အခန်း (၄၅၇-၄၅၈)

အခန်း ၄၅၇ ဓားတာအိုသူတော်စင်ဘိုးဘေးအဖြစ် ရောက်ရှိခြင်း

နှစ်ခုနစ်သောင်းအရွယ် လွတ်ငြိမ်းရာအမတတစ်ဦးသည် ဤကျင့်ကြံဆင့်နယ်ပယ်ကို တံခါးပိတ်ကျင့်ကြံခြင်းဖြင့် ရရှိခဲ့သည်။

ဤသည်မှာ အထင်ကြီးဖွယ်ရာပင်။

ကုအန်သည် ယန်ရှန်း၏ အနာဂတ်အတွက် ပိုမိုစိတ်လှုပ်ရှားနေပြီး သူသည် လွတ်ငြိမ်းရာအမတနယ်ပယ်ကို ကျော်လွန်နိုင်မည်လော အတိတ်ကအတွေ့အကြုံများအရ စောင့်ဆိုင်းနေသော သေခြင်းကပ်ဘေးကို ကျော်လွှားနိုင်မည်လောဟု တွေးမိသည်။

လွတ်ငြိမ်းရာအမတနယ်ပယ်သို့ ရောက်ရှိပြီးနောက် ယန်ရှန်းသည် တာဟုန်နယ်မြေသို့ ပြန်လာခဲ့သည်။ သူ၏ခရီးစဥ်တလျှောက်တွင် သူသည် တာဟုန်နယ်ပယ်မှ ကျင့်ကြံသူအချို့နှင့် တွေ့ဆုံခဲ့ပြီး ထိုနေရာရှိ အခြေအနေကို သိရှိခဲ့သည်။ နှစ်ထောင်ပေါင်းများစွာ ကြာအောင် ထောင်စုနှစ်တိုင်းတွင် တာဟုန်တာအိုကောင်းကင်သည် ဒေသတစ်ခုကို သွေးဖြင့် သန့်စင်ခဲ့သည်။ တာဟုန်နယ်ပယ်တွင် ဒေသပေါင်းတစ်ရာအောက်သာ ရှိပြီး ယခုအချိန်၌ ထိုဒေသများရှိ ကျင့်ကြံသူများသည် တာဟုန်တာအိုကောင်းကင်ကို ကြောက်ရွံ့နေကြ၏။ ထိုကြောင့် သူတို့ ကျင့်ကြံရန်နေရာများကို အပြင်ဘက်ကောင်းကင်တွင်သာ စတင်တည်ထောင်ကြတော့သည်။

ထိုကျင့်ကြံသူများနှင့်လမ်းခွဲပြီးနောက် ယန်ရှန်းသည် တာဟုန်နယ်ပယ်သို့ တစ်ဦးတည်း ပြန်လာခဲ့သည်။ သူသည် ပထမဦးစွာ သူ၏ မွေးရပ်မြေ ခရမ်းရောင်အမတစံအိမ်သို့ သွားရောက်ခဲ့သော်လည်း ထိုအရာသည် တာဟုန်တာအိုကောင်းကင်၏ဖျက်ဆီးခြင်းကို ကြာမြင့်စွာကတည်းက ခံခဲ့ရသည်အား တွေ့ရှိခဲ့သည်။ တစ်ချိန်က ရင်းနှီးခဲ့သော မြေသည် လူသူကင်းမဲ့နေပြီး အမတစံအိမ်၏ ကျိုးပဲ့နေသော နံရံအနည်းငယ်သာ ကျန်တော့သည်။

သက်ရှိများအားလုံးအတွက် မုန်းတီးမှုနှင့် ကိုယ်ပိုင်လက်စားချေမှုတို့ ပေါင်းစပ်လိုက်ချိန်၌ ကုအန်ပင်လျှင် တာဟုန်တာအိုကောင်းကင်အတွက် စိုးရိမ်မိပြီး ယန်ရှန်းသည် သတ်ဖြတ်မှုတစ်ခုကို စတင်မည်လောဟု မေးခွန်းထုတ်မိသည်။

တာဟုန်တာအိုကောင်းကင်တွင် အမတလမ်းစဉ်၏ ကောင်းကင်ကိုးခုကို ကျော်လွန်သော သက်ရှိများရှိကာ ယန်ရှန်းသည် သူ၏ သက်တမ်းကို ဆင့်ကဲပြောင်းလဲနိုင်စွမ်းလည်း ရှိသော်လည်း သူသည် ထိုအရာကို အသုံးမပြုရန် ရွေးချယ်ခဲ့သည်။ နောက်တစ်နှစ်တွင် ယန်ရှန်းသည် ယခင်က သွေးသမင်မြို့၏ နေရာသို့ သွားရောက်ခဲ့သည်။ သူသည် ဖန်မုန့်၏အရိုးများကို ရှာမတွေ့နိုင်တော့ဘဲ မြို့သည် အချိန်ကြာလာသည်နှင့်အမျှ ပျောက်ကွယ်သွားပြီးဖြစ်သည်။ ထိုမှတ်ဉာဏ်သည် သူ၏ စိတ်ကူးယဉ်မှုတစ်ခုမျှသာ ဖြစ်သည့်အလား ခြေရာတစ်စမျှ မကျန်တော့ချေ။

ယန်ရှန်းသည် တာဟုန်တာအိုကောင်းကင်ကို ရင်ဆိုင်ရန်အတွက် သူ၏ဓားကို ဆွဲထုတ်ရန် ဆုံးဖြတ်ခဲ့သည်။

နှစ်နှစ်အကြာတွင် ယန်ရှန်းသည် တာဟုန်တာအိုကောင်းကင်၏ ဟုန်ထျန်းနယ်ပယ်သို့ ဆင်းသက်လာပြီး ထိုအင်အားစု၏ချီကံကြမ္မာကို ဖျက်ဆီးရန် ရည်ရွယ်ခဲ့သည်။ ဤအတွက်ကြောင့် သူသည် တာဟုန်တာအိုကောင်းကင်၏ ချောင်းမြောင်းတိုက်ခိုက်ခြင်းကို ရင်ဆိုင်ခဲ့ရသည်။

ပြင်းထန်သော တိုက်ပွဲအတွင်းတွင် ယန်ရှန်းသည် သူ၏ဓားတာအိုအောင်မြင်မှုကို အဆက်မပြတ် မြှင့်တင်ခဲ့ပြီး ကုအန်က သူသည် သူ၏သက်တမ်းဆင့်ကဲပြောင်းလဲနိုင်စွမ်းကို အသုံးပြုခဲ့သည်ဟု သံသယဝင်ခဲ့သည်။

တာဟုန်တာအိုကောင်းကင်၏ လွတ်ငြိမ်းရာအမတများ ထိတ်လန့်သွားကြသည်။ လွတ်ငြိမ်းရာအမတဆယ်ဦးသည် ယန်ရှန်းကို ဝိုင်းရံတိုက်ခိုက်ခဲ့သော်လည်း သူသည် ကမ္ဘာ၏ အနှစ်သာရကို သူ၏ဓားအဖြစ် ကိုင်စွဲကာ တောင့်ခံနိုင်ခဲ့သည်။ သူသည် ရှေးခေတ်နှင့် လက်ရှိခေတ် လောကကြီးကို တုန်လှုပ်စေသော တောက်ပမှုကို ထုတ်လွှတ်ကာ ဓားတာအိုမြစ်၏ စွမ်းအားကိုပင် အသုံးချခဲ့သည်။

ဓားတာအိုမြစ်သည် ကံကြမ္မာမြစ်နှင့်အချိန်မြစ်ကဲ့သို့ပင် တာအို၏သရုပ်သကန်ထင်ဟပ်မှုတစ်ခုပင်။ သေမျိုးစိတ်ဝိညာဉ်များသည် ဤသည်ကို နားလည်နိုင်ခြင်း ရှိမည်မဟုတ်ပေ။ ထိုအရာသည် ဓားတာအို၏ စုစည်းထားသောစွမ်းအားကို ကိုယ်စားပြုပေ၏။

