကြယ်စွမ်းရည်ဆိုသည်မှာ ထိပ်သီးအင်အားစုလေးခုသာ ကျွမ်းကျင်နိုင်သော အဓိကတိုက်ခိုက်ရေးကျင့်စဉ်တစ်ခုပင်။

သူသည် ထိုလူနှစ်ဦးကို လွယ်လင့်တကူ ဖိနှိပ်နိုင်မည်ဟု သူ ယုံကြည်ထားခဲ့သည်။

သို့သော် အချိန်တခဏကြာမျှ တိုက်ခိုက်ပြီးနောက် ထိုသို့မဟုတ်ကြောင်း သူ တွေ့ရှိလိုက်ရသည်။

ပြိုင်ဘက်များ ကျွမ်းကျင်သော ဆန်းကြယ်စွမ်းရည်သည် သူ၏ကျင့်စဥ်လောက် အစွမ်းထက်ခြင်းမရှိသော်လည်း အလွန်အမင်း ထူးခြားပေ၏။

ထို့ပြင် သူတို့၏ တလိမ့်လိမ့်ထနေသော စွမ်းအားများနှင့် လျှံတက်နေသော သွေးချီများသည် ယန်သုံးပါးနယ်ပယ် ဒုတိယအဆင့်သို့ မကြာသေးမီကမှ ဝင်ရောက်လာသူတစ်ဦး ပိုင်ဆိုင်နိုင်သည့်အရာမျိုးနှင့် မတူညီချေ။

သူတို့သည် လွန်ခဲ့သော နှစ်ပေါင်းများစွာကတည်းက ယန်သုံးပါးနယ်ပယ် ဒုတိယအဆင့်သို့ အဆင့်တက်ထားသည့်အလား သူတို့ထံ၌ အခြေခံအုတ်မြစ် မတည်ငြိမ်မှုမျိုး အရိပ်အယောင်မျှပင် ရှိမနေချေ။

ဤသည်မှာ နတ်ဆိုးနဂါး သွေးအဆီအနှစ်၏ နက်နဲသိမ်မွေ့မှုပင်။

အကယ်၍ တစ်စုံတစ်ယောက်က တခြားကောင်းကင်နှင့်မြေပြင် ရတနာများဖြင့် အဆင့်တက်မည်ဆိုပါက သူ၏ကျင့်ကြံဆင့်ကို ခိုင်မာစေရန်အတွက် အချိန်များစွာ ယူရမည်မှာ မလွဲဧကန်ပင်။

သို့သော် နတ်ဆိုးနဂါး သွေးအဆီအနှစ်သည် ကျင့်ကြံခြင်းကို တိုက်ရိုက်အစပြုပေးသည့်အလားပင်။

ဤသည်က သူတို့နှစ်ဦးအား ကျင့်ကြံဆင့် မတည်ငြိမ်မှုအတွက် စိုးရိမ်ရန်မလိုအောင် ဖန်တီးပေးထားသည်။

ထို့အပြင် သူတို့နှစ်ဦး၏သွေးချီများ ပို၍ပင် သန်မာအားကောင်းလာသည်။

အကယ်၍ ဖူနျန်သည် အစပိုင်းတွင် သူတို့နှစ်ယောက်ကို ရင်ဆိုင်နိုင်ခဲ့လျှင်ပင် အချိန်ကြာလာသည်နှင့်အမျှ သူသည် သူတို့၏ဖိနှိပ်ခြင်းကို ခံလိုက်ရသည်။

"ဘုန်း..."

အကြိတ်အနယ် တိုက်ပွဲတစ်ခုအပြီးတွင် ပိုင်ဝူရှားနှင့်ကျီးဝူချန်တို့သည် တိုးပွားလာသော ခွန်အားများဖြင့် တိုက်ခိုက်ခဲ့ကြ၏။

နောက်ဆုံးတွင် သူတို့သည် ဖူနျန်အား လွှမ်းမိုးနိုင်သော စွမ်းအားများဖြင့် တိုက်ရိုက်ဖမ်းဆီးလိုက်ကြသည်။

ဤအခြေအနေသို့အရောက်တွင် တိုက်ပွဲပြီးဆုံးသွားခဲ့သည်။

သို့သော် တိုက်ပွဲပြီးဆုံးသွားသော်လည်း အကျိုးဆက်များသည် မပြီးဆုံးသေးချေ။

သူတို့၏ဂိုဏ်းချုပ် ပြိုင်ဘက်ကင်းမှုအပေါ် ဂုဏ်ယူဝင့်ကြွားနေကြသော ခုနစ်စင်ကြယ်ဓားဂိုဏ်းတပည့်များသည် ဖူနျန် အမှန်တကယ် ရှုံးနိမ့်သွားလိမ့်မည်ဟု ဘယ်သောအခါမျှ ထင်မှတ်မထားခဲ့ကြပေ။

"ငါတို့ရဲ့ဂိုဏ်းချုပ်ကို လွှတ်ပေးစမ်း..."

