အခန်း (၂၁၀၉-၂၁၁၀)

အပိုင်း(၂၁၀၉)

ထန်... ထန်... ဘုန်း...

သတ္တုနှင့် အသားများ၊ သွေးများ ရိုက်ခတ်သံမှာ နယ်မြေတစ်ခုလုံး ပဲ့တင်ထပ်သွားပြီး ပုံရိပ်တစ်ခုမှာ မြန်ဆန်လှသော အရှိန်ဖြင့် မြေပြင်ပေါ်သို့ ကျရောက်သွားကာ ကြီးမားသော ကျင်းကြီးတစ်ခု ဖြစ်ပေါ်သွားတော့သည်။

ဝေ့ဝူယင်မှာ ထိုကျင်းကြီး၏ ဗဟိုတွင် ရှိနေပြီး သူ၏ အခြေအနေမှာ အလွန်ပင် ဆိုးဝါးနေသည်။ သူ၏ ကိုယ်ခန္ဓာတွင် အက်ကွဲရာပေါင်း ထောင်ချီရှိနေပြီး ကြီးမားသော ဒဏ်ရာကြီး ဆယ်ခုမှာ ပါခက်၏ လက်သည်းရာများ ဖြစ်သည်။ ထိုဒဏ်ရာများမှာ အလွန်နက်လှသဖြင့် ပျက်စီးသွားသော အစာအိမ်၊ ကျန်ရှိနေသော အဆုတ်တစ်ဖက်နှင့် အရေပြားမျှင်လေးဖြင့်သာ တွဲလဲခိုနေသော ဘယ်ဘက်ခြေထောက် အပိုင်းအစတို့ကို မြင်တွေ့နေရသည်။ ထို့ပြင် သွေးချင်းချင်းနီနေသော လည်ပင်းမှာလည်း အစွမ်းကုန် ပြန်လည်ကုသနေရသည်။ သူ၏ ကိုယ်ခန္ဓာသာ အဂ္ဂိရတ် ထုတ်ကုန်များဖြင့် အကြိမ်ကြိမ် ပေါင်းစပ်ကျင့်ကြံထားခြင်း မရှိပါက သူသည် ထိုနေရာမှာတင် သေဆုံးသွားနိုင်ပေသည်။

သူ၏ အခြေအနေမှာ အလွန်ပင် ထိတ်လန့်ဖွယ် ကောင်းလှသည်။

"ကျွန်တော် ဒါကို လုပ်နိုင်တယ်..."

ခရာတို၏ အသံမှာ သူ၏ နှလုံးသားထဲတွင် ပဲ့တင်ထပ်လာသည်။ ၎င်းမှာ ခိုင်မာသော ဆုံးဖြတ်ချက်နှင့် မယိုင်လဲသော စိတ်ဓာတ်တို့ဖြင့် ပြည့်နှက်နေသည်။

"..."

ဝေ့ဝူယင်မှာ စကားပြောရန် ပြင်လိုက်ပြီး အိုရီကို ရှေ့တန်းတင်ကာ အခြား ပိုမိုထိရောက်သော နည်းဗျူဟာကို အသုံးပြုရန် သူ၏ လောကနယ်မြေကို ဖြန့်ကျက်ရန် ပြင်လိုက်သည်။ ဤကဲ့သို့ အစွမ်းထက်လှသော တည်ရှိမှုနှင့် ရင်ဆိုင်ရာတွင် သူ၏ အယ်ဖာမူလ လျှို့ဝှက်အင်အား၏ ခံနိုင်ရည်ကို စမ်းသပ်ခြင်းမှာ သူ၏ မူလရည်ရွယ်ချက် ဖြစ်သဖြင့် ၎င်းကို သူက သူရဲဘောကြောင်သည်ဟု မယူဆပေ။

"ကျွန်တော် ဒါကို လုပ်နိုင်တယ်"

ခရာတိုက ခိုင်မာစွာ ထပ်ပြောပြန်၏။ ဝေ့ဝူယင်၏ သွေးစွန်းနေသော မျက်မှောင်များမှာ တွန့်ချိုးသွားသည်။ သူသည် စက္ကန့်ပိုင်းအတွင်း ရောက်ရှိလာတော့မည့် သေဘေးကို ခံစားနေရပြီ ဖြစ်သည်။ သူတော်စင် ပါခက်သည် လာနေပြီ။ သူမသည် သတ်ဖြတ်လိုစိတ်များ ပြင်းထန်နေပြီး သူမ၏ သားကောင် သေဆုံးသည်အထိ အနားယူမည်မဟုတ်ပေ။

"ကျွန်တော် ဒါကို လုပ်နိုင်တယ်လို့"

ခရာတိုက ဟိန်းဟောက်လိုက်၏။

"..."

အိုရီ။

"..."

ဘုရင်။

"..."

ဧဒင်။

ဝိညာဉ်လေးခုအနက် ခရာတိုသည် မာန အကြီးဆုံး ဖြစ်သည်။ သူသည် ငရဲပြည်ဖြစ်စေကာမူ မည်သည့်အရာကမျှ သူ၏ ခြေလှမ်းကို မတားဆီးနိုင်ဟု အပြည့်အဝ ယုံကြည်မှု ရှိထားသည်။ သို့သော်လည်း သူတော်စင် ပါခက်မှာ ၎င်း၏ စွမ်းအားများနှင့် ကိုယ်ပိုင်လက္ခဏာများကို တိုက်ပွဲငယ် အနည်းငယ်အတွင်းမှာပင် နှိမ်နင်းနိုင်ခဲ့သည်။

ကိုယ်ခန္ဓာ အင်အားလား...

ရှုံးသည်။

ကိုယ်ခန္ဓာ အရှိန်လား...

ရှုံးသည်။

ဟင်းလင်းပြင် ကူးပြောင်းမှုလား...

