ယဲ့ဖေးရိုကိုယ်တိုင် ဆက်သခြင်း၊ ပထမအဆင့် စိတ်ဝိညာဉ်အမြစ်သို့ တက်လှမ်းခြင်း(၁)။

ဤအခိုက်တွင် ကျိုးစွေ့သည် ကောင်းကင်မိစ္ဆာဂိုဏ်း၏ဂိုဏ်းချုပ် ချန်ဇီယွင်ကို သတိရမိလေ၏။

ယဲ့ဖေးရိုနှင့် လုံးဝဆန့်ကျင်ဘက် အစွန်းနှစ်ဖက်ဟု ဆိုရပေမည်။

တစ်ယောက်က ပြိုင်ဘက်ကင်းသော ညှို့ဓာတ်ပြင်းသူဖြစ်ပြီး၊ တစ်ယောက်က မြင့်မြတ်စင်ကြယ်၍ ထိပါး၍မရသူဖြစ်၏။

မိစ္ဆာမနှင့် သူတော်စင်မတို့၏ ကွာခြားချက်ပင် ဖြစ်ချေ၏။

ရေနှင့်မီးကဲ့သို့ ဆန့်ကျင်ဘက် ဖြစ်နေကြ၏။

လက်တွေ့တွင်လည်း ချန်ဇီယွင်နှင့် ယဲ့ဖေးရိုတို့သည် ငယ်စဉ်ကတည်းကပင် ရန်ဘက်များဖြစ်ခဲ့ကြပုံရသည်။

နှစ်ဦးသားမည်မျှ တိုက်ခိုက်ခဲ့ကြသည်ကို မသိနိုင်ချေ။ သို့သော် ယနေ့အချိန်အထိ အနိုင်အရှုံးမပေါ်သေးပေ။

အကယ်၍သာ ဤပြိုင်ဘက်ကင်း အလှပဂေးနှစ်ဦးစလုံးကို သိမ်းပိုက်နိုင်မည်ဆိုပါက အံ့မခန်းကိစ္စကြီးတစ်ခု ဖြစ်လာပေလိမ့်မည်။

ဝန်ဆောင်မှုအမျိုးမျိုးကို ခံစားနိုင်မည့်အပြင်၊ ရေကဲ့သို့သော နူးညံ့သိမ်မွေ့မှုကိုလည်း ခံစားရပေမည်။

ပုံမှန်အားဖြင့်ဆိုရလျှင် ငါးနှင့်ဝက်ဝံလက်ဖဝါး နှစ်ခုစလုံးကို တစ်ပြိုင်နက်ရယူရန် မဖြစ်နိုင်ပေ။

သို့သော် သူကဲ့သို့သော လူကြီးလူကောင်းတစ်ယောက်အနေဖြင့် သဘာဝကျကျပင် နှစ်ခုစလုံးကို လိုချင်မိလေ၏။

အကယ်၍သာ ဤပြိုင်ဘက်ကင်း အလှပဂေးနှစ်ဦးစလုံးကို လက်ထပ်နိုင်မည်ဆိုပါက ယင်းမှရရှိလာမည့် အကျိုးကျေးဇူးများသည် ပြောနေစရာပင် လိုမည်မထင်ချေ။

"ဟင်းဟင်း... ရောင်းရင်းကျိုးက ချီးကျူးလွန်းနေပါပြီ…"

"ရောင်းရင်းကမှ တကယ်ကို ထူးခြားပြောင်မြောက်သူပါ..."

"အသက်နှစ်ရာမပြည့်ခင်မှာပဲ ဝိညာဉ်သန္ဓေသား အလယ်အလတ်အဆင့်ကို ရောက်နေပြီ..."

"ပြီးတော့ ကြားတာက ရောင်းရင်းရဲ့ ဆေးဖော်စပ်ပညာ၊ ဓားသိုင်းပညာ၊ အစီအရင်ပညာတွေကလည်း အမြင့်ဆုံးအဆင့်ကို ရောက်နေပြီဆို..."

"တကယ်ကို လေးစားလွန်းလို့ ဦးညွှတ်မိပါတယ်..."