ဓားတာအိုမြစ်၏ အားဖြည့်မှုဖြင့် ယန်ရှန်းသည် လွတ်ငြိမ်းရာအမတဆယ်ဦး၏ ရုပ်ပိုင်းဆိုင်ရာ ခန္ဓာကိုယ်များကို ဓားတစ်ချက်တည်းဖြင့် ဖျက်ဆီးပစ်ခဲ့ပြီး သူတို့၏ နတ်ဘုရားဝိညာဉ်များကို ပရမ်းပတာထွက်ပြေးစေခဲ့သည်။

ယန်ရှန်းသည် တာဟုန်တာအိုကောင်းကင်၏ အခြေခံအုတ်မြစ်ကို ဖျက်ဆီးတော့မည့်ဆဲဆဲတွင် ရှေးဟောင်းသက်ရှိတစ်ဦး ဆင်းသက်လာခဲ့သည်။ ဤသည်မှာ လွတ်ငြိမ်းရာအမတများထက် သာလွန်သော သက်ရှိတစ်ဦးပင်။ ယန်ရှန်းသည် ထိုသက်ရှိ၏တိုက်ခိုက်မှုများကို အကောင်းဆုံး ခုခံကာကွယ်ရတော့သည်။

ယန်ရှန်းသည် ရှုံးနိမ့်တော့မည့်အချိန်တွင် ဓားတစ်သောင်းဘိုးဘေးသည် သူ့ကို ကူညီရန် ရောက်ရှိလာပြီး နောက်ဆုံးတွင် သေဆုံးသွားခဲ့သည်။

ယန်ရှန်းသည် အလွန်အမင်း ဒေါသထွက်သွားခဲ့ပြီး သူ၏ဓားနှလုံးသားကို နတ်ဘုရားအဆင့်သို့ နိုးထစေခဲ့ရာ ကောင်းကင်နှင့်မြေကြီးကို တုန်လှုပ်စေခဲ့သည်။

ကုအန်သည် သူ၏ရှေ့မှ အချက်ပေးမှုကို ကြည့်ရင်း ယန်ရှန်း၏အခြေအနေ မည်မျှထိ ဆိုးရွားခဲ့သည်ကို စိတ်ကူးယဥ်တွေးတောကြည့်နိုင်လေပြီ။

လွတ်ငြိမ်းရာအမတတစ်ယောက်က အာကာပြင်တာအိုအမတကို တိုက်ခိုက်ခြင်းဖြစ်သည်။ ဓားတာအိုမြစ်၏ကာကွယ်မှုမရှိသောကြောင့် ယန်ရှန်းသည် မည်မျှပင် အင်အားကြီးမားသည်ဖြစ်စေ သူ၏သေဆုံးတရားနှင့်သာ တွေ့ဆုံရပေမည်။

သို့သော် ဤတစ်ကြိမ်တွင် အတိတ်နှင့် မတူပေ။ ယန်ရှန်းတွင် မဟာမိတ်တစ်ဦး ရှိလာခဲ့သည်။ နှစ်သောင်းပေါင်းများစွာ ကြာပြီးနောက် သူ၏ တပည့်ယန်ပင်းအန်သည် ကူညီရန် ပေါ်ထွက်လာခဲ့ပေ၏။ ယန်ပင်းအန်သည်လည်း လွတ်ငြိမ်းရာအမတတစ်ဦး ဖြစ်လာခဲ့သည်။ ဆရာနှင့်တပည့်သည် သူတို့၏ဓားတာအိုကို ပေါင်းစည်းပြီး တာဟုန်တာအိုကောင်းကင်၏ အဘိုးအိုကို ပြင်းထန်စွာ ဒဏ်ရာရစေခဲ့ပြီး သူ့ကို ကောင်းကင်အပြင်ဘက်သို့ ထွက်ပြေးစေခဲ့သည်။

နောက်ဆုံးတွင် ယန်ရှန်းနှင့်ယန်ပင်းအန်တို့သည် တာဟုန်တာအိုကောင်းကင်၏ အခြေခံအုတ်မြစ်ကို အတူတကွ ဖျက်ဆီးခဲ့ကြသည်။ ကောင်းကင်တာအိုသည် သူတို့၏ လုပ်ဆောင်မှုကို ခံစားမိပြီး ကြီးမားသော ကောင်းကင်တာအိုကုသိုလ်စွမ်းအားသည် သူတို့အပေါ်သို့ ကျရောက်လာခဲ့ပေ၏။ သူတို့၏ကျင့်ကြံဆင့်များသည် အရှိန်အဟုန်ဖြင့် တိုးတက်လာပြီး သူတို့နှစ်ဦးစလုံးသည် တာအိုသစ်သီးများကို စုစည်းနိုင်ခဲ့ကြသည်။

အာကာပြင်တာအိုအမတ

ဤဆရာတပည့်နှစ်ယောက်မှာ အသက်တစ်သိန်းမပြည့်မှီမှာပင် အာကာပြင်တာအိုအမတများဖြစ်လာကြသည်။ ကုအန် အလွန်စိတ်လှုပ်ရှားသွားသည်။ အကယ်၍ သူသည် ထိုအချိန်က ယန်ပင်းအန်ကို သူ၏တပည့်အဖြစ် မယူခဲ့လျှင် ယန်ရှန်းသည် တာဟုန်တာအိုကောင်းကင်၏ လက်ချက်ဖြင့် သေဆုံးသွားနိုင်ဖွယ်ရှိသည်။

တာဟုန်တာအိုကောင်းကင်၏ချီကံကြမ္မာသည် ပျောက်ကွယ်သွားပြီး ထိုအင်အားစု၏နောက်လိုက်များ တကွဲတပြားစီ ထွက်ပြေးသွားကြသည်။ ဤသတင်းသည် အရပ်ဒေသအသီးသီးသို့ ပျံ့နှံ့သွားပေ၏။ ဓားသူတော်စင်နှင့်ဓားနတ်ဘုရားတို့၏ နာမည်များသည်လည်း လောကတဝှမ်းတွင် ပဲ့တင်ထပ်သွားပြီး တာဟုန်နယ်ပယ်၏ ဒဏ္ဍာရီဖြစ်လာခဲ့ကြသည်။

ထို့နောက် ယန်ရှန်းသည် တာဟုန်နယ်မြေမှ ထွက်သွားရန် ရွေးချယ်ခဲ့သည်။ ယန်ပင်းအန်သည် လောကကြီးအတွက် စည်းမျဥ်းသစ်ကို ဖန်တီးမည့် သူ၏ ရည်ရွယ်ချက်ကို ကြေညာခဲ့ပြီး သက်ရှိအားလုံးကို ကိုယ်တိုင်ကိုယ်ကျ ကာကွယ်မည်ဟု ကတိပြုခဲ့သည်။ ယန်ရှန်းသည် သူ၏တပည့်ကို နက်ရှိုင်းပြီး အဓိပ္ပာယ်ပြည့်ဝသော အကြည့်ဖြင့် ကြည့်ပြီးနောက် ကောင်းကင်အပြင်ဘက်ရှိ စကြဝဠာကို သူတစ်ဦးတည်း လှည့်လည်သွားလာရန် ထွက်ခွာသွားခဲ့သည်။

ယန်ရှန်းသည် ကောင်းကင်အပြင်ဘက်ရှိ ကွဲအက်နေသော ကမ္ဘာတစ်ခုသို့ ရောက်ရှိလာပြီး လမ်းစဉ်ဉာဏ်အလင်းရရန် လုပ်ဆောင်ခဲ့သည်။ သူနှင့်တာဟုန်တာအိုကောင်းကင်အကြားမှ တိုက်ပွဲသည် သူ့ကို များစွာသောထိုးထွင်းသိမြင်မှုများ ပေးခဲ့သည်။

ကုအန်က ယန်ရှန်းသည် ကံကြမ္မာတာအို ချီကံကြမ္မာတာအိုနှင့် ဖန်ဆင်းခြင်းတာအိုတို့ကို နားလည်သဘောပေါက်ကြောင်း အချက်ပေးမှုများစွာကို တွေ့မြင်ခဲ့သည်။

"အသက်တစ်သိန်းသုံးဆယ့်လေးနှစ်တွင် လျှို့ဝှက်ဆန်းကြယ်သော ပုံရိပ်တစ်ခု သင်၏ ကျင့်ကြံရာနေရာသို့ ကျူးကျော်ဝင်ရောက်လာပြီး သူသည် ဆန်းကြယ်မဟူရာဧကရာဇ်ဖြစ်ကြောင်း ကြေညာကာ သင့်ကို တိုက်ပွဲတစ်ခုတိုက်ခိုက်ရန် စိန်ခေါ်ခဲ့သည်။ သင် လက်ခံရန် ရွေးချယ်မည်လား"

အမ်...

