ငါကိုယ်တိုင်ပဲ

ယီထျန်းယွမ်သည် နေရာတစ်ခုရှာ၍ တရားထိုင်နားနေစဉ် နတ်ဘုရားအရှင်ယွီချင်းသည် သူထွက်ပြေးသွားမည်ကို စိုးရိမ်သည့်အလား သူ၏ဘေးနား၌ တိုက်ရိုက်လာထိုင်လေသည်။

ယီထျန်းယွမ်သည် မျက်ခုံးပင့်လျက် မျက်မှောင်ကြုတ်ကာ ဆိုလိုက်သည်။

“ဘာလဲ... ငါထွက်ပြေးမှာ ကြောက်နေတာလား...”

“မကြောက်ပါဘူး... မင်းဘယ်သွားသွား ငါနဲ့ဘာဆိုင်လို့လဲ...”

နတ်ဘုရားအရှင်ယွီချင်းက တည်ငြိမ်စွာဖြင့် ပြန်လည်ဖြေကြားသည်။

“ငါက ဒီအတိုင်းပဲ ကုန်ဆုံးသွားတဲ့စွမ်းအင်တွေကို ပြန်ဖြည့်နေတာလေ... ဒါကဘာပြဿနာရှိလို့လဲ...”

“အဲဒါဆိုလည်း ပြဿနာမရှိပါဘူး...”

ယီထျန်းယွမ်သည် ပခုံးတွန့်ပြပြီးနောက် နတ်ဘုရားအရှင်ယွီချင်းအား ဆက်လက်ဂရုမစိုက်တော့ပေ။

နတ်ဘုရားအရှင်ယွီချင်းသည်လည်း သူ၏ဘေးနား၌ ထိုင်နေပြီး ဘာမှထပ်မပြောဘဲ ခန္ဓာကိုယ်တွင်းရှိ ကုန်ဆုံးသွားသော စွမ်းအားများကို အမှန်တကယ်ပင် ပြန်လည်ဖြည့်တင်းနေခဲ့သည်။ သူသည် ဒဏ်ရာရရှိပုံမပေါ်သော်လည်း စွမ်းအင်သုံးစွဲမှုမှာမူ အနည်းငယ်မျှ မနိမ့်ချေ။

ထိုမျှများပြားသော ကြယ်တာရာပင်လယ်မိစ္ဆာများကြားတွင် သူသည် ရှောင်တိမ်းရန် နည်းလမ်းမရှိသဖြင့် အတင်းအကျပ် ခုခံတိုက်ခိုက်ခဲ့ရသည်။ သူသတ်ဖြတ်ခဲ့သော အရေအတွက်မှာ အမှန်တကယ်ပင် များပြားလှသော်လည်း သူ့တွင် အခြားရင်းနှီးသူရှိသဖြင့် သူ၏ဘေးနား၌သာ တရားထိုင်နေခြင်း ဖြစ်ပေသည်။

ဤလုပ်ရပ်သည် လူအများ၏ အာရုံစိုက်မှုကို ခံရပြီး ယီထျန်းယွမ်သည် ဤမျှအစွမ်းထက်သူနှင့် သိကျွမ်းနေလိမ့်မည်ဟု မည်သူမျှ မထင်မှတ်ထားခဲ့ကြပေ။ နတ်ဘုရားအရှင်ယွီချင်း၏ အစောပိုင်းက စွမ်းဆောင်ရည်မှာ လူတိုင်း၏ မျှော်လင့်ချက်ကို ကျော်လွန်နေခဲ့ပြီး မြေကမ္ဘာအရှင်ယီထျန်းယွမ်နှင့်ပင် ယှဉ်နိုင်သည့်အလား ရှိနေခဲ့သည်။

ဤသည်က သူတို့အား မိမိတို့ကိုယ်မိမိ ပြန်လည်သံသယဝင်စေပြီး အဆင့်အတန်းတူညီသော မြေကမ္ဘာအရှင်များ ဖြစ်ကြပါလျက်နှင့် အဘယ်ကြောင့် ဤမျှအထိ ကွာခြားနေရသနည်းဟု တွေးတောနေကြတော့သည်။

