အခန်း (၅၅၉-၅၆၀)

အပိုင်း ၅၅၉ - မိုးကြိုး အဆင့်သတ်မှတ်ချက်များ

တုန်ဖန်ရှန်းသည် နောက်ဆုံး အကြံအစည်များကို သားဖြစ်သူထံ ပြန်လည်ပြောပြနေစဉ် မျက်နှာပေါ်တွင် ကောက်ကျစ်သော အပြုံးတစ်ခု ရှိနေခဲ့သည်။

"ငါ မြို့စားကျန်းနဲ့ အခုလေးတင် စကားပြောခဲ့တယ်။ လုယောင်ကို ဖြေရှင်းဖို့ ပါးနပ်တဲ့ အစီအစဉ်တစ်ခုကို ငါတို့ ရေးဆွဲခဲ့ပေမယ့် လောလောဆယ်တော့ အသေးစိတ်အချက်အလက်တွေကို လျှို့ဝှက်ချက်အနေနဲ့ ထားရမယ်။ မင်းက ပုံမှန်အတိုင်းပဲ ဆက်ပြီး တိုက်ခိုက်နေလိုက်ပါ။ ပထမအချီ ရွေးချယ်မှုတွေ ပြီးသွားရင် လုယောင်ကို ဖမ်းဆီးပြီး တရားဥပဒေအတိုင်း အရေးယူမယ်"

"တကယ်လား"

တုန်ဖန်ယုံက စိတ်လှုပ်ရှားမှုကြောင့် အသံများပင် တုန်ယင်ကာ မေးလိုက်သည်။

"သေချာတယ်။ နောက်ခံမရှိတဲ့ ဝရမ်းပြေးတစ်ယောက်က လှည့်ကွက်နည်းနည်းလေးသုံးပြီး ဖျက်ဆီးမှုတွေ လုပ်နိုင်နေမယ်ဆိုရင် ကောင်းကင်ရုံးတော် က မိုးကြိုးဌာနကို ထားစရာ အကြောင်း ဘယ်ရှိတော့မလဲ"

တုန်ဖန်ယုံသည် ရင်ထဲမှ ဒေါသနှင့် စိတ်ပျက်မှုများ အားလုံး ကင်းစင်သွားသကဲ့သို့ စိတ်သက်သာရာရသွားကာ အားရပါးရ ရယ်မောပြီး ထပ်ပြောသည်။

"ကျောက်တန်မင်နဲ့ ချန်ယုတို့ အခုဆိုရင် အေးအေးချမ်းချမ်း အနားယူလို့ရပြီ"

တုန်ဖန်ရှန်းက သားဖြစ်သူ၏ ပခုံးကို ပုတ်ကာ ပြောလိုက်၏။

"သူတို့ရဲ့ မိဘတွေက အဆင့် ၆ တရားစီရင်ရေး အင်မော်တယ် တွေလေ။ သူတို့ရဲ့ သေဆုံးမှုအတွက် ဘယ်လိုလုပ် နေနိုင်မှာလဲ။ လာ လာ၊ ပြိုင်ပွဲကွင်းကို သွားကြစို့။ မင်းရဲ့ စစ်မှန်တဲ့ တောက်ပမှုတွေကို ထုတ်ပြလိုက်စမ်း"

"ဟုတ်ကဲ့"

တုန်ဖန်ယုံ၏ နှလုံးသားသည် စိတ်အားထက်သန်မှုတို့ဖြင့် ပြင်းပြစွာ လှိုင်းထန်လာခဲ့သည်။

တုန်ဖန်ရှန်းက လေးနက်စွာ သတိပေးလိုက်သည်။

"ဒီအမှုရဲ့ အသေးစိတ်ကို မင်းဘာသာမင်းပဲ သိထား။ ဒါတွေအားလုံးက လျှို့ဝှက်စီစဉ်ထားတာတွေပဲ။ အပြင်ကို သတင်းဖြန့်ဖို့ မလိုဘူး"

"စိတ်မပူပါနဲ့ အဖေ၊ သားက သုံးနှစ်သား မဟုတ်တော့ပါဘူး"

" ဟုတ်တယ်၊ အခုဆို အသက် ၃၀ နီးပါး ရှိနေပြီပဲ"

တုန်ဖန်ရှန်းက သူ့ကို ပြုံးလျက် ကြည့်နေသော်လည်း နှလုံးသားမှာ နာကျင်နေခဲ့သည်။

လျူမူက အဝေးသို့ လက်ညှိုးထိုးပြလိုက်သောအခါ နန်းတော်ကိုးဆောင် ပုံစံဖြင့် စီစဉ်ထားသော သိပ်သည်းသည့် မုန်တိုင်းတိမ်တိုက် ကိုးခုသည် မိုးကြိုးဌာန၏ သန့်စင်သော နယ်မြေနှင့် မိုးကြိုး မဟာအစီအရင်တို့ အကြား လွင့်မျောနေ၏။ တိမ်တိုက်တစ်ခုစီသည် ကျယ်လောင်စွာ မြည်ဟီးနေသော မိုးချုန်းသံများနှင့် ရေတွက်မရနိုင်သော လျှပ်စီးကြောင်းများဖြင့် ကျယ်ပြောလှသော နေရာတစ်ခုဖြစ်ပြီး ပတ်ဝန်းကျင်ကို အဆက်မပြတ် ဆူညံစေသည်။ အနည်းဆုံး လူသောင်းနှင့်ချီ၍ ပြိုင်ကွင်းသို့ တစ်ချိန်တည်း ဦးတည်သွားနေကြကာ အဆင့်မြင့် အင်မော်တယ် များ သို့မဟုတ် စီရင်သူ ပါရမီရှင်များဖြစ်ကြပြီး မိုးကြိုးဌာန၏ အထက်တန်းလွှာများချည်း ဖြစ်ကြ၏။ အဆင့် ၆ ကောင်းကင်အရာရှိနှင့် အထက်ရှိသူများသာလျှင် တိုက်ပွဲကို ကြည့်ရှုခွင့်ရှိပြီး မိုးကြိုးဌာနရှိ လူဦးရေ ကိုးဆယ့်ကိုးရာခိုင်နှုန်းမှာ တစ်ချက်လေး လှမ်းကြည့်ခွင့်ရရန်ပင် မပိုင်ဆိုင်သော အခွင့်ထူးတစ်ခု ဖြစ်ပေသည်။

လျူမုမု သည် မိုးတိမ်တိုက်ကြီးများထံ နီးကပ်စွာ ချဉ်းကပ်လာရင်း ယွမ်ရှောင်ကို အသိပေးလိုက်သည်။

"စီရင်သူ ပါရမီရှင် ၁၀,၀၀၀ နီးပါး ဒီရွေးချယ်ပွဲမှာ ပါဝင်ကြလိမ့်မယ်"

