အခန်း (၄၉၃-၄၉၄)

အမတနယ်ပယ်

1.နိဗ္ဗာနအမတ

2.အချုပ်အနှောင်မဲ့အမတ

3.မြေလျှောက်အမတ

4.ကောင်းကင်ဈန်အမတ

5.အပူပင်မဲ့အမတ

6.ကမ္ဘာဦးအမတ

7.တာအိုဆန်းကြယ်အမတ

8.နတ်တွေးအစစ်အမှန်အမတ

9.လွတ်ငြိမ်းရာအမတ

တာအိုသစ်သီးနယ်ပယ်

1.အာကာပြင်တာအိုအမတအဆင့်

2. မူလဘူတနှောင်ဖွဲ့ကင်းအမတ

3. ကောင်းကင်တက်လှမ်းခြင်းနှောင်ဖွဲ့ကင်းအမတ

ကုအန်က အပိုင်း ၄၃၅ မှာ မူလဘူနှောင်ဖွဲ့ကင်းအမတအဆင့်ကိုတက်လှမ်းခဲ့ပါတယ်။ ဘာသာပြန်သူက ကုအန်က သူ့အဆင့်ကို အာကာပြင်တာအိုအမတပြီးပြည်စုံအဆင့်ကိုဖိနှိပ်ထားခဲ့ပါတယ်။

Htet Paing:

အခန်း ၄၉၃ အဆင့်တက်ခြင်း စတင်ပြီ

ကုအန်သည် သူ၏ နတ်ဘုရားအာရုံ ကို ပြန်ရုပ်သိမ်းလိုက်ပြီး ထိုနေရာတွင် တင်ပျဉ်ခွေ ထိုင်ကာ သူ၏ အရည်အချင်း ဇယားကွက် ကိုကြည့် လိုက်သည်။

"အရင်ဆုံး ခန္ဓာကိုယ်ကို မြှင့်တင်ရမယ်။"

နောက်ဆုံး မြှင့်တင်တုန်းက အောင်မြင်ဖို့ သက်တမ်း နှစ်သန်း နှစ်ရာ ကုန်ကျခဲ့တယ်။ ဒီတစ်ခါ သက်တမ်းသန်း ဘယ်လောက်များ လိုအပ်လိုက်မလဲ။

အကယ်၍ အရမ်းများနေပါက ကုအန်သည် ဘက်စုံ မြှင့်တင်ခြင်းကို စွန့်လွှတ်ရမည်ဖြစ်ပြီး သူ၏ ကျင့်ကြံမှု အဆင့် ကို အရင် မြှင့်တင်ရန် အာရုံစိုက်ရပေလိမ့်မည်။

သက်တမ်း နှစ်သန်း ၁၀၀ နဲ့ စလိုက်ရအောင်။

ရင်းနှီးမြှုပ်နှံမူစလိုက်၏။

ကုအန်၏ အကြည့်သည် အရည်အချင်း ဇယားကွက်ထဲရှိ ယွမ်ပေါင်းစည်းသန့်စင်ခြင်းခန္ဓာ အပေါ် စူးစိုက်လျက် သူ၏ ဆုံးဖြတ်ချက်ကို တိတ်တဆိတ် ချမှတ်လိုက်သည်။ အသိပေးချက်များ ဆက်တိုက် ပေါ်လာပြီး သူက ကျရှုံးမှုအတွက် ပြင်ဆင်ပြီးသား ဖြစ်သည်။

သို့သော် ၎င်းသည် အတိအကျ ကျရှုံးမှုတော့ မဟုတ်ပေ။ အဘယ်ကြောင့်ဆိုသော် ၎င်းသည် ကပ်ဘေး ဖြတ်ကျော်ခြင်း မဟုတ်သောကြောင့် ဖြစ်သည်။ မြှင့်တင်ခြင်း မရှိလျှင်ပင် သက်တမ်း၏ ဆင့်ကဲပြောင်းလဲမှုသည် သူ၏ ခန္ဓာကိုယ်ကို အားကောင်းစေဆဲ ဖြစ်သည်။

ဤသို့ တွေးမိသောအခါ ကုအန်သည် အတော်လေး သက်တောင့်သက်သာ ခံစားလိုက်ရသည်။ အသိပေးချက်များ အားလုံး ပေါ်လာပြီးနောက် ယွမ်ပေါင်းစည်းသန့်စင်ခြင်းခန္ဓာသည် အဆင့်မတက်ခဲ့ပေ။ သူသည် နောက်ထပ် သက်တမ်း နှစ်သန်း ၁၀၀ ဘကို ဆက်လက် ရင်းနှီးမြှုပ်နှံလိုက်ပြီး အသိပေးချက်များ လျင်မြန်စွာ ပြန်ပေါ်လာသည်ကို ကြည့်နေလိုက်သည်။

မအောင်မြင်ခဲ့ချေ။

တတိယမြောက် သက်တမ်း နှစ်သန်း ၁၀၀ တစ်ရာကို ရင်းနှီးမြှုပ်နှံလိုက်သည်။

အသိပေးချက်များ အားလုံး ငြိမ်သက်သွားပြီးနောက် ကုအန်သည် နောက်ထပ် သက်တမ်း နှစ်သန်း ၁၀၀ ကိုသာ ဆက်လက် ရင်းနှီးမြှုပ်နှံနိုင်တော့သည်။

သူသည် ဖိအားကို စတင် ခံစားလာရ၏။ ဤအဆင့်တွင် သက်တမ်း နှစ် ၆ ဘီလီယံ မျှဖြင့် ဘက်စုံ မြှင့်တင်ခြင်းသည် လက်လှမ်းမမီနိုင်ဟု သဘောပေါက်လာသည်။

ကံကောင်းစွာဖြင့် လေးကြိမ်မြောက် သက်တမ်း နှစ်သန်း ၁၀၀ တစ်ရာ ရင်းနှီးမြှုပ်နှံမှုတွင် အောင်မြင်ခဲ့လေသည်။ ယွမ်ပေါင်းစည်းသန့်စင်ခြင်းခန္ဓာသည် ရှေးဦးဖရိုဖရဲကိုယ်ခန္ဓာ အဖြစ်သို့ အဆင့်တက်သွားခဲ့သည်။

အောင်မြင်သော အသိပေးချက်များ ပေါ်လာသည်နှင့် သက်တမ်း အတားအဆီးသည် အကျိုးသက်ရောက်လာပြီး ​ေလဟာနယ် မှ တာအို ဝိညာဉ် စွမ်းအင် များကို အငမ်းမရ စုပ်ယူတော့သည်။

ကြီးကျယ်ခမ်းနားသောတာအိုဝိညာဉ်စွမ်းအင်များသည် ကုအန်၏ ခန္ဓာကိုယ်ထဲသို့ တိုးဝင်လာပြီး သူ၏ ဆံပင်ရှည်များကို လေထဲတွင် လွင့်ပျံစေသည်။ ကုအန်သည် သက်တမ်း အတားအဆီးကို ကြည့်ရင်းအသုံးပြုလိုက်သော သက်တမ်း အရေအတွက် ပြောင်းလဲမှုများကို စောင့်ကြည့်နေလိုက်သည်။

အရမ်းမြန်၏။

ကံကောင်းစွာဖြင့် သူ့တွင် လုံလောက်သော သက်တမ်း ရှိနေသည်။

ခဏတာ ကြည့်ရှုပြီးနောက် ကုအန်သည် သူ၏ မျက်လုံးများကို မှိတ်လိုက်ပြီး ရှေးဦးဖရိုဖရဲကိုယ်ခန္ဓာ၏ ပြောင်းလဲခြင်းတွင် နစ်မျောနေလိုက်သည်။

