ယဲ့ဖေးရိုကိုယ်တိုင် ဆက်သခြင်း၊ ပထမအဆင့် စိတ်ဝိညာဉ်အမြစ်သို့ တက်လှမ်းခြင်း(၂)။

ဤစကားကို ကြားလိုက်ရသောအခါ ယဲ့ဖေးရို၏ ရင်ထဲတွင် နွေးထွေးသွားရသည်။

မူလက သူမ ထင်ထားသည်မှာ ဤအမျိုးသားသည် နှာဘူးကောင်ဖြစ်ပြီး၊ ဤကမ်းလှမ်းမှုကို ကြားသည်နှင့် မစောင့်နိုင်တော့ဘဲ လက်ခံလိုက်ကာ သူမကို အတင်းအဓမ္မ သိမ်းပိုက်လိမ့်မည်ဟု ထင်ထားခဲ့မိသည်။

မိမိသည် အလွန်တရာ စိတ်လိုက်မာန်ပါ ဖြစ်လွန်းသွားပြီ၊ မည်ကဲ့သို့ဖြစ်ကာ ဤသို့သောအရှက်မရှိသည့် အကြံပြုချက်ကို ပြောထွက်မိရတာလဲ ဟူ၍ အစောပိုင်းကပင် သူမ နောင်တရမိသေးသည်။

ဤသည်မှာ ဟိုမိစ္ဆာလမ်းစဉ်က အမျိုးသမီးကျင့်ကြံသူများနှင့် ဘာကွာတော့မည်နည်း။

သို့သော် ယခု ဤစကားများကို ကြားလိုက်ရသောအခါ ဝိညာဉ်သန္ဓေသားအဆင့်ရှိသော အမျိုးသမီးကျင့်ကြံသူ အများအပြား အဘယ်ကြောင့် ဤအမျိုးသားနောက်သို့ စိတ်ပါလက်ပါ လိုက်ပါနေကြသနည်း ဆိုသည်ကို သူမ ချက်ချင်းနားလည်သွားရသည်။ အကြောင်းပြချက် မရှိဘဲ ဖြစ်လာသည်တော့ မဟုတ်ပေ။

ဤအမျိုးသားသည် ရုပ်ရည်ချောမောပြီး ပါရမီထူးကဲရုံသာမက၊ အရေးအကြီးဆုံးမှာ အရည်အချင်းရှိသော်လည်း မာနမကြီးဘဲ အမျိုးသမီးများကို လေးစားတတ်ချေသည်။

ပြီးပြည့်စုံသော လက်တွဲဖော်ဟုသာ ဆိုနိုင်ပေသည်။

အကယ်၍ သူမသာ ငယ်ရွယ်စဉ်ကတည်းက ဤအမျိုးသားနှင့်တွေ့ဆုံခဲ့မည်ဆိုလျှင်မူ၊ ဤမျှကြာအောင် တစ်ကိုယ်တည်းဖြစ်နေလိမ့်မည် မဟုတ်တန်ရာပေ။

သို့သော် တစ်ချိန်တည်းမှာပင် သူမသည် အနည်းငယ်ရှက်ရွံ့ပြီး ဒေါသထွက်မိလေသည်။

အဘယ်ကြောင့်ဆိုသော် သူမကဲ့သို့ ထိပ်တန်းအလှပဂေးက ကိုယ်တိုင်ပြောနေပါလျက်နှင့် ဤအမျိုးသားက ငြင်းပယ်လိုက်သောကြောင့် ဖြစ်ပေ၏။

‘ငါ့ရုပ်ရည်က မလုံလောက်လို့၊ ဒီအမျိုးသားက မျက်စိမကျလို့များ သွယ်ဝိုက်ပြီး ငြင်းလိုက်တာလား…’

သို့သော် မည်သို့ပင်ဖြစ်စေ သူမ၏ ကျိုးစွေ့အပေါ် ထားရှိသော မျက်နှာသာပေးမှုသည် ဆက်လက်မြင့်တက်နေဆဲ ဖြစ်၏။

"ဒါပေမဲ့ ရောင်းရင်းယဲ့က မြူနှင်းနန်းတော်ရဲ့ လုံခြုံရေးအတွက် အရမ်းစိုးရိမ်နေမှတော့... ကျုပ်ဘက်ကလည်း တစ်ဖက်တစ်လမ်းကနေ ကူညီပေးပါ့မယ်..."

