အခန်း (၃၆၄)

အခန်း။ ၃၆၄

ကျောက်လင်း၏ စကားကို ကြားလိုက်ရသောအခါ ပြေးထွက်လာကြသည့် ယွီဟွားဂိုဏ်းအဖွဲ့ဝင်အားလုံး မှင်တက်သွားကြသည်။

"ဟားဟားဟား... "

ခဏချင်းမှာပင် လူတိုင်းက လှောင်ပြောင်သရော်သော လေသံများဖြင့် ဝိုင်းဝန်းရယ်မောကြတော့သည်။

စောစောက ဂိတ်ဝရှိ ကင်းစောင့်တစ်ဦးက အပြေးအလွှား သတင်းလာပို့ရာတွင် ရန်သူကျူးကျော်လာကြောင်း ထိုသူမှာ အလွန်အစွမ်းထက်သော ဆင့်ကဲပြောင်းလဲသူဖြစ်ကြောင်းနှင့် ကျန်းစီမင်တို့အဖွဲ့ကိုပင် ဖမ်းဆီးထားကြောင်း ပြောကြားခဲ့သည်။

ထိုသတင်းကို ကြားရသောအခါ သူတို့သည် ကြီးမားသော ခြိမ်းခြောက်မှုတစ်ခုနှင့် ရင်ဆိုင်ရတော့မည့်အလား အသင့်ပြင်ထားခဲ့ကြသော်လည်း ယခု လူကိုယ်တိုင် မြင်တွေ့လိုက်ရချိန်တွင်မူ သူတို့ အလွန်အမင်း တွေးပူခဲ့မိကြောင်း သိလိုက်ရသည်။

ဤမိန်းမက ကြီးမားသော ရန်သူမဟုတ်ဘဲ စိတ်မနှံ့သူတစ်ယောက်သာ ဖြစ်ရမည်။

"တကယ် ရယ်စရာကောင်းတာပဲ။ မင်းလို မိန်းမတစ်ယောက်က ငါ့ရဲ့ ယွီဟွားဂိုဏ်းမှာ ခေါင်းဆောင်လုပ်ချင်တယ် ဟုတ်လား ငါ့ကို အသုံးမကျတဲ့ ဂိုဏ်းချုပ်လို့ တကယ်ပဲ ထင်နေတာလား"

ထိုအချိန်တွင် အုပ်စုကို ဦးဆောင်လာသော လူငယ်က ကျောက်လင်းကို ကြည့်ကာ ရိုင်းစိုင်းစွာ ပြောဆိုလိုက်သည်။

ထိုလူငယ်သည် အနက်ရောင် သားရေဂျာကင်ကို ဝတ်ဆင်ထားပြီး အရပ်ရှည်ကာ ထွားကြိုင်းသန်မာသည်။ သူ၏ ခါးပတ်တွင် ကျည်ဆန်ခါးပတ်နှင့် ဆင်တူသော အရာတစ်ခု ပတ်ထားသော်လည်း ကျည်ဆန်များအစား လက်ဝါးခန့်ရှိသော သံပစ်ဓားများကို ချိတ်ဆွဲထားသည်။

သူသည် ယွီဟွားဂိုဏ်း၏ ဂိုဏ်းချုပ် ချန်ယွီဖြစ်ပြီး တွေ့တွေ့ချင်းမှာပင် သူ၏ ရာထူးကို လုယူရန် ကြိုးစားနေသော ကျောက်လင်း၏ အမူအရာကို အလွန်ပင် မကျေမနပ် ဖြစ်နေသည်။

"ဘာတွေ ရယ်နေကြတာလဲ ငါက အမှန်တရားကိုပဲ ပြောနေတာ။ မင်းတို့လို အသုံးမကျတဲ့ အုပ်စုကို ငါ လက်ဝါးနဲ့ ရိုက်ရုံနဲ့တင် ရှင်းပစ်လို့ရတယ်။ အဲဒီအချိန်ကျရင် ငါကလွဲလို့ ဘယ်သူက ဂိုဏ်းချုပ်နေရာမှာ ထိုင်နိုင်ဦးမှာလဲ"

သူတို့၏ လှောင်ပြောင်မှုများကြားတွင် ကျောက်လင်း၏ မျက်နှာမှာ အေးစက်မြဲ အေးစက်နေပြီး အထင်သေးသော လေသံဖြင့် ပြန်လည် တုံ့ပြန်လိုက်သည်။

