အခန်း (၄၇၅-၄၇၆)

အခန်း ၄၇၅ ကောင်းကင်တာအို သိအိုရီ ၂

သူ၏ခေါင်းပေါ်တွင် ရှည်လျားသော ချိုများနှင့် သွေးနီရောင် ဆံပင်များ ဖုံးလွှမ်းနေသော သူ၏ တည်ရှိမှုသည် သူ သွားလေရာရာတွင် အာရုံစိုက်မှုကို ဆွဲဆောင်သည်။ အဓိပတိဂိုဏ်းတွင် နတ်ဆိုးမျိုးနွယ် တပည့်များစွာ ရှိသော်လည်း ထိုသို့ ထူးချွန်ပြတ်သားသော အမူအရာ ပိုင်ဆိုင်သည့် နတ်ဆိုး အနည်းငယ်သာ ရှိသည်။

သူသည် သူ၏ အချုပ်အနှောင်မဲ့အမတအရှိန်အဝါ ကို မရှက်မကြောက် ပြသထားရာ အခြားသူများက သူ၏ ကျင့်ကြံမှုအဆင့်ကို စပ်စုနေကြသည်။

အဓိပတိဂိုဏ်းအတွင်း၌ အမတလမ်းစဥ်မှ တစ်စုံတစ်ယောက်နှင့် တွေ့ဆုံလျှင်ပင် တပည့်များ ထိတ်လန့်ကြမည် မဟုတ်ပေ။ အဘယ်ကြောင့်ဆိုသော် အမတလမ်းစဥ် အစွမ်းထက်သူ မည်သူမျှ အဓိပတိဂိုဏ်းတွင် ပြဿနာရှာရန် မဝံ့ရဲဟု သူတို့ ယုံကြည်သောကြောင့် ဖြစ်သည်။ သူတို့ကို စစ်မှန်အမတလမ်းစဥ် အထွတ်အထိပ်တည်ရှိမူက ကာကွယ်ထားသည်မဟုတ်ပါလော။

ဤတစ်ကြိမ် ကုအန် စာအုပ်စုဆောင်းရေးခန်းမသို့ လာခြင်းမှာ စာအုပ်များ လှူဒါန်းရန် မဟုတ်ဘဲ ဝယ်ယူရန် ဖြစ်သည်။ စာအုပ်စုဆောင်းရေးခန်းမသည် သူ့အတွက် ကမ္ဘာတစ်ဝှမ်းမှ ရှားပါးစာအုပ်များကို စုဆောင်းပေးနေပြီး သူ မငြင်းပယ်ပေ။

သူ၏ တာအိုအဆင့်ဖြင့် သူ အကျိုးဆက်များကို ကြိုတင်ခန့်မှန်းနိုင်သော်လည်း သူ ထိုသို့ မလုပ်ခဲ့ပေ။ သူသည် စာအုပ်တစ်အုပ်၏ စာမျက်နှာများကို လှန်လှောခြင်း၏ ခံစားချက်ကို ပိုနှစ်သက်သည်။ မဟာကောင်းကင်စိတ်ဝိညာဉ်နယ်မြေထက် ကျော်လွန်သော စွမ်းအားများ ပိုင်ဆိုင်ထားသော်လည်း သူသည် သာမန် လောကီအလေ့အထများကို တတ်နိုင်သမျှ ထိန်းသိမ်းထားသည်။

နှစ်များတစ်လျှောက် သူ၏ သက်တမ်း တိုးတက်လာသည့်အပြင် ကံကြမ္မာနှင့် ကံအကြောင်းအကျိုးကို ပိုမို နက်ရှိုင်းစွာ နားလည်လာခဲ့သည်။ သူသည် ကောင်းကင်တာအို နှစ်မျိုးနှင့် မဟာတာအို နတ်စွမ်းရည်များကို ပိုမို ကြီးမားသော တန်ခိုးဖြင့် အသုံးပြုနိုင်သည်။ ၎င်းသည်လည်း လောကီလောက၏ တစ်စိတ်တစ်ပိုင်းအဖြစ် ကျန်ရှိနေခြင်း၏ အကျိုးကျေးဇူး ဖြစ်သည်။

တွက်ချက်ခြင်းနှင့် နှိုင်းယှဉ်လျှင် လူများကြားတွင် ဆက်ဆံနေထိုင်ခြင်းသည် အခြားသူများ၏ စိတ်ခံစားချက်များကို ပိုမို နားလည်စေပြီး ဘဝ၏ အသိတရားကို ရရှိစေသည်။

