အခန်း (၂၀၆၇-၂၀၆၈)

အပိုင်း(၂၀၆၇)

ဟူး... ဟူး...

ဝေ့ဝူယင်သည် သူ၏ လျှို့ဝှက်စွမ်းအားများမှာ ခုနစ်ရောင်ခြယ် အလင်းတန်းများအဖြစ် ပြောင်းလဲသွားပြီး ငွေရောင်အလင်းဖျော့ဖျော့ ထွက်ပေါ်လာသည်ကို စောင့်ကြည့်နေသည်။ မက်ဂီများ၏ အမွေအနှစ်ကို ရရှိပြီးနောက်၊ 'ဧဒင်' ပိုင်ဆိုင်ထားသည့် စိတ်တာအို ၏ မူလအစမှာ ဖန်တီးခြင်းဆိုင်ရာ အာကာရှစ် မှတ်တမ်းများ ဖြစ်ကြောင်း သူ သိရှိခဲ့ရသည်။ ၎င်းက စိတ်ဖတ်ခြင်းနှင့် အတွေ့အကြုံများကို သိမြင်ခြင်းစသည့် အစွမ်းများကို ရရှိစေခြင်း ဖြစ်သည်။

ဝေ့ဝူယင်က အဂ္ဂိရတ် ဖော်စပ်ခြင်းလမ်းစဉ်ကို လျှောက်လှမ်းသောအခါ ဧဒင်မှာ 'အဂ္ဂိရတ် အာကာရှစ် ကြယ်တာရာ ဝိညာဉ်' အဖြစ် ပြောင်းလဲသွားခဲ့ခြင်း ဖြစ်သည်။ အနာဂတ်တွင် ဧဒင်နှင့် ၎င်း၏ စွမ်းရည်များကို သူ ပိုမို လေ့လာရန် လိုအပ်သေးသည်။

'ဧဒင်ကို အသုံးပြုမယ်ဆိုရင် ငါ့ရဲ့ စိတ်အာရုံထဲမှာ အာကာရှစ်မှတ်တမ်းကို ကျင့်ကြံဖို့ ကြာမယ့်အချိန်ကို သိသိသာသာ လျှော့ချနိုင်လိမ့်မယ်...'

ဝေ့ဝူယင် တွေးတောနေမိသည်။ မက်ဂီများ၏ အမွေအနှစ် ကျင့်စဉ်ကို ကျင့်ကြံရာတွင် ဧဒင်က အကျိုးကျေးဇူးများစွာ ပေးလိမ့်မည်ဟု သူ ခံစားနေရသည်။

"ဆေးဖော်မလို့လား..."

ဝေ့ဝူယင်က အဂ္ဂိရတ် စွမ်းအင်များကို ဆင့်ခေါ်လိုက်သည်ကို ကောင်းကင် စစ်ဝိညာဉ် သတိထားမိလိုက်သည်။ လက်ရှိတွင် ဝေ့ဝူယင်သည် မည်သူမျှ မလျှောက်လှမ်းဖူးသော ကျင့်ကြံခြင်းလမ်းစဉ်သစ်တစ်ခုသို့ ရောက်ရှိနေပြီ ဖြစ်သည်။ သူ့ အနေဖြင့် လျှို့ဝှက် တာအိုထဲသို့ အပြည့်အဝ မဝင်ရောက်မီ သူ၏ လျှို့ဝှက် ကြယ်တာရာ အဆင့်ကို အမြင့်ဆုံးအထိ မြှင့်တင်ရန် လိုအပ်သည်။

သုံးရက်ဆိုသော အချိန်မှာ သူ၏ လက်ရှိ အရည်အချင်းနှင့် အဆင့်အတန်းကို စမ်းသပ်ရန် ဆေးဖော်စပ်ရန်အတွက် လုံလောက်သော အချိန်ဖြစ်သည်။ ဝေ့ဝူယင်၏ ဖြစ်တည်မှုမှာ အခြေခံအဆင့်မှစ၍ ပြောင်းလဲသွားခဲ့ပြီ ဖြစ်သည်။ သူ၏ 'ကြယ်တာရာ ပါရဂွန် ခန္ဓာကိုယ်' မှာလည်း ပိုမို အစွမ်းထက်လာခဲ့သည်။ သူ၏ ခန္ဓာကိုယ်မှ လူသားလမ်းစဉ်နှင့် လျှို့ဝှက်လမ်းစဉ်တို့၏ ကောင်းချီးပေးမှုများနှင့် ထာဝရ အော်ရာ များ သိသိသာသာ ထွက်ပေါ်နေသည်။

ဝေ့ဝူယင် ခဏမျှ တွေးတောပြီးနောက် သူ ရင်းနှီးပြီးသား ဆေးလုံးများကို စတင် ဖော်စပ်ကြည့်ရန် ဆုံးဖြတ်လိုက်သည်။ ပိုင်ရှုမှာ လော့နင်နှင့်အတူ ရှိနေသဖြင့် သူ အပိုဆေးအိုးကို အသုံးပြုလိုက်သည်။

ဝေ့ဝူယင်သည် သူ၏ လက်ရှိ အဂ္ဂိရတ် ဖော်စပ်ခြင်းအဆင့်ကို စမ်းသပ်ရန် 'အာရုဏ်ဦး အဂ္ဂိရတ် မျိုးဆက်' ၏ ဆေးလုံးများကို စတင် ဖော်စပ်လိုက်သည်။

ဝှစ်...