“တကယ်ကို များတာပဲ"

ယွမ်ရှောင်က မှတ်ချက်ချလိုက်ပြီး ကောင်းကင်ပျံသန်းရေးမြို့တော်မှာ ကျယ်ဝန်းသော်လည်း ဝင်ခွင့်နေရာ ၅ နေရာသာ ရှိသည်ကို ပြန်လည်သတိရမိသွားသည်။

"တကယ်တော့ သိပ်မများပါဘူး၊ ပြီးခဲ့တဲ့ ရွေးချယ်ပွဲတုန်းက ဒီထက်ပိုများတယ်။ အနည်းဆုံး ၈,၀၀၀ က မိုးကြိုးဌာနရဲ့ အဓိက အမာခံတွေက လာတာ။ နယ်မြို့တွေက လာတဲ့ မင်းလိုလူမျိုးတွေ ၂,၀၀၀ အောက်ပဲ ရှိတယ်။ မိုးကြိုးဌာနရဲ့ ရွေးချယ်ပွဲတိုင်းက ကိုးယောက် ရွေးချယ်ပြီး ကောင်းကင်ရုံးတော်၊ နတ်ဘုရားတံခါးပေါက်ဆီ သွားပြီး အရာရှိ ၁၀၀ ရှေ့မှောက်မှာ အင်မော်တယ် ချန်ပီယံ ဘွဲ့အတွက် ယှဉ်ပြိုင်ကြရတယ်။ ငါ မှတ်မိသလောက်ဆိုရင် အနည်းဆုံး ပြီးခဲ့တဲ့ ၅ ကြိမ်ဆက်တိုက် ရွေးချယ်ခံရတဲ့ ပါရမီရှင် ကိုးယောက်လုံး မိုးကြိုးဌာနကချည်းပဲ။ သမိုင်းတစ်လျှောက် နယ်မြို့တွေကနေ နတ်ဘုရားတံခါးအထိ ရောက်နိုင်ခဲ့တဲ့ စီရင်သူ အနည်းငယ်ပဲ ရှိခဲ့ဖူးတယ်"

နတ်ဘုရားတံခါးသည် ကောင်းကင်ရုံးတော် ၏ အချက်အချာနေရာ ဖြစ်ပြီး မဟာတာအို နယ်မြေ၏ ဗဟိုချက်လည်း ဖြစ်၍ သွားခွင့်ရခြင်းသည် ကြီးမားလှသော ဂုဏ်ထူးတစ်ရပ် ဖြစ်သည်။

"ကောင်းကင်ရုံးတော်မှာ မိုးကြိုးဌာန ဘယ်နှခု ရှိလို့လဲ"

ယွမ်ရှောင် က နားမလည်နိုင်စွာဖြင့် မေးလိုက်သည်။

လျူမုမု သည် ထိုကိစ္စကို ဆက်လက်မပြောတော့ဘဲ ရှင်းပြသည်။

"စီရင်သူ တွေက မိုးကြိုးဌာန လက်အောက်ခံဖြစ်ပြီး ကောင်းကင်ရုံးတော်မှာ မိုးကြိုးဌာန တစ်ခုတည်း ရှိတဲ့အတွက် နတ်ဘုရားတံခါး နောက်ဆုံးရွေးချယ်ပွဲတွေကို လွှမ်းမိုးထားပြီး နေရာ ကိုးနေရာကို ရယူထားတာပဲ"

"စုစုပေါင်း နေရာဘယ်နှခု ရှိတာလဲ"

" ကောင်းကင်ရုံးတော် ကနေ နတ်ဘုရားတံခါးကို သွားနိုင်တဲ့ စီရင်သူ ပါရမီရှင် ၁၆ ယောက် ရှိတယ်။ ကျန်တဲ့ ၇ ယောက်က ဌာနအသီးသီး၊ အင်မော်တယ် မျိုးနွယ်စုတွေနဲ့ မြင့်မြတ်တဲ့ မိသားစုတွေကနေ လာတယ်။ မိုးကြိုးဌာနက ကိုးယောက်ကလွဲရင် ကျန်တဲ့ ခုနစ်ယောက်က အဆင့်နဲ့ ဂုဏ်သတင်းကို မြှင့်တင်ဖို့ နယ်မြို့တွေမှာ တာဝန်ယူထားတဲ့ ဂုဏ်ထူးဆောင် စီရင်သူ တွေ သက်သက်ပဲ"

လျူမုမု က စနစ်၏ လက်တွေ့အခြေအနေကို လက်ခံရင်း စိတ်ပျက်လက်ပျက် ပြောလိုက်သည်။

"အဲဒီခုနစ်ယောက်က ဘယ်လောက်တောင် အရည်အချင်းရှိကြလို့လဲ"

ယွမ်ရှောင် က ပေါ့ပေါ့ပါးပါး မေးလိုက်၏။

"အမှန်အတိုင်းပြောရရင် မိုးကြိုးဌာနက ကောင်းကင်ရုံးတော် ရဲ့ အပြစ်ပေးဌာန သက်သက်ဖြစ်ပြီး အရင်းအမြစ်တွေ ကန့်သတ်ချက်ရှိတယ်။ အဲဒီ ခုနစ်ယောက်ကတော့ ကောင်းကင်ရုံးတော်ရဲ့ နေရာအနှံ့အပြားကနေ အကောင်းဆုံးတွေ ဖြစ်လေ့ရှိပြီး အများအားဖြင့် ငါတို့ထက် ပိုသန်မာကြတယ်။ ပြီးခဲ့တဲ့ ပြိုင်ပွဲ ၅ ခုမှာ မိုးကြိုးဌာနကနေ အင်မော်တယ် ချန်ပီယံ တစ်ယောက်မှ မထွက်လာခဲ့ဖူးဘူး"

" စီရင်သူ တွေအတွက် လုပ်တဲ့ အင်မော်တယ် သိုင်းပြိုင်ပွဲက တခြားသူတွေ အနိုင်ရသွားတာနဲ့ အဆုံးသတ်ရတယ်ပေါ့"

"တကယ်တော့ ပြိုင်ပွဲ ၅ ခုမှာ မိုးကြိုးဌာနက တတိယနေရာတောင် မရခဲ့ဘူး။ တခြား ပြိုင်ပွဲဝင် ခုနစ်ယောက်စလုံးက တစ်ယောက်ထက်တစ်ယောက် ပိုပြီး သန်မာကြတယ်"

သူတို့နှစ်ဦးသည် ကြီးမားလှသော မိုးတိမ်တိုက်ကိုးခုဖြင့် ဝန်းရံထားသော ပြိုင်ပွဲကွင်းထဲသို့ ခြေချမိနေပြီ ဖြစ်ကာ လူသောင်းနှင့်ချီ၍လည်း စုရုံးရောက်ရှိနေကြ၏။

