အခန်း (၅၆၁-၅၆၂)

အပိုင်း ၅၆၁ - ကိုယ်ပွား ဝိညာဉ် တိုက်ခိုက်မှု

ယွမ်ရှောင်သည် မျက်လုံးများကို ဖွင့်ကာ မတ်တတ်ရပ်ပြီး တည်ငြိမ်သော စိတ်နှလုံးဖြင့် မိုးကြိုး အဆင့်သတ်မှတ်ချက်သို့ လှမ်းကြည့်လိုက်သည်။ အရောင်ကိုးမျိုး လျှပ်စီးများသည် လုယောင် ဟူသော နာမည်ကို ပြသနေကာ ညာခြမ်းတွင် အခြား လျှပ်စီးတစ်ခုက စာလုံးသုံးလုံးပါဝင်သော နာမည်တစ်ခုကို ပုံဖော်လိုက်သည်။

"တုန်ဖန်ယုံ"

ဤနာမည်ကြောင့် ထိတ်လန့်သွားသော မြို့စားကျန်းသည် ယွမ်ရှောင်ထံ အလျင်စလို ချဉ်းကပ်လာကာ လေးနက်စွာ ပြောလိုက်သည်။

"ငါ ကျိန်ဆိုရဲတယ်။ ဒီတိုက်ပွဲနဲ့ ပတ်သက်ပြီး ဘာလှည့်ကွက်မှ မသုံးခဲ့ဘူး"

ယွမ်ရှောင် က သူ့ကို မျက်ခုံးပင့်ပြလိုက်သည်။

"မင်း သိပါတယ်၊ ငါ့မှာ ဒီလိုလုပ်စရာ အကြောင်းပြချက် မရှိဘူး"

"စိတ်မပူပါနဲ့၊ ကျုပ်က စိတ်ထဲမထားပါဘူး"

မြို့စားကျန်း အံ့သြသွားကာ တုန်ဖန်ယုံ တွင် ဖုံးကွယ်ထားသော လျှို့ဝှက်ချက်များ ရှိနေကြောင်း ပြောချင်ခဲ့သော်လည်း ယွမ်ရှောင်၏ ခပ်တည်တည် အမူအရာကို မြင်လိုက်ရသောအခါ စကားလုံးများကို မျိုချလိုက်သည်။

တုန်ဖန်ယုံသည် စိတ်လှုပ်ရှားစွာဖြင့် သူ၏ဖခင်ထံ ချဉ်းကပ်သွားသည်။

"အဖေ"

တုန်ဖန်ရှန်းသည် ရုတ်တရက် မျက်ရည်များ ကျဆင်းလာကာ သားဖြစ်သူ၏ ပခုံးကို ပုတ်ကာ ပြောလိုက်၏။

"သွားပြီး တိုက်ခိုက်ချေ။ အဖေက မြို့စားကျန်းကို သွားပြီး ကျေးဇူးတင်လိုက်ဦးမယ်"

"မိုးကြိုးဌာနရဲ့ ရွေးချယ်ပွဲမှာ သွေးကြွေးဟောင်းတွေ မပါဘူးဆိုရင် အများအားဖြင့် လူမသတ်ကြဘူး"

သူက ဤသို့ ကြုံးဝါးကာ လေပြင်းတစ်ချက်ကဲ့သို့ မိုးတိမ်တိုက်တစ်ခုထဲသို့ ပြေးဝင်သွားလေသည်။

"မြို့စားကျန်း"

တုန်ဖန်ရှန်းသည် မျက်လုံးများ နီရဲလျက် အလျင်စလို ရောက်လာခဲ့သည်။

မြို့စားကျန်းက ချောင်းဟန့်လိုက်ပြီး တုန်ဖန်ရှန်း အနီးသို့ ကပ်ကာ တီးတိုးပြောလိုက်သည်။

"တိုးတိုးလုပ်၊ ငါတို့က နှစ်ပေါင်းများစွာ သေတူရှင်မကွဲ ရဲဘော်ရဲဘက်တွေ ဖြစ်ခဲ့ကြတာပဲ။ မင်းရဲ့ သားကို ဘယ်လိုလုပ် မတရား သေခိုင်းရမှာလဲ။ ဒီတစ်ခါ ငါ အကောင်းဆုံး လုပ်ပေးခဲ့တယ်။ မင်းဘာသာမင်း သိထားပါ။ တခြားဘယ်သူမှ မသိစေနဲ့"

"နားလည်ပါပြီ"

တုန်ဖန်ရှန်းက ခေါင်းညိတ်ပြီး အနှစ် ၃၀ တိုင်တိုင် ဂရုတစိုက် ပြုစုပျိုးထောင်ခဲ့သော သားဖြစ်သူသည် အမြဲတမ်း တောင့်တခဲ့ရသည့် စစ်မြေပြင်သို့ နောက်ဆုံးတွင် ခြေချသွားနိုင်သည်ကို ကြည့်ရှုနေလေသည်။ အမှန်စင်စစ် ဤတိုက်ပွဲက မိုးကြိုးဌာန၏ ပြိုင်ကွင်းတွင် သေးငယ်သော မြင်ကွင်းတစ်ခုသာ ဖြစ်ပြီး အစပိုင်းတွင် အာရုံစိုက်မှု အနည်းငယ်သာ ရရှိခဲ့ကာ အဆင့်မြင့် အရာရှိကြီးများ အားလုံးက နာမည်ကျော် ပါရမီရှင်များကိုသာ အာရုံစိုက်နေကြသည်။

