အခန်း (၃၆၁)

အခန်း။ ၃၆၁

ဝံပုလွေသွား မုဆိုးတပ်ဖွဲ့သည် ကတိအတိုင်း အရှုံးကိုလက်ခံကာ နောက်ထပ် အနှောင့်အယှက် မပေးတော့ချေ။

ထိုအချိန်တွင် မြစ်ကြမ်းပြင်ရှိ ရွှံ့နွံများထဲမှ ယန်ချန်းလန် ဆွဲတင်ပေးလိုက်သော တန်ယု တစ်ယောက် ပေါ်ထွက်လာသည်။ တစ်ကိုယ်လုံး ရွှံ့များပန်းလျက် ခေါင်းပါမကျန် ရွှံ့ထူထူများ ဖုံးလွှမ်းနေပြီး အသက်ရှူပင် ကျပ်ကာ သတိမေ့မြောနေရှာသည်။ သူ၏ လက်ရှိရုပ်သွင်မှာ သူ၏ မွေးမိခင်ဖြစ်သူ ယန်ချန်းရွှယ်ပင်လျှင် မြင်လျှင် မှတ်မိနိုင်လိမ့်မည် မဟုတ်ချေ။

၎င်းကို မြင်သောအခါ ယွင်ရှန်းသည် လေးရာသီ ဖန်အပ်တစ်ချောင်းကို ထုတ်ယူလိုက်ပြီး သူ၏ ကိုယ်ပေါ်သို့ အချက်အလက်ကျကျ ထိုးစိုက်လိုက်သည်။

ထိုလူငယ်မှာ ရေနွေးပူဖြင့် အလောင်းခံလိုက်ရသော ဝက်သေတစ်ကောင်အလား ဆတ်ခနဲ ခုန်ထသွားတော့သည်။

"ဝူး... အား..."

တန်ယုသည် ရုတ်တရက် အသံထွက်မရတော့ကြောင်း သိလိုက်ရသဖြင့် ဒေါသအပြည့်နှင့် ယွင်ရှန်းကို လက်ညှိုးငေါက်ငေါက် ထိုးပြနေတော့သည်။

"မင်း စကားတွေ အရမ်းများလွန်းတယ်။ သေဆုံးရတဲ့ အကြောင်းရင်းကို ငါ အတိအကျ မသိရသေးခင်အထိ ငြိမ်ငြိမ်နေတာ အကောင်းဆုံးပဲ"

ယွင်ရှန်းက မနှစ်မြို့ဖွယ် လေသံဖြင့် ပြောလိုက်သည်။ သူမသည် ခဏနေလျှင် အလောင်းကို ခွဲစိပ်စစ်ဆေးရန် ကြံရွယ်ထားသည်။ အကယ်၍ တန်ယု၏ သက်သေထွက်ဆိုချက်သာ မလိုအပ်ခဲ့ပါက ယီပိုင်မင်း လုပ်ဆောင်ခဲ့သကဲ့သို့ တန်ယုကို တစ်သက်လုံး နှုတ်ဆိတ်သွားအောင်ပင် လုပ်မိပေလိမ့်မည်။

တန်ယု၏ သနားစရာ အခြေအနေကို မြင်ရသောအခါ လျိုဟောင်မှာ စိတ်ထဲမှ အတန်ငယ် ကျေနပ်သွားမိသည်။

"လူကြီးမင်းတို့... ကျွန်တော်တို့ ရှုံးနိမ့်မှုကို လက်ခံပြီး ဒုတပ်မှူးယန်ကို အလောင်းခွဲစိပ်ခွင့် ပြုလိုက်ပါပြီ။ ဒါဟာ ဒုတပ်မှူးယန်ရဲ့ သိက္ခာကို ကျွန်တော် ယုံကြည်လို့ပါ။ သူမက ကျွန်တော့်အတွက် တရားမျှတမှုကို ဖော်ဆောင်ပေးမယ်လို့လည်း မျှော်လင့်ပါတယ်"

လျိုဟောင်က ပွင့်လင်းစွာ ပြောဆိုပြီးနောက် ကောင်းကင်လိုက်လံရှာဖွေရေး အဖွဲ့ဝင်များကို ခေါ်ဆောင်ကာ ယန်အိမ်တော်၏ အပြင်ဘက်သို့ ထွက်လာခဲ့ကြသည်။

"ယန်အိမ်တော်က လူတွေလာပြီဟေ့"

ယန်ချန်းလန်နှင့်အတူ မူးဝေနေသော တန်ယုကို မြင်လိုက်ရသည်နှင့် ကွယ်လွန်သူ မိန်းကလေး ရှန်းယွီ၏ ဆွေမျိုးသားချင်းများမှာ အုံခဲ၍ ဝိုင်းအုံလာကြတော့သည်။

"ဦးလေးတို့... အဒေါ်တို့..."

