အခန်း (၉၈၁-၉၈၂)

စာစဉ် (၅၈) အကျဉ်းချုပ်

ကွန်ဒီမျိုးနွယ်စုခေါင်းဆောင်ရဲ့ မစ်ရှင်ကနေ ဘယ်လိုဆုလာဘ်တွေ ရနိုင်မှာလဲ

ဟန်ရှောင်းရဲ့ ဆင့်ကဲဖြစ်စဉ်ကုဗတုံးကို အင်ပါယာက စကြဝဠာရတနာ (၃) ခုနဲ့ လာလဲတဲ့အခါ ပေးလိုက်ရတော့မှာလား

သေမင်းနတ်ဘုရားမကိုရော မှတ်မိကြသေးလား

ဂေါ့ဒ် ဆိုတဲ့ လျှို့ဝှက်ဆန်းကြယ်တဲ့ ပါရမီရှင်က ဘယ်သူများလဲ

ဟန်ရှောင်းရဲ့ တိုက်ခိုက်ရေးသမားအဆင့်မှနေ၍ စကြဝဠာတစ်ခုလုံး၏ နိုင်ငံရေးနှင့် စစ်ရေးကို ခြယ်လှယ်နိုင်တဲ့ အဆင့်ထိ ရောက်လာပုံကို ကွင်းကွင်းကွက်ကွက် မြင်ရမယ့် စာစဉ် (၅၈)

အခန်း ၉၈၁ စစ်ဆေးမေးမြန်းခြင်းနှင့် ဆန္ဒ

ကွန်ဒီလူမျိုးစု၏ အာကာသယာဉ်အားလုံးကို မီးပြတိုက်ဂြိုလ်ဆီသို့ ပို့ဆောင်ရန်အတွက် တပ်ခွဲအားလုံး စုဝေးပြီး အင်အားကြီးမားသော ယာဉ်တန်းကြီးကို ဖွဲ့စည်းလိုက်ကြသည်။

အင်ပါယာ၏ ယာဉ်တန်းသည် ပတ်ပတ်လည်တွင် ဝိုင်းရံထားပြီး ကွန်ဒီလူမျိုးစု၏ အာကာသယာဉ် ထောင်ပေါင်းများစွာကို ဝန်းရံထားသည်။

သူတို့၏ လက်နက်များကို ဖျက်သိမ်းပြီးဖြစ်ကာ စွမ်းအင်အမြုတေများကိုလည်း အာကာသယာဉ်များ ပျံသန်းနိုင်ရုံသာ ခွင့်ပြုရန် ကန့်သတ်ထားသည်။ ယာဉ်တန်းတစ်ခုလုံးသည် ပြန်လည်ခုခံနိုင်စွမ်း ဆုံးရှုံးသွားပြီး အင်ပါယာ၏ ထိန်းချုပ်မှုအောက်သို့ ရောက်ရှိသွားသည်။ ကွန်ဒီလူမျိုးစု ယာဉ်တန်း၏ အာကာသယာဉ်များသည် ထောင်တစ်ခုအဖြစ် ပြောင်းလဲသွားခဲ့ပြီဖြစ်သည်။

ကွန်ဒီလူမျိုးစု ယာဉ်တန်း၏ ပင်မအလံတင်သင်္ဘောသည် အကြီးမားဆုံး ပြုပြင်မွမ်းမံခံရပြီး အာကာသယာဉ်၏ အခန်းများကို အကျဉ်းခန်းများအဖြစ် ပြောင်းလဲထားသည်။

ကွပ်ကဲမှုခန်းမကို အင်ပါယာစစ်သည်များက သိမ်းပိုက်ထားပြီး ကွပ်ကဲမှုခန်းမထဲတွင် ပုံရိပ်ယောင်နှစ်ခု ပေါ်လာသည်။ သူတို့မှာ တာရိုကော့ဗ်နှင့် ဟန်ရှောင်းတို့ ဖြစ်ကြသည်။

"စစ်သေနာပတိချုပ်ကြီးကို ဂါရဝပြုပါတယ်"

သူတို့နှစ်ဦးစလုံး အွန်လိုင်းပေါ်သို့ ရောက်ရှိလာသည်နှင့် စစ်သည်များက မိမိတို့၏ တပ်မှူးကို နှုတ်ဆက်သော အသံများ ထွက်ပေါ်လာသည်။

တာရိုကော့ဗ်သည် ၎င်းလာရောက်မည့်အကြောင်းကို ကြိုတင် အကြောင်းကြားထားပြီးဖြစ်သဖြင့် စစ်သည်များသည် ၎င်းအား စောင့်ဆိုင်းနေကြသည်။

တပ်ခွဲအသီးသီးမှ တပ်မှူးများသည် မိမိတို့၏ လက်ထောက်များနှင့်အတူ အဝေးရောက်ပုံရိပ်ယောင်များအဖြစ် ရှိနေကြသည်။

"အားလုံးပဲ ပင်ပန်းသွားကြပြီ" တာရိုကော့ဗ်က ဖော်ရွေသော အမူအရာဖြင့် ပြုံးလိုက်သည်။

ဤလူငယ်ထူးချွန်တပ်မှူးများသည် အင်ပါယာ၏ အနာဂတ်ကြယ်ပွင့်များ ဖြစ်လာကြမည်ဖြစ်ပြီး တာရိုကော့ဗ်သည် မိမိရှေ့မှ အရည်အချင်းရှိသူများကို ကြည့်ရှုကာ အမှန်တကယ်ပင် ကျေနပ်နေမိသည်။

ဟန်ရှောင်းသည် ရှိနေသော တပ်မှူးများကို ကြည့်လိုက်သည့်အခါ အနည်းငယ် အံ့အားသင့်သွားသည်။

ဟိုး... အားလုံးက အကောင်ကြီးတွေပဲ

အနာဂတ် တပ်မှူးများနှင့် အကောင်ကြီးကြီးများ တစ်အုပ်စုလုံးသည် စစ်ဆေးရေးချီတက်ပွဲကဲ့သို့ သူ၏ရှေ့၌ ရပ်နေကြသည်။

ဤတပ်မှူးများ၏ အနာဂတ် ရာထူးအဆင့်အတန်းများကို ၎င်းသိရှိထားသဖြင့် ဟန်ရှောင်းသည် ဤမြင်ကွင်းကို အမှတ်တရတစ်ခုအဖြစ် မြင်တွေ့နေပြီး ဓာတ်ပုံပင် ရိုက်ကူးထားချင်စိတ် ပေါ်လာသည်။

"အရှင် ဘလက်စတား၊ လူကြီးမင်းလည်း ဒီမှာ ရှိနေတာပဲ" တန်နီက ထိုအုပ်စုထဲမှ ဟန်ရှောင်းကို ပြုံး၍ နှုတ်ဆက်လိုက်သည်။

"ငါတို့ ပြန်ဆုံကြပြန်ပြီ" ဟန်ရှောင်းက ခေါင်းညိတ်ပြလိုက်ပြီး အခြားတပ်မှူးများက လှည့်ကြည့်လာသည်ကို မြင်သောအခါ "စစ်ပွဲမှာ အောင်နိုင်ခဲ့တဲ့အတွက် အားလုံးကို ဂုဏ်ပြုပါတယ်။ ဒီလို အရည်အချင်းရှိတဲ့ တပ်မှူးတွေရှိတာ အင်ပါယာအတွက် ဂုဏ်ယူစရာပါပဲ"

တစ်ဖွဲ့လုံးကို မြှောက်ပင့်လိုက်သည့် အကျိုးသက်ရောက်မှုသည် မဆိုးလှပေ။

သူသည် အင်ပါယာ၏ မဟာမိတ်တစ်ဦးသာ ဖြစ်သော်လည်း သူ၏ အဆင့်အတန်းသည် မိမိတို့၏ သက်တမ်းတွင် အမြင့်ဆုံးအဆင့်သို့ မရောက်ရှိသေးသည့် ဤလူငယ်ထူးချွန်သူများထက် သာလွန်နေသည်။

လူတိုင်းသည် ချီးကျူးစကားကို နားထောင်ရသည်ကို နှစ်သက်ကြပြီး ဘလက်စတား၏ ချီးကျူးမှုကို ကြားရသည့်အခါ လူတိုင်း ပြုံးလိုက်ကြသည်။

"အရှင် ဘလက်စတားက အဓိက သတင်းအချက်အလက်တွေကို ပေးခဲ့တဲ့အတွက် ကျွန်တော်တို့ အောင်ပွဲအတွက် တကယ့် အုတ်မြစ်ပါပဲ"

"ကျွန်တော်တို့က လက်တွေ့အလုပ်တွေကိုပဲ လုပ်ခဲ့တာပါ။ အရှင် ဘလက်စတားရဲ့ ပံ့ပိုးမှုက ကျွန်တော်တို့ စစ်ပွဲအောင်နိုင်ရတဲ့ အဓိက အကြောင်းရင်းပါပဲ"

ရှိနေသော တပ်မှူးအချို့က ချက်ချင်း ယဉ်ကျေးစွာ ပြန်လည်ပြောကြားသည်။ အချို့တပ်မှူးများမှာမူ ဘာမှမပြောဘဲ လေးစားမှုဖြင့် ခေါင်းညိတ်ပြကြသည်။

ဟန်ရှောင်းက ပြုံး၍ ပြန်လည်ပြောကြားလိုက်သော်လည်း ၎င်း၏ အကြည့်သည် ရုတ်တရက် ဂေါ့ဒ်ထံ၌ ရပ်တန့်သွားသည်။

"ဟင်... မင်းက..."

ဟန်ရှောင်းသည် မျက်မှောင်ကြုတ်လိုက်ပြီး မိမိရှေ့မှလူကို မမှတ်မိကြောင်း သိရှိလိုက်သည်။

၎င်းကို မြင်သည့်အခါ ဂေါ့ဒ်က ပြုံးလိုက်ပြီး ဦးအောင် ပြောကြားလိုက်သည်။ "ကျွန်တော် အရှင် ဘလက်စတားရဲ့ နာမည်ကို ကြားဖူးတာ ကြာပါပြီ"

"ဒါက ဂေါ့ဒ်ပါ၊ အင်ပါယာက ပြုစုပျိုးထောင်ပေးနေတဲ့ စူပါတွေထဲက တစ်ယောက်ပေါ့။ သူက ရှေးဦး ဆိုင်ရွန်းနစ် စွမ်းအင် ပေါက်ကွဲမှုကနေ လွတ်မြောက်လာခဲ့ပြီး အရမ်းထူးချွန်တယ်လို့ ငါကြားတယ်" ဟု တာရိုကော့ဗ်က ရယ်မောရင်း မိတ်ဆက်ပေးလိုက်သည်။

"မင်္ဂလာပါ ဂေါ့ဒ်"

ဟန်ရှောင်းသည် အခြားတပ်မှူးများကို ဆက်လက်နှုတ်ဆက်ရင်း ဂေါ့ဒ်၏ မှတ်တမ်းများကို စစ်ဆေးရန် ကွမ်တမ်ကွန်ရက်ထဲသို့ လျှို့ဝှက်စွာ ဝင်ရောက်လိုက်သည်။

လူတစ်ဦး၏ နောက်ကြောင်းကို စစ်ဆေးခြင်းသည် ၎င်းလုပ်ဆောင်နေကျ လုပ်ငန်းတစ်ခု ဖြစ်သည်။

သူ၏ လက်ရှိ အဆင့်အတန်းနှင့်ဆိုလျှင် တပ်မှူးအချို့၏ အချက်အလက်များကို စစ်ဆေးခြင်းသည် ပြဿနာရှိမည် မဟုတ်ပေ။

နောက်တစ်စက္ကန့်တွင် ဂေါ့ဒ်၏ ကိုယ်ရေးရာဇဝင်သည် ၎င်းရှေ့၌ ပေါ်လာပြီး ကိုယ်ရေးရာဇဝင်မှာ ပြဿနာမရှိဘဲ အလွန်ပင် ရိုးရှင်းနေသည်။