ဆန်းကြယ်မဟူရာဧကရာဇ်လား(နက်နဲသိမ့်မွေသောဧကရာဇ်)...

ကုအန်၏စိတ်ဓာတ်က ဤစကားလုံးများကို မြင်ချိန်၌ တက်ကြွလာသည်။

သို့သော် သူက ယန်ရှန်း၏ အချိန်သည် အတိတ် သို့မဟုတ် အနာဂတ်တွင် ရှိသည်ကို မသေချာသောကြောင့် ဆန်းကြယ်မဟူရာဧကရာဇ်၏ကျင့်ကြံဆင့်ကို မဆုံးဖြတ်နိုင်ပေ။

လောလောဆယ် ငြင်းပယ်တာ ပိုကောင်းပါတယ်။

ငါ သူ့ကို နောက်မှ ငါကိုယ်တိုင် ကိုင်တွယ်မယ်။

ထိုသို့သော အတွေးများသည် ကုအန်၏ စိတ်ထဲတွင် ရှိနေသည်။

[သင်သည် ဆန်းကြယ်မဟူရာဧကရာဇ်၏ တိုက်ပွဲအတွက် တောင်းဆိုမှုကို ငြင်းပယ်ရန် ရွေးချယ်ခဲ့သည်။ သို့သော် သူသည် မမျှော်လင့်ဘဲ လှုပ်ရှားမှုတစ်ခု ပြုလုပ်ခဲ့သည်။ သင်သည် ဓားတစ်ချက်တည်းဖြင့် တန်ပြန်တိုက်ခိုက်ခဲ့ပြီး ဆန်းကြယ်မဟူရာဧကရာဇ်၏ ရုပ်ပိုင်းဆိုင်ရာ ခန္ဓာကိုယ်ကို ဖျက်ဆီးပစ်ခဲ့သည်။ သူ၏နတ်ဘုရားဝိညာဉ်သည် ထိတ်လန့်ကြောက်ရွံ့စွာ ထွက်ပေါ်လာခဲ့ပြီး ကြမ်းတမ်းသော ခြိမ်းခြောက်မှုတစ်ခုကို ချန်ထားခဲ့သည်။ ထို့နောက် သင်၏ လိုက်လံဖမ်းဆီးမှုထက် ကျော်လွန်သော ရွှမ်မြှောင်နည်းလမ်းဖြင့် ထွက်ပြေးသွားခဲ့သည်။ သင်သည် စဉ်းစားတွေးတောရင်း သူ ထွက်ပြေးသွားသော လမ်းကြောင်းကို ကြည့်နေခဲ့သည်"

အမ်....

နိုင်သွားပြီလား...

ဓားတစ်ချက်တည်းနဲ့ နိုင်သွားတာလား...

ကုအန်ထံတွင် အံ့အားသင့်မှု ဝမ်းမြောက်မှုတို့ဖြင့် ပြည့်နှက်နေသည်။ ယန်ရှန်းသည် လုဟန်၊ ရှောင်ရှန်းထျန်းနှင့် ချူလုတို့ထက် ပို၍အင်အားကြီးမားသည်။

သို့သော် ဆန်းကြယ်မဟူရာဧကရာဇ် ထွက်ပြေးသွားသည်မှာ စိတ်ပျက်ဖွယ်ရာ ကိစ္စတစ်ရပ်ပင်။

ဤဘဝမှစ၍ ဆန်းကြယ်မဟူရာဧကရာဇ်သည် သူ၏ ပြန်လည်မွေးဖွားခြင်းကို မဆုတ်မနစ် လိုက်လံရှာဖွေနေသည်မှာ ရှင်းလင်းသည်။

ဘာကြောင့် ဒီလိုဖြစ်ရတာလဲ။

ဆန်းကြယ်မဟူရာဧကရာဇ်သည် သူ၏ ပြန်လည်မွေးဖွားခြင်းခန္ဓာကိုယ်ကို ဇွဲမလျှော့ဘဲ လိုက်လံရှာဖွေရလောက်အောင် သူထံတွင် မည်သို့သော မကျေနပ်မှုများ ရှိနေသနည်း။

ကုအန်သည် အကြောင်းရင်းကို မတွေးတတ်သော်လည်း ယန်ရှန်းသည် ဆန်းကြယ်မဟူရာဧကရာဇ်နှင့် နောက်တစ်ကြိမ် တွေ့ဆုံရန် သူ မျှော်လင့်မိလေ၏။

ဆန်းကြယ်မဟူရာဧကရာဇ်၏ တိုက်ခိုက်ခြင်းကို ကျော်လွှားပြီးနောက် ယန်ရှန်းသည် ပို၍မြင့်မားသော နယ်ပယ်သို့ ရောက်ရှိနိုင်မည်မှာ သေချာသည် မဟုတ်လော။

ဆန်းကြယ်မဟူရာဧကရာဇ် ထွက်ပြေးသွားပြီးနောက် ယန်ရှန်းသည် လမ်းစဉ်ဉာဏ်အလင်းရရန် နှစ်တစ်ထောင်နှစ်ကြာ ပြန်လည်သုံးသပ်ခဲ့သည်။ ထို့နောက် သူသည် စကြဝဠာ၏ နက်ရှိုင်းသောနေရာသို့ စွန့်စားဝင်ရောက်ကာ အသံမဲ့အပျက်အစီးနယ်မြေသို့ ဝင်ရောက်ခဲ့ပြီး အမည်နာမထူးခြားသော လူများနှင့် ရင်းနှီးကျွမ်းဝင်ခဲ့သည်။

တာအိုသစ်သီးနယ်ပယ်တွင် ရှိသော အမျိုးသမီးကျင့်ကြံသူများက သူ၏တာအိုလက်တွဲဖော်ဖြစ်လိုကြသော်လည်း ကုအန်သည် သူ့ကို ငြင်းပယ်ရန် ကူညီခဲ့ပေ၏။

အသက်သုံးသိန်းတွင် ယန်ရှန်းသည် ရွှမ်ယွမ်လွတ်ငြိမ်းရာအမတ၏ အဆင့်အတန်းကို ရရှိခဲ့သည်။ သူသည် စကြဝဠာတွင် ဒုက္ခများကို သက်သာစေသည့် သူရဲကောင်းစိတ်ဓာတ်ကို ဆက်လက်ထိန်းသိမ်းထားပြီး သူ၏ နာမည်ကို ပိုမိုကျယ်ပြန့်စွာ ပျံ့နှံ့စေခဲ့ကာ ဘွဲ့အမည်အသစ်တစ်ခုကို ရရှိခဲ့သည်။