ဒေါသအရှိန်ဖြင့် ပေါက်ကွဲလုနီးပါး ဖြစ်နေသော လူအုပ်ကြီးကို မြင်သောအခါ လျိုဟောင်က ရှေ့သို့ လှမ်းထွက်လိုက်သည်။

ယွင်ရှန်း ပြောခဲ့သည်များကို လျိုဟောင်က အကျဉ်းချုံး၍ ပြန်လည်ပြောပြလိုက်သည်။

"လျှောက်မပြောစမ်းနဲ့ လျိုဟောင်... ရှန်းယွီက သေတောင်သေနေရှာပြီ။ ဒါကို မင်းက သူများတွေကို သူမရဲ့ ရုပ်အလောင်းကို စော်ကားခွင့်ပေးဦးမလို့လား။ ပြီးတော့ မင်းနောက်ကလူတွေကိုလည်း ကြည့်ဦး။ သူတို့အားလုံးက ယန်အိမ်တော်ကလူတွေပဲ။ သူတို့ပြောတာကို မင်းယုံနိုင်လို့လား"

ဂုဏ်သိက္ခာကို အလွန်တန်ဖိုးထားသော ပညာတတ်စာဆိုကြီး ရှန်းယွီ၏ဖခင်က ရှေ့သို့ လှမ်းထွက်၍ ပြောလိုက်သည်။

သူ၏သမီးဖြစ်သူမှာ ယန်အိမ်တော်မှ ထိုတိရစ္ဆာန်တန်ယုကြောင့် ဘဝပျက်ခဲ့ရပြီးနောက် သူသည် သမီးဖြစ်သူအား ယန်အိမ်တော်သို့ပင် ပေးစားရန်ပင် စဉ်းစားခဲ့ဖူးသည်။ သို့သော် မမျှော်လင့်ဘဲ သူ၏မိုက်မဲသော သမီးဖြစ်သူမှာ ယန်အိမ်တော်အပြင်ဘက်တွင် စကားတစ်လုံးမျှ မဆိုဘဲ ကြိုးဆွဲချ သေဆုံးသွားခဲ့ရသည်။ ယခုမူ ရှန်းယွီသည် ကြိုးဆွဲချ၍ သေဆုံးခြင်းမဟုတ်ဟု သူတို့က ပြောနေကြပြန်ရာ ၎င်းမှာ အဓိပ္ပာယ်မရှိသော ကိစ္စဟုသာ သူ ထင်မြင်နေမိသည်။

"အဖိုး... ခုနက အဖိုးပြောတာက မိန်းကလေးရှန်းယွီက ကိုယ့်ကိုယ်ကိုယ် သတ်သေခဲ့တာလို့ ဆိုတယ်နော်။ ဒါဆိုရင် ကျွန်မ တစ်ခုလောက် မေးပါရစေ။ အကယ်၍ အဖိုးသာဆိုရင် ဒီလောက်မြင့်တဲ့ ညောင်ပင်ကြီးပေါ်မှာ ကိုယ့်ကိုယ်ကိုယ် ကြိုးဆွဲချနိုင်ပါ့မလား"

အလောင်းခွဲစိပ်စစ်ဆေးခြင်းမှာ ဤရှေးရိုးစွဲလူများအတွက် လက်ခံရန်ခက်ခဲမည်ကို သိထားသဖြင့် ယွင်ရှန်းက ညောင်ပင်အိုကြီး၏ အောက်ခြေသို့ ခြေလှမ်းအနည်းငယ် ဆုတ်ခွာရင်း မေးလိုက်သည်။ ရှန်းယွီ၏ ရုပ်အလောင်းကို ဤညောင်ပင်အိုကြီးတွင် တွဲလောင်းကျလျက် တွေ့ရှိခဲ့ခြင်းပင်။

