အခန်း (၂၁၀၁-၂၁၀၂)

အပိုင်း(၂၁၀၁)

"..."

မျက်လုံးများ ကျဉ်းမြောင်းသွားကာ ဝိညာဉ်များ တုန်လှုပ်သွားရသည်။ ဝေ့ဝူယင်၏ သွေးမျိုးဆက်မှာ တိုက်ခိုက်မှုတိုင်းတွင် ပြင်းထန်စွာ နိုးထလာနေ၏။ သူ အသွင်ပြောင်းလဲမှုကို အားအပြည့်ဖြင့် ထုတ်ဖော်လိုက်စဉ်တွင်တော့ အချိန်နှင့် အာကာသဆိုင်ရာ ဖြစ်စဉ်အမျိုးမျိုးကို ဖြစ်ပေါ်စေတော့သည်။

ဝေ့ဝူယင်သည် အကြေးခွံများ ဖုံးလွှမ်းနေသော သူ၏ လက်ဖဝါးများကို ခဏမျှ ကြည့်လိုက်သည်။ အကြေးခွံများထံမှ အချိန်၏ အနှစ်သာရကို ဖော်ဆောင်နေသော မီးခိုးရောင်ရင့်ရင့် အလင်းတန်းနှင့် အာကာသ၏ အစစ်မှန်ဆုံး အနှစ်သာရကို ပြသနေသော ငွေရောင် တဖျပ်ဖျပ် တောက်မှုတို့ ထွက်ပေါ်နေသည်။ အကြေးခွံများမှာ ခြောက်ထောင့်ပုံစံ မဟုတ်တော့ဘဲ ဆယ်ထောင့်ပုံစံ များ ဖြစ်နေကာ တစ်ခုနှင့်တစ်ခု အထပ်ထပ် ချိတ်ဆက်လျက် မည်သူမျှ မထိုးဖောက်နိုင်သော ခိုင်ခံ့သည့် ခံတပ်အလား ဖြစ်နေပေသည်။

သူ၏ လက်သည်းများမှာ ကြယ်စုံသော ညကောင်းကင်ယံကဲ့သို့ နက်မှောင်နေပြီး အဆုံးမဲ့ နက်ရှိုင်းမှုကို ဆောင်ကြဉ်းနေသဖြင့် ကြည့်ရသူတိုင်းကို တုန်လှုပ်စေသည်။ လက်သည်းဖြင့် တစ်ချက် ဝှေ့ယမ်းလိုက်ရုံမျှဖြင့် အချိန်နှင့် အာကာသတစ်လျှောက် တည်ရှိမှုတိုင်းကို ဆွဲထုတ်ကာ အချိန်မြစ်အတွင်းမှ ဖယ်ရှားပစ်နိုင်မည့်အလား ခံစားရစေသည်။

ဝေ့ဝူယင်၏ ခန္ဓာကိုယ်ဆဲလ်များမှာလည်း မယုံကြည်နိုင်လောက်အောင် ပြောင်းလဲသွားခဲ့ပြီ ဖြစ်သည်။ ယခင်က သူ အသွင်ပြောင်းသောအခါ ဆဲလ်များမှာ နဂါးစစ်စစ်၏ အော်ရာများ ကူးစက်ခံရရုံမျှသာ ဖြစ်သော်လည်း၊ ယခုအခါတွင်မူ သူ၏ ဆဲလ်တည်ဆောက်ပုံမှာ မက်ဂီနှင့် နဂါးတို့ အပြစ်ပြောစရာမရှိအောင် ရောနှောသွားခြင်း ဖြစ်သည်။ ၎င်းကို မြင်သောအခါ သူ၏ အဂ္ဂိရတ် ကြယ်တာရာ မျက်ဝန်းများမှာ ပိုမို ထက်မြက်ကာ ပြင်းထန်သော အကြည့်များဖြင့် သူ၏ ခန္ဓာကိုယ် ဆဲလ်များ ဆင့်ကဲပြောင်းလဲမှုကို စူးစိုက်ကြည့်နေတော့သည်။

သူ၏ ဆဲလ်များသည် ကျင့်ကြံခြင်းလမ်းစဉ်တစ်လျှောက် လူသားဆဲလ်တည်ဆောက်ပုံကိုသာ ထိန်းသိမ်းထားခဲ့သော်လည်း ယခုအခါတွင်မူ ပိုမို ရှုပ်ထွေးကာ သားရဲဆန်သော ပုံစံသို့ ပြောင်းလဲလာခဲ့သည်။

‘ငါ့ရဲ့ သွေးမျိုးဆက် စွမ်းအင်တွေကို လှုံ့ဆော်လိုက်တာက မက်ဂီသွေးမျိုးဆက်ရဲ့ ငုပ်လျှိုးနေတဲ့ ဂုဏ်သတ္တိတွေကိုပါ နှိုးပေးလိုက်တာလား...’

သူ့ကို အံ့အားသင့်စေသည်မှာ ဆဲလ်များ၏ ရုပ်ပိုင်းဆိုင်ရာ အပြောင်းအလဲ မဟုတ်ဘဲ၊ အရာအားလုံး ဖန်တီးချိန်ကတည်းက တည်ရှိခဲ့သော ရှေးဟောင်း မက်ဂီသွေးမျိုးဆက် နှင့် သူကိုယ်တိုင် ကျင့်ကြံဖန်တီးထားသော အစစ်အမှန် ဟင်းလင်းပြင် နဂါးသွေးမျိုးဆက် တို့ကြား ချောမွေ့စွာ ပေါင်းစပ်သွားခြင်းပင် ဖြစ်သည်။

ဤဖွံ့ဖြိုးတိုးတက်မှု၏ ရလဒ်များကို ချက်ချင်း မသိနိုင်သေးသဖြင့် သူ၏ ခန္ဓာကိုယ် တစ်ခုလုံးကို ဆက်လက် စစ်ဆေးကြည့်ရာတွင် အခြား ထူးခြားချက် မတွေ့ရပေ။ သို့သော် သူ၏ ဆဲလ်များက ပတ်ဝန်းကျင်ရှိ မန်နာ များကို အပြင်းအထန် ဝါးမျိုနေပြီး ကုန်ဆုံးသွားသော သွေးမျိုးဆက် စွမ်းအင်များကို ကုန်ဆုံးနှုန်းထက် ဆယ့်နှစ်ဆခန့် ပိုမြန်သော အရှိန်ဖြင့် ပြန်လည် ဖြည့်တင်းပေးနေသည်ကို တွေ့လိုက်ရသည်။

‘ဒါဆို ငါသာ အားအများကြီး မစိုက်ထုတ်ရင် ဒီအသွင်သဏ္ဌာန်အတိုင်း ထာဝရ နေနိုင်တာပေါ့...’