တားဆီးခံရသည်။

ဟင်းလင်းပြင် ပုန်းကွယ်မှုလား...

ထပ်မံ တားဆီးခံရပြန်သည်။

အထူးသဖြင့် အစစ်အမှန် နဂါး တစ်ကောင်အတွက်... မိမိ၏ မစွမ်းဆောင်နိုင်မှုကို ဝန်ခံရခြင်းမှာ အလွန်အရှက်ရဖွယ် ကောင်းလှသည်၊ ဖြစ်သည်။

ဝေ့ဝူယင်သည် သူ၏ စိတ်စွမ်းအင်များကို အသုံးပြုကာ အတွေးများကို အရှိန်မြှင့်လိုက်ပြီး မေးခွန်းတစ်ခုသာ လေးလိုက်၏။

"မင်း ဘာလုပ်နိုင်မှာလဲ..."

တစ်ဖက်တွင်မူ သူတော်စင် ပါခက်သည် သူမ၏ ကိုယ်ခန္ဓာနှင့် ပိုမို အသားကျလာပြီး ၎င်းမှာ သူမအတွက် အလွန်ပင် စိတ်လှုပ်ရှားစရာ ကောင်းနေသည်။

မူလက သူမ၏ ကိုယ်ခန္ဓာမှာ ပြင်းထန်သော ဖိအားများအောက်တွင် ရှိနေပြီး ဓားချက်တစ်ထောင်ဖြင့် အမွှန်းခံရသကဲ့သို့ နာကျင်နေသော်လည်း ယခုမူ အလွန်ပင် နေသာထိုင်သာ ရှိလာခဲ့ပြီ။ ဖြစ်နိုင်သည်က သူမ၏ တိုက်ခိုက်မှုတိုင်းတွင် အင်အား ၁၁၀ ရာခိုင်နှုန်းကို အသုံးပြုနေသဖြင့် ထိုဖိအားများ လျော့ကျသွားခြင်း ဖြစ်နိုင်သည်။ သို့မဟုတ် သူမ၏ လျင်မြန်သော လိုက်လျောညီထွေဖြစ်မှုကြောင့်လည်း ဖြစ်နိုင်သည်။ မည်သို့ပင်ဖြစ်စေ သူမ ပိုမိုသန်မာလာပြီး မြန်ဆန်လာကာ ကောင်းကင်ဘုံနှင့် ပဲ့တင်ထပ်မှုမှာလည်း တိုးပွားလာသည်ကို သူမ သိရှိနေသည်။

သူမ ဟိန်းဟောက်ချင်စိတ် ပေါ်လာသည်။

သူမသည် တွန့်ဆုတ်မနေဘဲ ခေါင်းကိုမော့ကာ သူမ၏ အင်အားအားလုံးကို အသုံးပြု၍ ဟိန်းဟောက်လိုက်တော့သည်။

ဝရား...

ခြင်္သေ့မတစ်ကောင်၏ ဟိန်းဟောက်သံမှာ အံ့ဩစရာ ကောင်းလှသည်။ သူမသည်လည်း ထပ်တူပင် ခံစားနေရသည်။ ဤသည်မှာ ပဲ့တင်ထပ်ဝိညာဉ်အဆင့်ရှိ အထွတ်အထိပ် သူတော်စင်များ ခံစားရသော စွမ်းအားမျိုးလော...။

သူမ ဤအရာကို အဆုံးသတ်ရန် အသင့်ဖြစ်နေပြီ ဖြစ်သည်။ သူမ၏ မျက်ဝန်းများသည် အချိန်၊ အာကာသနှင့် အတားအဆီးအားလုံးကို ဖြတ်ကျော်ကာ ဝေ့ဝူယင်ဆီသို့ စူးစိုက်လိုက်သည်။ ဝေ့ဝူယင်ကို မြင်လိုက်ရသည့် ခဏမှာပင် သူမ၏ နှလုံးသားမှာ တုန်လှုပ်သွားရသည်။

"ငါ နိုင်နိုင်တယ်...."

…

ဧဒင်၊ အိုရီနှင့် ဘုရင်တို့ တိတ်ဆိတ်သွားကြသည်။

နတ်သက်ကြွေ စစ်တလင်းအတွင်းရှိ အရာခပ်သိမ်းသည် ခဏတာမျှ ငြိမ်သက်သွားခဲ့သည်။ ဝေ့ဝူယင်၏ စိတ်၊ ဝိညာဉ်နှင့် နှလုံးသားထဲတွင်မူ နားအက်ကွဲမတတ် တိတ်ဆိတ်မှုတစ်ခုသာ ကြီးစိုးနေ၏။ တိုက်ခိုက်ခဲ့ဖူးသမျှ တိုက်ပွဲများစွာပင် ဝေ့ဝူယင်နှင့် ခရာတိုတို့ နှစ်ဦးတည်း သီးသန့်ဖြစ်နေသည်မှာ ဤသည်မှာ ပထမဆုံးအကြိမ်ပင်။

ဖော်ပြ၍မရသော ရင်းနှီးမှုနှင့် သံယောဇဉ်တစ်ခုမှာ ဝိညာဉ်ချင်းဆက်နွှယ်နေသော အမွှာများကဲ့သို့ပင် ဖြစ်တည်လာခဲ့သည်။ ထိုနှစ်ဦးသည် စိတ်ကူးစိတ်သန်း၊ အတ္တနှင့် အတွေးအမြင်များ တစွန်းတစမျှ ခြားနားခြင်းမရှိဘဲ စိတ်နှလုံးချင်း အပြည့်အဝ ပဲ့တင်ထပ်သွားကြချေပြီ။ ၎င်းမှာ ရှင်းပြ၍မရနိုင်သော ပဲ့တင်ထပ်မှု မျိုးပင်။