သို့သော် ၎င်းက ပိုမိုအသေးစိတ်သော အချက်အလက်များကို ကြည့်ရှုလိုသည့်အခါ ခွင့်ပြုချက်မရှိကြောင်း သတိပေးချက်တစ်ခု ပေါ်လာသည်။

"ငါ ကြည့်လို့ မရဘူးလား။ သူတို့က သူ့ကို တကယ်ပဲ အရေးတယူ ရှိပုံရတာပဲ"

ဟန်ရှောင်းသည် အင်ပါယာ၏ မကျေနပ်မှုကို ဖြစ်စေရန်အတွက် အကြောင်းပြချက်မရှိဘဲ အင်ပါယာ၏ ဖားယားဝေါကို ဖောက်ထွင်းရန် စိတ်မကူးပေ။

တာရိုကော့ဗ်က ဂေါ့ဒ်သည် အင်ပါယာမှ ပြုစုပျိုးထောင်ပေးနေသည့် စူပါတစ်ဦး ဖြစ်သည်ဟု ပြောကြားခဲ့သည်။ အင်ပါယာသည် စူပါ အမျိုးအစား နှစ်မျိုးကိုသာ ပြုစုပျိုးထောင်ပေးလေ့ရှိသည် - အထူးစွမ်းရည်ရှိသူ သို့မဟုတ် ထူးကဲသော ပါရမီရှိသူများ ဖြစ်ကြသည်။ ဤသူသည် အလွန်ဆုံးရှိလှ ကပ်ဘေးအဆင့် စူပါတစ်ဦးသာ ရှိဦးမည်ဖြစ်ပြီး ၎င်းသည် ရှေးဦး ဆိုင်ရွန်းနစ် စွမ်းအင် ပေါက်ကွဲမှုတွင် ရှင်သန်နိုင်ခဲ့သဖြင့် ပထမအုပ်စုထဲ၌ ပါဝင်သင့်သည်။

၎င်း၏ အရင်ဘဝတွင် မဟာယန္တရားပညာရှင် ဟန်သည် ကြက်သွေးရောင်အင်ပါယာ အဖွဲ့အစည်းဝင် ဖြစ်ခဲ့ပြီး အင်ပါယာ၏ အကောင်ကြီးများနှင့် အလွန်ပင် ရင်းနှီးခဲ့သည်။ ဂေါ့ဒ်သည် အင်ပါယာက အမှန်တကယ် ပျိုးထောင်ပေးထားသည့် စူပါဆိုလျှင် ၎င်းအနေဖြင့် အခြားတစ်ဖက်ကို အနည်းငယ် မှတ်မိနေသင့်သည်။

သို့သော် ဤကဲ့သို့သော ဇာတ်ကောင်မျိုးကို ၎င်းတစ်ခါမျှ မကြားဖူးကြောင်း သေချာနေပြီး ဂေါ့ဒ်နှင့် ပတ်သက်သည့် မည်သည့် အမှတ်ရမှုမျှ မရှိပေ။ ၎င်း၏ အရင်ဘဝတွင် ဤကဲ့သို့သော ဇာတ်ကောင်မျိုး မရှိခဲ့ပေ။

"ဇာတ်ကြောင်းက ပြန်ပြောင်းသွားပြန်ပြီလား။ ဒီလူသစ်က ဘယ်ကနေ ရောက်လာတာလဲဆိုတာ ငါ သိချင်မိတယ်" ဟန်ရှောင်းက မိမိဘာသာ တွေးတောလိုက်သည်။

သူသံသယဖြစ်နေသော်လည်း ဤကိစ္စကို အလွန်အမင်း ထူးဆန်းသည်ဟုတော့ မယူဆပေ။

အများကြီး လုပ်ဆောင်ပြီးနောက်တွင် ၎င်းသည် လိပ်ပြာအကျိုးသက်ရောက်မှုကို ဖြစ်ပေါ်စေခဲ့ပြီးဖြစ်ရာ ဇာတ်ကောင်အသစ်အချို့ ပေါ်လာခြင်းမှာလည်း မထူးဆန်းပေ။

အခြားသူများကို မဆိုထားနှင့်ဦး၊ ဂျာမီနယ်ဘဏ္ဍာရေးအုပ်စု၏ လက်ရှိမန်နေဂျာ အိုင်ယာပက်တပ်စ်သည်ပင် ၎င်း တူးဖော်ခဲ့သည့် လီခ့်တစ်ဦး ဖြစ်သည်။

ဟန်ရှောင်း၏ ခန့်ညားသော ပုံစံကို ကြည့်ရှုရင်း ဂေါ့ဒ်၏ နှုတ်ခမ်းများသည် အနည်းငယ် ကွေးညွတ်သွားသည်။ "အရှင် ဘလက်စတား၊ ဖြစ်နိုင်ရင် ကျွန်တော်တို့ အနာဂတ်မှာ ရဲဘော်ရဲဘက်တွေ ဖြစ်လာနိုင်ပါတယ်"

ဟန်ရှောင်းက သူ၏ အတွေးများထဲမှ ပြန်ရောက်လာသည်။ "ငါတို့က အခုရော ရဲဘော်ရဲဘက်တွေ မဟုတ်ဘူးလား"

"အာ... ကျွန်တော် ဘာကိုဆိုလိုတယ်ဆိုတာ ခင်ဗျား နားလည်ပါတယ်" ဂေါ့ဒ်က တည်ငြိမ်သော အပြုံးဖြင့် ပြောလိုက်သည်။

"... ရည်မှန်းချက် ကြီးတာပဲ၊ ဒါဆို မင်းကို ငါ စောင့်နေပါ့မယ်" ဟန်ရှောင်းက မျက်ခုံးပင့်လိုက်သည်။

သူက ငါ့လို အဆင့် အေ အထက်ဆင့် တစ်ဦး ဖြစ်လာမည်ဟု ဆိုလိုတာလား။ ဒီကောင် တော်တော်လေး ယုံကြည်မှုရှိတာပဲ။

ထို့နောက် သူသည် ဂေါ့ဒ်ကို မိမိ၏ မှတ်ဉာဏ်ထဲ၌ မှတ်သားထားလိုက်ပြီဂ အကြည့်လွှဲလိုက်သည်။

အခြားသူများနှင့် ပေါ့ပေါ့ပါးပါး စကားပြောဆိုပြီးနောက် သူသည် မိမိ၏ "နောက်တစ်ခါကျရင် ထမင်းကျွေးပါ့မယ်" ဟူသော အဆုံးသတ်စကားစုကို ပြောကြားလိုက်ပြီး တပ်မှူးအသီးသီး အော့ဖ်လိုင်း ဖြစ်သွားကြသည်။

ဟန်ရှောင်းနှင့် တာရိုကော့ဗ်တို့သာ ကျန်ရစ်ပြီး သူတို့သည် စစ်သည်များ၏ လမ်းညွှန်မှုအောက်တွင် အာကာသယာဉ်တစ်ခုလုံးကို ဆက်လက် လှည့်လည်ကြည့်ရှုကြသည်။

ကွန်ဒီလူမျိုးစု အရပ်သားအားလုံးကို တစ်နေရာတည်း၌ ထားရှိပြီး အထက်တန်းလွှာများကိုမူ သီးခြားစီ ပိတ်လှောင်ထားသည်။ ဟန်ရှောင်းသည် ပထမဦးစွာ တာရိုကော့ဗ်နှင့်အတူ အရပ်သားနယ်မြေကို လှည့်လည်ကြည့်ရှုသည်။

၎င်းသည် ဒုက္ခသည်စခန်းတစ်ခုနှင့် တူနေသည်။

ရေတွက်၍မရသော ကွန်ဒီလူမျိုးစု အရပ်သားများသည် မျက်လုံးထဲ၌ ကြောက်ရွံ့မှုများ၊ စိုးရိမ်မှုများနှင့်အတူ စုဝေးနေကြသည်။

စစ်ပွဲမစတင်မီတွင် သူတို့ထဲမှ အများအပြားမှာ ထွက်ခွာရန် ဝန်လေးနေကြပြီး ရန်သူမှာ စိတ်ကူးယဉ်သက်သက်သာ ဖြစ်သည်ဟု ခံစားခဲ့ကြသည်။

သို့သော် ယခုအခါတွင်မူ အရပ်သားများသည် နှလုံးသားထဲ၌ ကြောက်ရွံ့မှုများဖြင့် ပြည့်နှက်နေပြီ ဖြစ်သည်။ သူတို့သည် သားသတ်သမား၏ ဓားကျလာမည်ကို စောင့်ဆိုင်းနေသော သားကောင်များကဲ့သို့ ဖြစ်နေသည်။

ဤအရာမတိုင်မီက သူတို့သည် ကြယ်စုတန်းတစ်ခုလုံးကို အုပ်ချုပ်ခဲ့သော လူမျိုးစု ဖြစ်ခဲ့သည်။ သို့သော် ယခုအခါတွင်မူ သူတို့သည် သုံ့ပန်းများအဖြစ်သို့ အဆင့်လျော့ကျသွားခဲ့ပြီ ဖြစ်သည်။

အရပ်သားနယ်မြေကို လှည့်လည်ကြည့်ရှုပြီးနောက် သူတို့နှစ်ဦးသည် အထက်တန်းလွှာများ ပိတ်လှောင်ထားသော နယ်မြေသို့ သွားရောက်ကြသည်။ သူတို့သည် ကွန်ဒီလူမျိုးစု ခေါင်းဆောင်၏ စစ်ဆေးမေးမြန်းခန်း အပြင်ဘက်၌ ရပ်တန့်ပြီး ပြတင်းပေါက်မှတစ်ဆင့် အခြားတစ်ဖက်ကို ကြည့်ရှုကြသည်။

သူသည် သုံ့ပန်းတစ်ဦး ဖြစ်နေပြီဖြစ်သော်လည်း ကွန်ဒီလူမျိုးစု ခေါင်းဆောင်သည် မတ်မတ်ရပ်နေဆဲဖြစ်ကာ တည်ငြိမ်မှုကို ထိန်းသိမ်းထားသည်။ ၎င်း၏ မျက်လုံးများကို လက်ရှိတွင် တရားထိုင်နေသည့်ပုံစံ မှိတ်ထားသည်။

"ခင်ဗျား သူ့ကို စစ်ဆေးမေးမြန်းတဲ့အခါ ကျွန်တော် ဘေးကနေ နားထောင်နေပါ့မယ်" ဟန်ရှောင်းက တာရိုကော့ဗ်ကို ပြောလိုက်သည်။

အဓိက စစ်ဆေးမေးမြန်းသူသည် တာရိုကော့ဗ် ဖြစ်သည်၊ သူက ကြည့်ရှုရန်အတွက်သာ ရှိနေခြင်း ဖြစ်သည်။ ထို့အပြင် ကွန်ဒီလူမျိုးစု ခေါင်းဆောင်ကလည်း သူ့ကို မှတ်မိလိမ့်မည် မဟုတ်ပေ။

တာရိုကော့ဗ်က ခေါင်းညိတ်ပြပြီး ဘေးမှ စစ်သည်ကို အမိန့်ပေးလိုက်သည်။ "တံခါးဖွင့်လိုက်"

...

