တိုက်ရိုက် အဆင့်တက်ခြင်း

ကိုးရောင်ခြယ် ရေစီးကြောင်းကြီးက ဆက်လက် စီးဆင်းနေဆဲ ဖြစ်သည်။

၎င်း၏ အရှိန်အဟုန်မှာ ပိုမို ပြင်းထန်လာပြီး ခဏအတွင်းမှာပင် အဆုံးမဲ့သော စွမ်းအားများက ထန်ထျန်း၏ ခန္ဓာကိုယ်အတွင်းသို့ စီးဝင်သွားခဲ့သည်။

အကယ်၍ ထန်ထျန်း၏ အသိစိတ်မှာ ရှန်လင် ကမ္ဘာအတွင်းသို့ ရောက်မနေပါက သူက အနည်းဆုံး ကျင့်ကြံခြင်း အဆင့်တစ်ခုခန့် တန်း ကျော်သွားလောက်ပြီ ဖြစ်သည်။

သို့သော် သာမန် ကျင့်ကြံသူတစ်ဦး၏ ခန္ဓာကိုယ်က ဤမျှ ကြောက်မက်ဖွယ်ကောင်းသော စွမ်းအားကို အမှန်တကယ် တောင့်ခံနိုင်ပါမည်လော။

အကြီးအကဲများမှာ သူ့အတွက် ရင်တထိတ်ထိတ်ဖြင့် ချွေးပြန်နေကြတော့သည်။

သူတို့ အလွန်အမင်း စိုးရိမ်နေကြစဉ်မှာပင် တားမြစ်ရုပ်တု လက်ညှိုးထိပ်မှ ကိုးရောင်ခြယ် ရေစီးကြောင်းကြီးမှာ ရုတ်တရက် ထူးဆန်းစွာ ရပ်တန့်သွားခဲ့သည်။

ဝမ်ရူအင်မော်တယ်အရှင်က ကြောင်သွားပြီး ပြောလိုက်သည်။ "ပြီးသွားပြီလား"

သို့သော် သူ၏ စကားသံ ဆုံးသည်နှင့် တစ်ပြိုင်နက် ရှေ့ဘက်မှ ပိုမို ကြောက်မက်ဖွယ်ကောင်းသော ကောင်းကင်တုန်ဟည်းမည့် အရှိန်အဝါတစ်ခု ဝုန်းခနဲ ပေါက်ကွဲထွက်လာခဲ့သည်။

ထိုနိယာမ စွမ်းအားမှာ ခုနကထက် အဆပေါင်း ရာချီမက ပိုမို အစွမ်းထက်လှသည်။

မြူခိုးများကြားရှိ အစီအရင်မှာ ထိုကောင်းကင်ဘုန်းတန်ခိုးကို မခံနိုင်တော့ဘဲ တိုက်ရိုက်ပင် ပွင့်ထွက်သွားခဲ့သည်။

ခြေထောက်အောက်ရှိ ကျောက်တုံးကြီးပင်လျှင် ပြင်းထန်စွာ တုန်ခါလာပြီး ပြိုကျတော့မည့်အလား ဖြစ်နေသည်။

ကံကောင်းသည်မှာ အကြီးအကဲများ၏ အစွမ်းမှာ အလွန်မြင့်မားသဖြင့် ချက်ချင်းပင် တုံ့ပြန်ကာ ဤနေရာရှိ အစီအရင်ကို ပြန်လည် တည်ငြိမ်အောင် လုပ်နိုင်ခဲ့ကြသည်။ သို့မဟုတ်ပါက နှစ်ပေါင်း သန်းနှင့်ချီ တည်ရှိခဲ့သော ဤကျောက်တုံးကြီးမှာ ပျက်စီးသွားပေလိမ့်မည်။

သူတို့ သတိပြန်ဝင်လာသည့် အခါမှာမူ လူတိုင်း၏ မျက်နှာပေါ်တွင် ထိတ်လန့်တုန်လှုပ်မှုများ ပြည့်နှက်နေတော့သည်။

ဘာကြောင့်လဲဆိုသော် သူတို့က ရှန်လင် သန့်စင်မှု မြင်ကွင်းကို မမြင်ရတော့ခြင်းကြောင့်ပင်။

