အခန်း (၁၃၂၅-၁၃၂၇)

အခန်း (၁၃၂၅) လုံးဝ အရေးမလုပ်သော Sony

“ဥက္ကဋ္ဌခင်ဗျာ Wind and Rain အမှတ်တံဆိပ်ရဲ့ ဒီဂျစ်တယ် ဗီဒီယိုကင်မရာတွေ ဈေးကျသွားပါပြီ”

အိုဂါ နိုရီအိုသည် ခေါင်းပင် မဖော်ဘဲ မေးလိုက်သည်။ “ဘယ်လောက်အထိ ကျသွားတာလဲ”

“ဒေါ်လာ ၁၄၉၉ ပါ၊ တစ်ဝက်လောက်ကို လျော့သွားတာပါ”

အင်း... ဒီလောက်တောင် အများကြီး လျော့သွားတာလား။ ဒါပေမဲ့ ကိစ္စမရှိပါဘူး။ သူတို့ Sony ရဲ့ ဒီဂျစ်တယ် ဗီဒီယိုကင်မရာတွေက အဆင့်အတန်းမျိုးစုံ ခွဲခြားထားပြီးသားလေ။ ဒေါ်လာ တစ်သိန်းကျော်တန် ရုပ်သံဌာနသုံး စက်ပစ္စည်းတွေကနေ ဒေါ်လာ တစ်ထောင်ကျော်တန် အခြေခံအဆင့် အထိ အစုံအလင် ရှိနေတာ။

ထို့အပြင် ဒီဂျစ်တယ် ဗီဒီယိုကင်မရာလောကမှာ သူတို့ Sonyက ကမ္ဘာ့အကြီးဆုံး ခေါင်းဆောင်ကြီးပဲ။ Wind and Rain၊ Philips နဲ့ Thomsonသုံးခုလုံး ပေါင်းလိုက်ရင်တောင် သူတို့ Sony ရဲ့ အရောင်းပမာဏကို မမီသလို၊ အမြတ်အစွန်းဆိုရင်တော့ နှိုင်းယှဉ်လို့တောင် မရပါချေ။

Sony ဟာ အရောင်းအကောင်းဆုံး ဖြစ်သလို တစ်ပြိုင်နက်တည်းမှာ အမြတ်အစွန်းနှုန်းလည်း အမြင့်ဆုံး ဖြစ်နေခဲ့ရာ၊ ဤသည်မှာ သူတို့၏ အဓိက အားထားရသော ထုတ်ကုန်ပင် ဖြစ်သည်။

ဒီဂျစ်တယ် ကင်မရာ ဈေးကွက်ကိုတော့ တရုတ်ပြည်က ကုမ္ပဏီနှစ်ခုက အတော်လေး လုယူသွားခဲ့တာ မှန်ပါတယ်။ ဒါပေမဲ့ ဒီဂျစ်တယ် ဗီဒီယိုကင်မရာကျတော့ သူတို့ ဘယ်လိုမှ လုပ်နိုင်မှာ မဟုတ်ပါဘူး။

Wind and Rainရဲ့ ထုတ်ကုန်တွေကို ကြည့်လိုက်ပါဦး။ အားနည်းချက်တွေက တစ်ပုံကြီးပဲ၊ အားသာချက်ကျတော့ ဘာမှ မရှိသလောက်ပဲလေ။ ဒီလိုနဲ့ သူတို့ Sony ကို ပြိုင်ချင်နေတာလား။ ထုတ်ကုန်သစ် ထွက်တဲ့အချိန်ကိုလည်း အတူတူ ထားတယ်၊ ဈေးနှုန်းကိုလည်း အတူတူ သတ်မှတ်ခဲ့သေးတာ၊ အခုတော့ အထိနာသွားပြီ မဟုတ်လား။

Wind and Rain ဈေးချလိုက်ရတာဟာ သူတို့ ပစ္စည်းတွေ ရောင်းမထွက်လို့ ဖြစ်ရမယ်၊ ဒါကြောင့် ဈေးကွက်အနိမ့်ပိုင်းကိုပဲ အဓိက ဦးတည်ဖို့ ပြင်နေတာ ဖြစ်ရမယ်။ ဒါပေမဲ့ ဈေးချလိုက်ရင်တောင် Sony ကိုတော့ ယှဉ်နိုင်မှာ မဟုတ်ပါဘူး။

“ကိစ္စမရှိပါဘူး၊ ငါတို့လည်း အနိမ့်တန်းစား စက်တွေကို ထုတ်ထားတာပဲလေ၊ သူတို့နဲ့ ပြိုင်ခိုင်းလိုက်ပါ။ သူတို့က ဈေးချပြီး ဈေးကွက်အနိမ့်ပိုင်းကို ဝင်ချင်တာဆိုတော့၊ ငါတို့က ဒီထက်ပိုပြီး ဈေးသက်သာအောင် လုပ်နိုင်တယ်ဆိုတာကို သူတို့ သိသွားစေရမယ်။ ငါတို့ အခုနောက်ဆုံး ဒီဇိုင်းထုတ်ထားတဲ့ အခြေခံအဆင့် ဒီဂျစ်တယ် ဗီဒီယိုကင်မရာကို ဈေးကွက်ထဲ ဖြန့်လိုက်၊ ငါတို့ ဒေါ်လာ တစ်ထောင်အောက်နဲ့ ရောင်းမယ်”

လက်ထောက်ဖြစ်သူ စီစဉ်ရန် ထွက်သွားသည့်အခါ အိုဂါ နိုရီအိုသည် စီးကရက် တစ်လိပ်ကို မီးညှိလိုက်သည်။ လွန်ခဲ့သော နှစ်အနည်းငယ်အတွင်း Wind and Rain အမှတ်တံဆိပ်သည် နေရာတိုင်းတွင် သူတို့ Sony ကို ရန်စခဲ့သည်၊ သို့မဟုတ် ထို ဖုန်းယွီ ဆိုသူက သူ့ကို နေရာတိုင်းမှာ လိုက်ပြီး နှောင့်ယှက်နေခဲ့ခြင်း ဖြစ်သည်။

ထူးဆန်းသည်မှာ အမြဲတမ်း အသာစီး ရနေခဲ့သည်မှာလည်း ထို ဖုန်းယွီ တို့သာ ဖြစ်နေခဲ့သည်။ အခုတော့ ဘယ်လိုလဲ၊ ဒီဂျစ်တယ် ဗီဒီယိုကင်မရာမှာတော့ အလဲလဲအကွဲကွဲ ဖြစ်သွားပြီ မဟုတ်လား။

အဆင့်မြင့် ဗီဒီယို (HDV) စံနှုန်းတစ်ခုကို သတ်မှတ်လိုက်ရုံနဲ့ ငွေတွေ အများကြီး ရမယ်လို့ တကယ်ပဲ ထင်နေတာလား။ မင်းတို့ရဲ့စံနှုန်းကို လူတွေ လက်ခံလာအောင် တွန်းအားပေးနိုင်တယ် ဆိုဦးတော့၊ မင်းတို့မှာ ရောင်းဖို့ ထုတ်ကုန် ရှိရဦးမယ်လေ။ စံနှုန်းဆိုတာ မူပိုင်ခွင့် မဟုတ်ဘူး၊ ဘယ်လောက်ပဲ ကောင်းကောင်း၊ ဘယ်လောက်ပဲ လူတွေ အသုံးပြုနေပါစေ၊ မင်းမှာ ထုတ်ကုန် မရှိရင်တော့ ဘာမှ အသုံးမဝင်ပါဘူး။

ဒီဂျစ်တယ် ဗီဒီယိုကင်မရာ နယ်ပယ်မှာတော့ Sony ကို ယှဉ်နိုင်သူ မရှိပါချေ။

ယခုတစ်ကြိမ်တွင် ဒီဂျစ်တယ် ဗီဒီယိုကင်မရာ နယ်ပယ်မှာတင် ဖုန်းယွီကို အနိုင်ယူရန် မဟုတ်ဘဲ၊ ဒီဂျစ်တယ် ကင်မရာ နယ်ပယ်မှာပါ ထိုတရုတ် အမှတ်တံဆိပ် နှစ်ခုကို တရုတ်ပြည်ထဲအထိ ပြန်ပြီး မောင်းထုတ်ပစ်ရန် သူ ရည်ရွယ်ထားသည်။

