အခန်း (၃၆၇)

အခန်း။ ၃၆၇

ယခုအချိန်တွင် လီမြစ်စခန်းမြို့တော်၏ လက်နက်ကိုင်တပ်ဖွဲ့အားလုံးနီးပါးကို စစ်မြေပြင်သို့ ထုတ်နှုတ်အသုံးချထားပြီး ဖြစ်သည်။

အကယ်၍ ဤစစ်အင်အားနှင့်မှ ဇွန်ဘီဘုရင်၏ ကျူးကျော်မှုကို မဟန့်တားနိုင်ပါက လီမြစ်စခန်းမြို့တော်မှာ သေချာပေါက် ပျက်စီးခြင်းသို့ ရောက်ရတော့မည်ဖြစ်သည်။

သူတို့မှာ စက်မှုယန္တရားတပ်ဖွဲ့များ ဖြစ်သည့်အပြင် မြို့ရှေ့ရှိ လမ်းမများကိုလည်း စခန်းမြို့တော်က ကြိုတင်ရှင်းလင်းထားပြီးဖြစ်သဖြင့် ချီတက်နှုန်းမှာ အလွန်ပင် လျင်မြန်လှသည်။

ဝုန်း... ဝုန်း...

သို့သော်လည်း စစ်ယာဉ်များ၏ ဟိန်းဟောက်သံမှအပ တပ်ဖွဲ့တစ်ခုလုံးမှာ ထူးဆန်းစွာ တိတ်ဆိတ်နေပြီး သတ်ဖြတ်လိုသော အငွေ့အသက်များဖြင့် ပြည့်နှက်နေသည်။

တစ်ခဏချင်းမှာပင် လုချွမ်းထိန်းချုပ်ထားသော ဇွန်ဘီရေလှိုင်းနှင့် လူသားစစ်တပ်တို့သည် အမည်းရောင်နှင့် အစိမ်းရောင် လှိုင်းလုံးကြီးနှစ်ခုကဲ့သို့ တစ်ဖက်နှင့်တစ်ဖက် အရှိန်အဟုန်ဖြင့် တိုးဝင်လာကြတော့သည်။

အချိန်အတန်ကြာပြီးနောက် နောက်ဆုံးတွင် ရှေ့တန်းမှ ကင်းထောက်ပျံသန်းနေသော ရဟတ်ယာဉ်အဖွဲ့ထံမှ သတင်းစကား ရောက်ရှိလာသည်။

"ပစ်မှတ်ကို တွေ့ပါပြီ ပစ်မှတ်ကို တွေ့ပါပြီ နှစ်ဖက်အကွာအဝေး ၃ မိုင် သာ လိုပါတော့တယ်"

နောက်တန်းရှိ ကွပ်ကဲမှုယာဉ်ပေါ်တွင် သတင်းရရှိလိုက်သော အဆင့်မြင့်စစ်ဦးစီးမှူး၏ တင်းမာလှသော မျက်နှာထက်၌ ပြင်းထန်သော အရိပ်အယောင်များ ဖြတ်ပြေးသွားသည်။

သူသည် ဆက်သွယ်ရေးစက်ကို ချက်ချင်းကောက်ကိုင်လိုက်ပြီး အသံကျယ်ကျယ်ဖြင့် အမိန့်ပေးလိုက်သည်။

"အမြောက်တပ်ဖွဲ့တွေ အမြောက်နေရာယူကြ အချိန်မရွေး ပစ်ခတ်နိုင်အောင် ပြင်ထားစမ်း သက်ဆိုင်ရာ စစ်သည်အားလုံး တစ်မိနစ်အတွင်း ကားပေါ်ကဆင်းပြီး ခံစစ်အတားအဆီးတွေ တည်ဆောက်ကြ"

"ဆင့်ကဲပြောင်းလဲသူအဖွဲ့ အားလုံး ကားပေါ်ကဆင်းပြီး အခြေအနေကြည့်ပြီး လှုပ်ရှားကြ။ ရန်သူ့ဘက်က ဆင့်ကဲပြောင်းလဲထားတဲ့ ဇွန်ဘီတွေ ခံစစ်ကို ဖောက်မထွက်နိုင်အောင် အဓိကထား တားဆီးကြ။ အခွင့်သာရင် ဇွန်ဘီဘုရင်ကို ဝိုင်းပြီး အမဲလိုက်ဖို့ ပြင်ထား"