သို့သော် နူးညံ့ပုံရသော်လည်း စူးရှသော အသံတစ်သံသည် မိုးကြိုး စင်မြင့် မှတစ်ဆင့် ကွင်းပြင်တစ်ခုလုံးသို့ ပဲ့တင်ထပ်သွား၏။

"လူကြီးမင်းများရှင်၊ တိမ်တိုက်အမှတ် ၁,၀၀၁ မှာရှိတဲ့ လုယောင် လို့ခေါ်တဲ့ လူငယ်လေးကို အာရုံစိုက်ပေးကြပါ။ သူ့ကို အစ်ကိုက မွေးစားသားအဖြစ် အသိအမှတ်ပြုထားပါတယ်။ အခုကစပြီး သူ့ကို သေသေချာချာ ဂရုစိုက် အားပေးလိုက်ရအောင်"

ချောင်ရူ၏ ကြေညာချက်ကြောင့် တစ်ချိန်က လျစ်လျူရှုခံခဲ့ရသော ပြိုင်ပွဲသည် တက်ရောက်လာသူ အားလုံးနီးပါး၏ အာရုံစိုက်မှုကို ချက်ချင်းပင် ဖမ်းစားသွားကာ စိတ်ဝင်စားမှုအပြည့်ဖြင့် စိုက်ကြည့်နေကြသည်။

"တကယ်ပဲ သူ ဖြစ်နေတာလား"

"မိုးကြိုး တမန်တော်က အစ်ကိုရဲ့ မကောင်းသတင်းတွေကို လူသိရှင်ကြား ဖွင့်ချနေတာလား"

"ဘုရားရေ၊ သူမက လူတိုင်းရှေ့မှာ အစ်ကိုကို အရှက်ခွဲဖို့ ကြိုးစားနေတာပဲ"

အခြေအနေကို သဘောပေါက်သွားသောအခါ လူအုပ်ကြီးသည် ရယ်ရခက် ငိုရခက် ဖြစ်သွားကြသည်။

" စိတ်ဝင်စားစရာကောင်းတော့မယ်"

စစ်သူကြီးချောင်၏ မျက်နှာကို သူတို့ မမြင်နိုင်သော်လည်း မျက်နှာတစ်ခုလုံး နီရဲနေမည်မှာ ထင်ရှားသည်။ ထို့အပြင် များသောအားဖြင့် လေးနက်တည်ကြည်သော ပတ်ဝန်းကျင်၊ ကောင်းကင် မိုးကြိုး စင်မြင့် မှနေ၍ ရယ်သံသဲ့သဲ့ကို ကြားနေရသည်။

"စစ်သူကြီးချောင်က ဒီနေ့ ဆေးခါးတစ်ခွက်ကို မျိုချလိုက်ရသလိုဖြစ်သွားတာပဲ။ သူ စုဆောင်းထားခဲ့တဲ့ ဂုဏ်သိက္ခာတွေ အားလုံးကို ကုန်ပြီ"

"သူက အရမ်းလောလွန်းတယ်။ ငါသာဆိုရင် အနည်းဆုံးတော့ အဲဒီကလေးကို မူလဝိညာဉ် အရင် ပြခိုင်းလိုက်မယ်"

"ကျန်းထိုက်ပင်းလို့ခေါ်တဲ့ မိုးကြိုး တမန်တော် အသစ်တစ်ယောက်က သူ့ကို ချောက်ချလိုက်တာလို့ ကြားတယ်"

တီးတိုးစကားသံများသည် နားထဲသို့ ပုရွက်ဆိတ်များ တွားသွားဝင်ရောက်လာသကဲ့သို့ ပျံ့နှံ့သွားသောအခါ မြို့စားကျန်းသည် မျက်လုံးများကို မှိတ်ထားပြီး လက်သီးများကိုသာ တင်းတင်းဆုပ်ထားလိုက်ရသည်။

"အဖေ..."

ကျန်းဟိုင်ယန်သည် နောက်ဆုံးတွင် ဖခင်ဖြစ်သူ ရင်ဆိုင်နေရသော အခက်အခဲကို နားလည်သွားခဲ့သည်။

"လုယောင်၊ လုယောင်"

ကျန်းဟယ်ချင်းကမူ ပြုစားခံထားရသကဲ့သို့ ဖြစ်နေပြီး ရူးသွပ်စွာ အားပေးကာ လုံးဝ စွဲလန်းနေပုံပေါ်သည်။

"ငါ မင်းကို တကယ် ကျေးဇူးတင်သင့်တယ်။ မင်းရဲ့ အရှက်တကွဲ ဖြစ်ရပ်လေးသာ မပါဘူးဆိုရင် တစ်သက်လုံး ဒီလောက် အာရုံစိုက်တာမျိုး ဘယ်တော့မှ ရခဲ့မှာ မဟုတ်ဘူး"