သူ လက်ကို ဝေ့ယမ်းလိုက်ရာ ရေကန်ပေါ်တွင် 'မူလ အာရုဏ်ဦး နန်းတော်' တသ်ခု ပေါ်ထွက်လာသည်။ သူသည် ဆေးဖော်စပ်ခန်းထဲသို့ တိုက်ရိုက် ဝင်သွားခဲ့သည်။

'အာရုဏ်ဦး နေမီးတောက် ဆေးလုံး' ကို သာလွန်ခြင်း အဆင့် အရည်အသွေးဖြင့် ဖော်စပ်ရသည်မှာ အံ့သြဖွယ်ကောင်းလောက်အောင် လွယ်ကူနေသည်။ ဆေးလုံး ၃၃ လုံး ပါဝင်သော အစုံလိုက်ကို ဖော်စပ်ရန် တစ်မိနစ်ခန့်သာ ကြာမြင့်တော့သည်။ ဤသည်မှာ ယခင်ကထက် သိသိသာသာ မြန်ဆန်လာခြင်း ဖြစ်ပြီး၊ သူ၏ လျှို့ဝှက်အော်ရာများက ဆေးလုံးအတွင်းသို့ အလွယ်တကူ စီးဝင်သွားသည်။

ဝေ့ဝူယင် မျက်ခုံးကို ပင့်ကာ ထိုဆေးလုံးများကို စစ်ဆေးလိုက်သည်။ ထို့နောက် အဆင့် ၁ မှ အဆင့် ၉ အထိ ဆေးလုံးအားလုံးကို အထွတ်အထိပ် အရည်အသွေးဖြင့် ဖော်စပ်ကြည့်ရာ အားလုံးမှာ အောင်မြင်ခဲ့သည်။ ၎င်းမှာ သူ၏ ကြိုးစားအားထုတ်မှုကြောင့် မဟုတ်ဘဲ ဧဒင်၏ အဂ္ဂိရတ် ဖော်စပ်ခြင်း စွမ်းအားများက ဆေးလုံးများအတွင်းသို့ လျှို့ဝှက်လမ်းစဉ်၏ ဂုဏ်သတ္တိများကို အလိုအလျောက် ထည့်သွင်းပေးနေသကဲ့သို့ပင်။

မိနစ် ၃၀ မပြည့်မီမှာပင် ဝေ့ဝူယင်သည် အဆင့်မျိုးစုံရှိသော အထွတ်အထိပ် အရည်အသွေးရှိ ဆေးလုံးပေါင်း သောင်းချီကို ဖော်စပ်ပြီးသွားခဲ့သည်။ သူ သူ၏ ခန္ဓာကိုယ်ထဲမှ စွမ်းအင်များကို ကြည့်ကာ တိတ်ဆိတ်သွားသည်။

"ဒီလို အမြန်နှုန်းက... ရူးချင်စရာကြီး..."

ကောင်းကင်စစ်ဝိညာဉ်သည် ဝေ့ဝူယင်ကို အသက် ၁၀၀ မပြည့်မီမှာပင် အံ့သြဖွယ်ကောင်းသော သေမျိုး အဂ္ဂိရတ် ရှန့်ထို ဖြစ်လာသည်ကို မြင်တွေ့ခဲ့ရသော်လည်း၊ ယခု အခြေအနေမှာမူ ယခင်ကထက် လုံးဝ ကွဲပြားခြားနားနေပြီ ဖြစ်သည်။

ဝေ့ဝူယင်က ဆေးအိုးကို ဘေးချလိုက်ကာ သူ၏ စွမ်းအင်များကို စစ်ဆေးလိုက်သည်။ သူ လှုပ်ရှားလိုက်တိုင်း သေမျိုး လမ်းစဉ်၊ လျှို့ဝှက်လမ်းစဉ် နှင့် ထာဝရ အော်ရာတို့၏ ကောင်းချီးပေးမှုများက သဘာဝအလျောက် စီးဆင်းနေသည်။

ဝေ့ဝူယင်သည် ဤဂြိုဟ်ပေါ်ရှိ ဝိညာဉ်ဆင်းတု အဆင့် ရှိသော စွန့်စားလိုစိတ်ပြင်းပြသည့် လူငယ်လေးတစ်ဦးကို တွေ့ရှိသွားသည်။ သူသည် အထွတ်အထိပ် အရည်အသွေးရှိ 'အာရုဏ်ဦး နေမီးတောက် ဆေးလုံး’ တစ်လုံးကို ထိုလူငယ်၏ အနီးအနားတွင် မြှုပ်နှံထားလိုက်ပြီး ရှေးဟောင်းအော်ရာများ ထွက်ပေါ်စေရန် လုပ်ဆောင်လိုက်သည်။