မြင်ကွင်းသည် မယုံနိုင်လောက်အောင် ခမ်းနားကြီးကျယ်ပြီး ကျယ်ဝန်းလှကာ ခေါင်းအထက်တွင် ကျောက်စိမ်းဖြူ စင်မြင့်ကြီးတစ်ခု အုပ်မိုးနေပြီး စုရုံးနေကြသော အင်မော်တယ်များ အပေါ်သို့ ၎င်း၏ ခမ်းနားထည်ဝါမှုဖြင့် ဖိနှိပ်ထားကာ လျှပ်စီးကြောင်းများသည် ကြိုးများကဲ့သို့ ဆန့်ထွက်လာ၍ အထက်တွင် လှည့်ပတ်နေသော တိမ်တိုက် ကိုးခုနှင့် ချိတ်ဆက်ထားသည်။

"ဒါက ကောင်းကင်လျှပ်စီး စင်မြင့်ပဲ။ မကြာခင်မှာ မိုးကြိုးဌာနရဲ့ အင်မော်တယ် ၁၀၀ က တိုက်ပွဲတွေကို ကြည့်ရှုဖို့ နေရာယူကြလိမ့်မယ်"

"သူတို့က ဒီနေရာမှာ အစွမ်းအထက်ဆုံးတွေလား"

"ဟုတ်တယ်။ တစ်ယောက်ချင်းစီတိုင်းက သူတို့နယ်ပယ်နဲ့သူ အာဏာရှင်တွေချည်းပဲ"

လျူမူက ခေါင်းညိတ်လိုက်သည်။

"မြို့စားကျန်းက အဲဒီအပေါ်ကို တက်နိုင်တဲ့ အဆင့်အတန်းရှိလား"

ယွမ်ရှောင် က ပေါ့ပေါ့ပါးပါး မေးသည်။

"သူက အဆင့် ၄ မိုးကြိုး တမန်တော် အဖြစ် တရားဝင် ရာထူးတိုးမခံရသေးဘူး။ အောက်ကနေပဲ ကြည့်ရလိမ့်မယ်။ မင်းကို ကူညီခဲ့တဲ့ မိုးကြိုး တမန်တော်ချောင် နဲ့ နွေရာသီ မိုးကြိုးမြို့စားကြီး တို့ကတော့ အထက်တန်းလွှာ တစ်ရာထဲမှာ ပါဝင်တယ်"

အခြေခံအားဖြင့်၊ ကောင်းကင်ရုံးတော် ၏ အဆင့် ၄ ကောင်းကင်အရာရှိ အဆင့်အတန်းသည် ကောင်းကင်လျှပ်စီး စင်မြင့်ပေါ်သို့ တက်ရောက်ရန်အတွက် အခြေခံသတ်မှတ်ချက် ဖြစ်၏။ အဆင့်အတန်းခွဲခြားမှုများဖြင့် တင်းကျပ်လွန်းသော ကမ္ဘာတစ်ခု ဖြစ်ရာ အဆင့်တက်ရန်အတွက် အင်မော်တယ် အရာရှိ ဖြစ်စေ သို့မဟုတ် စီရင်သူ ပါရမီရှင်ဖြစ်စေ လူတိုင်းသည် စိတ်အားထက်သန်နေကြပြီး နှစ် ၃၀ တိုင်တိုင် ခက်ခဲကြမ်းတမ်းစွာ ကျင့်ကြံအားထုတ်ခဲ့ပြီးနောက် ယနေ့တွင် တောက်ပလိုသော ဆန္ဒများဖြင့် စိတ်ဝိညာဉ်များတွင် ပြည့်နှက်နေကြသည်။

" အဲဒါက ဘာလဲ"

ယွမ်ရှောင် က ကောင်းကင်လျှပ်စီး စင်မြင့်၏ အနောက်ရှိ အဆောက်အအုံတစ်ခုသို့ လက်ညှိုးထိုးပြလိုက်သည်။ ထိုနေရာတွင် ရွှေရောင် မိုးမျှော်နံရံကြီးတစ်ခုသည် လေထဲတွင် တွဲလောင်းကျနေပြီး ဗလာဖြစ်နေသော မျက်နှာပြင်၌ အလင်းရောင်များဖြင့် တောက်ပနေသည်။

ယွမ်ရှောင် သည် အပြင်လူဖြစ်မှန်း သိသောကြောင့် လျူမုမု က စိတ်ရှည်လက်ရှည် ရှင်းပြသည်။

" မိုးကြိုး အဆင့်သတ်မှတ်ချက်။ နတ်ဘုရားတံခါးအတွက် စီရင်သူ ကိုးယောက်ကို ရွေးချယ်ဖို့ တိုက်ပွဲကိုးချီကနေတစ်ဆင့် ယှဉ်ပြိုင်ကြမယ့် လူ ၁၀,၀၀၀ အကြောင်း ငါ အခုလေးတင် ပြောပြထားတယ်မဟုတ်လား။ ရွေးချယ်မှု ပြီးဆုံးသွားတဲ့အခါ နာမည်တွေက မိုးကြိုး အဆင့်သတ်မှတ်ချက်မှာ တောက်ပလာမှာဖြစ်ပြီး နောက်ထပ် အင်မော်တယ် ပြိုင်ပွဲ မရောက်မချင်း အလေးထားခံရလိမ့်မယ်"

" တခြား ခိုင်လုံတဲ့ ဆုလာဘ်တွေ မရှိဘူးလား"

ယွမ်ရှောင် က အဓိက စိုးရိမ်မှုကို ထုတ်ဖော်ပြောဆိုလိုက်၏။

"ကောင်းကင်ရုံးတော်မှာ ဘယ်ဆုလာဘ်ကို အလိုချင်ဆုံးလဲဆိုတာ မင်း သိလား"