တုန်ဖန်ယုံက ထူးဆန်းသော အမူအရာဖြင့် ပြောလိုက်သည်။

"ရပါတယ်။ ဘာဖြစ်ဖြစ် တခြားနေရာမှာဆိုရင် မင်းက အလယ်အလတ်အဆင့်လောက်ပဲ ရှိတယ်ဆိုတာကို ငါတို့အားလုံး သိထားတာပဲ"

ယွမ်ရှောင်သည် ပတ်ဝန်းကျင်ရှိ ကမောက်ကမများကို သတိမထားမိသည့်အလား တည်ငြိမ်အေးဆေးကာ စကားလုံးဖြင့် တစ်ဖက်လူ၏စိတ်ဓာတ်ကို ရိုက်ချိုးပစ်လိုက်သည်။

"သေခြင်းတရားနဲ့ ရင်ဆိုင်ရချိန်မှာတောင် အမြဲတမ်း ဘာမှမသိနားမလည်တဲ့ ငမိုက်သား ဖြစ်နေတုန်းပဲ"

တုန်ဖန်ယုံသည် စိတ်ထဲမှ ခေါင်းယမ်းပြီး လူသေတစ်ယောက်အတွက် စကားလုံးများကို အလဟဿ ဖြုန်းတီးနေရန် အဓိပ္ပါယ်မရှိဟု သတ်မှတ်ထားသည်။ ခန္ဓာကိုယ်သည် ကျားတစ်ကောင်ပမာ ကြောက်မက်ဖွယ် မိုးချုန်းသံများနှင့်အတူ ပေါက်ကွဲထွက်လာကာ အရေပြားက အဖြူရောင်တောက်တောက်သို့ ပြောင်းလဲသွားပြီး ထောင်ပေါင်းများစွာသော အစွန်းများဖြင့် ဝန်းရံထားသော နတ်ဘုရား လက်နက်တစ်ခုကဲ့သို့ ထင်ရသည်။

"သိုင်းကျင့်ကြံသူ တစ်ယောက်၊ ခန့်မှန်းခြေ အတ္တနတ်ဘုရား နယ်ပယ် နှောင်းပိုင်းအဆင့်မှာ ရှိနေတယ်"

တုန်ဖန်ယုံ ၏ အစွမ်းကုန် အားထုတ်မှုနှင့်အတူ စွမ်းအားကြီးမားသူများစွာသည် စစ်မှန်သော ကျင့်ကြံခြင်း အဆင့်ကို သိသွားကြသည်။

သူက ကျန်းဟိုင်ယန်ထက် အဆင့်ကြီးတစ်ဆင့်လုံး ပို၍ အစွမ်းထက်နေကာ စီရင်သူ သံချပ်ကာကို ဝတ်ဆင်ထားပြီး စစ်နတ်ဘုရားတစ်ပါးနှင့် ဆင်တူနေသည်။

"စစ်သူကြီးချောင် ရဲ့ မွေးစားသားက ဘယ်လောက် အစွမ်းထက်လဲဆိုတာ သိတဲ့သူ ရှိလား"

"သူက အသက် ၂၇ နှစ်ရှိပြီဖြစ်ပြီး အနှစ်သာရ နယ်ပယ် ကို အခုမှ ရောက်တာလို့ ကြားတယ်"

ကြည့်ရှုသူ ပရိသတ်များအကြား အထင်သေးသော အပြုံးတစ်ခု ပျံ့နှံ့သွားကာ ယွမ်ရှောင် ကို သရော်နေကြမှန်း တုန်ဖန်ယုံ သိ၍ သူလည်း လိုက်လံ လှောင်ရယ်ခဲ့သည်။ သူ၏ အမူအရာ အေးစက်သွားပြီး လက်ကို ဆန့်ထုတ်ကာ ဝိညာဉ်ကို သရုပ်ဖော်လိုက်ရာ လူနှင့် နဂါး တစ်ပိုင်းသဏ္ဍာန်တစ်ခု ဘေးတွင် ပေါင်းစည်းဖြစ်ပေါ်လာ၏။

"အာဏာနဂါး မူလဝိညာဉ်"

"သူက မိုးကြိုးဌာန ရဲ့ ဌာနချုပ်မှာ နေရာတစ်နေရာ ရဖို့ သေချာပေါက် ထိုက်တန်တယ်"

"သူ့ရဲ့ အနာဂတ်က မဆိုးဘူး"

အားပေးသံများ မြင့်တက်လာပြီး တုန်ဖန်ယုံ အနှစ်သုံးဆယ်တိုင်တိုင် တောင့်တခဲ့ရသော အခိုက်အတန့်ပင်။

"လုယောင်"