ဝေ့ဝူယင်သည် သူ၏ ကျင့်ကြံခြင်းဝိညာဉ်လေးခုနှင့် ကျင့်ကြံခြင်းလမ်းစဉ်ကို စတင်ခဲ့ချိန်မှစ၍ သူတို့၏ စွမ်းအားများကို စမ်းသပ်မှုများ၊ သီအိုရီများနှင့် ရလဒ်များကို အခြေခံ၍ တစ်ဆင့်ချင်း စူးစမ်းခဲ့ခြင်း ဖြစ်သည်။ ဧဒင်၏ မှတ်ဉာဏ် ပြောင်းလဲနိုင်စွမ်းနှင့် ခရာတို၏ ဟင်းလင်းပြင် ပေါ်တယ်များ ဖန်တီးနိုင်စွမ်းတို့ကို ဤနည်းလမ်းဖြင့်ပင် သူ ရှာဖွေတွေ့ရှိခဲ့ခြင်း ဖြစ်သည်။ ၎င်းမှာ ခက်ခဲပြီး အန္တရာယ်များသော လမ်းစဉ်ဖြစ်သော်လည်း သူသည် အံ့အားသင့်ဖွယ် အောင်မြင်မှုများနှင့်အတူ ရဲဝံ့စွာ လျှောက်လှမ်းခဲ့သည်။

ကျင့်ကြံခြင်း ဝိညာဉ်များသည်လည်း ဝေ့ဝူယင်ကဲ့သို့ပင် အစပိုင်း၌ ဗဟုသုတ နည်းပါးခဲ့ကြသော်လည်း ဖြည်းဖြည်းနှင့် မှန်မှန်ပင် သူတို့၏ ကြီးမားသော စွမ်းအားများကို နက်နက်ရှိုင်းရှိုင်း စူးစမ်းခဲ့ကြသည်။ ထိုအချက်တွင် သူတို့သည် ကျင့်ကြံသူများနှင့် မခြားနားသော်လည်း စွမ်းအားများကို အသုံးပြုရာတွင်မူ ပိုမိုကျွမ်းကျင်ပြီး လွယ်ကူလှသည်။ ဧဒင်၊ ခရာတို၊ အိုရီနှင့် ဘုရင်တို့သည်လည်း မိမိတို့ ဘာလုပ်နိုင်သည်၊ ဘာမလုပ်နိုင်သည်ကို လုံးဝမသိရှိဘဲ ဝေ့ဝူယင်အား စမ်းသပ်ခွင့် ပေးခဲ့ရသည့် အချိန်များ ရှိခဲ့ဖူးသည်။

ဝေ့ဝူယင်က သူတို့ကို လိုအပ်သကဲ့သို့ပင်၊ သူတို့ကလည်း ဝေ့ဝူယင်ကို လိုအပ်ကြသည်။

အမွေခံ အပြစ်သား တစ်ယောက် ဖြစ်လာပြီးနောက် ဝေ့ဝူယင်သည် သူ၏ ဝိညာဉ်လေးခုမှာ အသိဉာဏ်ရှိသော သက်ရှိမျိုးနွယ်များကဲ့သို့ပင် ကိုယ်ပိုင် ကျင့်ကြံခြင်း လမ်းစဉ်များကို လျှောက်လှမ်းနေကြကြောင်း မကြာခဏ သတိပြုမိခဲ့သည်။ အထူးသဖြင့် ကပ်ဘေးများကို ရင်ဆိုင်ခြင်း၊ အဆင့်တက်ခြင်းနှင့် ဆင့်ကဲပြောင်းလဲခြင်းများကို ကိုယ်တိုင်ဦးဆောင်ကာ ကောင်းကင်ကို ဖီဆန်သည့် ခြေလှမ်းတိုင်းအတွက် ကြိုတင်ပြင်ဆင်ခဲ့ကြခြင်း ဖြစ်သည်။ ကျင့်ကြံသူများကဲ့သို့ပင် သူတို့သည်လည်း တစ်ခါတစ်ရံ မိမိကိုယ်ကို အထင်ကြီးခြင်း သို့မဟုတ် အထင်သေးခြင်းများ ရှိခဲ့ပြီး ဝေ့ဝူယင်အနေဖြင့် သူ၏ ကိုယ်ပိုင်ဉာဏ်စွမ်းဖြင့် ထိုအခက်အခဲများမှ သီသီလေး လွတ်မြောက်ခဲ့ရသည်များလည်း ရှိခဲ့သည်။

ဤသည်မှာ ဝေ့ဝူယင်အတွက် သိသာထင်ရှားသော အကျိုးကျေးဇူး ဖြစ်သော်လည်း အခြားသူများ မသိနိုင်သည်က ၎င်းမှာ သူနှင့် သူ၏ ဝိညာဉ်များအတွက် အကြီးမားဆုံးသော အားနည်းချက်လည်း ဖြစ်နေခြင်းပင်။ ပုံမှန်အားဖြင့် ကျင့်ကြံသူများသည် မိမိတို့၏ ကျင့်ကြံခြင်းဝိညာဉ်များ ဘာလုပ်နိုင်သည်၊ ဘာဖြစ်သည်ကို ဗီဇအရ သိရှိနားလည်ကြပြီး ၎င်း၏ လျှို့ဝှက်ချက်များကို တဖြည်းဖြည်း တူးဖော်နိုင်ကြသည်။

သို့သော် မကြာသေးမီ အချိန်အထိ ဝေ့ဝူယင်နှင့် ဧဒင်တို့ နှစ်ဦးစလုံးသည် ဧဒင်၏ စွမ်းအားကို အာကာရှစ် စွမ်းအင်ဟု မခေါ်ဘဲ ဧဒင်စွမ်းအင်ဟုသာ ခေါ်ဆိုခဲ့ကြသည်။ ၎င်းမှာ ကျင့်ကြံခြင်းဝိညာဉ်နှင့် ကျင့်ကြံသူများအကြား ပုံမှန်အားဖြင့် မရှိသင့်သော အသိပညာ နည်းပါးမှုပင် ဖြစ်သည်။