"တစ်ချိန်တည်းမှာပဲ ရဟတ်ယာဉ်အဖွဲ့က ဇွန်ဘီရေလှိုင်းကို ပထမဆုံး စတင်တိုက်ခိုက်ရမယ်။ ခဲယမ်းမီးကျောက်တွေကို နှမြောမနေနဲ့။ အကုန်လုံးကို အမှုန့်ဖြစ်အောင် ချေမှုန်းပစ်လိုက်ကြစမ်း"

"ဟုတ်ကဲ့ပါခင်ဗျာ"

အမိန့်ထွက်လာသည်နှင့်တစ်ပြိုင်နက် ငြိမ်သက်နေသော တပ်ခွဲများအားလုံး လှုပ်ရှားတုံ့ပြန်ကြတော့သည်။

ယာဉ်တန်း၏ အလယ်တွင်ရှိသော ကိုယ်ပိုင်တွန်းအားသုံး အမြောက်များသည် နေရာအသီးသီးသို့ လျင်မြန်စွာ ခွဲထွက်သွားပြီး အမြောက်တပ်တည်နေရာများကို စတင်ပြင်ဆင်ကြသည်။

တစ်မိနစ်ခန့် ချီတက်ပြီးနောက် စစ်သုံးထရပ်ကားများမှာ တစ်စီးပြီးတစ်စီး ရပ်တန့်သွားကြပြီးစစ်သည်အင်အား အမြောက်အမြားမှာ ကားပေါ်မှဆင်း၍ ထရပ်ကားများကို အသုံးပြုကာ သိပ်သည်းလှသော ခံစစ်စည်းကို တည်ဆောက်လိုက်ကြသည်။

ရှေ့တန်းမှ ပျံသန်းနေသော ရဟတ်ယာဉ်အဖွဲ့သည် အမြင့်ကို လျင်မြန်စွာ လျှော့ချလိုက်ပြီး ဆင့်ကဲပြောင်းလဲသူများမှာ ကြိုးဖြင့်လျှောဆင်းကာ မြေပြင်ပေါ်တွင် စုရုံးလိုက်ကြသည်။

ထို့နောက် ရဟတ်ယာဉ်အဖွဲ့သည် ကောင်းကင်ယံသို့ ပြန်လည်ပျံတက်သွားပြီး ဇွန်ဘီရေလှိုင်းရှိရာဆီသို့ ဦးတည်သွားတော့သည်။

လီမြစ်စခန်းမြို့တော်ဘက်မှ ဇွန်ဘီရေလှိုင်းကို ရှာဖွေတွေ့ရှိပြီး မကြာမီမှာပင် လုချွမ်းသည်

လည်း လျင်မြန်သော ဇွန်ဘီရုပ်သေးများဖြစ်သည့် လျှပ်စီး ၁ နှင့် ပျံသန်းသူ ၁ တို့၏ အကူအညီဖြင့် ချဉ်းကပ်လာနေသော လီမြစ်စခန်းမြို့တော် တပ်ဖွဲ့များကို ရှာဖွေတွေ့ရှိသွားခဲ့သည်။

"ငါ့ကိုတားချင်တယ်ပေါ့... မင်းတို့မှာ အဲဒီလောက် အစွမ်းရှိမရှိ ကြည့်ရသေးတာပေါ့"

လုချွမ်းက အေးစက်စွာ ပြုံးလိုက်သည်။ စခန်းမြို့တော်နှင့် နီးကပ်နေပြီဖြစ်ရာ သူတို့ဘက်က ရိပ်မိသွားခြင်းကို သူ မအံ့ဩပေ။

ထို့နောက် လုချွမ်း၏ ယာဉ်တန်းမှာ ရပ်တန့်သွားပြီး သူ၏ ထိန်းချုပ်မှုအောက်ရှိ ပတ်ဝန်းကျင်မှ ဇွန်ဘီရေလှိုင်းကြီးမှာမူ အရှိန်မြှင့်၍ ရှေ့သို့ တိုးဝင်သွားတော့သည်။

ဝူး...

