အခန်း (၁၀၅-၁၀၆)

အခန်း (၁၀၅)

စုရန်က သူ၏ဆရာကို မဆုံးရှုံးရက်ပေ။

စုရန်က မူလက မိဘမဲ့တစ်ဦး ဖြစ်သည်။

သို့သော် လွန်ခဲ့သော ငါးနှစ်က စုရန်ကို လီဖုန်းရှန်းက ရှာတွေ့ခဲ့ပြီး ကျင့်ကြံခြင်းလမ်းစဉ်ပေါ်သို့ လျှောက်လှမ်းစေခဲ့သည်။

စုရန်အတွက်တော့ သူ၏ဆရာက ဖခင်တစ်ဦးနှင့် တူပေသည်။

"ဟီးဟီးဟီး၊ ကိစ္စမရှိပါဘူး။ မင်းက မင်းလုပ်ရမယ့် တာဝန်ကို လုပ်ဖို့ပဲ လိုတာပါ။ ဒါက လောကကြီးရဲ့ ကောင်းကျိုးအတွက်ရော၊ ဝမ်ရှန်းဂိုဏ်း ထာဝရ တည်တံ့နေဖို့အတွက်ပါပဲ၊ နားလည်လား။" လီဖုန်းရှန်း၏ လေသံတွင် ဆုံးမဟန့်တားသည့် အရိပ်အယောင်များ ပါဝင်နေခဲ့သည်။

"တပည့် နားလည်ပါပြီ။" စုရန်က ခေါင်းငုံ့လိုက်သည်။

"မြန်မြန်သွားကြစို့။" လီဖုန်းရှန်းက တပည့်ဖြစ်သူကို ကြည့်ကာ ပြုံးလိုက်လေသည်။ "မင်းဆရာက သူမရဲ့ နေရာကို ရှာတွေ့ထားပြီ။ ဒီနေ့ မြောက်ပိုင်းပင်လယ်ကို အပြင်းအထန် ဒဏ်ရာရစေရမယ်။"

"ဟုတ်ကဲ့ပါ ဆရာ။"

မြောက်ပိုင်းပင်လယ်ရှိ လူသူကင်းမဲ့သော ကျွန်းငယ်လေးတစ်ကျွန်းပေါ်တွင်။

လူငယ်တစ်ဦးက ကမ်းခြေတွင် ထိုင်နေပြီး သူ၏ဘေးတွင် ဝိညာဉ်စုဆောင်းခြင်း မှော်ဝင်္ကပါတစ်ခုကို ဆွဲသားထားလေသည်။

ဤမှော်ဝင်္ကပါကို ဆွဲသားရန် အသုံးပြုထားသော အရင်းအမြစ်များမှာ နဂါးချောက်နက်မှ မြေအောက်ကမ္ဘာကိုးထပ် ရေစင်များ ဖြစ်သည်။

မြေအောက်ကမ္ဘာကိုးထပ် ရေစင် အနည်းငယ်မျှ ယိုစိမ့်ထွက်သွားမည်ဆိုလျှင်ပင် လွတ်လပ်သော ကျင့်ကြံသူများစွာကို အပြင်းအထန် လုယက်တိုက်ခိုက်စေနိုင်မည် ဖြစ်သည်။

သို့သော် ယခုအခါတွင် ဤကြီးမားသော မြေအောက်ကမ္ဘာကိုးထပ် ရေစင်ပုလင်းကြီးကို ဝိညာဉ်စုဆောင်းခြင်း မှော်ဝင်္ကပါတစ်ခု ဆွဲသားရန်အတွက်သာ တန်ဖိုးမရှိသည့်အလား ရှောင်မို၏ ခြေဖျားတွင် အသုံးပြုနေခဲ့သည်။

မည်သည့်ကျင့်ကြံသူကမဆို ဤမြင်ကွင်းကို မြင်တွေ့ရပါက "ကောင်းကင်ဘုံက ရတနာတွေကို ဘယ်လောက်တောင် ဖြုန်းတီးပစ်လိုက်တာလဲ" ဟု ညည်းတွားကြပေလိမ့်မည်။

အဖြူရောင်ဂါဝန်နှင့် အမျိုးသမီးသည် သူမ၏ လက်များကို နောက်ပစ်ထားပြီး စကတ်အောက်မှ ရှည်လျားသော ခြေတံများက လူငယ်လေး၏ဘေးတွင် ညင်သာစွာ ခေါက်တုံ့ခေါက်ပြန် လျှောက်လှမ်းနေရင်း စကားပြောနေခဲ့သည်