လျူမူက မေးလိုက်ရာ ယွမ်ရှောင် က ခေါင်းခါပြသည်။

"ရာထူးတိုးတာပဲ။ ပုံမှန် စည်းမျဉ်းတွေအရဆိုရင် မင်းလို စီရင်သူ အလုပ်သင် တစ်ယောက်က တရားဝင် စီရင်သူ အဖြစ် ရာထူးတိုးဖို့ ငါးနှစ် အချိန်ယူရမယ်။ ပြီးတော့ အသက် ၃၀ မတိုင်ခင် အဆင့် ၈ ကို ရောက်ဖို့ဆိုတာ ချွင်းချက်အနေနဲ့ပဲ။ ဒါပေမယ့် မိုးကြိုးဌာနကို ကိုယ်စားပြုပြီး နတ်ဘုရားတံခါးမှာ သွားရောက်တိုက်ခိုက်မယ့် လူတွေကို ချက်ချင်း အဆင့် ၆ အဖြစ် ရာထူးတိုးမြှင့်ပေးလိမ့်မယ်။ ဒီမက်လုံးအသစ်ကို မကြာသေးခင်က နတ်ဘုရားတံခါးမှာ မိုးကြိုးဌာနဟာ စိတ်ပျက်စရာကောင်းလောက်အောင် စွမ်းဆောင်ရည်တွေ ကျဆင်းပြီးနောက်မှာ နွေရာသီ မိုးကြိုးမြို့စားကြီး က သတ်မှတ်လိုက်တယ်။ အင်မော်တယ် သိုင်းပြိုင်ပွဲဆိုတာ ထူးချွန်တဲ့သူတွေအတွက် အဆင့်တွေ ခုန်တက်တာပဲ။ မိုးကြိုး အဆင့်သတ်မှတ်ချက်အပြင် မိုးကြိုးဌာနက အသက် ၃၀ အောက် စီရင်သူ တွေအတွက် အမြင့်ဆုံးရာထူးကို အဆင့် ၇ ကောင်းကင် ကာကွယ်သူ အဖြစ် သတ်မှတ်ထားတယ်"

"ဟုတ်တယ်၊ ဆရာဆို နှစ်ချီကြာအောင် ကြိုးစားနေတာတောင် အဆင့် ၈ ပဲ ရောက်သေးတယ်"

ယွမ်ရှောင်မှာ မနေနိုင်ဘဲ ရယ်မောလိုက်မိသည်။

"ရယ်ချင်သလောက် ရယ်စမ်းပါ၊ ငါက မြန်တဲ့အထဲမှာ ပါသေးတယ်။ တစ်ခါတလေကျရင် ရာထူးတက်ဖို့ ကြိုးစားရတာက ကျင့်ကြံခြင်းကို တိုးတက်အောင် လုပ်ရတာထက်တောင် ပိုခက်ခဲသေးတယ်"

သူမက ပြန်ပက်လိုက်ပြီးနောက် မိုးကြိုး အဆင့်သတ်မှတ်ချက်သို့ ပြန်ကြည့်ကာ သက်ပြင်းချလိုက်သည်။

"မိုးကြိုးဌာနရဲ့ အသန်မာဆုံး ပါရမီရှင် ကိုးယောက် စာရင်းဝင်သွားပြီဆိုတာနဲ့ ငါ့အဖေလောက်ကို ရာထူး အဆင့်မြင့်သွားလိမ့်မယ်။ အစစ်အမှန် အာဏာမရှိဘဲ နာမည်ခံအဆင့် ဖြစ်နေရင်တောင် လုံလောက်နေပြီ။ ငါ့အဖေဆို အဆင့် ၆ တရားစီရင်ရေး အင်မော်တယ် ဖြစ်လာဖို့အတွက် ရာစုနှစ်ပေါင်းများစွာ အချိန်ယူခဲ့ရတာလေ"

" မဆိုးဘူး။ ဒါက ကျုပ် လိုအပ်နေတဲ့ အဆင့်အတန်းပဲ"

ယွမ်ရှောင်က မျက်လုံးများတွင် အလင်းရောင်များ တောက်ပလာကာ ပြောလိုက်၏။

"ဒါဆိုရင် မင်းက အဲဒီထဲက တစ်နေရာကို ပစ်မှတ်ထားနေတာပေါ့။ မင်းဆီမှာ အလားအလာတော့ ရှိပါတယ်။ ဒါပေမယ့် မှတ်ထား၊ ဒီပြိုင်ပွဲဝင် ၁၀,၀၀၀ ထဲမှာ အများစုက အဆင့် ၇ ကောင်းကင် ကာကွယ်သူ ရာထူးကို ရပြီးသားသူတွေ။ သူတို့အတွက်က အဆင့် ၆ ကို တက်လှမ်းဖို့ဆိုတာ တစ်ဆင့်တက်ရုံပဲ။ မိုးကြိုးဌာန အမာခံနေရာတွေကလာတဲ့ ပါရမီရှင်တွေက ကောင်းကင်ပျံသန်းရေးမြို့တော်က လူတွေထက် အများကြီး သာလွန်တယ်။ တချို့ဆို အဆင့် ၃ နဲ့ ၂ ကောင်းကင်အရာရှိ တွေရဲ့ ကလေးတွေတောင် ပါသေးတယ်။ ဒီနေ့က ကြီးကျယ်ခမ်းနားတဲ့ အနာဂတ်တွေအတွက် သူတို့ရဲ့ စွမ်းရည်တွေကို ပြသဖို့ အကောင်းဆုံး အခွင့်အရေးပဲ။ ဒါကြောင့် သူတို့ အစွမ်းကုန် ကြိုးစားကြလိမ့်မယ်"

ရိုးရိုးရှင်းရှင်း ပြောရလျှင် ၎င်းသည် အနာဂတ်အတွက် ပြိုင်ပွဲတစ်ခု ဖြစ်ကာ ယနေ့တွင် မိုးကြိုး အဆင့်သတ်မှတ်ချက်တွင် ဝင်ရောက်နိုင်သူများသည် တစ်နေ့လျှင် နယ်စားကြီးများ သို့မဟုတ် အချုပ်အခြာအာဏာပိုင်များ ဖြစ်လာနိုင်ပေသည်။ ယွမ်ရှောင်သည် ကောင်းကင်ပျံသန်းရေးမြို့တော် မှ အရည်အချင်းရှိသော စီရင်သူ အနည်းငယ်ကိုသာ ရှင်းလင်းပစ်ခဲ့သော်လည်း အမှန်တကယ် စိန်ခေါ်ချက်သည် ပြိုင်ကွင်းထဲတွင် ရှိနေပေလိမ့်မည်။ လူငယ် ပါရမီရှင် ၁၀,၀၀၀ ၏ ပြင်းပြသော ရည်မှန်းချက်များနှင့် တက်ကြွသော အသံများသည် သူ၏ နားထဲတွင် ပဲ့တင်ထပ်နေခဲ့ပြီး မိုးကြိုးဌာန နယ်မြေသည် ပန်းပဲဖိုကြီးတစ်ခုကဲ့သို့ဖြစ်ပြီး ပါရမီရှင်တိုင်း၏ သွေးနှင့် နှလုံးသားများကို သွန်းလုပ်လျက်ရှိ၏။

ယွမ်ရှောင်က အသက်ကို ခပ်ပြင်းပြင်းရှူပြီး ဖြည်းညင်းစွာ ပြောလိုက်လေသည်။

"ဆရာ၊ ကျုပ်ရဲ့ ရည်မှန်းချက်က မိုးကြိုး အဆင့်သတ်မှတ်ချက်ထဲ ဝင်ဖို့လောက်တင် မဟုတ်ဘူး။ လုယောင် ဆိုတဲ့ နာမည်ကို နတ်ဘုရားတံခါးအထိ ပဲ့တင်ထပ်သွားပြီး ကောင်းကင်ရုံးတော်မှာ ဟိန်းထွက်သွားအောင် လုပ်ချင်တယ်"