ယွင်ရှန်းက ထောက်ပြလိုက်သဖြင့် ရှန်းယွီ၏ဖခင်သည် သစ်ပင်အောက်သို့ လျှောက်သွားကာ သစ်ကိုင်းဖျားများကို မော့ကြည့်လိုက်သည်။ သူသည် အရပ် ၅ ပေ ၇ လက်မခန့် ရှိပြီး၊ အမျိုးသမီးဖြစ်သူ ရှန်းယွီမှာ ၅ ပေ ၃ လက်မခန့်သာ ရှိပေလိမ့်မည်။ သူ၏အရပ်နှင့်ပင် မြေပြင်မှ အနီးဆုံးသစ်ကိုင်းမှာ ၃ ပေကျော်ခန့် မြင့်နေသေးသည်။

"ငါ့သမီးက တစ်ခုခုပေါ် တက်နင်းပြီးမှ ကြိုးဆွဲချခဲ့တာလည်း ဖြစ်နိုင်တာပဲ"

ရှန်းယွီ၏ဖခင်က မလှမ်းမကမ်းရှိ ကျောက်တုံးတစ်ခုကို ကြည့်ရင်း ခပ်လျှော့လျှော့ပင် ခန့်မှန်းပြောဆိုလိုက်သည်။။ ၎င်းပြင် သူက "ဒါ့အပြင် ငါတို့က ဆေးဧကရာဇ်နန်းဆောင်က ဆရာဝန်ချန်းကိုလည်း မနက်စောစောကတည်းက ပင့်ဖိတ်ပြီး ပြသခဲ့သေးတယ်။ သူကိုယ်တိုင်လည်း ရှန်းယွီက ကြိုးဆွဲချသေတာလို့ အတည်ပြုပေးခဲ့တာပဲ" ဟု ထပ်လောင်းပြောလိုက်သည်။

"ဒါပေမဲ့ ကျွန်မသိရသလောက်တော့ ယန်အိမ်တော်ကလူတွေ အလောင်းကို စတွေ့တုန်းက အနားမှာ ဘာကျောက်တုံး၊ ဘာခုံမှ မရှိဘူးလို့ သိရတယ်။ အဲဒီအစား မိန်းကလေးရှန်းယွီရဲ့ လက်နားမှာ ရုန်းကန်ထားတဲ့ အမှတ်အသားတွေ အများကြီး ရှိနေတယ်"

ယွင်ရှန်းက စကားပြောရင်း ခေါင်းတလားဆီသို့ လျှောက်သွားကာ ရှန်းယွီ၏ လက်ကို ဆွဲကိုင်လိုက်ပြီး "ဆရာဝန်ချန်းက အဲဒီတုန်းက ဒီဒဏ်ရာတွေကို စစ်ဆေးခဲ့ရဲ့လားဆိုတာ ကျွန်မ သိချင်မိတယ်" ဟု ပြောလိုက်သည်။

ရှန်းယွီ၏ လက်ကောက်ဝတ်နှင့် လက်ချောင်းများပေါ်တွင်မူ အရောင်ပြောင်းနေသော ဒဏ်ရာအသေးစားလေးများစွာ ရှိနေသည်မှာ အမှန်ပင်။

"ဒါကတော့..."

ရှန်းယွီ၏ဖခင်မှာ စာပေကျမ်းဂန် လိုက်စားသူတစ်ဦးသာ ဖြစ်သဖြင့် ဤကဲ့သို့သော ကိစ္စရပ်များကို ကျွမ်းကျင်မှုမရှိရာ မည်သို့ ပြန်လည်တုံ့ပြန်ရမည်ကို မသိဘဲ တစ်ခဏမျှ ဆွံ့အသွားတော့သည်။