Sonyမှာ ပိုမိုကောင်းမွန်သော အလင်းဆိုင်ရာ နည်းပညာတွေ ရှိတယ်၊ မူပိုင်ခွင့်တွေ အများကြီး ရှိတယ်၊ ပြီးတော့ ထုတ်ကုန်သစ် ဖန်တီးတဲ့ အတွေ့အကြုံတွေလည်း အများကြီး ရှိနေတဲ့အတွက် သူတို့ သေချာပေါက် အောင်မြင်မှာပါပဲ။

တခြားလူတွေက ဖုန်းယွီကို စီးပွားရေး ပါရမီရှင်လို့ ပြောကြတယ်၊ စီးပွားရေးလုပ်ရင် တစ်ခါမှ မရှုံးဖူးဘူးတဲ့။ အခုတော့ ကမ္ဘာကြီးကို သိအောင် ပြလိုက်မယ်၊ ဖုန်းယွီ ဆိုတာ အနိုင်မတိုက်နိုင်တဲ့သူ မဟုတ်ဘူးဆိုတာရယ်၊ သူ့ကို အနိုင်ယူတဲ့သူဟာ သူတို့ Sony နဲ့ အိုဂါ နိုရီအိုကိုယ်တိုင် ဖြစ်တယ်ဆိုတာကိုပေါ့။

“ဥက္ကဋ္ဌခင်ဗျာ၊ Wind and Rain က ဒီဂျစ်တယ် ဗီဒီယိုကင်မရာ အသစ်တစ်ခု ထုတ်လိုက်ပြန်ပါပြီ။ အခြေခံအဆင့်အဖြစ် သတ်မှတ်ထားပြီး ရောင်းဈေးက ဒေါ်လာ ၄၉၉ ပဲ ရှိပါတယ်”

“ဘာ... ဘာလို့ ဒီလောက်တောင် ဈေးပေါနေရတာလဲ။ ဒါဆိုရင် အဆင့်မြင့် နည်းပညာတွေက ဒီထဲမှာ ဘယ်လိုမှ ထည့်ထားလို့ မရနိုင်ဘူးလေ” အိုဂါ နိုရီအိုအနေဖြင့် Wind and Rain သည် အဆင့်မြင့် ဒီဂျစ်တယ် ဗီဒီယိုကင်မရာ (HDV)၏ ကုန်ကျစရိတ်ကို ဤမျှအထိ လျှော့ချနိုင်လိမ့်မည်ဟု မယုံကြည်ပါချေ။

“သူတို့ရဲ့ ဒီစက်က အဆင့်မြင့် မဟုတ်ပါဘူး၊ သာမန် ဒီဂျစ်တယ် ဗီဒီယိုကင်မရာပါပဲ။ ပြီးတော့ အရမ်းကို သေးငယ်ပြီး လက်ဖဝါးတစ်လုံးစာပဲ ရှိတာမို့ သယ်ဆောင်ရတာ တကယ့်ကို လွယ်ကူပါတယ်”

အိုဂါ နိုရီအို မျက်မှောင်ကြုတ်သွားသည်။ ဖုန်းယွီက ဒီလောက် ဈေးပေါတဲ့ ထုတ်ကုန်နဲ့ ဘာလုပ်ချင်နေတာလဲ။ ဒီလို အလွန်သေးငယ်တဲ့ (Micro-DV) တွေနဲ့ ရိုက်ကူးထားတဲ့ ပုံရိပ်တွေက သေချာပေါက် ကြည်လင်မှာ မဟုတ်ဘူး။ အလွန်ဆုံး ရှိလှရင် လွန်ခဲ့တဲ့ သုံးလေးနှစ်က ပျမ်းမျှအဆင့်လောက်ပဲ ရှိမှာပါ။

ပြီးတော့ ဘာလို့ ဒီလောက်အထိ သေးအောင် လုပ်ရတာလဲ။ ဒီလောက် သေးရင် ဘက်ထရီနဲ့ အတွင်းက ဆားကစ်ပြားတွေလည်း ကြီးမှာ မဟုတ်သလို၊ ကင်မရာ မှန်ဘီလူး နည်းပညာတွေကလည်း သိပ်ပြီး ကောင်းမှာ မဟုတ်ပါဘူး။

“သူတို့ရဲ့ ထုတ်ကုန်နဲ့ ရိုက်ထားတဲ့ ဗီဒီယိုတွေက ပုံမှန်ကြည်လင်မှုအဆင့်ပဲလား”

“ဟုတ်ပါတယ်၊ သူတို့ ရိုက်ထားတာက ပုံမှန်ကြည်လင်မှုအဆင့်ပဲ ရှိပါတယ်။ ပြီးတော့ သူတို့ရဲ့ ဒီစက်က နှစ်နာရီပဲ အသုံးခံပါတယ်၊ ဒါပေမဲ့ Power bank နဲ့ အားသွင်းလို့ ရသလို ဘက်ထရီလည်း လဲလို့ ရပါတယ်။ သိုလှောင်မှု ပမာဏကတော့ များလာတယ်၊ 2GB ဖြစ်သွားသလို ဖလက်ရှ် စနစ်ကိုပဲ သုံးထားတာပါ။ မှန်ဘီလူး ချဲ့နိုင်စွမ်း ကတော့ ၃ ဆပဲ ရှိတုန်းပါ၊ ဒီဂျစ်တယ် ချဲ့နိုင်စွမ်း၃ ဆကို ပေါင်းထည့်ထားတာကတော့ အပြင်လူတွေကို လှည့်စားဖို့ လုပ်ထားတာပါပဲ”

“မင်းရဲ့အထင်အရဆိုရင်၊ သူတို့ ဘာကြောင့် ဒီလို လုပ်ရတာလဲ၊ ဘာကြောင့် ဒီလောက်အထိ သေးငယ်တဲ့ ဒီဂျစ်တယ် ဗီဒီယိုကင်မရာကို ထုတ်လုပ်ရတာလဲ” အိုဂါ နိုရီအိုက တည်ငြိမ်စွာ မေးမြန်းလိုက်သည်။

“တခြား မော်ဒယ်တွေက ကျွန်တော်တို့နဲ့ မယှဉ်နိုင်လို့ ဈေးကွက်အနိမ့်ပိုင်း ထုတ်ကုန်တွေကိုပဲ ထုတ်နိုင်တော့တာပေါ့။ နောင်ကျရင် Wind and Rain ရဲ့ ဒီဂျစ်တယ် ဗီဒီယိုကင်မရာတွေဟာ အဆင့်နိမ့်ပစ္စည်းတွေရဲ့ ပြယုဂ် ဖြစ်သွားတော့မှာပါ” လက်ထောက်က စိတ်လှုပ်ရှားစွာ ပြောဆိုလိုက်သည်။

အိုဂါ နိုရီအိုသည် သူ၏ လက်ထောက်ကို စိတ်ပျက်အားမလိုအားမရစွာ စိုက်ကြည့်လိုက်သည်။ “မင်း Wind and Rain ရဲ့ ဖုန်းတွေကို မေ့သွားပြီလား။ ဒီဂျစ်တယ် ကင်မရာနဲ့ ဖုန်းကို ပထမဆုံး ပေါင်းစပ်ပြီး ကင်မရာဖုန်းကို စတင် ထုတ်လုပ်ခဲ့တဲ့ ကုမ္ပဏီဆိုတာကို မင်း မသိဘူးလား”

လက်ထောက်မှာ ခဏမျှ ကြောင်သွားပြီးနောက် မျက်လုံးပြူးသွားခဲ့သည်။ “ဥက္ကဋ္ဌခင်ဗျာ၊ မင်း ဆိုလိုတာက သူတို့က ဒီဂျစ်တယ် ဗီဒီယိုကင်မရာ လုပ်ဆောင်ချက်ပါတဲ့ ဖုန်းတွေကို ထုတ်လုပ်တော့မှာလား။ အခု ဒီထုတ်ကုန်က သူတို့ရဲ့ နည်းပညာ အကူးအပြောင်း ထုတ်ကုန်တစ်ခုပေါ့။ ဒါပေမဲ့ ဖုန်းက အရမ်း သေးတာလေ၊ ဒီဂျစ်တယ် ဗီဒီယိုကင်မရာနဲ့ ဘယ်လို ပေါင်းစပ်လို့ ရမှာလဲ”

“သူတို့က ဗီဒီယိုရိုက်ကူးတဲ့ အကျိုးသက်ရောက်မှုက အရမ်းကြည်လင်ဖို့ မလိုအပ်ဘဲ ကိုယ့်ဘာသာ အပျော်ရိုက်ရုံလောက်ပဲ ဆိုရင် တခြားလူတွေကို ဆွဲဆောင်နိုင်လိမ့်မယ်လို့ မင်း မထင်ဘူးလား။ ရိုက်ထားတဲ့ ဗီဒီယိုက ဝါးနေဦးတော့၊ ပုံမှန်ကြည်လင်မှုအဆင့်တောင် မရှိဦးတော့၊ ဒါပေမဲ့ သူတို့မှာ ဒီလုပ်ဆောင်ချက် ရှိနေတာကတင် ဖုန်းရဲ့အဆင့်အတန်းကို မြှင့်တင်ပေးလိုက်သလို ဖြစ်သွားမှာပဲ”