ဤဖြစ်နိုင်ခြေကို သိလိုက်ရချိန်တွင် ၎င်းမှာ သူ၏ ကြယ်တာရာ ပါရဂွန် ခန္ဓာကိုယ် ၏ ပြန်လည် ပြုပြင်နိုင်စွမ်းနှင့် အစစ်အမှန် ဟင်းလင်းပြင် နဂါးသွေးမျိုးဆက်၏ လိုအပ်ချက်တို့ အပြစ်ပြောစရာမရှိအောင် ပေါင်းစပ်သွားသည့် ရလဒ်ဖြစ်ကြောင်း ဝေ့ဝူယင် သဘောပေါက်သွားသည်။

သူ၏ လက်ကို အနည်းငယ် လှုပ်ရှားလိုက်ရုံဖြင့် ဟင်းလင်းပြင်၏ ဆွဲငင်အား ပြောင်းလဲသွားမှုကို သူ ခံစားလိုက်ရသည်။

“ဟမ်...”

ဆက်လက်၍ သူ၏ ရုပ်ပိုင်းဆိုင်ရာ တည်ရှိမှု ဖိအားမှာ နေကြယ်များထက်ပင် သာလွန်နေသည်ကို သူ သတိထားမိလိုက်သည်။ သူသည် သူ၏ ဗဟိုချက် ဆွဲငင်အားအသုံးမပြုဘဲနှင့်ပင် သူ၏ ရုပ်ပိုင်းဆိုင်ရာ ခန္ဓာကိုယ်၏ စွမ်းပကားသက်သက်ဖြင့် နက္ခတ္တဗေဒဆိုင်ရာ စွမ်းအားများကို ထိန်းချုပ်နိုင်နေပြီ ဖြစ်သည်။

ဟင်းလင်းပြင် တာအို...

သူတော်စင် ရှစ်ဦး၏ မျက်လုံးထဲတွင်မူ ဝေ့ဝူယင်သည် မျိုးစိတ်တစ်ခုလုံး ပြောင်းလဲသွားသကဲ့သို့ပင်။ သူသည် လူသား သို့မဟုတ် သားရဲ တစ်ကောင်နှင့် မတူတော့ဘဲ စကားလုံးဖြင့် ဖော်ပြရန် ခက်ခဲသော ခံစားချက်မျိုးကို ပေးစွမ်းနေသည်။ အကယ်၍ နတ်ဘုရားတစ်ပါး လူ့လောကသို့ ဆင်းသက်လာသည်ကို မြင်တွေ့ရလျှင် ရနိုင်မည့် ခံစားချက်မျိုးကို သူတို့ ခံစားနေရခြင်း ဖြစ်သည်။

အမှန်စင်စစ် သူတို့သည် ဝေ့ဝူယင်ကို အာရုံခံစားမှုမျိုးစုံဖြင့် မြင်တွေ့နိုင်၊ ကြားနိုင်သော်လည်း၊ သူ၏ ပုံပန်းသဏ္ဌာန်ကိုမူ ပြန်လည် ဖော်ပြရန် သို့မဟုတ် မှတ်မိရန် ခက်ခဲနေကြသည်။ ၎င်းမှာ လူသားမျက်စိဖြင့် မမြင်နိုင်သော၊ သို့သော် ရုပ်ပိုင်းဆိုင်ရာအရ တည်ရှိနေသော နတ်ဘုရားတစ်ပါးကို ကြည့်နေရသကဲ့သို့ပင်။ ဤခံစားချက်မှာ သာမန် သေမျိုးတစ်ဦး၏ ဝိညာဉ်ပင်လယ်ကို ပျက်စီးစေရန် လုံလောက်လှသည်။

ဝေ့ဝူယင်၏ မက်ဂီ မျိုးရိုးနှင့် ကောင်းကင်ဘုံ နတ်မျက်လုံးများ တို့ကြောင့်သာ သူသည် ဤကဲ့သို့သော မမြင်နိုင်သည့် နတ်ဘုရားဆန်သော တည်ရှိမှုများကို မြင်တွေ့နိုင်ခြင်း ဖြစ်သည်။ သူ၏ နဂါးသွေးမျိုးဆက်မှာ တကယ့်ကို နတ်ဘုရားမျိုးရိုးပင်။ ယခုအချိန်တွင် ဝေ့ဝူယင်၏ ခန္ဓာကိုယ်မှာ ဆဲလ်များအထိ နတ်ဘုရားဆန်သော အဆင့်သို့ ရောက်ရှိနေပြီ ဖြစ်ရာ၊ သူတော်စင်များ၏ မျက်လုံးထဲတွင် သူသည် အတိုင်းအဆမရှိ ထူးဆန်း အံ့ဩဖွယ်ရာ ကောင်းနေတော့သည်။

သူတော်စင် ခွန်ရှူး၏ ထိတ်လန့်တုန်လှုပ်မှုမှာ လုံးဝ ယုတ္တိရှိလှပေသည်။

ဝေ့ဝူယင်သည် သူ၏ ဟုန်းဟုန်းတောက်နေသော သွေးမျိုးဆက် စွမ်းအင်များကို ဖြည်းဖြည်းချင်း တည်ငြိမ်အောင် လုပ်လိုက်သည်။

ဝှစ်...

