ဧကရာဇ်မင်းမြတ် ချီးမြှင့်သော ဆုလာဘ်များ

ဧကရာဇ်မင်းမြတ် ပလ္လင်ထက်တွင် ထိုင်လိုက်သည်နှင့် တစ်ပြိုင်နက် မဟာအခမ်းအနား ခန်းမဆောင်ကြီးအတွင်းရှိ လေထုမှာ လုံးဝဥဿုံ ပြောင်းလဲသွားလေသည်။

မဟာကောင်းကင်ဘုံတက်ခြင်းအဆင့် ကျင့်ကြံသူများပင်လျှင် သူတို့၏ ပုခုံးထက်၌ အလိုအလျောက် ကျရောက်လာသော ဖိအားတစ်ခုကို ခံစားလိုက်ရသည်။ ၎င်းမှာ ကျင့်စဉ်အဆင့်၏ ဖိနှိပ်မှုမျိုး မဟုတ်ဘဲ ပို၍ စိတ်မသက်မသာဖြစ်စေသော အရာတစ်ခုပင်...။

အာဏာစက်ပင်

ရာစုနှစ်ပေါင်းများစွာ အုပ်ချုပ်မင်းလုပ်လာခဲ့သူတစ်ဦးထံမှသာ ထွက်ပေါ်လာနိုင်သော အရှိန်အဝါမျိုး ဖြစ်သည်။

ဧကရာဇ်၏ အကြည့်တို့သည် ခန်းမတစ်ခုလုံးကို ဖြည်းညှင်းစွာ လှည့်လည်ကြည့်ရှုပြီး သူသည် အရေးတကြီး မလုပ်ပေ။ ချက်ချင်းလည်း စကားမဆိုသေးချေ။ ခန်းမတစ်ခုလုံး လုံးဝဥဿုံ တိတ်ဆိတ်သွားတော့မှသာ သူ၏ နှုတ်ခမ်းကို ဖွင့်ဟလိုက်သည်။

"ဒီနေ့မှာတော့..." ဧကရာဇ်က တည်ငြိမ်စွာ ဆိုသည်။ သူ၏ အသံမှာ ကျယ်လောင်ခြင်း၊ တိုးညှင်းခြင်း မရှိသော်လည်း ကျယ်ပြောလှသော ခန်းမဆောင်၏ ထောင့်တိုင်းသို့ ရှင်းလင်းစွာ ပဲ့တင်ထပ်သွားသည်။ "ငါတို့တွေ အောင်ပွဲကို ဆင်နွှဲကြမယ်”

သူ၏ စကားလုံးများမှာ ရိုးရှင်းလှသည်။

"မိစ္ဆာတပ်ဖွဲ့တွေကို မောင်းထုတ်နိုင်ခဲ့ပြီ။ မိစ္ဆာသားရဲလှိုင်းတွေကိုလည်း ချေမှုန်းနိုင်ခဲ့ပြီ။ ကောင်းကင်အင်ပါယာရဲ့ နယ်နိမိတ်တွေက အထိအခိုက်မရှိ မြဲမြံနေဆဲပဲ။"

သူသည် ခဏမျှ ရပ်တန့်လိုက်၏

"ဒီရလဒ်က တစ်ဦးတစ်ယောက်တည်းရဲ့ ကြိုးစားမှုနဲ့ ရရှိလာတာ မဟုတ်ဘူး။"

သူ၏ အကြည့်တို့သည် ခန်းမအတွင်းရှိ အဖွဲ့အစည်း အသီးသီးထံသို့ ကျရောက်သွားသည်။

"မျိုးနွယ်စုတွေ..."

"ဂိုဏ်းဂဏတွေ..."

"ရှေ့တန်းစစ်မျက်နှာမှာ ရပ်တည်ခဲ့တဲ့ စစ်သူကြီးတွေနဲ့ ကျင့်ကြံသူတွေ..."

"ပြီးတော့ မိမိတို့ရဲ့ သွေးနဲ့ ပေးဆပ်ခဲ့ကြတဲ့ ကျင့်ကြံသူတွေ..."