သိုင်းအင်မော်တယ် တစ်ယောက် ဖြစ်သော သူ၏ လက်သည် ရွှေရောင်အလင်းတန်းများဖြင့် တောက်ပနေပြီး နဂါး အကြေးခွံများဖြင့် အလှဆင်ထားသော လှံရှည်တစ်ချောင်း လက်ဖဝါးထဲတွင် ပေါ်လာကာ လျှို့ဝှက်ဆန်းကြယ် နေမင်း နဂါး လှံဟူ၍ နာမည်တွင်၏။ သူက ယွမ်ရှောင်ထံ မုန်တိုင်းတစ်ခုကဲ့သို့ အရှိန်အဟုန်ဖြင့် ပြေးဝင်လာကာ လူ၊ ဝိညာဉ်နှင့် လှံ တို့ တစ်ပေါင်းတစ်စည်းတည်း ဖြစ်နေ၍ တိုက်ကွက်တစ်ချက်တည်းဖြင့် လှံရှစ်ချက် သူ၏လှံသည် မျက်စိကျိန်းမတတ် ထွက်ပေါ်လာသည်။ စိတ်ဝိညာဉ်၊ ခွန်အား၊ ဆန္ဒစသည်တို့မှာ ကြည့်ရှုသူများ၏ မျက်လုံးထဲတွင် ငယ်ရွယ်သော စီရင်သူ တစ်ယောက် ဖြစ်သင့်ဖြစ်ထိုက်သည့် ပုံရိပ်အစစ်အမှန်ပင် ဖြစ်သောကြောင့် လေးစားချီးကျူးသံများ မစဲတော့ပေ။

"အလားအလာကောင်းတဲ့ လူငယ်လေးပဲ"

ချီးကျူးစကားသည် သူ၏ ဦးနှောက်ကို ဂုဏ်ယူဝင့်ကြွားမှုများဖြင့် ဖောင်းကားသွားစေပြီး လှံချက် ပိုမိုလျင်မြန်လာကာ ယွမ်ရှောင်ကို ကိုက်သတ်ရန် ကြိုးစားနေသည့် ရွှေရောင်နဂါးတစ်ကောင်ကဲ့သို့ပင်။

ရွှေရောင်မုန်တိုင်းရှေ့တွင် ယွမ်ရှောင်သည် နူးညံ့ပြီး အားနည်းပုံပေါက်နေကာ ဖျက်ဆီးခံရမည့်ပုံ ရှိနေသော်လည်း မျက်လုံးများတွင် တည်ငြိမ်မှုနှင့် လျစ်လျူရှုမှုများသာ ရှိနေသည်။

"အင်မော်တယ် တွေရဲ့ လမ်းစဉ်မှာ စွမ်းအားမရှိဘဲ မာန်ဖီတာက သေခြင်းရဲ့ ရှေ့ပြေးနိမိတ်ပဲ"

ယွမ်ရှောင်သည် လက်ကို ဆန့်ထုတ်လိုက်ရာ မိုးပြာရောင် ဓားဝိညာဉ် တစ်ခု ထွက်လာသကဲ့သို့ ဘေးတွင်လည်း အဖြူရောင် ဝတ်ရုံဝတ်ဆင်ထားသော မူလဝိညာဉ်သည် ဖြည်းညှင်းစွာ သရုပ်ပေါ်လာသည်။ ၎င်း၏ လက်ထဲတွင်လည်း ဓားတစ်လက် ပေါ်လာကာ အစိတ်အပိုင်းတစ်ခုဖြစ်ပြီး မိုးပြာ ရောင်ကို ထုတ်လွှတ်ကာ မြူခိုးများနှင့် ရစ်ပတ်နေသည်။

" အမြွှာ ဝိညာဉ် တိုက်ခိုက်မှု"

ယွမ်ရှောင် လှုပ်ရှားလိုက်သည့် အခိုက်အတန့်တွင် ဝိညာဉ်သည် အရိပ်ကဲ့သို့ သူနှင့်အတူ ရွေ့လျားသွားကာ ၎င်း၏ ဓားက ကောင်းကင် သင်္ချိုင်း ဓားဝိညာဉ် ၏ လမ်းကြောင်းအတိုင်း တိကျစွာ လိုက်ပါသွားပြီး ဓားသိုင်းပညာ ဆင့်ကဲပြောင်းလဲမှုကို ထင်ဟပ်စေသည်။ လျှပ်စီးမြွေတစ်ကောင်ကဲ့သို့ လျင်မြန်သော ဓားချက်သည် အသံကျယ်လောင်စွာ ထွက်လာပြီး အပြာရောင် လျှပ်စီးများ ရစ်ပတ်နေသော ဓားဝိညာဉ်မှ ပေါက်ကွဲထွက်လာ၏။ မူလဝိညာဉ်ကလည်း ဓားကို ဓားဝိညာဉ်နှင့် တစ်ပြိုင်တည်း ရွေ့လျားလိုက်သောအခါ လေထုကို ခွဲထွက်လာစဉ် လျှပ်စီးကြောင်းများ ထုတ်လုပ်ပေးခဲ့ပြီး ဓားအလင်းနှစ်ခု ပြိုင်တူ ဖြစ်တည်လာသည်။ တစ်စုံတစ်ယောက်က မူလဝိညာဉ်ဖြင့် တိုက်ပွဲကို အနီးကပ် လေ့လာရန် ကြိုးစားလျှင် ဤလျှပ်စီးဓားသည် အခြား ဝိညာဉ်များအပေါ် အလွန်တရာ ပျက်စီးထိခိုက်စေနိုင်ကြောင်း ရှင်းလင်းစွာ ခံစားမိပေလိမ့်မည်။