စာအုပ်စုဆောင်းရေးခန်းမမှ အကြီးအကဲများက ကုအန် ရောက်ရှိလာသည်ကို သိသောအခါ သူတို့သည် သူ့ထံသို့ အလုအယက် ရောက်လာကြပြီး တစ်ဦးချင်းစီ ရှာဖွေတွေ့ရှိခဲ့သော ရှားပါးစာအုပ်များကို စိတ်အားထက်သန်စွာ အကြံပြုကြသည်။ ကုအန်က သူတို့ကို တစ်ဦးချင်းစီ အလျင်မလိုဘဲ တင်ပြရန် ပြောကြားခဲ့သည်။ အကြောင်းမှာ သူသည် အချိန်တစ်နာရီ ကြာ နေထိုင်ရန် စီစဥ်ထားသောကြောင့် ဖြစ်သည်။

ကုအန် အချိန်တစ်နာရီ ကြာ နေမည်ဟု ကြားသောအခါ လူတိုင်း စိတ်တည်ငြိမ်သွားပြီး သူတို့၏ မျက်နှာပေါ်မှ အပြုံးများ မပျောက်ကွယ်သွားပေ။

သူတို့သည် သူတို့၏ ဝါရင့်မှုအလိုက် စာအုပ်များကို စတင် အကြံပြုကြသည်။ ကုအန်က ဂရုတစိုက် နားထောင်ခဲ့သော်လည်း ပထမ စာအုပ်အနည်းငယ်က သူ့ကို မဆွဲဆောင်နိုင်ခဲ့ပေ။

"ညီတော် ကုအန် ကျွန်တော့်မှာရှိတဲ့ ဒီစာအုပ်က ထူးခြားတယ်။ သူ့ရဲ့ မူလအစကို ဘယ်သူမှ မသိဘူး။ ဒါက ပင်လယ်ရပ်ခြားမှာ ရုတ်တရက် ပေါ်လာပြီး လူအများရဲ့ ချီးကျူးမှုကို ခံခဲ့ရတယ်။ တချို့က ဒီစာအုပ်က အနာဂတ်ကို ကြိုတင်ခန့်မှန်းနိုင်တယ်လို့ ပြောကြတယ်" ဟု အကြီးအကဲတစ်ဦးက အပြာရောင်အဖုံးပါ စာအုပ်တစ်အုပ်ကို လျှို့ဝှက်ဆန်းကြယ်စွာ တင်ပြရင်း ပြောလိုက်သည်။

ကုအန်က စာအုပ်အဖုံးကို ကြည့်လိုက်ရာ စကားလုံး သုံးလုံးကို တွေ့လိုက်ရသည်။

ကောင်းကင်တာအို သီအိုရီ !

ကုအန် လက်မြှောက်လိုက်ပြီး စာအုပ်ကို သူ့လက်ထဲသို့ ဆွဲယူလိုက်သည်။ အကြီးအကဲသည် သူ၏ နည်းလမ်းများကို အသားကျနေပြီ ဖြစ်သောကြောင့် အံ့အားမသင့်ဘဲ 'ကောင်းကင်တာအို သီအိုရီ' က ဖြစ်ပေါ်စေခဲ့သော ဂယက်ရိုက်မှုများကို ဆက်လက် မိတ်ဆက်ပေးခဲ့သည်။

ကုအန်သည် ပထမစာမျက်နှာမှစ၍ စိတ်ဝင်စားသွားသည်။

"ကောင်းကင်တာအို၊ သက်ရှိအားလုံး ကောင်းကင်တာအိုအတွက် ပျက်စီးကြရသည်။ မဟာတာအိုသည် ကောင်းကင်တာအိုအတွက် ပျက်စီးရသည်!"

ဒါက ကောင်းကင်တာအိုကို ဝေဖန်တဲ့ စာအုပ်လား။

ကုအန် ပို၍ စပ်စုလာပြီး ဤစာအုပ်က အနာဂတ်ကို မည်သို့ ကြိုတင်ခန့်မှန်းနိုင်သည်ကို သိလို၍ ဆက်လက် လှန်လှောကြည့်ရှုခဲ့သည်။

အကြီးအကဲ တစ်ဦးထက်မက ကောင်းကင်တာအို သီအိုရီ အကြောင်း ကြားဖူးကြသည်။သူတို့၏အဆိုအရ ကောင်းကင်တာအို သီအိုရီ စာအုပ်အစစ် ကိုးအုပ်သာ ရှိသည်ဟု ဆိုသည်။ ကျန်သည်များမှာ အတုများ ဖြစ်သည်။ ကောင်းကင်တာအို သီအိုရီ ကို ပိုင်ဆိုင်ခြင်းသည် ထူးကဲသော စွမ်းအားကို ရရှိခြင်းဖြစ်သော်လည်း ၎င်းသည် ကံဆိုးမိုးမှောင် ကျစေနိုင်ပြီး သေဆုံးခြင်းနှင့် တစ်စုံတစ်ယောက်၏ တာအိုပျက်စီးခြင်းသို့ ဦးတည်စေနိုင်သည်။ ကြိုတင်ခန့်မှန်းမရသော ပြန်လည်ရှင်သန်မှုတစ်ခု ဖြစ်သည်။

