ဒါက ချူတျဲယီရဲ့ ဆရာသခင်လေ၊ ယောက်ျားက လက်ရဲဇက်ရဲ နိုင်လှချည်လား(၃)။

"ဒီတစ်ခါ ကျုပ်တို့က လမ်းကြောင်းလေးခုခွဲပြီး မင်ကွမ်းကျွန်းကို တိုက်ခိုက်မယ်…"

"အရှေ့ဘက်လမ်းကြောင်းကို ကောင်းကင်ဓားဂိုဏ်းနဲ့ ရွှမ်ပေါင်မျှော်စင်က တာဝန်ယူမယ်…"

"အနောက်ဘက်လမ်းကြောင်းကို မြူနှင်းနန်းတော်နဲ့ ဆည်းဆာဂိုဏ်းက တာဝန်ယူမယ်…"

"တောင်ဘက်လမ်းကြောင်းကို ကောင်းကင်မိစ္ဆာဂိုဏ်းနဲ့ ဝူကျိမဟာမိတ်အဖွဲ့က တာဝန်ယူမယ်…"

"မြောက်ဘက်လမ်းကြောင်းကိုတော့ ဟေးရှားနန်းတော်နဲ့ ရွှမ်ယင်ဂိုဏ်းက တာဝန်ယူမယ်…"

"မင်းတို့ သဘောမတူတာ တစ်ခုခု မရှိဘူးမလား.."

ချုံးရွှီတာအိုအရှင်က ချက်ချင်းပင် တာဝန်ခွဲဝေပေးလိုက်ပြီး ဝိညာဉ်သန္ဓေသား ကျင့်ကြံသူများကို ကြည့်လိုက်သည်။

"ပြဿနာ မရှိပါဘူး... ကျွန်မတို့ မြူနှင်းနန်းတော်ရဲ့ ပျံသန်းရေးလှေတပ်ဖွဲ့လည်း ထွက်ခွာလာပြီး ဝေဟင်စစ်မျက်နှာကို သေချာပေါက် သိမ်းပိုက်ပေးပါ့မယ်…"

မြူနှင်းနန်းတော်၏ သခင်မ ယဲ့ဖေးရိုက လေးနက်စွာ ပြောလိုက်သည်။

မြူနှင်းနန်းတော်၏ အကျော်ကြားဆုံးလက်နက်မှာ သံသယဖြစ်ဖွယ်မရှိ ပျံသန်းရေးလှေများ ဖြစ်သည်။

သူမတို့သည် ဝိညာဉ်ရတနာသွန်းလုပ်ခြင်း၌ အလွန်ပင် ကျွမ်းကျင်ကြသည်။

အမျိုးသမီးကျင့်ကြံသူများ ဖြစ်ကြသည့်အားလျော်စွာ တစ်ဦးချင်း တိုက်ခိုက်ပါက အခြားကျင့်ကြံသူများကို ယှဉ်ပြိုင်နိုင်မည် မဟုတ်ဘဲ အားနည်းချက် ရှိနေနိုင်သည်။

ထို့ကြောင့် သူမတို့သည် လက်နက်ကိရိယာများ၏ စွမ်းအားကို ရယူအသုံးပြုကြသည်။

ထိုအထဲတွင် ပျံသန်းရေးလှေသည် မြူနှင်းနန်းတော်၏ ကိုယ်စားပြုလက်ရာပင် ဖြစ်လေသည်။

ကျင့်ကြံသူအများအပြားသည် မြူနှင်းနန်းတော်မှ ထုတ်လုပ်သော ပျံသန်းရေးလှေများကို ဝယ်ယူလိုကြပြီး အမှတ်တံဆိပ်တစ်ခု ဖြစ်လာခဲ့သည်။

ပျံသန်းရေးလှေများကို မောင်းနှင်ခြင်းအားဖြင့် သူမတို့၏ အမြန်နှုန်းမှာ အလွန် မြန်ဆန်ပြီး၊ တစ်ချိန်တည်းမှာပင် ပျံသန်းရေးလှေ၏ စွမ်းအားကို အသုံးပြုကာ ဝေဟင်မှ တိုက်ခိုက်နိုင်ပြီး စွမ်းအားကြီးမားကာ ဝေဟင်အရှင်သခင်များဟု ခေါ်ဆိုထိုက်သည်။