ယွမ်ရှောင်နှင့် မူလဝိညာဉ်သည် အမြွှာ ဝိညာဉ် တိုက်ခိုက်မှုကို ပြုလုပ်ခဲ့ပြီး ဓားချက်က လျှပ်စီးကဲ့သို့ လျင်မြန်ပြီး ပြင်းထန်ကာ အမြင့်ဆုံး တိကျမှုဖြင့် ထိုးနှက်သွားကာ ဓားတစ်လက်ဖြစ်သော်လည်း၊ ဓားနှစ်လက်လည်း ဖြစ်နေပြန်သည်။

ဘန်း

မျက်တောင်တစ်ခတ်အတွင်း မိုးပြာရောင် လျှပ်စီး ဓားကွန်ရက်တစ်ခုသည် တုန်ဖန်ယုံ၏ နဂါး လှံကို ရစ်ပတ်ဖုံးလွှမ်းသွားကာ ထိပ်တိုက်တွေ့ဆုံမှုကြောင့် မီးပွားများ လွင့်စင်သွားပြီး ပြိုင်ပွဲကွင်းတစ်ခုလုံး စူးရှသော အသံ တချွင်ချွင် ပျံ့နှံ့လာ၏။

လျှပ်စီး ဓားအလင်းသည် တုန်ဖန်ယုံ ၏ အာဏာနဂါး မူလဝိညာဉ်ကို ဖောက်ဝင်သွားပြီး ခန္ဓာကိုယ်ကို ဖြတ်သွားသောအခါ သူ၏မျက်နှာပေါ်ရှိ မောက်မာမှုတို့သည် ထိုအချိန်တွင် ထိတ်လန့်ကြောက်ရွံ့မှုအဖြစ်သို့ ပြောင်းလဲသွား၍ မျက်လုံးများ ပြူးကျယ်၍ လျှပ်စီးများ ရစ်ပတ်နေသော လူငယ်လေးကို စိုက်ကြည့်နေမိသည်။

"တုန်ဖန်ယုံ၊ မင်းက သွေးသောက်ညီအစ်ကိုတွေကို သတ်ဖြတ်ခဲ့တဲ့ နာမည်ဆိုးကို နောက်ဘဝအထိ သယ်သွားရလိမ့်မယ်။ ဒီတိုက်ပွဲက ငါ စီစဉ်ထားတာပဲ။ ကျေးဇူးတင်စရာ မလိုဘူး"

ရွှစ်

ယွမ်ရှောင်၏ ဓားသည် တုန်ဖန်ယုံကို ဖြတ်ကျော်သွားသည်နှင့် တပြိုင်နက် မျှော်လင့်ချက်တို့ မှေးမှိန်သွားသော အကြည့်များ စိတ်ပျက်အားငယ်မှုတို့ဖြင့် မှောင်မိုက်သွားသကဲ့သို့ ခန္ဓာကိုယ် လဲကျသွားတော့သည်။ သူက ဓားကို ကောင်းကင်သို့ မြှောက်လိုက်သည်နှင့် တပြိုင်နက် အထက်ရှိ မိုးကြိုး မဟာအစီအရင် အသက်ဝင်လာကာ လျှပ်စီးတန်း သန်းပေါင်းများစွာသည် လိမ်ယှက် လှည့်ပတ်နေကြရင်း အောက်သို့ ဆင်းသက်လာကြ၏။ သူ၏ အရှိန်အဝါသည် နတ်ဘုရားတစ်ပါးကဲ့သို့ လင်းလက်တောက်ပနေကာ စကားတစ်ခွန်းမျှ မဟခဲ့သော်လည်း ဓားတစ်ချက်တည်းဖြင့် မိုးကြိုးဌာန၏ အထက်တန်း အရာရှိများကို သူ့အပေါ် ရှုထောင့်အသစ်တစ်ခုမှ အမြင်ပြောင်းလဲသွားစေရန် အမှန်တကယ် ဖိအားပေးနိုင်ခဲ့လေသည်။

အပိုင်း ၅၆၂ - ကောင်းကင်ရုံးတော်၏ ဓား

တိမ်တိုက်များအနက် တစ်ခုတွင် တိုက်ပွဲ ပြီးဆုံးသွားကာ သေဆုံးနှုန်း အလွန်တရာ နည်းပါးသော ပြိုင်ပွဲ၌ အသက်တစ်ချောင်း ဆုံးရှုံးသွားသည်။ မဟာတာအိုနယ်မြေ၏ လူမှုဆက်ဆံရေးက ရှုပ်ထွေးပြီး အဆက်အသွယ်များမှာ အရေးပါသောကြောင့် ပြိုင်ပွဲများသည် လေ့ကျင့်ရန် သက်သက်သာ ဖြစ်၍ ရန်သူ မဖန်တီးလိုကြပေ။ တုန်ဖုန်ယုံ သေသွားသည်ကို မည်သူမျှ ဂရုမစိုက်အားဘဲ ယွမ်ရှောင်ကို အာရုံစိုက်ထားကြပြီး လှောင်ပြောင်သရော်သော အကြည့်များမှ အံ့သြမင်သက်ခြင်းများ အဖြစ် ပြောင်းလဲကုန်သည်။ လူအများစုက ခန့်မှန်းချက် လွဲမှား၍ စိတ်မသက်မသာ ဖြစ်နေကြသော်လည်း အရာရှိကြီးများကမူ တစ်ခုခုကို သဘောပေါက်သွားပုံရသည်။