"ကျွန်မက ရောင်းရင်းထက် အသက်နည်းနည်းပိုကြီးပေမယ့် ရောင်းရင်းနဲ့ယှဉ်လိုက်ရင်တော့ ကိုယ့်ကိုယ်ကိုယ် ရှက်မိပါရဲ့..."

ယဲ့ဖေးရိုက သက်ပြင်းချရင်း ပြောလိုက်သည်။

သူမသည်လည်း ကျိုးစွေ့နှင့်ပတ်သက်သော သတင်းအချက်အလက်အများအပြားကို ရရှိထားသည်။

ပိုပြီးသိလာလေလေ၊ ဤအမျိုးသား၏ကြောက်မက်ဖွယ်ကောင်းပုံကို ပိုပြီးခံစားလာရလေလေပင်။ နတ်ဘုရားအသွင်ပြောင်းအဆင့် ပါရမီရှိသည်ဆိုသည်မှာ နာမည်နှင့်လိုက်ဖက်အောင် အစစ်အမှန်ဖြစ်ပေ၏။

မှန်ပေသည်၊ အားနည်းချက်လည်းရှိသည်။ ၎င်းမှာ နှာဘူးထခြင်းပင်ဖြစ်သည်။

တစ်ယောက်တည်းနှင့် ကိုယ်လုပ်တော်ဆယ်ယောက်ကျော် ယူထားချေသည်။

သော့တစ်ချောင်းသည် သော့ခလောက်တစ်ခုကိုသာ ဖွင့်နိုင်သည်ဟု ဆိုကြသော်လည်း၊ ဤအမျိုးသားကမူ သော့ခလောက်တိုင်းကို ဖွင့်နိုင်သော မာစတာကီး ဖြစ်နေလိမ့်မည်ဟု မည်သူက ထင်မှတ်ထားပါမည်နည်း။

သို့သော် ဤကိစ္စအတွက် သူ့ကိုအပြစ်တင်၍ မရနိုင်ပေ။

အဓိကမှာ ဤအမျိုးသား၏ ရုပ်ရည်က အလွန်တရာ ချောမောလွန်းသောကြောင့် ဖြစ်သည်။ မျက်နှာထားသည် ပန်းပုဆရာတစ်ဦးက သေချာထုဆစ်ထားသကဲ့သို့ သေသပ်လှပပြီး၊ မျက်လုံးများက ကြယ်တာရာများကဲ့သို့ တောက်ပနေကာ အမျိုးသမီးများ၏ ဝိညာဉ်ကိုပါ ဝါးမြိုသွားနိုင်ပုံရလေ၏။

နှစ်ပေါင်းများစွာ ကျင့်ကြံခဲ့သော သူမ၏တာအိုစိတ်နှလုံးပင်လျှင် ဤအမျိုးသားကို မြင်လိုက်ရသောအခါ မျက်နှာမရဲဘဲမနေနိုင်သလို၊ ရင်မခုန်ဘဲမနေနိုင် ဖြစ်ရသည်။

အခြားအမျိုးသမီးများဆိုလျှင် ပြောနေစရာပင် လိုတော့မည်မဟုတ်ပေ။

တွေ့လိုက်သည်နှင့် အချစ်တွင် ကျဆုံးသွားကြပြီး ရုန်းထွက်နိုင်မည် မဟုတ်ချေ။

ဤအမျိုးသားသည် တိုင်းပြည်ပျက်မတတ် ချောမောသူဖြစ်ပြီး အမျိုးသမီးကျင့်ကြံသူ မည်မျှကို ဒုက္ခပေးခဲ့ပြီလဲ မသိနိုင်ဟုသာ ဆိုရပေမည်။

"ရောင်းရင်းယဲ့က ယဉ်ကျေးလွန်းနေပါပြီ..."

"ရောင်းရင်းအနေနဲ့ မိစ္ဆာသားရဲတွေ ဝိုင်းရံနေတဲ့ကြားက လူသားတွေအများကြီးကို ကာကွယ်ပေးနိုင်တာကလည်း..."

"မသေးလှတဲ့ အောင်မြင်မှုပါပဲ..."

ကျိုးစွေ့က ပြန်ပြောလိုက်၏။

"ဟူး... သေမယ့်နေ့ကို စောင့်နေရုံပါပဲရှင်..."