အပိုင်း ၅၆၀ - ရတနာလား ဒါမှမဟုတ် ဝက်လား

များစွာသော စီရင်သူ ပါရမီရှင်များသည် ပြိုင်ပွဲကွင်းများတွင် အချင်းချင်း တီးတိုးပြောဆိုနေကြစဉ် ကျောက်စိမ်း ရုံးတော်၏ အရပ်မျက်နှာအနှံ့မှ မျက်စိကျိန်းမတတ် တောက်ပသော လျှပ်စီးတန်းပေါင်း ၁၀၀ ကျော် ရုတ်တရက် ထွက်ပေါ်လာခဲ့သည်။

ဝုန်း

နတ်ဘုရား လျှပ်စီးတန်း ၁၀၀ သည် အင်မော်တယ် များအဖြစ် ပြောင်းလဲသွားပြီး လျှပ်စီး စင်မြင့်၏ အထွတ်အမြတ်ထားရာ နေရာများသို့ ဆင်းသက်လာကြသောအခါ ယခင်က ဆူညံနေခဲ့သော ပတ်ဝန်းကျင်သည် ထူးဆန်းစွာ တိတ်ဆိတ်သွားခဲ့၍ လူအုပ်ကြီးသည် ရိုသေလေးစားစွာဖြင့် ကျောက်စိမ်းဖြူ စင်မြင့်ကြီးကို မော့ကြည့်နေကြသည်။ သူတို့သည် ကြီးကျယ်ခမ်းနားသူများဖြစ်ကြပြီး တစ်ယောက်ချင်းစီတိုင်းသည် လျှပ်စီးဖြင့် ဖုံးလွှမ်းနေကာ မျက်တောင်တစ်ချက် ခတ်လိုက်တိုင်း မိုးကြိုးများ လှုပ်ခတ်သွားသည်။ သေသပ်စွာ ဖန်တီးထားသော တော်ဝင်ဝတ်ရုံများကို ဝတ်ဆင်ထားကြပြီး တပ်ဆင်ထားသော ကျောက်မျက်ရတနာများမှာ မုန်တိုင်း၏ မျက်လုံးများကဲ့သို့ တောက်ပနေကြပြီး သူတို့ ရောက်ရှိလာမှုသည် ကွင်းတစ်ခုလုံးကို ချက်ချင်းပင် လွှမ်းမိုးသွားခဲ့သည်။

သတိပေးစကား ပြောနေရန်ပင် မလိုဘဲ ပြိုင်ပွဲဝင် ၁၀,၀၀၀ သည် အင်မော်တယ် ၁၀၀ ကို ရိုသေလေးစားစွာ ဦးညွှတ်အရိုအသေပေးလိုက်ကြ၏။

"ဂါရဝပြုပါတယ်၊ ဘုံကိုးဆင့် မိုးကြိုး စစ်သူကြီး"

"ဂါရဝပြုပါတယ်၊ လမ်းရှစ်သွယ် တိမ်တိုက် မိုးကြိုး စစ်သူကြီး"

"ဂါရဝပြုပါတယ်၊ အရပ်ငါးမျက်နှာ မိုးကြိုး တမန်တော်များ"

"ဂါရဝပြုပါတယ်၊ မိုးကြိုး မြို့စားများနှင့် မြို့စားကတော်များ"

"မိုးကြိုး တမန်တော်ချုပ်များ အားလုံးကို ဂါရဝပြုပါတယ်!"

လေးနက်သော အသံလှိုင်းများသည် မြေပြင်တစ်ခွင်မှ ထွက်ပေါ်လာခဲ့ပြီး မိုးကြိုးဧကရာဇ်မှလွဲ၍ ကျန်အရာရှိများအားလုံး ဆင်းသက်လာကြသည်မှာ ထင်ရှားပြီး ၎င်းသည် အင်မော်တယ် ပြိုင်ပွဲအတွက် ဤရွေးချယ်မှုအပေါ် မိုးကြိုးဌာန မည်မျှ အရေးထားကြောင်း ပေါ်လွင်စေသည်။ ဤနေရာရှိ ပြိုင်ပွဲဝင် ၁၀,၀၀၀ အနက် ကိုးယောက်သည် ကောင်းကင်ရုံးတော် ၏ နတ်ဘုရားတံခါးတွင် အမြင့်ဆုံး ဂုဏ်ကျက်သရေအတွက် ယှဉ်ပြိုင်ရန် ဂုဏ်ထူးဆောင် စီရင်သူ ခုနစ်ယောက်နှင့် ပူးပေါင်းရမည်ဖြစ်သည်။ ထို့ကြောင့် မိုးကြိုးဌာန၏ စီရင်သူများအတွက် ၎င်းသည် ပင်မပွဲစဉ်တစ်ခုသာမကဘဲ အင်မော်တယ် ပြိုင်ပွဲ၏ ရှစ်ဆယ်ရာခိုင်နှုန်းဟု သတ်မှတ်ရလောက်ပေသည်။

လူအုပ်ကြီးက ရိုသေစွာ ဦးညွှတ်နေချိန်တွင် လျှပ်စီး စင်မြင့်ပေါ်၌ ခရမ်းရောင် ဂါဝန်ကို ဝတ်ဆင်ထားသော အရပ်ရှည်ရှည်နှင့် ဆွဲဆောင်မှုရှိရှိ အမျိုးသမီးတစ်ဦး ပေါ်လာပြီး အာရုံကို ဖမ်းစားသွားလေသည်။

" မိုးကြိုး တမန်တော်ချုပ်၊ ချောင်ရူ"

ထိုအမည်သည် ယောက်ျားဆန်သည်ဟု ထင်ရသော်လည်း မိုးကြိုးဌာန အတွင်းတွင် ဆွဲဆောင်မှုနှင့် ဥပဒေအပေါ် လိုက်နာမှုတို့ကြောင့် နာမည်ကျော်ကြားသော မိန်းမတစ်ယောက်ဖြစ်ကြောင်း လူအများစု သိထားကြ၏။ အံ့မခန်းစွမ်းရည်များကြောင့် သူမကို မိုးကြိုးမေမေကြီး ဟူသော နာမည်ပြောင်တစ်ခုကို ရရှိစေခဲ့သော်လည်း သေချင်နေသူမဟုတ်လျှင် မည်သူမျှ ဤအမည် ခေါ်ဝံ့မည်မဟုတ်ပေ။ သူမသည် ကောင်းကင် လျှပ်စီးများဖြင့် ရစ်ပတ်ကာ ရပ်နေပြီး ဂါဝန်မှာ လွင့်နေကာ ကျော့ရှင်းသော ခြေတံများသည် လင်းလက်တောက်ပနေ၍ ချက်ချင်းပင် အကြည့်အားလုံး ဆုံစည်းရာ ဖြစ်လာခဲ့သည်။