"ကျုပ်က ရွှမ်ပေါင်မျှော်စင်ရဲ့ ဘဏ္ဍာတိုက်ထဲကနေ စတုတ္ထအဆင့် ရုပ်သေးရုပ် (၁၈) ရုပ်၊ တတိယအဆင့် ရုပ်သေးရုပ် သုံးသောင်းနဲ့ ဒုတိယအဆင့် ရုပ်သေးရုပ် တစ်သန်းကို ယူဆောင်လာခဲ့မယ်... စစ်မြေပြင်မှာ သေချာပေါက် စွမ်းဆောင်ရည်ပြနိုင်မှာပါ…"

ရွှမ်ပေါင်မျှော်စင်သခင် ထျန်းဆွမ်းတာအိုအရှင်က ခပ်ဟဟ ပြုံးလိုက်သည်။

ချန်လန်ပင်လယ်ဒေသ၏ အချမ်းသာဆုံး အင်အားစုအနေဖြင့် သူတို့သည် ရုပ်သေးရုပ်သွန်းလုပ်ခြင်း၌ ကျွမ်းကျင်ကြသည်။

ရွှမ်ပေါင်မျှော်စင်မှ ကျင့်ကြံသူတိုင်းလိုလိုတွင် ရုပ်သေးရုပ်များ ရှိကြပြီး တစ်အပေါင်းတစ်သည် နှစ်ထက်များသော စွမ်းအားကို ထုတ်ဖော်နိုင်ပေသည်။

ရွှမ်ပေါင်မျှော်စင်၏ ရုပ်သေးရုပ်တပ်မတော်သည်လည်း ချန်လန်ပင်လယ်ဒေသတွင် ကျော်ကြားပြီး တိုက်ခိုက်ရေးစွမ်းရည် အလွန် မြင့်မားသည်။

"ဟားဟား... ကျုပ်တို့ ဆည်းဆာဂိုဏ်းကတော့ အဲဒီလောက် မချမ်းသာဘူး…"

"ဒါပေမဲ့ ကျုပ်တို့က အဆိပ်မြူတွေ၊ အဆိပ်ဆေးလုံးတွေ ဖော်စပ်ရာမှာ ကျွမ်းကျင်ပါတယ်…"

"စစ်ပွဲစတာနဲ့ ကျုပ်တို့က အဆိပ်မြူတွေ လွှတ်ပေးလိုက်မယ်... မိစ္ဆာသားရဲတွေလည်း တောင့်ခံနိုင်မှာ မဟုတ်ဘူး…"

ဆည်းဆာဂိုဏ်းချုပ် ယွီယန်တာအိုအရှင်က ဖြူဖွေးသော မုတ်ဆိတ်မွေးများကို ပွတ်သပ်လိုက်သည်။

ဆေးဖော်စပ်ပညာရှင်များ ဖြစ်သော်လည်း တိုက်ခိုက်နိုင်စွမ်း မရှိသည်တော့ မဟုတ်ပေ။

သူတို့သည် လူကို ကယ်နိုင်သလို သတ်လည်း သတ်နိုင်သည်။

ကျင့်ကြံခြင်းကို တိုးတက်စေသော ဆေးလုံးများ ဖော်စပ်နိုင်သလို အဆိပ်ဆေးလုံးများလည်း ဖော်စပ်နိုင်သည်။

ဆေးဝါးနှင့် အဆိပ်များ၏ အာနိသင်ကို သူတို့ထက် ပိုသိမည့်သူမရှိဟု ဆိုနိုင်ပေသည်။

မိစ္ဆာသားရဲများ၏ ခန္ဓာကိုယ်သည် လူသားများထက် ပိုမို သန်မာသော်လည်း အသွေးအသားဖြင့် တည်ဆောက်ထားခြင်းသာ ဖြစ်ပေသည်။

သူတို့ ဖော်စပ်ထားသော အဆိပ်မြူများကို တောင့်ခံနိုင်မည် မဟုတ်ပေ။ ပမာဏ တိုးလိုက်ရုံသာ ရှိသည်။