Sony သည်လည်း ဒီဂျစ်တယ် ဗီဒီယိုကင်မရာနှင့် ဖုန်းကို ပေါင်းစပ်ရန် အစဉ်တစိုက် လေ့လာနေခဲ့သော်လည်း၊ ဤသည်မှာ အလွန်ပင် ခက်ခဲလှပေသည်။ လက်ရှိတွင် Sony ဘက်မှာ မည်သည့် တိုးတက်မှုမျှ မရှိသေးပါချေ။ ဒီဂျစ်တယ် ကင်မရာနှင့် ဖုန်း ပေါင်းစပ်သည့် ကဏ္ဍတွင်ပင် သူတို့သည် Wind and Rain ဖုန်းများ၏ နောက်တွင် ကျန်ရစ်နေခဲ့ခြင်း ဖြစ်သည်။

သို့သော် ယခုအခါ ၎င်းတို့တွင် စိတ်ကူးသစ်တစ်ခု ရရှိသွားခဲ့သည်။ ၎င်းမှာ ဒီဂျစ်တယ် ဗီဒီယိုကင်မရာနှင့် ဒီဂျစ်တယ် ကင်မရာကို ပေါင်းစပ်ရန် ဖြစ်သည်။ ဒီဂျစ်တယ် ဗီဒီယိုကင်မရာထဲမှ ပုံရိပ်ကို ဓာတ်ပုံအဖြစ် ဖြတ်ထုတ်ယူသည့် ပုံစံမျိုး မဟုတ်ဘဲ၊ ဒီဂျစ်တယ် ကင်မရာကို ဗီဒီယို ဇာတ်လမ်းတိုများ ရိုက်ကူးနိုင်အောင် လုပ်ဆောင်ရန် ဖြစ်သည်။

ဤသည်မှာ Wind and Rain ဖုန်းများဆီမှ ရရှိလာသော သတိပေးချက်တစ်ခု ဖြစ်သည်။ အကယ်၍သာ ၎င်းတို့က ဤလုပ်ဆောင်ချက်ကို အရင်ဆုံး ဖြန့်ချိနိုင်မည်ဆိုပါက လူသုံးကုန် ဒီဂျစ်တယ် ကင်မရာ နယ်ပယ်တွင် တစ်ဦးတည်း ဗိုလ်မင်းနိုင်ပေလိမ့်မည်။

ဤသည်မှာ “နှစ်မျိုးစပ်” ထုတ်ကုန်တစ်ခု ဖြစ်လာမည်ဖြစ်ရာ၊ တစ်ခုရှိရုံဖြင့် စက်နှစ်လုံး ရှိသကဲ့သို့ ဖြစ်ပေလိမ့်မည်။ သယ်ဆောင်ရ လွယ်ကူသလို ငွေလည်း ပိုမို သက်သာစေမည် မဟုတ်ပါလား။

သို့သော် ဤလုပ်ဆောင်ချက် နှစ်ခု ပေါင်းစပ်ရန်မှာလည်း အလွန်ပင် ခက်ခဲလှပေသည်။ အစောပိုင်းက သူ ဘာလုပ်ရမှန်း မသိဖြစ်နေခဲ့သော်လည်း ယခုအခါတွင်မူ မည်သို့လုပ်ဆောင်ရမည်ကို သိရှိသွားခဲ့ပြီ ဖြစ်ရာ၊ ၎င်းမှာ ဗီဒီယို ဇာတ်လမ်းတိုများ၏ ကြည်လင်မှုကို လျှော့ချပစ်ရန်ပင် ဖြစ်သည်။

ဗီဒီယို ဇာတ်လမ်းတိုလေးတွေ ရိုက်လို့ရရုံနဲ့တင် လုံလောက်နေပြီဖြစ်ကာ၊ နောက်မှ ပုံရိပ် ကြည်လင်မှု မြင့်တက်လာအောင် နည်းလမ်းရှာလို့ ရသည် မဟုတ်ပါလား။ မည်သို့ပင်ဖြစ်စေ ဒီဂျစ်တယ် ကင်မရာ၏ အရောင်းနှင့် လိုအပ်ချက်မှာ ဒီဂျစ်တယ် ဗီဒီယိုကင်မရာထက် များစွာ ပိုမို ကြီးမားလှပေသည်။ သေချာပေါက် ဒီဂျစ်တယ် ကင်မရာ ဈေးနှုန်းမှာ ဗီဒီယိုကင်မရာထက် များစွာ သက်သာခြင်းကလည်း အဓိက အကြောင်းရင်း တစ်ခုပင် ဖြစ်သည်။

ဟင်း... ဖုန်းယွီ မင်းက ဒီလို လုပ်ဆောင်ချက်တွေ ပေါင်းစပ်တဲ့ နေရာမှာ ထပ်ပြီး ကစားကွက် ထုတ်ချင်နေပြန်ပြီပေါ့။ ဒါပေမဲ့ ငါတို့ Sony လည်း ဒါကို စဉ်းစားမိလိမ့်မယ်လို့ မင်း မထင်ထားဘူး မဟုတ်လား။ ငါတို့က ကင်မရာရဲ့ Pixels တွေ၊ မှန်ဘီလူး ချဲ့နိုင်စွမ်းတွေမှာ မင်းတို့ထက် ပိုကောင်းအောင် လုပ်နိုင်တဲ့အတွက် အနာဂတ်မှာ ကင်မရာဖုန်းဆိုရင် လူတိုင်းက ငါတို့ရဲ့ Sony Ericsson ကိုပဲ ပထမဆုံး ရွေးချယ်ကြမှာ သေချာတယ်။

အမှန်စင်စစ် ကင်မရာဖုန်း လောကတွင် အခြားသော အင်အားကြီး ကုမ္ပဏီတစ်ခုလည်း ရှိနေပါသေးသည်။ ၎င်းမှာ Sharpပင် ဖြစ်သည်။ အကယ်၍သာ ၎င်းတို့၏ အခြားသော လုပ်ဆောင်ချက်များမှာ အလွန်အမင်း မညံ့ဖျင်းခဲ့ပါက အရောင်းမှာ အလွန်ကောင်းမွန်နေပေလိမ့်မည်။

ကမ္ဘာပေါ်တွင် ပထမဆုံးသော Megapixel ကင်မရာပါသော ဖုန်းကို သူတို့ Sharp က ယခုနှစ်အတွင်းမှာတင် စတင်ဖြန့်ချိခဲ့ခြင်း ဖြစ်သည်။ Sony Ericsson သည်လည်း Sharpနှင့် ပူးပေါင်းဆောင်ရွက်ရန် ဆွေးနွေးနေခဲ့ပြီ ဖြစ်ကာ၊ နှစ်ဖက် ပူးပေါင်း၍ ကင်မရာပါသော ဖုန်းများကို တီထွင်ခြင်းအားဖြင့် Wind and Rain ဖုန်းများကို အနိုင်ယူရန် ကြိုးပမ်းနေခြင်းပင် ဖြစ်သည်။

အိုဂါ နိုရီအိုသည် ၎င်းတို့ သေချာပေါက် လုပ်ဆောင်နိုင်လိမ့်မည်ဟု အခိုင်အမာ ယုံကြည်နေခဲ့သည်။ Wind and Rain ဖုန်းများကိုမူ သူတို့၏ ခြေဖဝါးအောက်တွင် နင်းခြေပစ်ရန်သာ ကျန်ပါတော့သည်။

******

အခန်း (၁၃၂၆) ဈေးကွက်အနိမ့်ပိုင်းမှတစ်ဆင့် နယ်မြေသိမ်းပိုက်ခြင်း

“မန်နေဂျာဖုန်း... ငါတို့တွေက ဘာလို့ ပိုပြီးနောက်ကြောင်းပြန်တွေ လုပ်နေရတာလဲ။ မူလက ငါတို့တွေ ကျွမ်းကျင်အဆင့် ဒီဂျစ်တယ် ဗီဒီယိုကင်မရာတွေကို ထုတ်နိုင်တာပဲလေ။ မင်းက လူသုံးကုန်အဆင့် ကို လျှော့ချလိုက်တာက အရောင်းပိုများလို့ဆိုတာ ဟုတ်ပါပြီ၊ ဒါပေမဲ့ အခု ဒီမော်ဒယ်ကတော့ အခြေခံအဆင့်လို့ပဲ ခေါ်ရမှာ မဟုတ်ဘူးလား”