ဝေ့ဝူယင် လွှဲပစ်လိုက်သော ကျင်းကြီးထဲမှ သူတော်စင် ပါခက်သည် ဆံပင်များ ဖရိုဖရဲဖြင့် ပြန်လည် တက်လာသည်။ သူမ၏ မျက်ဝန်းထဲတွင် ထိတ်လန့်မှုများ ဖြတ်ပြေးသွားသော်လည်း ၎င်းမှာ ခဏတာမျှသာ ဖြစ်သည်။

သူမသည် သူမ၏ ဓားကို ပိုမို တင်းကျပ်စွာ ဆုပ်ကိုင်လိုက်သည်။ သူမ၏ တိုက်ပွဲဝင်လိုစိတ်မှာ မည်သို့မျှ ထိခိုက်ခြင်း မရှိပေ။ သူမ၏ ခြင်္သေ့မဟိန်းသံကဲ့သို့ အော်ဟစ်လိုက်မှုကြောင့် အခြားသူများ၏ စိတ်များလည်း ပြန်လည် တည်ငြိမ်လာကြသည်။ သူမသည် မြေပြင်ကို အရှိန်ဖြင့် ကန်ကာ ဝေ့ဝူယင်ထံသို့ သတ်ဖြတ်လိုသော မြားတစ်စင်းအလား ပြေးဝင်သွားပြန်သည်။

ပထမဆုံးအကြိမ်အဖြစ် ဝေ့ဝူယင်သည် ပါခက်၏ ဓားရည်ရွယ်ချက် ကို ခံစားလိုက်ရသည်။ ဝေ့ဝူယင်၏ အသွင်ပြောင်းလဲမှု ရှေ့မှောက်တွင် အခြားသူများမှာ စိတ်ဓာတ် ပျက်ပြားလုနီးပါး ဖြစ်နေသော်လည်း သူမ၏ ကျင့်ကြံခြင်း နှလုံးသား နှင့် တိုက်ပွဲဝင် ဝိညာဉ် မှာမူ ပကတိ အတိုင်းပင် ရှိနေသဖြင့် သူ ချီးကျူးမိသွားသည်။

သူမက ဓားကို လွှဲယမ်းဝံ့သေးသည်။

ဝေ့ဝူယင်ကလည်း ထိုဆုံးဖြတ်ချက်ကို လေးစားသောအားဖြင့် တိုက်ပွဲကို လက်ခံလိုက်သည်။ သူက ခြေထောက်ကို အားစိုက်လိုက်ရာ ဟင်းလင်းပြင်ကြီးမှာ သူ၏ ခြေနင်းခုံအလား ဖြစ်သွားပြီး အချိန်နှင့် အာကာသအတွင်း အစွန်းအထင်းငယ်တစ်ခု ကျန်ရစ်ကာ သူ ပျောက်ကွယ်သွားတော့သည်။

ပါခက်သည် သူ့ကို ချက်ချင်း မျက်ခြေပြတ်သွားသည်။ သို့သော် သူမ၏ တုံ့ပြန်မှုမှာ အလွန် မြန်ဆန်လှသဖြင့် သူမ၏ ရှေ့ရှိ အရာအားလုံးကို အစွမ်းကုန် ခုတ်ပိုင်းလိုက်သည်။ သူမ၏ ဓားချက်မှာ ကောင်းကင်ကို ခွဲထုတ်ကာ၊ မြေပြင်ကို အက်ကွဲစေပြီး၊ အချိန်နှင့် အာကာသကိုပင် ထိုးဖောက်သွားသော်လည်း...

ဘာကိုမျှ မထိမှန်ခဲ့ပေ...။

ဝေ့ဝူယင်မှာ သူမ၏ နောက်ကျောတွင် ရောက်နေခြင်း ဖြစ်သည်။ သူသည် ပါခက်၏ အချည်းနှီး ဖြစ်သွားသော တိုက်ကွက်ကို ကြည့်နေကြသည့် အခြား သူတော်စင်များကို စိုက်ကြည့်လိုက်သည်။ သူတို့အားလုံးက ပါခက်ထံသို့ ဝိညာဉ်သတင်းစကားများ ချက်ချင်း ပေးပို့လိုက်ကြသည်။

အာမွန်နက်မှာမူ ဝေ့ဝူယင်၏ ခန္ဓာကိုယ်သစ်ကို မြင်တွေ့လိုက်ရခြင်းကြောင့် စိတ်အာရုံ အနည်းငယ် နှောင့်နှေးသွားသဖြင့် သူမ၏ နိမိတ်ဖတ်ခြင်းများ နောက်ကျသွားသည်။ သူမက ပိုမိုပြင်းထန်သော စွမ်းအင်များဖြင့် ပြန်လည် တွက်ချက်ရန် ကြိုးစားလိုက်ချိန်တွင် ကျောရိုးထဲအထိ စိမ့်တက်သွားသော အအေးဓာတ်ကို ခံစားလိုက်ရသည်။ သူမသည် ဒုံးပျံတစ်စင်းအလား အထက်သို့ အရှိန်ဖြင့် ပျံတက်လိုက်သည်။

“သူ ငါ့ကို ပစ်မှတ်ထားနေပြီ...”

သူမက ဝိညာဉ်ကွန်ရက်မှတစ်ဆင့် သတိပေးလိုက်သည်။ သူမက ရှောင်တိမ်းရန် ပြင်လိုက်စဉ်မှာပင် သူမ၏ နိမိတ်ဖတ် မျက်ဝန်းများ ပြောင်းလဲသွားပြီး အလျင်အမြန် သတင်းပို့လိုက်ပြန်သည်။

“ခွန်ရှူး... နင့်ရဲ့ နောက်မှာ...”