စောစောက သူမသည် ရှေ့တွင်ရှိသော လူ ၃၀ ကျော်ကို အကဲခတ်ကြည့်ရာ အဆင့် ၃ ဆင့်ကဲပြောင်းလဲသူ နှစ်ဦးသာ ရှိပြီး ကျန်သူများမှာ အဆင့် ၁ နှင့် ၂ များသာ ဖြစ်ကြသည်။ သူတို့မှာ ထည့်တွက်စရာပင် မလိုပေ။

အဆင့် ၄ ဆင့်ကဲပြောင်းလဲသူ ဖြစ်နေသော ကျောက်လင်းအတွက် သူတို့မှာ အသုံးမကျသူများမှလွဲ၍ အခြားမဟုတ်ပေ။

"ရဲတင်းလှချည်လား မင်းလို မိန်းမတစ်ယောက်က တော်တော်ကို ရဲတင်းလွန်းတယ်။ ငါ့ရဲ့ ယွီဟွားဂိုဏ်းဝင်တွေကို ဒီလိုလုပ်ထားပြီးတာတောင် ထွက်မပြေးဘဲ အိမ်ပေါက်ဝအထိ လိုက်လာတာကတော့ တကယ်ကို အတော့်ကို လွန်လွန်းသွားပြီ"

"ဒီနေ့တော့ ငါ ချန်ယွီကိုယ်တိုင် မင်းလို မိန်းမမျိုးကို သင်ခန်းစာ ပေးရတော့မယ်"

ချန်ယွီသည် ဒေါသအလိပ်လိပ် ထွက်လာပြီး မျက်လုံးများ နီရဲလျက် အော်လိုက်သည်။ သူ၏ စိတ်အာရုံ စေခိုင်းမှုနှင့်အတူ လျှပ်စစ်သံလိုက်အားများ ပေါက်ကွဲ၍ ထွက်ပေါ်လာပြီး ခါးတွင် ချိတ်ထားသော အေးစက်စူးရှသည့် သံပစ်ဓားများသည် လေထုကို ခွဲထွက်ကာ လျှပ်စီးတန်းများအသွင်ဖြင့် ကျောက်လင်းထံသို့ တဟုန်ထိုး ပြေးဝင်သွားတော့သည်။

တစ်ချိန်တည်းမှာပင် ချန်ယွီသည် အေးစက်ခက်ထန်သော အကြည့်များဖြင့် လက်ထဲမှ တိုက်ပွဲဝင်ဓားကို ကျစ်ကျစ်ပါအောင် ဆုပ်ကိုင်ကာ အံ့ဩဖွယ်ရာ အရှိန်အဟုန်ဖြင့် ကျောက်လင်းထံသို့ လူကိုယ်တိုင်ပါ ပြေးဝင်တိုက်ခိုက်တော့သည်။

"ဟင်း"

ချန်ယွီမှာ အဆင့် ၃ ဆင့်ကဲပြောင်းလဲသူမျှသာ ဖြစ်သဖြင့် ကျောက်လင်းက သူ့ကို အရေးပင်မလုပ်ပေ။ သူမသည် အေးစက်စွာ နှာခေါင်းရှုံ့လိုက်ပြီး လက်ထဲမှ စတီးဓားကို လေထဲတွင် လျင်မြန်စွာ အကြိမ်ကြိမ် ဝှေ့ယမ်းလိုက်ရာ ဓားလေအရှိန်ကြောင့် လေထုထဲတွင် ကြက်ခြေခတ်ပုံစံ အမှတ်အသားများပင် ထင်ကျန်ရစ်ခဲ့သည်။

ချွင်... ချွင်... ချွင်...

မမျှော်လင့်ဘဲ ချန်ယွီ ထိန်းချုပ်ပစ်လွှတ်လိုက်သော သံပစ်ဓားများအားလုံးက ကျောက်လင်း၏ စတီးဓားနှင့် တစ်ခုမကျန် ထိမှန်သွားပြီး သတ္တုချင်း ထိခိုက်သံများနှင့်အတူ လွင့်စင်သွားကြတော့သည်။

"သေစမ်း"

အနားသို့ ရောက်ရှိလာသော ချန်ယွီသည် အံ့အားသင့်သွားသော်လည်း အရှိန်ရနေပြီဖြစ်သဖြင့် နောက်မဆုတ်တော့ဘဲ အံကြိတ်ကာ သူ၏ တိုက်ပွဲဝင်ဓားဖြင့် ကျောက်လင်းကို ပြင်းထန်စွာ ပိုင်းချလိုက်သည်။

သို့သော် နောက်တစ်ခဏတွင် ကျောက်လင်း၏ လှုပ်ရှားမှုက ပိုမိုမြန်ဆန်နေခဲ့သည်။ သူမ၏ စတီးဓားသည် လေထုကို ဖြတ်သန်းကာ လျင်မြန်စွာ ကန့်လန့်ဖြတ် ပိုင်းလိုက်သည်။

ချွင်...