ကျုံးချင်းရှန်သည် မျက်နှာတွင် ခက်ခဲသော အရိပ်အယောင်များဖြင့် ပြောဆိုနေမိသည်။ နည်းပညာဆိုသည်မှာ အစဉ်တစိုက် တိုးတက်နေမှသာ မှန်ကန်သည်ဟု သူက ယူဆထားသော်လည်း၊ ယခု ထုတ်ကုန်သစ်မှာမူ ပို၍ပင် ညံ့ဖျင်းသွားသလို သူ ခံစားနေရသည်။ ထုထည်ကတော့ ပို၍ သေးငယ်သွားသည်မှာ မှန်ပါသည်၊ လက်ရှိတွင် အသေးငယ်ဆုံး မော်ဒယ်ဟုပင် ဆိုနိုင်သော်လည်း လုပ်ဆောင်ချက်များမှာမူ အလွန်ပင် လျော့နည်းသွားခဲ့ပြီ ဖြစ်သည်။

“လောင်ကျုံး... စိတ်မပူပါနဲ့၊ ဒါက စမ်းသပ်ချက် တစ်ခုသက်သက်ပါပဲ”

ကျုံးချင်းရှန် အသက်ရှူ ချောင်သွားခဲ့သည်။ စမ်းသပ်ချက်ဆိုလျှင်မူ နောက်ပိုင်းတွင် ပိုမိုကောင်းမွန်သော အရာများ ထွက်လာဦးမည်ဟု ဆိုလိုခြင်းပင်။ ဤသည်မှာ လက်ကျန် အပိုပစ္စည်းဟောင်းများကို ရှင်းထုတ်ပစ်ရန် နည်းလမ်းတစ်ခု ဖြစ်နိုင်သည်ဟု သူက တွေးတောနေမိသည်။

“နောက်ကျရင် ငါတို့ ဒီထက် ဈေးသက်သာတဲ့ လက်ကိုင် ဗီဒီယိုကင်မရာတွေကို ထုတ်ဦးမှာ။ ဈေးနှုန်းကတော့ ဒေါ်လာ လေးရာအောက်အထိ ချပစ်မယ်”

“ဘာ... မန်နေဂျာဖုန်း... ငါ နားမမှားပါဘူးနော်၊ မင်းက ဒီထက်ပိုပြီး ဈေးပေါတဲ့ အရာတွေကို လုပ်ဦးမလို့လား။ ဒါဟာ ငါတို့ အမှတ်တံဆိပ်ရဲ့ ဂုဏ်သိက္ခာကို ထိခိုက်စေမှာ မဟုတ်ဘူးလား။ ငါတို့က အမြဲတမ်း အတုယူခံရတဲ့၊ ခေတ်ရေစီးကြောင်းကို ဦးဆောင်နေတဲ့ အမှတ်တံဆိပ်လို့ ကြွေးကြော်ထားတာလေ။ အခုလို လုပ်လိုက်တာက ငါတို့က အဆင့်နိမ့် ထုတ်ကုန်တွေပဲ လုပ်နေတဲ့ ကုမ္ပဏီလို့ တခြားသူတွေ ထင်သွားစေမှာ မဟုတ်ဘူးလား” ကျုံးချင်းရှန်တစ်ယောက် အမှန်တကယ် စိုးရိမ်သွားခဲ့ပြီ ဖြစ်သည်။

Aiwaနှင့် Wind and Rain တို့က နည်းပညာ သုတေသနအတွက် ငွေအမြောက်အမြား ရင်းနှီးထားသော်လည်း၊ ထုတ်ကုန်၏ စွမ်းဆောင်ရည်ကို မမြှင့်တင်ဘဲ အမှတ်တံဆိပ်၏ ဂုဏ်သတင်းကိုပဲ အလွဲသုံးစား လုပ်နေကြခြင်းလောဟု သူ တွေးတောနေမိသည်။

“မဟုတ်ပါဘူး။ ရှုလိဟွာက မိတ်ဆက်ပွဲမှာ ပြောသွားတာကို မင်း မကြားလိုက်ဘူးလား။ ငါတို့ရဲ့ ဒီအလွန်သေးငယ်တဲ့ လက်ကိုင် ဗီဒီယိုကင်မရာရဲ့ ရည်မှန်းချက်က မိသားစုတိုင်းမှာ ကိုယ်ပိုင် ဗီဒီယိုကင်မရာလေး တစ်လုံးစီ ရှိလာစေဖို့ပဲ.. အဆင့်မြင့် ဈေးကွက်ကိုလည်း ငါတို့ လက်လွှတ်မှာ မဟုတ်ပါဘူး၊ မကြာခင်မှာပဲ ကျွမ်းကျင်အဆင့်တွေကို ငါတို့ ထပ်ပြီး ထုတ်ဦးမှာပါ”

“မိသားစုတိုင်းမှာ ရှိလာဖို့ ဟုတ်လား။ အဲဒီလောက်အထိ လူတွေ အများကြီး ဝယ်ကြမှာလား”

“လောင်ကျုံး... မင်းက သာမန်မိသားစုတွေရဲ့ စိတ်နေစိတ်ထားကို သဘောမပေါက်သေးဘူး။ သူတို့က ခရီးသွားတဲ့ အခါမှာ အမှတ်တရအနေနဲ့ ဗီဒီယိုလေးတွေ ရိုက်ချင်ကြတာ။ ငါ ငယ်ငယ်တုန်းကဆိုရင် ပွဲလမ်းသဘင်တွေမှာ ဓာတ်ပုံရိုက်ပြီး အမှတ်တရ သိမ်းထားကြသလိုမျိုးပေါ့။ အဲဒီတုန်းက ဓာတ်ပုံရိုက်နိုင်တဲ့ မိသားစုက သိပ်မရှိပါဘူး၊ ဒါပေမဲ့ အခုတော့ ဘယ်လိုလဲ၊ ငါတို့ရဲ့ ဖုန်းတွေနဲ့တင် ဓာတ်ပုံရိုက်လို့ ရနေပြီလေ။ အချိန်မရွေး ရိုက်ပြီး အချိန်မရွေး ပြန်ထုတ်ကြည့်လို့ ရနေပြီ။ မင်းရဲ့ အမြင်အရဆိုရင် ဗီဒီယိုက ပိုပြီး အမှတ်တရ ဖြစ်စေမလား၊ ဓာတ်ပုံက ပိုပြီး ကောင်းမလား”

“ဒါကတော့... ဗီဒီယိုပေါ့။ ပုံရိပ်ရော အသံရော ပါတာကိုး”

“မှန်တာပေါ့။ အသံကလည်း အရမ်း အရေးကြီးသလို ဗီဒီယိုထဲက လူတွေကလည်း အသက်ရှိနေတာလေ... အဲ... လှုပ်ရှားနေတာကိုး။ ပြီးတော့ ဒီလို ဈေးသက်သာတဲ့ မော်ဒယ်တွေကို ထုတ်ရတဲ့ နောက်ထပ် အကျိုးကျေးဇူးတစ်ခုကတော့ ဈေးကွက်ကို နယ်မြေသိမ်းပိုက်ဖို့ပဲ”

“လူအတော်များများက ဒါကို ဝယ်တဲ့အခါ အရမ်းကြီး ကြည်လင်နေဖို့ မလိုအပ်ပါဘူး။ ဘာလို့လဲဆိုတော့ သူတို့ အိမ်က တီဗွီတွေကလည်း အဆင့်မြင့် မဟုတ်သလို၊ ငါတို့ရဲ့ LED ဖန်သားပြင်တွေကလည်း ထိုမျှအထိ ကြည်လင်ပြတ်သားမှု မရှိသေးလို့ပဲ။ ပုံမှန်ကြည်လင်မှုအဆင့်တောင် မရှိတဲ့ အခြေအနေမှာ ငါတို့က ဘာလို့ အဆင့်မြင့်ဗီဒီယိုတွေကို ရိုက်နေရဦးမှာလဲ။ တီဗွီတွေပေါ်မှာ ကြည့်ရင် ပုံရိပ်တွေက အတူတူပါပဲ၊ ချဲ့ကြည့်တဲ့ အခါမှသာ သိသာမှာပါ။ ဒါပေမဲ့ ဘယ်သူကများ ချဲ့ပြီး ကြည့်နေမှာမို့လို့လဲ။ အဆင့်မြင့် စံနှုန်းဆိုတာ ကျွမ်းကျင်အဆင့်တွေအတွက်ပဲ ထားလိုက်ပါ”