"အားလုံး ဒီအမိန့်တွေကို နားထောင်ကြစမ်း။ မိုးကြိုးဌာနရဲ့ ရွေးချယ်မှုကို အခု စတင်မယ်။ တိုက်ပွဲအစီအစဉ်ကို ကျပန်း ဆုံးဖြတ်မှာဖြစ်ပြီး အနိုင်အရှုံးကို အင်မော်တယ် အစီအရင်ကနေ အကဲဖြတ်ပေးလိမ့်မယ်။ နာမည်ခေါ်ခံရသူတွေက ထွက်သက်ဝင်သက် အကြိမ် ၃၀ အတွင်း တိုက်ခိုက်ရမယ်၊ မဟုတ်ရင် ရှုံးနိမ့်တယ်လို့ သတ်မှတ်ခံရမယ်"

သူမ၏ ကြေညာချက်မှတစ်ဆင့် မိုးကြိုးဌာန၏ စရိုက်လက္ခဏာကို သိမြင်နိုင်ကာ ရိုးရှင်းပြီး ထိရောက်မှုရှိခြင်း၊ လျှပ်စီးကဲ့သို့ မြန်ဆန်ခြင်းနှင့် အကောင်အထည်ဖော်ရာတွင် ပြတ်သားခြင်း တို့ပင်။

ကြီးမားလှသော တိမ်တိုက် ကိုးခုသည် နားကွဲမတတ် ဟိန်းသံများနှင့်အတူ ရုတ်တရက် ပေါက်ကွဲထွက်ပြီး လျှပ်စီးကြောင်း ကုဋေပေါင်းများစွာ ကွဲထွက်ကာ လေထဲတွင် ပြေးလွှားသွားကြသည်။ ၎င်းတို့က အချင်း မီတာ ၁,၅၀၀စီရှိသော ပိုမို သေးငယ်သည့် တိမ်တိုက်ငယ် ၅,၀၀၀ နီးပါးအဖြစ် ကွဲသွားပြီး ပြိုင်ပွဲဝင် ၁၀,၀၀၀ ကို ဝန်းရံသွားကာ ပြိုင်ပွဲများအတွက် စစ်မြေပြင်များ ဖြစ်တည်လာကြသည်။ တိမ်တိုက်များအပေါ် တိုက်ခိုက်ရာတွင် ပြိုင်ဘက်ကို သတိထားရမည်သာမက အဆက်မပြတ် ပစ်ခတ်နေသော မိုးကြိုးများကိုလည်း သတိထားရမည်ဖြစ်ရာ ပြိုင်ပွဲဝင်တိုင်းအတွက် စမ်းသပ်မှုကြီးတစ်ခု ဖြစ်ပေသည်။ ဤလျှပ်စီးကြောင်းများသည် ကောင်းကင် မိုးကြိုး မဟာအစီအရင်၏ အစိတ်အပိုင်းတစ်ခုဖြစ်သည်ဟုလည်း ဆိုကြ၏။

နောက်တစ်ဆင့်အနေဖြင့် တိုက်ပွဲ အစီအစဉ်ကို သတ်မှတ်မည် ဖြစ်ကာ အကြည့်အားလုံးသည် မိုးကြိုး အဆင့်သတ်မှတ်ချက်သို့ ချက်ချင်း ရောက်သွားကြပြီး နံရံကြီးက အရောင်ကိုးမျိုး လျှပ်စီးများ ထွက်လာပြီး ၎င်းတို့ လိမ်ယှက်သွားသောအခါ တစ်ဖက်တစ်ချက်စီတွင် နာမည်တစ်ခုစီကို ဖြစ်ပေါ်စေသည်။

"နီယွမ်နဲ့ ဖုန်းချီ"

ထိုအချိန်တွင် ချောင်ရူ၏အသံသည် ဆွဲဆောင်ခြင်း မရှိတော့ဘဲ လေးနက်မှု၊ သတ်ဖြတ်လိုမှုနှင့် ခွန်အားအပြည့် ပါဝင်နေလေသည်။

"မိုးတိမ်တိုက် နံပါတ်တစ်"

စကားဆုံးသည်နှင့် တစ်ပြိုင်နက် ပြိုင်ပွဲဝင် ၁၀,၀၀၀ အနက် ပုံရိပ်နှစ်ခုသည် အချိန်ကန့်သတ်ချက် ကျော်လွန်သွားမည်ကို စိုးရိမ်သဖြင့် ထောင့်တစ်နေရာရှိ တိမ်တိုက်တစ်ခုထံ အလွန်မြန်ဆန်သော အရှိန်ဖြင့် ပြေးသွားကြလေသည်။ ဤသို့ဖြင့် မိုးကြိုးဌာန၏ ရွေးချယ်မှု တိုက်ပွဲများသည် နီယွမ် နှင့် ဖုန်းချီ တိုက်ပွဲဖြင့် စတင်ခဲ့ကာ မိုးကြိုး အဆင့်သတ်မှတ်ချက်က ရပ်တန့်မသွားဘဲ နောက်ပွဲစဉ်များ ဆက်လက် ရွေးချယ်ပေးနေ၏။ နာမည်တစ်ခုစီတိုင်းသည် ပြိုင်ပွဲတစ်လျှောက် ကျော်ကြားလာရန် အခွင့်အရေးရှိကာ နာမည်များကို ကြားလိုက်ရသည့်အခိုက်အတန့်တွင် ပြိုင်ပွဲဝင်များ၏ နှလုံးသားများသည် ဂုဏ်ယူဝင့်ကြွားမှုများဖြင့် တောက်လောင်နေခဲ့ကာ စီရင်သူ တစ်ယောက်ဖြစ်ရခြင်းသည်ပင် ဂုဏ်ကျက်သရေတစ်ခု ဖြစ်ပေသည်။ ဤနည်းလမ်းသည် မမြန်သော်လည်း မတူညီသော တိမ်တိုက်များအထက်ရှိ တိုက်ပွဲများကို အစဉ်လိုက်ဖြစ်စေပြီး ပြိုင်ပွဲဝင်တစ်ဦးချင်းစီအား ကာလတစ်ခုအတွင်း လူအများ၏ အာရုံစိုက်မှုကို ရရှိစေမည့် အခွင့်အရေးကို ပေးစွမ်းနိုင်သည်။ အချို့က တိုက်ပွဲများကို လျင်မြန်စွာ အဆုံးသတ်ကြပြီး အခြားသူများကမူ မိုးကြိုး အဆင့်သတ်မှတ်ချက်ကို အာရုံစိုက် ကြည့်ရှုနေကြပြီး မျက်လုံးများ တောက်လောင်နေကာ မျှော်လင့်ချက်များဖြင့် အသက်ရှူအောင့်ထားကြသည်။