သူတို့သည် အလွန်အမင်း မယုံကြည်နိုင်ဖြစ်နေကာ တစ်ယောက်ပြီးတစ်ယောက် ဒေါသတကြီး အော်ဟစ်လိုက်ကြ၏။

ထို့နောက် ခုနစ်စင်ကြယ်ဓားဂိုဏ်းတစ်ဂိုဏ်းလုံး ဆူပူအုံကြွလာခဲ့သည်။

သူတို့က သူတို့၏ဂိုဏ်းချုပ်ကို ကယ်တင်လိုကြသည်။

သူတို့ လှုပ်ရှားလာချိန်၌ ရာသီလေးပါးဂိုဏ်းနှင့် ဓားတစ်သောင်းဂိုဏ်းမှ တပည့်များသည် မည်သို့ အငြိမ်ထိုင်ကြည့်နေနိုင်မည်နည်း။

မကြာမီတွင် တိုက်ပွဲစစ်မြေပြင်သည် ကြီးထွားလာကာ ဂိုဏ်းစစ်ပွဲတစ်ခုအဖြစ်သို့ ပြောင်းလဲသွားခဲ့သည်။

သို့သော်လည်း တိုက်ပွဲ၏ရလဒ်မှာ သတ်မှတ်ပြီးသား ဖြစ်ပေ၏။

တစ်ဖက်၏ အမြင့်ဆုံး တိုက်ခိုက်ရေးစွမ်းအားဖြစ်သော ယန်သုံးပါးနယ်ပယ် ဒုတိယအဆင့်သည် ဖမ်းဆီးခြင်းခံလိုက်ရသည်။ တခြားတစ်ဖက်တွင်မူ တားဆီး၍မရနိုင်သော အရှိန်အဝါများကို ထုတ်လွှတ်ထားသော ယန်သုံးပါးနယ်ပယ် ဒုတိယအဆင့် ကျင့်ကြံသူနှစ်ဦး ရှိနေသည်။

ဤကဲ့သို့ ဂိုဏ်းစစ်ပွဲတွင် ယန်သုံးပါးနယ်ပယ် ဒုတိယအဆင့် ကျင့်ကြံသူတစ်ဦးသည် တိုက်ပွဲတစ်ခုလုံးကို လွှမ်းမိုးနိုင်စွမ်း ရှိပေ၏။

ထို့ကြောင့် တိုတောင်းသော အချိန်တခဏအတွင်းမှာပင် ဤစစ်ပွဲသည် ရာသီလေးပါးဂိုဏ်းနှင့်ဓားတစ်သောင်းဂိုဏ်းတို့၏ အပြည့်အဝအောင်ပွဲဖြင့် အဆုံးသတ်သွားခဲ့သည်။

တိုက်ပွဲပြီးဆုံးသွားပြီးနောက် ခုနစ်စင်ကြယ်ဓားဂိုဏ်းမှတပည့်များသည် သူတို့အားလုံး ဖမ်းဆီးခံလိုက်ရပြီးနောက်တွင်ပင် မယုံကြည်နိုင်သေးချေ။

ခုနစ်စင်ကြယ်ဓားဂိုဏ်းသည် ထိပ်သီးတစ်ဝက်အဆင့် အင်အားစုတစ်ခုပင်။

သူတို့ မည်သည်ကြောင့် ရှုံးနိမ့်မည်နည်း...

သူတို့ မည်သည်ကြောင့် ရှုံးနိမ့်နိုင်မည်နည်း...