စစ်ဆေးမေးမြန်းခန်းထဲတွင် ကွန်ဒီလူမျိုးစု ခေါင်းဆောင်သည် ထိုင်နေပြီး မတ်မတ်ထိုင်နိုင်ရန် အစွမ်းကုန် ကြိုးစားနေသည်။

သူသည် မြင်တွေ့နေရသလောက် မတည်ငြိမ်သော်လည်း တည်ငြိမ်မှုကို ထိန်းသိမ်းထားရန် လိုအပ်သည်။ သူ၏ မျက်လုံးထဲ၌ သူသည် ကွန်ဒီလူမျိုးစု၏ နောက်ဆုံး ကိုယ်စားလှယ် ဖြစ်သည်။

ဝှစ်။

တံခါးပွင့်သွားပြီး ကွန်ဒီလူမျိုးစု ခေါင်းဆောင်သည် လူပုံရိပ်နှစ်ခု ဝင်လာသည်ကို ကြည့်ရှုရန် မျက်လုံးဖွင့်လိုက်သည်။

တစ်ဦးမှာ ၎င်း အရင်က မြင်တွေ့ဖူးသော စစ်သေနာပတိ တာရိုကော့ဗ် ဖြစ်ပြီး အခြားတစ်ဦးမှာမူ သူ့အတွက် အလွန်ပင် စိမ်းသက်နေသည်။ ၎င်းသည် အနက်ရောင် ဝတ်ရုံကို ဝတ်ဆင်ထားပြီး အကောင်ကြီးကြီးတစ်ယောက်ကဲ့သို့ ဖြစ်နေသည်။

"ဒါက ငါတို့ ဒုတိယအကြိမ် ဆုံတာပဲ" တာရိုကော့ဗ်က တည်ငြိမ်သော မျက်နှာထားဖြင့် ပြောကြားလိုက်သည်။ "ငါတို့ဘက်က ကတိအတိုင်း မင်းတို့လူမျိုးစုကို အစုလိုက်အပြုံလိုက် မသတ်ခဲ့ဘူး။ အခု မင်းသိသမျှ အကုန်ပြောပြရမယ်။ ငါတို့ကို တိုက်ခိုက်ဖို့ ဆုံးဖြတ်ရတဲ့ မင်းရဲ့ အတွေးအခေါ်တွေ၊ တိုက်ခိုက်ရတဲ့ အကြောင်းရင်းနဲ့ ဒီတိုက်ခိုက်မှုနဲ့ ပတ်သက်သမျှ အကုန်ပြောပြပါ။ မင်းရဲ့ အဖြေက မင်းအပေါ် ငါတို့ ဘယ်လို ကိုင်တွယ်မလဲဆိုတာကို ဆုံးဖြတ်ပေးမှာဆိုတာ မှတ်ထားပါ။ တစ်ခုခုကို ဖုံးကွယ်မထားတာ အကောင်းဆုံးပဲ၊ မဟုတ်ရင် နောင်တရမယ့်သူက ငါမဟုတ်မှာတော့ သေချာတယ်"

ပုံရိပ်ယောင် နည်းပညာသည် သူတို့အတွက် သတင်းအချက်အလက်များကို ခိုးယူပေးနိုင်သော်လည်း အခြားတစ်ဖက်၏ အတွေးဖြစ်စဉ်ကိုမူ ၎င်းမှတစ်ဆင့် နားလည်နိုင်မည် မဟုတ်ပေ။ ဤသည်မှာ ယနေ့ သူတို့ စစ်ဆေးမေးမြန်းရသည့် အဓိကအချက် ဖြစ်သည်။

ကွန်ဒီလူမျိုးစု ခေါင်းဆောင်သည် မိမိ စစ်ဆေးမေးမြန်းခံရမည်မှာ အချိန်တစ်ခုသာ လိုတော့ကြောင်း သိရှိနေပြီး ဘာကိုမျှ ဖုံးကွယ်ရန် မဝံ့ရဲပေ။ တစ်ချိန်တည်းမှာပင် ၎င်းသည် ဘာကိုမျှ ဖုံးကွယ်ထားရန် ဆန္ဒမရှိဘဲ မိမိသိရှိသမျှ အားလုံးကို လေးလံသော နှလုံးသားဖြင့် ပြောပြလိုက်သည်။

အခြားတစ်ဖက်က ၎င်း၏ ဇာတ်လမ်းကို ပြောပြနေသည်ကို ကြားရသည့်အခါ တာရိုကော့ဗ်က အစီရင်ခံစာတစ်ခုကို ရေးသားသည်။ ရံဖန်ရံခါတွင် ဟန်ရှောင်းက လှမ်းကြည့်လိုက်သည့်အခါ 'လူမျိုးခြား ကြောက်ရွံ့သော အတွေးအခေါ်'၊ 'ဌာနေမျိုးနွယ်စုဝင် မာန'၊ 'လက်စားချေသော လူမှုအဖွဲ့အစည်း' နှင့် 'အတူတကွ နေထိုင်ရန် မသင့်တော်ခြင်း' စသည့် အနုတ်လက္ခဏာဆောင်သော အသုံးအနှုန်းအချို့ကို မြင်တွေ့ရသည်။

"ဒါတွေက ကောင်းတဲ့ အသုံးအနှုန်းတွေ မဟုတ်ဘူး..." ဟန်ရှောင်းက မျက်တောင်ခတ်လိုက်သည်။

ဤစစ်ဆေးမေးမြန်းမှု အစီရင်ခံစာသည် အင်ပါယာ၏ ဆုံးဖြတ်ချက်ကို သေချာပေါက် သက်ရောက်မှု ရှိမည်ဖြစ်ပြီး ဤစကားလုံးများသည် အန္တရာယ်ရှိလှသည်။

ခဏအကြာတွင် ကွန်ဒီလူမျိုးစု ခေါင်းဆောင်သည် ၎င်းပြောကြားစရာ ရှိသည်များကို နောက်ဆုံးတွင် ပြောကြားပြီးသွားသည်။

"ခင်ဗျားတို့ရဲ့ တည်ရှိမှုက ကျွန်တော်တို့ ကြီးထွားဖို့နေရာကို လုယူသွားလိမ့်မယ်၊ ဒါကြောင့် ကျွန်တော်တို့က နှောင့်ယှက်ခြင်း မခံရမယ့် အမိမြေအသစ်ကို ရှာဖွေချင်တာပါ။ ခင်ဗျားတို့အားလုံးနဲ့ အတူတူနေဖို့ ဆန္ဒမရှိဘူး၊ ဘာလို့လဲဆိုတော့ အဲဒါက ကျွန်တော်တို့ရဲ့ ကြီးထွားမှုနဲ့ ဖွံ့ဖြိုးတိုးတက်မှုကိုပဲ ကန့်သတ်ထားမှာမို့လို့ပါ"

၎င်းကို ကြားသည့်အခါ တာရိုကော့ဗ်က ခေါင်းညိတ်လိုက်ပြီး ဘာမှ ဖုံးကွယ်မထားဘဲ ပြောကြားလိုက်သည်။ "မင်း မှန်ပါတယ်။ မင်းတို့ကို ငါတို့ ဘယ်တော့မှ ထမြောက်ခွင့်ပေးမှာ မဟုတ်ဘူး"

သူတို့ထဲမှ ဘယ်သူမှ သူတော်စင်များ မဟုတ်ကြပါ၊ ကြက်သွေးရောင်အင်ပါယာသည် ကြယ်ရောင်တောက်ပကမ္ဘာကို ရှာဖွေခြင်းမှာ ဌာနေမျိုးနွယ်စုဝင်များနှင့် သဟဇာတဖြစ်အောင် နေထိုင်ရန် မဟုတ်ပေ။ သူတို့သည် ဌာနေမျိုးနွယ်စုဝင်များကို ဖွံ့ဖြိုးတိုးတက်အောင် လုပ်ဆောင်ပေးရန် စီစဉ်ထားခြင်း မဟုတ်ဘဲ သူတို့ ရှင်သန်ရန်အတွက် နေရာအချို့ ပေးရန်သာ စီစဉ်ထားခြင်း ဖြစ်သည်။

ဌာနေမျိုးနွယ်စုဝင် အများစုအတွက်မူ ၎င်းသည် ဆိုးရွားသောအရာ မဟုတ်ပေ။ စကြဝဠာ လူမှုအဖွဲ့အစည်းကြီး သုံးခုက သူတို့ကို ပညာပေးမည်ဖြစ်ပြီး သူတို့သည် အဆင့်မြင့် နည်းပညာဗဟုသုတများကို ရရှိကြမည် ဖြစ်သည်။ သို့သော် အတိုင်းအတာတစ်ခုအထိ ရှိနေသော ကွန်ဒီလူမျိုးစုအတွက်မူ ၎င်းသည် ဘေးဒုက္ခတစ်ခု ဖြစ်သည်။

စကြဝဠာ လူမှုအဖွဲ့အစည်းကြီး သုံးခုသည် မိမိတို့၏ နေရာများကို ချောင်းကြည့်နေမည့် လူမှုအဖွဲ့အစည်းများ ပိုမိုရှိလာမည်ကို စိတ်ဝင်စားခြင်း မရှိကြဘဲ သူတို့၏ ကြီးထွားမှုကို သေချာပေါက် ကန့်သတ်ထားကြမည် ဖြစ်သည်။

ကြက်သွေးရောင်အင်ပါယာသည် ကွန်ဒီလူမျိုးစု၏ လုပ်ရပ်များကို မုန်းတီးခြင်း မရှိပေ။ နောက်ဆုံးတွင် ၎င်းသည် သူတို့အတွက် အခြားတစ်ဖက်ကို စစ်အင်အားဖြင့် နှိမ်နင်းရန် အကောင်းဆုံး အကြောင်းပြချက် ပေးခဲ့ခြင်း ဖြစ်သည်။

"ဒါပေမဲ့" တာရိုကော့ဗ်က ဆက်လက်ပြောကြားလိုက်သည်။ "မင်းတို့ ရခဲ့တဲ့ အာကာသယာဉ် အပျက်အစီးတွေက ငါတို့ ပြိုင်ဘက်တွေထဲက တစ်ယောက်က ပေးလိုက်တာဆိုတာ မင်း နားလည်မယ်လို့ ငါထင်တယ်။ သူတို့က ငါတို့ကို ကိုင်တွယ်ဖို့ မင်းတို့ကို အသုံးချခဲ့တာပဲ။

"သူတို့က မင်းတို့ရဲ့ စစ်အင်အားကို အားကောင်းအောင် နည်းပညာတွေ ပေးခဲ့ပေမဲ့ အင်ပါယာနဲ့ ပတ်သက်တဲ့ သတင်းအမှားတွေကိုပဲ ပေးခဲ့တာ။ သူတို့က ကြက်သွေးရောင်အင်ပါယာရဲ့ အင်အားကို မင်းတို့ကို မပြောခဲ့ဘူး၊ အဲဒါက မင်းတို့မှာ ပြန်လည် တိုက်ခိုက်နိုင်စွမ်း ရှိတယ်လို့ ထင်အောင် လုပ်ခဲ့တာပဲ။

"အာကာသယာဉ် အပျက်အစီးတွေက အဆိပ်သီးနဲ့ တူတယ်။ နည်းပညာ ကျွမ်းကျင်မှုက သေစေနိုင်တဲ့ အဆိပ်ကို ဖုံးကွယ်ထားတဲ့ အသီးရဲ့ အချိုဓာတ်ပဲ။

"ဒါကြောင့် မင်းတို့အားလုံးက မင်းတို့ရရှိခဲ့တဲ့ ဆိုင်ရွန်းနစ်စွမ်းအင်၊ ဟိုက်ပါဒရိုက်ဗ်၊ ကြယ်တာရာတံခါး နည်းပညာတွေက နှစ်ဖက်ကြားက ကွာဟချက်ကို ဖြည့်ဆည်းပေးနိုင်လိမ့်မယ်လို့ ထင်ခဲ့ကြတာ။ ငါတို့မှာရှိတဲ့ လက်နက်တွေကို မင်းတို့ ရရှိထားတယ်လို့ မင်းတို့ ထင်ခဲ့တာ။ ဒါပေမဲ့ အမှန်တရားကတော့ ငါတို့ရဲ့ လက်နက်တွေက မင်းတို့ ရရှိထားတာတွေထက် မျိုးဆက်ပေါင်းများစွာ ရှေ့ရောက်နေတာပဲ။

"မင်း အကျိုးဆက်ကို မြင်ပြီးပြီ။ ငါတို့မှာ အတူတူ နေထိုင်ဖို့ အခွင့်အရေး ရှိခဲ့ပါတယ်။ မင်းတို့ ဖွံ့ဖြိုးတိုးတက်ဖို့ အခွင့်အရေး ဆုံးရှုံးခဲ့ရပေမဲ့ မင်းတို့ရဲ့ လွတ်လပ်မှုကိုတော့ ထိန်းသိမ်းထားနိုင်ခဲ့မှာပါ။ တစ်ခါတလေမှာ တစ်ခုခုကို ဆုံးရှုံးရတာက ဆိုးရွားတဲ့ ရွေးချယ်မှု မဟုတ်နိုင်ပါဘူး"