ချောင်ရွှို သည် လောလောဆယ်တွင် အလုပ်လုပ်စရာ မလိုအပ်တော့သောကြောင့် ခါးကိုလှုပ်ခါလျက် ဂုဏ်ကျက်သရေရှိသော နေရာသို့ ပြန်သွားကာ တိုက်ပွဲများကို ပြုံးလျက် ကြည့်ရှုနေသည်။ သူမ၏ အနောက်ဘက်ရှိ ပိုမိုမြင့်မားသော နေရာတစ်ခုတွင် လေးလံသော သံချပ်ကာကို ဝတ်ဆင်ထားသည့် ထိပ်ပြောင် အင်မော်တယ် တစ်ပါး ထိုင်နေပြီး အစ်ကိုဖြစ်သူ၊ စစ်သူကြီးချောင်ပင်။ သူ၏ ကြီးမားလှသော လက်များကို လက်ရန်းများပေါ်တွင် တင်ထားပြီး ထိုနေရာတွင် မျက်လုံးများကို မှိတ်ကာ အနားယူနေသော်လည်း ခမ်းနားထည်ဝါသည်။ ဘေးရှိ အဆင့်အတန်းတူ နေရာတစ်ခုတွင် ထိုင်နေသူမှာမူ လုံးဝကွဲပြားခြားနားသော အမူအရာရှိသူ ဖြစ်၍ ပိန်ပါးပြီး အရပ်ရှည်ကာ အဖြူနှင့် ရွှေရောင် ချည်ထိုး အဝတ်အစားကို ဝတ်ဆင်ထားပြီး ကျော့ရှင်းသော ကိုယ်ဟန်အမူအရာ ရှိသည်။ ယဉ်ကျေးသိမ်မွေ့သော လူကြီးလူကောင်းတစ်ဦး ဖြစ်သော်လည်း အနည်းငယ် ပါးသော နှုတ်ခမ်းများက ကြောက်မက်ဖွယ်ကောင်းသော အသွင်အပြင်ကို ပေးစွမ်းနေသည်။

သူက မျက်ခုံးတစ်ဖက်ကို ပင့်ပြီး စစ်သူကြီးချောင် ကို လှမ်းကြည့်ကာ စကားစသည်။

"စစ်သူကြီးချောင်၊ ခင်ဗျားရဲ့ မွေးစားသားလည်း ဝင်ပြိုင်မယ်လို့ ကြားတယ်။ သူ့နာမည်က ဘယ်သူလဲ။ ငါတို့အားလုံး သူ့ကို ချီးကျူးနိုင်အောင် သိချင်လို့ပါ"

သူ၏ စကားက အနီးနားရှိ မိုးကြိုးဌာန၏ အဆင့်မြင့် အင်မော်တယ်များ၏ မျက်လုံးတွင် အဓိပ္ပါယ်ပါသော အကြည့်များ တောက်ပလာစေကာ အနည်းငယ် ပြုံးယောင်သန်းသွားကြသည်။

"လျှပ်စီး သခင် ပိုဟုန်၊ အစ်ကိုက ရှင်နဲ့ စကားမပြောချင်ဘူး။ အချိန်ကျရင် ကျွန်မ ရှင့်ကို ပြောပြပါ့မယ်"

"ဒါဆိုရင်လည်း ကျွန်တော်က မိုးကြိုး တမန်တော်ကို ကျေးဇူးတင်ရမှာပေါ့"

"ဘာမှမဖြစ်ပါဘူး။ ရှင် သူ့ရဲ့ အရည်အချင်းကြောင့် အရမ်း လန့်သွားပြီး အစ်ကိုရှေ့မှာ နောက်ထပ် သရော်စကား မပြောရဲတော့မှာကို စိုးရိမ်လို့ပါ"

ထိုစကားကို ကြားသောအခါ ပိုဟုန်သည် ခေတ္တတန့်သွားပြီးနောက် အခြားသူများနှင့်အတူ ရယ်မောလိုက်မိသည်။

"ဘယ်လိုပဲဖြစ်ဖြစ် အဘိုးကြီးချောင်က အမြင် စူးရှတယ်လို့ နာမည်ကြီးတာပဲ။ ဒီတစ်ခါတော့ သူ ရှာတွေ့ထားတာ ရတနာလား၊ ဒါမှမဟုတ် ဝက်လား ဆိုတာ မသေချာလို့ပါ"

ရယ်သံများ တစ်ဖန် ထွက်ပေါ်လာပြန်ပြီး ဟာသသက်သက်သာ ဖြစ်သော်လည်း စစ်သူကြီးချောင်က သိသာထင်ရှားစွာ ရှက်ရွံ့နေပြီး အဆင့် ၃ ကောင်းကင်အရာရှိ များအနေဖြင့် အာဏာ၏ အထွတ်အထိပ်သို့ တက်လှမ်းရန် ရည်ရွယ်ထားသူအချင်းချင်း မလွဲမသွေ ပြိုင်ဘက်များချည်း ဖြစ်ကြသည်။ ထင်ရှားသော မျိုးရိုးများမှ ဆင်းသက်လာကြပြီး ငယ်ရွယ်သော အောင်မြင်သူများဖြစ်ကြသည့် စစ်သူကြီးချောင် နှင့် ပိုဟုန်တို့ နှစ်ဦးလုံးသည် အနာဂတ် မိုးကြိုး စစ်သူကြီး ရာထူးအတွက် အပြင်းအထန် ပြိုင်ဆိုင်နေကြသူများ ဖြစ်၏။

"ဟေး၊ သတိပေးချင်တယ်။ အစ်ကိုက စိတ်တိုလွယ်တယ်နော်။ သူက လျှပ်စီး စင်မြင့်ပေါ်မှာ ရှင့်ကို ရိုက်နှက်သွားလိမ့်မယ်"

" ကြောက်စရာကြီးပါလား။ ငါတို့အားလုံးက ရှေးဟောင်း မိုးကြိုး မျိုးစေ့ ပိုင်ရှင်တစ်ယောက်ကို မွေးစားသား ခေါ်ယူနိုင်လောက်အောင် ကံကောင်းတဲ့သူတွေမှ မဟုတ်တာ ကြောက်စရာကောင်းနိုင်တာပေါ့လေ"

ပိုဟုန်သည် အပြုံး မျက်နှာထားဖြင့် လက်ကို လျင်မြန်စွာ ဝှေ့ယမ်းကာ ဆက်လက်လှောင်ပြောင်နေ၏။