ခုနက ဘာတွေ ဖြစ်ပျက်သွားခဲ့သနည်း။

ပေါက်ကွဲမှု၏ ဗဟိုချက်တွင် ရှိနေသော ထန်ထျန်းမှာရော အခု ဘယ်လို ဖြစ်နေပြီနည်း။

ယန်ရှို့အင်မော်တယ်အရှင်မှာ မျက်နှာညိုမည်းသွားပြီး မြူခိုးများအတွင်းသို့ ပြေးဝင်ရန် ကိုယ်ရှိန်သတ်လိုက်သည်။

သို့သော် ထိုအချိန်မှာပင် အလင်းတန်းတစ်ခုက သူ့အပေါ်သို့ ကျရောက်လာပြီး သူ၏ လှုပ်ရှားမှုကို တားဆီးလိုက်သည်။

ကြီးမြတ်လှသော အရှိန်အဝါနှင့်အတူ နက်ရှိုင်းသော အသံတစ်ခု ကောင်းကင်ယံ၌ ပဲ့တင်ထပ်လာခဲ့သည်။

"စိတ်အေးအေးထား"

"ထန်ထျန်း အခုထိ အဆင်ပြေတယ်"

လူတိုင်း မော့ကြည့်လိုက်ရာ အနက်ရောင် ရောယှက်နေသော ဝါကျင့်ကျင့် အဝတ်အစားကို ဝတ်ဆင်ထားသည့် အဘိုးအိုတစ်ဦးမှာ ကောင်းကင်ယံ၌ လက်မြှောက်ကာ ရပ်နေသည်ကို တွေ့လိုက်ရသည်။

လူတိုင်းက အလျင်အမြန်ပင် လက်သီးဆုပ် ဂါရဝပြုလိုက်ကြသည်။

"လက်အောက်ငယ်သား (တပည့်) များက မဟာအကြီးအကဲ ကို ဂါရဝပြုပါတယ်"

ဤသူကား တိမ်တိုက် ထျန်းဖူ နန်းတော်၏ မဟာအကြီးအကဲဖြစ်ပြီး ထျန်းချီတောင်၏ အမြင့်ဆုံး စီမံသူလည်း ဖြစ်သည်။

မဟာအကြီးအကဲက ဖြည်းညှင်းစွာ ဆင်းသက်လာပြီး ယန်ရှို့အင်မော်တယ်အရှင်၏ ဘေးသို့ ရောက်လာသည်။

"တားမြစ်ချက်မှာ မူမမှန်မှု ဖြစ်ခဲ့တာ မှန်ပေမဲ့ ရှန်လင် ကမ္ဘာထဲက ထန်ထျန်းမှာ ဘာအန္တရာယ်မှ မရှိပါဘူး"

"မင်း အရင်ဆုံး စိတ်အေးအေးထားပါ"

သူက ပြောရင်း ယန်ရှို့အင်မော်တယ်အရှင်အပေါ်ရှိ ချုပ်နှောင်မှုကို ဖယ်ရှားပေးလိုက်သည်။

ယန်ရှို့အင်မော်တယ်အရှင်က အင်မော်တယ်အရှင် အထွတ်အထိပ် အဆင့်ရှိသော အစွမ်းထက်သူ ဖြစ်သည်။

သူ့ကို အလွယ်တကူ ထိန်းချုပ်နိုင်သည်ဆိုလျှင် မဟာအကြီးအကဲ၏ အစွမ်းမှာ အင်မော်တယ်ဧကရာဇ် တစ်ပိုင်း အဆင့်မှာ သေချာပေါက် ရှိနေပေလိမ့်မည်။

သို့သော် ထိုမျှ အစွမ်းထက်ပြီး အဆင့်အတန်း မြင့်မားသော မဟာအကြီးအကဲကိုပင် ယန်ရှို့အင်မော်တယ်အရှင်က အလျှော့မပေးဘဲ အေးစက်စွာ နှာခေါင်းရှုံ့ရင်း ပြောလိုက်သည်။"အကယ်၍ ထန်ထျန်းသာ တစ်ခုခု ဖြစ်သွားခဲ့ရင်..."