အသံမဲ့အပျက်အဆီးနယ်မြေ၏ လေဟာနယ်သည် စတင် ပေါက်ကွဲထွက်လာပြီး ကြောက်မက်ဖွယ် ပုံရိပ်များက အမှောင်ထုထဲတွင် တိုးဝင်လာကာ ကျယ်ပြန့်သော နတ်ဘုရား အာရုံများက လဟာနယ်ကို ဖြတ်သန်း တိုက်ခတ်သွားသည်။ သက်တမ်း အတားအဆီး၏ လွှမ်းမိုးမှုသည် ဆက်လက် ကျယ်ပြန့်လာပြီး စက်ဝိုင်းပုံသဏ္ဌာန် ပျံ့နှံ့သွားခြင်း မဟုတ်ဘဲ ​ေလဟာနယ်မှ တာအိုဝိညာဉ် စွမ်းအင်များကို ဆွဲငင်နေခြင်း ဖြစ်သည်။

ကုအန် တည်ရှိနေသော လူသူမနေထိုင်သည့် တိုက်ကြီးသည် သက်ရောက်မှုရှိသော နေရာများထဲမှ တစ်ခုမျှသာ ဖြစ်သည်။ အစွမ်းထက်သော အရှိန်အဝါများ သူ၏ အပေါ်မှ ပျံသန်းသွားသော်လည်း မည်သူမျှ ဤတိုက်ကြီးပေါ်မှ ပုံမှန်မဟုတ်မှုများကို သတိမပြုမိသေးပေ။

တစ်နာရီကြာပြီးနောက် ကုအန်သည် နောက်ဆုံးတွင် သူ၏ ရှေးဦးဖရိုဖရဲကိုယ်ခန္ဓာ အဖြစ်သို့ ပြောင်းလဲခြင်းကို အပြီးသတ်လိုက်သည်။

ပြောင်းလဲနေစဉ်အတွင်း သူသည် တာအို ဝိညာဉ် စွမ်းအင်များကိုသာ စုပ်ယူနေခြင်း မဟုတ်ဘဲ တာအို၏ စွမ်းအားကိုလည်း စုပ်ယူနေခဲ့သည်။ ရှေးဦးဖရိုဖရဲကိုယ်ခန္ဓာသည် တာအို စည်းမျဉ်းအားလုံးနှင့် သဟဇာတ ဖြစ်ပြီး ယခုမှစ၍ မည်သည့် တာအိုကိုမဆို ပိုမို လွယ်ကူစွာ နားလည် သဘောပေါက်နိုင်စေမည် ဖြစ်သည်။

တစ်ချိန်တည်းမှာပင်၊ သူသည် ကျိ ၏ စွမ်းအားကို နိုးထခဲ့သည်။

ကျိ ၏ စွမ်းအားသည် ဝိညာဉ်စွမ်းအင် ၏ ပြောင်းလဲမှု မဟုတ်ဘဲသူ၏ ကိုယ်ပိုင် စိတ်ဆန္ဒ၏ စွမ်းအား ဖြစ်ပြီး အကန့်အသတ်မဲ့ပုံစံပြောင်းလဲနိုင်စွမ်း ကို ပိုင်ဆိုင်ကာ စိတ်ကူးမယဉ်နိုင်သော တိုက်ခိုက်မှု စွမ်းအားကို ပိုင်ဆိုင်ထားသည်။

ခံစားမှုနှင့် နားလည်မှု ပြီးဆုံးပြီးနောက် ကုအန်သည် သူ ကျိ ၏ စွမ်းအား သက်သက်ဖြင့် နေရာတိုင်းကို ဖျက်ဆီးပစ်နိုင်သည်ဟု ခံစားလိုက်ရသည်။

၎င်းသည် သက်တမ်း နှစ်သန်း ၄၀၀ ဖြင့်သာ ဖန်တီးနိုင်သော ခန္ဓာကိုယ် ဖြစ်ပေသည်။ ထို့အပြင် ဤမတိုင်မီကပင် ယွမ်ပေါင်းစည်းသန့်စင်ခြင်းခန္ဓာကိုလည်း နှစ်ပေါင်းများစွာ စုဆောင်းထားသော သက်တမ်းများဖြင့် တည်ဆောက်ခဲ့ရသည်။

ကုအန်သည် သူ၏ ယခင် ခန္ဓာကိုယ်များကို အနိမ့်မှ အမြင့်သို့ ပြန်လည် သတိရလိုက်သည်။ ဒြပ်စင်ငါးပါးရတနာကိုယ်ခန္ဓာ၊ မူလတာအို ကိုယ်ခန္ဓာ၊ ဆန်းကြယ်မြင့်မြတ်ကိုယ်ခန္ဓာ၊ ရှေးဦးကံကြမ္မာကိုယ်ခန္ဓာ၊ ထိုက်ချူဟွင်းယွမ်ကိုယ်ခန္ဓာ၊ ရှေးဦးအန္တိမကိုယ်ခန္ဓာ၊ ပျက်ယွမ်ဒြပ်စင်ကိုယ်ခန္ဓာ၊ ယွမ်ပေါင်းစည်းသန့်စင်ခြင်းခန္ဓာနှင့် ရှေးဦးဖရိုဖရဲကိုယ်ခန္ဓာ တို့ ဖြစ်သည်။

ဒြပ်စင်ငါးပါးရတနာကိုယ်ခန္ဓာ မတိုင်မီ သူသည် သူ၏ ဝိညာဉ် အမြစ်ကို မြှင့်တင်ရန် သက်တမ်းများစွာ အသုံးပြုခဲ့ရသည်။

မဟာကောင်းကင်စိတ်ဝိညာဉ်နယ်မြေတွင် ရတနာကိုယ်ခန္ဓာ သည် လက်ရှိခေတ်၏ ပထမတန်းစား ခန္ဓာကိုယ် ဖြစ်နေပြီ ဖြစ်သည်။ ကျူးရှီး၏ ထိုက်ချူဝါးမျိုချယွမ်ကိုယ်ခန္ဓာ သည် ရှေးဦးကံကြမ္မာကိုယ်ခန္ဓာနှင့် ခန့်မှန်းခြေ တူညီပြီး ၎င်းသည် ကုအန် မြင်တွေ့ဖူးသမျှ အစွမ်းအထက်ဆုံး ခန္ဓာကိုယ် ဖြစ်သည်။

ဟုတ်ပါသည်။ ဤခေတ်တွင်သာ ဖြစ်ပြီး ကုအန်သည် သက်တမ်းအဆင့်ကဲဖြစ်စင် အတွင်း အစွမ်းထက်သော ခန္ဓာကိုယ်များစွာကို မြင်တွေ့ခဲ့ဖူးသည်။

နောက်တစ်ခုက ကျင့်ကြံမှု နည်းစနစ်များ ၊ အန္တိမစွမ်းရည်များ နှင့် နတ်သိုင်းများကို မြှင့်တင်ရန် ဖြစ်သည်။

ပထမဆုံးမြင့်တင်ရန်မှာ မဟာတာအိုအန္တိမစွမ့းရည်ဖြစ်သည်။

ကုအန်သည် မဟာတာအိုအန္တိမစွမ်းရည်ကို တာအို မဟာလွတ်လပ်ခြင်းဆန္ဒကျမ်း အဖြစ်သို့ မြှင့်တင်ရန် သက်တမ်း နှစ်ပေါင်း သုံးသန်းကျော် သုံးစွဲခဲ့သည်။

ထို့နောက် နာရီဝက်ကြာ အမွေအနှစ် လက်ခံခြင်း အဆင့် ရောက်လာပြီး ထိုအချိန်တွင် သက်တမ်း အတားအဆီးသည် အသံမဲ့အပျက်အဆီးနယ်မြေကို ဖရိုဖရဲ ဖြစ်စေခဲ့ပြီး အချို့သော မျိုးနွယ်စုများပင် ထွက်ပြေးခဲ့ကြသည်။

