အားလုံးဆင့်ကဲပြောင်းလဲခြင်းနှင့် ဝိုင်းရံမှုကို ဖောက်ထွက်ခြင်း

ငွေရောင်ဘုရင်နဲ့ မီမီရဲ့ ခန္ဓာကိုယ်တွေဟာ အရင်ကထက် ပိုကြီးမားလာပြီး ကိုယ်ပေါ်က သွေးရောင်အစင်းကြောင်းတွေကလည်း ပိုပြီး တောက်ပကာ လှပလာ၏။

ရွှီရှင်းသည် မြေပုံကို အလိုလိုကြည့်လိုက်ရာ ထိုနှစ်ကောင်မှာ အဖော် ကို ကိုယ်စားပြုသည့် အစိမ်းရောင်အစက်အဖြစ် ရှိနေဆဲဖြစ်သည်ကို တွေ့ရသဖြင့် စိတ်အေးသွားရ၏။

ဆင့်ကဲပြောင်းလဲပြီးနောက် သူတို့နဲ့ ချုပ်ထားတဲ့ စာချုပ် တွေ ပျက်သွားမှာကို သူ တကယ် စိုးရိမ်နေခဲ့တာ ဖြစ်သည်။

အထူးသဖြင့် မီမီ ပင်...

ဗီဇပြောင်းသားရဲ စာချုပ် က အဆင့်နိမ့်ဗီဇပြောင်းသားရဲတွေအပေါ်မှာပဲ အလုပ်လုပ်လေသည်။

အခုတော့ စာချုပ် ချုပ်ပြီးမှ အဆင့်တက်သွားတာက ဘာသက်ရောက်မှုမှ မရှိဘူးဆိုတာ သေချာသွားပြီဖြစ်သည်။

ရွှီရှင်း ခြေလှမ်းအနည်းငယ် လှမ်းလိုက်စဉ်မှာပင် ငွေရောင်ဘုရင်က ရုတ်တရက် အရှေ့သို့ ခုန်အုပ်လိုက်၏။

"၀ုန်း"

ရွှီရှင်းမှာ ကြမ်းပြင်ပေါ်သို့ ပက်လက်လန် လဲကျသွားတော့၏။

"အီးးး"

ခဲခဲလေး ထိတ်လန့်သွားပြီး ငွေရောင်ဘုရင်ကို လက်သည်းနဲ့ ကုတ်ရန် ပြင်လိုက်သော်လည်း ၎င်း၏ လက်သည်းများမှာ ငွေရောင်ဘုရင်၏ သားမွှေးထူထူထဲတွင် နစ်ဝင်သွားရုံသာ ရှိပြီး ဘာဒဏ်ရာမှ မရစေပေ။

ရွှီရှင်းကတော့ ရှောင်တိမ်းခြင်း မပြုခဲ့ပေ။

အကြောင်းမှာ ငွေရောင်ဘုရင်ထံမှ ရန်လိုသည့် ခံစားချက်မျိုး သူ မရသောကြောင့် ဖြစ်သည်။

ထင်ထားသည့်အတိုင်းပင် ငွေရောင်ဘုရင်သည် ရွှီရှင်းကို လဲအောင်လုပ်ပြီးနောက် သူ့မျက်နှာကို လျှာဖြင့် ရက်နေပြီး အလိုလိုက်ခံချင်သည့် ခွေးကြီးတစ်ကောင်လို တအီအီ အသံပြုနေတော့သည်။

အရင်ကထက် ပိုတုတ်ပြီး ထက်လာတဲ့ ဝံပုလွေစွယ်ကြီးနှစ်ချောင်းမှာ ရွှီရှင်းမျက်နှာနားမှာ ဟိုဟိုဒီဒီ လှုပ်ရှားနေပေမဲ့ သူ့ကိုတော့ တစ်စက်ကလေးမှ မထိအောင် သေချာရှောင်ပေးထား၏။

"ဟားဟား... တော်ပြီ၊ တော်ပြီ"