"ကျုပ် ဟေးရှားနန်းတော်က ဟေးရှားမိစ္ဆာဂူကို ဖွင့်ပြီး အထဲက ဖုတ်ကောင်ပျံတွေ အကုန်လုံးကို လွှတ်ပေးလိုက်မယ်…"

"ဖုတ်ကောင်ပျံတွေရဲ့ အကူအညီနဲ့ဆိုရင် မိစ္ဆာသားရဲတပ်လောက်က ပြောပလောက်စရာ မဟုတ်ဘူး…"

ဟေးရှားနန်းတော်သခင် ပင်လယ်ခွင်းမိစ္ဆာဘုရင်လည်း မိမိဂိုဏ်းအနေဖြင့် လက်ပိုက်ကြည့်နေ၍ မရကြောင်း သိထားသည်။ အခြားဂိုဏ်းများက ဝှက်ဖဲများကို ထုတ်သုံးနေကြရာ မိမိဘက်က ဘာမှမလုပ်ဘဲ နေ၍ မဖြစ်နိုင်ပေ။

ကံကောင်းသည်မှာ ဟေးရှားနန်းတော်သည် ဖုတ်ကောင်များနှင့် ဖုတ်ကောင်ပျံများ မွေးမြူရာတွင် ကျွမ်းကျင်ပေသည်။

ဤဖုတ်ကောင်များ၏ အင်အားကို အသုံးပြုပြီး သူတို့သည်လည်း ဖုတ်ကောင်တပ်မတော်တစ်ခုကို ထုတ်ဖော်နိုင်ပြီး ရန်သူများကို ချေမှုန်းနိုင်သည်။

"ကျုပ်တို့ ရွှမ်ယင်ဂိုဏ်းက ရွှမ်ယင်တာအိုစစ်သည် တပ်ဖွဲ့တစ်ဖွဲ့ကို စေလွှတ်ပေးမယ်…"

"သူတို့က ရွှမ်ယင်ချီတွေနဲ့ ဖွဲ့စည်းထားတဲ့ စွမ်းအားကြီး တာအိုစစ်သည်တွေပဲ…"

"ဓားပြီး လှံပြီးတယ်... မန္တန်အမျိုးမျိုးကို ကာကွယ်နိုင်တယ်... ရွှမ်ယင်ပညာရပ်တွေကိုလည်း ကျွမ်းကျင်ပြီး တိုက်ခိုက်ရေးစွမ်းရည် ပြိုင်ဘက်ကင်းတယ်…"

"အင်အားကြီးမားတဲ့ မိစ္ဆာသားရဲတွေကို ရင်ဆိုင်ရရင်တောင် ယှဉ်ပြိုင်တိုက်ခိုက်နိုင်တယ်…"

ရွှမ်ယင်ဂိုဏ်းချုပ် စိတ်ခံစားမှုခုနစ်ပါး မိစ္ဆာဘုရင်က လေးနက်စွာ ပြောလိုက်သည်။

ရွှမ်ယင်တာအိုစစ်သည်များသည် ရွှမ်ယင်ဂိုဏ်း၏ ဝှက်ဖဲများထဲမှ တစ်ခုဖြစ်သည်။

သူတို့၏ ခန္ဓာကိုယ်ထဲတွင် ရွှမ်ယင်ချီများ ဖြည့်သွင်းထားပြီး ခံစားချက်များကို ဖျက်ဆီးထားသဖြင့် ရုပ်သေးရုပ်များနှင့် တူညီသည်။

တစ်ချိန်တည်းမှာပင် မောပန်းခြင်းနှင့် နာကျင်ခြင်းကို မသိရှိကြပေ။

အခြေခံအားဖြင့် သူတို့သည် သေမင်းကို မကြောက်ဘဲ တစ်ယောက်လျှင် ဆယ်ယောက်နှင့် ယှဉ်တိုက်နိုင်သည်။

ရွှမ်ယင်ဂိုဏ်း၏ မသေမျိုးတပ်မတော်ဟု ခေါ်ဆိုထိုက်သည်။

"ခစ်ခစ်... ကျွန်မတို့ ကောင်းကင်မိစ္ဆာဂိုဏ်းကတော့ အဲဒီလောက်စွမ်းရည် မရှိပါဘူး…"