သို့သော် အမှန်တရားသည် ပုဂ္ဂိုလ်ရေးဆန္ဒသက်သက်ဖြင့် ပြောင်းလဲသွားမည် မဟုတ်ချေ။

သူတို့ မည်မျှပင် မယုံကြည်နိုင်စရာ သို့မဟုတ် လက်ခံနိုင်စရာမရှိဟု ထင်မြင်နေပါစေ ခုနစ်စင်ကြယ်ဓားဂိုဏ်း၏ရှုံးနိမ့်မှုမှာ ခိုင်မာသော အမှန်တရားတစ်ခု ဖြစ်လာခဲ့သည်။

"ကြက်သခင်ကြီး ဒီလူတွေကို ဘယ်လို ကိုင်တွယ်ဖြေရှင်းရမလဲဆိုတာ သိချင်ပါတယ်..."

တိုက်ပွဲအဆုံးသွားချိန်တွင် ပိုင်ဝူရှားသည် ကြက်ပေါက်စတစ်ဆီသို့ ချက်ချင်းပြေးသွားကာ ညွှန်ကြားချက် တောင်းခံလိုက်၏။

ကြက်ပေါက်စတစ် စကားမပြောနိုင်မီမှာပင် ဖမ်းဆီးခံထားရသော ဖူနျန်က မကျေမနပ်ဖြင့် အော်ဟစ်လိုက်သည်။

"တကယ်ကို အသိဉာဏ်ကင်းမဲ့လွန်းတယ်...ပုရွက်ဆိတ်တွေကများ ငါ့ကို ကိုင်တွယ်ဖြေရှင်းဖို့ ကြိုးစားရဲတယ်ပေါ့..."

"ငါ မင်းတို့ကို ပြောပြရသေးတာပေါ့....ငါက ဖူဝမ်နန်းတော်ရဲ့ နန်းတော်သခင်ဖူထော်ရဲ့ သားပဲ..."

"မင်းတို့အတွက် ဘယ်အရာက ကောင်းတယ်ဆိုတာ သိရင် ငါ့ကို အခုချက်ချင်း လွှတ်ပေးကြစမ်း.... ဒီကိစ္စကို ဘယ်တုန်းကမှ မဖြစ်ခဲ့သလိုမျိုး ငါ ဟန်ဆောင်ပေးလို့ရတယ်..."

"မဟုတ်ရင် ဖူဝမ်နန်းတော်ရဲ့ဒေါသက မင်းတို့ ခံနိုင်ရည်ရှိမယ့် အရာမျိုး မဟုတ်ဘူး..."

ဤစကားများ ထွက်ပေါ်လာသည်နှင့် ပိုင်ဝူရှားနှင့်ကျီးဝူချန်တို့သည် အလွန်အမင်း ထိတ်လန့်တုန်လှုပ်သွားကြ၏။

ဖူနျန်တွင် ဤကဲ့သို့ နောက်ခံမျိုး ရှိနေလိမ့်မည်ဟု သူတို့ တစ်ကြိမ်တစ်ခါမျှ ထင်မှတ်မထားခဲ့ကြချေ။

ဤသည်က အမှန်တကယ့်ကို ပြဿနာကြီးတစ်ခုပင်။

ဖူဝမ်နန်းတော်...

မြောက်ပိုင်းဒေသရှိ အင်အားအကြီးမားဆုံး ထိပ်သီးအင်အားစုလေးခုအနက် တစ်စုဖြစ်သော ဖူဝမ်နန်းတော်သည် မြောက်ပိုင်းဒေသကို မရေမတွက်နိုင်သော နှစ်ပေါင်းများစွာကြာအောင် စိုးမိုးထားခဲ့ပြီး လောကီနှင့်သီးခြားကင်းကွာကာ အထက်စီးတွင် ရှိနေသည်။

လောကကြီးမှလူများ၏ မျက်လုံးထဲတွင် ဤသည်မှာ အမှန်တကယ်ကို ပြိုင်ဘက်ကင်းခြင်းနှင့် ရန်စ၍မရနိုင်သော တည်ရှိမှုတစ်ခုနှင့် အဓိပ္ပါယ်တူညီသော စကားလုံးပင်။

ထိုကဲ့သို့ ဂိုဏ်းတစ်ဂိုဏ်း၏စွမ်းအားသည် ရာသီလေးပါးဂိုဏ်းနှင့်ဓားတစ်သောင်းဂိုဏ်းတို့၏ လုံးလုံးလျားလျား နှိုင်းယှဉ်၍ မရနိုင်ချေ။

"ဟမ့်..."