"ဒီနေ့ အစ်မက မိုလေးကို ကျင့်ကြံခြင်းနဲ့ ပတ်သက်တဲ့ ဗဟုသုတတွေကို ရှင်းပြပေးမယ်။

ပထမဆုံးအနေနဲ့ အဆင့်တွေအကြောင်း ပြောရအောင်။

အဆင့်ဆိုတာ တကယ်တမ်းကျတော့ ဘာလဲ။

ချီစုစည်းမှုအဆင့်၊ အုတ်မြစ်ချခြင်းအဆင့်၊ ဂူဗိမာန်အဆင့်၊ နဂါးတံခါးအဆင့်၊ ရွှေရောင်အူတိုင်အဆင့်၊ သန္ဓေတည်ဝိညာဉ်အဆင့်၊ ကျောက်စိမ်းသန့်စင်အဆင့်၊ မသေမျိုးအဆင့်၊ ကောင်းကင်ဘုံတက်လှမ်းခြင်းအဆင့်။

ဒီအဆင့်တွေဆိုတာ တကယ်တော့ လူတွေ သတ်မှတ်ထားတဲ့ ခွဲခြားမှုတွေပါပဲ။

လူသားမျိုးနွယ်တွေအတွက်တော့ အဆင့်ဆိုတာက ကျင့်ကြံသူတစ်ယောက်ရဲ့ မဟာတာအိုအပေါ် နားလည်သဘောပေါက်မှုနဲ့ နေ့စဉ် ကျင့်ကြံအားထုတ်မှုကနေ စုဆောင်းရရှိလာတဲ့ ရလဒ်တစ်ခုပဲ။

တခြားတစ်နည်းနဲ့ ပြောရရင် မင်းရဲ့ မဟာတာအိုအပေါ် နားလည်သဘောပေါက်မှုက မနက်ရှိုင်းဘူး၊ ပြင်းထန်တဲ့ ကျင့်ကြံအားထုတ်မှုကနေ တဖြည်းဖြည်း စုဆောင်းရရှိလာတာမျိုး မရှိဘူးဆိုရင် အဆင့်သစ်တစ်ခုကို ခြေလှမ်းတက်လှမ်းဖို့ ခက်ခဲလိမ့်မယ်။

မိစ္ဆာမျိုးနွယ်တွေအတွက်တော့ အဆင့်ဆိုတာ သွေးမျိုးဆက် သန့်စင်ခြင်းနဲ့ ပိုသက်ဆိုင်တယ်။

ဒါပေမဲ့ ဒါက မိစ္ဆာမျိုးနွယ်တွေဟာ မဟာတာအိုကို နားလည်သဘောပေါက်ဖို့ မလိုဘူးလို့ ဆိုလိုတာ မဟုတ်ဘူး။

သွေးမျိုးဆက်နဲ့ မဟာတာအိုကို နားလည်သဘောပေါက်ခြင်းဆိုတာက မိစ္ဆာမျိုးနွယ်တွေအတွက် တန်းတူ အရေးကြီးတယ်။

ပြီးတော့ တာအိုဆိုတာ ဘာလဲ။

ကွန်ဖြူးရှပ်ပညာရှင်တွေက ရှေးခေတ်ပညာရှိကြီးတွေရဲ့ ပျောက်ဆုံးနေတဲ့ အဆုံးအမတွေကို လိုက်နာပြီး ထာဝရငြိမ်းချမ်းရေးကို ဆောင်ကြဉ်းပေးတဲ့အတွက် တာအိုကို ရရှိနိုင်ကြတယ်။

တာအိုကျင့်ကြံသူတွေက ကောင်းကင်နဲ့ မြေကြီးကို နားလည်သဘောပေါက်ကြတယ်၊ သဘာဝတရားကို နားလည်ကြပြီး သူတို့ရဲ့ မူလစိတ်နှလုံးကို ဆုပ်ကိုင်ထားနိုင်ကြတဲ့အတွက် တာအိုကို ရရှိနိုင်ကြတယ်။

ဗုဒ္ဓဘာသာဝင်တွေက သတ္တဝါအပေါင်းကို ပညာပေးပြီး ကောင်းမှုကုသိုလ်တွေကနေတစ်ဆင့် ကုသိုလ်တရားတွေ စုဆောင်းကြတဲ့အတွက် တာအိုကို ရရှိနိုင်ကြတယ်။

မိုဟစ်လေ့လာသူတွေက သူတို့ရဲ့ စိတ်နှလုံးထဲက တရားမျှတမှုအတွက် တာအိုကို ရရှိနိုင်ကြတယ်။

ရွှင်လန်းသောပေါင်းဖက်ခြင်းဂိုဏ်းကတောင်...