“ငါတို့ရဲ့ ဒေါ်လာ ၅၀၀ တန် ထုတ်ကုန်က သူတို့ရဲ့ ဒေါ်လာ ၁၀၀၀ တန် ထုတ်ကုန်နဲ့ စွမ်းဆောင်ရည် တူနေမယ်ဆိုရင် ဝယ်သူက ဘယ်ဟာကို ရွေးမလဲ။ သူတို့တွေ ငါတို့ ပစ္စည်းကို ဝယ်လိုက်တာနဲ့ Sony တို့လို ကုမ္ပဏီတွေက ပစ္စည်းတွေ ရောင်းမထွက်တော့ဘူး။ ဈေးကွက်က ဒီမျှပဲ ရှိတာ၊ ငါတို့က နေရာယူလိုက်ရင် သူတို့အတွက် နေရာ မရှိတော့ဘူးပေါ့”

“နောက်နှစ်အနည်းငယ် ကြာလို့ ဒီအခြေခံအဆင့်တွေ ခေတ်ကုန်သွားတဲ့ အခါကျမှ ငါတို့ရဲ့ လူသုံးကုန်အဆင့်တွေကို ထပ်ပြီး မိတ်ဆက်မယ်။ နောက်ထပ် နှစ်အတော်ကြာသွားရင်တော့ လူသုံးကုန်အဆင့် ဈေးကွက်ကလည်း ကျုံ့သွားပြီး၊ တကယ် ဝယ်မယ့်သူတွေက ကျွမ်းကျင်အဆင့်တွေကိုပဲ ဝယ်ကြတော့မှာပါ”

“လူတစ်ဦးချင်းစီက ကျွမ်းကျင်အဆင့်တွေကို ဝယ်မယ် ဟုတ်လား။ ကျွမ်းကျင်အဆင့်ဆိုတာ ဒေါ်လာ သုံးလေးထောင်လောက် ပေးရတာ မဟုတ်လား။ ဘယ်မိသားစုကများ အဲဒီလောက် အသုံးခံမှာလဲ။ ငါတို့ Songjiangက ထုတ်တဲ့ 'Songjiang စတား' ကားလေးတစ်စီးတောင် ဘယ်လောက်ရှိလို့လဲ၊ ဗီဒီယိုကင်မရာ တစ်လုံးက ကားတစ်စီးထက် ပိုဈေးကြီးနေတာကို လူတွေ အများကြီး ဝယ်ကြပါ့မလား”

“လွန်ခဲ့တဲ့ သုံးနှစ်တုန်းက ဖုန်းကို ဘယ်နှစ်ယောက် ဝယ်ခဲ့သလဲ။ အခုရော ဖုန်းကို ဘယ်နှစ်ယောက် သုံးနေကြပြီလဲ။ ပြီးတော့ ဖုန်းရဲ့ အစောပိုင်းဈေးနှုန်းက ဘယ်လောက်တောင် မြင့်ခဲ့သလဲ၊ အခုရော ဘယ်လောက် ဖြစ်သွားပြီလဲ။ ကျွမ်းကျင်အဆင့် ဗီဒီယိုကင်မရာရဲ့ ဈေးနှုန်းကလည်း မကျနိုင်ဘူးလို့ ဘယ်သူပြောလဲ။ ထို့ထက်ပိုတာက လူတွေရဲ့ ဝင်ငွေကလည်း တိုးတက်လာဦးမှာပဲ၊ သူတို့ မဝယ်ဝံ့ဘူးလို့ ဘယ်သူပြောနိုင်မှာလဲ”

အနာဂတ်တွင် အခြေခံအဆင့် ဗီဒီယိုကင်မရာ ဈေးကွက်မှာ တဖြည်းဖြည်း သေးငယ်သွားမည် ဖြစ်သည်။ အဘယ်ကြောင့်ဆိုသော် ဖုန်းများပေါ်ရှိ ဗီဒီယို ရိုက်ကူးနိုင်စွမ်းမှာ ဤအခြေခံအဆင့် စက်များထက် မညံ့တော့သည့်အပြင် ပို၍ပင် ကောင်းမွန်လာသောကြောင့် ဖြစ်သည်။ ထိုအချိန်တွင် ကင်မရာဖုန်းများမှာ Pixels သန်းပေါင်းများစွာ ရှိလာမည်ဖြစ်သလို၊ မှန်ဘီလူး ချဲ့နိုင်စွမ်း၊ တုန်ခါမှု ထိန်းချုပ်စနစ် စသည့် လုပ်ဆောင်ချက်များစွာ ပါဝင်လာမည် ဖြစ်သည်။ ထိုသို့ဆိုလျှင် မည်သူကများ ဤအခြေခံအဆင့် စက်ကြီးကို သယ်နေဦးမည်နည်း။

လူသုံးကုန်အဆင့်မှာလည်း ဈေးကွက် ကျုံ့သွားမည် ဖြစ်ကာ၊ ကြားညှပ်နေသော အခြေအနေသို့ ရောက်သွားပေလိမ့်မည်။ ကြည်လင်မှုကလည်း သိပ်မကောင်း၊ ဈေးကလည်း မသက်သာသဖြင့် တကယ် ဝါသနာပါသူများမှာ ကျွမ်းကျင်အဆင့် အနိမ့်စားများကို ဝယ်ကြမည်ဖြစ်ပြီး၊ သာမန်လူများမှာမူ ဖုန်းရှိလျှင် လုံလောက်ပြီဟု ယူဆကြပေလိမ့်မည်။

ကျုံးချင်းရှန်သည် ဤသတင်းအချက်အလက်များကြောင့် အနည်းငယ် ဇဝေဇဝါ ဖြစ်သွားပြီး ဆိုလိုက်သည်။ “မင်းပြောတာကတော့ အကျိုးအကြောင်း ရှိသလိုပါပဲ၊ ဒါပေမဲ့ အနာဂတ် ကိစ္စတွေကို ဘယ်သူကများ အသေအချာ ပြောနိုင်မှာလဲ”

“ငါ အသေအချာ ပြောနိုင်တယ်” ဖုန်းယွီက ယုံကြည်မှုအပြည့်ဖြင့် ပြန်ပြောလိုက်သည်။

နောက်ပြောင်နေတာလား၊ သူက ပြန်လည် မွေးဖွားလာသူ တစ်ယောက်လေ။ ဒီလောက် အခြေခံကျတဲ့ ခေတ်ရေစီးကြောင်းကိုမှ မမှတ်မိရင် ကောင်းကင်ဘုံက သူ့ကို တစ်ဖန် ပြန်မွေးဖွားပေးလိုက်တာဟာ အလကား ဖြစ်သွားမှာပေါ့။

ကျုံးချင်းရှန်“......”

“ဒါနဲ့... ခရစ္စမတ် အချိန်ကျရင် ငါတို့ Wind and Rain ဖုန်းတွေက ဈေးအသက်သာဆုံး မော်ဒယ်တစ်ခုကို ထုတ်ဦးမှာ။ အဲဒီရဲ့ကြွေးကြော်သံကလည်း 'လူတိုင်း ဖုန်းသုံးနိုင်စေရမယ်' ဆိုတာပဲ။ အမြတ်နည်းနည်းနဲ့ အများကြီး ရောင်းတာက အီလက်ထရွန်နစ် ထုတ်ကုန်တွေမှာလည်း အသုံးတည့်တာပဲလေ”

“ဒါကြောင့်ပဲ မင်းက ခေတ်နောက်ကျတော့မယ့် အပိုပစ္စည်းတွေကို ဝယ်ခိုင်းထားတာလား။ မင်းပြောတဲ့ ဒီဖုန်းက မဟာဗျူဟာမြောက် ထုတ်ကုန်တစ်ခုလား” ကျုံးချင်းရှန်တစ်ခုခုကို သတိရသွားပုံရသည်။

ဖုန်းယွီက လက်ဖျစ်တစ်ချက် တီးလိုက်ကာ “မှန်တာပေါ့။ ဒီဖုန်းဟာ အနာဂတ် သမိုင်းမှာ မှတ်တမ်းတင်ခံရလိမ့်မယ်။ ကမ္ဘာပေါ်မှာ အရောင်းရဆုံး ဖုန်း ဖြစ်လာမှာဖြစ်ပြီး သူ့ကို ဘယ်သူမှ ယှဉ်နိုင်မှာ မဟုတ်ဘူး။ အနာဂတ်မှာ လူတွေ ဖုန်းအကြောင်း ပြောတိုင်း ငါတို့ Wind and Rain ကို သတိရကြလိမ့်မယ်။ ဒါဟာ ပထမဆုံး ကင်မရာဖုန်း ဒါမှမဟုတ် MP3 ဖုန်းတွေထက်တောင် ပိုပြီး လူတွေရဲ့ စိတ်ထဲမှာ စွဲထင်ကျန်ရစ်မယ့် အရာပဲ”