အချိန်အတော်ကြာပြီးနောက် ကုအန် စာအုပ်ကို ပိတ်လိုက်ပြီး ပြုံးလိုက်သည်။ "ဒီစာအုပ် ကောင်းတယ်။ ကျွန်တော် ယူမယ်။ အနာဂတ်မှာ ကောင်းကင်တာအို သီအိုရီ ထပ်ရှိသေးရင် ကျွန်တော့်အတွက် သိမ်းထားပေးပါ"

အကြီးအကဲသည် ဤစကားကို ကြားသောအခါ မျက်နှာပွင့်လန်းသွားပြီး ရင်ဘတ်ကိုပုတ်ကာ ဝမ်းမြောက်ဝမ်းသာ သဘောတူလိုက်သည်။

သူသည် မည်သည့် ခ​ကြေးကိုမျှ မတောင်းဆိုခဲ့ပေ။ ကုအန်နှင့် အဆင်ပြေပြေမိတ်ဖွဲ့နိုင်ခြင်းကပင် အကြီးမားဆုံး ဆုလာဘ် ဖြစ်သည်။

ကိုယ့်ကိုကိုယ် ကုအန်၏ မိတ်ဆွေဟု ခေါ်ဆိုလျှင် အဓိပတိဂိုဏ်းအတွင်း မည်သူက သူ့ကို မလေးမစား လုပ်ရဲမည်နည်း။ အကယ်၍ တစ်စုံတစ်ယောက်က ဟန်ဆောင်ရဲလျှင် ကျင့်ကြံသူများက သူတို့၏ တံခါးဝသို့ လာရောက်ခေါက်ကြလိမ့်မည်။ အဓိပတိဂိုဏ်းတွင် အမှောင်ခန်းမ ကို တည်ထောင်ထားသည်ဟု ဆိုကြပြီး ၄င်းတို့သည် ကုအန် သို့မဟုတ် ဆရာသခင်ဓားအရှင်၏ ဂုဏ်သတင်းကို မည်သူမျှ မညှိုးနွမ်းစေရန် ကြီးကြပ်ခြင်းကဲ့သို့သော ကိစ္စရပ်များ ပါဝင်သည်။

ကုအန်က သူတို့ သူ့အတွက် ပြင်ဆင်ထားသော စာအုပ်အားလုံးကို ထုတ်ယူခိုင်းလိုက်သည်။ သူ သူတို့၏ စေတနာကို အလဟဿ မဖြစ်စေနိုင်ပေ။ နောက်ဆုံးတွင် ကုအန်သည် လူတိုင်း လိုက်ပါပို့ဆောင်လျက် စာအုပ်စုဆောင်းရေးခန်းမမှ ထွက်ခွာလာခဲ့သည်။

ကုအန် ထွက်လာသည်ကို မြင်သောအခါ သွေးအကျဥ်းထောင်သူတော်စင် ချက်ချင်း အပြေးအလွှား ရောက်လာသည်။

ကုအန်က သူ့ကို တစ်ချက်ကြည့်ကာ "မင်း အ​ချုပ်အနှောင်မဲ့အမတ ဖြစ်နေပြီလေ။ သူ့ကို အာရုံမစိုက်နဲ့တော့"

စပ်စုဖွယ် ရတနာတစ်ခုကို ခုလေးတင် ဝယ်ယူခဲ့သော သွေးအကျဥ်းထောင်သူတော်စင်သည် အနေရခက်စွာ ပြုံးကာ ချောင်းဆိုးလိုက်သည်"ကျွန်တော် သူ့ကို ကစားနေတာပါ... ကျွန်တော် သူ့ကို ကလေးတစ်ယောက်လိုပဲ မြင်တာ။ ဘာလို့ သူ့ကို အနိုင်ကျင့်ရမှာလဲ"

သူ ရည်ညွှန်းသော ကလေး မှာ ဝိညာဥ်ဖြူကြွက်ပင်။

ကုအန် စကားပြောလိုက်သည့်အချိန်တွင် သွေးအကျဥ်းထောင်သူတော်စင်သည် ဝိညာဉ်ဖြူကြွက်အား ခြောက်လှန့်မည့် သူ၏အစီအစဉ်ကို စွန့်လွှတ်လိုက်လေ၏။ သူ စိတ်မဆိုးပေ။ ကုအန်က ဝိညာဉ်ဖြူကြွက်ကို ဤမျှ ဂရုစိုက်ပါလျှင် သူသည်လည်း ကုအန်အတွက် ထပ်တူဖြစ်ပေလိမ့်မည်ဖြစ်၏။

ကုအန်သည် ညနေစောင်းတိုင်အောင် အပြင်တံခါးမြို့ပတ်လည်တွင် လှည့်လည်သွားလာနေခဲ့၏။ မထွက်ခွာမီအချိန်တွင် သွေးအကျဥ်းထောင်သူတော်စင်သည် သူ့အား သယ်ဆောင်သွားရန်အတွက် နွားမိစ္ဆာအသွင်သို့ သူ့သဘောဆန္ဒအလျောက် ပြောင်းလဲပေးခဲ့သည်။