ရွှီရှင်းက ငွေရောင်ဘုရင်ရဲ့ ပါးစပ်ကြီးကို တွန်းထုတ်လိုက်သည်။

ငွေရောင်ဘုရင်ကတော့ အရင်က ငွေရောင်ဘုရင်ပါပဲ၊ ဒါပေမဲ့ အလယ်အလတ်အဆင့် ဗီဇပြောင်းသားရဲ ဖြစ်သွားတော့ သူ့ရဲ့ စရိုက်က ပိုပြီး တက်ကြွလာသလိုပင်။

မီမီကလည်း အနားသို့ တိုးကပ်လာပြီး ရွှီရှင်းကို ကြည့်သည့် အကြည့်မှာ အရင်ကထက် အများကြီး ပိုပြီး ရင်းနှီးဖော်ရွေလာ၏။

မီမီရဲ့ ရှေ့လက်သည်းတွေကလည်း ပိုပြီး ထက်လာတာကြောင့် လမ်းလျှောက်လိုက်တိုင်း သစ်ပင်အိမ် ကြမ်းပြင်မှာ အပေါက်ကလေးတွေ ကျန်ခဲ့တာကို ရွှီရှင်း သတိပြုမိလိုက်၏။

"မီမီ၊ လက်သည်းတွေကို ပြန်သိမ်းထားဦး၊ ကြမ်းပြင်ကို မဖောက်နဲ့လေ"

ရွှီရှင်း ချက်ချင်းပင် ထရပ်လိုက်သည်။

သစ်ပင်အိမ်က အလိုအလျောက် ပြန်လည်ကောင်းမွန်နိုင်တယ်ဆိုပေမဲ့ မီမီက လမ်းလျှောက်တိုင်း ဒီလိုလုပ်နေရင်တော့ မသက်သာလှပေ။

မီမီက မကျေမနပ်ဖြစ်သလို ညောင်ခနဲ အော်လိုက်၏။

၎င်းသည် လက်သည်းများကို တစ်ဝက်ခန့် ရုပ်သိမ်းထားသော်လည်း ဆင့်ကဲပြောင်းလဲမှုကြောင့် လက်သည်းများမှာ ပိုရှည်ပြီး ထက်လာသဖြင့် ထိခိုက်မှု ရှိနေခြင်း ဖြစ်သည်။

မီမီက ကိုယ်ဟန်အနေအထားကို ပြင်လိုက်ပြီး လက်သည်းများကို ပို၍ အထဲသို့ ဆွဲသွင်းလိုက်၏။

အနည်းငယ် ထွက်နေဆဲဖြစ်သော်လည်း ကြမ်းပြင်ကိုတော့ မထိခိုက်တော့ပေ။

"ဟူး... တော်သေးတာပေါ့"

ရွှီရှင်း သက်ပြင်းချလိုက်မိသည်။

အနည်းဆုံးတော့ မီမီက လမ်းလျှောက်ရင်း အိမ်ကို ဖျက်ဆီးပစ်မှာ မစိုးရိမ်ရတော့ပေ။

အာဖုကလည်း ပျံသန်းလာပြီး မီမီ၏ ကျောပေါ်တွင် နားလိုက်၏။

"ဝိုး... မင်းလည်း တော်တော်ကြီးလာတာပဲ"

အာဖု၏ အတောင်ပံ ခတ်လိုက်သည့် ပုံစံကို ကြည့်ပြီး ရွှီရှင်း အံ့သြသွားရသည်။

၎င်း၏ တောင်ပံဖြန့်ကားမှုမှာ ၂ မီတာနီးပါး ရှိနေချေပြီ။

ထို့အပြင် တောင်ပံအတွင်းဘက်ရှိ သွေးကြောများမှာလည်း အလွန်တောက်ပနေပြီး အရင်ကနဲ့ လုံးဝမတူတော့ပေ။

အာဖုက ဘယ်လို သတ္တဝါမျိုးလဲ သူ မသိပေမဲ့ ၎င်းဟာ ဘယ်တုန်းကမှ အရွယ်အစား အကြီးကြီးဖြစ်မယ့် လင်းနို့မျိုး မဟုတ်ခဲ့ပေ။

အာဖုက လင်းနို့အုပ်စုတစ်ခုလုံးထဲမှာ သူ ရွေးထုတ်ခဲ့တဲ့ အကြီးဆုံးကောင် ဖြစ်ပေမဲ့ အစကတော့ အတောင်ပံဖြန့်ကားမှုမှာ ၁ မီတာတောင် မပြည့်ခဲ့ပေ။