ဓားတာအို သူတော်စင်ဘိုးဘေး။

"အသက် ၃၃၂၇၁၃၄ နှစ်တွင် သင်သည် စကြဝဠာရှိ ကျင့်ကြံရာနေရာအမျိုးမျိုးမှ ဂျူနီယာမျိုးဆက်များအား ဓားတာအိုသင်ကြားပေးနေစဉ် ဆန်းကြယ်မဟူရာဧကရာဇ်သည် ရုတ်တရက် တိုက်ခိုက်လာပြီး သင်၏ကျင့်ကြံရာနေရာတစ်ခုလုံးကို ဖျက်ဆီးပစ်လိုခဲ့သည်။ သင်သည် ကြယ်များကို သင်၏ ဓားအဖြစ် အသုံးပြုခဲ့ပြီး သန်းရာပေါင်းများစွာသော ကြယ်များ၏ဓားအသိစိတ်ကို မြင့်မြတ်ဓားတာအိုကွန်ယက်တစ်ခုအဖြစ် ပေါင်းစည်းကာ ဆန်းကြယ်မဟူရာဧကရာဇ်ကို လွှမ်းခြုံပြီး ပြတ်ပြတ်သားသား အနိုင်ယူခဲ့သည်။ သို့သော် သင်သည် သက်တမ်းကို သိမ်းပိုက်ခြင်းအကြောင်း အချက်ပေးမှုကို မရရှိသောကြောင့် ဆန်းကြယ်မဟူရာဧကရာဇ်သည် အသက်ရှင်နေဆဲဖြစ်ကြောင်း သင် ကောက်ချက်ချခဲ့သည်"

"ဒီကောင်က တကယ့်ကို သတ်ရခက်တာပဲ"

ကုအန် အံ့ကြိတ်လိုက်သည်။

အချက်ပေးမှုများ ဆက်လက်၍ ဖြစ်ပေါ်နေသည်။

နှစ် ၃၅၀၀၀၀ အကြာတွင် ယန်ရှန်းသည် စကြဝဠာ မည်မျှထိ ကျယ်ပြန့်သည်ကို သိလိုသဖြင့် သူ၏ခရီးကို ဆက်လက်၍လုပ်ဆောင်ခဲ့သည်။

နောက်ဆုံးတွင် သူသည် နယ်နိမိတ်တံခါးသို့ ရောက်ရှိခဲ့သည်။

ကုအန်သည် သူ၏ ကံကြမ္မာကို စိတ်အတွင်းတွင် ကျိန်ဆဲလိုက်သော်လည်း ဤကိစ္စတွင် ရွေးချယ်စရာမရှိပေ။

"အသက် ၃၅၀၀၀၈ နှစ်တွင် နယ်နိမိတ်တံခါးသို့ ရောက်ရှိချိန်၌ သင်သည် နယ်နိမိတ်တံခါး၏ နက်ရှိုင်းသော တာအိုတွင် နစ်မြောနေစဉ် တံခါးအတွင်းမှ ပုံရိပ်တစ်ခု ထွက်လာပြီး သင့်ကို တိုက်ခိုက်ခဲ့ရာ သင်၏ ရုပ်ပိုင်းဆိုင်ရာ ခန္ဓာကိုယ် ပျက်စီးသွားခဲ့သည်။ သင်၏ ဓားအသိစိတ်သည် သင်၏ နတ်ဘုရားစိတ်ဝိညာဉ်ကို ကာကွယ်ပေးနိုင်ခဲ့သော်လည်း တိုက်ခိုက်သူသည် နောက်တစ်ကြိမ် တိုက်ခိုက်ပြီး သင်၏ နတ်ဘုရားဝိညာဉ်ကို ဖျက်ဆီးခဲ့သည်..."

"သင်သည် ကောင်းကင်စိတ်ဝိညာဉ်နတ်ဘုရား၏လက်ချက်ဖြင့် သေဆုံးခဲ့သည်။"

"ပြန်လည်မွေးဖွားခြင်းစက်ဝန်းသည် အဆုံးသတ်သွားလေပြီ..."

ကုအန်၏မျက်နှာ မည်းမှောင်သွားသည်။

ဒီလိုဖြစ်မှာကို ငါ သိသားပဲ။

ယခင်က ဆန်းကြယ်မဟူရာဧကရာဇ်သည် နောက်ဆုံးတွင် သူ မကျော်လွှားနိုင်သော အတားအဆီးတစ်ခုဖြစ်ပြီး ယခုချိန်၌ကောင်းကင်စိတ်ဝိညာဉ်နတ်ဘုရားသည် သူ၏ အတားအဆီးအသစ် ဖြစ်လာခဲ့သည်။

အရူးကောင်။ ယန်ရှန်း... မင်းဘာလို့ သိချင်စိတ်ပြင်းပြရတာလဲ။

မင်း မသွားခဲ့ရင် မင်းရဲ့သေဆုံးခြင်းကို ရှောင်ရှားနိုင်မှာ မဟုတ်ဘူးလား။

ကုအန်သည် ထိုင်ခုံမှ လေထဲတွင် ပျောက်ကွယ်သွားပြီး စကြဝဠာ၏ အလယ်သို့ ရောက်ရှိလာကာ ဥက္ကာခဲတစ်ခုပေါ်တွင် အခြေချခဲ့သည်။ သူသည် သက်တမ်းအတားအဆီးကို အသက်သွင်းပြီးနောက် ယန်ရှန်း၏ ဘဝမှတ်ဉာဏ်များကို လက်ခံရရှိခဲ့ပေ၏။

ယန်ရှန်း၏ ဘဝကို အမှန်တကယ် ခံစားရခြင်းသည် ပို၍ပင် စိတ်မကောင်းဖွယ်ရာပင်။

သူ၏ဘဝတလျှောက်တွင် သူသည် သက်တမ်းဆင့်ကဲပြောင်းလဲခြင်းကို ဘယ်တုန်းကမှ အသုံးမပြုခဲ့ချေ။ ယန်ရှန်း၏ အချက်ပေးမှုများကို တိုက်ရိုက်မမြင်နိုင်သော်လည်း ယန်ရှန်း၏ ဓားတာအိုနှင့် ကျင့်ကြံဆင့်သည် ရှေးခေတ်နာရီတစ်နာရီအတွင်း အရှိန်အဟုန်ဖြင့် မတိုးတက်ခဲ့ချေ။ ခြွင်းချက်အနေဖြင့် သူသည် ကောင်းကင်တာအိုကုသိုလ်စွမ်းအားကို လက်ခံရရှိခဲ့သောအချိန်သာရှိသည်။ ထို့ပြင် သူ၏ဘဝတလျှောက်တွင် ယန်ရှန်းသည် သက်ရှိတစ်ရာအောက်သာ သတ်ဖြတ်ခဲ့သည်။

ဘယ်လောက်တောင် လေးစားဖို့ကောင်းတဲ့ စိတ်ဓာတ်လဲ။

ဖန်မုန့်၏ သေဆုံးခြင်းသည် ယန်ရှန်းကို အလွန်ဝမ်းနည်းစေခဲ့ပြီး ကုအန်သည်လည်း တူညီသော ဝမ်းနည်းမှုကို ခံစားခဲ့ရသည်။

ခရမ်းရောင်အလင်းစက်အမတစံအိမ်၏ ပျက်စီးခြင်းနှင့် ဓားတစ်သောင်းအမတဘိုးဘေး၏ ကျဆုံးခြင်းသည်လည်း ကုအန်ကို ဝမ်းနည်းစေခဲ့သော်လည်း သူ၏စိတ်ဓာတ်ကို မကျစေခဲ့ပေ။

ကုအန်သည် ယန်ရှန်းနှင့် ဆန်းကြယ်မဟူရာဧကရာဇ်တို့၏ နှစ်ကြိမ်တွေ့ဆုံမှုကို နားလည်ရန် အာရုံစိုက်ခဲ့သည်။ ဆန်းကြယ်မဟူရာဧကရာဇ်သည် အလွန်လျှို့ဝှက်ဆန်းကြယ်ပြီး သူ ပေါ်ထွက်လာတိုင်း သူ၏ ခန္ဓာကိုယ်ပတ်လည်တွင် အနက်ရောင်မြူများဖြင့် ဖုံးလွှမ်းထားပြီး၊ သူ၏အစစ်အမှန်မျက်နှာကို တစ်ချက်မျှ မမြင်နိုင်ပေ။

ထိုတိုက်ပွဲများတွင် ဆန်းကြယ်မဟူရာဧကရာဇ်သည် ယန်ရှန်းနှင့် ယှဉ်ပြိုင်နိုင်ခြင်းမရှိကြောင်း သိသာထင်ရှားသည်။