ကျင့်ကြံမှု နည်းစနစ်များကို အမွေဆက်ခံပြီးနောက် ကုအန်သည် သူ၏ သက်တမ်း ဆင့်ကဲပြောင်းလဲမှုကို ဆက်လက် ပြုလုပ်ခဲ့သည်။

မဟာနှလုံးသားတစ်ထောင်စွမ်းရည် သည် မဟာဆန္ဒတစ်ထောင်လေဟာနယ်စွမ်းရည် ကျွမ်းကျင်မှု မှ အဆင့်တက်လာပြီး သက်တမ်း နှစ်ပေါင်း သုံးသန်း နီးပါး ကုန်ကျခဲ့သည်။

ရွှမ်ဟွမ်ထာဝရတာအိုခြေလှမ်း သည် ထာဝရတိုင်းတာခြင်းကောင်းကင် တာအို ခြေလှမ်း မှ အဆင့်တက်လာပြီး သက်တမ်း နှစ်ပေါင်း ၃၅ ကုန်ခဲ့သည်။

ကောင်းကင်ခရမ်းရောင်သူတော်စင်တာအိုကိုယ်ခန္ဓာသည် သဏ္ဍာန်မဲ့ပုံရိပ်ယောင်ကိုယ်ခန္ဓာ မှ အဆင့်တက်လာပြီး သက်တမ်း နှစ်ပေါင်း ၄ သန်းကုန်ကျခဲ့သည်။

အချိန်သည် လျင်မြန်စွာ ကုန်ဆုံးသွားသည်။

အသံမဲ့အပျက်အဆီးနယ်မြေမှ ပုံမှန်မဟုတ်မှုများသည် မဟာကောင်းကင်စိတ်ဝိညာဉ်နယ်မြေကို သက်ရောက်နေပြီ ဖြစ်သည်။

အမတမင်းဆက် နှင့် မြင့်မြတ်ခုံရုံး နှစ်ခုစလုံးသည် ခုခံကာကွယ်ရန် မဟာ ကျင့်ကြံသူကြီး များကို စေလွှတ်ခဲ့ကြသည်။ မဟာကောင်းကင်စိတ်ဝိညာဉ်နယ်မြေ အတွင်းမှ ကောင်းကင်မိစ္ဆာများသည် လုံးဝ ပျောက်ကွယ်သွားခြင်း မရှိသေးဘဲ ယခု အပြင်ဘက်မှ ကြောက်မက်ဖွယ် လှုပ်ခတ်မှုများ ထပ်မံ ရောက်ရှိလာရာ နှစ်ဖက်စလုံးမှ ကျင့်ကြံသူများကို တပ်လှန့်လိုက်သကဲ့သို့ ဖြစ်စေသည်။

သို့သော် ဆရာသခင်ဓားအရှင် ရှိနေခြင်းကြောင့်၊ သူတို့ လုံးဝ မျှော်လင့်ချက်မဲ့နေသည်တော့ မဟုတ်ပေ။

"ဘာဖြစ်နေတာလဲ။ ကောင်းကင်မိစ္ဆာတွေထက် ပို ကြောက်စရာကောင်းတဲ့ သတ္တဝါ ရှိနေသေးလို့လား။"

"မသေချာဘူး၊ မနေ့က အသံနဲ့ ပတ်သက်နေမလားပဲ။"

"မကြောက်ကြနဲ့။ ကြောက်စရာကောင်းတဲ့ အရှိန်အဝါတွေ အများကြီး ရှိနေပေမယ့် သေချာ ခံစားကြည့် သူတို့ မဟာကောင်းကင်စိတ်ဝိညာဉ်နယ်မြေနားကို မကပ်ရဲကြဘူး။"

"ဟုတ်တယ်၊ ဆရာသခင်ဓားအရှင်က အမတလမ်းစဉ်၏ ကိုးထပ် ကို ကျော်လွန်တဲ့ ပုဂ္ဂိုလ်ကြီးပဲ။ မင်းတို့ အရင်က အသံမဲ့အပျက်အဆီးနယ်မြေမှာ ဒီလို ပုဂ္ဂိုလ်မျိုး ရှိတယ်လို့ ကြားဖူးလို့လား။"

မြင့်မြတ်ခုံရုံးမှ မတ်ကြီးများနှင့် အမတမင်းဆက်မှ နတ်ဘုရား ဝိညာဉ်များ သည် အချင်းချင်း ဆွေးနွေးနေကြသည်။ ဆရာသခင်ဓားအရှင်အကြောင်း ပြောမိသောအခါ သူတို့ စိတ်လှုပ်ရှားလာကြ၏။ အထူးသဖြင့် သူ့ကို အပြင်ဘက်မှ အစွမ်းထက် ပုဂ္ဂိုလ်များနှင့် နှိုင်းယှဉ်မိသောအခါ ဂုဏ်ယူမှုများဖြင့် ပြည့်နှက်သွားသည်။

သူတို့၏ ခန့်မှန်းချက်များ မမှားပေ။ အသံမဲ့အပျက်အဆီးနယ်မြေမှ ထို ကြောက်မက်ဖွယ် အရှိန်အဝါများသည် အမှန်တကယ်ပင် မဟာကောင်းကင်စိတ်ဝိညာဉ်နယ်မြေ အနီးသို့ မကပ်ရဲကြပေ။

ကြီးမြတ်သော စွမ်းအားရှင် အများအပြားသည် ကုအန်နှင့် သတ်ဖြတ်ခြင်းနတ်ဘုရားဧကရာဇ် တို့၏ တိုက်ပွဲကို တိတ်တဆိတ် ကြည့်ရှုခဲ့ကြသည်။ ကုအန်က သတ်ဖြတ်ခြင်းနတ်ဘုရားဧကရာဇ်ကို တစ်ကွက်တည်းဖြင့် ချေမှုန်းလိုက်သောအခါ သူတို့သည် အလွန် လျင်မြန်စွာ ဆုတ်ခွာသွားကြပြီး ယနေ့တိုင် သူတို့၏ စိတ်ခံစားမှုများကို မတည်ငြိမ်သေးပေ။

မဟာကောင်းကင်စိတ်ဝိညာဉ်နယ်မြေမှ မဟာ ကျင့်ကြံသူကြီးများ နှင့် မဟာ နတ်ဆိုး များ ပိုမို များပြားစွာ ပျံထွက်လာပြီး၊ ကောင်းကင်ဘုံ တာအိုအလင်းလွှာ အထက်တွင် စုရုံးကာ တိုက်ပွဲအတွက် အသင့်ပြင်ထားကြသည်။ သူတို့ အပြင်ဘက်မှ ပုံမှန်မဟုတ်မှုများကို ဆွေးနွေးနေကြရင်း၊ ဆရာသခင်ဓားအရှင်အကြောင်းကို မလွဲမသွေ ထည့်သွင်း ပြောဆိုမိကြသည်။

အချို့က ဆရာသခင်ဓားအရှင်သည် လောကကြီး၏သခင်ဖြစ်လာသင့်သည်ဟုပင် အဆိုပြုကြပြီး သို့မှသာ မြင့်မြတ်ခုံရုံးနှင့် အမတမင်းဆက်တို့ ဆက်လက် ယှဉ်ပြိုင်ရန် မလိုအပ်တော့မည်မဟုတ်ချေ။ လူအများအပြားက ဤ အကြံပြုချက်ကို သဘောတူကြသည်။

ဆွေးနွေးပြောဆိုခြင်း ခံနေရသူ ကုအန်ကတော့ ကောင်းကင်ခရမ်းရောင်သူတော်စင်တာအိုကိုယ်ခန္ဓာ၏ အမွေအနှစ် မှတ်ဉာဏ်ကို လက်ခံပြီးခါစ ရှိသည်။ ဤသည်မှာ ခန္ဓာကိုယ်သန့်စင်ခြင်းကျင့်ကြံမှုနည်းစနစ် ဖြစ်ပြီးခန္ဓာကိုယ် မဟုတ်ပေ။ ၎င်းသည် အခြားသူများ၏ တွက်ချက်ခြင်းကို တားဆီးနိုင်သည့်နတ်အစွမ်းအား တစ်ခုကိုလည်း နိုးထခဲ့သည်။