"အမှန်အတိုင်းပြောရရင် ကျုပ်က 'ကိုယ်ပွားပညာရပ်' ကို ကျင့်ကြံထားပါတယ်..."

"ကိုယ်ပွားတစ်ခုကို မြူနှင်းနန်းတော်မှာ ထားခဲ့ပေးလို့ ရပါတယ်..."

"တကယ်လို့ မတော်တဆမှုတစ်ခုခု ဖြစ်လာခဲ့ရင်လည်း ဝင်ကူညီပေးပြီး မိစ္ဆာကျင့်ကြံသူတွေကို သတ်ဖြတ်ပေးနိုင်ပါတယ်..."

ကျိုးစွေ့က သေချာစဉ်းစားပြီးနောက် အကြံပြုလိုက်သည်။

မည်သို့ပင်ဖြစ်စေ အနာဂတ်တာအိုလက်တွဲဖော် ဖြစ်လာမည့်သူ အန္တရာယ်ကြုံတွေ့နေရသည်ကို သူ လက်ပိုက်ကြည့်မနေနိုင်ပေ။

လက်ရှိအခြေအနေအရ မိစ္ဆာမျိုးနွယ်စုက မြူနှင်းနန်းတော်ကို မည်သည့်အချိန်တွင် တိုက်ခိုက်မည် ဆိုသည်ကို မည်သူမျှ အတိအကျမသိနိုင်ပေ။

မိစ္ဆာမျိုးနွယ်စု၏ အာရုံစိုက်မှုသည် ရှေးဟောင်းမိစ္ဆာပြောင်းလဲခြင်းအစီအရင် တည်ဆောက်ရေးတွင် ရှိနေသော်လည်း၊ သူတို့ ရုတ်တရက် ရူးသွပ်ပြီး ထသောင်းကျန်းမလား ဆိုသည်ကို မည်သူက သိနိုင်ပါမည်နည်း။ ကြိုတင်ကာကွယ်ထားခြင်းက ပိုကောင်းပေသည်။

"ရောင်းရင်းကျိုးက နာမည်နဲ့ လိုက်ဖက်ပါပေတယ်... 'ကိုယ်ပွားပညာရပ်' ကိုတောင် ကျွမ်းကျင်ထားတာပဲ..."

"ဒီလိုဆိုရင်တော့ ရောင်းရင်းကိုပဲ အားကိုးရတော့မယ်..."

"တကယ်လို့ နောင်တစ်ချိန် ရောင်းရင်းလိုအပ်တာ ရှိရင်ပြောပါ... ကျွန်မ ဘာမဆို ကူညီပေးပါ့မယ်..."

ယဲ့ဖေးရို၏ မျက်ဝန်းလှလှလေးများသည် ကျိုးစွေ့ကို နူးညံ့စွာ ကြည့်နေလေတော့သည်။

သူမ၏ရင်ထဲတွင် နွေးထွေးမှုကို ခံလိုက်ရသည်။ ဤမျှနွေးထွေးသော အမျိုးသားမျိုးနှင့် မတွေ့ရသည်မှာ ကြာပြီဖြစ်သည်။

သာမန်အမျိုးသား ကျင့်ကြံသူများသည် နှာဘူးများသာ ဖြစ်ကြပြီး သူမကိုမြင်သည်နှင့် သိမ်းပိုက်ချင်ကြသည်။

ဤအမျိုးသားကဲ့သို့ သူမကိုယ်တိုင် ဆက်သတာတောင်မှ စိတ်မလှုပ်ရှားဘဲ နေနိုင်သူ မရှိသလောက်ပင်။