လွန်ခဲ့သော အချိန်ကာလ အတော်ကြာက ဝေ့ဝူယင်သည် ထိုအံ့ဩစရာကောင်းသော ခံစားချက်ကို တစ်ကြိမ် ခံစားခဲ့ဖူးသည်။ မိုးကုပ်စက်ဝိုင်း မူလ အဆင့်သို့ ရောက်ရှိရန် ဆင့်ကဲပြောင်းလဲနေစဉ်အတွင်း သူ၏ ဝိညာဉ်တစ်ခုချင်းစီမှာ တာအို တစ်ခုစီကဲ့သို့ ဖြစ်နေသည်ကို သူ ခံစားခဲ့ရသည်။ ထိုစဉ်က သူ၏ အသိနည်းမှုကြောင့် ဖြစ်ပေါ်လာသော အသိပင်ဖြစ်သော်လည်း ထိုအချိန်က သူတို့၏ စွမ်းအားများမှာ တာအိုများကဲ့သို့ပင် ကျယ်ပြောနက်ရှိုင်းလှသည်မှာ အမှန်ပင်။

ထိုအရာက... ဝေ့ဝူယင်၏ ကျင့်ကြံခြင်း လမ်းစဉ်တွင် မမြင်ရသော်လည်း လောကကြီးကဲ့သို့ လေးလံလှသော အကြီးမားဆုံးသော ချို့ယွင်းချက် ဖြစ်နေခဲ့သည်။

သို့သော်လည်း ယခုအချိန်တွင်၊ ငြိမ်သက်တိတ်ဆိတ်နေသော ဤစက္ကန့်ပိုင်းအတွင်း၌ ဝေ့ဝူယင်သည် ထိုကွဲကွာနေသော အတိုင်းအတာကြီးမှာ အတင်းအကျပ် ဖြိုဖျက်ခံလိုက်ရသကဲ့သို့ ခံစားလိုက်ရသည်။

ဝေ့ဝူယင်သည် ခရာတို၏ စိတ်ခံစားချက်တိုင်းကို ခံစားနေရသည်။ အကြိမ်ကြိမ် နောက်တန်းသို့ ပို့ခံထားရမှုကြောင့် ဖြစ်ပေါ်နေသော စိတ်ပျက်အားလျော့မှုများ၊ မိသားစုထဲတွင် အငယ်ဆုံးနှင့် အားအနည်းဆုံး ဝိညာဉ်အဖြစ် တိုက်ပွဲများ၌ သွားလာရေးနှင့် ပုန်းကွယ်ရေး ကိရိယာတစ်ခုအဖြစ်သာ အသုံးချခံနေရသည့်အတွက် ဖြစ်ပေါ်နေသော အတွင်းပိုင်း ဒေါသများ၊ နှင့် စစ်မှန်သော ပြိုင်ဘက်များကို အနိုင်မယူနိုင်ခဲ့မှုအပေါ် ခံစားနေရသည့် မကျေနပ်မှုများ အားလုံးကို ဝေ့ဝူယင် ခံစားလိုက်ရသည်။

ဝေ့ဝူယင်သည် အစစ်အမှန် နဂါးတစ်ကောင်၏ နှလုံးသား၊ အဆုံးမဲ့သော မာန်မာနနှင့် အောင်နိုင်ရေး၊ အထွတ်အထိပ်ရောက်ရေးနှင့် တိုက်ပွဲများအတွက် မယိုင်လဲသော စိတ်ဓာတ်တို့ကို ခံစားလိုက်ရသည်။ ဝေ့ဝူယင်သည် သူ၏ အင်ပါယာ ဥပဒေသ မျိုးစေ့ ဖြစ်ပေါ်လာမှုမှာ ဘုရင်ကြောင့် မဟုတ်ဘဲ ခရာတိုကြောင့် ဖြစ်သည်ကို ယခုမှသာ သဘောပေါက်လိုက်တော့သည်။

ခရာတိုအနေဖြင့် မိမိကိုယ်ကို အသုံးမဝင်ဟု ခံစားခဲ့ရသည်မှာ ဤသည်မှာ ပထမဆုံးအကြိမ် မဟုတ်ပေ။ လွန်ခဲ့သော အချိန်များက ဧဒင်၊ အိုရီနှင့် ဘုရင်တို့သည် ခရာတို မိမိကိုယ်ကို သက်သေပြနိုင်ရန် နောက်ဆုတ်ပေးခဲ့သည့် အချိန်များ ရှိခဲ့သည်။ ထိုစဉ်က ဝေ့ဝူယင်သည် တိုက်ပွဲများတွင် အိုရီနှင့် ဘုရင်တို့ကိုသာ ပိုမိုအသုံးပြုခဲ့ပြီး အိုရီ၏ ဘက်စုံအသုံးဝင်မှုကြောင့် ၎င်းကို ပို၍ အားကိုးခဲ့သည်။ ထို့အပြင်... ခရာတိုမှာ အခြားဝိညာဉ်များထက်စော၍ လျှို့ဝှက် ဒဏ္ဍာရီ အမှတ်အသားတွင် သေမျိုးတာအို၏ အထွတ်အထိပ်သို့ ရောက်ရှိခဲ့သဖြင့် ဝေ့ဝူယင်၏ အားအကောင်းဆုံး လက်နက်ဖြစ်ခဲ့သော်လည်း အမြဲတမ်း နောက်တန်းသို့သာ ပို့ဆောင်ခံခဲ့ရသည်။

ဝေ့ဝူယင်သည် ဟင်းလင်းပြင် မီးတောက်များကို ဘယ်နှစ်ကြိမ် အသုံးပြုခဲ့ဖူးသနည်း။

ယခုအခါတွင်မူ ဝေ့ဝူယင်သည် ထိုစဉ်က ခရာတို ခံစားခဲ့ရသော ပြင်းထန်သော စိတ်ခံစားချက်အားလုံးကို အဆပေါင်း ထောင်ချီ၍ ခံစားနေရလေတော့သည်။

***

အပိုင်း(၂၁၁၀)

‘ငါ မင်းကို လျစ်လျူရှုခဲ့မိတာပဲ...’