အင်း။

အဲဒီအကြောင်း မပြောတော့ဘူး။ မိုလေး သိဖို့မလိုပါဘူးလေ။

အတိုချုပ်ပြောရရင် လောကကြီးမှာ မဟာတာအိုတွေ ထောင်သောင်းချီ ရှိတယ်။

ဒါပေမဲ့ နောက်ဆုံးမှာတော့ အားလုံးက ကိုယ့်စိတ်နှလုံးထဲက လမ်းစဉ်ကို လိုက်နာဖို့ပါပဲ။

မင်းလျှောက်လှမ်းနေတဲ့ လမ်းစဉ်က မှန်ကန်တယ်လို့ ယုံကြည်ပြီး တုန်လှုပ်ခြင်းမရှိတဲ့ ယုံကြည်ချက်နဲ့ လိုက်နာနေသရွေ့ မင်း တာအိုကို ရရှိနိုင်ပါတယ်။

တကယ်လို့ နောက်ဆုံးမှာ မင်းရဲ့ လမ်းစဉ်က မှားယွင်းနေတယ်လို့ ခံစားလာရရင် မင်းရဲ့ ကျင့်ကြံခြင်းအဆင့် ပိုမြင့်လေလေ၊ မင်းရဲ့ တာအိုစိတ်နှလုံးက မတည်မငြိမ်ဖြစ်ဖို့ ပိုများလေလေ၊ ဒါမှမဟုတ် ပျက်စီးသွားဖို့တောင် အလားအလာရှိတယ်။

မင်းက အတားအဆီးကိုဖြတ်ကျော်ပြီး အသစ်တဖန် ပြန်လည်မတည်ဆောက်နိုင်ဘူးဆိုရင် မင်းရဲ့ အဆင့်က ထိုးကျသွားနိုင်တယ်။

အစ်မ ရှင်းပြတာတွေကို မိုလေး နားလည်ရဲ့လား။"

အစီအရင်အတွင်း၌ ဝိညာဉ်စွမ်းအင်များကို စုဆောင်းနေသော ရှောင်မိုက မျက်လုံးများကို ဖွင့်ကာ ဖြည်းညင်းစွာ ခေါင်းညိတ်လိုက်သည်။ "ကျွန်တော် နည်းနည်းတော့ နားလည်သလိုပဲ။ ဒါဆို အစ်မဘိုင်၊ တာအိုကို ရရှိသွားရင် နောက်ဆုံးမှာ လိုအင်ဆန္ဒတွေကင်းမဲ့ပြီး သံယောဇဉ်တွေ ကင်းကွာသွားတာ အမှန်ပဲလား။"

"ဟီးဟီးဟီး၊ ဘယ်လိုလုပ် အဲဒီလို ဖြစ်နိုင်မှာလဲ။"

ဘိုင်ရုရွှယ်က ပါးစပ်ကိုအုပ်ကာ တခစ်ခစ် ရယ်မောလိုက်လေသည်။

"အဲဒါက ကျင့်ကြံသူ လျှောက်လှမ်းတဲ့ လမ်းစဉ်အပေါ် မူတည်တယ်။ သူတို့က မေ့လျော့ခြင်းတာအို လမ်းစဉ်ကို မကျင့်ကြံဘူးဆိုရင် ကျင့်ကြံသူ အများစုက ကျင့်ကြံမှု တိုးတက်လာတာနဲ့အမျှ လိုအင်ဆန္ဒကင်းမဲ့ပြီး သံယောဇဉ်ကင်းကွာသွားမှာ မဟုတ်ဘူး။

လုံးဝ ပြောင်းပြန်ပဲ။

ကျင့်ကြံသူ အများစုက ကျင့်ကြံခြင်းမှာ ပိုပြီး တိုးတက်လာလေလေ၊ သူတို့ရဲ့ စရိုက်လက္ခဏာတွေနဲ့ နှစ်သက်မှုတွေက ပိုပြီး ပေါ်လွင်လာလေလေပဲ။

ဥပမာအနေနဲ့ ရမ္မက်ကြီးတဲ့သူတွေက အလှတရားကို ပိုပြီး ပြင်းပြင်းထန်ထန် လိုက်စားလာကြလိမ့်မယ်။

စည်းစိမ်ဥစ္စာကို မက်မောတဲ့သူတွေက ပိုပြီး လောဘကြီးလာကြလိမ့်မယ်

ဒါပေမဲ့ သူတို့ရဲ့ ကျင့်ကြံခြင်းအဆင့် ပိုမြင့်လေလေ၊ မတူညီတဲ့ အလှတရားတွေနဲ့ မတူညီတဲ့ ရတနာတွေကို ပိုပြီး လိုက်စားလာကြလေလေပဲ။"