၎င်းကို ကြားသည့်အခါ ကွန်ဒီလူမျိုးစု ခေါင်းဆောင်က ခေါင်းခါလိုက်ပြီး ပြောကြားလိုက်သည်။ "ကျွန်တော်တို့ရဲ့ ဖွံ့ဖြိုးတိုးတက်မှု လမ်းကြောင်းကို ပိတ်ဆို့ခံထားရတာကို ကြည့်နေပြီး ဘာမှ မလုပ်ဘဲ နေတာက ကွန်ဒီလူမျိုးစုရဲ့ စတိုင် မဟုတ်ဘူး။ ကျွန်တော်တို့က လောင်းကြေးထပ်ဖို့ပဲ ရွေးချယ်မယ်"

"ကောင်းကောင်း ပြောလိုက်တာပဲ။ ရည်မှန်းချက် မရှိတဲ့ လူမှုအဖွဲ့အစည်းတစ်ခုမှာ အနာဂတ် မရှိဘူး။ မင်းရဲ့ လုပ်ရပ်တွေကို ငါ နားလည်ပေးနိုင်ပါတယ်" တာရိုကော့ဗ်က သဘောတူညီမှုဖြင့် ခေါင်းညိတ်ပြပြီးမှ ပြောလိုက်သည်။ "ဒါပေမဲ့ မင်းရဲ့ တစ်ခုတည်းသော အမှားက မင်း ပြိုင်ဘက်ကို မှားရွေးမိတာပဲ"

ကွန်ဒီလူမျိုးစု ခေါင်းဆောင်သည် ခေါင်းငုံ့လိုက်သည်။

သူ၏ ရွေးချယ်မှုအတွက် နောင်တမရသော်လည်း သူသည် နာကျည်းမှုများဖြင့် ပြည့်နှက်နေဆဲ ဖြစ်သည်။

သို့သော် သူသည် ကြက်သွေးရောင်အင်ပါယာကို အမုန်းဆုံး မဟုတ်ဘဲ သူတို့ကို အသုံးချခဲ့သည့် နောက်ကွယ်မှ ကြိုးကိုင်သူများကို အမုန်းဆုံး ဖြစ်သည်။

သူတို့သည် သူတို့၏ ပျက်သုဉ်းမှုကို ဖြစ်ပေါ်စေခဲ့သည့် တကယ့်လူများပင် ဖြစ်သည်။

"ကောင်းပြီ၊ ဒီနေ့အတွက် ဒီမှာပဲ တော်ကြရအောင်။ မင်းရဲ့ ပူးပေါင်းဆောင်ရွက်မှုအတွက် ကျေးဇူးတင်ပါတယ်"

ထို့နောက် တာရိုကော့ဗ်က ထရပ်လိုက်ပြီး စစ်ဆေးမေးမြန်းခန်းမှ ထွက်ခွာရန် ပြင်ဆင်လိုက်သည်။

"ခဏလောက် စောင့်ပါဦး" ကွန်ဒီလူမျိုးစု ခေါင်းဆောင်က ရုတ်တရက် ပြောကြားလိုက်သည်။ "ခင်ဗျားတို့ ကျွန်တော်တို့ကို အမြစ်ပြတ်သတ်မှာ မဟုတ်ဘဲ မွေးမြူထားဖို့ စီစဉ်နေတာ မဟုတ်လား"

"ဒီလို ဖြစ်နိုင်ခြေ ရှိပါတယ်။ ဒါပေမဲ့ ငါတို့က မင်းတို့လို ဉာဏ်ရည်ကို ကန့်သတ်ထားမှာ မဟုတ်ဘူး။ ငါတို့ရဲ့ လူမှုအဖွဲ့အစည်းနဲ့ပဲ မင်းတို့လူမျိုးစုကို ပညာသင်ပေးသွားမှာပါ"

ကွန်ဒီလူမျိုးစု ခေါင်းဆောင်က နားလည်မှုဖြင့် ခေါင်းညိတ်ပြီး အသက်ပြင်းပြင်း ရှူလိုက်သည်။ "ဒါဆို... ကျွန်တော်ကတော့ သေချာပေါက် သေရတော့မှာ မဟုတ်လား"

တာရိုကော့ဗ်သည် ခဏမျှ တုံ့ဆိုင်းသွားပြီးမှ အမှန်တရားကို ဖုံးကွယ်မထားရန် ရွေးချယ်လိုက်သည်။ "မင်းက မင်းတို့လူမျိုးစုရဲ့ ဒေါသတွေကို ဖွင့်ထုတ်ရာ ပစ်မှတ်ဖြစ်လာမှာဖြစ်ပြီး သမိုင်းမှာ သင်ခန်းစာတစ်ခုအဖြစ် ကျန်ရစ်လိမ့်မယ်။ မင်းက အကောင်းဆုံး ကိရိယာတစ်ခု ဖြစ်လာမှာပါ"

၎င်းကို ကြားသည့်အခါ ဟန်ရှောင်းက ခေါင်းခါလိုက်သည်။

ဤလူများသည် စကားထာဝှက်ပြောရသည်ကို နှစ်သက်ကြသည်။ ကံကောင်းထောက်မစွာဖြင့် သူတို့ ဘာပြောသည်ကို သူနားလည်လိုက်သည်။

အင်ပါယာက ကွန်ဒီလူမျိုးစုကို ပညာပေးလိုလျှင် သူတို့သည် ရုပ်သေးခေါင်းဆောင်တစ်ဦးကို ရွေးချယ်ရန် လိုအပ်သည်။ သို့သော် ဤရုပ်သေးခေါင်းဆောင်သည် လက်ရှိခေါင်းဆောင်တော့ သေချာပေါက် ဖြစ်လာမည် မဟုတ်ပေ။

ဤကွန်ဒီလူမျိုးစု ခေါင်းဆောင်သည် ပြကွက်တစ်ခု ပြသရန်အတွက် ရုပ်သေးတစ်ခုကဲ့သို့ ဆက်ဆံခံရမည် ဖြစ်သည်။

ဤပြကွက်၏ အဆုံးသတ်သည် သူ့အား ကွပ်မျက်ခြင်းဖြင့်သာ အဆုံးသတ်မည်မှာ သေချာသည်။

"ကျွန်တော် နားလည်ပါပြီ။ အပြစ်တင်ခံရမယ့်သူ တစ်ယောက်တော့ ရှိဖို့ လိုအပ်ပါတယ်၊ အရှက်ရစရာ နာမည်တစ်ခု ချန်ရစ်ခဲ့ဖို့ ကျွန်တော် စိတ်မရှိပါဘူး" ကွန်ဒီလူမျိုးစု ခေါင်းဆောင်သည် သေဆုံးရန်အတွက် အသင့်ပြင်ဆင်ထားပြီးဖြစ်သည်။ "ပြကွက်တစ်ခု ပြဖို့အတွက် ခင်ဗျားတို့အားလုံးနဲ့ ကျွန်တော် ပူးပေါင်းဆောင်ရွက်နိုင်ပါတယ်၊ ဒါပေမဲ့ ကျွန်တော့်မှာ တောင်းဆိုချက် နှစ်ခု ရှိတယ်... ကျွန်တော့်ကို ဒီလို မကြည့်ပါနဲ့။ ကျွန်တော့်မှာ အပေးအယူလုပ်ဖို့ အခွင့်အရေး မရှိတာကို သိပါတယ်၊ ဒါပေမဲ့ ကျွန်တော့်စကားတွေကို ခင်ဗျားတို့ကိုပဲ ပြောနိုင်တာပါ။ ကျွန်တော့်ရဲ့ ဆန္ဒတစ်ခုလို့ပဲ ခင်ဗျားတို့ မှတ်ယူလိုက်ပါ"

"... ဒါဆိုရင် ပြောပါ"

"ပထမအချက်က ကျွန်တော်တို့ လက်နက်ချပြီးပြီ ဖြစ်တဲ့အတွက် ကျွန်တော့်ကို သတ်တာက ကိစ္စမရှိပါဘူး။ ကျွန်တော့်လူမျိုးစုကို စောင့်ရှောက်ပေးဖို့နဲ့ တခြားဘယ်သူ့ကိုမှ မသတ်ဖို့ မျှော်လင့်ပါတယ်။ ဒုတိယအချက်က..." ကွန်ဒီလူမျိုးစုခေါင်းဆောင်၏ ခန္ဓာကိုယ်သည် ရုတ်တရက် တုန်ယင်လာပြီး ခက်ထန်သော လေသံဖြင့် ပြောကြားလိုက်သည်။ "ကျွန်တော်တို့ကို အသုံးချခဲ့တဲ့သူတွေကို ထိုက်တန်တဲ့ ပြန်ပေးဆပ်မှု ဖြစ်စေချင်တယ်"

တာရိုကော့ဗ်သည် ဘာမှ မကြားသိလိုက်ရသကဲ့သို့ အပြင်သို့ ထွက်ခွာသွားသည်။

၎င်းကို မြင်သည့်အခါ ကွန်ဒီလူမျိုးစု ခေါင်းဆောင်က တိတ်ဆိတ်စွာ ခေါင်းငုံ့လိုက်သည်။

အခြားတစ်ဖက်က ၎င်း၏ တောင်းဆိုချက်ကို လက်ခံမည် မဟုတ်သည်ကို ၎င်း သိရှိနေသော်လည်း ဤသည်မှာ ဤကဲ့သို့သော စကားမျိုး ပြောကြားနိုင်သည့် နောက်ဆုံးအကြိမ် ဖြစ်နိုင်သောကြောင့် ဖြစ်သည်။

ဤအချိန်တွင် အနက်ရောင် ပုံရိပ်တစ်ခုသည် ၎င်း၏ရှေ့၌ ရုတ်တရက် ပေါ်ပေါက်လာသည်။

ကွန်ဒီလူမျိုးစု ခေါင်းဆောင်က မော့ကြည့်လိုက်သည့်အခါ ထိုလူသည် ဝင်လာကတည်းက စကားတစ်ခွန်းမျှ မပြောသော အနက်ရောင် ပုံရိပ်ပင် ဖြစ်သည်။

သူကြားလိုက်ရသော စကားလုံးများသည် သူ့အား တုန်လှုပ်သွားစေသည်။

"မင်းရဲ့ တောင်းဆိုချက်ကို ငါ သဘောတူတယ်"

ကွန်ဒီလူမျိုးစု ခေါင်းဆောင် အံ့အားသင့်သွားရသည်။

တာရိုကော့ဗ်သည် ရပ်တန့်သွားပြီး ဇဝေဇဝါဖြစ်နေသော အကြည့်ဖြင့် ပြန်လည်လှည့်ကြည့်လိုက်သည်။

ဟန်ရှောင်းက တည်ငြိမ်သော မျက်နှာထားဖြင့် ဆက်လက်ပြောကြားလိုက်သည်။ "မင်းတို့လူမျိုးစုဝင်တွေကို ငါ့နယ်မြေမှာ ထားဖို့ အင်ပါယာဆီ ငါ အသနားခံစာ ရေးပေးမယ်။ ကြိုးကိုင်သူတွေကို ပြန်ပေးဆပ်ခိုင်းဖို့ ကိစ္စကတော့ သိပ်မခက်ပါဘူး"

သူ့အတွက် အကျိုးအမြတ် မရှိလျှင် ဤသို့ လုပ်ဆောင်မည် မဟုတ်ပေ။ ကွန်ဒီလူမျိုးစု ခေါင်းဆောင်က သူ၏ နောက်ဆုံးဆန္ဒကို ပြောကြားလိုက်သည့်အခါ သူ၏ အင်တာဖေ့စ်တွင် မစ်ရှင်အသစ်တစ်ခု ပေါ်လာသည်။