ကုအန်သည် အသစ် နားလည်လိုက်သော နတ်အစွမ်းအားကို လောလောဆယ် အာရုံမစိုက်သေးပေ။ သူသည် သူ၏ အရည်အချင်း ဇယားကွက်ကို ကြည့်လိုက်ရာ သူ့မှာ သက်တမ်း နှစ်ပေါင်း ၄.၁ ကျန်နေသေးသည်ကို တွေ့လိုက်ရသည်။

သက်တမ်းအတားအဆီး၏ သက်တမ်း သုံးစွဲမှုသည်လည်း လျစ်လျူမရှုသင့်သော အရေအတွက်ကြီး ဖြစ်သည်။ ကုအန်သည် တစ်ခဏမျှ တွေဝေသွားပြီး ကျင့်ကြံမှု အဆင့်ကို တိုက်ရိုက် ရင်းနှီးမြှုပ်နှံရန် ဆုံးဖြတ်လိုက်သည်။

အဆင့်တက်မှု မအောင်မြင်ခြင်းကို ရှောင်ရှားရန် စည်းမျဉ်းဟောင်းအတိုင်းတစ်ကြိမ်လျှင် နှစ်သန်း ၁၀၀ စီပင်။

[သင်သည် ချီစုပ်ယူ​ငြ်းကို နှစ် သန်းနှစ်ဆယ်ကြာကျင့်ကြံခဲ့သည်။ သင်သည် မဟာတာအိုလွတ်လပ်ခြင်းနှင့်ဆန္ဒကျမ်းစာဖြင့် သင်၏ ကြီးမြတ်သော အောင်မြင်မှုဖြင့် ကောင်းကင်တက်လှမ်းခြင်းနှောင်ဖွဲ့ကင်းအမတ နယ်ပယ်ကို အင်အားသုံး တိုက်ခိုက်ပြီး ကပ်ဘေးဖြတ်ကျော်ခြင်း စတင်ခဲ့သည်။ သင်သည် ချန်ရွှမ်မဟာတာအို ပြန်လည်မွေးဖွားခြင်းကပ်ဘေး ကို မကျော်လွှားနိုင်ခဲ့ပေ။ ဖြတ်ကျော်ခြင်း ကျရှုံးခဲ့သည်။]

[သင်သည် ချီစုပ်ယူခြင်းကျင့်ကြံမှုကို နှစ်ပေါင်းသန်း ၂၀ ကျင့်ကြံခဲ့သည်။ သင်သည် တာအို မဟာလွတ်လပ်ခြင်းနှင့်ဆန္ဒကျမ်းဖြင့် ကောင်းကင်တက်လှမ်းခြင်းနှောင်ဖွဲ့ကင်းအမတနယ်ပယ် အတင်းအကျပ် အဆင့်တက်ရန် ကြိုးစားခဲ့သည်။ သင်သည် ကပ်ဘေး ဖြတ်ကျော်ခြင်းကို စတင်ခဲ့သော်လည်း ချန်းရွှမ်း မဟာ တာအို ဝင်စားခြင်း ကပ်ဘေးကို မခံနိုင်ဘဲ ဖြတ်ကျော်မှု ကျရှုံးခဲ့သည်။]

.

ကပ်ဘေး ဖြတ်ကျော်ခြင်း တစ်ကြိမ်အတွက် နှစ်ပေါင်း သန်းနှစ်ဆယ်။

ဒုက္ခပါပဲ။

ကုအန် တုန်လှုပ်သွားသည်။ အရင်တစ်ခေါက် သူ အဆင့်တက်တုန်းကကပ်ဘေး ဖြတ်ကျော်ခြင်း တစ်ကြိမ်လျှင် နှစ် ၅သန်း မျှသာ ဖြစ်သည်။

ကောင်းကင်တက်လှမ်းခြင်းနှောင်ဖွဲ့ကင်းအမတ က ဒီလောက်တောင် ကြောက်စရာ ကောင်းတာလား။

၎င်းသည် ကုအန်က သူ၏ ခန္ဓာကိုယ်နှင့် ကျင့်ကြံမှု နည်းစနစ်များကို မြှင့်တင်ပြီးသား အခြေအနေတွင် ဖြစ်သည်။

ကံကောင်းစွာဖြင့် သူ သက်တမ်း နှစ်ပေါင်း ၄.၁ ဘီလီယံ ချန်ထားခဲ့၏သို့မဟုတ်လျှင် သူ အောင်မြင်စွာ အဆင့်တက်နိုင်မည်ဟု အမှန်တကယ် ယုံကြည်မှု ရှိမည် မဟုတ်ပေ။

အခန်း ၄၉၄ ကောင်းကင်တက်လှမ်းခြင်းနှောင်ဖွဲ့ကင်းးအမတ နယ်ပယ် နောက်ပိုင်းအဆင့်သို့ ကျော်ဖြတ်ခြင်း

နှစ် သန်းနှစ်ဆယ်လျှင် တစ်ကြိမ် ကပ်ဘေးကျော်ဖြတ်ခြင်းဆိုသည်မှာ ကုအန်၏ သက်တမ်း နှစ် သန်းတစ်ရာ ရင်းနှီးမြှုပ်နှံမှုသည် ရလဒ်အနေဖြင့်

ကပ်ဘေးကျော်ဖြတ်ခြင်း ငါးကြိမ်သာ ထွက်ပေါ်မည်ဟု ဆိုလိုသည်။

မဆိုင်းမတွပင် သူသည် ကျရှုံးမှုများဖြင့် အဆုံးသတ်ခဲ့သည်။ သူ့တွင် သက်တမ်း နှစ် သန်း ၄ ဘီလီယံ ကျန်သေးသည်။ အများဆုံးအားဖြင့် ကပ်ဘေးသင့်ခြင်း အကြိမ် နှစ်ရာအတွက် လုံလောက်မည် မဟုတ်လော။

ဤတစ်ကြိမ်တွင် သူသည် မတော်တဆ ဖြစ်နိုင်ချေကို တားဆီးရန် သက်တမ်းအတားအဆီးအတွက် အနည်းဆုံး သက်တမ်း နှစ် သန်းငါးရာ သီးသန့် ချန်ထားရမည်ဖြစ်သည်။

ကုအန်သည် အသက်ပြင်းပြင်းရှူလိုက်ပြီး သက်တမ်းကို ဆက်လက် ရင်းနှီးမြှုပ်နှံလိုက်သည်။တစ်ကြိမ်လျှင် နှစ် သန်းတစ်ရာနှုန်းပင် ဖြစ်သည်။

သူ၏ အထက်တွင် မဟာတာအို၏ချီ သည် မြူခိုးများကဲ့သို့ တရိပ်ရိပ် တက်လာသည်။ ကောင်းကင်ကြီးသည် လှုပ်ခတ်နေသကဲ့သို့ ဖိအားပေးနိုင်သော်လည်း ခမ်းနားထည်ဝါလှသည်။ ဧရာမ ပုံရိပ်ကြီးများက အချိန်မရွေး ပေါ်လာလိုက် ပျောက်သွားလိုက် ဖြစ်နေသည်။

ကုအန်သည် မော့မကြည့်ဘဲ သက်တမ်း ရင်းနှီးမြှုပ်နှံခြင်းကိုသာ အာရုံစိုက်ထားသည်။

သန်းတစ်ရာပြီး တစ်ရာ

မကြာမီ သက်တမ်း နှစ် သန်းတစ်ထောင် ကုန်ဆုံးသွားပြီး ကုအန်၏ မျက်နှာအမူအရာမှာ မှုန်ကုတ်နေလေ၏။