သို့သော် ယန်ရှန်းသည် ကောင်းကင်စိတ်ဝိညာဉ်နတ်ဘုရားနှင့်လည်း ယှဉ်ပြိုင်နိုင်ခြင်းမရှိပေ။

သူ သေဆုံးခါနီးအချိန်တွင် ယန်ရှန်းသည် တချို့သောပစ္စည်းများကို ချန်ထားခဲ့သဖြင့် ကုအန်၏စိတ်အတွင်းတွင် မျှော်လင့်ချက်တချို့ကို ဖြစ်ပေါ်စေခဲ့သည်။

သူသည် ထိုအကြွင်းအကျန်များနှင့် ဆက်သွယ်မှု ရရှိနိုင်ခြင်းရှိမရှိကို သူ တွေးမိသည်။

အခန်း ၄၅၈ သူတော်စင်နှလုံးသားဓားတာအို၊ ကုအန်၏ ပြောင်းလဲမှု

ယန်ရှန်း၏မှတ်ဉာဏ်များကို အမွေဆက်ခံပြီးနောက် ကုအန်သည် ယန်ရှန်း၏ ဓားတာအိုအမွေအနှစ်ကိုလည်း လက်ခံရရှိခဲ့သည်။ ဤသည်မှာ ယန်ရှန်း၏ဘဝတစ်သက်တာ ကျင့်ကြံမှုမှ အနှစ်သာရပင်။

သူတော်စင်နှလုံးသားဓားတာအို

ဤဓားတာအိုက နှလုံးသားကို အခြေခံအဖြစ် အသုံးပြု၏။ နှလုံးသားက စိတ်ကူးသမျှကို ကိုယ်ပိုင်ဓားအဖြစ်သို့ ပြောင်းလဲနိုင်သည်။

ပန်းများ၊ မြက်များ၊ သစ်ပင်များနှင့် သစ်တောများသည် ဓားများဖြစ်လာနိုင်ကာ တောင်တန်းများ မြစ်ချောင်းများ ပင်လယ်များသည်လည်း ဓားများဖြစ်လာနိုင်သည်။ သက်ရှိအားလုံးသည် ဓားများဖြစ်လာကာ နေ၊ လနှင့် ကြယ်တာရာများသည်လည်း ဓားများဖြစ်လာပေမည်။

ယန်ရှန်းသည် မဟာတာအိုသုံးထောင်ကို သူ၏ ဓားများအဖြစ်သို့ပင် ပြောင်းလဲလိုခဲ့သော်လည်း သူ၏ဓားတာအိုသည် မဟာတာအိုအဆင့်သို့ အမှန်တကယ် မရောက်ရှိသေးသောကြောင့် ဤသည်မှာ လောလောဆယ်တွင် အယူအဆတစ်ခုမျှသာ ဖြစ်သည်။

ကုအန်သည် ယန်ရှန်း၏ မှတ်ဉာဏ်များကို အပြည့်အဝ လက်ခံပြီးချိန်၌ သူသည် မျက်လုံးများကို ဖွင့်လိုက်ရာ အချိန်တစ်ရက် ကုန်လွန်သွားသည်ကို သိလိုက်ရသည်။

အချိန်တစ်ရက်မျှသာ ဖြစ်သော်လည်း သူသည် ပြန်လည်မွေးဖွားခြင်းတစ်ခုကို တွေ့ကြုံခဲ့ရပြီး ထိုမှတ်ဉာဏ်များသည် သူကိုယ်တိုင် တွေ့ကြုံခဲ့ရသကဲ့သို့ အလွန်ပြင်းထန်လှသည်။

သူသည် ယန်ရှန်းဖြစ်သော်လည်း အစစ်အမှန်ယန်ရှန်းမဟုတ်ချေ။ ပို၍တိကျစွာ ပြောရလျှင် ယန်ရှန်းသည် သူ၏ အစိတ်အပိုင်းတစ်ခုမျှသာ ဖြစ်ပြီး ကုအန်က ဤခံစားမှုသည် အလွန်လျှို့ဝှက်ဆန်းကြယ်သည်ဟု ခံစားမိလေ၏။

ယန်ရှန်းသည် ကုအန်ထံသို့ သူတော်စင်နှလုံးသားဓားတာအိုကိုသာမက များစွာသော မဟာတာအိုများအပေါ် နက်ရှိုင်းစွာ နားလည်သဘောပေါက်မှုကိုလည်း ယူဆောင်လာခဲ့သည်။

ကုအန်ပင်လျှင် ယန်ရှန်း၏ ထိုးထွင်းသိမြင်မှုကြောင့် အံ့အားသင့်ခဲ့ရသည်။ သက်တမ်း၏ ဆင့်ကဲပြောင်းလဲမှုကို အသုံးမပြုဘဲ ယန်ရှန်း၏ မဟာတာအိုများကို နားလည်သဘောပေါက်မှုသည် နက်ရှိုင်းပြီ တခြားပြန်လည်မွေးဖွားခြင်းခန္ဓာကိုယ်များထက် ပို၍အားကောင်းသည်။

ကုအန်သည် သက်တမ်းအတားအဆီးကြောင့် ကုန်ဆုံးသွားသော သက်တမ်းကို စစ်ဆေးကြည့်ရာ အလွန်အကျွံမဟုတ်သဖြင့် ထရပ်လိုက်ပြီး ခြေတစ်လှမ်းဖြင့် ဝိညာဉ်ဝှက်နန်းတော်သို့ ပြန်လာခဲ့သည်။

ပင်လယ်နက်နဂါးငါးကြင်းသည် ကျင့်ကြံနေစဉ် ခြေသံများကြားသဖြင့် သူ၏မျက်လုံးများကို ဖွင့်လိုက်သည်။ ကုအန်ပြန်လာသည်ကို တွေ့လိုက်ရသဖြင့် သူသည် ဝမ်းသာအားရဖြစ်ကာ ချက်ချင်းထရပ်ပြီး မေးမြန်းလိုက်၏။

"ဆရာ... ပြန်လာပြီလား"

ကုအန်က သူ့ကို ကြည့်ပြီး ပြောလိုက်သည်။

"မင်း တိုက်ခိုက်ရေးနည်းစနစ်တွေ လိုချင်တယ် မဟုတ်လား... ငါမင်းကို ဓားနည်းစနစ်တစ်ခု လက်ဆင့်ကမ်းပေးရင် ဘယ်လိုလဲ"

"ကျေးဇူးတင်ပါတယ် ဆရာ"

ပင်လယ်နက်နဂါးငါးကြင်းသည် ချက်ချင်းပင် ကုအန်ကို ကျေးဇူးတင်စကားဆိုပြီး စိတ်လှုပ်ရှားစွာဖြင့် သူ့ထံသို့ မျှော်လင့်ချက်အပြည့်ဖြင့် ချဥ်းကပ်လာခဲ့သည်။

ကုအန်သည် များများစားစား မပြောဘဲ ဓားသိုင်းပညာကို သူ့အား လက်ဆင့်ကမ်းပေးခြင်းကို စတင်လုပ်ဆောင်လိုက်သည်။ တချို့သော ရိုးရှင်းသည့် နည်းစနစ်များမှတဆင့် သူတော်စင်နှလုံးသားဓားတာအိုကို လေ့ကျင့်ရန် သူ့ကို လမ်းညွှန်ပေးခဲ့သည်။

ပင်လယ်နက်နဂါးငါးကြင်းသည် ကုအန်၏အရှိန်အဝါတွင် ပြောင်းလဲမှုတစ်ခုကို ခံစားလိုက်ရသော်လည်း သူသည် မည်သည့်အရာ ပြောင်းလဲသွားသည်ကို တိတိကျကျ မပြောနိုင်ချေ။ သူသည် ကုအန်အပေါ် ပို၍ ကြီးမားသော လေးစားမှုကိုသာ ခံစားရသည်။