ဧကရာဇ်က သူ၏ဦးခေါင်းကို အနည်းငယ် ငြိမ့်ပြလိုက်သည်။ ၎င်းမှာ သတိထားမိရန် ခက်ခဲသော အမူအရာဖြစ်သော်လည်း အလွန်ပင် လေးနက်လှသည်။

"ဒါကြောင့်မို့လို့... ငါကိုယ်တော်က မင်းတို့ကို အသိအမှတ်ပြုတယ်။"

ထိုစကားလုံးများမှာ အလေးအနက် ရှိလှသည်။ ဤနေရာရှိ လူအားလုံး၏ အထက်တွင် သူရှိနေသယောင်ပင်။

ကြယ်ကြွေအင်ပါယာကဲ့သို့သော နေရာမျိုးတွင် ဤသို့ ပြောကြားခြင်းမှာ သာမန်ကိစ္စဖြစ်နိုင်၏

သို့သော် ကောင်းကင်အင်ပါယာတွင်မူ မတူညီပေ။

ပိုင်၊ လီ၊ ကျောက် စသည့် မျိုးနွယ်ကြီးများသည် တော်ဝင်မိသားစုနှင့် အဆင့်အတန်း တန်းတူနီးပါး ရှိသည်ဟု သတ်မှတ်ကြသည်။

ထိုသို့သော ပုဂ္ဂိုလ်များရှေ့တွင် ဤကဲ့သို့ မိန့်ကြားလေ့မရှိပေ။

သို့သော် ယနေ့တွင်မူ ဧကရာဇ်က တုံ့ဆိုင်းမှုမရှိဘဲ ဆိုလိုက်ပေ၏

၎င်းမှာ သူ၏ အာဏာစက်ကို ပြသနေခြင်းပင် ဖြစ်သည်။

ထူးခြားသည်မှာ ပိုင်၊ လီ နှင့် ကျောက် မျိုးနွယ်စုများမှာ ထိုစကားကို ဂရုစိုက်ပုံမရချေ။

အဘယ်ကြောင့်ဆိုသော် စကားလုံးများမှာ အဓိပ္ပာယ်မရှိပေ

စစ်မှန်သော အစွမ်းသာလျှင် အရေးကြီးကြောင်း သူတို့ သိထားသောကြောင့် ဖြစ်သည်။

ထို့နောက် ဧကရာဇ်၏ အကြည့်တို့သည် ရွေ့သွား၏

တစ်နေရာသို့ ပိုမိုရှင်းလင်းစွာ ကျရောက်သွားသည်။

ပိုင်မျိုးနွယ်စု

ထိုမျိုးနွယ်၏ အလယ်ဗဟိုရှိ

ပိုင်ကျီဟန်

ဧကရာဇ်၏ မျက်လုံးများသည် ထိုနေရာတွင် လိုအပ်သည်ထက် အနည်းငယ်မျှ ပို၍ ကြာမြင့်စွာ တန့်နေခဲ့သည်။

သိသာလွန်းခြင်း မရှိပေ

သို့တိုင် ပိုင်ကျီဟန်ကမူ ရှင်းလင်းစွာ ခံစားလိုက်ရသည်။

(ရန်လိုမှုလား?)

မဟုတ်ပေ။

ထိုမျှအထိ ကြမ်းတမ်းခြင်း မရှိပေ

၎င်းမှာ စူးစမ်းလေ့လာမှုနှင့် ပို၍ တူညီနေသည်။

ပိုင်ကျီဟန်သည် သူ၏ ကိုယ်နေဟန်ထားကို သက်သောင့်သက်သာပင် ထားရှိပြီး မျက်နှာထားမှာလည်း ပုံမှန်အတိုင်းပင်။

ထွက်ပေါ်နေသော ကောလာဟလများအတိုင်း ချီစွမ်းအင် လှုပ်ခတ်မှု မရှိသည့် ဒုက္ခိတ လူငယ်တစ်ဦးအသွင်ပင်။

(ဒီဧကရာဇ်က...)

သူမြင်နေရသည့် ပုံရိပ်နှင့် သူရရှိထားသော သတင်းအချက်အလက်မှာ ကိုက်ညီမှု မရှိချေ။

အကယ်၍ ခုန်ကျန်းဟုန်၏ အစီရင်ခံစာသာ မှန်ကန်ပါက ဤဧကရာဇ်သည် ယခုကဲ့သို့ ဤနေရာတွင် ထိုင်နေနိုင်ရန် မစွမ်းသာသင့်ပေ။

သို့ဆိုလျှင်

(ခေတ္တမျှ နာလန်ထလာတာလား? ဒါမှမဟုတ် အစားထိုး တစ်ယောက်လား?)