ဝေ့ဝူယင်သည် သူ၏ ဝိညာဉ်ထဲတွင် ဖော်ပြ၍မရအောင် နာကျင်မှုကို ခံစားလိုက်ရသည်။ အိုရီ၊ ဧဒင်နှင့် ဘုရင်တို့မှာမူ အမြဲတမ်း ပါဝင်ကူညီနေရသဖြင့် လျစ်လျူရှုခံရသည်ဟု မခံစားခဲ့ရပေ။ အထူးသဖြင့် ဘုရင်သည် လိုအပ်မှသာ အသုံးပြုခံရသဖြင့် ၎င်း၏ ထက်မြက်မှုနှင့် ရည်ရွယ်ချက် ပြင်းထန်မှုမှာ ပိုမိုမြင့်မားလာခဲ့သည်။ ၎င်းကို အိမ်ထဲမှ ထုတ်လိုက်သည့်အခါတွင် လောကကြီးမှာ ၎င်း၏ ဆေဘာသွားအောက်၌ ပျက်စီးသွားရစမြဲ။

အိုရီနှင့် ဧဒင်တို့မှာမူ အထူးသဖြင့် အဂ္ဂိရတ်ဆေးဖော်စပ်ရာတွင် အမြဲတမ်း အသုံးပြုခံနေရသည်။ အထူးသဖြင့် အီလီစီယမ် အသေးပေါ်တွင် တစ်ကိုယ်တည်း ဆယ့်ခုနစ်နှစ်ကြာ ကျင့်ကြံနေစဉ်အတွင်း ဖြစ်သည်။

သို့သော်လည်း ထိုနည်းတူပင် ခရာတိုသည်လည်း ဝေ့ဝူယင်၏ အတွေးများ၊ ရည်ရွယ်ချက်များနှင့် စိတ်နေစိတ်ထားများကို ပိုမိုနက်ရှိုင်းစွာ ခံစားလိုက်ရသည်။ ဝေ့ဝူယင်အနေဖြင့် သူတို့၏ အားသာချက် တစ်ခုစီကို ပေါ်လွင်စေရန် ဂရုတစိုက် ကြိုးစားခဲ့မှုများ၊ သူတို့ထဲမှ မည်သူမျှ မေ့လျော့မခံရစေရန် အစွမ်းကုန် ကြိုးစားခဲ့မှုများ...

ပထမဆုံးအကြိမ်အဖြစ် ခရာတိုသည် ဝေ့ဝူယင်၏ ဘက်မှ အမြင်ကို မြင်တွေ့သွားခဲ့သည်။

‘ကျွန်တော် အခု နားလည်ပါပြီ...’

ခရာတိုသည်လည်း သူ၏ ဝိညာဉ်ထဲတွင် ထပ်တူပင် နာကျင်မှုကို ခံစားလိုက်ရသည်။ ၎င်းသည် တစ်ကိုယ်ကောင်းဆန်ခဲ့ပြီး မမျှတသော အငြိုးအတေးများကို မွေးမြူခဲ့မိသည်။

သူတို့ နှစ်ဦးသည် ယခင်ကထက် ပိုမို နီးကပ်သွားခဲ့ကြသည်။

‘ဒါက ဒီလိုခံစားချက်မျိုးလား...’

ဝေ့ဝူယင်နှင့် ခရာတိုတို့ နှစ်ဦးစလုံးသည် မိုးကုပ်စက်ဝိုင်း မူလအဆင့်ရှိ ဝိညာဉ်တစ်ခုကို ပိုင်ဆိုင်ရခြင်း၏ အဓိပ္ပာယ်ကို ပထမဆုံးအကြိမ် သိရှိသွားခဲ့ကြသည်။ ၎င်းမှာ ကျင့်ကြံခြင်းဝိညာဉ်နှင့် ကျင့်ကြံသူအကြား လုံးဝကွဲပြားပြီး ပိုမိုမြင့်မားသော ရင်းနှီးမှုအဆင့်တွင် ချိတ်ဆက်ထားခြင်းပင်။

ရုတ်တရက် အရာအားလုံးမှာ ရှင်းလင်းသွားသည်။ ဝေ့ဝူယင်၏ အသိစိတ်ပင်လယ်သည် သူ၏ ဟင်းလင်းပြင် နဂါး လျှို့ဝှက်အမြုတေအတွင်းရှိ ကမ္ဘာနှင့် နက်ရှိုင်းစွာ ချိတ်ဆက်သွားပြီး လျှို့ဝှက်ဒဏ္ဍာရီအမှတ်အသားနှင့်လည်း အံ့ဩဖွယ်ကောင်းအောင် ဆက်နွယ်သွားလေသည်။ ထိုလုပ်ငန်းစဉ်မှာ မမျှော်လင့်ဘဲ ရရှိလိုက်သော ဉာဏ်အလင်းပွင့်မှုကဲ့သို့ပင်။

ပထမဆုံးအကြိမ်အဖြစ် ဟင်းလင်းပြင် နဂါး လျှို့ဝှက်အမြုတေ၊ လျှို့ဝှက်ဒဏ္ဍာရီအမှတ်အသားနှင့် ဝေ့ဝူယင်၏ အစစ်အမှန် ဟင်းလင်းပြင်နဂါး သွေးမျိုးဆက်တို့သည် အတူတကွ ပဲ့တင်ထပ်သွားပြီး အလွန်တိုးညင်းသော ဟိန်းဟောက်သံတစ်ခုကို ထုတ်လွှတ်လိုက်သည်။

ဝရား...