သွေးအကျဥ်းထောင်သူတော်စင်သည် စီးတော်ယာဉ်အဖြစ် သူ၏တာဝန်ကို မမေ့လျော့သေးပေ။ ကုအန်က မလိုအပ်ကြောင်း ပြောကြားခဲ့သော်လည်း သူကမူ ထိုသို့ပြုလုပ်ရန် တောင်းဆိုခဲ့၏။

သူသည် မိုက်မဲသူတစ်ဦး မဟုတ်ပေ။ အကယ်၍ ကုအန်က သူ့အား နွားတစ်ကောင်အဖြစ် မလိုအပ်ဟု ပြောသည်ကို သူက အမှန်တကယ် ယုံကြည်လိုက်ပါက ကုအန်သည် နောက်တစ်နေ့တွင် သူ့အား အစားထိုးရန် အခြားနွားတစ်ကောင်ကို လွယ်ကူစွာ ရှာဖွေနိုင်လိမ့်မည်ဖြစ်သည်။

ကုအန်သည် သွေးအကျဥ်းထောင်သူတော်စင်၏ သဘောထားကို အလွန်ကျေနပ်လျက်ရှိ၏။ သွေးအကျဥ်းထောင်သူတော်စင် မည်သို့တွေးနေသည်ကို သူ ခန့်မှန်းနိုင်ပေသည်။

အခန်း ၄၇၆ အမတလမ်းစဉ်၏ နဝမကောင်းကင်ကို ကျော်လွန်ခြင်း

အမှန်စင်စစ် ကုအန်၏ လက်ရှိစွမ်းဆောင်ရည်များဖြင့် စီးတော်ယာဉ်တစ်စီး ရှာဖွေရန်မှာ လွယ်ကူလှပေသည်။ သူကိုယ်တိုင် ရှာဖွေရန်ပင် လိုအပ်မည်မဟုတ်ဘဲ သူလိုအပ်သည်ကို မြင်ပါက လူများက သူ့ထံ အပြေးအလွှား လာရောက်ဆက်သကြမည်ဖြစ်၏။

ကုအန်သည် သွေးအကျဥ်းထောင်သူတော်စင်အား အတင်းအကျပ် ဖိအားပေးမည်မဟုတ်ပေ။ သို့သော် သွေးအကျဥ်းထောင်သူတော်စင်က သူ့အနားတွင် ကပ်တွယ်နေလိုပါက သူသည် ငြင်းပယ်မည်လည်း မဟုတ်ချေ။ အနည်းဆုံးတော့ သူ့နောက်သို့ လိုက်ခြင်းအားဖြင့် သူ၏ကြိုးပမ်းမှုများသည် အချည်းနှီး ဖြစ်သွားတော့မည်မဟုတ်ပေ။

နွားကျောပေါ်တွင် ထိုင်လျက် မျက်နှာကို လေပြေညှင်းများ တိုက်ခတ်နေစဥ် ကုအန်သည် ကောင်းကင်တာအိုသီအိုရီ ကျမ်းကို တစ်ဖန်ပြန်လည်ထုတ်ယူ၍ ဆက်လက်ဖတ်ရှုနေခဲ့သည်။

ထိုစာအုပ်သည် မိတ္တူတစ်ခုသာ ဖြစ်သော်လည်း ၎င်း၏စကားလုံးများမှတစ်ဆင့် ကုအန်သည် အထူးတာအိုအသိပညာတစ်ရပ်ကို ခံစားမိစေ၏။ ၎င်းတွင် တာအိုအသိ ပါဝင်နေပါက ၎င်းကို ဖန်တီးသူသည် တာအိုသစ်သီးနယ်ပယ်တွင် ရှိနေဖွယ်ရှိသည်ဟု အဓိပ္ပာယ်ရပေသည်။ အပြင်ဘက်ကောင်းကင်ဘုံ၏ အလွန်တွင် မဟာကောင်းကင်နှင့်မြေပြင် နယ်ပယ်များစွာ ရှိနေခဲ့၏။ ကုအန်သည် အာကာပြင်တာအိုအမတ၏ တည်ရှိမှုကိုပင် ခံစားသိရှိခဲ့ဖူးသည်။ သို့သော် ထိုအရာသည် အလွန်နက်ရှိုင်းစွာ ဖုံးကွယ်ထားပြီး ခဏမျှသာ ပေါ်ထွက်လာခဲ့ခြင်းဖြစ်၏။