ဆေးဧကရာဇ်နန်းဆောင် အတွင်း၌ ချန်စီဟိုင်နှင့် အခြားသော ဆေးဆရာအချို့သည် ဆွေးနွေးတိုင်ပင်နေကြစဉ် အပြင်ဘက်မှ တစ်စုံတစ်ဦးက လာရောက်တွေ့ဆုံခွင့် တောင်းခံနေကြောင်း ရုတ်တရက် ကြားလိုက်ရသည်။ လာရောက်သူမှာ ရှန်းယွီ၏ ဆွေမျိုးသားချင်းများဖြစ်ပြီး ဆရာဝန်ချန်းအနေဖြင့် အချိန်အနည်းငယ်ပေးကာ အလောင်းကို နောက်တစ်ကြိမ် ထပ်မံစစ်ဆေးပေးရန် မျှော်လင့်နေကြကြောင်း ပြောလိုက်သည်။

"အလောင်းခွဲစိပ်စစ်ဆေးဖို့ ဟုတ်လား။ ဒါက ဘာတွေဖြစ်ကုန်တာလဲ။ အားလုံးက ရှင်းရှင်းလင်းလင်း ဖြစ်နေပြီပဲကို ဘာလို့ ထပ်စစ်ချင်နေရတာလဲ"

၎င်းကို ကြားလိုက်ရသောအခါ ချန်စီဟိုင် မျက်မှောင်ကြုတ်သွားခဲ့သည်။

အခမဲ့ဆေးခန်းဖွင့်လှစ်စဉ်က ဖြစ်ရပ်အပြီးတွင် ချန်စီဟိုင်မှာ ကံဆိုးမှုများနှင့် ဆက်တိုက်ကြုံတွေ့နေရပြီး သူ နှစ်ပေါင်းများစွာ တည်ဆောက်ခဲ့သော ဆေးပညာဆိုင်ရာ ဂုဏ်သတင်းမှာလည်း လုံးဝဥဿုံ ပျက်စီးလုနီးပါး ဖြစ်ခဲ့ရသည်။ ဂိုဏ်းချုပ်ဝမ်က သူ့အား ဆေးကုသမှုလုပ်ငန်းများကို ခေတ္တရပ်နားထားရန် အကြံပြုခဲ့သဖြင့် သာမန်ဆေးဖော်စပ်သည့် လုပ်ငန်းများကိုပင် အခြားသူများကိုသာ လွှဲပြောင်းပေးထားခဲ့ရသည်။

ဆေးဆရာတစ်ဦး၏ ဝင်ငွေမှာ အဓိကအားဖြင့် လူနာကြည့်ခြင်းမှ ရရှိခြင်းဖြစ်ရာ၊ ချန်စီဟိုင်အနေဖြင့် ဆေးကုသမှုများ ရပ်နားထားရသဖြင့် သူ၏ဝင်ငွေမှာလည်း သိသိသာသာ လျော့နည်းသွားခဲ့သည်။ အဆိုးဝါးဆုံးအချက်မှာ ချီဖန်းဖေးက သူ၏အတိတ်က ဆေးဖော်စပ်မှုများနှင့် ဆေးဖက်ဝင်အပင် ဝယ်ယူမှုမှတ်တမ်းများကို စုံစမ်းစစ်ဆေးရန် အမိန့်ပေးခဲ့သဖြင့် ဆေးဖက်ဝင်အပင်များမှရရှိသော ဝင်ငွေအတော်များများမှာလည်း ပိတ်ပင်ခံလိုက်ရခြင်းပင်။

တစ်ဖက်တွင် ချန်စီဟိုင်သည် သူ၏ဆေးပညာဂုဏ်သတင်းကို ပြန်လည်ဆယ်တင်ရန် ကြိုးစားနေပြီး အခြားတစ်ဖက်တွင်မူ ဝင်ငွေအချို့ရရှိရန် နည်းလမ်းများကို ရှာဖွေနေရသည်။

ထိုသို့သောအချိန်တွင် ယန်အိမ်တော်၌ ယွီကျင်း တစ်မြို့လုံးကို တုန်လှုပ်စေသော ဖြစ်ရပ်တစ်ခု ဖြစ်ပွားခဲ့ပြီး သူသည် ရှန်းယွီ၏ဖခင်ဖြစ်သူ စာဆိုအိုကြီးနှင့်လည်း အနည်းငယ် သိကျွမ်းနေခဲ့သည်။ ချန်စီဟိုင်သည် မည်သို့မျှ တွန့်ဆုတ်မနေဘဲ လူအများစိတ်ဝင်စားနေသော ဤယန်အိမ်တော်ဖြစ်ရပ်မှတစ်ဆင့် အာရုံစိုက်မှုပြန်လည်ရရှိရန် ရည်ရွယ်ကာ မှုခင်းဆေးဆရာအဖြစ် ခေတ္တဆောင်ရွက်ပေးခဲ့ခြင်း ဖြစ်သည်။