ငြင်းတောင် ငြင်းလိုက်သေး၏။

ဤအမျိုးသားသည် စစ်မှန်သော လူကြီးလူကောင်းဖြစ်သည်ဟုသာ ဆိုရပေမည်။

အမှန်တကယ်တွင် ယုံထိုက်ကျွန်း၌ ရှိစဉ်ကတည်းက ဤအမျိုးသားသည် စတုတ္ထအဆင့် မိစ္ဆာကျင့်ကြံသူအများအပြားကို ရင်ဆိုင်ပြီး၊ မြူနှင်းနန်းတော်မှ အမျိုးသမီးကျင့်ကြံသူများကို ကယ်တင်ပေးခဲ့စဉ်ကတည်းက ဤအမျိုးသားသည် စစ်မှန်သော လူကြီးလူကောင်းဖြစ်ကြောင်း သူမ သိခဲ့သည်။

ယခုအခါ ဤအချက်ကို ပိုမိုသေချာသွားစေခဲ့ခြင်း ဖြစ်၏။

အကယ်၍ လောကတွင် ဤကဲ့သို့သော လူကြီးလူကောင်းများ များပြားလာပါက ကျင့်ကြံခြင်းလောကသည် ဤမျှရက်စက်ကြမ်းကြုတ်လိမ့်မည် မဟုတ်ပေ။

ဝမ်းနည်းစရာမှာ ဤသည်မှာ စိတ်ကူးယဉ် အိပ်မက်သက်သက်သာ ဖြစ်ပေသည်။

…………

နောက်ထပ်တစ်ရက် ကြာပြီးနောက်…။

ကျိုးစွေ့၏ကိုယ်ပွားသည် မြူနှင်းနန်းတော်၏ တည်နေရာရွှေ့ပြောင်းအစီအရင်မှတစ်ဆင့် ဝူကျိမဟာမိတ်အဖွဲ့ဆီသို့ တိုက်ရိုက်ပြန်ရောက်လာခဲ့သည်။

ထို့နောက် ဝူကျိမဟာမိတ်အဖွဲ့၏ တည်နေရာရွှေ့ပြောင်းအစီအရင်မှတစ်ဆင့် ကြယ်သုံးပွင့်ကျွန်းစုသို့ ပြန်ရောက်လာပြီး၊ ယခုတစ်ကြိမ် ရရှိခဲ့သော ရတနာပစ္စည်းများကို မူလခန္ဓာကိုယ်ထံသို့ ပေးအပ်လိုက်တော့သည်။

"ဒါက နဂါးမုတ်ဆိတ်ရေခဲမီးအသီးလား..."

ဤအခိုက်အတန့်တွင် ကျိုးစွေ့သည် ရွှမ်ဟွမ်ကျွန်းရှိ လိုဏ်ဂူတစ်ခုထဲတွင် နေထိုင်လျက်ရှိပြီး၊ သူ့လက်ထဲတွင် အနီရောင်အသီးတစ်လုံးကို ကိုင်ထားလေသည်။ ထိုအသီးပေါ်တွင် ရွှေရောင်နဂါးမုတ်ဆိတ်မွေးများ ပေါက်ရောက်နေပြီး အတွင်း၌ ရေခဲနှင့်မီး၏ စွမ်းအင်များ ပါဝင်နေသည်။

သံသယဖြစ်ဖွယ်မရှိ၊ ဤသည်မှာ 'ပစ္စည်းရှာဖွေကူ' ပြောသော 'နဂါးမုတ်ဆိတ်ရေခဲမီးအသီး' ပင် ဖြစ်ပေ၏။

ရှေးဟောင်းမိစ္ဆာကမ္ဘာတွင်သာ ပေါက်ရောက်သော နှစ်တစ်ထောင်ဝိညာဉ်အသီး ဖြစ်လေသည်။

အကယ်၍ ထိုမိစ္ဆာကျင့်ကြံသူများသာ ကျင့်ကြံခြင်းလောကသို့ ရောက်မလာခဲ့ပါက၊ ဤကဲ့သို့သော သဘာဝရတနာကို ရရှိနိုင်မည်မဟုတ်ချေ။