"အမှန်အတိုင်းပြောရရင် ကျွန်မတို့ မြူနှင်းနန်းတော်က မြူနှင်းကျွန်းကို ကာကွယ်ပေးနိုင်ရုံပဲ ရှိတော့တာ..."

"ဒီပင်လယ်ပြင်ထဲက တခြားကျွန်းတွေကိုတော့ ကာကွယ်ပေးနိုင်စွမ်း မရှိတော့ပါဘူး..."

"ဒီအတိုင်းသာဆက်သွားရင် ကျွန်မတို့ မြူနှင်းနန်းတော်တောင် အန္တရာယ်ရှိလာနိုင်တယ်..."

"ရှေးဟောင်းမိစ္ဆာကမ္ဘာက လာတဲ့ မိစ္ဆာကျင့်ကြံသူတွေက အရမ်းများလွန်းတယ်..."

ယဲ့ဖေးရိုခမျာ စိုးရိမ်ပူပန်မှုများဖြင့် ပြည့်နှက်နေရှာသည်။

လက်ရှိတွင် မြူနှင်းနန်းတော် အသက်ရှင်ကျန်ရစ်နေသည်မှာ မိစ္ဆာမျိုးနွယ်စု၏ အဓိကပစ်မှတ်က မြူနှင်းနန်းတော်မဟုတ်ဘဲ ရှေးဟောင်းမိစ္ဆာပြောင်းလဲခြင်းအစီအရင် တည်ဆောက်ရေးဖြစ်နေသောကြောင့်သာ ဖြစ်ပေ၏။

သို့မဟုတ်ပါက မိစ္ဆာကျင့်ကြံသူ အများအပြားသာ အတင်းအဓမ္မ ဝင်ရောက်တိုက်ခိုက်လျှင် မြူနှင်းနန်းတော်သည် ဧကန်မုချ ပျက်စီးသွားရပေလိမ့်မည်။

သူမသည် မြူနှင်းနန်းတော်၏ လုံခြုံရေးအတွက် အချိန်တိုင်းစိုးရိမ်နေရလေသည်။

ယခုအချိန်တွင် အခြားဝိညာဉ်သန္ဓေသား အင်အားစုများကို အကူအညီတောင်းချင်လျှင်ပင် မဖြစ်နိုင်တော့ပေ။

အဘယ်ကြောင့်ဆိုသော် အခြားဝိညာဉ်သန္ဓေသား အင်အားစုများသည်လည်း သူတို့၏ပင်လယ်ပြင်ကို ကာကွယ်ရန် လိုအပ်နေပြီး ပိုလျှံသောအင်အား မရှိကြပေ။

မြူနှင်းနန်းတော်အနေဖြင့် ကိုယ့်ကိုယ်ကိုယ် ကံကောင်းပါစေဟု ဆုတောင်းရုံသာ ရှိတော့၏။

"ဒီလိုဆိုရင် ရောင်းရင်းအနေနဲ့ မြူနှင်းနန်းတော်ကို ရွှေ့ပြောင်းဖို့ အစီအစဉ်မရှိဘူးလား..."

"ဒီနေရာက လူသားကျင့်ကြံသူတွေ နေထိုင်ဖို့မသင့်တော်တော့ဘူးဆိုရင် တခြားနေရာကို ပြောင်းရွှေ့လိုက်တာ ပိုမကောင်းဘူးလား..."

ကျိုးစွေ့ မျက်ခုံးပင့်လိုက်မိသည်။

သူ့အမြင်အရဆိုလျှင် ခုခံ၍မရပါက၊ ပြောင်းရွှေ့လိုက်ခြင်းက ပိုကောင်းပေသည်။

ဘိုးဘွားပိုင် အမွေအနှစ်ဆိုသည်မှာ ကိုယ့်အသက်လောက် အရေးမကြီးပေ။

အသက်ရှိနေသရွေ့ နယ်မြေကို ပြန်လည်ရယူနိုင်သည်။ အသက်မရှိတော့လျှင် နယ်မြေရှိနေ၍ ဘာများ အသုံးဝင်မည်နည်း။

"ဘယ်မှာ အဲ့ဒီလောက် လွယ်ပါ့မလဲ..."