ထိုလူငယ်လေးမှာ ၎င်းကို တွေ့ရှိသွားသောအခါ ငလျင်နှင့် မုန်တိုင်းများကြောင့် မြေကြီးထဲမှ ပေါ်ထွက်လာသော ရှေးဟောင်းဆေးလုံးဟု ထင်မှတ်ကာ ဝမ်းသာအားရ စားသုံးလိုက်သည်။ ဝေ့ဝူယင်သည် ထိုလူငယ်၏ ခန္ဓာကိုယ်က ဆေးလုံးကို မိနစ်အနည်းငယ်အတွင်း အလွယ်တကူ ချေဖျက်လိုက်သည်ကို စောင့်ကြည့်နေမိသည်။ သေမျိုး လမ်းစဉ်၏ အော်ရာများက ထိုဆေးလုံးကို ချေဖျက်ရာတွင် ကူညီပေးနေပြီး ထိုလူငယ်မှာ စစ်မှန်သော 'နယ်မြေမျိုးစေ့' တစ်ခုကို ရရှိသွားခဲ့သည်။

ထိုလူငယ်လေးသည် သူ၏ စွမ်းအားသစ်ကို စမ်းသပ်ကြည့်ရင်း အလွန်ပင် စိတ်လှုပ်ရှားနေသည်။ သို့သော်လည်း သူသည် ပါးနပ်စွာဖြင့် သူ၏ စွမ်းအားများကို ပြန်လည် ဖုံးကွယ်ထားလိုက်သည်။ ဝေ့ဝူယင်သည် ထိုလူငယ်လေး၏ အမြော်အမြင်ရှိမှုကို သဘောကျသဖြင့် ခေါင်းညိတ်လိုက်သည်။ ထို့နောက် သူ မြင်တွေ့ခဲ့ရသည်များကို ပြန်လည် စဉ်းစားနေမိသည်။

ကောင်းကင်စစ်ဝိညာဉ်သည်လည်း ၎င်းကို မြင်တွေ့ခဲ့ရပြီး မယုံကြည်နိုင် ဖြစ်နေသည်။ ဆေးဖော်စပ်သည့် အရှိန်က တစ်ကြောင်း၊ ဆေးလုံးကို ချေဖျက်ရသည်မှာ တာအိုကိုယ်တိုင်က ကူညီပေးနေသကဲ့သို့ လွယ်ကူနေသည်မှာ ကမ္ဘာကြီးကို တုန်လှုပ်စေမည့် အချက်ပင် ဖြစ်သည်။

သို့သော် ဝေ့ဝူယင် တွေးနေသည်မှာ ထိုအချက် မဟုတ်ပေ။ ပို၍ အရေးကြီးသော အချက်မှာ... ဆေးလုံးအားလုံးမှာ သူ အထူးတလည် ကြိုးစားစရာ မလိုဘဲ သာလွန်ခြင်း အဆင့် အရည်အသွေး ဖြစ်နေခြင်းပင်။ လျှို့ဝှက်လမ်းစဉ်၏ ကောင်းချီးပေးမှုက ထိုဆေးလုံးများကို အခြေခံအဆင့်မှစ၍ ပြောင်းလဲပေးလိုက်ခြင်း ဖြစ်သည်။

"ဝေ့ဝူယင်... နင် ဘာတွေ တွေးနေတာလဲ..."

ကောင်းကင် စစ်ဝိညာဉ်မှာ ဝေ့ဝူယင်၏ တွေဝေနေမှုကို မြင်ရသော အခါ မေးလိုက်၏။

"ဟမ်..."

ဝေ့ဝူယင်မှာ သတိပြန်ဝင်လာ၏။

"ငါ့ရဲ့ ခန္ဓာကိုယ်က ရရှိထားတဲ့ ကောင်းချီးပေးမှုတွေက ငါ အဆင့်တက်ပြီးနောက်မှာ ခန့်မှန်းလို့မရအောင် ပြောင်းလဲသွားပုံရတယ်..."

"အဲဒါက သိသာနေတာပဲ မဟုတ်ဘူးလား... နင့်ရဲ့ အဆင့်တက်မှုက အရမ်း ထူးဆန်းနေတာပဲလေ... ဒါကြောင့် ခန့်မှန်းလို့မရတဲ့ ပြောင်းလဲမှုတွေ ရှိနေမှာပဲ... နောက်မှ ဖြည်းဖြည်းချင်း လေ့လာရမှာပေါ့"

သူမက နှစ်သိမ့်လိုက်သည်။

"ငါ့ရဲ့ ခန္ဓာကိုယ်ထဲမှာရှိတဲ့ တတိယမြောက် ကောင်းချီးပေးမှု ဖြစ်တဲ့ 'ထာဝရ အော်ရာ' နဲ့ ပတ်သက်ပြီးတော့ရော မင်း ဘာထင်လဲ... အဲဒါက တန်ခိုးရှင် တာအိုနဲ့ ဆက်စပ်နေတယ်လို့ ထင်လား..."