တစ်ချိန်တည်း၌... သူတော်စင် ပါခက်၏ မြင့်တက်လာသော အရှိန်အဝါမှာ မတားဆီးနိုင်သကဲ့သို့ သူမ၏ တိုက်ခိုက်မှုမှာလည်း ထိုနည်းတူပင်။ သူမသည် စိတ်လှုပ်ရှားမှုကြောင့် ဟိန်းဟောက်ရန် အချိန်အနည်းငယ် ယူခဲ့သော်လည်း သူမ၏ တိုက်ခိုက်မှုမှာမူ စက္ကန့်ပိုင်းလေးအတွင်းမှာပင် ဖြစ်ပွားခဲ့ခြင်း ဖြစ်သည်။

နတ်သက်ကြွေ စစ်တလင်းတစ်ခုလုံးမှာ အက်ကွဲရာများမှ ရွှေရောင်ကောင်းကင်အလင်းတန်းများ ယိုစီးကျနေပြီး လေထုကြီးကို သတ္တုအဖြစ် ပြောင်းလဲပစ်နေသည့် ကမ္ဘာပျက်ကိန်းကြီး ဆိုက်နေသကဲ့သို့ပင်။

အစောပိုင်းက သူတော်စင် ပါခက်သည် ကောင်းကင်သတ္တုဥပဒေသနယ်မြေကို ဟင်းလင်းပြင်နှင့် အာကာသဒိုင်မန်းရှင်း သုံးခုလုံးအား ရိုက်ခတ်လိုက်ပြီး ဝေ့ဝူယင်ကို ဟင်းလင်းပြင်ထဲမှ အတင်းအကျပ် ထွက်လာအောင် လုပ်ဆောင်ခဲ့သည်။

၎င်းမှာ သူမ၏ ဗီဇအရ တိုက်ခိုက်မှုဖြစ်သော်လည်း အလွန်ပင် ထိရောက်ခဲ့သကဲ့သို့ သူမ၏ အင်အားများကိုလည်း များစွာ ကုန်ဆုံးစေခဲ့သည်။ သို့သော် ထိုလုပ်ဆောင်ချက်ကြောင့် စစ်တလင်းတစ်ခုလုံးမှာ ရွှေရောင်သတ္တုအလင်းတန်းများ ယိုစီးကျနေသော ကောင်းကင်သတ္တု ရောင်စဉ်နယ်မြေအဖြစ် ပြောင်းလဲသွားခဲ့သည်။

သူမသည် မရည်ရွယ်ဘဲ မိမိအတွက် အခြေအနေကောင်းတစ်ခုကို ဖန်တီးလိုက်ခြင်းဖြစ်ပြီး ဗီဇတစ်ခုတည်းဖြင့်ပင် မကြုံစဖူးသော စွမ်းရည်တစ်ခုကို အကောင်အထည်ဖော်လိုက်ခြင်း ဖြစ်သည်။ ၎င်းမှာ "ကောင်းကင်နယ်မြေ" ပင် ဖြစ်သည်။ ၎င်းမှာ မပြည့်စုံသေးသော်လည်း သူမ၏ အင်အားနှင့် ကောင်းကင်အရှိန်အဝါတို့မှာ အဆက်မပြတ် မြင့်တက်နေပြီး အခြားသော ဥပဒေသများကိုမူ ဖိနှိပ်ထားလေသည်။ အပြင်လောကရှိ အထွတ်အထိပ် ရှန့်ထိုများသာ ဤအချက်ကို သိရှိပါက ပါခက်၏ ပါရမီကြောင့် အံ့အားသင့်သွားကြမည်မှာ အသေအချာပင်။

သူမသည် ဥပဒေသတစ်ခု၏ အဓိက အာဏာ ကို နားလည်ထားသော သူတော်စင် တစ်ဦးဖြစ်သည်ကို ထည့်တွက်လျှင်ပင် ဥပဒေသများကို ထိန်းချုပ်ခြင်းနှင့် ဖွံ့ဖြိုးတိုးတက်စေခြင်းတွင် သူမမှာ နတ်ဆိုးတစ်မျှ ပါရမီပါလှသည်မှာ အမှန်ပင်။ စစ်မှန်သော ပါရမီရှင်တစ်ဦးပင် ဖြစ်သည်။

ယခုအခါတွင်မူ သူမ၏ ခန္ဓာကိုယ်တစ်ခုလုံးမှာ ရွှေစင်ခဲကြီးကဲ့သို့ ဖြစ်နေသည်။ သူမ၏ မျက်နှာသွင်ပြင်ကို ခွဲခြားရန် ခက်ခဲလှပြီး လှပသည်ဟု သိနိုင်သော်လည်း လူသားတစ်ယောက်ထက် ရွှေရောင်နတ်ဘုရားရုပ်တုတစ်ခုနှင့် ပိုတူနေသည်။ သူမ၏ ဦးခေါင်းမှာပင် တစ်ခါတစ်ရံ ခြင်္သေ့မတစ်ကောင်နှင့် တူနေသေး၏။

ဝေ့ဝူယင်သည် သူ၏ ကိုယ်ခန္ဓာပေါ်သို့ ကျရောက်လာသော ပြင်းထန်လှသော ဖိအားများကို ခံစားနေရသည်။

နဂါးစွမ်းအားဖြင့် အားဖြည့်ထားသော သူ၏ ကောင်းကင်ဘုံ နတ်မျက်လုံးများများသည် အရှိန်အဟုန်ဖြင့် ချဉ်းကပ်လာသော သူမ၏ ပုံရိပ်ကို ကြည့်လိုက်သည်။ ပထမဆုံးအကြိမ်အဖြစ် သူမ၏ လှုပ်ရှားမှုများကို သူ မြင်လိုက်ရသည်။ သူ ခိုင်မာစွာ ရပ်တန့်လိုက်ပြီး ပါခက်၏ ကန်ချက်ကို လက်မောင်းနှစ်ဖက်အား ကြက်ခြေခတ်ကာ ကာကွယ်လိုက်သည်။

သူတော်စင် ပါခက်သည် မည်သည့် အရာမှချန်မထားဘဲ သူမ၏ အားအကောင်းဆုံး စွမ်းအားဖြင့် ကန်လိုက်ခြင်း ဖြစ်သည်။ ၎င်းမှာ ကြယ်စုတန်းများကိုပင် ချက်ချင်း ဖျက်ဆီးပစ်နိုင်သည့် အင်အားမျိုးပင်။

ဘုန်း...