ကျွမ်းကျင်သူ အများအပြား ရှိနေသည့် ဤနေရာတွင် အစားထိုးတစ်ဦးကို သုံးရန်မှာ မဖြစ်နိုင်သလောက်ပင်။

အကယ်၍ လူတိုင်းသိထားသော ဧကရာဇ် မဟုတ်ပါက ချက်ချင်း ရိပ်မိသွားကြလိမ့်မည်။

ထို့ကြောင့် ပထမအချက်မှာ ပို၍ ဖြစ်နိုင်ချေရှိသည်။

အသက်ဓာတ်ကို ခေတ္တပြန်လည် ရရှိစေသော ဆေးလုံးများ ရှိသော်လည်း နောက်ဆက်တွဲဒဏ်မှာ အလွန်ပြင်းထန်လှသည်။

ကောင်းကင်အင်ပါယာတွင်မူ ထိုဆေးမျိုးမှာ မကြားဖူးသလောက် ရှားပါးလှသည်။

အမှန်တရားက ဘာလဲ?

ဘယ်သူသိနိုင်မည်နည်း

ဧကရာဇ်သည် ရန်သူများကို လှည့်ဖျားရန်အတွက် နှစ်ပေါင်းများစွာ နာမကျန်းဖြစ်ဟန် ဆောင်နေခြင်းလည်း ဖြစ်နိုင်သည်။

သို့သော် ထိုသို့ဆိုပါက အဘယ်ကြောင့် ယခုအချိန်မှ ပေါ်ထွက်လာသနည်းဆိုသည်ကို ပိုင်ကျီဟန် နားမလည်နိုင်ပေ။

မည်သို့ပင်ဖြစ်စေ...

ဤသည်မှာ သူစူးစမ်းရမည့် အချက်တစ်ခုပင် ဖြစ်သည်။

ထိုစဉ်အတွင်း ဧကရာဇ်က ဆက်လက်မိန့်ကြားသည်။

"စွမ်းဆောင်ရည်တွေကို ဆုလာဘ် ချီးမြှင့်ရမယ်။ ဒီအခမ်းအနားဟာ အဲဒီအတွက်ပဲ ဖြစ်တယ်။"

သူသည် လက်ကို အသာအယာ မြှောက်လိုက်သည်။

ထိုအမူအရာနှင့်အတူ နန်းတွင်းအစေခံများမှာ လင်းလက်တောက်ပနေသော အခင်းအကျင်းများဖြင့် ပိတ်သိမ်းထားသည့် ရတနာများကို ကိုင်ဆောင်ကာ ရှေ့သို့ တက်လာကြသည်။

ထိုရတနာများမှ ထွက်ပေါ်နေသော အရှိန်အဝါ မှာပင် လူတို့၏ အသက်ရှူသံကို ရပ်တန့်စေလောက်သည်။

ဧကရာဇ်၏ အသံ တစ်ဖန် ထွက်ပေါ်လာသည်။

"ပထမဆုံးသော ဂုဏ်ပြုထိုက်တဲ့ စွမ်းဆောင်ရည်ရှင်ကတော့ မဟာအကြီးအကဲ ပိုင်ရမ် ပဲ ဖြစ်တယ်။"

ထိုအမည်ကို ခေါ်လိုက်သည်နှင့် ခန်းမအတွင်းရှိ လူပေါင်းများစွာ၏ အကြည့်တို့သည် ပိုင်မျိုးနွယ်စု ကြားတွင် ရပ်နေသော သက်ကြီးရွယ်အို ပုဂ္ဂိုလ်ကြီးထံသို့ ရောက်ရှိသွားသည်။

ပိုင်ရမ်သည် ဖြည်းညှင်းစွာ ရှေ့သို့ လှမ်းတက်လာသည်။

သူသည် မိစ္ဆာဂိုဏ်း၏ အမာခံ ကျွမ်းကျင်သူတစ်ဦးဖြစ်သော ကုံးယောင်ကို ကိုယ်တိုင် သတ်ဖြတ်ခဲ့သူ ဖြစ်သည်။

ထို့ပြင် ဘေးအန္တရာယ်တစ်ခုအဖြစ် သတ်မှတ်ခံရသည့် ချီလင်းတပိုင်းသားရဲကိုလည်း လိုက်လံနှိမ်နင်း သတ်ဖြတ်ခဲ့သူ ဖြစ်သည်။

သူ၏ စွမ်းဆောင်ရည်မှာ မည်သူမျှ မငြင်းသာပေ။

"ကုံးယောင်ကို သတ်ဖြတ်နိုင်ခဲ့တာ..."