ဆက်လုပ်မယ်။

ဆက်လက်၍ နှစ် သန်းတစ်ရာစီ တိုး၍ ဆက်လက် ရင်းနှီးမြှုပ်နှံခဲ့သည်။ ကုအန်၏ စိတ်အခြေအနေသည် အတော်လေး တည်ငြိမ်ပေသည်။

အကယ်၍ သူသည် အောင်မြင်စွာ ကျော်ဖြတ်နိုင်မည်ဆိုလျှင်ဖြင့် သက်တမ်း နှစ်တစ်ရာသာ ကျန်တော့မည်ဆိုတောင် ဘာမူစရာရှိမည်နည်း။

သူသည် သက်တမ်းကို လျင်မြန်စွာ ပြန်လည် စုဆောင်းနိုင်သည်။ နောက်ဆုံးတွင် နောက်ထပ် သက်တမ်း နှစ် ၂ ဘီလီယံ ကုန်ဆုံးသွားခဲ့ရပြန်သည်။

ကုအန်သည် သူ၏ ကျန်ရှိသော သက်တမ်း နှစ် ၂.၁ ဘီလီယံကို ကြည့်ရင်း အနည်းငယ် နှမြောသလို ခံစားလိုက်ရသည်။

ချန်ရွှမ်မဟာတာအို ပြန်လည်မွေးဖွားခြင်းကပ်ဘေးဆိုသည်မှာ ကျရှုံးပြီးနောက် နှစ် သန်းနှစ်ဆယ်ကြာ ပြန်လည်မွေးဖွားခြင်းပေလော။

ကုအန်သည် သက်တမ်း နှစ် သန်းတစ်ရာကို ဆက်လက် ရင်းနှီးမြှုပ်နှံရင်း စိတ်ကူးထဲတွင် လွင့်မျောနေသည်။

သန်းတစ်ရာ ပြီး ...တစ်ရာ..

ကုအန်၏ သက်တမ်းသည် လျင်မြန်စွာဖြင့် နှစ် ၁.၁ ဘီလီယံသို့ ရောက်ရှိသွားသည်။ သူသက်တမ်း နှစ် သန်းငါးရာသို့ ရောက်ရှိလာသည့်တိုင်အောင် အောင်မြင်စွာ မကျော်ဖြတ်နိုင်သေးပါက သူသည် ကျော်ဖြတ်ခြင်းကို လက်လျှော့မည်ဟု ဆုံးဖြတ်လိုက်သည်။

ထိုအတွေးဖြင့် သူ နောက်ထပ် သန်းတစ်ရာ ရင်းနှီးမြှုပ်နှံလိုက်သည်။ ထိုစဉ် သတိပေးချက်မှာ ပြောင်းလဲသွားသည်။

[သင်သည် နှစ် သန်း ၆၀ ဆယ်ကြာ ချီကျင့်ကြံခဲ့သည်။ သင်သည် မဟာတာအို မဟာလွတ်လပ်ခြင်းနှင့်ဆန္ဒကျမ်းစာဖြင့် ကောင်းကင်တက်လှမ်းခြင်းနှောင်ဖွဲ့ကင်းအမတ နယ်ပယ်သို့ တက်လှမ်းခဲ့သည်။ သင်သည် ကပ်ဘေးကို စတင်ခဲ့ပြီး ချန်ရွှမ်မဟာ တာအိုပြန်လည်မွေးဖွားခြင်း ကပ်ဘေးကို ခံနိုင်ရည်ရှိခဲ့ကာ အောင်မြင်စွာ ကျော်ဖြတ်ခဲ့သည်။ သင်၏ ကျင့်ကြံမှုအဆင့်သည် ကောင်းကင်တက်လှမ်းခြင်းနှောင်ဖွဲ့ကင်းအမတ အစောပိုင်းအဆင့် သို့ ကျော်ဖြတ်သွားသည်]

[သင်သည် နှစ် သန်းတစ်ရာကြာ ချီကျင့်ကြံခဲ့သည်။ သင်၏ ကျင့်ကြံမှုအဆင့် တိုးတက်လာပါသည်]

သူ့တွင် သက်တမ်း နှစ် ၁ ဘီလီယံ ကျန်ရှိသေးသဖြင့် ဆက်ပြီး မြှင့်တင်ခဲ့သည်။ကုအန်သည် နောက်ထပ် သက်တမ်း နှစ် သန်းနှစ်ရာကို ရင်းနှီးမြှုပ်နှံလိုက်ပြီး၊ သူ၏ ကျင့်ကြံမှုအဆင့်သည် နောက်ဆုံးတွင် ကောင်းကင်တက်လှမ်းခြင်းနှောင်ဖွဲ့ကင်းအမတ အလယ်လတ်ပိုင်းအဆင့် သို့ တိုးတက်သွားခဲ့သည်။

ထိုစဉ် သူသည် ရုတ်တရက် မကောင်းသော နိမိတ်တစ်ခုကို ခံစားလိုက်ရသည်။ ဤတစ်ကြိမ်တွင် သူသည် ပြီးပြည့်စုံခြင်းနယ်ပယ် သို့ မရောက်ရှိနိုင်မည်ကို စိုးရိမ်မိသည်။

ထားပါတော့လေ.. နောက်ပိုင်းအဆင့် ကို ရောက်ရင်လည်း ကောင်းတာပါပဲ... အလယ်လတ်ပိုင်းအဆင့်က သိပ်မကောင်းသေးဘူး...

နောက်ဆုံးတွင် ကုအန်သည် နောက်ထပ် သက်တမ်း နှစ်သန်းသုံးရာကို ရင်းနှီးမြှုပ်နှံခဲ့ရာ ၊ ကောင်းကင်တက်လှမ်းခြင်းနှောင်ဖွဲ့ကင်းအမတ နောက်ပိုင်းအဆင့်သို့ အောင်မြင်စွာ ရောက်ရှိသွားခဲ့သည်။

သူ့တွင် သက်တမ်း နှစ်သန်း ၄၈၀ ကျန်ရှိနေသေးပြီး၊ သက်တမ်းအတားအဆီးသည် မဟာတာအို၏ချီကို စတင် ဆွဲထုတ်နေပြီ ဖြစ်သည်။ ဤတစ်ကြိမ် လှုပ်ရှားမှုသည် ယခင် အကြိမ်များထက် သေချာပေါက် သာလွန်ပေလိမ့်မည်။

ကုအန်သည် ကောင်းကင်ဝိညာဉ်နတ်ဘုရား ကို မနှိုးဆော်မိရန်သာ မျှော်လင့်နေမိသည်။

သူသည် လက်ရှိတွင် ကောင်းကင်ဝိညာဉ်နတ်ဘုရားနှင့် ထိပ်တိုက် မတွေ့ချင်သေးပေ။ သတ်ဖြတ်ခြင်းနတ်ဘုရားဧကရာဇ်၏ ခန္ဓာကိုယ်အစစ်သည် ကောင်းကင်ဝိညာဉ်နတ်ဘုရားထက် ပိုမို အားကောင်းမည် မဟုတ်ဟု သူ ခံစားရသည်။ သို့မဟုတ်ပါက သတ်ဖြတ်ခြင်းနတ်ဘုရားဧကရာဇ်က၏ ခန္ဓာကိုယ်အစစ်သည် သူ့ကို ဒုက္ခပေးရန် အစောကတည်းက ရောက်ချလာနိုင်သည်။