“တကယ်လား။ အကယ်၍ ကမ္ဘာ့နံပါတ်တစ် အရောင်းရဆုံး ဖြစ်လာမယ်ဆိုရင်တော့ အမှတ်တံဆိပ်အတွက် တကယ့်ကို အထောက်အကူ ဖြစ်မှာပါ။ မင်း အခု ထုတ်ခိုင်းထားတဲ့ ဈေးပေါတဲ့ ဗီဒီယိုကင်မရာတွေကလည်း ကမ္ဘာ့နံပါတ်တစ် ဖြစ်လာဖို့အတွက်လား”

“ဟုတ်တယ်။ ထုတ်ကုန်ရဲ့ စွမ်းဆောင်ရည်က အဆင့်မြင့်တွေနဲ့ ဘယ်လောက်ပဲ ကွာပါစေ၊ ဈေးကွက်နဲ့ အကိုက်ညီဆုံး အရာကသာ အကောင်းဆုံးပဲ။ သူတို့က ကျွမ်းကျင်သူတွေကို ပစ်မှတ်ထားပေမဲ့ ငါတို့က သာမန်မိသားစုတွေကို ပစ်မှတ်ထားတာ၊ နေရာယူပုံချင်း မတူဘူး။ ဒါပေမဲ့ ငါတို့ရဲ့ အရောင်းပမာဏက နံပါတ်တစ် ဖြစ်လာတဲ့ အခါကျရင်တော့ အရာအားလုံးက ပြောင်းလဲသွားလိမ့်မယ်”

ကျွမ်းကျင်သူ နယ်ပယ်မှာတော့ လက်ရှိတွင် Wind and Rain မှာ ယှဉ်ပြိုင်နိုင်စွမ်း မရှိသေးသဖြင့်၊ သာမန်လူသုံးကုန်တွေမှာပဲ အကွက်ချ လုပ်ဆောင်ရပေမည်။ ယခုအခါ လူသုံးကုန် နယ်ပယ်တွင် ဂျပန် ကုမ္ပဏီများက ထိပ်ဆုံးမှ စိုးမိုးထားသော်လည်း၊ ဖုန်းယွီကတော့ ကိုယ်ပိုင် လမ်းကြောင်းသစ် တစ်ခုကို ဖောက်ထွက်ရန် ဆုံးဖြတ်လိုက်ခြင်း ဖြစ်သည်။

ဤအဆင့်နိမ့်ဟု ထင်ရသော အီလက်ထရွန်နစ် ထုတ်ကုန်များသည် လူအမြောက်အမြားကို အံ့အားသင့်သွားစေလိမ့်မည်ဟု ဖုန်းယွီ အခိုင်အမာ ယုံကြည်နေလေတော့သည်။

******

အခန်း (၁၃၂၇) တဟုန်ထိုး မြင့်တက်လာသော အရောင်းပမာဏ

“ဥက္ကဋ္ဌခင်ဗျာ၊ Wind and Rain အမှတ်တံဆိပ်ရဲ့ အခုနောက်ဆုံးထွက် အခြေခံအဆင့် အလွန်သေးငယ်တဲ့ ဒီဂျစ်တယ် ဗီဒီယိုကင်မရာ(Micro DV) တွေရဲ့ အရောင်းဟာ အခုဆိုရင် အလုံးရေ တစ်သိန်း ကျော်သွားပါပြီ”

“မင်း ဘာပြောလိုက်တယ်။ တစ်လတောင် မပြည့်သေးဘူးလေ၊ အလုံးရေ တစ်သိန်းကျော်သွားပြီ ဟုတ်လား။ အဲဒီစက်မှာ အားနည်းချက်တွေ အများကြီး ရှိနေတာကို ငါတို့ မီဒီယာတွေမှာ ဖွင့်ချခဲ့တယ် မဟုတ်လား” အိုဂါ နိုရီအိုသည် အလွန်အမင်း အံ့အားသင့်သွားခဲ့ရသည်။ ဤရလဒ်မှာ သူ စိတ်ကူးထားသည်နှင့် လုံးဝတခြားစီ ဖြစ်နေသောကြောင့် ဖြစ်သည်။

Wind and Rain အမှတ်တံဆိပ်သည် စွမ်းဆောင်ရည်နိမ့်သော မော်ဒယ်တစ်ခုကို ထုတ်လုပ်လိုက်ကြောင်း သိရှိရသည့်အခါတွင် သူသည် လူများကို ထိုစက်၏ စွမ်းဆောင်ရည်နှင့် ကန့်သတ်ချက်များအပေါ် ဆန်းစစ်မှု ပြုလုပ်ခိုင်းခဲ့ပြီး၊ သတင်းစာများနှင့် နည်းပညာ မဂ္ဂဇင်းများကဲ့သို့သော မီဒီယာများတွင် ထိုစက်၏ အားနည်းချက်များကို အချက်ကျကျ တိုက်ခိုက်ခိုင်းခဲ့သည်။

သို့သော် သူ တစ်ခုကို မေ့သွားခဲ့သည်။ သူတို့ တိုက်ခိုက်နေသော နေရာများသည် ကျွမ်းကျင်ပညာရှင်သုံး မဂ္ဂဇင်းများနှင့် သတင်းစာများ ဖြစ်နေသော်လည်း၊ ဤအခြေခံအဆင့် ဗီဒီယိုကင်မရာကို ဝယ်ယူနေသော သုံးစွဲသူများမှာ ပညာရှင်များ မဟုတ်ကြပါချေ။ ၎င်းတို့သည် သာမန်မိသားစုဝင်များသာ ဖြစ်ကြသည်။

ထိုသုံးစွဲသူများ၏ အမြင်တွင်မူ တီဗွီပေါ်ရှိ ကြော်ငြာများက တော်တော်လေး ကောင်းမွန်နေသလို၊ အမှတ်တံဆိပ်မှာလည်း Wind and Rain ဖြစ်နေ၍ နာမည်ကြီး အမှတ်တံဆိပ်ဟု သတ်မှတ်ထားကြသည်။ ထို့ပြင် ကိုယ်တိုင် စမ်းသပ်ကြည့်သည့်အခါတွင်လည်း မဆိုးဟု ခံစားရကာ ဈေးနှုန်းမှာလည်း သင့်တော်နေသဖြင့် သဘာဝကျကျပင် ဝယ်ယူလိုက်ကြခြင်း ဖြစ်သည်။

မူလက Sony သို့မဟုတ် Panasonicတို့၏ ထုတ်ကုန်များကို ဝယ်ယူရန် စိတ်ကူးထားသော သုံးစွဲသူအချို့သည်ပင် Wind and Rain ၏ အလွန်ချိုသာသော ဈေးနှုန်းကို မြင်သည့်အခါ စိတ်လှုပ်ရှားသွားကြသည်။ နှိုင်းယှဉ်ကြည့်သည့်အခါတွင်လည်း များစွာကွာခြားမှု မရှိဟု ယူဆသွားကြခြင်းပင်။

ထို့အပြင် အရောင်းဝန်ထမ်းများသည်လည်း ဝယ်သူများကို အမြဲတစေ အသိပေးနေသည်မှာ ဒီဂျစ်တယ် ထုတ်ကုန်များ၏ ခေတ်မီမှုနှုန်းမှာ အလွန် မြန်ဆန်လှသဖြင့် မော်ဒယ်တစ်ခုသည် သုံးနှစ်၊ ငါးနှစ်အတွင်း နည်းပညာပိုင်းအရ အပြတ်အသတ် ကျန်ရစ်သွားနိုင်ကြောင်း၊ ထို့ကြောင့် အကောင်းဆုံးကို ဝယ်ရန် မလိုအပ်ဘဲ မိမိနှင့် အကိုက်ညီဆုံးကိုသာ ဝယ်ယူသင့်ကြောင်း ဖြစ်သည်။

ဤသို့ဖြင့် Wind and Rain ၏ ဤဗီဒီယိုကင်မရာ အရောင်းမှာ အရှိန်အဟုန်ဖြင့် မြင့်တက်လာခဲ့ပြီး၊ ဂျပန် အမှတ်တံဆိပ်များ၏ လူသုံးကုန်အဆင့် မော်ဒယ်များမှာမူ အရောင်းမထွက်ဘဲ အခက်တွေ့လာရတော့သည်။