"ဒီကလေးရဲ့ မူလဝိညာဥ်က ထူးဆန်းတယ်"

"ဝိညာဥ်နဲ့ ရုပ်ခန္ဓာ တစ်ထပ်တည်း ကျနေပြီး တိုက်ကွက်တစ်ခုတည်းကို ပြိုင်တူ ထုတ်ဖော်နိုင်ကြတယ်"

မူလဝိညာဥ်ကို နက်ရှိုင်းစွာ လေ့လာထားသူများအတွက်ပင် ဤအချက်က မဖြစ်နိုင်လောက်ပေ။ သာမန် ဝိညာဥ်များက လက်နက်များအပေါ် ကပ်တွယ်၍ ပိုမိုအားကောင်းလာစေနိုင်သော်လည်း ပိုင်ရှင်နှင့် တစ်ထပ်တည်းတူညီစွာ လှုပ်ရှား၍ သိုင်းကွက်ကို ဆင့်ကဲပြောင်းလဲပေးနိုင်သည်မှာ ပထမဆုံးအကြိမ်ပင်။ လူငယ်ပါရမီရှင်များက ဤအချက်ကို သတိမထားမိဘဲ အထင်သေးနေဆဲ ဖြစ်သော်လည်း ကျင့်ကြံသူကြီးများ၏ မျက်လုံးတွင် ယွမ်ရှောင်အပေါ် အမြင်များ စတင်ပြောင်းလဲလာကြ၏။

"အရေးမပါတဲ့ ကိုယ်ပွားဝိညာဥ်က သိုင်းပညာကိုတောင် အတုယူနိုင်တယ်"

စွမ်းအားကြီး အင်မော်တယ်များ ဆင်ခြင်သုံးသပ်ရာမှ ထွက်ပေါ်လာသော ကောက်ချက်ဖြစ်ပြီး အချင်းချင်း ဆွေးနွေးရင်း စစ်သူကြီးချောင်ထံ လှမ်းကြည့်နေကြသည်။ သူက အဖြူရောင်ဝတ် လူငယ်လေးကို ကြည့်နေရင်း ပြုံးယောင်သန်းလာကာ မသိသာသော်လည်း တုံ့ပြန်မှုမှာ လုံလောက်ပေ၏။ ဘေးတွင် ရှိနေသော ပိုဟုန်ကမူ ပါးစပ်ပိတ်သွားကာ အလောင်းကောင်ပမာ မျက်နှာ ဖြူဖပ်ဖြူရော် ဖြစ်နေသည်။

"ချောင်ရှန်း"

ထိုအချိန်တွင် အမြင့်ဆုံးနေရာမှ ရှေးကျကာ အရှိန်အဝါကြီးမားသော အသံတစ်သံ ထွက်ပေါ်လာ၍ ခေါင်းလောင်းထိုးလိုက်သကဲ့သို့ မြည်ဟီးသွားပြီး ဝိညာဥ်ကိုပင် လှုပ်ခတ်သွားစေနိုင်လောက်၏။

"မဟာစစ်သူကြီး ဒီငယ်သား ရှိပါတယ်"

စစ်သူကြီးချောင်ရှန်းက ထိပ်ထိပ်ပြာပြာ ဖြစ်သွားကာ မိုးကြိုးစင်မြင့် အထက်တွင် ထိုင်နေသော အဘိုးအိုတစ်ယောက်ထံ ဂါရဝပြုလိုက်သည်။ သူ၏ ဆံပင်များက အဖြူရောင် ဖြစ်သော်လည်း အသက်ဝင် တောက်ပနေကာ တစ်ကိုယ်လုံး လျှပ်စီးကြောင်းများ ဖြတ်သန်း၍ မျက်နှာကို ဖုံးကွယ်ထားပြီး ရွှေရောင်မျက်လုံးတစ်စုံစာ မြင်နိုင်၏။ မိုးကြိုးဌာနတွင် တစ်ဦးတည်းသော အဆင့်နှစ် ကောင်းကင်အရာရှိ မဟာမိုးကြိုး စစ်သူကြီး ဖြစ်ကာ နတ်ဘုရားတံခါးတွင် အမြဲ နေထိုင်တတ်သည့် မိုးကြိုးဧကရာဇ်၏ လက်ရုံးလည်း ဖြစ်သောကြောင့် အာဏာကြီးကြီးမားမား ပိုင်ဆိုင်ထားသည်။ မဟာစစ်သူကြီး စကားစလိုက်သောအခါ လူတိုင်း တိတ်ဆိတ်သွားပြီး ထိုအဘိုးအိုထံ အရိုအသေပေးရန် ချက်ချင်း လှည့်လိုက်ကြ၏။

"ဒီကလေးရဲ့ မူလဝိညာဥ်က သာမန်ထက် ပိုတာတွေ လုပ်ပြသွားတာပဲ။ ဒီလို ပါရမီမျိုးက ပြောရခက်တယ်။ အကန့်အသတ်က အမြင့်ဆုံး ဖြစ်သွားနိုင်သလို အနိမ့်ဆုံးလည်း ကျသွားနိုင်တယ်။ ဆက်ပြီး စောင့်ကြည့်ထားလိုက်"