တစ်ချိန်တည်းမှာပင် ယာဉ်တန်းအတွင်းရှိ မီးလျှံ ၁ သည် မီးဝိညာဉ်ခန္ဓာကို ထုတ်ဖော်လိုက်ပြီး တောက်လောင်နေသော မီးလျှံများနှင့်အတူ ကောင်းကင်ယံသို့ လျင်မြန်စွာ ခုန်တက်သွားခဲ့သည်။

မကြာမီမှာပင် လုချွမ်းသည် ချဉ်းကပ်လာနေသော ရဟတ်ယာဉ်များကို မြင်လိုက်ရသည်။ အစီးရေ ၂၀ ကျော်ရှိသော အုပ်စုကြီးမှာ လီမြစ်စခန်းမြို့တော်၏ ရဟတ်ယာဉ်အားလုံးနီးပါးကို စေလွှတ်ထားခြင်းပင်။

စစ်မြေပြင် မှတ်တမ်းတင်စက်မှတစ်ဆင့် နီးကပ်လာသော ဇွန်ဘီရေလှိုင်းကို ကြည့်ရင်း နောက်တန်းမှ စစ်ဦးစီးမှူးက ချက်ချင်း အမိန့်ပေးလိုက်သည်။

"ပစ်ခတ်ကြ"

ရှုး... ရှုး... ရှုး...

ချက်ချင်းဆိုသလိုပင် ရဟတ်ယာဉ်များမှ စတင်တိုက်ခိုက်ကြတော့သည်။ ဒုံးကျည်များသည် မြွေနဂါးများကဲ့သို့ မီးလျှံများကို မှုတ်ထုတ်လျက် ဇွန်ဘီရေလှိုင်းကြီးဆီသို့ တဟုန်ထိုး ပြေးဝင်သွားတော့သည်။

ဤမြင်ကွင်းကို မြင်လိုက်ရသည်နှင့် ကောင်းကင်ယံ၌ ပျံသန်းနေသော မီးလျှံ ၁ က ချက်ချင်း လှုပ်ရှားလိုက်သည်။ သူသည် မီးတောက်နေသော သူ၏လက်မောင်းကို ဝှေ့ယမ်းလိုက်ရာ ကျရောက်လာသော ဒုံးကျည်မိုးနှင့် ဇွန်ဘီရေလှိုင်းကြားတွင် အနီရဲရဲ မီးလျှံတံတိုင်းကြီးတစ်ခု ရုတ်တရက် ဖြစ်ပေါ်လာတော့သည်။

၎င်းမှာ ပြင်းထန်သော မီးတောက်များဖြင့် ဖွဲ့စည်းထားသည့် ဧရာမ မီးတံတိုင်းကြီးဖြစ်ပြီး အောက်ခြေရှိ ဇွန်ဘီရေလှိုင်းတစ်ခုလုံးနီးပါးကို ဖုံးလွှမ်းသွားစေသည်။

ဘုန်း... ဘုန်း... ဘုန်း...

ဒုံးကျည်များသည် မီးတံတိုင်းကြီးအတွင်းသို့ အရှိန်ဖြင့် တိုးဝင်သွားကြပြီး စူးရှသော အလင်းတန်းများ၊ မိုးထစ်ချုန်းသံကဲ့သို့ ပေါက်ကွဲသံများနှင့်အတူ ပွင့်ထွက်ကုန်ကြသည်။ ပြင်းထန်လှသော အပူလှိုင်းများကြောင့် မီးတံတိုင်းကြီးမှာ တုန်ရင်သွားပြီး အက်ကြောင်းများဖြစ်ကာ လျင်မြန်စွာ ပြိုကွဲသွားခဲ့သော်လည်း ဒုံးကျည်များအားလုံးမှာလည်း ထိုနေရာ၌ပင် အကုန်အစင် ပေါက်ကွဲသွားခဲ့ရာ ဇွန်ဘီရေလှိုင်းအထိ တစ်ခုမျှ ရောက်ရှိမလာခဲ့ပေ။

လုချွမ်းသည် ရဟတ်ယာဉ် အစီး ၂၀ ကျော်ကို အေးစက်စွာ စိုက်ကြည့်နေသည်။

နောက်တစ်ခဏတွင် မီးလျှံ ၁ သည် ကြယ်တံခွန်တစ်ခုအသွင် ပြောင်းလဲသွားပြီး ရှေ့သို့ တဟုန်ထိုး ပြေးဝင်သွားတော့သည်။

မျက်စိတစ်မှိတ်အတွင်းမှာပင် သူသည် ရဟတ်ယာဉ်အဖွဲ့ထံသို့ ရောက်ရှိသွားခဲ့သည်။

ရဟတ်ယာဉ်မောင်းများမှာ တုံ့ပြန်ရန်ပင် အချိန်မရလိုက်မီမှာပင် မီးလျှံ ၁ က သူတို့ထံသို့ ဝင်တိုက်လိုက်တော့သည်။

ဝုန်း...