ထို့နောက် သူမ၏ မျက်နှာမှာ နာကျင်မှုကြောင့် ရှုံ့မဲ့သွားသည်။ ခွန်ရှူးက အာမွန်နက်ကို ကူညီရန် ပြင်နေစဉ်မှာပင် လျှို့ဝှက်အကာအကွယ်ကို အစွမ်းကုန် ထုတ်ဖော်လိုက်ရာ သူ၏ ခန္ဓာကိုယ်မှာ လရောင်များအောက်တွင် လူသားအရွယ်အစားရှိသော လကမ္ဘာတစ်ခုအလား တောက်ပသွားသည်။ ထိုလရောင်မှာ သူတော်စင် တစ်ဦး၏ တိုက်ခိုက်မှုကိုပင် ခုခံနိုင်လောက်အောင် သိပ်သည်းလှသည်။

“မဟုတ်ဘူး နက်ပစ်... သူက အာကာသကို ဖြတ်ကျော်ပြီး နင့်ရဲ့ ဘယ်ဘက် မီတာ ၃၀၀ အကွာမှာ ပေါ်လာလိမ့်...”

အာမွန်နက်သည် သူမ၏ သတိပေးချက်ကို ရပ်တန့်လိုက်ရသည်။ နာကျင်မှုမှာ ပိုမို ပြင်းထန်လာပြီး သူမ၏ ပုံရိပ်မှာ တဖြည်းဖြည်း မှေးမှိန်ပျောက်ကွယ်လာတော့သည်။

“သူတော်စင် ဟားသွော ကျဆုံးသွားပြီ သူ့ကို ကယ်ကြဦး...”

သူမက ထိတ်လန့်တုန်လှုပ်စွာဖြင့် အော်ဟစ်လိုက်သည်။ အဆင့်မြင့် သူတော်စင်ကြီးမှာ သတင်းစကားများစွာကို တစ်ပြိုင်နက် ပေးပို့နေသဖြင့် သူတော်စင် ရှစ်ဦးမှာ စည်းပျက်ကာ ရှုပ်ထွေးကုန်ကြသည်။

အထူးသဖြင့် ဟားသွောမှာ ဘာမှမဖြစ်ဘဲ ကောင်းကောင်းမွန်မွန် ရှိနေပါလျက်နှင့် ကျဆုံးသွားပြီ ဟု သတင်းပို့လိုက်ခြင်းကြောင့် ပို၍ ရှုပ်ထွေးသွားရသည်။ ဟားသွောသည် ဝေ့ဝူယင်၏ တိုက်ခိုက်မှုကို ကြောက်ရွံ့သဖြင့် သူမ၏ အပြင်းထန်ဆုံး ကာကွယ်ရေးအတတ်ကို ထုတ်ဖော်ကာ သူမ၏ တာဝန်ဖြစ်သော ကုသခြင်းနှင့် စွမ်းအင်ပေးဝေခြင်းကိုပင် မလုပ်နိုင်တော့ဘဲ ကိုယ်လွတ်ရုန်းနေတော့သည်။

အာမွန်နက်၏ မျက်လုံး၊ နှာခေါင်းနှင့် နားများမှ သွေးများ အရှိန်အဟုန်ဖြင့် စီးကျလာသည်။ တစ်စက္ကန့်အတွင်းမှာပင် သူမသည် အမျိုးမျိုးသော နိမိတ်ဖတ်ချက် သတင်းစကားပေါင်း တစ်ထောင်ခန့်ကို ပေးပို့လိုက်သည်။ ထို့နောက် သူမသည် သူမ၏ ခေါင်းကို ကိုင်ကာ တစ်ကမ္ဘာလုံး တုန်လှုပ်သွားစေမည့် အော်ဟစ်သံကြီးဖြင့် အော်လိုက်တော့သည်။

“အား...”

သူမ၏ အော်ဟစ်သံမှာ ဝိညာဉ်ကို ထိုးဖောက်သွားစေပြီး အခြားသူတော်စင်များမှာလည်း သူတို့၏ ဆက်သွယ်မှုကြောင့် ခဏတာမျှ ကျင့်ကြံခြင်း အခြေခံများ တန့်သွားရသည်။

“ဒါကြောင့်မို့လို့ ခင်ဗျား ဒီလို လုပ်နေတာကိုး...”

ဝေ့ဝူယင်၏ အသံမှာ ငရဲမှ ထွက်ပေါ်လာသော တစ္ဆေတစ်ကောင်အလား အာမွန်နက်၏ စိတ်ထဲသို့ ဝင်ရောက်လာသည်။ ၎င်းမှာ သူမ၏ ဝိညာဉ်ပင်လယ်အတွင်းသို့ တွားသွားဝင်ရောက်ကာ ဟင်းလင်းပြင်၏ အငွေ့အသက်များကို ချန်ထားရစ်ခဲ့သည်။ ဟင်းလင်းပြင်ဆိုသည်မှာ ကမ္ဘာကြီး၏ တည်ငြိမ်မှုကို ထိန်းသိမ်းထားပြီး အဆုံးမဲ့သော အချက်အလက်များ ပါဝင်နေသည့် နားလည်ရခက်သော နေရာတစ်ခု ဖြစ်သည်။

“ခင်ဗျားက သူတို့ကို ဗဟိုချက်အဖြစ် သုံးပြီး နိမိတ်ဖတ်နေတာကိုး... ကျုပ်ရဲ့ ကာကွယ်မှုတွေကို ရှောင်ဖို့အတွက် သူတို့ဆီမှာ ဘာဖြစ်မလဲဆိုတာကိုပဲ ကြည့်နေတာပေါ့... တကယ့်ကို ထက်မြက်တဲ့ နည်းလမ်းပဲ... ခင်ဗျားက တကယ့်ကို အံ့ဩစရာကောင်းတဲ့ အမျိုးသမီးပဲ”

ဝေ့ဝူယင်၏ အသံမှာ အာမွန်နက်၏ စိတ်ထဲတွင် ငရဲမှ နတ်ဘုရားတစ်ပါးအလား ပဲ့တင်ထပ်နေပြီး သူမထံသို့ မရေရာသော အနာဂတ် အချက်အလက်များစွာ စီးဝင်လာတော့သည်။

“ဒါပေမဲ့ အားနည်းချက်လည်း ရှိပုံရတယ်...”