အဓိပ္ပါယ်က မရေမရာ ဖြစ်နေသောကြောင့် မည်သို့ ဆိုလိုချင်ကြောင်း မသိသော်လည်း လူတိုင်း လေးစားစွာ နားစိုက်ထားကြသည်။

"ဘယ်လိုဖြစ်ဖြစ် မိုးကြိုးဌာနက ပါရမီရှင်ကို အမြဲတမ်း ကြိုဆိုပါတယ်။ ဒီကလေးနဲ့ ကျုပ်က ရေစက်ရှိမှတော့ ဘယ်လိုဖြစ်ဖြစ် အရည်အချင်း ပြသနိုင်ဖို့ အခွင့်အရေး ပေးသွားမှာပါ"

ချောင်ရှန်းက လေးနက်စွာ ပြောလိုက်သောအခါ အင်မော်တယ် အရာရှိ တစ်ရာကျော် ရှေ့မှောက်တွင် လူသိရှင်ကြား တာဝန်ယူကြောင်း ကြေညာလိုက်သည်ဖြစ်ရာ အားလုံး အံ့သြကုန်သည်။

"တော်တော်ရဲတင်းလာတာပဲ။ တကယ်လို့ ဝက်တစ်ကောင် ဖြစ်နေရင် အရှက်ကွဲတော့မယ်"

ပိုဟုန်သည် စိတ်ထဲမှ လှောင်ပြောင်လိုက်သော်လည်း မဟာစစ်သူကြီးကမူ အဓိပ္ပါယ်ပါပါ ဆက်လက် ရေရွတ်ပြန်သည်။

"အမှန်အတိုင်းပြောရရင် ဒီကလေးကြောင့် တစ်ယောက်ယောက်ကိက သတိရသွားတယ်။ နာမည်က သာမန်ဆိုပေမယ့် ထူးကဲတယ်။ ခေတ်တစ်ခေတ်ရဲ့ ပါရမီရှင်၊ ဝိညာဥ်တွေရဲ့ အရှင်သခင်ပေါ့"

ကြောက်မက်ဖွယ် ပုဂ္ဂိုလ်အကြောင်း တွေးမိသောအခါ အစွမ်းထက် အင်မော်တယ်တစ်ရာကျော် ရင်ထဲ၌ တုန်လှုပ်သွားကြ၏။

"မျိုးရိုးနာမည်ချင်းကလည်း တိုက်တိုက်ဆိုင်ဆိုင် တူညီနေပါတယ်"

ချောင်ရှန်းက အပြုံးဖြင့် ဆက်ပြောလိုက်ရာ ယခင်က လှောင်ပြောင်နေကြသူများ၊ အထူးသဖြင့် ပိုဟုန်တို့ မျက်နှာပျက်ကုန်သည်။ အခြေအနေကို လက်ခံရန် ခက်ခဲနေစဥ်မှာပင် မဟာစစ်သူကြီး၏ အမိန့်သံက ဟိန်းထွက်လာခဲ့သည့်အပြင် ဝိညာဥ်အထိ ထိုးဖောက်ဝင်ရောက်လာသော အကြည့်စူးစူးကြောင့် နာကျင်စွာ ခေါင်းငုံ့ပေးလိုက်ရ၏။

"ပိုဟုန်"

"အမိန့်ရှိပါ မဟာစစ်သူကြီး"

"ကောင်းကင်ရုံးတော် ဌာနတိုင်းမှာ ပါရမီရှင်တွေ ထွက်ပေါ်နေကြတယ်။ ဒါပေမယ့် ရုံးတော်ရဲ့ ဓားဖြစ်တဲ့ မိုးကြိုးဌာန အားနည်းနေတာဟာ ရှက်စရာပဲ။ မင်းအနေနဲ့ လူပုဂ္ဂိုလ်စွဲကို ဘေးဖယ်ထားသင့်တယ်။ ဘယ်လို လူငယ်မဆို အခွင့်အရေး ပေးရမယ်"

"ကျွန်တော်မျိုး တာဝန်ပျက်ကွက်တာ ရှက်ရွံ့မိပါတယ်"

သူ၏ ဦးရေပြားပင် ကြောက်စိတ်ကြောင့် ကျဥ်တက်သွားကာ လူသိရှင်ကြား အပြစ်တင်ခံလိုက်ရသဖြင့် ထိချက်ပြင်းလှ၏။

"ဒါက အပြစ်တင်တာ မဟုတ်ဘူး။ မင်းရဲ့ တာဝန်ကို မလစ်ဟင်းစေဖို့ သတိပေးတာပဲ။ ငါလည်း အိုလာတော့ လှုပ်ရှားရတာ သိပ်မကောင်းဘူး။ အခု သွားတော့မယ်"

"ကောင်းစွာ ကြွတော်မူပါ မဟာစစ်သူကြီး"