ပေါက်ကွဲသံများ အဆက်မပြတ် ထွက်ပေါ်လာသည်။ မီးလျှံ ၁ သည် လျှပ်စီးတန်းတစ်ခုကဲ့သို့ ရဟတ်ယာဉ်တစ်စင်းပြီးတစ်စင်းကို လျင်မြန်စွာ ထိုးဖောက်သွားခဲ့ရာ ရဟတ်ယာဉ်များမှာ ချက်ချင်းပင် ပေါက်ကွဲကာ ပျက်စီးကုန်ကြသည်။

ကောင်းကင်ယံတစ်ခုလုံး မီးတောက်မီးလျှံများ ဆက်တိုက်ဆိုသလို ပေါက်ကွဲထွက်ပေါ်လာပြီး ရုပ်ပျက်ဆင်းပျက် ပျက်စီးသွားသော ရဟတ်ယာဉ်များသည် မီးခိုးများနှင့် မီးလျှံများကို တန်းစီလျက် ပေါက်ကွဲသံများနှင့်အတူ အောက်ခြေသို့ ထိုးဆင်းပျက်ကျကုန်ကြတော့သည်။

"တောက်... "

စစ်မြေပြင် မှတ်တမ်းတင်စက်၏ မြင်ကွင်းမှာ မှောင်အတိကျသွားသည်ကို မြင်လိုက်ရသောအခါ အဆင့်မြင့်စစ်ဦးစီးမှူးများသည် ဒေါသတကြီး ဆဲဆိုလိုက်ကြသည်။ ဝေးကွာသော ကောင်းကင်ယံ၌ မီးလျှံများ ပေါက်ကွဲနေသည်ကို ကြည့်ရင်း သူတို့၏ မျက်နှာများမှာ အလွန်ပင် ခက်ထန်နေတော့သည်။

ထို့နောက် အဆင့်မြင့်စစ်ဦးစီးမှူးများသည် အမြောက်တပ်ဖွဲ့ထံသို့ ချက်ချင်း ဆက်သွယ်လိုက်သည်။

"ငါ့အမိန့်ကို နာခံကြ... ပစ်ခတ်ကြစမ်း"

ဘုန်း... ဘုန်း... ဘုန်း...

ချက်ချင်းဆိုသလိုပင် အမြောက်တပ်တည်နေရာတစ်ခုလုံး ဟိန်းဟောက်သွားပြီး ဧရာမအမြောက်ကျည်ဆန်ကြီးများသည် ကောင်းကင်ယံ၌ ပါရာဘိုလာပုံစံ အကွေးတိုက်ကာ ဇွန်ဘီရေလှိုင်းကြီးအတွင်းသို့ ထိုးဆင်းသွားတော့သည်။

ဘုန်း ဘုန်း... ဘုန်း

ရှေ့တန်းစစ်မြေပြင်တွင် လုချွမ်းသည် ကျရောက်လာသော အမြောက်ကျည်များကို သတိပြုမိလိုက်သော်လည်း ကြားဖြတ်တားဆီးရန် နောက်ကျသွားခဲ့ပြီဖြစ်ရာ ဇွန်ဘီရေလှိုင်းကြီးအတွင်း၌ ပေါက်ကွဲမှုများ အဆက်မပြတ် ဖြစ်ပေါ်လာတော့သည်။

မည်းမှောင်နေသော ဇွန်ဘီပင်လယ်ကြီးအတွင်း၌ မီးလျှံများ ပေါက်ကွဲထွက်ပေါ်လာပြီး အမြောက်ကျည်တစ်စင်းစီသည် ၁၀ မီတာပတ်လည်ရှိ ဇွန်ဘီများကို အပိုင်းပိုင်းအပြတ်ပြတ်

ဖြစ်အောင် ဆွဲဖြတ်သွားသလို မီတာ ၁၀၀ ပတ်လည်ရှိ ဇွန်ဘီများကိုလည်း လွင့်စင်သွားစေသည်။ ဇွန်ဘီရေလှိုင်းကြီးအတွင်း၌ စက်ဝိုင်းပုံစံ ကွက်လပ်ကြီးများ ဖြစ်ပေါ်လာတော့သည်။

လုချွမ်းကမူ ဤမြင်ကွင်းကို အေးစက်စွာသာ ကြည့်နေသည်။ ၎င်းတို့မှာ အသေခံစစ်သည်များသာ ဖြစ်သဖြင့် သေသည်ဖြစ်စေ၊ ရှင်သည်ဖြစ်စေ သူ ဂရုမစိုက်ပေ။

ထို့နောက် ဇွန်ဘီရေလှိုင်းကြီးသည် အမြောက်ဒဏ်ကို ကြံ့ကြံ့ခံရင်း လုချွမ်း၏ ထိန်းချုပ်မှုအောက်တွင် လူသားတို့၏ ခံစစ်စည်းဆီသို့ တဟုန်ထိုး ချဉ်းကပ်သွားတော့သည်။