ဖူနျန်သည် သူတို့၏မျက်လုံးများထဲမှ အကြောက်တရားကို မြင်လိုက်ရပြီးနောက် အေးစက်စက် နှာမှုတ်လိုက်၏။

သူက မောက်မာထောင်လွှားစွာ ပြောဆိုသည်။

"မင်းတို့ရဲ့စွမ်းအားက အားမနည်းသလို မင်းတို့ နှစ်ယောက်လုံးက ပါရမီရှင်တွေဆိုတာကို ငါ မြင်တယ်..."

"ငှက်တစ်ကောင်ကို မင်းတို့ရဲ့အကြီးအကဲအနေနဲ့ အသိအမှတ်ပြုပြီးတော့ ကိုယ့်ကိုယ်ကိုယ် ကျဆင်းသွားအောင် လုပ်လိမ့်မယ်လို့ ငါ ဘယ်တုန်းကမှ ထင်မထားခဲ့ဘူး..."

"တကယ့်ကို ရယ်စရာကောင်းလိုက်တာ..."

"ငါနဲ့ ပူးပေါင်းလိုက်.... ငါက မင်းတို့ရဲ့ အနာဂတ်အတွက် အာမခံနိုင်တယ်..."

သူ့ထံတွင် အကျဉ်းသားတစ်ဦးဖြစ်နေကြောင်း အသိအမြင်မျိုး လုံးဝမရှိချေ။

သူသည် ဖမ်းဆီးခံထားရသော်လည်း အလွန်အမင်း မောက်မာထောင်လွှားနေဆဲပင်။

သို့သော် ဤစကားများက ကြက်ပေါက်စတစ်အား မပျော်မရွှင် ဖြစ်သွားစေခဲ့သည်။

"ကောင်းတယ် ကောင်လေး...မင်းက တော်တော်လေး သတ္တိရှိတာပဲ..."

"မင်းက ငါ့ကို ငှက်လို့ ခေါ်ရဲတယ်ပေါ့..."

"ရှောင်ပိုင်....သူ့ကို သတ်လိုက်စမ်း..."

အေးစက်စက်နှာမှုတ်လိုက်ခြင်းနှင့်အတူ ကြက်ပေါက်စတစ်၏မျက်လုံးများတွင် မကျေနပ်မှု အရိပ်အယောင်များ ဖြတ်ပြေးသွားခဲ့သည်။

"ကြက်....ကြက်သခင်ကြီး..."

"ဖူဝမ်နန်းတော်က မြောက်ပိုင်းဒေသရဲ့ အင်အားအကြီးမားဆုံး အင်အားစုတွေထဲက တစ်စုဖြစ်ပြီး သူတို့ရဲ့ဂိုဏ်းထဲမှာ ယန်သုံးပါးနယ်ပယ်အလွန် ထိပ်သီးကျင့်ကြံသူတွေတောင် ရှိတယ်..."

"သူ့ကို မဆင်မခြင် သတ်လိုက်တာက မကောင်းဘူး မဟုတ်လား..."

ပိုင်ဝူရှားက သတိကြီးစွာထား၍ မေးမြန်းလိုက်သည်။

"ကြက်သခင်ကြီး...ကျေးဇူးပြုပြီးတော့ သေချာစဉ်းစားပါအုံး..."

သူ၏နံဘေးတွင်ရှိနေသော ကျီးဝူချန်ကလည်း တည်ကြည်လေးနက်စွာ ပြောဆိုလိုက်၏။

"ဟား ဟား ဟား.... ယန်သုံးပါးနယ်ပယ်အလွန် ဆိုရင်ရော ဘာဖြစ်လဲ..."

ကြက်ပေါက်စတစ်က သရော်တော်တော်ပြောဆိုကာ သူ၏နှုတ်ခမ်းကို တွန့်ကွေးလိုက်သည်။

ထို့နောက် သူက အသံကို နှိမ့်ကာ ထိုလူနှစ်ဦးအား ပြောဆိုလိုက်သည်။

"မင်းတို့ကို ပွင့်ပွင့်လင်းလင်း ပြောရရင်..."

"ငါတို့ရဲ့အစ်ကိုကြီး စာခြောက်ရုပ်မှာ ဘယ်လို စွမ်းအားတွေ ရှိလဲဆိုတာကို မင်းတို့ သိလား..."