လုံးဝ သေချာမှု မရှိဘဲ ကုအန်သည် ကောင်းကင်ဝိညာဉ်နတ်ဘုရားနှင့် တိုက်ရိုက် ထိပ်တိုက်တွေ့မည် မဟုတ်ပေ။ မဟာကောင်းကင်စိတ်ဝိညာဉ်နယ်မြေ တည်ရှိရာ စကြဝဠာသည် လှောင်အိမ်တစ်ခု ဖြစ်နေခဲ့လျှင်ပင် ၊ သူသည် သက်တမ်းကို အဆက်မပြတ် သိမ်းပိုက်နိုင်သရွေ့၊ မဟာကောင်းကင် စိတ်ဝိညာဉ်နယ်မြေတွင် နေထိုင်ရမည်ဆိုတောင် ပျင်းရိငြီးငွေ့မည် မဟုတ်။

ကုအန်သည် သက်တမ်းအတားအဆီးကို ကြည့်လိုက်ပြီး၊ သက်တမ်း စားသုံးမှုနှုန်းသည် သူ၏ အသက်ကို ခြိမ်းခြောက်နိုင်မည် မဟုတ်ကြောင်း သေချာသွားပြီးနောက်၊ သူသည် စိတ်သက်သာရာရသွားပြီး သူ၏ ကိုယ်ပိုင် ကံကောင်းခြင်း ကို ဂရုတစိုက် စတင် ခံစားလိုက်သည်။

မူလဘူတ မှ ကောင်းကင်တက်လှမ်းခြင်း သို့တက်လှမ်းခြင်းတွင် ထူးခြားသော တစ်စုံတစ်ခု ရှိရမည်မှာ သေချာသည်။ ကုအန်သည် လေကောင်းကင်တက်လှမ်းခြင်းနှောင်ဖွဲ့ကင်းအမတကို စတင် တက်လှမ်းသည်သည်နှင့်အမျှ မဟာတာအို၏ချီသည် စကြဝဠာ၏ အရပ်မျက်နှာ အားလုံးမှ ဆွဲငင်ခံရပြီး ၎င်း၏ ရင်းမြစ်ကို ခြေရာခံ၍ မရနိုင်ပေ။

မဟာကောင်းကင် စိတ်ဝိညာဉ်နယ်မြေ ပတ်ဝန်းကျင်ရှိ ဟင်းလင်းပြင်နယ်မြေတွင် မဟာတာအိုလေပြင်းများ တိုးဝှေ့လာပြီး အဆက်မပြတ် ကြောက်မက်ဖွယ်ရာ ဟိန်းဟောက်နေကာ ကောင်းကင်တာအို အလင်းလွှာပေါ်ရှိ အစွမ်းထက်သော ရှင်သန်မှုများကို အလွန်အမင်း တင်းမာစေသည်။

စကြဝဠာရှိ လှုပ်ရှားမှုသည် ပိုမို ကြီးမားလာသည်။ သတ်ဖြတ်ခြင်းနတ်ဘုရားဧကရာဇ် ကဲ့သို့သော ကြောက်မက်ဖွယ်ရာ ဖိအားမျိုး မရှိသော်လည်း၊ စကြဝဠာ၏ စည်းမျဉ်းများနှင့် ချီတို့၏ ပုံမှန်မဟုတ်မှုများသည် လူများကို ပို၍ပင် မငြိမ်မသက် ဖြစ်စေပြီး စကြဝဠာကြီး ပြိုလဲတော့မည်လားဟု သူတို့ကို တွေးတောစေသည်။

အချို့က ဆရာသခင်ဓားအရှင် နှင့် ထိုလျှို့ဝှက်ဆန်းကြယ်သော ရှင်သန်မှုတို့သည် အလွန် အစွမ်းထက်လွန်းသဖြင့် စကြဝဠာက မခံနိုင်တော့ခြင်း ဖြစ်သည်ဟု ထင်ကြေးပေးကြသည်။

သို့သော် မည်သူမျှ ဆရာသခင်ဓားအရှင်ကို အပြစ်တင် မဝံ့ရဲပေ။ သူသာ မရှိခဲ့လျှင် ထို လျှို့ဝှက်ဆန်းကြယ်သော ရှင်သန်မှုသည် မဟာကောင်းကင် စိတ်ဝိညာဉ်နယ်မြေကို ချေမှုန်းပစ်နိုင်သည်။

အချိန်သည် တရွေ့ရွေ့ ကုန်ဆုံးလာသည်။ သက်ရှိအားလုံး မငြိမ်မသက် ဖြစ်နေကြစဉ် ကုအန်သည် သူ၏ ကိုယ်ပိုင် ကံကောင်းခြင်းထဲတွင် နစ်မြုပ်နေခဲ့သည်။

ကမ္ဘာလောကအတွင်း၌၊ သာမန် သေမျိုးများသည် ကောင်းကင်ဘုံအပြင်ဘက်မှ လှုပ်ရှားမှုများကို မခံစားနိုင်ကြပေ။ကောင်းကင်မိစ္ဆာများ ဆုတ်ခွာသွားသည်နှင့်အမျှ၊ ကမ္ဘာပေါ်ရှိ နေရာအသီးသီးသည် ဘဝသစ်နှင့် ပျော်ရွှင်မှုများကို ကြိုဆိုနေကြသည်။ ကပ်ဘေးကြီးမှ လွတ်မြောက်လာသော သေမျိုးများသည် ဆရာသခင်ဓားအရှင်ကို ကျေးဇူးတင်နေကြပြီး၊ အချို့မှာ အထိမ်းအမှတ် ကျောက်တိုင်များ စိုက်ထူရန်ပင် ပြင်ဆင်နေကြပြီ ဖြစ်သည်။

တတိယဆေးတောင်ကြား အတွင်း။

ကျွယ်လော့ဓားသခင်သည် ချောက်ကမ်းပါးတစ်ခုပေါ်တွင် တရားထိုင်နေရင်း၊ ကောင်းကင်ကို ငေးကြည့်ကာ မျက်မှောင်ကြုတ်သွားသည်။

ဤနေရာသည် ဓားတစ်သောင်းတောင် နှင့် အလွန် နီးကပ်သည်။ သူသည် ဤနေရာတွင် တာအိုကို နားလည် သဘောပေါက်ရန် ရည်ရွယ်ခဲ့သော်လည်း၊ ကောင်းကင်ဘုံအပြင်ဘက်မှ မကြာခဏ ဖြစ်ပေါ်လာသော လှုပ်ရှားမှုများက သူ၏ စိတ်ကို မငြိမ်မသက်ဖြစ်စေသည်။

"နောက် ဘာဖြစ်လာဦးမလဲ"

ကျွယ်လော့ဓားသခင်သည် စိတ်ရှုပ်ထွေးစွာဖြင့် တွေးတောနေမိသည်။ သတ်ဖြတ်ခြင်းနတ်ဘုရားဧကရာဇ်ကဲ့သို့သော ရှင်သန်မှုမျိုး ပျက်စီးသွားခဲ့သောကြောင့် အရာအားလုံးသည် ခဏတာ ငြိမ်သက်သွားမည်ဟု ထင်ထားခဲ့သော်လည်း၊ မကြာမီအတွင်းမှာပင် အပြောင်းအလဲသစ်တစ်ခု ဖြစ်ပေါ်လာလိမ့်မည်ဟု သူ မမျှော်လင့်ထားခဲ့ပေ။

မဟာကောင်းကင် စိတ်ဝိညာဉ်နယ်မြေသည် ဘေးဒုက္ခများဖြင့် အမှန်တကယ် ဒုက္ခရောက်နေသည်ဟု တွေးမိရင်း သက်ပြင်းချမိသည်။ နောက်တစ်မျိုး တွေးကြည့်လျှင်ဖြင့်၊ ထိုအရာမှာ ပုံမှန်ပင် ဖြစ်သည်ဟု ခံစားမိသည်။

ဘာပဲဖြစ်ဖြစ် ဤသည်မှာ မဟာကောင်းကင် စိတ်ဝိညာဉ်နယ်မြေရှိ စကြဝဠာ၏ ဗဟိုချက် ဖြစ်သည်။ ၎င်းသည် အသန်မာဆုံး မဟာကမ္ဘာကြီး မဟုတ်လျှင်ပင် ၎င်း၏ အတိတ်က ၎င်းကို ထူးခြားစေရန် ကံကြမ္မာ ဖန်တီးခဲ့ပြီး ဖြစ်သည်။