ဝေ့ဝူယင်က မေးလိုက်သည်။

"ငါလည်း မသိဘူး"

ကောင်းကင် စစ်ဝိညာဉ်က ခေါင်းခါလိုက်သလိုဖြင့် ပြောလိုက်သည်။

ဝေ့ဝူယင်က သူမ၏ မသိမှုကို ဂရုမစိုက်ဘဲ ဆက်ပြောလိုက်၏။

"ဒါဆိုရင် လျှို့ဝှက်အဆင့် ဆေးလုံးတွေကို သာလွန်ခြင်း အရည်အသွေးနဲ့ ဖော်စပ်ဖို့ ဘာတွေ လိုအပ်မယ်လို့ ထင်လဲ..."

ကောင်းကင်ဘုံ စစ်ဝိညာဉ်မှာ ထိုမေးခွန်းကြောင့် ဇဝေဇဝါ ဖြစ်သွားသည်။ သူမတွင် ထိုမေးခွန်းအတွက် အဖြေမရှိပေ။ သို့သော် ဝေ့ဝူယင် ဆိုလိုသည့် အဓိပ္ပာယ်ကို နားလည်သွားသောအခါ သူမ၏ ကိုယ်ထည်မှာ တုန်ယင်လာတော့သည်။

"နင်... နင်... မဟုတ်မှလွဲရော..."

"တကယ်လို့..."

ဝေ့ဝူယင် စကားကို တစ်ဝက်ဖြင့် ဖြတ်လိုက်သည်။ သူ လက်မောင်းများကို မြှောက်လိုက်ရာ ကြည်လင်သော အလင်းတန်းများနှင့်အတူ အလွန်ပင် နက်နဲသော ထာဝရအော်ရာများ ထွက်ပေါ်လာသည်။ သူ၏ မျက်ဝန်းများထဲတွင် ဝိညာဉ်အစီအရင်များ လည်ပတ်နေပြီး 'မသေမျိုးမျက်လုံး' က နန်းတော်တစ်ခုလုံးကို ထာဝရအလင်းတန်းများဖြင့် လွှမ်းခြုံသွားစေတော့သည်။

...

သုံးရက်ဆိုသော အချိန်မှာ ကုန်ဆုံးသွားခဲ့ပြီ။ ဒေသအသီးသီးမှ ထိပ်တန်း အင်အားစုများသည် 'မာနု နယ်မြေ' သို့ စုဝေးရောက်ရှိလာကြသည်။ ၎င်းမှာ နေမင်းကြီး၏ အမတေကို အသုံးပြု၍ တည်ဆောက်ထားသော ဟင်းလင်းပြင်ထဲရှိ ရှေးဟောင်းနန်းတော်ကြီး တစ်ခုပင် ဖြစ်သည်။

***

အပိုင်း(၂၀၆၈)

မာနုနယ်မြေသည် ရတနာမြေဖြစ်သလို၊ အစောင့်အရှောက်ထူထပ်သော နယ်မြေလည်း ဖြစ်သည်။ ရှေးဟောင်းနန်းတော်တစ်ခုလည်း ဖြစ်သည့်အပြင် ဒဏ္ဍာရီလာပုံပြင်များ၊ ထူးခြားဆန်းပြားသော နောက်ခံသမိုင်းကြောင်းများနှင့် ပြည့်နှက်နေသော နေရာတစ်ခုလည်း ဖြစ်ပေသည်။

ထိုနေရာသည် ဒဏ္ဍာရီများဖြင့် ကြွယ်ဝရုံသာမက ၎င်း၏ လေထုထဲတွင် အမည်မဲ့ဂလက်ဆီ တစ်ခုလုံး၌ အသန့်စင်ဆုံးဖြစ်သော ချီ၊ ကြယ်တာရာနှင့် လျှို့ဝှက်အမတေ တို့ကို ထုတ်လွှတ်ပေးလျက်ရှိသည်။ ထိုနေရာသည် ဂလက်ဆီတစ်ခွင်တွင် ကျင့်ကြံခြင်းအတွက် အကောင်းဆုံးသော အထွတ်အထိပ်နယ်မြေအဖြစ် ကျော်ကြားပြီး ပဲ့တင်ထပ် ဝိညာဉ်အဆင့် အောက်ရှိ မည်သည့်ကျင့်ကြံသူအတွက်မဆို အထူးသင့်လျော်လှပေသည်။

မရေမတွက်နိုင်သည့် ကျင့်ကြံသူများ သည် ထိုနေရာသို့ ဝင်ရောက်ခွင့်ရရန် တောင့်တကြသော်လည်း သူတော်စင် ရှစ်ပါးတို့၏ ဘုံသဘောတူညီချက်ဖြင့် ချိတ်ပိတ်ထားခြင်းကြောင့် ဂလက်ဆီအတွင်း အကျော်ကြားဆုံးသော ရတနာမြေသည် မည်သူမျှ ကျူးကျော်ဝင်ရောက်ခြင်းမပြုနိုင်သည့် အတားအဆီးအထူထပ်ဆုံးသော တားမြစ်နယ်မြေ ဖြစ်သွားခဲ့ရသည်။