"ဒီပင်လယ်ပြင်က မြူနှင်းနန်းတော်၏ နှစ်ထောင်ချီသက်တမ်းရှိတဲ့ အခြေစိုက်စခန်းလေ... ဘယ်လိုလုပ် ဒီအတိုင်းပစ်ထားခဲ့လို့ ရမှာလဲ..."

"တကယ်လို့ ပစ်ထားခဲ့ရင်တောင် ကျွန်မတို့ မြူနှင်းနန်းတော်က လူတွေအများကြီး ဘယ်နေရာကို သွားရမှာလဲ..."

"သင့်တော်တဲ့ စတုတ္ထအဆင့်ကျွန်း တစ်ကျွန်းကိုရှာဖို့ဆိုတာ ခက်ခဲလွန်းပါတယ်..."

ယဲ့ဖေးရိုက လေးနက်စွာ ပြောလိုက်သည်။

အမှန်တကယ်တမ်းတွင် သူမသည်လည်း ဤပြဿနာကို စဉ်းစားဖူးသည်။ လုံးဝ မတတ်နိုင်တော့သည့်အဆုံးမှသာ မြူနှင်းနန်းတော်ကို ရွှေ့ပြောင်းရပေမည်။

ပြဿနာမှာ ထိုကဲ့သို့လုပ်ဆောင်ရန် အခက်အခဲများစွာ ရှိနေခြင်းဖြစ်၏။ မဖြစ်မနေအခြေအနေ မဟုတ်လျှင် မည်သူမျှ ထိုသို့မလုပ်ချင်ကြပေ။

"ဒါလည်း ဟုတ်တာပဲ..."

ကျိုးစွေ့ ခေါင်းညိတ်လိုက်သည်။

"ဒါပေမဲ့ ဖြေရှင်းနည်းမရှိတာတော့ မဟုတ်ပါဘူး..."

"တကယ်လို့ ရောင်းရင်းကျိုးသာ ကူညီပေးပြီး ကျွန်မရဲ့ မြူနှင်းကျွန်းကို ကာကွယ်ပေးမယ်ဆိုရင်... ဒီအခက်အခဲတွေက သူ့အလိုလို ပြေလည်သွားမှာပါ..."

ယဲ့ဖေးရို၏ မျက်ဝန်းလှလှလေးများ တောက်ပသွားပြီး ကျိုးစွေ့ကို မျှော်လင့်တကြီး ကြည့်လိုက်သည်။

အဘယ်ကြောင့်ဆိုသော် သူမသည် ကျိုးစွေ့၏ စွမ်းအားကို မြင်ဖူးသောကြောင့်ဖြစ်လေသည်။

ဓားချက်တစ်ချက်တည်းနှင့် မိစ္ဆာသားရဲအများအပြားကို သတ်ဖြတ်နိုင်ခဲ့သည်။

ဝိညာဉ်သန္ဓေသား နှောင်းပိုင်းအဆင့် မဟာကျင့်ကြံသူများပင် ထိုမျှစွမ်းအားမကြီးမားနိုင်ဘဲ ကွာခြားချက်မှာ ကြီးမားလှပေသည်။

ဤမျှစွမ်းအားကြီးသော တိုက်ခိုက်ရေးအင်အားသာ မြူနှင်းကျွန်းတွင် စောင့်ရှောက်ပေးမည်ဆိုပါက မြူနှင်းနန်းတော်သည် ထိုက်စန်းတောင်ကဲ့သို့ ခိုင်မာသွားပေလိမ့်မည်။

မိစ္ဆာသားရဲများ ကျူးကျော်လာမည်ကို စိုးရိမ်စရာမလိုတော့ပေ။

"ရောင်းရင်းယဲ့က နောက်နေပါပြီ..."

"ကျုပ်က ရွှမ်ဟွမ်ဂိုဏ်းရဲ့ဂိုဏ်းချုပ်လေ... ဘယ်လိုလုပ် မြူနှင်းကျွန်းမှာ အကြာကြီးစောင့်ရှောက်ပေးလို့ ရမှာလဲ..."