ဤသည်မှာ ယန်ရှန်း၏ မှတ်ဉာဏ်များက ကုအန်အပေါ် သက်ရောက်မှုရှိခြင်းပင်။

ယန်ရှန်းသည် ဓားတာအိုသူတော်စင်ဘိုးဘေးဟု မကြာခဏ ခေါ်ဝေါ်ခြင်းခံရပြီး ဟောပြောပို့ချရာ၌ သူ၏ ကိုယ်ပိုင်ဂုဏ်သိက္ခာ ပေါ်လွင်နေသဖြင့် ဤသည်မှာ ကုအန်အပေါ်သို့ စတင်၍ သက်ရောက်မှုရှိနေလေပြီ။

ပြန်လည်မွေးဖွားခြင်းမှတ်ဉာဏ်များကို ပေါင်းစည်းခြင်းသည် ကုအန်အပေါ် အတိုင်းအတာတစ်ခုအထိ မလွှဲမရှောင်သာ သက်ရောက်မှုရှိသည်။

ရှေးခေတ်နာရီတစ်နာရီအကြာတွင် ကုအန်သည် တတိယဆေးပင်တောင်ကြားသို့ ပြန်လာခဲ့ကာ ဆက်သွယ်ရေးဝင်္ကပါစင်မြင့်မှ ခြေချပြီးနောက် တပည့်များက သူ့ကို နှုတ်ဆက်ကြသည်။

"ငါတို့ဆရာ့မှာ တစ်ခုခုပြောင်းလဲသွားတာ ခံစားမိကြလား"

"မင်းတို့အားလုံးလည်း သတိထားမိကြတာပဲလား"

"တကယ်ပဲ ပြောင်းလဲမှုတစ်ခု ရှိတယ်..ဆရာက တိုးတက်မှုတစ်ခု ထပ်လုပ်လိုက်တာလား"

"ငါတို့ဆရာ့ရဲ့ တာအိုကို နားလည်သဘောပေါက်မှုက ငါတို့စိတ်ကူးထားတာထက် ကျော်လွန်တယ်။ သူ့ရဲ့နောက်ကွယ်မှာ ဘယ်သူရှိလဲဆိုတာ သတိရကြအုံး"

တပည့်များသည် ကုအန်၏ နောက်ကျောပုံရိပ်ကို ကြည့်ရင်း တီးတိုးပြောဆိုနေကြသည်။ တချို့ကမူ သူကြားနိုင်မည်ဟု တွေးကာ တမင်တကာ မြှောက်ပင့်ပြောဆိုကြသည်။

ကုအန် စံအိမ်ဆောင်ရှေ့သို့ ရောက်ချိန်၌ သွေးအကျဉ်းထောင်သူတော်စင်သည်လည်း သူ၏ အရှိန်အဝါတွင် ပြောင်းလဲလာမှုကြောင့် ထိတ်လန့်သွားသည်။

သလင်ရဲ့ ကျင့်ကြံဆင့် တိုးတက်သွားတာလား။

သူသည် ကုအန်ကို အထင်ကြီးပြီး ကုအန် အင်အားကြီးမားလေလေ သူ ပို၍ပျော်ရွှင်လေလေပင်။ အကြောင်းအရင်မှာ သူသည် ကုအန်၏အမိန့်ကို တစ်သက်လုံး လိုက်နာရန် ဆုံးဖြတ်ထားသောကြောင့်ပင်။

"ထောင်စုနှစ်တစ်ခု ဖြစ်စရာမလိုဘူး...ပြင်ဆင်ထားတော့"

ကုအန်က ရပ်တန့်ပြီး ထိုစကားကို သွေးအကျဉ်းထောင်သူတော်စင်အား ပြောလိုက်သည်။

ဤစကားကို ကြားချိန်၌ သွေးအကျဉ်းထောင်သူတော်စင်သည် မှင်သက်သွားပြီး သူ၏နွားမွှေးများသည် သွေးမီးလျှံလောင်ကျွမ်းနေသကဲ့သို့ တဖျပ်ဖျပ် လှုပ်ခတ်သွားသည်။

ကုအန်သည် လှေကားပေါ်သို့ ဆက်တက်သွားပြီး သူ၏ အခန်းသို့ ပြန်ရောက်ချိန်၌ သူ၏ စားပွဲတွင်ထိုင်ကာ စက္ကူနှင့်မင်ကို ထုတ်ယူပြီး ယန်ရှန်း၏ မှတ်ဉာဏ်များမှ ဓားနည်းစနစ်များနှင့် ကျင့်ကြံနည်းစနစ်များကို ချရေးခြင်းကို စတင်လုပ်ဆောင်သည်။

သူသည် ထိုအရာများကို မေ့သွားမည်အား မကြောက်ဘဲ အနာဂတ်တွင် ကံကြမ္မာကို ဖြန့်ဝေရန်အတွက် ချရေးလိုခြင်းသာဖြစ်သည်။

သူသည် အနာဂတ်တွင် ဤလျှို့ဝှက်စာအုပ်များအတွက် သီးသန့် စံအိမ်ဆောင်တစ်ခုကိုပင် ဖန်တီးနိုင်သည်။ ဤသည်မှာ အကျိုးအမြတ်အတွက် မဟုတ်ဘဲ ပြသရန်ပင်။

အဟွတ်...အဟွတ်...

ကြွားဝါရန်ပင်။

နာရီဝက်အကြာတွင် တံခါးခေါက်သံတစ်သံ ကြားလိုက်ရပြီး ကုအန်က ပြန်ဖြေလိုက်ရာ အန်ရှင်းက တံခါးကို တွန်းဖွင့်ပြီး ဝင်လာခဲ့သည်။

သူမသည် တံခါးကို ပိတ်လိုက်ပြီးနောက် စားပွဲသို့ ရောက်လာကာ ဘာမှမပြောဘဲ ကုအန်ကိုသာ ကြည့်ရှုနေခဲ့သည်။

ကုအန်က စာရေးခြင်းကို ရပ်တန့်ခြင်းမပြုသည့်အပြင် ခေါင်းမမော့ဘဲ မေးလိုက်သည်။

"တစ်ခုခုဖြစ်လို့လား"

အန်ရှင်းက ရယ်မောလိုက်၏။

"ဆရာရဲ့ စိတ်နေစိတ်ထားက ပြောင်းလဲမှုအချို့ ဖြစ်နေတယ်လို့ ကျွန်မကြားတယ်လေ။ လူတိုင်းက ဆရာ တိုးတက်မှုတစ်ခု ရခဲ့တယ်လို့ ထင်ကြေးပေးနေကြတာ။ ဒါကြောင့် ကျွန်မ ကိုယ်တိုင်လာကြည့်တာပေါ့။ တကယ်ပဲ ဆရာက ပြောင်းလဲသွားတာပဲ။ အရင်ကထက် ပိုပြီး အင်အားကြီးတဲ့ ပုဂ္ဂိုလ်တစ်ဦးလို ဖြစ်နေတယ်"

ကုအန်က ပြုံးလိုက်သော်လည်း မတုံ့ပြန်ခဲ့ချေ။

ရုတ်တရက် သူသည် ယန်ရှန်း၏ အတွေ့အကြုံများကို စဉ်းစားမိပြီး မေးလိုက်သည်။

"မင်း ချစ်ခင်တွယ်တာစိတ်ဝင်ဖူးလား"

အန်ရှင်းက ရပ်တန့်သွားပြီး နားမလည်စွာ မေးလိုက်၏။

"ဘယ်လို ချစ်ခင်တွယ်တာစိတ်ဝင်တာလဲ... ဆေးပင်တောင်ကြားမှာ ကျွန်မကို လောကီဆန္ဒတွေ ဖြစ်ပေါ်စေနိုင်တဲ့သူ ဘယ်သူမှမရှိဘူး... ပြီးတော့ ကျွန်မဘဝမှာ စိတ်ခံစားချက်တွေရဲ့ ကပ်ဘေးထဲကို ဘယ်တော့မှ ကျရောက်မှာ မဟုတ်ဘူး....ကျွန်မရဲ့ အစ်ကိုကြီးက တစ်ခါက ပြောဖူးတယ်...သူ့ရဲ့ အကြီးမားဆုံးသော နောင်တက တစ်စုံတစ်ယောက်နဲ့ စိတ်ခံစားမှုပိုင်းဆိုင်ရာ ပါဝင်ပတ်သက်ခဲ့တာပဲ.. အဲ့ဒါက သူ့ရဲ့ တိုးတက်မှုကို အဟန့်အတားဖြစ်စေခဲ့တယ်.. ဒါပေမဲ့ အဲ့ဒါကို စွန့်လွှတ်ဖို့ကျတော့လည်း သူ နာကျင်ရလိမ့်မယ်... ကျွန်မကိုယ်ကိုကျွန်မ အဲ့ဒီလိုအခြေအနေထဲကို ဘယ်တော့မှ ကျရောက်ခွင့်ပြုမှာ မဟုတ်ဘူး"