မနေ့က တိုက်ပွဲကြီး ပြီးဆုံးသွားပြီးနောက်၊ လူများစွာသည် တတိယဆေးတောင်ကြားသို့ ရောက်ရှိလာကြသည်။ အားလုံးက ဆရာသခင်ဓားအရှင်ကို လာရောက် တွေ့ဆုံလိုကြသည်။

လုပိုင်ထျန်းသည် ကုအန် အနှောင့်အယှက် မဖြစ်စေရန် 'လု' မိသားစုနှင့် 'ကျိ' မိသားစု၏ ကျင့်ကြံသူများကို ဆေးတောင်ကြား ပတ်ဝန်းကျင်တွင် အထူးတလည် စောင့်ကြပ်ခိုင်းထားသည်။

ရဲလန်နှင့် ကျန်ချင်း တို့သည် ပြန်လည် လာရောက် လည်ပတ်သည့်အခါတွင် တားဆီးခံခဲ့ရသည်။

"ဆရာသခင်ဓားအရှင်က ငါ့ ဆရာသခင်ပဲ၊ နင်တို့ ငါ့ကို တားရဲလား"

ကျန်ချင်းသည် ဒေါသသံဖြင့် ပြောဆိုလိုက်သည်။

သူမကို တားဆီးသော သက်လတ်ပိုင်း ကျင့်ကြံသူ၏ မျက်နှာအမူအရာသည် ချက်ချင်း ပြောင်းလဲသွားပြီး လေးနက်သော အသံဖြင့် ပြန်ပြောလိုက်သည်။

"ရူးနပ်တဲ့ စကားတွေ မပြောစမ်းနဲ့"

ထိုသို့ပြောပြီး သူသည် တစ်စုံတစ်ခုကို သတိထားနေပုံဖြင့် ပတ်ဝန်းကျင်ကို တစ်ချက် ကြည့်လိုက်သည်။

ထိုအချိန်တွင် တင်းကျပ်သော အနက်ရောင် အဝတ်အစားနှင့် မျက်နှာဖုံး ဝတ်ဆင်ထားသော ပုံရိပ်တစ်ခုသည် လေထဲမှ ထွက်ပေါ်လာသည်။ ထိုသူကို မြင်သောအခါတွင် သက်လတ်ပိုင်း ကျင့်ကြံသူ၏ အမူအရာသည် ပို၍ပင် မသက်မသာ ဖြစ်သွားသည်။

ချက်ချင်းဆိုသလိုပင် သက်လတ်ပိုင်း ကျင့်ကြံသူသည် တစ်စုံတစ်ခုကို ကြားလိုက်ရပုံရပြီး သူသည် ချက်ချင်းပင် ရဲလန်တို့ကို ဦးညွှတ်ကာ ပြန်ပြောလိုက်သည်။

"တောင်းပန်ပါတယ်၊ ကျွန်တော် မျက်စိကန်းသွားလို့ပါ..ကျွန်တော်လည်း အမိန့်အတိုင်း ဆောင်ရွက်နေတာပါ..ကျေးဇူးပြုပြီး ကြွပါ ခင်ဗျာ"

ကျန်ချင်းသည် အနက်ရောင် ဝတ်စုံ ဝတ်ထားသော ပုံရိပ်ကို စိုက်ကြည့်လိုက်၏။ ထို့နောက် ရဲလန်ကို ဆွဲခေါ်ကာ တတိယဆေးတောင်ကြားထဲသို့ ဝင်ရောက်သွားခဲ့သည်။

အနက်ရောင် ဝတ်စုံ ဝတ်ထားသော ထိုအနှီပုံရိပ်သည်လည်း နေရာမှ ပျောက်ကွယ်သွားသည်။ ပတ်ဝန်းကျင်မှ လုမိသားစု ကျင့်ကြံသူများသည် မနေနိုင်ဘဲ စုရုံးလာကြ၏။ ထိုအမျိုးသမီး နှစ်ဦးသည် အမှန်တကယ် ဆရာသခင်ဓားအရှင်၏ တပည့်များ ဟုတ်၊ မဟုတ်ကို စူးစမ်းလိုစိတ်ဖြင့် သက်လတ်ပိုင်း ကျင့်ကြံသူကို မေးမြန်းနေကြသည်။

သက်လတ်ပိုင်း ကျင့်ကြံသူသည် အသက်ပြင်းပြင်း ရှူလိုက်ပြီး ဖြည်းညှင်းစွာ ခေါင်းညိတ်လိုက်သည်။ ထိုမှသာလျှင်၊ အခြားသူများသည် ရဲလန်တို့ ထွက်ခွာသွားသည့် ပုံရိပ်ကို လှည့်ကြည့်ရင်း သူမတို့၏မျက်နှာများကို သူတို့၏ စိတ်ထဲတွင် မှတ်သားထားလိုက်ကြသည်။

သို့မှသာ နောင်တွင် ပြန်လည် တွေ့ဆုံသည့်အခါ မရိုမသေ မဖြစ်ကြတော့မည် ဖြစ်သည်။

ဆေးတောင်ကြားထဲသို့ ဝင်ရောက်ပြီးနောက်၊ ရဲလန်သည် တတိယဆေးတောင်ကြားတွင် သူမ နောက်ဆုံးအကြိမ် လာရောက်ခဲ့စဉ်ကထက် လူ ပိုများနေသည်ကို တွေ့ရှိခဲ့ရသည်။ ၎င်းတို့အနက် လူတော်တော်များများသည် ကျင့်ကြံမှုအဆင့် နက်ရှိုင်းသည်ကို ခံစားမိလိုက်သည်။

" ဆရာ‌ဒေါ်‌လေး ၊ စီနီယာ အစ်မ ရောက်လာကြပြီလား"

အန်ရှင်းသည် လျင်မြန်စွာ လျှောက်လှမ်းလာပြီး၊ သူတို့ကို နွေးထွေးစွာ နှုတ်ဆက်လိုက်သည်။

အန်ရှင်းကို မြင်သောအခါ၊ သူမတို့သည်လည်း ပြန်လည် ပြုံးပြကာ နှုတ်ဆက်လိုက်သည်။ မိန်းကလေးများ တွေ့ဆုံကြသည်နှင့် တစ်ပြိုင်နက် မရပ်မနား စကားများ ပြောကြတော့သည်။

ခဏအကြာတွင်၊ ရဲလန်သည် မေးလိုက်သည်။

"စီနီယာအစ်ကိုကြီး မရှိဘူးလား"

အန်ရှင်းသည် ခေါင်းညိတ်လိုက်သည်။

"သူ ဒီနေ့ မနက်စောစောကတည်းက အပြင်ထွက်သွားတာ ဒါပေမဲ့ သူ အပြင်ထွက်သွားတိုင်း အမြန် ပြန်လာလေ့ရှိတယ်..ကျွန်မ ရှင်တို့ကို အရင် နေရာချထားပေးရမလား"

ရဲလန်အနေဖြင့် ကန့်ကွက်စရာ မရှိပေ။ ကုအန်သည် ဆရာသခင်ဓားအရှင် ဖြစ်ကြောင်း သိရှိပြီးနောက်၊ သူမအနေဖြင့် ကုအန်သည် အချိန်အကြာကြီး အဝေးသို့ ရောက်နေမည်ကို ပို၍ပင် စိတ်မပူတော့ပေ။

အမျိုးသမီး သုံးဦးသည် ခန်းဆောင်ဆီသို့ လျှောက်လှမ်းသွားကြသည်။ ရဲလန်က ရုတ်တရက် မေးလိုက်သည်။