ကျီးဝူချန်နှင့်ပိုင်ဝူရှားတို့သည် သူတို့၏ခေါင်းကို အဆက်မပြတ် ခါယမ်းလိုက်ကြ၏။

"ကျွန်တော်တို့ မသိပါဘူး..."

ထိုလူနှစ်ဦးသည် အလွန်အမင်း ရိုးသားကြသည်။

တစ်ချိန်တည်းမှာပင် သူတို့သည် သိလိုစိတ်များ အလွန်အမင်း ပြင်းပြလာခဲ့သည်။

နတ်ဆိုးစစ်သူကြီးဆယ့်နှစ်ဦးသည် သူတို့၏ ဂိုဏ်းများကို လွယ်လင့်တကူ ချေမှုန်းနိုင်လောက်အောင် စွမ်းအားကြီးမားကြောင်းကို သူတို့ သိရှိထားပြီးဖြစ်သည်။

သို့သော် ထိုသို့ဖြစ်သည့်တိုင် စာခြောက်ရုပ်၏ရှေ့တွင် ဤသခင်များသည် ရိုသေလေးစားမှု ရှိကြ၏။

သူတို့သည် စာခြောက်ရုပ်က အလွန်လျှို့ဝှက်ဆန်းကြယ်သည်ကိုသာ သိရှိထားပြီး သူ၏ တိကျသော စွမ်းအားနှင့်ပတ်သက်၍မူ သူတို့ အနည်းငယ်မျှ မသိရှိခဲ့ကြချေ။

"ဟား ဟား ဟား...မင်းတို့နှစ်ယောက်က ကြက်သခင်ကြီးအပေါ် အလုပ်အကျွေးပြုပြီးတော့ သစ္စာရှိတာကို မြင်တာကြောင့် ကြက်သခင်ကြီးက မင်းတို့ကို ပြောပြမယ်..."

"ငါတို့အစ်ကိုကြီးရဲ့စွမ်းအားက မင်းတို့ စိတ်ကူးယဉ်တွေးတောနိုင်တာထက် ကျော်လွန်နေတယ်..."

"ငါက လုံလောက်အောင် စွမ်းအားကြီးတယ် မဟုတ်လား..."

ထိုလူနှစ်ဦးသည် ဆန်စေ့ကို စိတ်အားထက်သန်စွာ ကောက်နေသော ကြက်ပေါက်စလေးများအလား ခေါင်းညိတ်ပြလိုက်ကြ၏။

ကြက်ပေါက်စတစ်သည် စွမ်းအားကြီးမားသည်မှာ သေချာပေါက်ပင်။

ထို့ပြင် သူသည် နှိုင်းယှဥ်ပြစရာ မရှိလောက်အောင်ပင် စွမ်းအားကြီးမားသည်။

သို့သော် ဤအရာက စာခြောက်ရုပ်နှင့် မည်သို့ သက်ဆိုင်နေသနည်း....

ထို့နောက် ကြက်ပေါက်စတစ်က ဆက်လက်၍ ပြောဆိုသည်။

"ဒါပေမဲ့ အစ်ကိုကြီးရဲ့မျက်လုံးထဲမှာတော့ ငါ့ကို သတ်တာက ကြက်တစ်ကောင်ကို သတ်ရသလိုပဲ..."

"အမ်..."

ဤဥပမာက သူတို့နှစ်ဦးအား အချိန်တခဏကြာမျှ တိတ်ဆိတ်ငြိမ်သက်သွားစေခဲ့သည်။

ကြက်ပေါက်စတစ်သည် ကြက်တစ်ကောင်သာ ဖြစ်သည် မဟုတ်လော....

ကြက်ပေါက်စတစ်သည်လည်း သူ၏ဥပမာတွင် ပြဿနာတချို့ရှိနေကြောင်း ခံစားလိုက်ရသည်။

သူက ချက်ချင်းတောင်ပံခတ်ကာ ပြင်ပြောလိုက်၏။

"ဒီအသေးစိတ်အချက်အလက်တွေကို ဂရုမစိုက်နဲ့..."

"ယန်သုံးပါးနယ်ပယ်အလွန်က လူတွေတောင်မှ အစ်ကိုကြီးရဲ့လက်ထဲမှာတော့ အားနည်းသူတွေကလွဲပြီး ဘာမှမဟုတ်ဘူးဆိုတာကို မင်းတို့ သိထားဖို့ပဲ လိုတယ်..."