အစောပိုင်းကာလများတွင် အဓိကနယ်မြေကြီး ရှစ်ခုကို အုပ်ချုပ်သော သူတော်စင်ရှစ်ပါးတို့သည် ကျင့်ကြံသူ မျိုးဆက်အချို့ကို မာနုနယ်မြေအတွင်း ဝင်ရောက်ကျင့်ကြံခွင့် ပေးခဲ့ကြရာမှ မရေမတွက်နိုင်သော ပါရမီရှင်များ ပေါ်ထွန်းခဲ့ဖူးသည်။ သို့သော် နောက်ပိုင်းတွင် သူတော်စင်ရှစ်ပါးတို့ သဘောထားကွဲလွဲကာ မူလသဘောတူညီချက် ပျက်ပြားသွားခဲ့သဖြင့် မာနုနယ်မြေအား မည်သည့်အချိန်တွင် ပြန်လည်ဖွင့်လှစ်မည်ကို တစ်ဦးနှင့်တစ်ဦး သဘောမတူနိုင် ဖြစ်ခဲ့ကြတော့သည်။

မာနုနယ်မြေ၏ မူလဇစ်မြစ်မှာလည်း ဒဏ္ဍာရီများနှင့် လျှို့ဝှက်ချက်များအောက်တွင် ဖုံးကွယ်နေဆဲဖြစ်သည်။ ခိုင်လုံသော ယူဆချက်အချို့အရ ထိုနေရာသည် လွန်ခဲ့သော နှစ်သန်းပေါင်းများစွာက ပဲ့တင်ထပ် ဝိညာဉ် အဆင့် သူတော်စင် တစ်ပါး၏ နေအိမ်ဖြစ်သည်ဟုလည်းကောင်း၊ သို့မဟုတ် ကမ္ဘာဦး၏ ပထမဆုံးသော နေမင်းကို အသုံးပြု၍ ဖန်တီးခဲ့ခြင်းဖြစ်သည်ဟုလည်းကောင်း ဆိုကြသည်။

ထို့ပြင် မာနုနယ်မြေသည် သူတော်စင်ရှစ်ပါးတို့ မွေးဖွားရာဒေသဖြစ်ပြီး ထိုနေရာသို့ ဝင်ရောက်နိုင်သူသာလျှင် ဤဂလက်ဆီအတွင်း သူတော်စင်တစ်ပါးဖြစ်လာရန် အခွင့်အရေးရှိသည်ဟူသော ကောလာဟလများကို လူအများက ယုံကြည်နေကြသည်။ ဤသည်မှာ အမှန်တရားမဟုတ်သော်လည်း ဒေသခံများအတွက်မူ ကျင့်ကြံခြင်း၏ ခက်ခဲနက်နဲမှုကို ဤကဲ့သို့ပင် အကြောင်းပြချက် ပေးထားကြလေသည်။

ယခုအခါတွင်မူ ထိုရတနာမြေ၊ တားမြစ်မြေဖြစ်သော ရှေးဟောင်းနန်းတော်ကြီးကို သူတော်စင်ရှစ်ပါးတို့၏ တစ်ခဲနက် သဘောတူညီချက်ဖြင့် နှစ်ပေါင်းသောင်းချီအတွင်း ပထမဆုံးအကြိမ် ပြန်လည်ဖွင့်လှစ်တော့မည် ဖြစ်သည်။ ဤနေရာသည် ဂလက်ဆီအဆင့် ဆွေးနွေးပွဲကျင်းပမည့် သတ်မှတ်နေရာ ဖြစ်လာတော့မည်ဖြစ်သည်။

နယ်မြေအသီးသီးရှိ ထိပ်သီးအင်အားစုများမှ အဆင့်မြင့်ကျင့်ကြံသူ အများအပြားသည် ဟင်းလင်းပြင်သင်္ဘော သို့မဟုတ် ဟင်းလင်းပြင် ဂိတ်တံခါးများဖြင့် အမှောင်ဟင်းလင်းပြင်ကို ဖြတ်သန်းကာ အရှိန်အဟုန်ပြင်းစွာ ခရီးနှင်လာကြသည်။ ယင်းအတွက် ကျင့်ကြံခြင်းစွမ်းအင် အမြောက်အမြားကို ရင်းနှီးပေးဆပ်ခဲ့ကြရသည်။ မူလက ပိုင်ရှင်မဲ့ရှေးဟောင်းနန်းတော်ဖြစ်သော မာနုနယ်မြေသည် ထိပ်သီးအင်အားစုများနှင့် ပညာရှင်များကို လက်ခံတွေ့ဆုံရန် အသင့်တော်ဆုံးနေရာ ဖြစ်ခဲ့သော်လည်း မကြာမီမှာပင် ပြဿနာများ စတင်ပေါ်ပေါက်လာခဲ့သည်။