ဝေ့ဝူယင်၏ ကိုယ်ခန္ဓာတစ်ခုလုံးမှာ သူမ၏ ရွှေရောင်ခြေထောက်ကြောင့် ထိခိုက်သွားရပြီး ရွှေရောင်အလင်းတန်းများမှာ သူ့အပေါ်သို့ ဖုံးလွှမ်းသွားခဲ့သည်။ သူ၏ ကိုယ်ပေါ်ရှိ နဂါးအကြေးခွံတိုင်းမှာ ကြေမွသွားကာ အရေပြားများမှာလည်း နေရာအနှံ့ ပေါက်ပြဲသွားခဲ့ပြီး သူ၏ အပေါ်ဝတ်ရုံမှာလည်း အဝတ်စုတ်များအဖြစ် ပြောင်းလဲသွားခဲ့သည်။ သူ၏ ကိုယ်ခန္ဓာတစ်ခုလုံးမှာ ဖျက်ဆီးခံလိုက်ရသည်။

သို့သော်လည်း... သူ နောက်သို့ တစ်လှမ်းမျှ မဆုတ်ခဲ့ပေ။

တစ်လှမ်းမျှပင် မဆုတ်ခဲ့...။

"မင်းရဲ့ ယုံကြည်မှုက ဘယ်ကလာသလဲဆိုတာ ငါ နောက်ဆုံးတော့ နားလည်သွားပြီ"

သူ၏ နဂါးအရိုးစု အပြင်ဘက်အလွှာမှာ လွင့်ထွက်သွားစဉ် ဝေ့ဝူယင်က အသံတိုးတိုးဖြင့် ပြောလိုက်သည်။ ဗီဇအရ ခရာတိုသည် မိမိ နိုင်နိုင်သည်ဟု ခံစားခဲ့ရသည်။ သို့သော် ဝေ့ဝူယင်က အကြိမ်ကြိမ် ကြိုးစားခဲ့သော်လည်း ရှုံးနိမ့်ခဲ့သည်။ ထိုစဉ်က ခရာတို၏ ယုံကြည်မှုကို သူ နားမလည်နိုင်ခဲ့ပေ။

သို့သော်လည်း အခုတော့... သူ နားလည်သွားလေပြီ။

ခရာတိုမှာ အစစ်အမှန် နဂါးတစ်ကောင်၊ ကမ္ဘာဦးသားရဲတစ်ကောင်ဖြစ်ပြီး ဗီဇအတိုင်းသာ လုပ်ဆောင်ခြင်း ဖြစ်သည်။ ထို့ကြောင့် ၎င်းသည် ဝေ့ဝူယင်အား သူ၏ စွမ်းရည်များကို ရှင်းလင်းစွာ မပြောပြနိုင်ခဲ့ခြင်းပင်။ ဗီဇကို ရှင်းပြရန်မှာ အလွန်ပင် ခက်ခဲလှသည်။

ယခုအခါ ဝေ့ဝူယင်၏ လျှို့ဝှက်အမြုတေ၊ ဒဏ္ဍာရီအမှတ်အသားနှင့် သွေးမျိုးဆက်တို့မှာ ပေါင်းစည်းသွားသကဲ့သို့ ခံစားနေရပြီး ထိုဗီဇများကို သူ၏ သိစိတ်ပင်လယ်ထဲတွင် ခံစားနေရသည်။ ၎င်းတို့မှာ ခရာတို၏ ဗီဇများသာ မဟုတ်တော့ဘဲ သူ၏ ဗီဇများလည်း ဖြစ်လာခဲ့ချေပြီ။

"..."

သူတော်စင် ပါခက်မှာ တုန်လှုပ်သွားရသည်။ သူမ၏ ကန်ချက်တွင် အကန့်အသတ်မရှိသော ကောင်းကင်သတ္တုစွမ်းအားများ ပါဝင်နေပြီး သူမ၏ မပြည့်စုံသော ကောင်းကင်နယ်မြေကြောင့်လည်း ယခင်ကထက် ပိုမိုသန်မာနေသည်ဟု ခံစားနေရသည်။ သို့သော် ဝေ့ဝူယင်က သူမ၏ တိုက်ခိုက်မှုကို သူ၏ ကိုယ်ခန္ဓာတစ်ခုတည်းဖြင့်သာ ကြံ့ကြံ့ခံနိုင်ခဲ့သည်။ သူ၏ အကြေးခွံများမှာ ပြုတ်ထွက်သွားသော်လည်း သူ၏ အရှိန်အဝါမှာ ယခင်အတိုင်း အေးဆေးတည်ငြိမ်နေဆဲ ဖြစ်နေခြင်းမှာ အံ့ဩစရာပင်။

သို့သော် သူမ၏ တုန်လှုပ်မှုမှာ ခဏသာ ဖြစ်သည်။ သူမ လှပစွာ လှည့်ပတ်လိုက်ပြီး ဝေ့ဝူယင်၏ သွေးချင်းချင်းနီနေသော ဝမ်းဗိုက်ကို ထပ်မံ ကန်လိုက်ပြန်သည်။

ဘုန်း...