"ဒါပေမဲ့ ကောင်းကင်မိစ္ဆာတပ်ဖွဲ့တစ်ဖွဲ့ကိုတော့ ဆင့်ခေါ်နိုင်ပါတယ်…"

"ဒီကောင်းကင်မိစ္ဆာတွေက မိစ္ဆာသားရဲတွေရဲ့ စိတ်မိစ္ဆာကို လှုံ့ဆော်ပေးနိုင်ပြီး အချင်းချင်း သတ်ဖြတ်အောင် လုပ်နိုင်တယ်…"

"ဒါပေမဲ့ ယဇ်ကောင်တွေကိုတော့ ကြိုတင်ပြင်ဆင်ထားဖို့ လိုတယ်…"

ကောင်းကင်မိစ္ဆာဂိုဏ်းချုပ် ချန်ဇီယွင်က တခစ်ခစ်ရယ်မောပြီး ကောင်းကင်မိစ္ဆာဂိုဏ်း၏ အစီအစဉ်ကို ပြောပြလိုက်သည်။

သူမ ပေါ့ပါးစွာ ပြောလိုက်သော်လည်း ကောင်းကင်မိစ္ဆာတပ်ဖွဲ့သည် ကောင်းကင်မိစ္ဆာဂိုဏ်း၏ ဝှက်ဖဲများထဲမှ တစ်ခုဖြစ်ပေသည်။

၎င်းတို့သည် ပုံသဏ္ဌာန်မဲ့ပြီး ဟင်းလင်းပြင်ထဲသို့ ဝင်ရောက်နိုင်ကာ၊ စိတ်နှလုံးထဲသို့ ဝင်ရောက်ပြီး စိတ်မိစ္ဆာကို ထိန်းချုပ်ရာတွင် ကျွမ်းကျင်သည်။

မိစ္ဆာသားရဲများပင် ကောင်းကင်မိစ္ဆာ၏ စွမ်းအားကို ကြောက်ရွံ့ကြသည်။

အကယ်၍ ကောင်းကင်မိစ္ဆာတပ်ဖွဲ့ ထွက်ပေါ်လာပါက ရောက်ရှိရာနေရာတိုင်းတွင် မြက်ပင်တစ်ပင်မျှ ပေါက်ရောက်နိုင်မည် မဟုတ်ပေ။

"အဟမ်း... ကျုပ်တို့ ဝူကျိမဟာမိတ်အဖွဲ့ကတော့ တစ်ဦးချင်း တိုက်ခိုက်ရေးစွမ်းရည် ကောင်းမွန်ပါတယ်…"

"ရောင်းရင်းတို့လောက် အခြေခံအုတ်မြစ် မခိုင်မာပေမယ့် အတိုင်းအတာတစ်ခုအထိတော့ ကူညီပေးနိုင်ပါတယ်…"

ဝူကျိတာအိုအရှင်က ချောင်းဟန့်လိုက်ပြီး အနည်းငယ် ရှက်ရွံ့နေသော်လည်း မျက်နှာပြောင်တိုက်ကာ ပြောလိုက်တော့သည်။

"အဲ..."

ဤစကားကို ကြားရသောအခါ ကျိုးစွေ့မှာ နှုတ်ခမ်းမဲ့လိုက်မိသည်။ ဝူကျိမဟာမိတ်အဖွဲ့သည် အခြား ဝိညာဉ်သန္ဓေသား အင်အားစုများနှင့် ယှဉ်လျှင် အခြေခံအုတ်မြစ် မည်မျှ ကွာခြားကြောင်း ဤအချက်က ပြသနေသည်။

အခြား ဝိညာဉ်သန္ဓေသား အင်အားစုများတွင် ကြီးသည်ဖြစ်စေ၊ ငယ်သည်ဖြစ်စေ ဝှက်ဖဲများ ရှိကြသည်။