ဝေ့ဝူယင် သတိပြုမိသည်မှာ သူမသည် သူတို့၏ ဝိညာဉ်များနှင့် နီးကပ်စွာ ချိတ်ဆက်ထားသဖြင့် အချက်အလက်များ စီးဝင်မှုကို မရပ်တန့်နိုင်ခြင်းပင်။ ဝေ့ဝူယင်ကဲ့သို့သော လူနှင့် ရင်ဆိုင်ရချိန်တွင် ၎င်းမှာ အကြီးမားဆုံး အားနည်းချက် ဖြစ်သွားရသည်။

အချက်အလက်များစွာ ပေါက်ကွဲစီးဝင်မှုကို မခံနိုင်တော့ဘဲ အာမွန်နက်မှာ သတိလစ်သွားတော့သည်။ သူမသည် သူမ၏ အသက်ကို ကယ်တင်ရန်အတွက် ထိုဆက်သွယ်မှုများကို ဖြတ်တောက်ကာ သူမ၏ ဝိညာဉ်ပင်လယ်ကို အလုပ်မလုပ်သော အခြေအနေသို့ ပြောင်းလဲလိုက်ပြီး မြေပြင်သို့ ပြုတ်ကျသွားတော့သည်။

တစ်ချိန်တည်းမှာပင် ဝေ့ဝူယင်မှာ ပါခက်၏ နောက်ကျောတွင် ရပ်မြဲ တည်ရှိနေဆဲပင်။

နိမိတ်ဖတ်သူကို ရှင်းလင်းပြီးနောက် ကျန်ရှိနေသူများကို ကိုင်တွယ်ရန် အချိန်ရောက်လေပြီ။

ပါခက်သည် သူမ၏ နောက်တွင် တစ်စုံတစ်ခု ရှိနေကြောင်း သိလိုက်သဖြင့် လှည့်ကြည့်လိုက်သည်။ သို့သော် သူမ၏ ဆံပင်မှာ ထပ်မံ အဖမ်းခံလိုက်ရပြန်သည်။ သူမ မတုံ့ပြန်နိုင်ခင်မှာပင် သူမ၏ ခန္ဓာကိုယ်မှာ မာကျောသော မြေသားအတွင်းသို့ အရှိန်ပြင်းစွာ ရိုက်ချခံလိုက်ရတော့သည်။

ဘုန်း...

သူမ ကိုင်ပေါက်ခြင်း ခံလိုက်ရပြန်လေပြီ။

ဝေ့ဝူယင်က သူ၏ အာရုံကို သူတော်စင် ဟားသွောထံသို့ လွှဲလိုက်တော့သည်။

***

အပိုင်း(၂၁၀၂)

“မလုံလောက်သေးဘူး...”

ဧဒင်စာကြည့်တိုက်အတွင်းမှ စိတ်လှုပ်ရှားတက်ကြွနေသော စကားသံများနှင့်အတူ အရှိန်အဟုန်ဖြင့် စာရေးသားနေသည့် အသံများ ထွက်ပေါ်လာသည်။ ဒုတိယစိတ်အာရုံသည် ဗဟုသုတနှင့် နားလည်သဘောပေါက်မှုအပေါ် အလွန်အမင်း ဆာလောင်မွတ်သိပ်နေသော စိတ်ရူးသွပ်မှုဖြင့် ထောင်ပေါင်းများစွာသော လိပ်စာများ၊ စာအုပ်များနှင့် ကျောက်စာချပ်များကြားတွင် တင်ပလ္လင်ခွေ ထိုင်နေ၏။

‘အချက်အလက်သစ်တွေ အများကြီးပဲ... တိုးတက်မှုအသစ်တွေ အများကြီးပဲ မက်ဂီလား... အစစ်အမှန် နဂါးလား လိုက်ဖက်ညီမှု... အယ်ဖာမူလကနေ ထွက်လာတဲ့ လျှို့ဝှက်စွမ်းအားကရော... အပြောင်းအလဲ ရှိမလား...”

ဒုတိယစိတ်အာရုံသည် မေးခွန်းပေါင်းများစွာ၊ သီအိုရီပေါင်းများစွာဖြင့် အဖြေများကို ရှာဖွေနေပြီး ဝေ့ဝူယင်ထံသို့ အမိန့်များ ပေးပို့နေသည်။

ဝေ့ဝူယင်သည် အပြစ်သား သွေးမျိုးဆက် ကို ရရှိပြီးကတည်းက သူ၏ ကျင့်ကြံခြင်းလမ်းစဉ်မှာ မည်သူမျှ မလျှောက်လှမ်းဖူးသော လမ်းသို့ ပိုမို ရောက်ရှိလာခဲ့သည်။ သူ၏ မူလအစနှင့် မျိုးရိုးဗီဇများမှာလည်း ပိုမို နက်နဲကျယ်ပြန့်လာခဲ့သည်။ ဒုတိယစိတ်အာရုံသည် ဝေ့ဝူယင်၏ စူးစမ်းလိုစိတ်၏ ပုံရိပ်ယောင်အလား ဖြစ်သော်လည်း ၎င်း၌ သီအိုရီများကိုသာ အချိန်ပြည့် စဉ်းစားတွက်ချက်ရန် အချိန်အကန့်အသတ် မရှိပေ။ ပြဿနာတစ်ခုမှာ ထိုသီအိုရီများကို အတည်ပြုရန်နှင့် စစ်မှန်သော အမှန်တရားကို ရှာဖွေရန် ဝေ့ဝူယင်၏ လက်တွေ့ လှုပ်ရှားမှုများကို လိုအပ်ခြင်းပင် ဖြစ်သည်။