"ချီလင်းကို အမြစ်ပြတ် နှိမ်နင်းနိုင်ခဲ့တာ..."

"ဒါတွေကြောင့်..." ဧကရာဇ်က ဆက်ပြောသည်။ "မင်းရဲ့ စွမ်းဆောင်ရည်ဟာ အမြင့်ဆုံးမှာ ရှိတယ်။"

ဧကရာဇ်၏ အချက်ပြမှုအရ အစေခံတစ်ဦးသည် ရှေ့သို့တက်ကာ ဆုလာဘ်များကို ဖွင့်ပြလိုက်သည်။ ခန်းမအတွင်းရှိ လူအများမှာ အံ့အားသင့်စွာဖြင့် အသက်ရှူမှားသွားကြသည်။

ကျောက်စိမ်းပုလင်း ဆယ်လုံးသည် လေထုထဲတွင် ဝဲပျံနေပြီး တစ်လုံးချင်းစီ၌ သွေးနီရောင် မှော်စာလုံးများဖြင့် ပိတ်သိမ်းထားသည်။

ပုလင်းအတွင်း၌ ပျစ်ခဲသော အနီရောင် အရည်များမှာ တုန်ခါနေပြီး ကြောက်မက်ဖွယ်ကောင်းသော အသက်ဓာတ်များကို ထုတ်လွှတ်နေသည်။

"ချီလင်းရဲ့ သန့်စင်ပြီးသား သွေးစက် ဆယ်ပုလင်း”

လီကျန်းဟုန် နှင့် ကျောက်ဝူထျန်း တို့ပင်လျှင် သူတို့၏ မျက်နှာအမူအရာကို မဖုံးကွယ်နိုင်တော့ချေ။

ထိုချီလင်းသွေးစက်များသည် သာမန်ကျင့်ကြံသူတစ်ဦး၏ ကံကြမ္မာကို ပြောင်းလဲပေးနိုင်စွမ်း ရှိသည်။

ဆယ်ပုလင်းဆိုသည်မှာ

ဆေးဖော်စပ်သူတစ်ဦး၏ လက်ထဲတွင် အဆင့်မြင့် ဆေးလုံးများစွာ ထွက်ပေါ်လာနိုင်သည့် အဖိုးတန် ရတနာပင်

ထိုရတနာများသည် သာမန်ချမ်းသာမှုဖြင့် ရရန်မလွယ်ကူပေ

ထို့နောက် နောက်ထပ် အစေခံတစ်ဦးက ရှေ့သို့ တက်လာပြန်သည်။

ချပ်ဝတ်တန်ဆာတစ်ခုသည် လေထဲတွင် ပွင့်ထွက်လာသည်။

ကြေးခွံများသည် အရည်ပျော်နေသော သတ္တုများကဲ့သို့ တောက်ပနေပြီး တစ်ခုနှင့်တစ်ခု ချောမွေ့စွာ ဆက်စပ်နေကာ ခံစစ်ဆိုင်ရာ မှော်စာလုံးများစွာ ထွင်းထုထားသည်။

ရှေးဟောင်းသားရဲတစ်ကောင်၏ အရှိန်အဝါမှာလည်း ထွက်ပေါ်နေသည်။

"ချီလင်း အရေခွံကနေ သန့်စင်ဖော်စပ်ထားတဲ့ ကောင်းကင်အဆင့်အလတ်စား ချပ်ဝတ်တန်ဆာ”

ခန်းမတစ်ခုလုံး တိတ်ဆိတ်သွားသည်။

ကောင်းကင်အဆင့် အလတ်စား

ထိပ်တန်းမျိုးနွယ်စုများအတွက်ပင် ထိုရတနာမျိုးမှာ အလွန်ရှားပါးလှသည်။

ထိုချပ်ဝတ်တန်ဆာနှင့် သူတော်စင်အဆင့်ဓားရှိနေသော ပိုင်ရမ်ကို မည်သူကများ ရင်ဆိုင်နိုင်ဦးမည်နည်း။