အန်ရှန့်ထျန်းနှင့်အန်မိသားစု၏ နောက်ပိုင်းမျိုးဆက်များသည် အန်ဟောင်အပေါ် မကျေနပ်ချက်များ ရှိနေဆဲပင်။ ဤသည်ကြောင့် အန်ရှင်းကို လက်ထပ်ပြီး ကလေးယူရန် ပို၍ပင် ဆန္ဒမရှိ ဖြစ်စေခဲ့သည်။

ထို့ပြင် သူမသည် အမတကျင့်ကြံမှုကို ကျင့်ကြံနေသဖြင့် သွေးသား၏ ဗီဇများကြောင့် လှုပ်ရှားခြင်းကို ခံရမည်မဟုတ်ပေ။ သူမသည် ဆန္ဒရှိသည့်အတိုင်း ပျော်ရွှင်နေပြီး အချစ်ကို အမှန်တကယ် မတောင့်တချေ။

ကုအန်က သူမကို မော့ကြည့်ပြီး သူမသည် စကားအရာသက်သက် ပြောနေခြင်းမဟုတ်ကြောင်း တွေ့မြင်ချိန်၌ သူက ပြုံးလိုက်သည်။

"ဟုတ်လား ...ချစ်ခင်တွယ်တာမှုက မင်းထင်သလောက် မရိုးရှင်းဘူး။..ကံကြမ္မာရောက်လာတဲ့အချိန်ကျရင် မင်းဒီနေ့ပြောခဲ့တဲ့ စကားတွေကို မေ့သွားနိုင်တယ်"

အန်ရှင်းက မာနကြီးစွာဖြင့် သူမ၏မေးကို မော့လိုက်သည်။

"ကျွန်မ မမေ့ဘူး... ဆရာက ကျွန်မကို နှင်ထုတ်ဖို့ ကြိုးစားနေတာတော့ မဟုတ်ဘူးမလား"

"ဘယ်လိုလုပ်ပြီး ဖြစ်နိုင်မှာလဲ..ငါက ဒီရက်ပိုင်းအတွင်း စာအုပ်တစ်အုပ်ဖတ်ပြီး အထဲက အချစ်ဇာတ်လမ်းအကြောင်း စိတ်ခံစားမှုအချို့ ခံစားမိလို့ပါ"

ကုအန်က ရှင်းပြရင်း ထိုရှုပ်ထွေးသော စိတ်ခံစားမှုသည် သူ၏စိတ်အတွင်းတွင် တဖန်ပြန်၍ဆူပွက်လာသည်ကို ခံစားလိုက်ရသည်။

ယန်ရှန်း၏ဘဝတွင် အကြီးမားဆုံးသော နောင်တသည် ဖန်မုန့်ကို ငြင်းပယ်ခဲ့ခြင်းပင်။ သူသည် ဘယ်တုန်းကမှ အမျိုးသမီးတစ်ဦး မရှိခဲ့ပေ။ အကြောင်းအရင်းမှာ ဖန်မုန့်အပေါ်ထားရှိသော သူ၏ခံစားချက်များ၏ မှတ်ဉာဏ်သည် စိတ်ကျေနပ်မှုအလုံအလောက် ဖြစ်စေသောကြောင့်ပင်။

ဤစကားကို ကြားချိန်၌ အန်ရှင်းသည် သက်ပြင်းတစ်ချက်ချပြီး သူ့ကို သတိပေးလိုက်၏။

"ဆရာ...ဆရာက အဲ့ဒီလိုအပေါစားစာအုပ်တွေကို လျော့ဖတ်သင့်တယ်"

ကုအန်က သူမကို မမျက်စောင်းထိုးဘဲ မနေနိုင်တော့ပေ။

"ထွက်သွား...ထွက်သွား..ထွက်သွားစမ်း...မင်းအကြီးတွေကို ရိုသေမရှိဘူး"

အန်ရှင်းက အောင်နိုင်သူတစ်ဦးကဲ့သို့ ပြုံးပြပြီး ဦးညွှတ်ကာ ထွက်ခွာသွားသည်။

ပြတင်းပေါက်အပြင်ဘက်မှ နေသည် တဖြည်းဖြည်း ဝင်သွားသည်နှင့်အမျှ ကုအန်က လျှို့ဝှက်စာအုပ်ကို ဆက်လက်ရေးသား၏။ အချိန်သည် ဆက်လက်စီးဆင်းနေပေ၏။

သုံးနှစ်အကြာတွင် ကုအန်ကိုသိသောသူအားလုံးသည် သူ၏ စိတ်နေစိတ်ထားပြောင်းလဲမှုများနှင့် အကျွမ်းတဝင်ရှိနေလေပြီ။ သူတော်စင်နှလုံးသားဓားတာအိုကို ပေါင်းစည်းခြင်းဖြင့် သူ၏ဓားအသိစိတ်သည်လည်း တိုးတက်လာပြီးဓားသိုင်းပညာသည် သူ၏ အင်အားအကြီးဆုံးသော နည်းစနစ်ဖြစ်လာခဲ့သည်။

ယနေ့တွင် ကုအန်သည် တတိယဆေးပင်တောင်ကြား၏ အစွန်းရှိ ချောက်ကမ်းပါးပေါ်တွင် ရပ်နေပြီး ကောင်းကင်ကို မော့ကြည့်နေခဲ့သည်။

သူသည် စကြဝဠာ၏ နက်ရှိုင်းသောနေရာရှိ အသံမဲ့အပျက်အစီးနယ်မြေအနီးတွင် မဟာကောင်းကင်စိတ်ဝိညာဉ်နယ်မြေအထက်မှ နေမင်းကြီးကဲ့သို့ ကြီးမားပြီး မည်းနက်သော မြို့တစ်မြို့ ပေါ်လာသည်ကို တွေ့မြင်ခဲ့သည်။

သတ်ဖြတ်ခြင်းနတ်ဘုရားဧကရာဇ် သည် ထိုအနက်ရောင်မြို့တော်အတွင်းတွင် ပုန်းအောင်းနေသည်။ မဟာကောင်းကင်စိတ်ဝိညာဉ်နယ်မြေမှ မြင့်မြတ်ခုံရုံများ အမတမင်းဆက်များ ရွှမ်ယုနတ်ဘုရားမင်းဆက်နှင့် ကောင်းကင်မိစ္ဆာဂိုဏ်းကြီးတို့သည် စုံစမ်းစစ်ဆေးရန် လူများကို စေလွှတ်ခဲ့လေ၏။ သို့ရာတွင် အနက်ရောင်မြို့တော်သို့ ချဉ်းကပ်သွားသူတိုင်း ကျောက်တုံးဖြစ်သွားကြသည်။ ပတ်ဝန်းကျင်ကို ကြည့်လိုက်လျှင် ဟင်းလင်းပြင်တွင် ကျောက်ရုပ်ရာပေါင်းများစွာ ဆိုင်းငံ့နေပြီး သူတို့ထဲမှ အင်အားအကြီးဆုံးသူသည် တာအိုဟင်းလင်းပြင် လျှို့ဝှက်ဆန်းကြယ်အမတနယ်ပယ်အဆင့်သို့ ရောက်ရှိနေသည်။ ဤသည်မှာ ဝမ်းနည်းဖွယ် ကိစ္စတစ်ရပ်ပင်။