ရင်ထဲတုန်သွားလောက်သော သတ္တုချင်းရိုက်ခတ်သံနှင့်အတူ ချန်ယွီ၏ လက်ထဲမှ ဓားမှာ လွင့်ထွက်သွားတော့သည်။

ဝုန်း….

"အား... "

ထိတ်လန့်တုန်လှုပ်နေသော ချန်ယွီမှာ ဘာမျှပင် မတုံ့ပြန်နိုင်မီမှာပင် ကျောက်လင်း၏ ပြင်းထန်သော ကန်ချက်တစ်ခုကြောင့် နာကျင်စွာ အော်ဟစ်လျက် လွင့်စင်သွားရတော့သည်။

"ဂိုဏ်းချုပ်"

လူအုပ်ထဲသို့ လွင့်စင်လာသော ချန်ယွီကို ဂိုဏ်းဝင်များက ပျာပျာသလဲ ဝိုင်းဝန်းကာ ဖမ်းထိန်းပေးလိုက်ကြသည်။

"ညီအစ်ကိုတို့... တိုက်ကြစမ်း ဂိုဏ်းချုပ်အတွက် တိုက်ကြ... အဟွတ် အဟွတ်"

ရင်ဘတ်တစ်ခုလုံး ပြင်းထန်စွာ နာကျင်နေသဖြင့် မျက်နှာတစ်ခုလုံး ရှုံ့မဲ့နေသော ချန်ယွီသည် ဂိုဏ်းသားများ၏ တွဲကူမှုဖြင့် မတ်တပ်ရပ်ရင်း ဒေါသတကြီးဖြင့် ကျောက်လင်းကို လက်ညှိုးထိုးကာ အသက်ပင် မနည်းရှူနေရရှာသည်။

"သတ်ဟေ့"

ဂိုဏ်းချုပ်၏ အမိန့်ပေးသံအဆုံးတွင် အနားရှိ ဆင့်ကဲပြောင်းလဲသူအမြောက်အမြားမှာ ဟိန်းဟောက်၍ ကျောက်လင်းထံသို့ ပြေးဝင်တိုက်ခိုက်ကြတော့သည်။

"အား... အား... "

ခဏချင်းမှာပင် နာကျင်စွာ အော်ဟစ်သံများမှာ အဆုံးမရှိ ပဲ့တင်ထပ်သွားပြီး ရှေ့သို့ ပြေးတက်လာသော ဂိုဏ်းသားများမှာ ကျောက်လင်း၏ သံလက်သီးအောက်တွင် ဝက်ဝက်ကွဲအောင် ခံလိုက်ရတော့သည်။

စက္ကန့်အနည်းငယ်အကြာတွင် ယွီဟွားဂိုဏ်းအဖွဲ့ဝင်အားလုံးမှာ မြေပြင်ပေါ်တွင် ဖရိုဖရဲ လဲကျနေကြပြီး နာကျင်လွန်းသဖြင့် ညည်းတွားသံများသာ ထွက်ပေါ်နေတော့သည်။

"မင်း... မင်း... မင်း... "

ရင်ဘတ်ကို ဖိကာ ခန္ဓာကိုယ်ကို ကိုင်းထားရသော ချန်ယွီသည် သူ့ထံသို့ လျှောက်လှမ်းလာသော ကျောက်လင်းကို ကြည့်ကာ မျက်နှာတစ်ခုလုံး ထိတ်လန့်တုန်လှုပ်သွားပြီး အလိုလိုပင် နောက်သို့ တရွတ်တိုက် ဆုတ်ခွာမိသွားသည်။

"ဒီနေ့ကစပြီး ငါက ယွီဟွားဂိုဏ်းရဲ့ ဂိုဏ်းချုပ်ပဲလို့ ငါပြောခဲ့တယ်။ ဘယ်သူများ ကန့်ကွက်စရာရှိသေးလဲ"

ကျောက်လင်းသည် မြေပြင်ပေါ်တွင် လဲကျနေသော ချန်ယွီနှင့် ဂိုဏ်းသားများကို အေးစက်စွာ တစ်ချက်ကြည့်လိုက်ပြီး တည်ငြိမ်စွာ မေးလိုက်သည်။