သို့သော် ဝူကျိမဟာမိတ်အဖွဲ့တွင်မူ တစ်ကိုယ်တော် ဝိညာဉ်သန္ဓေသားများမှလွဲ၍ ထုတ်ပြစရာ မရှိလှပေ။

သို့သော် ဤသည်မှာလည်း မတတ်နိုင်သော ကိစ္စဖြစ်သည်။

ဝူကျိမဟာမိတ်အဖွဲ့သည် တစ်ကိုယ်တော်ကျင့်ကြံသူ မဟာမိတ်အဖွဲ့သာ ဖြစ်ရာ၊ အခြား ဝိညာဉ်သန္ဓေသား ဂိုဏ်းများကို မယှဉ်နိုင်သည်မှာ သဘာဝကျပေသည်။

သို့သော် အခြား ဝိညာဉ်သန္ဓေသားများက ဤကိစ္စကို ဂရုမစိုက်ကြပေ။ ဝူကျိမဟာမိတ်အဖွဲ့၏ နောက်ခံကို မည်သူမဆို သိရှိကြသည် မဟုတ်လော။

တစ်ကိုယ်တော်ကျင့်ကြံသူ မဟာမိတ်အဖွဲ့ကို အခြေခံအုတ်မြစ် ထုတ်ပြခိုင်းခြင်းသည် အလွန်ခက်ခဲသော ကိစ္စဖြစ်သည်။

"ကောင်းပြီ... ဒါဆိုရင် နောက်ထပ် တစ်လကြာရင် ငါတို့ မြူနှင်းကျွန်းကို တည်နေရာရွှေ့ပြောင်းပြီး သွားကြမယ်…"

"ပြီးရင် မြူနှင်းကျွန်းကနေ တိုက်ရိုက်ထွက်ခွာပြီး မင်ကွမ်းကျွန်းကို ဝင်တိုက်ကြမယ်…"

ချုံးရွှီတာအိုအရှင်က ချက်ချင်း အတည်ပြုလိုက်တော့သည်။

တစ်လအချိန်ယူရခြင်းမှာ အင်အားစုအသီးသီး ပြင်ဆင်ချိန် လိုအပ်သောကြောင့် ဖြစ်ပေသည်။

ရုတ်တရက် လှုပ်ရှား၍ မဖြစ်နိုင်ပေ၊ သို့မဟုတ်ပါက အလွယ်တကူ ကျရှုံးသွားနိုင်သည်မဟုတ်လော။

"ကောင်းပါပြီ…"

ဝိညာဉ်သန္ဓေသား ကျင့်ကြံသူအားလုံး ခေါင်းညိတ်လိုက်ကြသည်။

အမှန်တကယ်တွင် ဤအစီအစဉ်ကို သူတို့ ယခင်ကတည်းက ကြားဖူးပြီးဖြစ်ရာ ယခုအခါမူ အသေးစိတ်အချက်အလက်များကို ဖြည့်စွက်လိုက်ခြင်းသာ ဖြစ်ပေသည်။

"ဒါဆိုရင် ရောင်းရင်းတို့ ကျုပ်ရဲ့ ကောင်းကင်ဓားဂိုဏ်းမှာ ခေတ္တ နေထိုင်ကြပါ…"

"ရောင်းရင်းတို့အတွက် ကျင့်ကြံရေးဂူတွေကို ပြင်ဆင်ထားပြီးပါပြီ…"

"အရင် အနားယူပြီး အားမွေးထားကြပါ…"

ချုံးရွှီတာအိုအရှင်က ခပ်ဟဟ ပြုံးလိုက်သည်။

အမှန်အတိုင်း ဆိုရလျှင် ခရီးဝေး တည်နေရာရွှေ့ပြောင်းအစီအရင်ကို အသုံးပြုနိုင်သော အကြိမ်အရေအတွက်မှာ အကန့်အသတ် ရှိသည်။

အတွင်းရှိ အထွတ်အထိပ်အဆင့် ဝိညာဉ်ကျောက်တုံးများ၏ စွမ်းအင်သည် အကန့်အသတ်မရှိ မဟုတ်ဘဲ အားပြန်ဖြည့်ရန် အချိန်တစ်ခု လိုအပ်ပေသည်။