သူ့ပခုံးပေါ်မှာဆို သေးသေးလေးပင်။

ဒါပေမဲ့ အခုတော့ သူ မြင်ဖူးတဲ့ သိန်းငှက်ကြီးတွေ လောက်နီးပါး ကြီးနေပြီဖြစ်သည်။

အာဖုက စူးရှသည့် အသံတစ်ခု ပြုလိုက်၏။

ခန္ဓာကိုယ် ကြီးထွားလာသော်လည်း ၎င်း၏ အော်သံမှာ အရင်ကအတိုင်း စူးစူးရှရှပင် ဖြစ်သည်။

ရွှီရှင်းက ငွေရောင်ဘုရင်ရဲ့ ခေါင်းကို ပုတ်ပေးရင်း နောက်ပြောင်လိုက်သည်။

"ငွေရောင်ဘုရင်၊ မင်းတို့ လေးကောင်ထဲမှာ မင်းတစ်ကောင်ပဲ ချွဲတတ်တဲ့ ကောင် မဟုတ်တာပဲ ရှိတော့တယ်"

"ဝူးးး"

ငွေရောင်ဘုရင်က ခေါင်းမော့ကာ ဟိန်းဟောက်လိုက်သည်။

တကယ်ပဲ ခဲခဲလေးနဲ့ အာဖုကတော့ ချွဲတတ်တဲ့ကောင်လေးတွေ ဖြစ်နေပြီ။

မီမီကတော့ ခန္ဓာကိုယ်ကြီးပေမဲ့ သူ့အသံကတော့ ကြောင်လေးတစ်ကောင်လို ညောင်ညောင်ပဲ ရှိသေးတာ။

သူက ကျားသစ်မျိုးနွယ် ဖြစ်ပေမဲ့ အသံအိုးတည်ဆောက်ပုံက ခြင်္သေ့တို့ ကျားတို့လို မဟိန်းနိုင်တော့ တစ်သက်လုံး ညောင်နေရုံပဲ ရှိမှာလားမသိဘူး။

ရွှီရှင်းက သူတို့ကို ပြတင်းပေါက်နား ခေါ်သွားပြီး အပြင်က နွယ်ပင်တွေကို လက်ညှိုးထိုးပြကာ သူ့ရဲ့ အစီအစဉ်ကို စတင်ရှင်းပြလိုက်သည်။

ဝိုင်းရံမှုကို ဖောက်ထွက်ဖို့ဆိုရင် အရင်ဆုံး နင်းလို့ရမယ့် နေရာတစ်ခု ဖန်တီးရမည်။

သူက ပေါက်ကွဲမြှားတွေကို သုံးပြီး သစ်ပင်အိမ်အောက်က နွယ်ပင်တွေကို ဗုံးခွဲကာ နေရာလွတ်တစ်ခု အရင်ဖန်တီးမည်။

ပြီးမှ ငွေရောင်ဘုရင်နဲ့ မီမီကို အောက်သို့ ခေါ်သွားမည် ဖြစ်သည်။

အဲဒီနောက်မှာတော့ သူတို့ရဲ့ အစွမ်းပြရမယ့် အချိန်ပင်။

ဒီသွေးရောင်ဆူးနွယ်ပင်တွေက အဆင့်နိမ့် အဆင့် ဗီဇပြောင်းသတ္တဝါတွေပဲ ဖြစ်ပြီး အရေအတွက်ကိုပဲ အားကိုးတာလေ။

အလယ်အလတ်အဆင့် ဗီဇပြောင်းသားရဲတွေ ဖြစ်သွားတဲ့ ငွေရောင်ဘုရင်နဲ့ မီမီရဲ့ ဟိန်းသံနဲ့တင် ဒီနွယ်ပင်တွေကို ခြောက်လှန့်ပြီး လမ်းဖောက်ထွက်နိုင်မှာ သေချာပါသည် ဟု ရွှီရှင်း တွေးလိုက်မိသည်။

"ငွေရောင်ဘုရင်၊ နောက်တစ်ကြိမ်လောက် ထပ်ပြီး ဟိန်းပြပါဦး"