ထိုပြဿနာမှာ... အရင်းအမြစ် ပြတ်လပ်ခြင်းပင် ဖြစ်သည်။

ဟင်းလင်းပြင်သင်္ဘောဖြစ်စေ၊ ဟင်းလင်းပြင်တံခါးဖြစ်စေ ဂလက်ဆီကို ဖြတ်ကျော်ရန်အတွက် အံ့ဩဖွယ်ကောင်းလောက်အောင် များပြားသည့် စွမ်းအင်များကို အသုံးပြုရသည်။ မာနုနယ်မြေနှင့် နီးကပ်သော အင်အားစုအချို့အတွက်မူ အဆင်ပြေစေကာမူ ဝေးလံသောဒေသမှ လာရသူများမှာမူ မကြာသေးမီက ဖြစ်ပွားခဲ့သော တိုက်ပွဲများကြောင့် အရင်းအမြစ်များ ကုန်ခန်းနေခဲ့ရာ တိုတောင်းလှသော သုံးရက်တာအတွင်း ရောက်ရှိရန် သူတို့၏ ကိုယ်ပိုင်ကျင့်ကြံမှုစွမ်းအားကိုသာ အားကိုးနေကြရသည်။

ဤသည်မှာ လွယ်ကူသောကိစ္စ မဟုတ်ပေ။

အမှန်စင်စစ် လူအများအပြားကို ခေါ်ဆောင်လာရန် မဖြစ်နိုင်သလို၊ အချို့မှာမူ ဟင်းလင်းပြင်တံခါးမှတစ်ဆင့် လူတစ်ဦးတစ်ယောက်ကိုပင် စေလွှတ်နိုင်စွမ်း မရှိတော့ချေ။ သူတော်စင်ရှစ်ပါးထံသို့ စုံစမ်းမေးမြန်းမှုများ ချက်ချင်းရောက်ရှိလာသည်။ လာရောက်ရန် အင်အားမရှိတော့သူများကို ချန်လှပ်ထားခဲ့မည်လော၊ သို့မဟုတ် ရက်ချိန်းကို တိုးပေးမည်လော စသည်ဖြင့် ဖြစ်သည်။

ဤပြဿနာသည် ယခင်က တစ်ခါမျှ မကြုံဖူးသဖြင့် ကြိုတင်တွေးဆထားခြင်း မရှိခဲ့သော အမှားတစ်ခုပင် ဖြစ်သည်။ သူတော်စင်များသည် ထိတ်လန့်ဖွယ် ကောင်းလောက်အောင် အစွမ်းထက်ကြသော်လည်း ဤကိစ္စကို အမြန်ဖြေရှင်းလိုသော ဇောကြောင့် အင်အားစုအသီးသီး ကြုံတွေ့နေရသော ဘုံပြဿနာကြီးကို မမြင်မိဘဲ ရှိခဲ့သည်။

ထိုဘုံပြဿနာမှာ... သူတို့အားလုံး "ဆင်းရဲ" နေကြခြင်းပင်။

ဟင်းလင်းပြင်သင်္ဘောအချို့မှာ လက်ကျန် အမတေကျောက်တုံးများ ကုန်ခန်းသွားပြီးနောက် ကျင့်ကြံခြင်းအခြေခံများကို အစွမ်းကုန်အသုံးပြု၍ ခရီးဆက်ခဲ့သော်လည်း အမှောင်ဟင်းလင်းပြင်အတွင်း လမ်းခုလတ်၌ သောင်တင်နေကြရသည်။ ယခင်က အလျှံပယ်ပေါများခဲ့သဖြင့် စွမ်းအင်အရင်းအမြစ်မှာ ပြဿနာမဟုတ်ခဲ့ဘဲ သင်္ဘော၏ အရည်အသွေးနှင့် အရှိန်ကိုသာ ဂရုစိုက်ခဲ့ကြသော်လည်း ယခုမူ အခြေအနေက ပြောင်းပြန်ဖြစ်နေပြီဖြစ်သည်။

ကုန်ကျစရိတ်သက်သာစွာဖြင့် ပစ္စည်းအမြောက်အမြား သယ်ဆောင်နိုင်သော ဟင်းလင်းပြင်သင်္ဘောများ ပေါ်ပေါက်လာပြီးနောက်ပိုင်း အသုံးနည်းသွားခဲ့သည့် ဟင်းလင်းပြင်တံခါးများမှာမူ ပို၍ပင် ဆိုးရွားလှသည်။ အချို့မှာ နေရာနှစ်ခုအကြား တံခါးဖွင့်ရန် ကြိုးစားသော်လည်း အရင်းအမြစ်နည်းပါးမှုကြောင့် လမ်းခုလတ်တွင် ဆက်သွယ်မှုပြတ်တောက်သွားခဲ့သည်။

အချို့မှာမူ လုံးဝ ပျောက်ဆုံးသွားကြသည်။ သူတို့သည် တံခါးနှစ်ခုကို ဆက်သွယ်ရန် လုံလောက်သော အင်အားရှိသော်လည်း ဝင်ရောက်သူဦးရေနှင့် ပါလာသော အဖိုးတန်ပစ္စည်းများကို တွက်ချက်လိုက်သည့်အခါ သယ်ယူပို့ဆောင်ရေးအတွင်း ဆက်လက်ထိန်းထားရန် အင်အားမလောက်ငတော့ဘဲ ပျောက်ကွယ်သွားရခြင်း ဖြစ်သည်။