မိုးကြိုးသံကဲ့သို့ပင် ဝေ့ဝူယင်မှာ ထပ်မံ၍ ကန်ခံလိုက်ရပြီး သူ၏ ကိုယ်ခန္ဓာမှ မီးခိုးရောင် နဂါးသွေးများမှာ ကောင်းကင်ယံသို့ မိုင်ပေါင်းများစွာ လွင့်စဉ်သွားခဲ့သည်။ သူ၏ ခြေဖဝါးအောက်ရှိ မြေပြင်မှာလည်း အက်ကွဲရာပေါင်းများစွာ ဖြစ်ပေါ်သွားခဲ့သည်။

သို့သော် သူသည် မယိုင်မလဲ ဆက်လက် ရပ်တည်နေဆဲပင်။

သွေးချင်းချင်းနီနေသော ဝေ့ဝူယင်သည် အနည်းငယ် လှုပ်ရှားလိုက်ပြီး လူသားတစ်ယောက်နှင့် မတူတော့သော ပါခက်၏ ရွှေရောင်မျက်ဝန်းများကို စိုက်ကြည့်လိုက်သည်။ သူ၏ မျက်ဝန်းများမှာ အလွန် သန့်စင်သော အဂ္ဂိရတ် ကြယ်တာရာများ မဟုတ်တော့ဘဲ ငွေရောင်အစစ်အမှန် နဂါးမျက်ဝန်းများအဖြစ် ပြောင်းလဲသွားချေပြီ။

သူတော်စင် ပါခက်သည် နှလုံးသားထဲတွင် ရှင်းပြ၍မရသော တုန်လှုပ်မှုကို ခံစားလိုက်ရသည်။ သူမသည် ရူးသွပ်စွာပင် အော်ဟစ်လိုက်ပြီး အဆက်မပြတ် ရိုက်နှက်၊ ကန်ကျောက်ကာ လက်သည်းများဖြင့် ကုတ်ခြစ်တော့သည်။ ကောင်းကင်နှင့် မြေပြင်တစ်ခုလုံးမှာ နဂါးသွေးများဖြင့် လူးဟပ်သွားတော့၏။ တိုက်ခိုက်မှုတိုင်းတွင် ကောင်းကင်ဘုံ၏ စွမ်းအားများ ပါဝင်နေသည်။

ဝေ့ဝူယင်မှာမူ လောကကြီး ပျက်စီးနေသော်လည်း...သူ၏ ကိုယ်ခန္ဓာ၊ အရိုးများနှင့် ကလီစာများ ဆိုးဝါးစွာ ပျက်စီးနေသော်လည်း... မယိုင်မလဲ ရှိနေဆဲပင်။ သူတော်စင် ပါခက်မှာ ဝေ့ဝူယင်၏ ကိုယ်ခန္ဓာ အစိတ်အပိုင်းများကို တူးထုတ်နေသကဲ့သို့ပင်။

ဤအခြေအနေမှာ နှစ်စက္ကန့်မျှ ကြာမြင့်ခဲ့သည်။

‘ဒါပဲပေါ့...’

ဝေ့ဝူယင်၏ မျက်ဝန်းများမှာ ရုတ်တရက် ကျယ်သွားပြီး သူ၏ ဝိညာဉ်မှာ ခရာတိုနှင့်အတူ ပဲ့တင်ထပ်သွားတော့သည်။

သေမျိုးဒဏ္ဍာရီအမှတ်အသား နှင့် လျှို့ဝှက်ဒဏ္ဍာရီအမှတ်အသား တို့၏ ခြားနားချက်မှာ အဘယ်နည်း။ သေမျိုးတာအိုနှင့် လျှို့ဝှက်တာအိုတို့၏ ခြားနားချက်မျှသာလော။ ထိုမျှလောက် ရိုးရှင်းပါသလော။

မဟုတ်ပေ...။

ဝေ့ဝူယင်သည် လျှို့ဝှက်ဒဏ္ဍာရီအမှတ်အသား၏ ပထမအဆင့်သို့ မကြာသေးမီကမှ ရောက်ရှိခဲ့သော်လည်း ခရာတို၏ ဗီဇကို ခံစားလိုက်ရသည့် အချိန်အထိ ၎င်း၏ စစ်မှန်သော စွမ်းရည်များကို မသိရှိခဲ့ပေ။

ထိုခြားနားချက်မှာ စကားလုံးနှစ်လုံးသာ ဖြစ်သည်။

"အသွင်ပြောင်းလဲခြင်း..."

နှင့်...

"ခြေချခြင်း..."

ကောင်းကင်ဘုံ၏ စွမ်းအားများ ဖုံးလွှမ်းထားသော သူတော်စင် ပါခက်သည် ပထမဆုံးအကြိမ်အဖြစ် ကြောက်ရွံ့မှုကို ခံစားလိုက်ရသည်။ အချိန်၊ အာကာသနှင့် ဟင်းလင်းပြင်တို့ ငြိမ်သက်သွားသကဲ့သို့ ခံစားလိုက်ရပြီး သူမ၏ ကိုယ်ခန္ဓာမှာလည်း တောင့်တင်းသွားခဲ့သည်။

ဝေ့ဝူယင်သည် သူ၏ အစစ်အမှန်ျ ဟင်းလင်းပြင်နဂါး လျှို့ဝှက်သွေးမျိုးဆက်၏ အနက်ရှိုင်းဆုံးသော စွမ်းအားကို ထုတ်ယူလိုက်သည်။

ခရာတို၏ အသံနှင့် သူ၏ အသံတို့မှာ တစ်ထပ်တည်း ကျသွားပြီး ဟိန်းဟောက်လိုက်တော့သည်။

"နဂါး ခြေချခြင်း..."