သူတော်စင် ရှစ်ဦးနှင့် တိုက်ပွဲတွင် ဝေ့ဝူယင်သည် ပထမဆုံး စက္ကန့်ပိုင်းကတည်းက အားလုံးကို ထုတ်သုံးရန် ပြင်ဆင်ထားသော်လည်း ထိုသို့လုပ်ခြင်းမှာ သူ၏ ဥပဒေသများကို အားကိုးခြင်း ဖြစ်ပေလိမ့်မည်။ ကောင်းကင် စစ်ဝိညာဉ်က ကောင်းကင်ဘုံ၏ စွမ်းအားများကို အလွန်အမင်း အားမကိုးရန် သတိပေးထားသကဲ့သို့ ဒုတိယစိတ်အာရုံကလည်း ဥပဒေသစွမ်းအားများကို မသုံးရန် တိုက်တွန်းထားသည်။ သူတော်စင် အာမွန်နက်ကို နိမိတ်ဖတ်ခြင်းလှိုင်းများဖြင့် တိုက်ခိုက်ခဲ့သည့် တိုက်ကွက်မှာပင် သူ၏ ဟင်းလင်းပြင် နဂါး လျှို့ဝှက်စွမ်းအားကို အသုံးချခြင်းသာ ဖြစ်သည်။

အစပိုင်းတွင် ဝေ့ဝူယင်သည် ထိုသို့ စွမ်းအားကန့်သတ်မှုကို အလုပ်ရှုပ်စရာဟု ထင်ခဲ့သော်လည်း ယခုအခါတွင်မူ ထိုသို့ မဟုတ်တော့ပေ။ ဟင်းလင်းပြင် နဂါး လျှို့ဝှက်စွမ်းအား၏ စစ်မှန်သော အသုံးချမှုမှာ အတိုင်းအဆမရှိ အံ့ဩဖွယ်ကောင်းလှပြီး၊ အချိန်ဥပဒေသ သို့မဟုတ် အာကာသဥပဒေသ တို့ကို တစ်ခုချင်းစီ အသုံးပြုခြင်းထက်ပင် ပိုမို ထိရောက်လှသည်။ ထို့ပြင် ၎င်းမှာ အလွန် သဘာဝ ကျလှသည်။ သဘာဝကျခြင်း ဆိုသည့် စကားလုံးကို လျှော့မတွက်သင့်ပေ။

နှိုင်းယှဉ်ရလျှင် ဥပဒေသစွမ်းအားများကို အသုံးပြုခြင်းမှာ ပြင်ပမှ အထောက်အပံ့များကို ရယူကာ မိမိ၏ ဆန္ဒအတိုင်း ပုံသွင်းယူရသကဲ့သို့ ဖြစ်သော်လည်း၊ ဟင်းလင်းပြင် နဂါး လျှို့ဝှက်စွမ်းအားမှာမူ မိမိ၏ ခန္ဓာကိုယ်ကို ရွှံ့စေးအလား မိမိစိတ်ကြိုက် အသေးစိတ် ပုံဖော်နိုင်ခြင်း ဖြစ်သည်။

ရိုးရိုးရှင်းရှင်း ပြောရလျှင် အချိန် သို့မဟုတ် အာကာသ ဥပဒေသ အပေါ် သာမည အာဏာများကို အသုံးပြုရုံမျှဖြင့် သူတော်စင် အာမွန်နက်ကို ထိုသို့ အနိုင်ယူနိုင်မည် မဟုတ်ပေ။ ၎င်းတို့မှာ အစွမ်းထက်သော်လည်း ကျင့်ကြံခြင်း အခြေခံ ကန့်သတ်ချက် ရှိလှသည်။ ထို့ပြင် ၎င်းတို့မှာ ဝိညာဉ်အင်အားအပေါ်တွင်သာ မူတည်သည်။

ဝေ့ဝူယင် သတိပြုမိသည်မှာ သူ၏ ဆင့်ကဲပြောင်းလဲမှုသည် သူ၏ ဝိညာဉ်အင်အားကို သိသိသာသာ ပြောင်းလဲစေခဲ့ပြီး ဥပဒေသများထံမှ ရယူနိုင်သော စွမ်းအားကိုလည်း မြှင့်တင်ပေးခဲ့သည်။ ထို့ပြင် သူ မထုတ်ဖော်ရသေးသော အခြား စွမ်းအားများလည်း ကျန်ရှိနေသေးသည်။

စမ်းသပ်စရာများမှာ အလွန်များပြားလှသော်လည်း သင့်တော်သော ပြိုင်ဘက်မှာမူ မလုံလောက်ပေ။ သူသည် ပဲ့တင်ထပ် ဝိညာဉ် အဆင့် ကျင့်ကြံသူများ ရှိသည့် ဂလက်ဆီများသို့ သွားရောက်ရန်နှင့် မကြာမီ ဖြစ်ပွားတော့မည့် စစ်ပွဲကို မျှော်လင့်နေမိသည်။

‘ဟမ်... ငါ့စိတ်ထဲမှာ သူတော်စင်တွေက ဘယ်တုန်းက ဒီလောက်အထိ အရေးမပါ ဖြစ်သွားရတာလဲ...’