အများစုမှာမူ သူတို့၏ ဟင်းလင်းပြင်တံခါးများက အာကာသဆက်သွယ်မှုပြုရန် ကြိုးစားရင်း ရှိသမျှ အကန့်အသတ်ရှိသော ပစ္စည်းများကိုသာ ဝါးမြိုသွားပြီး ဘာရလဒ်မျှ ထွက်မလာသည်ကို ငေးကြည့်နေရုံမှတစ်ပါး ဘာမျှမတတ်နိုင်ဘဲ ဆွံ့အခဲ့ကြရသည်။ အကွာအဝေးက အလွန်အမင်း ဝေးလံလွန်းနေသည် မဟုတ်ပါလား။

ကြေညာချက်ထုတ်ပြန်ပြီး ပထမဆုံးနေ့မှာပင် ဤပြဿနာကို ချက်ချင်း သတိပြုမိသွားကြသည်။

သူတော်စင် နက်ပရီနှင့် သူတော်စင် အီမန်တက်တို့မှာ ဒဏ်ရာများကို ကုသခြင်း သို့မဟုတ် ဧည့်သည်များကို ဧည့်ခံခြင်းတို့ဖြင့် အလုပ်ရှုပ်နေစဉ် ကျန်ရှိသော သူတော်စင်ခြောက်ပါးတို့မှာ စိုးရိမ်ပူပန်သော စိတ်နှလုံးများဖြင့် စုဝေးကာ ဤကိစ္စကို ဆွေးနွေးကြသည်။ ဤသည်မှာ ချမ်းသာကြွယ်ဝသော လူတစ်စုက ခရီးစရိတ်မတတ်နိုင်သော ထောင်ပေါင်းများသော လူများအတွက် လမ်းစရိတ်နှင့် သယ်ယူပို့ဆောင်ရေးကို စဉ်းစားပေးနေရသကဲ့သို့ ဖြစ်နေသဖြင့် ချက်ချင်းလက်ငင်း အဖြေထုတ်ရန် ခက်ခဲနေခဲ့သည်။

သူတော်စင် ခတ်ပရီက သူတို့ကိုယ်တိုင် ဂလက်ဆီကို ဖြတ်ကျော်ပျံသန်းပြီး လူများကို သွားရောက်ခေါ်ယူကာ မာနုနယ်မြေသို့ ပြန်လာရန် အကြံပြုသည်။ ဤသည်မှာ ပင်ပန်းလှသော်လည်း သူတို့၏ စွမ်းအားအရ လက်တွေ့ကျသော နည်းလမ်းဖြစ်သည်။ အချိန်ကုန်သက်သာစေရန် လျှို့ဝှက်အရှင်များကိုလည်း စေလွှတ်ခိုင်းနိုင်သည်။

သို့သော် ဤဂလက်ဆီကြီးသည် မယုံနိုင်လောက်အောင် ကျယ်ပြောလှကြောင်း သူတော်စင် ခတ်ပရီ ကို ပြန်လည်ထောက်ပြကြသည်။ သူတို့၏ စွမ်းအင်များမှာလည်း အပြည့်အဝ ပြန်လည်ကောင်းမွန်ခြင်း မရှိသေးသလို သူတို့တွင် သူတော်စင် အီမန်တက် ကဲ့သို့ အလွယ်တကူ သုံးစွဲနိုင်သော အထွတ်အထိပ်အဆင့် ဆေးလုံးများ မရှိကြချေ။ လိုအပ်သော စီစဉ်ဆောင်ရွက်မှုများမှာလည်း စိတ်ကူးကြည့်ရန်ပင် ခက်ခဲလှသည်။

ထို့ပြင် ဂလက်ဆီအတွင်းရှိ အင်အားစုများမှာ လူထောင်ဂဏန်းမျှသာ မဟုတ်ပေ။ သူတို့သည် အားလုံး၏ အကြံဉာဏ်များကို ရယူလိုခြင်းဖြစ်သဖြင့် ခေါင်းဆောင်အချို့ကိုသာ ရွေးချယ်ခေါ်ယူခြင်းသည် သူတို့၏ ရည်ရွယ်ချက်ကို အကန့်အသတ်ဖြစ်စေပေလိမ့်မည်။ သူတော်စင် ခတ်ပရီ သည် ဤအကြံကို မစွန့်လွှတ်လိုသေးသော်လည်း တစ်နာရီကြာ ဆွေးနွေးပြီးသည့်တိုင် မည်သည့်အဖြေမျှ ထွက်မလာခဲ့ချေ။

ထိုစဉ် သူတော်စင် အာမွန်နက်က ရုတ်တရက် အကြံပြုလိုက်သည်။

"ဟို နယ်ခြားသားတွေကို အကူအညီတောင်းကြည့်ရင်ကော ဘယ်လိုလဲ"

"နယ်ခြားသားတွေ ဟုတ်လား"

သူတော်စင် ခွန်ရှူး၏ ချောမောသော မျက်နှာတွင် မျက်မှောင်ကြုတ်မှုတစ်ခု ပေါ်လာသည်။ ထိုနယ်ခြားသားများသည် မကြာသေးမီက ဂလက်ဆီကို ကူညီခဲ့ကြသဖြင့် သူတို့၏တည်ရှိမှုကို လူအများ သိရှိနေကြပြီဖြစ်သည်။

"အာရုဏ်ဦး အင်ပါယာက လာတဲ့သူတွေကို ပြောတာလား..."