တစ်ချိန်တည်းမှာပင် လီမြစ်စခန်းမြို့တော်မှ ဆင့်ကဲပြောင်းလဲသူအဖွဲ့တစ်ဖွဲ့သည် နောက်တန်းရှိ ယာဉ်တန်းအနီးသို့ လျှို့ဝှက်စွာ ချဉ်းကပ်လာခဲ့ကြသည်။

ပျံသန်းသူ ၁ ၏ အကဲခတ်မှုကြောင့် လုချွမ်းသည် ဤခိုးကြောင်ခိုးဝှက် လာသူများကို ကြိုတင်သိရှိနေပြီး သူ၏ နှုတ်ခမ်းအစုံမှာ လှောင်ပြောင်သရော်သည့်အလား ကွေးတက်သွားသည်။

ငါ့ကို အရင်ဖြုတ်ချချင်တာလား။ ငါ့ရဲ့ ဇွန်ဘီရုပ်သေးတွေကို အရင်ကျော်ဖြတ်နိုင်အောင် ကြိုးစားဦးမှပေါ့။

ချက်ချင်းဆိုသလိုပင် တာ့ဖန့်၊ လျှပ်စီး ၁ နှင့် အခြားသော ဇွန်ဘီရုပ်သေးများသည် အဖွဲ့နှစ်ဖွဲ့ခွဲကာ လမ်းဘေးဝဲယာရှိ တောအုပ်များအတွင်းသို့ ပြေးဝင်သွားကြသည်။

"သတ်ကြဟေ့"

သူတို့ကို ရိပ်မိသွားပြီဖြစ်ကြောင်း သိလိုက်ရသောအခါ ဆင့်ကဲပြောင်းလဲသူများသည် ဆက်လက်ပုန်းအောင်းမနေတော့ဘဲ ယာဉ်တန်းရှိရာသို့ ပြေးဝင်တိုက်ခိုက်ကြတော့သည်။

သို့သော်လည်း ဤဆင့်ကဲပြောင်းလဲသူများမှာ အလွန်ဆုံး အဆင့် ၃ မျှသာ ရှိကြရာ အဆင့် ၄ နှင့် ၅ ရှိသော ဇွန်ဘီရုပ်သေးများကို ဘယ်လိုလုပ် ရင်ဆိုင်နိုင်မှာလဲ။

"အား... "

တိုက်ပွဲစတင်သည်နှင့် တစ်ဖက်သတ် သတ်ဖြတ်ပွဲကြီး ဖြစ်သွားတော့သည်။ မကြာမီမှာပင် နာကျင်စွာ အော်ဟစ်သံများမှာ ရုတ်ချည်း ရပ်တန့်သွားပြီး ပတ်ဝန်းကျင်တစ်ခုလုံး ပြန်လည် တိတ်ဆိတ်သွားခဲ့သည်။

"ဆုတ်ကြ ဆုတ်ကြစမ်း"

ရှေ့တန်းစစ်မျက်နှာတွင် ဇွန်ဘီရေလှိုင်း၏ အရှိန်အဟုန်ကြောင့် ခံစစ်စည်းမှာ ပြိုကွဲလုနီးပါး ဖြစ်နေပြီဖြစ်သည်။

မှတ်တမ်းတင်စက်ပေါ်တွင် ဆင့်ကဲပြောင်းလဲသူအဖွဲ့၏ ပုံရိပ်များ ပျောက်ကွယ်သွားသည်ကို မြင်လိုက်ရသောအခါ အဆင့်မြင့်စစ်ဦးစီးမှူးများသည် ဇွန်ဘီဘုရင်ကို မြို့ပြင်တွင် ရင်ဆိုင်

တိုက်ခိုက်ရန် ယုံကြည်မှု ကုန်ဆုံးသွားခဲ့ပြီး သူတို့၏ တပ်ဖွဲ့များကို အမြန်ဆုံး ဆုတ်ခွာရန် အမိန့်ပေးလိုက်တော့သည်။

ဤမြင်ကွင်းကို ကြည့်ရင်း လုချွမ်းက အေးစက်စွာ ပြုံးလိုက်သည်။

"ဟင်း... ဒီနေ့တော့ ငါ့ရဲ့ ဇွန်ဘီဘုရင် အမျက်ဒေါသကို မင်းတို့ မြည်းစမ်းစေရမယ်"