ဝေ့ဝူယင်သည် သူ၏ အတွေးများအပေါ် အံ့အားသင့်သွားပြီး မိမိကိုယ်ကို ချက်ချင်း ပြန်လည် နှိမ့်ချလိုက်သည်။ အခြားသူများနှင့် ခြားနားစွာပင်... သူသည် မိမိကိုယ်ကို အမြဲ သတိပေးလေ့ရှိသည်။ တစ်တောင်ထက် ပိုမြင့်သည့် တောင်ရှိသလို ပိုမို အစွမ်းထက်သည့် ကျင့်ကြံသူများလည်း ရှိနေနိုင်သည်။

သူသည် မည်သူမျှ မလျှောက်လှမ်းဖူးသော လမ်းကို လျှောက်နေသည် ဆိုသော်လည်း၊ အမိဝမ်းထဲကတည်းက ကျင့်ကြံလာပြီး လျှို့ဝှက်ဝိညာဉ်အဆင့် ပစ္စည်းများကို စားသုံးကာ ခန္ဓာကိုယ် ဆဲလ်တိုင်းကို သန်မာအောင် လုပ်ထားသည့် သုံးနှစ်အရွယ် ကလေးငယ်တစ်ဦးက သူ့ကို လက်တစ်ချက် ဝှေ့ယမ်းရုံဖြင့် သတ်ပစ်နိုင်သည်မျိုးလည်း ရှိနိုင်သည် မဟုတ်ပါလား။

သူ တွေးတောနေသော်လည်း တိုက်ပွဲမှာ ဆက်လက် ဖြစ်ပွားနေဆဲပင်။ ဝေ့ဝူယင်၏ အတွေးများမှာ အလွန် မြန်ဆန်လှသဖြင့် သူ စိတ်ကို တည်ငြိမ်အောင် ထားပြီးနောက် သူတော်စင် ဟားသွောကို စိုက်ကြည့်လိုက်သည်။ သူမသည် ခုခံရေး အနေအထားကို ယူထား၏။ ဝေ့ဝူယင်၏ ခန္ဓာကိုယ်ပတ်လည်တွင် ကြည်လင်သော အလင်းတန်းများ ဝန်းရံနေပြီး ဖန်တီးခြင်း အော်ရာ များမှာ လေထုထဲတွင် ပျံ့နှံ့နေသည်။

အစစ်အမှန် နဂါးအသွင် ပြောင်းလဲပြီးနောက် ဝေ့ဝူယင်၏ ခန္ဓာကိုယ်မှာ ဟင်းလင်းပြင်အတွင်းသို့ အလွန် လွယ်ကူစွာ ဝင်ရောက်နိုင်ခဲ့သည်။

ဝှစ်...

သူ ခြေလှမ်းတစ်လှမ်း လှမ်းလိုက်သည်နှင့် ပျောက်ကွယ်သွားတော့သည်။ မည်သူမျှ သူ့နောက်ကို မလိုက်နိုင်ကြပေ။ သူတော်စင် အာမွန်နက်နှင့် ဆက်သွယ်မှု ပြတ်တောက်သွားခြင်းကြောင့် သူတို့အားလုံးမှာ ထိတ်လန့်နေကြသည်။

ဦးဆောင်ညွှန်ကြားသူ မရှိသဖြင့် သူတို့မှာ ကိုယ့်အားကိုယ်ကိုးကြရတော့သည်။ သို့သော် သူတို့မှာ အညတရ သူတော်စင်များ မဟုတ်ဘဲ ထိပ်တန်း တိုက်ခိုက်ရေးသမားများ ဖြစ်ကြသည်။ သူတော်စင် ဟားသွောကို ကာကွယ်ရန်မှာ အလွန် အရေးကြီးကြောင်း သူတို့ သိကြသည်၊ အဘယ်ကြောင့်ဆိုသော် သူမသည် အာမွန်နက်ကို တိုက်ပွဲအတွင်း ပြန်လည် ခေါ်ဆောင်လာနိုင်သည့် တစ်ဦးတည်းသောသူ ဖြစ်သောကြောင့်ပင်။ ထို့ပြင် သူတို့တွင် ဒုတိယ အစီအစဉ်လည်း ရှိပေသည်။

သူတော်စင် ခွန်ရှူးက နည်းဗျူဟာကို ချက်ချင်း ပြောင်းလဲလိုက်သည်။ သူ၏ မျက်ဝန်းထဲမှ လရောင်အလင်းတန်းများတွင် နိမိတ်ဖတ်ခြင်း အငွေ့အသက်များ ပါဝင်လာသည်။ သူသည် နိမိတ်ဖတ်ခြင်း မှော်အတတ်ကို ထုတ်ဖော်နေခြင်း ဖြစ်သည်။ သူ၏ စွမ်းဆောင်ရည်မှာ အာမွန်နက်ကဲ့သို့ မဟုတ်သော်လည်း အခြေခံမှာ တူညီလှသည်။ သို့သော် ကံမကောင်းစွာဖြင့်...

သူတို့က ဟားသွောကို ကူညီရန် အတတ်ပညာများကို ပြင်ဆင်နေစဉ်မှာပင် ဝေ့ဝူယင်က စတင် လှုပ်ရှားလိုက်လေပြီ။

“...”

သူတော်စင် နက်ပစ်၏ မျက်လုံးများ ပြူးကျယ်သွားသည်။

“မင်္ဂလာပါ”

ဝေ့ဝူယင်က ပြုံးလျက် နှုတ်ဆက်လိုက်ကာ နက်ပစ်၏ ရှေ့တွင် ပေါ်လာသည်။ နက်ပစ်မှာ ဝေ့ဝူယင်နှင့် အမြဲတမ်း အကွာအဝေးတစ်ခုကို ထိန်းထားလေ့ရှိသော ဝိညာဉ်ကျင့်ကြံသူတစ်ဦး ဖြစ်သည်။ သူသည် အဝေးကနေ ဝိညာဉ်အတတ်ပညာများဖြင့် နှောင့်ယှက်ခြင်း၊ တိုက်ခိုက်ခြင်းနှင့် ပြိုင်ဘက်၏ ကျင့်စဉ်များကို ဖျက်ဆီးခြင်းတို့ကို လုပ်ဆောင်လေ့ရှိသူ ဖြစ်သည်။