ကျိုးစွေ့ လက်ကာပြလိုက်သည်။

"ရပါတယ်..."

"ရောင်းရင်းကျိုးက အခု ဝိညာဉ်သန္ဓေသား အလယ်အလတ်အဆင့်မှာ ရှိနေတယ်ဆိုတာ ကျွန်မ သိပါတယ်..."

"တကယ်လို့ ကျွန်မ ခန္ဓာကိုယ်ထဲက သန့်စင်ယင်စွမ်းအင်နဲ့ ကူညီပေးမယ်ဆိုရင်... ဝိညာဉ်သန္ဓေသား နှောင်းပိုင်းအဆင့်ကို အမြန်ဆုံး ရောက်သွားနိုင်လောက်တယ်..."

"ရောင်းရင်းကျိုးသာ ဆန္ဒရှိမယ်ဆိုရင်... ကျွန်မ ကူညီပေးချင်ပါတယ်..."

ယဲ့ဖေးရို၏ မျက်ဝန်းများမှာ တောက်ပနေပြီး မျက်နှာလေးနီရဲသွားကာ အလွန်ရဲတင်းသော အကြံပြုချက်တစ်ခုကို တင်ပြလိုက်သည်။

ဤစကားများကိုပြောပြီးသည်နှင့် သူမ ချက်ချင်းပင် နောင်တရသွားမိသည်။

သူမ အဘယ်ကြောင့် ရုတ်တရက်ကြီး ဤသို့သောစကားမျိုး ပြောထွက်သွားသည်ကို သူမကိုယ်တိုင်လည်း မသိပေ။

သူမသည် ဤသို့သောမိန်းမမျိုး မဟုတ်ပေ။ နှစ်ရာပေါင်းများစွာ ကိုယ့်ကျင့်သိက္ခာကို စောင့်ထိန်းခဲ့ပြီး အခြားအမျိုးသားများကို မျက်နှာသာမပေးခဲ့ပေ။

သို့သော် ဤအမျိုးသားနှင့်တွေ့ဆုံပြီးနောက် သူမ၏မာနများကို လျှော့ချလိုက်မိသည်မှာ တကယ့်ကို မယုံနိုင်လောက်အောင်ပင်။

‘ဟုတ်တယ်…’

‘အရာအားလုံးက မြူနှင်းနန်းတော်ရဲ့ နှစ်ထောင်ချီ အမွေအနှစ်အတွက်ပဲ…’

‘မြူနှင်းနန်းတော်က အမျိုးသမီးကျင့်ကြံသူတွေရဲ့ လုံခြုံရေးအတွက်ပါပဲ…’

‘ဒါကြောင့်မို့လို့ သူမ ဒီလိုရွေးချယ်မှုကို ပြုလုပ်ခဲ့တာ ဖြစ်တယ်…’

‘ဒီအမျိုးသားကို သဘောကျလို့ ကိုယ်တိုင်ဆက်သတာမျိုး လုံးဝမဟုတ်ဘူး…’

‘သူမ ယဲ့ဖေးရိုက ရုပ်ရည်ကိုကြည့်ပြီး စိတ်လှုပ်ရှားတတ်တဲ့ မိန်းမမျိုးမဟုတ်ဘူးလေ… ဘယ်လိုလုပ် ဒီလိုကောင်လေးမျိုးကို စိတ်ဝင်စားနိုင်မှာလဲ…’

‘ဘာပဲပြောပြော ချန်လန်ပင်လယ်ဒေသမှာ ချောမောတဲ့ အမျိုးသားတွေအများကြီး ရှိတာပဲ… သူမ မတွေ့ဖူးတာမှ မဟုတ်တာကို…’

မှန်ပေသည်၊ ဤအမျိုးသားမျိုးကိုတော့ မတွေ့ဖူးပေ။ နှစ်ထောင်ပေါင်းများစွာအတွင်း တစ်ယောက်သာရှိသော အကောင်းဆုံး အမျိုးအစား ဖြစ်၏။

"ဒါက..."