သူတော်စင် နက်ပစ်က တိုးညှင်းစွာ ပြောလိုက်သည်။ သူ၏ အသံထဲတွင် သံသယများ ရောယှက်နေသည်။

"သူတို့နဲ့ ပတ်သက်ပြီး ထပ်သိရတာများ ရှိသေးလား..."

သူတော်စင် ဟားသွောက မေးလိုက်သည်။ သူမသည် သတင်းကွန်ရက် အလွန်ကျယ်ပြန့်ပြီး တိကျသော သူတော်စင် အာမွန်နက် ကို ကြည့်ကာ မေးခြင်းဖြစ်သည်။ ထို့အပြင်... အာမွန်နက်သည် ကောင်းကင် နိမိတ်ဖတ်ပညာရှင် တစ်ဦးလည်း ဖြစ်နေသည် မဟုတ်ပါလော။

"..."

သူတော်စင် အာမွန်နက်သည် ဝတ်ရုံဖြင့် ဖုံးကွယ်ထားသဖြင့် သူမ၏ မျက်နှာအမူအရာကို မမြင်ရသော်လည်း သူမ ဝေခွဲမရဖြစ်နေသည်ကိုမူ အဝေးကပင် ခံစားသိရှိနိုင်ကြသည်။

"သူတို့က အဲဒီလောက်တောင် အကာအကွယ် မြင့်မားတာလား..."

ထိပ်သီးအင်အားစု အများစုသည် သူတို့၏ သတင်းအချက်အလက်များကို နိမိတ်ဖတ်သူ များနှင့် ပရောဟိတ်များ မမြင်နိုင်အောင် ကာကွယ်ထားလေ့ရှိကြသည်။ အာရုဏ်ဦး အင်ပါယာ သည် သန့်စင်သော ဟင်းလင်းပြင်စွမ်းအင်များ ပါဝင်သည့် ကောင်းကင်ရတနာ အဆင့်နီးပါး ပစ္စည်းများကို ပိုင်ဆိုင်ထားသဖြင့် သူတို့၏ ကာကွယ်ရေးမှာ ခိုင်မာမည်မှာ သေချာလှသည်။

သူတော်စင် ခွန်ရှူး၏ မျက်မှောင်ကြုတ်မှုမှာ ပို၍ နက်ရှိုင်းလာသည်။ သူကိုယ်တိုင်လည်း သူ၏ ပရောဟိတ်များနှင့် နိမိတ်ဖတ်သူများကို အသုံးပြု၍ စုံစမ်းခဲ့သော်လည်း အာရုဏ်ဦး အင်ပါယာ နှင့် ပတ်သက်၍ အလွန်နည်းပါးသော အချက်အလက်များကိုသာ ရရှိခဲ့သည်။

ခေတ္တမျှ တိတ်ဆိတ်သွားပြီးနောက် သူတော်စင် အာမွန်နက် က နောက်ဆုံးတွင် ပြောလိုက်သည်။

"အာရုဏ်ဦး အာဏာရှင် အင်ပါယာဟာ ဒီနေရာနဲ့ အလွန်ဝေးကွာတဲ့ ဂလက်ဆီတစ်ခုမှာ သေမျိုးတစ်ဦးအနေနဲ့ သူ့ရဲ့အင်ပါယာကို တည်ထောင်ခဲ့တာပါ... သူဟာ အဂ္ဂိရတ်ပညာရှင် တစ်ဦးဆိုတာကို ကျွန်မတို့ သိရှိရပါတယ်... ဒါ့အပြင် သူ့မှာ သေမျိုးအဆင့်ကနေ လျှို့ဝှက်အဆင့်၊ အထူးသဖြင့် လျှို့ဝှက်လောက အဆင့်အထိ ကျယ်ပြန့်တဲ့ အဂ္ဂိရတ်မျိုးဆက် ရှိပါတယ်... အဲဒီဆေးတွေ အားလုံးဟာ အာရုဏ်ဦးဆိုတဲ့ အမည်နာမကို ခံယူထားပြီး အံ့ဩစရာကောင်းတဲ့ အာနိသင်တွေ ရှိကြပါတယ်..."

နိမိတ်ဖတ်ပညာရပ်များကို အသုံးပြု၍ သတင်းအချက်အလက် စုဆောင်းခြင်းမှာ အမြဲတမ်း ရှိခဲ့သည်။ သို့သော် ဆေးဖော်စပ်နည်းကဲ့သို့သော အသေးစိတ် အချက်အလက်များကို ရယူရန်မှာမူ ကြီးမားသော ပေးဆပ်မှုမပါဘဲ မဖြစ်နိုင်လောက်အောင် ခက်ခဲလှပေသည်။

***