"မင်း လုံချင်းကို ဆွဲဆောင်ဖို့ ဘာကို အတိအကျ အသုံးပြုဖို့ စီစဉ်နေတာလဲ"

ကုအန်က တွေးတောပြီး သတ်ဖြတ်ခြင်းနတ်ဘုရားဧကရာဇ်သည် လွတ်ငြိမ်းရာအမတထက်ပင် အားကောင်းသော အကြောင်းတရားဆက်နွယ်မှုစွမ်းအားဖြင့် ဖုံးလွှမ်းထားသည်ကို သိရှိလိုက်၏။ ဤမြို့တွင် သတ်ဖြတ်ခြင်းနတ်ဘုရားဧကရာဇ်၏ အစစ်အမှန်ခန္ဓာကိုယ်ရှိရမည်ဟု မှတ်ချက်ပြုလိုက်သည်။ ထိုအချိန်တွင် ပုံရိပ်တစ်ခုသည် ကောင်းကင်မှ ဆင်းသက်လာပြီး ကုအန်ဘေးသို့ ကျရောက်လာသည်။ ဤသည်မှာ ဝူကျဲပင်။

မကြာသေးမီနှစ်များအတွင်း ဝူကျဲသည် မဟာယနနယ်ပယ်သို့ တိုးတက်ခဲ့ပြီး အဓိပတိဂိုဏ်းတွင် နာမည်ရလာကာ ကုအန်နှင့် နေ့ရောညပါ သောက်စားခဲ့သည်။

ကုအန်က သူ့ကို ကြည့်ပြီး အပြုံးနှင့် မေးလိုက်သည်။

"ဘာကိစ္စနဲ့ ဒီကိုရောက်လာတာလဲ"

ဝူကျဲက စိတ်လှုပ်ရှားစွာဖြင့် ပြောဆိုလိုက်၏။

"ငါမှာ အန်ဟောင်အကြောင်း သတင်းရှိတယ်...သူက အခု နိဗ္ဗာနနယ်ပယ်ရောက်သွားပြီ... ပင်လယ်ပြင်မှာ အဆုံးအဖြတ်တိုက်ပွဲအတွက် အချိန်သတ်မှတ်ထားတယ်...အဓိပတိဂိုဏ်းက သူ့ကို ထောက်ခံဖို့အတွက် ဝင်္ကပါစင်မြင့်ကို ကျင့်ကြံသူတစ်စုကို စေလွှတ်ဖို့ စီစဉ်ထားတယ်..ငါလည်း လိုက်သွားမယ်"

အန်ဟောင်က အဓိပတိဂိုဏ်း၏ သမိုင်းတွင် အရည်အချင်းအရှိဆုံးသော ပါရမီရှင်ဖြစ်ကာ ယနေ့တိုင် ဒဏ္ဍာရီတစ်ခုအဖြစ် ရှိနေဆဲဖြစ်ပြီး တပည့်များစွာက အဆက်မပြတ် ပြောဆိုနေကြသည်။

ကုအန်က အံ့အားသင့်ဟန်ဆောင်ပြီး မျက်ခုံးပင့်လိုက်သည်။

"သူက ဒီလောက်မြန်မြန် တိုးတက်သွားတာလား.....သူ့ရဲ့ ပြိုင်ဘက်က အင်အားကြီးလား"

"ပြိုင်ဘက်က အချုပ်အနှောင်မဲ့အမတတစ်ဦးပဲ... သူက သူ့နယ်ပယ်ထက် ကျော်လွန်တဲ့ အချုပ်အနှောင်မဲ့အမတတစ်ဦးကို စိန်ခေါ်နေတာ.. ဒါကြောင့် ဒီကိစ္စက ပင်လယ်ရပ်ခြားမှာ တော်တော်လေး လှုပ်ရှားမှုဖြစ်စေခဲ့တယ်.. မင်းရဲ့တပည့် အန်ရှင်းက သူနဲ့ ကောင်းမွန်တဲ့ ဆက်ဆံရေးရှိတယ်မလား။ ငါသူကိုသတင်း ပို့လိုက်ရမလား"

ဝူကျဲက အပြုံးနှင့် ပြောဆိုလိုက်ပြီး တိုက်ပွဲကို ကြည့်ရှုရန် မစောင့်နိုင်တော့ပေ။

အချိန်တခဏမျှ စဉ်းစားပြီးနောက် ကုအန်က ပြောလိုက်သည်။

"ထားလိုက်ပါ..သူ့ကို မပြောပါနဲ့..အလကားသက်သက် သူ စိတ်ပူနေလိမ့်မယ်"

"ဒါက သဘာဝကျတယ်"

ဝူကျဲက ခေါင်းညိတ်ပြပြီး ဆက်လက်၍ ပြောသည်။

"မင်းသိလား....အန်ဟောင်က အခု ဘယ်လောက်တောင် အင်အားကြီးမားနေပြီလဲ... သူက နိဗ္ဗာနနယ်ပယ်မှာ ရှိသေးတာတောင် အျုပ်အနှောင်မဲ့အမတတစ်ဦးကို စိန်ခေါ်ရဲတယ်.... အမတလမ်းစဉ်ရဲ့ အဆင့်မြင့်နယ်ပယ်တွေမှာ တခြားသူတွေကို ကျော်လွန်ဖို့ ပိုပိုပြီး ခက်ခဲလာတယ်လို့ ဆိုကြတယ်.. ပြီးတော့ တူညီတဲ့ နယ်ပယ်အတွင်းမှာတောင် တစ်ယောက်ကိုတစ်ယောက် အနိုင်ယူဖို့က ကောင်းကင်ကို ရောက်ရှိဖို့လောက် ခက်ခဲတယ်"

အန်ဟောင်သည် မဟာယနနယ်ပယ်သို့ ရောက်ရှိခါစ ဝူကျဲထက် ငယ်ရွယ်သော်လည်း သူသည် အချုပ်အနှောင်မဲ့အမတများကို စိန်ခေါ်နေလေပြီ။ သူသည် အန်ဟောင်ကို မည်သို့ မလေးစားဘဲ နေနိုင်မည်နည်း။

အချိန်အတော်ကြာအောင် သူသည် အဓိပတိဂိုဏ်း၏ နံပါတ်တစ် ပါရမီရှင်ဖြစ်ခဲ့သော်လည်း သူရော ဂိုဏ်းရှိ လူတိုင်းပါ ဂိုဏ်း၏သမိုင်းတွင် အင်အားအကြီးဆုံးသော ပါရမီရှင်မဟုတ်ဟု ခံစားရသည်။ အကြောင်းမှာ တခြားတစ်ဦးက ထိုနေရာကို ခိုင်မြဲစွာ ကိုင်စွဲထားသောကြောင့်ပင်။

ကုအန်က သူကိုယ့်သူ ညွှန်ပြပြီး အံ့အားသင့်ဟန်ဆောင်လိုက်သည်။

"မင်းက ငါ့ကို မေးနေတာလား"

ဝူကျဲက ရယ်မောလိုက်၏။

"မင်းက ကိုယ့်ကိုယ်ကိုယ် ဆရာသခင်ဓားအရှင်လို့ ကြေညာထားတာ မဟုတ်လား.. နောက်ဆုံးမှာတော့ အန်ဟောင်က မင်းရဲ့ တပည့်ပဲ...ငါ သူ့ကို ဒီအကြောင်း ပြောပြရမလား"

ကုအန်က သူ့ကို မျက်စောင်းထိုးကြည့်လိုက်သည်။

"မင်းက ငါ့ကို ယုံတာမှ မဟုတ်တာ.... မင်းကြိုက်သလို ပြော...ငါမကြောက်ဘူး"

ဝူကျဲ စိတ်လှုပ်ရှားသွားသည်။

"မင်းမကြောက်ဘူးဆိုရင် ငါ သူ့ကို ပြောပြလိုက်မယ်...မင်းတို့နှစ်ယောက် တွေ့ဆုံတဲ့ မြင်ကွင်းကို ငါ တကယ်မျှော်လင့်မိတယ်"