"မင်း နောင်မှာ ဘယ်တော့မှ အေးအေးဆေးဆေး နေရတော့မှာ မဟုတ်ဘူး"

၎င်းမှာ ပြောင်ပြောင်တင်းတင်း ခြိမ်းခြောက်လိုက်ခြင်းပင်

သို့သော် ပတ်ဝန်းကျင်ရှိ အခြားအကြီးအကဲများမှာမူ ဤမြင်ကွင်းကို ကျင့်သားရနေပုံ ပေါ်ပြီး ဘာမှ မကြားသလိုပင် ငြိမ်သက်နေကြသည်။

အခြား မြင့်မြတ် သားတော်လောင်းလျာများမှာမူ တစ်ဦးကိုတစ်ဦး ကြည့်ကာ မှင်သက်နေကြသည်။

လော့ရှီးမှာလည်း မျက်လုံးများ တောက်ပလာပြီး သူမ၏ မျက်နှာပေါ်တွင် စပ်စုချင်စိတ်များ ပြည့်နှက်သွားသည်။

ထန်ထျန်းနှင့် ယန်ရှို့အင်မော်တယ်အရှင်တို့မှာ ဘယ်လို ပတ်သက်မှုမျိုး ရှိနေကြသနည်း။

ယန်ရှို့၏ ခြိမ်းခြောက်မှုကို မဟာအကြီးအကဲက သက်ပြင်းချရင်း "စိတ်ချပါ၊ ငါ တားမြစ်မှန် ထဲကနေ မြင်ပြီးသားပါ"

"အစပိုင်းက ကိုးရောင်ခြယ် ရေစီးကြောင်းက ထန်ထျန်းရဲ့ ရှန်လင် သန့်စင်မှုအတွင်း ပုံမှန် ပြသမှုပဲ"

"ဒါပေမဲ့ နောက်ပိုင်းမှာ ဘာကြောင့်လဲ မသိဘဲ တားမြစ်ချက်က မူမမှန် ဖြစ်သွားလို့ ခုနက လှုပ်ခတ်မှုတွေ ဖြစ်ခဲ့တာ"

"ဒါပေမဲ့ အဲဒါက ထန်ထျန်းကို မထိခိုက်စေဘဲ သူ့ကို ပိုပြီး စွမ်းအားတွေ ရရှိစေခဲ့တယ်"

မဟာအကြီးအကဲ၏ ရှင်းပြချက်ကို ကြားမှ ယန်ရှို့အင်မော်တယ်အရှင်၏ မျက်နှာမှာ အနည်းငယ် ပြေလျော့သွားသည်။

ထန်ထျန်း ဘာမှ မဖြစ်လျှင် ပြီးရောဟု သူ ယူဆပုံရသည်။

တားမြစ်ချက် မူမမှန်ဖြစ်ခြင်း ဆိုသည့် ကိစ္စထက် ထန်ထျန်း ဘေးကင်းဖို့က ပိုအရေးကြီးနေသကဲ့သို့ပင်။

ခဏအကြာတွင် မဟာအကြီးအကဲက ခပ်တိုးတိုး ပြောလိုက်သည်။ "ပြီးတော့မယ်"

"သွားကြစို့၊ မင်း စိတ်အေးရအောင် ငါ မင်းနဲ့အတူ လိုက်ခဲ့မယ်"

"ပြီးတော့ အဲဒီမှာ ဘာတွေ ဖြစ်ခဲ့လဲဆိုတာ သွားကြည့်ကြတာပေါ့"

ပြောပြီးနောက် မဟာအကြီးအကဲက ရှေးဟောင်း မှန်တစ်ချပ်ကို ထုတ်လိုက်သည်။

ထိုမှန်မှ မှိန်ဖျော့သော အလင်းတန်းအောက်တွင် သူနှင့် ယန်ရှို့အင်မော်တယ်အရှင်တို့က ရှေ့မှ မြူခိုးကမ္ဘာအတွင်းသို့ ပျံသန်းဝင်သွားကြသည်။

ယခုအချိန်တွင် ရှန်လင် ကမ္ဘာအတွင်း၌မူ...

ရှင်းယွဲ့ အင်မော်တယ်ဓား၏ စွမ်းအားကို စမ်းသပ်ပြီးနောက် ထန်ထျန်းမှာ ခေတ္တမျှ စောင့်နေခဲ့သည်။

နောက်ဆုံးတွင် ရှေ့မှ ကျောပြင်ကြီးမှာ ဝေဝါးလာတော့သည်။

မြူခိုးများမှာ အရပ်မျက်နှာ အနှံ့မှ ပြန်လည် အုံ့ဆိုင်းလာပြီး သူ့ကို လုံးဝ ဖုံးလွှမ်းသွားခဲ့သည်။