ရက်အနည်းငယ် နားနေပြီးနောက် သစ်မျိုးနွယ်သားကပ္ပတိန်တို့သည် ဝိညာဉ်သင်္ဘောကို ပြုပြင်ကြသော်လည်း အချိန်အတော်ကြာအောင် မပြုပြင်နိုင်ဘဲ တစ်ဦးပြီးတစ်ဦး စိတ်ပျက်လက်ပျက်ဖြင့် ပြန်လည်ပျံသန်းလာကြသည်။

“သစ်မျိုးနွယ်သားကပ္ပတိန်... ဘယ်လိုအခြေအနေရှိလဲ...”

ဝက်ဝံကပ္ပတိန်သည် သစ်မျိုးနွယ်သားကပ္ပတိန်၏ အမူအရာမှာ မကောင်းသည်ကို မြင်သောအခါ မေးမြန်းလိုက်သည်။

“ဘယ်လိုအခြေအနေ ရှိရမှာလဲ... ဒီဝိညာဉ်သင်္ဘောက အပြင်းအထန် ပျက်စီးသွားပြီဆိုတော့ ကြယ်တာရာပင်လယ်ကို ဖြတ်ကျော်ဖို့ နည်းလမ်းမရှိတော့ဘူး... ကြယ်တာရာလှိုင်းလုံး အနည်းငယ်လောက် ရိုက်ခတ်လိုက်တာနဲ့ ဒီသင်္ဘောက လွင့်ထွက်သွားတော့မှာပဲ...”

သစ်မျိုးနွယ်သားကပ္ပတိန်က ခေါင်းခါယမ်းလျက် သက်ပြင်းချကာ ဆိုလိုက်သည်။

“ကြည့်ရတာတော့ လာခဲ့တဲ့လမ်းအတိုင်းပဲ ပြန်လှည့်ရတော့မယ် ထင်တယ်...”

ထို့နောက် သူသည် လူအုပ်ကြီးကို ကြည့်ကာ ကျယ်လောင်စွာ ဆိုလိုက်သည်။

“အခုပဲ လာခဲ့တဲ့လမ်းအတိုင်း ပြန်လှည့်ကြမယ်... ဝိညာဉ်သင်္ဘောကို သေချာပေါက် ပြုပြင်ရမယ်... ဒါပေမဲ့ အခု ငါတို့မှာ ပြုပြင်နိုင်စွမ်း မရှိဘူး... တကယ်လို့ ဒီထဲမှာ နတ်ဘုရားအင်းဆရာ ပါခဲ့ရင်တော့ တစ်မျိုးပေါ့... အဆင့်မြင့်ကြီး မဟုတ်ရင်တောင် အဆင့် ၁ နတ်ဘုရားအင်းဆရာ ဆိုရင်ပဲ ရပါပြီ... ပြုပြင်ရမယ့် နတ်ဘုရားအင်း တွေက အဆင့်အမြင့်ကြီးတွေ မဟုတ်ပါဘူး...”

လူတိုင်းက ခေါင်းခါယမ်းလိုက်ကြသည်။ အဆင့် ၁ နတ်ဘုရားအင်းဆရာ အဆင့်သို့ ရောက်ရှိရန်မှာ အဘယ်မှာ လွယ်ကူပါမည်နည်း။

“အဆင့် ၁ နတ်ဘုရားအင်း... ဟုတ်လား...”

ယီထျန်းယွမ်သည် ထိုအချိန်တွင် မတ်တတ်ရပ်ကာ မေးမြန်းလိုက်သည်။

“ဟုတ်တယ်... ဒါဆိုရင် မင်းက...”

သစ်မျိုးနွယ်သားကပ္ပတိန်၏ မျက်ဝန်းများမှာ တောက်ပသွားခဲ့သည်။

“ဟုတ်ပါတယ်... ကျွန်တော်က အဆင့် ၁ နတ်ဘုရားအင်းဆရာပါ... အဆင့်က သိပ်မမြင့်သေးပေမဲ့ ရိုးရှင်းတဲ့ နတ်ဘုရားအင်းတွေကို ပြုပြင်ဖို့ကတော့ ပြဿနာမရှိပါဘူး...”