မဟာစစ်သူကြီးက အကြောဆန့်ရင်း ပြောပြောဆိုဆိုနှင့် ထရပ်လိုက်သောအခါ အင်မော်တယ်အားလုံး အလျင်အမြန် နှုတ်ဆက်ခဲ့ကြသည်။

"ချောင်ရှန်း မင်းရဲ့မွေးစားသား နောက်တစ်ခါ တိုက်ခိုက်ရင် ငါ့ကို လာခေါ်ဦး"

"အမိန့်အတိုင်းပါ"

ထိုအမိန့်ကြောင့် ချောင်ရှန်း၏ မျက်လုံးများ တောက်ပလာကာ မဟာစစ်သူကြီး ထွက်ခွာသွားသဖြင့် ပတ်ဝန်းကျင် ပေါ့ပါးသွားသော်လည်း အခြေအနေအောက်တွင် ပြင်းထန်သော လှိုင်းလုံးများ ရိုက်ခတ်နေဆဲပင်။

နွေရာသီ မိုးကြိုးနန်းတော် အပြင်ဘက်တွင် စောင့်ဆိုင်းနေသော ကျန်းထိုက်ပင်းသည် လုယောင်၏ တိုက်ပွဲကြောင့် ပုဂ္ဂိုလ်ကြီးများပင် လှုပ်ရှားကြမည်ဟု ထင်မထားပေ။ စစ်သူကြီးချောင် အမှားလုပ်မိပြီဟု သတ်မှတ်ကာ အခြားအရာရှိများက နင်းချေရန် ကြိုးစားခဲ့သော်လည်း ယွမ်ရှောင်၏ အရည်အချင်းကြောင့် သံနံရံကို ကန်လိုက်မိသည့်ပမာ ဖြစ်သွားသည်။ သူ့ကို ဆင့်ခေါ်လိုက်သောအခါ အလျင်အမြန် ဝင်ရောက်ပြီး စစ်သူကြီးချောင်အတွက် အလိုက်သိစွာ သေရည်ငှဲ့ပေးနေခဲ့သည်။

"ဂုဏ်ပြုပါတယ် စစ်သူကြီး။ အရှင်ပိုဟုန်ကတော့ အရှက်တကွဲ ဖြစ်သွားတယ်လို့ ကြားတယ်"

ချောင်ရှန်းကမူ အလျင်စလို လုပ်လျှင် အမှားများကြောင်း နားလည်ထား၍ ပိုမို တည်ငြိမ်လာပုံရ၏။

"ငါ့မှာ သံသယတွေ ရှိနေတယ်"

"အမိန့်ရှိပါ စစ်သူကြီး"

တစ်ဖက်လူ၏ အမူအရာ အလွန်တရာ လေးနက်နေသောကြောင့် ကျန်းထိုက်ပင်းလည်း အပြုံးများ ပျောက်ကွယ်၍ တည်တံ့သွားသည်။

"ငါ့ညီမနဲ့ လုယောင်က သိနေတာလား။ တုန်ဖုန်ယုံနဲ့ တိုက်ပွဲကို သူ စီစဥ်ခဲ့တာပဲ"

သူက တည်းခိုဆောင်တွင် ဖြစ်ပျက်သမျှကို ဖုံးကွယ်ထားရန် မဖြစ်နိုင်သောကြောင့် အမှန်အတိုင်း ပြောလိုက်ပြီး ထွက်သွားရန် မောင်းထုတ်ခံလိုက်ရ၏။

"စစ်သူကြီး လုယောင်ကို ချောင်အိမ်တော်မှာ လက်ခံဖို့ စဥ်းစားထားလား"

"သူ့ကို ငါ လမ်းညွှန်ပေးလိုက်မယ်။ ထပ်မမေးနဲ့"

ထွက်မသွားခင် သူက မေးဖြစ်အောင် မေးလိုက်သော်လည်း ပြတ်ပြတ်သားသား နှင်ထုတ်ခံခဲ့ရသည်။ ကျန်းထိုက်ပင်း ထွက်ခွာသွားသောအခါ အမှောင်ထုအတွင်းမှ အပြာရောင်ဝတ် မိန်းမတစ်ယောက် ထွက်လာပြီး ခန္ဓာကိုယ် ကြီးမားသော ချောင်ရှန်းနှင့် ယှဥ်လျှင် အလွန်သေးငယ်ပုံရ၏။ မျက်နှာရော ကိုယ်လုံးကိုယ်ပေါက်ရော ထူးထူးခြားခြား လှပကာ ဆွဲဆောင်မှု ပြင်းထန်၍ ချောင်ရူအောက် မနိမ့်ပေ။ သူမက လေထဲတွင် မျောလွင့်လာပြီး ချောင်ရှန်း၏ ပေါင်အထက် ဆင်းသက်ကာ လည်ပင်းကို လက်မောင်းသွယ်သွယ်လေးများဖြင့် ရစ်ပတ်ထားလိုက်၏။ ဤစုံတွဲသည် ဝက်ဝံတစ်ကောင်နှင့် ဒေါင်းမလေးတစ်ကောင်ပမာ ကွဲပြားခြား၍ သူ၏ တုတ်ခိုင်သန်မာသော လက်များမှာ သူမ၏ ခါးထက်ပင် ပို၍ ကြီးထွားသန်မာလေသည်။