ကောင်းကင်တာအိုသီအိုရီကျမ်း သည် အမှတ်မထင် ပေါ်ပေါက်လာခြင်း မဟုတ်ချေ။ တွက်ချက်ပြီးနောက် ကုအန်သည် ၎င်းစာအုပ်များ ကမ္ဘာတစ်ဝှမ်းလုံးသို့ တစ်နှစ်တည်းတွင် ဆင်းသက်လာခဲ့သည်ကို တွေ့ရှိခဲ့၏။ ဤသည်မှာ အင်အားကြီးပုဂ္ဂိုလ်တယောက်ယောက် က မဟာကောင်းကင်စိတ်ဝိညာဉ်နယ်မြေ ပစ်မှတ်ထားနေကြောင်း ညွှန်ပြနေသည်။

ယခုအချိန်တွင် မဟာကောင်းကင်စိတ်ဝိညာဉ်နယ်မြေအတွင်း လွတ်ငြိမ်းရာအမတ ဆယ်ဦးထက်မနည်း ရှိနေ၏။ သူတို့သည် အမှောင်များကြားတွင် သိမ်မွေ့စွာ တိုက်ခိုက်နေကြသည်။ ရံဖန်ရံခါ တွေ့ဆုံကြသော်လည်း သူတို့သည် ကမ္ဘာလောက၏ အခြေအနေကို မထိခိုက်စေဘဲ သူတို့၏တိုက်ပွဲကို အပြင်ဘက်ကောင်းကင်ဘုံသို့ ရွှေ့ပြောင်းတိုက်ခိုက်ကြ၏။

နောက်ထပ် အာကာပြင်တာအိုအမတ တစ်ဦး ပေါ်ထွက်လာခြင်းသည် ကုအန်အား စိုးရိမ်စေခြင်းမရှိပေ။ ၎င်းသည် ခြိမ်းခြောက်မှုတစ်စုံတစ်ရာ မဖြစ်စေခဲ့ချေ။

ထို့အပြင် သူသည် သူ၏နောက်ထပ် ကျော်လွှားတက်လှမ်းမှုအတွက် စတင်စီစဥ်နေခဲ့ပြီ ဖြစ်သည်။ သွေးအကျဥ်းထောင်သူတော်စင်သည် လျင်မြန်စွာ ပျံသန်းနေခြင်းမဟုတ်ပေ။ သူတို့ တတိယဆေးတောင်ကြားသို့ ရောက်ရှိသည့်အချိန်တွင် လသည် ထွက်ပေါ်နေခဲ့ပြီဖြစ်၏။ ဆင်းသက်လိုက်သည်နှင့် ကုအန်သည် အတွင်းသို့ မဝင်ဘဲ အဝေးရှိ ခြံဝန်းတစ်ခုဆီသို့ လျှောက်သွားခဲ့သည်။

တတိယဆေးတောင်ကြားရှိ တပည့်အရေအတွက်သည် ငါးထောင်ကျော်လွန်သွားခဲ့ခြင်းကြောင့် အန်ရှင်းအား နေထိုင်ခွင့်ရလိုသူများအတွက် သတ်မှတ်ချက်များ ချမှတ်စေခဲ့သည်။ ထို့ကြောင့် ယနေ့ခေတ်တွင် အမှန်တကယ် စိန်ခေါ်မှုဖြစ်နေသည်မှာ လေ့ကျင့်မှု ပြီးဆုံးရန်မဟုတ်ဘဲ ဆက်လက်နေထိုင်နိုင်ရန် စီမံခန့်ခွဲခြင်းပင်ဖြစ်၏။

တပည့်ဟောင်းများလည်း နေထိုင်ရန် ရွေးချယ်နိုင်သော်လည်း ဤစည်းမျဥ်းများသည် အကောင်အထည်ဖော်ပြီးနောက် တပည့်သစ်များအတွက် ဖြစ်လာခဲ့သည်။ ကုအန်သည်လည်း သူတို့ကို ယခင်ကဲ့သို့ပင် ဆက်ဆံခဲ့၏။

လမ်းတစ်လျှောက်တွင် ကုအန်သည် တပည့်များ၏ နှုတ်ဆက်ဂါရဝပြုမှုများကို အဆက်မပြတ် တုံ့ပြန်ခဲ့ရသည်။ သူသည် ထိုတိတ်ဆိတ်သော ခြံဝန်းသို့ ရောက်ရှိလာခဲ့ပြီး ကျူးရှီးသည် အတွင်း၌ ကျင့်ကြံနေကြောင်း အာရုံခံမိလိုက်၏။

သူသည် ခြံဝန်းကို လေ့လာကြည့်ရှုပြီးနောက် တံခါးဆီသို့ လျှောက်သွားကာ သူ၏လက်ကို မြှောက်လိုက်သည်။ တံခါးခေါက်သံထွက်ပေါ်လာပြီး မကြာမီ ကျူးရှီးက တံခါးလာဖွင့်ပေး၏။ ကုအန်ကို မြင်သောအခါ သူမသည် ချက်ချင်း ဦးညွှတ်လိုက်သည်။