"အာ၊ နားလည်ပါပြီ။" ရှောင်မိုက ခေါင်းညိတ်လိုက်သည်။

"နားလည်ရင် ကောင်းတာပေါ့။ နောက်တစ်ခုအနေနဲ့ ဝိညာဉ်စွမ်းအင်အကြောင်း ပြောကြရအောင်။

ဝိညာဉ်စွမ်းအင်ဆိုတာ ဘာလဲ။

ဝိညာဉ်စွမ်းအင်ဆိုတာကို အမျိုးအစား နှစ်မျိုး ခွဲခြားထားတယ်။ တစ်ခုက ကောင်းကင်နဲ့ မြေကြီးဆီကနေ စုပ်ယူရရှိတဲ့ ဝိညာဉ်စွမ်းအင်ပဲ။

နောက်တစ်ခုကတော့ ကျင့်ကြံသူ ကိုယ်တိုင် ထုတ်လုပ်တဲ့ ဝိညာဉ်စွမ်းအင်ပဲ။

အဆင့်နဲ့ ဝိညာဉ်စွမ်းအင်ကြားမှာ အကြောင်းအကျိုး ဆက်စပ်မှုတစ်ခု ရှိတယ်လို့ ရှုမြင်လို့ရတယ်။

ကျင့်ကြံသူတစ်ယောက်ရဲ့ အဆင့်က ပိုမြင့်လာတဲ့အခါ သူတို့ရဲ့ ခန္ဓာကိုယ်အတွင်းမှာ ထုတ်လုပ်တဲ့ ဝိညာဉ်စွမ်းအင်က ပိုများလာပြီး အပြင်လောကကနေ အချိန်တိုင်း စုပ်ယူတဲ့ ဝိညာဉ်စွမ်းအင်ကလည်း ပိုများလာတယ်။

ဒါပေမဲ့ ဘာလို့ တချို့လူတွေက တူညီတဲ့ အဆင့်မှာ ရှိနေတာတောင် အရည်အသွေး ကွာခြားမှုတွေ ရှိနေကြသေးတာလဲ။

နောက်ဆုံးမှာတော့ ဝိညာဉ်စွမ်းအင်ရဲ့ အရည်အသွေး ကွာခြားနေလို့ပါပဲ။

ဝိညာဉ်စွမ်းအင် ပမာဏကွာခြားတယ်ဆိုရင် ထုတ်လွှတ်နိုင်တဲ့ မှော်အတတ်တွေရဲ့ ပြင်းအားကလည်း ကွာခြားလိမ့်မယ်။

ဝိညာဉ်စွမ်းအင်အရည်အသွေး ကွာခြားတယ်ဆိုရင် ထုတ်လွှတ်လိုက်တဲ့ မှော်အတတ်တွေရဲ့ စွမ်းအားအရည်အသွေးကလည်း ကွာခြားလိမ့်မယ်။

ထပ်ပြောရရင် မိုလေး သေချာ မှတ်ထားရမယ်နော်။

ကျင့်ကြံသူတစ်ယောက်ရဲ့ တိုက်ခိုက်ရေးစွမ်းအား ခွန်အားကို သူတို့ရဲ့ အဆင့်တစ်ခုတည်းနဲ့ လုံးဝ ဆုံးဖြတ်လို့မရဘူး။

ကျင့်ကြံသူတိုင်းမှာ မတူညီတဲ့ အဓိက ကျင့်စဉ်တွေ၊ မတူညီတဲ့ တိုက်ခိုက်ရေး အတွေ့အကြုံတွေနဲ့ မတူညီတဲ့ တိုက်ခိုက်ရေး ထက်မြက်မှုတွေ ရှိကြလို့ သူတို့ရဲ့ တိုက်ခိုက်ရေးစွမ်းအားကလည်း သဘာဝကျကျ ကွာခြားကြတယ်။

ဒါကြောင့် လူတစ်ယောက်ရဲ့ အဆင့်နိမ့်နေရုံနဲ့ အနိုင်ကျင့်လို့ လွယ်တယ်လို့ ဘယ်တော့မှ မထင်လိုက်နဲ့။

ဘယ်သူနဲ့ပဲ ရင်ဆိုင်ရပါစေ ရန်သူကို အထင်မသေးရဘူးနော် မိုလေး၊ နားလည်လား။"

"အင်း။" ရှောင်မိုက ခေါင်းညိတ်လိုက်သည်။ "ကျွန်တော် နားလည်ပါပြီ အစ်မဘိုင်။"

"သိရင် ကောင်းတာပေါ့။" ဘိုင်ရုရွှယ်က လမ်းလျှောက်နေခြင်းကို ရပ်တန့်လိုက်သည်။

"မိုလေးက အခုဆိုရင် အုတ်မြစ်ချခြင်းအဆင့် ကျင့်ကြံသူတစ်ယောက် ဖြစ်နေပြီ။ ကျင့်ကြံသူ အများစုကို အများကြီး ကျော်လွန်နေပြီ။ ဒီနေ့ကစပြီး အစ်မက မိုလေးရဲ့ ခန္ဓာကိုယ်ထဲက မသေမျိုးဂူဗိမာန်ကြီး သုံးခုကို ဖွင့်ပေးမယ်။ အဲဒါတွေ ပွင့်သွားတာနဲ့ မိုလေးက..."