ဤနှစ်တစ်ထောင်ဝိညာဉ်အသီးတွင် ကြီးမားသော ဆေးစွမ်းအင်များ ပါဝင်နေကြောင်း၊ လောကတွင် ရှားပါးသော ဝိညာဉ်အသီးဖြစ်ကြောင်း သူ ခံစားမိလိုက်သည်။

ထိုကျောင်းနဂါးက ဤအသီးကို တစ်ချိန်လုံး ကိုယ်နှင့်မကွာ သယ်ဆောင်ထားခြင်းမှာ အံ့သြစရာ မဟုတ်တော့ပေ။

လုံလောက်အောင် တန်ဖိုးမရှိပါက ကျောင်းနဂါး၏ မျက်စိထဲ ဝင်နိုင်မည်မဟုတ်ပေ။

ဤအကြောင်းကို တွေးမိပြီးနောက် ကျိုးစွေ့သည် တွန့်ဆုတ်မနေတော့ဘဲ 'နဂါးမုတ်ဆိတ်ရေခဲမီးအသီး' ကို ချက်ချင်းစားလိုက်တော့သည်။

ဝုန်း... ဝုန်း...

တစ်ခဏချင်းတွင် ဤနှစ်တစ်ထောင်ဝိညာဉ်အသီးသည် ပါးစပ်ထဲရောက်သည်နှင့် အရည်ပျော်သွားပြီး၊ ခန္ဓာကိုယ်ထဲသို့ ရောက်ရှိသွားသောအခါ ကြီးမားပြီး သန့်စင်သော ရေခဲနှင့်မီးဆေးစွမ်းအင်များအဖြစ် ပြောင်းလဲသွားကာ၊ သူ့ခန္ဓာကိုယ်တစ်ခုလုံးကို ကြီးမားသော ဆေးစွမ်းအင်ထဲတွင် စိမ်ထားသကဲ့သို့ ဖြစ်သွားတော့သည်။

အစစ်အမှန်နဂါးစွမ်းအားအချို့ပင် သူ၏ခန္ဓာကိုယ်ထဲသို့ ဝင်ရောက်လာသည်။

သူ၏ကျောဘက်တွင် အစစ်အမှန်နဂါး ပုံရိပ်ယောင်တစ်ခု ပေါ်လာပြီး၊ ဟိန်းဟောက်သံများ ပြုလုပ်ကာ တိမ်မြူစီးနင်းနေသကဲ့သို့ ရှိလေသည်။

လိုဏ်ဂူတစ်ခုလုံးမှာ တုန်ခါနေပြီး တဝုန်းဝုန်း မြည်ဟည်းနေတော့သည်။

ဤအခိုက်အတန့်တွင် သူ၏ခန္ဓာကိုယ်တစ်ခုလုံးသည် ကောင်းကင်နှင့်မြေကြီး ပြောင်းပြန်လှန်သကဲ့သို့ အပြောင်းအလဲများ ဖြစ်ပေါ်နေပြီး၊ ခန္ဓာကိုယ်အစိတ်အပိုင်းတိုင်းသည် ဤနှစ်တစ်ထောင်ဝိညာဉ်အသီး၏ သန့်စင်ပေးမှုကို ရရှိနေသကဲ့သို့ ဖြစ်နေချေသည်။

ကြီးမားသော စွမ်းအင်ဒီရေလှိုင်းများသည် အဆက်မပြတ် ဝင်ရောက်လာပြီး၊ ရိုက်ခတ်မှုများ တစ်ကြိမ်ပြီးတစ်ကြိမ် ဖြစ်ပေါ်နေကာ ဒီရေလှိုင်းများကဲ့သို့ မရပ်မနား ဖြစ်နေတော့သည်။

တစ်ချိန်တည်းမှာပင် သူ၏ကျင့်ကြံခြင်းသည်လည်း လျင်မြန်စွာတိုးတက်လာပြီး အနည်းဆုံး ဆယ်စုနှစ်ပေါင်းများစွာ ကြိုးစားကျင့်ကြံရမည့်အချိန်ကို သက်သာစေခဲ့သည်။