"အန်ရှင်း၊ မင်း ဆရာသခင်က ဘယ်သူလဲဆိုတာကို အစောကြီးကတည်းက သိနေခဲ့တာလား"

ကျန်ချင်းသည်လည်း အန်ရှင်းကို ကြည့်လိုက်သည်။အန်ရှင်းသည် ခါးသီးစွာ ပြုံးလိုက်ရင်း။

"ဘယ်လိုလုပ် ဖြစ်နိုင်မှာလဲ၊ ကျွန်မလည်း မနေ့ကမှ သိခဲ့တာ"

ထိုစကားကို ကြားလိုက်သည်နှင့် ၊ ရဲလန်၏ မျက်နှာသည် ပြုံးရွှင်သွားသည်။ ကျန်ချင်းသည်လည်း ဆရာသခင်က သူမကိုလည်း ကောင်းကောင်း ဖုံးကွယ်ထားခဲ့ကြောင်း ညည်းညူလိုက်သည်။

အန်ရှင်းသည် သူမ အောင်မြင်စွာ လှည့်ဖြားနိုင်ခဲ့သဖြင့် ၊ တိတ်တဆိတ် ဝမ်းသာနေသည်။

"ဆရာ၊ ကျွန်မ ဆရာ့ရဲ့ နည်းလမ်းတွေထဲက ဆယ်ပုံတစ်ပုံကို သင်ယူတတ်မြောက်ခဲ့ပြီ"

သူမသည် မိုက်မဲသူတစ်ယောက် မဟုတ်ပေ။ ရဲလန်သည် သူမကို စမ်းသပ်နေခြင်း ဖြစ်ပြီး၊ သူမအနေဖြင့် ဆရာသခင်၏ဇနီး နှင့် ပဋိပက္ခ မဖြစ်လိုပေ။

ရဲလန်နှင့် ကုအန်တို့သည် အစ်ကိုကြီးနှင့် ဂျူနီယာညီမလေး အဆင့်သာ ရှိသေးသော်လည်း အန်ရှင်း၏ အမြင်တွင် ထိုနှစ်ဦးသည် တာအိုကြင်ဖော်များနှင့် ဘာမှ မခြားနားပေ။

အမျိုးသမီး သုံးဦးသည် အတိတ်အကြောင်းများကို ပြန်လည် သတိရ ပြောဆိုလာကြပြီး ကုအန်သည် မည်မျှ နက်နက်ရှိုင်းရှိုင်း ဖုံးကွယ်ထားခဲ့သည်ကို တင်းတုတ်နေခဲ့ကြသည်။

ကျန်ချင်းသည်လည်း အလွန် သိချင်နေမိသည်။ကုအန်သည် အသက်ငယ်စဉ်ကတည်းက ထိုက်ရွှမ်းဂိုဏ်းသို့ ရောက်ရှိလာပြီး၊ ကျိမိသားစုတွင် မွေးဖွားခဲ့သည်။ သို့ဆိုလျှင် သူသည် မွေးကင်းစ ကလေးငယ်အဖြစ် ဟန်ဆောင်ခဲ့လေသလော။

ထို့နောက် အန်ရှင်းသည် ပြန်လည်မွေးဖွားခြင်းကပ်ဘေး နှင့် ပတ်သတ်၍ ပြောပြခဲ့သည်။ အကြီးအကဲတစ်ဦးထံမှ ကြားသိရသည်မှာ၊ လူတစ်ဦး၏ နယ်ပယ်သည် အဆင့်တစ်ခုသို့ ရောက်ရှိသွားသည့်အခါတွင် သူတို့သည် ပြန်လည်မွေးဖွားခြင်းထဲသို့ ဝင်ရောက်နိုင်ပြီး ၊ သူတို့၏ ယခင်ဘဝမှ စွမ်းအားများကို အချိန်မရွေး အသုံးပြုနိုင်သည်ဟု ဆိုလေသည်။

ဤသည်က အမျိုးသမီး နှစ်ဦးကို ရုတ်တရက် နားလည် သဘောပေါက်သွားစေသည်။ သူမတို့သည် ပြန်လည်မွေးဖွားခြင်းကပ်ဘေးအကြောင်းကို စတင် ဆွေးနွေးခဲ့ကြသည်။

အခြားတစ်ဖက်တွင်။

လုံချင်း သည် သွေးအကျဥ်းထောင်သူတော်စင် ၏ ဘေးသို့ ရောက်လာသည်။ သွင်ပြောင်းပြီးနောက် သွေးအကျဥ်းထောင်သူတော်စင်သည် သီးသန့် အခန်းတွင် မနေထိုင်ဘဲ ကုအန်၏ အဆောက်အအုံအောက်တွင် နေ့တိုင်း စောင့်ကြပ်နေဆဲ ဖြစ်သည်။

ဤအချိန်တွင် သွေးအကျဥ်းထောင်သူတော်စင်သည် နတ်ဘုရားစွမ်းရည်တစ်ခုကို ကျင့်ကြံနေသည်။ သွေးစွမ်းအင် များ သူ၏ လက်ဖဝါးများထဲတွင် စုစည်းနေပြီး ၎င်းသည် သူ၏ ဖြူဖွေးသောဆံပင် ၊ ဦးချိုများနှင့် ပေါင်းစပ်လိုက်သည့်အခါတွင် သူ့ကို ထူးဆန်းပြီး ဆိုးရွားသော ပုံပေါက်စေသည်။

"ညီအစ်ကိုနွား၊ ယှဉ်ပြိုင်တိုက်ခိုက်ချင်လား"

လုံချင်းက ရယ်မောကာ ပြောလိုက်သည်။

ကောင်းကင်မိစ္ဆာများ စတင် ပြိုကွဲသွားသည်နှင့်အမျှ၊ သူ၏ နှလုံးသားထဲမှ ထူးခြားသော ခံစားချက်များ ပျောက်ကွယ်သွားပြီး၊ သူသည် လွတ်လပ်စွာ ပြန်လည် နေထိုင်နိုင်ပြီ ဖြစ်သည်။

သွေးအကျဥ်းထောင်သူတော်စင်သည် မျက်လုံးတစ်ဖက် ဖွင့်လိုက်ပြီး၊ ငြင်းဆန်မည့်ဆဲဆဲ၊ သူသည် ရုတ်တရက် တစ်စုံတစ်ခုကို မြင်တွေ့လိုက်ရသည်။ မထီမဲ့မြင် အပြုံးတစ်ခုက သူ၏ မျက်နှာပေါ်တွင် ပေါ်လာပြီး ပြောလိုက်သည်။

"ငါ့ကို စိန်ခေါ်ချင်တာလား၊ မင်းရဲ့ စီနီယာအစ်ကိုကြီးကို အရင် သွားမစိန်ခေါ်ဘူးလား"

"ငါ့ စီနီယာအစ်ကိုကြီး ဟုတ်လား"

လုံချင်းသည် အံ့အားသင့်သွားပြီး အလိုအလျောက် လှည့်ကြည့်လိုက်သည်။

သူသည် ဆေးတောင်ကြား၏ ဝင်ပေါက်သို့ လျှောက်လှမ်းဝင်ရောက်လာသော ပုံရိပ်တစ်ခုကို တွေ့လိုက်ရသည်။ ၎င်းမှာ ငွေရောင် သံကြိုးချပ်ဝတ်တန်ဆာ ဝတ်ဆင်ထားပြီး ၎င်းအပေါ်မှ အဖြူရောင် ဝတ်ရုံတစ်ထည် ထပ်ဝတ်ထားသော အမျိုးသားတစ်ဦး ဖြစ်သည်။ သူ၏ မျက်နှာသွင်ပြင်မှာ ခန့်ညားပြီး သူ၏ မျက်ခုံးများကြားတွင် မငြင်းဆန်နိုင်သော ထက်မြက်မှုတစ်ခု ရှိနေခဲ့သည်။