အခန်း (၁၀၆)

ဘိုင်ရုရွှယ် စကားတစ်ဝက်ခန့်အရောက်တွင် သူမ၏ မိုးမခရွက်ကဲ့သို့ မျက်ခုံးလေးများ တွန့်ချိုးသွားခဲ့သည်။

နောက်တစ်ခဏတွင် အဖြူရောင် အလင်းတန်းများက ဘိုင်ရုရွှယ်နှင့် ရှောင်မိုတို့ဆီသို့ ရိုက်ချလာခဲ့လေသည်။

ဘိုင်ရုရွှယ်က ရှေ့သို့ ခြေတစ်လှမ်းတိုးကာ ရှောင်မိုကို သူမ၏ ရင်ခွင်ထဲသို့ ဆွဲသွင်းကာကွယ်လိုက်သည်။

"ဝုန်း ဝုန်း ဝုန်း"

အဖြူရောင် အလင်းတန်းများက ဘိုင်ရုရွှယ်နှင့် ရှောင်မိုတို့၏ ပတ်လည်သို့ ရိုက်ခတ်လာပြီး ဖုန်မှုန့်များ မီတာအတော်အမြင့်ထိ လွင့်စင်သွားစေခဲ့သည်။

ပြိုင်ဘက်၏ တိုက်ခိုက်မှုက တဖြည်းဖြည်း ရပ်တန့်သွားခဲ့သည်။ ဖုန်မှုန့်များ ငြိမ်သက်သွားချိန်တွင် ပင်လယ်ပြာရောင် အတားအဆီးတစ်ခုက သူတို့နှစ်ဦးကို ဖုံးလွှမ်းထားလေသည်။

"အစ်မဘိုင်..." ရှောင်မိုက ခေါင်းမော့ကာ ဘိုင်ရုရွှယ်ကို ကြည့်လိုက်သည်။

"မကြောက်နဲ့ မိုလေး။ ဖိတ်ခေါ်မထားတဲ့ ဧည့်သည်တချို့ ရောက်လာလို့ပါ။ အစ်မ မြန်မြန် ဖြေရှင်းလိုက်မယ်။"

ဘိုင်ရုရွှယ်က ပြုံးကာ ရှောင်မို၏ ခေါင်းလေးကို ပွတ်သပ်ပေးလိုက်ပြီးနောက် ကျမ်းစာလိပ်တစ်ခုကို ပစ်ထုတ်လိုက်လေသည်။

ကျမ်းစာလိပ်ထဲမှ ထွက်ပေါ်လာသော မှော်ဝင်္ကပါက ရှောင်မိုကို လွှမ်းခြုံသွားခဲ့သည်။

"မြောက်ပိုင်းပင်လယ် နဂါးအရှင်သခင်က လူသားမျိုးနွယ် ကောင်လေးတစ်ယောက်ကို ကာကွယ်ပေးနေတယ်ဆိုတော့ အတော်လေး စိတ်ဝင်စားဖို့ ကောင်းတာပဲ။"

လီဖုန်းရှန်း၏ အသံက ကောင်းကင်ယံအထက်မှ ထွက်ပေါ်လာခဲ့သည်။

ဘိုင်ရုရွှယ်က ခေါင်းမော့ကြည့်လိုက်ရာ အဘိုးအိုတစ်ဦးနှင့် လူငယ်တစ်ဦးတို့ လေထဲတွင် လွင့်မျောနေသည်ကို တွေ့လိုက်ရသည်။

ဘိုင်ရုရွှယ်က ထိုနှစ်ဦး၏ ဝိညာဉ်စွမ်းအင် အတက်အကျများကို အာရုံခံကြည့်လိုက်သည်။

လူငယ်လေးက ဂူဗိမာန်အဆင့်တွင် ရှိနေပြီး အဘိုးအို၏ အဆင့်မှာ သူမထက် နိမ့်မည်မဟုတ်ပေ။

"ငါ့ရဲ့ မြောက်ပိုင်းပင်လယ်က မင်းတို့ လူသားမျိုးနွယ်တွေကို ဘယ်တုန်းကမှ ရန်မစဖူးဘူး။ ဒါက ဘာသဘောလဲ။" ဘိုင်ရုရွှယ်၏ မျက်လုံးများက တင့်တယ်ခမ်းနားသော ရွှေရောင် ဒေါင်လိုက်သူငယ်အိမ်များအဖြစ်သို့ ပြောင်းလဲသွားပြီး သူမ၏ အသံမှာ ဒေါသထွက်စရာမလိုဘဲ မွေးရာပါ လေးစားမှုရရှိစေသော အသံမျိုး ဖြစ်နေလေသည်။