"မရှိ... မရှိပါဘူး ဂိုဏ်းချုပ်။ ဒီနေ့ကစပြီး အရှင်က ကျွန်တော်တို့ရဲ့ ခေါင်းဆောင်ပါ။ ယွီဟွားဂိုဏ်းတစ်ခုလုံး အရှင်ခိုင်းတာကိုပဲ နားထောင်ပါ့မယ်"

ကျောက်လင်း၏ ဖိအားပေးလှသော အကြည့်အောက်တွင် သေဘေးကို ကြောက်လန့်သွားသည့် ချန်ယွီသည် နောက်ဆုံးတွင် လက်ရှိအခြေအနေကို လက်ခံလိုက်ရပြီး ပျာပျာသလဲ ပြောလိုက်တော့သည်။

"ဂိုဏ်းချုပ်"

"ဂိုဏ်းချုပ်ကို ဂါရဝပြုပါတယ် ခင်ဗျာ"

"ဂိုဏ်းချုပ်..."

အခြားသော ဆင့်ကဲပြောင်းလဲသူများသည်လည်း မနည်းရုန်းထပြီးနောက် သူတို့၏ ခေါင်းဆောင်ဟောင်းကိုယ်တိုင် ဒူးထောက်သွားသည်ကို မြင်သောအခါ ချက်ချင်းပင် လက်နက်ချအညံ့ခံလိုက်ကြပြီး ရှေ့သို့တိုးကာ သစ္စာခံကြောင်း ပြောဆိုကြတော့သည်။

ဤမြင်ကွင်းကို ကြည့်ရင်း ကျောက်လင်း၏ မျက်နှာတွင် အားရကျေနပ်သော အပြုံးတစ်ခု ပေါ်လာတော့သည်။

သူမအနေဖြင့် ယွီဟွားဂိုဏ်း၏ ခေါင်းဆောင်ဖြစ်ရန် ကြိုးပမ်းရခြင်းမှာ သူမကိုယ်ပိုင် ဆင့်ကဲပြောင်းလဲမှု အဖွဲ့အစည်းတစ်ခု တည်ထောင်ရန် အခြေခံအုတ်မြစ် ချလိုသောကြောင့်ပင်။

အကယ်၍သာ ကောင်းမွန်စွာ ဖွံ့ဖြိုးတိုးတက်လာပါက နောင်တစ်ချိန်တွင် လူသားစခန်းမြို့တော်တစ်ခုခုနှင့် ပူးပေါင်းခွင့်ရရှိခဲ့လျှင် သူမကိုယ်သူမ ရာထူးကြီးကြီးမားမား ရရှိအောင် မြှင့်တင်နိုင်မည်ဖြစ်သည်။ ဤနည်းဖြင့် လူသားခေါင်းဆောင်တစ်ဦး ဖြစ်လာစေရန် သူမ၏ ရည်မှန်းချက်အတွက် မြင့်မားသော စတင်ခြင်းအမှတ်တစ်ခုကို ရရှိနိုင်မည် ဖြစ်သည်။

ထို့နောက် ကျောက်လင်းသည် သူမ၏ လက်အောက်ငယ်သားများ ဝန်းရံလျက် ဗီလာအိမ်ရာဝင်းအတွင်းသို့ ဝင့်ကြွားစွာ လျှောက်လှမ်း၍ ဝင်ရောက်သွားတော့သည်။

ရှစ်စွမ်းမြို့…

ကျိရုရွှယ်မှာ ဘေးကင်းစွာဖြင့် ပြန်လည်နိုးကြားလာခဲ့ပြီ ဖြစ်သည်။

ချီချီလေးတစ်ယောက် အပြည့်အဝ ပြန်လည်သက်သာလာပြီဖြစ်ကြောင်း မြင်သောအခါ လုချွမ်းသည် လူသားအရာရှိများကို လက်စားချေရန် ပြင်းပြသောဆန္ဒဖြင့် ရှစ်စွမ်းမြို့မှ ချက်ချင်းထွက်ခွာရန် ဆုံးဖြတ်လိုက်တော့သည်။

ဂျိမ်း...