"ဝူးးး... ဝူးးးးးး"

ရွှီရှင်း ဘာကို ဆိုလိုမှန်း မသေချာသော်လည်း ငွေရောင်ဘုရင်က ခေါင်းမော့ကာ ထပ်မံဟိန်းဟောက်လိုက်၏။

ငွေရောင်ဘုရင် ဟိန်းဟောက်လိုက်သည့်အခါ သစ်ပင်အိမ်အောက်ရှိ နွယ်ပင်များမှာ ကြောက်ရွံ့စွာဖြင့် အောက်သို့ ငုံ့ဆင်းသွားကြသည်။

အဆင်ပြေမှာပါ...

သူတို့နှစ်ကောင်က ဒီနွယ်ပင်တွေအပေါ်မှာ တော်တော်လေး လွှမ်းမိုးနိုင်စွမ်း ရှိတာပဲ။

မီမီနဲ့ ငွေရောင်ဘုရင်က သာမန် အလယ်အလတ်အဆင့် ဗီဇပြောင်းသားရဲတွေ မဟုတ်ပေ။

သူတို့က သူတို့၏ မျိုးနွယ်စုများထဲတွင် အကြီးဆုံးနှင့် မွေးကတည်းက အစွမ်းထက်ခဲ့သည့် ကောင်များ မဟုတ်ပါလား။

ဗီဇပြောင်းလိုက်ခြင်းက သူတို့၏ မူလစွမ်းအားများကို ပိုပြီး မြှင့်တင်ပေးလိုက်သလို ဖြစ်သွားသည်။

အဆင့်တူ သားရဲတိုင်း အစွမ်းတူသည် မဟုတ်ပေ။

အရင်က ယဇ်ပလ္လင် မှ ဆင့်ခေါ်ခဲ့သည့် အလယ်အလတ်အဆင့် တောကြောင်ဆိုလျှင် ဗီဇမပြောင်းထားသည့် ကျားတစ်ကောင်၏ လက်ဝါးရိုက်ချက် တစ်ချက်တည်းနှင့်တင် သေသွားခဲ့သည် မဟုတ်ပါလား။

မူလအခြေခံ အစွမ်းကလည်း အရေးကြီး၏။

အစကတည်းက အစွမ်းနည်းလျှင် ဗီဇပြောင်းလဲသော်လည်း သာမန်သာ ဖြစ်ပေလိမ့်မည်။

ငွေရောင်ဘုရင်နှင့် မီမီမှာမူ အစွမ်းအထက်ဆုံး အလယ်အလတ်အဆင့်များထဲတွင် ပါဝင်နေသဖြင့် ဤနွယ်ပင်အုပ်စုကို ဖြေရှင်းဖို့မှာ ပြဿနာရှိမှာ မဟုတ်ပေ။

ရွှီရှင်းသည် ရုတ်တရက် ဝက်ဝံကြီး ကို သတိရလိုက်မိသည်။

ထိုဝက်ဝံကြီးမှာ ဗီဇမပြောင်းလဲသေးခင်ကပင် အလွန်အစွမ်းထက်ခဲ့ခြင်း ဖြစ်၏။

အကယ်၍ ငွေရောင်ဘုရင်နှင့် မီမီတို့သာ ထိုဝက်ဝံကြီးနှင့် ယှဉ်တိုက်ရပါက ဘယ်သူနိုင်မည်ဆိုသည်မှာ မသေချာသေးပေ။

အကယ်၍ အဲဒီဝက်ဝံကြီးကိုပါ ဗီဇပြောင်းသားရဲအဖြစ် ပြောင်းလဲပြီး ယဉ်ပါးအောင် လုပ်နိုင်လျှင် အဖွဲ့ရဲ့ တိုက်ခိုက်ရေးစွမ်းအားက ကိန်းဂဏန်းတွေနဲ့တောင် တိုင်းတာလို့ မရအောင် တက်လာမှာပင်။

ဒါပေမဲ့...

အစာကျွေးရမည့် ပမာဏကလည်း အဆမတန် တက်လာပေလိမ့်မည်။

အခန်း ၁၅၈ ပြီး။