"ဘာသဘောမှ မဟုတ်ပါဘူး။ ငါတို့က မင်းရဲ့ အသက်ကို လိုချင်လို့ပါ။"

လီဖုန်းရှန်းက အဓိပ္ပာယ်မရှိသော စကားများကို ဆက်မပြောတော့ဘဲ အိုမင်းနေသော လက်ဖဝါးကို ဆန့်တန်းကာ အောက်သို့ ဖိချလိုက်လေသည်။

ဧရာမ ရွှေရောင်လက်ဝါးကြီးတစ်ခု ကောင်းကင်မှ ဆင်းသက်လာခဲ့သည်။

"မိုလေး၊ ဒီအစီအရင်ထဲကနေ ထွက်မလာနဲ့နော်။ အစ်မ အခုပဲ ပြန်လာခဲ့မယ်။"

ဘိုင်ရုရွှယ်က ကြာပန်းအလင်း ခြေလှမ်းများဖြင့် ရွှေရောင်လက်ဝါးကြီးဆီသို့ ပြေးဝင်သွားခဲ့သည်။

တစ်ခဏချင်းမှာပင် ရေခဲတိုင်များက ဘိုင်ရုရွှယ်၏ ပတ်လည်မှ ထွက်ပေါ်လာပြီး ပိုင်ရှင်၏နောက်သို့ လိုက်ပါကာ ရွှေရောင်လက်ဝါးရာကြီးကို ရိုက်ခွဲဖျက်ဆီးပစ်လိုက်လေသည်။

"တပည့်လေး၊ နောက်ဆုတ်နေ။"

လီဖုန်းရှန်းက စူးရှစွာ အော်ဟစ်လိုက်ပြီး သူ၏ လက်ချောင်းများက ဝမ်ရှန်းကျင့်စဉ် လက်ကွက်များကို ဖော်ဆောင်လိုက်သည်။

ချက်ချင်းပင် ထူထပ်သော တိမ်တိုက်များက ကောင်းကင်တစ်ခွင်သို့ လှိုင်းလုံးများအလား ရိုက်ခတ်လာပြီး စစ်မှန်သောနဂါး၊ ချီလင်၊ ဖီးနစ်နှင့် ကျန်းရုံ အစရှိသော ရှေးဟောင်း နတ်ဘုရားသားရဲများ၏ ဓမ္မရုပ်တုများအဖြစ် စုစည်းသွားခဲ့သည်။

"ဂါး"

တိမ်ချီများဖြင့် ဖွဲ့စည်းထားသော နတ်ဘုရားသားရဲများက လေတိုက်ခတ်မှုနှင့် မိုးကြိုးပစ်ခတ်မှု အဟုန်တို့ကို သယ်ဆောင်ကာ ဘိုင်ရုရွှယ်ဆီသို့ တည့်တည့် ပြေးဝင်လာကြလေသည်။

ဘိုင်ရုရွှယ်က ဦးဆောင်လာသော ဖီးနစ် ဓမ္မရုပ်တုကို လက်ဝါးတစ်ချက်တည်းဖြင့် ရိုက်ခွဲလိုက်ရာ မီးခိုးငွေ့များနှင့် တိမ်တိုက်များအဖြစ် ပြိုကွဲပျောက်ကွယ်သွားစေခဲ့သည်။

သို့သော် ကျန်ရှိနေသော နတ်ဘုရားသားရဲများက တိုက်ခိုက်မှုကို ဆက်လက်ထိန်းသိမ်းထားပြီး မျက်စိတစ်မှိတ်အတွင်း ဘိုင်ရုရွှယ်၏ မျက်စိရှေ့သို့ ရောက်ရှိလာကြသည်။

တစ်ချိန်တည်းမှာပင် လီဖုန်းရှန်းက သူ၏ လက်ချောင်းများကို ဓားတစ်လက်ကဲ့သို့ ပေါင်းစပ်လိုက်ပြီး ကောင်းကင်ယံရှိ ပူပြင်းလှသော နေမင်းကြီးထံသို့ ချိတ်ဆက်လိုက်လေသည်။

ရွှေကျီးကန်း၏ ခြေသည်းများနှင့် တူညီပြီး ရွှေရည်များကဲ့သို့ ပူပြင်းလှသော မီးတောက်ကြိုးများစွာက လေထုကို ဆုတ်ဖြဲကာ ဘိုင်ရုရွှယ်ကို သံကြိုးများသဖွယ် ရစ်ပတ်ချည်နှောင်လိုက်ကြသည်။