သူသည် လှည့်စားတတ်သော တိုက်ခိုက်ရေးသမား တစ်ဦး ဖြစ်သည်။ ပုံမှန်အားဖြင့် တိုက်ပွဲတစ်ခုတွင် သူ့ကို အရင်ဆုံး ပစ်မှတ်ထားရမည် ဖြစ်သော်လည်း၊ ကုသပေးသူ ဟားသွောနှင့် နိမိတ်ဖတ်သူ အာမွန်နက်တို့ကို လျစ်လျူရှုထားခြင်းမှာ အလွန် အန္တရာယ်များလှသည်။

သို့သော် ဝေ့ဝူယင်၏ ဟင်းလင်းပြင် ဖုံးကွယ်ခြင်း နှင့် ဟင်းလင်းပြင် ကူးပြောင်းခြင်း စွမ်းရည်များမှာ အလွန် ထူးခြားလှသည်။ ခွန်ရှူးက အာမွန်နက်၏ နေရာတွင် အစားထိုး ဦးဆောင်နေသော်လည်း ဝေ့ဝူယင်၏ ရည်ရွယ်ချက်ကို အတိအကျ မသိနိုင်ကြပေ။ ဝေ့ဝူယင်သည် နဂါးအသွင် အပြည့်အဝ ပြောင်းလဲပြီးနောက် သာမန် အာကာသလမ်းကြောင်းအတိုင်း မသွားတော့ဘဲ ဟင်းလင်းပြင်ထဲမှတစ်ဆင့် သွားလာနေခြင်းကြောင့်ပင်။

ဝေ့ဝူယင် နက်ပစ်အနားသို့ ရောက်ရှိချိန်တွင် ခွန်ရှူး၏ နိမိတ်ဖတ်ချက်မှာ နောက်ကျနေလေပြီ။

“မင်း...”

နက်ပစ်က စကားစပြောကာ ဝေ့ဝူယင်ကို အချိန်ဆွဲရန် ကြိုးပမ်းလိုက်သည်။ သူသည် မည်သည့် ကျင့်စဉ်ကိုမျှ မထုတ်ဖော်နိုင်တော့ဘဲ ဝိညာဉ်ကွန်ရက်မှတစ်ဆင့်သာ အကူအညီ တောင်းနေတော့သည်။

ဝေ့ဝူယင်က နက်ပစ်ကို စိုက်ကြည့်လိုက်ရာ သူ၏ အဂ္ဂိရတ် ကြယ်တာရာ မျက်ဝန်းများထံမှ နက်နဲသော အလင်းတန်းများ ထွက်ပေါ်လာသည်။

“နစ်မြုပ်သွားစမ်း...”

ဝေ့ဝူယင်က စကားတစ်ခွန်းသာ ပြောလိုက်ပြီး ပုံရိပ်ယောင် မျက်လုံးကို ထုတ်ဖော်လိုက်သည်။

နက်ပစ်၏ မျက်လုံးများ ပိုမို ပြူးကျယ်သွားပြီး သူ၏ ခန္ဓာကိုယ်မှာ မတွန်းလှန်နိုင်သော ဆွဲငင်အားတစ်ခုကြောင့် နစ်မြုပ်သွားသကဲ့သို့ ခံစားလိုက်ရသည်။ သူ မြေပြင်ပေါ်သို့ ကျသွားသောအခါ ပြင်းထန်သော ရေပွက်သံကြီးကို ကြားလိုက်ရပြီး ပတ်ဝန်းကျင် တစ်ခုလုံးမှာ ရေကမ္ဘာကြီးအဖြစ် ပြောင်းလဲသွားတော့သည်။ နောက်ကျိနေသော ရေထုထဲတွင် သူသည် အသက်ရှူရန် ကြိုးစားသော်လည်း မရပေ။

သူ၏ အဆုတ်ထဲသို့ ရေများ အတင်းအဓမ္မ စီးဝင်လာပြီး နာကျင်မှုနှင့်အတူ အသက်ရှူလိုစိတ်မှာ ပြင်းပြနေသည်။ သူသည် ရေထဲမှ လွတ်မြောက်ရန် ရုန်းကန်နေသော်လည်း ပိုမို နက်ရှိုင်းသော နေရာသို့သာ နစ်မြုပ်သွားတော့သည်။ အပေါ်မှ လင်းနေသော အလင်းရောင်မှာလည်း တဖြည်းဖြည်း မှေးမှိန်သွားကာ အမှောင်ထုက လွှမ်းမိုးလာသည်။ သူသည် အဆုံးမဲ့ မျှော်လင့်ချက်မဲ့ခြင်းသို့ ရောက်ရှိသွားတော့သည်။

‘ရေတွေက အရမ်းလေးတာပဲ ငါ ထွက်လို့မရဘူး ကယ်ကြပါဦး...’

၎င်းမှာ ကျန်ရှိနေသော သူတော်စင် ခြောက်ဦး ကြားလိုက်ရသည့် နက်ပစ်၏ နောက်ဆုံး စကားပင် ဖြစ်သည်။

ဝေ့ဝူယင်သည် နက်ပစ်၏ လည်ပင်းကို တင်းကျပ်စွာ ညှစ်၍ ကိုင်ထားသည်။ နက်ပစ်မှာ ဝိညာဉ်မရှိသော ရုပ်ကလာပ်အလား ဖြစ်နေပေပြီ။ သူ၏ ခန္ဓာကိုယ်မှာ ရေများဖြင့် ရွှဲနစ်နေ၏။ သူ၏ နှုတ်ခမ်း၊ မျက်လုံး၊ နှာခေါင်းနှင့် နားများမှ ရေများမှာ မြစ်တစ်စင်းအလား စီးထွက်နေသည်။ ၎င်းမှာ သူတော်စင် တစ်ဦး၏ ဖန်တီးခြင်း လျှို့ဝှက်စွမ်းအား ဖြင့် ဖန်တီးထားသော အစစ်အမှန် ရေများ ဖြစ်သည်။ ကျင့်ကြံသူ အများစုအတွက်မူ ၎င်းမှာ ကောင်းကင်ဘုံ ဆေးရည်နှင့် မခြားပေ။

***