ယာဉ်တန်းရှည်ကြီးမှာ မြို့ပြင်သို့ ဖြည်းညင်းစွာ မောင်းနှင်ထွက်ခွာလာသည်။ လုချွမ်းသည် ရှေ့ခန်းတွင် ထိုင်ရင်း နဂါးပျံတပ်ဖွဲ့ထံမှ ရရှိခဲ့သော မြေပုံကို ကိုင်ဆောင်ထားကာ လီမြစ်စခန်းမြို့တော်ဟု အမှတ်အသားပြုထားသော နေရာကို စူးစိုက်၍ ကြည့်နေသည်။

ယခုအချိန်တွင် ယာဉ်တန်းမှာ လီမြစ်စခန်းမြို့တော်ဆီသို့ ဦးတည်ကာ မောင်းနှင်နေခြင်းပင်။

ယာဉ်တန်းမှာ မြို့လေးမှ ဖြည်းဖြည်းချင်း ထွက်ခွာလာသည်နှင့်အမျှ အနီးအနားရှိ ဇွန်ဘီအားလုံးကို လုချွမ်းက ဇွန်ဘီရုပ်သေးများအဖြစ် ပြောင်းလဲလိုက်ပြီး ၎င်းတို့ကို ထိန်းချုပ်ကာ ယာဉ်တန်းနောက်မှ နဂါးနက်ကြီးတစ်ကောင်ကဲ့သို့ တန်းစီ၍ လိုက်ပါစေသည်။

ထို့နောက် လမ်းတစ်လျှောက် တွေ့ရှိသမျှ ဇွန်ဘီမှန်သမျှကိုလည်း လုချွမ်းက ဇွန်ဘီရုပ်သေးများအဖြစ် ဆက်တိုက်ဆိုသလို ပြောင်းလဲပစ်ရာ အရေအတွက်မှာ လျင်မြန်စွာပင် တိုးပွားလာတော့သည်။ မကြာမီမှာပင် ယာဉ်တန်း၏နောက်တွင် ဇွန်ဘီရေလှိုင်းငယ်လေးတစ်ခု ဖြစ်ပေါ်လာခဲ့သည်။

လုချွမ်း၏ ထိန်းချုပ်မှုအောက်တွင် ထိုဇွန်ဘီရေလှိုင်းကြီးမှာ ထူးဆန်းစွာပင် တိတ်ဆိတ်ငြိမ်သက်နေပြီး အုပ်စုလိုက် သိပ်သည်းစွာ ချီတက်နေပုံမှာ ကြည့်ရသူကို အလွန်ပင် ဖိအားပေးနိုင်သလို အသက်ရှူလည်းကျပ်စေသည်။

နောက်ခန်းတွင် ထိုင်နေသော ကျိရုရွှယ်သည် သူတို့နောက်မှ လိုက်ပါလာသော ဇွန်ဘီရေလှိုင်းကြီးကို ကြည့်ကာ စိတ်ထဲမှ အချို့သောအရာများကို ခန့်မှန်းမိသွားသည်။ ထို့နောက် လုချွမ်းဘက်သို့ လှည့်ကာ မေးလိုက်သည်။

"ဖေဖေ... သမီးတို့ ဘယ်ကိုသွားနေတာလဲ"

ထိုစကားကို ကြားသောအခါ ရှေ့ခန်း၌ ထိုင်နေသော လုချွမ်းက ပြုံးလိုက်ပြီး စက္ကူတစ်ရွက်ပေါ်တွင် စာရေးလိုက်သည်။

"ချီချီလေး...ဖေဖေတို့က တခြားသူတွေရဲ့ အနိုင်ကျင့်တာကို အမြဲခံခဲ့ရတာလေ။ ဒါပေမဲ့ ဒီတစ်ခါတော့ ဖေဖေက သူတို့ကို ပြန်ပြီးအနိုင်ကျင့်ဖို့ သမီးကို ခေါ်သွားမှာ ငါတို့ကလည်း အလွယ်တကူ ရန်စလို့ရတဲ့သူတွေ မဟုတ်ဘူးဆိုတာ အဲဒီလူတွေကို သိအောင် လုပ်ပေးရမယ်"

စက္ကူပေါ်ရှိ စာသားများကို မြင်လိုက်ရသောအခါ ကျိရုရွှယ်သည် လုချွမ်း၏ ရည်ရွယ်ချက်ကို ချက်ချင်းပင် နားလည်သွားတော့သည်။

ဖေဖေသည် လူသားအရာရှိများ၏ လုပ်ရပ်ကြောင့် အကြီးအကျယ် ဒေါသထွက်နေပုံရပြီး သူတို့ကို သင်ခန်းစာကောင်းကောင်း ပေးလိုနေခြင်းပင်။

"ဖေဖေ ဘာပဲလုပ်လုပ် ချီချီကတော့ ဖေဖေ့ဘက်က အမြဲရှိနေမှာပဲ"

ကျိရုရွှယ်သည် သူမ၏ ဖခင်ကို ပြုံးပြလိုက်ပြီး လက်သီးလေးကို ကျစ်ကျစ်ပါအောင် ဆုပ်ကာ ပြတ်သားစွာ ပြောလိုက်သည်။