စင်စစ်တွင် သူသည် အလောင်းခွဲစိပ်စစ်ဆေးခြင်း၌ အလွန်အမင်း ကျွမ်းကျင်သူတစ်ဦး မဟုတ်ပေ။ ဆေးဧကရာဇ်နန်းဆောင် ရှိ မှတ်တမ်းအချို့ကိုသာ အပေါ်ယံဖတ်ရှုထားခြင်းဖြစ်ပြီး၊ ကြိုးဆွဲချသေဆုံးသူတစ်ဦး၏ ပုံမှန်လက္ခဏာများကို အခြေခံကာ ရှန်းယွီသည် ကြိုးဆွဲချ၍ သေဆုံးခြင်းဖြစ်ကြောင်း သေစာရင်း ထုတ်ပေးခဲ့ခြင်း ဖြစ်သည်။

အမှန်တကယ်ပင် ဤယန်အိမ်တော်ဖြစ်ရပ်ကြောင့် ချန်စီဟိုင်မှာ ဂုဏ်သတင်းအချို့ ပြန်လည်ရရှိခဲ့ပြီး ဂိုဏ်းချုပ်ဝမ်၏ ဒေါသမှာလည်း လျော့ပါးသွားခဲ့သဖြင့် သူ၏ဆေးကုသမှုလုပ်ငန်းများကို ပြန်လည်စတင်ခွင့် ရရှိခဲ့သည်။ သူ၏ရည်မှန်းချက် အောင်မြင်သွားပြီဖြစ်သဖြင့် ချန်စီဟိုင်သည် ကံဆိုးလှသော ရုပ်အလောင်းများကို နောက်ထပ် တစ်ခါမျှ မကိုင်တွယ်လိုတော့ချေ။

"ဆရာဝန်ချန်း... တစ်ဖက်လူတွေ ပြောတာက ရှန်းယွီက ကိုယ့်ကိုယ်ကိုယ် သတ်သေတာ မဟုတ်နိုင်ဘူးတဲ့။ ဆရာဝန်ကြီးရဲ့ စစ်ဆေးမှုက မှားယွင်းနေတယ်လို့ သူတို့က ပြောနေကြပါတယ်"

သတင်းစကား လာရောက်ပါးသူမှာလည်း ဘာမှနားမလည်ဟန်ဖြင့် ပြောဆိုလိုက်သည်။။

သူသည် သတင်းပို့သမားသက်သက်ပင်။

"ဘယ်သူက ငါ့ရဲ့စမ်းသပ်မှုကို သံသယဝင်ရဲတာလဲ။ သူတို့က ကိုယ့်ကိုယ်ကိုယ် ဆေးဧကရာဇ်

နန်းဆောင်က ဆေးဆရာတွေထက် ပိုတော်တယ်လို့ ထင်နေကြတာလား"

ချန်စီဟိုင်က မကျေမနပ် ပြောဆိုလိုက်သည်။။

"တစ်ဖက်လူတွေ ပြောတာကတော့ စီအန်းခန်းမငယ်က ဆေးဆရာမလေး တစ်ယောက်လို့ ပြောပါတယ်"

သတင်းပို့သူက တုံ့ဆိုင်းတုံ့ဆိုင်းဖြင့် ဖြေကြားသည်။

"စီအန်းခန်းမငယ် ဟုတ်လား။ ဒါဆိုရင်တော့ ယွင်ရှန်းပဲ ဖြစ်ရမယ်။ ဆေးဧကရာဇ်နန်းဆောင်ကို အာခံပြီး အလောင်းခွဲစိပ်ဖို့အထိ ဝံ့ရဲတာ သူမကလွဲလို့ တခြားသူမရှိဘူး။ ချန်စီဟိုင်... ငါတို့ ဆေးဧကရာဇ်နန်းဆောင်အနေနဲ့ စီအန်းခန်းမငယ်ကို နောက်တစ်ကြိမ် ထပ်ပြီး အရှုံးမပေးနိုင်ဘူး။ လာ... ငါကိုယ်တိုင် မင်းနဲ့အတူ လိုက်ကြည့်မယ်"