မစ်ရှင် လိုအပ်ချက်များနှင့် ဆုလာဘ်များကို မြင်တွေ့လိုက်ရသည့်အခါ ဤမစ်ရှင်ကို သေချာပေါက် လက်ခံရမည်ဟု ဆုံးဖြတ်လိုက်ခြင်း ဖြစ်သည်။

"မင်းက ဘယ်သူလဲ" ကြားရသည့်အခါ ကွန်ဒီလူမျိုးစု ခေါင်းဆောင်သည် ဟန်ရှောင်း၏ မည်သူမည်ဝါဖြစ်ကြောင်းကို နောက်ဆုံးတွင် မမေးဘဲ မနေနိုင်တော့ပေ။

"ငါ့ကို ဘလက်စတားလို့ ခေါ်နိုင်ပါတယ်။ ငါ ဘယ်သူလဲဆိုတာထက်... မင်း တစ်ခုပဲ သိထားဖို့ လိုတယ်" ဟန်ရှောင်းက ပြုံးလိုက်သည်။

"ငါက မင်းတို့ လူမျိုးစု တစ်ခုလုံးကို တစ်ယောက်တည်းနဲ့ အမြစ်ပြတ်အောင် လုပ်နိုင်တဲ့သူပဲ"

စာစဉ် (၅၈)၊ အခန်း (၉၈၁) ပြီးပါပြီ။

လင်းဆက်

+++++

အခန်း ၉၈၂ ခေါင်းဆောင်မှု သက်သေ

"မင်းက..." ကွန်ဒီလူမျိုးစု ခေါင်းဆောင်သည် ဟန်ရှောင်းကို ကြည့်ရင်း မှင်သက်သွားရသည်။

မိမိတစ်ယောက်တည်းနှင့် လူမျိုးစုတစ်ခုလုံးကို အမြစ်ပြတ်အောင် လုပ်ဆောင်နိုင်သည် ဟုတ်ပါသလော။ ဤသည်မှာ ၎င်း ပထမဆုံးအကြိမ် ကြားဖူးသည့် အာဏာရှင်ဆန်သော မိတ်ဆက်မှုမျိုး ဖြစ်သည်။

ဤသူစိမ်းသည် မည်သို့သော နောက်ခံမျိုး ရှိနေပါသနည်း။

သူ၏ တုံ့ပြန်မှုမှာ မယုံကြည်နိုင်မှု ဖြစ်နေသော်လည်း အခြားတစ်ဖက်သည် စူပါများရှိသည့် အဆင့်မြင့် လူမှုအဖွဲ့အစည်းတစ်ခုမှ လာခြင်းဖြစ်ကြောင်း ၎င်း ချက်ချင်း သတိရလိုက်သည်။ အရာအားလုံးသည် ဖြစ်နိုင်ခြေရှိသဖြင့် ၎င်း၏ ခေတ်နောက်ကျနေသော အတွေးများကို စွန့်ပယ်လိုက်ရသည်။

အင်ပါယာအတွင်း ဟန်ရှောင်း၏ အဆင့်အတန်းကို ၎င်း နားမလည်သော်လည်း အခြားတစ်ဖက်က ဤကဲ့သို့ ပြောဝံ့ခြင်းကြောင့် ၎င်းသည် သေချာပေါက် အကောင်ကြီးတစ်ကောင် ဖြစ်ရမည်။

ဤသို့ တွေးကြည့်လိုက်သည့်အခါ ဟန်ရှောင်း၏ မိတ်ဆက်မှုမှာ အမှန်တကယ်ပင် ထိရောက်လှသည်။ ၎င်းသည် အခြားတစ်ဖက်အား မိမိ၏ အဆင့်အတန်းကို ချက်ချင်း နားလည်သွားစေသည်။

မိမိတစ်ခါမျှ မတွေ့ဖူးသည့် အကောင်ကြီးတစ်ဦးက အဘယ်ကြောင့် မိမိ၏ နောက်ဆုံး တောင်းဆိုချက်ကို သဘောတူခဲ့ပါသနည်း။

ဘာကြောင့်လဲ။

သနား၍လော။

သို့မဟုတ် ၎င်းသည် ကတိပေးသယောင်နှင့် မိမိအား အသုံးချလိုရုံသာလော။

သူ့၌ သံသယများ ပြည့်နှက်နေသည်။

သူတောင်းဆိုချက်ကို စတင်တင်ပြစဉ်က မျှော်လင့်ချက် သိပ်မရှိခဲ့ဘဲ အခြားတစ်ဖက်က အမှန်တကယ် သဘောတူလိမ့်မည်ဟု ဘယ်တုန်းကမှ မမျှော်လင့်ခဲ့ပေ။

ရုတ်တရက် ကွန်ဒီလူမျိုးစု ခေါင်းဆောင်သည် မယုံကြည်နိုင်မှုများဖြင့် ပြည့်နှက်နေပြီး ဘာပြောရမှန်း မသိဖြစ်နေသည်။

"ငါ နောက်နေတယ်လို့ မင်း စိုးရိမ်နေတာလား" ဟန်ရှောင်းက ကွန်ဒီလူမျိုးစု ခေါင်းဆောင်ကို ကြည့်လိုက်သည်။ "မင်းကို လိမ်ပြောဖို့ ငါ့မှာ အကြောင်းပြချက် မရှိပါဘူး။ မင်းကို ငါ ကတိပေးပြီးကတည်းက ငါ့ကတိကို ငါ သေချာပေါက် တည်ပါ့မယ်"

ထိုအခါ ကွန်ဒီလူမျိုးစု ခေါင်းဆောင်က မမေးဘဲ မနေနိုင်တော့ပေ။ "မင်း ဘာလို့ ငါ့ကို ကူညီချင်တာလဲ"

"မေးခွန်းကောင်းပဲ" ဟန်ရှောင်းက ရယ်မောလိုက်သည်။ "ငါက ဂရုစိုက်တတ်ပြီး စာနာတတ်တဲ့သူ တစ်ယောက်ပါ။ သူတစ်ပါးကို ကူညီရတာ နှစ်သက်ပြီး သဘောထားကြီးတဲ့သူ တစ်ယောက်လည်း ဖြစ်တယ်။ ဒါကို ကွန်ဒီလူမျိုးစုအပေါ် ငါ့ရဲ့ သနားကရုဏာလို့ပဲ သဘောထားလိုက်ပါ။ ဒီကိစ္စက ငါ့အတွက်တော့ အကြီးအကျယ် မဟုတ်ပါဘူး"

ဘေးနားရှိ တာရိုကော့ဗ်၏ မျက်နှာသည် အနည်းငယ် တွန့်သွားသည်။

ညီလေးရာ၊ နည်းနည်းလောက်တော့ ရှက်ပါဦး။

ကွန်ဒီလူမျိုးစု ရှုံးနိမ့်တာရဲ့ အနည်းဆုံး တစ်ဝက်လောက်က မင်းမှာတာဝန်ရှိတာ မဟုတ်လား။ အခုကျ မင်းက ငါတို့ကိုပဲ လူဆိုးတွေဖြစ်အောင် ပြောနေပါလား။

သူ၏ မျက်နှာသည် ဆိုင်ရွန်းနစ်စွမ်းအင် အမြောက်ဒဏ်ကိုပင် ခံနိုင်ရည်ရှိလောက်အောင် ထူလိမ့်မည်... အင်း၊ ဒါက တကယ်လည်း ဖြစ်နိုင်တယ်။

တာရိုကော့ဗ်က စိတ်ထဲ၌ ကျိန်ဆဲနေသော်လည်း ကွန်ဒီလူမျိုးစု ခေါင်းဆောင်မှာမူ အလွန် စိတ်လှုပ်ရှားနေသည်။

သူသည် လမ်းဆုံးသို့ ရောက်ရှိကာ အမှောင်ထုထဲ ကျရောက်နေချိန်တွင် ရုတ်တရက် ကမ္ဘာပေါ်သို့ အလင်းတန်းတစ်ခု ရောက်ရှိလာပြီး မိမိထံသို့ ကူညီမည့် လက်တစ်ကမ်း ကမ်းပေးလိုက်သကဲ့သို့ ဖြစ်သည်။

"ကျေးဇူးတင်ပါတယ်..." ကွန်ဒီလူမျိုးစု ခေါင်းဆောင်သည် လက်သီးကို ကျစ်ကျစ်ပါအောင် ဆုပ်လိုက်ပြီး စိတ်လှုပ်ရှားစွာဖြင့် ပြောသည်။ "ငါ့ဘဝရဲ့ နောက်ဆုံးအချိန်မှာ မင်းလိုလူမျိုးနဲ့ တွေ့ရတာ ကံကောင်းတာပါပဲ။ မင်းကို ပြန်ပေးဆပ်ဖို့ ငါ့မှာ ဘာမှမရှိတာကတော့ စိတ်မကောင်းစရာပါပဲ"

"အာ... ဘာမှ မဟုတ်ပါဘူး။ ငါက ဘာ ပြန်ပေးဆပ်မှုကိုမှ မလိုအပ်ပါဘူး" ဟန်ရှောင်းက ရယ်မောလိုက်ပြီး မိမိစကားကို မိမိကိုယ်တိုင်ပင် မယုံကြည်နိုင်ပေ။

၎င်းကို ကြားသည့်အခါ ကွန်ဒီလူမျိုးစု ခေါင်းဆောင်သည် ပိုမို စိတ်လှုပ်ရှားသွားရသည်။

ဘလက်စတားဟု ခေါ်သည့် ဤလူသည် စကြဝဠာထဲ၌ အမှန်တကယ်ပင် အကောင်းဆုံးလူ ဖြစ်ရမည်။

ဖြန်း

တာရိုကော့ဗ်က မျက်နှာကို လက်ဖြင့်အုပ်လိုက်ပြီး လုံးဝ စကားမပြောနိုင်တော့ပေ။

မိမိရှေ့မှ မြင်ကွင်းသည် အမှန်တကယ်ပင် ရယ်စရာကောင်းလှသည်။

အခြားတစ်ဖက်က မင်းလူမျိုးစု ရှုံးနိမ့်မှုအတွက် တာဝန်ရှိတဲ့သူ မဟုတ်ဘူးလား၊ ဒါကို မင်းက ကျေးဇူးတင်နေသေးတာလား။

ငါ တကယ်ကို လက်လျှော့လိုက်ပြီ။ လူသတ်ပြီးနောက်မှာတောင် သေသွားတဲ့သူတွေ ကိုယ့်အပေါ် ကျေးဇူးတင်လာအောင် မင်းတကယ် လုပ်နိုင်ပါလား။

ဤအချိန်တွင် တာရိုကော့ဗ်က ကောက်ချက်တစ်ခု ချလိုက်သည်။

ဘလက်စတားက တကယ်ကို ကမောက်ကမ နိုင်တယ်။

ငါ သူနဲ့ဝေးဝေးနေတာ အကောင်းဆုံးပဲ။ ငါက မကြာခင် အနားယူတော့မှာ။ သူ့ကြောင့် လမ်းမှားမရောက်ချင်ဘူး။

ဟန်ရှောင်းသည် ရယ်မောလိုက်ပြီး တာရိုကော့ဗ်နှင့်အတူ အခန်းထဲမှ ထွက်လာသည်။

အခန်းပြင်သို့ ထွက်လာသည့်အခါ တာရိုကော့ဗ်က လှည့်ကြည့်ပြီး သံသယဖြင့် မေးမြန်းလိုက်သည်။ "ဘလက်စတား၊ မင်း ဘာလို့ သူ့ကို သဘောတူလိုက်တာလဲ"

သူသည် ဤသို့ ဖြစ်လာမည်ဟု အမှန်တကယ် မမျှော်လင့်ထားခဲ့ပေ။ ဘလက်စတားသည် အပျင်းပြေလာကြည့်ခြင်းသာ ဖြစ်သည်ဟု သူထင်မှတ်ထားခဲ့သော်လည်း အခြားတစ်ဖက်က ဤသို့ လုပ်ဆောင်လိမ့်မည်ဟု မထင်မှတ်ခဲ့ပေ။ ဘလက်စတား၏ ရည်ရွယ်ချက်ကိုလည်း နားမလည်နိုင်ပေ။