ဤစကားကို ကြားသောအခါ ကျိုးစွေ့၏ မျက်နှာအမူအရာမှာ ထူးဆန်းသွားရသည်။ ယဲ့ဖေးရိုက ရုတ်တရက် ထိုသို့သော စကားမျိုး ပြောလာလိမ့်မည်ဟု သူ ထင်မထားခဲ့ပေ။ ယင်းသည် မြူနှင်းနန်းတော် နန်းတော်သခင်၏ ဂုဏ်သိက္ခာနှင့် လုံးဝမလိုက်ဖက်ပေ။

သို့သော် သူ သေချာအာရုံခံကြည့်လိုက်ရာ ယဲ့ဖေးရို၏ ခန္ဓာကိုယ်အတွင်းမှ မျက်နှာသာပေးမှုသည် သိသိသာသာ တိုးတက်လာသည်ကို တွေ့လိုက်ရသည်။

သူနှင့်တွေ့ဆုံပြီးကတည်းက တရိပ်ရိပ် တက်လာခဲ့ခြင်းပင်။

အကယ်၍ မျက်နှာသာပေးမှုက အမှတ်တစ်ရာအပြည့်ဟု ဆိုလျှင်၊ ယခုတွင် အနည်းဆုံး (၈၅) မှတ်လောက် ရှိနေပြီဖြစ်၏။

မှန်ပေသည်၊ တစ်ဖက်လူက အလွန်အမင်း ဆွဲဆောင်မှုရှိနေသည့်တိုင် ရာနှုန်းပြည့်မဖြစ်မချင်း သူသည် ဤအမျိုးသမီးကို လက်ဖျားနှင့်ပင် ထိမည်မဟုတ်ပေ။

"ရောင်းရင်းယဲ့... ကိုယ့်ကိုယ်ကိုယ်တန်ဖိုးထားပါ..."

"ရောင်းရင်းယဲ့က မြူနှင်းနန်းတော်ကို အရမ်းဂရုစိုက်တယ်ဆိုတာ ကျုပ် သိပါတယ်..."

"ဒါပေမဲ့ ကျုပ်ကတော့ ဒီလိုအရာမျိုးနဲ့ ရောင်းရင်းယဲ့ကို အကျပ်ကိုင်ဖို့ ဆန္ဒမရှိပါဘူး..."

"ကျုပ် ကျိုးစွေ့က တာအိုလက်တွဲဖော် အများကြီး ယူတတ်တာ မှန်ပေမယ့်... ဘယ်တုန်းကမှ အတင်းအဓမ္မ မလုပ်ခဲ့ဖူးပါဘူး... အားလုံးက ကိုယ့်သဘောဆန္ဒနဲ့ကိုယ်ပါပဲ..."

"တကယ်လို့ ရောင်းရင်းယဲ့က ကျုပ်ကိုသဘောကျလို့ဆိုရင်တော့ ဒါက ကျုပ်အတွက် ဂုဏ်ယူစရာပါ..."

"ဒါပေမဲ့ မြူနှင်းနန်းတော်အတွက်နဲ့ ကျုပ်ဆီမှာ ပုံအပ်ချင်တာဆိုရင်တော့ မလိုအပ်ပါဘူး..."

"ပြီးတော့ ရောင်းရင်းအနေနဲ့ မိစ္ဆာသားရဲတွေရဲ့ အန္တရာယ်ကို စိုးရိမ်စရာ မလိုပါဘူး..."

"ကျုပ်ရဲ့အစီအစဉ်သာ အောင်မြင်သွားရင်... မိစ္ဆာမျိုးနွယ်စုရဲ့ ရှေးဟောင်းမိစ္ဆာပြောင်းလဲခြင်းအစီအရင်ကို ဖျက်ဆီးနိုင်မှာဖြစ်လို့... အဲ့ဒီအခါကျ မြူနှင်းနန်းတော်ရဲ့ အန္တရာယ်က သူ့အလိုလို ပြေလည်သွားမှာပါ..."

ကျိုးစွေ့က ဖြောင့်မတ်တည်ကြည်သော ဟန်ပန်ဖြင့် ပြောလိုက်ပြီး စိတ်ဓာတ်ခိုင်မာသော လူကြီးလူကောင်းတစ်ယောက်ကဲ့သို့ ပြုမူလိုက်သည်။