ထို့ထက်ပိုသည်မှာ လူသုံးကုန်ဈေးကွက်တွင် Philips နှင့် Thomsonတို့ကလည်း ဈေးနှုန်းလျှော့ချကာ အရောင်းမြှင့်တင်မှုများ စတင်လာကြသဖြင့် ဂျပန် ကုမ္ပဏီများမှာ လိုက်လံတုံ့ပြန်ရန် အတော်လေး ပင်ပန်းနေခဲ့ရသည်။

“သူတို့က ကြော်ငြာလည်း သိပ်မလုပ်ပါဘဲနဲ့ ဘာလို့ ဒီလောက် မြန်မြန် ရောင်းရတာလဲ”

“သူတို့က အင်တာနက်ပေါ်မှာ ကြော်ငြာတာပါ။ အဓိကအားဖြင့် 'ဈေးနှုန်းချိုသာမှု' ဆိုတဲ့ အချက်ကို ပေါ်လွင်အောင် လုပ်ထားတာပါ။ ပြီးတော့ Shopping Channels အမျိုးမျိုးမှာလည်း ကြော်ငြာတွေ လုပ်နေတာက သုံးစွဲသူ အတော်များများကို ဆွဲဆောင်နိုင်ခဲ့ပါတယ်။ Amazon လို အွန်လိုင်းဈေးဝယ်စင်တာတွေက အရောင်းတင်တင်တင်တင် တကယ်ကို များလှသလို၊ အဲဒီ အရေအတွက်ကလည်း လျင်မြန်စွာ တိုးတက်နေဆဲပါပဲ”

ဖုန်းယွီတွင် အရောင်းဆိုင်များကဲ့သို့သော လက်လီအရောင်းလမ်းကြောင်းများ ရှိနေရုံသာမက၊ အွန်လိုင်း ဈေးဝယ်စင်တာဟူသော ဧရာမ အရောင်းလမ်းကြောင်းကြီးလည်း ရှိနေခဲ့သည်။ Amazon၊ Taobao နှင့် ဝင်ရိုးစွန်းဝက်ဝံအွန်လိုင်းစင်တာများ၏ မှတ်ပုံတင်ထားသူဦးရေ မည်မျှ ရှိမည်နည်း။ အခြားသော အွန်လိုင်းဈေးကွက်ငယ်လေးများကို မဆိုထားနှင့်ဦး၊ ဤလမ်းကြောင်းများပေါ်ရှိ အရောင်းပမာဏမှာ ဆိုင်ခွဲများထက်ပင် ပိုမို ကောင်းမွန်နေခဲ့သည်။

လက်လီအရောင်းလမ်းကြောင်းများတွင် ယှဉ်ပြိုင်ရမည်ဆိုပါက ဖုန်းယွီသည် မည်သူ့ကိုမျှ မကြောက်ပါချေ။ Walmart ကဲ့သို့သော လက်လီလုပ်ငန်းကြီးများပင်လျှင် ယခုအချိန်၌ ဖုန်းယွီ၏ လမ်းကြောင်းများလောက် မစုံလင်လှပါချေ။

အရေးကြီးဆုံး အချက်မှာ လွန်ခဲ့သော နှစ်နှစ်အတွင်း ကမ္ဘာ့စီးပွားရေးမှာ အမေရိကန်၏ ဘဏ္ဍာရေး ဂယက်ကြောင့် ကျဆင်းနေခဲ့သဖြင့် ဈေးကြီးသော ပစ္စည်းများမှာ ရောင်းရခက်ခဲနေခဲ့သည်။ Wind and Rain ၏ ဤဈေးပေါသော ထုတ်ကုန်သည် ဈေးကွက်အတွင်း လိုအပ်ချက်ကို ကွက်တိ ဖြည့်ဆည်းပေးလိုက်သဖြင့် အရောင်းကောင်းနေသည်မှာ မဆန်းပါချေ။

“ခရစ္စမတ်တုန်းက သူတို့ ဈေးအနိမ့်စား ဖုန်းတစ်မျိုး ထုတ်ခဲ့သေးတယ် မဟုတ်လား၊ အဖြူအမည်း ဖန်သားပြင်နဲ့လေ။ အဲဒါကော ဘယ်နှစ်လုံး ရောင်းရပြီလဲ”

အိုဂါ နိုရီအိုသည် ရုတ်တရက် စိုးရိမ်စိတ်များ ဝင်လာမိသည်။ ဤဈေးပေါသော ပစ္စည်းများသည် ဤမျှအထိ ဈေးကွက် ရှိနေခြင်းလော။

“ဒါကတော့ အခုထိ မစုံစမ်းရသေးပါဘူး။ ဥက္ကဋ္ဌခင်ဗျာ၊ တစ်ပတ်ပဲ ရှိသေးတာဆိုတော့ ဘယ်လောက်များ ရောင်းရမှာမို့လို့လဲ”

“ပေါ့ပေါ့တန်တန် မတွေးပါနဲ့၊ မင်း အခုချက်ချင်း သွားပြီး စုံစမ်းခိုင်းလိုက်။ အကယ်၍ အဲဒီအဆင့်နိမ့် ဖုန်းက တကယ် ရောင်းကောင်းနေတယ်ဆိုရင် ငါတို့ Sony Ericssonကလည်း တစ်မျိုး ထုတ်ပြီး ဈေးကွက်ကို လုရလိမ့်မယ်”

“ဥက္ကဋ္ဌခင်ဗျာ၊ အဲဒီဖုန်းရဲ့ ရောင်းဈေးက ဒေါ်လာ ၄၉ ပဲ ရှိတာလေ။ ဘာအမြတ်များ ကျန်မှာမို့လို့လဲ။ ၄၉ ဒေါ်လာနဲ့ ဖုန်းတစ်လုံး ဖြစ်နိုင်ပါ့မလား။ ငါတို့သာ အဲဒီလိုမျိုး ထုတ်လိုက်ရင် လူတွေက ငါတို့ Sony အဲရစ်ဆင် ကို အထင်သေးသွားကြပါလိမ့်မယ်” လက်ထောက်က အံ့အားသင့်စွာ ပြောလိုက်သည်။

“လမ်းမတိုင်းမှာ ငါတို့ရဲ့ Sony အဲရစ်ဆင် ဖုန်းတွေကို လူတိုင်း ကိုင်နေကြပြီဆိုရင် ဘယ်သူကများ အထင်သေးဝံ့မှာလဲ။ အလုံးရေ သန်းချီ ရောင်းရမယ်ဆိုရင် တစ်လုံးကို အမြတ် နှစ်ဒေါ်လာ၊ သုံးဒေါ်လာပဲ ရဦးတော့၊ စုစုပေါင်း အမြတ်က ဒေါ်လာ သန်းဆယ်ဂဏန်း ရှိနေမှာပဲ”

“ဥက္ကဋ္ဌခင်ဗျာ၊ ဒေါ်လာ သန်းဆယ်ဂဏန်းလောက် အမြတ်အတွက်နဲ့ ငါတို့ ဒီလို လုပ်ဖို့ ထိုက်တန်ပါ့မလား” လက်ထောက်ကမူ သဘောမတူလိုသေးပါချေ။

မည်သို့ပင်ဖြစ်စေ Sony အဲရစ်ဆင် တွင် အဲရစ်ဆင်၏ ရှယ်ယာများ ပါဝင်နေသဖြင့် အမြတ်၏ တစ်ဝက်ခန့်ကို အဲရစ်ဆင်အား ခွဲဝေပေးရမည် ဖြစ်သည်။ ထိုအခါ အမြတ်မှာ ဒေါ်လာ သန်းအနည်းငယ်မျှသာ ကျန်ရှိမည်ဖြစ်ပြီး သုတေသနနှင့် ကြော်ငြာစရိတ်များကိုပါ နှုတ်လိုက်မည်ဆိုပါက ဘာမျှ ကျန်တော့မည် မဟုတ်ပါချေ။

ထို့ပြင် ဤအဆင့်နိမ့်ဖုန်းသည် အမှတ်တံဆိပ်၏ ဂုဏ်သိက္ခာကိုလည်း ထိခိုက်စေနိုင်သည်။ Sony အဲရစ်ဆင် ၏ ဈေးကွက်ဝေစုမှာ ကျဆင်းနေချိန်တွင် ဤသို့လုပ်ဆောင်ခြင်းက ၎င်းတို့အား အဆင့်နိမ့်ဖုန်းများသာ ထုတ်သော ကုမ္ပဏီဟု အထင်ခံရစေနိုင်သည် မဟုတ်ပါလား။