"မင်းနဲ့စကားပြောဖို့ ကိုယ်ဝင်ခဲ့လို့ရမလား" ကုအန်က ပြုံးလျှက် မေးလိုက်၏။

ဤသည်ကို ကြားသောအခါ ကျူးရှီးသည် အလျင်အမြန် ဘေးသို့ ဖယ်ပေးကာ ကုအန်အား အတွင်းသို့ ဖိတ်ခေါ်လိုက်သည်။ သူ့အား သိကျွမ်းခဲ့သည်မှာ နှစ်တစ်ရာကြာမြင့်ပြီဖြစ်၍ သူမသည် ကုအန်ကို အလွန်လေးစားပြီး သူမကို အန္တရာယ်ပြုမည်ကိုလည်း စိုးရိမ်ခြင်းမရှိပေ။

သူမ စဥ်းစားမိသည်မှာ အကယ်၍ ကုအန်သည် ပုန်းကွယ်နေသူတစ်ယောက်ဖြစ်ပါက ဤမျှကြာအောင် ဟန်ဆောင်နိုင်မည်လော။ အထူးသဖြင့် နေ့စဥ် လူအများနှင့် ထိတွေ့ဆက်ဆံနေရသော တန်ခိုးကြီးကျင့်ကြံသူတစ်ဦးအနေဖြင့် ဤသို့တန်းတူညီမျှစွာ ဆက်လက်ပြုမူနေနိုင်ပါမည်လော။

ထို့အပြင် ကုအန်၏ ရှုထောင့်မှကြည့်လျှင် ဟန်ဆောင်ရန် မလိုအပ်ပေ။ သူသည် ယခုအခါ ကမ္ဘာကြီးတစ်ခုလုံးကို သူ့အား လက်အောက်ခံဖြစ်စေနိုင်ပြီဖြစ်ရာ မည်သူက သူ့ကို တားဆီးနိုင်မည်နည်း။

မဆင်မခြင် သန်မာသူများနှင့် နှိုင်းယှဥ်ပါက ကျူးရှီးသည် သူ၏ စိတ်ခံစားချက်များနှင့် ဆန္ဒများကို ထိန်းချုပ်နိုင်စွမ်းရှိသော ကုအန်ကို ပို၍ လေးစားမိ၏။

ကုအန် အခန်းထဲသို့ ဝင်ရောက်လိုက်ချိန်တွင် ကျူးရှီး၏ အခန်းသည် သန့်ရှင်းပြီး ရိုးရှင်းကာ အပိုပရိဘောဂများ မရှိကြောင်း တွေ့ရှိလိုက်ရသည်။ လန်းဆန်းသော ရနံ့တစ်ခုက လေထုထဲတွင် လွှမ်းခြုံနေပြီး အာရုံများကို ကြည်လင်စေ၏။

ကုအန်သည် စားပွဲတွင် နေရာယူလိုက်ပြီး ကျူးရှီးက တံခါးကိုပိတ်ကာ သူ့အတွက် လက်ဖက်ရည် စတင်ငှဲ့ပေးလေသည်။

ခဏတာ နှုတ်ဆက်စကား ပြောဆိုပြီးနောက် ကျူးရှီးသည် ကုအန်၏ တစ်ဖက်ခြမ်းတွင် ဝင်ထိုင်ကာ "ဆရာသခင်... တစ်ခုခု အလိုရှိလို့လား"

သူမသည် ယခု တတိယဆေးတောင်ကြား၏ တပည့်တစ်ဦးဖြစ်နေပြီဖြစ်၍ ကုအန်အား သူမ၏ ဆရာသခင်အဖြစ် ခေါ်ဝေါ်ခြင်းသည် သင့်လျော်လှပေသည်။

ကုအန်က ပြုံးလိုက်ပြီး "မင်း မကြာသေးခင်က စာအုပ်တစ်အုပ် ရထားသေးလား"

ကျူးရှီးက နားမလည်စွာဖြင့် "ဘာစာအုပ်ပါလဲ"

"ကောင်းကင်တာအိုသီအိုရီ"

ဤစကားကို ကြားသောအခါ ကျူးရှီး၏ မျက်နှာအမူအရာ အနည်းငယ် ပြောင်းလဲသွားသည်။ သူမသည် ချက်ချင်းပင် "ကောင်းကင်တာအိုသီအိုရီ" မိတ္တူစာအုပ်တစ်အုပ်ကို ထုတ်ယူလိုက်ပြီး "ဒီစာအုပ်လား... ဆရာသခင် အလိုရှိလို့လား"

ယခင်က ကုအန်သည် ကောင်းကင်တာအိုသီအိုရီကျမ်းကို တွက်ချက်နေစဥ် အချိန်တွင် မူရင်းကျမ်းတစ်အုပ်သည် လွန်ခဲ့သော လပေါင်းများစွာက အပြင်ထွက်ရင်း မတော်တဆ တွေ့ရှိခဲ့သော ကျူးရှီး၏ လက်ဝယ်တွင် ရှိနေသည်ဟု သူ ကောက်ချက်ချခဲ့မိသည်။ သို့သော် ထိုသို့သော တိုက်ဆိုင်မှုများမှာ များလွန်းနေ၏။