ထိုအခါ ဟန်ရှောင်းက လက်မောင်းများကို ဝေ့ယမ်းလိုက်ပြီး "ငါ စိတ်ကောင်းဝင်နေလို့ လူကောင်းတစ်ယောက် ဖြစ်ချင်လို့ပါ"

"ဒါဆို မင်း စောစောက သူ့ကို စနေတာ မဟုတ်ဘူးပေါ့"

"သေချာတာပေါ့ မဟုတ်ပါဘူး။ ငါက တကယ် အတည်ပြောနေတာ။ နေပါဦး၊ မင်း တစ်ခုခု နားလည်မှုလွဲနေတာလား"

ဟန်ရှောင်း၏ စကားကို လျစ်လျူရှုပြီး တာရိုကော့ဗ်က မျက်မှောင်ကြုတ်လိုက်သည်။

"ဒါပေမဲ့ မင်းက ကွန်ဒီလူမျိုးစုအပေါ် အင်ပါယာရဲ့ ကိုင်တွယ်ပုံမှာ ဝင်မပါဘူးလို့ စောစောက ပြောထားတယ် မဟုတ်လား။ မင်းရဲ့ သဘောထားကို ပြောင်းပြီး ဒီသုံ့ပန်းတွေကို ဆက်ထားဖို့ မင်း ပြင်ဆင်နေတာလား"

"ဟား... စကြဝဠာထဲမှာ အမြဲတမ်းဆိုတာ မရှိပါဘူး။ ငါ့စိတ်ကူးကို ငါ ပြောင်းလို့ မရဘူးလား" ဟန်ရှောင်းက မျက်ခုံးပင့်လိုက်သည်။

"ကောင်းပြီ" ဟု တာရိုကော့ဗ်က ခေါင်းညိတ်လိုက်သည်။ "မင်းရဲ့ ဆန္ဒကို အူရန်ရယ်ဆီ ငါ တင်ပြပေးပါ့မယ်။ မင်းရဲ့ မျက်နှာက ဘယ်လောက် အရာရောက်မလဲ ဆိုတာကတော့ ငါ စဉ်းစားပေးလို့ရတဲ့ ကိစ္စမဟုတ်ဘူး"

"ဒါဆို လုံလောက်ပါပြီ" ဟန်ရှောင်းက ပြုံးလိုက်သည်။

ဤအချိန်တွင် တာရိုကော့ဗ်သည် ပတ်ဝန်းကျင်ကို ကြည့်ရှုလိုက်ပြီး တိုးတိုးလေး မေးမြန်းလိုက်သည်။ "ငါ့ကို အမှန်အတိုင်း ပြောစမ်းပါ။ မင်းရဲ့ ရည်ရွယ်ချက်က ဘာလဲ"

"ဟင်... ငါ စိတ်ကောင်းဝင်နေလို့ပါလို့ ပြောပြီးပြီပဲလေ"

"အာ" တာရိုကော့ဗ်က 'ငါ့ကို လာမလိမ်နှင့်' ဟူသော မျက်နှာထားမျိုး ပြုလုပ်လိုက်သည်။

၎င်းကို မြင်သည့်အခါ ဟန်ရှောင်းသည် လက်လျှော့သည့်အနေဖြင့် ခေါင်းခါလိုက်ပြီး "ကောင်းပါပြီ၊ ငါ အမှန်အတိုင်း ပြောပါ့မယ်။ ကွန်ဒီလူမျိုးစုရဲ့ လူဦးရေက ကြယ်စုတန်း အဆင့်မှာ ရှိတယ်။ သူတို့ကို ပညာပေးဖို့ အချိန်အများကြီး ယူရမှာ ဆိုပေမဲ့ ပညာပေးပြီးသွားရင်တော့ သူတို့ရဲ့ လူဦးရေက ရတနာသေတ္တာတစ်ခု ဖြစ်လာမှာပဲ။ သူတို့ကို ငါ့နယ်မြေမှာ ထားဖို့ ငါ စီစဉ်နိုင်ရင် သူတို့က အနာဂတ်မှာ ငါ့အတွက် လုပ်အားတွေ ဖြစ်လာလိမ့်မယ်။ အင်ပါယာက ကွန်ဒီလူမျိုးစုရဲ့ လူဦးရေကို မလိုအပ်ပေမဲ့ အဲဒါက ငါ့ရဲ့ ဖွံ့ဖြိုးတိုးတက်မှုအတွက် အခွင့်အရေးတစ်ခုပဲ"

ထိုစကားကို ကြားသည့်အခါ တာရိုကော့ဗ်က 'ငါ သိသားပဲ' ဟူသော အပြုံးမျိုးကို ပြလိုက်သည်။

အမှန်ပဲ၊ ဒါကမှ ငါသိသည့် ဘလက်စတားပဲ။ ဒီကောင်က ဘာလို့ ဒီလောက် စိတ်နှလုံး ကောင်းနေမှာလဲ။

မင်းက မင်းနာမည်နဲ့ တကယ်လိုက်တယ်။

ခဏမျှ စဉ်းစားပြီးနောက် တာရိုကော့ဗ်က ဟန်ရှောင်း၏ အစီအစဉ်မှာ မဆိုးလှဟု ခံစားလိုက်ရသည်။ အင်ပါယာသည် ကွန်ဒီလူမျိုးစုကို ဆက်လက်ထားရှိလိုပါက သူတို့ကို မည်သည့်နေရာတွင် ထားရှိရမည်ကို စဉ်းစားရမည်ဖြစ်သည်။ လူဦးရေ အရွယ်အစားသည် အရေးကြီးသော အရင်းအမြစ်တစ်ခု ဖြစ်လာမည်ဖြစ်ရာ မဟာမိတ် အများအပြားသည်လည်း ဤအသားတုံးကို မျက်စိကျနေကြမည် ဖြစ်သည်။ ၎င်း၏ အမြင်အရမူ ဘလက်စတားသည် ကြိုတင် တောင်းဆိုထားခြင်းသာ ဖြစ်သည်။

သူ၏ ဆန္ဒဟု ခေါ်သည့်အရာကို သဘောတူလိုက်ခြင်းနှင့် ပတ်သက်၍မူ သူသည် ဟန်ရှောင်းကို ကောင်းစွာ နားလည်ထားသဖြင့် ၎င်းမှာ အကြောင်းပြချက်တစ်ခုထက် မပိုဟု သူခံစားလိုက်ရသည်။

တာရိုကော့ဗ်သည် အတွေးထဲ နစ်နေစဉ် ဟန်ရှောင်းက မိမိ၏ အင်တာဖေ့စ်ကို တစ်ချက် ကြည့်ရှုလိုက်သည်။

သင်သည် [ကွန်ဒီလူမျိုးစု ခေါင်းဆောင်၏ နောက်ဆုံးဆန္ဒ] မစ်ရှင်ကို စတင်လိုက်ပြီ ဖြစ်သည်။

မစ်ရှင် မိတ်ဆက် - ကွန်ဒီလူမျိုးစုသည် စစ်ပွဲတွင် ရှုံးနိမ့်ခဲ့ပြီး သူတို့၏ လူမျိုးစု တစ်ခုလုံးသည် ယခုအခါ အနာဂတ်ကို မသိရသေးသော အင်ပါယာ၏ သုံ့ပန်းများ ဖြစ်နေပြီ ဖြစ်သည်။ ကွန်ဒီလူမျိုးစု ခေါင်းဆောင်သည် သေရန် ပြင်ဆင်ထားပြီး သင်၏ နောက်ဆုံးဆန္ဒကို ပြောပြခဲ့သည်။

မစ်ရှင် လိုအပ်ချက်များ - ၁။ ကွန်ဒီလူမျိုးစုကို အခြေချပေးရန်နှင့် ပညာပေးကာလအတွင်း သူတို့ကို ကာကွယ်ပေးရန်။ ၂။ ကြက်သွေးရောင်အင်ပါယာကို ကိုင်တွယ်ရန် ကွန်ဒီလူမျိုးစုကို အသုံးချခဲ့သည့် နောက်ကွယ်မှ ကြိုးကိုင်သူကို လက်စားချေရန်။

ရှုံးနိမ့်မှု အခြေအနေ - ကွန်ဒီလူမျိုးစု၏ လူဦးရေသည် စတင်ချိန်က လူဦးရေ၏ ၈၀ ရာခိုင်နှုန်းထက် နည်းသွားခြင်း။

ပထမလိုအပ်ချက်ကို ပြီးမြောက်ပါက ရရှိမည့် ဆုလာဘ် - ၆,၀၀၀,၀၀၀,၀၀၀ အတွေ့အကြုံအမှတ်၊ +၁၀,၀၀၀ ကွန်ဒီလူမျိုးစု ရင်းနှီးမှု (လက်ရှိ ရင်းနှီးမှု -၁၅၀၀၊ ဆက်ဆံရေး - [နာကျည်းမှု])၊ ကျပန်းဆု ၂ ခု၊ +၄ နိုင်ငံရေး အင်အားစု (ကွန်ဒီလူမျိုးစု)

ကွန်ဒီလူမျိုးစုသည် [နိုးထခြင်းခေတ်] သို့ ရောက်ရှိသွားမည်ဖြစ်ပြီး စူပါ ဖြစ်လာနိုင်ခြေ +၁၀ ရာခိုင်နှုန်း တိုးလာမည်။

ဒုတိယလိုအပ်ချက်ကို ပြီးမြောက်ပါက ရရှိမည့် ဆုလာဘ် - ၁၂,၀၀၀,၀၀၀,၀၀၀ အတွေ့အကြုံအမှတ်၊ +၁၅,၀၀၀ ကွန်ဒီလူမျိုးစု ရင်းနှီးမှု၊ သတ်မှတ်ထားသော ဇာတ်ကောင်ဆင့်ခေါ်ကတ် ၁ ခု၊ အရည်အချင်း [ရန်သူ]၊ အရည်အချင်း [ခေါင်းဆောင်မှု သက်သေ] နှင့် အထူးကျွမ်းကျင်မှု [ကွန်ဒီဒေါသ]။

[ရန်သူ] - သင့်သွေးအမှတ် ဆုံးရှုံးမှု များလေလေ၊ သင့်တိုက်ခိုက်မှု မြင့်မားလေလေ ဖြစ်သည်။ အများဆုံး အပိုဆု ၂၅ ရာခိုင်နှုန်း။ တိုက်ခိုက်မှု အခြေအနေမှ ထွက်ခွာပြီးနောက် အကျိုးသက်ရောက်မှုများကို ပြန်လည် ဆန်းသစ်မည်။ ၎င်းအကျိုးသက်ရောက်မှုအတွင်း ဆင့်ခေါ်ထားသော သက်ရှိများနှင့် ယန္တရားများကို အသုံးပြုနိုင်သည်။

[ခေါင်းဆောင်မှု သက်သေ] - သင်သည် လူမျိုးစုတစ်ခု၏ ခေါင်းဆောင် ဖြစ်နေချိန်တွင် အဘက်ဘက်မှ အပိုဆုများကို ရရှိမည် ဖြစ်သည်။ အပိုဆုသည် အဖွဲ့အစည်း၏ အရွယ်အစားနှင့် အဆင့်ပေါ်တွင် မူတည်လိမ့်မည်။ အမြင့်ဆုံး ကန့်သတ်ချက် မရှိပါ။