အိုဂါ နိုရီအိုသည်လည်း အနည်းငယ် တုံ့ဆိုင်းသွားခဲ့သည်။ လက်ထောက် ပြောဆိုသော စိုးရိမ်မှုများမှာ သူ့တွင်လည်း ရှိနေခဲ့သည်။

“ဒါဆိုရင် မင်း မှာကြားလိုက်ပါ၊ နောက်တစ်နာရီကြာရင် အဆင့်မြင့် အရာရှိတွေရဲ့ အစည်းအဝေး ခေါ်လိုက်။ ငါတို့ ဈေးကွက်အနိမ့်ပိုင်းကို ဝင်မလား၊ မဝင်ဘူးလားဆိုတာ သေသေချာချာ တိုင်ပင်ကြတာပေါ့”

“မန်နေဂျာဖုန်း... မထင်မှတ်ထားဘူးနော်၊ တစ်လတောင် မပြည့်သေးဘူး၊ ငါတို့ရဲ့ ဗီဒီယိုကင်မရာ အသေးလေးတွေရဲ့ အရောင်းက တစ်သိန်းကျော်သွားပြီ။ ဈေးကွက်ရဲ့ တုံ့ပြန်မှုကလည်း အရမ်းကောင်းသလို ဂုဏ်သတင်းလည်း မဆိုးပါဘူး။ အမြတ်နှုန်းက အများကြီး လျော့သွားပေမဲ့ အရောင်းက တဟုန်ထိုး တက်လာသလို ဈေးကွက်ဝေစုလည်း တိုးလာတာမို့လို့၊ ဒါဟာ ငါတို့ရဲ့ အနာဂတ် ထုတ်ကုန်တွေအတွက် ကြော်ငြာရာမှာ အများကြီး အထောက်အကူ ဖြစ်စေမှာပါ” ရှုလိဟွာက ဝမ်းသာအားရဖြင့် အစီရင်ခံလိုက်သည်။

“တစ်သိန်းလောက်နဲ့ ဘာတွေ ဝမ်းသာနေတာလဲ။ ငါ့အမြင်အရဆိုရင် ဒီအဆင့်နိမ့် ဗီဒီယိုကင်မရာရဲ့ အရောင်းဟာ အနည်းဆုံး အလုံးရေ ငါးသန်းအထိ ကျော်ဖြတ်နိုင်ရမယ်” ဖုန်းယွီက လက်တစ်ဖက်ကို ဖြန့်ပြကာ ဆိုလိုက်သည်။

“ဘယ်လောက်။ ငါးသန်း အဲဒီလောက်အထိ ဖြစ်နိုင်ပါ့မလား”

“ဘာလို့ မဖြစ်နိုင်ရမှာလဲ။ မင်းပြောသလိုပဲ အရောင်းက တဖြည်းဖြည်း တိုးလာနေတာလေ။ နောင်ကျလို့ ကုန်ကျစရိတ်တွေ ကျသွားတဲ့အခါ ဈေးနှုန်းကို ထပ်လျှော့မယ်၊ ဒါမှမဟုတ် လက်ဆောင်ပစ္စည်းတွေနဲ့ တွဲဖက်ရောင်းမယ်ဆိုရင် အရောင်းက ပိုတက်လာဦးမှာပဲ။ ပြီးတော့ မမေ့ပါနဲ့ဦး၊ မြို့ပြဈေးကွက်ကို ရရှိပြီးပြီဆိုရင် ကျေးလက်ဈေးကွက်ကိုပါ ငါတို့ တိုက်စစ်ဆင်လို့ ရသေးတယ်။ တရုတ်ပြည် ဈေးကွက်ကို Aiwaဆီ လွှဲပေးထားတယ် ဆိုဦးတော့၊ ပြည်ပမှာလည်း မြို့ပြနဲ့ ကျေးလက်ဆိုတာ ရှိတာပဲလေ။ ပြည်ပက ကျေးလက်မှာ နေတဲ့သူတွေကရော ဗီဒီယိုကင်မရာ မဝယ်ချင်ကြဘူးလို့ မင်း ထင်နေတာလား”

“နားလည်ပါပြီ။ ဒါဆိုရင် ဖွံ့ဖြိုးမှုအားနည်းတဲ့ နိုင်ငံတွေမှာ ကြော်ငြာတွေကို ပိုပြီး အရှိန်မြှင့်ခိုင်းလိုက်ပါ့မယ်။ အဲဒီဈေးကွက်တွေကိုပါ ငါတို့ သိမ်းပိုက်နိုင်ခဲ့ရင် ငါတို့ရဲ့ အနာဂတ် အရောင်းဟာ တကယ့်ကို မျှော်လင့်ချက် ရှိလာမှာပါ”

“ဂျပန် အီလက်ထရွန်နစ် ကုမ္ပဏီတွေကော ဈေးပေါတဲ့ မော်ဒယ်တွေ ထုတ်ကြပြီလား”

“မထုတ်သေးပါဘူး။ Philips နဲ့ Thomsonတို့လည်း ဒီဈေးကွက်ကို ဝင်ဖို့ စိတ်မကူးသေးပုံရတယ်။ သူတို့တွေကတော့ အမှတ်တံဆိပ်ရဲ့ တန်ဖိုးကို ကျဆင်းသွားမှာ စိုးရိမ်နေကြတုန်းပဲ ထင်ပါတယ်”

ဖုန်းယွီ က နှာခေါင်းရှုံ့လိုက်သည်။ Philips မှာ ဒေါ်လာ ရာဂဏန်းတန် မုတ်ဆိတ်ရိတ်စက်တွေ ရှိနေသလို၊ ၁၀ ဒေါ်လာအောက်တန် မုတ်ဆိတ်ရိတ်စက်တွေလည်း ရှိနေတာပဲ မဟုတ်လား။ ဈေးနှုန်းမတူတဲ့ ထုတ်ကုန်တွေက မတူညီတဲ့ သုံးစွဲသူတွေကို ဦးတည်တာပဲလေ၊ ဒါက ဘာပြဿနာ ရှိလို့လဲ။ ထုတ်ကုန်ရဲ့ နေရာယူမှုကသာ ရှင်းလင်းနေမယ်ဆိုရင် ကြော်ငြာဖို့အတွက် စိုးရိမ်နေစရာ မလိုပါချေ။

“သူတို့ လက်လျော့လိုက်တာ ပိုကောင်းတာပေါ့၊ ဒါဆိုရင် ဒီဈေးကွက်ကို ငါတို့ တစ်ဦးတည်း စိုးမိုးထားလို့ ရတာပေါ့”

“မန်နေဂျာဖုန်း... ဒါက မသေချာဘူး ထင်တယ်။ ဂျပန် နဲ့ ဥရောပက ကုမ္ပဏီကြီးတွေ မထုတ်သေးပေမဲ့၊ ကုမ္ပဏီငယ်လေးအချို့ကတော့ ဈေးပေါတဲ့ မော်ဒယ်တွေကို စတင် ထုတ်လုပ်နေကြပါပြီ။ သူတို့ရဲ့ဈေးနှုန်းက ငါတို့နဲ့ ဆင်တူသလို စွမ်းဆောင်ရည်ကလည်း သိပ်မကွာပါဘူး”

“ကိစ္စမရှိပါဘူး။ သူတို့မှာ ငါတို့လောက် ကောင်းမွန်တဲ့ အရောင်းလမ်းကြောင်း မရှိတဲ့အတွက် အရောင်းပမာဏက တက်လာမှာ မဟုတ်သလို အမြတ်လည်း များများစားစား ရမှာ မဟုတ်ပါဘူး။ ငါတို့ရဲ့ ကုန်ကျစရိတ်ကလည်း ဆက်တိုက် ကျဆင်းနေတာ မဟုတ်လား။ နောက်ထပ် လအနည်းငယ် ကြာလို့ ငါတို့ ဈေးနှုန်းကို ထပ်လျှော့လိုက်ရင် အဲဒီ ကုမ္ပဏီ အုပ်စုတစ်စုကို ငါတို့ ဒုက္ခပေးလို့ ရပြီ။ ကျန်တဲ့ ကုမ္ပဏီတွေကိုတော့ ငါတို့ နယ်မြေချဲ့ထွင်ဖို့အတွက် လိုအပ်နေတာဆိုတော့၊ သူတို့ကို ဝယ်ယူလိုက်ပြီး ငါတို့ရဲ့စက်ရုံတွေအဖြစ် ပြောင်းလဲပစ်ကြတာပေါ့”