ယီထျန်းယွမ်သည် လက်ရှိတွင် အဆင့် ၁ နတ်ဘုရားအင်းဆရာသာ ရှိသေးသော်လည်း အဆင့်တက်လိုပါက ကျွမ်းကျင်မှုအမှတ်အချို့ သုံးစွဲရုံဖြင့် လွယ်ကူစွာ အဆင့်တက်နိုင်ပေသည်။

“မင်းက အဆင့် ၁ နတ်ဘုရားအင်းဆရာလည်း ဖြစ်နေသေးတာလား...”

ဘေးရှိ နတ်ဘုရားအရှင်ယွီချင်းက သူ၏ မျှော်လင့်ချက်ထက် ကျော်လွန်နေသဖြင့် အံ့အားသင့်စွာဖြင့် ဆိုလိုက်သည်။

အဆင့် ၁ နတ်ဘုရားအင်းဆရာသာ ဖြစ်သော်လည်း သူသည် တခြား နတ်ဘုရားအအင်းဆရာများနှင့် လုံးဝကွာခြားသော တည်ရှိမှုမျိုး ဖြစ်သည်။ ကျင့်ကြံခြင်းနယ်ပယ် မှာလည်း အလွန်သန်မာနေသဖြင့် သူသည် ယီထျန်းယွမ်အား အစွမ်းထက်သူတစ်ဦး ပြန်လည်ဝင်စားလာခြင်းလားဟုပင် သံသယဝင်နေတော့သည်။

အမှန်စင်စစ် သူကိုယ်တိုင်လည်း အစွမ်းထက်သူ ပြန်လည်ဝင်စားလာသူ ဖြစ်သော်လည်း ယခင်ဘဝ၌ နတ်ဘုရားအင်း စွမ်းရည်များကို မတတ်ကျွမ်းခဲ့ချေ။ သူသည် ဆေးဖော်စပ်သူ တစ်ဦးသာ ဖြစ်သဖြင့် အခြေအနေမှာ ကွဲပြားသည်။ သူ့တွင် ကောင်းကင်လောင်ကျွမ်းခြင်း နတ်ဘုရားမီးလျှံ ရှိနေသဖြင့် ဆေးဖော်စပ်ခြင်းက သူအတွက် အကောင်းဆုံး ရွေးချယ်မှု ဖြစ်ခဲ့သည်။

“ဘာပြဿနာရှိလို့လဲ...”

ယီထျန်းယွမ်က သူအား ကြည့်ကာ ဆိုလိုက်သည်။

“ဘာမှမဖြစ်ပါဘူး...”

နတ်ဘုရားအရှင်ယွီချင်းက ခေါင်းခါယမ်းလိုက်သော်လည်း တကယ်ကို မယုံနိုင်စရာကောင်းသည်ဟုသာ ခံစားနေရသည်။

“ဒါဆိုရင် ငါ့ကိုကူပြီး အမြန်ပြုပြင်ပေးပါဦး...”

သစ်မျိုးနွယ်သားကပ္ပတိန်သည် အလွန်စိတ်လှုပ်ရှားသွားပြီး မြေကမ္ဘာအရှင်ယီထျန်းယွမ်အား ဝိညာဉ်သင်္ဘောဆီသို့ ဆွဲခေါ်သွားခဲ့ရာ မှင်တက်မိနေသော ကျင့်ကြံသူ အုပ်စုကြီးသာ ကျန်ရစ်ခဲ့တော့သည်။