စတုတ္ထအဆင့် ရတနာဆေးလုံး အများအပြား၏ ဆေးစွမ်းအင်ထက် မလျော့နည်းပေ။

မှန်ပေသည်၊ အရေးအကြီးဆုံးမှာ စိတ်ဝိညာဉ်အမြစ် အရည်အသွေးတိုးတက်လာခြင်း ဖြစ်ပေ၏။

ဤလျှို့ဝှက်ဆန်းကြယ်သော စွမ်းအင်များသည် သူ၏စိတ်ဝိညာဉ်အမြစ်ထဲသို့ ဝင်ရောက်သွားပြီး၊ စိတ်ဝိညာဉ်အမြစ် အဆင့်အတန်းကို အဆက်မပြတ်မြှင့်တင်ပေးနေသည်။

မူလက သူ၏စိတ်ဝိညာဉ်အမြစ်သည် ဒုတိယအဆင့် ပြီးပြည့်စုံခြင်းနယ်ပယ်သို့ ရောက်ရှိနေပြီ ဖြစ်ပြီး၊ ပထမအဆင့်နယ်ပယ်သို့ ရောက်ရှိရန် ခြေတစ်လှမ်းသာ လိုတော့သည်။

ယခုအခါ 'နဂါးမုတ်ဆိတ်ရေခဲမီးအသီး' ၏ စွမ်းအင်ကို ရရှိလိုက်ရာ တံခါးဝရောက်မှ ကန်သွင်းလိုက်သကဲ့သို့ ဖြစ်သွားပြီး ဤအဆို့အတားအဆင့်ကို ချောမွေ့စွာ ချိုးဖျက်နိုင်ခဲ့တော့သည်။

ပထမအဆင့် စိတ်ဝိညာဉ်အမြစ်…။

ချက်ချင်းပင် ကျိုးစွေ့၏ခန္ဓာကိုယ်သည် တုန်ခါသွားပြီး တစ်ကိုယ်လုံးရှိ အရိုးနှင့်အကြောများ၊ ကလီစာများ၊ ဆဲလ်တစ်ခုချင်းစီပါမကျန် တုန်ခါမှုဖြစ်ပေါ်လာကာ၊ ခန္ဓာကိုယ်ထဲတွင် တာအိုတရားသံများ ပေါ်ထွက်လာသကဲ့သို့ ဖြစ်သွားရသည်။

ကမ္ဘာလောကကြီးတစ်ခုလုံး ပြောင်းလဲသွားသကဲ့သို့ သူ ခံစားလိုက်ရသည်။

ယခင်ကနှင့်နှိုင်းယှဉ်လျှင် သဘာဝဝိညာဉ်စွမ်းအင် စုပ်ယူမှုစွမ်းရည်သည် အနည်းဆုံး ထက်ဝက်ခန့် တိုးတက်လာတော့သည်။

သူ၏ နားလည်သဘောပေါက်နိုင်စွမ်းသည်လည်း အတိုင်းအတာတစ်ခုအထိ တိုးတက်လာခဲ့ပြန်သည်။

သူ၏ပါရမီအရည်အချင်းသည် ယခင်ကထက် အများကြီး ပိုမိုကောင်းမွန်လာသည်ဟု ဆိုနိုင်ပေသည်။

ယခင်နှင့် နှိုင်းယှဉ်၍ မရနိုင်တော့ပေ။

"ဒါက ပထမအဆင့် စိတ်ဝိညာဉ်အမြစ်ရဲ့ ပါရမီလား..."

"ဒီလိုကျင့်ကြံခြင်း ပါရမီမျိုးက ဝိညာဉ်သန္ဓေသား ဂိုဏ်းတွေမှာဆိုရင်တောင် အမွေခံတပည့် ဖြစ်လောက်ပြီ..."