[ကွန်ဒီဒေါသ] - ကျွမ်းကျင်မှုကို အသုံးပြုပြီးနောက်၊ အများဆုံး စက္ကန့် ၄၀ အတွင်း တစ်စက္ကန့်လျှင် သွေးအမှတ် -၅ ရာခိုင်နှုန်း ကျဆင်းမည်။ စိတ်ပိုင်းဆိုင်ရာ ခုခံမှု ၂.၀ ဆ၊ တိုက်ခိုက်မှု +၅ ရာခိုင်နှုန်း၊ ဉာဏ်ရည် -၅ ရာခိုင်နှုန်း၊ ဆွဲဆောင်မှု -၂၀ ရာခိုင်နှုန်း၊ ကံကောင်းမှု -၁၀ ရာခိုင်နှုန်း။ သင်သည် [ဒေါသ] မှလွဲ၍ ကျန်ရှိသော စိတ်ပိုင်းဆိုင်ရာ အခြေအနေ ဆိုးကျိုးအားလုံးကို ခုခံနိုင်မည် ဖြစ်သည်။ ပြန်လည်အသုံးပြုနိုင်ချိန် - ၅ မိနစ်။ ဒေါသကို သင့်ဦးခေါင်းထဲမှာ ပြည့်နေပါစေ။

ဟန်ရှောင်းသည် မစ်ရှင်ကို မြင်လိုက်သည်နှင့် ဤမစ်ရှင်ကို လုပ်ဆောင်ရမည်ဖြစ်ကြောင်း သိရှိလိုက်သည်။ ဆုလာဘ်များသည် သူ၏ မျှော်လင့်ချက်ထက် အမှန်တကယ် ကျော်လွန်နေသဖြင့် အကြီးအကျယ် အံ့အားသင့်သွားရသည်။

ဤသည်မှာ အမှန်တကယ်ပင် များပြားလှသည်။

ဟန်ရှောင်းသည် မျက်နှာသေဖြင့် ရှိနေသော်လည်း သူ၏ စိတ်ထဲတွင်မူ အမှန်တကယ်ပင် ဝမ်းမြောက်နေမိသည်။

ကွန်ဒီလူမျိုးစု ခေါင်းဆောင်သည် စူပါ တစ်ဦး မဟုတ်သော်လည်း ကြယ်စုတန်း လူမှုအဖွဲ့အစည်းတစ်ခု၏ ခေါင်းဆောင်ဖြစ်သဖြင့် အလွန်ကောင်းမွန်သော ဆုလာဘ်များကို ပေးအပ်နိုင်ခြင်း ဖြစ်သည်။

ပထမမစ်ရှင် လိုအပ်ချက်အတွက် အတွေ့အကြုံအမှတ်နှင့် ကျပန်းဆုမှာမူ ပုံမှန်သာ ဖြစ်သည်။ ဟန်ရှောင်းသည် နိုင်ငံရေး အင်အားစု ဆုလာဘ်ကိုသာ ပိုမို အလေးထားသည်။ အတွေ့အကြုံအမှတ်များကို ပိုမို ထိရောက်စွာ ရရှိနိုင်ခြင်းအပြင် သူသည် ကွန်ဒီလူမျိုးစုအပေါ် သူ၏ ပြောရေးဆိုခွင့်ကိုလည်း ပိုမို ကြီးမားလာစေမည် ဖြစ်သည်။

အင်ပါယာသည် ကွန်ဒီလူမျိုးစုကို လက်အောက်ခံ နိုင်ငံတစ်ခု ဖြစ်စေလိုသည်။ သို့သော် သူတို့ အားနည်းသွားလျှင်တောင်မှ သူတို့၌ ကြယ်စုတန်း လူမှုအဖွဲ့အစည်းတစ်ခု၏ အခြေခံအုတ်မြစ် ရှိနေဆဲ ဖြစ်သည်။

ဟန်ရှောင်းက တာရိုကော့ဗ်အား ပေးအပ်ခဲ့သည့် အကြောင်းပြချက်သည် မမှားယွင်းပေ။ ကွန်ဒီလူမျိုးစုသည် သူ၏ နယ်မြေတွင် ရှိနေမည်ဆိုပါက သူတို့၏ ကြီးမားသော လူဦးရေ အရွယ်အစားမှ ရရှိမည့် အကျိုးကျေးဇူးများသည် လျှော့တွက်၍ မရသောအရာ ဖြစ်သည်။

မစ်ရှင် ပြီးဆုံးသွားသည့်အခါ ကွန်ဒီလူမျိုးစုသည် မျိုးဆက်သစ်တစ်ခုထဲသို့ ရောက်ရှိသွားမည်ဖြစ်သည်။ သူတို့ စူပါ ဖြစ်လာနိုင်ခြေ တိုးလာမည် ဖြစ်သည်။ ၁၀ ရာခိုင်နှုန်းမှာ သိပ်မများဟု ထင်ရသော်လည်း သန်းပေါင်းများစွာ၏ ၁၀ ရာခိုင်နှုန်းဆိုသည်မှာ နည်းပါးသော ပမာဏ မဟုတ်ပေ။ ဒါ့အပြင် ၎င်းသည် ကွန်ဒီလူမျိုးစုနှင့် သူ၏ ရင်းနှီးမှုကိုလည်း အများကြီး တိုးလာစေမည်ဖြစ်ရာ သူတို့နှင့် ဆက်ဆံရေးသည် [ကြည်ညိုလေးစားမှု] အဆင့်သို့ တိုက်ရိုက် ရောက်ရှိသွားမည် ဖြစ်သည်။ ဤသည်မှာ ကွန်ဒီလူမျိုးစုသည် အတိုင်းအတာတစ်ခုအထိ သူ၏ အင်အား ဖြစ်လာလိမ့်မည်ဟု ဆိုလိုခြင်း ဖြစ်သည်။

ဒါပေမဲ့ အဆင့် အက်စ် မစ်ရှင် အများစု၏ မိတ်ဆက်များမှာမူ တော်တော်လေး ရိုးရှင်းပါသည်။ ပထမမစ်ရှင်က ကာကွယ်မှု ပေးအပ်ရမည်ဟုသာ ပြောကြားထားပြီး မည်သည့်အချိန်တွင် ပြီးဆုံးမည်ကိုမူ မဖော်ပြထားပေ။ ဟန်ရှောင်းကမူ အင်ပါယာက ကွန်ဒီလူမျိုးစုကို ပိတ်ဆို့ထားမှုများ ပြန်လည်ဖွင့်ပေးသည့်အချိန်ကျမှ သူ၏ မစ်ရှင် ပြီးဆုံးမည်ဟု ခန့်မှန်းထားသည်။ ထို့ကြောင့် ဤမစ်ရှင်သည် ပြီးမြောက်ရန် အချိန်အများကြီး ယူရနိုင်သည်။

ဒုတိယမစ်ရှင်မှာမူ ကွဲပြားလိမ့်မည်။

ကွန်ဒီလူမျိုးစု ခေါင်းဆောင်၏ တောင်းဆိုချက်အရ ၎င်း၏ ပစ်မှတ်မှာ နောက်ကွယ်မှ ကြိုးကိုင်သူများကို လက်စားချေရန် ဖြစ်သည်။

ဒုတိယမစ်ရှင် လိုအပ်ချက်၏ ဆုလာဘ်များသည် ဟန်ရှောင်းအား ဤမစ်ရှင်ကို လက်ခံရန် ဖြစ်စေခဲ့ခြင်း ဖြစ်သည်။

သတ်မှတ်ထားသည့် ဇာတ်ကောင်ဆင့်ခေါ်ကတ်ကို မဆိုထားနှင့်ဦး၊ သူသည် စွမ်းရည်သုံးခုကိုလည်း ရရှိဦးမည် ဖြစ်သည်။

[ရန်သူ] မှာ လက်တွေ့ကျသော အရည်အချင်းဖြစ်ပြီး သူ့အတွက် သင့်တော်သည်။

ပုံမှန်လူတစ်ဦးအတွက်မူ အရည်အချင်း၏ အမြင့်ဆုံး ကန့်သတ်ချက်သို့ ရောက်ရှိရန် တိုက်ခိုက်မှုများစွာ ခံရသည့်အချိန်တွင် သူ့၌ သွေးအမှတ် အနည်းငယ်သာ ကျန်ရှိတော့မည် ဖြစ်သည်။

သို့သော် ဟန်ရှောင်းသည် သူ၏ သွေးအမှတ်ကို အလွယ်တကူ ပြန်လည်ဖြည့်တင်းနိုင်သဖြင့် ဤ ၂၅ ရာခိုင်နှုန်း အပို တိုက်ခိုက်မှုသည် ကောင်းကင်မှ ကျလာသည့် မုန့်လုံးကြီးကဲ့သို့ပင် ဖြစ်သည်။

ဒါ့အပြင် ၎င်းသည် ဆင့်ခေါ်ထားသည့် သက်ရှိများနှင့် ယန္တရားများအပေါ်တွင်လည်း ထိရောက်မှု ရှိလိမ့်မည်။ ဤသည်မှာ ၎င်း၏ ယန္တရားတပ်မတော် တစ်ခုလုံး၏ တိုက်ခိုက်မှုသည် တိုးလာလိမ့်မည်ဟု ဆိုလိုခြင်း ဖြစ်သည်။

[ခေါင်းဆောင်မှု သက်သေ] မှာမူ ဤစွမ်းရည် သုံးခုထဲ၌ အစွမ်းထက်ဆုံးဖြစ်ပြီး သူ၏ အရင်ဘဝက ကစားသမားများကြားတွင် အလွန်ပင် နာမည်ကြီးခဲ့သည်။

ကစားသမားများလည်း ဤစွမ်းရည်ကို ရရှိနိုင်၏။

အဖွဲ့အစည်းတစ်ခု၏ ခေါင်းဆောင်သည်သာ ဤအရည်အချင်း၏ အကျိုးသက်ရောက်မှုများကို အသုံးပြုနိုင်မည်ဖြစ်ရာ ၎င်းမှာ ပုံသွင်းခြင်း အရည်အချင်းနှင့် ဆင်တူသည်။ ကစားသမားများလည်း မိမိတို့ကိုယ်ပိုင် လက်နက်ကိုင် အဖွဲ့အစည်းများ ဖွဲ့စည်းနိုင်ပြီး ကွန်ပျူတာဇာတ်ကောင်များကို ငှားရမ်းနိုင်သည်။

အနာဂတ် ဗားရှင်းများတွင်မူ ကစားသမားများသည် [ခေါင်းဆောင်မှု သက်သေ] အရည်အချင်းကို ရယူရန်အတွက် ပုံသေ နည်းလမ်းတစ်ခု ရှိလာမည် ဖြစ်သည်။ ဤအရည်အချင်းကို အသုံးပြုနိုင်ရန်အတွက် ကစားသမား အမြောက်အမြားသည် မိမိတို့ကိုယ်ပိုင် အဖွဲ့အစည်းများ ဖွဲ့စည်းကြမည်ဖြစ်ရာ ၎င်းမှာ ခေတ်သစ်တစ်ခု၏ အစ ဖြစ်လာလိမ့်မည်။

အရည်အချင်း၏ အပိုဆုသည် အဖွဲ့အစည်း၏ အရွယ်အစားပေါ်တွင် မူတည်သည်။ နာမည်ကျော်ကြားမှု သို့မဟုတ် ငွေကြေးမရှိသော ကစားသမားများအတွက်မူ ဤအရည်အချင်းသည် လုံးဝ အသုံးမဝင်ပေ။ သို့သော် အလုပ်ရုံများနှင့် ကလပ်များသည်မူ ဤအရည်အချင်း၏ အကျိုးကျေးဇူးများကို အပြည့်အဝ အသုံးချနိုင်ကြသည်။

သူ၏ အရင်ဘဝတွင်မူ တစ်ကိုယ်တော်သမား တစ်ဦးအနေဖြင့် ဟန်ရှောင်းသည် [ခေါင်းဆောင်မှု သက်သေ] အရည်အချင်းကို တစ်ခါမျှ အသုံးမပြုခဲ့ဖူးပေ။ သို့သော် [ခေါင်းဆောင်မှု သက်သေ] သည် မည်မျှအတိုင်းအတာအထိ အစွမ်းထက်နိုင်သည်ကို အလွန် ရှင်းလင်းစွာ သိရှိထားသည်။