ကုအန်သည် ကောင်းကင်တာအိုသီအိုရီကျမ်းကို သူမ၏လက်ထဲမှ မယူဘဲ ဖြည်းညှင်းစွာ ပြောလိုက်သည် "ကျူးရှီး... မင်း ဘယ်လိုလူစားမျိုးလဲဆိုတာ ငါ အမှန်တကယ် သိနေခဲ့တာ ကြာပါပြီ... မင်း လကြွေနတ်ရေကန်မှာ ရှိနေတုန်းကတည်းက ငါ မင်းကို သတိထားမိခဲ့တယ်... မင်း ဆေးပင်တွေ ခိုးရတာ ကြိုက်တယ်"

ကျူးရှီးသည် မျက်လုံးများ ပြူးကျယ်သွားပြီး အလိုအလျောက် ထရပ်ကာ နောက်သို့ ဆုတ်လိုက်မိသည်။

ကုအန်က သူမကို စိုက်ကြည့်ရင်း "မင်းက လူတိုင်းကို သတိထားနေတတ်တယ်... ဒါကြောင့် ငါ မင်းကို မဖော်ထုတ်ခဲ့ဘူး... မင်းကို တပည့်အဖြစ် လက်ခံခဲ့တဲ့ အကြောင်းရင်းတွေက ပထမအချက်က မင်းရဲ့ အရည်အချင်းကြောင့်...ဒုတိယအချက်က မင်း အပြစ်ကြီးကြီးမားမား မကျူးလွန်ခဲ့သေးဘဲ မင်းအတွက် မျှော်လင့်ချက် ရှိနေသေးလို့... ပြီးတော့ မင်းကို အဆုံးအစမရှိတဲ့ ဆေးဝါးအပင်တွေ ပေးနိုင်တယ်... ဒါပေမဲ့ ငါလည်း မင်းဆီက ယုံကြည်မှုကို လိုအပ်တယ်။

မင်းကို အစောပိုင်းကတည်းက အာရုံစိုက်ခဲ့ရတဲ့ အကြောင်းရင်းက မင်းရဲ့ ထူးခြားတဲ့ ခန္ဓာကိုယ်ကြောင့်ပဲ... မင်းရဲ့ သွေးမျိုးဆက်ရဲ့ ဇာစ်မြစ်ကို အမြဲ သိချင်နေခဲ့တာ မဟုတ်လား"

ဤသည်ကို ကြားသောအခါ ကျူးရှီး၏ ကြောက်လန့်မှုအများစုမှာ ပျောက်ကွယ်သွား၏။ သူမသည် စားပွဲဆီသို့ သတိဖြင့် ချဥ်းကပ်လာပြီး "ဆရာသခင်... ကျွန်မ တတိယဆေးတောင်ကြားထဲမှာ ဘယ်ဆေးပင်မှ မခိုးခဲ့ပါဘူး"

သူမ ပြောသည်မှာ အမှန်ဖြစ်၏။ အဘယ်ကြောင့်ဆိုသော် တတိယဆေးတောင်ကြားရှိ ပြုစုစောင့်ရှောက်မှုများမှာ ကောင်းမွန်သောကြောင့်ပင်။

အန်ရှင်းက သူမအား သီးသန့် ပြောကြားခဲ့သော စကားများသည် ပျံ့နှံ့သွားခဲ့ပြီး မိသားစုများစွာက သူမသည် ဆရာသခင်ဓားအရှင်၏ တိုက်ရိုက်တပည့် ဖြစ်လာနိုင်သည်ဟု တွေးကာ သူမအား ဆွဲဆောင်ရန် ကြိုးစားနေကြသည်။

ကုအန်က "ငါသိပါတယ်... ဒါကြောင့် မင်းကို တစ်ခါမှ မေးခွန်းမထုတ်ခဲ့ဘူး... ဒီနေ့ မင်းကို ရှာလာခဲ့တာက ဒီစာအုပ် ကောင်းကင်တာအိုသီအိုရီက သာမန်မဟုတ်ဘဲ မင်းရော တတိယဆေးတောင်ကြားကိုပါ ဒုက္ခပေးနိုင်လို့ပဲ"

ဤသည်ကို ကြားသောအခါ ကျူးရှီးသည် ကောင်းကင်တာအိုသီအိုရီကျမ်းကို ချက်ချင်း ထုတ်ယူလိုက်သည်။