ဤစကားများက အလွန်စိတ်ရှုပ်ထွေးနေသော သူတို့နှစ်ဦးအား အလွန်အမင်း ထိတ်လန့်တုန်လှုပ်သွားစေခဲ့သည်။

"အရှင်စာခြောက်ရုပ်က အဲ့ဒီလောက်တောင် ကြီးမားတဲ့ နတ်ဘုရားစွမ်းအားတွေကို တကယ်ကြီး ပိုင်ဆိုင်ထားတာလား..."

"ဟား ဟား...ဒါက ငါ့ရဲ့ အနိမ့်ဆုံး ခန့်မှန်းချက်လေးတစ်ခုပဲ ရှိသေးတယ်..."

"ငါက သူ့ရဲ့ အနိမ့်ဆုံးအကန့်အသတ်ကို မြင်နိုင်ပေမဲ့ သူ့ရဲ့အမြင့်ဆုံးအကန့်အသတ်ကိုတော့ ငါ မမြင်နိုင်ဘူး..."

"အစ်ကိုကြီးရဲ့ စွမ်းအားက မင်းတို့ စိတ်ကူးယဉ်နိုင်တာထက် ကျော်လွန်နေတုန်းပဲ..."

အိုး ဘုရားရေ...

ကျီးဝူချန်နှင့်ပိုင်ဝူရှားတို့ တံတွေးမျိုချလိုက်ကြပြီး သူတို့၏မျက်နှာများပေါ်ရှိ ထိတ်လန့်တုန်လှုပ်မှုများကို ဖုံးကွယ်မထားနိုင်တော့ချေ။

အကယ်၍ သူ၏ အနိမ့်ဆုံးအကန့်အသတ်က ယန်သုံးပါးနယ်ပယ်အလွန် ကျင့်ကြံသူများကို သတ်ဖြတ်နိုင်ပါက သူ၏အမြင့်ဆုံးအကန့်အသတ်သည် မည်မျှထိ မြင့်မားနေမည်နည်း။

သူတို့ စိတ်ကူးယဉ်တွေးတောကြည့်ခြင်းပင် မပြုနိုင်ချေ။

ဤအချိန်တွင် သူတို့သည် စာခြောက်ရုပ်ကို တိတ်တဆိတ် ကြည့်လိုက်ကြ၏။ ထိုသာမန်အသွင်အပြင်၏အောက်တွင် သူတို့ ခန့်မှန်း၍မရနိုင်သော ထူးခြားသည့် လျှို့ဝှက်ဆန်းကြယ်မှုများနှင့် နားလည်သဘောပေါက်နိုင်စွမ်းမရှိသော စွမ်းအားများ ကိန်းအောင်းနေသည်ဟုသာ ခံစားလိုက်ရသည်။

ကြက်ပေါက်စတစ်သည် သူတို့၏တုံ့ပြန်မှုအပေါ် အလွန်စိတ်ကျေနပ်သွားခဲ့သည်။

"အစ်ကိုကြီးက ငါတို့ရဲ့ အားထားရာတစ်ခုပဲ ရှိသေးတယ်..."

"ဒါပေမဲ့ ငါတို့ဆီမှာ အစ်ကိုကြီးထက်တောင် ပိုပြီး စွမ်းအားကြီးမားတဲ့ အားထားရာ နောက်တစ်ခု ရှိသေးတယ်..."

"ဘာ..."

ဤသတင်းက သူတို့နှစ်ဦး၏ နှလုံးသားထဲတွင် ဧရာမလှိုင်းလုံးကြီးများနှင့် ဒီရေများ တက်လာသည့်အလား ထိတ်လန့်တုန်လှုပ်မှုများကို ဖြစ်ပေါ်စေခဲ့သည်။

ဤမျှ ထိတ်လန့်ဖွယ်ကောင်းသော စွမ်းအားရှိသည့် စာခြောက်ရုပ်ကပင် သူတို့၏ အင်အားအကြီးမားဆုံး အားထားရာမဟုတ်ဟုဆိုလျှင်...

.

ထိုအားထားရာသည် မည်ကဲ့သို့ စွမ်းအားမျိုးကို ပိုင်ဆိုင်ထားမည်နည်း။

ထို့ပြင် ထိုသူသည် မည်သူဖြစ်သနည်း....