သူတို့ထဲမှ ကောင်းကင်အရှင်ဖာဝမ်တို့မှာ ဘာပြောရမှန်းပင် မသိတော့ပေ။ အရင်က သူသည် မြေကမ္ဘာအရှင်ယီထျန်းယွမ်အား မိမိတို့အဖွဲ့သို့ ဝင်ရန် ဖိတ်ခေါ်ခဲ့ဖူးသော်လည်း ယခုကြည့်ရသည်မှာ သူသည် တကယ်ကို နုနယ်လွန်းခဲ့ချေပြီ။ မိမိတို့အဖွဲ့သို့ ဝင်ရန်မပြောနှင့်၊ ဤစွမ်းရည်မျိုးဖြင့် အဆင့် ၂ နတ်ဘုရားနယ်မြေရှိ အဖွဲ့အစည်းများသို့ ဝင်ရန်ပင်လျှင် မည်သည့်ပြဿနာမျှ ရှိမည်မဟုတ်ပေ။

“ဒီလိုအရည်အချင်းမျိုး ရှိနေတာကြောင့် ငါတို့ဆီ ဝင်ဖို့ ငြင်းခဲ့တာကိုး... ကြည့်ရတာ သူက အဆင့် ၂ နတ်ဘုရားနယ်မြေမှာရှိတဲ့ အဖွဲ့အစည်းတွေကို ဝင်ဖို့ ရည်ရွယ်ထားပုံရတယ်...”

“ဟုတ်တယ်... ဒါက လူအချင်းချင်း ကြားက ကွာခြားချက်ပဲ... လုံးဝ နှိုင်းယှဉ်လို့မရဘူး...”

“အရင်ကတော့ သူက အခွင့်အရေးကို အသုံးမချတတ်ဘူးလို့ ထင်ထားတာ... အခုကြည့်ရတာ သူက အရမ်းကို သိုသိုသိပ်သိပ် နေတတ်တာပဲ...”

အားလုံးက ခေါင်းခါယမ်းလိုက်ကြပြီး မိမိတို့ အလွန်အကျွံ တွေးတောမိသွားခြင်း ဖြစ်ကြောင်း ခံစားလိုက်ရသည်။

“ဟင်... မြေကမ္ဘာအရှင်ယီထျန်းယွမ် ဆိုတဲ့နာမည်ကို ငါတစ်နေရာရာမှာ ကြားဖူးသလိုပဲ... တော်တော်လေး ရင်းနှီးနေတယ်...”

ကျင့်ကြံသူတစ်ဦးမှာ တစ်စုံတစ်ခုကို သတိရသွားပုံရပြီး ခဏကြာ စဉ်းစားပြီးနောက် မျက်ဝန်းထဲတွင် ထိတ်လန့်မှုများ ပေါ်ပေါက်လာခဲ့သည်။

“ငါ... ငါ အရင်က သူငယ်ချင်းတစ်ယောက်နဲ့ စကားပြောတုန်းက အဲဒီသူငယ်ချင်းက အဆင့် ၁ နတ်ဘုရားနယ်မြေကလေ... သူက လတ်တလောမှာ ကျင်းပခဲ့တဲ့ နတ်ဘုရားနယ်မြေ တက်လှမ်းခြင်းတိုက်ပွဲ အကြောင်း ပြောပြဖူးတယ်... အဲဒီမှာ ပထမရတဲ့သူရဲ့ နာမည်က မြေကမ္ဘာအရှင်ယီထျန်းယွမ် တဲ့...”

“အဲဒါကို ငါလည်း သတိရပြီ... နတ်ဘုရားနယ်မြေ တက်လှမ်းခြင်းတိုက်ပွဲရဲ့ ပထမဆုရှင်က တကယ်ပဲ မြေကမ္ဘာအရှင်ယီထျန်းယွမ် ပေါ့... သူက အရမ်းတော်တယ်လို့ ကြားတယ်... နာမည်ကို ကြားတုန်းက ရင်းနှီးသလိုရှိပေမဲ့ ချက်ချင်း သတိမရလိုက်ဘူး... သူက တကယ်ပဲ အဲဒီ မြေကမ္ဘာအရှင်ယီထျန်းယွမ်ပဲ လား...”

“မဖြစ်နိုင်ပါဘူး... နာမည်တူတာလည်း ဖြစ်နိုင်တာပဲ မဟုတ်လား...”