"ငါသာ အခု ဒီအရည်အချင်းကို ရနိုင်မယ်ဆိုရင် အကျိုးသက်ရောက်မှုတွေက စိတ်ကူးယဉ်လို့တောင် ရမှာမဟုတ်ဘူး"

ဟန်ရှောင်းသည် အမှန်တကယ်ပင် စိတ်လှုပ်ရှားနေမိသည်။ မိမိ၏ အင်အားကို တိုးမြှင့်စေနိုင်သည့် စွမ်းရည်များအပေါ် ၎င်းသည် အမြဲတမ်း စိတ်အားထက်သန်တတ်သည်။

နောက်ဆုံးကျွမ်းကျင်မှုဖြစ်သည့် [ကွန်ဒီဒေါသ] သည်လည်း သူ၏ မျက်လုံးများကို တောက်ပသွားစေသည်။

စိတ်ပိုင်းဆိုင်ရာ ခုခံမှု နှစ်ဆဆိုသည်မှာ အလွန် အစွမ်းထက်လှသည်။

ဟန်ရှောင်း၏ စိတ်ပိုင်းဆိုင်ရာ ခုခံမှုသည် သူ၏ အားနည်းချက် အမြဲတမ်း ဖြစ်နေခဲ့ရာ စိတ်ပိုင်းဆိုင်ရာ ခုခံမှုကို တိုးမြှင့်စေနိုင်သည့် မည်သည့် ကျွမ်းကျင်မှုမျိုးကိုမဆို သူစိတ်ဝင်စားသည်။

ဒါ့အပြင် ၎င်းသည် အချိန်တိုအတွင်း၌ ဆိုးရွားသော စိတ်ပိုင်းဆိုင်ရာ အခြေအနေ အားလုံးကို ခုခံနိုင်စေမည် ဖြစ်သည်။ ဤသည်မှာမှာ စိတ်ပိုင်းဆိုင်ရာ ထိန်းချုပ်မှု စွမ်းရည်အားလုံးကို ခုခံနိုင်စွမ်း ပေးအပ်မည့် ကျွမ်းကျင်မှုမျိုးနှင့် ဆင်တူသည်။

ဤကျွမ်းကျင်မှုသည် သူ၏ သွေးအမှတ်ကို အသုံးပြုရန် လိုအပ်ပြီး တစ်စက္ကန့်လျှင် သွေးအမှတ် ၅ ရာခိုင်နှုန်း လိုအပ်သည်။ စက္ကန့် ၂၀ အတွင်း၌ ၎င်း၏ သွေးအမှတ် ကုန်ဆုံးသွားမည်ဖြစ်ရာ ဤကျွမ်းကျင်မှုကို အများဆုံး စက္ကန့် ၄၀ သာ သုံးနိုင်သည်။ လူအများစုမှာမူ ဤကျွမ်းကျင်မှုကို စက္ကန့်အနည်းငယ်သာ အသုံးပြုနိုင်ကြမည် ဖြစ်သည်။

သို့သော် ဟန်ရှောင်း၏ ပြန်လည် နာလန်ထူမှုမှာမူ အစွမ်းထက်လွန်းလှသဖြင့် တစ်စက္ကန့်လျှင် သွေးအမှတ် ၁၀ ရာခိုင်နှုန်း ပြန်လည်ဖြည့်တင်းနိုင်သည်။ စက္ကန့် ၄၀ အပြည့် အသုံးပြုရန်မှာ သူ့အတွက် ပြဿနာ မရှိပေ။

ဟန်ရှောင်း နားမလည်သည့် တစ်ခုတည်းသော အရာမှာ ကျွမ်းကျင်မှု၏ နာမည်ပင် ဖြစ်သည်။

‘မင်းက ဒေါသထွက်နေရင် တိုက်ခိုက်မှု တိုးလာသင့်တာ မဟုတ်ဘူးလား။ ဘာလို့ ခုခံမှုက တိုးလာတာလဲ။’

‘ဘာပဲဖြစ်ဖြစ် ဒီစွမ်းရည် သုံးခုစလုံးက အရမ်း အသုံးဝင်တယ်။ မစ်ရှင်ကိုသာ ငါ ပြီးမြောက်နိုင်မယ်ဆိုရင် ငါ့ရဲ့ အင်အားက အများကြီး တိုးလာမှာပဲ။ အထူးသဖြင့် [ခေါင်းဆောင်မှု သက်သေ] ကိုပေါ့။ အဲဒါကို အမြန်ဆုံး ရဖို့က ငါ့အတွက် အကောင်းဆုံးပဲ။’

ဒုတိယမစ်ရှင် လိုအပ်ချက်မှာမူ နောက်ကွယ်မှ ကြိုးကိုင်သူကို လက်စားချေရန် ဖြစ်သည်။ သို့သော် မစ်ရှင်က မည်သို့သော အရာကို လက်စားချေမှုဟု သတ်မှတ်သည်ကိုမူ ရှင်းလင်းစွာ မဖော်ပြထားပေ။ ၎င်းသည် အဆိုပါအချက်ကို မိမိဘာသာ ရှာဖွေရမည် ဖြစ်သည်။ ဤအချက်တွင်မူ ၎င်းသည် ဂိုဒိုရာ၏ [သွေးမျိုးဆက်] မစ်ရှင်နှင့် ဆင်တူသည်။

သို့သော် မစ်ရှင် ဆုလာဘ်များသည် အမှန်တကယ်ပင် ဆွဲဆောင်မှု ရှိနေသဖြင့် ဟန်ရှောင်းသည် ၎င်းကို ပြီးမြောက်အောင် အစွမ်းကုန် ကြိုးစားမည် ဖြစ်သည်။

ဟန်ရှောင်းသည် မျှော်လင့်မထားသော ဆုလာဘ်ကြောင့် အလွန် ကျေနပ်နေမိသည်။

...

သူ၏ အဝေးရောက် ပုံရိပ်ယောင်ကို ပိတ်လိုက်ပြီးနောက် တာရိုကော့ဗ်သည် အူရန်ရယ်ထံသို့ အစီရင်ခံစာ ချက်ချင်း တင်ပြလိုက်သည်။ သူသည် စစ်ဆေးမေးမြန်းမှု မှတ်တမ်းနှင့် ဟန်ရှောင်း၏ လုပ်ရပ်များကို ပေးပို့လိုက်သည်။

"မင်းပြောချင်တာက ဘလက်စတားက သုံ့ပန်းတွေကို ကြည့်ပြီးတဲ့နောက်မှာ သူ့စိတ်ကို ပြောင်းဖို့ ဆုံးဖြတ်လိုက်တယ်ပေါ့။ သူက ငါတို့ သူတို့ကို ပညာပေးသင့်တယ်လို့ ခံစားရတယ်ပေါ့"

"ဟုတ်ပါတယ်။"

"ဟင်း..." အူရန်ရယ်သည် အတွေးထဲ နစ်သွားသည်။ "ဘာကြောင့်လဲ"

"သူတို့ရဲ့ လူဦးရေအတွက်လို့ သူက ပြောပါတယ်..." ထို့နောက် တာရိုကော့ဗ်က ဟန်ရှောင်း ပြောကြားခဲ့သည်များကို အကျဉ်းချုပ် ရှင်းပြလိုက်သည်။

ထိုအခါ အူရန်ရယ်က ခေါင်းညိတ်လိုက်ပြီး "ငါတို့ မဟာမိတ်ရဲ့ သဘောထား ဖြစ်နေတာကြောင့် ငါတို့ အဲဒါကို သေချာ စဉ်းစားရမှာပေါ့"

ဘလက်စတား၏ တန်ဖိုးသည် ရှုံးနိမ့်သွားသည့် ကွန်ဒီလူမျိုးစုထက် အများကြီး ပိုမိုမြင့်မားသည်။ နောက်ဆုံးတွင် နိုင်ငံတော် မဏ္ဍိုင်ဆိုသည်မှာ ပေါများနေသည်မဟုတ်ဘဲ လက်အောက်ခံ လူမှုအဖွဲ့အစည်းများမှာမူ အမြောက်အမြား ရှိသည်။

ဒါ့အပြင် ဘလက်စတားသည် ဤစစ်ပွဲတွင် အများကြီး ပံ့ပိုးပေးခဲ့သဖြင့် သူ၏ သဘောထားကို အင်ပါယာက အလွန် အလေးထားသည်။

အမှန်တရားမှာ ကွန်ဒီလူမျိုးစုကို ကိုင်တွယ်ခြင်းသည် အင်ပါယာအတွက်မူ သာမန်ကိစ္စတစ်ခုသာဖြစ်ပြီး သိပ်ပြီး အရေးမကြီးပေ။ သူတို့ကို ဘလက်စတား တပ်မတော်၏ နယ်မြေထဲ၌ ထားရှိခြင်းသည် ပြဿနာ မရှိပေ။ ၎င်းသည် သူတို့ မဟာမိတ်၏ နယ်မြေတွင် လူဦးရေ တိုးလာစေရုံသာမက သူတို့ မဟာမိတ်သည်လည်း ကွန်ဒီလူမျိုးစုကို ကူညီစောင့်ရှောက်ပေးနိုင်မည် ဖြစ်သည်။

သို့သော် ဘလက်စတားသည် သူတို့၏ တစ်ဦးတည်းသော မဟာမိတ် မဟုတ်သဖြင့် ဤအသားတုံးကို ဘလက်စတားအား ပေး၊ မပေးဆိုသည်ကို မဆုံးဖြတ်မီ အမျိုးမျိုးသော သဘောထားများကို သူတို့က ချိန်ညှိရမည် ဖြစ်သည်။

နောက်ကွယ်မှ ကြိုးကိုင်သူကို ကိုင်တွယ်မည့် ကိစ္စသည် ကွန်ဒီလူမျိုးစု ခေါင်းဆောင် တစ်ဦးတည်းသာ လုပ်ဆောင်လိုခြင်း မဟုတ်ပေ။ အင်ပါယာတွင်လည်း အလားတူ ရည်ရွယ်ချက် ရှိနေသည်။

သူတို့၏ ပြိုင်ဘက်သည် ကွန်ဒီလူမျိုးစု ဖြစ်နေသော်လည်း နည်းပညာအိတ်ကို ပစ်ချပေးခဲ့သည့် ကြယ်စုတန်း လူမှုအဖွဲ့အစည်းသည်သာ တကယ့် တရားခံဖြစ်ရာ အင်ပါယာသည် ထိုတရားခံကို လွှတ်ပေးရန် အစီအစဉ် မရှိပေ။

ထို့အပြင် ကြယ်ရောင်တောက်ပကမ္ဘာကို စူးစအ်းရှာဖွေခြင်းသည် မပြီးဆုံးသေးသဖြင့် သူတို့သည် နောက်ထပ် ဌာနေလူမှုအဖွဲ့အစည်းအချို့ကို ပြဿနာရှာရန် လှုံ့ဆော်ပါက အင်ပါယာ၏ တိုးတက်မှုကို အများကြီး နှောင့်နှေးစေမည် ဖြစ်သည်။

ထို့ကြောင့် ပြဿနာရှာနေသည့် လူများကို အင်ပါယာက ဤအတိုင်း လွှတ်ပေးထားရန်မှာ မဖြစ်နိုင်ပေ။

ဟန်ရှောင်း၏ ရည်ရွယ်ချက်သည် အင်ပါယာ၏ အစီအစဉ်များနှင့် တစ်ထပ်တည်း ကျနေသည်။

"ဒါဆိုရင် ဘယ်အဖွဲ့အစည်းက ကွန်ဒီလူမျိုးစုဆီကို အာကာသယာဉ်ကို ပစ်ပေးခဲ့တာလဲဆိုတာ ငါတို့ စုံစမ်းရမှာပေါ့"

အူရန်ရယ်၏ မျက်လုံးထဲတွင် အေးစက်သော အရိပ်အယောင်များကို မြင်တွေ့လိုက်ရသည်။

စာစဉ် (၅၈)၊ အခန်း (၉၈၂) ပြီးပါပြီ။

လင်းဆက်

+++++