အစစ်အမှန် ကောင်းကင်တာအိုသီအိုရီကျမ်းသည် သွေးများဖြင့် စွန်းထင်းနေသကဲ့သို့ အနီရောင်အဖုံးဖြင့်ဖြစ်ပြီး ပေါ်ထွက်လာသည်နှင့် မကောင်းဆိုးဝါးဆန်သော အငွေ့အသက်များ ထုတ်လွှတ်နေ၏။

ကုအန်က သူ၏လက်ညှိုးကို တောက်တီးလိုက်ရာ ကျူးရှီး၏ လက်ထဲရှိ ကောင်းကင်တာအိုသီအိုရီကျမ်းသည် လွင့်ထွက်သွားပြီး ကုအန်၏ လက်မောင်းအနီးရှိ စားပွဲပေါ်သို့ ကျသွားသည်။

ကျူးရှီးက တကယ်ကို အထင်ကြီးစရာကောင်းတဲ့ပညာရပ်ပဲ ဟု စိတ်ထဲမှ တွေးလိုက်မိသည်။

သူမ၏ ကျင့်ကြံမှုအဆင့်သည် မနိမ့်ကျပေ။ အဘယ်ကြောင့်ဆိုသော် သူမသည် သူမ၏ အစစ်အမှန်စွမ်းအားကို ဖုံးကွယ်ထားခဲ့ခြင်းသာ ဖြစ်သည်။ သို့သော် ကုအန်၏ ရှေ့တွင် သူမသည် သူမ၏ စိတ်ဝိညာဉ်စွမ်းအားမှာ နုနယ်လှပြီး အချိန်မီ မတုံ့ပြန်နိုင်ဟု ခံစားလိုက်ရ၏။

ကုအန်က "ဒီစာအုပ်က အပြင်ဘက်ကောင်းကင်ဘုံက လာတာဖြစ်နိုင်တယ်။ အမတလမ်းစဉ်ရဲ့ နဝမကောင်းကင်ကို ကျော်လွန်သွားတဲ့ တစ်စုံတစ်ယောက်ရဲ့ လက်ရာပဲ... ဒါက မင်းရဲ့ အကြောင်းတရားဆက်နွယ်မှုနဲ့ ချီကံကြမ္မာတွေနဲ့ အဆက်မပြတ် ပေါင်းစပ်နေလိမ့်မယ်... မင်း ဒါကို များများသုံးလေ ပိုမှီခိုလာလေ ဖြစ်ပြီး နောက်ဆုံးမှာတော့ ဒါရဲ့ ချယ်လှယ်မှုကို ခံရလိမ့်မယ်... သက်ရောက်မှု မရှိစေဖို့ဆိုရင် မင်းက လွတ်ငြိမ်းရာအမတကို ကျော်လွှားရုံတင်မကဘူး... သူ့ကို ဖန်တီးခဲ့တဲ့သူကိုပါ ကျော်လွန်သွားဖို့ လိုတယ်"

အမတလမ်းစဉ်၏ နဝမကောင်းကင်ကို ကျော်လွန်ခြင်းလော။

ကျူးရှီးသည် ဖြူဖျော့သွားသည်အထိ ကြောက်လန့်သွားပြီး သတိဖြင့် "ဆရာသခင်... ကျွန်မ ဘာလုပ်ရမလဲ"

ကုအန်က ပြုံးကာ "မင်း ဒီစာအုပ်ကို ကြိုက်လား"

"ကျွန်မ ကြိုက်... မဟုတ်ဘူး... ကျွန်မ သူ့ရဲ့ စွမ်းအားကိုပဲ ကြိုက်တာပါ" ကျူးရှီးက ရိုးသားစွာ ပြန်ဖြေသည်။ သူမသည် ၎င်းကို အမတလမ်းစဉ်၏ အဓိပတိရတနာဟု မှားယွင်းစွာ ထင်မှတ်ခဲ့မိပြီး ထို့ကြောင့်ပင် ၎င်းကို အလွန်ဂရုတစိုက် ဖုံးကွယ်ထားခဲ့ခြင်း ဖြစ်၏။

ကုအန်က ပြုံးလျက် "ငါ မင်းကို သိမ်းထားခွင့် ပေးနိုင်တယ်... ဒါပေမဲ့ မင်း ဒါကို မသုံးရဘူး... သူ့ရဲ့ စွမ်းအားကို ဘယ်လို ထိန်းချုပ်ရမလဲဆိုတာ ငါ သင်ပေးမယ်... ပြီးတော့ ဘယ်သူ မင်းကို ဆက်သွယ်ဖို့ ကြိုးစားသည်ဖြစ်စေ မင်း ငါကို ပြောရမယ်"

ကျူးရှီးသည် တုံ့ဆိုင်းခြင်းမရှိဘဲ သဘောတူလိုက်သည်။ ကောင်းကင်တာအိုသီအိုရီ ကျမ်း၏ နောက်ကွယ်ရှိ ပုဂ္ဂိုလ်ဘက်မှ ရပ်တည်ရန် သူမတွင် အကြောင်းပြချက် မရှိပေ။