ထို့ကြောင့် အမြဲတစေ အသုံးပြု၍ မဖြစ်နိုင်ပေ။

အရေးကြီးသောအချိန်တွင် တည်နေရာရွှေ့ပြောင်းအစီအရင်သည် စွမ်းအင်ကုန်ခမ်းသွားပြီး အသုံးပြုမရ ဖြစ်မည်ကို ရှောင်ရှားရန်၊ ချွေတာနိုင်သမျှ ချွေတာရမည် ဖြစ်လေသည်။

ထို့ကြောင့် ဝိညာဉ်သန္ဓေသား ကျင့်ကြံသူအများအပြားသည် ကောင်းကင်ဓားဂိုဏ်းတွင် နေထိုင်ပြီး လှုပ်ရှားမည့်အချိန်ကို စောင့်ဆိုင်းနေကြရတော့သည်။

ကောင်းကင်ဓားဂိုဏ်းသည်လည်း ဤအချက်ကို ထည့်သွင်းစဉ်းစားပြီးဖြစ်ရာ ဝိညာဉ်သန္ဓေသား ကျင့်ကြံသူများအတွက် ကျင့်ကြံရေးဂူများ ပြင်ဆင်ထားပြီး ဖြစ်သည်။

မည်သို့ပင်ဖြစ်စေ ကောင်းကင်ဓားကျွန်းသည် အတော်ပင် ကြီးမားလှသည်။

ဝိညာဉ်သန္ဓေသား သုံးရာကျော်အတွက် ကျင့်ကြံရေးဂူများ ပြင်ဆင်ပေးခြင်းသည် ပြောပလောက်စရာ မဟုတ်ဘဲ အပြည့်အဝ လက်ခံနိုင်ပေသည်။

မကြာမီ အချိန်အတွင်း ဝိညာဉ်သန္ဓေသားများသည် ကောင်းကင်ဓားဂိုဏ်း၏ စီစဉ်ပေးမှုအောက်တွင် သက်ဆိုင်ရာ ကျင့်ကြံရေးဂူများသို့ ရောက်ရှိသွားကြသည်။

ကျိုးစွေ့နှင့် သခင်မမက်မွန်ပွင့်တို့သည် သဘာဝကျကျပင် ကျင့်ကြံရေးဂူတစ်ခုတည်း၌ အတူတူ နေထိုင်ကြသည်။

တာအိုလက်တွဲဖော်များ ဖြစ်ကြသည့်အားလျော်စွာ ခွဲခြားနေထိုင်ရန် မဖြစ်နိုင်ပေ။

နာရီအနည်းငယ် ကြာပြီးနောက်...။

သန်းခေါင်ယံအချိန်၊ လမင်းသာ၍ ကြယ်ရောင်များ ကြဲပါးနေချိန်၌...။

ကျင့်ကြံရေးဂူအပြင်ဘက်သို့ လှပသော အရိပ်တစ်ခု ရောက်ရှိလာလေသည်။ ခန္ဓာကိုယ်အချိုးအစားမှာ သေနိုင်လောက်အောင် ဆွဲဆောင်မှုရှိပြီး အမို့အမောက်များ ပေါ်လွင်နေကာ၊ ညှို့ဓာတ်မျိုးစုံ ပျံ့နှံ့နေပြီး ကောင်းကင်နှင့် မြေကြီး၏ အလှတရားများ စုဝေးနေသကဲ့သို့ ဖြစ်နေချေသည်။

ရောက်လာသူမှာ ကောင်းကင်မိစ္ဆာဂိုဏ်းချုပ် ချန်ဇီယွင်ပင် ဖြစ်လေသည်။

"ရောင်းရင်းချန်... ကျုပ်ရဲ့ ကျင့်ကြံရေးဂူကို ဘာကိစ္စနဲ့ လာတာလဲ…"

ကျိုးစွေ့သည် ချန်ဇီယွင်၏ အရှိန်အဝါကို အာရုံခံမိသဖြင့် ကျင့်ကြံရေးဂူ၏ အကာအရံအစီအရင်ကို ဖွင့်ပေးလိုက်ပြီး ချန်ဇီယွင်ကို ဖိတ်ခေါ်လိုက်သည်။