ပိုင်ရမ်သည် ဆုလာဘ်များကို တည်ငြိမ်စွာ လက်ခံလိုက်ပြီး လက်အုပ်ချီလျက်—

"ကျွန်တော်မျိုး ဧကရာဇ်မင်းမြတ်ကို ကျေးဇူးတင်ရှိပါတယ်"

ဧကရာဇ်က ခေါင်းတစ်ချက် ငြိမ့်ပြလိုက်ပြီး အကြည့်ကို ပြောင်းလိုက်သည်။

"ဒုတိယမြောက် စွမ်းဆောင်ရည်ရှင်ကတော့ မြောက်ပိုင်း ကာကွယ်ရေးတပ်ကို ဦးဆောင်ခဲ့တဲ့ စစ်သူကြီးပဲ။"

လူတိုင်း လှည့်ကြည့်လိုက်ကြသည်။

"စစ်သူကြီး ဝေကျုံးယွမ်”

စစ်သူကြီးဝေသည် ရှေ့သို့ တက်လာသည်။

သူ၏ ချပ်ဝတ်တန်ဆာမှာ ရိုးရှင်းသော်လည်း သူ၏ တည်ငြိမ်မှုကြောင့် လူအများက လေးစားကြသည်။

ပိုင်ရမ်၏ တစ်ဦးချင်း အစွမ်းထက်မှုနှင့် မတူဘဲ သူ၏ စွမ်းဆောင်မှုမှာ အခြားတစ်မျိုး ဖြစ်သည်။

"စစ်ကူတွေ မရောက်လာခင်မှာ..." ဧကရာဇ်က ဆိုသည်။ "မင်းဟာ မြောက်ပိုင်းကာကွယ်ရေးတပ်ကို မိစ္ဆာတွေရဲ့ အဆက်မပြတ် တိုက်ခိုက်မှုတွေကြားကနေ ထိန်းထားနိုင်ခဲ့တယ်။"

"အဲဒီနောက်မှာလည်း စစ်တလင်းကို တည်ငြိမ်အောင်လုပ်တယ်၊ ပြန်လည်တိုက်စစ်ဆင်တာတွေကို ညှိနှိုင်းဆောင်ရွက်ပေးခဲ့ပြီး လူပေါင်းများစွာရဲ့ အသက်ကို ကယ်တင်နိုင်ခဲ့တယ်။ မင်းရဲ့ ဦးဆောင်မှုသာ မရှိရင် မြောက်ပိုင်းကာကွယ်ရေးတပ်ဟာ ပြိုလဲသွားမှာပဲ။"

မည်သူမျှ မငြင်းဝံ့ကြပေ။

အကယ်၍ ထိုတပ်သာ ပြိုလဲသွားပါက ဒေသတစ်ခုလုံး မိစ္ဆာများလက်ထဲ ကျရောက်သွားမည် ဖြစ်သည်။

အသက်ပေါင်းများစွာသေဆုံးရမည်သာ။

“ အဲ့အတွက်” ဧက္ကရာဇ်က ပြောလေ၍ “ သူ့လုပ်ဆောင်ချက်တွေက ဒုတိယအဆင့်ပဲ”

ဆုလာဘ်များကို အင်မော်တယ်အဆင့်များမှ စတင်၍ မဟာကောင်းကင်ဘုံတက်ခြင်းအဆင့်ရှိ စစ်သူကြီးဝေအထိ ဆက်လက် ချီးမြှင့်နေသည်။

ထို့နောက်တွင် မျိုးနွယ်စု ခေါင်းဆောင်များနှင့် ဂိုဏ်းချုပ်များအား သူတို့၏ အဖွဲ့အစည်းအလိုက် စွမ်းဆောင်မှုများအတွက် ဆုချီးမြှင့်သည်။

ပိုင်မျိုးနွယ်စုသည် နယ်မြေအသစ်များနှင့် မိစ္ဆာသားရဲများထံမှ ရရှိသော အရင်းအမြစ်များစွာကို ရရှိခဲ့သည်။

လီနှင့် ကျောက် မျိုးနွယ်စုများလည်း ရရှိကြသည်။

ထို့နောက်တွင်မူ...

ဧကရာဇ်က ဖြည်းညှင်းစွာ ပြောကြားလိုက်သည်။ "နောက်တစ်ယောက်ကတော့... ပိုင်မျိုးနွယ်စုက ပိုင်ကျီဟန်”