ချီဖန်းဖေး ထွက်လာကာ ပြောလိုက်သည်။ သူမသည် ပြီးခဲ့သော ရက်အနည်းငယ်အတွင်း ဆေးဧကရာဇ်နန်းဆောင်၌ ရှိနေခဲ့ပြီး ယနေ့မှ အောက်ထပ်သို့ ဆင်းလာစဉ် ဤသတင်းကို ကြားလိုက်ရခြင်းဖြစ်သည်။ သူမသည် ယွင်ရှန်း၏ နောက်ကြောင်းကို စုံစမ်းကြည့်ရာမှ သူမသည် အမှန်တကယ်တွင် ယန်အိမ်တော်၏ သားကြီးဖြစ်သူ ယန်ချန်းဟိုင်၏ သမီးဖြစ်ကြောင်း သိရှိထားပြီးဖြစ်သည်။ အကယ်၍ ယခုတစ်ကြိမ် တန်ယုနှင့်ပတ်သက်သော ဖြစ်ရပ်ကို အသုံးချနိုင်မည်ဆိုပါက စီအန်းခန်းမငယ်ကို တစ်ချက်တည်းနှင့် အမြစ်ပြတ်ချေမှုန်းနိုင်ပေလိမ့်မည်။ ၎င်းမှာ ဆေးဖက်ဝင်အပင် တင်သွင်းသူများကို ထိန်းချုပ်ပြီး စီအန်းခန်းမငယ်ကို တဖြည်းဖြည်း ဖျက်ဆီးမည့် အစီအစဉ်ထက် ပိုမိုထိရောက်ပေလိမ့်မည်။

၎င်းကို ကြားသောအခါ ချန်စီဟိုင်သည်လည်း လက်ရှိအလုပ်များကို ချထားခဲ့ကာ သူ၏ဆေးသေတ္တာကို ဆွဲ၍ ချီဖန်းဖေးနှင့်အတူ အပြေးအလွှား လိုက်သွားတော့သည်။

သူတို့ ယန်အိမ်တော်အပြင်ဘက်သို့ ရောက်ရှိချိန်တွင် ရိုးရှင်းသော တဲတစ်လုံးကို အသင့်ဆောက်လုပ်ထားပြီး ဖြစ်သည်။ ပတ်ဝန်းကျင်ကို ယန်အိမ်တော်မှ စစ်သည်များက စောင့်ကြပ်ထားပြီး ကြည့်ရှုသူ လူအုပ်ကြီးကို အနားမကပ်နိုင်အောင် တားဆီးထားကြသည်။

"ငါတို့က ဆေးဧကရာဇ်နန်းဆောင်က ဆေးဆရာတွေပဲ။ အလောင်းခွဲစိပ်စစ်ဆေးဖို့ လာတာ"

ချန်စီဟိုင်နှင့် ချီဖန်းဖေးတို့သည် သူတို့၏ ဆေးဆရာအမှတ်အသား တံဆိပ်ကို ပြသပြီးနောက် အတွင်းသို့ ဝင်သွားကြသည်။

အခင်းဖြစ်နေရာကို ရှင်းလင်းထားပြီးဖြစ်ရာ မသက်ဆိုင်သူ အများစုကို ဖယ်ရှားပေးရန် တောင်းဆိုထားပြီး ဖြစ်သည်။ ထိုနေရာတွင် ဝံပုလွေသွား မုဆိုးတပ်ဖွဲ့ဝင် သုံးဦး၊ ကောင်းကင်လိုက်လံရှာဖွေရေး အဖွဲ့ဝင် သုံးဦး၊ တန်ယုနှင့် ရှန်းယွီ၏ မိဘများသာ ရှိနေကြသည်။

သူတို့၏ သမီးဖြစ်သူ ရုပ်အလောင်းကို နောက်တစ်ကြိမ် ပြန်လည်ထုတ်ယူလာသည်ကို မြင်သောအခါ ရှန်းယွီ၏ မိဘများမှာ ရှိုက်ကြီးတငင် ငိုကြွေးကြပြန်သည်။