နောက်တစ်ခဏတွင် ထန်ထျန်းက လက်တွေ့ကမ္ဘာသို့ ပြန်လည် ရောက်ရှိလာခဲ့ပြီဖြစ်ကြောင်း ခံစားလိုက်ရသည်။

သို့သော် ပြန်ရောက်သည်နှင့် သူ၏ ခန္ဓာကိုယ်မှာ တစ်ခုခု မူမမှန်ဖြစ်နေသည်ကို သတိထားမိလိုက်သည်။

ပေါက်ကွဲထွက်တော့မည့်အလား ခံစားနေရခြင်းပင်

ဒန်တျန်အတွင်းရှိ အင်မော်တယ်စွမ်းအားများမှာ အဆုံးစွန်အထိ ပြည့်သိပ်နေပြီဖြစ်သည်။

အကယ်၍ သူသာ ဟင်းလင်းပြင် ခန္ဓာ ပိုင်ရှင် မဟုတ်ပါက ခုနကတည်းက ပေါက်ကွဲသွားလောက်ပြီ ဖြစ်သည်။

ဤအချိန်မှသာ ထန်ထျန်း နားလည်သွားသည်။

သူက ရှန်လင် ကမ္ဘာအတွင်း ဘာမှ မရခဲ့သည် မဟုတ်ပေ။

လက်တွေ့ကမ္ဘာရှိ ခန္ဓာကိုယ်မှာ အဆုံးမဲ့သော စွမ်းအားများကို ရရှိထားခဲ့ခြင်း ဖြစ်သည်။

အနည်းငယ် နေရခက်နေသဖြင့် ထန်ထျန်းက ချက်ချင်းပင် ကျင့်ကြံခြင်းကို စတင် လည်ပတ်စေကာ ဒန်တျန်အတွင်းရှိ စွမ်းအားများကို ချေဖျက်လျက် အဆင့်တက်ရန် ကြိုးစားလိုက်သည်။

အသက်ရှိုက်ချိန် အနည်းငယ်အတွင်းမှာပင် သူက အင်မော်တယ်ဘုရင် အစောပိုင်းအဆင့် မှ အလယ်အလတ်အဆင့် သို့ တိုက်ရိုက် ရောက်ရှိသွားခဲ့သည်။

ထိုမျှမကသေးဘဲ ခန္ဓာကိုယ်အတွင်းရှိ စွမ်းအားများမှာ အလွန်ပင် များပြားနေဆဲ ဖြစ်ရာ အင်မော်တယ်ဘုရင် နှောင်းပိုင်း အဆင့်အထိပင် ရောက်ရှိသွားနိုင်သည့် ပုံစံရှိသည်။

ဤအခြေအနေကို မြင်သည့်အခါ ထန်ထျန်း ပြုံးလိုက်မိသည်။

သူက နိယာမစွမ်းအားနှင့် နိယာမအပေါ် နားလည်မှုများ လိုအပ်သူ မဟုတ်ပေ၊ သူ အလိုအပ်ဆုံးမှာ ကျင့်ကြံခြင်း အဆင့် ဖြစ်သည်။

ဤသန့်စင်မှုက သူ့ကို အနည်းဆုံး ကျင့်ကြံခြင်း လပေါင်းများစွာကို သက်သာစေခဲ့သည်။

သို့သော် သူ ဆက်လက်၍ အဆင့်တက်ရန် ပြင်ဆင်နေစဉ်မှာပင် တစ်စုံတစ်ယောက်က ဤဘက်သို့ ပျံသန်းလာသည်ကို ခံစားလိုက်ရသဖြင့် ခေတ္တမျှ ရပ်တန့်ထားလိုက်သည်။

ထန်ထျန်း စိတ်ကို ပြန်လည် တည်ငြိမ်အောင် ထားပြီး ပတ်ဝန်းကျင်ကို ကြည့်လိုက်သောအခါ ဘေးမှ ရှောင်းယောင်ရွှင်နှင့် ယွမ်ယုတို့မှာ အကြောင်းရင်းမရှိဘဲ ပျောက်ကွယ်နေသည်ကို တွေ့လိုက်ရသည်။

ခြေထောက်အောက်ရှိ မိုးမခလှေမှာလည်း အက်ကြောင်းများ ပြည့်နှက်နေပြီး ပျက်စီးတော့မည့်အလား ရှိနေသည်။