ကျိုးစွေ့၏ မျက်လုံးများတွင် အရောင်အဝါများ တောက်ပနေပြီး အတိုင်းအဆမရှိ စိတ်လှုပ်ရှားနေလေသည်။

သူသည် အချိန်များစွာ ကုန်ဆုံးပြီးနောက် နောက်ဆုံးတွင် သူ၏စိတ်ဝိညာဉ်အမြစ်ကို ပထမအဆင့်နယ်ပယ်သို့ မြှင့်တင်နိုင်ခဲ့ပြီ ဖြစ်၏။

ဤကဲ့သို့သော စိတ်ဝိညာဉ်အမြစ်ပါရမီသည် ကျင့်ကြံခြင်းလောကတစ်ခုလုံးကို ကြည့်လျှင်ပင် အမာခံကျောရိုး ဖြစ်နေပြီဟု ဆိုနိုင်သည်။

မည်သို့ပင်ဖြစ်စေ ကောင်းကင်အဆင့် စိတ်ဝိညာဉ်အမြစ် ရှိသူများက နည်းပါးလွန်းလှသည်။

နတ်ဘုရားအသွင်ပြောင်းအဆင့် ဂိုဏ်းများတွင်ပင် ကောင်းကင်အဆင့် စိတ်ဝိညာဉ်အမြစ်ရှိသော ကျင့်ကြံသူများကို လက်ချိုးရေတွက်၍ ရပေသည်။

ရတောင့်ရခဲပင် ဖြစ်ချေသည်။

အတိတ်က အင်မော်တယ်ရှားကျွန်းတွင်ရှိစဉ် ဤမျှကြီးမားသော ကျွန်းကြီးပေါ်၌ ကောင်းကင်အဆင့် စိတ်ဝိညာဉ်အမြစ် ကျင့်ကြံသူကို ရှာဖွေရန် အလွန်ခက်ခဲခဲ့သည်။

အခြေခံအားဖြင့် ပထမအဆင့် စိတ်ဝိညာဉ်အမြစ်သည် ကျင့်ကြံသူအများအပြားကြားတွင် ထိပ်တန်း အထွတ်အထိပ်ဖြစ်နေပြီ ဖြစ်၏။

"ဒါပေမဲ့ ဒီလောက်နဲ့ မလုံလောက်သေးဘူး..."

"အနည်းဆုံးတော့ ကောင်းကင်အဆင့် စိတ်ဝိညာဉ်အမြစ်အဆင့်ထိ မြှင့်တင်နိုင်မှ ကျင့်ကြံခြင်းလောကရဲ့ ပြိုင်ဘက်ကင်း ပါရမီရှင်လို့ သတ်မှတ်လို့ ရမှာ..."

"ပထမအဆင့် စိတ်ဝိညာဉ်အမြစ် ဆိုတာက အစပျိုးရုံလောက်ပဲ ရှိသေးတယ်..."

ကျိုးစွေ့ လက်သီးကို ဆုပ်လိုက်ပြီး ရည်မှန်းချက်ကြီးမားနေမိသည်။

အခြားကျင့်ကြံသူများအတွက်မူ ပထမအဆင့် စိတ်ဝိညာဉ်အမြစ်ပါရမီသည် အတော်လေးကောင်းမွန်နေပြီ ဖြစ်သည်။

သို့သော် အင်မော်တယ်ဖြစ်လာရန် ရည်မှန်းထားသော သူ့အတွက်မူ ဤပါရမီမျိုးနှင့် မလုံလောက်သေးပေ။

အနည်းဆုံးတော့ ကောင်းကင်အဆင့် စိတ်ဝိညာဉ်အမြစ်ပါရမီကို ပိုင်ဆိုင်မှသာ ရှေ့ဆက်ရမည့် ကျင့်ကြံခြင်းလမ်းခရီးတွင် အသာစီးရယူထားနိုင်မည် ဖြစ်၏။

နှစ်နာရီခန့် ကြာပြီးနောက်...။

ကျိုးစွေ့သည် ကျင့်ကြံခြင်းကို ခိုင်မာအောင်လုပ်ဆောင်ပြီးနောက် ယခုတစ်ကြိမ် ရရှိခဲ့သော ပစ္စည်းများကို စစ်ဆေးကြည့်ရှုလိုက်သည်။