"ယွင်ရှန်း... နင် တကယ်ပဲ ဘာတွေလုပ်ဖို့ ကြံနေတာလဲ"

လာရောက်သူမှာ ယွင်ရှန်းမှန်း သိလိုက်ရသောအခါ ချန်စီဟိုင်မှာ ဒေါသထွက်သွားတော့သည်။

တကယ့်ကို အနှောင့်အယှက်ပေးသည့် တစ္ဆေမလေးနှင့် တွေ့နေရသကဲ့သို့ပင်။ ဤမိန်းကလေးနှင့် တွေ့ဆုံပြီးကတည်းက သူ၏ဘဝတွင် ကောင်းသောရက်ဟူ၍ မရှိခဲ့ချေ။ ဆေးဧကရာဇ်နန်းဆောင်အတွင်းရှိ သူ၏ရာထူးမှာလည်း ထိုးဆင်းသွားခဲ့ရသလို သူ၏ဆေးပညာဂုဏ်သတင်းမှာလည်း လုံးဝပျက်စီးခဲ့ရသည်။ ယခုမူ အလောင်းစစ်ဆေးခြင်း၌ပင် သံသယဝင်ခြင်း ခံနေရပြန်သည်။ ဤပြဿနာအားလုံး၏ တရားခံမှာ သူ၏ရှေ့မှ ဤမိန်းကလေးပင်။

"လမ်းဖယ်ကြစမ်း"

ယန်အိမ်တော်၏ တံခါးကြီး ပွင့်လာပြီး အဖိုးအိုယန်ပါးဟိုသည် ဦးလေးယန်နှင့် ယန်ချန်းရွှယ်တို့ကို အဖော်ပြုလျက် ထွက်လာခဲ့သည်။

ယန်ချန်းရွှယ်သည် သူမ၏ အဖိုးတန်သားလေး၏ အခြေအနေကို မြင်လိုက်ရသောအခါ မျက်နှာမှာ ညိုမည်းစုတ်ပြတ်နေပြီး တစ်ကိုယ်လုံးလည်း ရွှံ့များပေကျံလျက် စကားပင် ကောင်းကောင်းမပြောနိုင်သည့် ပုံစံကြောင့် သူမသည် ဒေါသတကြီးဖြင့် စူးစူးဝါးဝါး အော်ဟစ်တော့သည်။

"ဘယ်သူလဲ... ငါ့ရဲ့ ယုယုလေးကို ဘယ်သူက ဒီလိုဖြစ်အောင် လုပ်လိုက်တာလဲ"

"သူ အသက်ရှူနေသေးတာကိုပဲ ကံကောင်းတယ်လို့ မှတ်လိုက်ပါ"

ယွင်ရှန်းက ယန်ချန်းရွှယ်ကို တစ်ချက်ကြည့်ကာ သူမဘေးရှိ အေးစက်နေသော ရုပ်အလောင်းကို တစ်လှည့်ကြည့်ရင်း ပြောလိုက်သည်။ ယွင်ရှန်း၏ မျက်ဝန်းအစုံမှ စူးရှသော အလင်းတန်းများကြောင့် ယန်ချန်းရွှယ်မှာ ချက်ချင်းပင် နှုတ်ဆိတ်သွားရသည်။

ယန်ပါးဟိုသည် အိမ်တော်အတွင်း၌ သွေးစွန်းသောလက်ဂိုဏ်း ကိစ္စကို ဘယ်လိုဖြေရှင်းရမလဲဟု အသည်းအသန် စဉ်းစားနေစဉ် ယန်ချန်းလန်နှင့် ယွင်ရှန်းတို့က ဝံပုလွေသွား အဖွဲ့ဝင်များအပါအဝင် လူတစ်စုကို အိမ်တော်ရှေ့သို့ ခေါ်ဆောင်လာကြောင်း ဦးလေးယန်ထံမှ ကြားသိလိုက်ရခြင်း ဖြစ်သည်။

ညှိနှိုင်းမှုတွေ ပျက်ပြားသွားတာလား...

ယန်ပါးဟိုသည် ဆက်လက်အောင့်အည်းမထားနိုင်တော့ဘဲ အပြင်သို့ ထွက်လာခဲ့တော့သည်။