လူတိုင်း၏ မျက်နှာတွင် အံ့ဩမှုများ ပေါ်ပေါက်လာပြီး နတ်ဘုရားနယ်မြေ တက်လှမ်းခြင်းတိုက်ပွဲဘက်သို့ တွေးတောနေကြတော့သည်။ သူတို့မှာ အဖွဲ့အစည်းမရှိသော တကိုယ်တော် ကျင့်ကြံသူများ ဖြစ်ကြသဖြင့် နတ်ဘုရားနယ်မြေ တက်လှမ်းခြင်းတိုက်ပွဲသို့ ဝင်ရောက်ယှဉ်ပြိုင်ခွင့် မရှိကြချေ။ ထို့ကြောင့် မြေကမ္ဘာအရှင်ယီထျန်းယွမ်အား မသိကျွမ်းကြခြင်း ဖြစ်သည်။

ယခုအခါ အချို့သော အကြောင်းအရာများကို သိရှိသွားကြသဖြင့် သူတို့၏ စိတ်နှလုံးမှာ တုန်လှုပ်သွားခဲ့ရသည်။ အကယ်၍ သူကသာ ပထမဆုရှင် ဖြစ်ပါက သူတို့က သူ့အား မိမိတို့အဖွဲ့သို့ ဝင်ရန် ဖိတ်ခေါ်ခြင်းမှာ အမှန်တကယ်ပင် အရိုက်ခံရမည့် ကိစ္စပင် မဟုတ်ပါလော။

“ဒါပေမဲ့ သူက နတ်ဘုရားနယ်မြေ တက်လှမ်းခြင်းတိုက်ပွဲရဲ့ ပထမဆုရှင်လို့ မပြောခဲ့ဘူးလေ... အဆင့် ၂ နတ်ဘုရားနယ်မြေဘက်ကို လှည့်လည်ကြည့်ဖို့ သွားတာလို့ပဲ ပြောခဲ့တာ...”

“ဒါကတော့ သူက အေးအေးဆေးဆေး နေတတ်လို့ပေါ့... မင်းမသိဘူးလား...”

“ဂရုမစိုက်ပါနဲ့တော့... ခဏနေ သူပြန်လာရင် မေးကြည့်လိုက်ရင် ပြီးတာပဲပေါ့...”

မြေကမ္ဘာအရှင်ယီထျန်းယွမ်၏ သတင်းမှာ ဤနေရာ၌ လျင်မြန်စွာ ပျံ့နှံ့သွားခဲ့ပြီး ဒုတိယဆုရှင် ဖြစ်သော နတ်ဘုရားအရှင်ယွီချင်း အကြောင်းကိုမူ မည်သူမျှ ဆွေးနွေးခြင်း မရှိကြချေ။ သူသည် ဖမ်းဆီးခံခဲ့ရသဖြင့် ဆွေးနွေးမှုများအတွင်း၌ ပါဝင်လာခြင်း မရှိခြင်းလည်း ဖြစ်ပေလိမ့်မည်။

မကြာမီမှာပင် ယီထျန်းယွမ်သည် ပြုပြင်ပြီးနောက် ပြန်လာခဲ့သည်။ သစ်မျိုးနွယ်သားကပ္ပတိန်က ဘေးမှနေ၍ အဆက်မပြတ် ချီးကျူးနေခဲ့သည်။

“တကယ်ကို တော်လွန်းပါတယ်... ဒီတစ်ခါတော့ ပြန်လှည့်ရတော့မယ်လို့ ထင်ထားတာ... ယီထျန်းယွမ်က နတ်ဘုရားအင်းတွေကိုတောင် ပြုပြင်နိုင်လိမ့်မယ်လို့ မထင်ထားဘူး... ဒီလိုအရည်အချင်းမျိုးက တကယ်ကို အားကျစရာပဲ... တကယ်လို့ မြေကမ္ဘာအရှင်ယီထျန်းယွမ်သာ ဘယ်အဖွဲ့အစည်းမှ မဝင်ရသေးဘူးဆိုရင် ငါတို့နဲ့ ပူးပေါင်းပါလား...”