မည်သို့ပင်ဖြစ်စေ ယခုတစ်ကြိမ်တွင် သူသည် စတုတ္ထအဆင့် မိစ္ဆာသားရဲ (၂၅) ကောင်ကို သတ်ဖြတ်နိုင်ခဲ့ပြီး၊ ထိုအထဲတွင် စတုတ္ထအဆင့် အထွတ်အထိပ်တစ်ကောင်လည်း ပါဝင်သည်။

ရရှိသော အကျိုးအမြတ်သည် လွန်ခဲ့သောတစ်ကြိမ် မိုးကြိုးသိမ်းငှက်မျိုးနွယ်စု ကျူးကျော်စဉ်ကနှင့် မယှဉ်နိုင်သော်လည်း အတော်လေးကောင်းမွန်နေပြီ ဖြစ်၏။

"မဆိုးဘူး... မဆိုးဘူး... စတုတ္ထအဆင့် ပစ္စည်းတွေ ဒီလောက်အများကြီး စုဆောင်းမိသွားတာပဲ..."

"ဒါတွေအားလုံးကို စတုတ္ထအဆင့် ရုပ်သေးရုပ်တွေလုပ်ဖို့ ပါဝင်ပစ္စည်းအနေနဲ့ သုံးလို့ရတယ်..."

"အနည်းဆုံးတော့ စတုတ္ထအဆင့် ရုပ်သေးရုပ် ဆယ်ကောင်ကျော်လောက် သန့်စင်လို့ ရမယ်..."

"တကယ်လို့ ပစ္စည်း လုံလောက်အောင်စုဆောင်းနိုင်ရင်... ကြီးမားတဲ့ ရုပ်သေးတပ်မတော်တစ်ခုတောင် ဖွဲ့စည်းလို့ ရနိုင်တယ်..."

ကျိုးစွေ့ မေးစေ့ကို ပွတ်သပ်လိုက်သည်။

သူသည် ရုပ်သေးပညာကိုလည်း လေ့လာခဲ့ပြီး အနည်းဆုံး စတုတ္ထအဆင့်သို့ ရောက်ရှိနေပြီ ဖြစ်၏။

သူ၏လက်ရှိ နည်းပညာဖြင့် စတုတ္ထအဆင့် ရုပ်သေးရုပ်ကို သန့်စင်ရန်မှာ ပြဿနာကြီး မဟုတ်ပေ။

မှန်ပေသည်၊ စတုတ္ထအဆင့် ရုပ်သေးရုပ်သည် သူ့အတွက် အင်အားများစွာ တိုးစေမည်မဟုတ်ပေ။

သို့သော် ရွှမ်ဟွမ်ဂိုဏ်းနှင့် သူ၏တာအိုလက်တွဲဖော်များအတွက်မူ စတုတ္ထအဆင့် ရုပ်သေးရုပ်များသည် သူတို့၏ တိုက်ခိုက်စွမ်းရည်ကို အပြည့်အဝမြှင့်တင်ပေးနိုင်သည်။

အန္တရာယ်ကြုံတွေ့ရပါက စတုတ္ထအဆင့် ရုပ်သေးရုပ်များကို ထုတ်သုံးပြီး တိုက်ခိုက်နိုင်သည်။

ထို့အပြင် ရုပ်သေးရုပ်သန့်စင်ခြင်းကလည်း အချိန်ကုန် လူပန်းဖြစ်စေသော ကိစ္စမဟုတ်ပေ။

သူ့တွင် ကိုယ်ပွားများစွာ ရှိသည် မဟုတ်ပါလော။

သူ၏ကိုယ်ပွားများကို သန့်စင်ခိုင်းလိုက်လျှင် လုံလောက်ပေသည်။

မူလခန္ဓာကိုယ်၏ အဓိက အားစိုက်ထုတ်ရမည့်အရာမှာ ကျင့်ကြံခြင်းအဆင့်ကို မြှင့်တင်ရန်သာ ဖြစ်ချေ၏။