ထန်ထျန်း ကြောင်သွားရသည်။

သူ သန့်စင်မှု ခံယူနေစဉ်အတွင်း ဘာတွေ ဖြစ်ခဲ့သနည်း။

စဉ်းစားနေစဉ်မှာပင် ပုံရိပ်နှစ်ခုက သူ၏ ရှေ့၌ ပေါ်လာသည်။

တစ်ဦးမှာ ယန်ရှို့အင်မော်တယ်အရှင် ဖြစ်ပြီး အခြားတစ်ဦးမှာ ဝါကျင့်ကျင့် အဝတ်အစားနှင့် အဘိုးအို ဖြစ်သည်။

ထိုအဘိုးအိုထံမှ ကြောက်မက်ဖွယ်ကောင်းသော အော်ရာ များ ထွက်ပေါ်နေသည်။

၎င်းမှာ အင်မော်တယ်ဧကရာဇ် တို့၏ အရှိန်အဝါမျိုး ဖြစ်သော်လည်း ရှင်းဟယ် အင်မော်တယ်ဧကရာဇ် နှင့် ယှဉ်လျှင်မူ အနည်းငယ် လိုနေသေးသည်။

စကားလုံးတစ်လုံး ထန်ထျန်း၏ ဦးနှောက်ထဲတွင် ပေါ်လာခဲ့သည်။

အင်မော်တယ်ဧကရာဇ် တစ်ပိုင်း

ထန်ထျန်း ဘာမှမဖြစ်ဘဲ ဘေးကင်းနေသည်ကို မြင်မှ ယန်ရှို့အင်မော်တယ်အရှင်မှာ သက်ပြင်းချနိုင်တော့သည်။

"မင်း အဆင်ပြေရဲ့လား"

ယန်ရှို့အင်မော်တယ်အရှင် က မေးလိုက်သည်။

ထန်ထျန်းက ခေါင်းညိတ်ပြကာ "အင်မော်တယ်အရှင်ရဲ့ ဂရုစိုက်မှုကို ကျေးဇူးတင်ပါတယ်၊ တပည့် ဘာမှမဖြစ်ပါဘူး"

ယန်ရှို့အင်မော်တယ်အရှင် က ထန်ထျန်းကို စိုက်ကြည့်ရင်း မျက်လုံးများ ကျဉ်းသွားသည်။

"မင်း... အင်မော်တယ်ဘုရင် အလယ်အလတ်အဆင့်ကို အဆင့်တက်သွားတာလား"

ကျင့်ကြံခြင်း အဆင့်မှာ အခုမှ တက်ထားခြင်း ဖြစ်သဖြင့် မတည်ငြိမ်သေးရာ အလွယ်တကူ အကဲခတ်မိခြင်း ဖြစ်သည်။

ထန်ထျန်းကလည်း ဖုံးကွယ်ရန် မရည်ရွယ်ဘဲ ခေါင်းညိတ်ပြလိုက်သည်။ "ဟုတ်ကဲ့"

ယန်ရှို့အင်မော်တယ်အရှင် မှာ သက်ပြင်းကို အရှည်ကြီး ချလိုက်မိသည်။

ရှန်လင် သန့်စင်မှုအတွင်း တိုက်ရိုက် အဆင့်တက်ခြင်းမှာ ယခင်ကလည်း ရှိခဲ့ဖူးသော်လည်း ဤသည်မှာလည်း အလွန်ပင် ကောင်းကင်ကို ဆန့်ကျင်သော ကိစ္စပင်။

ထန်ထျန်း အဆင်ပြေကြောင်း အတည်ပြုပြီးနောက် ယန်ရှို့အင်မော်တယ်အရှင် က ဘေးမှ မဟာအကြီးအကဲကို တစ်ချက်ကြည့်ကာ မေးလိုက်သည်။

"ရှန်လင် သန့်စင်မှုအတွင်းမှာ... မင်း တကယ်ပဲ ဘာကို မြင်ခဲ့ရလဲ"

ထန်ထျန်း ခေတ္တမျှ တိတ်ဆိတ်သွားသည်။

ထို့နောက် အမှန်အတိုင်းပင် ပြောလိုက်တော့သည်။"ကျွန်တော် လူတစ်ယောက်ကိုပဲ မြင်ခဲ့ရပါတယ်..."

"သူက ဘောလုံးကစားနေတာပါ"

ယန်ရှို့အင်မော်တယ်အရှင် : ...

မဟာအကြီးအကဲ : ...

"မင်း ဘာပြောလိုက်တယ်"