ဘိုင်ရုရွှယ်က မျက်မှောင်ကြုတ်သွားပြီး မြေပြင်ပေါ်ရှိ ရှောင်မိုကို တိတ်ဆိတ်စွာ လှမ်းကြည့်လိုက်လေသည်။

သူမက ရှောင်မို၏ရှေ့တွင် သူမ၏ စစ်မှန်သောပုံစံကို မထုတ်ဖော်ပြသချင်ပေ။ မည်သို့ပင်ဆိုစေ သူမက မိစ္ဆာတစ်ပါးဖြစ်ပြီး လူသားမျိုးနွယ်နှင့် မိစ္ဆာမျိုးနွယ်တို့ကြား ဆက်ဆံရေးမှာ ယခုအချိန်တွင် အလွန်အမင်း တင်းမာနေသောကြောင့် ဖြစ်သည်။

လူသားမျိုးနွယ်နှင့် မိစ္ဆာမျိုးနွယ်တို့ကြား ကြီးမားသော စစ်ပွဲကြီးတစ်ခု ဖြစ်ပွားလုနီးပါး ဖြစ်နေသည့် ဤပတ်ဝန်းကျင်အခြေအနေတွင် မူလက မိစ္ဆာမျိုးနွယ်အပေါ် သဘောထားကောင်းရှိခဲ့သော ဝေးလံခေါင်ဖျားသည့် တံငါရွာလေးဖြစ်သော ဟွမ်ယွီကျေးရွာပင်လျှင် သက်ရောက်မှုရှိနေခဲ့ပြီဖြစ်သည်။

ဟွမ်ယွီကျေးရွာ၏ လက်ရှိ ရွာသားများက မိစ္ဆာမျိုးနွယ်အကြောင်း ပြောကြလျှင် သတိထားစောင့်ကြည့်ရမည့် ပုံစံမျိုးဖြင့် ပြောဆိုနေကြပြီ ဖြစ်သည်။

ရှောင်မိုက ငယ်ရွယ်ပြီး သိပ်နားမလည်သေးသော်လည်း ထိုသို့သော ခံစားချက်များနှင့် အမြဲတမ်း ထိတွေ့နေရသည့်အတွက် မိစ္ဆာမျိုးနွယ်အပေါ် သဘောထားကောင်း သိပ်ရှိမည်မဟုတ်ပေ။

သို့သော် သူမ၏ရှေ့မှ ဤအဘိုးအိုကြီးက အလွန်တရာ အင်အားကြီးမားပြီး ကြိုတင်ပြင်ဆင်ထားခဲ့ပုံရသည်။ သူမသာ စစ်မှန်သောပုံစံကို အသုံးပြုပြီး မတိုက်ခိုက်ပါက ရှောင်မို အန္တရာယ်ရှိသွားနိုင်ပေသည်။

"ဂါး"

ဘိုင်ရုရွှယ်က အံကြိတ်လျက် သူမ၏ အဖြူရောင်နဂါးပျံ စစ်မှန်သောပုံစံသို့ ပြောင်းလဲကာ တည့်မတ်စွာ တက်ရောက်တိုက်ခိုက်ရန် ဆုံးဖြတ်လိုက်လေသည်။

သူမက တွေဝေတတ်သူတစ်ယောက် မဟုတ်ပေ။

သာမန်အချိန်များတွင် ဘိုင်ရုရွှယ်က လွန်ခဲ့သော နှစ်သုံးထောင်က ကောင်မလေးတစ်ယောက်ကဲ့သို့ ပုံပေါက်နေသေးသော်လည်း။

တကယ်တမ်းတွင် သူမ၏ ထိုအပြစ်ကင်းစင်သော ပုံစံလေးကို သီးခြား လူတစ်ယောက်တည်းကိုသာ ပြသခြင်းဖြစ်သည်။

လွန်ခဲ့သော နှစ်ပေါင်းသုံးထောင်ကျော် ကာလအတွင်း သူမသည် မရေမတွက်နိုင်သော ကြီးမားသည့် တိုက်ပွဲပေါင်းများစွာကို ကြုံတွေ့ဖြတ်သန်းခဲ့ပြီးဖြစ်ကာ မိုင်သောင်းချီ ကျယ်ဝန်းသော ပင်လယ်နယ်မြေကို အုပ်စိုးသည့် မြောက်ပိုင်းပင်လယ် နဂါးအရှင်သခင်၊ စစ်မှန်သော မိစ္ဆာဧကရာဇ်တစ်ပါး ဖြစ်နေခဲ့ပြီဖြစ်သည်။

"မည်မျှ ရက်စက်ကြမ်းကြုတ်သော မသေမျိုးအဆင့် နဂါးပျံဖြစ်လိုက်သနည်း။"