“ငါတို့နဲ့ ပူးပေါင်းမယ်ဆိုရင်တော့ အကျိုးကျေးဇူးတွေ အများကြီး ရလိမ့်မယ်လို့ ငါ အာမခံတယ်... ငါတို့ရဲ့ ဂိုဏ်းက တကယ်ကို နာမည်ကြီးတာလေ...”

သစ်မျိုးနွယ်သားကပ္ပတိန်ကပင် ဖိတ်ခေါ်လာခဲ့ပြီ ဖြစ်သော်လည်း သူပြောပြီးနောက် ပတ်ဝန်းကျင်ရှိ အခြေအနေမှာ အနည်းငယ် ထူးဆန်းနေသည်ကို ခံစားလိုက်ရသည်။ သူက လူတိုင်းကို လှည့်ကြည့်လိုက်သည့်အခါ သူတို့၏ မျက်နှာများမှာ ထူးဆန်းနေကြသည်ကို တွေ့လိုက်ရသည်။

“ဘာဖြစ်လို့လဲ...”

သစ်မျိုးနွယ်သားကပ္ပတိန်က မေးမြန်းလိုက်သည်။

“အဟမ်း... အဟမ်း...”

ဝက်ဝံကပ္ပတိန်က ချောင်းဟန့်လိုက်ပြီး မြေကမ္ဘာအရှင်ယီထျန်းယွမ်အား ကြည့်ကာ မေးမြန်းလိုက်သည်။

“မြေကမ္ဘာအရှင်ယီထျန်းယွမ်... မင်းက နတ်ဘုရားနယ်မြေ တက်လှမ်းခြင်းတိုက်ပွဲရဲ့ ပထမဆုရှင်ဖြစ်တဲ့ အဲဒီ မြေကမ္ဘာအရှင်ယီထျန်းယွမ် ဆိုတဲ့သူလား...”

“နတ်ဘုရားနယ်မြေ တက်လှမ်းခြင်းတိုက်ပွဲရဲ့ ပထမဆုရှင် မြေကမ္ဘာအရှင်ယီထျန်းယွမ် ဟုတ်လား...”

သစ်မျိုးနွယ်သားကပ္ပတိန်မှာ တစ္ဆေမြင်လိုက်ရသည့်အလား မြေကမ္ဘာအရှင်ယီထျန်းယွမ်အား စိုက်ကြည့်နေတော့သည်။

ယီထျန်းယွမ်က မျက်မှောင်ကြုတ်လိုက်သည်။ ကြည့်ရသည်မှာ သူ၏ အထောက်အထား ပေါ်သွားခဲ့ပြီ ဖြစ်သည်။ သူတို့မှာ မသိရှိကြဟု သူ ထင်ထားခဲ့သော်လည်း အမှန်တကယ်ပင် နာမည်အသစ်တစ်ခု ပြောင်းလဲသုံးစွဲမှသာ ပို၍ အဆင်ပြေပေလိမ့်မည်။

“ဟုတ်ပါတယ်... ငါကိုယ်တိုင်ပဲ... နတ်ဘုရားနယ်မြေ တက်လှမ်းခြင်းတိုက်ပွဲက မြေကမ္ဘာအရှင်ယီထျန်းယွမ် ပါ...”

ယီထျန်းယွမ်က ခဏတာ စဉ်းစားပြီးနောက် ငြင်းဆိုခြင်း မပြုတော့ချေ။ သူ ငြင်းဆိုလိုသော်လည်း မလိုအပ်တော့ဟု ခံစားရသည်။ နတ်ဘုရားအရှင်ယွီချင်းမှာလည်း ဤနေရာ၌ ရှိနေသဖြင့် ငြင်းဆိုနေခြင်းက အဓိပ္ပာယ်မရှိချေ။ မူလက သူ့အား ဖမ်းဆီးမည့် နတ်ဘုရားနယ်မြေများကို သတိထားနေခဲ့သော်လည်း ယခုအခါ နတ်ဘုရားအရှင်ယွီချင်းပင်လျှင် ဤနေရာ၌ ရှိနေပြီဖြစ်ရာ စိုးရိမ်နေရန် မလိုအပ်တော့ချေ။

အခန်း ၁၀၇၂ ပြီးပါပြီ။