အစပိုင်းသာ ရှိသေးသော်လည်း မိုးကြိုးဌာန၏ ရွေးချယ်ရေး တိုက်ပွဲသည် ပြင်းထန်စွာ ကျင်းပနေပြီး မိုးကြိုး ပေါက်ကွဲသံများနှင့် လေပြင်း တိုက်ခတ်သံများဖြင့် ပြည့်နှက်နေကာ အချို့က ရှေ့သို့ တက်လှမ်းသွားကြပြီး အချို့ကမူ စင်မြင့်ပေါ်မှ မှေးမှိန်စွာ ထွက်ခွာသွားကြရသည်။ ထောင့်တစ်နေရာတွင် ယွမ်ရှောင်က အလှည့်ကို စောင့်ဆိုင်းနေဆဲဖြစ်ကာ ကြယ်ပြာနှင့် လနီတို့သည် ကျောက်တန်မင် နှင့် ချန်ယု၏ ရတနာများနှင့် အင်မော်တယ် ကျောက်စိမ်းများကို စားသုံးပြီးနောက် သုံးရောင်ခြယ် ဆေးလုံး သုံးခုကို ထပ်မံ ထုတ်လုပ်ပေးခဲ့၏။ ခဏအကြာတွင် သူက အသက်ကို ပြင်းပြင်းရှူထုတ်လိုက်ကာ ဆေးများကို စုပ်ယူပြီးနောက် ဒန်တန်အတွင်းရှိ ချီစက်ဝန်း ပိုမိုကျယ်ပြန့်လာ၍ တောက်ပနေသော ကြီးမားသည့် အလင်းပြားကြီးတစ်ခုနှင့် တူလာသည်။

"အလယ်အဆင့် ဝိညာဉ် အနှစ်သာရ နယ်ပယ်"

သူက လျင်မြန်စွာ အဆင့်တက်နေသော်လည်း အရင်းအမြစ်များစွာ ကုန်ကျခဲ့ရသည်။

"ငါ ဘယ်တော့ ကျောထောက်နောက်ခံတစ်ခု ရနိုင်မှာလဲ။ အရင်းအမြစ်အတွက် လုယက်သတ်ဖြတ်တာကိုပဲ အားကိုးနေရတာက ကောင်းကင်ရုံးတော်မှာ အရမ်း နှေးလွန်းတယ်"

သူ၏ တိုးတက်မှုသည် ကောင်းကင်ကို ဆန့်ကျင်နိုင်လောက်သော်လည်း အရမ်းနှေးကွေးသည်ဟု ထင်နေဆဲဖြစ်သည်။ ထိုပြဿနာအတွက် ချက်ချင်း ဖြေရှင်းစရာ နည်းလမ်း မရှိဘဲ လူ့အဖွဲ့အစည်းက ပိုမိုရှုပ်ထွေးလာလေလေ အစွမ်းထက်သော အဆက်အသွယ်များကို ရရှိရန် ပို၍ခက်ခဲလာလေလေ ဖြစ်သည်။ ဆက်ဆံရေးအများစုသည် အချင်းချင်း အမြတ်ထုတ်ခြင်းသက်သက်သာ ဖြစ်ကြောင်း သိထားသောကြောင့် သူ၏ ခြေလှမ်းများကို ပြုပြင် ပြောင်းလဲကာ လိုက်လျောညီထွေဖြစ်အောင် နေထိုင်ခဲ့သည်။ ယခု အရင်းအမြစ် ကုန်သွားပြီဖြစ်ရာ အရာရာကို အလျင်စလို မလုပ်နိုင်တော့ဘဲ ရှေ့လာမည့် တိုက်ပွဲအတွက် ပြင်ဆင်ရန် ကျင့်ကြံတရားထိုင်ခြင်းကိုသာ ဆက်လုပ်နိုင်တော့၏။ ထိုအချိန်တွင် ကောင်းကင်ပျံသန်းရေးမြို့တော်မှ အဖွဲ့ ရောက်လာကြပြီး ကျန်းထိုက်ပင်း၊ တုန်ဖန်ရှန်း၊ ကျန်း ညီအစ်မများနှင့် တုန်ဖန်ယုံတို့ အတူတကွ ရောက်လာကြသည်။ တုန်ဖန်ယုံသည် များစွာ ပိုမိုတည်ငြိမ်နေပုံရကာ ယွမ်ရှောင် ကို မြင်လိုက်ရသည့် အခိုက် အေးစက်သော အပြုံးတစ်ခုကို ပြပြီးနောက် လျင်မြန်စွာ ဖုံးကွယ်လိုက်၏။

"မြို့စားကျန်း"

လျူမူက သူတို့ကို ကြိုဆိုလိုက်သည်။

"ဒီကလေးသုံးယောက်ရဲ့ နာမည်တွေကို မခေါ်သေးဘူးမလား"

နောက်ကျမှ ရောက်လာသော မြို့စားကျန်း က မေးလိုက်သည်။

"မခေါ်သေးပါဘူး"

ထို့နောက် သူတို့သည် အုပ်စုငယ်သုံးခု ခွဲပြီး တိတ်ဆိတ်စွာ စောင့်ဆိုင်းနေကြကာ တုန်ဖန်ရှန်း နှင့် သားဖြစ်သူက တစ်ဖက်၊ ယွမ်ရှောင် နှင့်လျူမူက တစ်ဖက်နှင့် ကျန်လူများအားလုံးက အခြားတစ်ဖက်တွင် နေရာယူကြသည်။

"အဖေ၊ အမှန်တိုင်းပြောရရင် ကျွန်တော့်ကို ဒီကောင်နဲ့ တွဲပေးရင် အကောင်းဆုံးဖြစ်မယ်ထင်တယ်"

"ဘာကြောင့်လဲ"

တုန်ဖန်ရှန်း က မေးလိုက်သည်။

"အဲဒါဆို သူ့ကို သတ်ဖို့ ပိုလွယ်လာလိမ့်မယ်။ သူ သေသွားတာနဲ့ ပြဿနာတွေ မဖန်တီးနိုင်တော့ဘူးလေ"

တုန်ဖန်ယုံ က အေးစက်စွာ ပြောသည်။

"ဒီလို အသေးအဖွဲ ကိစ္စလေးအတွက် စစ်သူကြီးချောင် ကို ငါတို့ အနှောင့်အယှက် မပေးရဲဘူး"

"နားလည်ပါပြီ။ လူမိုက်က နည်းနည်းလောက် အသက်ပိုရှည်ခွင့် ရသွားတာပေါ့"

သူက အထင်သေးစွာ မှတ်ချက်ချလိုက်သည်။

ထိုအချိန်တွင် ယွမ်ရှောင်က ဆက်လက်ကျင့်ကြံနေစဉ် မိုးကြိုး အဆင့်သတ်မှတ်ချက်မှ တိုက်ခိုက်ရန် အလှည့် ကျရောက်လာခဲ့လေသည်။

"လုယောင်"