ကျန်းနှစ်ရာ့သုံးဆယ်ခန့် ရှည်လျားသော ဤအဖြူရောင် နဂါးပျံကြီးကို ကြည့်ကာ လီဖုန်းရှန်း လန့်သွားခဲ့သည်။

သူက နဂါးပျံများစွာကို သတ်ဖြတ်ခဲ့ဖူးသော်လည်း ဒဏ္ဍာရီလာ စစ်မှန်သောနဂါးနှင့် ဤမျှနီးစပ်သည့် သူ၏ရှေ့မှ အဖြူရောင်နဂါးပျံမျိုးကိုတော့ တကယ်ကို တစ်ခါမှ မမြင်ဖူးခဲ့ပေ။

ပြိုင်ဘက်က နဂါးပျံလက္ခဏာအချို့ ကျန်ရှိနေသေး၍သာ မဟုတ်ပါက လီဖုန်းရှန်းသည် သူမကို စစ်မှန်သော နဂါးစစ်စစ်တစ်ကောင်ဟုပင် ထင်မှတ်သွားနိုင်ပေသည်။

အခြားတစ်ဖက်တွင် စုရန်က ကောင်းကင်ကို ဖုံးကွယ်သွားသော အဖြူရောင် နဂါးပျံကြီးကို ကြည့်ကာ သူ၏ ခန္ဓာကိုယ်မှာ အဆက်မပြတ် တုန်ယင်နေခဲ့သည်။

တောင်ကြီးတစ်လုံးကဲ့သို့ ကြီးမားလှသော နဂါးအငွေ့အသက်ကြီးက စုရန်အပေါ်သို့ ဖိကျလာခဲ့သည်။

စုရန်၌သာ ခန္ဓာကိုယ်ကို ကာကွယ်ပေးထားသော မှော်ရတနာ မရှိပါက သူသည် အသက်ရှူကျပ်နေသကဲ့သို့ ခံစားရပေလိမ့်မည်။

ကမ်းခြေပေါ်တွင် ထိုင်နေသော ရှောင်မိုသည်လည်း အလွန်အမင်း အံ့အားသင့်သွားခဲ့သည်။ နှစ်ပေါင်းများစွာ ကြာပြီးနောက်တွင် ဤသည်က နတ်ဘုရားတစ်ပါးနှင့် တူလှသော ရုရွှယ်၏ စစ်မှန်သောပုံစံကို သူ ပထမဆုံးအကြိမ် မြင်တွေ့ရခြင်းပင် ဖြစ်သည်။

"ဒီလို အင်အားကြီးမားတဲ့ သွေးမျိုးဆက်ကို ငါကပဲ အသုံးပြုရမယ်။" လီဖုန်းရှန်းက လက်ဝှေ့ယမ်းလိုက်လေသည်။

ထူထပ်သော တိမ်တိုက်ကြီးများက ကောင်းကင်တိုင်လုံးကြီးများအဖြစ် ထပ်မံပြောင်းလဲသွားပြီး ဘိုင်ရုရွှယ်ကို ချည်နှောင်ရန် ကြိုးစားလိုက်ကြသည်။

ဘိုင်ရုရွှယ်က သောင်းကျန်းကာ တိမ်တိုင်လုံးကြီးများကို ရိုက်ခွဲဖျက်ဆီးပစ်လိုက်ပြီးနောက် လီဖုန်းရှန်း၏ ခန္ဓာကိုယ်ကို တည့်တည့်ထိမှန်စေမည့် နဂါးအသက်ရှူငွေ့တစ်ချက် မှုတ်ထုတ်လိုက်လေသည်။

နဂါးအသက်ရှူငွေ့ မှုတ်ထုတ်ပြီးနောက် လီဖုန်းရှန်း၏ ခန္ဓာကိုယ်က ပြန်လည်ဖွဲ့စည်းလာခဲ့သည်။ ထို့နောက် သူက ရွှေရောင် ငါးဖမ်းခြင်းတောင်းတစ်ခုကို ပစ်ထုတ်လိုက်လေသည်။

ငါးဖမ်းခြင်းတောင်းက အလျင်အမြန် ကြီးမားလာပြီး ဘိုင်ရုရွှယ်ကို လွှမ်းခြုံသွားခဲ့သည်။

ဘိုင်ရုရွှယ် မြစ်ကိုဖြတ်ကူးစဉ်က နဂါးဖမ်းခြင်းတောင်း အတုတစ်ခုနှင့် ကြုံတွေ့ခဲ့ဖူးသည်။

သို့သော် ဤအရာက အတုမဟုတ်ပေ၊ ဤသည်က စစ်မှန်သော မသေမျိုးလက်နက်တစ်ခု ပင်ဖြစ်သည်။